ኢትዮ ቴሌኮም በ2018 በጀት ዓመት 215.8 ቢሊየን ብር ገቢ ማግኘቱን ገለጸ።

• የደንበኞች ቁጥር 90.1 ሚሊዮን ደርሷል።
• የቴሌብር ተጠቃሚዎች 60.5 ሚሊዮን ሆነዋል።

ኢትዮ ቴሌኮም የ2018 በጀት ዓመት እና የ«ቀጣይ አድማስ 2028» ስትራቴጂ የመጀመሪያ ዓመት አፈጻጸም ሪፖርቱን አቅርቧል።

ዋና ሥራ አስፈጻሚዋ ፍሬህይወት ታምሩ እንዳሉት፣ በ2028 የደንበኞችን ቁጥር 100 ሚሊዮን እና የቴሌብር ተጠቃሚዎችን 75 ሚሊዮን ለማድረስ እቅድ ተይዟል።

በበጀት ዓመቱ 603 አዳዲስ የሞባይል ጣቢያዎች ወደ ሥራ ገብተው አጠቃላይ ቁጥራቸው 10,613 ደርሷል፤ ይህም 1.5 ሚሊዮን አዳዲስ ተጠቃሚዎችን ተደራሽ ተደርጓል።

264 ተጨማሪ ከተሞች የ4ጂ አገልግሎት ተጠቃሚ ሲሆኑ፣ 4ጂ ሽፋን 82.2 በመቶ ደርሷል። 7 አዳዲስ ከተሞች ደግሞ የ5ጂ አገልግሎት በማግኘታቸው አጠቃላይ 33 ከተሞች ተጠቃሚ ሆነዋል።

የደንበኞች ቁጥር 90.1 ሚሊዮን ሲደርስ፣ 86.9 ሚሊዮን የሞባይል ድምጽ፣ 51.5 ሚሊዮን የሞባይል ብሮድባንድ፣ 1 ሚሊዮን የፊክስድ ብሮድባንድ እና 719 ሺህ የፊክስድ ድምጽ ተጠቃሚዎች ተመዝግበዋል።

የቴሌብር ተጠቃሚዎች 60.5 ሚሊዮን ደርሰው በዓመቱ 4.19 ትሪሊዮን ብር ትራንዛክሽን ተከናውኗል። ባለፉት 5 ዓመታት የተከናወነው የገንዘብ ዝውውር 9.13 ትሪሊዮን ብር ደርሷል፤ 19.72 ሚሊዮን ደንበኞችም የብድር አገልግሎት አግኝተዋል።

ተቋሙ በበጀት ዓመቱ 215.8 ቢሊዮን ብር ገቢ በማግኘት የዕቅዱን 99.7 በመቶ እንዳሳካ ተገልጿል። ይህም ካለፈው ዓመት 162 ቢሊዮን ብር ገቢ ጋር ሲነጻጸር ከፍተኛ ጭማሪ ነው።

188.4 ሚሊዮን ዶላር የውጭ ምንዛሬ ገቢም ተገኝቷል።

የዳታና ኢንተርኔት ገቢ 31.1 በመቶ የጠቅላላ ገቢውን በመሸፈን ለመጀመሪያ ጊዜ ከድምጽ አገልግሎት (23.5%) በላይ ገቢ አስገኝቷል። የEBITDA መጠን 113.1 ቢሊዮን ብር (52.4%) ሲሆን፣ ያልተጣራ ትርፍ 92.9 ቢሊዮን ብር መድረሱ ተገልጿል።

ፋይናንሻል ኦዲቱ ከተጠናቀቀ በኋላ የተጣራ ትርፍ መጠን ለባለድርሻ አካላትና ባለአክሲዮኖች ይፋ እንደሚደረግ እና ከዚያም ወደ የትርፍ ድርሻ (Dividend) ክፍፍል እንደሚገባ ፍሬህይወት ታምሩ ገልጸዋል።

ቲክቫህ ኢትዮጵያ
አዲስ አበባ
ሃምሌ 16 ቀን 2018 ዓ/ም

@tikvahethiopia

Me whenever I see the sky ✨️ 🤳
#HiveCaptures