السلام عليكم ورحمة وبركاته:
استاذ سعيد بالبدايه بارك الله بيك او بجهودك الطيبه او بارك بعمرك واعطاك الصحه لاكمال مسيرتك المكلله بالنجاحات هذا الشي دليل على فهمك او وعيك او احاطتك بالوزاره وخبرتك الكبيره قبل لحظات قرأت الرساله الي نزلته بالنسبه ل ملازم حظرتك اني لو اظل اشكر بيك للصبح ماراح استوفيك حق الشكر لانو صدك انته مدرس عظيم والعظمه لله استاذ شگد شفت ملازم او شگد جربت ملازم بس مثل ملزمتك ماكو والشاهد الله انو هذا الكلام مو مجامله وانما اني من بداية سنه ادرس على ملزمة الكلاميات مالتك او اصلن مافاتح كتاب ولا ارجع على كتاب لانو عندي ثقه بملزمتك او عندي ثقه انو هيه وافيه لانو انته انسان شريف او هدفك تساعد الطلاب او متهمك الماده بگد ميهمك سعادة او مستقبل طلابك فلهذا بالنسبه للي يسقطون بالأستاذ سعيد خلي عدكم كرامه شويه واحترموا الرجال وانتو مامجبورين تقرون عليه ولاهو جابركم العراق صار بي مدرسين لايعدون ولا يحصون لاكن مع احترامي اصحاب الخبره قليلين جدا لهذا من تريد تسئل شخص اسئل واحد مجرب الاستاذ مو تسئل واحد ماشايف الاتساذ طبعاً راح يكلك مو زين او يمكن ينصحك بغير مدرس انته كطالب حر بأختيار المدرس لكن مالك حق تسقط بالبقيه اني شفت رساله وانغثيت من كلام لانو والله العظيم جيبوا اي ملزمة كلاميات او قارنوهه زيه ملزمة استاذ سعيد راح تلگون ملزمة استاذ سعيد وافيه والبقيه بيه نقص إلا ماشاء ربي وبالنهايه تحياتي الك استاذ ربي يوفقك ويجازيك على تعبك.
(استاذ اتمنه تشاركه بقناتك على تلكرام خلي تصل الرساله للبقيه)

عيني ستاذ قصدك يا ملزمه بالمنشور اني من محافظه كربلاء ومادري عليمن دا تحجي بس اريد اكولك رحمالله والديك ع كل ملزمه لان كل فكره اجت بالوزاري وكل مدرس إذا راد يسوي ملزمه ياخذ منك والله العظيم

السلام عليكم استاذ
بخصوص الملزمه والله العظيم كلما اقره بيها اكول اني صدك محظوظه عندي هيج ملزمه وعرفتها بالوقت المتاخر من خلال بوت نيوتن كلمه شكرا قليله بحقك والقران يعني جنت ابجي من الفيزيا وصلت ٣ ملازم وكلهم نقص ف هسه من سمعت تكول يسقطون بلمزمه مكدرت اسكت وارجع واكلك شكرا من كل كلبي ربي يوفقك 🥹🤲

والله مو كدامك استاذ تحس من تقره بيها مأمن

مساك الله بالخير استاذنا الغالي ، شلونك عساك طيب
ماهان عليّه كطالب معتمد على جوهر الكتاب في السؤال والجواب أنهُ اشوف هالإنتقادات من قبل الطلبة المغلوب على عقولهم ، وأنت ماقصرت بالإجابة على ترّهاتهم لكن احب اضيف شيء آخر ، عندنا بالقضاء احد الأساتذة المعروفين على مستوى القضاء ملزمته مال الكلاميات كوبي بيست منك فقط مغير التصميم وصارف عليه مايقارب المليونين وأحب اگول للطلاب راجعوا نسخ الأسئلة الوزارية إذا لگيتوا سؤال ماموجود بهالساعة عود إعتبوا وانتقدوا أما زيادة الأسئلة فهذه دليل على أنهُ الأستاذ اختصاص بالمادة ومو فضائي يخدم جيبه فقط لا وإنما استاذ سعيد إله مواقفه ويه الطلاب بالوقت الي الأساتذة ذمم وحلفان على اي شخص يستنسخ ملازمهم أستاذ سعيد منزل كل جهده مجانًا فما لكم كيف تحكمون؟ ‏<تم تعديل هذه الرسالة>

استاذ خواتي ٣ ع ملزمتك قروا وكلهم ١٠٠ بالفيزيا وانه هسه اقرا عليها يوم الالي ان شاء الله احسن وأكمل ملزمة وارتب ملزمة وبيها وزاريات ما يحتاج اي مصدر ثاني حتى 🩷الله يوفقك

السلام عليكم أستاذ
بالنسبه للملزمه يشهد الله انو كامله مكمله مابيها اي نقص ونصاً من الكتاب
واني شكد شفت وقريت ملازم بس مثلها ملكيت والله
وحتى ملزمه الوزاريات كذلك

اما بالنسبه لهاي الإشاعات ف لانك مدرس ناجح ومتفوق ويتمنون يصيرون مثلك بس مدا يكدرون
ف ديسوون هالشي المريض مثلهم

الصراحه ماجه من گلبي اشوف هيج شي واسكت

السلام عليكُم استاذ ، ماراح احچي حتىٰ اجامل..
لكن ملزمتك كاملة والكمال لله ، واللي يريد يجيب ميه ويتعب
ف لازم يدرس الكتاب كُلّه على شكل سؤال وجواب بالنهاية
هل يستوي الذين يعلمون والذين لايعلمون
لما نطلُب مِن الله لازم واحنا مساعدين انفسنا
ووالله استاذي الخاص ، مابطل مِن ذكرك بالخير طول فترة دراستنا
وهو يگول بإن خبرتك عظيمة ، والمدرس الجيد
والجدير ، يعترف بإنك كامل والحمدلله.

السلام عليكم ،استاذ مدرستنا نصحتنا نقرا عليك وكل الاثرائيات الاساتذة ياخذوها مِنْك واكثر ملزمة معطية استحقاق لمادة الفيزياء هيَّ ملزمتك انتهى النقاش.

السلام عليكم استاذ ، طبعا ملزمتك اني اعتبرها افضل وارقى ملزمة فيزياء بحيث اني ما احتاج اشتري ملزمة وزاريات لان كلشي متوفر بيها ، وشكرا هواي استاذ على هاي الهدية الي قدمتها لطلاب العراق 🩵

انت شيخ الفيزياء قسما بالله انت ماتعرفني اصلا ولا انا ملتقي بحضرتك ولا عندي مصلحة انا طالب سادس وتركت سنة كاملة بسبب المدرسين الفاشلين والتجارب الفاشلة والملازم التجارية وعندي دلال و اثباتات اكو بعض المدرسين الي خابص اليوتيوب ملزمته الواجبات كلها من ملزمتك الاثرائية وعندي دليل يعني اذا اسلمك الادلة تكدر تفضحه بس ما عندي مصلحة من هل شي المهم انا ما ضلت ملزمة او مدرس ما جربتها بالفيزياء واكدر اكلك بالاخير (الاستاذ سعيد شيخ الفيزياء) لاتهتم لبعض الاراء السلبية عقول الناس في تفاوت والعمر رقم يعني اذا صار طالب سادس لازم يفتهم اكو ناس اعمارهم ب ٤٠ بس تجاربه بالحياة مال شاب بعمر ١٨ اتمنالك الصحة والتوفيق استاذ

السلام عليكم استاذنا العزيز
طبعاً شفت حملة انتقادات على ملزمتك
فأحب أگول انّه اني احد طلابك واعتمدت على ملزمتك لا غير لسنتين متتاليات
لان عدت بالسادس سنتين
والحمد لله، جبت بيها ١٠٠ وبكل جداره خلال هالسنتين، وحاليا طالب طب والحمد لله ، وربي يحفظك ويطول بعمرك، عملاق الفيزياء الأول بالعراق وبلا منافس.

السلام عليكم استاذ
استاذ تدري اني ملزمة وزاريات مامشتريه‍ معتمده‍ على ملزمتك وبس اكثر مدرس مرتب ملزمته‍ وتعبان بيهه انتَ والله لا داخله عندك ولا شايفتك استاذ لاكن كثير طلاب نصحوني بيهه اشتريتهه‍ وقارنتهه‍ بلملازم لعندي انصدمت قلت حقهم طلاب استاذ سعيد محي تومان ياخذون 100
طبعاً اني من النو؏ الألامي يعني بلصعب اقتنع بلشيء واوافق عليه‍ 😂🤍
لاكن خالتي طبيبة اسنان ونصحتني هيه‍ وصديقاتهه‍ انو اقره‍ فيزياء واعتمد فقط عليك،
دخلت هيه‍ وصديقاتهه‍ عندك دوره‍ وماشاء الله كلهن كادر طبي (حكومي) 🤍
وبلفيزياء 100 💕🩷

اكتفي بهاي الرسائل الي كلها محافظات واحب اشكر كلامهم الطيب ورسائلهم الي تثلج الصدر ويارب الموفقية والنجاح والمعدلات العالية الي تسر القلوب وتقر العيون وتعمدت ما انشر اي رسالة لاي طالب او طالبة من طلابي حتى ما ينفهم النشر بغير قصد والله من وراء القصد ، ان شاء الله اليوم تنزل المراجعة المركزة pdf للي يريدها يحملها من القناة وياخذها الى اي مكتب استنساخ ويسحبها مهديا ثوابها الى والدتي العزيزة رحمها الله واسكنها فسيح جناته.

#المراجعة_المركزة(المختصر المفيد) في الفيزياء للعام الدراسي 2023-2024
◾️تتضمن هذه المراجعة اهم الكلاميات مدعومة بالوزاريات من 2013 - 2023 وبكافة الادوار.
▫️لا تتضمن المراجعة اي جانب رياضي ولكن نوهت في المقدمة عن الالية التي يجب اعتمادها في حفظ القوانين ومراجعة المسائل الرياضية.
◾️ان هذه المراجعة ليست بديلا عن الكتاب وانما هي مكملة له ولا تعتبر مرشحات لذا علينا الاعتماد عليها ليلة الامتحان فقط.
▫️لمن يرى لا طاقة له في حفظ الكتاب من الجلاد الى الجلاد يستطيع الاعتماد عليها او على وزارياتها والحصول على الدرجة التي ترضيه.
◾️اخول الجميع في تحميلها وسحبها من اي مكتب استنساخ قريب فهي من غير حقوق.

ملف اسئلة امتحانات شهرية للفصل الثاني - الحث الكهرومغناطيسي
www.youtube.com/c/saeedmuhi
instagram.com/saeedmuhi
facebook.com/saeedmuhi4
t.me/saeedmuhi2
t.me/saeedmuhi
tiktok.com/@saeedmuhi

#الماسية_الوزارية2025
📕بعد رفع الجزء الاول من الماسية للحلول الوزارية والذي يتضمن الاسئلة الكلامية ، نرفع لكم الجزء الثاني والذي يتضمن حلول المسائل الوزارية من 2013 -2023 وبكافة الادوار مع التمهيدي. والتوفيق للجميع.
…………………………..
#تابعونا 👇👇👇👇👇👇👇
www.youtube.com/c/saeedmuhi
instagram.com/saeedmuhi
facebook.com/saeedmuhi4
t.me/saeedmuhi2
t.me/saeedmuhi
tiktok.com/@saeedmuhi

#الشامل_في_الفيزياء
انتظروا النسخة الاحدث من الشامل في الفيزياء 2025 خلال الايام القريبة المقبلة مع الامنيات للجميع بالتوفيق والسداد
………………………………………………
youtube.com/c/saeedmuhi
instagram.com/saeedmuhi
facebook.com/saeedmuhi4
t.me/saeedmuhi2
t.me/saeedmuhi
tiktok.com/@saeedmuhi