Jono, bitigingki, bo‘ldi marqum manga,
Mehnat bila g‘amni qildi ma’dum manga.
Ko‘rgach ani garchi shod behad bo‘ldum,
Mazmuni, vale, bo‘lmadi ma’lum manga.

Zahiriddin Muhammad Bobur

@ruboiyot

Taqdir lavhasida hukmim bo‘lg‘onda,
Maylimcha yozardim uni shu onda.
Qayg‘uni dunyodan yo‘qotib butkul,
Shodlikdan bo‘lardi boshim osmonda.

Umar Xayyom

@ruboiyot

Soqiy, qadahi jur'ati joning qayda?
Ul oinai nuri jahoning qayda?
Sun mengaki, ko‘nglimni musaffo etayin,
Taqvoni shikast aylagoning qayda?

Abu Ali ibn Sino

@ruboiyot

Yod etmasa yorni mard dilin shod etmas,
Yor, der yuragi o‘zgaga faryod etmas.
Ishq yo‘lida oshiq degani andoqdir,
Do‘zax neyu jannat nimadir, yod etmas...

Hakim Sanoiy

@ruboiyot

Soqiy menga tutsa ul mayi gulgunni,
Gulgun etayin firoqidin Jayhunni.
yer ustiga ko‘z yoshim ila boda berib,
Ham mast etayin yer ostinda Qorunni.

Adib Sobir Termiziy

@ruboiyot

Jonim berayin, ol uni, jondin kechma.
Dildan kechayin, ol u jahondin kechma.
Sen o‘qsanu men esam kamonmen hanuz,
Ey o‘q, sabr ayla, kamondin kechma...

Jaloliddin Rumiy

@ruboiyot

Jonona, shu lablaring menga taskindir,
Bir bo‘sa tilarmen, oshig‘ing — miskindir.
Dedingki, bu gapni qo‘y, labimda tuz ko‘p,
Hay, sho‘r demagil, sho‘r deganing - shirindir...

Amir Xusrav Dehlaviy

@ruboiyot

Ne ishratu aysh uchun mayi nob manga,
Ne toat uchun go‘shai mehrob manga,
Ne fisq qilurg‘a bordur asbob manga,
Ne zohid o‘lurg‘a toqatu tob manga.

Zahiriddin Muhammad Bobur

@ruboiyot

Ey charx, nokaslarni qilding farovon -
Hammomu uy berding, yer, suv, tegirmon,
To`g`ri kishi garov bir burda nonga,
Jirtakka arzimas bundayin davron.

Umar Xayyom

@ruboiyot

Ey ongsiz, bilmaysan, bu olam hechdir,
Negizing shamoldir, bir tutam, hechdir.
Ikki yo‘qlik aro qolmish borliging,
Atrofing yo‘qligu o‘rta ham hechdir.

Umar Xayyom — @ruboiyot

Afsus, yorug‘ umrim - qaro tun bo‘ldi,
Ajal dastidan ko‘p jigar xun bo‘ldi.
U dunyodan kelib, aytmadi hech kim:
Ketganlar boshida qanday kun bo‘ldi.

Umar Xayyom — @ruboiyot