@riwait_221
📖 روايـة أنتي حمول الوقت وأنا سندها .
(البارت 39 )
.
هيا : بخير يا ساره لا تخافين علي
ضحكت ساره بمزح: فعلاً ماعليتس خوف
ابتسمت هيا بضيق وصدت حزينه وتنهدت وهي تقول بنفسها( ااه يا هيا انهد حيلتس وانتي بأول المشوار )
_______.
وفي بيت ابو مقبل
في المطبخ كانت ام مقبل ودق الباب بقوه
وطلع مقبل بأنزعاج وفتح:يالله صباح خير
تفشلت عزوف وصدت: سلام
مقبل بنفس خايسه: امي بالمطبخ
ناظرته عزوف بطرف عين وهي تقول بنفسها ( ياثقل الدم بس ، السلام لله يا ابليس)
دخلت عند ام مقبل : صبحتس بالخير ياخالتي
ام مقبل : هلا هلا يا عزوف صبحتي بالنور
عزوف : وش اخبارتس اليوم
ام مقبل : بخير بخير بس ادعي معي ان هيا تكون بخير
عزوف وهي تبوس كتف ام مقبل : انتي بخير وحنا بخير وهيا أم الخير لابد تكون بخييير انتي خلي ثقتس بالله كبيره
ام مقبل : يارب ياكريم ماعليك قوي يارب اكفها شر من فيه شر
عزوف : امييين ..
شمرت عن يدينها وهي تقول : عطيني بخلص الشغل وانتي اجلسي لين تزهب القهوه
ام مقبل : والله يا عزوف مدري كيف ارد جميلتس
عزوف : افا يا خالتي افا انا بنتس ومالي عليتس جمايل
ام مقبل: اي والله بنتي واغلى والله
ابتسمت عزوف وهي تكمل شغلها
_______.
وفي دكان ابو مقبل
دخل مقبل دخوله اللي تعودوا عليه من شهر صامت وكله شر اعتدل قدام ابوه : يبه ؟
ابو مقبل : يالله صباح خير علامك يا مقبل
مقبل : برسل مرسول لهيا
صفق ابو مقبل الدفتر والتفت له : انت منين تفهم ؟ انت تبي الموت لاختك اقولك مايصير ننشد عنها لين تجي هي
مقبل: ابي اتطمن عليها
ابو مقبل: اقولك بخيير ووصيت عليها الناس
مقبل: محدٍ مستوصي فيها خير وهي اخت غريمهم
ابو مقبل بغضب: هذا انت قلتها غريييم يعني دم وثار مالنا كلام هي في وجهه ابو سند وقبيلته وبتجيب لهم ضناهم وتجي وتخليهم خلاص انتهى الموضوع
مقبل : ان كان ماجابت ولدهم
ابو مقبل : حيل الله اقوى
صد وتركه وهو يحذره ويكرر: ابعد عن هيا يا مقبل لا تزيد الطين بله لا تشب النار على هيا زود
وقف مقبل وطلع اتجهه لقهوه سعد ووقف قدام سعد : بتخاويني ؟
سعد : للجنه ان شاء الله ! خير اللهم ياكافي علامك شايل شيطاينك من صباح الله
مقبل : ما تفارقني شياطيني وهيا عند ابليس
تنهد سعد تنهيده تهز ضلوعه : يا مقبل هيا تحت رحمة الله قدام رحمتهم وهيا في وجهه القبيله لو يمسها ضر وبتوفي دينها وترجع باذن الله لا تصير انت والزمن عليها هي راحت عشانك تكمل عليها العذاب لو رحت لهم بيطلبون راسك وتصير هيا ذليله واخوها مقتول لكن خلها تدفع ثارها بعز وتجي واخوها ينتظرها ولا تدفع ثار وتبكي فراق اخوها
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 40 )
.
لو رحت لهم بيطلبون راسك وتصير هيا ذليله واخوها مقتول لكن خلها تدفع ثارها بعز وتجي واخوها ينتظرها ولا تدفع ثار وتبكي فراق اخوها
مقبل : كلكم تقولون هالكلام ومحد يحس بناري والله ان الموت ارحم من دموع هيا
سعد : مافيه احد يحس فيك اكثر مني لكن حيل الله اقوى
سكت مقبل وقعد وصد سعد اللي اوجعه كلام مقبل ووده يقول تعال ناخذ هيا من يديهم بس خوفه على هيا يمنعه
_______.
في بيت ابو سند
انتهى الفطور اللي اجتمعت عليه كل العايله ما عدا هيا اللي تاكل بغرفتها لحالها وهي ما تحس بطعم الاكل ولا طعم الحياه تمنى بس متى ينتهي هالثار تركت اللي بيدها وجمعت رجولها على صدرها وتركت دموعها وبكت وهي تحسس جرحها فزت على الباب اللي دخل منه سند وهو يناظرها ووقف شوي وقال : وين ثيابي اللي امس قلت نظفيها
ناظرته هيا بهدوء لفتره وتنهدت : ثيابك في دولابك ماهيب عندي وانا ماعلي خلاف لا تحسبون انكم انتصرتوا يوم فتحتوا راسي والله ان كل قطره من دمي فدا لمقبل
كان سند جاي يتطمن عليها بعد الضربه بس شاف قوه ممزوجه بضعف ودموع قبل يشفق عليها تكهرب مسمعه من اسم مقبل
وقرب وهو يسحبها بغضب لين وقفت وهزها بصراخ : لا تمارين بدم اخوتس قدامي والله والله لو ما ابوتس جاء طالب الغره وعرض وجه وجاهه قدام الناس ان كان مقبل في إعداد الموتى ولا تحسبين اني باخذ ثاري من مره ؟ ثاري مع مقبل ما انتهى
دفها بغضب وطلع وتركها استوعبت هيا وش قالت وانهارت تبكي خافت انها بكلامها جنت على مقبل ركضت وراه ومسكته قبل يطلع
وقالت: تكفى ياسند
قشعر راس سند من نخوتها بأسمه وعجز يسحب يده منها ولف لها بصمت وقالت هيا : ثاركم عندي في ولدكم اللي ببطني اترك مقبل في حاله
طارت عيون سند بصدمه: وشهو ؟
هيا استوعبت وابعدت يدها عن يده وقالت بحزن ممزوج بفرح ان فرجها قرب : انا يمكن اني حامل ويارب اكون حامل ويجي مجاهد
صدمات سند ماوقفت من اسمه اللي بصوتها اللي اول مره تنطقه ليدها لخبرها الصاعق لاسم اخوه اللي هد حيله
سحب يده بشويش وهو يقول : مابشرتيني بخير ياهيا
وقفت هيا تناظر مقفاه يوم طلع ومافهمت وش مغزى كلامه مثله المفروض يفرح ان بيجي الولد اللي يعوض فقد اخوه
بس بالنسبه لسند مافرح ولا استبشر رغم انه اول مره يصير ابو بس كان يسال نفسه ( ابو ؟ لمن ؟ لولد الغره؟ ولا عوض اخوي ؟ ولا خسارة شجاعتي وثاري من مره؟ ولا لولد خاله ذباح اخوي ؟ )
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 41 )
.
ولا خسارة شجاعتي وثاري من مره؟ ولا لولد خاله ذباح اخوي ؟ )
مشى وطلع مايدري وين يروح لكن راح لفزاع ناداه وطلع فزاع مستغرب وقفت سند : سند وش بلاك
سند : اللي يبونه يصير صار
فزاع سكت وهو يفكر وش يقصد بس ارتخت كتوفه بخيبه : حامل؟
سند: حامل ب همي وضيقي وقلة حيلتي
فزاع: اذكر الله وانا اخوك هذا هو الفرج قرب بكره تجيب مجاهد وتنتهي هالمشكله
ضحك سند بحزن ضحك بخيبه وانكسار: المشكله ؟
تدري وش المشكله ؟ المشكله ان خال ولدي ذباح اخوي
ولدددددي اللي كنت اتمنى ولد لكن مابي ولدي ذليل ولا ابي اكون ذليل قبله
فزاع: ذليل؟ وشلون ذليل ولدك بيشيل اسم عمه بيكون هامه من هامات القبيله هذا عوض عمه
سند : فزاع لا تشب النار بقلبي زود تكفى ولدي اللي تقوله بيولد مكروه من كل الجهات لا اهلي بيقبلونه ولا خواله بيقبلونه وامه؟ غررره يعني بعد فطامه بتروح لاهلها اسمه بيتعلق بذنب ماله في حيله بيرتبط اسمه بأبشع ايامنا
ابسط حقوقه امه وابوه كل واحد فيي مكان وكل واحد كاره الثاني
كان المفروض اركض ابشر امي وابوي بحفيدهم الاول ابشرهم ان بكرهم بيصير ابو ؟ لكن مالي وجه حتى افرح به
هذا كله ما ملى عينك يا فزاع
فزاع بضيق : كل كلامك صح لكن فااات اوانه ماعاد يفيد هذا الولد ببطن امه وادع انه يكون ولد مايكون بنت وحزتها بتثقل مصيبتك يا سند
للمره الالف ينصدم سند ماكان حاط في باله احتمال انها تكون بنت حط يده على راسه وترك نفسه للارض تستقبله قعد مايدري وين يروح بنفسه وحاله
___.
في بيت ابو مقبل
طلعت عزوف وهي تمسح كفوفها من المويه : انا خلصت ياخاله تامريني على شي قبل اروح
ام مقبل: اقعدي وانا امتس تغدوا معنا
عزوف : لا ياخالتي صعبه والله لازم ارجع البيت قبل يجي سعد واسوي له لقمه ياكلها
ام مقبل: العذر والسموحه منتس يابنيتي اشغلتس عن اخوتس وبيتس
عزوف: افا ياخاله مابينا هالحكي بيتنا واحد
ام مقبل : مادامه واحد اقعدي ومقبل يجيب سعد وتغدون عندنا
تكهربت عزوف مجرد ما سمعت اسم مقبل اللي ماتحب طاريه : لا لا ما يحتاج كثر الله خيركم
اخذت اغراضها بسرعه وطلعت وهي ماتجي هالبيت الا عشان خاطر هيا وامها وابوها
سكرت الباب وهي تعدل طرحتها بس ما مداها تاخذ نفس الا شافت مقبل جاي ومعه ابوه وسعد اخوها تحركت بسرعه ووقفها صوت ابو مقبل : عزوف يا بنتي
لفت بهدوء: سم يا عمي
ابو مقبل : تعالي تعالي وين رايحه تغدوا معنا
عزوف بسرعه: لا لا ياعمي غدانا زاهب
ابو مقبل : ما امداتس يابنتي تلحقين للغداء انتي عندنا من الصبح
قالت عزوف : انا اجي اعاون خالتي وارجع لبيتنا وبيمديني بعد اسوي غدا عليكم بالعافيه
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 42 )
.
.
ابو مقبل : ما امداتس يابنتي تلحقين للغداء انتي عندنا من الصبح
قالت عزوف : انا اجي اعاون خالتي وارجع لبيتنا وبيمديني بعد اسوي غدا عليكم بالعافيه
سعد: وهي صادقه ياعمي يمدي كثر الله خيركم يلا فمان الله
اتجهه لعزوف وهو يمشي جنبها: وش بلاتس عجله
عزوف : ولا شي ابي ارجع اسوي الغداء
سعد : مضايقتس شي؟
عزوف : لا وش بيضايقني
سعد: مدري قلبي يحس فيتس ترا
عزوف : الله لا يخليني منك ومن قلبك
سعد: ولا منتس
كملوا طريقهم وهم كلهم يفكرون بهياء
_______.
وفي بيت ابو سند
اجتمعوا من جديد على الغداء وينتظرون سند اللي كان وده يضيع طريق البيت ولا يرجع ولا يقولهم ان هيا حامل
دخل وهو يسحب نفسه ويتمنى ما يصادف احد بذات هيا
بس تجمدت اول ماقالت ام شايع: سند ابوي تعال ابيك
التفت لها سند بقلة حيله وقرب وقعد وهي يقعد قدامها ومسك يدها بيده : لبيه امريني
ام شايع:وشلونك يمه
سند : الله يا جده من زمان ما سمعت احد يقولي شلونك
ام شايع: افا يمه افا محد ناسيك نساك موتك
سند :ادري يمه ادري
ام شايع: وش فيك وانا جدتك وراك ضايق ؟
سند: وش اللي مايخليني اضيق كل شي حولي يضيق الصدر ويكسره
ام شايع: لا تقول كذا ياوليدي كلامك يغضب الله
سند : استغفر الله العلي العظيم ، امريني ياجده وش بغيتي
ام شايع:ابيك تشوف هيا ماهي عاجبتني من الصبح اخاف هالجرح مأذيها
تنهدت سند : ابشري ابشري
قبل يقوم جت هيا وهي تفرش سفرة الغداء ونادتها ام شايع: هيا تعالي يا بنتي
غمضت هيا بكل قوتها والتفت : سمي
ام شايع: يوجعتس شي ما انتي عاجبتني
هيا: مافيني الا العافيه
ام شايع: ان شاء لله مافيتس الا العافيه دايماً
هيا: وياتس
راحت وسند بس يطالعها مايدري وش يسوي وكيف يتصرف
وجت ام سند ودفت هيا عن الباب : عمى يعميك ماتشوفين
هيا تماسكت قبل تطيح واخذت نفس وهي تحاول تطلع
ام شايع: ام سند وش بلاتس؟
ام سند: ما بلاني شي الا هالمغضوبه اللي تبي تنكد عيشتي
ام شايع: خافي الله يا ام سند خافيه
جلست وسكتوا كلهم وهيا للحين تجيب الغداء وهي تجاهد نفسها ماتدوخ ولا يختل توازنها خصوصاً انها ما فطرت وقبل توصل السفره ماتدري كيف انفلت الصحن منها وطاح وعلى صوت ام سند اختفت الدوخه من راسها وجلست تبي تدارك وضع الصحن بس ما قدرت
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 43 )
.
وطاح وعلى صوت ام سند اختفت الدوخه من راسها وجلست تبي تدارك وضع الصحن بس ما قدرت وفي اللحظه اللي كان الرز يعبي يدين هيا وهي تحاول تجمعه شهقت من الم اليد اللي سحبت شعرها من جذوره ولا طولت عشان تستوعب مين سوا كذا وليه لانها تدري انها ام سند اللي بدا صوتها يلعلع: ياعل يدتس الشل يا شينه
اختلطت الاصوات حول ام سند يبون يهدون الوضع واعتلى صوت ام شايع : اتركي البنت يا ام سند
ماطاعت ام سند ومصره تضرب هيا وتهاوشها بس هنا حاول سند يدخل بدون ماتكبر السالفه: يمه اتركيها انا احاسبها
ام سند : انت ماتوصخ يدينك فيها
ام شايع : ام سند تسمعين حكيي ولا ماتسمعين
دفتها ام سند وطاحت هيا وقبل تكمل عليها وترفسها وقف سند بينها وبينه : يايممه خلاص خلاص
ام سند بغضب: توقف بوجه امك عشانها ياسند
سند : ما وقف بوجهتس يا يمه بس كفايه اكيد انها ماتقصد
ام سند بصراخ:الا تقصد تبيتنا جواعا
حاولت تفلت عليها وهي مقهوره ليه سند يمنعها منها وهنا انفجر سند: يااااايمه هيا حامل حااااامل
عن الصمت على كل المكان ولا نفس ولا حرف ولا حتى رمشه كان الخبر صاعقه بدل مايكون الخبر مفرح كان تعيس ممزوج بفرج لكل الاطراف خبر مايعرفون كيف يصنفونه وابسط حقوق الخبر المباركه ولا احد قادر يبارك
انسحبت ام سند وهي تبكي وكلٍ نزل راسه ووقفت هيا اللي تجاهد الدوخه مع جهادهم وطلعت من الغرفه تركض لغرفتها وهي تبكي بصمت مالها حق حتى تبكي بصوت مسموع
جلس سند في مكانه بهدوء وماتحرك وبعد صمت طويل قالت ام شايع: الله يتمم بخير ويرزقك الذريه الصالحه ياولدي
ناظرها سند بهدوء مايدري كيف بيرد او وش الرد المناسب لكن قال: الله كرييم ويلطف بالحال
ام شايع: قوم ياسند تطمن عليها هي ترا مهما كان هي امانة برقبتك والحين ولدك امانة في رقبتك انت زود
قام سند اتجه لغرفه هيا وفتح الباب وبسرعه البرق مسحت هيا دموعها ووقفت : سم ، الحين اجدد الغداء
دخل سند وقفل الباب وقعد : اقعدي
هيا: بجدد الغداء قبل يوصل عمي
سند بغضب : اقعدي اقعدي اقعدي اتركي هالبيت يهدا ولو يوم واحد اسمحي للبيت يرتاح
هيا سكتت وقعدت بخوف في مكانه من صراخه والتفت سند لها بعد صمت وهو يادوب يسحب كلامه : من هالحظه تقعدين بأرضك لين يتم حملك وتجيبين وينتهي هالموال سمعتي ؟
هيا هزت راسها بهدوء :طيب
سند : اذا تبين شي ساره تساعدك وامي لا تقربين صوبها
هيا : طيب
سكت سند ولا عاد تكلم بس انه ماطلع من الغرفه جلس باقي فيها وبعد شوي دق الباب بشويش وكان ساره
دخلت بهدوء وهي تنزل صينية اكل قدام هيا : اكلي ماكلتي من الصبح
.
.
ابي حماسكم وين🥹
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 44 )
.
دخلت بهدوء وهي تنزل صينية اكل قدام هيا : اكلي ماكلتي من الصبح
تركتها بهدوء وطلعت وهيا مامدت يدها لكن فزعت على صوت سند : اكلي لازم يكون هالحمل بصحه كويسه
طالعته هيا بهدوء وشافت ملامحه اللي ابد ماهي بخير ولا تستبشر الخير
بدت تاكل غصب عشان ماتدوخ وعشان يعدي الحمل على خير ويفرج همها
ناظرها سند وهو يفكر في مليون طاري واكثر هواجيسه وده ياخذها لاهلها وينهي هالثار بموت مقبل
في عز اندماجه وهو يهوجس بها وهو يناظرها وامتزجت دموع هيا بأكلها وهي تمنى لو تقدر تفرح به ولو تقدر تبشر اهلها واكثر امنيه انها ماتبكي قدام سند ولا تنهار عنده لكنه اصر انه يكبت انفاسها لين ماعاد لها حيله الا البكي
تعبت مشاعرها من الظروف ومشاعر الحمل زادت الطين بله
وقفت كل الدنيا عند سند ياكرهه لدموع وياكرهه لضعف وكان فرحان ان هيا قويه بس انهارت كل الاقنعه اليوم
وقف مايدري وش يسوي بس انه وقف
في عز الجفا عجز يواسيها كل اللي اعرفه ان هيا مالها ذنب في ذا كله مايدري كيف بيكمل وهو ضد هذا كله
وقف قدامها : يوجعتس شي
ما ردت هيا
ورجع يقول : يوجعتس شي علميني
هيا ناظرته وهي تمسح دموعها: ماينسال هالسؤال للغره عند عدوها
اخذ سند نفس وقال: انا ماني عدوتس ياهيا ولا طلبت اسرة الذنب ماهو ذنبي ولا ذنبتس لكن اشهدي علي اني بقول كلمه يقولها العدو
( انتي بوجهي ياهيا لين الله يحل هالكربه )
طلع وتركها وكان هذا اصدق شي قاله سند من يوم صار اللي صار وهذا الشي الوحيد اللي قاله سند بقناعه وبدون اجبار
ماصدقت هيا اللي سمعته وحاولت تعيده في بالها لكن ماصدقت ولا بتصدق ولا عندها مجال تصدق هالكلام
ابعدت الكل وضمت نفسها تبكي وخايفه من كلامه اكثر من انها مطمئنه به
_______.
في بيت ابو فزاع
جلست خزاري بعد ما حضرت الغداء وهي تنهدت : والله لجدتي فقده
فزاع: اي والله بيتنا ماله طعم
ابو فزاع: ان شاء الله نروح ل بيت اخوي الليله ونتعشى عندهم ونجيبها معنا ونجي
فزاع: عندك خبر يبه ليه ماتبي تجي؟
ابو فزاع بهدوء: تقول بتقعد في بيت ابو سند لين تنحل المشكله اللي هم فيها
فزاع: مشكلتهم حلها ماهو في يوم ولا يومين المشكله طويله ماهوب معقول جدتي بتجلس عندهم كل هالفتره
ابو فزاع: اقل القليل ان هالغره تحمل وبعدها تجيب هالولد وينتهي الموضوع
صدت خزاري من طاري الغره وسسند اللي يخنقها ويضيق صدرها وهي تقول بنفسها( الله يعجل بروحة هالغره وترجع الحياه لنا بدال طاري الموت والثار)
فزاع بهدوء : قالي سند اليوم انها حامل
ا.
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 45 )
.
.
ا وهي تقول بنفسها( الله يعجل بروحة هالغره وترجع الحياه لنا بدال طاري الموت والثار)
فزاع بهدوء : قالي سند اليوم انها حامل
التفت ابو فزاع بلهفه: الله يتمم ويطلع ولد
فزاع: يارب
احتاست خزاري وهي اللي ماتدري ترحم هيا ولا سند لكن رحمتها لهيا اكبر كل هالضغوط عليها تهد الحيل
ماصدقت يقوم ابوها عشان تقوم بعد وهي مالها نفس شي
_______.
المغرب في بيت ابو مقبل
اجتمعوا على قهوة المغرب وهم ساكتين وكل واحد يفكر
لين كسر الصمت ابو مقبل اللي قال : اقول يامقبل
التفت له مقبل: سم يبه
ابو مقبل :وش رايك اخطب لك
طارت عيون مقبل وام مقبل : وشو
ابو مقبل: وش بلاكم
ام مقبل: وش اللي وش بلانا لك خاطر تخطب وتفرح وهيا اسيره
مقبل: وش هالحكي يبه كيف تبيني اعرس واختي الوحيده طايحه بسبب ذنب ارتكبته انهي حياتها وابني حياتي
ابو مقبل : انا ما اقول نسوي عرس كبير اقول امك يبي لها من يساعدها ولا راضين عزوف هالمسكينه من الصبح وهي تدق البيبان عشان تعاون امك ومخليه بيتها ومخليه اخوها
مقبل : انا يبه ماني راضي على شي ولا ودي هذا كله يصير بس محد طلب منها تجي هي مهتويه
ابو مقبل :هذا كلامك ؟ اللي مثلك يحترمها ويحطها فوق راسه
ام مقبل: عيب عليك يامقبل عزوف ماقصرت وشالتني بكفوف الراحه ولا قالت اه
مقبل: انا ماقلت قصرت وجزاها الله الف خير لكن محد جابرها واذا قصدك على العونه بكره ادور لك وحده تشتغل عندك وتكفيك منة الناس
ام مقبل: عزوف ما تمن علي يامقبل
ابو مقبل : قصير الهرج اللي بتجيبها على قولك تعاون امك لازم تكون من محارم البيت ولا فيه حل الا انك تعرس
مقبل: يبه انا مابي العرس
قام وتركه والتفت ابو مقبل على ام مقبل: عقلي ولدتس وعلميه إنتس بحاجة من يعاونتس
ام مقبل: ولدي ماله عرس واخته في هالحال والمعونه عزوف ما تقصر
ابو مقبل: عزوف ماهي مجبوره تجي كل يوم ومن بكره قولي لا لا تجي وكثر الله خيرها اتعبانها واجد
ام مقبل : عزوف تسوي اللي تسويه وفاء لهيا هي اللي حلفتني ما اققول لها شي
ابو مقبل: اجل زوجيها ولدتس وخلي شغلها في محله
انصدمت ام مقبل وقبل ترد وقف ابو مقبل : مابي اسمع زود حكي فكري بها وبكره نتباصر
راح وتركها تقلب يدينها يمين ويسار ماتدري وش تسوي
_______.
في بيت ابو سند
المغرب اجتمعوا بعد ماجاهم ابو فزاع والكل يسولف والاصوات كثير
وهيا بالمطبخ تجهز للعشاء وهي تحس بلوعه من كل شي
لفت على اليد اللي انحطت على كتفها: هيا
لفت هيا: هلا ثريا
ثريا: كيفتس الحين بعد التعب
هيا: بخير الحمدلله
ثريا: لا تتعبين نفستس بالشغل
.
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 46 )
.
هيا: ماني تعبانه ماعليتس
قبل تكلم ثريا قالت مزون: ثرررريا امي تبيتس
ثريا: طيب روحي وانا الحقتس
مزون : لا امشي معي الحين
ثريا: مزون اسمعي الكلام
دخلوا ساره وخزاري على ارتفاع صوت ثريا
ساره: الله الله الله وش صاير بالدنيا ثريا تصارخ
ثريا: استغفرلله بس يخلون الواحد يسوي شي مايبيه
ساره: افا والله من ذا اللي مطفشتس خليني اطير عيونه
خزاري :اكيد مزون من غيرها
مزون بحده: لا مب انا الا المنحوسه هاذي اللي مصره تنكد على كل البيت
ساره بحده: مزون احضري بخيرتس ولا اطلعي من هنا
مزون: تطرديني عشان هالسعلوه
ثريا: قلنا لتس اطلعي بخيرتس
خزاري : خلاص تعوذوا من ابليس
ارتفعت اصوات البنتت وجت ام سند على الصوت: وش فيكم! وش هالصراخ
مزون : يمه ثريا مب راضيه تطلع تبي تسوي العشاء عن ست الحسن والدلال وساره تطردني برا عشانها
ام سند : وشوووووو ؟ انا بناتي يتهاوشون عشان قليلة التربيه هاذي؟
في هاللحظات ارتفع الصوت وصل لصاله وعند الرجال وهناك عند سند اللي كان جالس ويصب القهوه لابوه وعمه
سمع الصوت وتاكد انها حرب امه على هيا لكن هو وعد هيا انها بوجهه ماهو عشان سواد عيونها لا عشان يتم الحمل وتنتهي هالمصيبه
وقف بسرعه وطلع متجه للمطبخ وجاء ولقى امه تسحب شعر هيا الطويل وهي تحاول تفكك منها والبنات يفرقون
دخل من بينهم ولا همه حتى ان خزاري فيه وقف بين امه وهيا وهو يفكك شعر هيا من يدين امه اوجعه قلبه على شعرها الحرير في مقابض يدين امه القاسيه لكن رجع عقله بصراخ امه: توقف معها ضدي ياسند توقف مع قاتلة اخوك ضد امك
بدون اي كلمه سحبها سند وطلعها من المطبخ كله تجاهل وجود فزاع فالصاله غطاها ورا ظهره وطلعها لغرفتها
كل تصرفات سند كوم وهالتصرف كوم ناظرته هيا بذهول وهي تقول : ليه؟
ناظرها سند : قلت لتس انتي بوجهي
هيا: مابي اكون بوجهك ابي اقضي ديني
سند : قلت لتس ديني ما اخذه من حرمه وانتي بوجهي عشان مجاهد اللي ببطنتس غيره لا
وقف سند وهو مايحاول يبني في قلبها شي ابد ولا يبي قلبه يجي فيه شي غير الخلاص من الهم هذا
_______.
في قسم الحريم قامت الدنيا ولا قعدت عند ام سند وتبكي ومنهاره ومقهوره والكل يهديها بس عجزوا
لين جاء ابو سند بغضب: وش بلاتس تنوحين
ام سند بغضب: ولدك اللي تبيه ياخذ ثار اخوه راااح وغسلت مخه بنت ابليييس
ابو سند : وشهوو وش اللي صاير تكلموا
مزون تقدمت وبدت تحكي كل شي من بداية اليوم وطبعاً زاد عليه بلاوي
وطلع ابو سند معصب وهو ينادي : سنننند سنننند
اتجهه للغرفه وفتح الباب بغضب وفزت هيا اللي باقي واقفه ماقدرت تجلس والتفت سند لابوه : يبه؟
.
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 47 )
.
ماقدرت تجلس والتفت سند لابوه : يبه؟
ابو سند بغضب: هذا ولدي اللي اشد ظهري فيه اخرها يصير مطواع لغرررره؟
سند : اسمعني يبه
ابو سند : وش اسسسسمع وش اسممممع ؟
سند : تعال اتكلم معك في مكان ثاني
ابو سند : لااا ما نتكلم في مكان ثاني لااا نتكلم وتسمع هي تسمع انها غره وانها هنا عشان تجيب الولد ماهوب عشان تعشق وتمعشق وانك ما توقف ضد امك عشانها
رفعت راسها هيا بصدمه : ان..
قطع كلامها سند بسرعه وقال : يايبه مافيه شي من اللي تقوله كل المسأله انها حامل ومابغيت امي تتعب معها وثم يطيح الولد ابي تجيب ولدها وتطلع من هالبيت باسرع مايمكن وامي تاج ماينوقف ضدها لا مع الغره ولا غيرها
سند ماهو راضي بكلامه بس مضطر يقوله عشان مايجي في قلب هيا شي وتكبر مصيبتهم اكبر من كذا
ابو سند طفى غضبه اول ماعرف بحملها والتفت لهت وقال : ان طاح هالولد مصيبتس كبيره يا اخت مقبل
اسم مقبل مثل السم ينزل على مسامعهم محد يبيه ولا احد يبي يسمعه حتى هيا صارت تخاف من طاري مقبل
طلعوا وتركوا هيا بغرفتها ولا قدرت تطلع بعد اللي صار
وطلع سند يحاول يرضي يمه يحاول يقنعه ان كل السالفه انه يحافظ على هالولد عشان ترجع هيا لاهلها
لكن قالت ام سند ببكى: لو تجيب مليون ولد محدٍ يعوض ولدي ويخسي ولدها يعوض مجاهد
راحت وتركت العشاء وتركت كل شي وتعشوا كلهم وافترقوا محد منهم مرتاح وام شايع رفضت ترجع لبيت ابو فزاع شافت ان وجودها مهم وخصوصاً هالوقت
_______.
من بكره
الصبح عند عزوف
صحت اليوم وهي مالها خاطر تروح بيت ابو مقبل وتقابل مقبل ولا لها حيله ابد
جلسست على سفرة الفطور وهي تفكر بصمت لين قاطعها سعد اللي قال : عزوف افا وانا اخوتس وش مضيقٍ صدرتس ومخليتس سرحانه
عزوف : ولا شي مافيني شي ليه
سعد: لي ساعه اناديتس ماتردين
عزوف تنهدت ونست نفسها وقالت: ماعاد اطيق اروح بيت ابو مقبل
التفت لها سعد بحده: ليه احد مزعلتس ولا قايل لتس شي
ارتبكت عزوف بس مابينت: لا لا محشومين محد يزعلني بس ضايق صدري لاني اشتقت لهيا وتعبت اروح واجي وهي ماهي فيه
سعد بضيق: ماعليتس ايام وتفرج المهم ما تخيبين ظنها وتوقفين مع اهلها في ضيقهم
عزوف : والله ماني مقصره بس اليوم ضايق صدري بزود واخاف اضيق صدورهم
سعد: على راحتس لا تروحين اليوم وبكره خير
عزوف : تعال تعال افطر وبعدين تسهل
قعد سعد وهو يحاول يبتسم عشانها ولا هو منقطع قلبه وهو يفكر بهيا وحياتها ووش صار عليها
_______.
في بيت ابو مقبل
قعدت ام مقبل طول الليل وهي تفكر في كلام ابو مقبل ولا تقبلت فكرة عزوف ومقبل
.
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 48 )
.
ولا تقبلت فكرة عزوف ومقبل لكن فكرت بطرفها وشافت ان عزوف وقفت معهم وقفه خير وماقصرت بس تذكرت مقبل ورفضه لها
وصحت من هواجيسها على صوت مقبل اللي طالع كالعاده ومستعجل : صبحتس الله بالخير يمه
ام مقبل: صبحك بالنور تعال يمه تعال افطر
مقبل: ماني مشتهي يمه بطلع تبين شي
ام مقبل : سلامتك
طلع ولا خلى لها مجال وتاكدت ان مقبل مايصلح لعزوف ابد
وجاء ابو مقبل: صباحتس خير
ام مقبل: صباح النور
ابو مقبل وهو يتلفت: الا وين عزوف مالها حس
ام مقبل :مدري اليوم صيفت
ابو مقبل: يكون ازين علميها لا تجي وتعب نفسها ماهي مجبورتن علينا
صدت ام مقبل : زين
طلع ابو مقبل بعد الفطور وام مقبل اشغا تفكيرها هالموضوع
_______.
وفي قهوة سعد
دخل مقبل وجلس : سعد شاهي لاهنت
سعد: تامر امر
جاب الشاهي وقعد مقبل : تفطر معي؟
سعد ابتسم: لا سبقتك
ضحك مقبل: هب ياوجهه مايفرط بريال
سعد: ماهو بسالفة تفريط والله لكن عندي اخت ماتخليني اطلع بدون فطور لو تحترق الدنيا
نزل راسه مقبل: الله يخليها لك
سعد: امين ويخلي لك اخيتك
صد مقبل : الله يحفظها لين تجيني وبعدها لو يصير اللي يصير مايهمني
سعد: الله كريم
سكتوا كلهم ومحد تكلم
_______.
وفي بيت ابو سند
طلع هالصبح لكن طلع غير على هيا كانت خايفه من تهديد ابو سند ماتدري وش تسوي تطلع وتشتغل ولا تجلس عشان مايصير لها شي من ام سند ومزون
انفتح الباب وكانت مزون : امي تقولك قومي لشغلتس يا شغاله ما انتي جايه تنامين
اخذت نفس هيا ووقفت وطلعت بصمت ودخلت المطبخ وبدت تكرف كرفها المعتاد وعلى اكمل وجه
_______.
ومن هاللحظه ............................................................................... إلى .... أن مرت ٩ شهور
كانت هالوقفه ملازمه هيا نفس الوقفه ونفس الذل ونفس الكرف
رغم ان سند محافظ على وعده وكثييير ينقذها وتكون في وجهه من امه وجورها كانت تتعب وتهلك ومع ذلك تحمل وتسكت
كانت ساره وثريا مايقصرون ويساعدونها بالخفا وحبوها ورحموها بس ام سند ماترحم ومزون ماترحم
كان نص هم هيا يطير اذا شافت ام شايع اللي تحتويها وتطبطب عليها
....
اما سند مايدري كيف عدت هالشهور كان يجاهد فيها جهاد مابين امه وهيا ونفسه
....
ام سند اللي حاولت بشتى الطرق تسقط حمل هيا بس ماقدرت وهي تشوف ان عوض ولدها مستحيل يكون ولد هيا
ومزون توافقها الشر والتفكير
اما ساره وثريا كانوا غيير وكانوا مأيدين ان هيا مظلومه ولا بها ذرة ذنب في ذا كله
وابو سند كل همه يتم الحمل ويجي الولد
_______.
.
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 49 )
.
اما ام مقبل
كان ماناقص رفضها لعزوف الا رفض مقبل اللي مجرد ما اطروا له الزواج رفض ورفض بشده اول ما عرف ان عزوف العروس وبدا يقتنع ان عزوف ما تساعد امه عشان هيا لا تساعدها عشان تتزوجه وزاد بغضه لها
ونست ام مقبل مقبل وزواجه وماعاد لها تفكير الا في هيا اللي وصلتها اخبار انها حامل وبكت لين جفت دموعها وهي ماتدري كيف تستوعب ان بنتها الوحيده حامل وهي ماهي قادره تفرح لها ولا توقف معها ولا تساعدها في حملهاا وتكون جنبها
_______.
وفي بيت ابو سعد
كانت عزوف تفكر في هيا ياترا ولدت ولا ماولدت وش جابت وهل بيجي الفرج كانت تستحي تسال سعد عن اخبار هيا اللي يسمعها من مقبل
تركت كل شي بيدها وهي تدعي ان هيا تكون بخير
_______.
وفي بيت ابو سند
من الصبح كانت هيا على عادتها تكرف بس هاليوم ما مر عليها بسلام
دخلت هيا غرفتها وهي ماصدقت تجي حزة العشاء وينتهي اليون وتوقف شوي انسدحت على طول وهي مو قادره تحمل ألم ظهرها غمضت بقوه وهي تمسح دموعها: يارب قوني يارب مابقى شي
لفت على الباب اللي انفتح ولا قدرت تجلس بعد ماشافت سند اللي دخل : سلام عليكم
هيا: وعليكم السلام
ناظرها سند بهدوء: وش بلاك اليوم ما انتي على بعضتس
هيا كانت تحاول تقول بس ماقدرت ومد يده سند وقومها وجلست بألم وقالت: مافيني شي زي ما انا
سند: لا
هيا : ألا
ما تطمن سند لها لكن وقفت هيا وهي تاخذ ملابسها وراحت تتروش تبي التعب يروح لكن ماراح
رجعت لغرفتها وانصدمت ان سند باقي هناك وهو من زمان ماشافته بهالغرفه ماكان لها خلق تجاهده
وقبل تكلم دق الباب ودخلت ساره وهي تبتسم: هيا هيا
هيا : سمي بغيتي شي
ماشافت ساره سند وقالت ببتسامه: لا والله ضاق صدري بلحاليي قلت اجي شوفتس اليوم ما انتي في مزاجنا يوجعتس شي
هيا: لا لا
كان هم هيا سند مايسمع بس سمع وقالت ساره اللي مابعد التفت: ظهرتس خف؟ انا جيت بشويش اخاف يصيدوني عندتس وحزتها بيربطونا جميع
ضحكت ساره بمزح وهي صارت تمون على هيا وودها تغير جوها ولا تحسسها بالغربه
ابتسمت هيا وضحكت وانصدم سند للي اول مره يشوفها تضحك حس بحجم الظلم اللي قتل ضحكة هيا الجميله ياكبر ذنبهم يوم ظلموها
ورجعت ساره تضحك: اقولتس لايكون بتولدين وتروحين وتخليني
هيا : ليتني اقدر اخذتس معي ولا وارد جميلتس علي
ساره: مابينا ذا الحكي بس لاتنسيني اذكريني بدعوه ان كانت لي ولا علي
ضحت هيا: انتي يندعى لتس مايندعى عليتس
في هالحظه انتبهت ساره ان فيه احد واول ماشافت سند جمدت وانسحبت بسرعه وابعدت وهي مصدومه من وجود سند وراحت مسرعه لغرفتها
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇

@riwait_221
📖 روايـة أنتي حمول الوقت وأنا سندها .
(البارت 50 )
.
وانسحبت بسرعه وابعدت وهي مصدومه من وجود سند وراحت مسرعه لغرفتها تهوجس بسند وش جابه وقالت بينها وبين نفسها وهي تضحك( لو ما حن عليها سند وحب هالزين بيطلع ثور ولا يفهم )
اما سند كان في عالم ثاني وهو يفكر لكن استغرب اول ما راحت ساره ولفت عليها هيا كانت تبتسم لكن شحب وجهها وانطفى نوره اول ماشافته وصدت وجلست بألم كان تايه ويؤمن ان لو تكلمت هيا بتلملم ضياعه وتدله على كل شي صح وبيسويه ولا يدري ليه بيسويه وليه مستعد يسمع اللي هي بتقوله يمكن لانها مظلومه والمظلوم دايم على حق وتحرك حسه الشعري ومايدري كيف قال هالبيت وليه قاله وعلى اي اساس يتسائل سؤال يُسمح لكل الناس تسأله الا هو وتنهد وهو يقول بنفسه
(‏لغيري تصبحين انوار ، وبدربي تصبحين اظلم
‏"وتعرفين الطريق الي يدل، وماتدليني؟!!")
قبل ترجع له افكاره ويستوعب ان ماله حق السؤال قالت هيا بصوت متألم : يارب رحمتكك
وقف سند:هيا يوجعتس شي
حاولت هيا تكابر بس الموضوع ماعاد يحتمل مسكت ظهرها بألم : مدري مدري من الصبح وهالالم يروح ويجي توقعته بيخف بس كل ساعه يزيد
سند ماكان عنده ادنى فكره لكن اعتمد على كلام ساره: لايكون بتولدين
لفت هيا تناظره برعب وكانت نفس النظره عند سند بعد كلهم مرعوبين من هاللحظه انهارت دموع هيا وقالت : مدري مد...آه آه
قرب سند بدون مايحس وحط يده على ظهرها : وش فيتس
تعلقت هيا بيده وطارت عيونها من قوة الالم اللي تحس به : ألحقني ياسند ألحقني
سند: وش اسوي وش اسوي يا هيا
هيا ببكى: ناد جدتك بسررعه
احتار سند مايدري يتركها ويروح ولا ينادي وهو عندها ماعرف وش يسوي بس استوعب صراخها المكتوم وتركها وركض لغرفة جدته فتح الباب وفزت ام شايع: بسم الله الرحمن الرحيم
سند : تكفين الحقي ياجده
ام شايع: خير اللهم اجعله خير وش بلاك
سند: هيا مدري وش بلاها شكلها بتولد
فزت ام شايع وهي تستند لسند: عطني عصاتي
عطاها المعكاز وهو وده يشيلها ويركض من كثر ماهوب مستعجل وصلوا لهيا اخيرا اللي كانت واقفه وهي تلوى من الالم
ام شايع : هيا يابنتي وش فيتس
هيا: مدري مدري يا خالتي تكفين ألحقيني
ام شايع : عاوني ياسند خلنا نوديها للمستشفى
سند: يلا يلا
سند هيا وهو يساعدها تلبس عبايتها اللي نست وين مكانها من كثر ماهي محبوسه
لبست ام شايع وجت تركض لكن في هالحظه قام البيت كله
وهنا وقفت ام سند: وين على الله
سند: يمه هيا بتولد وبناخذها المستشفى
صرخت ام سند: اسمها الغرررره تسمع؟ وغير كذا تولد هوا بالبيت غير كذا مافيه
ام شايع بغضب: ام سند سكت عنتس واجد وراعيتس بس الظاهر ماعاد يفيد السكوت ابعدي عن طريق
طريق البنت

.
خلونا نشوف تفاعلكم منشان انزل لكم بارتات جديدة
___.
@riwait_221
ابيكم تفاعل قوي
#ملاحظة : طريقة التفاعل مع الرواية هو الضغط على احدى الايموجات التي تأتي في نهاية كل بااارت
👇👇👇👇👇👇