🤍


بارتـات يومنـا الخميـس👆🏻😍

.

البـارت 31 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


اسير يوم في الاسبوع اطمن عليها واطرح مصاريفها وافلتها ليوم وقعت مشكله بينهم جاء يشل المره كالعاده بس هذه المره شلها بكلام يوجع  هانني عمي ومرتي معه قالوا ماناش رجال وجابوا كلام جارح قوووي مااقدر اقله لك وهي عرفت انه تزوجت حلفت لها مالمستها قلت لها لا تصدقيش ابوش ولش مايرضي خاطرش راسلتها بعد ماخرجت وهي ولا فعلت لكلامي حساب

لحقت ابوها وانا حرمت وطلقت ماعاد ترجع شليت العيال الحديده وجلسنا تصدق يابسام ان الثلاث الاسابيع هذه حسيت فيها اني عايش وكل السنين اللي سارت من عمري ماكني عشت فيها شفت الخوف والاحترام اني رجال ولي كلمتي في عيون حور وشفت الذل والاهانه في السنين الاوله مع غدير شفت الاهتمام للعيال ومراعاه مشاعرهم لحد يصيح عندهم من حور وشفت اللامبالاه في غدير ويفتجعوا العيال والا مااشتوا اهم شي رايي وكلمتي

قارنت حاجات خيرات فعلا بعض المواقف تكون خير لنا ولو فيها وجع تكشف لنا كل الحقايق وذاحين الصبح يقل ابوك رديت مرتك للبيت والعيال ردهم سدينا انا وعمك ولا كأني رجال عندهم مابيعتبر ابي لكلمتي حساب ولا يقل ابني غاثي منهم نقصوا من قيمته اهم شي مصلحته انا قلت ماعترجع واني حرمت وطلقت رجع لطمني وطرني من البيت وهذا انا عندك


بسام كان مركز ع كل حرف بيقله اخوه ومتألم ع حاله بس مش مثل مارقص قلبه لما قال انه وحور ماصار بينهم شي وكأن شي من قلبه برد دعمم كل شي وقال: ويحين عتطلق حور اشتي اشلها معي ونسافر وعدتها ادرسها


بدر ابتسم وشهق في نفس اللحظه: هههه انت داري اني قلت لها تريع شاجي اشلها وتدي الشهايد حقها معاها لو تبسر كم فاقده لك وتقل مدري ماله ما بيتصل لعندي ولا بيرد ع رسايلي هو وعدني يشلني وعدني يدرسني رجع قلت لها شاوفي بوعد اخي انا وقلت اسجلها وزد عناد في الشيخ لانه عصب بقوته لما دري اني شاسجلها


بسام: خلاص قذا جيت طلقها ومرتك رجعت وشاسافر انا وهي


بدر انقبض قلبه من كلمه طلقها وقطب حواجبه وشاف بسام بنظره خلت هذه النظره بسام يبعد نظره لبعيد منه ويتحاشى النظر فيهن وشاف البنات اللي شافهن في الجوله (حنين وبحور) خارجات من الطاوله اللي وراه وماشيات


بدر: اطلقها عوذب عادو الا بدأ هذا واشر ع ❤ يدق مشاعر غريبه يااخي رن تلفونه ها ذكرناها اتصلت لو ذكرنا مليون


بسام داخله ااااااااح هي اغلى من المليون يانذل مشاعر غريبه جعلك غراب رد ضميره مالك ع اخوك هذا بدر بدر الذي ما بيسخى عليك بشي جاوب ع نفسه ريته سخي في كل شي ولا شل حور وحور من بسرها وعرفها عتشل قلبه مثل ماشلت قلبي

.
.

تجهزت حور ومنتظره رنه بدر لها فكرت ماهي اغلى شي عندها ذكرت السلس والاسويره اللي في الدولاب حقها السلس كان حرف اسمها جابه لها بسام في عيد ميلادها واللي بيحتفل باليوم اللي جيت فيه ع بيتهم ويقل انه يوم عيد ميلادها 

لبسته وتحسست بيدها عليه وحنت له قوي والاسويره كانت في يدها ما تبعدها ابدا كانت هديه من مدرسه الاسلاميه لها هي وبحور لما كانين صف ثالث ومن يومها والاسويره ماتبعدها من يدها واذا بعدتها ترجع تلبسها من جديد.


حور وهي معصبه وباين عصبيتها من صوتها: وين انت كم لي مريعه لك وزد مصدقه لك شليت اغلى ماعندي


بدر وهو فاتح الاسبيكر ومبتسم ع عصبيتها الواضحه من صوتها: ايوه وماهن اغلى شي عندش.


حور قالت من قلبها: والله مامعي شي غالي الا سلس اخوك الغايب


بسام حس بوجع في قلبه وذكر  السلس اللي جابه لها في عيد ميلادها


بدر: واذا اديت لش الغايب بنفسه ماعتفعلي


حور: ابتسمت ولو اديته انا غاثيه منه ذاحين وين انت من صدق صدقتك ومريعه لك


بدر: الان معي لش مفاجأه ريعي لي انتي وامي في الصاله اهم شي الشيخ مشو موجود


حور تحمست لما قال مفاجأة: لا مش موجود خرج وشل رجع سكتت ماقالت شل العيال معه بس ايش المفاجأة


بدر: نص ساعه وتدري

حور بدلع: هيا امانه مايصبرني

بدر تحيلا لها: شدي الغايب واجي لا تقليش لامي خليها تفرح بعد النكد حق الصبح

حور شهقت: احلف بسام رجع

بدر: ايوه اوذا معي ذاحين

حور دمعين عيونها غصب عنها: يله طيب منتظره لكم


بسام (من لما سمعت صوتها دق قلبي دقات يسمعوهن من صنعاء لذمار صوتها الطفولي شقوتها الحروف لما تنطقها شكلها ضحكتها كل شي كل شي خلاني اموت فقد لها واعاتب قلبي من جديد والومه كيف سخي قلبك ع حور يابسام حور حور كيف سخيت عليها هون ع قلبه لما قالت السلس اغلى ماعندي مش داري كيف يبسر لوجهها كيف يسلم عليها هي ماعاد له حق حتى يفكر فيها بيبسر ملامح وجه اخوه وتعابير وجهه لما كلمها كيف الراحه تبدلت لوجهه بعد الساعه من الهدار عن كل ما يعانيه هذه الفتره



















📚 @rewayatyamania  🇾🇪

.

البـارت 32 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


وصلت البيت بعد ما وصلت حنين لبيتهم دخلت بكل هدوء وراحه نفسيه حستها اليوم انها من بعد ايام عتقدم برنامج اسبوعي لها خاص فيها عتتألق فيه وحاسه انه عيوصلها لحور وان الحل الوحيد الاعلام تناقش فيه عده قضايا مكبوته داخلها

وهي داخلة لعند امها سيده هذه الانسانه اللي كانت لها حضن كله حنان وامان وسعاده احتوتها وهونت عليها وهي ماعليه الان من فضلها وهي بحور بقوتها وشخصيتها بفضل امل لها ودعمها وهي بحور ونجاحها الان بفضل زياد وانه مثل ظلها وهي بحور بفرفشتها وضحكتها وجمالها بفضل حنين توأم روحها بس في لحظه هي ممتنه لهذه الاسره اللي احتوتها ممتنه للحظه للوقت اللي جمعها بهم وبتحمد الله عليهم..

بس في  لحظه حست  ان كل المشاعر والمواقف اللي كانت في هذك اللحظات تبخرت بلحظه وحست حركه جسمها كأنها انشلت


امل: مصمم يمه عليها


سيده(الجدة)بصوتها المهزوز: الله يقنع قلبه ماعذر من خير


امل: تخيلوا يمه قال حتى ولو وافقت على علي هذا اردهم نابي انه مش موافقين والا لايجنن رسمي


سيده: وبحور هي عترفض علي بس زياد ضروري يقنع منها انتي مجنونه تزوجي ابنش بواحده داريين ايش حصل معاها ولو هي غاليه عليا وتربت ع يدنا بس زياد اغلى


امل: كيف افعل يمه دليني


سيده: حاكيه بقصة الاغتصاب لها وانها مشي بنت وانكن فعلتين عمليه لها وهو عيقنع


امل: مايسبر يمه بحور بنت مالها ذنب بقصه اغتصاب وهي منومه من قبل وحش مشو انسان مالها ذنب


سيده: داريه مالها ذنب بس مانفعل كان ماعيقنع زياد منها


امل وكأنها حست بشي تحرك قامت تشوف ايش الشي هذا شافت بحور قدامها ارتبكت وماقدرت تتكلم

امل: ها بحور كم لش هانا ماسمعنا السيارة ويحين دخلتي


بحور بقوه رغم الدمار اللي داخلها وعتظل في نظرهم ناقصه مهما كملت نفسها عتظل في نظرهم الانسانه اللي مدري من اهلها او يمكن تكون عار ع واحده غلطت ورجمتها هي واختها هذا وهم الناس اللي احتووها وهي عمرها 10 سنين ومش راضيين فيها لابنهم كيف بعلي اذا عرف الحقيقية ومن اين هي بس كل شي يهون قدام اغتصاب اي اغتصاب ما اذكر شي من هذا كله

رغم الخراب وقفت بكل قوه قدامهن وبابتسامه تحاشت النظر او اي كلام يمكن تقله لها امل هونت عليها الاستفسار والسؤال من متى جت وكم لها: عاد انا وصلت ذاحين وين هم امي


قربت لعند سيده وحبت راسها: امه شكلكم اليوم تاعبين بس معي خبر حالي وقعت العقد في الاذاعه ومن الاسبوع الجيي عتبدا في البرنامج بس المخرج طلع علي نفسه المندوب نفسه الخطيب المستقبلي ماعاد قدرت تمثل اكثر بتحس نفسها عتبكي في اي لحظه بس معي ذاحين بروفا بعد العصر شاسير واتاخر غير قلت اطمن عليش ماناش داريه ان امل عندكم

التفت لامل انتبهي لها يمكن اتاخر ارقدي عندنا لاني شاجي واردش خبر ع علي ايش تقلي لهم


ما خلت فرصه لامل وسيده يردين عليها حست امل من طريقه كلامها وارتباكها ان هي سمعت شي قلبها قبضها وحست بندم وندم شديد مجرد مايطلع احساسها صح

.
.

وصل بسام وبدر للبيت كان بسام مش همه شي الا لما يشوفها خايف يضعف وماله عين يشوف لعيونها العيون اللي بيستمد منهن تفاؤله وقوته في الحياه


بدر دخل بابتسامه عكس التكشيره حق الصبح لما خرج

بدر بصوت: امممممممه يمه ياام بدر.


بسام بغيره: اممممه يا ست الحبايب ياام بسام


جليله كانت بتصلي سمعت اصواتهم خافت شبهت صوت بسام تعوذت من الشيطان وقامت بتلف سجادتها


بدر وبسام بصوت واحد من الدور الاول: اممممممممممممهههههههههه.


جليلة بسرتهم من طالع بسرت بسام وبدر كانت تنزل من الدرج بسرعه: امي وروحي امي وقلبي حيااااااا بنظر عيني حيا بروح امه

بسام ضم امه بقوه وسلم عليها

بدر بيشوفهم تنحنح: احنا هانا والله وانا ابنش والكل وعادو قع لي ملطام من زوجش جي ع الاقل حبيني( بوسيني ) هنيه واشر لخده بقعه الملطام لعل وعسى يخف الوجع

جليله ضحكت: هههههههههههههه كلكم عيالي والله ان قلبي غاثي لوما طمنتني عليك حور

بدر: الا صدق وينها قلنا لها تريع معانا مفاجأة


جليله: جت تقل ريعي لبدر نازل قال معه مفاجأة قلت اصلي وارجع انزل


بدر بيداعي حور من الدرج: حووووووور


بسام اقتهر بيحس ماعاد له حق فيها بشي شاف امه بنظرة قهر واللي عارفه بمشاعره لعند حور طبطبت ع يده ومسكتها بقوه واشرت براسها له وكأنها فاهمه شعوره لحظتها


حور (كنت في غرفتي وقتها شفت لحظه ما وصلوا كنت اشتي...





















📚 @rewayatyamania  🇾🇪

.

البـارت 33 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


حور (كنت في غرفتي وقتها شفت لحظه ما وصلوا كنت اشتي انط من الطاقه من شده فرحي بسام رجع ابتسامي لثغري وحسيت روحي رجعت  بس انا زاعله منه وعلى هجره وضروري يتعاقب ومش بسهوله شاكلمه واسلم عليه لانه مره قلي (ياحور لا تخلي حد يستهون بمشاعرش ولا  يزعلش ويبكي عيونش شلي حقش منه ومن عيونه واللي يوجعش بيوم وما يخليش الليل تنامي بسلام وتجلسي طول الليل تفكري فيه وتهميه هذا ما يستاهل يكون في حياتش لا ترخصي نفسش ومشاعرش لحد لا للاخ ولا لصديقه ولا لحد خلي لنفسش قدر ومثل ما حوريات البحر في عمق البحر ومحد قادر يوصل لهن انتي مثلهن حور.. محد عيزعلش لو اقطع لش من هذا واشر ع قلبه والله لاشرب من دمه اللي ينزل الدموع من هولا العيون )


وانا ذاكره كل حرف قلته لي قبل ماتسافر ومحد زعلني الا انت وقهرني وخلاني الليل ما انام وافكر ليش هجرتني مافعلت بك كنت اتصل فيك ارسل لك ما تكلمني ولا ترد عليا وجعتني قوووووي


انفتح عليها باب غرفتها كانت لابسه فستان شيفون طويل واكمامه طوال لونه اصفر وكانت جالسه ع طرف سريرها وجالسه بتمشط شعرها وسارحه في بسام وبتذكر كلامهم مع بعض .


جالس بدر يتاملها بصمت وكأن رصاصه صابت قلبه بقوه كانت بتشع مثل الشمس الصفراء شعرها الذهبي المايل للاشقر وحركه يدها وهي بتمرر المشط فيه ولون عيونها العسلي


حور ركزت عليه ونكزت

حور بتلم شعرها بالشباصه: عاد الناس يدقوا الباب


بدر: مرتي ليش ادق

حور دق قلبها من كلمه مرتي: لاياشيخ قل بغيرها مرتك اهجع لافضحك ملان البيت


بدر ابتسم ودخل وغلق الباب: ايش عتقلي لهم بدر ماقد لمسني لحد الان

حور ارتكبت من كلامه وشكله وهو مربع يداته وبيكلمها

حور تشتي ترد بس سكتها حركته لما مسك يداها بدر: انا جاهز تقعي مرتي من صدق


حور ارتجف جسمها وبعدت يدها بقوه منه: بغير خباله شلت الشيله من فوق السرير وفلتته ونزلت


بدر استوعب ع نفسه ماقال وكيف لمس يداها وكيف ارتكبت وخجلت تنهد ومسك ع قلبه: ااااااااه مابيحصل لك يابدر ما لحالك مقلوب هكذا



خرجت حور كانت تلمس خدودها وتتحسسهن تحس النار بتخرج منهن تنهدت وهي داريه كيف تسوي هي ناويه ما تشوف بسام يحس بزعلها شويه بس بدر جبرها تنزل

جليله شافتها: حيا ببنتي وين انتي


حور: كنت بين اصلي وبتتحاشى تبسر لوجه بسام

وبسام نفس الخبر بيبسر للقاع


جليله بتشوفهم: هيا مالكم ساع الاغراب كنكم ماتتعارفوا


حور رفعت عيونها وبسام والكل

التقت عيونهم مع بعض وكانت كل نظره منهم كلها عتاب وفقد


حور: الا اعرفه بس انا ما شاسلم عليه انا حانقه منه

ابتسم بسام وجليله: وليش حانقه

حور جلست ع طرف الكنبه وبدر خلفها من بعيد شوي وبكل عفويه: لو تبسروا يمه هذا الكريه واشرت ع بسام كم قد راسلته واتصلت له وهو ولا عاد عبرني ولا عاد رد عليا كم رسلت له واتصلت له لما الشيخ قال عيزوجني ببدر وهو مدعمم قال تلفونه انكسر مدري انسرق سبحان الله ما بقي في تلفونه هكذا الا لما احتجته وهو قال لي والله ما افلتش وانا سندش واخوش وصديقش هيا وين سار حكاه يمه بين احاكيه ولا بيرد مافعلت به

وانفجرت بكاء انا اصلا غاثيه منه كيف اسلم عليه لا يحاكيني ولا يسلم عليا وبكل طفوله قالت: ولااشتي حقه الهديه الذي قال لما سافر عيرجع ويديها وبتمسح دموعها بطرف الكم حق الفستان

.
.

عند الشيخ وخبرته كملوا يسوروا ربع الارضيه لان هي كبيره جدا ومساحتها شاسعه


الشيخ بصوت عالي بيداعي: يله ياطارق(واحد من رجاله) هذه ميه الف وبياشر بها لعنده سير ادي غداء وقات


قبل مايرد عليه صوت طارق جا له صوت واحد شكله كان اسمر اللون وطويل جذاب جدا شكله انيق ومهندم

قابوس بيتقدم لعنده: الله المستعان تسور ارضيه تحت بيتي واشر لعند بيته ومن الصبح هدار وداويه وماخليتوني ارقد ولا خليتوا امي التاعبه تهجع لها وكاد وحجار وياجنازه الله حلقي وزيد اخليكم تتغدوا من خارج وبصوت عالي بحكم انه يسمعه كل الذي حوله انا قابوس

(كل الذي كانوا حول الشيخ رفعوا سلاحهم لعنده لانه عارفين ان الارضيه هي لقابوس) بس ما هابهم قابوس وواصل كلامه ( حفيد الشيخ غالب وابن الشيخ عمار عارف باصول المشيخه والقبيله لو اسافر لاخر الدنيا ماعتغير فيني الدول شي ويمين بالله ماتتغدوا كلكم الا عندي والغداء جاهز ارحبووووا يارجال


الشيخ جهران استحى ع نفسه وحس نفسه صغير قدام كلامه اشر لرجاله ينزلوا الاوالي ومشي هو وحاتم مع قابوس


قابوس داخله: ههههههههههه عنبسر ايش اخرتها معك ياجهران


تقدم جهران ورجاله شافوا الحوش كله ملطخ بدم


قابوس شاف الدم وذكر ربيع وموقفه معه الصبح


قابوس ابتسم وطمنهم: لا تقلقوا يارجال هذه دمه اليوم جت تلعب معي ومشي قد اللعب قتلتها ادخلووووا فوق العين وفوق الراس


https://t.me/+Ecxq_OzMYh40M2E0



📚 @rewayatyamania  🇾🇪

.

البـارت 34 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


دخلوا الرجال ع مايده مالها اول ولا لها اخر ويحين جهز قابوس الاكل ومن طبخ.


#قبل ساعات ⌚ ..

قابوس نزل من الدرج بعد ماكلم الياسمين وقع في فخه لعبه السنين


ربيع وهو بيكلم امه: يمه قد بطوني بين ارجلي والله ليقتلنا هو مريض مريض قومي نهرب قبل مايدرا بشي


ام ربيع بخوف: وانت من قلك تحاكيه وتوثق فيه وببكاء ياالله خارجنا من قابوس ومن جهران هذا


ربيع: بعد الظهر عنخطى لنا من غير محد يحس رشا قد لفت الثياب باقي كم حاجه شاخرج رشا الاوله عشان محد يشك وبعدها انتوا


ام ربيع: وخالتك رقيه والولد 

ربيع: لهم الله ماعيسخى عليهم قابوس لما يهدا ويفهم كل شي هو طيب بس وقت العصبيه مايعرف حد


ام ربيع بقلب ام من اعماق قلبها بتدعي: يارب خارجنا يارب


بعد مرور نص ساعه من هذا الحوار بين ام ربيع وربيع

ربيع: خلاص ياقابوس بردت قلبك قد دمي ملان الحوش

قابوس وهو بيتنفس بسرعه من كثر ما ضرب ربيع: تحاكى اسمعك اشتي كل شي تقله لي بالتفصيل وبكل صدق لو ادرى انك تنقص شي والا تكذب بشي ياويلك ومسك شعر راسه بتفهم

ربيع وهو حاسس ان نهايته قربت

ربيع: قبل 22 سنه كنت اشوف ناس بيلووا عند الارضيه اللي تحت البيت وارجع نزلت اشوفهم مجرد ماقربت منهم عمروا فوقي الاوالي وقال


الشيخ: رحلك ياابني لا تدخلش روحك انت الا حارس ساع اسمك

ربيع بهنجمه: هذه الارض للشيخ قابوس وهذا كله وبياشر على ماحول البيت كله له وحقه وملكه


الشيخ طلع فوق سيارته ومشي وماعاد كلمني ليوم قبل 10 سنين كنت ع ضويتي من الملجأ طرحت لهن الفلوس ومشيت ومن دون محد يعرف من انا كنت امكن الحارس واقل للتوأم الذي طرحهن الشيخ قابوس ويوم كنت مراقب ما حسيت الا بعصا ع راسي وماعاد صحيت الا وانا والحارس جنب بعض ومكتفين ايدينا


ربيع: وين انا اااااااه راسي ياعيال ال....وين انا


الحارس مثله جالس بيسبح الله ويستغفر ومرعوب من المكان الذي هو فيه وهو واحد بعد حاله ماياذي حد ولا له علاقه مع حد


ربيع بيشوف الحارس: انت الحارس العم صالح صح

صالح: ايوه ياابني منهم هولا الذي شلونا انا وانت من باب الملجأ

ربيع: والله مالي علم وبيمسك راسه من الالم


دخل عليهم الشيخ وابنه واثنين رجال


جلس الشيخ فوق كرسي وقال مااشتيش أاذي حد فيكم انا شيخ ولي سمعتي ومكانتي اشتي تفهموني الاثنين من هن الذي طرحهن الشيخ قابوس ماقصة البنات الذي كنتوا بتتحاكوا عليهن


ربيع بيشوف للحارس والحارس بيشوفه المهم بعد عذاب وتهديد نطق الحارس


صالح: والله ياابني انه في يوم جا لنا واحد طرح لنا ثنتين بنات ساع القمارا كانين توأم وقال هولا بناتي انا مااقدرش اربيهن وامهن ماتت وجدتهن معاقه عيكن يرسل صرفتهن والمهم مايعرفين ان ابوهن عايش انا مااشتيهن انا مسافر انا ومرتي الجديده وامي تاعبه ماعتقدر تنتبه لهن وخلاص والبنات كبرين وتربين عندنا ومش عارفات من اهلهن ولا حتى فكر يجي يشوفهن


انا والله ماتحاكيت يا قابوس ولا نطقت بحرف ماقلت انهن بنات الياسمين ولا بنات غمدان وافقت الحارس بكلامه وقلت انه صدق كلامه مع انه غلط مش هن بناتك بس وقتها فكوا لنا وماعاد بسرت وجه الشيخ الا اليوم هو نفسه اللي خطفنا ونفسه اللي شل البنات من الميتم والكل لانه تبنى الشيخ واحده و الثانيه تبنتها اسره ثانيه قال لي الحارس هكذا

بعد اخر مره شليت له الزلط والله هذا كل شي واليوم خفت خفت لما شفته نفسه وانا مخبي عليك ماعاد ذكرناها ولا عاد بسرته حتى ماناش داري باسمه الاشكله بس سامحني سامحني وببكاء لا تقتلني امي وامك محتاجات لي ومرتي حامل..

.
.

نوريتا: ياسمين اذا تشتي تتخلصي من كل هذه الكوابيس وترجع لش ذاكرتش لا تكني تقلي بكل شي لقابوس

ياسمين بصدمه: ذاكرتي

نوريتا: ايوه ذاكرتش تعتبر مفقوده من لما سويتي الحادث في اليمن وهذه الكوابيس هي اشياء حصلت معش في الماضي انتي بتتحسني انتي باقي وقت بسيط وترجع لش كل ذاكرتش انتي ضروري تريحي بالش من كل شي ودام قابوس مسافر هو اللي كان مايشتي يشوفش بتتعذبي وتكوبسي انا قطعت عليش العلاج لان هذه الكوابيس هي اللي عتساعدش في ذكرياتش ترجع وحياتش تعرفيها صح


ياسمين بدات تبكي: حتى ماعاد بين احس بالامان مع حد


نوريتا: قابوس يحبش معه كل الامان بس اوعديني انش ما تقلي له ايش بيحصل في الجلسات ولا تقلي له ايش بتحلمي واذا سألش نوريتا ردت لش الحبوب قلي ايوه ردتهن وما تكرري غلطه الصبح انا شليت التلفون فجاه منش لانش كنتي عتغلطي وقابوس عيرجع في لمح البصر ويشوف علاء وعلاء ماله ذنب اصلا.


ياسمين ابتسمت لمجرد ذكر علاء: مارايش نسير الليل نتعشى في المطعم اليمني


نوريتا: مشغوله معي عمل في المشفى سيري لحالش عترتاحي اكثر اجلسي اكثر مع نفسش واكتبي لي الاشياء الجميله اللي حسيتي فيها.




















📚 @rewayatyamania  🇾🇪

.

البـارت 35 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


ياسمين ابتسمت لمجرد ذكر علاء: مارايش نسير الليل نتعشى في المطعم اليمني


نوريتا: مشغوله معي عمل في المشفى سيري لحالش عترتاحي اكثر اجلسي اكثر مع نفسش واكتبي لي الاشياء الجميله اللي حسيتي فيها.



مشيت الياسمين ونوريتا فتحت المعرض وبتشوف اللوحات اللي صورتهن تبع قابوس كانين فوق 2000 لوحه بس اللوحات الاخيره اللي كانت معلقه ع الجدران وغيرهن مطروحات ع الطاوله شافت لوحه كان مرسوم فيها طفلين صغار جالسين في رصيف ع الشارع فيه ناس كثير.

الطفل الي كان على يمين اللوحه كان يبكي والطفل الي ع يسارها كان محاوط.بيداته ع كتف الطفل اللي بيبكي وكانه بيواسيه على شي ما.


لفت انتباهها لوحه ثانيه 🖼   كبيره وكأنها بتحكي قصه حصلت كان في بنت جميله وكانت حامل كان جنبها رجال بس كان شكله بشع وجهه وجه حيوان وجسمه جسم انسان بس كان من بعيد نفس الطفل اللي كان يبكي كان يشوفهم.

.
.


عند بحور خرجت من البيت وهي متبلده مش مصدقه ماسمعت حتى الدموع عاندتها ومانزلت كان داخلها يصرخ داخلها كأنه بركان كانت تسوق بكل سرعه وكأنها بهذه السرعه تشتي تتخلص من حياتها كلها زادت سرعة السياره كانت لفت يمين بالسكان لمحت الاسويره اللي لبستها حور لما تكرمين من استاذه الاسلاميه ذكرت حور ومر كل شي حصل ذيك اليوم صوت حور في اذنها


حور وهي بترفع خصلات شعر بحور وتحطهن لها قفا اذنها: المره الثانية عنجي من المرتبه الاولى مش الثالثه ما عنخلي سحر  تزيد علينا


بحور وقد الدموع في عيونها: ماقدرت البسها

حور: انتي واصل بكيه لانش ماقدرتي تلبسيها عتبكي ادي يدش

بحور مدت يدها ولبستها حور.

حور: دام اختش معش لا تقلقي شاكن امسح دمعتش واصل

بحور: واذا فلتيني يوم وبكيت وحدي

حور: ابسري الاسويره واذكريني ولا تبكيش ابدا الا وانا معش محد عيمسح دمعتش الا انا


بحور اكتبدت بالدموع وبتحس صدرها عينفجر من كثر الضغط عليه وبتقل لنفسها: حور قالت لا تنزليش دموعش وهي مش موجوده قوتش وسندش مابحد لكتف من عتسندي راسش

وقفت سيارتها لما شافت متر قطع عليها الطريق ووقف وسط الشارع انصددمت من حركه صاحب المتر كان لابس الخوذه تبع المترات (كوفيه الحمايه اللي تغطي الراس والعيون) بعد الكوفيه شافته وانصدمت من...

.
.

من يعيرني حياة أخرى! دون الم دون إن اعرف من اكون .


مسحت دموعها بطرف اكمام الفستان حقها

بدر تحيلا لحركتها وكأنها جيهان عنده مش بنت في العشرينات اما بسام حس انه حد طعنه بسكين في حلقه لا هو قادر يطلع الكلام ولا هو قادر يسكت مش داري مايفعل.

بدر من خلفها: سامحيه ياحور وغمز لبسام اخر مره له معذور بسر الزرق والشقر والحمر والصفر ونسيش


بسام من دون ما يحس اللي قاله: والله مايسوين حذاتها

حور وجليله وبدر بسروه

بسام بسرهم وسكت


حور: يله شاقوم اصلح الغداء


بدر: احنا تغدينا الحمد لله


حور: سم ويحين تغديتوا وانا مريعه بشهادتي  مصدقه لك وبمكابره وبتشوف بسام كم انا متحمسه للدراسه


جليلة: ياعيبتش عليهم ياحور تقلي لهم سم


حور: وهم ياعيبتهم علينا مايغدونا


بسام: لاجل عين تكرم الف عين قومين البسين هيا

بدر: ماشي انت اطلع ارتاح وانا شاسير ادي لهن

جليلة: الغداء موجود ليش عاد


قطع عليهم رنه تلفون بدر بسر المتصل وقطب (عقد) حواجبه شاف حور بنظره وخرج يجاوب خارج

حور شافته خرج قامت من عندهم ودخلت المطبخ فتحت الحنفيه وبتغسل وجهها تنهدت بقوووووه بتمسح وجهها بالشيلة وبتمشي مش منتبهه صدمت في شي بعدت الشيله من وجهها شافت بسام قدامها

حور رجعت خطوه منه وبسام فتح يداته بمعنى تعالي اسلم عليش

حور هزت راسها ورفعت جنوبها بمعنى لا

بسام بيحرك شفايفه من دون صوت: انا اسف اسمعيني وبياشر لعند اذنه


حور كابرت وهي اصلا فاقده له اكثر (مشاعر حور عكس بسام حور مشاعرها مشاعر اخ لاخته مشاعر تربوا مع بعض تربت عندهم وع يدهم ما تحمل اي مشاعر ثانيه الا مشاعر اخوه ) سارت لعند البوتجاز وبدات تحمي الاكل شافته جالس بيشوفها

بسام: يعني ما تشتيش تسمعي عذري

حور: ولاعذر عندي عيغفر لك ولاقد تسرش ترقد وبعصبيه(فعلت لك البيتزا) اللي بتعجبك كل واطلع بعدها ارتاح تحت عيونك حارق شكلك ما كنت تنام سوى وجسمك سمن شكلك ماعاد تمارس رياضه ولا سافرت وكنسلت كل برنامجك اللي كنت تفعله هانا


بسام بيسمعها ومبتسم ويشتي يضم يداتها ساع اول ويقل لها احكي لي ما حصل معش من لما عقدتي لليوم لانها الفتره الوحيده اللي ماعاد عرف عنها شي

بسام قرب لعندها: ادي اعاونش

حور قلبت عيونها فوقه وبتقرب الاكل



عند بدر شاف المتصل وضاق به صدره توقعها تتصل لانها عوايدها مثل كل مره يردها ابوها وابوه

بدر ساكت

غدير ع طول: ...


https://t.me/+Ecxq_OzMYh40M2E0



📚 @rewayatyamania  🇾🇪

.

البـارت 36 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


عند بدر شاف المتصل وضاق به صدره توقعها تتصل لانها عوايدها مثل كل مره يردها ابوها وابوه

بدر ساكت

غدير ع طول: طبعا اسمعني ما شاتصل لك واقلك مثل كل مره اعذرني وغصب عني ابي شلني هذه المره ابي غصب عني ردني ماعاد اشتيك قنع قلبي منك واكيد قنع قلبك مني دام قد معك الاشقر والابيض والذي بعتني في يوم وليله لاجلها ع العموم مايهمني خليها تسويك رجال انا تعبت اسويك رجال لاني في حياتك رجال ومره

بدر بصووووووت وبعصبيه من كلامها: قسما بالله لو اجي البيت وعادش فيه ل....

قطع عليه يمينه(حور وهي ماسكه يده وبتاشر بيدها يهدأ

بدر وكأنه تخدر وراق كل عرق فيه هدأ وجالس بيتنفس بصوت عالي


غدير: لا تهنجم فوقي انا غدير عمري ماحد يدسعني ولا يخطيني على ما يشتي اسمع يا ابن جهران حاجتي تجي لي من الالف للياء انا وعيالي وصورتك ماعاد اشتي ابسرها تجي تطرح المصاريف الذي اقلك عليهن في اي رساله ارسلها لك وتبسر عيالك والله معك ولاعليك مني ولا من خرجتي ولا عليك من بشي.

بدر غلق التلفون لوجهها

حور شافته وبهدوء: تحملها لاجل عيالك لا تشردهم


بدر ماتوقع تكون هذه ردة فعلها وكيف عرفت ان هي غدير: هي شردتهم هي


حور: ماعندها منقود غدير تشتي وقت لما تستوعب انك تزوجت عليها بس لاجل يرجع كل شي ع ماكان واحنا في الاول والاخير عنتطلق فالافضل تصارحها بعلاقتنا وتسرع بااجراءت الطلاق لاجل اسافر مع بسام وادرس معه في الخارج وانت عتسامحك لما تطلقني وترجعوا مثل اول واحسن


بدر جالس بيشوفها ويسمعها بصدمه مااستوعب ايش قالت شافها مشيت من عنده اركى جسمه ع سيارته وجالس بيشوفها وداخله: مالها هذه اطلق من ولاجل من رد داخله مالك يابدر مش قلت انك عتطلقها انت الذي قلت لها مشي هي

رد ع نفسه ايوه قلت بس خلاص انا حبيتها قال قلبه حبيتها استوعب ع نفسه وعلى داخله لما رد قلبه حبيتها مسح ع وجهه ومش عارف ايش يفعل دخل بعدها يشتي يلغي من بالها هذه الكلمه حياته احلوت بوجودها مجرد ما يشوفها تهدأ اعصابه انا انشهههد انك وقعت يابدر ومحد داري بك تنهد بقوووووته ودخل بعدها..

لو تموتي مااطلقش سمع صوت رسالة وصلت لتلفونه بيقراها وبيمشي

ادي صابون شامبو و..........الخ طلبات الى مالانهايه ....

.
.

دخلوا على مائده مالها اول ولا اخر مرتبه بشكل انيق وجميل

قابوس: تفضلوا كلوا يارجال وبدا ياكل هو قبلهم

العمال ورجال جهران من كثر ماهم جاوعين بداوا ياكلوا جهران رغم رجاله ومن حوله بيحس انه وحيد تعود يكون بدر ع يمينه في كل شي صح انه حاسس وداري بغلطه بس هو هكذا ماتعود الا سمع وطاعه من ابنه ومن غير ابنه سوى كان كلامه صح او خطا حاسس بتوتر وضيق في صدره مش مطرح قلبه لقابوس

حاتم بيهمس لجهران: هيا مالك ياشيخ تغدأ

جهران: افرض ان فيه سم لا تأمن له

حاتم طرح الملعقه وطنت في راسه

قابوس لمح شفايف حاتم وفهم ايش بيقل: تطمنوا كل ياشيخ ما فيه سم ولا شي.. الاكل من مطعم نجوم الشام لاقع بنا كلنا شي هو غريمنا


الشيخ بيهمس لحاتم: اعوذ بالله فيه جن دري مابنقل وبداوا ياكلوا


بعد ماخلصوا ياكلوا دخلهم قابوس مجلس كبير فراشه كله من حق زمان العقود منقوشه والمعاشر النحاس يتوسطين المفارش الوسط الكبار والمداكي وبنات المداكي فوقهن والثلاجات الماء فوق المعاشر النحاس


بداوا يخزنوا بعد ما جوا عدة شيوخ طرحهم قابوس عدول ووسطهم  لاجل يحرج الشيخ جهران وطرحه في موقف يخجل منه طول ماهو جالس معاهم ولاجل ينفذ خطته ومحد يشك فيه


قابوس بعد مرور نص ساعه مجابر ومن هانا لهانا بدا يتكلم: اسمعوا يا شيوخ والله ان جيتكم تسوى الدنيا ومافيها وانكم اصل المشيخه والقبيله وقد دسعتوا اليوم فراشي ومكانهم كلكم وسط قلبي كم عنجلس نتناحر ونتقاتل مع بعضتنا البعض لاجل ارضيه والا لاجل شجره والا لاجل اماكن تافهه ويسير كم من راس فيها وابي الاول سار ضحايا الاراضي والحق والمال وماناش داري من غريمي ومن قتل ابي بس مكانه وبيشوف لجهران عيرجع يقع في شر اعماله والله يرحمهم جميعا

المهم وانا في غربتي ومفلت حقي ومامعي ومفلت امي المريضه مابتبسرها غير ام صاحبي وماهمني شي لاني واثق ان حقي بين اهلي وناسي ومعارف جدي وابي بس انا وفرش لهم لوحه كبيره في الارضيه الذي بيسورها الصبح الشيخ جهران وهي حقي ومعي ما يثبت مااشتي حتى ابيعها انا كان مخططي كله عمل خيري اسوي مستوصف لاهل القريه ومدرسه خاصه للبنات وثانية للعيال ونسوي صيدليات بدل ما بيسيروا لوسط المدينه ساعه ونص او ساعتين لما يسعفوا حد والا يشتوا له علاج والا بناتنا بينحرمين من الدراسه معاهن لصف سادس والعيال يكملوا

انا عرضت المشروع عليكم اولا وعنقدمه لمجلس النواب ثانيا وانا متبرع بارضي...






















📚 @rewayatyamania  🇾🇪

.

البـارت 37 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


انا عرضت المشروع عليكم اولا وعنقدمه لمجلس النواب ثانيا وانا متبرع بارضي لهم هم بس ينفذوا المشروع ونحقن الدم الذي عيوصل للركب لان هي حقي حقي وهذا ما يثبت وقدم اوارقه للشيوخ


الشيخ جهران ماكان حيلته لما شل حور الا لاجل الارضيه وما قتل عمار الا لاجل الارضيه لان بعد هذه الارضيه ملايين تطلعه من القاع للسماء والمشتري جاهز وزور ورق تثبت اني حقه


الشيخ: كلامك يوزن بلد ومالنا بعد مصلحه القريه واهلها اعتراض بس هي حقي ومعي ما يثبت وقدم اوراقه وليش عيوصل الدم للركب واحنا انساب واهل بنتك زوجه ابني بدر والله مايوصل الدم للركب وبيننا نسبه وعيش وملح


الشيوخ كلهم بسروا قابوس وجهران: انساب ويحين تناسبتوا والبعض مش نسبك حاتم وغيره قد معاك بنات ياشيخ قابوس.. وغيره الله يهدي مابينكم


قابوس انحرج ومش متوقع انه عيقل قدام الناس كلهم هكذا ولا متوقع انه عيذكر هذا الموضوع ومن بناته اصلا مفكر ان هي بنتي وداخله هههه شل البنت لاجل الارض يلوي ذراعي بها بيحاول يكون طبيعي ويكتم غضبه ومايبين للناس الذي حوله بيشوف لعند جهران بنظرات وجهران بيشوفه باانتصار عظيم وكأنها حرب بارده بينهم بنظراتهم اللي كل واحد فيهم بيتحدى الثاني بكل خبث ولؤم وكره كل واحد فيهم سفاح ويحل الدم وقتل الثاني عنده يعتبر حلال


قابوس: ماعنختلف والنسبه عاد هي جديد ومصالح القريه فوق كل شي وبدا يتكلم عن الخارج وعن ماوصلوا له وكيف احنا جالسه حياتنا كلها دم وحقد وبغض وحقي وحقك وشل حقنا ...

.
.

وصلت للمطعم كانت وحدها بس هذه المره سارت وفي خاطرها تشوف علاء (غمدان) دخلت باب المطعم ولفحتها ريحه البخور اليمني وتعمد غمدان يبخر منه لاجل انه عرف بجيتها كان بعيد عنها وحاول ما تشوفه مثل ما وصته نوريتا


جلست في طاوله وجالسه وبعدت نظارتها الشمسيه جلست فوق الكرسي وشلت قلم وطلعت دفتر وبدأت تكتب والمكان كان هادئ جدا


(انا مجهوله الهويه قيل عني اني الياسمين وقيل اني يمنيه الاصل وفقدت امي واخي كذلك من زوجي السابق لا اعلم من هو زوجي السابق ولا اتذكر شكل امي ولا اخي ولا اتذكر شي ولا يوجد في ذاكرتي سوى قابوس فهو الشخص الوحيد الذي كان امامي في ذلك المشفى وقال انه وحيد ايضا وقد كان المنقذ لنا في الحادث وبعد علمي ان زوجي قد قتل اخي كما قال لي وانه حاول قتلي انا وامي وهربت منه خائفه اسوق سيارتي وبعدها حصل الحادث كرهته جدا وهو عدوي الوحيد في هذه الحياه ولا اود الا ان ترجع لي كل الصور في ذاكرتي من اجل ان اتذكر صورته واقوم بقتله فقد سلب كل شي جميل في حياتي لا اعلم كيف كان جمال حياتي ولكني....


اوقفتها كلمه جمال وكأن هذا الاسم مر عليها بتسمع اصوات في اذنها بتقل جمال جمال بترجع لها 📷 صوره شخص وهي بتقله جمال ياجمال

همست ع راسها بيداتها بقوه وبتحاول تطرد كل شي مر عليها لما كتبت كلمه جمال شافت العامل واقف فوق طاولتها وطرح صحن فيه كرتون  بسكوت ابوولد و ابريق من البن اليمني ) رائحه البن خلت اعصابها تهدأ وشافت البسكوت وارتسمت على مبسمها ابتسامه

ياسمين باللغه الالمانيه بتتكلم ومن دون شعور قالت: حد قلكم ان اعشق هذا واشرت على البسكوت ورجعت تمر في بالها صوتها وهي بتقل بسكوت ابو ولد ايوه وفيسع قد البن جاهز ياروحي


استغربت كيف طلعت الكلمه منها يعني هي تعرف هذا البسكوت يعني هي قد اكلت منه يعني ابتسمت وسكبت لها قلص بن وفتحته وكأن هي ذكرت كل لحظاتها معه بدأت تاكله وهي فارحه ان هي ذكرت شي بصوره واضحه ذكرها بالماضي


ياسمين خلصت تاكل رفعت يدها بتأشر للعامل

تقدم العامل لعندها: في حد عندكم اسمه علاء

العامل: ايوه

ياسمين: وينو ما شفته

العامل: مدري اختفى قبل شوي

ياسمين: خلاص شكرا

ياسمين داخلها وينو ليش مش موجود كنت اشتي... قطع عليها الكلام داخلها لما وصل غمدان بصحن كبير فيه كل الاكل اليمني الذي كانت تحبه ياسمين وتعشقه وسواه بنفسه لها


كان في محشي بالدقه وزايده فيه 🌶 لاجل هي تحب كل شي حار كان في الشفوت اليمني بالحقين كان في بنات الصحن بالسمسم والحبه السوداء والعسل البلدي كان في المرق واللحم البقري في حرضه سوداء كان في الرز الابيض والبطاط المسلوق وزحاوق الفلفل الاخضر فقط والسلطه من دون ما يقطعها غسل الخضروات فقط كل شي كان تحبه كان موجود في الصحن


ياسمين باستغراب بتشوف الاكل وتشوف علاء: تعرفني انت


علاء شاف لعيونها اللي فاقد لهن قووووووي: ...

https://t.me/+Ecxq_OzMYh40M2E0




📚 @rewayatyamania  🇾🇪

.

البـارت 38 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


ياسمين باستغراب بتشوف الاكل وتشوف علاء: تعرفني انت


علاء شاف لعيونها الي فاقد لهن قووووووي: ماشي مااعرفش


ياسمين: كان ايش عرفك اني احب هذا الاكل وبتشوف الاكل وانا ماقد طلبت 


علاء: قلت اجبر بخاطرش لش من اليمن خيرات مثل ماقلتي لي وشفتش لما دخلتي المحل قلت ادي لش كل شي عندنا موجود


ياسمين بتشوفه: كأني شفتك من قبل ممكن تجلس تاكل معي


علاء بيشوف صاحب المحل اللي قدهم اصحاب وعارف بقصة غمدان كلها ومتساعد معه جدا

جلس غمدان وبيقرب لها ياسمين رجعت لها صوره في ذاكرتها خلتها تشهق بقوتها

.
.

عند بحور شافت علي قدامها انصدمت ماتوقعت اصلا وجوده وكيف حصل هذا وقطع عليها الطريق معقوله يكون بيراقبها


علي نزل من المتر وبيدق بكل عصبيه زجاج سيارتها وبصوووووت: مجنونه انتي مجنونه مش انتي بعقلش كيف بتسرعي هكذا مالش تشتي تموتي واموت بعدش


بحور جالسه بتشوفه من دون حتى ماتفتح زجاج السياره متبلده من الموقف بقوه


فتحت الزجاج بحور: ليش بتلحقني


علي: همش ليش بتلحقني مش همش السرعه حقش وبصوت كله حنيه مالش يابحور ليش انتي غامضه هكذا حاكيني مالش


بحور حست الغصه باب حلقها ماتعودت حد يكلمها بهذا الاسلوب الا زياد ردت: اوعدك اكلمك بكل شي قريب ياعلي ذاحين ممكن ما تلحقني وتخليني براحتي


علي بيشوفها بكل حب: بس اوعديني تسوقي دلا لا تسرعي


بحور هزت راسها بمعنى حاضر وشغلت سيارتها ومشيت


علي تنهد: مجنونه وجننتني معاها يارب اني لي واذا مشي لي لا تخليها لغيري


بحور جالسه بتمشي بسيارتها متجاهله كل المكالمات والرنات والرسايل من أمل وحنين وزياد كانت تسمع تلفونها وهو في الشنطه ولا حتى اهتمت تشوف لان هي عرفت ان هي ماهي شي عندهم اذا كانت امها والحضن الذي احتواها بتتكلم عليها بهذا الشكل ولا يشتنها لزياد لاجل ان هي من الدار ولاجل ان هي تعرضت للاغتصاب وهي منومه يعني مالها ذنب ليش بيحملني ذنب مشو ذنبي ليش قتلني وقتلين فرحتي في اني اقل لزياد ايوه يازياد اشتيك انت وبس اللي بين احس معه بالامان

وصلت لباب عياده نساء وولاده دخلت العياده وجسمها كلها ينتفض من الخوف وقلبها لو بيسمعه الذي جنبها لايحس بانزعاج من كثر دقاته حجزت عند الدكتوره ومنتظره حجزها تذكرت تلفونها شلته من الشنطه ورجمته في السيارة في الكرسي الخلفي بعد مرور ساعه ونص سمعت اسمها بحور ال....


بحور دخلت لعند الدكتوره ماتعرفها ولا حتى عارفه ايش اسم الدكتوره بس من ملامحها الكبيره في السن اطرح قلبها شويه


الدكتوره كانين عيونها في الاوراق ومن كثر الارهاق والتعب ماعاد بتشوف لعند المريضه بعدت النظاره بكل تعب وبتفحس عيونها باطراف اصابعها: ايوه ايش اسمش

بحور: بحور

الدكتوره رفعت عيونها لعندها بعد ما سمعت اسمها وهو بيتقال بصوت مهزوز


د/فاطمه شافتها وشكلها الخايف وعيونها في الارض: بحور ممكن ترفعي وجهك اشوفك

بحور رفعت وجهها

د/فاطمه: ماشاء الله قمر متزوجه صح

بحور هزت راسها بمعنى لا

د/فاطمه استغربت وحاولت تخفف من توترها وتحسسها بالامان: تشبهي ممثله اجنبية حد قلش هذا الكلام من قبل

بحور شافتها وهزت راسها بلا

د\فاطمه: ايش مشكلتش ياماما

بحور وكأن هي لمست ع الجرح وماقد طاب ذكرت امل لما شافتها قدام السوبر وكانت بتبكي نفس الكلمة وبنفس النبره


بحور حاولت تقوي نفسها وكودا خرجت الكلمه منها: اشتي تسوي لي فحص وسكتت شويه وقالت(فحص البكاره)اشتي اشوف انا بكر او لا


د\فاطمه ماانصدمت لان كثير حالات يجين لها هكذا بس ماتوقعت تجي بنت ومامعاها حد لوحدها تشتي تفحص


د/فاطمه وتشتي تعرف السر: بس انا مااسوي شي الا لمااعرف سبب الفحص يعني ليش وكيف


بحور بتشوفها بنظرات كلها خوف وتوتر وعيونها ملان دموع بس هي حالفه ماتبكي بتكابد لصدرها وقالت...

.
.


حور بعد ماكملت تنظف المطبخ شافتهم عادهم جالسين في الصاله بيجابروا طنشتهم وطلعت تصلي

بدر بيسمع اذان العصر طرح يده ع جبهته بالخفيف(اتمنى تكونوا فهمتوا الحركه🤦‍♂): اذن وماقد خزنت ربشتنا اليوم يااخي


بسام بضحكه: هههههههههههه لو انت وابي سديين ان قدك هذا الساع باغر قات

بدر ذكر ابوه: الا صدق وين جاء ابي ما قد ضوى

جليلة: قال عيجلس عند الارضيه يومين ثلاث لما يكمل يسورها وداخلها(يسرقها)


بدر: خلاص الليله عنسمر ونخزن انا وانت للصبح ذاحين ارقد وانااسير ادي لغدير وشاف حور بنظره الذي قالت تشتيهن وبسر الجهال واجي نخزن


بسام: يله تمام


بدر قام للمطبخ شافه نظيف ومرتب ذكر...




















📚 @rewayatyamania  🇾🇪

.

البـارت 39 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


بدر قام للمطبخ شافه نظيف ومرتب ذكر مطبخ غدير كيف بتخلي كل شي لليل خصوصا اذا معاها خرجه والجهال ترجمهم عند امه واصل للساعه تسع او عشر ويرجع يسير لها ع ضويته من عند ابوه تذكر كيف انه ماعاش استقرار وحياه زوجيه هادئه وكيف عيونه مغطى عليهن وكان يشوف كل شي فيها حالي بس فعلا المواقف تكشف الشخص ع حقيقته والقلب لما ينوجع وينكسر من اقرب شخص له يتولد في القلب قناعه من كل شي يخصه ..

فتح الباب ع حور

حور نكزت كانت سارحه حور ويدها ع صدرها: مالك فجعتني الناس يدقووووووا


ع طلعه بسام سمعها وبدر واقف باب الباب بحكم انه مابيشوف بسام انه وراه

بدر: مرتي ليش ادق

حور وهي معصبه للاخر منه: مرتك في احلامك مش ترفضني في البدايه وتسمعني كلام ساع السم يوم العرس قصدي يوم الدفن وذاحين بتمكني مرتك لو سمحت انا لي 8 شهور انام لحالي ومش متعوده عليك اطلاقا كن دق الباب قبل ما تفتح وبعدا رجعت غدير سير عندها تفاهموا وانا مثل ماقلت لك في الحوش طلقني لاجل اسافر مع بسام ولو انا زاعله منه سهل واذا حتى ما طلقتني شاسير معه


بدر وملامح الغضب باينه ع وجهه وحور بتتحاشى النظر لعيونه لان هي مجرد ما عتبسره وملامح العصبيه باينه ع وجهه عتسكت وتنسى كل الكلام شخصيتها عكس بحور تماما.


بدر دخل وغلق الباب بقووووه


بسام اقتهر لما غلق الباب ومتفاجئ من حور وطلبها بالطلاق وداخله احببببببببش ياحور يارب يارب تتطلق ولو عتقع بيني انا واخي القاطعه بس مستعد اخسر اخي ولا اخسرش ومشي من قدام الغرفه وكله فضول وخوف لايسوى بدر بحور شي او يزعلها او ياذيها بشي مشي لغرفته وداخله نار


بدر وهو مقبع ولابس معوز وشميز وحالق دقنته خفيف قرب من حور لما حست بحراره انفاسه بتلفح وجهها رفع اصبعه بمعنى بيهددها وعيونه في عيونها وبيشوفها بكل قوه عكس الخوف اللي في ملامح حور

(هي كلمه يا بنت الناس واطرحيها في راسش وحط اصبعه ع راسها مابش حاجه يشلها البدر ويرجع يتركها بسهوله فهمتي ياحور يعني طلاق ماناش مطلق الا لما اشتي انا مش انتي ومره ثانيه ازيد اسمع هذا الكلام ياويلش مني ومن بين اسنانه فاهمه

حور بتهز راسها بمعنى ايوه وهي ماعاد تقدر تتحمله اكثر بتحس قلبها عيوقف من شده الخوف


بدر خرج وغلق الباب بعده بقوه شغل سيارته وهو جالس معصب للاخر بيسوق بكل عصبيه وصوره حور وهي خايفه منه بين عيونه

صاح بصوووووت عالي وسط سيارته (ليييييش يابدر تخليها تفتجع منك هكذا مارحمت عيونها كيف بترمش بسرعه ماعاد قدرت تبسر لعندك ليش ما اقلها ماشاطلقش لانش دخلتي ذيه وبيضرب على مكان القلب في صدره دخلتي ذيه ياحوووور والله انش دخلتي فيه كيف اطلقش كيفه.


وصل للسوبر ماركت شل كل شي موجود في الرساله لغدير وصل لبيته نزل بكل عصبيه مااعتادت عليها غدير

دخل لها الاغراض من غير حتى ما يرفع عيونه لعندها دخل لعند عياله ضمهم بقوه

جهران: بابا انا احبك خيرات وماعاد احب جدو ليش جدو يضربك

جيهان: جدو شرير وانا احبك واحب عمه حور واحب ماما جليلة


بدر توجع اكثر من كلامهم: لا جدو طيب وحالي وعيدي لكم جعاله خيرات وهو كان معصب مني لاني رفعت صوتي فوقه ويحق له يضربني لان الابن ما يصيح فوق ابوه وبعدا جا وحبني هانا بقعه الالم

جهران: يعني تصالحت انت وجدو

بدر: ايوه

جيهان: وانا اشتي احبك(بوسه) ساع جدو

بدر اشر لها ع خده وابتسم لبوستها وجهران نفس الشي ضمهم بدر بقوه لصدره وداخله (الله يقدرني اعوضكم عن النقص الذي عشته في حياتي وابعدكم كل البعد عن القبيله والمشيخه


بدر: معي لكم مفاجاه

جيهان وجهران: عتشلنا الحديقه

بدر: غير الحديقه عمو بسام جاء من السفر وغدوه شاجي عنسير عنده قدو فاقد لكم قوي

جيهان بفرح: هيييييييييي ذاحين ادا لي فستان حالي مكوش ساع حق الاميرات

جهران بسرها بنص عين: مالها هذه يابابا انا قال عيدي لي ايباد

بدر: ادا لكم كل شي سمع صوتها

غدير: انا شاخرج شل العيال معك عند جدتهم

بدر بيحاول يكتم اعصابه اللي كودا هدات بابتسامة وبراءة عياله

بدر: يله ادخلوا غرفتكم ولا تخرجوا الا لما اقل لكم

جيهان وجهران مشيوا غرفتهم


غدير قدي جاهزه ممكيجه وقاصه شعرها وسابغه له وكأن هي بتعاند بدر لما قال لها ماتقصيش شعرش يعجبني وهو طويل

بدر متجاهل شكلها

بدر: اسمعي يابنت الناس هي كلمه قسما بالله لو تخرجي من باب البيت هذا من دون اذني والعيال تفلتيهم ياويلش مني فاهمه


غدير بصوت: لا تجيش تتمرجل عليا

بدر قرب منها وهزر شعرها: صوتش مايعلاش عليا رجال من قبل مااعرفش بس الميزه والحب والاحترام ماينفعش معش بدل ماتجلسي مع العيال المفروض تكوني فاقده لهم لش منهم شهر ونص ماقد شبعتي خرجات وفلت شعرها ها الكلمه في اذنش


غدير ماعاد ردت ومصدومه من بدر...



https://t.me/+Ecxq_OzMYh40M2E0




📚 @rewayatyamania  🇾🇪

.

البـارت 40 ⇩


عبـق اليـاسمـين 🤍

👌🏻👇🏻 😍
📚 @rewayatyamania  🇾🇪


غدير ماعاد ردت ومصدومه من بدر وتصرفه اللي اول مره في حياتها يسوي معاها هكذا ويرفع صوته

دخل لعند عياله وخرج لعندها الجهال شاجي لهم غدوه الصبح عمهم جا من السفر

غدير: ليش وين عترقد لما عتجي لهم


بدر شافها بنظره خلتها تسكت وخرج من عندها ...

.
.

عند بحور (وهذا كل شي حصل معي)


د/فاطمه بكل حنيه وعطف ع بحور وبنت مثلها ماتستاهل كل شي حصل معاها: قومي يا بنتي الله يسخر لش كل خير لا تقلقي

.
.


عند امل وحنين منهارات بيبكين في المستشفى وزياد بيجهز اجراءت الخروج

امل: كانوا بخير كنا بنتحاكى مسرع ماتوا مسرع ياالله مااقرب الموت

حنين: الصبر ياماما انا لله وانا اليه راجعون


امل: وبحور ردت او ماشي اااااح ياامه فلتيني وسرتي فلتيني لمن

حنين بتعيد الاتصال لعند بحور وبحور نفس الخبر مابترد

امل: مابترد يعلم الله وين هي وداخلها والله ان هي سمعت كل شي بحور سمعت كل شي ريتني ماتكلمت ريتني كتمت كل شي بقلبي


زياد وضيقه ع وجهه: يله روحوا مع صاحبي وانا شاكمل الاجراءات والحقكم


امل: ماشافلت امي شاجلس تروح حنين وتبسر البيت وبحور وين هي


زياد وكأنه نسي بحور وبعصبيه: وقتها هذه والكل وين هي ناقص انا حريق دم يله قومي اضوي انتي

حنين قامت وهي بتمسح دموعها وسارت مع زياد لعند سياره صاحبه.



في نفس اللحظه كانت بحور بتمسح دموعها اللي خانتها ونزلت فرح


بحور: يعني ايش يادكتوره


فاطمه: يعني ولا شي تطمني كأنش بنت ولا فيش الا العافيه لاتخافي تزوجي وانتي رافعه راسش ولافيش شي


بحور: يعني كيف مافهمت

فاطمه بابتسامه: يعني لانش كنتي صغيره والعمليه حصلت في وقتها التم كل شي بقدرة الله


بحور: اللهم له الحمد وانفجرت بكاء

فاطمه قامت من فوق الكرسي وبتضمها بقوه حست ان هذه البنت تشبه صاحبتها ياسمين الا نسخه منها

بحور بعد دقايق: انا اسفه

فاطمه: ليش الاسف يابنتي بس اشتي منش طلب ممكن

بحور: عيوني

فاطمه: نصور انا وانتي سليفي والله انش نسخه من خبيرتي الله يفتح عليها سافرت كانت تشبهش ايام ما كانت في عمرش

بحور: بس صوره جوا وجلسين جنب بعض وبيتصورين

بحور ذكرت تلفونها وانا كنت خاوره احتفظ بصوره عندي لكم بس تلفوني فوق السياره

فاطمه: انا حاسه انه عنلتقي مره ثانيه

بحور: ان شاء الله

فاطمه: وشاكن من المتابعين لبرنامجش واشارك معش

بحور بابتسامه لطيبة هذه الانسانة: ان شاء الله وانا مريعه لمشاركتكم وتسالمين ونزلت بحور وهي بتنزل بدل الدرج درجتين مشاعرها ونفسيتها هدأت بعكس ما كانت قبل ما تدخل لعند الدكتوره.
فتحت سيارتها والتفت تجيب تلفونها ع اتصال حنين لها


حنين وهي فوق السياره وبصوت كله بكاء وشجن: وين انتي وين انتي كم قد اتصلنا لش كم قد رسلت لش

بحور نكعت بطونها مجرد ماسمعت صوتها: حنين مالش ما لصوتش زياد فيه شي

حنين ببكاء: زياد بخير بس امي سيده

بحور: ساكته وكأن هي عرفت بشي الذي عتقله لها حنين

حنين: بحور وين سرتي وين انتي مالش سكتي

بحور: معش معش

حنين: امي ماتوا جده ماتوا جي البيت.

بحور ارتخى كل شي في جسمها وفلت التلفون من يدها وبتحس ان هي مش قادره حتى تفتح عيونها.



عند بسام جالس بيشوف حنين من المرايه بعد ماانهارت بكاء
داخله ياالله كم قد بكيت هذه البنت بختي كنت مايقع الا اتصل لزياد يجي يخزن عندنا اتصل ع هذا الخبر

شويه ويشوفها بتمسح بطرف الشيله حقها عيونها وانفها رحم لحال الشيله وشل الفاين والتفت لوراء وطرحه شافها والتقت وجوههم ببعض


بسام انصدم لما شافها وقال والله ان هي نفسها نفسها البنت اللي كانت في الجوله اليوم الساعه 11 وبتدعي وتتمجنن معقولة هي اخت زياد ياالله والصدف اليوم اجتمعنا 3 مرات مره جوله ومره في المطعم والثالثه هانا..


وصل لقدام بيتهم وهي نزلت دون حتى ما يلفت انتباهها انه نفسه الرجال اللي شافته في الجوله او حتى انها قد بسرته جلس موقف سيارته باب البيت


سمع رنه تلفونه: ها بدر

بدر: وين انت ياكيس النوم فيسع اطلع انا في الطيرمانه قد شليت لنا قات امانه مابعده الا العافيه


بسام ضحك: شكلك عتخزن وحدك

بدر: ليش

بسام: قمت اتفيضل واعزم صاحبي من المعهد لانه عيجي معي هذه المره المانيا وندرس انا وهو فقلت اقله ان قد جيت ونخزن جمعه اتصلت وهو في المستشفى جدته توفت وانا قمت معه ابسر اذا يحتاج شي واني محلبط عندهم شد انتباهه وماعاد سمع بدر ايش بيقل لما شاف بحور بتنزل من سيارتها

بسام: سبحان الله سبحان الله حور نفسها حور


بدر: حور من مالها حور مالك

بسام ساكت بيشوفها بكل قوته كان قلبه يدق يدق ومااستوعب صوت بدر الا لما دخلت البيت

بدر: يييييي بسام وين انت مالك طننت من بتحاكي مالها حور

بسام: ها ولاشي ولاشي شاحاكيك بعدا وغلق








https://t.me/rewayatyamania/46942











📚 @rewayatyamania  🇾🇪

🤍


بارتـات يومنـا الجمعـة👆🏻😍

💕 قائمـة روابط جميـع القصص والروايات التي تـم عرضهـا والمكتملة

❣❣❣❣

🔅للـوصــول للقصـص عـن طريـق اسـم
الكاتب او الكاتبـة

👈🏻 له او لهـا اكثـر من قصـة في القنـاة👉🏻


👈🏻له او لهـا قصـة واحـدة فقـط في القنـاة👉🏻


❣❣❣❣


🔅للـوصــول للقصـص عـن طريـق اسـم القصـة


هنـــــ👈🏻1👉🏻ـــا


وهنـــــ👈🏻2👉🏻ـــا


وهنـــــ👈🏻3👉🏻ـــا


❣❣❣❣

🦋🔹🦋




روابـط روايــات الكـاتبـة المتـألقـة: نجـلاء يحيـى التي تم عرضها في القناة



1. مـن حبـك حبيـت ظلم الاقـدار


2. خـربشـات وجــع


قراءة شيقة نرجوها لكم



📚 @rewayatyamania 🇾🇪

.

روايات يمنية من قرية براقط💙 من صديقة القناة مشكوورة🌹

.