.

الذئب والفريسة

مستند

و

روابط

.

البـارت 11 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


وائل: تمام بس راعي امد
ودخل بسرعه للبيت وخرج

وائل: هاه شل هذه الزلط لك

إياد: ماشي يا وائل انت داري انني ما اشلش من احد

وائل: اذا ما تشتيني احاكي ابي شل هذه الزلط

إياد: ماهو يا وائل قووا الا عمي لايدراش انت داري كيف عيفعل بي قوا لاتحاكيهمش

وائل: جر هذه الزلط انا داري انك محتاج لها

إياد: لاجرها بس عاسب لا تحاكيهمش يله خاطرك

وائل وهو نفسه يخبي إياد وسط قلبه بس مابش في اليد حيله قال بحززن: انتبه لنفسك

إياد: ولاعليك
وخطي إياد بحممله عاسب يوصل بسرعة

ابو وليد: مالك تأخرت في الباب

وائل: هاه مابلا صاحبي جاء

ابو وليد: ومالك ماتدخله

وائل: مابلا يشتي مني دفتر وخطي

ابو وليد: يله سابر

.
.


إياد وصل للبيت وقدهو تاعب من الحمله خرج الزلط من جيبه وبيعدها: يوه يا وائل ليش هذه بكلها وخباها كلها وبقى له الف بس
وخطي يرقد بعد يوم سعيد بالنسبه لإياد لانه قذا له خيرات ماقد اكلش هكذا وماقد لعبش رقد وهو بيحمد الله
.
.


ياسر وهو ممدد فوق السرير وبيجابر روحه: ياالله كيف عنلقى هذاك الولد وايش سبب المرض حقه هل المرض مميت او لا وهل المرض عيختفي لوما يكبر او عيجلس يرافقه

بس كيف وشه لونه اسود وايديه بيض غريب امره هذا الولد
او شكله بيضحك على الناس
نفض الفكره من راسه ماشي مستحيل لو هو بيضحك علينا ما ينتفض اول مايقوم فجيعه وبعدا ايديه كيف عيقدر يخليهن يزرقين ويصفين مابلا شكله تاعب صدق

يوووه ياالله ساعدني
واقتلب للشق الثاني بيحاول يرقد
.
.

*صباح يوم جديد ويوم سعيد للبعض وحزين للبعض
قد تختلف البدايات لكنها هي اقدار الله لنا لذا فلنسعد بها *


قام إياد بروتين مختلف اليوم يذهب لصلاة الفجر في المسجد ويقرأ قرآن بصوته الجميل العذب
روح للبيت وبدل لداه احلى لداه عنده بنطلون قد هو قصير عليه بس بيلبسه باعتبار انه ياسعم برموده وشميز قد اكمامه صغار بيعطفهن وكانه مش صغير واوقعين عليه تحفه

خطي بعد ماجر له زلط وسار للبقاله واشترى له سندوش وعصيرر وهو بيحاكي نفسه * دلع نفسك معاك زلط اسهل اليوم مابه معاك الا اليوم *

جلس في بقعه فوق كرسي وبدأ يصتبح
وكمل وبدا يخطى وهو بيتبسر الناس
وصل للمكان الذي يشتي تنهد: فقدتكم والله فقدتكم

وبدأ يحمل كانه عيلقاهم ويحجفهم
.
.

ياسر سار لبيت محمد وبيدق الباب

ابو محمد: من

ياسر: انا ياعم صاحب محمد

ابو محمد: حياا ادخل ادخل

ياسر: اسلموا بس وينه محمد

ابو محمد: داخل راقد

ياسر: هاه عتقدروا تقوموه اشتيه

ابو محمد: ادخل ادخل قومه مابحد

ياسر بشيطنه: تمام بس قبل ما ادخل اشتي منكم حاجه

ابو محمد: مالك ياابني

ياسر: ايش اسم خطيبة محمد

ابو محمد ضحك: هاه اسمها ريم

ياسر ضحك: اسلموا

وحمل بعد ماحاكى ابو محمد مرته ان ياسر عندهم وطلع في الدرج لاغرفه محمد قدهو حافظ لها من كثر مايجي عنده

ياسر: محمد هياا قوم

محمد ولا في حسه نومه ثقيل

ياسر شل ورقه وعطفها وبدا يحركها في وش محمد

ومحمد بيحرك يده يخرها وياسر عيطفح ضحك
ياسر: هيا حرييوو شرق عليناا اقطب

نكز محمد واخيرا وهو بيفحس عيونه: ماجاء بك من صباح الصبح.

ياسر: جيت اجهز الحريو حقنا هيا اقطب اليوم نفحر فيك عاسب لابسروك يحبوك من اول نظره

محمد ضحك عليه: سعليك عيحبوني لانني قمري من غير

ياسر: مصدق لروحه هيا شرق علينا

محمد: ناهي اول نصتبح وبعدا يحلها الله
.
.


حمل ووصل لحقهم القبر وحضنه بايديه الصغار

إياد وكانه بيحاكيهم: وحشتوووني قوووي قوووي فقدتكم البيت من دونكم شوعه اي حين عتجوا والا اي حين عتشلوني معاكم
مراعي للوقت الذي تشلوني معاكم

قام من فوق القبر وبدأ يوزع الريحان: ابسروا اشتريت لكم ريحان على ماوعدتكم المره الاوله لانني ماقدرت ادي لكم

اباه اماه انتوا داريين ان ابنكم بطل وعيرفع راسكم للسماء انا دائما بين ادي درجات نهائيه على ما وعدتكم


✨باااك✨

إياد وهو فارح طلع يستلم نتيجته من المنصه حق المدرسه بعد ماسمع اسمه وانه الاول
ونزل لاعند امه وابوه

إياد: ابسروا ابسروا كم جيت

ابو إياد وهو بيلبسه الفل: ايوه هذا ابني الشاطر ذلحين اوعدني انك تجلس هكذا الاول

إياد: حاضر من عيووني وعد ما اجي الا الاول

✨

لاتقلقوا ولا ابنكم بياكل ويشرب ومابياكل حرام ما بياكل الا من زلطه وتعب جبينه

مسح الدموع من عيونه وسنب: ابسروا مااحلى اللداه الذي فوقي حاليه صح هذه اشتريتوها لي في العيد قبل ما تستشهدوا
جيت بها عاسب تبسروا مااحلى ابنكم كيف هو محافظ

وشويه وارتجم فوق القبر بانهيار:
مامه شلوني عندكم تعبت اتظاهر للناس حاجه وانا حاجه ثانيه
بابه فقدتكم قووي

ورجع يبكي فوق القبر والناس الذي في الروضه حق الشهداء متأثرين منه قووي بس بيخلوه براحته عاسب يرتاح
















📚 @rewayatyamania  🇾🇪

.

البـارت 12 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


كملوا يصتبحوا وساروا للحمام ومعاهم اصحابهم وعيال عم محمد

ياسر: وحقك يا محمد

العيال: حقك

وقرب ياسر لاعند اذن محمد وقال: وحقش يا ريم

محمد بهرر وانصدم: من قالك من قااااال

ياسر ضحك من قلبه: بعدا بعدا ذلحين خلينا مش حالي افضحك عند الخبره وغمز له ياريم تمام

محمد نزفه بالماء: انا اوريك حاااضر

رجع يضحك ياسر من قلبه لانه برد قلبه شويه



✨باااك✨

نرجع لخطوبه ياسر
محمد بنزغه: يووه يا ياسر امس سمعت اسمم حالي قووي مكون من سته حروف عجبني مناسق لاسمك قوي

ياسر: يعلم الله ايش نهايه المقدمه هذه

محمد: نهايتها وبدايتها ياسمين

ياسر حاول يبين انه مش اسم خطيبته: من هذه

محمد: ابووها النيزغه مش حاليه قد درينا باسمها

ياسر: يفف مايفوتك شي

محمد: ايوه انا محمد مش باب حوي


✨بااك✨
محمد: ياسر ووو ياسر مالك مطنن

ياسر: مش مطنن ولاشي

محمد: مابلا شكل حسك عند ياسمينتك

ياسر بضبح: يااخي لاتكن تدي اسمها انا وحدي الذي اقله

محمد: اوهو قد بنغار

ياسر: محمد

وبدأوا يتلاحقوا ومحمد جلس اسبوعين يضحك على ياسر ويعلق عليه
✨

.
.

إياد: قدني فاقد للرقده في حضنكم انا شكلي لارقد عندكم اليوم احس بحنانكم شويه
وهو بيحاكيهم غفى فوق القبرر ورقد والدموع ملان عيونه

رجال: ابسر ابسر ماارحم هذا الولد من اول وهو بيجابرهم وذلحين رقد

صاحبه: ايوه شكلهم ابوه وامه

رجال: ايوه سمعت انهم قصفوا بيتهم وهو كان في المدرسه وروح منها والبيت خرابه وابوه وامه كانوا في البيت.

صاحبه: مسكين عتوقع صدمته الله يرحمهم ويعصم قلبه وهو وين ساكن

رجال: سمعت انه عند عمه وقالوا عمه خبيث

صاحبه: ما اعتقدش ابسر على نور في الولد وكيف هو لابس

رجال: ايوه صدق

وخطيوا وإياد راقد

طرح الرجال يده في ظهر إياد والرجال هو دائما في الروضه هو الحارس وقدهو داري اي حين بيجي وداري باسمه: إياد إياد حبيبي قوم

نكز إياد وابسر الرجال وهو متعود دائما يقومه هو ويقل له وفي عيونه دموع: كل ماقدني لاسير عندهم انت تقومني لمه ياعم لمه كنتوا عتخلوني اجلس راقد لوما اسير عندهم

الرجال بحزن وهو كل مره يقل له هكذا: إياد حبيبي عاد الحياه قدامك لا تيأسش لاتبكيش انت داري ان الله يحبك

إياد: ايوه الله يحبني خيرات لانه مبتليني بهذه المحن كلها

الرجال: ايوه وانت ماقد جاش اجلك قوم افتخر ابوك وامك شهداء عند الله هم رفعوا راسك وانت ارفع راسهم بحبك لله وللرسول والتزامك في ماقال الله واجتهد واطلب العلم واكيد انا داري انت الاول

إياد مسح دموعه: ايوه

الرجال: يله قوم قوم اتغدى معي قدهو وقت غداء وودع اهلك يله

إياد: يوه ليش كم قد الساعه شكلي رقدت خيرات

الرجال: ايوه نفس كل مره يامشاغب الساعه 2 ونص بس هاه مش مثل كل مره ما ترضاش تتغدى معي واجلس اراشيك وما ترضاش خلاص كل يوم تجي للروضه عتتغدى معي ويله قوم اوبه تقل لي ماشي لاحارش بك عند ابوك وامك وضحك

إياد بابتسامته الهادئه: حاضر ياعم

وخطي إياد يتغدى مع الرجال والرجال بيحاول يخلي إياد يضحك بشتى الطرق
.
.

كملوا يتحمموا وهم بيزفوا محمد ولا كأنه عرس

ياسر: هيا نسير المطعم عيوقع ضخمم خاصه ان احنا كلنا

محمد: ايوه صح وعلى حساب الدكتور ياسر

ياسر ابسره بنص عين: لوما بتبسرني قدني موظف قلي هكذا وابشر بعيوني الثنتين ماذلحين من اينه ياحسرتي

محمد قرب لاعند اذنه: داري بتطيحها هدايا لحبيبة القلب

ياسر بضحكه: ايوه كان ما قصدك عتجرب عتجررررب

وخطيوا للمطعم واتقاسموا الزلط

وروحوا لبيت محمد وخزنوا خزانه ومحمد جنب ياسر بينغط عليه

محمد: ابسر ابسرر كيف شكلك بالقات شوعه

ياسر قزز: بدأ الرازم حق محمد

محمد: يااخي القات شوعه يلللله لمغطه غطوه والا لو عليا ما اخزن بس ماعيقلوا الناس

جاوب ابن عمه عبدالله: ماعيقلوا شي مابلا حاالي لا تخزن ولا وبكم يوقعين الصور حاليات كما لو تخزن بيوقع شكلك شوعه مقزز يالطيف

محمد: امانه ياعبدالله كان ولا عنذوق قات غطوه

ياسر شاوره: وبكم تبسرك الريم وانت طبيعتك حاليه

محمد بقزازه: خيرة الله عليك خلاص درينا انك دريت

ياسر ارتزح: اشتي ابرررد قلبيي
ورجع يضحك

.
.

إياد كمل يتغدى: يله اسلموا ياعم

الرجال بمزح: الله يسلمك ولو هيا عتخزن معي

إياد: مععععع معع مش حالي القات ابدا اضراره كبيرره مستحيل اخزن

الرجال اعجب بإياد: ايوه صح القات شوعه بس اذا واحد تعود عليه مايفعل الله يعيننا لوما نفلته

إياد: ان شاء الله يله خاطركم

وخطي للبيت روح وبدا يسبر المسابح
وهو بيحفظ الايات وهو بيسبرهن
كمل يسبرهن وابسر قد الوقت شرق قام لبس وسار الجامع وروح البيت رقد














📚 @rewayatyamania  🇾🇪

.

البـارت 13 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


* صباح تتخلله زقزقة العصافير *

قام إياد بعد ماصلى الفجر وقري قران وبدأ ينبش اللداه حقه الذي في الدولاب الحديد الذي باقي معاه من البيت الخرابه ومركوز في الخرابه بين التراب والحجار حق البيت

وبيحاكي نفسه: ياالله ايش البس اليوم اشتي زنه حاليه

وبيدور ولقي زنه اخر زنه اشتراها له ابوه مسكها بيده وضمها لصدره: الله يررحمكم

وابسرها ملعوزه وفيها شويه تراب: يووه يا إياد كيف عتفعل ابسر كيف هي وسخه وملعوزه شكلك ما عتسيرش

وشويه صيح بفرح: ايوه اشلها المغسله اخليه يغسلها لي ويكويها

وجهز له العسيب حقه والكوت حقه حق الزنه الذي اشتراه له ابوه مع الزنه وشل الزنه والكوت المغسله وفي نفسه: يوه يا وائل ما لنساش فضلك عليا ابددا

غسلهن واكواهن وروح البيت وبدأ يذاكر له شويه امد لوما يوقع ظهر ويسير الجامع
.
.

ياسر وهو عند محمد من زقزقه فاارح به ومحمد فارح وشاق الابتسامه ملان وشه

محمد: يوه ياياسر الفررحه ما توصفش فاررح باقوى قوه

ياسر: باين من غير ما تتحاكى والله يتمم لك على خيرر يا سندي

محمد: يارب ياالله

قاطعهم دخول عبدالله: اووه ماشاء الله ياسر هانا يعني مستحيل مهما بكرت انني اوصل قبلك

ضحك ياسر: اكيد مستحيل كيف انت
وتسالموا

عبدالله: الدكتور حقنا خلااص عيخطب وشويه وقد بيهرم يشتي يتزوج

محمد: نو مالتزوج الا بعد ما اكمل ادرس وبعدا انا وياسر مخططين ان شاء الله نعرس جمعه

عبدالله: الله ضخم الله يتمم لكم على خير وانت ياياسر خاطب صح

ياسر: ايوه وانت اي حين عنفرح بك

عبدالله: عادني شويه لوما اكون نفسي وبعدا اقرر اخطب

محمد: ضخم الله يكتب لك مافيه الخير

ياسر: يوه يا محمد انت داري ما نسيت

محمد باستغراب: ماهو

ياسر: نسيت ما اشتري شذاب

محمد: للمه

ياسر وهو كاتم لضحكته: عاسب اطرحه بين الخاتم حقك

محمد: يلعن ابليسك قصدي مدري ماهو
وبيتلفت يمين وشمال عاسب يلقى حاجه يضربه بها: سلمت مني انت داري انك سلمت لانني مالقيت بأيش اضربك

عبدالله: اضربه بالشذاب حقه ههههههههههههه

ياسر وهو بيضحك وبيحاول يخفيها ويرجع يبسر وش محمد كيف هو احمر من الضبح منه

محمد: ياسررر خلاص

ياسر: اهه خلاص بس قلت اذكرك كيف كنت تفعل بي بس انا مؤدب اومه

محمد بسخريه: ايوه قووي مؤدب

ياسر بضحكه: ايوه هيا اقطب اليوم الصبوح عليا اصبحك في احلى مطعم حق قنم

محمد قام: الله من هذه الخوره اشتيها هيا

عبدالله: انا هنا ياقوم

ياسر ضحك: هيا وانت والكل معانا

عبدالله: هيا
وخطيوا
.
.

إياد قام وخطي للجامع وبدأ يدرس مع العم عبدالملك سوره الكهف وقد العم عبدالملك متعود على إياد لان إياد دائما يقرأ معاه عاسب لا يغلط وصوت إياد بالقراءه روووعه

العم عبدالملك: إياد ماشاء الله انا احب التزامك ان شاء الله مايجيش يوم وتتخلف عن الجامع

إياد: الله المستعان ياعم عبدالملك مستحيل اتخلف والله يثبتني

العم عبدالملك: ايوه وبحزن ريت والله ومعي جهال ان هم ذلحين في سنك

إياد: وانا ياعم يحسب الله انني ابنكم

العم عبدالملك: فديتك وانا اعتبرك ساع ابني بس اشتي تداعيني بيابه احسن

إياد بصعوبه: حاضر يابه

وكملوا يدرسوا لوما يأذن
وقاموا يصلوا

.
.

عبدالله: الصبوح ماهوو يجننن قد بطني بتوجعني

ياسر: محد قال لك تاكل خيرات

عبدالله ضحك: الجوع

محمد: هيا شرق عنتأخر على الجامع

ياسر: والله انه صدق

وخطي كل واحد لبيته عاسب يصلي ويتغدى وبعدا يجتمعوا في بيت محمد
.
.

إياد اشترى له روتي وزبادي وتغدى وادى الزنه من المغسلة وسار لبيت يونس عاسب الخطوبه
وصل وابسره يونس

يونس: حيااا حيا إياد كيف انت

إياد: الحمدلله وانت

يونس: الحمدلله ادخل ادخل

ودخله للديوان وماكان فيه الا ابو يونس واخوه واعموم يونس سلم عليهم وجلس جنب يونس وهو خازي وحزين حن مابحد ابوه معاه

يونس: ايوه ما بتفعل

إياد: ولاشي وانت

يونس ممزوج بخرط الجهال: ولا قد قريت من الصباح وانا بين انافع

إياد: ضخمم حالي يكفيك الاجر الذي عيوقع لك

يونس: ايوه قد معي خيرات
.
.

صاحب ماجد: من هو هذا ياماجد

ماجد بيتلفت: اين هو

صاحبه: الذي جنب اخوك

ماجد: هاه صاحبه إياد اسماعيل

صاحبه: هاه ماشاء الله بين اتحيلى له من اول ماشاء الله باين انه هادئ وحكيم

ماجد: ايوه

صاحبه: واين هو ابوه

ماجد بحزن: ابوه استشهد قذا له خيرات

صاحبه: يووه هنيئا له والله يعصم قلبه وقلب اهله


ملاحظه
عتقلوا ان كيف مادريوش كيف استشهد اهل إياد
اصلا كل واحد في حاره بعيده عن الثانيه
والبعض يعتقد ان إياد جالس عند عمه وعمه ماهو داري وين إياد
مع الاحداث وعتدروا كيف قصه العم هذا



https://t.me/+Ecxq_OzMYh40M2E0







📚 @rewayatyamania  🇾🇪

.

البـارت 14 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


وصل اهل الحريو وجلسوا

ابو محمد: جيناكم اليوم راغبيبن طالبين يد بنتكم المصونه ريم لولدنا محمد

ابو ماجد: واحنا نتشرف بكم

وجروا الشنطه وشلوها للنسوان

وإياد اول مابسر محمد وياسر افتجع وبيحاكي نفسه * ضروري اروح لاعد يعرفوني وبعدا يحاكوا يونس والا شي

ضميره: بس مش عيب ياإياد انك بتبيع
ايوه مش عيب بس عيقل لاصحابي كلهم انني بين ابيع مسابح وعيوصل الخبر لعمي ويوقع لي ماقسم الله

ضميره: خلاص قوم ذلحين تعذر بأي شي واخطى للبيت
والله انه صدق
وقام لاعند يونس
إياد: يونس يله ماتشتي شي

يونس: عادهو بحين

إياد: ماشي قدهو وقت وزيد قلت لهم انني لاروح بحين

يونس: هاه كان الله معاك

وخطي إياد وهو منزل راسه عاسب لايعرفه محمد ولاياسر لكن بعد مه بعد مالمحه ياسر

ياسر بهمس: محمد محمد ابسر هذا الولد يشبه إياد الذي نشتيه

محمد: اين هو

ياسر: ابسره الذي لابس زنه لاقوم لاعنده ابسره لاهو هو وانت اجلس مايسبرش تقوم

محمد: تمام قوم قبل مايخطى

ياسر خرج بعد إياد وبيداعيه: يا إيااااد

إياد بفجيعه * يممه عرفني عرفني عيقلهم كلهم
ضميره: وانت جاوبه ويحسب الله انك واحد ثاني خاصه انك لوما بتخرج تبيع بتملي وشك سود
ايوه صح

والتفت لاعند ياسر وقزز حواجبه ياسعم انه مايعرفه: بتداعيني انا

ياسر: ايوه انت كيف انت يا إياد

إياد: من إياد انا اسمي صالح

ياسر باستغراب خاصه بعد ما بسر ايدي إياد ينتفضين خاصه حن هو مايكذبش ابدا: انت إياد انا اعرفك ليش تشتي تخفي نفسك

إياد * ماعد بش امل تخفي نفسك وطى راسه: ايوه انا ماتشتي مني

ياسر: مابلا اشتي اجابرك اذا مابش ازعاج

إياد: عادي مابش شي ماتشتي

ياسر: جي ندخل ذلحين وكما غطوه التقينا وتجابرنا

إياد بخوف: مع خلينا اذا مثلا التقينا واشتي منك وعد

ياسر: اطلب ما اشتيت

إياد: مااشتيش احد يدرى انني بين ابيع مسابح عيضحكوا عليا

ياسر: لايضحكوا ولا بس من عيوني مالقلش لاحد

إياد: خلاص ماعد لقدرش ادخل لانني قد قلت ليونس انني مروح

ياسر: خلاص سابر بس اي حين الوقت المناسب لك عاسب نلتقي

إياد: العصر لان الصباح معي مدرسه ونلتقي في نفس البقعه حق المره الاوله الذي لقيتوني

ياسر: يله تمام ماتشتي شي

إياد: عافيتك وخطي

وياسر دخل لاعند محمد وبيجابره وقاموا خطيوا لانهم مايجلسوا الا شويه ويخطوا
.
.

إياد * يعلم الله مايشتي مني شكله يشتي الالف
ضميره لو يشتي الالف لايقل لك ذك الساع تديها
ايوه صح يعلم الله مايشتي *
.
.

ياسر * يعلم الله ليش مايشتيش يقل لاحد انه بيبيع وبعدا وين هو ساكن لوما هو وحده جاء اليوم
الولد هذا قصته قصه اشتي ادراها *
.
.

محمد * الحمدلله انتهت الخطوبه على خير الله يتمم لنا على خير يارب
وذلحين ضروري ارقد بحين عاسب غطوه جامعه وبعدا عنتوجه لاعند إياد
اهي عاد إياد هذا قصه اخررررى يعلم الله ماهي
واقتلب للشق الثاني ورقد *
.
.

قام إياد الصباح ساع كل مره وسار للمدرسه وصل بحين ماقد جاش يونس

إياد خفع راسه: يوه بكرت اليوم بحين قووي يله سهل سير للفصل وذاكر لوما يجوا اصحابك

ودخل للفصل وقد به بعض الطلاب جالسين طرحوا شنيطهم وخرجوا وبدا إياد يذاكر ومش حسه عند احد

قاطعه صوت الجرس وقام للطابور وسار يطوبر جنب اصحابه بعد مابسرهم

إياد: صباااح الخير

احمد: صباح النور اليوم مبكر

إياد: ايوه كيف انت

احمد: الحمدلله وانت

إياد: الحمدلله ماقد جاش يونس

احمد: ايوه مدري ماله تأخر

ويقاطعهم صوته وهو بينهل يونس: صباا ح الخير

إياد ضحك: اول شي خذ نفس وبعدا جابر

يونس ضحك وحك راسه: هو من حبي لكم قلت اسلم عليكم

احمد: سهل خذ نفس وبعدا سلم وبعدا ماعيوقع لنا يونس

إياد: يوه مع من غير شر الله يحفظه

جاء لاعندهم المشرف حق الطابور: عتطوبروا سكته والا اقل للاستاذ

إياد: مع مع هوذا عنسكت وسكتوا ولاعد ادوا كلمه

.
.

ياسر: حيا بالحريو حيا

محمد: حريو مالك اصبر شويه شكلك معاجل

ياسر: ماشي بس اشتي ارفع المعنويات

ضحك محمد: بأيش يعني المهم هيا اخطى اخطى عتبدأ المحاضره

ياسر ضحك: هيا

دخلوا للقاعه وشويه وجاء الدكتور ونهايه المحاضره

: ياسر الـ... محمد الـ... اوقفوا
اتباسروا باستغراب وسنبوا

الدكتور: حيوهم

القاعه كلها بدأت تصفق وياسر ومحمد مش داريين على ايش

الدكتور: اجلسوا

وبعد ماجلسوا كمل كلامه: زملاءكم فعلا يستحقوا كلمه دكاتره الذي عنده حب وشغف لمساعدة الناس هذاك فعلا يستحق كلمه دكتور وبما انهم بدأوا الموضوع الذي كنت اشتي ابدأه انا مابش مشكله يله وضحك

اشتي تبحثوا لي عن مرض غريب ونادر يصادفكم وتبدأوا تشتغلوا فيه والذي يعطيني البحث كامل له الدرجه النهائيه وطبعا عيشتركوا كل اثنين طلاب مع بعض

وياسر ومحمد هم الذي...

















📚 @rewayatyamania  🇾🇪

.

البـارت 15 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


اشتي تبحثوا لي عن مرض غريب ونادر يصادفكم وتبدأوا تشتغلوا فيه والذي يعطيني البحث كامل له الدرجه النهائيه وطبعا عيشتركوا كل اثنين طلاب مع بعض

وياسر ومحمد هم الذي بدأوه وقد صادفوا الحاله ومافلتوهاش ودعمموا بالعكس جلسوا يلاحقوني عاسب يدروا ايش المرض وحن كنت مشغول جوا لي للمستشفى يعني ما استسلموا ودعمموا والآن ان شاء الله قد بدأوا يشتغلوا فيها المهم البحث اشتيه بعد شهر ما اشتي اي تأخير او اي عذر وخرج

وياسر ومحمد بيوزعوا ابتسامات فارحين

محمد: يوه احرجني الدكتور قووي

ياسر: والله صدق الله يعيينا

محمد: ذلحين عاد باقي معانا محاضره للساعه ثنتين وبعدا نسير نتغدى في مطعم وسرنا لاعند إياد

ياسر: ايوه يله جي نسير نصتبح امد ما تبدأ المحاضره الثانيه

محمد: قيام
.
.

وفي وقت الحصه وعادهم في الفصل والاستاذ جالس فوق الماسه بيصحح الدفاتر صيح ولد

الولد: سرقوا زلطي سرقوني من شل حقي الزلط

الاستاذ سمعه وفلت الورقه ودعاه: مالك بتصيح

الولد: يا استاذ مدري من سرق حقي الزلط مالقيتهن

االاستاذ: دور سوا ياابني لانت عتلقاها

الولد: مالقيتهاش

الاستاذ: اي حين فلت شنطتك

الولد: فلتها قبل الطابور في الفصل وخرجت العب

الاستاذ: ومن كان في الفصل

الولد بيتذكر: إياد بس

إياد وهو جالس بيكتب الذي في السبوره وبيضحك مع اصحابه قاطعه صوت الاستاذ: إياااااااد

إياد قام بفجيعه: حاضر يا استاذ

الاستاذ: جي

خطي إياد لاعنده وهو بينتفض من الفجيعه

الاستاذ بعد ما اخر إياد من عند الطلاب وبدأ يحاكيه: إياد زميلك ضاعت حقه الزلط اذا انت شليتها قلي لي مالفعل بك شي

إياد وكل خليه في جسمه انتفضت: والله ماسرقت يا استاذ انا ما اسرقش

الاستاذ: بس انت كنت وحدك الصباح في الفصل وصاحبك طرح شنطته وخرج يلعب وقال انت كنت في الفصل

إياد وهو بيحاول يتحكم في ايديه: والله ماسرقت والله انا ما اكلش حاجه حرام يا استاذ

الاستاذ ابسر في عيونه الصدق: وماكنت بتفعل في الفصل وحدك

إياد: جيت اليوم بحينه جلست اذاكر امد لوما يجوا اصحابي

الاستاذ: خلاص سابر لابسر من الذي سرق واذا انت سرقت رد الزلط ومالصيح فوقك

إياد: الله المستعان يا استاذ وخطي لاعند اصحابه وهو بينتفض وايديه زرق وفي نفسه * إياد بيقلوا انك سارق سرقت الذي ماتاكلش ولا لجع حرام ذلحين يقلوا انك سارق
ضميره يا إياد انت واثق من نفسك انك مستحيل تسرق خلاص اهدأ

كيف اهدأ كيفف والكل ذلحين قصده انني سارق *

قومه من سرحانه صوت يونس: مالك ياإياد مالك بترتجف وايديك هكذا زرق

إياد: هاه ولاحاجه ولا حاجه

يونس مسك ايدي إياد الذي ساع الثلج: إياد مالك بتقشط

والتفت لاعند احمد الذي كان لابس جاكت

يونس: احمد اخلس الجاكت حقك لإياد بيقشط
وإياد جالس مطنن وبتتردد كلمه سارق في عقله
لبسه يونس الجاكت ليكن مابش فايده جالس بيرتجف

يونس بخوف: استاذ لاخرج إياد للساحه يدفى بيقشط

الاستاذ: تمام

خرج إياد خلاه بين الشمس وبيداعيه: إياد صلِ على النبي مالك

إياد طرح راسه فوق كتف يونس: قالوا انني سارق يا يونس

يونس باستغراب لانه ماسمعش: من الذي قال مستحيل انك تسرق

إياد وقد بدأ يغيب عن الوعي: الا س ت اذ قا ل ان نني سرق ت حق ول يد

يونس التفت يبسر إياد الذي حس بالثقل حقه كله في كتفه طرحه في القاعه حق الساحه * طبعا مبلطه *

يونس وهو بيهز إياد: إياد إياد مالك يييه إياد
افتجع يونس وابسر احمد خاطي صليه داعاه بصوت عالي: احمددددد ادعي الاستاذ بسرعه إياد امدري ماله

حمل احمد يدعي الاستاذ ويونس بيحاول يقوم إياد ليكن بدون فايده
.
.

رهف: الف الف الف مبروووك حبيبتي ريمم الله يتمم لكم على خير

ريم بخزا: الله يبارك فيش وعقبالش حبيبتي

رهف: نو شويه

ريم: ماعد باقي قذا باقي سنتين ونتخرج

رهف: لا كما كملت يحلها الله

وبغيار موضوع: قلي لي ابسرتيه معش صورته

ريم: كان نفسي تجي بس يله خير ايوه معي صورته

رهف: وانا والكل كان نفسي بس حن مرضوا بابه ماقدرت اجي هيا اسكه وريني الصوره

ريم فتحت تلفونها وبتروي رهف الصوره حقه حق الخطوبه

رهف: من اينه شليتيها

ريم: هاه شليتها من حاله اخته فعلتها وانا نستخها

رهف: طلعتي مش بسيطه

ريم ضحكت: كان ما قصدش

وخطيين للقاعه بعد ماكملين يصتبحين

* طبعا بيدرسين لغات *
.
.

وصل الاستاذ الذي يعالج الجهال لاوقعت مضرابه والا شي لاعند إياد وبيبسر كيف شكله: ما اقدرش افعل له حاجه ضروري انه ينقل للمستشفى لاني مش داري ايش افعل له خاصه انني مادرست طب هو غر درست اسعافات اوليه

يونس بخوف: ما نفعل ذلحين يا استاذ

الاستاذ: قذا بين اتصل للمستشفى يدوا سياره اسعاف

وصلت الاسعاف وإياد جالس في حالته ماقام ولاشي

يونس: يا استاذ خليني اجي..



https://t.me/+Ecxq_OzMYh40M2E0









📚 @rewayatyamania  🇾🇪

.

البـارت 16 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


وصلت الاسعاف وإياد جالس في حالته ماقام ولاشي

يونس: يا استاذ خليني اجي معاكم قوا

الاستاذ: ماشي مااقدرش ابداا يله اخر شرق
وطلع الاستاذ فوق الاسعاف وخطيوا ويونس بيبكي من الفجيعه دخل الفصل وجمع كتب إياد ودخلهن الشنطه وخطي لاعند الاداره يخليهم يتصلوا لاخوه لانه ماعد عيقدر يجلس في المدرسه

كرها خلوه يتصل وجاء له ماجد وفوق السياره

ماجد: يونس صلِ على النبي يكفي بكاء ماعيوقع به شي

يونس جالس بيبكي: لو لو ا بسسرته مااتقلل هككذا

ماجد: اهدأ سعليك ماعيوقع به شي

يونس: لو تبسر ككيف ايدييه زررق قوووي وبينتفضض قووي
ورجع يبكي

ماجد: هيا انزل وصلنا

طرحوا الشنيط في السياره وبيحمل يونس للطوارئ وماجد بيجاريه

بعد ما سألوا ساروا للغرفه حقه

ماجد: هيا ابسر كيف هو بخير

يونس دخل لاعند إياد وحجفه: إياد كيف انت ذلحين فجعتني عليك

إياد بتعب: هاه سعلليك مافيني شي عادي عاادي

ماجد: الحمدلله على السلامه إيادو

إياد: الله يسلمك
.
.


ياسر وهم وسط المحاضره بيرن تلفونه ولارضي يوقف وشويه ويتصل تلفون محمد

محمد: تقل من بيتصل

ياسر: ابسر من اول بين اكتومه بيتصل لي رقم غريب

خرج محمد تلفون وانه رقم غريب
وشويه وتوصل لمحمد رساله
* انا الدكتور فؤاد حالتكم وصلت لاعندي جوا استلموها *

محمد: ياسر ياسر ابسر ايش رسل الدكتور فؤاد

ياسر بعد ماقريها رفع يده: يادكتور حصلت لي انا ومحمد ظروف ممكن نخرج

الدكتور: تمام

وخرجوا

محمد: مالك خرجتنا

ياسر: ياسعم بتفهم المحاضره تدي النوم
واتصل للدكتور فؤاد: السلام عليكم

الدكتور فؤاد: وعليكم السلام

ياسر: عفوا منكم كنا في المحاضره لذلك ماجاوبنا

الدكتور: عادي المهم اليوم على وصلتي للمستشفى وصل للطوارئ ولد بنفس المرض الذي قلتوا لي جوا استلموا حالته انتوا وشخصوا عليه طبعا انا بدأت له البدايه والباقي عليكم

ياسر: حاضر الان جايين صليك
وخطيوا للمستشفى
.
.

ماجد: إياد انت حافظ رقم امك

إياد والحزن ملان وجهه: هاه مامه

ماجد باستغراب: ايوه

إياد وايديه بداين يرجعين لحالتهن: مامه استشهدوا مع بابه

يونس مسك ايدي إياد: إياد اهدأ

وبصياح: ماجد ابسر ابسر ايديه

إياد وهو بيحاول يهدأ: سعليك يا يونس ولابه شي لهدأ ذلحين

ماجد وهو يشتي يتصل لاحد عاسب لايقلقوا عليه: كان انت حافظ رقم عمك

إياد بصدمه نزل راسه

ماجد بتبرير: اشتي عاسب اطمنهم عليك

إياد: اسهل اسهل انا ذلحين بخير لاروح البيت ماعد يحتاج اجلس هنيه

ماجد: ولو ضروري وماعتخرج الا بهم

إياد باستسلام بدأ يمليه الرقم: هذا رقم ابن عمي ماحافظ الا هو

ماجد وهو بيتصل: اسهل قصدك من واحد

ماجد: السلام عليكم

وائل: وعليكم السلام عفوا يااخي من معي

ماجد: انا اخو صاحب إياد

وائل: حياك الله

ماجد: مابلا اشتي اقل لك ان إياد في المستشفى

وائل بخووف: إياد ماله ماوقع فيه

ماجد: صلِ على النبي مابلا دوخ في المدرسه ونقلناه للمستشفى

وائل: اللهم صل على سيدنا محمد واله كيف هو ذلحين

ماجد: بخير

وائل: اسكه احاكيه

ماجد: حاضر
مكن إياد التلفون

وائل: إيادو حبيبي كيف انت

إياد ارتزح عرض السرير: الحمدلله

وبصوت واطي: اذا ماعتقدر تجي عادي لادبر روحي

وائل: الله المستعان يا ابن العم الآن اجي لك

إياد: عيخليك عمي تجي

وائل: انا ذلحين مروح من المدرسه لاقل لهم ان معي اختبار ولاذاكر عند صاحبي

إياد: ماعيتصلوش لصاحبك

وائل: ماعليك شي لادبر روحي

إياد: يله تمام مراعي لك
وغلق

وشويه ورجع اتصل

ماجد: ايوه

وائل: نسيت ما اسأل ايش اسم المستشفى

ماجد: مستشفى الـ......
.
.

الدكتور فؤاد بعد ما ابسر ياسر ومحمد خطي معاهم للمدير

المدير: حيا بالدكتور فؤاد

الدكتور: الله يحييك

المدير: كيف انت واخبارك

الدكتور: الحمدلله بس اشتي منك طلب ان شاء الله ماتردني

المدير: اذا اقدر ابشر

الدكتور: ابسرر هذولا الطلاب طلابي في الجامعه ومن افضل طلاب الدفعه وانا كلفتهم ببحث عن مرض نادر وغريب وحالتهم موجوده في المستشفى هانا اشتيك تخليهم يمسكوها

المدير: ابشر بعزك لافعل لهم الآن بطاقه عشان يخطوا ويفعلوا الفحوصات بدون عرقلة ولارجع امكن السكرتير واخليه يمكنهم

الدكتور: شكرا

وسلموا عليه وخرجوا

الدكتور: خلاص الباقي عليكم فعلت الذي عليا يله افعلوا عملكم وهااه اشتي عمل يبيض الوجه

محمد: ولاعليك الا يعجبك
وتوجهوا للغرفه حق إياد


















📚 @rewayatyamania  🇾🇪

.

البـارت 17 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


دقوا الباب ودخلوا

ياسر: ماكنت حابب يكون اللقاء هكذا يا إياد

إياد: وانا والكل حياك ياسر ادخل

محمد: وانا مالك نسيتني

إياد بضحكه: ادخل ادخل

ياسر بعد ما ابسر ماجد شاور محمد: اوبه تدوخ اخو الحبيبه هانا

محمد خفع ياسر بعركوبه وسلم على ماجد ويونس

ماجد: حيا بالنسيب كيف انت

محمد: الله يحييك الحمدلله

ماجد: طلعت تعرف إياد

محمد: ايوه

وياسر بدا يفحص إياد ويجابر

ياسر: لمسك حالتك انا ومحمد ان شاء الله نكون دكاتره ضخمين بس هاه اوبه تدلع علينا

إياد: سعليك مالدلعش مايعجبنيش الدلع

قرب لاعندهم محمد: هيا كيف انت يابطل

إياد: الحمدلله

ياسر التفت لاعند ماجد ويونس: طبعا عنمسك حالة إياد احنا وذلحين نشتي نفحصه

قاطعه ماجد بضحكه: بدون لف ودوران عنخرج ذلحين هيا يونس نخطى البيت وكما بعد العصر جينا لاعند إياد

يونس: ليكن

ماجد: هيا عاسب يفتهن إياد

يونس: تمام

بعد ما خرجوا

التفت ياسر لاعند محمد: عنفعل له فحص دم عاسب نبسر ايش السبب

محمد: تمام

وإياد مسكين في الوسط مش داري ايش عيفعلوا به

جر ياسر الابره وقرب لاعند إياد

ياسر: لا تفتجع ولا بس اشتي افعل لك فحص عاسب نبسر ليش بيوقع فيك هكذا

إياد وطى راسه: مايحتاج انا داري ليش بيوقع فيني هكذا

محمد: كيف يعني

إياد والحادثه قبال عينه انتفض بكله وراسه موطى ماقدرش يتحاكى

ياسر طرح الابره وقرب لاعنده ومسك ايديه: إيادو حبيبي سعليك ماعنفعل بك شي قلي بس ايش فيك انا اشتيك تتعالج وتفتهن اشتي ابسرك اضخم دكتور

إياد ابسر ياسر: انا مشني مريض مابش فيني شي

ياسر: انا داري انك بطل بس اشتي تقل لي ليش بيوقع فيك هكذا اشتي ابسر اخي الصغير وهو بخير

إياد: اخوك الصغير

ياسر: ايوه او ماتشتيني اوقع اخوك

إياد: الا الاا
وارتجم في حضن ياسر وبدأ يبكي وبيبكي قووي وياسر مخليه يبكي على راحته
.
.

ماجد ويونس لوما دخلوا البيت: السلام عليكم

ابو يونس: وعليكم السلام هيا كيف هو إياد

يونس وعيونه شورغين بالدموع: عادهو تاعب يابابه مفتجع يفلتني

ابو يونس حجف ابنه: سعليك إياد بطل وماعيوقع به شي ان شاء الله

ابو يونس: ماقالوا الدكاتره

ماجد: والله فعلوا الذي عليهم وذلحين عنده ياسر ومحمد عيشرفوا على حالته

ابو يونس: هاه الله يوفقهم ويشفي إياد

يونس: ياررب

ماجد: وين هي ريم اسير احانكها

ابو يونس دري بنية ابنه وضحك: هيذكه في المطبخ

دخل للمطبخ: حياا بخطيبة محمد حيا

ريم بخزا: الله يحييك

ماجد: اوه لو تبسري على وسامه في محمد وهيبه وهو بيعالج

ريم خاوره الارض تنشق وتبلعها لان هي داريه ان ماجد ماعيخرج الا وقد خزا بها لابعد درجه

ماجد ابسر ريم وهي بتقص السلطه افتجع لا تقص يدها خاصه ان هي خازيه: انتبهي انتبهي تقصي يدش خلاص عنخرج

خرج للباب وبعدا رجع: ايوه صح اوبهي تقصيها مشني دكتور ساع بعض الناس اعالجش

وخرج وهو بيضحك وريم بتحطم: ضروري يحرجني ضروري

.
.

رقد إياد في حضن ياسر والدموع ملان عيونه

طرحه ياسر فوق السرير وخرج هو ومحمد للحديقه حق المستشفى وجلسوا فوق الكرسي

ياسر: احس ان هذا الولد وراه قصه

محمد: قصه كبيره الله يعينه

ياسر: ويعيننا يارب ونكتشف ايش حالته هذه

محمد: تقل كيف لوما هو داري بمرضه ليش ما يتعالج ليش مايخلينا نفحص دمه

ياسر: هذا الذي محيرني اسهل خليه يرقد ذلحين وبعدا لاجاء ابن عمه سألناه لاهو داري

محمد: ذلحين خلينا نقوم ناكل لنا حاجه من الكافتيريا جاوع

ياسر: هيا وبعدا ندخل لاعند إياد وندي له حاجه ياكلها

محمد: تمام

خطيوا اتغدوا واشتروا لإياد سندوش ودخلوا لاعنده
.
.

وائل وصل وهو مفتجع على إياد سأل الممرضه وشلته لاغرفه إياد دخل لاعنده وهو راقد قرب بهدوء لاعنده وحبه في راسه ومسك يده وبيحاكيه بصوت هادئ: إياد انت وعدتني انك تكون قوي انك ما تستسلمش لهذه الحاله إياد حبيبي انا مافلتك الا بعد ماوعدتني

إياد شد على يد وائل: انا كنت على وعدي ماخليت احد يبسر حالتي هذه بس

وائل: بس ايش

إياد شد على يده اكثر: بس اتهموني اتهموني يا وائل اتهموني انني سارق انا اناا الذي ما اكلش حاجه الا بزلطي ويقلوا لي اليوم انني سارق

وائل ابسر إياد بدأ ينفعل: إياد حبيبي اهدأ اهدأ انا داري انك ماتسرقش ومستحيل انت ماتاكل الا من حلالك ما تاكلش حاجه حرام اهدأ قوا لايوقع بك شي

إياد غمض عيونه وبيحاول يهدأ: وائل حاكيت عمي

وائل: كان نفسي بس لو احاكيهم ماعيخلوني اجي لذلك كذبت عليهم

إياد: هاه

وائل: لا تغثاش قذا جيت انا

إياد: عادي مالغثاش ولا قد تعودت

قاطعهم فتحة الباب

محمد: قمت يابطل يله قوم اتغدى

طرح الغداء عند إياد وسار سلم على وائل
محمد: انت ابن عم إياد

وائل: ايوه





https://t.me/+Ecxq_OzMYh40M2E0












📚 @rewayatyamania  🇾🇪

.

البـارت 18 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


طرح الغداء عند إياد وسار سلم على وائل
محمد: انت ابن عم إياد

وائل: ايوه

محمد: انا محمد وهذا ياسر المشرفين على حالته

وائل: هاه حياكم الله

إياد ابسر الغداء وخزي يزوعه قرب لاعنده محمد: هيا مالك ما تتغدى احنا قد تغدينا والتفت لاعند وائل: وانت قد تغديت

وائل: ايوه ماخلوني اجي الا بعد ما تغديت

وياسر جالس فوق السرير جنب إياد بيخليه ياكل
اكل اشويه وطرحه

ياسر: هيا مالك كمله

إياد: قدني شابع خاصه ان المغذيه عادهي في يدي

ياسر: ماتفعل لي وهي غر شويه كل كل

إياد: قوا ياسر ماعد لقدر

ياسر: هذه بس زد قحصه

هز راسه إياد

ياسر بضحكه: بس هاه من حقي القحصات مش من حقك الكيوتات

ضحك إياد وياسر فوق راسه لوما كمل السندوش

وائل: اي حين عيخرج إياد

ياسر: والله قل للآن مادرينا ايش المرض تبعه لذلك ما اقدرش اخرجه لان انا ومحمد مكلفين بحالته وضروري نعرف ايش المرض الذي فيه خاصه انه غريب علينا

إياد: ماشي اشتي اخرج ما اشتيش اجلس خيرات

محمد: ضروري اول شي تفتهن وبعدا نخرجك

إياد: انا بخيرر سعليكم خلوني اروح وبس

ياسر: قلنا ايش مرضك وبعدا اسهل

إياد ارتزح عرض السرير وغمض عيونه * ضروري اقل لهم عاسب اخرج خاصه ان وائل ماعيقدر يجلس عندي خيرات

إياد: وائل حاكيهم

وائل: ليكن

إياد: حاكيهم اشتي اخرج من المستشفى ضبحت خاصه انه مابش علاج لمرضي

وائل: تمام

جلس محمد وياسر والتفتوا لاعند وائل بحماس يشتوا يدروا ايش المرض هذا


غمض إياد عيونه قوي وشد على ايديه

وائل: قبل سنتين العدوان الغاشم قصف بيت إياد
إياد كان في المدرسه وكان هذاك اليوم تسليم النتايج حق نص السنه روح إياد البيت وماقدوش داري وصل وفي يده الشهاده فارح يشتي يوري ابوه وامه خاصه انه جاء الاول من الاوائل وصل والبيت مهدوم للقاع ماعد بش حاجه كله خراب والناس ملان البيت بيحاولوا انهم يخرجوا ابوه وامه

إياد كان يبسرهم ومش قادر يصيح من الصدمه انا هذاك اليوم كنت في المدرسه والكل اول مادريت حملت بسرعه لهناك ابسر ماوقع ابسر إياد خاصه انني انا وياه علاقتنا قويه وصلت وبسرته جامد بقعته افتجعت عليه خاصه ان عادهو صغير على هذه المناظر وخاصه انه بيتهم

وصلت ومع الاسف على مابيخرجوا امه وابوه بعد مالقيوهم تحت الانقاض إياد ذك الساع كان ينتفض وبعد ما استوعب بعد مابسر امه وابوه حمل لاعندهم وبيصيح مش مستوعب انهم ماتوا خالص

إياد: باااااابه ماااااامه هيا قوموا ابسروا بيتنا كيف قدهو باببه قوموا سبروا بيتنا عاسب نعيش جمعه وين عنعيش والبيت مخرب
مامه ابسروا جيت على ماوعدتكم الاول
وكان يصيح ويتحاكى بغير شعور كان يهز امه ويهز ابوه ليكن بدون فايده

انا كنت جامد بقعتي مادريت ايش افعل حالته اثرت فيني إياد كان في حاله تخوف استوعبت بعد صياحه الاخير وهو بيداعي ابوه وامه بعد مادخلوهم فوق سياره الاسعاف حملت لاعنده وبين احجفه

وائل: إياد حبيبي اهدأ سعليك ماعيوقع شي اهدأ قوا إياد

حاولت امسك ايديه واقومه من الحاله الذي دخل فيها ماقدرت خاصه انه إياد مش مستوعب للذي حصل

قاطعه صوت إياد الباكي: كنت ابسر كيف قدهم وابكي قد ابي كله اشلاء ماباين الا وجههم مامه قد وجههم وجسمهم كله ددم ما استوعبت انهم فلتوني ابدا كنت مراعي بيضحكوا عليا كنت اهزهم ليكن بدون فايده كنت اقرب حقي الشهاده لعيونهم لاهم عيبسروها ويقوموا ويحجفوني ويحبوني ككنت اشتي ابسسسر عيونهم بس تتفتتح ليكن العدوان حرمني منهههم خلاااني وحيدد

كنت كنت امسح الدم من وجه مامه واقل لهم مامه اخر مره ما اقومش اصلي فجر هو مابلا اليوم رقدت وماصليت فجر مامه قوموا اخر مره سامحوني

محمد والدموع في عيونه ابسر إياد كيف قدهو بينتفض حمل مسك ايديه: خلاص إياد حبيبي اهدأ اهدأ افتخر انت ابن شهيد

إياد وهو بيبكي وجالس بينتفض: كيف اهدأ كيف قدني فاقد لهم محمد قوا قل لهم يجوا قلهم يشلوني معاهم قل لهم

محمد ابسر ياسر وبحزن: ياسر ادي ابره مهدئه

ياسر قام ادى الابره وابسر إياد وطبز له الابره وعلى شويه شويه غاب إياد عن الوعي ورقد والدموع في عيونه وناشفات في خده

ياسر ابسر كيف هو وائل ماسك ليد إياد وهو بيبكي ماعد قال له يكمل اشر لمحمد وخرجوا
.
.

ام وليد: هيا وينه ولدك ليش ماقد جاء

ابو وليد: سار عند صاحبه يذاكر

ام وليد: وليش مايذاكر هانا

ابو وليد: قال مش فاهم عيخلي اخو صاحبه يفهمه

ام وليد: هاه هيا يااااولاء ادي الكيكه والشاهي وادعي اخوش ومرته هيا

ولاء: حاضر

سارت دعتهم وبداوا يشربوا شاهي

وليد: هيا وين هو وائل

ابو وليد: عند صاحبه بيذاكر بيخلي اخوه يفهمهم

وليد: على غيري هيا ادي ادي تلفوني يا ولاء اتصل له ابسر وينه

ولاء: تمام















📚 @rewayatyamania  🇾🇪

.

البـارت 19 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


وائل نكز على صوت التلفون وخرج وحمل وهو بيدور محمد والا ياسر ابسرهم وهو بينهل: اخي اخي بيتتتصل لاجاووبه انا وانا قلت له اانني في بيت صاحبي عاسب يفهمني اخوه الدرس لاقال يششتي يحاكيه قوا جاوبوه انتوا وبعدا لحكي لكم القصه

ياسر باستغراب: تمام

وائل اخذ نفس: الو

وليد: حيا بالهاربي

وائل: ماهو هاربي ياوليد انا بين اذاكر

وليد: ناهي على غيري انا اتصلت ابسر هو صدق بتذاكر والا بتلعب

وائل: الا بين اذاكر مالك حسستني انني جاهل

وليد: هيا خليني اجاوب اخو صاحبك ابسر هو صدق بيفهمك

وائل: هاه تمام راعي ياسر ياسر هذا اخي يشتي يحاكيك
وهو بيغمز له

ياسر: تمام

وليد: السلام عليكم

ياسر: وعليكم السلام

وليد: هيا مه كيف هو وائل شاطر والا بيلعب

ياسر: الله المستعان شاطر ماشاء الله الله يوفقه

وليد: يله تسلم قد بيتعبك اخي

ياسر: لاتعب ولاشي

وليد: يله تسلم مع السلامه

ياسر: مع السلامه

غلق والتفت لاعند وائل كءنه بيقل يشتي تفسير

وائل: تمام تمام لشرح لك جي اجلس
جلسوا

وائل: انا بابه مايحبش إياد وفي الاصل اخي بيعبي راس ابي ولو اقل لهم انني عند إياد عيصيحوا فوقي وماعد يخلوني اخرج لذلك قلت انني عند صاحبي نذاكر وعيفهمنا اخوه

ياسر: هاه وإياد اين هو عايش

وائل بتهراب لانه لاعد يصيح إياد والا شي: مدري

ياسر: يله اليوم إياد عيبقى عندنا وانا لهتم به انا ومحمد انا تقدر تروح ذلحين

وائل: ليكن

ياسر: ماعليك شي واحتمال اذا رفض إياد يجلس في المستشفى لاجره معي للبيت واهتم به هناك مادام مش هو عايش عند عمه

وائل: مااعتقدش إياد يرضا وانت جرب

ياسر: ماعليك شي

وائل مسك يد ياسر: إياد في امانتك احتمال غطوه مالقدرش اجي بس لحاول امانتك انت ومحمد انتبهوا له

ياسر: في عيوني لاتخاف

وخطي وائل وهو نفسه يجلس بس ابوه ماعيخليه

محمد: شكله يحب إياد قوي

ياسر: قووي
.
.

إياد: بابه قدني فاقد لكم شلوني عندكم

ابو إياد: عادك صغير ماقد عنشلك عندنا اهتم بصحتك ولا تغثاش ولاشي واجلس خلي راسك مرفوع انت ابن شهيد

إياد: بس بس يابابه اتهموني انني سارق وطيت راسكم يا بابه

ابو إياد: لا وطيت راسي ولا شي انا واثق في ابني حبيبي مستحيل يسرق

إياد: قلت لهم هكذا بس ماصدقوني

إياد: ماعليك الا يصدقوك لا تغثاش ويله اشتيك تفتهن وتقوم تذاكر شويه ويبداين اختباراتكم النصفيه ذاكر واجتهد اشتيك الاول

إياد: حاضرر وانتوا داريين انا الاول دائما مابين انقصش ولادرجه

ابو إياد: ايوه شاطر ابني فديتك

حبه في جبهته: يله خاطرك يابابه

إياد: مع قوا عادني ماقد شبعت منكم

ابو إياد: ولا انا يابني بس القدر يله انا لارح لي وانت جر الختمه وادرس تمام

إياد نكز من الحلم وكلمات ابوه بتتردد في اذانه التفت والدنيا ظلمي وابسر واحد راقد عند راسه وابسر وانه ياسر

ياسر حن هو نومه خفيف نكز حن إياد يشتي يقوم

ياسر: وين عتسير

إياد: اشتي ابسر كم الساعه وادور لي ختمه

ياسر ابسر يده: الساعه قدهي 4

إياد: هاه اسلم يعني باقي نص ساعه ويأذن الفجر انت داري به هانا ختمه

ياسر: ماشي لاسير ادي لك من الجامع حق المستشفى

إياد: تمام


رجع ياسر وابسر إياد قد توضى مكنه القران وبدا يقراه بصوت خاشع جلس ياسر جنبه وبيسمعه والابتسامه في وجهه

بعد ماكمل إياد يقرأ

ياسر: صوتك روعه في التلاوه

إياد: شكرا ذلحين قل لي قبل ماياذن اي حين لخرج مااشتيش اغيب عن المدرسه وانا ما احبش المستشفيات

ياسر: مااقدرش اخرجك الا لوما ادرى ايش مرضك

إياد: ليكن ما احبش المستشفيات ما اجلس افعل هانا خاصه ان

ياسر: مالك سكت

إياد وطى راسه: مابش من يدفع تكاليف المستشفى

ياسر: ماعليك من هذا لدفعها انا ماعليك شي

إياد: ماشي ياسر قوا لو سمحت لو تعتبرني اخوك الصغير خرجني قوا

ياسر: تمام لخرجك ليكن مش لبيتك

إياد: كان لوينه

ياسر: لبيتي

إياد: ياسر قوا لاتحرجني

ياسر: انا اشتي اتطمن عليك فعندك خيارين يااما تجلس في المستشفى والا تجي عندي في البيت

إياد: ليكن يا ياسر في الثنتين احراج ما اقدرش قوا اخي

ياسر: مابش يله اختار

إياد: خلاص بيتك المستشفى ما احبش وبعدا مابش علاج لمرضي قد قلت لك ابرد لك مني

ياسر: ابدااا كيف افلت اخي ومستحيل انني ما القاش لك علاج اذا مالقيت لك ذك الساع ما اتشرفش انني اكون دكتور ذلحين ابرد لك قوم نسير انا وانت نصلي في الجامع وبعدا اكتب لك خروج وبعدا نبسر مانفعل

إياد: تمام

وخطيوا للجامع وياسر ماسك ليد إياد وهو بيفكر فيه كيف متحمل هذا كله وعقله اكبر من سنه الله يعينه ويشفيه
.
.

يونس: صباح الخير

ابو ماجد: صباح النور جي اجلس جنبي نصتبح جمعه

يونس جلس: بابه اشتي اغيب اليوم مااشتيش اسير المدرسه وإياد مابحدهو

ابو يونس: ...


https://t.me/+Ecxq_OzMYh40M2E0




📚 @rewayatyamania  🇾🇪

.

البـارت 20 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


يونس جلس: بابه اشتي اغيب اليوم مااشتيش اسير المدرسه وإياد مابحدهو

ابو يونس: وليش تغيب مادراك وإياد يسير المدرسه

يونس: بس هو في المستشفى

ابو يونس: بس ماعيجلس خيرات لانه مش هو تاعب قووي

يونس: بس لو تبسروه يابابه ماتقلوا هكذا

ابو يونس: ان شاء الله مايوقع فيه شي ذلحين قوم بدل وسير المدرسه واذا ماجاش إياد وعد اشلك انا للمستشفى عند إياد

يونس: تمام

سار بدل ووصل للمدرسه

احمد: حيا يونس كيف انت

يونس: الحمدلله وانت

احمد: الحمدلله كيف هو إياد ماقدرت امس اسير ابسره

يونس: الحمدلله ليش ماجاش للمدرسه

احمد: ماجاش
شويه وغطى إياد عيون يونس

يونس: من هذا يخوو كم اكره هذه الحركه

إياد ضحك: حتى لوهي مني

يونس التفت وحجفه: منك عسسل والله كيف انت ذلحين

إياد: الحمدلله ساع الاسد قبالك

يونس: الحمدلله متأكد مش انت تاعب ليش جيت كنت عتغيب عاسب تفتهن

احمد ضحك: وكيف يغيب الاول حق الفصل مايسبرش

وسلم عليه: الحمدلله على السلامه إياد

إياد: الله يسلمك
.
.

بعد ماكمل يصلي إياد وياسر قام لبس إياد الزي حقه خاصه ان الزي في المستشفى لبسه وياسر شله اشترى له سندوتشات وبعد كررها رضي يشلهن إياد والحاجه الذي اكتشفها ياسر ان إياد عزيز نفس مايشلش من احد وصله بالسياره للمدرسه ودخل معاه للاداره طبعا مادراش إياد انه دخل للاداره خلاه لوما دخل وبعدا دخل بعده
دخل لغرفه الاداره بعد مادق الباب

المدير: تفضل

ياسر: زاد الله من فضلك

المدير: بايش اقدر اخدمك

ياسر: اشتي اسالك بعض الاسئله

المدير: عن

ياسر: عن الطالب إياد اسماعيل

المدير باستغراب: ايش لقبه

ياسر حك راسه وبابتسامه: والله مش داري بس هو صف خامس وهو الاول

المدير: هاه إياد معروف ومن افضل الطلاب خير ماله

ياسر: مابلا امس هو تعب وانا الذي توليت حالته مع صاحبي وطبعا هو عاد احنا طلاب سنه اخيره تطبيق وكان علينا تكليف نبحث عن مرض نادر وندور ايش العلاج ومن هذه الاشياء ونعالجها اذا وجدناها وطبعا كان انا ومحمد لقينا إياد يوم وهو خاطي * ماقال انه بيبيع مسابح عاسب إياد * وبعدا ابسرناه دوخ وبدأنا نستلم حالته واشتي اسألك بعض الاشياء لانت داري

المدير: ابشر اذا اقدر اسأل لان إياد غالي من غلاوة ابوه

ياسر: اشتي ادرى وين عايش إياد

المدير: عايش عند عمه

ياسر باستغراب: هوذا قالوا عمه خبيث ومايحب إياد

المدير: هذا صح بس بعد ما استشهدوا اهله عاش عند عمه لان البيت اصبح دمار ماتقدر تعيش فيه

ياسر: مابش معاه اخوال

المدير: للاسف امه كانت الوحيده حق اهلها ولوما استشهدت كان قد مات ابوها وامها اول مادريت بخبر استشهاد بنتها لحقتها

ياسر: هاه الله يرحمهم وكيف كانت حالة ابو إياد

المدير: كان شاقي يعمر رزقه يوصل له يوم ويوم مع وانت داري ان الشاقي لاعمر والا رنج يوقع شقاه في اليوم مش ساع الموظف راتب شهري بس لحظه ليش بتسال هذه الاسئلة

ياسر: هاه ولاشي خلاص شكرا بس باقي تقل لي اين موقع بيت إياد مش بيت عمه بس

المدير: تمام البيت في حارة الـ...... لف يمين وبعدا يسار وعتعرف البيت خاصه انه واضح انه مدمر خاصه ان جنبه بيوت ضخمه وكان بيت إياد منهن لانه حن كان يعمر كان يسبر كل حاجه هو وباتقان وتصميم وثقه بالله كان يقدر يفعل كل حاجه اه ه الله يرحمك يا اسماعيل

ياسر: الله يرحمه يارب يله تسلم خاطرك

المدير: الله معاك

وخطي ياسر بعد ما اتصل لمحمد يجتمعوا خاصه ان اليوم مابش معاهم دوام في الجامعه
.
.

احمد: سامحني ياإياد ماقدرت امس اجي لاعندك للمستشفى

إياد: عادي مابش فيها شي وبعدا مابش فيني شي اخطوا اخطوا للفصل

يونس: ليش

إياد: اخطوا نطرح الشنيط حقنا عاسب لاجاء الطابور مانجلسش متحملين لهن

يونس: تمام

وخطيوا للفصل

إياد ابسر الولد وذكر امس حاول يتجاهله بس الولد جاء لاعنده

الولد: إياد انا آسف

إياد بغباء: على ايش

الولد: على امس هو نسيت زلطي في البيت وافتجعت لاهي انسرقت

إياد: عادي عادي مابش شي اسهل احنا اخوه

الولد: صدق يعني تقبل تكون صاحبي

إياد: اكيد

الولد: انا اسمي رامي

إياد: حيا بك جي ذلحين نجلس جمعه احمد يونس ابسروا هذا صاحبنا الجديد رامي

احمد: حيا به

وجلسوا يتعارفوا مع ان يونس مش بالع له خاصه بعد ماوقع بإياد امس

إياد: هيا قوموا دق الجرس

قاموا كلهم وإياد مسك يد يونس وبيحمل معاه ياسعم يوصلوا الاولين ليكن إياد يشتي يحاكي يونس: يونس مالك على الولد

يونس: يااخي اشتي ادرى كيف سامحته ابسرت امس كيف شكلك

إياد: انا دائما يوقع بي هكذا لذلك لا تستغرب ولا تحمل الولد حاجه مش هو داري بها ابسرت كيف هو مفتجع

يونس: ولو محد قال له يكذب عليك

إياد: يونس انا سامحته فعشاني سامحه وحاكيه طبيعي

يونس بتردد: ...


https://t.me/rewayatyamania/49746




📚 @rewayatyamania  🇾🇪

☄


بارتـات يومنـا الاحـد👆🏻😍

.

البـارت 21 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


إياد: يونس انا سامحته فعشاني سامحه وحاكيه طبيعي

يونس بتردد: عاسبك بس لاسامحه

إياد: ضخم
.
.

محمد وصوته ملان نووم: ايش به من جديد اليوم قلت مابش جامعه يعني لرقد بس مابش امل

ياسر ضحك: مابش امل

محمد: ايوه قل لي كيف إياد

ياسر: والله إياد خرجته من المستشفى

انتبز محمد من السرير: ايوه ليش وانت داري انه تاعب خاصه ماقد درينا ايش مرضه

ياسر: اول شي اهدأ ثانيا إياد مش متحمل المستشفى قال مابلا اخرجه ومابلا يشتي يخرج حسيت لو خليناه في المستشفى مش عيتقبل حاجه ذك الساع خيرته يااما يجلس في المستشفى او اشله عندي في البيت ذك الساع مارضيش ورفض ليكن اقنعته وبعدا قال عيجي عندي

محمد: ايوه وين عيعيش عندك

ياسر: انت داري مابش معي خوات والبيت كبير لاخليه في غرفه وعاد الولد صغير يعني عادي يقابل امي

محمد: بس واهله يعني وين هو عايش

ياسر اتنهد: والله على كلام وائل شكل إياد مش عايش عندهم وحن سرت اليوم وصلت إياد المدرسه دخلت للاداره وبين اجابر المدير قال اهله امه وابوه استشهدوا وامه كانت الوحيده حق اهلها ولوما اوقع القصف الجده اول مادريت ان بنتها استشهدت ماتت بعدها والجد قد مات من قبل

محمد: يعني وين عايش

ياسر: هذا الذي محيرني شليت الموقع حق البيت ولاسير ابسر البيت حقهم

محمد: بس هذا ما يخليك تشله عندك في البيت كيف تأمنه

ياسر: باين الولد من شكله مؤدب

محمد: ولو يقل المثل تحت المدني الف جني

ياسر: ابداا إياد مش من هذا النوع إياد باين انه مؤدب ولا تجادلني خلاص اقتنعت انني اشله بيتنا يله خاطرك وصلت الحاره حق بيته

وصل ياسر للحاره حق بيت إياد وبيخطى نفس ماقال له المدير ابسر البيت كيف هو للقاع
ياسر: يعلم الله اينك عايش يا إياد

دخل للارضيه حق البيت وبيتبسر كيف هو البيت مهدوم: إياد كيف تحملت هذا المنظر هذا ككككيف

خطي وابسر عماره صغيره بالحجار ساع الصندقه هكذاك صغيره ومغلقه بستاره قدهي مشططه * طبعا مش باينه الا لوما تدخل للارضيه *

فتح ياسر الستاره وابسر اداة إياد والمسابح في القاع مسبرات: دريت وين بتعيش مستحيل اخليك ترجع لهانا ولو افعل المستحيل معاك رد الستارة وهو مصمم خلاص إياد عيعيش معاه ماعيفلته وروح للبيت يحاكي ابوه وامه عاسب لادى إياد وقد هم داريين
.
.

بعد مادخلوا الفصل
رفع رامي يده

الاستاذ: مالك يارامي

رامي سنب: اشتي اعتذر لإياد امام الفصل يا استاذ

الاستاذ ابتسم: اتفضل

رامي: انا آسف ياإياد وماكان قصدي افعل هكذا وانا آسفف وان شاء الله تتقبل اعتذاري

إياد سنب: انا مسامح لك من غير ما تعتذر

الاستاذ صفق لرامي وإياد وبدأ الفصل كله يصفق لهم

جلسوا وبدا الاستاذ يشرح وتصافت القلوب وفي الراحه جلسوا جمعه

يونس: إياد مازد قالوا لك في المستشفى كيف لوما خرجوك

إياد بضبح: بين اقل لكم انني بخير ليش مابتفهموا

احمد بيغالط: ايوه صح إياد الاختبارات النصفيه بعد اسبوع قال لنا الاستاذ امس

إياد: صدق يووه ماقد ذاكرت سوا

رامي: ما انت ماشاء الله عليك الاول الله يحفظك

إياد: اسلم وماقال لكم كم الرسوم حق الاختبارات

احمد: الا قال 200 حق طباعه الورق ياسعم مدري كم انختبر

إياد: هاه يله خلونا نصتبح قبل ماتكمل الراحه كما هي تكمل بسرعه

يونس: والله صدق

وبدأوا يصتبحوا
.
.

ياسر: السلااااام عليكممم

ام ياسر: حيا بولدي حياا ادخل وين انت من امس

سلم ياسر على امه بحب: اجلسوا وانا احكي لكم وابي ساروا العمل

ام ياسر: ماشي هوذاك في الغرفه اليوم تاعب شويه فيه حمى ماسارش العمل

ياسر فز: وكيف هم ذلحين

ام ياسر: شرب حبه وذلحين ماله شي

سار ياسر لاعند ابوه حبه في راسه: كيف انتوا ذلحين

ابو ياسر: الحمدلله بخيرر

ياسر وهو بيعس راس ابوه: هوذا الحمدلله ماعد انتوا محميين

ام ياسر: خفت مع الحبه

ابو ياسر: وين كنت امس ياابني اقلقتني عليك

ياسر تربع فوق السرير: هيا صلوا على النبي احكي لكم

ابو ياسر وام ياسر: اللهم صلِ على سيدنا محمد وعلى آله
وبدأ يحكي لهم قصه إياد
* لوما يكمل واقل لكم ايش عيقلوا هههههه *

.
.

في الفيدوس
إياد في نفسه * ياسر تأخر بالرغم انه وعدني عيجي لي يعني فلتني يله لاسير بيتنا وخلاص ولا انسى ياسر لانه طلع مايحبنيش وخطي وحده بعد ماخلى يونس يخطى وقال عادني متأخر *
وصل إياد وبدل وسار الجامع

العم عبدالملك ابسره: حيا بابني إياد مالك ماجيت امس بالكره قلقت عليك

إياد حبه في راسه: سعليكم مابلا امس تعبت شويه وشلوني المستشفى وخرجت الصباح صليت في الجامع حق المستشفى وسرت المدرسه

العم عبدالملك: سلامتك هيا قوم صلي مع هذه الجماعه قد تأخرت اليوم على الجماعه الكبرى

قام إياد صلى معاهم ورجع جنب العم عبدالملك بيقرأ قران
.
.

ابو ياسر: ...
















📚 @rewayatyamania  🇾🇪

.

البـارت 22 °•


مشـرد بيـن ركـام المـنزل ☄

👌🏻👇🏻 😍
📚 @rewayatyamania  🇾🇪


ابو ياسر: انا افتخر ان هذا ابني

ياسر: ذلحين ماقلتوا اديه والا لا المهم رضاكم

ام ياسر: انا عن نفسي اديه مابش اي اعتراض مادام انت ابسرته مؤدب والرأي راي ابوك

ابو ياسر: لا اعتراض ولاشي الولد من وصف ياسر انه مؤدب وانا الصدق رحمته خاصه انه عايش في دمارر

ياسر: فديتكم بس هاه مااشتيش تبينوا له ان انتوا داريين خلوكم ان انتوا داريين انه بس ان اسرته شهداء بس

ابو ياسر: ولاعليك

ام ياسر: هيا قوم اديه قد خورت ابسره

ياسر ابسر الساعه وفزز من السرير: يووووه تأخرت عليه قوووي

وخطي للسياره حقه وبيسوق بسرعه: ذلحين اكيد غلقت المدرسه

وصل للمدرسه وهي مغلقه: يووه يا إياد سامحني وين عتسير ذلحين لاسير للبيت حقك لانت هناك
وصل وابسر ما بحد بس موجود الزي وبقلق: إياد وين انت ويننننه

وخطي بيلوي في الشارع بارجله ويسأال العيال الصغار بس محد لقيه

سال عن جامع قريب عاسب يصلي لانه ماقد صلاش

دخل الجامع وصلى وهو بيدعي الله يلقى إياد
.
.

إياد ابسر ياسر وهو بيصلي في نفسه * هذاا ياسر ليش جاء لاهانا *

قام لاعنده وطرح يده في كتفه بعد ماسلم

ياسر التفت وابسر وانه إياد طوالي حجفه قووي: فجعتني عليك قدني قلق عليك ياإياد قد دورتك ولا لقيتك

إياد: ابسرتك تأخرت قلت شكلك نسيتني

ياسر: احد ينسى اخووه مابلا والله حصلت لي ظروف واتأخرت سامحني

إياد: عادي مابش بين الاخ واخوه شي

ياسر: هيا قوم نروح

إياد: هيا بس راعي هانا ادي حقي الزي والشنطه

ياسر: نخطى جمعه هيا

إياد: لكن

ياسر: بدون لكن هيا

خطيوا للبيت واول ماوصلوا وإياد مغمض عيونه مراعي لاي كلمه من ياسر اي شي ليكن ياسر ما انصدمش: هيا إياد مالك

إياد: دخل للخرابه حقه وهو مستغرب ليش ما استغربش ياسر جر حقه الزي والشنطه ولقط احلى لداه عنده وهن على بعضهن ثنتين شلهن وشل الزلط الذي مخبايه وخطي مع ياسر فوق السياره

ياسر: إياد اسالك سؤال

إياد: ايوه عادي

ياسر: كيف تحملت تعيش هانا

إياد بتنهيده: عادي تعودت كنت بعد استشهادهم بشهر كنت ارقد بين لداة بابه ومامه كنت احس انهم بيحجفوني

كنت ارقد فوق الفرش المشطوط واحس انني راقد بينهم
تعودت على البقعه لوما احسها شي عادي مش حاجه غريبه ساع مابسرتها

ياسر: الله يرحمهم ويعصم قلبك يارررب

إياد: يارررب ويلحقني من بعدهم

ياسر: يلحقنا كلنا من بعدهم يارب

بعد صمتت

ياسر: قذا وصلنا البيت

إياد بخوف وتردد مسك يد ياسر

ياسر التفت صليه وابتسم وكأنه بيطمنه
دخلوا

ياسر: يااهل البيت اخي جاء جوا استقبلوه

إياد موطي راسه خاززي

ابو ياسر قام بعد مالبس جاكت من البرد: حيا بابني الثاني حيا جي سلم على ابوك

إياد جمد بقعته كلمه ابني علقت في عقله ايديه بيرتجفين

ياسر مسك ايديه قوي وخطاه معاه لاعند ابوه

سلم إياد بتردد وخزا: الله يحييكم ياعمم

ام ياسر: وانا ما عتسلم عليا يا ابني

إياد مهي بقعته الترحيب به ذكره بامه وابوه ذكره لوما كان يرجع من المدرسه ذكره لوما كان يمسي في بيت سيده ويرجع عند ابوه وامه كيف يحبوه ويحجفوه

ياسر انتبه لإياد انه شارد وايديه بداين يرجفين مسك راسه وبيحاول يهديه جلس على ركبته عاسب يكون محاذي له: إياد حبيبي ركز معي إياد اهدأ اهدأ الله يرحمهم يا إياد وانت ذلحين بين اسرتك الثانيه إياد

إياد انتبه لياسر وحاول ينسى الماضي ومايتذكرش حجف ياسر: ياسر قل لهم لايقلوش لي ابني بيذكروني ببابه ومامه

ياسر مسح على راسه: تمام تماام جي ذلحين نغسل وبعدا نتغدى

شل إياد في حضنه وخطي وهو حاضن له

ام ياسر والدموع في عيونها: شكل حالته قوويه مسكين عادهو صغير

ابو ياسر: قووي الله يرحمهم ويعصم قلبه يارب

سارت ام ياسر تقرب الغداء

وبعدا دعتهم كلهم وإياد موطي راسه خاززي وبياكل سكته وهم كلهم ساكتين ولابيدوا صوت

ابو ياسر بيحاول يكسر الصمت: إياد صف كم انت

إياد: صف خامس

ابو ياسر: هاه ماشاء الله يله عترجع توقع دكتور ساع ياسر

إياد: ماقد فكرت

ابو ياسر: كيف الدراسه معاك

إياد: الحمدلله

ياسر: بابه انتوا داريين ان إياد الاول على الفصل

ابو ياسر: امانه ماشاء الله عليك يا إياد ووعد مني اذا جيت الاول في نص السنه لاشلك اين ما اشتيت

إياد ابتسم ابتسامه حزن وفي نفسه * نفس ماقالوا لي بابه قبل ما يستشهدوا


✨باااك✨
ابو إياد: اذا جيت الاول في نص السنه وعد اشلك الحديده عند مانفسك تسير

إياد: صدق يابابه حاضر وعدد لاجي الاول

✨
إياد حرك راسه يمين ويسار: تسلموا
وقام من الغداء

ياسر: اجلس كل

إياد: الحمدلله شبعت

خرج شويه وارجع رجع لاعنده: ياسر عادي لاخرجت الحوش

ياسر: اخرج وين ما اشتيت
.
.

خرج الحوش وسار تحت الشجر..

















📚 @rewayatyamania  🇾🇪