⚡️

بــارتــات يـومنـا الاربعـاء والأخيـرة 😍👇🏻

البـارت 61 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


ياسر:الله يسلمه وانتي سلمي عليه

ليا:الله يسلمكم يوصل امممم معي لكم خبر حالي

ياسر:ماهو او عتجوا

ليا:مع بسسسس انا حامل

ياسر وقف بفرحه:حامل

ليا :ايوه

الكل ابسر لا عند ياسر بفرح
واللي بتزغرط واللي فارحه
بعدما غلقت ليا من ابوها

الجده بمزح:وانتوا يا مصطفى اي حين عنبسر عيالكم

مرام ومصطفى انصدموا

الجد بجديه:ايوه قدلكم سنتين وشويه متزوجين

مصطفى:سهل يا جد لوما الله يرزقنا

الجد:ماشي زوجنا مصطفى لو مرام ماقد تشتيش جهال

مرام اشترغت بالاكل

مصطفى وكان الفكره اعجبته ويشتي يحانك مرام:ايوه وماله عادي

احمد عصب:مصطفى منك صدق

مصطفى:ايوه مني صدق

احمد بعصبيه:وانتوا كلكم موافقين على رايه

الجده:عادي مادام مرته ساكته وما تحاكت

مرام حست بالغيره بس كابرت

احمد قام:مرام قومي لفي ملابسش مابش لنا جلسه هنا

الجد:وعترحلك علاميد زوج بنتك عيتزوج عليها

مرام ابسرت الامور بدات تتعقد ودعست على قلبها مره ثانيه وقامت:بس انا موافقه عادي يتزوج الله يوفقه.....وطلعت غرفتها هي ومصطفى وارتجمت فوق السرير وجلست تبكي


عند منال :
كانت جالسه في الصاله بتبسر التلفزيون بملل
دخلت نسيم بسرعة وارتجمت في حضنها

منال افتجعت وبخوف:نسيمو يا قلبي مالش

نسيم وهي بتبكي ومحد يفهم من كلامها شي:قا..ل..ت عت..حا..كي ..اب..ي..وتت...همني ا...نن..ي انا بي..ن احا..كي ..عي..ال

منال وهي مش فاهمه شي:نسيم يا قلبي اهداي وامسحي دموعش وحاكيني سواء

نسيم بعد دقايق هدات وبدات تحاكي منال:صاحبتي في المدرسه كانت بتحب واحد وبتخرج معه وكانت تحاكيني وانا انصحها وهي ما تفهمش وامس قالت لي عتخرج معه وانا صيحت فوقها قوي هي قالت والله لا اصور محادثاتي مع حبيبي وارسلها لابوش واخليه يقل اسمش ويتصله ويقل انش خرجتي معه وذاحين انا مفتجعه ما افعل ما افعللل.....وبدات تبكي

منال ضمتها:خلاص يا قلبي لا تفتجعيش انا شادبر الموضوع مع ابوش وعنتغدى بها قبل ما تتعشى بنا

نسيم:كيفه

منال:انتي معش رسايلها وهي بتهددش وما عتقل لحبيبها

نسيم:مش رسايل بس سجلت لي صوت

منال فرحت:ايوووه عادهو احسن الان شاستأذن من ابوش ونسير لا بيتهم تعرفي بيتهم

نسيم بخوف:ايوه في الشارع اللي جنبنا

منال بفرحه:ايوووه ضخم الان شدخل البس واستأذن شاقل ان احنا عنسير لا بيت الجيران نفرح للوالده ما عيتحاكاش


عند مصطفى بعد ما تغدى دخل لاغرفته وابسر مرام بتبكي فوق السرير

مصطفى جلس فوق الكنبه :هيا مالش بتبكي المفروض تفرحي

مرام اول ما سمعت صوته مستحت دموعها بسرعه وهي ما تشتيش احد يبسرها بتبكي

🌸احلامي اصبحت تتلاشى شيئاً بعض شي فواقعي مُر وحتى وان حاولت جاهده ان اتذوق بعض حلاوة احلامي ولكن يخذلني الواقع بشدة💕بقلمي بتول ابراهيم💕

مصطفى بسخريه:او غرتي ان انا شتزوج

مرام بسرعه واندفاع:مع ما غرت سعليك وبعدين انا اغار ومن من

مصطفى اقتهر وزاد الاصرار على موضوع الزواج:طيب كان مالش

مرام:ولا شي بس ضابحه اشتي اخرج

مصطفى وهو بيبين ان هو مابش في حسه منها:تمام سيري

مرام:شابز سيارة ابي

مصطفى:ايوه لانني مش فاضي اخرجش اشتي اخرج اشتري اشياء الخطوبه حق المره الجديده

مرام حست بنار شبت في صدرها لبست العبايه حقها ولبست الطرحه ولما قدهي
هي عتخرج

مصطفى:ييي وعتخرجي هكذا بوجهش

مرام لفت لاعنده:ايوه واعتقد ان هذا الشي ما يهمك والا بتغار عليا لذلك اسكتتتت.....وخرجت من الغرفه ونزلت

دخلت لا غرفة ابوها

احمد وهو زاعل من مرام ورايها وبعصبيه مكبوته :منش صدق انتي ورأيش هذا الاهبل توافقي يتزوج عليش ليش انتي ناقصه والا فيش عيب والا ماهو

مرام انجرحت بس حاولت تخبي جرحها من ابوها:عادي يا بابا يتزوج مرده يرجع لاعندي ويعرف قيمتي

احمد:انتي هكذا خبلاء بتخربي بيتش بيدش ليش ما تمنعيه من الزواج

مرام ودموعها قد عينزلين: بابه لو سمحتوا خلاص انا وافقت وهو طز فيه يتزوج في ستين داهيه الان طافحه اشتي سيارتكم اخرج اغير جو واسير لاعند ماما اشتياق

احمد تنهد بقلة صبر من عناد بنته:انتي اخبر شاشلش انا هيا اخطي

مرام وقدهي عتبكي بس مسكت دموعها :بابا قوا اشتي اجلس لوحدي قوا

احمد تنهد بقلة حيلة ومكنها مفاتيح سيارته

مرام بزت المفاتيح وهربت بسرعه ودموعها بتنزل من دون توقف







📚 @rewayatyamania 🇾🇪

البـارت 62 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


عند منال:
خرجت هي ونسيم وسارين لا بيت صاحبتها هذه اللي هددت نسيم دقين الباب وفتحت لهن الام

الام:حيا من تشتوا

نسيم:انا صاحبة بنتكم سمية

الام:هااا حياكن ادخلين غر سميه مابحدهي

منال:هو احنا نشتيش وحدش

الام فرحت راكنه انهم عيجوا يخطبوا سميه مش هي داريه ببلاوي بنتها

دخلتهن وقربت لهن العصير والضيافه هي من عادات اهل اليمن ومعروفين بالكرم والجود
بعد السلام والكلام والسوال عن الاحوال

منال بتوتر :هو يا ام سميه جينا لاعندكم بموضوع

الام فارحه:تفضلي

منال:والله يا ام سميه مش داريه ايش اقلش وانا ام نفسش وحاسه بشعورش

نسيم من كلمة منال وانا ام وحاسة بشعورش اثرت في قلبها بقوه وكانت عتبكي بس مسكت نفسها

منال سكتت وبعدين كملت بتنهيده وكان هي بتتذكر ماضيها: بس بنتش سميه .....وحكت لها كل القصه

الام بعناد:بنتي تفعل هكذا بدون كذب بطلين كذب يا كذابات

نسيم بكيت:والله العظيم يا خاله والله ولو تشتوا شاسمعكم

الام:ايوه اشتي اسمع واتاكد

نسيم خرجت تلفونها وايديها بيرتجفين وفتحت محادثاتها هي وسمية ومكنت ام سمية التلفون وبدات تقرا وتسمع التسجيلات ودموعها بينزلين على تربية بنتها وهي مش عارفة اين تودي بوجهها قدام منال ونسيم وبكيت من فضيحتها اللي سببتها بنتها

الام بصياح وبكاء:حسبي الله ونعم الوكيل فيها بس حسبي الله هو عملي عملي انا اللي وثقت فيها للطرف وفلتها ولا عاد ابسرتها ولا ابسرت من بتراسل ولا من بتحاكي وتقلي اسير عند صاحبتي واخليها وانا مش داريه ان هي بتسير عند هذا ال......

عند مرام
طلعت فوق السياره ودموعها بتتسابق للنزول كانت دموعها تنزل وقلبها مقبوض وبيوجعها وكانت تقول طز فيك يا مصطفى اتزوج طز ما تهمنيش اصلا ولا بين اغار عليك ليش انا اغار عليك اصلا ليش انا احبك لا بين احبك ولا بين اغار عليك لكن انت عترجع تخسرني وتندم فتحت اغنية براحتك روح لا ترجع لصلاح الاخفش وكان كلمات الاغنيه سهام بتخترق قلبها مع الحانها وصوت صلاح براحتك روح لا ترجع من راح ماعاد يلزمني طلعت لا راس عصر ونزلت وقفت في الهاويه وفتحت ايديها وتنفست بعمق
مش داريه بالشخص اللي وراها ومراقبها من اول ما خرجت البيت والان نزل من فوق السياره لا عندها وبصوت هامس:مرام

مرام من الخوف كانت عتزل رجلها وتنكع(تسقط) من الهاويه وبخوف التفتت وانصدمت بالشخص اللي قدامها
وبعصبيه

مرام:ايش انت انت ما تفهم انت ماعندك احساس جالس تلاحقني من امريكا و ورور ورور لليمن

جاسم:ايه ما افهم لاني احبك شنو انتي ما تفهمين

مرام:هييي شكلك زيدت السخافه حقك قوم انقلع وارجع بلدك لاني ما اتشرف فيك اصلا

جاسم :بس انا احبج يا مرام ورب البيت احبج وماتي لاحقج من امريكا لليمن الا انني احبج بترجاج اعطيني فرصه لحتى اثبت لج حبي

مرام:تشتي الصدق وشاكرر المثال هذا في وجهك حبتك الصلى وهي حاميه او زيما يقولوا حبك برص.... انت ما تفهم كيف تلاحق انسانه مزوجه

جاسم ضحك من المثل حقها:وربي المثل حلو وايد وبعدين يا بنتي عارف انج متزوجه ومتزوجه مصطفى اللي بقسم العظام وكمان هو ابن عمج بس عارف بعلاقتكم وانكم مو مرتاحين وما تحبون بعض لذلك اعطيني فرصه

مرام:فرصوا راسك يابني انا ما احبكش ما احبكش انا احب شخص ثاني يعني لا انت ولا مصطفى اطمن

جاسم:بوريج يا مرام صدقيني رح تندمين لانج رفضتيني ورفضتي حبي









📚 @rewayatyamania 🇾🇪

البـارت 63 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


الام:اخيرا جيتي وين انتي لا هذا الساع

سميه ارتبكت وهي بتبسر نظرات امها لها وكان هي عتقتلها

سميه:والله يمه كرها لقينا باص يوصلنا انا والبنات

الام بعصبيه مكبوته:ايوه انتي والبنات ..منهن هولا البنات

سميه ارتبكت ماعاد دريت ما تقول:البنات ايوه نسيم وساره

الام تقدمت لا عندها بعصبيه وبزت العصا:نسيم ايوه صح نسيت ما اقلش انهي هي وامها كانين اليوم هنا

سميه افتجعت ونكعت بطونها وجلست ترتجف

الام بدات تجلدها :ايوه نسيم يا فاجره يا كذابه انتي ومن كنتي لا هذا الساع انتي وهذاك الصايع ابن الكلب حاضر انا اوريش والله لا اقل لابوش يادبش انا استاهل انا السبب اللي وثقت فيش واديت لش تلفون وخليتش تدخلي وتخرجي على هواش لكن انا اوريش والله يا سميه ما عاد تبسري يوم حالي في حياتش حاااااضر لا عاد تلفون ولا دخله ولا خرجه وانتي عتبسري يا اما تتزوجي وتتقلعي من عندي والا القبر.......وجلست تضربها بالعصا مع محاولات سميه ان هي تهرب بس كانت الام احرص منها غلقت كل الغرف


عند مرام:
اصوات سيارات الاسعاف والشرطه الكل موجود هناك وبيدوروا على شي يدل على هويتها

الضابط بيحاكي المسعف:كيف عادهي حيه

المسعف باستعجال:ايوه بس نبضها ضعيف قوي ضروري نشلها للمستشفى الان لان هي احتمال في وقت يقطع تنفسها

الضابط:طيب استعجلوا خرجوها من السياره

بداوا المسعفين يخرجوها من السياره ونقلوها للمستشفى


عند مصطفى
بيراسل اصحابه اللي في اليمن بيتفقوا يتلاقوا
فجأة حس ان قلبه انقبض ومسك على قلبه
مصطفى وهو بيضغط على قلبه:ااه

كلهم التفتوا لاعنده

امه:بسم االله عليك سلامتك من الاه

الجده:يو صلينا على النبي مالك ياولدي

ياسر:او قلبك بيوجعك

احمد كذلك قلبه مقبوض وبيحس بمصيبه عتجي

مصطفى:الله يسلمكم غر والله ان قلبي مقبوض وبيوجعني عادهو بدا يوجعني من الان

احمد:وانا والكل بين احس بخوف مدري مالي يارب استر

قاطع كلامهم رنة تلفون احمد الكل انقبضت قلوبهم مع هذا القلق

الجده بخوف:يا الله استر جاوب يا ابني

احمد فتح الخط بخوف وهو بيبسر رقم غريب

احمد:الو

....:معنا احمد ال...

احمد ايوه من معي

.....:معاكم الشرطة لقينا سيارتك مصدومه وكان فيها بنت البنت في حاله خطره ويمكن الان ان هي ماتت نقلناها لا مستشفى ال....

احمد نكع التلفون من يده ودوخ

ياسر اللي كان جنبه بيسمع بعدما ابسر احمد عقد حواجبه سمع كل شييي بس ما عرفش من هي البنت

كلهم حملوا لاعند احمد يفوقوه

الجد:خير مابه يا ابني

ياسر :اتصلوا له من مستشفى ال... بيقلوا فوق سيارته بنت وفعلت حادث وشكلها ماتت او في حاله خطره مش انا داري من هي البنت هذه

مصطفى اول ماسمع ايش قال ياسر سوم ودقات قلبه كانت تنبض بشده وبعصبيه:مراااااام كانت فوق السياره.....بز مفاتيح سيارته وخرج وهو بيحاول يتذكر اسم المستشفى اللي قالوا له

الكل بعدما عرفوا من كان فوق السياره اللي بيصيح واللي بيقوم احمد وبيبكي

احمد قام ودموعه بينزلين:بنتي بنتي انا السبب اللي اديت لها السياره انا السببب....وقام

ياسر مسك احمد:اهدأ يا اخي وصلي على النبي الان عنسير نبسرها

فاطمة زوجة ياسر:انا شاجي معاكم

الجد والجده:واحنا

يارا ويونس:واحنا والكل

ياسر:بسرعه سيروا البسوا

الكل سار يلبسس واللي بيبكي واللي زاعل


عند ليا وميثم:
وهم بيتغدوا
ميثم:يا اللله والله ان انا قلق مدري مالي

ليا:وانا والكل يارب استر اسكه اتصل للبيت ابسر مالهم

ميثم خرج تلفونه وبدا يتصل لمرام

ميثم التفت لاعند ليا: تلفونها مغلق

ليا:ابسر مصطفى

ميثم اتصل وانتظر الرد بس محد بيرد قلق اكثر
حاول يتصل لمصطفى مره ومرتين بس لاردددد لان تلفون مصطفى في البيت ومصطفى في المستشفى

ليا بكيت:يا الله استر شتصل لامي
....واتصلت لامها بس محد بيرد
.....وزاد بكاها

ميثم بيهداها:خلاص يا قليي يمكن مشغولين او شي شويه ونحاول نتصل

ليا ودموعها ما وقفت:ياااارب احفظهم يااارب


في المستشفى
عاد مصطفى وصل توجه للريسبشن يسال




https://t.me/joinchat/AAAAAEIz_KDfjDgo7Gaxwg



📚 @rewayatyamania 🇾🇪

البـارت 64 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


عاد مصطفى وصل سار يسال في الريسبشن
مصطفى وهو قلق وخايف ويحاول ما يصدقش الذي اتصل لعمه احمد :بنت عملت حادث عادهم الان نقلوها اسمها مرام احمد ال......

السكرتاريه:في الطوارئ غرفة رقم٥ بس ايش تقرب لها

مصطفى سار بسرعه للطوارى من دون ما يسمع ايش زد قالت ووقف عند الغرفه وعيونه معلقه في الباب بأمل

خرجت الممرضه من الغرفه وهي بتجري

مصطفى لحق بعدها بخوف ووقفها:ايش فيها زوجتي ايش فيها

الممرضه:انت زوجها

مصطفى بيبسر لاعندها بامل وهو بيتمنى تقول خبر حالي:ايوه ايش فيها

الممرضه كملت بأسى:عظم الله اجرك الله يصبرك.....وخطيت

مصطفى كانين دموعه ينزلين وهو بيحس ان هو السبب في موت مرام خرج من المستشفى بانكسار وخيبه طلع فوق سيارته كان يخطى بسرعه سار لا بقعه فاضيه خارج صنعاء ونزل وصاح باقوى قوته :يااااااااااااااااراااااااااااااااااب ارحمنييييييييييي.... وجثى بركبه على الارض وجلس يبكي بقهر وندم على كلامه اللي كان يقوله لمرام وعلى انكاره لحبها

اصعب واوجع شي في الحياة دموع الندم....دموع الندم تميت القلب بالبطيء وتحرقه...فالندم يصيب القلب بحرقة كبيرة لا يمكن لاحد اطفائها💕بقلمي بتول ابراهيم💕


عند ليا وميثم:
اخيرا ردت يارا اخت مصطفى

ليا وهي قلقه:مالش كم قد اتصلت لكم اتصلت للكل ولا احد بيجاوب وين انتوا

يارا ببراءة:احنا عنسير المستشفى

ليا انقبض قلبها:ليش مابه

يارا:مابلا مرام فلعت حادث وهي في خطر....وانسحب التلفون منها وجاوبتها امها وهي بتتوعد في يارا

فاطمه:ها بنتي سعليش مابه شي

ليا وهي بتبكي:يمه اسالتكم بالله مابه في مرام ماوقع بها

ميثم ابسر لاعند ليا وهو عيجنن

فاطمه وهي بتبسر لاعند يارا بنظرات عتب وتهديد:ولاشي يا بنتي غر فعلت حادث بسيط واحنا الان عنسير نبسرها

ليا:يماااه امانتكم طمنوني عليها

فاطمه:سعليش خاطرش وصلنا المستشفى

غلقت ليا من امها وهي بتبكي

ميثم جاء لاعندها:مال مرام ماوقع بها

ليا وهي بتبكي:قالت يارا ان هي فعلت حادث وحالتها خطره

ميثم انصدم ونزلت دمعه من عينه على اخته وحبيبة قلبه:ماقالت لش خالتي شي ثاني

ليا:قالوا عيطمنوني

ميثم:شاسير احجز لنا واستأذن من العمل....وخرج سار يحجز حجز مستعجل والرحله اليوم بعد اربع ساعات وقدم طلب اجازه من المستشفى وروح البيت يحاكي ليا ويتجهز للسفر وهم قلقين وكل شويه يتصلوا لعند فاطمه تطمنهم بس هي غلقت تلفون يارا وخبته عندها

ياسر اتصل لمحمد ابو مرام ومحمد اتصل لاعند حنان :

كانت جالسه هي ومرت اخوها ام سام وسام بيتجابروا قاطع كلامهم رنة تلفون حنان

حنان ابسرت وانه رقم محمد استغربت بس ردت لعل ان هو شي ضروري

حنان:الو

محمد:حنان

حنان:ايوه ها محمد

الكل استغرب

محمد باستعجال وخوف:مرام بنتش فعلت حادث وهي في العنايه المركزة وحالتها خطرة هي في مستشفى ال..... حابه تجي جيتي انا شاسير انا وملاك...وغلق لاوجهها والجرح اللي في قلبه عادهو ما برى

حنان انصدمت ونكع التلفون من يدها وجلست تبكي

الكل انصدم وحمل لاعندها

سام:يوه يا عمه مالش صلي على النبي

حنان ببكاء:مرام بنتي فعلت حادث وهي في العنايه وحالتها خطرة

سام انصدم وافتجع عليها ووجعه قلبه بس حاول ما يبينش:قوموا البسوا وانا اشلكم هيا

حنان سارت تلبس وهي بتبكي









📚 @rewayatyamania 🇾🇪

البـارت 65 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


في المستشفى
اول ما وصلوا استغربوا لان مصطفى مش موجود وصلوا لاعند غرفة مرام وخرجت الدكتورة

احمد حمل لاعندها بسرعه

احمد:يا دكتوره مرام ال.... هي بخير كيف حالتها

الدكتوره بحزن:للاسف دخلت في غيبوبه
بس محد عارف مدتها كم لان الغيبوبه ممكن تطول لشهر شهرين سنه سنتين ثلاثين سنه كل على حسب الجسم ومقاومته اذا لقي شي يقوم لاجله بنتك مناعتها ضعيفها وقلبها تعبان وجسمها مش راضي يقاوم الغيبوبه وضعها لازال ما تعداش الخطر
احمد دموعه نزلين وجلس في الارض في الممر وطرح راسه على ركبه وهو بيدعي:ياااارب رحمتك يااارب سلمتك وفوضت اليك امري يارب بنتي في امانتك يارب لا تفجعني في بنتي يااااارب

الكل انصدم من كلام الدكتورة

الجده بكيت وجلست فوق الكراسي وارتفع ضغطها

وفاطمه بتبكي وبتحاول تقوم الجده

الدكتوره كملت:كان في واحد هنا قال انه زوجها سال الممرضه وقالت له ان هي ماتت هي كانت تقصد الممرضه اللي في الغرفه الثانيه اللي ولدت

الكل انصدم وصدمه وراء صدمه افتجعوا على مصطفى واتصلت له يارا

ياسر صيح فوق الممرضه اللي كانت جنب الدكتوره ومنزله راسها

ياسر:منش صدق انتي مابش معش عقل خبلاء والا مه تفجعي الرجال

الممرضه وهي مفتجعه لا يررفعوا عليها قضيه:انا اسفه والله ما كنت اقصد اصلا كان ابنكم واقف جنب الغرفه اللي بتولد فيها المره

ياسر:خلاص حصل خير ثاني مره انتبهي

فاطمه بتتصل لمصطفى وما بيجاوب عادت الاتصال

عند مصطفى:
كان جالس تحت شجره ودموعه بينزلين بقهر كان يتذكر كلامه لمرام وكيف كان يجرحها ويقهرها واخر شي اليوم خرجت وهي مقهوره منه تذكر عمه احمد وابوه وجده وجدته وقف بانكسار وقهر وقال في نفسه:قوي نفسك يا مصطفى حاول علشان اهلك سير قويهم قد انت الكبير

.....طلع سيارته وتوجه للمستشفى

عند ليا وميثم:
ساروا للمطار وطلعوا فوق الطياره وهم قلقين على مرام

وصلت حنان وسام للمستشفى
حنان وهي بتبكي توجهت لاعند محمد اللي وصل قبل دقايق

حنان:محمممد كيف مرام كيف بنتي

محمد وقلبه بيوجعه على مرام ووجه نظره لاعند ملاك اللي فوق الكراسي وبتبكي:دخلت في غيبوبه ووضعها جالس في خطر واحتمال تقوم بعد شهور او سنين

حنان بكيت وجلست تلطم نفسها:احححح يا بنتي عتفلتيني وما قد ابسرتي مني يوم حالي مراااام احححح يا كسر قلبي يا مرام

سام اول ما سمع محمد ايش قال عن مرام ارتزح عرض جدر بعيد منهم ودموعه نزلين

مصطفى وصل للمستشفى وخطي للغرفه اللي فيها مرام بس لمح من بعيد سام اول ما ابسره جن جنونه وحمل لاعنده وانهال عليه ضرب

مصطفى وهو مجروح ومكسور وكأن هو بيخرج قهره وضبحه وجروحه اللي سببتها حب مرام لسام وحبه اللي كان من طرف واحد للمره الثانيه اول مره كانت من رانيا بنت عمته وثاني مره حبه لمرام ونفس الشي كان من طرف واحد:انت انسان نذلللل انت قتلت مرتي قتلتها انت قتلت مرتي حب حياتي انت كنت سبب مشاكلنا كلها انت انسان تافه وحقير انا شقتلك نفس ما قتلت مرام

سام مشو فاهم ما بيقل مصطفى بس اللي فهمه ان مصطفى عرف بحب مرام له :ييي بطل جنان وسير ابسر مرتك
مرتك في غيبوبه سير ابسرها قد الكل هنا الا انت جالس بتلوي ومفلت مرتك

مصطفى انصدم وكان ماء بارد انسكب فوقه وبعدم استيعاب :مرام ماتت

سام لكمه واستغل هدوء مصطفى وقلبه وبدا يضربه:بتتفول عليها مرام حيه مرام حبيبتي حيه ما ماتتش جعلك انت اللي تموت مش هي

مصطفى انصدم وكان ما بيحس بلكمات وضرب سام له :بس قالت لي الدكتوره ان هي ماتت

سام بعد من فوق مصطفى وقام:جعلك انت الموت وارتاح منك لانك سرقت البنت اللي حبيتها

مصطفى ولا كأن هو سمع كلام سام اتوجه لاعند غرفة مرام

الكل كانوا جنب الغرفه مورعين للدكتوره تخرج اول ما ابسروا مصطفى حملوا لاعنده بخوف

مصطفى بهدوء عكس اللي داخله وهو مش راضي يصدق كلام سام يشتي يتاكد
:صدق مرام حيه

احمد دمع وحضن مصطفى:ايوه حيه يا مصطفى بس هي في غيبوبه واحتمال ما تقوم منها

مصطفى فرح وابتسم وسجد لله:الحمد لله الحمد لله

احمد بعصبيه:بس هي في غيبوبه ليش فارح

مصطفى ودموعه ننزلت واللي في البيت اول مره يبسروا دموعه:كنت راكن ان هي ميته ماتت وقلبي مات معاها مش مصدق ان هي ماتت عشت ساعات ما تمضي على كافر لاول مره دموعي تنزل على شخص بس نزلت لموتها موتها كسرني وحطمني مش متخيل كيف اقدر اعيش من دونها ....قاطع كلامه خروج الدكتوره الكل توجه لاعندها




https://t.me/joinchat/AAAAAEIz_KDfjDgo7Gaxwg



📚 @rewayatyamania 🇾🇪

البـارت 66 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


الدكتوره:احنا فعلنا كل اللي علينا والباقي على الله حالتها لسا ما استقرت الان تقدروا تروحوا لان وجودكم وعدمكم واحد تفضلوا سددوا مصاريف العلاج والرقود والان سيروا ادفعوا

ياسر: شاسير ادفع....وسار يدفع

مصطفى:انتوا روحوا وانا شجلس عندها

الدكتوره:روحوا كلكم لانو ما ينفعش احد يجلس عندها اولا لان هي عنايه ثانيا هي في غيبوبه ما تحتاج احد يجلس عندها....وراحت لها

احمد وقلبه مكسور على بنته:خلاص يابني روح البيت ما ينفعش احد يجلس

مصطفى عصب:شجلس يعني شجلس ما عليكم مني روحوا كلكم

ياسر بأسى من عناد مصطفى:خلاص خلونا نروح كلنا وهو اخبر بنفسه معه سمع وبصر


الكل روح ووصلوا جلسوا في الصاله يتجابروا ويواسوا احمد ما يشتوش يفلتوه وحده والكل قلوبهم موجوعه على مرام


عند ليا وميثم:
وصلوا للمطار واستاجروا تاكسي وحملوا شنيطهم وتوجهوا للبيت


الكل في الصاله:
كانوا سرحانين قاطع سرحانهم دخول ليا وهي بتبكي

الكل انصدم وانفجع من شكلها عيونها مورمات

حضنتها فاطمه وبكيت هي وياها وقد الكل بيبكي
بعد ما تسالموا

الجد:فينو زوجش يا بنتي

ليا:طرحني وسار للبيت يسلم على ابوه ويطرح الشنيط

ياسر:الله يحفظه

ليا ببكاء:الان تشلوني ابسر مرام الان

ياسر بهدوء:الزياره مش مسموحه اليوم بس يمكن غطوه يخلونا نزورها الان اطلعي غرفتش ارتاحي عادش جيتي من سفر وتعب

ليا ببكاء:كيف يجي لي نوم واختي وصاحبتي وبنت عمي في غيبوبه قلوا لي كيييف

الجده بعقل:لو هي بنت عمش فهي اخت زوجش المفروض تكوني مع زوجش في مصاعبه ومحنه بنت الاصل ما تفلتش زوجها وظروفه صعبه يله اتصلي له وروحي بيتش

ليا بحزن:انا داريه يا جده بس هو عادهو عيجي يبسركم واروح معه

الجده:مره

ليا:ما سخاني افلته وهو في هذه الحاله

فاطمه:الله يكملش بعقلش يا بنتي

عند مصطفى:
كان جالس في الكراسي اللي قدام غرفة العنايه المركزه وطارح راسه فوق ارجله وبيتذكر مرام من اول ما التقى بها في امريكا لا اليوم لما جرحها وعيتزوج عليها وخرجت وهي زاعله منه لام نفسه ان هو السبب في الحادث نزلت دمعه يتيمه كسيره من عينه

عند ميثم:
اول ما وصل البيت دخل وان هو فاضي تذكر ان ابوه هو وملاك انتقلوا يعيشو في بيت جده ابو محمد
طرح الشنيط في غرفته وتوجه لا بيت جده
دق الباب وفتحت له ملاك وارتجمت في حضنه تبكي

ملاك:اختي يا ميثم اختي ولا مره في حياتي عاملتها على اساس اني اختها ووقت ما قررت ارجع علاقتنا هكذا في غمضة عين يقلوا في غيبوبه واحتمال تقوم واحتمال ما تقوم منها.....وجلست تبكي

ميثم انصدم وارتعش جسمه وبعد ملاك منه وجلس يهزها بصدمه


ميثم:ماهو ما بتهذي غيبوبة مه من الجنان

ملاك زاد بكاها:دخلت في غيبوبة واحتمال تقوم منها واحتمال مع

ميثم سوم(دارت به الارض)وجنن وبعصبيه:في اي مستشفى هي

ملاك بخوف:في مستشفى ال.......بس الزياره ممنوعه وممنوع ان احد يجلس عندها لا تسير

ميثم:لاحول ولا قوة الا بالله خلاص انا شاسير لابيت اهل ليا ابسر عمي احمد واتطمن عليهم واروح بيتنا قلي لابي ان انا هناك

ملاك:عيب ادخل سلم على جدي قدهم فاقدين لك

ميثم تنهد ودخل بدون نفس سلم وتجابروا شويه وتوجه لا بيت ليا

عند بيت ليا:
كانواجالسين في الصاله مع ان الوقت تاخر بس ولا احد جاء له نوم قاطع شرودهم الشغاله

الشغاله:ماما ليا

ليا التفتت:هلا ميري

ميري:بابا ميثم في يبغى انتا

ليا:قولي له يدخل...يارا اتغطي ميثم عيدخل

يارا طلعت غرفتها تلبس

دخل ميثم:السلام عليكم

الكل:وعليكم السلام ...ووقفوا وبداوا يسلموا عليه

ميثم بقهر:اشتي ابسر اختي اشتي ابسرها

ياسر بهدوء:صلي على النبي يا ابني هو بس اليوم ممنوع الزياره وغطوه الزياره مفتوحه

ميثم:مش انا مصدق ان هو وقع بها هكذا يا الله بس

احمد بهدوء وعقل:كلنا مش مصدقين لكن الحمد لله قضاء وقدر

ميثم تنهد:الحمد لله..ليا هيا قلبي نروح البيت

ليا قامت:يلا..وقامت تلبس


الصباح عند مصطفى :
كان جالس قدام غرفة مرام وراقد وطارح راسه فوق رجله

جت لاعنده الممرضه:يا اخخ

مصطفى نكز:هاا

الممرضه:....








📚 @rewayatyamania 🇾🇪

البـارت 67 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


مصطفى نكز : هااا

الممرضة : تقدر تدخل تشوف زوجتك بس معك نص ساعه لوقت الزيارة

مصطفى فرح ودخل

اول ما دخل الغرفه لاعند مرام لفحه هواء الغرفة البارد وشم المطهرات والعلاجات ملان المكان ابسرها مستلقيه فوق السرير وشكلها نفس الملاك زعل عليها ووجعه قلبه كانت يدها مجبسه لان هي مكسوره والكدمات الحمراء ملان وجهها الابيض لام نفسه ان هو السبب في حادث مرام

دخل ببطء وخوف وجلس فوق الكرسي اللي جنب السرير ومسك يدها اللي مش مكسوره وكانت باااارده جلس ماسك لها ويمسح عليها ودموعه بينزلين

مصطفى:مرام يا قلبي مرام يا روح مصطفى انتي انا بدونش عدم والله انني عدم قوا قومي وانا والله لا اعوضش عن كل السنين اللي فاتت والله لا انسيش سام وابو سام انا احبش يا مرام والله ان انا احبش بس قومي



كان كل شي حولها ظلام في ظلام حاولت تفتح عيونها بس مابش فايده حاولت تحرك يدها بس بدون فايده حاولت تنطق باي كلمه برضو دون فايده :يوووه ياربي اين انا ولا بين ابسر شي ولا بين اقدر احرك شي اشتي اتكلم اصيح فين انا ياربي شكلي مت وانا الان في القبر بين الظلام بس بين اسمع صوت انسان اعرفه...ايوه هذا صوت مصطفى مصطفى زوجي الانسان اللي حبيته وجرحني وطلع ما بيحبنيش....شدها كلامه اللي قاطع تفكيرها وهو بيقول


مصطفى:مرام احبش انتي بس قومي والله لا اعوضش عن كل شي احبش يا مرام من اول يوم تلاقينا فيه قومي قومي....ونزلت دمعه حاااره من عينه لا فوق يد مرام


مرام اول ما سمعت كلامه حاولت تتحاكى وتقول وانا والكل احبك بس ماقدرت والمتها اكثر شي الدمعه اللي نزلت من عينه وفي نفسها:هذا مصطفى بيبكي علشاني انا ..مصطفى بيحبني انا وما بيحبش احد غيري.. مصطفى حبني حب صادق مش نفس حب سام.. مصطفى بيحبش يا مرام افرحي..لقيتي من يحبش يا مرام اه من سام والقهر اللي قهرني بس مصطفى نساني سام وطوايف سام احبك يا مصطفى والله انني احبك.....


مصطفى:يا قلبي انا شا اكون اجي عندش يوميا بس الان شاروح البيت اغير ملابسي واطمن عمي احمد اللي ماوقفت له دمعه وجدتي وجدي ابوش محمد اللي يحبش اطمنهم واجي ودعتش الله الذي لا تضيع ودايعه يا نظر عيني .....

وخرج بفرح ان هو ابسر مرام صح تالم من شكلها والكسور اللي فيها بس اهم شي ان هو ابسرها وبيدعي الله ان هي تقوم في اقرب وقت


(مش ضروري يحصل شي للشخص اللي تحبوه سواء كان حبيب ام اب اخ اخت صديق مش ضروري يمرض او يوقع به شي علشان تحبوه وتسامحوه استغلوا وقتكم في قرب من تحبوا لانكم بتندموا بعدين استغلوا وقتكم بقرب امكم وابوكم قبل ما ياخذ الله امانته وتتمنى تحاكيهم بس دقيقه واحدة)

الصباح
في بيت الجد
الكل فوق الطاوله والاكل قدامهم بس ولا ذاقوا شي ولا ذاقوا طعم النوم الا البعض منهم عمل له غفوه

كل واحد اللقمه في يده وسرحان قاطع سرحانهم دخول مصطفى الكل التفت بفرح منتظرين البشاره من ملامحه

ملامح مصطفى كانت عاديه ولا تبين اي شي

مصطفى بحزن:سمحوا لنا بالزياره سيروا زوروها امد ما اغير ملابسي وارجع لاعندها

الكل فرح وكل واحد سار غرفته يغير ملابسه علشان يسيروا المستشفى عند مرام ويارا اتصلت لليا وميثم اتصل لحنان


الكل في المستشفى :
دخلوا عند مرام واللي بيبكي واللي حزين قاطع جوهم الكئيب دخول الدكتوره

الدكتوره:على فكره هي الان بتسمعكم




https://t.me/joinchat/AAAAAEIz_KDfjDgo7Gaxwg




📚 @rewayatyamania 🇾🇪

البـارت 68 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


الدكتوره:على فكره هي الان بتسمعكم وبنلاحظ ان مؤاشراتها ارتفعت يعني هي الان بتحس بكم بس ما تقدرش تتكلم او تبسركم او تتحرك الا لو لقيت شي تقوم لاجله حاولوا تذكروها باشياء سعيده انتبهوا تنكدوا عليها غيروا نفسيتها....وخرجت

بعد مالكل روح بقي عندها مصطفى
وتذكر كلام الدكتوره اذا لقيت شي تقوم لاجله:مرام يا قلبيي صح ان انا احبش بس شاضحي بحبي لاجلش ولاجل سلامتش اهم شي عندي انني ابسرش مرتاحه اذا قمتي شاطلقش وازوجش انا بنفسي لسام

مرام انصدمت من كلام مصطفى وبتقول في نفسها:ياااربي هذا الادمي عيجلطني انا مابين احبش سام انا بين احبك انت يا غبييييي لغجهههه ياااللللله شاموت من هذا الادمي احبك يا مصطفى ماتفهمش انت والا ايش..حاولت تمسك يده بس ماعاد لقيتهاش دليل ان هو خرج انقهرت

مصطفى بحزن وانكسار:شاضحي بسعادتي لاجلش.....وخرج وغلق باب الغرفه وجلس قدام الكراسي اللي عند الباب

فز من سرحانه وهو بيبسر الدكاتره وهم بيدخلوا لا غرفتها افتجع وقلبه نزل لابطنه غمض عيونه وهو مريع للدكاتره يخرجوا يبشروه ياما بخبر حالي او خبر مفجع ممكن ينهي حياته غمضضض عيوونه بالم وفتحها على صوت الدكتوره وهي بتبسر لاعنده بابتسامه:مبروووك زوجتك صحت من الغيبوبه

مصطفى ما استوعبش الخبر وبلم

الدكتوره ضحكت على شكله:ييي يا اخ زوجتك طالبه تشوفك

مصطفى استوعب وسجد شكر لله ودموعه نزلت

الدكتوره تاثرت وخطيت


عند اشتياق:
اول ما روحت بيت هاشم بيت زوجها بعد ما كانت في بيت اهلها دريت من حنان ان مرام دخلت في غيبوبه جننت وزعلت منهم ليش ما قالوا لها لبست البالطو حقها وهي بتبكي

سام:يا عمه شاوصلكم انا

اشتياق وهي مش مركزه وحسها عند مرام:تمام هيا
وخطيت مع سام للمستشفى

سام كان راكن ان مصطفى روح البيت ومرام مابش احد عندها حب يدخل يبسرها مع اشتياق ويغتنم الفرصه دخلوا للغرفة


عند مصطفى:
دخل للغرفه بفرحه كبيره وتوجه لعند مرام

مرام ابسرته وابتسمت

مصطفى حضنها بخوف وشوق وهو خايف من فقدانها ...قاطع جوهم دخول اشتياق وسام

اشتياق حملت لاعند مرام وهي بتبكي ومصدومه ان هي فاقت من الغيبوبه

اشتياق ببكاء:مراااااام يا قلبيي انتي عادنا دريت الان يوووه جعلي مكسر فيني ولا فيش يا روح امش وخالتش انتي وحضنتها وهي بتبكي

اشتياق:الحمد لله الحمد لله حمدا كثير طيبا يارب

مصطفى اول ما دخلت اشتياق استحى وبعد من مرام والتفت يبسر اشتياق وانصدم بوجود سام قام لاعنده ساع الثور الهايج


مصطفى:يااا كلللللب ما دخل بك عند مرتي اخرج خرجوا بطونك....وبدا يضربه وكل واحد بدا يضرب الثاني ويخرج قهره وحقده في بعض

مرام واشتياق انصدمين من ضرب مصطفى وسام

اشتياق سارت تفرع بينهم

حاولت مرام تقوم بصعوبه وتعب

سام:انقلع انت مرام ما بتحبك مرام ما بتحبني الا انا انا وبس فهممممت

مصطفى انقهر

مرام وقفت بينهم ومسكت يد مصطفى وتسندت عليه لانه عاد هي تاعبه ووجهت كلامها لسام:انا احب مصطفى وبس مصطفى ماضيي وحاضري مصطفى وحده تفهم والا ما تفهمش انت كنت حب طفوله ومراهقة وغواء بس مصطفى حب حياتي وحب شبابي افهممممم....وكملت بقهر:انقلع من قدامي لانني اكرهك ومش طايقه ابسر صورتك وبدات تدهفه بيدها الضعيفه...اخرج اخرج

مصطفى واشتياق انصدموا

سام خرج بقهر وعصبيه وقرر ان هو يعجل زواجه باالاء ويقهر مرام

مرام وجهت كلامها لمصطفى:انا قمت من الغيبوبه لاني احبك ولانني دريت انك بتحبني والكل والا ما كانش به اي شي اقاوم الغيبوبه من اجله انا احبك يا مصطفى

مصطفى فرحته ما تنوصفش وهو بيحاول يستوعب كلام مرام

اشتياق ابسرت مكانها غلط بينهم بزت نفسها وخرجت واستاجرت تاكسي وروحت البيت وهي فارحه لمرام

الكل دري بقيام مرام من الغيبوبه والكل فرحته ما تنوصف








📚 @rewayatyamania 🇾🇪

البـارت 69 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


جاء وقت خروج مرام من المستشفى
مصطفى سعيد وسعادته ما تنوصف بوجود مرام منع الكل ان هو يجي للمستشفى وعيروح هو ومرام للبيت

خرجو الثنائي الرومانسي مرام فوق الكرسي لان هي بتتحرك دلا مش كثير ومصطفى خايف لا تتعب ما خلاهاش تخطى ...

مصطفى بيدهف لها الكرسي واشكالهم توووحفه ومبتسمين وتبين معنى الحب الحقيقي الحب اللي الكل يتمناه

(الله يرزقكم حب حقيقي لحياتكم ويعوضكم ويجبر كسر قلبكم بشخص احلى واحن واطيب يارب)


طلعوا فوق السيارة
طلعت مرام قدام ومصطفى جنبها خطيوا ومرام مسكت يد مصطفى بحب وكل واحد متيم بالثاني
شغل مصطفى المسجله وفتح على اغنية
(احبك انت يا ساكن شراييني لهاشم الحسني)

وكانت كلمات الاغنيه تدخل في صماصيم قلوبهم وكان هي بتعبر عن حالهم
(💙المقطع لمصطفى💙 :احبك..احبك..احبك انت ياساكن شرايييني..💙
لمرام 💙:احبككك.. لانك لي ...وانت اليى فقط بتحس ما فيني...احبك موت انا ياروحي الغالي...
💙مصطفى💙خيالك دائما ما غاب عن بالي...اذا قد غبت عني يقتلب حالي...وحتى الناس كامل يسالوا مالي..حبك شغل بالي واصبحت مجنونك....والله يا غالي ما اعيش من دونك..💙مرام💙انا لك...انا لككك...انا لك وانت ما عتكون الا لي..انا لك..فداك روحي قدك يا نور عيني دنيتي واهلي..)

وصلوا البيت وحالهم غير
فارحين وفرحهم لا ينوصف
دخلوا البيت

مصطفى بفرح:نوورتي بيتش

مرام ابتسمت:بنورك

استقبلوهم الكل بفرح واللي بيزغرط واللي بيبكي

احمد حمل حضن مرام

وبعده ليا وميثم اللي انصدموا مرام ومصطفى بوجودهم والكل دموعهم بتنزل بس هذه المره الدموع اللي بتنزل غير
الدموع اللي بتنزل هي دموع الفرح ودموع السعاده الدموع العذبه اللي طعم الملوحه مش موجود فيها الكل فارح وفرحته ما تنوصف


جلسوا الكل فوق الطاوله يتغدوا :
مرام ومصطفى جنب بعض ومصطفى بياكل مرام ومرام خازيه والكل فارح لهم وسعيد

الجد:بمناسبة لمتنا من جديد على طاوله واحده حبيت افعل عزومه واذبح ثور بمناسبة سلامة مرام وبمناسبة رجوعكم من امريكا

يارا بطفوله وعفويه نبعت:يسسسس ضخمممم فديت جدي فداء بس

الكل ضحك عليها وهي لما استوعبت ان ميثم جالس معاهم خزيت وجلست وهم بيضحكوا عليها

ميثم بيقلدها ويقلد صوتها:فديت جدي فداء..ورجع لطبيعته..يي اي حين عتعقلي قد عمرش ١٨سنه قد عنزوجش وعادش تيك الغاوية

يونس قام يفزع مع يارا وبيقلد الهنجمه

يونس بهنجمه:ييي يا ميثم مدري هيثم مالك على توأمي

يارا:يخخ وثقاله الدم فيه يوووه غبني عليش يا ليا

الكل ضحك

ليا سنبت:قدش فداله يا شوزه والله ان هو عسلل ما عليش منه

الكل ضحك وليا استوعبت ما قالته وخزيت وجلست

الجده:الان اي حين العزومه يا حج

يونس:الان عتبدا المغازله حق جدي وجدتي اسمعوا لكم

الجده رجمته بالعظم حق الدجاجه:استحي على نفسك يا وسخ

الكل ضحك

الجد:العزومه الاسبوع اللي عيجي علاميد مرام تفتهن يا حجه

مرام:ضخم عيجي وقد انا بخيره شويه بس شوعه عيجي وعاد الجبس حق يدي موجود

مصطفى:سهل انتي قمر بكل حالاتش ما عليش من احد بعدين عيجي وقد ابتعد سعليش

مرام خزيت

يارا:الللله على رومانسية اخي الله اتعلموا الرومانسيه منهم يا جدو انتوا وجده مش تمكنونا يا حج ويا حجه وقدهي هذه عندكم رومانسيه😂😂⁦✌🏻⁩

الكل ضحك

واخيرا عادت الفرحه واللمه لهذا البيت من جديد والله يديم الفرح للجميع



https://t.me/joinchat/AAAAAEIz_KDfjDgo7Gaxwg



📚 @rewayatyamania 🇾🇪

البـارت 70 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


يوم العزومه:
بعدما الكل تغدى

والرجال ساروا يخزنوا

والنسوان لبسين واتمكيجين يجلسين مرام لبست فستان قصير اصفر سيحت شعرها اللي لونه اشقر من الله وخلته مفرود وبطوله اللي يزيد حلاوه ويكبر يوم عن يوم ووصل لاعند ركبتها وشكله خيال ما شاء الله عملت لها ميكب ثقيل شويه فعلت ايشادو احمر مطفي وايلاينر وتكحلت وفعلت لها ماسكارا ورسمت حواجبها وفعلت لها روج لحمي خلا شكلها كيييووووت
لبست اكسسوارات سوداء مع اللون الاصفر والميكب شكلهن روعه لبست شوز اسود كعب وتعطرت وقدهي عتنزل دخل مصطفى للغرفه

انبهر بشكلها ولاول مره يبسرها بهذه الكشخه

مصطفى بانبهار:ماشاء الله ماشاء الله اللهم صل على محمد وعلى ال محمد يا الله لاحد يصرعش عين قل اعوذ برب الفلق يارب يحفظش

مرام استحت من تعليقاته وابتسمت

مصطفى:انتي داريه يا مرام اني ما قد ابسرت مثل جمالش ولا مثل روحش وقلبش الطيب انتي جوهره وانسانه عظيمه انتي حب حياتي احبش

مرام ابتسمت :فديتك بس وانا احبك

بعد مرور ايام سعيد لابطالنا وحزينه للبعض سافروا امريكا يكملوا السنه الاخيره لهم ويرجعو بلدهم وموطنهم

في امريكا :
غرفة مصطفى ومرام :
قامت من النوم بسرعه وسارت الحمام

مصطفى خاف عليها ولحقها للحمام وبيدق :ييي مرام مالش 

مرام لا رد

مصطفى خاف اكثر :مرام افتحي مالش

مرام خرجت من الحمام ووجها اصفر وتاعبه سارت لافوق السرير وانسدحت

مصطفى لحقها :مرامي يا روحي مالش

مرام :ولا شي بخير غر مدري مالها بطني

مصطفى :قومي يله اشلش المستشفى

مرام :ماشي مشتيش

مصطفى بعصبيه مصطنعه:هيا قومي من الدلع

مرام قامت

مصطفى اخذ عبايتها وساعدها في اللبس وخرجوا


في المستشفى:
مرام :والله مابه فيني شي يا مصطفى مالك

مصطفى :اسكتي بس وورعي تطلع نتيجة التحاليل وبعدين سهل

مرام :اوووف تماااا....

قاطعتها الدكتوره وهي مبتسمة : خرجت نتيجة التحاليل

مصطفى بخوف:هل هناك اي شي مخيف

الدكتوره:لا ،،لايوجد اي شي يدعي للخوف

مرام وهي متوتره:ماذا هناك

الدكتوره :هناك كائن حي صغير يعيش بداخلك

مصطفى بغباء:ماهو مابتقل هذه

مرام :مدري خلينا نسمع

الدكتوره شافت الاستغراب في وجههم :انك حامل

مرام ابتسمت

مصطفى ......

الدكتوره شافت لاعندهم وخرجت

مرام بتهز كتف مصطفى:ييي وينك ولا صوت

مصطفى اخيراً استوعب:مرااااام انتي حامل

مرام ضحكت:ما بتقول الدكتوره من اول

مصطفى :يعني شوقع اب

مرام اتسعت ابتسامتها:ايوه

مصطفى :امانه شكلها بتكذب

مرام ضحكت

مصطفى :امانه صدق

مرام ضحكت على هبالته


روحوا البيت والعشي وهم كلهم مجتمعين بيتعشوا فوق الطاولة اتصصلوا لهم من اليمن 

مرام اتسعت ابتسامتها لما سمعت وابسرت جدها:جدووووو كيف انتي وحشتوني

الجد :الحمد لله وانتي كيف انتي وكيف مصطفى والباقيين

مرام :كلهم يسلموا عليكم ماهو هذا الازعاج عندكم

الجد :اليوم جمعة عماتش احنا ذلحين بنتغدى
ووجه كاميرة التلفون الى عندهم 

مرام :هااااي كيف انتوا وحشتوننيييي


مصطفى بز التلفون منها :اهلاً كيف انتوا

ليا هزرت التلفون من يد مصطفى وميثم بيضحك عليهم

الجد :ييي مالكم سومتوا بي كل واحد يبزه من يد الثاني

ليا :جدوووو كيف انتوا وجدتي وعماتي والباقيين

الجد :الحمد لله وانتوا كيف انتوا

ليا :الحمد لله 

مصطفى اخذ التلفون من يد ليا  :يا جد

الجد :خير ما قد به

مصطفى :معي لك خبر حالي بس اشتي البشاره

الجد :اذا هو خبر حالي لك ما تشتي

مصطفى :خلاص اهه كلمة رجال

الجد :كلمة رجال

مصطفى :عيجي لكم حفيد بعد سبعه اشهر من الان مرام حااامل

الجد بفرحة ما تنوصف :امااانه قلدك الله 

الكل لما سمع كلام مصطفى كلهم فرحوا والذي بتزغرط الا كان في قلب حاقد وحاسد







📚 @rewayatyamania 🇾🇪

البـارت 71 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


في مطار اليمن :
كان راجع لامريكا وهو حزين ومقهور على مرام
رجع بذاكرته لما اعترف لمرام وهددها ومرام خطيت وهو خطي بعدها وانصدم لما فعلت الحادث وسمع المسعفين بيقلوا ان هي ماتت هرب لا يقلوا انه هو اللي صدمها

روح الفندق اللي مستاجر فيه وسار حجز تذكره لامريكا وبدا يجمع ملابسه
رجعت ذاكرته وهو بيسمع :
على الركاب المتجهين الى الولايات المتحده الامريكية الذهاب الى صالة المغادرة.....بز شنطته بحزن على موت مرام وتوجه لا صاله المغادرة


الساعه الواحده بعد منتصف الليل :
مصطفى :مرام شخرج اشتري من البقاله تشتي شي

مرام :اشتري لي شوكلاته خيراااات وفراوله وتفااح وبرتقال وبطاطيسات وكل شي قدامك

مصطفى :الله الله هذا كله ما هكذا قد عتفقرينا

مرام بزعل :خلاص ما اشتي

مصطفى :يوه يا قلبي امزح معش ادي لش عيوني كم معنا مرام

مرام :تسلم لي عيونك يله بسرعه سير

مصطفى :تمامو وخرج

مرام انسدحت فوق السرير وبتتذكر حياتها في الماضي وبتتذكر معاناتها وبتتذكر كيف لما عرفت ابوها وبتتذكر حب سام وبتتذكر اشياء كثيره

بتتذكر  ليلة زواجها بمصطفى وكيف قضوها هو نايم فوق السياره وهي نايمة بدموعها وبفستانها بتتذكر كيف حبت مصطفى بتتذكر الغيبوبه اللي دخلت فيها واعترافهم لبعض طرحت يدها فوق بطنها وابتسمت قاطع سرحانها رنين تلفونها

مرام ابسرت الرقم رقم يمني استغربت
وردت:الو

.....مرام

مرام :ايوه من

.....:انا رانيا

مرام بتتذكر :من رانيا

رانيا :بنت عمتش ما عرفتيني

مرام :لا والله سوري بس لانو به رانيا كثير

رانيا:اسمعي يا بنت الامريكية لا تفرحيش انو انتي الان حامل  مصطفى ما بيحبش
ولا شي شي بس تزوجش علشان جدي والعائله ويكون في علمش بس مصطفى بيحبني انا والعائلة كلها عارفين بهذا الموضوع لذلك بين اقلش

انسي مصطفى لان مصطفى لي انا وبس فهمتي...وغلقت لا وجههاا

غلقت من منار وجلست تبكي بكاء يقطع القلب بكاء بكل معنى القهر والوجع والخيانه والالم وكل شي 

دخل مصطفى وهي بهذه الحاله فلت كل مافي يده وحمل لاعندها:مرام مالش يا قلبي وحضنها

مرام دهفته :ابعد مني يا كذاب يا خاين ليش بتكذب عليا وتقول انك بتحبني ليش الكذب هذا ليش ...ليش بتفعل فيني هكذا ليييييش

مصطفى انصدم:ييي مرام صلي على النبي واهدائي انا احبش من قال اني ما احبش ومن قال اني خنتش انا اصلاً مستحيل اخونش يا مرام انا احبش

مرام :اكذب عليا بس اصلاً جالس بتحب حبيبة الطفوله صح انا نزوه عابره في حياتك

مصطفى عصب:بين اقلش انتي حبي وانتي حياتي كلها صلي على النبي ولا تخليش الشيطان يدخل بيننا

مرام :اي شيطان وانت اصلاً بتحب شيطان

مصطفى عصب بقوه :من هي هذه الذي بتقولي اني احبها انا احبش انتي بس 

مرام :ورانيا ما بتحبهاش صح ولا كنتوا مخطوبين لبعض وولا شي من هذا كله صح

مصطفى بتمتمه:اا رانياا 

مرام:اها خلاص دريت ان انت بتحبها لكن تقول ان انت بتحبني ....كذاب لا تكونش تكذب تمام مادام وانت بتحبها تزوجها وعيشوا حياتكم وطلقني

مصطفى:مرام صلي على النبي وخليني اشرح لش القصه

مرام:اللهم صل على محمد وآله ها ماتشتي تشرح انا بين اسمعك اشرح لي يله فسر

مصطفى:انا كنت من قبل احب رانيا بس هي ما كانتش تحبني تقدمت لها ورفضتني وكانت تتكلم عليا بكلام وقح عند البنات وعند ليا اختي وبعد فتره انا نسيتها وسرت امريكا ادرس انا وليا جلست ترسل لي وتقول ان هي ندمت ان هي رفضتني وان هي بتحبني وهي لاحد الان بتحبني وتتمنى ان انا ارجع احبها بس انا حبيتش انتي يا مرام رانيا كانت حب مراهقه زيما سام  كان عندش حب مراهقه انتي يا مرام حبي الاول والاخير

مرام بكيت :يعني انا ظلمتك يا مصطفى سامحني يا قلبي اخر مره 

مصطفى:اخر مره لش مش بعدا اي واحده تقول لش زوجش بيحبني وتخرف كلام من راسها مشتيش تصدقي بكلامش هذا اثبتي لي ان انتي ما بتوثقيش فيني

مرام:والله ان انا واثقه فيك بس من غيرتي عليك ماعد عرفتش طريقي

مصطفى: يله اخر مرة لش

مرام:تسلم يا قلبي

مصطفى:بس من قال لش ليا صح

مرام:مش هي ليا رانيا اتصلت لي قبل شويه     وقالت له كل شي

مصطفى:انا لازم اتصرف خلاص طفح الكيل انا تعبت منها هذه واحده مريضه نفسياً خرج تلفونه واتصل لعمته

مصطفى:الو عمه كيف انتوا انا الحمد لله بخير




https://t.me/joinchat/AAAAAEIz_KDfjDgo7Gaxwg



📚 @rewayatyamania 🇾🇪

البـارت 72 ⚡️

وحــوش لا تعــرف الحُــب

👌🏻👇🏻 😍
📚 @rewayatyamania 🇾🇪


خرج تلفونه واتصل لعمته
مصطفى:الو عمه كيف انتوا.. انا بخير.. وانتوا.. دوم يارب بس ياعمه اشتي اقول لكم ان انتوا تفهموا بنتكم رانيا وتقلوا لها ان انا رجال مزوج وبين احب زوجتي ومستحيل استغنى عنها كيف تجي تقول لمرتي لا تاخذيش شي مش هو لش..
يا عمه فهمي بنتش وقولي لها تبعد عن طريقي احسن لها انا كرهتها خلاص صح كنت من قبل احبها بس الان احب مرتي وبس..تمام.. خلاص .. علشانكم هذه المره. يله مع السلامه

(سر نجاح اي علاقة هو التفاهم وسماع كل من من الطرفين اذا تشتوا حياتكم تكون للافضل فقط اسمعوا من بعض اشرحوا لبعض فسروا لبعض ولا تتسرعوش في اتخاذ قراراتكم بل اتخذوها بتاني وتفكير)

سام عايش حياته بندم وقهر وحزن ضحك على بنت الناس جاء من يضحك على اخته و تزوج الاء من نفس طينة اخته وحياتهم نكد في نكد لان هو ما بيحبهاش وهي مصاحبه وبتجابر عيال


علي ونبيله وعيالهم رجعوا بيت لطفيه يعيشوا والكل هاناك سعيد الا لطفيه الذي بتتحسر على الماضي


ليا وميثم بيحبوا بعض وعايشين حياه سعيده بس الحياه ضروري ما يكون فيها ملح وصعوبات بس بحبهم الاثنين يقدروا يتغلبوا عليها طبعاً معاهم توأم

مرام ومصطفى عايشين حياه سعيده مع بنتهم ماريتا الذي سمتها مرام باسم امها وعايشين حياه سعيده لا تخلوا من بعض المشاكل والمصاعب


اشتياق عايشه حياتها على ذكرى هاشم بس لابد ويجي يوم وترجع حياتها نفس السابق وتلقى اللي يعوضها


فجاةً  استيقظت وفتحت عيناي  ووجهي مبلل بالدموع ولكن ليست تلك دموع حزن....نعم انها دموع الفرح .....لقد سردت لكم ما في جعبتي من خيال واغمضت عيناي على حزن ولكنني الان افتحها على فرح وسعادة


وانتي عزيزتي الفتاة
اذا اهلش ضغطوا عليش حبتين شويه سهل هو كله لمصلحتش اذا قالوا لش لا تسيريش عند فلانه فهو لمصلحتش لان هو ممكن سمعوا عن اهلها شي والا شي فانتي عتكوني النتيجه ....

عادي اذا ابوش او امش بزوا تلفونش وتصفحوا فيه بحجة الفضول لا اكثر خليش عاديه وطبيعيه لانش لو منعتيهم والا صيحتي والا عصبتي بتثيري الشك في نفوسهم لذلك خليش ريلاكس وطبيعيه وخليش واثقه في نفسش..

اذا اهلش سالوش وين سرتي ووين جيتي ومن حاكيتي فهذا كله لمصلحتش عادي مش مشكله لو جاوبتيهم ما بتموتيش ومابش شي اسمه خصوصيه بين البنت واهلها لان الاهل هم اللي يحموش ويربوش ويعلموش الصح من الغلط واذا الله لا قال واجهتي موقف مثل منال او ياسمين فكلمي اهلش حتى لو ذبحوش او قتلوش او اي شي لان هو تجي من اهلش ولا تجي من الناس وقد فضيحتش وسيرة اهلش على كل لسان

معش مشكله او اي شي استعيني بامش باختش باخوش لا تستعيني بالغرب لانهم ممكن في يوم من الايام ينقلبوا ضدش مهما كانت ثقتش فيهم

عزيزتي الفتاه احذري من وحوش او ذئاب الحب اللي بتنهش في لحمش وعظمش سواء كان بعلمش او من دون علمش وكوني واعيه نفس مرام رفضت تواصلها واشياء ثانيه وكشفت لها الايام كذب سام وعوضها الله بانسان يحبها عكس منال اللي اتزوجت رجال يكبرها بعشرين سنه وعكس ياسمين اللي خلفت ابن حرام وماتت وهي بتولد الحرام وقتلت اخوها من القهر


وانت عزيزي الشاب
لا تكون مثل اياد وسام وراعي الله في بنات الناس واسترهن واحفظ بشرفهن علشان الله يحفظ ويستر خواتك ولا تنسوا ان الدنيا دوارة ومن دق باب الناس دقوا بابه

وللجميع
ولا تكونوا مثل لطفيه ظالمه والله اخذ بحق الناس اللي ظلمتهم واوقع فيها فشل كلوي وكل يومين بتعمل غسيل وفي اي لحظه تموت واتهمت لها مرام ببنت الحرام وجاء لها ابن حرام لا بين يدها

ولا تكونوا مثل حنان ظالمه وعماها الحقد واستماعها لامها وخسرت حياتها وبنتها

كونوا مثل مرام لاتيأسوا وتاملوا لان الصبر مفتاح الفرج 

وكونوا واثقين في قضاء وقدر الله وتوكلوا على الله 
وتراحموا فيما بيناتكم والبين وتآخوا
لا تياسوا ولا تقنطوا من رحمة الله ....

اذا ما جاء لك الشي الذي انت تريده فتذكر ان الله منع حدوث هذا الشي لان فيه رحمة لك
 
اشكر كل من دعمني وساندني وخلاني اكمل الروايه لان انا كنت شاوقف وما شازيد اكتب بس في اشخاص ساعدوني ودعموني اشكرهم من كل قلبي  ولكنني احمد ربي واشكره على هذه النعمه وهي تحقيق حلمي في الكتابة


ملاحظة:الرواية من وحي خيالي ولكنها تتحدث عن الواقع وتنقله لكم بصيغة رواية ....كل ما تم كتابتة سواءً من خواطر او اي شي كان من كتاباتي ولا يوجد لها مصدر اخر غيري

لن اقول وداعاً لان حبر قلمي لم ينتهي بل ساقول لكم الى اللقاء في رواية اخرى

لكم خالص الشكر وودي لكم الكاتبة بتول ابراهيم💕


#انتهت


https://t.me/rewayatyamania/29947




📚 @rewayatyamania 🇾🇪

كلام الكاتبة بتول إبراهيم 👇🏻👇🏻

السلام عليكم ...اولا اشكر ادارة روايات يمنية على نشرها لروايتي مع العلم انها اول روايه لي اكتبها وان شاء الله قريب بتنتشر روايتي الثانية انت وتيني باللهجة الصنعانيه وروايتي الثالثة حب خلف اسوار بلجيكا باللهجة الصنعانية وقريب ان شاء الله بيصدر لي كتاب باللغة العربيه الفصحى مع مجموعة من الكتاب الرائعين اشكركم انتم كذلك على قراءتكم لروايتي واتمنى ان لا تبخلوا عليا بكلامكم اللطيف ...

في روايتي هذه حبيت اوجه رساله واعطي دروس للبنات والعيال خاصة واعطي دروس للظالمين والحاقدين وانهو ضروري ما يجي يوم علشان يتصلح كل شي وانتي عزيزتي حافظي على نفسش وعلى شرفش وانتبهي تنخدعي بالوحوش التي تدعي وتلعب باسم الحب وانت عزيزي اياك وانت تخدع او ان تلعب بعرض او شرف فتاة لانك قبل ما تتعاقب في الاخرة ستتعاقب عقاب شديد وعسير في الدنيا وتذكر ان من ستر مسلم ستره الله يوم القيامة واذا هددتوهن بصورهن او استغليتوهن لابد ويجي يوم والله يخلي من يهددك ويفضحك في شرفك وعرضك خواتك امك اقرباءك وتذكر ان الله ما بينساش حق احد وان الدنيا دواره والذي صنعته لاخيك بيرجع لك دبل مرة اخرى واياك والظلم فالظلم ظلمات يوم القيامة واصبروا لان الصبر جميل والله بيعوضك باضعاف ان ما كان العوض في الدنيا فالعوض بيكون في الاخره..... اشكر من اعماق قلبي كل من ساندني ودعمني وشجعني ...لن اقول لكم وداعا بل الى اللقاء في رواية اخرى ...لا احلل ولا اسامح من يقوم بالنقل دون ذكر اسمي اذكروا تعبي 💙....واتمنى ان لا تبخلوا عليا بتعليقاتكم وكلامكم اللطيف والحالي واشتيكم تكتبوا لي سلبيات وايجابيات الروايه انتقاد مدح اي شي استقبله بصدر رحب واشتيكم تكتبوا اهداء او كلام وتوجهوه للابطال او موقف او حدث كنتوا تشتوه يحصل في الرواية ادخلوا للبوت واكتبوا كل شي ساقرأ كل التعليقات وارد عليها دمتم بود💙تحياتي بتول ابراهيم💕


للتعليق عبر بوت الإدارة
👇🏻
@YemRewBot


.

كمـا نـرجـوا مـنـكـم تـقيـيـم الرواية ومـدى اعـجـابـكـم❤️👍🏻 بـهـا" وحوش لا تعـرف الحُـب " للـكاتبـة" بتـول إبراهيـم" تفاعلوا بالتصويت لتقديم المزيد🙂🌹 صوتوا بسرعة عشان نعرض اللي بعد💜
anonymous poll

⭐️⭐️⭐️⭐️⭐️ – 402
👍👍👍👍👍👍👍 89%

⭐️⭐️⭐️⭐️ – 24
▫️ 5%

⭐️⭐️⭐️ – 16
▫️ 4%

⭐️⭐️ – 11
▫️ 2%

👥 453 people voted so far.