من فترة وصلتني رسالة بتقول:

"يا ريم، الصحة النفسية والاكتئاب والنفسيات دي حقيقة ولا كلام فارغ ساي؟ بحسها خيال خيال."

وبصراحة، السؤال ده مهم.

لأن في ناس فعلًا بتسمع كلمة "اكتئاب" أو "صحة نفسية" وتحس إنو الموضوع كله دلع، أو إنو الزول بس محتاج يشد حيلو وينسى الموضوع.

لكن خلونا نفرق بين حاجتين. 🤍

إنك تكون زعلان، مضغوط، متضايق، أو مارق بفترة صعبة...
دي مشاعر طبيعية بتحصل لينا كلنا.

لكن الاكتئاب كاضطراب نفسي حاجة مختلفة.

ما كل زول حزين عنده اكتئاب، وما كل فترة سيئة معناها مرض نفسي.

لكن برضو الاكتئاب ما "خيال" ولا مجرد زول قرر يكون حزين.

لمن الأعراض تستمر، وتبدأ تأثر على نومك، أكلك، تركيزك، طاقتك، دراستك أو شغلك، وعلاقتك بالحياة نفسها... هنا الموضوع يستحق إننا ناخده بجدية.

ومنظمة الصحة العالمية بتوضح إن نوبة الاكتئاب تختلف عن تقلبات المزاج العادية، وغالبًا تستمر معظم اليوم تقريبًا كل يوم لمدة أسبوعين على الأقل، مع أعراض أخرى ممكن تشمل فقدان المتعة، ضعف التركيز، التعب، اضطراب النوم أو الشهية، والشعور باليأس.

والأهم:

ما مفروض نحن نشخّص بعض.

يعني ما كل زول قال "أنا مكتئب" نرد عليه بـ "إنت ما عندك حاجة".

وبرضو ما كل زول مرّ بيومين سيئين نقول ليه "إنت عندك اكتئاب".

التشخيص موضوع طبي، ولو الأعراض مستمرة أو مأثرة على الحياة، الأفضل الشخص يتكلم مع مختص. والاكتئاب أصلًا عنده علاجات فعّالة.

فيمكن السؤال الحقيقي ما:

"الاكتئاب حقيقة ولا وهم؟"

يمكن السؤال الأهم:

"هل الحاجة البمر بيها بدأت تأثر على حياتي لدرجة إني محتاج مساعدة؟"

ودي ما حاجة تخجل منها. 🤍

شنو رأيكم؟
هل بتحسوا إن مجتمعنا لسه بيستهين بالصحة النفسية؟🤔
#ReemSolutions

من الأسبوع ده إن شاء الله حيكون عندنا مواعيد ثابتة ✨

لما قعدت مع نفسي ورتبت الأمور، لقيت إننا مرات بننزل بطريقة عشوائية.. فقررت يكون في مواعيد ثابتة تكونوا عارفينها:

📌 الأحد: مذاكرة وتطوير ذات
أي حاجة بتساعدنا نذاكر أحسن ونرتب أمورنا عمومًا.

📌 الأربعاء: حاجة عملية
ملفات وأدلة، CV، منح، LinkedIn، العمل التطوعي، وكل حاجة بتطور شخصيتك في الجامعة.

📌 الخميس: سؤال من الفورم
كل خميس بنجاوب على سؤال واحد من أسئلتكم.

🕊 الجمعة: #كنوز_الكهف
كالعادة.. وقفة مع سورة الكهف أو حاجة دينية عمومًا.

ما حأحدد زمن معين، لأني مرات بحب أنزل الصباح ومرات بالليل، لكن إن شاء الله حأحاول ألتزم باليوم المحدد 🤍

احفظوا المواعيد دي عندكم، ولو عندكم اقتراحات لمواضيع دايرين أتكلم عنها في التلاتة شهور الفاضلة من السنة، وروني في التعليقات

#ReemSolutions

الـ CV بتاعك فاضي؟ 🤔
غالبًا لا.. إنت بس ما عارف تكتب الحاجات العملتها 👌

أغلبنا بيفتكر إن "الخبرة" معناها وظيفة.. وبما إننا لسه طلاب، بنكتب اسمنا وجامعتنا وبنقيف 😅
لكن الحقيقة إن الجامعة نفسها مليانة خبرة، بس محتاجة تتكتب صاح.

📌 الخطوة الأولى: طلّع الحاجات المدفونة
اقعد مع نفسك 10 دقايق واكتب أي حاجة عملتها في الجامعة:
مشروع أو بحث، عرض تقديمي، جمعية علمية، يوم توعوي، كورس أونلاين، تصميم لمبادرة، أو حتى شرحت لي دفعتك قبل الامتحان.
كل دي خبرات حقيقية ✨

📌 الخطوة التانية: حوّل "المهمة" لـ "إنجاز"
القاعدة بسيطة: فعل + شنو عملت + نتيجة أو رقم

❌ كنت متطوع في مبادرة
✅ نظمت مع فريق من 5 أشخاص يوم توعوي حضره أكتر من 200 شخص

❌ عضو في الجمعية العلمية
✅ نسقت 3 محاضرات علمية لطلاب الدفعة

❌ بعرف Canva
✅ صممت بوستات لصفحة مبادرة طلابية لمدة 6 شهور

نفس الحاجة.. بس التانية بتوري المهارة، مش بس الوجود 👌
(والأرقام لازم تكون حقيقية، ما تخمن ساي 😆)

📌 الخطوة التالتة: رتّبها صاح
التعليم ← المشاريع والأنشطة ← المهارات ← اللغات
وخليهو صفحة واحدة بس.. الزول البيقرأه ما عندو زمن لأربعة صفحات.

📌 ولو فعلًا ما عندك ولا حاجة؟
ده ما عيب.. ده معناها إنو ده الوقت تبدأ.
انضم لرابطة في كليتك، أو تطوع في نشاط واحد الشهر ده. وقريب إن شاء الله حنتكلم عن كيف تلقى فرص تطوع وتدريب 👀

الخبرة ما بتبدأ بأول وظيفة.. بتبدأ بأول حاجة عملتها بجدية 🤍

اكتبوا لي في التعليقات حاجة واحدة عملتها في الجامعة وما كتبتها في الـ CV، وحأختار كم واحدة وأوريكم كيف تتكتب كإنجاز ✨

#CV #ReemSolutions

📩 سؤال الخميس

"عايزة برامج AI مفيدة للدراسة، نسختها المجانية كويسة، بتعمل كويزات، وبتلخص من غير ما تغير المحتوى أو تضيف من عندها"

سؤال مهم شديد لأن أكبر مشكلة في الـ AI إنه مرات بيضيف معلومات ما موجودة في الشيت أصلًا، وإنتي ما بتنتبه أثناء القراية

دي 3 أدوات، كل واحدة ليها شغلها:

1️⃣ Gemini Notebook (اسمها القديم NotebookLM)

دي الأقرب لطلبك بالضبط.
بترفعي شيتاتك وسلايداتك، وهي بتلخص وتجاوب منها هي بس، وكل معلومة جنبها رقم صغير، تضغطي عليه يوديك للمكان في الملف الأصلي عشان تتأكدي بنفسك.
بتعمل كويزات، فلاش كاردز، ملخصات، وحتى ملخص صوتي تسمعيه في المواصلات ✨
النسخة المجانية كافية لمعظمنا (حوالي 50 سؤال و10 كويزات في اليوم)

2️⃣ Knowt
للكويزات والفلاش كاردز بالذات.
ترفعي PDF أو سلايدات، يطلع ليك فلاش كاردز وPractice Tests، وفيه Spaced Repetition بيذكرك تراجعي في الوقت الصح قبل ما تنسي.
المجانية فيها إعلانات، لكن مفيدة جدًا✨.

3️⃣ ChatGPT (Study Mode)
لما تكوني دايرة تفهمي، مش تلخصي.
بيشرح خطوة خطوة، ويسألك أسئلة عشان يتأكد إنك فهمتي. ومجاني.
بس انتبهي: ده ما بيقيد نفسه بالشيت، فما تعتمدي عليه في التلخيص


وأهم حاجة انسخي الجملة دي وأديها لأي أداة مع الملف:

"لخص لي الملف ده بس. استخدم نفس المصطلحات الموجودة فيه، وما تضيف أي معلومة من براه، وخت رقم الصفحة بعد كل نقطة. ولو في حاجة ما موجودة في الملف قول إنها ما موجودة."

📌 وفي الآخر.. ولا أداة معصومة 100%، حتى الأمينة فيهم.
الأرقام والتعريفات والجرعات وأي حاجة حتتسألي فيها في الامتحان، راجعيها من الشيت ذاتو 🤍

إنتو بتستخدموا شنو في المذاكرة؟ شاركونا في التعليقات 👇
وعندك سؤال للخميس الجاي؟
الفورم مفتوح: Https://forms.gle/uoadnKVwkeXjWCnM7

#سؤال_الخميس #ReemSolutions

حتى موسى عليه السلام ما مشى رحلته براهو 🤍

في سورة الكهف، لما عرف سيدنا موسى إنو في عبد من عباد الله عندو علم ما عندو، ما اكتفى بعلمه.. قرر يمشي ليهو ويتعلم منو، وقال:

﴿وَإِذْ قَالَ مُوسَىٰ لِفَتَاهُ لَا أَبْرَحُ حَتَّىٰ أَبْلُغَ مَجْمَعَ الْبَحْرَيْنِ أَوْ أَمْضِيَ حُقُبًا﴾ (الكهف: 60)

وقفت عند الآية دي في 3 حاجات:

1️⃣ لا أبرح.. يعني ما حأقيف
موسى ما كان عارف الطريق حيطول قدر شنو، لكن قرر من البداية إنو ما حيرجع قبل ما يوصل، حتى لو مشى "حقبًا".. يعني زمن طويل جدًا.
وإحنا مرات بنسأل: الموضوع ده حياخد كم؟ 🤔
بينما السؤال الأهم: هل أنا مستعد أواصل لحدي ما أوصل؟

2️⃣ لفتاه.. ما مشى براهو
نبي من أولي العزم، وعزيمتو قوية، لكن برضو أخد معاه رفيق في الطريق.
الرحلات الطويلة (أي حلم كبير) ما بتتمشى براك.. محتاج زول يمشي معاك، يذكرك، ويسندك لما تتعب.

3️⃣ فارتدا على آثارهما قصصًا
في نص الرحلة نسوا الحوت، وفاتوا المكان المطلوب ✋
لكن ما قعدوا يلوموا نفسهم.. رجعوا على نفس الأثر، ولقوا الحاجة الكانوا بيدوروها.
الغلطة في نص الطريق ما نهاية الطريق.. ارجع خطوة وواصل 🤍

👇 منو "فتاك" في رحلتك؟ منو الزول البيمشي معاك الطريق ده

#كنوز_الكهف #ReemSolutions

أول أسبوع في الجدول الجديد.. وده الحاصل 👀

الأسبوع الفات أعلنت ليكم المواعيد الثابتة..
وبصراحة؟ الحمد لله التزمت بكل المواعيد... كان أسهل من ما توقعت✨

والأسبوع ده علمني إنو بناء أي عادة ما محتاج حماس.. محتاج نظام صغير يمشي حتى في الأيام البتكون فيها ما عندك نفس ✨

دي 3 حاجات بطبقها هسي، وممكن تطبقها في أي عادة دايرها (قراية، رياضة، ورد، أي حاجة):

📌 1. اربطها بموعد، ما بمزاج
أنا ما بسأل نفسي "عندي نفس أكتب الليلة؟".. الأربعاء يعني حاجة عملية، وخلاص 👌

وإنت كمان: ما تقول "حأقرأ لما أفضى".. قول "بعد صلاة المغرب طوالي، نص ساعة قراية".
لما العادة تتربط بحاجة بتعملها أصلًا، مخك ما بيحتاج يقرر كل يوم🤍.

📌 2. ابدأ أصغر من ما تتخيل
صفحة واحدة.. 5 دقايق.. سؤال واحد.
الهدف في الأول ما الكمية، الهدف إنك تبقى "الزول البيعمل كده كل يوم".
(قاعدة الدقيقتين لو فاتتكم:
https://t.me/reemsolution999/9)

📌 3. يوم واحد فات؟ عادي.. بس ما تخلي يومين ورا بعض
يوم ضايع ما بيهدم العادة، لكن يومين ورا بعض بيبدوا عادة جديدة اسمها "الترك" 😅
(لو السلسلة انكسرت:
https://t.me/reemsolution999/59)

💡 ومعلومة مفيدة عرفتها إمبارح :
كلام "21 يوم وتتكون العادة" ده ما دقيق.. دراسة من جامعة UCL في لندن لقت إنو المتوسط حوالي 66 يوم، وبيختلف من زول لي زول.
يعني لو لسه بتجاهد بعد 3 أسابيع، إنت ما فاشل.. إنت في النص بس 🤍

👇 شنو العادة الدايرين تبنوها الشهر ده؟ اكتبوها في التعليقات، وبعد شهر نرجع نشوف وصلنا لوين ✨

#تطوير_الذات #ReemSolutions

نفسك تبدأ تطوع أو تدخل تدريب يفيدك في مجالك، لكن ما عارف تبدأ من وين؟ 🤔

أحيانًا بنفتكر إن الفرص قليلة، لكن ممكن تكون المشكلة إننا ما عارفين نبحث عنها وين وكيف.

عشان كدا، بدل ما تنتظر الفرصة تجيك، جرّب الخطوات دي:

📌 فتّش في الأماكن الصحيحة
تابع صفحات المنظمات والمبادرات الشبابية ومراكز التدريب على السوشيال ميديا، واستخدم كلمات مفتاحية محددة، زي «فرص تطوع لطلاب الجامعات» أو «تدريب مجاني في المجال البتدرس فيه»، حسب اهتمامك.

📌 جهّز نفسك للتقديم
اعمل CV بسيط يوضح تعليمك ومهاراتك وأي تجارب عندك، حتى لو كانت أنشطة طلابية أو أعمال تطوعية سابقة. كدا بتكون جاهز لما تلقى فرصة مناسبة بتتطلب سيرة ذاتية.

📎 لسه ما جهّزت الـ CV؟ شوف بوست الأربعاء الفات

📌 قدّم وما تخلي الخوف يوقفك
اقرأ شروط الفرصة كويس، وجهّز المطلوب، وقدّم قبل انتهاء موعد التقديم. وما تستبعد نفسك لمجرد إنك لسه في البداية؛ المهم تكون مستوفي الشروط ومستعد تتعلم.

📌 لو ما لقيت، اصنع فرصتك
ابدأ حاجة صغيرة بنفسك، أو اعرض مهارتك على مبادرة بتحبها.

وتذكّر: ما لازم تكون عندك خبرة كبيرة عشان تبدأ، لكن مهم تعرف تبحث عن الفرصة المناسبة وتستفيد منها. ✨

وأخيرًا، ورّينا: أكتر حاجة بتواجهك شنو في البحث عن فرص التطوع والتدريب ؟


#ميعاد_علي #ReemSolutions

📖 المصادر (الأرقام البين الأقواس في المقال بترجع ليها)
🔬 دراسات علمية
[1] Sellami, A., et al. (2025). Choices and Constraints: Factors Impeding Qatari Students’ Choice of a University Major. Journal of Further and Higher Education.
افتحوا الدراسة
[2] Ersoy & Speer (2025). Opening the Black Box of College Major Choice: Evidence from an Information Intervention. Journal of Economic Behavior & Organization.
افتحوا الدراسة
[3] Aldosary & Assaf (1996). Analysis of Factors Influencing the Selection of College Majors by Newly Admitted Students. Higher Education Policy.
افتحوا الدراسة00013-X)
📘 كتاب
[4] Gordon, V. N. & Sears, S. J. Selecting a College Major: Exploration and Decision Making. Pearson.
افتحوا الكتاب
🌐 منصة «اعرف مجالك»
يوتيوب
تليجرام
فيسبوك

Reshare✨

تكملةً لحديثنا عن "ألفة النعمة".. ✨

​أمس اتكلمنا عن النعم العادية المن كتر ما تعودنا عليها، نسينا نشكر ربنا عليها.
الليلة، وأنا بقلب في فيسبوك، صادفني فيديو لشاب بيتكلم عن نعمة، حرفياً هي "أعظم نعمة في الدنيا"، بس إحنا ألفناها لدرجة إننا ما بنحس بيها إلا لو اتهزت..
​نعمة الستر.. 🤍

​عمركم فكرتوا إحنا من غير "ستر ربنا" حنكون كيف؟🤔

الستر ما بس في اللبس أو البيوت، الستر أعمق من كدا بكتير:
​🔹 ستر لعيوبنا وتقصيرنا: الحاجات اللي مافي زول بيعرفها غيرنا، وربنا مجمل صورتنا في عيون الناس.

🔹 ستر في كواليسنا: الناس بتشوف "النجاح، الشغل، أو الدرجات"، وما بتشوف التخبط، والضغط، والمحاولات الفاشلة، ولحظات الضعف اللي بنخفيها ورا كلمة "الحمد لله، الأمور تمام".

🔹 ستر في جهلنا: لما نكون ما عارفين نتصرف، وربنا يسترها معانا وييسر لينا الحل من حيث لا نحتسب.

​النجاح البنوصل ليه، والصورة الحلوة اللي الناس شايفانا بيها، ما شطارة مننا والله، قدر ما هي "ستر وتوفيق" من رب العالمين. الناس بتشوف "الصورة النهائية المترتبة"، وربنا وحده الساتر "الفوضى" الجوانا✨.

الفترة دي مضغوطة جداً في القراية والتحضير للامتحانات، والزمن حرفياً بيجري. وأنا بضغط نفسي عشان أنجز أكبر قدر ممكن، لاحظت حاجة غريبة جداً في استيعابي حبيت أشاركها معاكم🤍.

في مواد كنت قاريها زمان أو مألوفة بالنسبة لي، ولما جيت أراجعها استخدمت الذكاء الاصطناعي عشان يلخصها لي في نقاط (High-Yield). الموضوع كان سلس جداً، بقرأ الملخص، بفهمه بسرعة، وبنجز.

لكن لما جيت أطبق نفس الحكاية على مواد جديدة لنج وأول مرة أشوفها، حصلت لي صدمة😓! بقرأ نفس الملخص ونفس التنسيق، لكن الكلام حرفياً ما راضي يدخل راسي.. حاسة إني بقرأ طلاسم! بقيت أتهرب من القراية، أمسك التلفون، وأي حاجة تانية بس عشان ما أواجه الشيت ده

بعد ما ركزت في الحاصل، اكتشفت إنو ده فخ نفسي بيقع فيهو أي زول بيبدأ يدرس حاجة جديدة كلياً، واسمه العلمي (Cognitive Overload) أو العبء المعرفي. الدماغ لما يلقى معلومة جديدة تماماً وما عندها أي "أساس" قديم يربطها بيهو، بيرفضها وبيدخلك في حالة "هروب".

عشان كده، لو بتمروا بنفس الحالة دي (سواء في قراية، كورس، أو مهارة جديدة)، دي 4 حيل سحرية جربتها عشان أفك بيها "الطلاسم" دي:

1. التهيئة البصرية للموضوع (Visual Introduction)

قبل ما تقرأ حرف واحد من الملخص أو الشيت المعقد، افتح اليوتيوب واكتب اسم الموضوع. احضر فيديو مدته 10 دقايق بيشرح الفكرة ببساطة. الهدف ما الحفظ، الهدف إنك تفهم "القصة شنو" وتتخيلها عشان عقلك يبني صورة مبدئية يربط بيها الكلام المكتوب.


2. التمهيد بالذكاء الاصطناعي (AI Prompt)


قبل ما تطلب من الـ AI يلخص ليك المادة الطويلة، اطلب منه الطلب ده أولاً: "اشرح لي الفكرة العامة للمحاضرة دي في 3 أسطر بأسلوب مبسط. المشكلة شنو؟ والحل بتاعها شنو؟ كأنك بتشرحها لمبتدئ". الفهم المبسط ده هو اللي حيبني ليك الأساس اللي حترص فوقه باقي المعلومات.


3. القراءة الاستكشافية (Skimming)


زي الطفل اللي بيمسك كتاب لأول مرة.. ما تبدأ تقرأ من السطر الأول وتحاول تحفظ. قلب الصفحات، اقرأ العناوين الكبيرة، شوف الجداول والصور، وبعدين ارجع للتفاصيل. ده بيدي دماغك خريطة للمكان قبل ما تدخله.


4. قاعدة الـ 5 دقايق لكسر الهروب

لما تحس برغبة إنك ترمي الشيت وتمسك التلفون، قول لنفسك: "حأقرأ فقرة واحدة بس لمدة 5 دقايق، وبعدها حأفتح التلفون". غالباً بعد الـ 5 دقايق دي، حاجز البداية حيتكسر، ومكنة التركيز حتدور وتكمل.


أتمنى الحاجات دي تفرق معاكم وتسهل عليكم قرايتكم أو أي مهارة جديدة بتتعلموها.


ربنا يوفقنا جميعاً ويفتح علينا فتوح العارفين، ويسهل لينا كل صعب. دعواتكم لي بالتيسير والتوفيق في امتحاناتي، ولكم بالمثل أضعاف مضاعفة يا رب 🤍✨

#ReemSolutions

بروفايلك على LinkedIn بيتكلم عنك وإنت نايم.. بس شنو بيقول؟ 💼

ناس كتار عندهم حساب LinkedIn لكنه فاضي: صورة قديمة وكلمة «طالب» بس. وده بيضيّع عليك فرص كان ممكن توصلك لوحدها.

📌 عنوانك (Headline) هو أول حاجة بتتشاف

بدل «طالب طب» اكتب شنو بتدرس وشنو اهتمامك وشنو بتدور عليه. مثال: «طالب طب | مهتم بالبحث العلمي والتطوع الصحي».

📌 صورة واضحة ومرتبة

وش واضح وخلفية بسيطة. الصورة بتدي انطباع الثقة قبل ما أي زول يقرا كلمة.

📌 ملخص قصير (About) في 3 جمل

منو إنت، وشنو بتعمل، وشنو هدفك. اكتبو بسيط وصادق من غير مبالغة.

📌 ضيف تجاربك الحقيقية

التطوع، الدورات، المبادرات، المشاريع، والمهارات، حتى لو صغيرة. كل تجربة بتوريك صورة أوضح للناس.

📌 ابدأ تتواصل

أضف زملاءك وأساتذتك ومنظمات في مجالك، وتفاعل مع منشوراتهم. البروفايل بيشتغل أكتر لما يكون نشط.
📎 لسه ما جهّزت الـ CV؟ شوف البوست ده

بروفايل واحد مرتب ممكن يفتح ليك فرصة ما كنت متخيلها. ✨

💬 شنو أكتر حاجة بتحيّرك في بروفايلك على LinkedIn؟

#LinkedIn
#ReemSolutions

بتمر علينا اللحظة دي... كل الناس حواليك ماشين في طريق، وقلبك بيقول ليك إنو الطريق ده ما ليك. أهلك شايفين حاجة، وأصحابك شايفين حاجة، والمجتمع كله عنده رأي.. وإنت واقف في النص 😔

📍 كنز اليوم من أول سورة الكهف:

﴿إِنَّهُمْ فِتْيَةٌ آمَنُوا بِرَبِّهِمْ وَزِدْنَاهُمْ هُدًى (13) وَرَبَطْنَا عَلَىٰ قُلُوبِهِمْ إِذْ قَامُوا فَقَالُوا رَبُّنَا رَبُّ السَّمَاوَاتِ وَالْأَرْضِ...﴾

كلمة «فتية» يعني شباب زينا. ما كانوا ملوك ولا علماء. كانوا شباب وقفوا قدام قوم كاملين ماشين في طريق تاني. وربنا قال عنهم حاجة عجيبة: «وربطنا على قلوبهم» 🤍

الربط على القلب معناه ثبات بيجي من الله في اللحظة الصعبة، لما الخوف يكون في أعلى درجاته.

لاحظوا الترتيب في الآية:
✨ هم أول حاجة «آمنوا بربهم».. الخطوة منهم
✨ بعدين ربنا «زادهم هدى»
✨ وبعدين «ربطنا على قلوبهم إذ قاموا».. الثبات جاهم في لحظة القيام
والدرس هنا لينا شنو؟ ✨

كم مرة وقفنا قدام قرار صعب وخوفنا من كلام الناس مسكنا؟
يمكن يكون (تخصص مختلف عن توقعات الأهل).
يمكن يكون (التزام بحاجة ما كل اللي حوالينا ملتزمين بيها).
يمكن يكون (مشروع بدأته وناس شايفة إنو ضياع وقت).

وبنفتكر إننا لازم نكون أقوياء عشان نقوم.. لكن القصة بتقول إنو الربط بيجي بعد القيام، ما قبله.

⚠️ ومهم نوضح: «قيامهم» كان في أصل الدين والحق، وما معناها نعاند أهلنا في كل خلاف. في خلافاتنا العادية بنسمع، ونستشير، وبنحترم.

✨ الزبدة من الآخر
ما تنتظر الخوف يمشي عشان تبدأ. قوم في الحق وإنت خايف، واطلب من ربنا يربط على قلبك. اللهم اربط على قلوبنا وثبتنا. 🤍🤍

شاركنا في قروب النقاش شنو القرار الصعب البتحتاج فيهو تثبيت من ربنا الأيام دي؟ 👇

#كنوز_الكهف
#ReemSolutions

مساء الأنوار عليكم 🤍

امتحاناتي بعد أسبوعين.. وأسبوع منهم حيضيع في السفر. يعني عملياً قدامي أسبوع واحد بس للقراية 😅

وبصراحة أول ما فتحت الجدول جاني الإحساس ده: «أبدأ من وين؟»

فقعدت أرتب نفسي، وحبيت أشارككم الطريقة، لأنها ممكن تفيد أي واحد امتحانه قريب.

📍 الخطة البمشي بيها:

1️⃣ جدول الامتحانات قدامي، مرتب بالموعد

حأطبعو، أو أكتبو بإيدي: كل المواد، وعدد محاضراتها. وأبدأ بالمادة امتحانها أقرب، ما بس بالأصعب. لما التفاصيل قدام عيني الخوف بيقل، لأنو المجهول هو اللي بيخوف، ما الكتير.

2️⃣ الصعب في أنشط وقت، والسهل في المساء

الجزء الصعب بنبدأ بيهو وأنا في أنشط وقت عندي، وغالباً بدري الصباح وراسي فاضي. أما السهل والمراجعات الخفيفة فللمساء، وللأوقات المخاطفة (المواصلات، قبل النوم).

3️⃣ أغطي الجديد قبل ما أعيد القديم

أكبر غلطة نعملها إننا نرجع نقرا الجزء المرتاحين فيه، لأنو بيدينا إحساس إننا ذاكرنا. الشغل الحقيقي في الحاجات اللي ما مريت عليها خالص، فبنبدأ بيها، وبعدين نرجع للمراجعة.

4️⃣ حل أسئلة سنوات سابقة

في الأسبوع الأخير، حل الأسئلة بيفيدك أكتر من إعادة القراءة. بتعرف وين أنت، وشنو بيجي في الامتحان.

5️⃣ النوم أهم حاجة

السهر بيخسرك أكتر مما بيكسبك. نام كويس، لأنو المعلومة بتثبت في راسك وإنت نايم.

📍 والدعاء والتوكل.. دي نص الخطة
في ناس بتفتكر التوكل معناه تقعد وتستنى. لكن لما سأل رجل النبي ﷺ: أترك ناقتي وأتوكل؟ قال: «اعقلها وتوكّل». يعني اعمل السبب الأول، وبعدها اتوكل.

والدعاء ما بيجي بعد التعب بس، قبل ما تفتح الكتاب كل يوم قول:

﴿رَبِّ زِدْنِي عِلْمًا﴾

وقبل ما تدخل الامتحان:

﴿رَبِّ اشْرَحْ لِي صَدْرِي * وَيَسِّرْ لِي أَمْرِي﴾

وبعد ما تخلّص الورقة، ما تحمل هم النتيجة، وقول: «يا رب، دي كل اللي قدرت عليها، وأنت أعلم وأكرم». 🤍

✨ الزبدة من الآخر:
اعمل العليك: رتّب، وابدأ بالجديد، وحل أسئلة، ونام. والباقي على ربنا.

شاركونا في قروب النقاش: امتحاناتكم متين؟ وشنو الخطة البتمشوا بيها؟ 👇

وما تنسوني من دعواتكم ❤️

#الإمتحانات
#ReemSolutions

«اشتغلت مع ناس في الحي.. ده يعتبر تطوع؟» 🤔

سؤال جاني من خريجة جديدة كانت عايزة تعمل سي في عشان تقدم في برنامج تدريب خريجين في شركة معروفة.

في الأول كل اللي كانت عايزاهو إنها تضيف كورسات وشهادات.

لكن لمن سألتها: "عندك تدريب أو عمل تطوعي؟" قالت لي: "ما عملت تدريب للأسف." وبعدين سألتني السؤال اللي فوق.

قلت ليها: "وريني عملتي شنو بالظبط."
وطلع إنها كانت بتشتغل مع ناس في الحي في مبادرات حقيقية، وعندها كمان مشروع تخرج ما كانت شايفاهو يستاهل.

ضفنا كل ده في السي في، وكتبنا ليها رسالة تقديم مخصوصة للوظيفة.
وبعد فترة جات تبشرني إنها تم اختيارها للمرحلة الجاية من التقديم. 🥹❤️❤️

📌 عشان تعمل زيها، دي الطريقة:

1️⃣ اقرا الإعلان بالورقة و القلم

حدد الشروط الإلزامية: سنة التخرج، التقدير، اللغة، والمهارات.

2️⃣ اعمل قايمة كلمات

اكتب الكلمات المطلوبة وشوف دي عندي ولا لا؟ واللي عندك فعلاً ختو في أول نص الصفحة الأولى.

3️⃣ قدّم الدليل أول

الشرط اللي بتثبتو بشهادة أو كورس أو مشروع، اطلعو فوق.

4️⃣ ما تقول "ده ما يعتبر"

العمل التطوعي ومشروع التخرج والمبادرات، اكتبها بسطرين واضحين. وحتى لو ما عندك تدريب، السي في ما بيفضل فاضي.

5️⃣ رسالة التقديم تكون للوظيفة دي

تلاتة فقرات: ليه الوظيفة دي، شنو بتجيب معاك، وجاهز لشنو. وكتب عنوان الإيميل زي ما الإعلان طالب بالظبط.

✨ الزبدة من الآخر:
الحاجة اللي شايفها عادية، ممكن تكون أحسن ما في سي في حقك .

ولو عايز تراجع سي في حقك قبل ما تقدم، @reemsolution موجودة. وأي زول عمل معانا سي في قبل كده، التعديل عليهو مجاني. 🤍

#سي_في #فرص_عمل #حلول_ريم