من قال انا لك ! شمس ودّي مالها سكة غروب
قله قبل يقطع وعوده : صاحبي وفّر عناك

أجواد نسل اجواد ، ما خنّا ، ولافينا لعوب!
لكن مرور الوقت وظروفه ودوراته هلاك

مواقف الايام منها يصمد الود و يذوب
وطبع النفوس : تعاف مع كثر الخطايا والعراك

تعوّذوا بالله دوم من إنتكاسات القلوب
يومٍ من الأيامُ كان إبليس مع شرّه ( ملاك )

⁧#بشاير_المقبل⁩

وعطر الختام اللي سبى نظرة العين
برقن مخاييله على القلب هتّان

امطر وصب المسك فوق الثرى لين ..
صاح الرعد سلمان سلمان سلمان

سلمان قايدنا على ملة الدين
محدٍ تهقوا به ولا فاز برهان

عدوان عينه تحت رجله جثامين
وخلان عينه بين شيخ و سلطان

تحت امره : الشعب العظيم متبارين
كلٍ بيدينه روحٍ وقلب ولسان

تفدا عيونه .. لا ! ولا هم موفين
دام العطا له !! دايم ٍ فيه نقصان💚

#بشاير_المقبل

‏”مت فارغًا ! أو (Die Empty)، هو عنوان كتاب للمؤلف تود هنري، والذي قال فيه: "لا تذهب إلى قبرك وأنت تحمل في داخلك أفضل ما لديك، اختر دائمًا أن تموت فارغًا"، أي كل الخير الذي في داخلك، سلمه قبل أن ترحل، إذا كنت تملك فكرةً جيدةً نفَّذها، علمًا نافعًا بلغه، هدفًا عميقًا حقّقه”.❤

والله إن حبي له اكبر من " أُحد "
وابيض من الغيم في زرقة سماي

واصدق من الدمع لا بلّ اللحد
واعذب من السيل لا وافق ضماي

لكن بقلبي رسمت الفين حدّ
استلذ البرد ، ما اطلب دفاي

ما تسوّلت السعاده من أحد ..
ولا لأحد مِنّه على بسمة شفاي

ان تعبت السبت بطيب الاحد
وان بكيت اليوم .. يوم السعد جاي

ولا كرهت إنسان لو جار وجحد ..
هقوتي ! ما تبعد اكثر من غَطاي

ما رجيت إلا رضى الفرد الأحد ..
في رضاه اليا رضى عني رضاي

بشاير المقبل

أوّاااهُ ! لو أني قدمتُ بهجرةٍ
أو كنت في الانصار " مَرحبَ " داعيه

أَوليت أني في تميمٍ إذ أتوا ..
بقوافلِ البيعاتِ جئتُ مواليه

أو عبدةٌ مع أمِ مِحجنَ حولَهُ
او كنتُ في طرقاتِ مكةَ جاريه

أرعاهُ في جنحِ الظلامِ مصلياً
وأصيرُ في الغزواتِ خيرُ مداويه

أنا ، من انا حتى أراه ؟ غَفولةٌ
والناس من حولي جموعٌ باكيه

ما حيلتي والصالحون تراكضوا
وانا المطوّقُ بالذنوبِ الضاريه

أدري بأني لستُ أهلاً للمُنى!
لكن ربي عالمٌ بالخافيه

أحببته بالغيب إيمانا به ِ
لم ألتقيه ولم أرى برهانيه

أحببتهُ حباً يفوق تكلُّمي
وحدود شعري وزنُهُ والقافيه

يا من بـ بابكَ لا يُرَدُ مناجياً
عبدٌ فقيرٌ قد أتاكَ بـ أُمنيه

أمنيّةٌ فوق الأماني كلُها
فالناسُ تفنى .. والأماني فانيه

يا ربِ فاقبضني بمكة َ أو مِنى
أو في الطوافِ مع الحجيجِ ملبيه

يا ربِ قبراً أرضُ مكة لحدُهُ
أو في البقيعِ مع القبورِ مكانيه

واسمو بروحي قرب روحِ محمدٍ
في دار صدقٍ عند عرشك باقيه

رب المشارق والمغارب لا إله..
سواكَ أدعوهُ بنفسٍ راضيه

أدعوه ُفي قلبٍ تيقّنَ أنهُ
سيجابُ خيراً والعوائدُ آتيه

كلمات : #بشاير_المقبل

‏⁧ #شقر⁩

‏طوّل على صوت المناره يا الإمام
‏وصّ المؤذن يرفعه لين آخره

‏علّه يجي سبّاق للصف الأمام ..
‏شخصٍ نبي ملقاه دنيا وآخره

‏⁧ #بشاير_المقبل⁩

روما تقلّب في غضى !
كل الطرق أدّت إليك!

مزحوم بك كل الفضا
ما فوقك الا الله مليك

شوفاتك من الله رضى
عيش السعد مما يليك

انت اللذي : فيما مضى ..
وانت المضارع ، والوشيك

حظ اللي بوصلك حضى
بخت اللي مجوّد يديك

كاسي فضا .. صبري ٍقضى
الغيث .. يرحم والديك !


#بشاير_المقبل

( الجمعه )

يا "منوتي" مسراك ما بين الحمايم والسحابه
ماهيب في صفر الوعود ولا معاريضٍ تعبّى

في زحمة ابواب السما وقت الدعاوي المستجابه
ساعة عطا .. من (يطلب الكايد) مطاليبـه تلبّى

صبّي دموعك وإحمديه ونوّخي رحلك فبابه
ربٍ يعرف اللي بصدري .. ما عنه شيٍ يخبّى

عَـلّـه يثبتني على دينه ويكفيني عذابه
ويرحم وجيهٍ من سبايب فقدها شعري تربى

وقولي طلبتك يا عظيم الشان زِد صدري رحابَه
صب اليقين بقلبي الضميان من رحماك صبّا

وارزقني اللي ما تِبع " تكفى " ولا قبله طْلابه
رزق ٍ جزيلٍ .. سلسبيلٍ .. خاطري به ما تنبّا

وقت ٍ عطاه الله مناه اللي تغانمْه و دعا به
محد رفع كفّه طلوب .. ولا رجع كفه مْلبى

#بشاير_المقبل

اللهم صلِ على نبينا محمد عدد ما ذكره الذاكرون وغفل عنه الغافلون 🤍

‏🤍

‏.
‏.

‏سولف ...

‏ تنام عيون مسهوده
‏تبرق تبوك و تمطر السوده

‏وشطّ الخُبر أمواجه تغنّي
‏والطايف يفتّح لك وروده

‏سبحانه مسوّيك من غيثٍ ..
‏يحط عن هالقلب جلموده

‏لو يشبهك! من يَجبُرون اللي ..
‏به شرهةٍ في خاطره عوده !

‏والله! فلا يبقى بنا حي ٍ ..
‏ينام ودموعه على خدوده

‏⁧ #بشاير_المقبل ⁩

( بديعٍ خاص )

💔
.
.

ابفصح عن بعض وجدٍ على قلبي عليه اقفاص
‏عسى ينزاح همي وأدلَه وينفعني افصاحي

‏خلق هالخلق سبحانه .. وابدع له بديعٍ خاص :
‏تهيّا في بعض ناسٍ من الدنيا هم ارباحي

تقادم وصلهم لكن غلاهم بالحشى غوّاص
‏وجيه تمسح وجيه ! واثرهم ما لقى ماحي

‏أحس بقلبي اليامن طروا كنّه على حصحاص
‏تدوسه كل ذكرىً غاليه كانت من أفراحي

‏وجع فقد الوحيد إليا رحل عن فقد ١٠ أشخاص
‏وجع من ينزعون القلب من صدره وهو صاحي!


#بشاير_المقبل

تبسّم بوقتٍ وجيز !
‏والٍ على شعبه عزيز
‏
‏وكل الصدور إستاسعت
‏اللي الولا فيها ركيز

‏محد ٍ فـ ظله ما ابتسم ..
‏حتى الملك عبدالعزيز 🤍

‏⁧ #بشاير_المقبل ⁩

باب ما جاء في الوجد :

🤍

يعاف المراضع من غدا اليمّ بمهاده
‏وله بالشواطي من دوا الحال .. مشفوقه

سكن دار عدوانٍ توقّاه بإلحاده
وهو مسلمٍ ويسيل الإيمان بعروقه

عليها السلام من آدم .. لآخر أولاده
عدد ما اردف الغربي على القاع بحقوقه


#بشاير_المقبل

✨ قيل لي ذات يوم : صوتك عوره !
فقلت:


ياللي تقول (الصوت عوره) لا تعدّين القصيد!!
حنّا نعرف اللي يقال .. ونعرف اللي ما يقال

حتى قصايدنا حشمناها عن الهرج الزهيد
والهرج له حشمه مثل ما للمفاتن والجمال

حنّا حراير من حراير ما يذللنا عبيد
واليا حكينا .. ما تضيق صدور ، ما يزعل رجال !

انا سمعت ابوي واشعاري على سمعه تعيد ..
يقول يا فخري بها !! كيف التفت للي يقال ؟



#بشاير_المقبل

يوم اشوف صديقتي اللي دائما كانت جنبي متضايقه وانا ما في يدي من الحيله الا شِعري ودعواتي💔
اقول :

لا يا دلال ارجوك لا .. لا تزعلين !
ان كان لي عندك قدر .. ارجوك لا

مثلك حرام يمرها يومٍ حزين
مثلك حلال تعز ّ عن كل الملا

ما يجرحك شخصٍ معه قلبٍ وعين !
يا يسعدك من يعرفك .. والا فلا

وجهك أجر للطيبين الصالحين
صِدّي عن الوجه الكليح المبتلا

وعيونك عيونك ! دخيلك لا تجين ..
وعيونك تدوّر من الضيقه سلا

انا فداك بكل مابي ، وش تبين ؟
قولي وياتي لك على كف الغلا

يا أجمل صدوف الليالي و السنين
يكفي معك قلب ٍمع الغيم عْدَلا

ايه .. إشرقي منتي بعَرض الآفلين
ايه اضحكي .. زودي حلا وجهك حلا 🤍

#بشاير_المقبل

االلهم صلِ على حبيبي محمد عدد ما ذكره الذاكرون وغفل عنه الغافلون ✨

‏⁧ #محاوره ⁩

‏قال:
‏ودعتك الله في أمان الكريم
‏إقري مْعَوذاتك وإستري هالجمال

‏وبين ولد الحرام ودربك المستقيم
‏جعل تبنى ديار! وجعل ترسي جبال!

‏قالت:
‏الله بعزه يحفظك من صميم ..
‏قلب ماشال غيرك من وجيه الرجال

‏ويبعد الله عن دروبك جميع الحريم
‏من بنات الحرام ومن بنات الحلال :)

‏⁧ #بشاير_المقبل ⁩

رساله الى ناقلين القصيد 🤚🏻:

.
.

كلي رجا جيتكم يا ناقلين القصيد
‏تكفون روفوا على الشعّار وافكارها

‏هذي بنات الفكر .. لاحدٍ يزيل ويزيد !
‏محشومة حظور ! فوق الروس مقدارها !

‏أشعارنا ما بها شيٍ علينا زهيد !
‏وكسرة قلوب العرب أشوى من أشعارها

‏⁧ #بشاير_المقبل⁩