جائحة كورونا

يا هَل الله من سمان ٍبالمدى شوف (القلوب المومنات) مْطلّه
القصيده ( ملحمة جيل تقدم زملكم ) وأدعى الجْلال دقاقه

إلبسوا ثوب الرخى .. حنا إمخاوين الشّداد .. ثيابنا مبتله
من عْجافٍ اسرفت فيها مذاليق السّقام .. ولا زهى ترياقه

يا خَلف من ضاق ذرعه مع غريمٍ ماحدٍ حَدر السما ندٍ له
( علةٍ ) طوفانها هدَّم مداهيل النسايم .. والقلوب رْقاقه..

أشعمتنا شوق ، وابكتنا تعازي ، وإلتحفنا من بلاها مَـلّه
عطّلت شريان مكه ، والدروب تفوح وحشه، والوصال شْفاقه

مسّنا الضر .. ولبسنا بشت من لون (الرضى به) واستعنّا بالله
مرحبا بالضيف لو نفسه ثقيله ، ما كرهنا .. والله اللي ساقه

اعتصمنا في جبال من اليقين .. سنين واعلناّ : " الوقوف دواً له "
وابرهزّت قادة الأمه وَقْـم ذروة عتيم المسغبه والفاقه

احتملناها جنود .. عيال عود ، محصنينٍ بالولا والمِلّه
التثمنا في قنوف الغيم ، وامطرنا ، وربّع بالحصن مشراقه

جايحه حلّت علينا دَرس : عن شكر النعم ، واوطاننا ، والخِلّه
دُورنا فزّت محاريب ، وكتاتيب ، وطبيب ٍ له اتشدّ الساقه

البيادر مستعفّه ، والسنابل أزرت يدين اليباس إتدلـّه
كل ما خيّل سحاب الوسم غنّت يا فرج ربي ويا برّاقه

يا هَل الله من سمان ٍبالمدى شوف القلوب المومنات مْطلّه
نحّرونا صفحة التاريخ الابلج واكتبونا للظلام اشراقه

#بشاير_المقبل

لو تنفض الغيمات مافي جوفها يا خِلي ..
‏على غصونٍ عافت القيعان ما ورّقها

‏إن جيت تاصف ( مُرّ فنجال ٍ شربته ) قلي:
‏" أمرّ من فقد الشغف في حاجةٍ تعشقها "

‏⁧ #بشاير_المقبل⁩

تركض بنا الايام ، ما كن السنين إبها سنين
‏عِمر ! وغدا عابر سواليفٍ لنا نحكيبها

‏راح رمضان اللي نحبه ! راح كنه ليلتين!
‏واعمارنا مثله ؛ تبي تركض ولا ندريبها

‏يالله تقبل ما دعينا .. راكعين وساجدين
‏وتعتق رقابٍ ما انحنت في غير باب مجيبها

‏⁧ #بشاير_المقبل ⁩

ي مشوّهين الدين ، ليه ؟!
ما غيركم فينا تقاة ؟!
 
اللي يحابيكم نزيه !
واللي يخالفكم .. عصاة !
 
الدين : لا إكراه فيه
مَ انتم على العالم " وُصاة "
 
قلنا شهود الله ! إيه ..
لكن ترا منتم "قضاة"
 
حشرٍ وراكم ما نبيه
وكلٍ يسوي ما يراه
 
راع ِ الخَطا : ربي عليه
ما يجهل المخطي خطاه!
 
(الله .. وثم سنّه نبيه )
مستمسكينٍ في عراه
 
في يوم تسوّد الوجيه
الله .. يحشرنا وراه 🤍


#بشاير_المقبل

عجابٌ كل شيءٍ في زماني
يؤيد مُستهلّي من يعاني

توارت بيننا قِيَمٌ عِظامٌ
وصار الحبُ كالنجم اليماني

يُقربُك الذي أقصيِتَ يوماً
ويُقصيك المغرّقُ بالحنانِ

"وقد تلقى الحفاوة من غريب "
ويهملك الذي سكن المحاني

#بشاير_المقبل

طيبنا ما تغير من هذيك السنين
المبادي .. نموت وما زهدنابها

قولوا إن الزمان اللي مضى : له حنين
قولوا : إنه ذبحنا فقد غيّابها

لا تقولون “ والله راحوا الطيبين “ !!
وأنا عيني تكحّل فيهم أهدابها

#بشاير_المقبل

الأمان إن ما لقيته في عشيرك لا تِجذّر !
العروق الموغله .. بأغصاننا مستاثمات

أرض ربي رحبه وفيها قلوب ٍ ما تِعذّر
والله اللي قاسم الارزاق من قبل الحياة

#بشاير_المقبل

قال : " انا ما لي خلق ادراي الناس ! "

قلت :

إدرى مواليفك على شان الأيام .. !
لا احتجت فيها للمدارى .. تدارى

حال الرخى لو سرّك أوقات .. ما دام !
تجيك سود أيام عمرك تِبارى

اصنع بمدات الجمايل لك حزام
خلٍ عن الدنيا بـ صدره تِوارى

#بشاير_المقبل

كثرة الـ ( آسف ) مثل حَبّ الدوا
‏لا تعوّدها الجسد ما تنفعه

‏خاطرك لاطاب ؛ سامَح وانكوى
‏(البلا) ما كلُ توبه تدفعه

‏ومن يلوم القلب لاعاف الهوى
‏ضيقوا دنياه والدنيا سَعه!

#بشاير_المقبل

مغتنين .. ولا لغير الله شكينا من حوايج
‏ما شكى الصبار من ظلم الصياهد لـ الأثل

‏ما نبي غير الكلام السَمْح و وجيهٍ بلايج
‏طيبكم خلوه ذخر .. و عاملونا بالمثِل !

‏امطروا للي يجيكم ديمٍ ما جاكم عجايج
‏ومن يضيّفكم ركيك دلاله .. اسقوه الحِثل

‏⁧ #بشاير_المقبل⁩

أنا أحبك حب مقطوع النظير
لا قبلي اللي قد وصلْه ! ولا بعَدي

غديت احنّك كنّك بسنّك صغير
ما باقي إلا إني أناديك : ولدي !

أجيك أنا والشمس لافاضت نطير
من شوقنا ناصين بابك ونعَدي

من يَسبق؟ ويصبح على عينك بخير؟
من ينتظر عينه نهار ٍ سرمدي !

غيم .. وعصافير .. ونواوير .. و غدير
وبرق تلاه من التراحيب إبرِدي

يسعِد صباحي وجهك الطَلْق السفير
و يسعَد وراي الكون كله يا بَعدي

#بشاير_المقبل

ما عاد هو شوق وشفاقه ! صار للقلب احتياج !
وجداه يا مكه ويا نسناسها وترابها

أحرِم لها كني مريض الصدر في وسط العجاج !
وارجع وصدري أوسع من ارض الوطن ورحابها

روحي تهادى بالجسد ، أصفى من الما و الزجاج
دمعي غسلها من خطاياها و حَطّ اتعابها

ياجعلني فيها مع الحجّاج دور العام .. حاج
ويا جعل تقبل دعوة ٍ راحت تطق ابوابها

#بشاير_المقبل

إتضح لي درس ( كَفّار العشير الجاحد)
‏ولافهمت الدرس إلا بالعنا والقوه

‏ولّ ، ياظلم البنادم لاكره له واحد !
‏لو هو أسمى خلق ربي مايشوف سموّه
‏
‏⁧#بشاير⁩_المقبل

‏♪

‏يا صاحبي حقك علينا .. تشْرَه
‏وحنا نجي لك والندم غطّانا

‏"انسف خَطا" كرمالـ عيش وعِشره
‏لا تنسف العِشره عشان أخْطانا

‏⁧#بشاير_المقبل

(حول الغروب)

في ساعة ٍميقاتها حول الغروب
فيها نشوف النور و الليل خْصما

صبّت حقوق حْكاه في سمع ٍ نهوب
وكن الخزاما في وسط قلبي نما

تبسم اللي لا تبسم لي يذوب ..
جمر الهموم اللي ورا صدرى حما

يا رحبها الدنيا ويا يسر الدروب
ما دام عينه في حياتي له وِما

ماقد سمى حي ٍ على الطيب مْحَسوب
الا واشوفه فوق هالسامي سِمى

دايم صباحه ما جرحني بالـ غروب
شمسٍ جبينه يوم الاجباه إجهما

ابشر بعزي قبل اجي عنده طلوب
وش عاد لو قلبي على يديه ارتمى؟

من لايمي في حب كسّاب القلوب؟
يوم أرفعه عن خلق ربي للسما ؟

يقطف لي ( الغيمات ) من عذق الهبوب
لامن طلبته ( قطرةٍ ) تجلى الضما🤍!

يحبني من دون شايبتن تشوب
قلب الرضيع اللي على الفطره نما

احس لامنه رضى .. تغفر ذنوب
سيل ٍ من الجنه على روحي هما

جزاه بالدنيا على ربٍ يثوب
مع من مشوا بين المخاليق رْحَما 🤍

#بشاير_المقبل

(ي سعود)


يا سعود ياللي كل شاعر يناديك
‏يشكي عليك من الظروف الاليمه

‏هو انت شيخ ؟! ونعتزي كلنا فيك ؟
‏أو لك حكايه بالسنين القديمه ؟

‏والا اخو دنيا ولك عين ترجيك ؟
‏والا حروفك بالبحر مستقيمه ؟

مع العرب يا سعود .. جيتك ابشكيك
وقتٍ شحيح ، وكفّ جوره كريمه

جيتك و في صدري هجاد ودواكيك
ودموع عيني ما تونّا هتيمه

ما بالمدى غير العِدا والتهاليك
وما في شليل الغيم للبيد ديمه

‏يا سعود رد الصوت ياسعود وشفيك؟
‏عَبّر قصايدنا يمال الغنيمه :(

#بشاير_المقبل

كثّر بهار الهروج ، وصفّي دلالها
‏وقَلّب فناجيلها يا خوف منثلمه !

‏ترا خفيفك بعين العاني .. ثقالها
‏بالذات لاصرت تجهل حربه وسِلمه

‏لاتستغلّ الأجاويد و تِجِمّالها
‏وحليم الأطباع .. لا تمتحنه بحِلمه

‏أغليت أنا ( واحدٍ ) من كلمةٍ قالها
‏وكرهت أنا ( واحدٍ غالي ) سبب كلمه!

‏⁧ #بشاير_المقبل⁩