عمّر وسط قلبي ولا ذاق تقصير
‏واقفى وخلّى عقبه (حروق وشقوق

‏وخيبة رجى) لو وزّعتها المقادير
‏ماحب مخلوقٍ على الارض مخلوق!
‏
‏⁧#بشاير⁩_المقبل

يا سارق ٍجمّارة صدورنا .. عيب !
‏تسرق وتمشي واللواحظ بصيره !

‏هذي تراها قلوب ماهي لعابيب!
‏من جارها رب الخلايق يجيره

‏كل الحبايب مثلك تصيب وتخيب
‏ولا يتركون الكسر دون الجبيره

‏⁧ #بشاير_المقبل

‏ياغيم وش مِعجلٍ مسراك؟
‏“فيحان”ينخاك مِرباعه

‏لي غالي ٍبالنقى شرواك
‏ودّعته الله تحت قاعه

‏له وجهٍ أطهر من المسواك
‏وأبلج من الشمس وشعاعه

‏ياليتني قطرةٍ من ماك
‏وأحوّل بحفرته ساعه

‏وأروي ضمى فاقدٍ ناجاك
‏قلبٍ عسى تبرد أوجاعه

‏⁧ #بشاير_المقبل

(رجال)

ياناس اللي مصبرني على جَهد الزمن ، رجّال
اعرف اني عقب عينه بعيش العمر ملتاعه

عيوني لا تباطت جيّته يمّي .. غدنّ اجفال
يطلّ الصبح ماذاقت من صحون الكرى ساعه

يا رب ، اقصر غلاه من العروق اللي غدنّ انحال
وردهن حبه اللي له عليّ السمع والطاعه

يا رب اربط على قلبي ليامنه جهم رحّال
وفقدت اللي ليا ضاقت صنع ضحكاتي صناعه

يا رب ، سنين لا مرت ورا فقده عجاف ، محال
يغاث العوز في ذاك الخفوق وتِطعَم جياعه

ودرب وصال : ما تظلم سماه ، وعارضه لا سال
سقى برفوق ما هدّ الصبر والجاش ما راعه

ودربٍ لا يجي واعر ، ولا ظلما  وراه جبال
يسير  ،  و حيّته عميا بصر ، شبعانه سباعه

ودليلٍ يقظب كفوفي ليا اجتاح النهار .. ظلال
وغابت شمس صبري وارتعد في صدري شْجاعه

يا رب إكرمني بفضلك وانا ادري بك يديك جزال
ليامنك عطيت ادهشت عبدك  ، والبخت طاعه

يا رب الجنه .. الجنه ، بلا فرقى ولا ترحال
عوض حظ ٍ لعب في زهرة سنيني تِمنّاعه

يا رب عيوني .. بما لا رأتْه من الحياة .. كْحال
عوض طرفٍ غضيض وشاف خلقك طاغي ابداعه

يا رب أَسمع وانا فوق الارايك طق نعل بلال
عوض صوتٍ تبيه اذن الشفوق ويِطرب أسماعه

يا رب جنانك اللي ريحها ما قد خطر بالبال
عوض عطرٍ على روحي يجيب الوجد ذعذاعه

ويا رب اقسم لي امن الصبر ما يجبر كسير الحال
وسق لي من مخاييل الرضى ما يطفي اوجاعه

انا اضعف من مقاديرٍ تتلّ من الحشى ، رجّال
ماهو بين العروق !!  الا سكن بالعظم و نخاعه 

#بشاير_المقبل

يبه 🤍

لو "العالم" من علومك شرب
‏ساد السلام وقادة حروبه صفوا

‏ولو يفهق الله ( نصف طيبك ) للعرب
‏ما جابت بطون الحريم الا كفو

‏⁧ #بشاير_المقبل ⁩

إنتبه لا طبت .. من شر النوايا !
‏لا يْتكدر صَفو ميراد الحنايا

‏خّبها يسراك .. لا مَدّت يمينك
‏لا تشوفك عين مدّاح السجايا

‏قدّم المعروف وانسى انك فعلته
‏لا تدور من ورا فعلك جزايا

‏ولا تغادر هالحياة إلا رصيدك
‏ممتلي - بينك وبين الله - ( خبايا )

‏⁧ #بشاير_المقبل ⁩

خيوط الشيب بحجاجك تِحيك حِرام للنسّاك ، وقار ٍفي ذرى هيبه
وتجاعيدك علامات اقتباس لشاعرٍ راهي .. وِصَف تاريخ هالأمه !

عصاتك ناي معزوفة سلام ، ايقاعها ( ممشاك ) ، انا وشيحه مطاريبه
ومسباحك رجاي بجوف نون العالم الـلاّهي .. قداي ان عزت اليمّه

تغطرس وانتهض واطغى وخذ بارودك وشلفاك ، انا دامك معي ذيبه
تمركى بالحشى ! ماغير (زولك) آمرٍ ناهي ، مديحٍ لي حِنو ذَمّه


كبير احلامي ، وشفّي ، وغاياتي بشَسع حذاك ، أبد .. لا يلحقك ريبه
اجل وش عاد يا وجدٍ تولّج طرفك الساهي ، يا عَلّي عَنْك من هَمّه

ايا عبدالعزيز المقبل إسمعني عساي افداك ، أتله من تلابيبه ..
قصيدي لين يوقف بك على الاشهاد متباهي .. لعله ! يبري الذمه

ولا مره خسرت رهان حطيته على (محياك) تجمّل شيبةٍ شيبه!
ليا ناديت لك ! دلّى يجاوب لي تندّاهي .. عرب وشعوب ملتمّه !

يا شيخي عزّي لبنتٍ ابوها مثلك وشرواك ، (كبر طيبه عذاريبه)
وتركها ، ما لقت في هالحياة لظِفرِهـ مْضاهي ويجاوبها "هلا يمه" !


#بشاير_المقبل

أماري بالسعوديه واهلها من منابر جيس
واحس بنسمة طويق العذيه من غلا الجيره

ليا قالوا عن التاريخ كاذب واكثره تدليس
صدوقه صفحة الجغرافيا تروي أساطيره

تِذكّر كل طوبه بالوطن خيّالة التأسيس
ثلاث قرون ما زلّ الصباح ولا غفى طيره

حدو مجد البلد حَدي العرب لمهودجات العيس
ورا سود البراقع ترقص لعزّه .. غناديره

#بشاير_المقبل

جائحة كورونا

يا هَل الله من سمان ٍبالمدى شوف (القلوب المومنات) مْطلّه
القصيده ( ملحمة جيل تقدم زملكم ) وأدعى الجْلال دقاقه

إلبسوا ثوب الرخى .. حنا إمخاوين الشّداد .. ثيابنا مبتله
من عْجافٍ اسرفت فيها مذاليق السّقام .. ولا زهى ترياقه

يا خَلف من ضاق ذرعه مع غريمٍ ماحدٍ حَدر السما ندٍ له
( علةٍ ) طوفانها هدَّم مداهيل النسايم .. والقلوب رْقاقه..

أشعمتنا شوق ، وابكتنا تعازي ، وإلتحفنا من بلاها مَـلّه
عطّلت شريان مكه ، والدروب تفوح وحشه، والوصال شْفاقه

مسّنا الضر .. ولبسنا بشت من لون (الرضى به) واستعنّا بالله
مرحبا بالضيف لو نفسه ثقيله ، ما كرهنا .. والله اللي ساقه

اعتصمنا في جبال من اليقين .. سنين واعلناّ : " الوقوف دواً له "
وابرهزّت قادة الأمه وَقْـم ذروة عتيم المسغبه والفاقه

احتملناها جنود .. عيال عود ، محصنينٍ بالولا والمِلّه
التثمنا في قنوف الغيم ، وامطرنا ، وربّع بالحصن مشراقه

جايحه حلّت علينا دَرس : عن شكر النعم ، واوطاننا ، والخِلّه
دُورنا فزّت محاريب ، وكتاتيب ، وطبيب ٍ له اتشدّ الساقه

البيادر مستعفّه ، والسنابل أزرت يدين اليباس إتدلـّه
كل ما خيّل سحاب الوسم غنّت يا فرج ربي ويا برّاقه

يا هَل الله من سمان ٍبالمدى شوف القلوب المومنات مْطلّه
نحّرونا صفحة التاريخ الابلج واكتبونا للظلام اشراقه

#بشاير_المقبل

لو تنفض الغيمات مافي جوفها يا خِلي ..
‏على غصونٍ عافت القيعان ما ورّقها

‏إن جيت تاصف ( مُرّ فنجال ٍ شربته ) قلي:
‏" أمرّ من فقد الشغف في حاجةٍ تعشقها "

‏⁧ #بشاير_المقبل⁩

تركض بنا الايام ، ما كن السنين إبها سنين
‏عِمر ! وغدا عابر سواليفٍ لنا نحكيبها

‏راح رمضان اللي نحبه ! راح كنه ليلتين!
‏واعمارنا مثله ؛ تبي تركض ولا ندريبها

‏يالله تقبل ما دعينا .. راكعين وساجدين
‏وتعتق رقابٍ ما انحنت في غير باب مجيبها

‏⁧ #بشاير_المقبل ⁩

ي مشوّهين الدين ، ليه ؟!
ما غيركم فينا تقاة ؟!
 
اللي يحابيكم نزيه !
واللي يخالفكم .. عصاة !
 
الدين : لا إكراه فيه
مَ انتم على العالم " وُصاة "
 
قلنا شهود الله ! إيه ..
لكن ترا منتم "قضاة"
 
حشرٍ وراكم ما نبيه
وكلٍ يسوي ما يراه
 
راع ِ الخَطا : ربي عليه
ما يجهل المخطي خطاه!
 
(الله .. وثم سنّه نبيه )
مستمسكينٍ في عراه
 
في يوم تسوّد الوجيه
الله .. يحشرنا وراه 🤍


#بشاير_المقبل

عجابٌ كل شيءٍ في زماني
يؤيد مُستهلّي من يعاني

توارت بيننا قِيَمٌ عِظامٌ
وصار الحبُ كالنجم اليماني

يُقربُك الذي أقصيِتَ يوماً
ويُقصيك المغرّقُ بالحنانِ

"وقد تلقى الحفاوة من غريب "
ويهملك الذي سكن المحاني

#بشاير_المقبل

طيبنا ما تغير من هذيك السنين
المبادي .. نموت وما زهدنابها

قولوا إن الزمان اللي مضى : له حنين
قولوا : إنه ذبحنا فقد غيّابها

لا تقولون “ والله راحوا الطيبين “ !!
وأنا عيني تكحّل فيهم أهدابها

#بشاير_المقبل

الأمان إن ما لقيته في عشيرك لا تِجذّر !
العروق الموغله .. بأغصاننا مستاثمات

أرض ربي رحبه وفيها قلوب ٍ ما تِعذّر
والله اللي قاسم الارزاق من قبل الحياة

#بشاير_المقبل

قال : " انا ما لي خلق ادراي الناس ! "

قلت :

إدرى مواليفك على شان الأيام .. !
لا احتجت فيها للمدارى .. تدارى

حال الرخى لو سرّك أوقات .. ما دام !
تجيك سود أيام عمرك تِبارى

اصنع بمدات الجمايل لك حزام
خلٍ عن الدنيا بـ صدره تِوارى

#بشاير_المقبل

كثرة الـ ( آسف ) مثل حَبّ الدوا
‏لا تعوّدها الجسد ما تنفعه

‏خاطرك لاطاب ؛ سامَح وانكوى
‏(البلا) ما كلُ توبه تدفعه

‏ومن يلوم القلب لاعاف الهوى
‏ضيقوا دنياه والدنيا سَعه!

#بشاير_المقبل

مغتنين .. ولا لغير الله شكينا من حوايج
‏ما شكى الصبار من ظلم الصياهد لـ الأثل

‏ما نبي غير الكلام السَمْح و وجيهٍ بلايج
‏طيبكم خلوه ذخر .. و عاملونا بالمثِل !

‏امطروا للي يجيكم ديمٍ ما جاكم عجايج
‏ومن يضيّفكم ركيك دلاله .. اسقوه الحِثل

‏⁧ #بشاير_المقبل⁩

أنا أحبك حب مقطوع النظير
لا قبلي اللي قد وصلْه ! ولا بعَدي

غديت احنّك كنّك بسنّك صغير
ما باقي إلا إني أناديك : ولدي !

أجيك أنا والشمس لافاضت نطير
من شوقنا ناصين بابك ونعَدي

من يَسبق؟ ويصبح على عينك بخير؟
من ينتظر عينه نهار ٍ سرمدي !

غيم .. وعصافير .. ونواوير .. و غدير
وبرق تلاه من التراحيب إبرِدي

يسعِد صباحي وجهك الطَلْق السفير
و يسعَد وراي الكون كله يا بَعدي

#بشاير_المقبل

ما عاد هو شوق وشفاقه ! صار للقلب احتياج !
وجداه يا مكه ويا نسناسها وترابها

أحرِم لها كني مريض الصدر في وسط العجاج !
وارجع وصدري أوسع من ارض الوطن ورحابها

روحي تهادى بالجسد ، أصفى من الما و الزجاج
دمعي غسلها من خطاياها و حَطّ اتعابها

ياجعلني فيها مع الحجّاج دور العام .. حاج
ويا جعل تقبل دعوة ٍ راحت تطق ابوابها

#بشاير_المقبل

إتضح لي درس ( كَفّار العشير الجاحد)
‏ولافهمت الدرس إلا بالعنا والقوه

‏ولّ ، ياظلم البنادم لاكره له واحد !
‏لو هو أسمى خلق ربي مايشوف سموّه
‏
‏⁧#بشاير⁩_المقبل