‏⁧ #على_لسانها⁩

‏ياصاحب الكلمه العذبه! وطبع الوطا
‏يا أكثر انسان مرجلته (بقيفانه!)

‏لاصرت كذّاب والأيام عَجلة خِطا
‏ولك ذاكره تشبهك ضحله وخوّانه

‏دوّن كلامك لياقفّيت عنّا، خَطا
‏ننشد ووجهك تقلّب فيه ألوانه

‏خف من جزا اللي لياشاف المفوّه سِطا
‏سلَط عليه البلاوي تقطع لسانه

‏⁧ #بشاير_المقبل⁩

ذاك الوحيد اللي ليا ضقت يدري !
ويجمّع مزون الفرح فوق رمضاي

ويلوي ذراع الشرهه اللي بصدري
وينوّخ سمان المعاذير لرضاي

#بشاير_المقبل

بصوتٍ والدي : (القول الهزيل)

ضاق بي صدر الوساع وساق لي همي سحايب
وامطرت عينٍ ملاها الضيم بدموعٍ سخيه

ساق رجلي ريهجانه قاصدٍ مجلاس شايب
شيخي اللي قاضبٍ شرع الله وسنة نبيه

وانسكب همي على صدره وجرّيت النحايب
لين صارت لحيته من ديم دمعاتي نديه

صحت يا شيخي تقول الناس ! والناس المصايب!
طالت أيدين الكلام وهزّت عزومٍ قويه

قوّلوني هرجتن ما قلتها بين القرايب
وانت تدري ساس بنتك ماهي الساس الرديه!

تربية شهمٍ يعز القوم ويفك النشايب
تربية ام السنع والطيب والنفس الرضيه

قال : يا بنتي سمعت من اول سنيني .. غرايب !
وش رجيتي من سنينك دام ذيك الاوليه !

اسمعي مني وانا اللي راسي من الناس شايب
شاربٍ شيخك هماج الخلق شرب الشاذليه

الرسول ! اشرف عباد الله ! و ورّوه العجايب !
في حديث الإفك طالوا عرضه ، وشاف الاذيه !

مريّ القول الهزيل مْرور عجلات الركايب
واسمعي قولة (سمين الهرج)(والناس السويه)

دام فوق متونك جنودٍ على فعلك رقايب !
لا يهمك من يقول بغيبتك يا ابوك سيّه

#بشاير_المقبل

قالت العالم تقدم وابصمي بالميه
‏ماحدٍ غيرك بقى في هالسواد وحرّه

‏قلت انا ما هي عوايدنا وشيخ الهيّه!
‏ذي قناعاتي ولانيب إمعه منجرّه

‏هذا انا حره ولااشوف بعباتي سيّه
‏ما لبست الطرحه وبي من شكوكك ذره

‏كان ديني والحشيمه والحيا رجعيه
‏الله يتمّي على رجعيتي يا " الحره "

‏⁧ #بشاير_المقبل

البعد حمّاي الغلا بعض الاوقات
‏لا صار كثر القرب مابه مسرّه

‏نحبكم .. مير اتعبتنا المْدارات
‏وطويق هم ٍ من ورانا نجرّه

‏نسكب شهدنا ونتحرى البشارات
‏ولا لنا .. يا كود فنجال مُرّه

‏غضوا بصركم لين رب السماوات
‏يرفع عن اللي مسه الضرّ .. ضرّه

‏⁧ #بشاير_المقبل⁩

" درَج "

حاسب أفعالك ، وظنك ، واللسان إليا هرج
قبل لا تسجد جفـونك في محاريب الكـرى

لا تمشّى في وساع صدورنا مشي العرج !
رجلك اليمنى تِـقَـدّم ! وإختها ترجع ورى !

قدرك اللي ما قِدر هامان يبني له دَرَج
كذّبه فرعون قلبك ، وأنكره بين الــورى

انت كافر بالمحبه ، ما على مثلك حـرج
ما يهم يجير قلبك قلب ، أو يسكن عَرى

صدري اوسع من رحاب الكون في ساعة فرج
لكن أضوق من عروق النمل لا جاه إفتِرا

[شرع الأُنثى] : لو اتسامح ذنب ، والتايب سرج ..
خيل شوقه في رضاها ولـ معاذيره سرى !

( كل ما تفعل خطيّـه ! تنزل بقدرك درج ..
أوله في جنّة الفردوس ، وأتلاه الثرى . )

#بشاير_المقبل🍃

#ساعة_استجابه


من دون لا ادعي .. قلت يا رب استجب
ربي عليم بـ نفسي و بـ اسرارها

ان كان حلمي خير ! قال الله : وِجب
وان كان فات ! فـ خيرةٍ واختارها

#بشاير_المقبل

ليت ربي حط روحي في جسد شيهانه
‏والله إن الحيل - قِلّه - ما يليق بروحي

‏يا فِضى قلبي الكبير ورفرفة جنحانه
‏كلما حرّك سبوقه تستلجّ جروحي

‏شوق عيني هالسحاب اللي جهلت أوطانه
‏ووجد عيني يالدروب اللي عليها نوحي

‏⁧ #بشاير_المقبل ⁩

الحياة أجوديه .. ما تطيب لحقود
‏وأسود القلب والله مايشوف الهنا

‏لا تكدّر ، ولا يبقى بهالقلب عُود
‏كل ما تزرعه كفك .. تذوقه جنى

‏وإن تِسعّر قليبك من خويٍ جحود
‏قل عسى الله ؛ يجعلني عَنَه في غِنا

‏ما تشح العباد .. إلا وربك يجود
‏وما إبتعد عنك شيّ .. إلا وغيره دنا

‏⁧ #بشاير_المقبل⁩

☁️

ليت المطر لامن غسل قاعنا ماه
‏يغسل على دربه "قلوب المخاليق"

‏كم (حاجةٍ) عيّت تجينا .. وجيناه
‏ضاعت ، وضعنا بالدروب المغاليق

‏وكم (ذاهبٍ) بالعين صورة محيّاه
‏ما كنه الا الدم وسط المعاليق

‏وكم (فاقدٍ) فينا ، وكم (كاظمٍ) : آآه
‏وكم شاهقٍ غبنه ، وكم زافرٍ ضيق

‏⁧ #بشاير_المقبل

ما بين عربانٍ ذممهم بِيّعت ..
‏وقلب من الصدمات باحبابه وجيع

‏.
‏.
‏وهقوات عين ٍ في مَهدها شِيّعت
‏فيمن تمكّن له ملـٰكوت ٍ رفيع
‏.
‏.

‏كان الجْلال من الجمايل ضِيّعت !
‏عند الله دقاق الجمايل ما تضيع

‏⁧ #بشاير_المقبل⁩

“وش يقول الناس عنّا؟“ تحتها عشرة خطوط
ياجَهل بعض العقول ! و ياثقل دم العباره

من تسمّع للنقايد مامشى له ربع شوط
يبشر بقلّ الفلاح ويبشر بكثر انهياره

لو عيون الناس توجع والكلام الشين سوط
( حسبي الله ) حطها من دون خلق الله ستاره

إفتح القرآن واقرا في حكاية آل لوط .. !!
ما لقوا فيهم عيوب وعيّروهم بالطهاره !

#بشاير_المقبل

لو تنفض الغيمات مافي جوفها يا خِلي ..
على غصونٍ عافت القيعان ما ورّقها

إن جيت تاصف ( مُرّ فنجال ٍ شربته ) قلي:
" أمرّ من فقد الشغف في حاجةٍ تعشقها "

#بشاير_المقبل

‏ما نمت ! احسب الشوق : كم باقي له ويَجهَل عَليّ؟
‏يـ البَـلّه اللي يحتريها الريق تَرفق بعْطِشَه

‏إرجع .. ترا عيوني يتامى مالهم بَعدك وِليّ
‏والدار من دونك ولو فيها ثلاثين .. وْحَشَه !

‏⁧ #بشاير_المقبل⁩

عمّر وسط قلبي ولا ذاق تقصير
‏واقفى وخلّى عقبه (حروق وشقوق

‏وخيبة رجى) لو وزّعتها المقادير
‏ماحب مخلوقٍ على الارض مخلوق!
‏
‏⁧#بشاير⁩_المقبل

يا سارق ٍجمّارة صدورنا .. عيب !
‏تسرق وتمشي واللواحظ بصيره !

‏هذي تراها قلوب ماهي لعابيب!
‏من جارها رب الخلايق يجيره

‏كل الحبايب مثلك تصيب وتخيب
‏ولا يتركون الكسر دون الجبيره

‏⁧ #بشاير_المقبل

‏ياغيم وش مِعجلٍ مسراك؟
‏“فيحان”ينخاك مِرباعه

‏لي غالي ٍبالنقى شرواك
‏ودّعته الله تحت قاعه

‏له وجهٍ أطهر من المسواك
‏وأبلج من الشمس وشعاعه

‏ياليتني قطرةٍ من ماك
‏وأحوّل بحفرته ساعه

‏وأروي ضمى فاقدٍ ناجاك
‏قلبٍ عسى تبرد أوجاعه

‏⁧ #بشاير_المقبل

(رجال)

ياناس اللي مصبرني على جَهد الزمن ، رجّال
اعرف اني عقب عينه بعيش العمر ملتاعه

عيوني لا تباطت جيّته يمّي .. غدنّ اجفال
يطلّ الصبح ماذاقت من صحون الكرى ساعه

يا رب ، اقصر غلاه من العروق اللي غدنّ انحال
وردهن حبه اللي له عليّ السمع والطاعه

يا رب اربط على قلبي ليامنه جهم رحّال
وفقدت اللي ليا ضاقت صنع ضحكاتي صناعه

يا رب ، سنين لا مرت ورا فقده عجاف ، محال
يغاث العوز في ذاك الخفوق وتِطعَم جياعه

ودرب وصال : ما تظلم سماه ، وعارضه لا سال
سقى برفوق ما هدّ الصبر والجاش ما راعه

ودربٍ لا يجي واعر ، ولا ظلما  وراه جبال
يسير  ،  و حيّته عميا بصر ، شبعانه سباعه

ودليلٍ يقظب كفوفي ليا اجتاح النهار .. ظلال
وغابت شمس صبري وارتعد في صدري شْجاعه

يا رب إكرمني بفضلك وانا ادري بك يديك جزال
ليامنك عطيت ادهشت عبدك  ، والبخت طاعه

يا رب الجنه .. الجنه ، بلا فرقى ولا ترحال
عوض حظ ٍ لعب في زهرة سنيني تِمنّاعه

يا رب عيوني .. بما لا رأتْه من الحياة .. كْحال
عوض طرفٍ غضيض وشاف خلقك طاغي ابداعه

يا رب أَسمع وانا فوق الارايك طق نعل بلال
عوض صوتٍ تبيه اذن الشفوق ويِطرب أسماعه

يا رب جنانك اللي ريحها ما قد خطر بالبال
عوض عطرٍ على روحي يجيب الوجد ذعذاعه

ويا رب اقسم لي امن الصبر ما يجبر كسير الحال
وسق لي من مخاييل الرضى ما يطفي اوجاعه

انا اضعف من مقاديرٍ تتلّ من الحشى ، رجّال
ماهو بين العروق !!  الا سكن بالعظم و نخاعه 

#بشاير_المقبل

يبه 🤍

لو "العالم" من علومك شرب
‏ساد السلام وقادة حروبه صفوا

‏ولو يفهق الله ( نصف طيبك ) للعرب
‏ما جابت بطون الحريم الا كفو

‏⁧ #بشاير_المقبل ⁩

إنتبه لا طبت .. من شر النوايا !
‏لا يْتكدر صَفو ميراد الحنايا

‏خّبها يسراك .. لا مَدّت يمينك
‏لا تشوفك عين مدّاح السجايا

‏قدّم المعروف وانسى انك فعلته
‏لا تدور من ورا فعلك جزايا

‏ولا تغادر هالحياة إلا رصيدك
‏ممتلي - بينك وبين الله - ( خبايا )

‏⁧ #بشاير_المقبل ⁩

خيوط الشيب بحجاجك تِحيك حِرام للنسّاك ، وقار ٍفي ذرى هيبه
وتجاعيدك علامات اقتباس لشاعرٍ راهي .. وِصَف تاريخ هالأمه !

عصاتك ناي معزوفة سلام ، ايقاعها ( ممشاك ) ، انا وشيحه مطاريبه
ومسباحك رجاي بجوف نون العالم الـلاّهي .. قداي ان عزت اليمّه

تغطرس وانتهض واطغى وخذ بارودك وشلفاك ، انا دامك معي ذيبه
تمركى بالحشى ! ماغير (زولك) آمرٍ ناهي ، مديحٍ لي حِنو ذَمّه


كبير احلامي ، وشفّي ، وغاياتي بشَسع حذاك ، أبد .. لا يلحقك ريبه
اجل وش عاد يا وجدٍ تولّج طرفك الساهي ، يا عَلّي عَنْك من هَمّه

ايا عبدالعزيز المقبل إسمعني عساي افداك ، أتله من تلابيبه ..
قصيدي لين يوقف بك على الاشهاد متباهي .. لعله ! يبري الذمه

ولا مره خسرت رهان حطيته على (محياك) تجمّل شيبةٍ شيبه!
ليا ناديت لك ! دلّى يجاوب لي تندّاهي .. عرب وشعوب ملتمّه !

يا شيخي عزّي لبنتٍ ابوها مثلك وشرواك ، (كبر طيبه عذاريبه)
وتركها ، ما لقت في هالحياة لظِفرِهـ مْضاهي ويجاوبها "هلا يمه" !


#بشاير_المقبل