مولد بحق الامام الحسين عليه السلام


ينور عيوني اهواك حبيبي ومكَدر انساك
يساكن العــــــين محبوبي يحسين
------------------------------------------------
يا غالي عندي واغلى من انفاســي
تهواك روحي وانتــه كل احساسي
حبك شغلني عن هلي وعن ناسي
مجنون بيك من الجــــدام لراســــي
الك كل لحظة اشتاكَ شيطفي نار الفراكَ
بين المحبــــــين محبوبي يحسين
------------------------------------------------
انته حياتي وانته شوف عيوني
مجنون بيك وخلهم ايلومــــــوني
هام الكلب بـيك وشغلت ظنوني
عنك يمحبوبي فــــلا ايبعــــدوني
سكنت ابكَلبي والروح طبيب اداوي الجروح
ابطول السنين محبوبي يحسين
------------------------------------------------
سهران ليــــــــلي وانته شاغــــل بالي
وياك السهر صار شكــــثر يحــــــلالي
يا ســــر وجــــــودي ويا نــــبض دلالي
ياغالي عندي واغلى من كل غالي
الك بيت الكَلب صار احس بفركَتك نار
ما منك اثنين محبوبي يحسين
------------------------------------------------
كل لحظة وياك التمر محــــلاها
شكَد ذكريات وياك ما انساها
خل وخليله الدنيا من عشناها
يساكن الروح وعــــــشكَ غذاها
جميلة وياك الايام اعيش بعالم احلام
مثلك يصح وين محبوبي يحسين
------------------------------------------------
شوكَي وحنيني البالكَلب لحسيني
حــبة ادري بيــــــه لــخالقي يدنيــــــني
عايــــش حيــــاتي بحبة كل سنــــيني
خــــــادم حبــــيبي هالفــــخر يكــــفيني
اموت واحيا وياه يسر الروح ملكَاه
مطلوب الك دين محبوبي يحسين
------------------------------------------------

أسالكم الدعاء رائد الاسدي

بيت ابو ذية مع مولد بحق ابا الفضل العباس عليه السلام


الهواشم ازهرت نور بدرها
الدنية بالسما تنثر بدرها
حيدر بالفرح لمة بدرها
الف عالخير ياطيبة او وفية
==================


اليوم انولد عباس عباس
اسد وابن الاسد عباس عباس
كل شيعي انسعد كل شيعي انسعد
----------------------------------
من يوم الولادة وامة جابتة
بالخوة كبر بيها امة غذتة
غيرة وزود من الزغر رظعتة
لحسين السند عباس عباس
================
ما راد الكَماط يجتف زنودة
مد اديه اغتاظ وكطعة بزودة
لجل حسين فدوة يكَلها مكَصودة
فحل من المهد عباس عباس =====================
حيدر باب علم النبي تدري الناس
والعباس باب حسين والعباس
دكَ باب الحسين وادخل باحساس
بابة ما يسد عباس عباس
===================
فرحانين عدنا اليوم مثل العيد
نتبارك اجينة وهل لبسنا جديد
اطلب حاجتك من الكَمر شتريد
يكظيها وترد عباس عباس
----------------------------------
حتى السما ابتشرت شعت انوارة
صبح باب الحوائج شاعت اخبارة
يكظي حاجتة كلمن كصد زارة
حلال الشدد عباس عباس
====================
التاريخ كَلب واقرة صفحاتة
من نور انكتب عباس وكفاتة
وارث من علي الكرار خصلاتة
باقي للابد عباس عباس
=====================
دنيا واخرة عباس صحنة وياك
بالمحشر نلوذ ونحتمي بحماك
خدامك امامي واحنا شلنا لواك
خدمكم مجد عباس عباس
==================

اسالكم الدعاء رائد الاسدي

قصيدة منصة بحق الامام المهدي عجل الله فرجه

منتظرين..
سچة شوكَ نمشيها اعله طول سنين
ابلهفة عاشكَ امسيرين
محبوبة رسم مرسوم وسط العين
نتكَاود ونمشي مكَاود العميان
ندور سچة سچة دوارة متهين
نجوم الظهر خلصت وي نجوم الليل
حسبناهن سوة وظلينا سهرانين
وكَفنا بتك رجل بالدنيا تعبانين
نطحن بالصبر يا مهدي ومتانين
عشنا ارواح متلاكَين
فقرة والكم محبين
جاسانة البرد يا دفو البردانين
منتظرين..
كظينة اعمار نترجاك
تانيناك..
انعاتب بالهوة بجفاك
بالله برضوى كَلي ما صدف ممشاك
مر بذي طوى يمكن تشوفة هناك
ما لازم رداءة اتجيب
عطر من عدة جيب وياك
رد الشوف النة مو عمه بفركَاك
تانيناك
دعوت والدة تدعي لابنها وحيد
مثلها لو دعينا بحظرة التاناك
شنهي العطلك شبطاك
ركبت حصان شوكَي واطرد لملكَاك
لا جابتك نُدبه ولا رفعت لواك
لينة الشوكَ ماهزاك
ترد أرواحنا بطرواك
خنكحل العين بشوفة محياك
تانيناك..
ما تلحكَنا يا مولاي
تاهت يبو صالح وانتة ادرة بهاي
خربت والفريضة تاه منة الراي
والوادم بعض ماكو بكَصصهم ماي
يا مولاي.
علينا بغيبتك بهداي
الله اليستر من الجاي
يا مولاي.
ماتسمع يغايب صوتنة المبحوح
الكَلب مجروح .
الحلم مذبوح.
هلالك بالسما چا شنهي يمتة ايلوح
يا راعي الحچي المملوح
يا ريحة مُحمد يامُحمد بيك دوم اتفوح
متانينك مطر يبست كَلوب الناس
متانينك فجر كسر قيود الياس
متانينك ضوة طر ظلمة الوساس
متانينك دمع وإحساس
متانينك ندة والياس
متانينك لحد ما تكَطع الانفاس
يا الِ محمد ساسكم نداس
شاربها الرجولة بكاس
وعمك شربك كاس الوفة العباس
مو كافي.. البعُد يالمدري ساكن وين
جمرة ولازمين الدين
تظيع حچاية الزينين
نظل بشوكَ متأملين
عشنة ويالبصيرة هواي
چا يمتة نشوفك كون شوف العين
منتظرين..
___________
رائد الاسدي

مولد بحق الامام المهدي عجل الله فرجه تخص مشاية الشعبانية


يمهدينا يمهدينا اجينا انزور والينة
====================
الامام المهدي انوارة
شمس ودلي زوارة
البصرة وية العمارة
تهني اليوم هادينة
===========
تصيح الناصرية وياك
يامهدي فلا ننساك سيفك سيدي بيمناك
فدوة ارواحنة اهدينة
===============
للمهدي نظل انصار
شما راد الدهر يندار
البطحة تلكت الزوار
فراش وغطة تغطينة
============
على الدراجي ممشانة
لهل الخضر ودانة
المهدي يمشي ويانة
نبارك مولدك جينة
=============
الخضر واهلة تودعنة
السماوة بفرحة حظنتنة
بجيتكم تشرفنة
خدام اليطب لينة
===============
الرميثة من نطب ليها
تفرح كل اهاليها
زغار كبار نلكَيها
ترحب من تعدينة
=============
الطابو اهلة اتاني
الحمزة اتصيح هذا اني
هلة بيكم يخواني
ادعوا حسين يحمينة
================
الديوانية من انطب
صبح لوعصر لومغرب
شطيب الاكل والمشرب
نبارك مولدك جينة
===============
سنية والطليعة اثنين
خداماليزور حسين
للقاسم نطب ماشين
كل اهلة تحيينة
===============
الحلة اليوم عدهم عيد
تتلكانة من بعيد
يزاير امر وشتريد
اطير من الفرح بينة
==============
من الحلة لطويريج
تسبج للجي تسبييج
ننسة كل تعب الطريج
لولايتها طبينة
==============
اهلهة مجربة فريحة
ياهو اليمشي اتصيحة
تعلك بخور والريحة
ونلكة معلكة الزينة
=============
وصلنة لكربلة وشفنة
متجملة ومزينة
وصلنة بشوك للجنة
رفعنة للدعا ادينة
=====++++======
اسالكم الدعاء
رائد الاسدي

قصيدة فصيح بحق الامام علي عليه السلام


قد علا صوتُ الاسى والحزنُ بادي بالمصابِ مُذ نعى صـــــوت المنادي
واماما وا عليا واماما وا عليا
-----------------------------------------------
صاح جــبرائيلُ في كــــــبد السماءِ
قد أُصيبَ الدينُ في هذا المساءِ
لُف حزناً واعـــــــتلى صوت البكاءِ
نادباً متشـــــــحاً ثــــوب َالـــــــــــسوادِ
__________________
انحنىٰ المنبرُ يـــــرثيك وَجُوعا
واتى المحراب يـبكيك دموعا
وبدين اللهِ قد بــــانت صدوعا
وكتـــــاب الله مفـــــجوعا ينادي
---------------------------------------
كلُ ركُناً للــــهدى اليـــــوم تهدم
عروةُ الدينِ بهذا اليوم تُفصم
عندما رأسُ علي بالسيفِ تُقسم
واصابَ سيــــــفهُ ديــــنَ الرشادِ
_________________
فُلقت هـــام كتاب اللهِ حــيدر
عندَ وقــتٍ كان فيهِ اللهُ يُذكر
داخلَ البيتِ الحرام والمطهر
ســــاجداً خرَ الى رب العِــــــبادِ
--------------------------------
زُلــــــزُل الكــــــــــــونِ ونــــــادا بكتأبِ
ريح َحُزناٍ عصفت عندَ المصابِ
نـــــــــــندبُ اليومَ مــــــعاٌ ابا تُــــــرابِ
والدموع انهـمرت في كل وادي
--------------------------------
ياعلياً نـــــــــــادت اليومَ الاياما
ابـــــتاهُ تنــــــــــــدبُ كلَ اليــــتاما
كُلَ شيــــــعياً يُنـــــــــادي واماما
رفع الاســــــــلام اعلام الحدادِ
__________________

أسالكم الدعاء رائد الاسدي

قصيدة بحق الامام علي عليه السلام

شحال زينب من ابوها اتــــــودعة
شحال زينب من عظيم الفاجعة
يابوية رايح الله وياك لأخر نفس مااكَدر انساك
------------------------------------------------
بالحزن كَلبي تچوة وارتدى ثـوب النـياحة
ابيت حزني مايهود ينتحب ليلة وصباحة
ذكريات ابالي ظلت تلچم ابكَلبـي جراحة
راح من دللني بعدة ما اشوف بعيني راحة
كَمت اشوفة خالي بيــــتك يالولي
كَمت اشوفة كَبالي طيفك ياعلي
ما ينحمل يابوية فركَاك لاخر نفس مااكَدر انساك
------------------------------------------------
الحُسين دموعة تجري والحســــن يابوية نادة
راح خيمــــــتنا وســــندنا راح والــــــدكم يــــسادة
يجري ابوفاضل دمعتة الحزن صار النة عادة
شــــمت العدوان دهري ســــوة بــــــــينا ما ارادة
شلون حالة ينفطر منها الحجر
شلون حالة كَلبي مايحمل قهر
يا ابو اليتامة كَلبي ناداك لاخر نفس ما اكَدر انساك
------------------------------------------------
غمــــظت عينك يحيدر والحزن چلچل علية
العمــــــر ما اريدة بعــــدك كــــون وياك المنــــــية
شــــيعوك ابعــــيد عنــــــي والكَلب نارة ســــرية
ماكَدرت امشي وراهم واشبكَ الــوالد بدية
يالمشيتوا بالنعــــش لرض الغــــــري
يالمشيتوا رحموا كسرت خاطري
لبو بيدي چان بروحي افداك لاخر نفس ما اكَدر انساك
------------------------------------------------
وحــــشة الوالد چبــــــيرة ياخلكَ تعمــــي النواظر
وطبع البنــية حنيــــنة شلون لو مكسورة خاطر
للكَبــــــــــر شال وتركنــــــي بس احس وياي حاظر
عيني مشبوحة لمچانة ها يجيــني اليوم باچر
بوية وينك كَلبي رايد شوفتك
بوية وينك بس اشمن ريحتك
كَلبي اعلى باب الدار تاناك لاخر نفس ما اكَدر انساك
------------------------------------------------
الكَلب ما فاك حــــزنة لمي دوم ايــــــنوح بعدة
زاد مــــــن فركَاك وني ظل يتيم اينوح وحدة
بغفلة صوبني زماني فــــركَتك ماي وتــــــــــبدة
اليــــــتيم اشلون حالة لا ام ولا ابــــوه عــــــــــدة
دموع عيني ما تبــــطل لو رحــــــــت
دموع عيني چن مطر لجلك تكت
يا بوية ما اصبر بلياك لاخر نفس ما اكَدر انساك
------------------------------------------------
جاينة العــــيد وتعيد الخلكَ واحــــنا يتامة
راح والدنا من ادينة حتى ما تمم صيامة
آ يبوية ونور عيــني ليلي بعــــدك ما انامة
من بعد عينك يوالي للحزن اصبح علامة
دوم انحب تجري لجل دمعتي
دوم انحب وانتة تدري بحالتي
بتك نهار وليل تنعاك لاخر نفس ما اكَدر انساك
****************************

أسالكم الدعاء رائد الاسدي

قصيدة بحق الامام علي عليه السلام عن السيدة ام البنين ..على طور(وسط كَلبي شغلاتك)


اسيرة دمع وشوكَ وسط كَلبي المحروكَ
اخذني وياك لفوكَ يا علـــي يا علـــي
____________________
يحــــــــيدر من تهاجر اظل مكسورة خاطر
شبه صــــحرة وتهب من كل كتر بيه المــــشاعر
العمر وحشة بغيابك يـــــــــتاماك اعله بابك
علي ام البـــــــنين انة واون حــــيل لمـــــــــــصابك
يشوفي وضي عيناي لـــنشف منها الماي
صبـــتني وضاع دواي يا علـــي يا علـــي
____________________
الفكَد جنة حــنانك يحــــن كَلبه لزمانك
يآدم ما خذت حوة ورحــــت بيها لجـــــنانك
علت ونتها روحي ولا طابت جروحي
يجنة فاطمة منها ارحلت بـس باقي نوحي
حنينة هواي الروح يحيدر تسوة النوح
الدمع دم المسفوح يا علـــي يا علـــي
_____________________
حلم مر ولكَيــــــــتك هــــوة واتنفسيتك
لون عمر بعمر يــــتبدل ابعمري اشـــــــتريتك
تصد عيني لبنيني يــــونون لونيـــــني
حزن يعكَوب اريد احزن واريد اعميها عيني
حمر صارت العيون علي اولادك يبچون
يسر الله المكـــــــنون يا علـــي يا علـــي
____________________
الحزن بعدك هويتة الكَلب سويتة بيتة
ابدال ام البــــنين ام الحـــــزن اســـــمي يــــــريـتة
سهم هجرج نياحة دمعتي اتظل مُباحة
مثل صب المطر لجلك يصـــــب ليلة وصباحة
تهز ذكـــــراك البال واعيش باصعب حال
چنت للعيد هلال يا علـــي يا علـــي
_________________________
چنت تعنيلي كلشي علي لو عني تمشي
يشيب كَلبي من حزنة ويشـــيب حتى رمشي
يروحي وسر حياتي يتارس ذكرياتي
علي ومــــرورة فـــــــراكَك تظــــــل دوم بـــــــلهاتي
خذت وياك الحيل وسهرت عليك الليل
غبت يا نجم سهيل يا علي يا علي
_______________________

أسالكم الدعاء. رائد الاسدي

قصيدة بحق الامام علي عليه السلام


مفجوع الكَلب وانشده بالي مجروح بجرح راسك يوالي
صابوا هامتي بسيف ياريت ابمصابك
------------------------------------------------
كَاعــــــدة ابيتــــــي واتانــي هسة ابوي ايرد علية
انخمش كَلبي اعلى غفلة وترتجف كَامت ادية
لن اسمعة الصــــــوت نادة علي وافــــتة المــــــنية
ماتــــــت اجــــــدامي بابك آه يدهري شعمل بيه
ابابك انتظر شنهي المصيبة بعدك يالولي اصبح غريــــــبة
صابوا هامتي بسيف ياريت ابمصابك
------------------------------------------------
انظر اعلى اخواني ردوا ياعلي جابوك اخوتي
تنــــــــتچي عليهم اشاهد ريت هذا اليوم موتي
اخمش خدودي وانوحن وحــدي ماطلع صوتي
راح خيمتــــــــــنة التلمــــنة بيك شعظــمها بلوتي
راسك منفطر والدم خظابة شــــيهود كَلب بــــــتك يا يابة
صابوا هامتي بسيف ياريت ابمصابك
------------------------------------------------
آه يدهــــــري ويا عملــــتة مني اخذ احباب كَلبي
من عمت عيني عليهم ويا دموع العــين صبي
عمية كون ولا اشوفك امدد اعلى فراش كَربي
حــيل دوهــــــني زماني ماشــفت من راح دربي
بفراشك تون تصعب علية مدري منين اجت ليك المنية
صابوا هامتي بسيف ياريت ابمصابك
------------------------------------------------
الابــــــــو لو راح بعــــــــــــدة يــــظلم البيت ابرحيلة
موحش وخالي مچانة وحسرتي بعدة طويلة
يمي بس ليلة ويـسافر طــــولي بــوداعة يليلة
شوف ما شــــبعانة منك شــــــوفتك همي تزيلة
يابوية تون دارك خلية بالحسرة اجر وافرك بدية
صابوا هامتي بسيف ياريت ابمصابك
------------------------------------------------
فــــركَة الوالد مصيــــــبة تــــــمرد الروح وتفتها
من دنــــــت ليه المنــــية دمعتي يمة اذرفــتها
كَام يوصي ابهل بيتة روحي يابوية خذتها
حالتة تعمي النواظــر ميتة كون ولاشفــتها
لا ام لا ابو اصبح يتيمة كل عمري العزة بعدك اجيمة
صابوا هامتي بسيف ياريت ابمصابك
_____________________
أسالكم الدعاء رائد الاسدي

قصيدة بحق الامام علي عليه السلام


يابونة صاحت الايتام تندب بحسرة وآلام
وي الحسن وي حسين تجــري الدمع عالخدين
---------------------------------------------
كل اليتامة اتجمعـت وارتفع من عدهم صوت
بعدك فلا انريد العمر وياك ياريت انمــوت
مرتين نتيتم صعـب يتمنة سيف الطاغــــوت
وياك اخذنة ياعلـــي للكَبرخلينة انفــــــــــوت
ياعلي هالجانة العيد وانتة تفاركَنة اتريد
بعيد الله الك محتاجين تجري الدمع عالــخدين
------------------------------------------
راح اعلى بابك ياعلي ماتم حزن ننصب بيه
وبمصابك انزيد الحزن والدمع من دم نجــريه
وبصوت واحد يالابـــو الايتام كلها اتنـــــاديه
ايظل اليتيم لوحـــــــدة لو رحت ياهو ايباريه
عيد الله لولاح وبان ايزيد علينة الاحزان
طول العمر حزنانـين تجري الدمع
عالـخدين
---------------------------------------------
حال اليتامة من رحـت ايفت الكَلب وية الــروح
ايعين الله الحسين وحسن من طحت يمهم مجروح
وشلون لمن شافـــــــــتك زينب تون ومطـــــروح
منها الكَلب ذاب وخلص من كثر ماكَام اتنــــــوح
العباس يبچي وينعاك ما تنحمل يافركَاك
رايح يبو كَلب حنـين تجري الدمع عالـــخدين
____________________

تعودنة كل عيد الصبح نلتم سوة كلنا عليـك
نتعايد ونفرح ســـــــوة يابونا ونحب ايديـــــك
يبچون الحسين وحسـن وعباس وانة انـــــاديك
انكابل مچانك ننتـظر من الصبح احنة انتانيك
چنة تلمنة ونرتاح ابهالعيد بس صوت انياح
ايتام صرنة وحيديـن تجري الدمع عالخدين
-------------------------------------------
لو طر صبح عيد الفطر وتتعايد الناس اتكَــوم
وتتعنا الايتام الصـبح ياعلي اعلى الباب تحوم
بالعيد ما نفرح بــعد نلبس الك سود هـدوم
مظلومة ايتامك تظــــل وياهو الينصرة المظلوم
من طحت مصيوب الهام يتمت كل الاسلام
مثــلك ابو ايجيب منين تجري الدمع عالخدين
--------------------------------------------------
أسالكم الدعاء رائد الاسدي

جديد قصيدة بين الامام علي والسيدة زينب عليهما السلام

آه يــــــــــا نار الهــــــــــــجر بالكَلب من تسـتعر
هذا اخير وداع مني صبري يا ام الصبر
---------------------------------------------------
بـــوية يازينــــــب تعالي تكَربيلي ياظـوة العين
آية من قـــرآن ناطــــــــق انتي يابوية تعرفين
عليچ تتوالة المصايب ها يزينب لا تجزعين
ارد اشــــوفن بيچ امچ كل مصيبة الها تصبرين
عــــــــنچ ايطول الســـــفر وهمچ بگلبچ كبر
ابقى بس ذكرى حزينة تالمچ من تنـــذكر
--------------------------------------------------
آه يا حـــيدر يبــــــوية لو تشاهد حالي اشلون
مو سهل فكَد الاحبة بالكَلب حسرة يخــلون
راح اظـل بعدك يتيمه واليتيم ايدور العون
الحزن ساكن ابكَلبي بالبواچي اتشيب العيون
بوية مثل امــــــي اون وانة اصـير ام الحزن
ماتغـــــيب ابالي حاظر بية لو طال العمر
------------------------------------------------
عاشــــراچ اول حياتــچ الحزن عدچ نزل
شفتي امچ يا حنينة والدهر بيـها شعمل
وراح نتفــاركَ يزينب هالــدنة مني الاجـل
بيـــدي اسلمــنچ امانة لبني عــــباس البطل
من ايدي بيدين الكفيل يعدل الحمل اليميل
الوكـــــت لو مال بــــيها انتة اريـــــدنك ظــــخر
______________________
لو غمض جفنك يحيدر بالعذاب انعيش تالي
والنعش مشيول لو طر ينفجع گلبي يغالي
تعوديـنة انلوذ كلــــــنة حدر جنحينك يوالي
ياهو بعدك للــــــيتامة من تغيب شلون حالي
الدمع بعـــدك يصــــب وانه مفجوعة گلب
نعيش بالدنيا غرايب واحنا من سيد البشر
--------------------------------------------------
الحسن مظلوم بعدي بالسم ويطيچ عمرة
ايلوج يا بوية ويعاني كَبالچ وعينچ تنـــظرة
والحسين اگبال عينچ ينذبح ويفيض نحرة
وتنذبح اهلة وبنينة والخيول ادوس صدرة
وحركَ الخيام وسبي تمـشي اهل بيت النبي
وانتي يا زينب غريبة مچتفة بحبل اليسر
----------------------------------------------

أسالكم الدعاء رائد الاسدي

قصيدة جديدة بحق الامام علي عليه السلام تقرأ بلحنين وبطريقتين هذه الطريقة الأولى

يبوية يالنمت بأرض النجف
يبوية دمعي بعدك مانشف
بالدمعة غرگت عيني وليلي انترس بونيني
يبوية يبوية
======================
منصوبة ظلت فاتحة وروحي عليك امجرحة ماسكت صوت النايحة ابمصابك
شيطفي نيران البُعد لگبرك اذا عيني تصد يمرد بقى بگلبي مرد غيابك
خيمتنا وســــندنا والابــــو غالي
من بعدك يحيدر حالي مو حالي
اشوف البيت بعدك موحش وخالي
اشوفن صورتك گام ايتراوالي
يا شمعت البيت انطفت وجمر المصيبة ما خفت روحي بغيابك عاشرت ترابك
گلبي صبح مثل الجمر ودمعي بعيوني ينهمر ما ينفع وياه الصبر عذابك
يبوية البُعد يـــدمي الگلب
يبوية مو سهل كلش صعب
اشتاكَ الك تدريني وليلي انترس بونيني
يبوية يبوية
=====================
اترس اعيوني ابصورتك چنت واحبن شوفتك يا بوية عازة عازتك مصيبة
فگد الابو يحني الظهر وغيابة چم خاطر كسر لجلك يون حتى الحجر يهيبة
راح الچان الية بدنيتي سلوة
عن عيني تغيب رسومك الحلوة
تشتم ريحتة لو عافك التهوة
لو غاب الابو مالك بعد تچوة
مثلك يحيدر ما يصح مرهم تداوي كل جرح نياحة ودمعتي للصبح سچيبة
ايتامك ابابك تون والدمعة باطراف الجفن گلبي ولا ساعة يچن نحيبة
يبوية چنت الي تچوة وسند
يبوية ابغبيتك گلبي انمرد
بعدك حزن غاطيني وليلي انترس بونيني
=======================
اشتاكَ الك صبح ومسة يالعشرتك ما تنسة صارت حياتي بائسة برحيلك
مثلك يحيدر ما يصح گلبي بغيابك منجرح ما ينگطع حد الصبح عويلك
چانت راحتي من اسمع بصوتك
صاباني الدهر بوية بخبر موتك
على متني اشيلن وسفة تابوتك
كاتلني يحيدر بوية بسكوتك
نعشك على متني شلت صوب النجف بي غربت حاچيني يا بوية صحت دخيلك
الله اعله همة ايساعدة البيدة يدفن والدة يا گلبي هذا الفاگدة خليلك
يبوية دوم احن واشتاكَ الك
يبوية يا علي دار الفلك
گصرن يبوية سنيني وليلي انترس بونيني
=====================
اتحسر سنين الگظت.. ومن ذكرياتي اصبحت.. روحي يحيدر ما صحت عليلة
بليلي بدر وجهك رحل.. واظلم حياتي من افل.. حزنك يبوية للازل.. اشيلة
محرابك حزين او زايد اونينة
المفجوع ابغيابك الله اليعينة
يبوية فراگك ابهاليوم ماذينة
يعينة الله العزيزة ايغيب عن عينة
لارض النجف شال الابو.. غايب يبو طول الحلو.. شامت صبح بيه العدو.. رحيلة
حزنت الناس الحبتك.. ما تگطع ومو عادتك.. مو سهلة تدري فركتك.. ثجيلة
يبوية ناسك حزينة ابهالمسة
يبوية كلها اعله بابك جالسة
انريد الابو اتحاچيني وليلي انترس بونيني
====================
أسألكم الدعاء رائد الاسدي

هذه الطريقة الثانية


يبوية يالنمت بأرض النجف
يبوية دمعي بعدك مانشف
بالدمعة غرگت عيني وليلي انترس بونيني
يبوية يبوية
======================
منصوبة ظلت فاتحة وروحي عليك امجرحة ماسكت صوت النايحة ابمصابك
شيطفي نيران البُعد لگبرك اذا عيني تصد يمرد بقى بگلبي مرد غيابك
يا شمعت البيت انطفت وجمر المصيبة ما خفت روحي بغيابك عاشرت ترابك
گلبي صبح مثل الجمر ودمعي بعيوني ينهمر ما ينفع وياه الصبر عذابك
يبوية البُعد يـــدمي الگلب
يبوية مو سهل كلش صعب
اشتاكَ الك تدريني وليلي انترس بونيني
يبوية يبوية
=====================
اترس اعيوني ابصورتك چنت واحبن شوفتك يا بوية عازة عازتك مصيبة
فگد الابو يحني الظهر وغيابة چم خاطر كسر لجلك يون حتى الحجر يهيبة
مثلك يحيدر ما يصح مرهم تداوي كل جرح نياحة ودمعتي للصبح سچيبة
ايتامك ابابك تون والدمعة باطراف الجفن گلبي ولا ساعة يچن نحيبة
يبوية چنت الي تچوة وسند
يبوية ابغبيتك گلبي انمرد
بعدك حزن غاطيني وليلي انترس بونيني
=======================
اشتاكَ الك صبح ومسة يالعشرتك ما تنسة صارت حياتي بائسة برحيلك
مثلك يحيدر ما يصح گلبي بغيابك منجرح ما ينگطع حد الصبح عويلك
نعشك على متني شلت صوب النجف بي غربت حاچيني يا بوية صحت دخيلك
الله اعله همة ايساعدة البيدة يدفن والدة يا گلبي هذا الفاگدة خليلك
يبوية دوم احن واشتاكَ الك
يبوية يا علي دار الفلك
گصرن يبوية سنيني وليلي انترس بونيني
=====================
اتحسر سنين الگظت.. ومن ذكرياتي اصبحت.. روحي يحيدر ما صحت عليلة
بليلي بدر وجهك رحل.. واظلم حياتي من افل.. حزنك يبوية للازل.. اشيلة
لارض النجف شال الابو.. غايب يبو طول الحلو.. شامت صبح بيه العدو.. رحيلة
حزنت الناس الحبتك.. ما تگطع ومو عادتك.. مو سهلة تدري فركتك.. ثجيلة
يبوية ناسك حزينة ابهالمسة
يبوية كلها اعله بابك جالسة
انريد الابو اتحاچيني وليلي انترس بونيني
====================
أسألكم الدعاء رائد الاسدي

قصيدة جديدة بحق الامام علي عليه السلام عن السيدة زينب عليها السلام


راح امن ادية حامي الحمية
دلالي مجروح هاي المسية
===================
عيني اعله عينك من تصد / ذابل اشوفك يالورد / يا رايحة ليمك وارد / والدمعة بالعين

صاباني بمصابة الدهر / حزنك وسط گلبي استقر / ابكل بيتي اشوفلك اثر / ما يهدة الونين
أغلى الحبايب يالعني غايب
دلالي مجروح هاي المسية
======================
يالبيتي وحشة ابغيبتك / واگبالي اشوفن صورتك / اشتم يبوية ريحتك / وابالي ذكراك
صعبة من اظلن وحدي / وما اشوفة يمي والدي / يومي ابنياحة يبتدي / مجروحة وانعاك
يا اغلى مني بُعدك كتلني
دلالي مجروح هاي المسية
====================
يغمر حنانك عيلتك / وسفة يبوها فگدتك / تنحب عليك او رادتك / تدرينا نشتاكَ
اكبر بجالك حسبت / وتحظرني انت لو متت / دولاب بوية ادولبت / ما احمل فراكَ
محتارة بامري ذوبني صبري
دلالي مجروح هاي المسية
====================
ايتامك اعله الباب اجت / وروحي ييوية تمرمرت / يا وسفة عينك غمظت / عن هاي الايتام
تگصد الك صبح ومسة / كل الارامل والنسة / هاي اعله بابك جالسة / صار الها ايام
راح الكفلها صعبة امن اگلها
دلالي مجروح هاي المسية
=====================
مثلك يبوية ما يصح / فگدك جرح گلبي بجرح / سهرانة عيني للصبح / لجلك يوالي
من اغفى جرحي يلچلم / طيفك يجيني بالحلم / مرسوم الة بعيني رسم / أغلى الغوالي
بعيوني رسمك شيبني همك
دلالي مجروح هاي المسية
====================
أسالكم الدعاء رائد الاسدي

قصيدة بحق السيد الصدر قدس سره


يالصدر عايش تضل ويانة وابد ما ننساك يا مولانة
وا ويلاه يا ابو مؤمل وا ويلاه يا ابو مؤمل
========================
عايش وتمشي سوة وية النفس
انت للاجيال صرت اعظم درس
يا منار وگبتك چنها الشمس
روحك الطيبة تضل ترعانة
وا ويلاه يا ابو مؤمل
====================
منهجك ثابت او راسخ بالعلم
انت يا مولاي مــــــصنع للزلم
بمسجد الكوفة صدح صوتة بعزم
كلا للشيطان ولاعوانة
وا ويلاه يا ابو مؤمل
==================
يا ابونا واشكثر فگدك صعب
حسرة فراگك لهسة بالگلب
يا حسافة سيدي اتنام ابترب
لهسة مشتاگتلك الحنانة
وا ويلاه يا ابو مؤمل
==================
يا شهيد الجمعة يا رمز الآباة
انت يا مولانة احييت الحياة
ثورتك ثورت شرف ضد الطغاة
بصوتك اهتز الضلم واركانة
وا ويلاه يا ابو مؤمل
===================
انت لجل الدين ضحيت العمر
ودمك الثائر كتب اعظم نصر
موقف ايخلدة الدهر ال الصدر
محمد الصادق برز عنوانة
وا ويلاه ييا ابو مؤمل
==================
قدمت ولدك قرابين بشرف
دمكم الطاهر نزف بارض النجف
رد جديد الدين باسمك وانعرف
وبالفضل ساد وغطانة احسانة
وا ويلاه يا ابو مؤمل
====================
أسالكم الدعاء رائد الاسدي

قصيدة بحق ابا الفضل العباس عليه السلام


من المستحة ميت حيل ماميت من جروحي
كل عـركَة تنـزل للكَاع وياها تاخـذ روحي
عيون الاطفال اتصييح الماي
بعــيدين صاروا عني هــــــواي
------------------------------------------------
بسـيوف عطـشانة اجوا رويـتها بدم زندي
وسهام مـتروس الهـوة واطيها عيني وخدي
باكَن چفوفي والنـظر ظليت حاير وحـدي
موش ابعمود امن الخجل وي جربـتي متــبدي
لسان الهوة جاب الصوت--چا وينة عمنة انريدة
متانينك وشــوف الحال-- ماعونة كلمن بيدة
ياهوة اتكَلهم عني ماجاي
بعيدين صاروا عني هواي
------------------------------------------------
تنزف جروحي مستحة وزنودي اهــومش بيها
خافنها تـنصاب بسهم جودي بحياتي افديها مديت خلكَي وركَبــتي الـماي اعـز اعليـها
غـدار دوار الوكـت فـوكَ الـرمل چافيها
عن بالي ماغاب حسين-- من الـنهر للحومة
شايل الماي وعطــشان--بعيوني اشوف ارسومة
ساقي العطاشة وابقى رواي
بعيدين صاروا عــــــني هواي
------------------------------------------------
مشبوحة عيني لعيلتي چن صورةشفت كَبالي
تـتزاحم اباب الخـيم اطفال اخوي الغالي
اعصر اعيوني بجــربــتي واتـرسها چان ابالي
يــبسهن ابــنارة الضِـمة ويبس حلوكَ اطفالي
فززت جرحي الاطفال -- حدر الشمس عطشانة
بالماي الم ومحتار -- شحالة الفـكَد ذرعانة
حيرني دهري وتايه الــراي
بعيدين صاروا عني هواي
-----------------------------------------------
يا مـوت رفقاً بالعـمر امهلني اقدم اعذاري
وديت صوتي وانتظر توصل لخوي اخباري
مكسور خاطر والظهر خافـن يرد لـداري
وعيون زينب ترتجي ارجع ابــماي الجاري
الروح بـيدين المـوت -- كَلهن يسكنة وزينب
يبرد ابن آدم لو مات -- بس هوة نار ويلهب
اطلب سماح اوصيتي هاي
بعيــــدين صاروا عني هواي
------------------------------------------------
ارجوك اتـرك ردتـي الخجل بيه شـسوة
فارس غيور ولخوتي صاحب عزيمة ونخوة
بحزام صـبرك احتزم ودعـني بسـم الخوة
مشابكَ لحد اخر نفــس راحت اللمة الحلوة
ودعـني يا ماي العين -- عمري انچفة واتبدة
دمي تــرس حلكَ الكَاع -- خلــيت اخيي لوحدة
مهظوم وانة بطــبعي وفاي
بعــيدين صاروا عني هواي
------------------------------------------------
بفــــراكَ اخيك تنفـجع اسمع واقـبل عذرة
راسي بحجرك وانتة مَنّ راسك يحطة بحجرة
وركَة حياتي صوفرت يبست الچانت خظرة
اعذرني خافن قصرت يا فشلتي من الزهرة
اتمددت طول بطول -- عالغبرة ياظي عيني
هذا اخر وداع ايصير -- بينك يخوية وبيني
اعذرني صارت جربــــــتي ناي
بعيــــــدين صاروا عــــني هواي
======================

أسالكم الدعاء رائد الاسدي

قصيدة نزال بحق ابا الفضل العباس عليه السلام

رايح لنهر المـوت يتــــرس جربتة
علي مدري العباس ترهب حملتة
يا عباس يا عباس
------------------------------------------
سيفي وي ملك الموت خوة مناحر
لو تعب واحــد صاح الثاني حاظــر
آنة ابـــو راس الحـــار همة كَناطـر
سعفة وبعالي الريح جيش الچهبتة
يا عباس يا عباس
------------------------------------------------
همة احسهم دخان وانة العواصف
لو تهب نســـمة ريح مايبــــقه واكَف
والله باصحاب الفيل ماكو عواطف
سيفي يمطر سجيل والردتة خذتة
ياعباس. ياعباس.
----------------------------------------------
ضاكَت وحل المـــوت واظلم سماها
اختنكَت من العباس موت وغطاها
يطــــرب الها وبالسيف يطرد وراها
هذا يـومي واليــــوم مـن الله ردتة
يا عباس يا عباس
------------------------------------------------
يبسن شفاف حسين وانة الحماية
غيم اصيرلهم كون واروي الظماية
الة اخلي اعله الماي مدكَوكَة ثاية
چفوفي للخوة اطيح والدين اثبتة
----------------------------------------------
اربع آلاف الجيش عالشاطي وكَفت
ترسوا فجوج الكَاع والدنيا غصــــت
دخنت من الغيض والغيرة صعدت
هذا ماينعد جــــيش بالكَوة شــفتة
------------------------------------------------
واكَف بــــشاطي الماي اتـرس وابدي
بيـــني وبــــــين اجيـش اعلن تحـدي
بحر واتلاطم غيض ظل عالي مدي
بية يغركَ من خاض بحري وغمرتة
---------------------------------------------------
من اهزن بالســـــيف مـحد جزاني
مثــل هــــزة فنـــــجان ماثـني ثاني
خيير وملك الموت خـــــطار اجاني
راح اعزب بالروس ظيفي وكرمتة
-------------------------------------------------
بخزرة عيوني الماي جدامي اركظة
والنهر اســـحل بيه من جروفة اكظة
بس لجل يبقى الدين والباري يرظة
اهدي روحي قربان والغالي بعـــــــتة
======================

أسالكم الدعاء رائد الاسدي

قصيدة محاورة بين العليلة وام البنين عليهما السلام


علة وهجر ليل ودمع ياجدتي
يم البنين مصيبتچ ومصيبتي
بس الدمع والونة ياجدتي ظل النة
-----------------------------------------------
من سافر ارجع صيحت يا بوية ارحم حالي
لاچمني كَلبي بسفرتك گلبي انخمش يالوالي
تارسها عـيني مدمعي چم حسبة بوية ابالي
هذا انة حالي من مشوا رخصتة دمعي الغالي
ايكَصر العمر ياجدة لو طال البُعد
مُرة الحياة اخلافة خافــــن ما يرد
نياحة وبواچي وحَنّة ياجدتي ظل النة
------------------------------------------------
يا فاطـمة مر الصبر بس بعـدة كَالوا تفــرج
صبري يجدة وننتظر ظعـن النحـبهم عرج
دلالي بالفركَة انچوة لساني بذكـرهم يلهج
اذن بكَلبي للحزن وهموم اجت من كل فج
يافاطمة وياه اخذ روحي ومــــشة
متروسة ناس ايامي لكن موحشة
ذكــــــرى ادور مــــنة ياجدتي ظل النة
------------------------------------------------
اعمي دليلي من الحزن بعيــــــــني فلا ظل مدمع
ابيضت ويبست وانعمت يمتة بقــمـــيصة يرجع
عينيـني يالكلچ وفة ومدري البواچي شتنفع
وردة وذبل عودي ومتت من عروكَة كَلبي تشلع
ماخيط جروحي بزغ خيط الفجر
باچر يجــــــوني اقنع كَليــــــبي بعذر
لا ما كَطعت الظنة ياجدتي ظل النة
-----------------------------------------------
الفاكَد عزيز اعلى الكَلب ايروح الضوة البالناظر
ليلية عشرة ويالسـهر شيجبرلة كسرت خاطر
خافن عزيـزچ ما يرد ولا خـبر ندري شصاير
يعينة الله من فاركَ ابو ايتيه طريــــــجة وحــاير
وني واون انواصــل الليل بصبح
راح العزيز وبالكَلب تارك جــــــرح
الغالي انشدچ عنة يا جدتي ظل النة
------------------------------------------------
غاب الكَمر يَمّ الكَمر هجر الغــــوالي شخلة
هم مثلي دارچ موحشة جدة البُعد شيــــــحملة
يــــم البنــين وحالــتـچ للعــــــلة حطت علة
بكَلبچ فتح بابة الحزن بيتچ مشت كل اهلة
ما نامت عيونچ ذبل منها الجفن
الله اليعينچ هالــــــكثر عدچ حزن
يكتلني كَلبچ حزنة ياجدتي ظل النة
------------------------------------------------
ياجدة باچــر من يــــرد ننــسة الحزن والفركَة
كَعدتنة ما تنمل ســــوة ايصير شحلاتة الملكَة
ظمي ابعيونچ دمعتچ خافن دلــــــيلة انحركَة
خلــيني وياچ انتــظر هلــــبت الباب ايـدكَة
راح النظر من النظر صــــوب الدرب
انتاني العزيز وهلبت بغفلة ويطب
يومية ليچ اتعنة يا جدتي ظل النة
===================
أسالكم الدعاء رائد الاسدي

قصيدة بحق العليلة... وداع العليلة مع اختها رقية


ياليل طول بالوداع ابهالمســــــــية
ياليل عنـــــي تروح ما تصبح رقية
مصيبتنا مصيبة العليلة و الغريبة
---------------------------------------------------
ياليل احلفك تـنتظر طول وصبحك لايطر ما تسمع الـويد
ما يطبكَ لعيني جفن اسمع رقية من تـــون حسراتي اتزيد
تحظني حظنة فاكَدة وانه عليلة امـددة وتسافر اتريـد
عذبني يالــيل الدمع ارحم دليلي المنفــجع مايقبل ايهـيــد
حسرات اكظي اللــيل ما يكطع ونيني
حسراﺕ خاف تروح عني وما تجيني
ايا كَلبي ونحيبة العليلة و الغريبة
------------------------------------------------------
طول يالـــيل النايــــــــبة كَلبي وكَلبها صايبة اختي العلــــيلة
مدري شجاني ابهالمــسه عيني ابد ما ناعسه طولي يلــــيلة
باچر نويت اعلى الســفر ثوبي اخليـــــلچ اثر لو اخلي شيلة
يا فاطــــــــمة راح ابتعد عنچ اروح وما ارد بسفرة طـويلة
ارجوچ كافي النوح بطلي لا تونـــين
ارجوچ عدنة وداع خلي الونة بعدين
قصتنا عجيبة العليلة والغريبة
------------------------------------------------
محد يكَلي اتحــظري رحموها كسرت خاطري يهلي يطيــبـين
يرقية كَلي لـوالــــدي ليش انه اظل لوحــــــدي وانتي ترحلـين
كَليله لو شفــــتيه اجه ماظنه يرفظــــــلچ رجه بيه ترحــــمين
ما راح اكلفة بسفرتي ولا تعب ابـــوي بعلتـي يختي تشوفـين
وياچ عمري ايام ينعد مو بالسنــــــــين
وياچ بس لحظات عن عيني تغيبين
الدمعة سچيبة العليلة والغريبة
------------------------------------------------
بطلي العتب يافاطـمة سفرتنة صعبة ومؤلمة كل خوفي عليچ
ظلي يخيتي بمــنزلچ وانه اذكرهـم هــــــلچ اواحد يــرد ليچ
عمچ اودي لـو علـي كَلچ ابــوي اتحملــــي يفاطمة أيـجــيچ
تدرين ابونا لو وعـد لازم يوديــلچ احــــــد وهناك اتانــــيچ
اهناك احظرلچ مچان وصبري چم يوم
اهناك شملي وياچ يلتم ظــــمي الهدوم
المدة قريبة العليلة والغريبة
------------------------------------------------
عني ركبكم لو رحل معناها وافاني الاجل ما اتــــاني جـــيتة
انتم ظعنـــكم يـــبتعد ما اصبر وعمي يرد يــــــلكَاني مـــيتة
عله اوحيدة ابمنزلي لمن تودولي علــــي مايلكَة اخــــــــيتة
يرقية اموت لوحدي ماظن يردلي والدي واغفة اعلى اديتة
هيهات اصبر وانتظر لمن تعــــودون
هيهات تبقى الروح لو عنــي ترحلون
كلمن يانصيبة العليلة والغريبة
------------------------------------------------
صعبة وشديدة علـتچ ياخيتي ارحــــمي حالتچ خافن تموتــــــين
امر الله لازم نقبــــلة باچر تســـــير القافـلة وانتي تظلـين
ذكريني وانه اذكرچ ما انسة كـسرت خاطرچ كل ذاك الونــين
ابريها ذمة خيتـچ وانتـي برية ذمتـــچ كل احنة ماشين
لبعيد راح انروح يخــتي لرض العراكَ
لبعيد ممـشانه ويطــــول وياچ الــفراكَ
هالحالة رهيبة العليلة والغريبة
=========================

أسالكم الدعاء رائد الاسدي

هذا رابط قناتي مال النعي الي يحب يشرفي اهلا وسهلا

https://t.me/joinchat/AAAAAE1zU6QOsmaiW6ca1w