Heval Sofî bû fermandarek ku bi her awayî di têkoşîna me de şopa xwe hiştiye. Hem di xebatên avakirina civakî de hem jî di xebatên leşkerî de wekî fermandarekî pêşeng û mînak di mêjî û dilan de cih girt. Gotin û kirinên wî yek bûn, xwedî meşeke şoreşgerî ya bi îstîqrar bû. Kesayetiyeke wî ya civakî ya di pêş de bû. Di coş û heyecana jiyanê de qet tawîz neda. Pêşketina wî ya ramanî jî qet nesekinî. Her tim dixwend û xwe perwerde dikir. Hem xwe perwerde kir hem jî hevalên xwe. Ji bo her hevalekî ku pê re xebat meşandibû, bûbû mamoste. Kesayetiyekî entelektuel bû. Bi kesên li kêleka xwe re tim nîqaş dikir, her tim tiştekî dixwend. Li ser her mijareke ku meraqa wî hebû, lêkolîn dikir. Bi van taybetmendiyên ku bûbû şêwazeke jiyanê, sosyalîstekî rastî bû. Ji aliyekî ve bi girêdaneke mezin bi nirxên ku hatibûn afirandin ve girêdayî bû, ji aliyê din ve tim li pey tiştên nû bû. Qet nediwestiya. Hem bi keda xwe ya ramanî hem jî ya fizîkî mînakek bû. Qet neketibû qalibekê. Tim di nav faaliyetekê de bû. Her kêliya xwe ji bo têkoşînê jiya. Bi hevalên ku pê re xebitîbûn re wekî tîmeke kolektîf xebat dimeşand. Sosyalîstekî ku şêwaza rêveberiya kolektîf di pratîkê de bi cih anîbû bû. Qet di xwe de israr nedikir û nirxek mezin dida nêrînên her hevalekî. Ji bo heval Sofî manewiyat esas bû. Nirxeke mezin dida wêjeyê, hunerê û afirandinên têkoşînê. Propagandîstekî rastîn bû. Xîtaba wî bi hêz bû û dizanibû divê çi bi kî re çawa biaxive. Wî tevlîkirina nav têkoşînê a her kesê ku nas kiribû, wekî felsefeya jiyanê qebûl kiribû. Şopên ku naypn jibîrkirin di bîra her kesê ku wî dîtibû û nas kiribû de dihişt. Di mêjî û dilê mirovan de cih digirt. Bi xwezaya xwe ya nerm, durust, samîmî û taybetmendiyên exlaqî yên şoreşgerî, di her cihê ku lê bû de bû fermandarekî mînak.
Hevalê me, fermandarê mezin Nûreddîn Sofî, ji bo me mîrateyek û xetek şoreşgerî ya mezin hişt. Di têkoşîna ku li çar parçeyên Kurdistanê li dijî polîtîkayên qirkirin û tunekirinê yên li ser gelê me tê meşandin de, navê xwe di dîrokê de nivîsî. Ji bo me fermandarek, hevalek û şoreşgerekî ku qet nayê ji bîr kirin bû.
Em di şexsê heval Nûreddîn Sofî de hemû şervanên azadiyê yên ku şoreşa Rojava ya ku bingeha sîstema Bakur-Rojhilatê Sûriyê ye heta îro anîn û di têkoşîna azadiyê de şehîd bûne bi bîr tînin. Em di serî de ji malbata heval Nûreddîn Sofî û malbata gêrîla Baxtiyar Gabar ê ku bi wî re şehîd bû, ji hemû gelê me re sersaxiyê dixwazin. Em soz didin ku em ê mîrateya şoreşgerî ya ku şehîdan ji me re hiştine heta dawiyê biparêzin û têkoşîna azadiyê bigihînin serkeftinê.
Fermandariya Giştî a Yekîneyên Parastina Gel
12.08.2025

Em Fermandar û Pêşengê Mezin ê Şoreşa Rojava, Rêheval Nûreddîn Sofî Bi Rêzdarî Bi Bîr Tînin

Daxuyaniya Fermandariya Giştî a YPGê

KU: https://ypgrojava.org/daxuyani/em-fermandar-u-pesenge-mezin-e-soresa-rojava-reheval-nureddin-sofi-bi-rezdari-bi-bir-tinin1754904817

EN: https://ypgrojava.org/press-release/we-commemorate-comrade-nureddin-sofi-commander-and-pioneer-of-the-rojava-revolution1754904997

AR: https://ypgrojava.org/daxuyani-ar/1754904905

Rojava FM