لو تجين،
چا لكيتيني ملح بي حوبة أمي
وچا لكيتيني خضار..

شويه تاني،
مرورة العاشگ نهار
بارده عيوني عليج وگلبي حار..

منين اجيب الحيل والحگ،
وانتي تمشين بچدم مطلوب ثار
حتى ليشوف الموادع
گون من يوصل محطه
يغمض عيونه القطار.

#علي_رشم

اهز راسي من اذكرك واني مو درويش!

صلاة الفرگه تالي الليل صليت
وگلبي الجان كافر بالعشك تاب
سهم يمك ردتني وبيه جريت
انه الحسبالي رايد ضلتي وحاب
وبس يمك صرت للموت رديت
وطحت طيحة الجندي بين الارهاب
"يشعرة رمشي ليش بعيني طبيت"
يمنها وصعبه منها يصير الصواب
وانصحك لاتجي..
وماتلكه لو جيت..
بس وجهي الثكيل وسدت الباب.

#شهد_الخزاعي

صرت للماله أي موضوع عنوان
الجان يحبني لايمكن ولا جان
اليحضن روحه يشبه ورد ذبلان
ياروحي عليج هواي زعلان
رماد بنار صرتيله وتغنين
(تغطيت وبعدني الليله بردان)
شما يلتم شملنه الكاني خسران
الحطب يلتم حرك مو لمة اخوان
بعد گلبي اشتعل بلكت يشوفوك
ينشاف الهوى من يصير دخان..
#المطوري

قُل لي لماذا إليكَ الآن أندفعُ
ولا أملُ خياليْ فيكَ أو أدعُ
ولا أغيبُ بأرضٍ عنكَ ضيقةٍ
إلا أراها مع التذكارِ تتسعُ
وكيفَ فرقتَ عنيْ الناسَ كُلهمُ
حتىٰ رأيتُ شتاتي فيكَ يجتمعُ
أدري الجوابُ سيأتي عندَ أسئلتي
سهلاً ولكنْ عن الادراكِ يمتنعُ..

#ابراهيم_حمدان

تنكر يافضل حتى الدروب شهود
وبعد هاي الادله شلون تنكرهن
بصمات الكحل..
والرمش
والنظرات
على جروحي لكوها وخنجرك يمهن..

#سمير_صبيح

احلم تمرني حلم،
بس كون مااصحى..
والليل انحته صنم واركعله كل العمر..
بس لايطل صبحه..

يالمنخلق من لغز،
وبس اخرس اليعرفك وجفوفه متكطعه..
"ياهو الفهم شرحه..

من الامل صفحه بقت،
وانكلبت الصفحه..
ومن صبري باقي صَرح..
بس الصرح من رمل..
والروج اجا جن نسر وانقض على صرحه..

جفي اللواه الزمن،
شجره وجذعها انكسر..
ياثمر التطرحه..

من كبل لا احشمك،
مرخوص لوما تجي..
من عيونك اقرا الحجي..
ما حاجه الي توضحه..

يالساكن بنص قصر،
حُبك ربه ويه الفقر..
وتعتني الك شوغتي..
واربط ببابك علك..
من هدمتي الملحه..

گلبي على بابك رهم،
ممنون الك فهمه..
وللناس كله لسن..
ماتتعب تنصحه..
كله الوكت مو الك..
والشايلك بالصدر لك بطل تجرحه..
ولو عاندك مارجع..
غنيله طور الحزن..
يتلاشه مثل الحلم بس يسمع البحه.



#ميثم_فالح

على غفله مشيتوا عاد ودعونه
تره اليكتل كتل هم عطوه ينطونه
درتوا وجوهكم ديرة الحظ لو دار
ومثل ماتعبر الفرصه عبرتونه
وعيشتونه وكفة سآئل على الباب
(مايدري بـ هلا بـ طرده يلاكونه)
اكو حجايه دوه وحجايه مثل الموت
الاعمى تكتله من تحلفله بعيونه..
#علي_الدريعي

احس گلبي اليحبك طير،
طاح بشبچة الغربه..

بعيد انت وبعيد اني،
وكل واحد نصب تمثال..
للثاني بوسط گلبه..


#الكاطع

ثكيله حجايتج والنهايات اخلاق،
عرفتيمن قبل احسن من اخلاقي..
مو بيج بجروحج مانطيت بيوم..
يعيبون على جرحج كلت لا راقي..

دسألي يا مكان البيه مامطعون،
منج..حتى اكلج والله ماباقي..

تتهميني احجي عنج يالضميرج مات،
يا ورده انتي كبلج تهمت الساقي..
كلامج شكك بصدري الحجي المضموم..
ودمع شكك خدودي..
وشكك اوراقي..
لتتشاقين كتلج بي جرح منصوب..
وتزعلين واكلج عذراً تشاقي..
وترجعين واعرفج راجعه تطعنين..
واكلج مو مهم..لطعنتي اشتاقي..
حيلج ويه جرحي من اوكع تشدين..
ويسألوني واكلهم شدت نطاقي..

واكول اليحب يصبر،
والجروح تهون..
ولو مو بالسهوله تنسي الكلمه..
ونرد نحلم نجبر خاطري المكسور..
وهَم الفركه بلكت نكدر نلمه..
وترجعين على جرحي الوارم تسحكين..
وتسبحين بفرح من يسبح بدمه..

هسه انتهى كلشي،
ومات ورد الشوگ..
ومايسوه بعد خاطر نجي نشمه..
هاي المره كلش ناوي عـ النسيان..
ومسامح وراضي وباري كل ذمه..
بس بيمن احلفج بعد لترجعين..
گلبي لسجن حُبج بعد مااسلمه..

روحي لغير گلبي،
گلبي شلج بي..
گلبي يحب صدك شلج بهالنعمه..
روحي وبيد الله مسلمه..لتخافين..
مو گلبج وحقج گلبي لمسلمه..
لان شوفني ذله وانه الماطخ راس..
ومشاني درب ماجنت متعلمه..

عموماً هايهيه..الحمد عالمكتوب،
خلينه نتفارك والحجي نضمه..
شسألوج..شحجيتي..مو مهم تهون..
سألوني وكلت..
ما صارت القسمه.



#ميثم_فالح

تلهث ايامي وعمر تركض وراك..
والدقايق غربه واللحظه قطار،
دير وجهك مايهم بجروحي خير
"واضحه حجاياتي وحروفي نهار"..

(وياي طبعك يشبه اوضاع العراق
خير للغربه وعلى اهله يصير نار)..

رَكضت شهكاتي ودموعي وراك،
شلون ركضت عوزنه بوكت الحصار..

فحطت خلكي وبعد زعلك طويل،
ودرب الملاكه عليه شبعده صار..

"روحي مابيها عشگ خَلص عليك"
وبسما جروحي حنينك كله طار..

فرفحت روحي ونكتت جفوفي حيل،
من سمعت بواهسك يم غيري صار..

#علي_رشم

ماشفتك اليوم مستعجل تنام،
انه كبلك نمت نتشاوف طيوف..

ما نوه گلبك علي،
ولو مره گلبك نوه..
بس چي لأنك تمر..
عوّد انه جسمي صفى وعزفت علي شفتك..
وبأذني صوتك غفى..
واتقدم الـ ليوره واوصل لحد السكر..
واتطوطح بشوفتك..
حرموك مني شعجب..
شنهي انت قابل خمر..

تهديد دزينه الك،
موتنه كافي الصبر..
نص ساعه اذا ماتجي..
ماعدنه شي ننتظر ..

عدنه احنه غيرك فرح؟
بسمه على شفت طفل..
ياكعده واخر عشگ..
يانوم وكت الارق..
بوسه توزع جنت لأي طفل واكف عدل..
واني اصفط جنت وبحجة اركد ولك صرت انه ثالث طفل..
ضوجني واحد وره..
يدفع وباوعت..ثاري انت واكف سره..ماشفت بوسه قبل..

سطرتني وكـ مشيتك،
قطعه على ظهرك خطر!..
متشوف كلما تجي نبتعد مية متر..

وايدي على خدي ستر،
بلوه انت حسنك علي..
كلما تجيني انسطر..
ماشفت روحك قبل!
يله انت لاتنتظر وياك اخذلك صور..

النحل نكط عسل،
نحله على شفتك شفت..
شتنكط انت نحل..

كلش يتيم اعتذر،
ماشفت مثلك قبل..
شايل فريسه ونسر..
شايل ترافة طفل..
العدل لويسمعك يتخربط وينكتل..
على المات جرب تمر..
يموت كلش بعد..
ما اظن يرجع عدل..

چي طولك الساريه،
العلم رمشك اظن..
لان دوم اشوفه يرف..
بحجايه دمك طلع..
وتخيل شكد ترف..
مرجوحه شعرك صفى..
واحنه نروح ونجي..ويلعب بكيفه الزلف..

شكتبلك انه غزل،
يالخلصيت الورق..
الناي لو يسمعك اني اعتقد ينتحر..
ويموت كد ما سمع..
يا اترف من الهوى..لوحه انرسمت بضوه..
لازم نصفك اله فنان ربك طلع..
دين بوسط شفتك..
وحط بيك صوت الصبح..
وتغزر انت اظن رش بيك ربك ملح..

انذبح من غمزتك،
ضيم اني وانت الفرح..
جا يمتى تغمز ولك متكلي يمتى انذبح..

بالنوم تانيت امس،
دورت عيني غطى وغطيت عيني بجفن..
بالحلم صفنه اجت..تانيت سهواً يهل..
ظل طيفك ومااجه..
مر بيه حتى انتعش..
چي كلشي يوكف الك..
لو سلمت عـ الجفن..
يرفعلك ايده رمش..

(مُر بيه فاهي العُمر،
واتطعم بشوفتك..
بيك انت ملح العشگ..
السواك عنده خلك..
چي ضلك انت الشمس..
تمشي انه اموتن برد..
تتقرب اني احترك)..

"يالوكفيت الهوى،
متشوف كلما تجي..
تلكاني بس مختنك..
تروح رايد صدك؟
عاد احنه خل نلتقي..
وبعدين خل نفترك".



#يوسف_الدراجي