حسين حيدر اللامي

بساع اتلگوني ..جبت ابني جبت ابني
هاشم عينوني..جبت ابني جبت ابني
مات..ودمه امچلب بيديه
مات..لميته اشويه اشويه
//////////////////////////////////////
السابع خيمه طب الشيب..والانفاس مأخوذه
عرفت الدنيه موش ابخير..لمّن طاحت الخوذه

ياهوّه اليگابلني جزّاع
من صدر الاكبر طالعه الگاع
كون العوافي اهنانه تنباع
چا چمَّلت للاكبر اضلاع

دم راس اوليدي..طيحني طيحني
من رجفة ايدي..طيحني طيحني
مات..راح ايدوّرله امّيّه
مات..لميته اشويه اشويه
/////////////////////////////////////
تدرون اشحچيت اوياه؟.. لمّن طاح واتمدد
يأبيض شي يملكه حسين..كون البس عليك اسود

ايصيحون ضربو عله الخدين
هذا المكان ايبوسه الحسين
بيناتنه العباس مو زين
چا غير الاكبر صار نصين

كامل وديته..واتطشر واتطشر
بيديّ لميته..واتطشر واتطشر
مات..نضراته الصوب ابنيه
مات..لميته اشويه اشويه
/////////////////////////////////////
بعدنه نسولف ولن مات..وي ما ثگلت انفاسي
شغلة نص نهار وراح..بالطف ينگطع راسي

تدرون شنهو ايطلّع الروح؟
من تدري راح اتموت مذبوح
ومنانه الاكبر زيّد النوح
اتلگوني اجيت وصوتي مبحوح

اصعب شي شفته..دم گلبه دم گلبه
واصل يم شفته..دم گلبه دم گلبه
مات..بس نفسه ضلت بيه
مات..لميته اشويه اشويه
///////////////////////////////////////////
مالحگت اخلصه ابساع،.من يمهم خذا مهره
جسم اوليدي صار اگراب..كل شي خلو بصدره

بس واحد اكبر عدنه چا ليش
إبدرع صدره ايهوّس الجيش
لا طيّب الله الماي والعَيش
بضلوعه موش اصوابه بالريش

أنه ميت لوما..چف زينب چف زينب
من جبته اتلگا..چف زينب چف زينب
مات..شگد اثّر بالعلويه
مات..لميته اشويه اشويه
////////////////////////////////
العساكر تضحك وبحچون..بين المات وال يمكن
من گد ما وحيد حسين..حچي صدره بقه ايبيّن

مو مالت امناغاة وادموع
لا كون اشمّر يمه الاضلوع
اهنانه بس الموت موضوع
والراس وي الماي مگطوع

هذا الچنه الضي..ماينلم ما ينلم
متطشر چن مي..ماينلم ما ينلم
مات..طلعت روحه وهاهيه
مات..لميته اشويه اشويه
////////////////////////////////
حسين حيدر اللامي

❤5

960 viewsحسين حيدر, 16:14