نزله:

يالرايد نجـــاتــك..اسمع هالوصيــه
روح إبچف الادموع..دگ باب الزچيه
_______________________
إدخل إعله المجلس—وإبدمعتك إجلس
إتخيل اهل البيت يمك واغمض العين

ومن تطيح العبره—تلگه چف الزهره
يحسب إدموع البچت لمصاب الحسين

إيصيح صوت ام الحسن لاهل الحنين
أُدخُـــلـــوها بِـــسَـــلامٍ آمــنــيــــن


تلگــه هالـــعباره..بابـــواب العزيـه
روح إبچف الادموع..دگ باب الزچيه
___________________
هيه حيل إتحبك—ومثل إبنهه إتحسبك
من يمر اعليك إسمهه دنگ الراس

بيهه يكثر زادك—منهه أخذ امــرادك
گلهه وفقيني إبخدمتي إبروح عباس

بالشدد هيه التمد چفهه الرحيم
إسأل إمجرب ولا تـــسأل حكيم


لو رايد تغـــمرك..بالنضـــره الخفيه
روح إبچف الادموع..دگ باب الزچيه
___________________
هايه ام الفقره—النه نزلـــت دُرّه
تترس إچفوفي لَوَّن مَديت إديه

عرّفتنه إعليهه— ومحتوه ماظيهه
حيل مشكوره الليالي الفاطميه

ابچي واطلب حاجتك وي الدعــاء
گله الٰهي إبداعت اصحاب الكساء


كلهه ماتــفيدك..من هـــاي البــريه
روح إبچف الادموع..دگ باب الزچيه
___________________
خل تصير النيه..دمعه وحســـينيه
هايه ام الهادي الله اموصي بيهه

تختفي سُكّانهه.. وتنمحي اوطـــانهه
ابكيفهه ولو حَرَّكت إصبع إيديهه


إبأذن الله للزچيه كلــــــشي دون
ابكلمه وحده اتگولهه كن فيكون

تكـرم للإجـــاهه..ام روح الأبــــيـــه
روح إبچف الادموع..دگ باب الزچيه
___________________
فاطمه الإنسيه.. السيده العلويه
هنه خمس احروف بيهه تلهج الروح

بالخطر تحمينه..چفهه دوم اعلينه
من نزف ذاكه ضلعهه اتشافي الاجروح

انعم الله اعليهه هاي ام الوجود
الارتباط ابخالد ايســـبب خـلود

يبقه عالي اســـمك..منـــا للـــمنيه
روح إبچف الادموع..دگ باب الزچيه
___________________
حسين حيدر اللامي

القصيدة:كل لحضه ما ناسيچ

أداء:الرادود ضياء الطائي

كلمات: حسين حيدر اللامي



https://youtu.be/7keAc6wo4pU?si=lQXj-xVd3MMsFG87

القصيدة:عيون الزهره

أداء:الرادود سيف المطيري

كلمات: حسين حيدر اللامي

المجلس الاسبوعي لمدرسة الرادو الحسيني الليالي الفاطمية الرواية الاولى


https://youtu.be/e0E_IEfEqP0?si=THqEMRhYNoY8-TMb

بابُ الأَسى وَ الأوْجاعِ
مِســمارُهُ في أَضلاعي

تَمَهَّلي تَمَهَّلي..يا فاطِمه هذا علي
////////////////////////////////////////////////
چانــت اتغطيــــچ إديه وهسه غطــاچ التـراب
حيدر اخلافچ يتيم إظلوعه هم عاصرهه بـــاب
الدنيه بين اعيوني صارت تشبه الوان الســراب
امقرحات إجفون عيــــني وطايح ابديرة عذاب

ذي زَينَبٌ زادَت هَـمّي
قالَت فَهَل رَحَلَت أُمي

هذا ندائي يَعتَلي ..يا فاطِمه هذا علي
////////////////////////////////////////////////
من بعد عشره ومشاعر فرگتچ صارت صدگ
هسه اصبح چفي بارد وانتي چـــفچ محترگ
أَمَّنــــت يـم باب گبرچ ضلــٰع لمّن نفتــرگ
والگبر مو مثـــل بابچ عالـــصدر ماينطبــگ

يا زَهرَتي وَسْطَ الدارِ
مَجروحَةً بِالمِسمارِ

بِكِ هُمومي تَنجَلي .يا فاطِمه هذا علي
////////////////////////////////////////////////
فاطمه ام روح العزيزه إشلون ضمّاچ اللحد
كل خظار اسنيني صحره وبالگبر دافـن ورد
مدّي إيدچ يالحنينه إچفوفي جاساهه البرد
عالگبر اوگف واسلّم والصده وحـــشه يرد

سارَ اللظى في الأَحشاءِ
أَحتاجُكِ يا زَهــــــرائي

وَالدَّمعُ يَشكو ما يَلي .يا فاطِمه هذا علي
////////////////////////////////////////////////
التارس الدنيه إبوجوده من عگب عينچ وحيد
حرب يــــفراگ الزچيه وحيدر الـطايح شهيد
حلم نتلاگه سويه وهالحـــلم اصبـــح بـعيد
اتكسرن بيبان گلبي واني الأمـليّنِ الـــــحَديد

أغدو كَسيراً بِالحَسره
ظاعَت مِنَّ الكَفِّ دُرّه

قَلبي الحَزينُ يَشكو لي .يا فاطِمه هذا علي
////////////////////////////////////////////////
حضّرت تابوت گلــــبي ودمعـــي يحفر بالگبر
جيتچ وقرآني بيـدي آنه وادمــــوعي الحـــمر
إشتاگت إعيوني الوگفتچ گومي خنصلي الفجر
جوهره ورحتي إمن إديه وراحت أحلام العمـــر

شَهيدَةُ البابِ الكَوثَر
لِفَقــدِكِ يَبكي حَيدَر

نادَيتُكِ لا تَرحَلي .يا فاطِمه هذا علي
////////////////////////////////////////////////
حسين حيدر اللامي

القصيدة: توجع هالخساره

أداء: الرادود حسين الكعبي

كلمات: حسين حيدر اللامي

المجلس الاسبوعي لمدرسة الرادود الحسيني
الليالي الفاطمية الرواية الاولى


https://youtu.be/kzjyxJ0W6vo?si=_ixt46HczkeJ_Uwn

القصيدة: آه إعليچ يافاطمة

أداء:الرادو هشام الغراوي

كلمات: حسين حيدر اللامي



https://youtu.be/x7vmI9q1r-o?si=wX84gjQYFOjfFHEN

غُربه ورايد موت..وانشال ابتابوت
هضم هضم هضم
لا طيَّب هالعيش..تتعوضين إبيش
هضم هضم هضم
/////////////////////////////
هاجر ناسي..وشيب ابراسي.. عفتي بگلبي كسره
امراية عمري..ماچنت ادري..ادفن بيدي عشره

مقلوعه روحه القالع الباب
معقوله هاي احرورة اصواب
ما دره اشماخذ مني الاتراب
يفراگچ الماحاطله احساب

آنه امتعب الخيل..رايد منچ حيل
هضم هضم هضم
تعبي وراسي الشاب..ايروح ابدفعة باب
هضم هضم هضم
/////////////////////////////
وي قرآني..لبيت احزاني..بيت احزاني يمچ
ابثوبي الاسود..ودمعي اعله الخد..ارتاح امن اكلمچ

يُستَحَب كل ما طب للگبور
انحني اشلون الضلعه مكسور
من غربة الايام مغدور
عصرة المحسن گلبي معصور

قبّاض الارواح..يم اترابچ طاح
هضم هضم هضم
ابسط ما ينگال..صاير ضهري اهلال
هضم هضم هضم

/////////////////////////////
غربة دربي..ولازم گلبي..دافن بيدي روحي
ميت دونچ..امغمضه اعيونچ..وامعاشر جروحي

ودعتچ و ودعت الاحلام
واعليه جارت هضم الايام
دمعاتي صارن مثل الايتام
والجفن مامتعود اينام

يانور المشكاة.. حيدر بعدچ مات
هضم هضم هضم
ذكره النه اتعوفين..رحه وسبحة طين
هضم هضم هضم

/////////////////////////////
صحره ارسومي..وجيش اهمومي..كل مغرب يجيني
عايش شلي..الموت احسلي..وايسكت ونيني

اليدفن خليله ايعيش محتار
چف ايده بارد والگلب حار
ابكل زاوية بالبيت تذكار
وادموع عينه ايصيرن انهار


البيده ايحرك الريح..هسه ابساع ايطيح
هضم هضم هضم
وي كل لحظه اشتاگ..وطبع الدنيه افراگ
هضم هضم هضم

/////////////////////////////
زهو ايامي..وروح احلامي..راحت من اديه
خضره اجروحي..ودافن روحي..ومدري اشباقي بيه

لو ساحب السيف امن الاگراب
چا مكه ضلت تحسب ارگاب
لا طاب عمري وكلشي لاطاب
عشرة عمر بس جوه الاتراب

والسر المَكنون..عايش بس مدفون
هضم هضم هضم
يا ضد النسيان..متروحين آذان
هضم هضم هضم

/////////////////////////////
حسين حيدر اللامي

القصيدة:بيت ينزف چنه عين

أداء:الرادود أمير التميمي

كلمات: حسين حيدر اللامي

المجلس الشهري لهيئة العباس ع مدرسة الرادود الحسيني



https://youtu.be/e0Sw5cWXW3g?si=kbtJmKcFJqz9SwcF

القصيدة:ذات يومٍ

اداء:الرادود احمد البغدادي

كلمات :حسين حيدر اللامي


https://youtu.be/7mT1rLl-4GY?si=ChD34MWXOGFoJ3Na