يامسلم بن عقيل
رحت إبجنحانك لو مُهره
يابو الـمسؤوليه الخطره

تكليفك گال..سيف ومرسال

////////////////////////////////////////
إذا چان الحچي إمن إثگال يا مُرسَل
اكيد ايحـــمله لازم طارش إمــعدّل
مــنو امن حسين ماخذ بالثقه الاول
حـَط بيـدك رســاله وگلــــك إتوكّل

گلك بيــدك يا إبن الـــعم
هيچ إيحن الدم إعله الدم

خل تقره اجيال ..سيف ومرسال
////////////////////////////////////////
يبن حمزه وعقيل البالحرب تشتد
مو انته اليــفك الســالفه وتنسـد
مادام الرساله اعله الزند تنــــشد
عله احرورة گلب راعيهه ماتبــــرد

حچي المعصوم إبنص إيدك
شـــــغلة توفيق الله يريدك

التوفيق أشكال..سيف ومرسال

////////////////////////////////////////
إبذيچ الساعه من رحت أركبت مهرك
دعه الـــعباس حته ايسهّل الله امرك
روح وخـــلي بالــك بـــارد وفـــكـرك
وراك حسين لتظن ينكســـر ضـــهرك

ياثقتي حــسين يـــناديلك
وانخه العباس يشد حيلك

إيسندوك إثگال.. سيف ومرسال

////////////////////////////////////////
مُهرك خلّص الصــــحراء مو ركضـــــه
المسافه إمن الحسين الكوفتك ومضه
كلهـه إتگــول عنّك يا عُــــظُم حضــه
إبوكت كلهه حجر مـــــسلم إجه فضه

موضــوعك ما بي أي رِكّه
طارش بس بي ريحة مكّه

وقفة إجلال ..سيف ومرسال
////////////////////////////////////////
ميزان الــحچي من مـال عدّلتـــه
إثنين الـــهه كفو لو انتـــه لو انته
يا اول ضوه إمن حســين شاهدته
كتبت اول شطر من عشت سالفته

يالخطـــواتك تتــناثر حـــق
شنو هذا التــسليم المُطلق

مَضرَب أمثال ..سيف ومرسال
////////////////////////////////////////
حسين حيدر اللامي

حينَما سَقَطَ العَباسُ ع نادى ادركني يا أخي يا حُسيَن فَأتاهُ الحُسيَنُ ع قائِلاً:
عباس اجيتك واطمئن..لكن دخيلك لا توّن
هذا اني الحسين
اشصاير ابوجهك كله دم..متخوصر ابعينك سهم
وابلايه چفين
//////////////////////////////////////////////////
متعوب يالتسوه التعب..بحجاره مصيوب الذهب
ايطعنوك من هبَّ وَدَب.. وابالك اخيام

مثل النَفَس بعدك صرت.. لا رايح ولا ملتفت
همزين ياخويه صحت.. ياتعب الايام

اذا اطلع السهم
تموت امن الالم
ويم زينب ارد..لحيتي كلهه دم

يالصدرك اسهام انترس..صعبه تطيح امن الفرس
ماعندك اچفوف
امن استقبلت گاع ووجع..چم سهم من ضهرك طلع
وما تگدر اتشوف

//////////////////////////////////////////////////
ابعينك سهم بايگ عمر..بس لا اشلعه وينكسر
يتبسم اگبالي الشمر.. وسفه يمبخوت

وابجسمك اشسوو جُرُم.. الرمح واصل للعظم
ضهري انكسر من الهضم..بس فدوه لتموت

تره افـــراگك مثل
سبـيه اعله الهزل
تناديك الخيم..يواهس چم طفل

يا قل هوَ اللهُ أَحَد.. راسك امهشم بالعَمَد
مُثخَن بالاجراح
يالغارگ ابنزف الدمه..اشگد تحبك فاطمه
بعدك ممرتاح

//////////////////////////////////////////////////
ايصيحون قربت ساعِته..العباس طاحت خوذِته
لايسرته ولا يمنته.. تتبسم الناس

گطعوهن الچانن قبل..لاهل الخيم همزة وصل
صاير ضوه امغطي نبل.. تتوهج انفاس

اخيّـــك يالصعب
وحيد ابهل حرب
ويا آخر عِرِف.. قتيل اعله الترب


أمّا بعد يابالفضل..ابهاي الحرب ماريد اضِل
ماعندي حيله
يمطفي نيران المُهَج..دم راسك ابشيبي امتزج
ياهو اشتكيله

//////////////////////////////////////////////////
مو خوف من باب الحرص..جاي اشعر ابجسمك نقص
خليتني ابدمعي اغص..عباس مهضوم!

مادام ضل آخر وقت..شيصير لو يمك متت
مطبور بالحاجب شفت..بالعمد مهشوم

اگل لاهل الخيَم
تره طاح الــعلم
بعد ماكو امل.. لان راسه انهشم

راح ارجع وانقل خبر..عباس مات اعله النهر
بس ماشرب ماي
واخبرهم ورب الفلق..سهم ابوسط عينه اخترق
ضل ينزف اهواي

//////////////////////////////////////////////////
بعدك يبو فاضل تره..إضلوع اخوك امكسره
من مگفه ينحز منحره..عالوجه مگلوب

لمّن اطيح اعله الارض..ام الخدر تشبع ركض
والحافر ابصدري يرض.. وي جية الغروب

وراسي يرتفع
بعد ماينگطع
توصل للخيم.. صدى طگةالضلع

عالدنيه بعد ابني العفه..وبعدك نضر عيني انطفه
اقوى الخسارات
واهناكه ربات الخدر..ينضربن ابسوط الشمر
وابلايه خيمات

//////////////////////////////////////////////////
حسين حيدر اللامي

بالريه مشت ..هلخـدمه هــوه
هيه إلعلّتي.. صارتـــــــلي دوه
—————————————
هلخدمه تجري إبدمي وإبشرياني
من زغري أبوي إعله اللطم ربانـي
التيه وجودي تدري وين إمچانــي
إبمجلس ابو السجاد خل يلگانــي

لو ناعي ..لو لاطم..لو دمعه بالــعين
بلدنيه..ماعندي..بس مجلس حسين

گلبي ضامي بس..بلمجلس روه
هيه إلعلّتي.. صارتــــــــلي دوه
—————————————
لمن احس گلبي يدگ إهــــوايه
يعني المواكب ناصبين إقـــرايه
وافرح واحضر بيرغي والــــرايه
لمن يجينه موعد المــــشـــايه

دمعاتي ..الي تـــــنزل..أبچيهه بحسـاس
والحاجه .. إشما تصعب..يگظيهه عـباس


دنيانه ظـلام..والـــخدمه ظوه
هيه إلعلّتي.. صارتـــــــلي دوه
—————————————
خل أحچي البگلبي وأگول البيه
اني بشر عايش على اللطـــميه
شهر المحرم من يهل لـــيليــه
أتنقل حســــينيه لحـــسيــنيه

متـعلم..علــــدمعه..موبيدي والله
زنجيلي..إعله اچتافي.. بلعزه محلاه

من زغري أحس..راظعهن سوه
هيه إلعلّتي.. صارتـــــــلي دوه
—————————————
حسين أبونه واحنه صرنه إيتامـه
وهذا العـــزه ساتر عله اللطامـه
مو بس صدر نطبرله هم الهامـه
بيوم القيامه تشهــــدلنه القامـه

بلمحشر..نـتحـــظر..هم نرفع اعــلام
اسرع ..واحد يدخل..بس سره الخدام

الله إيوَفُّقه..للخـــدمه النــوه
هيه إلعلّتي.. صارتـــــــلي دوه
—————————————
اليدخل عزاء وبگلبه شايـــل جــمره
هذا اكيد الزهــــره ترفـــــع قـــدره
والتنزل إدموعه إبجزع وإبحــســــره
من الإمام المهدي ياخذ أجــــــــــره

دمعاتي ..وآهـــاتي..إبكـــل عزيه
بس كون..إتسجلني..أُمنه الزچــيه

عن لا ننحسد..نقره القُــل هُوه
هيه إلعلّتي.. صارتـــــــلي دوه
—————————————
🖊️:حسين حيدر اللامي

أوبريت :خِتامُ القِصَّةِ
كلمات
الشعر الفصيح:حسين حيدر اللامي
الشعر الشعبي:علي مولى الدراجي

أداء:مدرسة الرادود الحسيني
مرقد الإمامين الجوادين (ع)
بغداد


https://youtu.be/IlFsDaQJ6E0?si=qOXnPuZw0fR5xOVz

القصيده:يقرآن الفجر

أداء:الرادود الحسيني حيدر كريم اللامي

كلمات: حسين حيدر اللامي

المجلس الاسبوعي لمدرسة الرادود الحسيني





https://youtu.be/9d4Q-_iWIO4?si=u-2eUMrRqHYhKsOt

القصيده:جانه محرم

أداء:الرادود حيدر الخزعلي

كلمات: حسين حيدر اللامي



https://youtu.be/TgGggZ-qihE?si=aUNEZqfBzyTzSlGf

ضايع بس هُمَّه الكفلوني
———————————
ما اخسر بالدنـــيه واربح
لَمَّن حبيت الناس الصح
اهل البيت ابگلبي وافرح
تچايه وهمّه السندوني
———————————
هوه اليخدمهـــم عالفطـــره
بالـــتأكيد اتــــحبه الزهـــره
واني اطلب من عدهم نضـره
آني اعشگهم وايحبوني

———————————
منين ابدي وشحچيلك عنهم
إتخيل نــاس الله ايحـــبهــم
كل خيرات الدنيه ابچفهـــم
شگد اطلب بس ما فشلوني

———————————
نـــازح مــن ذنــبي وتعـــقيـده
رحلة شــوگ وحــيـل ابعيــده
وبــس حــسين المــدّالي إيده
حسين الما خيَّبهه إظنوني
———————————
ودّانــي لعــالـــم حنــيه
أقصــد يم باب إحسينيه
وأول مسـمّعت اللطميه
نور الخدمه شَع بعيوني
———————————
بســـم الله امن اركـبناهه
مجراهه حسين ومرساهه
فوگ الطوفان اشمحلاهه
حسين الرُّبان وصعدوني

———————————
تبحر بينه لارض الخدمه
ومايركب بيهه الا الزلمه
والمكتوب اوياهم اسمه
وشكراً لله من سجلوني
——————————
حسين حيدر اللامي

هكذا آمَنتُ بِالحُسَين
///////////////////////////////
قَتَلتَ الظلامَ فَصِرتَ الصَّباحْ
وَلكن حبيبي ارتَقَيتَ الرّماحْ
فَهِمتُ جِراحكْ بِبَعضِ الجِراحْ
وعَفَّرْتُ خَدِّي بحيثُ استراحَ
خَدٌّ تَفَرَّى ولم يَضْرَعِ
///////////////////////////////
على الرُمحِ تتلو بِاهلِ الرقيم
فدينُ محمد بلاكَ عقيم
وفدتُ عليكَ فانتَ الكريم
شَمَمْتُ ثَرَاكَ فَهَبَّ النَّسِيمُ
نَسِيمُ الكَرَامَةِ مِنْ بَلْقَعِ

///////////////////////////////
سَقيتَ الزَّمانَ بِكاسِ الحياة
وَقَيتَ الخيامَ بِكُلِ الجِهات
نَضَرتُ بِحُزنٍ لِنَهرِ الفُرات
وَخِلْتُ وقد طارتِ الذكرياتُ
بِروحي إلى عَالَمٍ أرْفَعِ

///////////////////////////////
أَنا لَم تُــشاهِد عُــيوني ذَبيح
يَطوفُ عَليهِ وَ يَبكي المسيح
نَضَرتُ بِقَلبي لِشَيءٍ صريح
كأنَّ يَدَاً مِنْ وَرَاءِ الضَّرِيحِ
حمراءَ " مَبْتُورَةَ الإصْبَعِ"
///////////////////////////////
حسين حيدر اللامي

القصيدة:علي يا مولاي

أداء:الرادود احمد الموالي

كلمات: حسين حيدر اللامي


https://youtu.be/fVluBSU4prg?si=HFM90isXhtYFAZfJ

القصيدة:رحت إبجنحانك

أداء:الرادود محمد السورميري

كلمات: حسين حيدر اللامي


https://youtu.be/TwBxRFoZztM?si=xJP-btk1_euz_raH

القصيدة:يالرايد نجاتك

أداء:الرادود محمد السورميري

كلمات: حسين حيدر اللامي


https://youtu.be/HvOIUDEi7q0?si=QHBqZolm2Nip0K2R

القصيدة:وجودي

أداء:الرادود سيف المطيري

كلمات: حسين حيدر اللامي


https://youtu.be/IAMm2hzdZWw?si=nKvbhbWkrctUwhN6

القصيدة:كلهه تريده

أداء:الرادود ايهاب الخزعلي

كلمات : حسين حيدر اللامي

المجلس الاسبوعي لمدرسة الرادود الحسيني





https://youtu.be/BKnu3V_aego?si=HYvF3UKL1fNcJkvX

للدفن:

وصل لاجل الدفن وادموعه بالعين
ولگاه اعله الوجه مگلوب الحسين
——————————————
يگــله يا ضـوه فانوس الاخــيـام
مثل ارموش عينك فوگك اسهام
من ذبحوك گطعو راس الاسـلام
المصابك مو گلب ينراد گلبيــن
—————————————
وگف لحظه وحچــه چلمه چـبــيره
سلام الله علــه شــيخ الـعــشـيــره
يبــويــه راح المــك بالـحــصـيــره
بقية جسمك الـــطاهر صفت ويـن

—————————————
صفن كلشي وحچت بالسكته الادموع
وحچي الگــلب ياعــالــم ممسمــوع
بـــقه بــيده يــلـم إبــاقي الاضــلـوع
ولگه چــبد الابو مگــســـوم نـصــين

—————————————
انكسر يـم الجســد ويعد بالاجراح
وذكر لـمَّن صـعد عالصـــدر ذباح
الحـوافـر ابـــد ما خَــلَّنه يــرتـاح
تناثر جسـمه من الدوس صوبــين

—————————————
من الصدمه صاح ابصوت مبحوح
اول مــره اشـوفك بويـه مـذبــوح
مــن النـوح رادت تطــلع الــروح
طير ويمشي مكســور الــجناحين

—————————————
حسين حيدر اللامي

ما بَينَ الغُبارِ وَ اقتِرابِ اللَّيـــل
شاهَدتُ أَبي تَعلوا عَليهِ الخَيل

جِسمٌ على الغبرا فاَرَقَ الروحا
آهٍ كَالأَضاحي مـــاتَ مَذبوحا
—————————————-
الـــقتل عاده النه نعـــرف والشـــهاده للأبـي
لكن اهـل البيــت احنه وما يلوگلـــنه السـبي
امدللات حسين ركضن نار مشتــــعله الـعبي
الچان ما ينشاف ضلهه شافهه اشچم اجـنبي


صِحتُ قُل أعوذُ وَبِرَبِ النّاسْ
مِن أَشرارِ قَومٍ قَتَـلوا العَباسْ

قَلبُ السِبطِ مِنهُ باتَ مَجروحا
آهٍ كَالأَضاحي مـــاتَ مَذبـوحا
—————————————-
التعب ماخذ كل مكانه ودم عله اوجوه الزغـار
ليل كل دنــيانه صارت كــسرو اضــلوع النهار
فجأة صارت دنيه صحره وعالنهر طاح الخـظار
الخــير نايم عله الغــبره واني ادري الرمل حــار

أَم حينَ هَوى في يَومِ عاشـــوراء
تَحتَ السِبطِ مَدَّت كَفَّها الزهراء؟

إبنُ العَرشِ هذا باتَ مَطــروحا
آهٍ كَالأَضاحي مــــاتَ مَذبـوحا
—————————————-
كلشي يركض يوم عاشر شاهدت عيني العجب
فوگ صدر حسين يسحگ كُلُّ مَن هَـبَّ وَ دَب
غَيّمَت غيمة بواچي ومطـــرت اعـــلينه تعب
مو بعثنه حسين رحمه ليش بالحومه انسـلب

زَينَب عَــمَّتي تَندُبُ وَسطَ البَر
شاهِد إبنَكَ المَذبوح يا حَيـدَر

ذا أَطـهَرُ دَمٍّ صــارَ مَـــسفـوحا
آهٍ كَالأَضاحي مــــاتَ مَذبـوحا
—————————————-
انذبحنه ابسيف فرگه امن المخيم للوريــد
اگبالي علوياتي كلـــــهن گيدوهن بالحديد
خاطبت عمتي الحنينه وما الي ناصر وحيد
شدّي راية ابو فاضل بلكي يرجع من جديد

آهٍ لَو يَرى هذا اباالفــــضَلِ
زَينَب تَلطِمُ الخَدَّ على التَّلِ

جِفنُ الال مِنهُ صارَ مقـــــروحا
آهٍ كَالأَضاحي مــــاتَ مَذبـوحا
—————————————-
آه يا شـيــخ العشـــيره تارك ابگلـــبي جــمر
اختلت احوال الطبيعه من گطع راسه الشمر
من سحگ هاي الحوافر ضهره طبگو بالصدر
ايعيــنه الله كل بنــاته اگــباله راحن لليــسر

في فَرضِ المَنايا وَ لظى العاشِــر
صَلّى فَوقَ صَدر ِالسِبطِ كَم حافِر

أَمّا جُرحُهُ بِالطَعنِ مَفــتوحـــا
آهٍ كَالأَضاحي مــــاتَ مَذبـوحا
—————————————-
حسين حيدر اللامي

حديث الاجساد
في مشهدٍ من خيال الشاعر، حين وصل الإمام السجاد (ع) للدفن، سمعت الأجساد الطاهرة وقع خُطاه بعد ثلاث ليالٍ من الوحشة، فدبّ فيها الأمل، ودار بينها حوار كالمشتاقات، تكلّمن كأنهن ينتظرن هذا المجيء منذ دهور:

من وين هذا النبضه محبوس
إتلگّنّه بلكت جايب الــــروس
متعودات تفتر يمـــنه الاسبـــاع
منو هذا لعيونه اتضــوي بالگــاع
///////////////////////////////////////////
إتلگـــنه گــومن يا جــثث..بالياعلي واســــم الله
خــل جثـــه ترسمله ســـهم..منا لَحَد عـــبدالله
غمضن شكو عدچن جرح..لوقـــام بــــينه وصلّه
يالسالمات إمن السحگ..وحسين ضل چم وصلّه

يدفنّـــه خـــلي أهـــنانه بعدين
بس عاده خيلم جسم الحسين
خلــي إبراحـته إيدور عـــله الضاع
منو هـــذا لعيـــونه اتضوي بالگاع
///////////////////////////////////////////
المشكله الروس ومشن.. چا صحنه بي وإنحذره
دم الضلـــع توّه يبــس..لنّـــوب يــــوگع صدره
اكثر بشر بالطف نــــزف..دفّــانه شنــهو إمأخره
يشبه السبحه التنگطع..كــض وذره تـــوگع وذره

طلّع سهــــم بحشاه مدفوع
معقوله هلگد ضايعه اضلوع
إيشم بيه ضل وإيشبگه كلســاع
منو هذا لعيونه اتضوي بالــگاع
///////////////////////////////////////////
مابيـــچن إتأشـــرن لعد..نـــزفن إلــــه ودلّنّه
وخــرن إذا منچـــن عبر..بعــدين خــل يدفنّه
خيشيل شيّال العلـم..چم عـــضم طالع مـنه
حلوه النعاوي اعله الجثث..امـشنّه خل نتدنه

عدنه اليطب گـاع النواويس
خل ينعه وين الونّه التجيس
يم كل جثه كون إنجيـــب جزّاع
منو هذا لعيونه اتضوي بالــگاع
///////////////////////////////////////////
مايبقـــه مطروح الحِمِــل..لا بُد أنِ إيشـــيلونــه
بس احنه من خلصو ذبح..جوه الشمس خلّــونه
تتذكرن حسين الضـــــهر..من نشف مي إعيونه
خيّطو خاصرته ابـــــرمح.. لمّن فزع لضعـــونه

تــطلع شمس وايرد الاغروب
ومحَّد يعدل حسين مگلـوب
على الباقين كون إيلحّگ إبـساع
منو هذا لعيونه اتضوي بالــگاع
///////////////////////////////////////////
شو كلّش اهتم بالــــدفن..مــــعقوله يهتم هلـگد
ياهي التعرفه إمن الجثث..خل تحچي ناقصنه الـرد
بي ريحة حسيـــن اشكثر..عــبدالله دمّه اعله الخد
بس لا ابن ذاك الـــــذي..سيــف اعله مگفاه انحد

إحتارينه كلـش ها يالاجساد
لتخافن الطب علي السجاد
چِنّه اهــــواي نسأل بينه أوجاع
منو هذا لعيونه اتضوي بالــگاع
///////////////////////////////////////////
حسين حيدر اللامي