ياصاحب الزمان
إنَّ القُلـــوبَ أوعيه..واشــلون أنه احتويك
هوه اني ما استاهلك..حته ابچي دم عليك

يالغيابك مثل..مخيم مشتعل
//////////////////////////////////////////////////////////
هَل مِن جزوعٍ سيدي..يحتاج الى جزوع
ابجسمي حوافر غيبتك..كسرت عشر ضلوع

لا آني ميثم لابو ذر لا سلمان
بس ابجي عالطبت ابنص الديوان
امحلفك ابذاك الدارت اعليه فرسان
كض گلبي بيدك وانته سويني انسان

في أيّ ارضٍ تستقر..دلينه انته وين
بس لا تدگ اعله الضلع..يم مذبح الحسين

دموعك من تهل ..مخيم مشتعل
///////////////////////////////////////////////////////
گلي اشلگه مَن ضيعك..واشضيع اللگاك
كل دنيتي يبن الحسن..عايفهـه أنه وراك

امشي وأدوّر واسأل إبّين الناس
ماشفتو واحد نسخه من العباس
گلوله عبدك عايش ابنص وهواس
واسهام چنهن من تطب صدره انفاس

اتشوفوني گلت انته ابشرط..تتصافه هالقلوب
ماصافيات وداعتك..بيهه اشكثر ذنوب

بلا وجهك اضِل..مخيم مشتعل
///////////////////////////////////////////////////////
لمّن اخلّص مجلسي..يم اهلي ارد وانام
بس انته اهلك سيدي..نامو بلا خيام

ساعة المذبح انته قابَ ابقوسين
شفت الشمر لمّن گطع راس حسين
فوگه الاسهام انرسمن ارموش ابعين
وطلعت الحره وشابچه اثنين ايدين

انته اقرب انسان ابوكت..من ذبحو الجمال
ماكو شبر سالم بقه..من كثرة النصال

صفه بعد القتل ..مخيم مشتعل

///////////////////////////////////////////////////////
من طاحو اهلك عالثره..صعدو عله الرماح
وصلت الخيل اعله الخيم..صار الضرب مُباح

شفت الحسين ابكربله اشلون ايلوع
من شاهد السوط اعله زينب مطبوع
حاول يگوم ويجمع الصدره اضلوع
بس السهم البگلبه كلش مدفوع

ركضن بناته اعله الجمر..من انچفه الدلال
بت حيدر ابنص الزلم..وامچتفه ابحبال

شكو صرخة طفل ..مخيم مشتعل

///////////////////////////////////////////////////////
ما گلك اني الحر ولا..عابس يبو الحنان
بس اني احبك من صدگ..يا صاحبَ الزمان

جيتك دخيل وانته ياراعي الدار
گالولي عنك ما امفشل خطار
ابداعت الضلت تشگف احجار احجار
بالجمعه جارك يا ابن حامي الجار

اما بعد يبن الحسن..حچي الگلب سكوت
مؤتزر اوياك الكفن..وابحضنك ارد اموت

شفت حلقة وصل..مخيم مشتعل

///////////////////////////////////////////////////////
حسين حيدر اللامي

علي علي مولا مولانه علي
__________________
يا محمد جمّع الناس__كلهم ابنص صحره
ذكّــــر إبآيـــات ربك — عسه اتفيد الذكره
صيح بس حيدر خليفه—صيح يابو الزهره
هوه ربك هيــــچ راده —سيد اعله الفقره

بس حيدر —خليفه
ختموت—السقيفه
والينكر—ولائه
الناس المو—نظيفه

علي علي مولا مولانه علي
__________________

هذا عيـــد الله الاكــبر—نحـــتــفل ليلـــيه
والله خصص بيهه ياناس—الطائفه الشيعيه
غصباً اعله الي ميقبل__عطله هــم رسميه
فرحه واعله الشيعه كلهه—فرحه إلــزاميــه

والخادم —غديري
إبيا حيدر —أميري
صرنه احنه عشيره
وحيدرنه چبيري

علي علي مولا مولانه علي
__________________
چف محمد ويه حيدر—ياحلاة الصـــــوره
هبت انســـام الولايه— وابـعلي شـع نـوره
اذنوب شيعة علي كلهه—إلخاطره مغفوره
والعمر وارواح كلـــهه—الـــخدمته منذوره

تاج اعله—البرايه
يا ناس—الــولايه
مادام آنه شيعي
چف حيدر ورايه

علي علي مولا مولانه علي
__________________
علــي ســيد الكون كله—علي شيــخ الـــديره
الفلـك لو راد ابثواني—ابــذو الــفقــار ايديره
آنه وي اهلي يــــعالم—عــــشنه كلنه ابخيره
حبه غصن احلامي شفته—وگلبي مثل الطيره

ياحيدر—ندائي
يجري وي—دمائي
گمره ونوره يضوي
صار ابنص سمائي

علي علي مولا مولانه علي
__________________
حسين حيدر اللامي

من العلي .. إتنصب علي .. وإنـــكتبت البيعه
كلشي نطق .. والله خلق ..لخاطر علي شـيعه
______________________________
عيد الله الاكبـــر ياخلگ فرحـــه غديريــه
غصباً عله الما يرضه صارت عطله رسميـه

صاح النبي وإبصوته كبّر
هذا إمـام الـــبحر والبر
سيد عله الاكوان حـيدر

أكملتُ الدين اليوم بس إبحيدر
……
صوت السمه..حامي الحمه.. سَيدِ الزَمن كله
والما قبـــل ..حيدر يــضل.. إبدينه الف خِله
______________________________
نلزم سره يوم القيامه كلــــنه بالمحشر
واليدخل الجنة عدن بس اليحب حـيدر

بهل بشـر رايد تكشف الزين
إمبين تره اليحب ابو حسين
أبيض وجه شكله ويگر عيـن

والما حب الكرار صوچ إبساسه
…….
فوگ العرش..إسمه نقش..حيدر علي والي
الليله فرح.. كلبي إنشرح.. يتنَصَب الغـالي

______________________________
بسمه الگلب نبضه يدگ لا ما يحب غيره
آنه الفقير الجاب عمره عايش ابخــــيره

شيخ العرب واوصافه مغوار
حامي الحميه ابحــربه كرار
كل عالِم إبتاريـــخه مـحتار

تشبه عدل الميزان ضربة سيفه
…….
إبحربه رعب.. غيره يصـــب..النــــافع الشافع
يمه الهِـــدِم..تـــنزع زِلم..تشوف البعض راكع

______________________________
ياناس قـــتال العرب فـرحه ولائيه
واترفرف الاعلام للطائفه الشيعـيه

هذا البطل حامي الحمـيه
روح النـــبي وزوج الزچـيه
صولات عـــنده خيـــبريه

هالكون ابذو الفقار كله ايديره
….
من الأزل .. حيدر بــــطل.. ســـيد عله الساده
يابو الحسن.. طول الزمن.. من نسله بس قاده

______________________________
الأنزع المنزوع من الشرك والاكمـــل
هذا المُبَطَّن بالشرع والدين والاجمل

وابرحمته الافلاك واتدور
حيدر علـــي نورٌ على نور
ابهاي الولايه علي مشكور

والما واله المغوار ناقص دينه
……..
يمشي سوه.. وي الهوه.. حب الوصي حيدر
طول العمر..هم نفتخر.. بالبرزخ ويحـــضر

______________________________
حسين حيدر اللامي

من لاگيته ابواهس خادم ..صاح شتطلب
گتله ازياره ودمعه وممكن..موكب انصب
گال اسمك منـــانه ورايــح..قربـان الحُب
///////////////////////////////////////////////////////
اذكـــر چانت اســـرع فتــره
طحت ابحبه امن اول نضره..مالك روحي
حسين الغيّر كل شَي بيه
ما نام الا اسمع لطــميه..سيد نوحي

تايه ابحالـــة عدم ماكو وصال
والوحيد حسين صاحالي تعال
گلي افتح ايدك وهــاك ارتوي
مو مَعين انطاني لا جُرعة دلال

مصدوم ابعطفه وايثاره..اشهل حنيه
مذبوح ومتروس اسهام..ويــهتم بيه
مشاني ابدرب العشاگ..وكــظ ايديه

///////////////////////////////////////////////////////
ملح الخدمه ولمّن ضگته
ضعن حسين ابسرعه الحگته.. لا يسبگني!
من ذنبي العالم تنبذني
جرّاني حسين وانقذني..هواي ايحبني

مثــل ليلــة عاشــر اوياه اگــعـــدت
ا تـخــذ ليلك جــمل بس مــارحت
من شفت صار الحچي امگابل بقيت
ابــرايــة الـــعباس رأســن چـلّــبت


گتله ابصبح العاشر جرني..اوياك اذبحني
ومن ماتوگع نبله ابصدري..حيل اعذرني
امكانيـتي ادموع وحبـــك..امــلك ذنــي
///////////////////////////////////////////////////////
طاوعت احساسي وگمت اشعر
يدفع بظلوعي وفز الحر..ولزينب ضج

گلت الگلبي افهم يالتنبض
بس حسين اعليك اليفرض..اعقل وانضج

حسيــن لو دوره دَهــر ما انكســر
ما أمل ارجـع اعـدّ امــن الصـــفر
ومن ازوره ارجع اسولف بالــطريـق
ابقه اگول اشلون گعده امن العمر

كلـما اگــعد يم شــباچـه..ارجع اســأل
هم چانت عينك مفتوحه..وزينب عالتل؟
كلمة طـلعت زينـب والله..هذا المقتــل

///////////////////////////////////////////////////////
اكثر من ما چنت اتصور
مو كامل محبوبي اموذر..هاي التهظم

متربع ذباح ابصدره
اهنانه انغثت امه الزهره..وگامت تلطم

الحسين ابن عـلي اعليه الســـلام
ابيوم عاشر طاحت اعليه السـهام
تِعب سوه اوساده بتراب ويشوف
امدللاته احتـرگن ابـــنار الخــيام

ابسط شي واصل للشـيعه..گال البــاقر
يعني شسوو باهل البيت ..ابيوم العاشر
فوگ حسين ايروح ويرجع.. كلسا حـافر

///////////////////////////////////////////////////////
عاشورا عايش يوميه
امن حسينيه ولحسينيه.. ابرحلة دمعه

واتخيل ذاك اليوم المُر
گطعو من حسين الخنصُر..ضلن تسعه

هســه مرقد صــار محبـوبي الذبيـــح
مـــنه يطــلب حاجــته حته المسـيح
ايقنت كل حــب چذب بالـــدنيه هاي
وماكو بس حسين معشوگي الصحيح


جددت العهد ابشباچه..وگتـــله ابشــغله
يامولاي المُر اويــاك ..امن العــسل احله
والصعبه اشما تصعب يمي..عندك سهله

///////////////////////////////////////////////////////
حسين حيدر اللامي

العليله وحمـيده حــچن فد مره
لغتهن مدامع توضح الفكره

عاللي طاح امن القصر..والوگع من المهر
بس مدامعهن حمر..مصيبه
————————————————
فاطمه المكسوره بدت تنقل صوره
عن الهجر
اتگول ظايع عمري وريته يگطع نحري
سيف الشمر
حايره ابموضوعه امكسرات اضلوعه
وكت الضهر

حسين ابوي ابيوم عاشر منسحگ
وضهره بتــراب الوطيــه مـحترگ
راسه عن جسمه الـــموذر مفترگ

جاوبــتهه حــميده وتــهل الدمــعه
عمي الحسين ابچفوفه اصابع تسعه

وسولفت باقي الكسر ..والوگع من المهر
واعيونهن صارن حمر..مصيبه
————————————————
اهنا حميده التنقل الفرگه مره وتكتل
ماتنجرع
بالگلب ظل يهدم إفراگ ابويه مسلم
وحار الدمع
امفطرات اشفافه امغيرات اوصافه
واني انفجع

من على قـصــر الامــــاره لـلارض
چنهه خيل وعالظلع گـامـت تـرظ
أذَّن الموت ومشه ايكــمل الفرض

اهنا حميده الوحيده تدگ عالـهامه
اتگول ابويه ابوگعته هشم بعـظامه

بعده احس ظاع العمر ..والوگع من المهر
بس مدامعهن حمر..مصيبه
————————————————
العليله تحچي وبيهه كلشي يبچي
من القهر
واگع ابنص حومه امسلبات اهدومه
ابجبهه حجر
ابصدره حافر داسه وشمر گاطع راسه
وگلبي انكسر

الحگلــنه نادتـه زينـب ســمــع
إبـگلبه حرگه وعود لخيامه فزع
راد يوگف بس عله وجهـه وگـع

ياحمــيده ابويه الحــرگ دلالـه
لمَّن شافت عيونه سبايه اعياله
ابسوطه يضربهم شمر ..والوگع من المهر
بس مدامعهن حمر..مصيبه
————————————————
يالعليله إبالي إفراگ ابوي الغالي
لمَّن رحل
قاصداً للكوفه والمنايه اتطوفه
غاب الأمل
ماشرب مي حسره اتذكر ابن الزهره
ومنه خجل

من ابو اليمه مسـح هامتي بيــد
يعني مسلم والدچ طايح شـهيـد
مثل ابو السجاد هم باقي وحيـد

امن القصر رافع ايده لأبوچ وسـلّم
رد سـلامه ابكسرته واحسّــه اتألم
رد سلامه منقهر ..والوگع من المهر
بس مدامعهن حمر..مصيبه
————————————————
ياحميده أفهم افراگه سيف امثلّم
يذبح نحر
الأبو چن خيمه والهجر چن هيمه
وظيم القدر
ظل اخوي ايدوّر نقص چفه الخُنصر
وگلبه انفطر

جسمه لمّاه ابحصيره ابلايـه حيل
مـن كثـر ماگلبته وسـحگته الخيل
والنــهار ابلايه ابـوي ابــعيـني ليل

ياحميده اليفارگ ابــو من زغره
يبقه كل يوم يتاني مماته وگبره
ايشافي اوجاعه الگبر ..والوگع من المهر
بس مدامعهن حمر..مصيبه
————————————————
حسين حيدر اللامي

ام البنين ع
إفتِتحَت نِقاش المعركه وگالت كلمتين
إنـــتم زرع وإيخــــظّر إبستان الحسين
/////////////////////////////////////////////////////
واتناوشو إدورع الحرايـــب يم الاخيـــام
الله يحبه التقترن وي صدره الاســـــهام
جردو البواتر يا ضياغم شـــــــدو الالثام

القسمه عله اخيام الخدر ما تقبل إثنين
/////////////////////////////////////////////////////
كظّت العباس وبقـــت تحـچيله الادروس
لو فرغت الجربه إبسهم ضل إنته متروس
ولو زينب احتاجت ضوه صيرلهه فانوس

إبعين البصيره اعليهه صد لو طفّو العين

/////////////////////////////////////////////////////
موت اعله زينب يالصعب لو رايد تعيش
ولو ســـيّر إبصدرك سهم گللهه بالريش
يا نورس ابيض والـــزلم يمك خفـافيش

عبد الله كض روس ورِتَب وانثرهه صوبين

/////////////////////////////////////////////////////
وزّع عله اخيامك هوه لو كونك إيضيق
يوليدي جعــــفر هالأمر يحتاج توفيق
تسقـــــيك باچر فاطمه اكوابٍ أباريق

وتبنيلك املاك السمه بالجنه قصرين

/////////////////////////////////////////////////////
طش الرگب ريش إبهوه يوليدي عثمان
يا شيــــخ وارگاب الزلم بيـــبان ديوان
خاطر يگول إبن النبي والله اخــــو چان

والگطعو إيده إبهالحرب ينطو جناحين

/////////////////////////////////////////////////////
حسين حيدر اللامي

استخارة ام البنين ع
اول مُهاجر..رحلته..الخناجر
بالإستخاره..طلعلي..حوافر
رِسمَت سبحتي..تراب و..مجازر..حسين
//////////////////////////////////////////////////
إستخاريت المُسافر..وإبسبحتي الصور تنعه
إنرسم جسم حسين إبني..ومدري شمچلب إبضلعه
واحسبت بيده الاصابع..إتوقفّت عد رقم تسعه

مشهد صدمني اهواي ما حَسّبيته
زلمه اعله صدر حسين لازم لحيته
رمش ابني فوگ الگاع طايح لگيته

حاچيته عوفه..حبيبي..تِألم
والسبحه كامت..تناثر..علي دم
لحظه واجتني..ملامح..مخيم..حسين

//////////////////////////////////////////////////
والله حيره إمنين أباوع..بالصور چانت الصدمه
ينزل الحافر عله أبني..ينرفع ينـــــشال لحمه
إشگد صحت بس ما سمعني..إشويه وخّر منهه يمه

صوب أخته صاح إبصوت وإحساسه مِنغث
زينب تعاي إبساع طلعي المثلث
كلهه اعله سلبه الناس أسمعهه تحتث

بالهيمه صارت..صياح و..ترابه
ثاري العشــــاير..تجر ..إبثيابه
يتناهشونه..كَأنهم..ذيابه ..حسين

//////////////////////////////////////////////////
شردت اعوف الاستخاره..وانرسم گدامي مشهد
إنجمعن أگبالي سويه..أضلوع بيضه وحافر اسود
ولا چنه حسين طايح.. والله عبالي محمد

إشلون الحگ إعله حسين طايح إبشدّه
جرّ الســــهم بهداي بس طلـــع چبده
وجهه إبحجر مصيوب وإنخسف خــدّه


حســيته آخر..ثواني..إبحياته
من شاهد الكل..تباوع..بناته
سدّو طريقه..على ..ست جهاته..حسين
//////////////////////////////////////////////////
طلع گدامي مخيم..وزلمه لازم بيده مَشعَل
الليل يركض مدري زينب..أسره بيهه الباري للتل
وگفت وضل كلشي واگف..ثاري صفنت عله المقتل

إن كُنــتَ حياً هاي جـــرّت أنفــــاسه
توهــم بدو يحــچون وانگـــطع راسه
صدره عرش بلقيس چم جندي داسه

ضليت اركز..عليمن ..يأشر
رايد من اخته..تدور ..إعله خنصر
وضعه ربكني..جروحه..تحيّر..حسين

//////////////////////////////////////////////////
شاهدت بنته رقيه..من وگف الحسين نبضه
صاحت إبجندي تگله..إمنينلك خاتم الفضه؟
گلهه من ذاك العجيد..الباقي نايم عله الرمضه

گلهه بچفوف حسين شاهدت لمعه
مـن ما إجه إضـطريت أگطع إصبعه
عفته وإجته الخيل داســـتله ضلعه


بالهيمه تلهب..اباوع..عبايه
ريحة محمد..خذوهن..سبايه
هَل مِن..جَزوعٍ..يون للنهايه..حسين

//////////////////////////////////////////////////
حسين حيدر اللامي

يامسلم بن عقيل
رحت إبجنحانك لو مُهره
يابو الـمسؤوليه الخطره

تكليفك گال..سيف ومرسال

////////////////////////////////////////
إذا چان الحچي إمن إثگال يا مُرسَل
اكيد ايحـــمله لازم طارش إمــعدّل
مــنو امن حسين ماخذ بالثقه الاول
حـَط بيـدك رســاله وگلــــك إتوكّل

گلك بيــدك يا إبن الـــعم
هيچ إيحن الدم إعله الدم

خل تقره اجيال ..سيف ومرسال
////////////////////////////////////////
يبن حمزه وعقيل البالحرب تشتد
مو انته اليــفك الســالفه وتنسـد
مادام الرساله اعله الزند تنــــشد
عله احرورة گلب راعيهه ماتبــــرد

حچي المعصوم إبنص إيدك
شـــــغلة توفيق الله يريدك

التوفيق أشكال..سيف ومرسال

////////////////////////////////////////
إبذيچ الساعه من رحت أركبت مهرك
دعه الـــعباس حته ايسهّل الله امرك
روح وخـــلي بالــك بـــارد وفـــكـرك
وراك حسين لتظن ينكســـر ضـــهرك

ياثقتي حــسين يـــناديلك
وانخه العباس يشد حيلك

إيسندوك إثگال.. سيف ومرسال

////////////////////////////////////////
مُهرك خلّص الصــــحراء مو ركضـــــه
المسافه إمن الحسين الكوفتك ومضه
كلهـه إتگــول عنّك يا عُــــظُم حضــه
إبوكت كلهه حجر مـــــسلم إجه فضه

موضــوعك ما بي أي رِكّه
طارش بس بي ريحة مكّه

وقفة إجلال ..سيف ومرسال
////////////////////////////////////////
ميزان الــحچي من مـال عدّلتـــه
إثنين الـــهه كفو لو انتـــه لو انته
يا اول ضوه إمن حســين شاهدته
كتبت اول شطر من عشت سالفته

يالخطـــواتك تتــناثر حـــق
شنو هذا التــسليم المُطلق

مَضرَب أمثال ..سيف ومرسال
////////////////////////////////////////
حسين حيدر اللامي

حينَما سَقَطَ العَباسُ ع نادى ادركني يا أخي يا حُسيَن فَأتاهُ الحُسيَنُ ع قائِلاً:
عباس اجيتك واطمئن..لكن دخيلك لا توّن
هذا اني الحسين
اشصاير ابوجهك كله دم..متخوصر ابعينك سهم
وابلايه چفين
//////////////////////////////////////////////////
متعوب يالتسوه التعب..بحجاره مصيوب الذهب
ايطعنوك من هبَّ وَدَب.. وابالك اخيام

مثل النَفَس بعدك صرت.. لا رايح ولا ملتفت
همزين ياخويه صحت.. ياتعب الايام

اذا اطلع السهم
تموت امن الالم
ويم زينب ارد..لحيتي كلهه دم

يالصدرك اسهام انترس..صعبه تطيح امن الفرس
ماعندك اچفوف
امن استقبلت گاع ووجع..چم سهم من ضهرك طلع
وما تگدر اتشوف

//////////////////////////////////////////////////
ابعينك سهم بايگ عمر..بس لا اشلعه وينكسر
يتبسم اگبالي الشمر.. وسفه يمبخوت

وابجسمك اشسوو جُرُم.. الرمح واصل للعظم
ضهري انكسر من الهضم..بس فدوه لتموت

تره افـــراگك مثل
سبـيه اعله الهزل
تناديك الخيم..يواهس چم طفل

يا قل هوَ اللهُ أَحَد.. راسك امهشم بالعَمَد
مُثخَن بالاجراح
يالغارگ ابنزف الدمه..اشگد تحبك فاطمه
بعدك ممرتاح

//////////////////////////////////////////////////
ايصيحون قربت ساعِته..العباس طاحت خوذِته
لايسرته ولا يمنته.. تتبسم الناس

گطعوهن الچانن قبل..لاهل الخيم همزة وصل
صاير ضوه امغطي نبل.. تتوهج انفاس

اخيّـــك يالصعب
وحيد ابهل حرب
ويا آخر عِرِف.. قتيل اعله الترب


أمّا بعد يابالفضل..ابهاي الحرب ماريد اضِل
ماعندي حيله
يمطفي نيران المُهَج..دم راسك ابشيبي امتزج
ياهو اشتكيله

//////////////////////////////////////////////////
مو خوف من باب الحرص..جاي اشعر ابجسمك نقص
خليتني ابدمعي اغص..عباس مهضوم!

مادام ضل آخر وقت..شيصير لو يمك متت
مطبور بالحاجب شفت..بالعمد مهشوم

اگل لاهل الخيَم
تره طاح الــعلم
بعد ماكو امل.. لان راسه انهشم

راح ارجع وانقل خبر..عباس مات اعله النهر
بس ماشرب ماي
واخبرهم ورب الفلق..سهم ابوسط عينه اخترق
ضل ينزف اهواي

//////////////////////////////////////////////////
بعدك يبو فاضل تره..إضلوع اخوك امكسره
من مگفه ينحز منحره..عالوجه مگلوب

لمّن اطيح اعله الارض..ام الخدر تشبع ركض
والحافر ابصدري يرض.. وي جية الغروب

وراسي يرتفع
بعد ماينگطع
توصل للخيم.. صدى طگةالضلع

عالدنيه بعد ابني العفه..وبعدك نضر عيني انطفه
اقوى الخسارات
واهناكه ربات الخدر..ينضربن ابسوط الشمر
وابلايه خيمات

//////////////////////////////////////////////////
حسين حيدر اللامي

بالريه مشت ..هلخـدمه هــوه
هيه إلعلّتي.. صارتـــــــلي دوه
—————————————
هلخدمه تجري إبدمي وإبشرياني
من زغري أبوي إعله اللطم ربانـي
التيه وجودي تدري وين إمچانــي
إبمجلس ابو السجاد خل يلگانــي

لو ناعي ..لو لاطم..لو دمعه بالــعين
بلدنيه..ماعندي..بس مجلس حسين

گلبي ضامي بس..بلمجلس روه
هيه إلعلّتي.. صارتــــــــلي دوه
—————————————
لمن احس گلبي يدگ إهــــوايه
يعني المواكب ناصبين إقـــرايه
وافرح واحضر بيرغي والــــرايه
لمن يجينه موعد المــــشـــايه

دمعاتي ..الي تـــــنزل..أبچيهه بحسـاس
والحاجه .. إشما تصعب..يگظيهه عـباس


دنيانه ظـلام..والـــخدمه ظوه
هيه إلعلّتي.. صارتـــــــلي دوه
—————————————
خل أحچي البگلبي وأگول البيه
اني بشر عايش على اللطـــميه
شهر المحرم من يهل لـــيليــه
أتنقل حســــينيه لحـــسيــنيه

متـعلم..علــــدمعه..موبيدي والله
زنجيلي..إعله اچتافي.. بلعزه محلاه

من زغري أحس..راظعهن سوه
هيه إلعلّتي.. صارتـــــــلي دوه
—————————————
حسين أبونه واحنه صرنه إيتامـه
وهذا العـــزه ساتر عله اللطامـه
مو بس صدر نطبرله هم الهامـه
بيوم القيامه تشهــــدلنه القامـه

بلمحشر..نـتحـــظر..هم نرفع اعــلام
اسرع ..واحد يدخل..بس سره الخدام

الله إيوَفُّقه..للخـــدمه النــوه
هيه إلعلّتي.. صارتـــــــلي دوه
—————————————
اليدخل عزاء وبگلبه شايـــل جــمره
هذا اكيد الزهــــره ترفـــــع قـــدره
والتنزل إدموعه إبجزع وإبحــســــره
من الإمام المهدي ياخذ أجــــــــــره

دمعاتي ..وآهـــاتي..إبكـــل عزيه
بس كون..إتسجلني..أُمنه الزچــيه

عن لا ننحسد..نقره القُــل هُوه
هيه إلعلّتي.. صارتـــــــلي دوه
—————————————
🖊️:حسين حيدر اللامي

أوبريت :خِتامُ القِصَّةِ
كلمات
الشعر الفصيح:حسين حيدر اللامي
الشعر الشعبي:علي مولى الدراجي

أداء:مدرسة الرادود الحسيني
مرقد الإمامين الجوادين (ع)
بغداد


https://youtu.be/IlFsDaQJ6E0?si=qOXnPuZw0fR5xOVz

القصيده:يقرآن الفجر

أداء:الرادود الحسيني حيدر كريم اللامي

كلمات: حسين حيدر اللامي

المجلس الاسبوعي لمدرسة الرادود الحسيني





https://youtu.be/9d4Q-_iWIO4?si=u-2eUMrRqHYhKsOt