حسن مولا مولا حسن مولا
///////////
مضيـــفك عالــكرم يعله
الـهلا مصــبوبه بالـــدلّه
يقبله وقبلة القبله صرت

يــأول واحـــد ابزغـــره
ابمهد وامحضر السفـره
عنك شكـــتب وشــقره حرت

كلشـي منه واله
اسمه ما اجمله
هذا صوت اعتله

حي الله الما خاسر سيفه

چنه آيه ونزل
رمحه عاقر جمل
عاشِگَه امن الازل

ينهي ويأمر هوه ابكيفه

حسن مولا مولا حسن مولا
///////////
يوارث هيبه من جده
ملائك هزّت ابمهده
مفاتيح العلم عنده الحسن

كريم افعاله معروفه
يصيته واصل الكوفه
انتخاه وخلَّد احروفه الزمن


وجهه مثل البدر
چنه ليلة قدر
الغيره منه تدر

شبعانه اليومك خطّاره

نازل امن السمه
عطره من فاطمه
منبع المكرمه

هز الكون ابيوم اصياره

حسن مولا مولا حسن مولا
///////////
حكايه امبينه كالعاده
علي نسله فقط قاده
الحسن يا سيد الساده فخر

الحسن بچفوفه ضل كلشي
يوگف لو يرد يمشي
نوره اعله البصر يغشي گُمَر


خله بينه عشگ
حبنه اله من صدك
ولده مانفترگ

من فاضل طينه امسوينه

سوره لا بل سور
والسمانه گمر
ياعطش يانهر

لو نعطش هوه اليروينه

حسن مولا مولا حسن مولا
///////////
گلبي بس اله يهوه
التعب يمه صدگ يسوه
الكل خادم صفه تچوه سند

الگلب لو غيره يتمنه
اگطعه وما اريدنَّه
لان ذكر الحسن جنه انعقد

يمه يحله العشگ
اطفه بي واحترگ
گلبي بسمه يدگ

تغمرنه ابكل يوم الطافه

سورة القل هوه
هوه واسمه دوه
وجهه اليشع ضوه

من الهادي اشتق اوصافه

حسن مولا مولا حسن مولا
///////////
البقيع اتاني واليهه
تريد المهدي يبنيهه
مجالس يمه نحييهه سوه

نشاهد گبه من نوره
وتجي مشايه واتزوره
ويصير اهناكه عاشوره دوه

ورايته تنتشر
وتمسح اهل الكفر
ابكلمه وحده نقر

والشيعه اتضل المنصوره

وابو صالح يهل
يملي قسط وعدل
والنواصب تذل

وانشوف الرايه المنشوره

حسن مولا مولا حسن مولا
///////////
حسين حيدر اللامي

علي يا مولاي علي يا مولاي
______________
يابو الما سلم نحره.. قرّب گلبي لتبعده
خادمكم تعرفونه..فقير وكلشي ماعنده
ترضوهه اذا عفتو.. تنزل دمعته ابخده
والعافوه اهل البيت..كل عمره يضل وحده

تِسَجلني اريدك
عبد من عبيدك
فقط مدلي ايدك.. علي مولاي

______________
عشت بين الضلع والباب..وبين الخيمه والتله
وشفت دمعاتي فوك العين..اهواي امن الفرح احله
الينصه ابخدمتك مولاي..السماء السابعه يعله
واليبجي اعله ذبح حسين..الله امبارك ابنسله

الفضل لله والكم
حسبتوني ابنكم
يماكو مثلكم..علي مولاي

______________
تريدون اليدك صدره..ابعزاكم صافيه نيته
الخادم درساه حسين..ومن ام عون تربيته
ومن يدخل حسينيه..يحس چن داخل البيته
حنين اعله اليخدمه اهواي..من عباس حنيته

يـــــسادة حياتي
ابمعاشي ومماتي
يفرضي وصــلاتي ..علي مولاي

______________
شحلاهه من اطب مجلس.. ابلوعه وگلبي بي حسره
وتگول الوادم اعليه..هذا خادم الزهره
ويأشرولي عله المنبر..اتفضل اصعد واقره
واگلهم زينب ابنص سوگ..والحسين انگطع نحره

وتجي بالعــزيه
الرضيه الزچيه
وتباوع عليـــه ..علي مولاي

______________
شايل دمعتي ابخدي..وجيت الليله يم بابك
اقبل خدمتي مولاي..اروحن فدوه لترابك
الخدم تتأمل ابعطفك..چي حاسبهه احبابك
اقبل مجلس النقراه..ونهدي اللوعه لمصابك

الخدامه تِهِمّنّه
كأن هــيه امنه
يخيمه وتلـمنه ..علي مولاي

______________
حسين حيدر اللامي

قران النور..ينزف مطبور
دم راسه ايفور..وي فرض الفجر
/////////////////////////////////////////
الك تنعه اصول الدين..وفروعـه الليلــه مقهوره
علي وابطيحتك الاسلام..احس اضلوعه مكسوره
ياصبــر الـــنبي ايـوب .. وموسه وعصّـته وطوره
الهامه البـيهه سـر الله..حـــسافه ابسيف مطبوره

نگصد لاوين.. يابو الحسنين
لو درت العين.. ورحت ابنص گبر
/////////////////////////////////////////
يالرد الشمس مرتين .. ومارد لاهـله مـــن گبره
شحَّة مَلگه صيف افراگ..وأنه دلالي چن شجره
علــي ياكـعبــة الايــتام.. ابابك طافت الــفقره
اذا قرآن جـــوه الــگاع..چا يم گبـــرك اشنقره

يبچي المحراب..فرض الله انصاب
بجروحي اعتاب.. ياكعبة صبر

/////////////////////////////////////////
چف ايداري اهل البيت..وچف يمسح عله الايتام
تعال ابعيني افرشلك .. مو مال ابترابه اتنام
لبسنه اعله العيون ادموع..چي ثوب الفرح ما دام
جنه انشوفك ابكل يوم..هسه اتمرنه بس احلام

ملهوفه اعليك..روحي اتحاچيك
بسنيني افديك..ياكل العمر

/////////////////////////////////////////
وي ما شالو التابوت..روحي امن الجسد شالــت
إسمع صوتهه ايناديك..شوف اشـــدار واشـگالت
صاحــت ياعلي الكــرار..زيــنبــكم تــره مـــاتت
ورجعت للجسد واشلون.. مثل طيحت سمه طاحت

وصحت امن ابعيد..ماريد العيد
واجروحي اتزيد..من طاري يمر

/////////////////////////////////////////
الضلام البيه تدري اشلون..يشبه جية المغرب
دفتر حزني كله ادموع..ابچي وأمسح واكتب
عداد الهجر كلساع.. ابتوقيت الحزن يحسب
اليفگد والده ابكل يوم..يكبر عمره وايشيب

كلما احتار..اركض باصرار
يم ذو الفقار.. اشتم بي عطر

/////////////////////////////////////////
حسين حيدر اللامي

ميمر

إيصيح النّبي يابو حسين.. يحضر علي إيصفيهه
////////////////////////////////////
يكتب إبماي الذهب كلمن أرّخ
من الـــحرب دز الزلم للبــرزخ
فُقّاره يفـــرح لَمَن دم يتـــلطخ

ايغوص الكتايب واتصير..سافلهه وي عاليهه
////////////////////////////////////
اغلب حروبه تنتهي بس ضربه
الراده خصم لازم يبدّل گــلبـه
اضهور الزلم ردّت لاهلهه امحدبه

ريش ابهوه طش الروس..والعاليه اينصيهه

////////////////////////////////////
هـوه الي بالاســـماء علّــم آدم
حته السليمان انطه سر الخاتم
كم قارّه اليحكمهه حولَ العالم

يونس بقه ابطن الحوت..لو ما علي حاچيهه

////////////////////////////////////
ابمعراج طه للــسماء اتصوّر
حاچه النبي ربك ابنبرة حيدر
گله إشتحب گلاله قالع خيبر

ايرف الگلب من طاريه..والدنيتي امحليهه

////////////////////////////////////
إمنين مادار ومشه تلگه الحق
ابنص الصلا وابخاتمه يتصدق
هذا الورع هذا الولي الاصـدق

طلگ الدنيه الكرار.. والاخره شاريهه

////////////////////////////////////
حسين حيدر اللامي

بَعدَ فِراقٍ طَويل..وَدَمعِ الرَحيل.. وَ عينٍ تَسيل
هَمَسَ بِنَبراتِهِ الحَيدريه..كَلِماتٍ شَجيه
قائِلاً:

اخيراً من بعد شيب وبچي وكسره
المسافه البينچ وبيني فقط طــبره
تنجمع هاي المسيه ..هامتي وضلعچ سويه
/////////
الدنيه هيمه واجرعت كاس الصبر
ويا ربيع ايلمنه يا موسم هجر
اقسم ابعز الشفع وي الوتر
ناذر الشوفت اعيونچ انطبر

والسيف يطبر ليه هامه..وانگسمت ابراسي العِمامه

جايبــــلچ بشاره ولا يهـــل دمــعچ
من دم هامتي ايصير الدوه الضلعچ

كسرتين ابهل رزيه ..هامتي وضلعچ سويه
/////////
نلتقي ونبرة سوالفنه دمع
وخدچ ايلالي ضوه وما منصفع
اهوايه عطشان اعله شوفچ يانبع
عطشت الفلاح لو لاگه زرع

اوياچ چانت روحي خضره..هسه حيدر صار صحره

بســتان ابدليلي هيچ احس شوگي
وصيف الفرگه بيه ايخضرن اعثوگي

يا ألم حامي الحميه ..هامتي وضلعچ سويه
/////////
هذا مرسال العشگ لام الغرام
من علي الحد فاطمه اعليهه السلام
زينب ابنيتچ تره گوه تنام
دمعة الفاكد مثل رشگ السهام

لو متت تسأل علينه..فاطمه زينب حنينه

چانت من تفز تغفه اعله ذرعاني
هسه اشلون زينب لو متلگاني

لو بچت تگصد اليه ..هامتي وضلعچ سويه
/////////
امشي اعثر مره كلبي ينعصر
واليعوف اعزازه ميريد العمر
كاسر اضهور الزلم بس منكسر
والعلامه الفاصله فرض الفجر

اليخدم الامه جاب عمره..تاليته ويجازونه طبره

ايتام اعله بابي مدت ايديهه
وصيت الحسن يتصدق اعليهه

ترتجي وتنشد عليه ..هامتي وضلعچ سويه
/////////
العلة اجروحي ردت وجهچ دوه
اني اتنفس حروفچ مو هوه
صايم وحيلي اعله فركاج انلوه
ويم محمد نگعد ونفطر سوه

جيت آنه شايل جرح السنين..فاستقبليني يام الحسين

اشوفچ واشتكي امن الفرگه حراگه
وانتي ابـــــــدورچ اتگليلي مشتاگه

وايدچ الزمهه بديه.. ..هامتي وضلعچ سويه
/////////
حسين حيدر اللامي

الفگد أب وإمام ماتهيد اجروحه
ويه كل دمعه تطيح سكته تطلع روحه
عذاب ماتهيد اجروحه
________________________
هوه الفراگ//ايزيّد اجروحك//ياكل ابروحك
چنه نيران
تبقه تشتاگ//امنية عمرك//ينحفر گبرك
دار الاحزان

نهر تتـــبده الــمدامع والدهر صيف
الچان ما ينساك هسه ايمرك ابطيف


اشلون تتحمل تعيش ابلا دفو چفنيه
وانته ميت لا محــال من تفارگ عينه
عذاب ماتهيد اجروحه
________________________
الابو خير//خيمة اعياله// نعشگ اخياله
محله ملگاه
ريته يرجع//يمي لو مره//ارد اشم عطره
حاشه انساه

من كثر ماحبه وابـــروحي غلاته
افرش امصلاته واتغــطه ابعباته

كوكب الحب والجمال شوفته موصوفه
خيره مو بس لليتيم ساتر اعله الكوفه
عذاب ماتهيد اجروحه
________________________
سفرة ادموع//تبتدي ابعبره// وتنتهي ابگبره
مستقر نوح
خنجر الموت//صوَّب اسنيني// جرحه ياذيني
وباقي مفتوح

اني دافن حيــــدره مو اي بشر كان
هو شيضل بي الراح امن ايده قرآن

تشرب اسنيني الهموم وبالضياع اني انذبح
جرحي ما صحـــله دوه ليل وايجافي صبح
عذاب ماتهيد إجروحه
________________________
جية الاغروب//خنگت انفاسي//شيبت راسي
ابدمعة العين
اسأل اشلون//حالته اشلونه//فدوه لعيونه
هذا ابو حسين

بيه نيران الخليل ابوكت الاغروب
يوسفي جوه التراب واني يعگوب

ابگد عمر آدم بچيت عنه لو سئلوني
ما متت آنه وراه بس عمالي اعيوني
عذاب ماتهيد اجروحه
________________________
راح مكسور//خلصت انفاسه //وانطبر راسه
وي الاذان
هذا ابو اتراب//ياحلات اسمه//الترب لمه
چنه قران

چان اذا يوصل الليل اعيونه متنام
من كثر حنيته يفتر اعله الايتام

مره وصّاني الحنين وابحنانه المطلق
بويه اذا شفتو يتيم انيابه عني اتصدق
عذاب ماتهيد اجروحه
________________________
حسين حيدر اللامي

هَل انشَقَّ القَمَر..أَمِ الرأسُ انطَبَر
شهيدٌ فَانتَصر ..وداعاً ياعلي
///////////////////////////////////////////////
سلاماً يا أَمينَ اللهِ حَقّا
فَذا رَأَسُ السَّماءِ اليَومَ شُقّا
شَهيداً ساجِداً للهِ تَرقا
أتى الحزنُ عَليكَ البابَ دَقّا

الهٌ نَظَرَك..إليهِ قَبَظَك
وذا الكَونُ ارتبَك.. وداعاً ياعلي
///////////////////////////////////////////////
فَأَهلُ الغَدرِ لَم يُبقوا سلاما
مِنَ الآنِ لَقَد صِـــرنا يَتامى
وَقــالَ اللهُ فـــيكَ يا إماما
(فَيدعونــي قُعــوداً وَقياما)

(الذينَ يَذكُرونَ اللهَ قياماً وَقُعوداً)آل عمران ١٩١

وذا قَلبي نَزَف..إلى أرضِ النَّجَف
وَ باِلدّمعِ هَتَف …وداعاً ياعلي
///////////////////////////////////////////////
يَنوحُ العَرشُ أمّا الارضُ ضَجّه
لَساخَت أرضُنا مِن دونِ حُجّه
عَليٌّ ماتَ أم مــاتَتِ البَهجــه
أَعادَ العَنكَبوتُ الحُزنَ نَسـجَه

حَبيبٌ قَد رَحَل.. إذاً ماتَ الأَمَل
فَذا خَيرُ العَمَل …وداعاً ياعلي
///////////////////////////////////////////////
فَأَنتَ اخترتَ اصحابَ المَشاقِ
فَـخيرُ النّاسِ هُــم أَهلُ العِراقِ
فَــهُم أهلُ الأَمــانتِ الــوُثــاقِ
(إلى يَــومٍ تَلِفُّ الــساقُ ســــاقِ )

(وَالتَفَّتِ الساقُ بِالساقِ) ٢٩ القيامه

نِداءٌ يَعتَلي..على حُبِّ الوَلي
فَهيا قائِلي …وداعاً ياعلي
///////////////////////////////////////////////
مَعَ الصَّــــوتِ سرى اللهُ أَكبَر
يصيحُ الكُلُّ ماتَ اليَومُ حَيّدَر
فَكَم قَلبٍ حَزينٍ قَدْ تَكَسَّـــر
وَلَونُ الكَونِ رُعباً صارَ أَحـمَر

وَمضلوماً قضى..عَليُّ المُرتضى
وَ بِالفَوزِ حضى …وداعاً ياعلي
///////////////////////////////////////////////
حسين حيدر اللامي

القصيده:وين العباس

اداء : الرادود حسن اياد المطيري

كلمات : حسين حيدر اللامي

المجلس الأسبوعي لمدرسة الرادود الحسيني




https://youtu.be/gM5fb2ibZtE?si=ibDcCM4YHN6lFiyb

القصيده: انشق القمر

اداء:الرادود هشام الغراوي

كلمات : حسين حيدر اللامي

استشهاد الامام علي (ع)




https://youtu.be/zhL6rxkg7uk?
si=9nYVAHEQYvOoYjLe

هذا آني يابالفضل
عايش بقاية حرب..دوّرني تلگه جثث
عُطّاب ،نار، ورعب
عايش تجارب لَحد..حسّيت ماكو گلب
اتخطّه كلشي نعم!!..ماعندي اي شي صعب
بس امن اطب للصحن ..ما ادري ليش انغلب

حسين حيدر اللامي

لِحَرقِ دار مولاي الصادق عليه السلام:



هذا دارك .. مقتبس نيرانه من نـــيران خيمه
هذا دارك .. من بناتك ركظن اتخايلته هــيمه
اتذكرت خولي وشمر
لَمَن هجمو عالخدر
هذا دارك..هذا دارك
____________________________
وصلت النار اعله دارك..يا إمــام الرافظــيه
ركظن ابحسره بناتك..مــن شِرار الناصــبيه
نفسه هالموقف تِجَدد..ركظة سكينه ورقيه
والفرق واحد ولكن..ما مـشت وحده سبيه

كل الاطفال.. ركظو امن الــدار يتناثر دمعـهم
كل الاطفال.. ما اكو چف عمِّتك زينب يلمهم
كسرة اسنيــــن الــعمر
لَمَن هجمو عالخدر
هذا دارك..هذا دارك

____________________________
من خذوك القصر ظالم..ابليل وابدون العمامه
اتذكرت طــبت عــقيلة..بني هاشــم والــيتامه
ومن يزيد اهناكه گاعد ..يـضرب ابراس الإمـامه
ورادو ايذبـــحون زيـن ..العابدين اهل الضـلامه

صاحت ام عون..يايزيد اســـمع كلامي وانته تدري
صاحت ام عون..عوفو زين العابدين وگطعو نحري
امچتفيــن ام الـــصبـر
لَمَن هجمو عالخدر
هذا دارك..هذا دارك
____________________________
تالي مسموم ابچبدتك..وبالگلب حسره اعله حسره
مو مثل جدك يغالي.. داست الخيل اعله صـــــدره
امسلبات اهدومه واگـع..من گفـــه گطــعوله نحره
ركظن ابهيــــمه بنـــاته..وبالمــصايــب انــتـه ادره

يا إمامي.. وسفه ابو السجاد مرمي اعله الترابه
يا إمامي.. وزينــب وأطفـــال گعدو بالخرابه
هنِّه ســــحگن عالجمر
لَمَن هجمو عالخدر
هذا دارك..هذا دارك
____________________________
كلشي تعرف كلشي سامع .. عن مصايب هالغريبه
تصحه واتنام ابعيونك..جثه عالغبره سليبه
هيه من ركظت وَحَدهَه..هايه وحَّدّهه مصيبه
زينب ابنص غربه ضلت..امنين ابو فاظل تجيبه

خاطبوهه..من وگع كافل خدرهه وعالنهر مات
خاطبوهه..استعدي يالعقيله الباب ساعات
واستعدي لليسر
لَمَن هجمو عالخدر
هذا دارك..هذا دارك

____________________________
حظرت الزهره ابوفاتك..سيدي وايهل دمعهه
موتتك عدهه عظيمه..چنهه كسره ابنص ظلعهه
الدمعه تلچم خدهه تدري..من اثر ذاكه الصفعهه
تمشي محنيه وتكابر.. من چفوف الي عصرهه

سيدي هاي..امك الزهره اجت يرهب وضعهه
سيدي هاي.. لاذت وكافر اجه ابقوه دفعهه
لازمه ابچفهه الكسر
لَمَن هجمو عالخدر
هذا دارك..هذا دارك

____________________________
حسين حيدر اللامي

علم الأوليـــــن السابق ولاحق
ربك صبّه كله ابجعفر الصـادق
تركعله المذاهب ..من نسل ابو طالب
_______________________
أسس حوزه ابكبر العالــم..ذو خمس وستين اسنين
مسقط راس الدين ابگلبه..ومسقط گلبه ابنص الدين
راسم بسمه ابوجه الفقره..وكل مهموم وكل مسكين
سلطان ابن الزهره وحيدر ..بس بيته امشيّد من طين

حيدر ثاني كلهه شافته الفـقره
چي بثيـابه شمّو ريحة الزهـره
هذا ابن الاطايب ..من نسل ابو طالب
_______________________
عطشان الدين وبس هـــوه..شـايل شـط امن العـرفان
لمّن چانت هيمه الدنيـــه..صارلهه الــصادق بســتان
مركب عنده وكل الشيــعه.. هـــوه ايصيـــرلهه الربان
هذا ابن اهل البيت وحاشه..توصل قطره امن الطوفان

چان العلم صادق والشرع سيفه
على روس الجهل يتصيد ابكيفه
فوگ الغيمه كاتب..من نسل ابو طالب
_______________________
ربك اعلم ويـــن ايخلـــي..سره إبأعظم شخــصيات
لو ردنه انسولف عالصادق.. ياشــعر ايكــفي وابـيات
مجلس زاد وعلــم وتقوى..ولحسين ايـسوي اقرايات
دمعاته امن اتطيح اتضوّي..مو دمع الينـــزل نجمات


تنزل دمعته كل مـغرب ابخده
محد يلطم اعله العاشر ابگده
عالراحن غرايب ..من نسل ابو طالب
_______________________
خله المذهب بين اچفوفه..وكل منصب خلا جــواه
من يقره القران ابوحده..كلشي ابصفه ايصــيح الله
تسبيح الزهره امن ايسبح..جبـــريل ايســبح ويــاه
يا گاع الداساهه اتخضر..واترد اتبوس ابمـمـــشـاه


أُستــاذ البلاغـه لَمَن يتكــلـم
كل العرب يم السانه تتلـعثم
ذرية عجايب ..من نسل ابو طالب
_______________________
بيت الصــادق چان ازغيّر..لكــن گلبه ابگــد الكون
لو اعمه ايدگ بابه ابحاجه..ايرد البيته ابچفه اعيون
لو لامس چفينه ابرحمــه..يرجع عاقل كل مجــنون
ليهســه الديـــن ينـاديله..يالصــادق منك ممــنون

لو چان العلم مصحف يشع نوره
چان الصادق اول سوره مذكـوره
والسر الي غالب ..من نسل ابو طالب
_______________________
حسين حيدر اللامي

القصيده:عباس اجيتك

أداء:الرادود حسين الساعدي

كلمات:حسين حيدر اللامي

المجلس الاسبوعي لمدرسة الرادود الحسيني



https://youtu.be/7AeRKRE3p5k?si=QaSa3sjZrgnX3rJV

القصيده: سليل الانبياء

أداء: الرادود عمار الساعدي

كلمات: حسين حيدر اللامي

العزاء الاسبوعي لمدرسة الرادود الحسيني




https://youtu.be/tiuicZM8ezs?
si=QY-qQdu4g22uYjWl