تجليبه


حينما وصلو لقصر الطغاة خاطبت زينب ع
راس العباس ع وبدأت بالخطبه فقالت:

طب گدامي تقدير الاخو واجــب
گلهه العين ماتعله عله الحاجب
///////////////////////////////////////////
مثل ازماط شاعـر چــــانت الخطبه
بحيث ابكل شطر گامت تحط ضربه
اهل البيت احنه وانتـــم الـــغربــه

أنه بت حيدره ولبوة بني غالب
///////////////////////////////////////////
آنه اخت الوگع چفه وصعد راســـه
ماخلّص وفه بس خلصت انفــاسه
جسمه ابكربله ويمي بقه احساسه

ودليلي هذا راسه اوياي وايراقب
///////////////////////////////////////////
إشتظن ترعب أُلوفك مره علويه!!
العدهه اهواي متباوع للشـــويّه
اجينه والضعـــن مـليان روحيــه

جميل الراده ربنه ومحّد إيعاتب
///////////////////////////////////////////
بت شيخ العرب والطـاعن ابرمحين
الابچفه الكلف رد الشمـــس مرتين
اذا حشمه تره ايرد الحسن وحسين

ويصير الطف قصركم عد بني طالب
///////////////////////////////////////////
مو كلمن سحب سيفه انحسب رجّال
ولا كلــمن ركب مهــره صــبح خيـال
بــس عباس ترســت صفحته الافعال

الساحگ جوه رجلينه شكو شارب
///////////////////////////////////////////
نور الـــروس بـــاقي الهســه يتــوهـج
إشـــاره أَنَّهُ احـــنه انــعــدّل الاعــوج
رغم ما وجه اخوي امن الدمه امضرّج

اله استعداد هسه ابخزرته ايحارِب
///////////////////////////////////////////
سيف اخواني من فوگ الرگب ينحط
ميتجــرّأ بشــر ويـاهـــم ويـغـــلط
عطشانين بس لو ردنه نـــخلق شط

جوه اخيامنه وبي لذه للشارِب
///////////////////////////////////////////
حسين حيدر اللامي

القصيده:امنية خادم

اداء:الرادود عباس الخفاجي

كلمات:حسين حيدر اللامي

العزاء الشهري لمدرسة الرادود الحسيني


https://youtu.be/6vStbY68VQE?si=STq8hyYFIfGckAAw

القصيده :زينب آنه

اداء: الرادود مصطفى التميمي

كلمات: حسين حيدر اللامي




https://youtu.be/uW3NpFyojSg?si=rFfTq8nCCDCoFWly

موشح


يا ازلام الما خــسر طاعونهه
زينب الليله تغمض اعيونهه
///////////////////////////////////////
ياهو يطوي البيده وايسابگ الريح
لَعِد حرمه اطروشهه قِله وشحيح
غدت تلفظ اخر انفاس وتـــصيح

عود بلكت هاشم اليلفونهه
///////////////////////////////////////
يا ازلام البيــدهه اتقرب البــــعيد
اكو حرمه اونــينهه ايفل الحــديد
ضلت اتغص دوم بحسين الشهيد

امنهد يوم الطف تغيّر لونهه
///////////////////////////////////////
يارمح غالب العل حگ ماخطه
يالثخـــن راياتكم مثل الغـطه
زينب ابلا اهل چنهه امربّــطه

اتريد اهلهه الليله اليشيعونهه
///////////////////////////////////////

هاي زينب ظيمهه ايملخ الاچبود
غدت تطلع روحــهه وهيه تـجود
وين عنهه الحمزه صياد الاســود

كون يم عباسهه اتدفنونهه
///////////////////////////////////////
وينه جعفر خلي يعصف بالجنح
خل يطشر ليلهه ابوجه الصبح
ما انذبحت بس نذل راس الرمح

ايميل منهه حته ميسمعونهه
/////////////////////////////////////
خل صهيل الخيل يچهب كربله
اكو زلمه اهناك مرمي اعله الفله
جيبو عطره البت بني عـمر العُله

ابعطر اخوهه الفاگده اترحمونهه
///////////////////////////////////////
ابيوم عاشور انحنت مثل الســعف
مات ذاكه البيده دگ صدره وحِلَف
حَشّمــت صنـديد ميـت بالنــجف

اتلم بخوهه حسين ميخلونهه
///////////////////////////////////////
يابني طالب واهل ذاك الصراط
يالتسل صمصامهه ابوكت الازماط
هايه بتكم طابعه اعليهه السياط

اسود امن الليل لون امتونهه
///////////////////////////////////////
هايه زينب تخـــتلف مو اي مره
شافت اضلوع الحسين امكسره
بآخر اللحــــظات تــنظر ليـوره

تعالج وما يمهه اليعينونهه
/////////////////////////////////////
حسين حيدر اللامي

لسان حال السيده زينب ع في عاشوراء:

بالهيمه ذاك حسين ممدود
وكل الزلم ركضوله فرهود

من طاح منه الخنصر..عالخيمه ضل إيأشر
تعبني عاشور
//////////////////
إحسين ابو الشاره..ايضربونه بحجاره
يضحك الذباح..واهواي الارماح

مو هوه ابو اليمه..شو سلّبو هدمه
طاح اعله الاسهام.. وعينه اعله الايتام


يشهگ تراب ابن النبي..كلما يجر انفاسه
مو بس حوافر ياخلگ..حته البشر هم داسه
توه بده ياخذ نفس..ركضوله گطعو راسه



هذا الچبير اليشبه الضي
من الحوافر صاير شوي

يلمع وگع مثل الدر ..عالخيمه ضل إيأشر
تعبني عاشور
//////////////////
من اصعدت عالتل..عاينت عالمقتل
گامو يهوسون ..ابصدره يدبچون

سهم العده يدفع..من ضهره ضل يطلع
بالحومه الأزغار ..حرگتهم النار

ضربو رقيه بالحجر..ترضاهه من ناديته
حاول يگوم و رد وگع..والسهم شگگ ريته
الله اليلعنك يا شمر ..بچفوفه جر الحيته



وأسمعته گال اخذو حياتي
و لا شوفن امراكض بناتي

والموته اعاين ينطر ..عالخيمه ضل اياشر
تعبني عاشور
//////////////////////
حلّفته بالزهره..لاتطبر ابنحره
وشّل انفاسه..وشوفني راسه

بحسين للمغرب..هالوادم اتسلّب
والليلُ عَسعَس..وباگونه محبس

اتصيّح رقيه امن الحرگ..ما اگدر افتح عيني
عمه اني اخاف امن الشمر..ابداعت علي ضميني
العباس وينه مايجي..لو هسه اله اتوديني



هاي الرباب وشابعه اسياط
مصدومه حيل اتشم بالاگماط
موقفنه حيل ايحير . عالخيمه ضل اياشر
تعبني عاشور
///////////////////
ليل اهدعش من جن..كلهن اجن گعدن
محترگ دمهن..ينعن ولدهن

رمله ابدمع ساجم..تلطم عله القاسم
عريس تنعه..سحگوله ضلعه

وليلى الي تنعه اعله الولد..لاچمهه حيل الاكبر
ابني طلع كامل جسد..للخيمه رد امطشر
امنين ما گلبه شفت..راسه المضيء امطبر



بين الحوافر تاه عباس
هسه اكيده باقي بس راس
وياهو التكظه يغدر.. عالخيمه ضل اياشر
تعبني عاشور
////// //////////////
اشگد صعب هالموقف..السجاد ضل يرجف
من جابو احبال.. والصعبه تنگال

عماته من لمهن..بچفوفه گيدهن
هاي التهظمه..وتحرگ ابدمه

طبينه للشام الصلف..والتمت اعلينه الناس
لاگونه گامو بالحجر.. يرمون راس العباس
واليعثر ابذاك الدرب..ايعوفونه وحده وينداس



موهينه لمن ندخل السوگ
وتنفك علينه اعيون واحلوگ
الله كريم ونصبر..عالخيمه ضل ايأشر
تعبني عاشور
////////////////
حسين حيدر اللامي

زينب نبي ونازل
نسخه امن ابو فاضل
موصوفه بالحره
بت فاطمه الزهره
/////////
بت حيدره— ماراجعه من السبي
بت حيدره— هيه البدت حرب العبي

من طاح ابو فاضل
هيه اصبحت كافل
چف حيدره وشايل
ضعن الخدر

زينب ممكسوره
زينب مثل سوره
من الله منصوره
ضعن الخدر

هيه الشفع هيه الوتر هيه نبي وايه
طبت عليهم بالقصر متگبعه بالرايه
جيش الشمر كله زغر بس زينب اهويه
كل خطوه داست بالدرب خضرّت مشايه

ايوب وي صبره
بت فاطمه الزهره
/////////
ابراية علي..نشّفت كل ماي النهر
ابراية علي..علّگت ريشات الگمر

كل الخلگ تزغر
بس بت علي التكبر
لاهل السمه محور
ام الشيَّم

موسه وجبل ڤاران
مريم بِنِت عمران
إخت الوگع عطشان
ام الشيّم

حفضت اسم دين النبي واركانه معموره
لو چان مصحف للگمر چا هيه بي سوره
الوادي المقدس للستر سيناء وي طوره
ليهسه وايگلهه الشرف يم عون مشكوره

صارت مثل سدره
بت فاطمه الزهره
/////////
چنهه جبل..مليانه احزان وصبر
چنهه جبل..داست على راس الشمر

يالبيدهه كلشي
يوگف يرد يمشي
نور الخدر يغشي
لبوة علي

طبت عله العسكر
زينب مثل حيدر
چن قالعه خيبر
لبوة علي

الصعبه يم ام الخدر اسهل امن السهله
مريم قرتلچ فاتحه من هزت النخله
اختصرت مضامين العشگ كلهه ابفرد جمله
عدنه الذبح والتضحيه من العسل احله

لاهل العشگ عِبره
بت فاطمه الزهره
/////////
شالت علم..من مملكة اهل الستر
شالت علم.. واموقع امن ام الخدر

اما بعد يا ناس
هاي اني اخت عباس
والما قبل ينداس
ام الخدر

والكوثر وياسين
والطاعن ابرمحين
واخت الحسن وحسين
ام الخدر


طف كربله خلص تره وطف العبي يبدي
مرسال خطيته ابدمعتي النازله ابخدي
السبابه ترعبهم تضل منا لحد لحدي
والرايه منشوره الى ان يضهر المهدي

مكتوب بي عَبره
بت فاطمه الزهره
/////////
تعدل الف.. مرعوبه كل اهل الكفر
تعدل الف..كربله سوت بالقصر

طبت عله اهل الشام
هيه وسرب ايتام
حطمت كل اصنام
ذلت زلم

گالولي مسبيه
بس هيه علويه
بحچايه قدسيه
ذلت زلم

موقف حصل كل الخلگ خلتهه متعجبه
تقضي الحوائج بالسبي واتوزع ابــــجربه
هوه الستر ما يُكتَسَب الستر من ربه
بحجاب زينب يا خلگ متغطيه الكعبه

وانتصرت الثوره
بت فاطمه الزهره
/////////
حسين حيدر اللامي

يا موسى الكاضم

كانَ في المِحرابِ أم فَوقَ النَّعيم
إبنُ جَعفَر أم تُرى موسى الكَليم
——————————————
حُزنُهُ لَيسَ قُيوداً في اليَــدين
كانَ يَبكي جازِعاً نَحرَ الحُسَين
دَمـعُهُ خاضَ سَماءَ الخافِقَين

وَ أنينٌ زاد مِن سَبيِّ الحَريم

——————————————
قُبَةٌ قَد أزهَــــرَت كُلَّ الـبِلاد
هيَ بَغدادٌ لِموسى وَ الجَـواد
شامِخٌ لِلدَهرِ صارَ كالعِمـــاد

كاضِمٌ لِلغَيضِ مَرحومٌ رَحيم

——————————————
نورُهُ يُغشي العُيونَ المُضلِـمه
سَيدي صارَ أمـــيرَ العاصِمـه
كَيفَ لا وَ النَّسلُ نَسلُ فاطِمه

بَل أميراً وَ إمامٌ وَ زَعيم

——————————————
باقـــياً رُغمَ أُنوفِ الحــاقِدين
قَبـــرُهُ صارَ مَــلاذَ الزائِـــرين
أَينَ هُـم قَد أَصبَحو وَ هوَ أين

صارَ في الفِردَوسِ صاروا في الجحيم

——————————————
هوَ يَــــدعو رافِــــعاً كَـفّاً رَحـوم
إكفِ يا رَب شيعَتي كُلَّ الهُـــموم
هَل يُـجازى بِالسِجونِ وَ السُموم

سُمُّهُ مِن كَفِّ شَيطانٍ رَجيم

——————————————
هوه لو بس يرفع اچفوف الدعاء
بالــسجن واتســـيّر اعليه انبياء
—————————————
هالسجين ارعب حديث السنسله
كل ملائكة السمه گصدت اله
وي رجب بغداد تصبح كربله

وتنهض الشيعه وتجددله الولاء

——————————————
ساجن السجان عنوان الصمود
الهذا يومك ترجف امن اسمه القيود
همه اهل البيت اسياد الوجود

مدرسه للتضحيه وفن الاباء

——————————————
بالسجون وقابض اگلوب الزلم
گُبِّته ضلت تشع مثل النجم
صعد للجنه العضيمه مبتسم

اسد بغداد الشهم رد للسماء

——————————————
حسين حيدر اللامي

القصيده: مكسور ولبيته رجع

اداء: الرادود سيد حيدر الموسوي

كلمات : حسين حيدر اللامي

https://youtu.be/CW8HHaMCUZA?si=vAqgPIuHgT0sQH5s

القصيده: شيعوها بليل

اداء: الرادود هشام الغراوي

كلمات :حسين حيدر اللامي


https://youtu.be/JFZKXyndqRs?si=sgwzIyInrAZ7GJdt

مدد مدد يابو الرضا
/////////////////////////
ياهو الاجه والدربك اتعنه
اتگول الروايه يضمن الجنه

من ابعيد انشم الحضره..گبرك بي ريحه امن الزهره..
ما يتراجع حبنه تجاهك..يالحبيناك اعله الفطره

مدد مدد يابو الرضا
/////////////////////////
هوه اليطوفك ما يضل تعبه
ابنص الصحن چن طايف الكعبه

باب الحاجه الما يتكرر..امك فاطم جدك حيدر
يالگبتك احلى امن الدنيه.. وابهل الدنيه چفك محور

مدد مدد يابو الرضا
/////////////////////////
حيره صفاتك ماكو بالدنيه
مسجون لكن كله حنيه

يا مصحف نازل يا آيه..طلعت لعيونك مشايه
من البصره الحد الحضره.. زوارك يا موسى اهوايه

مدد مدد يابو الرضا
/////////////////////////
حگهه الملائك تحضر اتطوفك
هيه السلاسل باست اچفوفك

يا سورة كوثر مقريه..ابسجنك بس انته ابحريه
گلبي ايريد ايعوف اضلوعي..لو جابو موسى وطاريه

مدد مدد يابو الرضا
/////////////////////////
ياداحي بغداد وضواحيهه
گبرك تره هوه الي حاميهه


متعودين احنه وكالعاده.. ياهو اليگصد فاز امراده
من الله يا عالم هايه .. كله احروره دم الساده

مدد مدد يابو الرضا
/////////////////////////
حسين حيدر اللامي

القصيده:مشايه بغداد

اداء:الرادود حسين العقابي

كلمات: حيدر اللامي


https://youtu.be/wDqH1y9reEk?
si=zTHwkfG-aJIRPllh

القصيده:عالخيمه شل ايأشر

اداء:الرادود عباس البديري

كلمات: حسين حيدر اللامي

المجلس الاسبوعي مدرسة الرادود الحسيني

https://youtu.be/T5YWNAKB8ZM?si=7FS1U3dUbC9BkBJR

شَعبانُ أَنتَ وطارِدُ الأَحزانِ
فيكَ السُرورُ وَ ضِحكَتي عُنواني

ولِدَ الحُسَينُ فَيا حَناجِرُ هَلّلي
ولِدَ الحُسَينُ بِرَحمَةِ الرّحمنِ

لا زِلتُ أَفخَرُ حينَ أَذكُرُ نِعمَةً
أنَّ الإله بِطينِهِ سَوّاني

في رابِعِ الأيامِ قَد ولِدَ القَمَر
في ذِكرِهِ قَد يَرتَوي العطشانِ

عَباسُ غيرَةُ حَيدَرٍ صَبرُ النَّبي
عَينُ البَتولِ و حِكمَةُ الحَسَنانِ

وَبِخامِسِ الأَيامِ يولَدُ زَينُهُم
لَيثُ العِبادَةِ سَيّدُ الإيمانِ

وَ عَزيزُ والِدِهِ عَليُّ الأكبَرُ
ولِدَ الوفا إحدى عَشَر شَّعبانِ

وَ القائِمُ المَهديُّ نَوَّرَ أَرضَنا
وَغَداً بِحُكمِهِ يَسمو كالميزانِ

حسين حيدر اللامي

ميلاد الامام الحسين ع
ثالث من شهر شعبان..بي تــتكحل الــــعين
نزل جبريل بچفوفه..يهز كاروك الحــسيـن
//////////////////////////////////////////////////////
ياعلـي صاحــت وطــلگت فاطـمه
ما ايكَفّي اگماط چي جابـــت سمه
والملائك كلهه بس سمـعت حسين
صــارت ابــاب النبــي مــتزاحـــمه

عم الفرح هذا اليوم..وخير انترست الــگاع
من كاروكه گام حسين..يدز للعرش اشعاع

//////////////////////////////////////////////////////
كلهه حاچت فاطمه اهل العالمَــين
حيل مشكوره لان جـبتي الــحسيـن
هوه حاجـــب باقي برســوم الزمـان
وعله الحاجب والله ابد ماتعله عين

سلمان اعتنه الحيدر..وصاح النبي اشسماه
گله حسين هـذا اسـمه..وهوه جــاوبه الله

//////////////////////////////////////////////////////
اسمه راحه اعله الشفايف والسبب
هوه من مــاء وتراب ومــن ذهـب
لان هوه بـزغ وجـــهه بــهالشــهر
بالحســين ايباهي شعبان ابرجــب

وابهذا الشهر نازل..والجده اقرب انسان
گام ايباهي بالاشهر.. ويفخر شهر شعبان

//////////////////////////////////////////////////////
الف يوسف يركع الـــهذا الجــمال
نور وجه حسيــن واقـــع لو خيال
چنه كوكب مدري الله اشخـله بي
لمعــة اعيونه احَـدّ امن النــصال

ابوكت كلشي صبح صحراء..صار حسين بستان
ابوجهه اموزعه الايات.. بشر بــس چـــنه قران

//////////////////////////////////////////////////////
غالي چي خصّا القــران الكــريم
هوه بسم الله الرحمن الرحـــيم
راح نهدي السيد الحب والجمال
نتلو من ايات اصحاب الرقــــيم

هذا الغالي ابو اليمه..اسمه يمشي بالدم
امه الكوثر وجابــت..لاهل البــيت زمـزم

//////////////////////////////////////////////////////
حسين حيدر اللامي

شعبان بي يحله السهر ..بميلاد عباس الكمر
حي الله سبع الگنطره..عباس
////////////
جانه يا هالناس هذا اجمل خبر
الليله نفرح وي ابونه المنتضر
طلگت ارجاء السمه باجمل نهر
وجابتلنه اليوم عباس الگمر

سلطان فوگ اهل الستر..حماي لضعون الخدر
حي الله سبع الگنطره..عباس
////////////
وابسواد اعيونه حل كل الغسق
والضوه وجناته نقراله الفلق
حسين هنياله باخو هيج انرزق
باب للحاجات للان انطرق

عباس غيره ممتلي .. من يمشي چن يمشي علي
حي الله سبع الگنطره..عباس
////////////
اول احچايه تگله ام البنين
صير خادم لابن سيد المرسلين
ايزيد عشگه اشما يزيد اويه السنين
نهر للخوه وضفافه امن الحنين

يوم القيامه ينعرض ..عباس هوه اجمل فرض
حي الله سبع الگنطره..عباس
////////////
جاءَ من اقصى الضوه لاقصا الجمال
ماكو يم شباكه اي كلمة محال
هوه تاج اعله الرجوله وعالرجال
هوه عجبه لو حقيقه لو خيال

وجناته چم سورة فتح..وابعينه مرسوم الصبح
////////////
هوه مولود ويلالي چن نجم
وعنده طف بي يكسر اخشوم الزلم
بالبصيره نافذ ومنهج علم
لو جبت طاريه صيحو والنعم

وامكلل باجمل هدم .. عباس يا شيخ الزلم

////////////
حسين حيدر اللامي

لولادة سيدي ومولاي صاحب الزمان
عجل الله فرجه:

دَع فَجرَ كُلِّ النّائِمينَ سُباتُ
وَابزَغ لِفَرحٍ وَامسَحِ العَبَراتُ

قَد جاءنا المَهديُّ بِاسمِ مُحَمَّدٍ
فَلِذِكرِ أَحمَدَ تَعتَلي الصَلَواتُ

وَكَأَنَّهُ العَباسُ لَيلَ تَمامِهِ
مِن كَفِّهِ يَسقي الفُراتُ فُراتُ

يَعلو على عَلياءَ مِن عَلياءِ
وَ أَهلُ العُلا لِلعالياتِ عُلاةُ

مُتَفَضِلٌ فَضلٌ عَلى الافضالِ
وَأَعارَ أَيضاً لِلصَّلاةِ صَلاةُ

دَرَسُ الإبا في كَفِّ مَعصومٍ أَبيّ
وَأَهلُ الإبا طولَ الزَّمانِ أُباةُ

ولِدَ على قَيدِ الحيا ماذا جرى
أَعطى بِكَفيّهِ الحياةَ حَياةُ

إنولد والعسكري ابهاللحضه شاهد
نزل من بطن امه لله ساجد

حافض عالگلب تسبيحة ام حسين
ابجامع مو مهد مهدينه گاعد

ملائكة السمه تفرش افراشه اتريد
وينزل للارض كلساع واحد


حسين حيدر اللامي

ملائكة السمه..تنادي فاطمه
ابو صالح اجه
//////
كل الخلايگ والارض مبتشره
جاكم ولد يشبه علي والزهره
عطر النبوه والامامه عطره
چنه محمد نازل ابسامره

بگماطه .. بس ساجد
ابجامع ..چن گاعد
تسبيحه .. للواحد
مهدينه .. يالقائد

علي علي علي علي .. مهدينه هالليله انولد
علي علي علي علي .. للباري بگماطه سجد

يضوّي المضلمه .. مثل حامي الحمه
ابو صالح اجه
//////
من دوحة العطر الالهي نسله
وراث محمد بالصفات واهله
صوت الخدامه ابهل مسيه يعله
من الشهد ذكر ابو صالح احله

بسم الله .. الدائم
يافرحتنه .. القائم
لاهل البيت .. الخاتم
گلبي ابذكره.. هايم



علي علي علي علي .. خــــيراته للدنيه شمل
علي علي علي علي .. لاهل الارض كوكب نزل

رزق هالمكرمه .. يزيل القاتمه
ابو صالح اجه
///////
ابنص المهد لكن تشاهد صـوره
موسى الكليم ابعز وقاره وطوره
والشيعه كلهه ابصايته منصوره
ابمصحف هدايه هوه نازل سوره

يا ياسيــن..وكوثر
ذو الفقار..وحيدر
ياهو ايوصفه..اتحيّر
من التوصيف ..اكبر

علي علي علي علي .. بهذا الفرح يحله السهر
علي علي علي علي .. وكل ناصبي خشمه انكسر

ابن حامي الحمه .. باوصافه والدِمه
ابو صالح اجه
////
بخمسطعش شعبان صوت انذيعه
وي ابو صالح للابد منبيعه
قائدنه واجب كل كلامه انطيعه
ولخاطر اعيونه اسمنه الشيعه

شيخ الكل ..الديره
وامغرگنه.. ابخيره
مانوصل.. تفسيره
ربنه ابدع.. تصويره


علي علي علي علي.. بلسم الكل عله وجرح
علي علي علي علي .. وجهه مثل وجه الصبح

التعوفه نادمه .. تتبعه الفاهمه
ابو صالح اجه
///
الليله فرصتنه ونگول احچايه
هذا عهدنه وللابد وفّايه
وين الله يحضر بيده ناشر رايه
نبني البقيع ونعتني مشايه

خدامك ..ونحبك
خلينه..ابنص گلبك
درب الباري..ابدربك
يسوه الدنيه..حبك

علي علي علي علي.. طول الدهر نِتنَطَّرَك
علي علي علي علي .. خلينه كلنه ابعسكرك

ومِسكُ الخاتمه.. الگلوب الهيامه
////
حسين حيدر اللامي

القصيدة - من طين لو من ياقوت
كلمات | حسين حيدر اللامي

أداء | سيف المطيري
محمد السوره ميري
مصطفى التميمي
أمير الدراجي





https://youtu.be/Bxz4uDwMcSY?si=Rvem2rwMsxJy7xg2

القصيده:باقة عشگ

اداء:الرادود سيف المطيري

كلمات:حسين حيدر اللامي


https://youtu.be/WELPqvQ6knI?si=oe_FBsatn4mg6Uph