السيده الزهراء عليها السلام حين دخلت لقصر الطاغيه بدات بخطبتها:

احنه ناس اويه النجم عنوانهه
التركع إبچفنه إنسهه وجانهه
___________________
احنه شمس العافيه إبوكت البرد
احنه اصل الدنيه والبـــاقي سرد
سادة السادات عــــدنه من تعد
وبيدنه الدنيه ونحــــرك أوزانهه
___________________
راح اعدّدلك واريـــدنك تـــشوف
احنه خلينه النقاط اعله الحــروف
الكعبه تسعى الدارنه وبينه تطوف
چيف قسط اهل السمه وميزانهه

___________________
الله رازقنـــه خلــــگ كــلش طويل
إنعَدّل الدنيــــه إذا بيكـــم تميـــل
ايصير خير امن الله يم چفنه القليل
ووالدي الهاي الخلگ سلطانهه
___________________
انتم اصحــــاب الكفر والطــلقـاء
واحنه سمانه الله اصحاب الكساء
ناس مانعرف شنــــو معنه الفـناء
والحيا حبنه صبح شريانهه
__________________
حادّين وما تِـــحد حَدنه حـــدود
كلشي لامس چفنه يصعد للخلود
وإنته بس لا من نسل عاد وثـمود
اي أكيد وهم مثل كفرانهه
__________________
خاف ناسي وخاف ماعندك علم
أوصـــياء وبـــيدنه إنلوح النجم
الله شـــــاء الكون الــنه ينرسم
والسمه النه اصبحت بُنيانهه
__________________
حسين حيدر اللامي

ذاتَ يَومٍ جَلَسو الإِخـوه مَعَاً
سَأَلَ العَباسُ عَنْ أُمِ الحَسَن
حَدّثوني وَضعَها.. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
يسأل العـباس وإدموعه جـــرن
ياهو گلولي كسر ضلع أُم حـسن
وإبخياله إيـريد يرجــع بالزمــن
من سؤاله الباب وإجذوعه بچن

زَينَبٌ قامَت لِكَي تَروي لَهُ
بَدَأَ العباسُ يَجــري دَمعَهُ
قِصَةٌ في بابِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
ذاكه باب العله صــدر أمي إنـــطبگ
إهنا بچينه إهنانه من خدهه إنصفگ
وأذكر إعله العتبه محسنهه إنســحگ
چف إديـــهه إبجـمـر وإبـنـار إحتـرگ

بَقيَت تَحتامُ خَلفَ البابِ
زُمرَةُ الكُفّارِ في الأَعتـابِ
أَكثَرو في ضَربِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
إنوب سولفله الحسن موقف صعب
گلــه داســـو بيـــتنــه وادم غــرب
ورجع صاح إبحسره وإدموعه تصب
ياهـو يرضــه اگبـاله أُمه تنــضـرب

بَعدَها صارَ الحُسَينُ قائِماً
لِلمُصيبه راويــاً وَمُكــمِلاً
مِكمِلاً لِجَرحِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
يابو فاظل من لزمت أمـي وبــچيـــت
فَزَّت وإيديهــه مــحــترگه نســيــت
إشگد دعيت أُمي تِظل وإشگد دعـيت
مــادريــت إتــروح منــي مــا دريــت

وَسَمِــعــنا صارِخاً بَعــدَ زَمَـن
ياعلي نَحي الحُسَينَ وَ الحَسَنْ
صِرتُ أَشكو رَبـها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
من تجــر النفــس يلچــمهــه الـهـوه
أُمــنـه مــا تنــزف دمــه تنزف ظــوه
إهــوايــه حــاولــنـه نــدور عــن دوه
تالي مــاتــت وآنه كـل حــيلي خـــوه

لا يَزالُ الحُزنُ فينا مُنتَشِـر
نَحنُ نَبكي ظِلعَ أُمٍ مُنكَسِر
وَكَبيرٌ فَقدُها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
🖊️:حسين حيدر اللامي

مكسور ولبيته رجع—يمشي وعله وجـهه وگع
حيدر عجيبه حالته—ما يحچي من گد الوجع
————————————————-
طب منقهر حيدر علي..للــدار وإيصــب الدمـع
حيله إنهدم لمن لگه ..فاطمته مكــسورة ظــلع
باوع عله خدهه وصرخ..من صرخته طاح الجذع
وجهچ مثل وجه السمه..وجه السمه هم ينصفع؟

وإهنانه زينب شبگته—مسحت دموعه وباسِته
وَدّعهه بــويــه نادته—ما يحچي من گد الوجع
————————————————-
راحو سوه للمغتسل..واعيــونهم ســكته جــرن
ابچفه لزم زينب علي..وحسين لازم چف حســن
غَسَّلهه وايصيح ابحزن..وينچ تره اعيوني انعـمن
ومن ايده مرت عالظلع..اهنانه وگف حته الزمـن

طگة ظلع منهه سِمَع—عاف الغسل لحظه ورجع
يبچي بقه اهواي وجِزَع —ما يحچي من گد الوجع
————————————————-
قالـــع الباب وخيــبــره.. الباب كاســرله گلـــب
نار ابوسط صدره بقت..چي بالگـبر دافنلــه حب
إيگولون من گد البچي..بدموعه مرشوش الـدرب
صاير يطيح اعله الوجه..الما طاح فد يوم ابحرب

لجله بچت اهل السمه—بدموعه غَسَّل فاطمه
صارت حياته مظلمه —ما يحچي من گد الوجع
————————————————-
كسرو ظلع للفاتحه..خد السماوات انصـــطر
باقي وحيد ابغربـــته..غربة نجــوم ابــلا گمر
وايلچمه طاري المگبره..وجفنه تِعَوَّد عالسهر
الكاسر اظهور المعركه..بفراگ ام بيــته انكسر

ظل تايه ابوادي الهجر—صيف وعليه شح الصبر
ظي عينه دافنهه ابگبر —ما يحچي من گد الوجع
————————————————-
عاش ابدنيته مختنــگ..چي هاجر وراح الــهـوه
اصبح مريظ ابعلِّتــه ..و أُم الحـــسن هــيه دوه
عطشان ظل بير الصبر.. يلهج باسمهــه وارتــوه
عاشو سوه ابعشرة عمر..چا لــيش ما ماتو سوه

يذكر حرگ جفهه ابجمر—ويذكر الباب وينعصر
ظاع الامل ظاع العمر —ما يحچي من گد الوجع
————————————————-
🖊️:حسين حيدر اللامي

ميمر مجنس
هيه الشفع هيه الوتر
..هيه القظا هيه القدر
كوثر عظيم ام حسين..واتحبهه كل الفقره
——————————————————
هاي الذي رب العرش علّاهه
ماكو ارض ماكو سمه لو لاهه
فاز الذي يمشي عدل وياهــه

اتشد الهمم الكل الخدم..
غيمه وتصب خير ونِعَم
نتوظه كون المفــروظ.. لو گـلنه اســم الــزهــره
——————————————————
جانت هـدية طـه هيــه الكــوثـر
گله اليـظدك شــانه هوه الابــتر
ماكو كفو لام الحسن بس حيـدر

گله تره بس حــيدره ..
الـــهه كفو وعالمقدره
فارس مظر داحي الباب هوه اليصون العشره
——————————————————
يوم الحشر بيديهه تحمل رايــه
اتصيح الخدم واتكافئ المشايه
نوگف حدرهه آيه وابصـف آيـه

الي لطم والي انتحب..
وبالخدمه شد حيله وتعب
باچر تجـــيه الزهـراء.. اتفرحــه وتــزيـــد قــدره

——————————————————
اليدخل عزاهه ودمعه طاحت منه
باچر تگله اوليــدي طــب للجنــه
انوب الخلـــگ تــتحسر وتتـــمنه

لو خادِمه يم فاطمه..
واتظل تحسده ارض وسمه
هذا اقل شي موجود..وقيس اعله هــاي الفــكره

——————————————————
باچر كتاب المعبر اعلـــه النيه
اكتاب الخدم چنه شعر لطميه
والجنه چن باب وعزه احسينيه

نظره غداً امن ام الحسن..
بينه تظل طول الزمن
مشكوره مولاتي اهواي..اموفقتني ابچــي وأقره

——————————————————
🖊️:حسين حيدر اللامي

القصيده :مرسال الهجر

اداء: الرادود جسام الكعبي

كلمات : حسين حيدر اللامي

https://youtu.be/TmjcgHvtus4?si=tccAxqxd3sgRibEY

فَمُــذ رَأوهــا عَـــصَروها عَــصره
حد ما وصلهم صوت ظلع الزهره

آه يا أُمَّ الحَسَن —آه يا أُمَّ الحَسَن
///////////////////////////////////////////////
كلشي اختلف امره..من سطرو الزهره
محسنهه عالغبره..واگع مــثل شذره

باب من اجذوع من دفعو علــيهه
مشتعل بالنار واحترگن ايـــديهـه
والنذل بيده صطر وجه ام ابيــهه

لكنـــهــا لاذت وراءَ البــــابِ
گالت اموت وما يطيح احجابي

آه يا أُمَّ الحَسَن —آه يا أُمَّ الحَسَن
///////////////////////////////////////////////
لالا مراعوهه ..چا ليش عصروهه
تتلوه خـلوهه.. والدار حرگوهــه

والعلي لــــو ما امر ذيچ الوصــيه
چان محد إيده مدهه اعله الزچيه
وچان محسن ماوگع سكته رميــه

مكسورةَ الاضلاعِ بَل مــــحنيه
من مات ابوهه اتغيرت موهيه

///////////////////////////////////////////////
حيدر يـــهل دمعه..چن منكسر ضلعه
عايش بقه ابفجعه..من شاهد الصفعه

چفه بارد لكن ابنص روحه الف نار
ينلچم كلما يشوف اگباله بســمار
إبيا گلب رايح يشوف اولاده الازغار

عَن مَوتِها لِلدارِ كَيــــفَ يَذهَب
گد ما حنينه يخاف يلچم زينب

آه يا أُمَّ الحَسَن —آه يا أُمَّ الحَسَن
///////////////////////////////////////////////
مدري شنو اتكسر..يمكن گلب حيدر
من يمشــي يتعثر.. عالفرگه مايـگدر

الأصعب امن الموت سئلو شنهو ابو اتراب
گال حيدر حيــــل يكـــتل فگد الاحـــباب
تفرش اعيونك ادمــــوع ابعتبـــة الـــباب

مُكتَئِبَـــاً باِلحُزنِ تَـــغدو مُفعَــــم
اتعيش ابحياتك مثل ضلع امهشم

آه يا أُمَّ الحَسَن —آه يا أُمَّ الحَسَن
///////////////////////////////////////////////
الرد الشمس مرتين..مارجَّع ام حسين
مكـسور الاجناحين..منه خذاهه البَين

يحچي وي سلمان وادموعه جِريه
گله يا عم فاطـــمه ماتـــت بديه
ابلحظه طبت دارنه سكته المـنيه

في قِصَّتي رَبُّ الجَلاله يَشهَد
كفّار هجمو عله بت محمد

آه يا أُمَّ الحَسَن —آه يا أُمَّ الحَسَن
///////////////////////////////////////////////
حسين حيدر اللامي

سَأحمِلُ صَمتي..إلى حَيثُ أنتي..وَأمضي كَسير
أَنا لَستُ قـــادِر..علــى أنْ أُكابِر.. فَحُزني كَبير
_____________________________
في قَلبي ســؤالٌ باتَ مُـــحتارا
كَيفَ أَدخَلو في الظِلعِ مِسمارا
ألا شُلَّت يَدا مَن أَشــعَلَ النّارا
وَ فَجَّرَ في العُيونِ سَبــعَ أنهارا

قَتيلٌ لَديكِ.. فَمُدّي يَـــدَيكِ.. بِكِ أَستَجير
أَنا لَستُ قادِر..على أنْ أُكابِر.. فَحُزني كَبير
_____________________________
سَأَسقي بِدُموعي دَكَّـةَ القَـــبرِ
مِنَ الأَسحارِ حَتى مَطلَعِ الفَجرِ
أَجيبيني أَفاطِمُ مَااْلذي يَجــري
فَهَل مُتُّ أنا أَم أَنتـــي لا أدري

فَقَلبي فَجيعُ.. وَلا أَستَطيعُ..بَلاكِ المَســير
أَنا لَستُ قادِر..على أنْ أُكابِر.. فَحُزني كَبير
_____________________________
فَقارِبُ حُزنِنا قُربَ الأَســى يُرسي
وَذي عَيناكِ تَشكو ضَربَةَ الرّجسِ
أَما كُنــــتِ بِــقُربي لَيلَةَ الأَمـسِ
عودي فَالنَّهارُ بِحاجَةِ الشَـــمسِ

حَياتي عَسيره.. بِفَقدِ الأمــيره..يَمـــوتُ الامير
أَنا لَستُ قـــادِر..علــى أنْ أُكابِر.. فَحُزني كَبير
_____________________________
حينَ أَصبَحَ فَرضُ الاسى واجِـب
أَتى يَبكي عَليُّ إبـــنُ أَبي طـالِب
أَسَدُ الله في الهَيجا غَدا غاضِب
بَعدَ الفَقدِ اغدو اشحَبَاً ناحِــب

الى الآبِدينا..سَأَبقى حَزينــا..بِجُرحِ الـــــظَمير
أَنا لَستُ قـــادِر..علــى أنْ أُكابِر.. فَحُزني كَبير
_____________________________
في كُلِّ الاَماكِنِ تَبقى ذِكــــراكِ
أَنسى روحي حينَ أَقولُ أَنساكِ
يُمنايَ تَحِــنُّ لِدِفئِ يُــــمناكِ
أيا دُرّاً أَفيقي أَينَ مَحـــــــياكِ

وَ مِسكُ الخِتامِ..عَلَيكِ سَلامي.. بِدَمــــعٍ غَزير
أَنا لَستُ قـــادِر..علــى أنْ أُكابِر.. فَحُزني كَبير
_____________________________
حسين حيدر اللامي

انتي مــن گد ما حنــينــه الله يحــبچ
ومن اجه البسمار ظيف انطيتي ظلعچ

اني اول مــره اشوفنــلي امـيــره
تملك الكون وتنام اعله الحصيره
////////////////////////////////////////////////////
حيره إويـاچ فاطــم شكــتب وشــقره
وإســمچ بالــعرش سلـطــانة الفقـره
هديه إمن السمه تسبيحه لاهل البيت
سمــاهه النــّبي تسبـيــحــة الـزهـره

دارت اعليچ القرون ودارت اسنين
وانتي مفتاح الخلق يا ام الحسين

يالزچيه وانتــي خيمــتنه الچبيره
تملك الكون وتنام اعله الحصيره
////////////////////////////////////////////////////
يالأسمـــچ دوه للمــا بــرد جرحــه
تفــريــن الفلــك وي فـرَّة الـرحّــه
كل هاي الكواكب والشمس والكون
خاطتهه السمه وسوتهه الچ سبـحه

انتي كوثر بــت محـــمد نبي العزّه
واشتريتي الدنيه كلهه ابكسر خبزه

والله حيره اشنوصفچ اي والله حيره
تملك الكون وتنام اعله الحـــصيره
////////////////////////////////////////////////////
اتزوجتي علي هالفخـر واشـكــبره
وخلّفتي الحسن وحسين يا گـمره
شجره وچن غصن متفرع العباس
هله ابطول ابو فاظل كبَّر الشجره

ابعالم الارحام صرتي وچن تحاچيه
فاطمه ابخدر العقيله چن توصــيه

ابو فاظــل يالزچـــيه كــله غيـره
تملك الكون وتنام اعله الحصيره
////////////////////////////////////////////////////
هاي المعــجزه وكل الكــرامـات
يمـچ مو ســره لزمن ســـراوات
سرب من الملائك تجي كل يـوم
ابعتبـة دارچ اتلـم الصـــلاوات

نهر فيظچ بالكرامه عابر الـنيل
وينزل ايردد سلامه الچ جبريل

عالمه ابسر السمه كــلش خبيره
تملك الكون وتنام اعله الحصيره
////////////////////////////////////////////////////
لو سئلوني ياهو اجمل الاسماء
اكيد ابلا منازع فاطمه الزهـراء
افديلچ نظر عيني وهلي والروح
ويرحولچ فده الاموات والاحياء

والي عنده حاجه يم دارچ تعنه
باب بيتچ بالكـرم متروس حـنه

للموده وللعلـــم صــرتي سفيره
تملك الكون وتنام اعله الحصيره
////////////////////////////////////////////////////
حسين حيدر اللامي

من اجه الليل وصفن كلشي وسكت
اجت زينب غطّت اخوتهه وبچـــت

وشبگت حسين إشعجب. شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
مشت للباب وتهل سكته الدمــع
الحسن شافاهه ومشيهه ينسمع
رجعي يا زينب صرخ بس منفجع
إهناك يا خويه يكسرولـچ ظـلــع

إتگله خويه مادريتــك گاعـد
أرد أروح أمسح الدم الجامد

ويه باب أمي عتب . شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
گعدت إويه الباب وإتسولف محـن
إتگله ليش إكسرت ظلع ام الحسن
ومن بچت خشباته كلهه إتحـركــن
ويه زيـنب ناحــن إهــواي وبــچـن

دائِماً تبـــچي وتون وإتنـــوحــهه
إمن الحزن والنوح طلعت روحهه

تدعي عالچان السبب . شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
دخلت الحجرتهه واتصيح ابكسر
يمه وينچ گومي خنصلي الفجــر
يمه خَلَّص گلــبي اذاني الـــصبر
أنه إزغيــره ويني ويـــن الــهجـر

والله مشتاگتلج آنه اهوايه
منتظرتچ تبچي المصـلايه

إنتي من روحي أَحَب . شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
چنه ندعي وبالــدعاء أگـعــد وراچ
ليش غفله الموت من إيدي خذاچ
هسه وحدي وگمت أتغطه إبعباچ
يمه مريــلي ابحلـم واخذيني هاچ

دمعي يهمل هسه وينچ ما تجــين
إهوايه يبچون الحسن وي الحسين

اسمچ ابدمعي انكتب . شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
ردت ألزم إيــدهه قــبل الوفــاة
فزت وصاحت إديه إمحرّگـــات
وشاهدتهه گوه گامـت للـصلاة
مو ظلع يمكن ظلوع إمكسرّات

صارت إتگوم وتخط گوه الجِدَم
ويه كل دمعه تطيح إيسـيل دم

وحقهه من عدهه إنسلب . شافته إهوايه نحب
\//\/\/\/\/\/\/\//\/\/\/\/\/\/\/\/\/\/\/\/\/\/\/\/\/\/\/\/\/\/
🖊️: حسين حيدر اللامي

دارمي ٣دگات كربلائي:

دم مو دمع يا عين صُبّي المسيه
دارت الدنيه وطاح باب الزچيــه
—————————————-
دارت الدنيه وطاح باب ام الاحـسـيـن
حارت تلوذ اشلون تنطي الـوجه ويـن
بنت النبي يا ناس مـحـترگه الايــديـن

نار الحقد والموت صارت سريه
—————————————-
هاي الي رب الكــون جـاهاً رفعــهه
چف اجنبي وملعون عالخد صفـعهه
ام الحـــسن يا حـيف كافر دفــعهه

وغايب علي الكرار حامي الحميه

—————————————-
صاحت ابعالي الصوت يا فظه اسمعي
ويــنچ تره الكفّــار كســرولي ظلـــعي
دم عيني هاي اشلون سال اويه دمعـي

و الونه كالمعتاد ونه شجيه

—————————————-
وصّت علي الكرار يخفي گبرهـه
لمن اجه البسمار حار الصدرهه
حرمه بلا وليان آخ اشكبــرهـــه

مارعو حرمة بيت الله ونبيّه

—————————————-
رادت علي الكرار يبقه الــخلـيفه
بس اشيقنع انوب اهل السقيفـه
زمرة كـفر و شرار لا مو نضــيفـه

والمرتظه مگيود بس ابوصيه

—————————————-
🖊️:حسين حيدر اللامي

القصيده: فاطمة نور العين

اداء: الرادود الحسيني حيدر الخزعلي

كلمات: حسين حيدر اللامي

عزاء غريبة الشام الليالي الفاطميه
الروايه الاولى


https://youtu.be/cbOmjs9W0Lw?si=FMtLVEchVzl0cBmz

نزله:

يالرايد نجـــاتــك..اسمع هالوصيــه
روح إبچف الادموع..دگ باب الزچيه
_______________________
إدخل إعله المجلس—وإبدمعتك إجلس
إتخيل اهل البيت يمك واغمض العين

ومن تطيح العبره—تلگه چف الزهره
يحسب إدموع البچت لمصاب الحسين

إيصيح صوت ام الحسن لاهل الحنين
أُدخُـــلـــوها بِـــسَـــلامٍ آمــنــيــــن


تلگــه هالـــعباره..بابـــواب العزيـه
روح إبچف الادموع..دگ باب الزچيه
___________________
هيه حيل إتحبك—ومثل إبنهه إتحسبك
من يمر اعليك إسمهه دنگ الراس

بيهه يكثر زادك—منهه أخذ امــرادك
گلهه وفقيني إبخدمتي إبروح عباس

بالشدد هيه التمد چفهه الرحيم
إسأل إمجرب ولا تـــسأل حكيم


لو رايد تغـــمرك..بالنضـــره الخفيه
روح إبچف الادموع..دگ باب الزچيه
___________________
هايه ام الفقره—النه نزلـــت دُرّه
تترس إچفوفي لَوَّن مَديت إديه

عرّفتنه إعليهه— ومحتوه ماظيهه
حيل مشكوره الليالي الفاطميه

ابچي واطلب حاجتك وي الدعــاء
گله الٰهي إبداعت اصحاب الكساء


كلهه ماتــفيدك..من هـــاي البــريه
روح إبچف الادموع..دگ باب الزچيه
___________________
خل تصير النيه..دمعه وحســـينيه
هايه ام الهادي الله اموصي بيهه

تختفي سُكّانهه.. وتنمحي اوطـــانهه
ابكيفهه ولو حَرَّكت إصبع إيديهه


إبأذن الله للزچيه كلــــــشي دون
ابكلمه وحده اتگولهه كن فيكون

تكـرم للإجـــاهه..ام روح الأبــــيـــه
روح إبچف الادموع..دگ باب الزچيه
___________________
فاطمه الإنسيه.. السيده العلويه
هنه خمس احروف بيهه تلهج الروح

بالخطر تحمينه..چفهه دوم اعلينه
من نزف ذاكه ضلعهه اتشافي الاجروح

انعم الله اعليهه هاي ام الوجود
الارتباط ابخالد ايســـبب خـلود

يبقه عالي اســـمك..منـــا للـــمنيه
روح إبچف الادموع..دگ باب الزچيه
___________________
حسين حيدر اللامي

بابُ الأَسى وَ الأوْجاعِ
مِســمارُهُ في أَضلاعي

تَمَهَّلي تَمَهَّلي..يا فاطِمه هذا علي
////////////////////////////////////////////////
چانــت اتغطيــــچ إديه وهسه غطــاچ التـراب
حيدر اخلافچ يتيم إظلوعه هم عاصرهه بـــاب
الدنيه بين اعيوني صارت تشبه الوان الســراب
امقرحات إجفون عيــــني وطايح ابديرة عذاب

ذي زَينَبٌ زادَت هَـمّي
قالَت فَهَل رَحَلَت أُمي

هذا ندائي يَعتَلي ..يا فاطِمه هذا علي
////////////////////////////////////////////////
من بعد عشره ومشاعر فرگتچ صارت صدگ
هسه اصبح چفي بارد وانتي چـــفچ محترگ
أَمَّنــــت يـم باب گبرچ ضلــٰع لمّن نفتــرگ
والگبر مو مثـــل بابچ عالـــصدر ماينطبــگ

يا زَهرَتي وَسْطَ الدارِ
مَجروحَةً بِالمِسمارِ

بِكِ هُمومي تَنجَلي .يا فاطِمه هذا علي
////////////////////////////////////////////////
فاطمه ام روح العزيزه إشلون ضمّاچ اللحد
كل خظار اسنيني صحره وبالگبر دافـن ورد
مدّي إيدچ يالحنينه إچفوفي جاساهه البرد
عالگبر اوگف واسلّم والصده وحـــشه يرد

سارَ اللظى في الأَحشاءِ
أَحتاجُكِ يا زَهــــــرائي

وَالدَّمعُ يَشكو ما يَلي .يا فاطِمه هذا علي
////////////////////////////////////////////////
التارس الدنيه إبوجوده من عگب عينچ وحيد
حرب يــــفراگ الزچيه وحيدر الـطايح شهيد
حلم نتلاگه سويه وهالحـــلم اصبـــح بـعيد
اتكسرن بيبان گلبي واني الأمـليّنِ الـــــحَديد

أغدو كَسيراً بِالحَسره
ظاعَت مِنَّ الكَفِّ دُرّه

قَلبي الحَزينُ يَشكو لي .يا فاطِمه هذا علي
////////////////////////////////////////////////
حضّرت تابوت گلــــبي ودمعـــي يحفر بالگبر
جيتچ وقرآني بيـدي آنه وادمــــوعي الحـــمر
إشتاگت إعيوني الوگفتچ گومي خنصلي الفجر
جوهره ورحتي إمن إديه وراحت أحلام العمـــر

شَهيدَةُ البابِ الكَوثَر
لِفَقــدِكِ يَبكي حَيدَر

نادَيتُكِ لا تَرحَلي .يا فاطِمه هذا علي
////////////////////////////////////////////////
حسين حيدر اللامي

القصيده:صدى الزهره

اداء:سيد صادق البخاتي

كلمات:حسين حيدر اللامي

المجلس الاسبوعي لمدرسة الرادود الحسيني


https://youtu.be/L1espZJNL0g?si=P9mrvUT0oYwyMeO4

شوط كريلائي


ابونه امن الزغر لمنه__وگال استمعو يولادي
التــدبر دنـــيته وياه—خل ينخه علي الهادي
___________________________
اعذيبي بالصحن كل يوم_يفتر ضال طالــع طــاب
حته الشايب التسعين_يذب عوچيـته يرجع شاب
ابمهد عبد الله من ينخون_تنحل مسئلة الاصلاب

اهناك إبأرض سامره
توزع عافيه الزهــره
تدري بناسهه فقـره

إمراده ياخذه إمربع_البالشده علي اينادي

_______________________
عله الله وعله اهل البيت—إبداية كلشي من ابدي
وأنه بهالدمعه رايد كون__ يرضه سيدي المهدي
وأبد مو حاجه دمعه اطلب_ومو ايدي امد خدي

يقبـــلوني عبـــد ياريـت
دخيل ابصاية اهل البيت
عله الهـــادي أنه ونّيــت

عشرة خادم ومعصوم_ واتفاخر إبأسيادي

_______________________
حي الله بنــي عدنان_العلم الله نزل عـــدهه
نجي وحاجاتنه رايات__يم شباچه نعــگدهه
ميرد الطلب هيهات__ الجده الشمس ردهه

يصيح الماخذ إمراده
مشكورين يالســـاده
يالمــشبعنه من زاده

عشگت الهادي والعباس_وآنه ابصلب اجدادي

_______________________
الما جامل بني العباس_ ومن لائه النعم تخجــل
البستان الضلم والجور_ابشجاعة گلبه هد منجل
فارس عالظلام ايشـــع_واعـــله الكلــفه يتــرجل


شــجاعة گـلبه ماتنقاس
ماخـذ شـمرة العـــباس
لدولة حيدره دگ ساس

الما يبدي بأبو محمد_ چا محسوب مابادي

_______________________
يحيي الموتى باذن الله_ماكو حد اله ولا بس
إبجماله الأعمه ضل إيشوف_وسكوته إينَطّق الاخرس
ماشايف بشر بالكون_الهواء ابصدره يتنفس


كريــم وبالكــرم دوله
ترابه امن الذهب اغله
صحّه ايطــيح عالعـلّه

ولو يطوي الارض ياناس_ هايه عنده شي عادي

_______________________
هذا الامـــام المفــترض قد افلح
كلهم غلط بس هوه الاينگط صح
نحزن الحزنه ولمن يفـــرح نفرح

(قَدّم لله احله اطروحه)

سبحان ربنه المصطفي هالصفوه
اهل الضلم قط ما نطاهم عـطوه
ربع الجرم قَدّمو عالحــــگ شكوه

(چي حط عالمَصخّهه املوحه)

_______________________
حسين حيدر اللامي