علي الاكبر عليه السلام:

علي اموذر وذر من شافته العين
عزيز الروح كاسر گلـب الحسين

على الدنيه العفه بعدك.. تراب ودم عله خدك
_________________
مُحَمَّد طايح اعله الگاع—ودمه اعله الارض خضّرّ
شيصير الأبو لو شـــاف—ابـــنه ابــكربله اتطـشر
هذا الماكو منه اوصاف__ لا بالبــحر لا بـــالبـــر
لا ماچانت إعــله البـال__ألمّ إبـــهــامــة الأكبــر

ألم إبجسمه واسمع بويه عطشان
جسم إوليدك إمن الطعن تعــبان

إذا روحن تضل وحدك .. تراب ودم عله خدك
_____________
اشوف الدنــيه رحلة مــوت__من خيماتي حد جسمه
الشمس طاحت عله التربان__طفه نوره وصفت ضلمه
واصــل للعـــرش يانـــاس__مــن گد النــــــزف دمه
طحــت مــن المهر للـــگاع__ اتــمـــدد ردت يـــمـه

علي الاكبر حبيـــبي و آه لو مات
كون ابطيحته اتطيح السماوات

علي وجدك علي ايردك .. تراب ودم عله خدك
_____________
خنجر نابت ابصدره__ هذا الصدره بس يــــنشم
عطشان ويريد الماي__ اوليدي الطـوله چن زمزم
واحد صاح من ابعيد__طعنـــته ابخنجــر امــثلّم
يحسين ابنك اتطشـر__شِــتلم بـــعـــد ما ينلَــم

أركض وحدي آنه ابظهر عاشـــور
لگيت اوليدي بس ابراسه مطبور

علي بويه طحت عندك .. تراب ودم عله خدك
_____________
خل انسولف آنه إويـــاك__گتله اوليــدي عالـعشـــره
وسفه إبنص ضهر عاشـــور__ تعبي الــحافر ايطشــره
يـــا أول نجم مذبـــوح__وطحت فوگ الترب شــذره
إسم الله إمن العطش كتّال__اتحضرك فاطمه الزهره

حبيبي وروحي گوم إوياي أناغيك
جدك بس تغمض العيـن يرويك

وما تضمه إبحضن جدك .. تراب ودم عله خدك
_____________
يالچنك صلاة الليل __ بيك إشـگد بنيـــت أحلام
دمك فوگ وجهك ليش__ علي يوليدي صار إلثام
نــام إبگلــبي يوليــدي__ ليش إعــله الترابه إتنام
جبتك للخيم وأنـــعاك__ تعب إســـنيني لا مادام

نور الشمس حار وخاف يچويك
راح افرش عباتي حته اغطيـــك

فراغ ابروحي شيسدَّك .. تراب ودم عله خدك
_____________
حسين حيدر اللامي

العليله وحمـيده حــچن فد مره
لغتهن مدامع توضح الفكره

عاللي طاح امن القصر..والوگع من المهر
بس مدامعهن حمر..مصيبه
————————————————
فاطمه المكسوره بدت تنقل صوره
عن الهجر
اتگول ظايع عمري وريته يگطع نحري
سيف الشمر
حايره ابموضوعه امكسرات اضلوعه
وكت الضهر

حسين ابوي ابيوم عاشر منسحگ
وضهره بتــراب الوطيــه مـحترگ
راسه عن جسمه الـــموذر مفترگ

جاوبــتهه حــميده وتــهل الدمــعه
عمي الحسين ابچفوفه اصابع تسعه

وسولفت باقي الكسر ..والوگع من المهر
واعيونهن صارن حمر..مصيبه
————————————————
اهنا حميده التنقل الفرگه مره وتكتل
ماتنجرع
بالگلب ظل يهدم إفراگ ابويه مسلم
وحار الدمع
امفطرات اشفافه امغيرات اوصافه
واني انفجع

من على قـصــر الامــــاره لـلارض
چنهه خيل وعالظلع گـامـت تـرظ
أذَّن الموت ومشه ايكــمل الفرض

اهنا حميده الوحيده تدگ عالـهامه
اتگول ابويه ابوگعته هشم بعـظامه

بعده احس ظاع العمر ..والوگع من المهر
بس مدامعهن حمر..مصيبه
————————————————
العليله تحچي وبيهه كلشي يبچي
من القهر
واگع ابنص حومه امسلبات اهدومه
ابجبهه حجر
ابصدره حافر داسه وشمر گاطع راسه
وگلبي انكسر

الحگلــنه نادتـه زينـب ســمــع
إبـگلبه حرگه وعود لخيامه فزع
راد يوگف بس عله وجهـه وگـع

ياحمــيده ابويه الحــرگ دلالـه
لمَّن شافت عيونه سبايه اعياله
ابسوطه يضربهم شمر ..والوگع من المهر
بس مدامعهن حمر..مصيبه
————————————————
يالعليله إبالي إفراگ ابوي الغالي
لمَّن رحل
قاصداً للكوفه والمنايه اتطوفه
غاب الأمل
ماشرب مي حسره اتذكر ابن الزهره
ومنه خجل

من ابو اليمه مسـح هامتي بيــد
يعني مسلم والدچ طايح شـهيـد
مثل ابو السجاد هم باقي وحيـد

امن القصر رافع ايده لأبوچ وسـلّم
رد سـلامه ابكسرته واحسّــه اتألم
رد سلامه منقهر ..والوگع من المهر
بس مدامعهن حمر..مصيبه
————————————————
ياحميده أفهم افراگه سيف امثلّم
يذبح نحر
الأبو چن خيمه والهجر چن هيمه
وظيم القدر
ظل اخوي ايدوّر نقص چفه الخُنصر
وگلبه انفطر

جسمه لمّاه ابحصيره ابلايـه حيل
مـن كثـر ماگلبته وسـحگته الخيل
والنــهار ابلايه ابـوي ابــعيـني ليل

ياحميده اليفارگ ابــو من زغره
يبقه كل يوم يتاني مماته وگبره
ايشافي اوجاعه الگبر ..والوگع من المهر
بس مدامعهن حمر..مصيبه
————————————————
حسين حيدر اللامي

القصيده:إجه شهرك

اداء.:الرادود الحسيني يقظان النوري

كلمات:حسين حيدر اللامي

https://youtu.be/mo7K89u-5NQ?
si=UjvgHJyrsW3aFsQI

القصيده: إمامي سليب

الرادود الحسيني :يقظان النوري

كلمات :حسين حيدر اللامي


https://youtu.be/T371WwRSS3w?si=e0tqI-5tzx_h59aa

وداع الامام الحسين عليه السلام
مع سيدتي زينب عليمها السلام :

إتوادعنه بآخر نضره..وإمتوني شبگت نحره
ضليت اشم ابعطره..الله عطـــر الزهــــره
وچانت آخر جمله
نتلاگه اعله الـتـله
//////////////////////////////////////////////////////////
كلشي اختلف حل الهجر.. مدري اشحصل وكت الظهر
يم الخيم رحـــت إبألــم.. بچــفوفي قدمـــت الــمهر

وإتخايلته.. وإبــــآخر أنفـــــاس
جثه ابهيمه.. بس مابيهـه الراس

بعيوني رِسمت صوره..اضلوع الاخو مكسوره
واعله الترب منثــوره.. والهامه هم مطبـوره
اهناك ابچبده النبله
نتلاگه اعــله الــتـله
/////////////////////////////////////////////////////////
خويه اقترِب هوه اقترَب..وجهه مثل خيط الصبح
جيت آنه أشمن منحـره..اتخايلـته بي نابــت رمح

من شمــيته.. فرفح بيـــه الشــوگ
اشلون ابگلبي ..لو شفته ومسـحوگ

حاچاني اخوي وتعبي..زينب كسرتي گلبي
ياخويه هذا دربي..وادموعه ضلت تحـبي
فرض المدمع صــله
نتلاگه اعــله الــتـله
/////////////////////////////////////////////////////////
باخويه مو مـــالت ذبـــح..هيجي القدر مـــسرا بعــد
بس صعبه لو شفت الشمر..ابخنجر على صدرك صعد

كلهه اتنـــادي..زينب راحــت وين
حرگو گلبهه..ابراس الغالي حسين

ياخويه من اودعك..للخيمه يوصل ضـلعك
جوه الخيول اسمعك..يلچمني هذا وضعك
يالمــــن كلشي اغله
نتلاگه اعــله الــتـله
/////////////////////////////////////////////////////////
باوع عله متني وشهگ..واتخايل ابچفي حبل
معناهه لو راح الاخو..زينب تروح اعله الهزل

يعني ابهـــزله..وابين الارجاس
لا يمي حسين..ولا ضل عباس

ضلت باذاني احچايات..امتانيچ باب الساعات
سبي وشماته ولچمات..عينچ عله العـــلويات
وصاني احفـظ نسله
نتلاگه اعله التله

/////////////////////////////////////////////////////////

رايح يزينب من حچه..شلال انه ادموعي جرن
امودع يبن روحي وهلي..ايحرسك علي وام الحسن

رايح خويه..وراح اوياك الحيل
اسم الله الصدرك..خاف اتدوسه الخيل

مايبقه اليه ناصر..لو سحگتك حوافر
ويلاه يظيم العاشر..بينه يخويه اشصاير
امر الباري انقبله
نتلاگه اعــله الــتـله
/////////////////////////////////////////////////////////
حسين حيدر اللامي

السجاد عند جسد ابيه الحسين عليهما السلام:

وصل لاجل الدفن وادموعه بالعين
ولگاه اعله الوجه مگلوب الحسين
——————————————
وگف لحظه وحچــه چلمه چـبــيره
سلام الله علــه شــيخ الـعــشـيــره
يبــويــه راح المــك بالـحــصـيــره
بقية جسمك الـــطاهر صفت ويـن

—————————————
صفن كلشي وحچت بالسكته الادموع
وحچي الگــلب ياعــالــم ممسمــوع
بـــقه بــيده يــلـم إبــاقي الاضــلـوع
ولگه چــبد الابو مگــســـوم نـصــين

—————————————
انكسر يـم الجســد ويعد بالاجراح
وذكر لـمَّن صـعد عالصـــدر ذباح
الحـوافـر ابـــد ما خَــلَّنه يــرتـاح
تناثر جسـمه من الدوس صوبــين

—————————————
يگــله يا ضـوه فانوس الاخــيـام
مثل ارموش عينك فوگك اسهام
من ذبحوك گطعو راس الاسـلام
المصابك مو گلب ينراد گلبيــن

—————————————
من الصدمه صاح ابصوت مبحوح
اول مــره اشـوفك بويـه مـذبــوح
مــن النـوح رادت تطــلع الــروح
طير ويمشي مكســور الــجناحين

—————————————
حسين حيدر اللامي

القصيده:راح شيخ العشيره

أداء:الرادود مصطفى التميمي

كلمات :حسين حيدر اللامي

ليالي دفن الاجساد الطاهره

https://youtu.be/c9pyr7CxjEA?si=K95YmMRJxYFkSG6T

القصيده:توادعنه

أداء:الرادود الحسيني وليد البيضاوي

كلمات:حسين حيدر اللامي

العزا الشهري لهيئة العباس (ع)
[مدرسة الرادود الحسيني ]بغداد

https://youtu.be/a4f73emxN0Y?si=ZtY-gcMzW6a0I-l3

القصيده:لمّيت حيلي

أداء:الرادود الحسيني حمزه الساعدي

كلمات: حيدر اللامي

العزاء الشهري لهيئة العباس (ع) الرادود الحسيني


https://youtu.be/Fxs2wpyePWk?si=YgPMotdh96S6rCS4

السلام إعـله الشفــاه الذابــلات
سيدي من وجهك إعرفنه الحياة
………………………………………….
نور وجهك بلسمه بـاقــي ويشّــع
فرض والصلاك يتوضــه إبدمـــع
چفك إبخد الظلـم دايــم صَــفـع
وإنته بوصلتك تضوي إعله النــّجاة

………………………………………….
ما إلك تشبــيه بلدنيــــه أبد
واليخدمك بلعمر فاز وسـعد
يم أبو السجاد من جَدَّ وجـد
وهم تحظره إبگبره ساعات الممات

………………………………………….
كبريائـــك ذل أُنوف الحـــاقدين
الدين عطشان وروه إبدمك الدين
نجمه إسمك وإبسماء الخافقين
ولازم إنسلم عليك إبكل صلاة

………………………………………….
مارظيت الذل ولا ترظـــه اكــــيد
گلت ما قركم أنـه إقرار العبــــيد
صرت صفعه إيون بقه منهه يزيد
يا إبن حامي الحمه وإبن التقاة

………………………………………….
هيبه ابن هيبه تظل طول العمر
واحنه خدامك وكلنه نفتـــــخر
ياحسين وإنته دستــــور الصـبر
وانته دين الله القويم إبن الأُباة

………………………………………….
🖊️:حسين حيدر اللامي

بالريه مشت ..هلخـدمه هــوه
هيه إلعلّتي.. صارتـــــــلي دوه
—————————————
هلخدمه تجري إبدمي وإبشرياني
من زغري أبوي إعله اللطم ربانـي
التيه وجودي تدري وين إمچانــي
إبمجلس ابو السجاد خل يلگانــي

لو ناعي ..لو لاطم..لو دمعه بالــعين
بلدنيه..ماعندي..بس مجلس حسين

گلبي ضامي بس..بلمجلس روه
هيه إلعلّتي.. صارتــــــــلي دوه
—————————————
لمن احس گلبي يدگ إهــــوايه
يعني المواكب ناصبين إقـــرايه
وافرح واحضر بيرغي والــــرايه
لمن يجينه موعد المــــشـــايه

دمعاتي ..الي تـــــنزل..أبچيهه بحسـاس
والحاجه .. إشما تصعب..يگظيهه عـباس


دنيانه ظـلام..والـــخدمه ظوه
هيه إلعلّتي.. صارتـــــــلي دوه
—————————————
خل أحچي البگلبي وأگول البيه
اني بشر عايش على اللطـــميه
شهر المحرم من يهل لـــيليــه
أتنقل حســــينيه لحـــسيــنيه

متـعلم..علــــدمعه..موبيدي والله
زنجيلي..إعله اچتافي.. بلعزه محلاه

من زغري أحس..راظعهن سوه
هيه إلعلّتي.. صارتـــــــلي دوه
—————————————
حسين أبونه واحنه صرنه إيتامـه
وهذا العـــزه ساتر عله اللطامـه
مو بس صدر نطبرله هم الهامـه
بيوم القيامه تشهــــدلنه القامـه

بلمحشر..نـتحـــظر..هم نرفع اعــلام
اسرع ..واحد يدخل..بس سره الخدام

الله إيوَفُّقه..للخـــدمه النــوه
هيه إلعلّتي.. صارتـــــــلي دوه
—————————————
اليدخل عزاء وبگلبه شايـــل جــمره
هذا اكيد الزهــــره ترفـــــع قـــدره
والتنزل إدموعه إبجزع وإبحــســــره
من الإمام المهدي ياخذ أجــــــــــره

دمعاتي ..وآهـــاتي..إبكـــل عزيه
بس كون..إتسجلني..أُمنه الزچــيه

عن لا ننحسد..نقره القُــل هُوه
هيه إلعلّتي.. صارتـــــــلي دوه
—————————————
🖊️:حسين حيدر اللامي

غيره ووفه ام الخدر رفعة راس
من الله زينب هيه تشبه عباس
///////
گالو سبيه و هيه رفـعة هامه
شيمة اخوهه اتكفلّت بايتامه
ذلّت يزيد وســــــوّدت ايامه
نمرود هوه وحطمت اصنامه

بحچاية وحده سكتت احلوگ الناس
من الله زينب هـــيه تشـبه عـــباس
///////
طوفان دم يا زينب المـحـروسه
هيبة علي وابچفهه عصة موسه
خزرة الكافل بيهــه وي ناموسه
چنهه جبل والعانـداهه اتدوسه

هيه الخدر والتضحيه والنوماس
من الله زينب هيه تشــبه عباس
///////
من طاح ابو فاضل عالـــمسنــايه
زينب بدت قصتهـــه وي الـــرايه
زرعت عشگ بگلوبنه امن احچايه
ابهـــذا زرعهه خضّــرت مـــشايه

رفعت هممنه وبينه خلت احـساس
من الله زينب هـــيه تـــشبه عباس
///////
معروفه هـــــيه وتنذكر كالعاده
زينب سِبَت كل جيشهم والقاده
واليسأل اعليهه وجـــــوابه راده
من الله هوه حـــار دم الـــساده

ما همهه كل الي حچوه الارجاس
من الله زينب هيه تشبـــه عباس
///////
گد ما عضيمه وبالصبر موصــوفه
صيت العقيله اهناكه طب للكوفه
كعبه خدرهـه وانبـــياء اتطـــوفه
عبالك العـــباس مـــن اتــشوفـه

للباطـــل وللحـــق صـــفت كالمقياس
مـــن الله زيـــنب هـــيه تشــبه عباس
///////
حسين حيدر اللامي

إستشهاد الامام زين العابدين عليه السلام:

ما بَينَ الغُبارِ وَ اقتِرابِ اللَّيـــل
شاهَدتُ أَبي تَعلوا عَليهِ الخَيل

جِسمٌ على الغبرا فاَرَقَ الروحا
آهٍ كَالأَضاحي مـــاتَ مَذبوحا
—————————————-
التعب ماخذ كل مكانه ودم عله اوجوه الزغـار
ليل كل دنــيانه صارت كــسرو اضــلوع النهار
فجأة صارت دنيه صحره وعالنهر طاح الخـظار
الخــير نايم عله الغــبره واني ادري الرمل حــار

أَم حينَ هَوى في يَومِ عاشـــوراء
تَحتَ السِبطِ مَدَّت كَفَّها الزهراء؟

إبنُ العَرشِ هذا باتَ مَطــروحا
آهٍ كَالأَضاحي مــــاتَ مَذبـوحا
——————————————-
الـــقتل عاده النه نعـــرف والشـــهاده للأبـي
لكن اهـل البيــت احنه وما يلوگلـــنه السـبي
امدللات حسين ركضن نار مشتــــعله الـعبي
الچان ما ينشاف ضلهه شافهه اشچم اجـنبي


صِحتُ قُل أعوذُ وَبِرَبِ النّاسْ
مِن أَشرارِ قَومٍ قَتَـلوا العَباسْ

قَلبُ السِبطِ مِنهُ باتَ مَجروحا
آهٍ كَالأَضاحي مـــاتَ مَذبـوحا
—————————————-

كلشي يركض يوم عاشر شاهدت عيني العجب
فوگ صدر حسين يسحگ كُلُّ مَن هَـبَّ وَ دَب
غَيّمَت غيمة بواچي ومطـــرت اعـــلينه تعب
مو بعثنه حسين رحمه ليش بالحومه انسـلب

زَينَب عَــمَّتي تَندُبُ وَسطَ البَر
شاهِد إبنَكَ المَذبوح يا حَيـدَر

ذا أَطـــهَرُ دَمٍّ صــارَ مَسفــوحا
آهٍ كَالأَضاحي مــــاتَ مَذبـوحا
—————————————-
انذبحنه ابسيف فرگه امن المخيم للوريــد
اگبالي علوياتي كلـــــهن گيدوهن بالحديد
خاطبت عمتي الحنينه وما الي ناصر وحيد
شدّي راية ابو فاضل بلكي يرجع من جديد

آهٍ لَو يَرى هذا اباالفــــضَلِ
زَينَب تَلطِمُ الخَدَّ على التَّلِ

أَنَّـت ثُـــمَّ أَنَّــت أَنَّـتَ نوحــــا
آهٍ كَالأَضاحي مــــاتَ مَذبـوحا
—————————————-
آه يا شـيــخ العشـــيره تارك ابگلـــبي جــمر
اختلت احوال الطبيعه من گطع راسه الشمر
من سحگ هاي الحوافر ضهره طبگو بالصدر
ايعيــنه الله كل بنــاته اگــباله راحن لليــسر

في فَرضِ المَنايا وَ لظى العاشِــر
صَلّى فَوقَ صَدر ِالسِبطِ كَم حافِر

أَمّا جُرحُهُ بِالطَعنِ مَفــتوحـــا
آهٍ كَالأَضاحي مــــاتَ مَذبـوحا
—————————————-
حسين حيدر اللامي

عگيلي:

ضايع بس هُمَّه الكفلوني
———————————
ما اخسر بالدنـــيه واربح
لَمَّن حبيت الناس الصح
اهل البيت ابگلبي وافرح
تچايه وهمّه السندوني
———————————
هوه اليخدمهـــم عالفطـــره
بالـــتأكيد اتــــحبه الزهـــره
واني اطلب من عدهم نضـره
آني اعشگهم وايحبوني

———————————
منين ابدي وشحچيلك عنهم
إتخيل نــاس الله ايحـــبهــم
كل خيرات الدنيه ابچفهـــم
شگد اطلب بس ما فشلوني

———————————
نـــازح مــن ذنــبي وتعـــقيـده
رحلة شــوگ وحــيـل ابعيــده
وبــس حــسين المــدّالي إيده
حسين الما خيَّبهه إظنوني
———————————
ودّانــي لعــالـــم حنــيه
أقصــد يم باب إحسينيه
وأول مسـمعت اللطميه
نور الخدمه شَع بعيوني
———————————
حسين حيدر اللامي

ماعدنه صوت اعليكم انصيح..گمنه ابدمعنه انگوم وانطيح
مـــن فارگتكم بيه كـــسرت خــاطر
كل لحضه تمشي چنهه سحگة حافر
/////////////////////////////////////////////////
من البواچي اعيوني تعمه..جيبو قميص حسين اشمه
خل يمتزج دمي اويه دمه
ماعندي اخو يفزع اليه..خيل وزلم دارو عليه..
شماتي صاحولي السبيه

صاحو اعلــــيه..ابصوت متسائل
هايه مو زينب؟.. اخت ابو فاضل
مايله الدنـــيه..والضـــعن مايل

احنه اهل بيت الهادي والدين.. مو مال ندخل عالدواوين
تفضحنه دمــع اعيونّه امـــن انـكابر
كل لحضه تمشي چنهه سحگة حافر
/////////////////////////////////////////////////
هوه اشيضل بالتصعد النوگ..واتشوف اخوهه ابهيمه مسحوگ..حرگولي گلبي ابطبة السوگ

ابنص الخرابه وصاح صوتي..اخذو حياتي ورجعو اخوتي
وين الله كون ايحين موتي

ما اضن يفزع..مات ابو الاكبر
وينه عباسي..ردته بس يحضر
طاح عالشاطي..منگطع منحر

ريته يجيني ايگلي شوفي .. ياخيتي رجعنلي چفوفي
ويسئلني خويه هـــاي بيچ اشــصاير
كل لحضه تمشي چنهه سحگة حافر
/////////////////////////////////////////////////
ردونه للشام وذكرنه.. اهنا عثرنه اهنا وگعنه
لمن بچينه وانضربنه

هاي الارض بيهه انسبينه..بيهه انطبع سوط ابعبينه
اشگد بچينه اشگد بچينه

اهنانه اطفالي..امن الرعب صاحت
اهـــنا رقيتنه..عالـــطشت مــاتت
والرباب اهناك..عالـــمهــد ناحت

هم رجعوني ثاني مره.. يكسرلي گلبي اشما اذكره
عمري ابجفاكم يهلي مـــني امسافر
كل لحضه تمشي چنهه سحگة حافر
/////////////////////////////////////////////////
كلما ردت اغفالي وارتاح.. ابنص الحلم يطلعلي ذباح
من كل مكان اسيوف وارماح

واتذكرت لمن اجو ناس..وشالته الغيره راس عباس
لا ما بچه ضل ينزف احساس

والسلاسل هاي..تشرب ابدمـي
بس ردت كلمه..رجعّولي اسمي
يهــدم ابحيلي ..الليل وي همي

كلما اجر النفس حسره.. تسحگني احس خيول عشره
مثل ابـــو اليــمـــه مـا اليـه نـاصـر
كل لحضه تمشي چنهه سحگة حافر
/////////////////////////////////////////////////
هذا ضعنكم ها يالحنان.. تعبان متَّچي اعله تعبان
ردينه ما ويانه وليان

راجع ضعنكم مو سلامه..ردينه بس كلنه يتامه
كل واحد ابمتنه علامه

يا صــبر روحــي..ماكو من صبـــره
شفت اخوي حسين..ينگطع نحــره
اتكسرت بالخيل..اضلوع من صدره

هاي اني الاتمنيت موتي..مابين اهلي وبين اخوتي
مايغفه جفني لحضه يبقـــه امساهر
كل لحضه تمشي چنهه سحگة حافر
/////////////////////////////////////////////////
حسين حيدر اللامي