ليلة العليله عليها السلام:

لمّيت حيلي وفرفحـــت—لاهلي ابدفو وحـنيه
ماظل مكان اويه الضعن— عدكم نقص علويه
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
مشيت ودمعي فوگ الخد فرض صله
بين الـــحسره والعــثرات واسـم الله
هلي معقوله نگــطع چـــلمة الوصله
عاد اخـــذوني اهز كــاروك عــبدالله

حاچيت عمي ابكل خجل— تانوني لو بس لحظه
باوعلي وادموعه تصب—گال الابو مايرظه
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
يعمي إزغيره لچن والله مـــلچومـه
الجِفِن لو رحتو إحسب زاعل النومه
ماترهـــم تره عــلـويه مـهظــومـه
اثاري الفرگه مثل الطاب للـحومــه

وجهت وجهي إلعمّتي—والجِفن صاير غيمه
أتعلعل إهـنا وحّدي__وياكم أصحه ابخيمه
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
اذا ســــافر ضعنّـــه ومارجـــعتـــولي
وصيه امـــن العليـــله الفاتحه اقرولي
بقت بس چلمه وحده اتبات وي طولي
جيــبــولي ابوي حــسـيــن جــيبــولي

من باوعت وجه الابــو—مهضوم حيــل وحاير
اتاكدت راح ابقه ابغرب—والضعن كله مسافر
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
صحت لاهل الضعن بس طلع گوه الصوت
واحس روحة اهلنه چنهه روحة موت
إفراگ الــغالي يــشبه طَــبَّت التابـــوت
ومثل جــثه غريبـــه وما لگــت زاتــوت

يشرب دمع وكت العطش—هذا اليعوف اعزازه
كافـور كل مغـــرب يـمر— والخنگه هيه اجنازه
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
سارو بالضعن وابگلبي الف كسره
وضلت بالدرب بس ريحة الزهره
ابوي حسين ما ردلي طلب مره
شعجب هسه تركني ابدمعتي الحمره

عاشرت دمعات الحزن—شبسرعه اجتي الفرگه
وي الاهل راح الهـــوه—وضــليت أنه مختنگه
هلي…هلي
/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
حسين حيدر اللامي

ام البنين عليها السلام:

گلبي ينشد اعليك يوليد الزچـــية
اقمار اربعة افديك يا شمعة رقية
——————————————————
ناطرتلك لية ترجـع وانتـضر عنـك خبــــر
ياضـوة عيـوني ومهجتي والله دلالي انفطر
لـخاطر عـيونك ييـمة بزود ربيـت الكمـر
كتلة تعريف الوفاء چفوف ذبهة اعلة النهر

غالي بدمنة نشريك حد يوم المنية
اقمار اربعة افـديك يا شـمعة رقـية

——————————————————

شلــون لو تــدري ييمـة عذبتــني كربلـة
مثل لو كل المنـاجل حاوطــلهن ســنبلة
ولدي سويهم مضايف خير متروسة هلـة
ينگلب عباس دلة تفور بيهــة الــمرجــلة

زلمك يبو الاحرار وفوهة الوصـية
اقمار اربعة انطيك يا شمعة رقية

——————————————————

گلبي موجوع بغيابك حيل متاذي ويــنوح
ترجع تمنيت سالم وجهك يشافي الجروح
حضرتلك ولدي للطف زلم بالغيرة تفــوح
واذا ما كفـوك ولـدي انـي ويـــاهـم اروح

جندي احسبني وياك ضد جيش ال امية
اقمــار اربعة انطــيك يا شمـــعة رقــية

——————————————————

باجر بيوم القيــامة بيش الاگــي فاطــمة
زينب مچــواية اديهة وانـة ادية سالــمـة
ما يسدهم ضلع امك هالعصابة الـظالمة
ردو بخيل اعوجية على ضلوعـك هاجمــة

جسمك شايل اجروح وانة الحسرة بية
اقمار اربعة انطـــيك يا شــمعة رقيــة

——————————————————

روحي مـا تهـدة اعلة ونهة والدمـع يـنزل جمـر
والله عگبك صرت اعاني وكلشي ما يسوة العمر
بـيـن نـاس الــشـيـعتني اعليـك دورت شـكثـر
لـلدفـن تـانيـت تحـضـر يـبـني وتـسـد الـگبـــر

دمعي بگبري وياي عالراحت سبية
اقمار اربعة انطيك يا شمعة رقــية

——————————————————
🖊️—حسين حيدر اللامي

القصيده::عمري ذخري

أداء: الرادود الحسيني سيف المطيري

كلمات: حسين حيدر اللامي

العزا الشهري لهيئة العباس(ع) مدرسة الرادود الحسيني بغداد



https://youtu.be/5paqO3wdd6k?
si=8gjBzGc8N8tosi9E

عمري — ذخري
يالساكن كل نبضه ابگلبي
خادم — عندك
من ابچيلك اشكر ربي
////////////////////////////////
يا حبيبي ومهجتي—يافرحتي ودمعتي
وابحياتي قدوتي..حسين

انت يا وجه الصبح —نابت ابنحرك رمح
والله مو مالت ذبح ..حرام

والله اموتن بالبواچي وصـــدري بالهم يختنگ
لمن اسمع طايح انته وبالحــوافر منســــحگ


اجزع والطم
من اسمع زينب مسبيه
ويلاه ركظت
بالهيمه اشلون العلويه
////////////////////////////////
حبي الك چن قافله —امن المدينه الكربله
عشگي الك ما اجمله ..جروح

يانحر ذابحله سيف..ياصدگ والباقي طيف
نسمه حلوه ابدنيه صيف .. تجي


حبي الك من البدايه سيدي حب من صدگ
ادعـــي الله انـــي وانــته للابد مــانفــترگ

عشگي ودربي
بس حسين الظل ابعيني
اتبره منهن
لو عافن دربك رجليني
////////////////////////////////
يمك ارد اگظي العمر..ياحبيب ام الخدر
ابچي لو اسمك يمر..حنين

الطم ابقوه الصدر..لان صدرك منكسر
انت قرآن الفجر..تطيح

وَمِنَ الحُب ما قَتَل هــذا المثل ادري اكـيد
يعني اليموت ابمحبتك هذا عند الله شهيد


يمك رايد
يامنحر نازف باحساس
ابقه ابچفك
مثل الرايه ابچف عباس

////////////////////////////////
نفترظ صارت صدگ— عن خدمتك إفترگ
والله اموت واختنگ..عليك

ابلا مجالس فاطمه..الدنيه هيمه ومظلمه
ابچي دمعاتي دمه.. عذاب

ابلا مجالس لا منابر نفترض يگــظي العمر
الدنيه بين اعيوني تصبح ليله الاوله بالـگبر

الخدمه نعمه
صارت للخادم شريان
والله الهه
ما يتوفق اي انسان
////////////////////////////////
وين اكو مثلك حنين..يا حبيبي يا حسين
اعمه اني وانته عين..امان

يا ملاذ الانبياء—يا سليب ابكربلاء
يا غريب الغرباء..وحيد

لهذا جرحك لسه تبچي مو دمع دم السماء
قبلة الاسلام كعبـــه وقبلة الحــــب كربلاء

طايح وحدك
لا انصار ولا خوان
صعبه وكلفه
وسفه حسين اعله التربان
////////////////////////////////
حسين حيدر اللامي

ميمر لمسلم بن عقيل عليه السلام


كل الكتب والتاريخ جهلت حقيقة أمره
—————————————————
جايب رساله من ابن عمه إحسين
والــعانـده يتخــيّر إبّــين إثنـيــن
لو صطره لو سيفه يگسمه نصّـين

والصطره تطبع نيشان وحروره مثل الجمره

—————————————————
إمبين علي عمه الفحل من چـفه
موت الكتايب بالحرايب وصـفـه
رَكّب جماجمهه إعله هيئة تُحفه

بي ريحه من داحي الباب وإبدمه تمشي الزهره

—————————————————
مسلم أسد كل الاجت حاصرهه
وروس العده من ضربته فطـرّهه
خيل وزلم گاع النجف كاســرهه

وإبچفه چن ذو الفقار والكوفه كلهه إبأمره

—————————————————
بيهم صرخ لكن تحس نفخة صــور
من گصته تعرگ مرجله اتصب ونور
چم كربله بيهم بده وچــم عاشــور

متحس زلم چن نسوان تتراجف امن الخزره

—————————————————
سيفه إبيمينه وما شرب گطرة مــاي
كلــش قليله المعركه وهوه إهــواي
طبع الوفــه مـثل الكفـــيل الوفّــاي

بي شمره من العباس واوصافه مثل الگمره

—————————————————
🖊️—حسين حيدر اللامي

لسان حال الامام العباس عليه السلام:

أصعب حال.. من اتطيح إگبال إعداك وكلهه اتشوفك
أصعب حال..إتريد إتگوم وتتذكر مگــطوعه إچفوفك

إتشيل الجربه سهم العين؟
لو تمسح دمعات حــسين
///////////////////////////////////////
عادي اي زلمه يـــطيح ابحرب وايهل مدمعه
بس صعب من ابو فاظل يوگع اعله المشرعه
عطش واســيوف ورماح ونبــل كلشي يوجعه
شايل الدنيا اعله چتفه بس چفوفه امگطّــعه

خويه حسين..هاي الخويه الكسرت گلبه وحيل اتالم
خويه حسين..راس العباس ابعامـــود البيــن اتهشم

طايح بس ماعنده ايـدين
لو تمسح دمعات حسين
///////////////////////////////////////
طحت من مهري ولكن عينـي شــبحت للخيم
ردت اشوفن حال زينب بس اجه ابعيني سـهم
وگلت خويه حسين اخيَّك يعتذر حيـــل ابندم
الگطعو ايساره ويمينه ايطيح من ايده العــلم

خويه اسمع..زينب منتظرتني وماتدري ابچفـــيني
خويه اسمع.. گلهه العباس اهناك ايگول اتعذريني

مگطوعات ابسيف البين
لو تمسح دمعات حسين
///////////////////////////////////////
الطيحه للذرعانه عنده ســـهله نعرف هالخـبر
وآني طحت ابلايه ايدين وسهم البعيني انكسـر
واليطيح وهوه ضــامي ابماي تفزعـــله البشـر
وآنه طحت اعله الشريعه وتالي فزعولي ابحجر

حيره اهواي..زينب عطشانه وذبــلانه كلش صـــعبه
حيراه اهواي..من اتصدمك نبلة موت اتشگ الجربه

ايحير الماي ايطيح امنين
لو تمسح دمعات حسين
///////////////////////////////////////
من وصلني حسين اخويه شفت ضهره منكسر
گلي يم خيـــماتي ارجعك گتله ياخــويه اعتذر
شفت بعيونه انكســـار وخـــيبة امال الـــخدر
الما عثر مره ابمشيته هسه طــــاح امن المهر

كلشي ايهون..هاي اچفوفي الطاحن فدوه لكل العتره
كلشي ايهون..باچر ترفعـــــهن بالمحشر امي الزهره

واتعوض بس بجناحـــين
لو تمسح دمعات حسين
///////////////////////////////////////
ارجعت حاچيته ابحسرتي وصوتي ضايع مختنگ
گـــتله ياخـــويه آنه أخافن عالــمخيم يحتــرگ
وحيل اخافن على صـــدرك بالــحوافر ينسحـگ
شلون ضهرك ويه صدرك عله الغبــره ينـــطبگ

هذا اوداع.. رايح يم الباري وگلبي اعليك اتكســر
هذا اوداع.. اسم الله اعليك امن الخياله لاتتوذر

أسأَل هَل وَفــيت الدين؟
لو تمسح دمعات حسين
///////////////////////////////////////
حسين حيدر اللامي

راية العباس نُصــرَت ديــنهه
ومن عباية زينب امفصـلينهه
تندل ادروب الفضاء..بيهه ريحه امن الكساء
_____________________________
تلگه مكتوب ابطـرفهه..كربله ومـــاي وحزن
واليكض خشبتهه لازم..بس ابو چف الخشن
اختارت اچفوف الكفاله..چيف ابو فاظل رزن
هوه لو فارگهه لحضه.. اترفرف اتگوم وتحـن

من ترف بيده تشگ وجه السمه
هيه تنخه ابيا علي ويا فاطـــمه
من علامات الاباء ..بيهه ريحه امن الكساء
_____________________________
ربنه گل الموسه اخــلع..نعلك انته ابنص طوه
وهيه خلعت شكو جندي ..اتگابله ابطف نينوه
ابكيفهه ويآخذ امرهـــه..امنين ميهـــب الهوه
اتحل مشاكل والعليـــل..العـــلّته تصــبح دوه

رسمت ادروب الوفه هالرايه
حته تندل باچر المـــشــايه
هذا من سر الولاء..بيهه ريحه امن الكساء
_____________________________
هيه هم تلزم حراســـه ..جـــانت اباب الخيـم
اترفرف ابكل المــواقع ..حته ما يــعبر سهـــم
نگِّـعوهه ابــماي زمـــزم.. طشـو اعليهه شـيَم
عدهه ابو فاضل حقيقه ..وباقي هالعـالم وهـم

بيهه هم مكتوبه جمله ابكل فخر
صُنِعَت خصّيصاً الچــف الــگمر
صاحت املاك السماء ..بيهه ريحه امن الكساء
_____________________________
من فخر صيت ابوفاضل .. صيت هـالرايه عله
عگب ما چانت تقــاتل ..وي گمر طــف كربله
كبرت وصارت اميـــره .. إقماشهه غيره امتله
صاحت ابدرب المـواكب .. هـله بالزايــر هله

خدمت العــباس وي بتّاره
وهسه گامت تخدم ابزواره
وابسبب هالإنتماء ..بيهه ريحه امن الكساء
_____________________________
الاعمه لو حطهه ابعيونه ..ويندب اتردله البصر
هذا شي جداً طبــيعي ..بركـات امـــن الگـــمر
هيبه من راعيهه عدهه .. داســت إبصـدر النهر
گلبت الخيل وزلمــــهه..وللكـفر كســرت ضهر

راية الحض والبخت موصــوفه
وابعصفهه اتسولف اهل الكوفه
جمله خطّوهه ابدماء ..بيهه ريحه امن الكساء
_____________________________
حسين حيدر اللامي

من الخوف سكتو محد إيحـــوس
أخذ رقمه القياسي إبگطعة الروس

بده العد التنازل —إجاهم أبو فاظل
————————————————
من زغره وإمسمينه سبع الگنـــطره
يعني الوصل لخيامه يگطع منحـــره
يم سيفه كل روس الزلم لزمت سره
صال وگلبهه الحومه سوه ثغـــــبره

بعثوگ النخل علگ زلــــمهه
ظل أبيمنته إيطشهه وإيلمهه
صرخ هل من منازل —إجاهم أبو فاظل
————————————————
رب الحرب والسيف لا ما ينـــغلب
والميمنه وإيسار گالبـهن گلــــــب
من گصته تعرگ نور وي غيره تصب
يلچنه ملك الموت وأكثر من يطـب

يحنط روسهم ما تسمع اي صوت
مو سيف ابچفوفه شايل المـــوت
آنه الموت گايل—إجاهم أبو فاظل

————————————————
زلمه وكلف عباس لا ما ينـــگدر
يگطع نسل هلجيش يبترهم بتر
أسرع طريق إيصير سيفه للگـبر
رجله تخط علگاع راكب علــمهر


رجف ماي الفرات إبخزرة الــــعــــين
گله إشلون تجري ويعــطش حـــسين
تشهدله المَقاتِل—إجاهم أبو فاظل

————————————————
چن ملعبه العباس بلحــــومه تــــحس
ما تحصي گطع الروس موسوعة غينيس
جمدو كَأن أصـــنام خالســـهــم خلس
من وجهه تاخذ نور وإتظوي الشــــمس

طبهه إبهيــبته وطَـشَّــــر شــمِـــــلـهه
هاي السالـــفه إشـــلون إشيحـــلهـــه
سيف و زلم ياكل—إجاهم أبو فاظل

————————————————
تشهدله حد اليوم ظلت كربلـــــــه
بلحومه عطره إيفوح عطر المرجـله
كلهه نصت جواه بس هـوه الـــعله
إبذاك الوكت عباس ســــوه زلــزله

كابوس ورعـب يركظ وراهــم
بارض المعركه تسمع بچاهم
الشرد مارجع عاقل—إجاهم أبو فاظل

————————————————
🖊️:حسين حيدر اللامي

إنّا أعطيناكَ الگُمَـر
زلمه ينشد بي ظهر
ساقي الوجود أبو فاظل
——————————
نَـــحنُ أنزلــناه گمـــره وإبــحظــن ام البنيــــن
يظوي من أقصه المدينه حسب توقيت الحـسين
مصحف العباس كامـــل منــــذُ آلآف الســـنين
وچانت آياته الشـــهيره جـــربه وإعــيون وإديــن

مِن نورِهِ يَعمي البَصَر
زلمه ينشد بي ظـــهر
ساقي الوجود أبو فاظل
——————————
لو زعل زلزله يصـــبح لو رظــه كوثــر تره
رقم واحد ابو فاظـــل والبقـــيه لــــيوره
من عصف ريشاته ربك عاقب إبأهل القُره
روح شوف المعجزات إبابهم لزمت ســره

زِلزالٌ نازِلْ وَ سَقَرْ
زلمه ينشد بي ظـــهر
ساقي الوجود أبو فاظل
——————————
عنده خوذه إتصير مرهم كل عليل وكل جرح
يخلص الليل إبجماله ويرجع إيطلع الصـــبح
لو يصير إسمه وتينك لو عضـــيدك نــقتـرح
لان بلشـــدات هوه ينگـــلب ســـورة فـــتح

سَيفُهْ قَضاءٌ وَ قَدَرْ
زلمه ينشد بي ظـــهر
ساقي الوجود أبو فاظل
——————————
عنده جربه بيهه غيره و تحتمل كل الــــبحار
نام إنته إبراس بارد أبو فاظل راســـه حـــار
يم اليحبوك بيـــرغ يـم اليـــبغــــظوك نار
كلشي الاتريده ينفذ إنته تحچي وهوه صــار

في عَينِهْ نارٌ وَ شَرَرْ
زلمه ينشد بي ظـــهر
ساقي الوجود أبو فاظل
——————————

إختصاراً عنده رايه تعـــرف إدروب الســـــمه
عينه إذا تخزر كتيبه گــول خَيّــــرهم عِـــمـه
الجندي اذا يسمع إبإسمه جسمه يتنازف دمه
مشية إجدامه رهيـــــبه أخو زينب حاطـــمه

في الحُسنِ بَحرٌ وَ نَهرْ
زلمه ينشد بي ظـــهر
ساقي الوجود أبو فاظل
——————————
🖊️:حسين حيدر اللامي

علي الاكبر عليه السلام:

علي اموذر وذر من شافته العين
عزيز الروح كاسر گلـب الحسين

على الدنيه العفه بعدك.. تراب ودم عله خدك
_________________
مُحَمَّد طايح اعله الگاع—ودمه اعله الارض خضّرّ
شيصير الأبو لو شـــاف—ابـــنه ابــكربله اتطـشر
هذا الماكو منه اوصاف__ لا بالبــحر لا بـــالبـــر
لا ماچانت إعــله البـال__ألمّ إبـــهــامــة الأكبــر

ألم إبجسمه واسمع بويه عطشان
جسم إوليدك إمن الطعن تعــبان

إذا روحن تضل وحدك .. تراب ودم عله خدك
_____________
اشوف الدنــيه رحلة مــوت__من خيماتي حد جسمه
الشمس طاحت عله التربان__طفه نوره وصفت ضلمه
واصــل للعـــرش يانـــاس__مــن گد النــــــزف دمه
طحــت مــن المهر للـــگاع__ اتــمـــدد ردت يـــمـه

علي الاكبر حبيـــبي و آه لو مات
كون ابطيحته اتطيح السماوات

علي وجدك علي ايردك .. تراب ودم عله خدك
_____________
خنجر نابت ابصدره__ هذا الصدره بس يــــنشم
عطشان ويريد الماي__ اوليدي الطـوله چن زمزم
واحد صاح من ابعيد__طعنـــته ابخنجــر امــثلّم
يحسين ابنك اتطشـر__شِــتلم بـــعـــد ما ينلَــم

أركض وحدي آنه ابظهر عاشـــور
لگيت اوليدي بس ابراسه مطبور

علي بويه طحت عندك .. تراب ودم عله خدك
_____________
خل انسولف آنه إويـــاك__گتله اوليــدي عالـعشـــره
وسفه إبنص ضهر عاشـــور__ تعبي الــحافر ايطشــره
يـــا أول نجم مذبـــوح__وطحت فوگ الترب شــذره
إسم الله إمن العطش كتّال__اتحضرك فاطمه الزهره

حبيبي وروحي گوم إوياي أناغيك
جدك بس تغمض العيـن يرويك

وما تضمه إبحضن جدك .. تراب ودم عله خدك
_____________
يالچنك صلاة الليل __ بيك إشـگد بنيـــت أحلام
دمك فوگ وجهك ليش__ علي يوليدي صار إلثام
نــام إبگلــبي يوليــدي__ ليش إعــله الترابه إتنام
جبتك للخيم وأنـــعاك__ تعب إســـنيني لا مادام

نور الشمس حار وخاف يچويك
راح افرش عباتي حته اغطيـــك

فراغ ابروحي شيسدَّك .. تراب ودم عله خدك
_____________
حسين حيدر اللامي

العليله وحمـيده حــچن فد مره
لغتهن مدامع توضح الفكره

عاللي طاح امن القصر..والوگع من المهر
بس مدامعهن حمر..مصيبه
————————————————
فاطمه المكسوره بدت تنقل صوره
عن الهجر
اتگول ظايع عمري وريته يگطع نحري
سيف الشمر
حايره ابموضوعه امكسرات اضلوعه
وكت الضهر

حسين ابوي ابيوم عاشر منسحگ
وضهره بتــراب الوطيــه مـحترگ
راسه عن جسمه الـــموذر مفترگ

جاوبــتهه حــميده وتــهل الدمــعه
عمي الحسين ابچفوفه اصابع تسعه

وسولفت باقي الكسر ..والوگع من المهر
واعيونهن صارن حمر..مصيبه
————————————————
اهنا حميده التنقل الفرگه مره وتكتل
ماتنجرع
بالگلب ظل يهدم إفراگ ابويه مسلم
وحار الدمع
امفطرات اشفافه امغيرات اوصافه
واني انفجع

من على قـصــر الامــــاره لـلارض
چنهه خيل وعالظلع گـامـت تـرظ
أذَّن الموت ومشه ايكــمل الفرض

اهنا حميده الوحيده تدگ عالـهامه
اتگول ابويه ابوگعته هشم بعـظامه

بعده احس ظاع العمر ..والوگع من المهر
بس مدامعهن حمر..مصيبه
————————————————
العليله تحچي وبيهه كلشي يبچي
من القهر
واگع ابنص حومه امسلبات اهدومه
ابجبهه حجر
ابصدره حافر داسه وشمر گاطع راسه
وگلبي انكسر

الحگلــنه نادتـه زينـب ســمــع
إبـگلبه حرگه وعود لخيامه فزع
راد يوگف بس عله وجهـه وگـع

ياحمــيده ابويه الحــرگ دلالـه
لمَّن شافت عيونه سبايه اعياله
ابسوطه يضربهم شمر ..والوگع من المهر
بس مدامعهن حمر..مصيبه
————————————————
يالعليله إبالي إفراگ ابوي الغالي
لمَّن رحل
قاصداً للكوفه والمنايه اتطوفه
غاب الأمل
ماشرب مي حسره اتذكر ابن الزهره
ومنه خجل

من ابو اليمه مسـح هامتي بيــد
يعني مسلم والدچ طايح شـهيـد
مثل ابو السجاد هم باقي وحيـد

امن القصر رافع ايده لأبوچ وسـلّم
رد سـلامه ابكسرته واحسّــه اتألم
رد سلامه منقهر ..والوگع من المهر
بس مدامعهن حمر..مصيبه
————————————————
ياحميده أفهم افراگه سيف امثلّم
يذبح نحر
الأبو چن خيمه والهجر چن هيمه
وظيم القدر
ظل اخوي ايدوّر نقص چفه الخُنصر
وگلبه انفطر

جسمه لمّاه ابحصيره ابلايـه حيل
مـن كثـر ماگلبته وسـحگته الخيل
والنــهار ابلايه ابـوي ابــعيـني ليل

ياحميده اليفارگ ابــو من زغره
يبقه كل يوم يتاني مماته وگبره
ايشافي اوجاعه الگبر ..والوگع من المهر
بس مدامعهن حمر..مصيبه
————————————————
حسين حيدر اللامي

القصيده:إجه شهرك

اداء.:الرادود الحسيني يقظان النوري

كلمات:حسين حيدر اللامي

https://youtu.be/mo7K89u-5NQ?
si=UjvgHJyrsW3aFsQI

القصيده: إمامي سليب

الرادود الحسيني :يقظان النوري

كلمات :حسين حيدر اللامي


https://youtu.be/T371WwRSS3w?si=e0tqI-5tzx_h59aa