القصيده:باب الفقره

اداء:الرادود محمد الطائي

كلمات :حسين حيدر اللامي

المجلس الشهري هيئة العباس(ع)
(مدرسة الرادود الحسيني)


https://youtu.be/UZrYzmbR41g?
si=rKyD7QiOWEnRcgmL

القصيده:شاء القدر

اداء: الرادود باقر الدراجي

كلمات:حسين حيدر اللامي

https://youtu.be/A5QdXSnbc08?
si=-OAj8-OEq5sL7x2f

سيّد النور..راسه مطبور..حسره واتدور
لحضة فرگته عليه

—————-
خيمه وايلمنه ابحنانه ..چف ابوي ابكل مسيه
نفرح ابشوفة عيـــونه..نگـــعد ونـفطر سويه
هسه حزني ابنص دليلي..چـــنه روح المغربيه
هوه راح ابنــص ترابه..وآنه گمت اصفگ بديه

هجره ذبّاح..والدي راح..گلبي چن طاح
ابچي ومايرد اليه

—————-
صعبه اليفارگله غالي..يصحه نار ويغفه جمره
ايحسه چن يوم القيامه ..من تشاهد عينه گبره
ايروح بشواگه ودموعه..ويرد لازم بيده ضهره
يضل يشتم بالترابه..بلكت ايشم بيهه عطره

يبقه مذبوح.. امعاشر اجروح.. يبجي واينوح
ابصبحه وابكل مسيه

—————-
رحمة الله ابكل وسعهه..بي لمن يگصد علينه
سگف بيت اچفوفه چانت..كل وكت ساتر علينه
اني واخواني ويتامه..هالمدينه اشگد بچينه
ربي سلم حيدر النه..ابهالدعا كلنه دعينه

ابدمعة العين..مات ابو حسين..جرح الاسنين
كاسرنه حامي الحميه

—————-
وي فرض رب العباده..انطبر راس الامامه
وانهضم مصحف نبينه..وانملت دم العِمامه
اقسم ابهذا فِعلهم..دمرو حال اليتامه
واليتامه كل املهه ..حيدر ايرد ابسلامه

عينه متنام..تحرس ايتام..حيدر احلام
من الباري كوثريه

—————-
كسرة الفاگدله والد..خيمه شَبَّت بيهه ناره
من وسط نومي افزَّن..واركض واشبگ فقاره
واندب ابإسمه واصيحن..ياشمس ربنه ونهاره
يا اسد الله ونبيه..هسه شو گبرك حِجاره

حلمي شفتك..اني بنتك..يمي ردتك
ياريحة امي الزچيه

—————-
حسين حيدر اللامي

لا تلفي ياعــــيد
والوالد ابــعيــد
من عدنه شتريد
ورايح ابونه
_____________
ياعيد ماريدك تجي اعذرني هـــاي الـــمــره
شــلون افرح وذاكه الابو بچفوفي حافر گبـره
حيدر اذا صار العـصر بـيده يـجَمع الفـــقـره
هذا اليبوسه ابجبهته وذاكه الـيــشم ابعطره

لا ما غــفه ونــام
عـينه اعله الايتام
جــرحي مـــيلتام
ورايح ابونه
_____________
هذا الحنين المرتضى شايل وطن بمتـــونه
ماقــصر اويــانه ابد خــلانه بـيـن اعيــونه
أيتام من بعده صدگ كل الخلگ سمَّـــونه
المفروض متنه ونندفن لا مانعيش ابدونـه

الـــفـارگ ابو اينوح
كل عـــمره مذبوح
يغفه اعله الاجروح
ورايح ابونه

_____________
المامره ردلنه طلـــب شو هــسه مارد لينه
بينه اشتياق البسمـته وذاكه الدفو ابچفينه
خلينه يتراب اللحد نــشتم علـــي خليـــنه
هذا الأبو البي نحتمي من فدوه اروح العينه

حيــدر ابو اتراب
غـــطاه الاتـراب
وابهامته انصاب
ورايح ابونه

_____________
لمن نشاهد حيـــــدره وجه الله بيه انشــوفه
نترك الدنيه والمهم نــركض نــبوس اچـفوفه
كعبة يتامه اجمل حضن والفقره كلهه اتطوفه
من نور وجهه الحيدري تاخذ ضوه اهل الكوفه

اعـضم رجل دين
هذا ابو الحسنين
خير وضوه العين
ورايح ابونه
_____________
بوداعه من وَدَّع هــــله بالگــوه جر انـــفاسه
ايگوم ويطيح ابخطوته گد ما نزف دم راســـه
الما خله فارس بالحرب بجدامه ذلَّه وداســه
شو هسه يتنازف دمه ومكسور حيل احساسه

راح وتركـــنـه
احنه ودمعنه
ياهو اليلمـنه
رايح ابونه
_____________
حسين حيدر اللامي

موشح:

فِتيَةٌ قَــد نادو إبوسط الكَهَف
كون مو بالروم مِتنه بالنجــف
____________________
كون متـــنه يم علي اعــــدل امام
يم حُـسام النـــور قتّـــال الضـلام
هذا حسن الخاتمه ابوادي السلام

هذا دمع العين يم حيدر زحف

________________
كون مو بالكهــف كون ايلــمنه غــار
ويحرس اعـلينه علي اويا ذو الفـــقار
الدنيه صحره وبس وجه حيدر خضار

هذا صوت الفتيه بحروفه هتف
________________
إحنه نمنه ابهالكهف بضعة سنين
وإبأمان أنفاس أمير المؤمــــنين
صــاح نامـــو بسلامٍ آمــــنيـــن

والنعم منه وعلي شيخ السلف
________________
لو اجينه ابمملكة شيخ العـــرب
تنملي چَفَّيّــــنَّه إبلايه طــــلــب
نخله وايساقط عله الدنيه رطـب

من بعد طه النّبي هوه الخَلَف

________________
يم علي دار المعاجز والعَجَـــب
لو ردت فضه يحط بيدك ذهب
والإمـــامه مو لِمَن هَبَّ وَ دَب

فرق بين الجوهره وبين الخزف

________________
حسين حيدر اللامي

القصيده: احن الهم

اداء:الرادود محمد باقر العگيلي

كلمات:حسين حيدر اللامي

العزاء الاسبوعي لمدرسة الرادود الحسيني
ليالي استشهاد الامام علي عليه السلام

https://youtu.be/D_vr8beJu5w?si=ZgOjvgb8AXlVYeTQ

القصيده:رايح ابونه

اداء: الرادود مقتدى الساعدي

كلمات : حسين حيدر اللامي

العزاء الاسبوعي لمدرسة الرادود الحسيني
ليالي استشهاد الامام علي عليه السلام


https://youtu.be/BVIzDaSgKWk?
si=mEUikD4R7_0XzzeX

القصيده:بلكت انحسب خادم

اداء:الرادود مصطفى التميمي

كلمات: حسين حيدر اللامي


عزاء الزهراء عليها السلام

https://youtu.be/YEh8DPJIyy8?si=aTbsoGRKpCxST_Ow

القصيده: علي يا مولاي

اداء:الرادود السيد محمد باقر الغالبي

كلمات: حسين حيدر اللامي

ليالي استشهاد الامام علي عليه السلام
هيئة طريق الجنة


https://youtu.be/6eTXWkoZQ2M?si=jhlaRLRbzaVRcQrg

زُقاقُ الطَّف:

أَمشي وَ حيداً في زُقاقِ القافِله
فَالجَوُّ يَبكي بِنسائِمَ قاحِله

سُكّانُها رَسَموا بِعَيني مَنضَرَاً
ما بَينَ مَذبوحٍ وَ دَمعَةِ أَرمَله

وَ نَشيدُهُم إن كُنّتَ حَيّاً فَانتَهِض
قَرَؤا النَّشيدَ بِلَوعَةٍ مُتَواصِله

لا تُسمَعُ النَغَماتُ في أنشادِهِم
بَل كَيفَ تُسمَعُ وَ النِّساءُ موَلوِلَه

وَتَقودُ تِلكَ النّائِحاتِ بِكَفِّها
هيَ زَينَبٌ في خِدرِها وَ مُبَجَّله

مُذ غابَ عباسُ الكَفيلِ عَنِ الحَرَم
صارَت كَفيلاً آخَراً لِلعائِله

حَفَضَت أُصولَ الدّينِ زُرقَةُ مَتنِها
حَتى غَدَت باءً لِباءِ البَسمَله

لا لَم تُقَيَّد في مَضاليمِ العِدا
فَبِزَينَبٍ كُلُّ الصَّلاةِ مُكَلَّله

هذا زُقاقُ الطَّفِ يَرأسُهُ الضَما
أَكمَلتُ سَيري في خُطاً مُستَرسِله

فَتَعَددَّت سُبُلِ الزِقاقِ بِمَشيَتي
فَسَلَكتُ إحداهُنَّ كانَت ناحِله

وَ مَشَيتُ مَحنيّاً كَكَسرَةِ مِنجَلٍ
وَسَئَلتُ نَفسي فيهِ عِدَّةَ أَسئِله

ما بالُ أَرجاءِ الطَّريقِ كَأّنَّها
نَزَفَت دِماءً أَم تُرى مُتَزَلزِله

أَم حينَ أَمشي أَسمَعُ صَوتاً شَجيّ
( يا والِدي )بِنَبرَةٍ مُتَسائِله

فَاجابَني صَوتٌ حَزينٌ يا فَتى
هذا الطَّريقُ لِطِفلَةٍ مُتَعَلعِله

ماتَت مِنَ الهَجرِ الشَديدِ وَ صُبحُها
وَمَساؤها وَصَلاتُها مُتَنَحِله

ماتَت وَ ضَمَّت كَفَّها في صَدرِها
ماذا إذاً ماتَت وَهيَ مُتَوَسِله

فَمَشيتُ آخِرَ مَرَّةٍ نادوا هُنا
هذا الطَريقُ لِطِفلَةٍ مُكَبَّله

فَرُقَيَّةٌ رادَت أَبوها فَزعَةً
فَأّتوا بِهِ بِالطَّشتِ كافِرُ يَحمِلَه

ماتَت عَلى الرّأَسِ الوَهيجِ عِندَما
قالَت حَبيبي رَأسُكَ ما أَجمله

حسين حيدر اللامي

علم الأوليـــــن السابق ولاحق
ربك صبّه كله ابجعفر الصـادق
تركعله المذاهب ..من نسل ابو طالب
_______________________
أسس حوزه ابكبر العالــم..ذو خمس وستين اسنين
مسقط راس الدين ابگلبه..ومسقط گلبه ابنص الدين
راسم بسمه ابوجه الفقره..وكل مهموم وكل مسكين
سلطان ابن الزهره وحيدر ..بس بيته امشيّد من طين

حيدر ثاني كلهه شافته الفـقره
چي بثيـابه شمّو ريحة الزهـره
هذا ابن الاطايب ..من نسل ابو طالب
_______________________
عطشان الدين وبس هـــوه..شـايل شـط امن العـرفان
لمّن چانت هيمه الدنيـــه..صارلهه الــصادق بســتان
مركب عنده وكل الشيــعه.. هـــوه ايصيـــرلهه الربان
هذا ابن اهل البيت وحاشه..توصل قطره امن الطوفان

چان العلم صادق والشرع سيفه
على روس الجهل يتصيد ابكيفه
فوگ الغيمه كاتب..من نسل ابو طالب
_______________________
ربك اعلم ويـــن ايخلـــي..سره إبأعظم شخــصيات
لو ردنه انسولف عالصادق.. ياشــعر ايكــفي وابـيات
مجلس زاد وعلــم وتقوى..ولحسين ايـسوي اقرايات
دمعاته امن اتطيح اتضوّي..مو دمع الينـــزل نجمات


تنزل دمعته كل مـغرب ابخده
محد يلطم اعله العاشر ابگده
عالراحن غرايب ..من نسل ابو طالب
_______________________
خله المذهب بين اچفوفه..وكل منصب خلا جــواه
من يقره القران ابوحده..كلشي ابصفه ايصــيح الله
تسبيح الزهره امن ايسبح..جبـــريل ايســبح ويــاه
يا گاع الداساهه اتخضر..واترد اتبوس ابمـمـــشـاه


أُستــاذ البلاغـه لَمَن يتكــلـم
كل العرب يم السانه تتلـعثم
ذرية عجايب ..من نسل ابو طالب
_______________________
بيت الصــادق چان ازغيّر..لكــن گلبه ابگــد الكون
لو اعمه ايدگ بابه ابحاجه..ايرد البيته ابچفه اعيون
لو لامس چفينه ابرحمــه..يرجع عاقل كل مجــنون
ليهســه الديـــن ينـاديله..يالصــادق منك ممــنون

لو چان العلم مصحف يشع نوره
چان الصادق اول سوره مذكـوره
والسر الي غالب ..من نسل ابو طالب
_______________________
حسين حيدر اللامي

القصيده:قرآن النور

اداء: الرادود سعد القريشي

كلمات: حسين حيدر اللامي

العزاء الشهري لهيئة العباس (ع) مدرسة الرادود الحسيني بغداد

https://youtu.be/1TmTBMJuShs?
si=e59vg5PYdfB35Wkg

لِحَرقِ دار مولاي الصادق عليه السلام:

هذا دارك .. مقتبس نيرانه من نـــيران خيمه
هذا دارك .. من بناتك ركظن اتخايلته هــيمه
اتذكرت خولي وشمر
لَمَن هجمو عالخدر
هذا دارك..هذا دارك
____________________________
وصلت النار اعله دارك..يا إمــام الرافظــيه
ركظن ابحسره بناتك..مــن شِرار الناصــبيه
نفسه هالموقف تِجَدد..ركظة سكينه ورقيه
والفرق واحد ولكن..ما مـشت وحده سبيه

كل الاطفال.. ركظو امن الــدار يتناثر دمعـهم
كل الاطفال.. ما اكو چف عمِّتك زينب يلمهم
كسرة اسنيــــن الــعمر
لَمَن هجمو عالخدر
هذا دارك..هذا دارك

________________
من خذوك القصر ظالم..ابليل وابدون العمامه
اتذكرت طــبت عــقيلة..بني هاشــم والــيتامه
ومن يزيد اهناكه گاعد ..يـضرب ابراس الإمـامه
ورادو ايذبـــحون زيـن ..العابدين اهل الضـلامه

صاحت ام عون..يايزيد اســـمع كلامي وانته تدري
صاحت ام عون..عوفو زين العابدين وگطعو نحري
امچتفيــن ام الـــصبـر
لَمَن هجمو عالخدر
هذا دارك..هذا دارك
________________
تالي مسموم ابچبدتك..وبالگلب حسره اعله حسره
مو مثل جدك يغالي.. داست الخيل اعله صـــــدره
امسلبات اهدومه واگـع..من گفـــه گطــعوله نحره
ركظن ابهيــــمه بنـــاته..وبالمــصايــب انــتـه ادره

يا إمامي.. وسفه ابو السجاد مرمي اعله الترابه
يا إمامي.. وزينــب وأطفـــال گعدو عالخرابه
هنِّه ســــحگن عالجمر
لَمَن هجمو عالخدر
هذا دارك..هذا دارك
________________
كلشي تعرف كلشي سامع .. عن مصايب هالغريبه
تصحه واتنام ابعيونك..جثه عالغبره سليبه
هيه من ركظت وَحَدهَه..هايه وحَّدّهه مصيبه
زينب ابنص غربه ضلت..امنين ابو فاظل تجيبه

خاطبوهه..من وگع كافل خدرهه وعالنهر مات
خاطبوهه..استعدي يالعقيله الباب ساعات
واستعدي لليسر
لَمَن هجمو عالخدر
هذا دارك..هذا دارك

________________
حظرت الزهره ابوفاتك..سيدي وايهل دمعهه
موتتك عدهه عظيمه..چنهه كسره ابنص ظلعهه
الدمعه تلچم خدهه تدري..من اثر ذاكه الصفعهه
تمشي محنيه وتكابر.. من چفوف الي عصرهه

سيدي هاي..امك الزهره اجت يجري دمعهه
سيدي هاي..بين مسموم وقتل خلصو ولدهه
لازمه ابچفهه الكسر
لَمَن هجمو عالخدر
هذا دارك..هذا دارك

________________
حسين حيدر اللامي

القصيده:أصعب مواقف

أداء:الرادود كرار الغراوي

كلمات :حسين حيدر اللامي

المجلس الاسبوعي لمدرسة الرادود الحسيني بغداد


https://youtu.be/tBt9gJ69bOY?
si=xsN64Oca69_eteF0

إلى الإمامْ مُحَمَدْ الجَوادْ(عَلَيهِ السَّلامْ) :

جواد وجود فضلك تارس العـيــن
ضريحك بي زياره ابطعم الحسين

جدك راد شمس الله الوسيعه
أمرك سيدي واجــب نطيــعه
——————————————-
مملكتك إچبيره..جود اووفه وغيره..
كل الفلك والكون—بالاصبع إتديره

هيـه امــك الكــوثر ..منانه واتصور
اهل السمه يركعون..يم نورك الابهر

قبل السؤال إترد عَلَيْ هاك امــراد
گبرك مناره وحگهه تفخر بغـــداد


الطلب ذريه ودمــوعه إبلــحيــتـه
يرد تترسله حضــنه ويحله بــيــته
ويجي للحضره جايبلك رضيعه
أمرك سيدي واجـب نطــيعــه

——————————————-
ما رجَّعِت سائل..چنك أبو فـــاضل
والمارضه إبحبك..جاهل ابن جاهل

عشاگك إهوايه ..ترفـعلك الــرايــه
إبنص العزاء إتصيح ..مشايه مشايه


اليدخل ضريحك بيه يشم هيل وياس
ومو عجبه لو حيهّ الخدم چف عبـاس


الامان إيخاف وإبنص صحنك آمن
رؤوف وتشبه الوالـــــد الضــامن
يم اسمك نأمن كل فجيعه
أمرك سيدي واجب نطيعه

——————————————-
عطر الحسن عطرك..جنة عدن حدرك
حته صبر ايوب .. ضل يسجد إلصبرك

سامره هم تحدي..وبالــتعــزيه تبدي
والعسكري إتعناك..والهادي والمهدي

سفرة حوائج تفرش إبصحنك دوم
للاعمى للطاح إبمرض للـمهـمـوم


بيدك جاذبيه إعله الــعــــوافي
إمام وهم عضيم وهم تشــافي
منك صار منهاج الشــريعه
أمرك سيدي واجب نطيعه

——————————————-
بعين الگلب رسمك ..فدوه رحت لاسمك
يا سيدي ومـولاي..قــربنــي مــن يمــك

خدامك احبابك..باب الله چــن بابـــك
كل معجزات الكون..صلت إعله اعتابك

عدكم بسيطه الدنيا يا اهل البيت
كل التواضع بيكم وكل الــصيــت

يمن باب الله بيدك ضال مفتـوح
عطر الجنه من شباچــك يفــوح
ما همتكم الدنيه الوضيعه
أمرك سيدي واجب نطيعه

——————————————-
عالِم على العالِم..سيد علــى الـــوادم
بحر العلم والدين..والعانـــــدك نادم

رادو يحجبــــونـك..رادو ينـــزلــونــك
بس الزمــان انــدار..والضـلت اعيونك

اسمك بحر فوگ العطاشه إنشوفه
بس اليحبك يرتوي إمــن إحـروفه


كوكب تبقــه ما بيــن الكـــواكـــــب
ونورك فاگــس إعـيـــون النواصـــب
وصدى صوتك على الشيعه تذيعه
أمرك سيـــدي واجـــب نطيــعه

——————————————-
🖊️:حسين حيدر اللامي

ذُو الخَمس والعِشرين
مُلقى محبوساً غريباً وحيد ، يمم وجهه
الشاحب شطر ڪربلاء الشهيد ، يبعث دمعه
علىٰ جنح الحمام وَ يلفظ أنفاسه الزڪية
من بعيد.
"السَّلامُ علىٰ روحكَ وَ جسدكَ مولاي يا باب
المراد".

المصيبة : إلقاء جسد الإمام الجواد عليه
السّلام من أعلى السّطح!
«كما في جنّات الخلود : تورّم جسده وكان
يقطر جلده شبه الدم ، فلمّا قضى نحبه أمر
المعتصم بأن يرموا جسده الشريف من
أعلى السطح إلى الأرض ، ومنع الناس أن
يحملوه ويشيّعوه ويدفنونه ويدنوا منه ،
وبقي جسده ملقى على الأرض أياماً بلا
غسل ولا كفن ولا دفن ، وكان يسطع منه
رائحة المسك والعنبر ، فلمّا علم المعتصم
ذلك خاف الفتنة وخشي الفضيحة أمر
بدفنه.»

نعم فهوَ الجواد عليه السلام
حتى في موتهِ يواسي جدهُ الحسين عليه السلام
السلامُ عليكَ يا مولاي يا مُحمد الجواد

موعدنه يم باب المراد
لبيكَ مولايَ الجـــــواد.. يامولاي
——————————————-
إبكل سنه زواره ضـلـــــت تـزداد
وكل الطرق صارت تؤدي البغداد

ربنا ابعصمته اتجــله
بحيث ايشافي كل عله
ياهو ابعلمه يوصــــلّه
بشر أَتحَدّه

الامام الراكع الســـاجد
الشّاب المــتقي العابد
حبيب الخالق الواحــد
مثال إلجدَّه

فوگ العرش علگو حداد
لبيكَ مولايَ الجـــــواد... يامولاي
——————————————
اهل السمه نصبوله فوگ إقرايه
واهل الارض راحــو إله مشــايه

هـــــوه سيد الساده
حنين أبجودة كلعاده
يفرش سفــرتة وزاده
ويگلي اتفظل

الشيخ العـــام عالديره
صعب يصعب تفاسيره
اليطيح ابشدة وابحيره
يگصده وتنحل

كل الخدم لبست ســواد
لبيكَ مولايَ الجـــــواد.. يامولاي
——————————————
محله المناره إبداره محـله الحظره
إبن الرضا وبي ريـحه أُمــــه الزهره

الحوائج بيدة جمعهه
على الخدام وزعـهـه
حنين ومايرجـــــعهه
امير النعمة

عضيم وگبته اچبيــــره
مظيفه عامر ابخــــيرة
ابجـواره عاشت الطيره
برودة نسمه

اسمه يضل سيد العــباد
لبيكَ مولايَ الجـــــواد... يامولاي
——————————————
واحدنه بتراب الدرب يتـــحنّه
شفنه طريقه هوه درب الجـنه

حـــنين ويحــن علفــقره
امــــاني صــٰاير بگبــــره
ردت من عنده بس نضره
ويسجل اسمي

بحر جوده طفح گدره
چبير يبلـل الصــحـره
هوه بــــحالـــتي أدره
يحقق حلمي

حلمي معَ المهدي الجهاد
لبيكَ مولايَ الجـــــــواد... يامولاي
——————————————
اليعشگ حروفه للابد ما يحتار
حبه امان وتــبرئه مــن النـــار

هواك الدخل بانفاســـي
رفع صيتي ورفع راســـي
بقت تحسدني كل ناسي
على هلخدمه

وأضل بخدمتـــك دائـــم
الى ان يضـــهر القائـــــم
چبيره كلـــمة الخـــــادم
إشعظم هلكلمه


ناح وبچه حته الجــــمــاد
لبيكَ مولايَ الجـــــــــواد... يامولاي

——————————————
🖊️:حسين حيدر اللامي