https://t.me/AboAlFadhelPomes
ارجو الاشتراك في قناة الاخ الشاعر ابو الفضل

السيده زينب عليها السلام في العاشر تقول للامام الحسين عليه السلام:

شلون اضمك وانته كل جسمك سهام
خــدك امـچــوّي رمــل واللـه حـرام

الله لا ينطي الشمر. سوطة اذاني شكثر

صـدرك الـقـران والـحــب والسـلام
شلون اضمك وانته كل جسمك سهام
………………………………………………..

ضلعك تخلصة الحوافر من بعد ذاك الذبح
خـدك بـنص الـترايب يا ضـوة وجه الصبح
حيرتني منين الزمـك ويـن مـا ا لـزمك جرح
رادو يـحـرگـون گـلـبي خـلـو بـراسـك رمـح


بالمـخـيم جيـشـهـم صـار ازدحـام
خـوية عگـبك حـرگو اعـلينة الخيام

گمنة نسحگ عالجمر. طفلة تاهت باليسر

صـدرك الـقـران والـحــب والسـلام
شلون اضمك وانته كل جسمك سهام

………………………………………………..

نبلة دگت باب گلبـك عَزَبـِت دمك هـلـة
طـگة الولية هضيمة للي ماكـو احـد الـة
شافهم طلعو روحك گام يضحك حرملـة
حيل مستعجل ابموتك وانته عندك عايلة


شلـون بلة حـسين عالـغبرة ينام
سَلِّبـو ديـن الله ما سـلبـو إمــام

عندك اطفال وخدر. كلهة للهيمة تفر

صـدرك الـقـران والـحــب والسـلام
شلون اضمك وانته كل جسمك سهام

………………………………………………..
سَـلّبو منك قمـيصك جـيش امـية وما حـچيت
ومن شفتني بمتني اشاگف حيل وجّيت وطفيت
صحـت زيـنب ايخـوية بصـوت مبحوح وبچيت
وانـة صـحت حـسين وينك ضربو امتوني دريت


بـس ونيــنك لـيش ما اســمع كـلام
كلشـي ضـايع مــني وبعيــني ضــلام

كسري ما صحّلة جبر. يا ضوة عيون الخدر

صـدرك الـقـران والـحــب والسـلام
شلون اضمك وانته كل جسمك سهام

………………………………………………..
الخيمة محترگة علينة والحرم كلهة تنـوح
صرت چادر للبواچي وللمصايب والجروح
گطّعو بالهيمة جسمك طلعو منك الـروح
تشهگ تراب انته واحنه للسبي كلنة نـروح


بـالخـرابـة هنـاكـة بنـتـك هـم تنــام
واختـك تـصـلي الفـرض مو من قيـام

صبري ما مثلة صبر. والله گلبي منكسر

صـدرك الـقـران والـحــب والسـلام
شلون اضمك وانته كل جسمك سهام

………………………………………………..
جيـت اودعـك وامـسح دمـوع العتـاب
وانـهي كـل هـاي النـوايـب والمـصـاب
كـــلـنـة مـــن تــراب ونـــرد لـلـتـراب
عــضم الله خـوية اجـري بـهـالمـصاب

الـفرحة فـرّت مـني چـن فَـرّة حـمـام
والـحــزن لايـك عـلـى ثــوبـي وســام

ابنوح اخلصنة العمر. وابقة للمهدي انتضر

صـدرك الـقـران والـحــب والسـلام
شلون اضمك وانته كل جسمك سهام

……………………………………………….
✍️ حسين حيدر اللامي

هوسات لأمير المؤمنين عليه السلام


بلّغ يا محمد خل يسمــــعــون
بس حيدر ولي وبكل وجــــــازه
علي رد الشمس وإبچفه الاكوان
هيج انسان عازه وجـــــهه عازه

((بس حيدرهه إيلوگ إعليهه)). هوسه
————————————————-

علي أول علي شيخ إعله الاعــراب
علي الحَبه يظل مرفـــوع راســـه
تره اليكره علي من الله مـكــــروه
الخلل بيه بله خل إيشوف ساسـه

((تدري إمنين الصوچ إبساسه)). هوسه

————————————————
علي فارس مهيب إمحير الكـــــــون
علي إبكل معركه تلگا الاشـــــجـــع
علي جدنه وأبونه والجماعه إهنـاك
جدهم بالحرب گاضـــــــيهه ينزع

((يمك حيدر ذب إهدومه)). هوسه

————————————————

علي چم آيه نزلت بي لحــــد الان
علي جوهر عضيم إشكبر هلنعمه
علي سيفه يهلهل لو نــــظر روس
ذواق ويلگـــــط زلمــــــــه زلمه

((ذواق يدور عالقاده)). هوسه

————————————————

مشهودتله حيدر بدر صــــــفين
من خله الزلم راس إبحـلگ راس
ما ميت علي واليسأل إشلـــــون
إشلون إيموت المخلف العــباس

((مامات الخلّف عباسه)).. هوسه

————————————————
🖊️:حسين حيدر اللامي

فتحة عزاء :

حبيبي حسيناه حبيبي حسيناه حبيبي حسيناه
————————————————————
سمحلي وصالك اطب إبعــزائــك
يساتر عليه وســـــليــبه ثـــيابـك
عفت كل حياتي واجيت اعله بابك
تركت امنياتي إعله عتبة رجــــائك

حبيبي حسيناه حبيبي حسيناه حبيبي حسيناه

————————————————————
اذا ما ردتــني اروحـــن لويــــــن
انوح وانــادي حبــيــبي حـــسين
چنت انه اعمه وصرت انته عيــن
دمعتي إبعزائك اوفـــيـــــهه دين

حبيبي حسيناه حبيبي حسيناه حبيبي حسيناه

————————————————————
فواجب عــــليـه ارد الجـــمـيل
نحر من رضيعك چفوف الكـفيل
خيول اعله صدرك دمائك تسـيل
زلم اجـــنبيه بخـــواتك تـــــعيل

حبيبي حسيناه حبيبي حسيناه حبيبي حسيناه

————————————————————
لطم خده لجلك مليك السماء
لهسه إبضريحك جزع أنبــياء
تظل إبوجـــودك أرض كـربلاء
محطة عويل ودمـوع وبكـــاء

حبيبي حسيناه حبيبي حسيناه حبيبي حسيناه

————————————————————
يعلة وجــودي وأمــير الوجــــــود
الوكت چنه خيمه وحضرتك عمود
أسير آنه جيتــك وذنــوبي القــيود
إشكثر عنك أبعــــد ولكــن أعـــود

حبيبي حسيناه حبيبي حسيناه حبيبي حسيناه

————————————————————
🖊️:حسين حيدر اللامي

الحن هاي القصيدة

https://t.me/hushamalsaadi
ارجو الاشتراك في قناة الشاعر هشام الساعدي

نعي هلاليه



اجه هلال الغدر والظيم والعــــــبره
اجه وبيامه جاب النوح والحـــــسره
اجه والف وتسعمية جرح بحســــين
وترد تنشر قميصه فاطمه الزهـــــره
وابو فاضل گطيعه إچفوفه يم المـاي
وام عون التنوح وشابچه العشــــــره
إهنانه الأكبر إمگطع وصل يا حيـــــف
إهناك القاسم المغدور بالـــــطــــبره
عطش عبدالله وإنوب السهـــــم يرويه
وأنصار السبط ميــــــــتين عالغبـــــره
الله يساعد المهدي إبشهر عاشــــــــور
شاف إبن الزچيه مِنگِـــــطع نـــحــــره

خادم إبخادم ضل يشد إحـزامه
قادم محرم موسم اللطـــــامه

اهلاً وسهلاً باللـــــطم والدمعات
غايب علينه وچنه نحسب ساعات

———————————————
محرم كلهه تنتضره—شهر بي ريحة الزهره
الخادم يخسف إبصدره— أبد ميهـــمه

نخلي إبكل شبر رايــه—ونرد إنـــوب مشــايه
مجلس لطم وإقرايه —إشعظم هالنعمه

والخدم من تتفق يوميه
مُلتقانه إيصير بحسينيه


إتشوف الخدم بالتعزيه دمهم حار
ورثو صفات التضحيه إمن الانصار

كل ذني بس إيهل علينه سهلات
غايب علينه وچنه نحسب ساعات

———————————————

ندعي إمن الله يوميه—تضل النيه لطميه
مجالسنه هوه الريه—تضل بگلوبنه

نغير الكره الارضيه—تصير الكره الشيعيه
نعزي العمته مسبيه —إبدموع إعيّونّه

هذا شهر البي عزائات إشــــــكثر
نلطم إمـــن المغرب إلحد الفجر



نستقبله إبدگة صدر دمعة عيـن
شهر المحرم يعني شهر الحسين

فوگ السطوح إندگ سواد ورايات
غايب علينه وچنه نحسب ساعات

———————————————
الخادم كاتب إبابه—آ يحسين ومصابه
تبقه الدمعه سچابه— ابد ميجامل

تره احنه بهالشهر ياناس—نتاني ليلة العباس
عم الساده تاج الراس—ابونه الكافل

حگنه نفخر بي لإنه إعجـــوبه
الخله عسكرهم يصيح التـوبه



عاشور اجه ورجعن علينه ايـامه
وبليلة العاشر نحضـــــر القامه

شنگول وشنحچي قلـــيله الابيات
غايب علينه وچنه نحسب ساعات

———————————————
يعجن حنِّته الخادم—اكيد إبليلة القاسم
يحضره طبعاً القائم—أبد ميعوفه

لازم كلنه نتحضر—نتعب باللطم اكثر
أذان العَزه قَدْ كَبّر—سمعنه إحروفه


الحـمد للة إبتده عاشور الجديد
وتره محد بس الحسين اليفيــد


والينتضر جية الطبگ بحـروره
تلگا إبـسابع سمه واصل نـوره


إتموت الگلوب وهوه گلبه مامـات
غايب علينه وچنه نحسب ساعات

———————————————
محرم خيمه ويلمنه—طريقه إيودي للجنه
تشوف الناس تتعنه—اله إبكل لهفه

خل احچيلك إحچايه—القليله بي تره إهوايه
سندنه وهوه تچايه— منو الي يوصفه

الله يحفظ هالعزاء الـــدائم
باقي بينه الحد ضهور القائم

إبن العزه صيته يشع بين الناس
من الزغر شداله حيله العباس

مو دمعه من عينه تحســـهه آيات
غايب علينه وچنه نحسب ساعات

———————————————
🖊️:حسين حيدر اللامي

حُسين حُسين —يا ابا عبدالله
—————————————————

إجه شهرك يبعد الروح. وإمتد العُـمر بـــــــــيه
وإرد إلبس سواد إبشوگ—وألطم بالحســـــينيه
وأخسف صدري لو أسمع—مشت للشام مسبـيه
وأذكر حرگة إخيامك—وتراچي إبنـــيتك إرقيــــه

حُسين حُسين —يا ابا عبدالله
—————————————————
تجي الزهره وقميص حسين—ناشرته إبدمع هامل
وأحس إلهسه مگطوعات —چفينك يبــوفاضـــــل
زينب ترجع إبعاشـــور—مـٰتن أزرگ جســم نـــاحل
والسجاد بعده إيحـــير—إبعمـــاته وضــعن مـــايل

حُسين حُسين —يا ابا عبدالله
—————————————————
خل أسأل سؤال إزغير—بس إهـواي أنه شفــته
ياهو اليرضه كل السوگ—يتفرج عله اخـــــتـه
واليضَيِّع ضوه العباس —ظلمه إتصير سالفــته
إتخيل والدك الحسين—تشوف الخيل ساحگته

حُسين حُسين —يا ابا عبدالله
—————————————————
مصايب كربله كل عـــام—تِزَيد اللـــوعه من تبـــــدي
وإباب العزيه إبشــــوگ — واگف يلطـــم المـــهـــدي
يصيح إبكل عزاء إبصوت—آيحــــسين يــــا جـــــــدي
ويظل صوت العليله إيصيح—هلي ليش آنه أضل وحدي

حُسين حُسين —يا ابا عبدالله
—————————————————
آيحسين ومصابه—تجري إبــدمي لطـــمـــيه
واحس خيمات ابو السجاد—شبن وانطفن بيه
واحس إبحسرة الايتام—وإبچي إبحرگه لـــيليه
بلكت انحسب خادم—وتقبل فاطمه إعلـــــيه

حُسين حُسين —يا ابا عبدالله
—————————————————
🖊️:حسين حيدر اللامي

إلى أُمِنا الزَهراءْ صَلَواتُ اللهِ عَليها:
————————————————-
يا دَوْحَةَ العِطـــــــرِ الزَكيّ الزاكـي
مـــا كانَ خَلــقٌ لِلـــوَرى لَــو لاكِ

هَل كُنتِ جالِسَةً تُديــرينَ الـرَحىْ
أمْ دارَتِ الأكــــوانُ فـي يُمنــــاكِ

في وَصْفِكِ قَدْ حارَ قاموسُ العَرَبْ
وَاستَسلَمَتْ قِمَمُ العُــلى لِـــعُلاكِ

مِنْ أَينَ ما يَحلو الشُــرُقُ لِشَمْسِكِ
قَمَـــرٌ وَ نَـــجمٌ تــاهَ في كَفّــــاكِ

زَهراءُ فـــاطِمَةٍ سُــٌـموُ جَـــلالَـــةٍ
مِنْ نورِهِ العالـــي القَـــديرُ بَـــراكِ

كُتّابُــــهُمْ فَقَـــدوا رِباطَةَ جأشِـهِمْ
سُبحـــــانَهُ أَبــــدَعَ مَـــنْ سَـــوّاكِ

سابقتي تاريخَ الزَمــــانِ عَظيــــمةٌ
وَتَقَصَّرَتْ سُبُلُ المَــدى لِمَــــداكِ

روحي وَعائِلَــــتي فِــــداءُ تُـــرابِكِ
بَلْ روحُ كُــلِ العـــالَمـينَ فِـــداكِ

قَدْ لا نَراكِ وَ لَـمْ نَعِــــشْ بِزَمــانِكِ
لكِنَّ جَوهَــــرَةَ القُلــــوبِ تَــــراكِ
———————————————
🖊️:حسين حيدر اللامي

نُدبة إلى حبيب الروح مولاي المهدي عَجَّل الله فرجه الشريف:


راح اعوفنلك قصيده خاف امــــوت
بيهه كومه إسوالف إبطعم السكوت

إشكثر تانيت —إلك حنيت—تجــــــي ياريت..مولاي
إبدموع العيـن—عليك حسين—أشوفك وين..مولاي
——————————————————

ثگل البُعِدْ مِثل الجبال— يالمـــــهدي ما أگدر تعال
عطشانه روحي لفرگتك—طال الصدى يمته الوصال

يمته نـــلتقي — أنتظـرك وين
يم ابو الحسن—لو يم حسيـن


أقره بالندبه وظياء الصــالحين
وأدعي يم شباچ أمير المؤمنين

حلم محروم—يعد إنجوم—بچه كل يــــوم ..مولاي
إبدموع العين—عليك حسين—أشوفك وين..مولاي
——————————————————
تدري الوضع كله فسـاد—جور وظــلم كل البلاد
دليني بالخط الصحيح— وياك أنه حلمي الجهاد

غابه تحس—ومفترسه إذياب
‏جرح البُعِد—ينزف ما طـــاب


تايه إبصحرة نوايب قـــاحــله
وبوصلة حبي الوحيده كــربله

ردت وياك —نجم بِسماك— ولا انســـــاك..مولاي
إبدموع العين—عليك حسين—أشوفك وين..مولاي
——————————————————

صح اني أحبك وإنتحب—وحارمني من وجهك ذنب
أُعفو عليه سيـــــدي—خـليــــني يمـــك أقـتــرب


حلمي أقترب—منك مــولاي
إمقصر أعترف—وياك هواي


يمك اشكي الما شكيته يم أخوتي
أضعف وباسمك تردلي بيه قـوتي

دعيت إهواي—أشوفك جاي—يوجه الماي..مــولاي
إبدموع العين—عليك حسين—أشوفك وين..مولاي
——————————————————

مني رساله إلحضرتك—چا يمتى أحضه بشوفتك
يا صاحِبَ العَصرِ تَعال—إعليك أمشـــي جـدتك

لو تجي وتمر —ترتـــاح الــــروح
بلسم الجرح—والدنيــه إجــروح


فتشو گلبي ولگوك إبكل نبــض
واجب إنسلم عليك إبكل فرض

إلك چم عام—جـــــرح والآم—جفن ما نام..مـولاي
إبدموع العين—عليك حسين—أشوفك وين..مولاي
——————————————————

مولايَ تــــعرف حاجـــتي—لو شيعو بجنــازتي
هم تحظر إلدفني أكيد — عازت وجودك عازتي

أقره بالعهد—وأبقه أترجاك
مؤتزر كفن—وأطـــلع وياك

شَكِّــكَو بيك وأدافــــع منقهر
إهــوايه گالو ما يجي لا تنتضر

أون ظليت— أنه أشتاگيت— دمع صـــــبيت..مولاي
إبدموع العين—عليك حــسين—أشوفك وين..مولاي
——————————————————
🖊️:حسين حيدر اللامي

بسم الله الرحمن الرحيم
على بركة الله نشر قصائد الليالي الفاطميه
من الآن وصاعداً

مملكة فاطمة
الارض والسمة
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
الله من خلق هالدنيا والكون
تحـت يـمناج خلاهـن هديـة
لو ما انتي اصـلاً ماكو كل دين
ولا طـه ولا حــيـدر وصــيــة
يعني الفلـك كلـة لو تريـديـن
تـفـرينـة بـاصـبـعج يالـزجية

بت محــمد فـــخر
منهه يظوي الگمر
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
بعض من يمنة بينة ما يصدكـون
عـن حـادثـة الـبـاب الـمخـيفــة
يـدافـع عـن التكـره عـلي الـكـرار
ويتـرضـة ويسـميها الشــريفــة
قـطع وبـلا جـدل جنسيته ارهاب
ومصـدر جيتة من تحت السقيفة

والي ينكر ضلع
هذا دافع جذع
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
وكـف جبريل وجنودة يـنضرون
علـى راس الزجـية فـرد نـضـرة
كلة الباري اريدك تهجم الكون
لـون لـحجابـها شـالت الزهــرة
والمسـجد رفـع جدرانة والـباب
لان نادت علـي وبالضـلع كسـرة

والسمة كبّرت
والملائك هوت
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
ربـنـا اخــتـارج ورادج تــصـيريـن
علـى هالــكون مسـؤوله واميــره
زغيـرة بالـعمر واوصــافج هــواي
عضيمة الجاه بس تغفة بحـصيرة
واكـو قانــون ثابت بيــن الاكــوان
يــسمـونـج عـشـيرتنـة الـچبـيـره

إعليهه دار الزمـن
فاطمه أُم الحسن
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
يــسالــوفة بـخــت يـا علـة الكــون
يمــشـكـاة الـله يــانـور الـقـداســه
اليخدمج ضمن روحة بساعة الموت
غــداً يــوم الــحشـر مـرفـوع راسـه
والــينـكــر قـضـيـتـج هـذا چــذاب
الخـلل مـو بيـه خـل يـشوف سـاسه

والخدمهة ترة
اسمة عد حيدرة
شيخة عوالم والِعلم بيهة

\//\/\//\/\/\/\//\/\/\/\/\/\/\/\//\/\/\/\/\//\/\/\/
🖊️:حسين حيدر اللامي

ذاتَ يَومٍ جَلَسو الإِخـوه مَعَاً
سَأَلَ العَباسُ عَنْ أُمِ الحَسَن
حَدّثوني وَضعَها.. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
يسأل العـباس وإدموعه جـــرن
ياهو گلولي كسر ضلع أُم حـسن
وإبخياله إيـريد يرجــع بالزمــن
من سؤاله الباب وإجذوعه بچن

زَينَبٌ قامَت لِكَي تَروي لَهُ
بَدَأَ العباسُ يَجــري دَمعَهُ
قِصَةٌ في بابِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
ذاكه باب العله صــدر أمي إنـــطبگ
إهنا بچينه إهنانه من خدهه إنصفگ
وأذكر إعله العتبه محسنهه إنســحگ
چف إديـــهه إبجـمـر وإبـنـار إحتـرگ

بَقيَت تَحتامُ خَلفَ البابِ
زُمرَةُ الكُفّارِ في الأَعتـابِ
أَكثَرو في ضَربِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
إنوب سولفله الحسن موقف صعب
گلــه داســـو بيـــتنــه وادم غــرب
ورجع صاح إبحسره وإدموعه تصب
ياهـو يرضــه اگبـاله أُمه تنــضـرب

بَعدَها صارَ الحُسَينُ قائِماً
لِلمُصيبه راويــاً وَمُكــمِلاً
مِكمِلاً لِجَرحِها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
يابو فاظل من لزمت أمـي وبــچيـــت
فَزَّت وإيديهــه مــحــترگه نســيــت
إشگد دعيت أُمي تِظل وإشگد دعـيت
مــادريــت إتــروح منــي مــا دريــت

وَسَمِــعــنا صارِخاً بَعــدَ زَمَـن
ياعلي نَحّي الحُسَينَ وَ الحَسَنْ
صِرتُ أَشكو رَبـها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
من تجــر النفــس يلچــمهــه الـهـوه
أُمــنـه مــا تنــزف دمــه تنزف ظــوه
إهــوايــه حــاولــنـه نــدور عــن دوه
تالي مــاتــت وآنه كـل حــيلي خـــوه

لا يَزالُ الحُزنُ فينا مُنتَشِـر
نَحنُ نَبكي ظِلعَ أُمٍ مُنكَسِر
وَكَبيرٌ فَقدُها .. ما جَرى في ضِلعِها
صارَ يَسأَل..
\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/\/
🖊️:حسين حيدر اللامي