تَهَدَّمَتْ وَالله أركانُ الهُدى

واكسرتاه بَعدَكَ يا أبانا ياعلي 💔

عَجيبٌ أَنْتَ حَبيبي حُسينْ

عن قريب تنزل انشاء الله قصائد شهر محرم الحرام بحيل ساداتي ال محمد

صلى اللهُ عَلَيكَ يا مَولايَ الجَوادْ💔

إلى الإمامْ مُحَمَدْ الجَوادْ(عَلَيهِ السَّلامْ) :

جواد وجود فضلك تارس العـيــن
ضريحك بيه زياره ابطعم الحسين

جدك راد شمس الله الوسيعه
أمرك سيدي واجــب نطيــعه
——————————————-
مملكتك إچبيره..جود اووفه وغيره..
كل الفلك والكون—بالاصبع إتديره

هيـه امــك الكــوثر ..منانه واتصور
اهل السمه يركعون..يم نورك الابهر

قبل السؤال إترد عليه هاك امــراد
گبرك مناره وحگهه تفخر بغـــداد


الطلب ذريه ودمــوعه إبلــحيــتـه
يرد تترسله حضــنه ويحله بــيــته
ويجي للحضره جايبلك رضيعه
أمرك سيدي واجـب نطــيعــه

——————————————-
ما رجَّعِت سائل..چنك أبو فـــاضل
والمارضه إبحبك..جاهل ابن جاهل

عشاگك إهوايه ..ترفـعلك الــرايــه
إبنص العزاء إتصيح ..مشايه مشايه


اليدخل ضريحك بيه يشم هيل وياس
ومو عجبه لو حيهّ الخدم چف عبـاس


الامان إيخاف وإبنص صحنك آمن
رؤوف وتشبه الوالـــــد الضــامن
يم اسمك نأمن كل فجيعه
أمرك سيدي واجب نطيعه

——————————————-
عطر الحسن عطرك..جنة عدن حدرك
حته صبر ايوب .. ضل يسجد إلصبرك

سامره هم تحدي..وبالــتعــزيه تبدي
والعسكري إتعناك..والهادي والمهدي

سفرة حوائج تفرش إبصحنك دوم
للاعمى للطاح إبمرض للـمهـمـوم


بيدك جاذبيه إعله الــعــــوافي
إمام وهم عضيم وهم تشــافي
منك صار منهاج الشــريعه
أمرك سيدي واجب نطيعه

——————————————-
بعين الگلب رسمك ..فدوه رحت لاسمك
يا سيدي ومـولاي..قــربنــي مــن يمــك

خدامك احبابك..باب الله چــن بابـــك
كل معجزات الكون..صلت إعله اعتابك

عدكم بسيطه الدنيا يا اهل البيت
كل التواضع بيكم وكل الــصيــت

يمن باب الله بيدك ضال مفتـوح
عطر الجنه من شباچــك يفــوح
ما همتكم الدنيه الوضيعه
أمرك سيدي واجب نطيعه

——————————————-
عالِم على العالِم..سيد علــى الـــوادم
بحر العلم والدين..والعانـــــدك نادم

رادو يحجبــــونـك..رادو ينـــزلــونــك
بس الزمــان انــدار..والضـلت اعيونك

اسمك بحر فوگ العطاشه إنشوفه
بس اليحبك يرتوي إمــن إحـروفه


كوكب تبقــه ما بيــن الكـــواكـــــب
ونورك فاگــس إعـيـــون النواصـــب
وصدى صوتك على الشيعه تذيعه
أمرك سيـــدي واجـــب نطيــعه

——————————————-
🖊️:حسين حيدر اللامي

موعدنه يم باب المراد
لبيكَ مولايَ الجـــــواد.. يامولاي
——————————————-
اهل السمه نصبوله فوگ إقرايه
واهل الارض راحــو إله مشــايه

هـــــوه سيد الساده
حنين أبجودة كلعاده
يفرش سفــرتة وزاده
ويگلي اتفظل

الشيخ العـــام عالديره
صعب يصعب تفاسيره
اليطيح ابشدة وابحيره
يگصده وتنحل

كل الخدم لبست ســواد
لبيكَ مولايَ الجـــــواد.. يامولاي
——————————————
محله المناره إبداره محـله الحظره
إبن الرضا وبي ريـحه أُمــــه الزهره

الحوائج بيده جمعهه
على الخدام وزعـهــه
حنين ومايرجـــــعهه
امير النعمه

عضيم وگبته اچبيــــره
مظيفه عامر ابخــــيره
ابجـواره عاشت الطيره
برودة نسمه

اسمه يضل سيد العــباد
لبيكَ مولايَ الجـــــواد... يامولاي
——————————————
إبكل سنه زواره ضـلـــــت تـزداد
وكل الطرق صارت تؤدي البغداد

ربنا ابعصمته اتجــله
بحيث ايشافي كل عله
ياهو ابعلمه يوصــــلّه
بشر أَتحَدّه

الامام الراكع الســـاجد
الشّاب المــتقي العابد
حبيب الخالق الواحــد
مثال إلجدَّه

فوگ العرش علگو حداد
لبيكَ مولايَ الجـــــواد... يامولاي
——————————————
واحدنه بتراب الدرب يتـــحنّه
شفنه طريقه هوه درب الجـنه

حـــنين ويحــن علفــقره
امــــاني صــٰاير بگبــــره
ردت من عنده بس نضره
ويسجل اسمي

بحر جوده طفح گدره
چبير يبلـل الصــحـره
هوه بــــحالـــتي أدره
يحقق حلمي

حلمي معَ المهدي الجهاد
لبيكَ مولايَ الجـــــــواد... يامولاي
——————————————
اليعشگ حروفه للابد ما يحتار
حبه امان وتــبرئه مــن النـــار

هواك الدخل بانفاســـي
رفع صيتي ورفع راســـي
بقت تحسدني كل ناسي
على هلخدمه

وأضل بخدمتـــك دائـــم
الى ان يضـــهر القائـــــم
چبيره كلـــمة الخـــــادم
إشعظم هلكلمه


ناح وبچه حته الجــــمــاد
لبيكَ مولايَ الجـــــــــواد... يامولاي

——————————————
🖊️:حسين حيدر اللامي

أذنب والگه خيرك جاي للبيت
يالمــغرگني مــن كوثر حنانـك

وتسامحني إشكثر —— يقرآن الفــجر
——————————————————
انـــي ذرّه—وانته حضـره
وگبه مخطوطه إبقلم رب العـــباد
لا متطرد—يـمك اگـصد
مجلسك يشطب عله إذنوبي إبسواد

متحملني اهــواي —يل ما شارب مــاي
شابع جيش اسهام—شنــجازيك إبــهاي

اعوفن دربك وهــم امشي لبعيد
وارد والگه إبدفو إتحضّر مكانــي

بَحر من الصبر — يقرآن الفــجر

——————————————————
ياهو مثــلك—سال دمك
وزعت جسمك على احلوگ السيوف
تنطي الاكبر —تنطي اكثر
إمسلّبه اثيابك لچــــن ســـاتر الوف

گلي إنروح الوين — لو عفناك احسين
عميان وصحناك —وافتحتلنه العـين

الشمس منريدهه وانته الضوه الزين
خل الـشمس تنزل وانتـــه اصــعــد

يوالدنه الذخر—يقرآن الفجر

——————————————————
يا حنـــانك—يـا امـــانـك
شيخ ومغطي السلف كل الجهــات
على ايتامك—على اخيامك
لحد هاي الساعه دم يبجي الفرات

صبرك ماله احدود—من شفت العامـود
طر راس الوفّــاي — ومايه اتبده الجود

ذبح عبدالله نبلة عين عباس
كل هذا تقدمه ابلا مقــابل

وتقدملي العُمر — يقرآن الفجر

——————————————————
إنته عِبره—إنته عَبره
إنتــه منـــحر مـــحتــقر ذبّـاحه
حيره عاشر—طبع حافر
ليش مثــلك ينــزف إمن اصفاحه

صدرك نجمه وليل—ليش اتدوسه الخيل
كلهه اسيوف ارماح—گامـــت بيك اتعيل

يل إمبچيني زيد حرگتي إعليك
وبمـشّايــتك سـجّلنــي زايــر

وتخليني افتخر —يقرآن الفجر

——————————————————
إبموتي تحضر—يبو الاكبر
وحشه گبري وخايف إيطول الحساب
وتبقه يمــي —حسين امي
وانته بيدك خـــــتم توقيــع الكــتاب

ضلمه وشع النور— لو بيّن عاشـور
بالبرزخ انعــــاك— دمك بيه إيفور

احبك يا ابو الكل اليخدمون
واليخدم عزائـك عالي شانه

مثل نسمه وتمر—يقرآن الفجر

——————————————————
🖊️—حسين حيدر اللامي

بسم الله الرحمن الرحيم
نبدأ تنزيل قصائد شهر محرم الحرام

العليله عليها السلام:

آنــه ودَمـعــتي واللـيل — سولفنه إبدفو إحروفك
نزلت نجمه مدري إمنين — ثــاري إدور إچفـوفـك

جرح الـفُرگه ماطــاب— آيا فــگـد الاحــبـاب
—————————————————————
هــذا حالي إخلاف وجهك طير محبوس إبقفص
وبـالنـوايـح بـيـر صبـري هـم ابـشــرنك خلـص

مرني إبحلم لو بالصدگ عـازة نفـس للمخــتنـگ
دلالي بس باسمك يدگ ما ضل الي صبر

انــه العليــله وانتــضــر. دمعي نزل مثل الجمر
لو ردته هاك اخذه العمر. بس ترجع وتمر


أرجع واغفه باحـزاني — وانه ادري البُعُد حرّاگ
هيه الجنه باحضانك — وانه بنيــتك وأشتــاگ

أصيح اويه الهوه الهاب—آيا فــگـد الاحــبـاب

—————————————————————
الشجره لو تكسر غصنها يطير واهس كـل زرع
وانه مصيوبه إبشظايه إفـراگ واتنــازف دمــع

غرگــانه واستنشق حزن واسمك يجي إبالي واحن
‏والبيت صاير چن سجن ما يرحم القَدر

يا بويه يا اجـمل نــحر منـك اخــذ لونه الگُـمَر
طفله انه شيبني القـهر فَگدك كِسَر ضَهَر


اجمع ذكرياتي إبشوگ — والفرگه تطـشّــرهـن
كـل أَيـامي وسنيــني — عگبك والله ما حبهن

عـيني مناطــره الباب—آيا فــگـد الاحــبـاب

—————————————————————
نجمه تاهت بالـعوالم وإنگطـع درب السمــه
هيج احس انه بصــفنتي وداعت امك فاطـمه

ليش النحبه ما يضــل. ودروبه يترسهه الزعل
وكل المشاعر والخجل. تتبده چن نهر

وبكل كتر نبقه نــصد. ها لو يرد لو ما يرد
سيف ويذَّبِّحنه البُعِد. ونتاني اي خبر


آخ إتكـض ضهر چـــم آخ. وتلم قــوّتي لباچـر
هيچ أكضي العمر ضليت. انه ولوعتي إنكــابـر

بالطــف عندي غيّـاب —آيا فــگـد الاحــبـاب

—————————————————————
أسال أوراق الخريف الچانت أبطولك تِحف
لان اول بشــر انته إيــصير طاريــك تــرف

ليل الهجر لمن يجي. اشبع هضم اشبع بچي
واتذكر اوياك الحچي وينك يكل هلي

اكتبلك بدمعي اليصيب. شوگ إبضرف رشيته حُب
وإموقع إبختـم الگلــب. بلكت ترد الي


حيره إمحــزمه ابـــالآم —تفتر إبوسط حلمي.
مثل الملح وسط العين —هيج إموصّفه هَمّي

جفني إمن التعب شاب — آيا فــگـد الاحــبـاب

—————————————————————
انه من يـــوم الٰـفتح عينــاي رب العالــمــيـن
خله كل دگات گلبي إبصوت تصرخ ياحسيـــن


احسبني طيره إويه الضعن — ماتندل وعينك وطن
واتجرعت كــاس المــحن — مــحد الــي التــفت

من رحت عنّي إشكد صحت — اوگف گمت واعثر طحت
اوصــــل الـــك انـــه ردت — بــس دمــعتي صــفــت


مل كل الصبــر والآه — سوده وموحشــه داري
لو سبع ابحر وانهار — مــــا تطفــه بعــد ناري

عندي اوياكم إعتاب — آيا فــگـد الاحــبـاب

—————————————————————
🖊️—حسين حيدر اللامي

سَيّدُ العِزَّة:

إمامي غَريبْ. إمامي سَليبْ
حُسَينٌ حُسَينْ. حُسَينٌ حُسَينْ
———————————————
أرىٰ فيكَ صَمْتُاً يُحاكي الكَــلامْ
كَسَرْتَ بِــنورِكَ أَنــفَ الضَــلامْ
رَسَمْتُـكَ كَعْــبَةً لِــديِنِ الوِئــامْ
فَجائَتْ بِصَدرِكَ تَطـوفُ السِهامْ


سَتَبقى عَجيبْ. إمامي سَليبْ
حُسَينٌ حُسَينْ. حُسَينٌ حُسَينْ

———————————————
سُحِقْتَ بِخَيلِ العِدا وَالطُغاة
لِتروي بِكْأسِكَ مــاءَ الحَيــاة
فَجاعَتْ سُيوفٌ بِأيدي العُتاة
فَوَزَّعْتَ جِسمَكَ كُلَ الجهاتْ

أَميرُ النَّحيب. إمامي سَليبْ
حُسَينٌ حُسَينْ. حُسَينٌ حُسَينْ

———————————————
بِبَحْرِ المَعاصي شَرِبْتُ الـكَــثيـر
تَــصَدّقْ عَلَيَّ فَهــذا الـفَـقــيـر
مَقامي صَــغيرٌ وَ ذَنــبي كَــبيـر
وَأَشــهَـدُ حَــقاً بِــأنّي الحَسـير

فَأَنتَ الحَبيبْ . إمامي سَليبْ
حُسَينٌ حُسَينْ. حُسَينٌ حُسَينْ

———————————————
دَخَلـتَ حَيـاتي فَكُنْـتَ الضياءْ
ومُـذْ أَن عَرَفتُــكَ تَرَكتُ الهواء ْ
فَشَخصي مَريضٌ وَ أنتَ الدَواءْ
كَنَجمٍ مُضيٍ يَجــوبُ السَّمــاءْ

لِجرحي طَبيبْ. إمامي سَليبْ
حُسَينٌ حُسَينْ. حُسَينٌ حُسَينْ

———————————————
لَبِســتُ لِحُــزنِكَ ثَوبَ الحِـدادْ
فأَنـتَ العَــزيزُ وَأَنــتَ الجَــوادْ
دُفِنــتَ وَ قَبــرُكَ أَنــارَ الـــبِلادْ
وَقَدْ ناحَ فيكَ ضَمـــيرُ الجَــمادْ

لِقَـلبي قَريـب. إمامي سَليبْ
حُسَينٌ حُسَينْ. حُسَينٌ حُسَينْ

———————————————
🖊️-حسين حيدر اللامي

يوم الخدمه:

كـل المـناصـب والـعناويـن
ماتسوة خيط بثوب الحسين
ياحسين ياحسين
……………………………….
كون اليشيل اسمك
طبعه شهــم مثلك
بالاخـــــــره يمــك
مرفوع الهــــامه وما ينذل

واني اعتقد فكــره
اليعشَگ الحَضره
من يوصل لگبــره
من ايذكرون اسمك يعدل

لو يمر ذكر —الى الخدر— يلطـــم بگبره
هذا ابو علي— ترك الي —بالگلب جمره

شمـسـوي بالخــادم يمــولاي
من يذكر اسمك يعطش هواي
ياحسين ياحسين
……………………………………
من زغري مَجنــونك
شسوه انه من دونك
ضــــد اليعــادونك
يا شيــخ الساده وواليهة

وكت الشـدد يمي
كافيني كل هـــمي
يحسين چــٰن امـي
كل شدة عيونك تگضيهة

بالمهد صحت— الك نحـت —واوجعت صدري
مجلسك هوه—اللطم سوه— اويه الدمه يجري

ريت الزمــن لو بينه يندار
نترسلك الـــطف كلة زوار
ياحسين ياحسين
………………………………….

يالفـضلك هواية
يالبـالوصف آيـه
ارزقـــني مــشايه
ابخيـــمـه زوارك خليني

ابخيرك يبو اليمه
ســــــويتني زلمه
يا محله هالنعمه
ابچيلك واعـميلك عيني

بِالنِّـــعَم بحــر— ارض فـخر —مجلس الزهره
اليشعر بحزن —بچه ويـون— يرتفـــع قـدره

الماعنده مثلك قدوه بالدين
دنيا وممـاته واخــرة ويـــن
ياحسين ياحسين
………………………………….
من يبتــدي المحشر
وكل الخـلگ تحضر
بيـــدك يبــــو الأكبر
چن خيمه إتلــم إبخِدامك

وإعله اليعـــادونك
ما توگع إعيــــونك
بــس اليحبــــونك
چن حيدر تحسبهه إيتامك

إبمصحف الخدم —شِكِل عَلَـــم —والگمر وإســمه
بي لـطم دمـــع— ضـوه ويــشع —دفــتر الــخِدمه

أول سَــرَه للجــنّه خِــدام
تدخل مواكب رافعه اعلام
ياحسين ياحسين
…………………………………
يالمرجع الأعــلم
طاريك مي زمـزم
من ثورتك نفــهم
منجامل علحق بالباطل

طحت و وگفنه احنه
يل دمـــك إبـــدمنه
منـــك تـــعلّــــمنه
كل عالم ما يتبع جــاهل

ثورتك عهد —الــــٌـــى الابد— جمره ما تطفه
دمك النّزف— صدى وهِتف —بالسمه وصـفه

تبـقــى بـضــمايرنه الوسيــعـه
لوحـــه ونخطّهه إمن الشريعه
ياحسين ياحسين
…………………………………….

🖊️::حسين حيدر اللامي

ام البنين عليها السلام:

گلبي ينشد اعليك يوليد الزچـــية
اقمار اربعة افديك يا شمعة رقية
——————————————————
ناطرتلك لية ترجـع وانتـضر عنـك خبــــر
ياضـوة عيـوني ومهجتي والله دلالي انفطر
لـخاطر عـيونك ييـمة بزود ربيـت الكمـر
كتلة تعريف الوفاء چفوف ذبهة اعلة النهر

غالي بدمنة نشريك حد يوم المنية
اقمار اربعة افـديك يا شـمعة رقـية

——————————————————

شلــون لو تــدري ييمـة عذبتــني كربلـة
مثل لو كل المنـاجل حاوطــلهن ســنبلة
ولدي سويهم مضايف خير متروسة هلـة
ينگلب عباس دلة تفور بيهــة الــمرجــلة

زلمك يبو الاحرار وفوهة الوصـية
اقمار اربعة انطيك يا شمعة رقية

——————————————————

گلبي موجوع بغيابك حيل متاذي ويــنوح
ترجع تمنيت سالم وجهك يشافي الجروح
حضرتلك ولدي للطف زلم بالغيرة تفــوح
واذا ما كفـوك ولـدي انـي ويـــاهـم اروح

جندي احسبني وياك ضد جيش ال امية
اقمــار اربعة انطــيك يا شمـــعة رقــية

——————————————————

باجر بيوم القيــامة بيش الاگــي فاطــمة
زينب مچــواية اديهة وانـة ادية سالــمـة
ما يسدهم ضلع امك هالعصابة الـظالمة
ردو بخيل اعوجية على ضلوعـك هاجمــة

جسمك شايل اجروح وانة الحسرة بية
اقمار اربعة انطـــيك يا شــمعة رقيــة

——————————————————

روحي مـا تهـدة اعلة ونهة والدمـع يـنزل جمـر
والله عگبك صرت اعاني وكلشي ما يسوة العمر
بـيـن نـاس الــشـيـعتني اعليـك دورت شـكثـر
لـلدفـن تـانيـت تحـضـر يـبـني وتـسـد الـگبـــر

دمعي بگبري وياي عالراحت سبية
اقمار اربعة انطيك يا شمعة رقــية

——————————————————
🖊️—حسين حيدر اللامي

ميمر لمسلم بن عقيل عليه السلام


كل الكتب والتاريخ جهلت حقيقة أمره
—————————————————
جايب رساله من ابن عمه إحسين
والــعانـده يتخــيّر إبّــين إثنـيــن
لو صطره لو سيفه يگسمه نصّـين

والصطره تطبع نيشان وحروره مثل الجمره

—————————————————
إمبين علي عمه الفحل من چـفه
موت الكتايب بالحرايب وصـفـه
رَكّب جماجمهه إعله هيئة تُحفه

بيه ريحه من داحي الباب وإبدمه تمشي الزهره

—————————————————
مسلم أسد كل الاجت حاصرهه
وروس العده من ضربته فطـرّهه
خيل وزلم گاع النجف كاســرهه

وإبچفه چن ذو الفقار والكوفه كلهه إبأمره

—————————————————
بيهم صرخ لكن تحس نفخة صــور
من گصته تعرگ مرجله اتصب ونور
چم كربله بيهم بده وچــم عاشــور

متحس زلم چن نسوان تتراجف امن الخزره

—————————————————
سيفه إبيمينه وما شرب گطرة مــاي
كلــش قليله المعركه وهوه إهــواي
طبع الوفــه مـثل الكفـــيل الوفّــاي

بيه شمره من العباس واوصافه مثل الگمره

—————————————————
🖊️—حسين حيدر اللامي

الانصار رضوان الله عليهم :

حاجب ما عِلو مـــركزهـم العــين
أبطال وكفو إمن أصحاب الحسين
———————————————
لبسو عالدروع إگلوبهــم ليش
حته إنشوف نيتــهم البيــضه
رهبان وعلي وبيهـــم الف ثار
وقائدهم گمر شيخ الفـريضه

صاحو عالمنيه إبــصوتهــم ويــن
أبطال وكفو إمن أصحاب الحسين

———————————————
صاحو صيحه منهه إستغرب الكون
نخلي إبكـــــل كــتر ونه وفجيــعه
واحد گال أجيبن شارب الجيــــش
واحــد گــال اجـــيبنهه الشــريعه

مامات اليضحي إبعــــمره للـدين
أبطال وكفو إمن أصحاب الحسين
———————————————
عله فرض الصلاه راحو يركضون
جدم تسبگ جدم لجل الشهاده
بيهم صله بيهم شابگ إســهام
ذاك إستشهد و أنهه العــــباده

يفدون الوصي مو عــمر عـــمرين
أبطال وكفو إمن أصحاب الحسين
———————————————
فرح عباس من شاف الحچي حار
إشتد بيه الجمـــال وصــار گمره
شافاهم ضهر يشبگ ضهر حيـــل
وفحل فوگا فحل ضل يدگ صدره

دَين ولازم يوفــــون هــــالدَيـــن
أبطال وكفو إمن أصحاب الحسين
———————————————
نزلو مثل طيحة جبل عالـــــگــاع
زلزال ووگع عالــــطف تشـوفــــه
بيهه إترادمت روس وسعــف خيل
وبيهه إمن الر عب گصدت الكوفه

للنخوه أصبحو شـــاره وعــناويـن
أبطال وكفو إمن أصحاب الحسين
———————————————
🖊️:حسين حيدر اللامي

شوط كربلائي لمولاي ابا الفضل صلوات الله عليه :


شال الطف حدر چفة. زرع خوف ورعـب بيـهم
لَيغرك عدد و خــيول. تره العبـاس ســابيــهـم
————————————————————————
سيـفـه إعـلرگــب تـفـصال ويـــن التوجــع إيگصــهه
وبــچفه صـريــچ إفـچـوچ. إضروس العده إمخلصهه
گضت صطره وخسف بالراس وگضت من الرعب نصـهه

آيــا صــطـرة الــكـافــل
تضل إبكـل وجــه تــاكل
الوگع بيــهه صفه مـايـل

مِـن الواقـــعه لليـوم.. مـا تســكت بــواچيهـم

——————————————————————
من گــد الـضوه مـتـشوف. لو واجـهت اخـو زيـنــب
شمس متسيّده إعله الكون. وفه وغيره وغضب يلهب
جـبل لو لاگه ابـــو فاضــل. حتـماً ضهـره يتــحَــدّب


حُسَين وفاطـمه حِــرزه
راجــع نـسله للحــمـزه
جـبل فـوگ الارض هـزّه

سجـدو من گمر عدنان . ضـل إبنـوره عاميــهم

——————————————————————
عين إعله الـمنايه إتــحوم وعين إتصد عله الخيمه
الخيل إعله الزلـم ركبــت. خسـفت بيهم الــهيمــه
الوگع بيده الثگيله إنگول. أكلهــن حصـته و ضـيمه


گام يـلـفهه راس بـراس
چفه يگـطـع الانــفاس
يـاهـو العــانده ينداس

مثل الساحقه إعله الگوم. .نيزك نازل إعليهم

——————————————————————
طب للمشرعه بجربه. يجيب المــاي لــسكينه
ما يشرب ابد هيهات. وشفته إمفطره إحسينه
يكول امي إبزغر سني. عـلى الـخــوه تربــينــه

هذا الوفه إيسمونه
لو مو سهم بعيونه
شال الجربه بسنونه

هواشم والكلام افعال. كـل الخـلگ تدريـهم

——————————————————————
صيته بكل فرع كل دار. كاسر شـارب وزلــمــه
مثل حيدر علي الكــرار. ينزعون الــستر يـمـــه
وبخزره عيونه الحيـــد. يفتــح يمـهـن الاعمــه


ليث ابن الـفحل قســـور
راس الـنـازله إتـطــشـــر
سيفه اعله الوغه صرصر

مـن الكــره الارضــيه. . لـلــمريخ يـرميــهـم

——————————————————————
🖊️—حسين حيدر اللامي

الامام الحُسَين عليه السلام حينما وصل للامام العباس عليه السلام
گأنَه يقول:

مـن اوصـلت يـمك رجـف جـدمي
تـرضـاها بعـدك ينسـلب هـدمـي
خـوية دگـوم اعلـيك امـشّي امــي
عذاب. عذاب
مـا يرحمــك. هـذا سـهمــك. ويـل
وانـه صـدري. تسـحگة تـدري. خيـل

…………………………………………

طحت بس طيحتك ليفوگ. شمس وبنص سمة الفرگه
تنـزف اسـرع امـن الصـوت. تـجـر اويه النفـس حـرگـه
وزينـب مـن بعـدنه اتصــير ســبيـه امتـٰونــهــة زرگـــه

من بعدك مكسور الخـاطر
ياهو اعلة العــباس يكـابر. يا عباس

ردت ابحسره تغمض عينك
دورت ومــا هنـة ايـدينـك. يا عباس

لو هـيـج اخـو لـو مـاكـو كــل خـوه
تگـطعـلي چــفـك عالــنهـر فــدوه
تچـٰايـه صــرت بـسـاعـة النــخــوه
عذاب. عذاب

جرحك اضـلم. خـويـــه تــعلـم. ليل
وانـــه صـدري. تسـحگه تـدري. خيل

…………………………………………

تـركض فـحطـوك هـواي. حـيرة وسـهـم بـعـيـونـك
ردت بـس توصل الخيمة. لـچن ضـلـو يـحوطـونـك
حـيـل يـأذي هـالمنـضـر إمـام وجـربـة بـسـنونـك

ردت اوصل يمك واحـچيلك
وادري العـامـود يهد حيلـك. ياعبـاس
هية الخوه شتسوه ابدونك
لو شفت اگبالي ايـوذرونك. يا عباس


شلــون ارجـع لزينب واگللهـه
وامگـطعات چـفوف كافـلهـه
ضل بحسـرته وما وصل الهـه
عذاب عذاب
خــل اشـمك.يـجـري دمـك. حيـل
وانـه صـدري. تـسحگه تـدري. خيل .
………………………………………..
صحت خويه ووگف گلـبي. وبچه مـهري وانه بحيــره
جسـمك لـلسيوف گـراب. يـصعب حـيل تـفسـيــره
مـن گد مـا كَلِف جرحك. وي دمــك تـصـب غــيــره

كل همك زينب منـتضره.
وانته فراگك مثل الجمره. يا عباس

گوم وياي انطب للخيمه.
مالايــكلك نـوم الهـيمه. يا عباس


للـخيمه تـخجـل مـا ترو حلـهـة
من الي ما مـشيوف ابـد ضـلهـة
بحر الـخدر وانتـه الهـة سـاحلهة
عذاب. عذاب

كــبّــرتهــة. مـن عـفتــهـة. جيل
وانه صدري. تسحگه تـدري. خيل
………………………………………..

شبگــتك وانمـرد كـلبي. وجـرن دمـك ودمعــاتي
من عگـبك يبـو الخــوه. الشمـر قابـض بشــيباتي
وابقه امَّدد اعـله الـكاع. تبـچي الـصــخـر ونــاتي

إشلــع سهــمك وانـهـض لَيّه.
وكل اجـروحـك خلــهن بيــه. يا عباس

ركـضت خـدّر منــا حــافـر
بـينه اشـسوه شخله العاشر. يا عباس


خيل وعســاكر دارو اعــلـيه
من كل كتـر خلو جـرح بيــه
ومن بنتي هم يردون ترچـيه
عذاب. عذاب

ياذي هجرك. يالي عــطرك. هيل
وانه تدري. تسحگه صدري. خيل
………………………………………..

شايـف ضـحكـة الشــمـات. تلـچم گلـبي وتهـضمه
دنيه ومـن بــعد عبــاس. ما بيــها ضــوه وضـــلمه
سمعت امن المعسكر صوت. مـن حـسين خنـحرمة

رايح كل حيلي وكل قوتـي.
انه حسين وگـرّب موتـي. يا عباس

عطشان وشوفك يرويني.
يا روحي ويا ضي سنيني. يا عباس


عالشاطي واگع طَلّعت روحـي
يابو الكفاله وزيّــدت نــوحـي
ماترضه تهدة ابدونك جروحي
عذاب. عذاب

كلـهه بيــه. ابلا حميـــه. اتعـيل
وانه تدري. تسحگه صدري. خيل
…………………………………..
🖊️:حسين حيدر اللامي