🌹
27 🌹
🌹




عاتقه : هيا مسرع رجعت

ياسر: ماعاد شربت شدخل ابدل واخطى الجامعه

عاتقه : مسرع عتخطي اوذا ادخل ادي الصبوح قد خبزت دافي

ياسر: اسلموا مابش نفس كودي اخطى رجل أنفخ شويه
خرج ياسر وهو خاطي بيفكر في ملاك ويتفرج تلفونه

ملاك : قامت تتجهز للمدرسه ذكرت انها سمعت صوت رساله العشي فتحت تلفونها تقراها مكتوب فيها مكتوب فيها مكتوب أقلكن ولا مع خلنها مفاجاه

نجلاء: هيا صبووووح

ملاك : حاضر الآن ونزلت تصتبح ماقريتهاش

ياسر: وصل الجامعه ودخل القاعه ماقدبش أحد طرح رآسه فوق الكرسي وفعل يده قفى راسه ورفع أرجله للجدر مفعل ذلحين أدعمم بس ولا مع أيوه خلاص شادعمم مثل ماقالوا أمي

ملاك : وصلت المدرسه وغلقت التلفون

ياسر: الصدق ماعاد قدرتش خرج تلفونه وأتصل
(إن إلاتصال بالرقم المطلوب غير ممكن حاليا)

خفع الماسه بيده وشل كتبه وخرج ع دخله هاني القاعه

هاني: ييييه ياسر أين عتسير يييه ماله هذا مدعمم أو حانق مني من كلام سميه أمس

ياسر: خرج من الجامعه وسار لاجنب المدرسه حق ملاك وسميه .

ملاك: بصوت واطي فالفصل ماتشتي ياهرمه رسلتي العشي ماقد قريتهاش .
سميه : أيحين مارسلتش .

ملاك: يووه كان من رسل ماقد أحد داري بالرقم وخرجت تلفونها سكته بدون ماتنتبه الأبله
.....

🌹
28 🌹
🌹




سميه : غمزت بعينها ومدت لسانها هيا افتحي بسرعه نبسر لاقدمعش معجب .

ملاك : مشنا سميه ههه عادنا شاخليش تعترفي فالبريك منهو الي قد جننش ..

سميه : خزيت ووطت راسها ناهي ياهرم ابسري اول من رسلش ..

ملاك : لفتت لسميه وهي بتضحك مش معقول معجب خطير

سميه : سحبت التلفون بسرعه تبسر من .

ملاك : خرجت لسانها وبتضحك ههههههههه تستاهلي طلعت الشركه يامعجب

الأبله ابسرتهن بيضحكين صيحت وهن سكتين

ياسر: بيجابر نفسه الصدق ماعاد قدرت أصبر قدهي راحه شاجرب اتصل خرج تلفونه وبيتصل جاوبه رجال قله ماهو ياخي امس رساله وذلحين اتصال ياسر اعتذر منه وغلق خفع راسه اوووو ع خباله فيني هي قالت لها دبل اوو يعني 00 ورجع يضحك ع نفسه




🌹meme-abdalgaleel

🌹
29 🌹
🌹



ياسر: خلاص يكفي حريق دم من أمس شاغمض عيوني وأرسل

ملاك وسميه فالحوش حق المدرسه بيلعبين

تلفون ملاك في جيبها دن دن دن دن
سميه: ضحكت هههه هيا جاوبي المعجب

ملاك: دكمتها وببتخمر عليها أيوه صح المعجب حق الشركه ياذكيه ههههه

سميه: هيا افتحيها نقراء مارسلوا

ملاك : أول لما تقلي لي وغمزت بعينها وابتسمت

سميه : حمرت وضحكت ههه قذاك قلتلش مدراني هو هكذا قدنا بينحب سعم أو ماهو

ملاك: سحبتها من يدها وجلستها فوق الدرج يله إحكيلي من الألف للياء

سميه : سنبت وبتحمل وتفعل بيدها حركات محانكه لملاك ماتعرفيش هو يقربلي من جهه أمي لاكن الصدق يجنن يارب وهو يحبني مثل مابينحبه

ملاك: هيا ناهي يايحبش مسكين عيودف هههه تأخرنا عيبدأ الكلاس يله

سميه: ورساله المعجب حق الشركه

ملاك : إبردي منهم شكلهم مزعجين ..

ياسر: أووووف شكل اليوم عيطير بعد أمس


كملت المدرسه والبنات بيروحين وياسر جالس مراعي

سميه وملاك خرجين سميه ركبت مع أخوها وملاك عادها مراعيه جالسه تتمخطر فالحوش .

ياسر: خرجين عيونه من كثر مابيلاحقها وهي سيره وجيه بيجابر نفسه يووووه ع حلا فيها وبعدا ما معاها بالجينز هكذا ماتلبس بالطو إذا مالثمتها ...أين لثمه طربال طربال 😉

🌹
30 🌹
🌹




ملاك : طلعت فوق السياره وخرجت تلفونها تلعب أمد الطريق إبسرت رساله جديده قالت مش وقتها ألعب شويه علشان أذاكر فالبيت

ياسر: وصل البيت من الباب يااامه ياااامه جاوع عتغديني .

عاتقه : معصبه راسها بمصر يوووه مافعلتش غداء مدرى مالي تاعبه شويه لاكن شاقوم ذلحين بساعتي جعلي الجوع وأنت جاوع

ياسر: سلامتكم مالكم مابلا تسيروا تتعالجوا قدلكم فتره تاعبين والغداء لاتهموش ادخلوا ارقدوا وشاسير أشتري من خارج لي ولكم .


ملاك : وصلت اتغدت وطبعا مثل كل يوم جلست ساعه مع أبوها يتجابروا وطلعت غرفتها تذاكر لأنها شهاده .

ياسر: مخزن وحده بيذاكر مارضيش يسير يذاكر مع هاني وكل شويه بيتفرج تلفونه رجع ضبح وطرحه شكلي غلطت بعد أمس ضروري أبسرلي طريقه وأشله من سميه .


سوسن : اتصلت لعاتقه ألووو

عاتقه: حيا باأختي

سوسن : ماله صوتش أوو جالسه تاعبه

عاتقه : راسي ياختي مدرى ماله مسنب لي وبينسوم ووشيش في أذاني

سوسن: ماعاد ينفعش تصبري شامرلش الصبح ونسير للمستشفى نبسر مالش

عاتقه: خلاص نسير بحين اشتي اروح أفعل غداء لياسر

سوسن: مع لاتفعلي ولا عنروح لاعندي وشانبي ع هاني يروح هو و ياسر كذا

عاتقه: خلاص ان شاء الله مع السلامه

ملاك : كملت تذاكر ونزلت تسمر معاهم وجلست تتحانك مع أخوتها وأبوها يدافع عليها

يله شطلع أرقد تصبحوا ع خير يا أحلا أخوه قصدي يا اهرم أخوه هههه وقربت تحب أبوها وأمها وطلعت غرفتها


مسكت تلفونها توقت المنبه للصبح يوةة ماقريتش رساله المعجب حق الشركه ع قوله سميه

فتحت الرساله لقيت مكتوب فيها ....



🌹meme-abdalgaleel

🎈 31 🎈




فتحت الرساله لقيت مكتوب فيها....
(تشتي طرزان ^___*)..


ملاك: مستغربه ماهو هذا شكله غلطان أمس الشركه واليوم غلطان وطرحت تلفونها فوق الكومدينو وتمددت ترقد ..



في بيت ياسر:

ياسر: كمل يذاكر وجالس مطنن بعد خداره قات بيفكر في ملاك ويتذكر شكلها اليوم فالمدرسه .

عاتقه : ياسر ييه ياااسر أصنج ييييييه هزته مالك مطنن

ياسر: هاه يايمه ماسمعتش

عاتقه : خيرت الله صورتها شدفتك قووي انساها يابني عتتعب بس مدام مشحنا من قيسهم المهم لا أنسى العشاء جهزته لك فالمطبخ شدخل ارقد تاعبه شويه والصبح شاسير مع خالتك للمستشفى اتعاين وعنروح لاعندها نتغدا روح مع هاني .


ياسر: أيوه عيس نبسر مالكم قد كودكم تاعبين سيروا ارتاحوا وأنا شتعشى بعدا.

بيجابر نفسه ... ذلحين ضروري أدورلي خطه أشل رقم ملاك من سميه ...

ملاك: بتتقلب ماقد جالهاش نوم صاحت أيووووة بعدت البطانيه من فوقها بسرعه ومسكت التلفون تفتح الرساله تتأكد مامكتوب فيها ...

ياسر: كمل يتعشى وبيوضع بقعته يرقد سمع رنه رساله في تلفونه يعلم الله من بيرسل مسك التلفون يفتحه ...

عاتقه : بتصيح يااااسر يا يااااسر جي كذا بسرعه مدرى مالي قد شطفح .

ياسر: رجم التلفون من يده وحمل لاعندها مالكم بتعرقوا هكذا مابه مابتحسوا .

عاتقه : راسي وأذاني بتوش وسومه قد شادوخ وبتفلت .

ياسر: ياسيد ييييه حمل يدعي سيده من الباب الي بين الطرحه حقهم وحق سيده طالع ياسييد أمي تاعبين قوى ادولي دواير السياره اسعفهم .

حنان: بنت عم ياسر هي دبه وسمراء قووى وأكبر من ياسر ب3سنين حملت تجاوبه مالك مابه لاتفتجعش اوذا الداير هاه ادوه سيدي وانا ألبس بسرعه وأجي مع عمتي أشبحهم .

ياسر: بساعتش ياأختى قووى .

ملاك : مراعيه جنب التلفون يوووه شكل توقعي غلط حميت الرساله .



ياسر وحنان وعاتقه فالمستشفى ..

ياسر: هادكتور طمني .

الدكتور: الضغط عندها مرتفع قوى فعلنالها إبره ولازم تبسروا دكتور مختص .

حنان: ابسرتوا ياعمه كودكم بتتبرقطوا ع هذا الأخبل لما مرضتوا .

ياسر: أخبل في عينش ياتنجره ..

عاتقه : ضحكت ههه بس قوى من المحانكه ضحكتوني

حنان : الله يشفيكم هيا أتصل يا أخبل لسيدي طمنهم .

ياسر: يووه نسيته فالبيت لماسمعت أمي بيصيحوا يله قذا عنروح ونطمنهم .


وصلوا البيت....


حنان : ادخل ارقد انت بس معك جامعه أنا شرقد عند عمتي

ياسر: تسلمي يا أختي تعبناش .

حنان: تعب عمتي راحه .

عاتقه: اسلمي يابنتي كثر خيرش.

ياسر: دخل غرفته قدهو تاعب أمس مارقدتش واليوم فالمستشفى تمدد يرقد ومسك تلفونه ...

🎈 32 🎈



ياسر: دخل غرفته قدهو تاعب أمس مارقدتش واليوم فالمستشفى تمدد يرقد ومسك تلفونه ..


فتح الرساله: (أنت ياسر صح )..
إبتسم بقوه ورفع يده وصيح قووي يس يس يس عرفتني ..

حنان : بتدق الباب ياسر بتصيح تشتي شي ..

ياسر: ضحك هههههه للمه صوتي كان عالي إسلمي ياختي مابلا رسلولي الخبره نتيجه اديت درجه عاليه صيحت فرحه .

حنان: الله يوفقك تصبح ع خير.

ملاك : بتتقلب أوووف من قلي أرسل ذلحين لوهو ياسر عيقل اني فارحه فيه وعجبني معاكسته لي فوق السياره ولو مشهو ياسر عيقل اني بينعاكسه مالي تخيبلت هكذا المفروض كنت أطنش وبس .


ياسر : نسي التعب وطار النوم فارح ان ملاك عرفته امممم مارد عليها بس لاعد عتقل اني واحد صايع واشتي أزعجها خلاص شتأسف منها رسل (أيوه ياسر أنا أسف لو أزعجتش برسالتي بس حبيت أعتذر منش ع الكلام الي قلته فوق السياره نسيت ان قدحنا كبار وماعد ينفعش أحانكش ).


ملاك : متردده أرد أو أطنش خلاص شارد أخر رساله علشان مايزعلش ( عادي مش مشكله مابش داعي للأسف إحنا أخوه ).

ياسر: بهرر عيونه وبيجابر نفسه أخوه في عينش لوتدرى أني مانسيتش لحظه من موت عمش جت تقلي أخوه ههههه لاكن يله أخوه أخوه أمد مانلقى لنا باب ندخل منه ...

رسلها ( وأنا أتشرف يكون لي أخت قمر قوي ساعش وفعلها صوره غمزه 😉).
ملاك : قريتها وخزيت ورسلت(بس من أدالك رقمي).

ياسر: ( حفظته لما اديتيه لسميه قد غلطت ألف غلطه شرجع أحكيلش ذلحين أرقد شويه تاعب عادنا روحت أمي من المستشفى تاعبين ).

ملاك: ( سلامتهم . وأنت من أهله).



🌹meme-abdalgaleel

🎈33 🎈




الصبح بحين جت سوسن لعاتقه يسيرين المستشفى ع ما أتفقين مشي داريه انهم إسعفوها وصلها هاني ..

حنان: فتحت الباب حيا خاله إدخلوا قدهم أشكل بعد ما اسعفناهم.

سوسن : يوووه أيحين ماوقع اوذا شدخل ابسرها وانتي ادعي ياسر يخطى الجامعه مع هاني مراعي له خارج .

ياسر: طلع السياره وفالطريق ذكر ملاك خرج تلفونه ورسل (صباح الورد يا ملاكي وصوره ورده🌹).

هاني: هيا ماقد معانا بنوزع إبتسامات من الصبح .

ياسر: خفع هاني مشو عليك ههههه .

ملاك : فالطابور التلفون هز في جيبها خرجته سكته قريت الرساله ضحكت ورسلت( وجه مستغرب😱 ملاكك).

سميه : دكمتها ييييه حظيه مش وقت التلفون عيعاقبونا خبيه ولا قد موظف الشركه بيصبح عليكم ههه).

ملاك : ههههه ضحكت ذكريني أجابرش بعدا .

ياسر: قريها وقال بصوت واطي أيوه ملاكي وحبيبه قلبي .

هاني: التفت له ماهو ماقلت بتحاكيني ..
ياسر: سوق سوق أنت غر أبسر طريقك ..
هاني: هز راسه وغيوز عيونه يعلم الله ماقد معانا يابن خالتي لاكن ماعليك إلا أخرطك ..


فالمستشفى الدكتور فعل فحوصات لعاتقه و كتب لها علاجات ولازم ترتاح طلع عندها الضغط والسكر والمراره ملتهبه ..

في نص المحاضره ياسر ذكر ورسل ( ملاكي أوبهي تقلي لسميه أني رسلتلش عتبدع بي ).


فالبريك :

سميه : هيابنت عمي ما أذكرش تجابريني ولا قد عديتش قد ذيه واشرت لاعند قلبها بيدق دق ..

ملاك : ذكرت رساله ياسر وضحكت غيرت الموضوع مشنا سميه المجنونه أنا بس قلت احنا هذه السنه تاسع شهاده لوتكن تجي عندي نذاكر ...😉



رحت عاتقه بيت علي مع سوسن وأمل بتجهز الغداء قد كملت الثانويه هذه السنه .

وصلين وبيتجابرين وأمل سمعتهن

سوسن: ابسرتي تقيه مره صالح ال**** أمس اتصلت لي قالت تشتي أمل لأبنها ماقد سخيت أحاكي أبوها ..

عاتقه : يوووه ياختي وأنتي للمه ماتقلي له يسأل ولاهو رجال سوى الله يستر عليها

أمل : سمعت سكته وخطيت سمعتهن بيقلين ياسر رجعت تسمع سكته .

عاتقه : يوووه ياختي مانا قد شجنن آح ولا داخل بس شكل ياسر قد بيحب واحده من بنات الجامعه ويعلم الله بنت منهي مشتيش يتعلق بها ومايرضوش قذا بتبسري حالتنا بيندبدب ع مصاريف جامعته ..

روحت سميه وأمل حملت تهزرها لاغرفتهن تقلها من موظوع الخطيب وهي خازيه .

سميه : يهي يهي أنا فدال الحريوه حقنا بتخزوا ..

أمل : هيا لكن والله ماكن أزد أقلش حاجه بعدا أنتي داريه ان ياسر بيحب وحكت لها ..


فوق الغداء ....

علي : هيا كيف الجامعه ياياسر بتقروا سوى أنت وهاني نشتي مهندسين بإمتياز وأنت يا أبراهيم وسميه نشتي مجموع أنتوا شهاده ..

عبدالله : واحنا اسألوا علينا ولا حن أحنا أعلام مانخارجش ..

علي : ههههه أنت الله ينور قلبك راكن مامعي هم غر هولاء المهافيف ..

سميه : أنت رجال وسيد الرجال ياعبدالله هو غر الباقي بدل مايدخلوا يقروا دخلوا يبسروا مطلع لما تكتسر رقبتهم إن شاء الله وقامت من فوق الغداء ...

ياسر: دكم هاني مالها هذه المهفوفه من تقصد تقل انا أو أنت .

هاني : والله ماعلم مابتتمجنن هذه خبلا محد يعتب عليها..

ملاك : جالسه بتذاكر وحسها عند تلفونها بتجابر نفسها ماله مارسلش شكله زعل مني لما قلتله ملاكك 😱 امممم أيوه شارسله ياسعم أسأل كيف أمه (حبيت أطمن كيف قد خاله ).


ياسر: مخزن مع العيال إبسر تلفونه وأبتسم ورد(تسلم لي العسل الي بتطمن ع خالاتها قال الدكتور قد عندهم ضغط وسكر والمراره ..

ملاك : ( الله يشفيهم يارب ويخليهم لك ).

ياسر: ( ويخليش لي يارب يا أختى ورسل لها صوره غمزه 😉..

🎈34 🎈




عبدالله : هيا ماقد معانا يا أبتسامات .

هاني : ياخي يعلم الله ماحكايته من الصبح وهو هكذا وهزر التلفون من يده ..

ياسر : هاني بطل خباله والله لو ماتديه لأقوم أرحلي ..

هاني : هاه خلاص إشبحه شكلك ضايقت صدق محد يصافدك .

ياسر: أيوه لاحد يصافدني وشل تلفونه وجلس مقفي ..

إبراهيم : بيحاكي عبدالله دلا هذا شكله بيحب واحده من الجامعه يعني باقي لي سنه وأحب ساعه هههه ..


عبدالله : أنت غر ذاكر سوى ياثالث ثانوي وبعدا إسهل .

ملاك : يووووه ماهو هذا ماينفعش أراسله عيقل عليا بنت صايعه وماكرهن رسلي أرد عليه خلاص ماعاد شارسلش أبدآ ونزلت ..

نجلاء : خلاص كلشي جاهز يعني قد عتفلتوني .

سامي : باقي يأكدوا لنا التاريخ بس .

سمير: هيا أنتوا قلتوا مابلا ندرس في أمريكا مانا لو عتزعلوا شجلس ماعاد شاسيرش .

محمد: لاتصدقش أمك مستقبلكم أهم وبعدا كما قد هي فاقده لكم ماعتبسروها إلا عندكم قد خليت خالكم استأجر لكم شقه لاتجلسوش في سكن الجامعه أمد مايلقى شقه حاليه نشتريها ولاتهموش التنظيف والأكل قد عتجي أخت الشغاله حقه تطبخ لكم وتنظف قد رتبت لكم كلشي أشتي توقعي غر رجال وترفعوا راسي ساع ملاكي ماشاء الله عليها متفوقه من صغرها تكمل الثانويه وتجي تكمل جامعتها عندكم .

ملاك : وأفلتكم ماعه شاموت رجلي ع رجلكم .

محمد : ههههه قلك عتموت عادحنا عنزوجش سعم عتجلسي عندي طول العمر.

ملاك : أنا ماشتزوجش أبدا

نجلاء : ناهي يا ماعتتزوجيش لوتبسري كم قد يشتوش قد صاحباتي بيدحسين يشتين يخطبنش ..

محمد: ولاقد تفتحي الموظوع مع أحد عاد ملاكي جاهله كما تمت جامعتها لنا خبر .

نجلاء : وأنا قد بينقلهن هكذا عاد بنتي جاهله ..

ملاك : بابا معي طلب ممكن بس مفتجعه من ماما عيصيحوا .
نجلاء: ومدام داريه شاصيح ليش تتطلبيه ولا علشان بابا يخليش أنا ماليش احترام .

ملاك : ماسخاني أنتوا روحي من بيدلعني هذا الدلع كله إلا أنتوا وبابا ومعيشين لي أميره بس قلت لأني شهاده لو سميه تكن تجي نذاكر جمعه لأنه به مواد قدهي شاطره فيهن قووى بيذاكر لها أخوها هاني وابن خالتها .

نجلاء : عندي لش مدرس وخلاص عادنا بينقل شاسالش لوتشتي هذا السنه ..

محمد : اسهل تجي حيابها لكن المدرس أحسن قدهو يذاكر لكن جمعه ..
نجلاء : اسهل تجي مدام وهو في مصلحه مستقبلش قد طرحتوني امام الأمر الواقع من حن سجلها بابا معش ..

ياسر : بيداعي أمه هيا أمه كيف قد أنتوا هيا نروح شرق .

سوسن : أمك ماعتروحش شاخليها عندي لماتفتهن وأنت سير ادي لكم لده مافايده تكن تروح كن سير انت وهاني الجامعه .

ياسر: علي مايشتوا .

ملاك : بتتصل لسميه ألوو سماسم بابا قالوا نبسر مدرس يكن يجي يذاكر لنا عندنا فالبيت .

سميه : خراطه يله عيس ياملاك علشان ندي مجموع .

ياسر : سمعها بتحاكي ملاك فالتلفون سنب عند الباب سكته لما كملت قلها ماهو ياعيس ماقد معش انتي وبنت عمش مزقرعه .

سميه : مادخلك أنت غر خليك عند القمر حقك .

ياسر: تفاجأ افتجع لاقد ملاك قالت شي لسميه قمر مه ياسميه ماهو ماقصدش مافهمتش .

سميه : ببتحاكى بغرق أنت أخبر حبيبتك الي فالجامعه الي قالوا خالتي .
ياسر : تنهد وضحك ههههه الحمدلله فجعتيني ياخبلا تخايلي مدرى مابه هذه خالتش قد بتربش والله مامعي بنت فالجامعه ولا قد ابسرت واحده .
ذلحين مامعاكن مزقرعه ...

سميه :بفرحه قل والله مابه بنت ..

ياسر: بطلي رفاس قلنا مابش مالش ذلحين .

سميه : حكت له ع موظوع المدرس .
روح يدي ملابس لأمه وضابح فالطريق مسك تلفونه ورسل لملاك ( مابش معي مدرس رجال يجي يدرسكم ياقمر وتجلسوا معه).



🌹meme-abdalgaleel

🎈 35 🎈




ملاك : ماله هذا مادخله هذا أكيد سميه قالت له أخوتي الصدقيين ماقالوش هكذا وهو أخي من أمس ويشتي يتحكم بي أنا أصلا اديت له وجه المفروض كنت أطنشه .

سميه : قالت لأبوها ع موظوع المدرس وهم سامرين ..

علي : الصدق محمد أخي قد بيحرجني قوي مايكفيش مصاريف مدرستش والتلفون الي اشترالش انتي وأمل زد ذلحين مدرس .

عاتقه : مايقع يا اخي علي هو أخوك ريت والله وأعموم ياسر ساعه ولابينهم مصاريفه هم وهم بيلعبوا بالزلط لعب هم وسيده سعم قدهم متجملين حن مجلسين لنا عندهم في الطرحه النازليه .

سوسن : صدق ياعلي لو تحاكي أخوك محمد لو يبسر له وظيفه عنده فالشركه يعاون نفسه ع مصاريف الجامعه .

أمل : أيوه يابابا صدق ابسروا كيف قد خاله مريضين من كثر البرقطه .

علي : والله ماقلكن إلا كل خير شابسر .


ياسر: بيلوم نفسه ليش أقلهاهكذا ذلحين مادخلني ذلحين ماعتقل عليا مالي تخيبلت ذلحين لاعد تحنق مني رسلها ( أنا آسف مادخلش افعلي الي تشتي بس لو هي أختي ماشاخليش رجال يدرسها بس أنتوا يمكن عندكم عادي يافري ).

ملاك : اوووف منه ماله هذا أحسن حل أمسح رقمه وبس .

ياسر : مالها هذه ماترد شكلها حنقت صدق أزيد أجرب ( ملوكه خلاص آسف ) .

ملاك : غلقت تلفونها ورقدت .

علي : ألو مساء الخير كيف أخي.

محمد : سلمك وعافاك كيف أنت .

علي : ياخي للمه الشغله بتحرجني هكذا بتقلي سميه ع موظوع المدرس يكفي مابتفعله .

محمد : ليش أو مشهي سميه بنتي غثيتني الصدق بدل ما تأمر وتتشرط أنت أبي بدل أبي الله يرحمهم .

علي : مايأمر عليك ظالم غر قلت لو تذكر ياسر أبن عديلي الله يرحمه لوتبسر له لابه عمل عندك يعاون نفسه ع مصاريف الجامعه بيدرس هندسه ماقد حاكيتش ولا قلت أول أسألك .

محمد: هاه قصدك ياسر ماشاء الله عليه قدهو هندسه كم كنت أتحيلالا له من جهله عرفت عاتقه تربي هيا معي فكره مدام وهو هندسه أكيد شاطر ..

علي : أيوه ذكي ماشاء الله أدى 93 مجموعه
قالوا عيدوا له منحه ولاسبر شي .

محمد : هيا مارأيك لو نخليه نجي يذاكر للبنات قدهو نأمن عليهن معه قدهو من البيت والي عنديها للمدرس نديها له .

علي : والله انها فكره خلاص شابسره واردك خبر مشو داري اني شادورله عمل غر رحمت أمه قدهي مريضه قلت يعاونها .

محمد : تمام وردني خبر مع السلامه .

🎈 36 🎈




ياسر: ماسك تلفونه بيرسل لملاك بيعتذر منها لأنها ماعد رضيت ترد عليه .. بيحاكي نفسه أنا أخبل بدل ما أحاول أتقرب منها خربت الدنيا .


علي: مارأيك ياياسر لو نبسرلك عمل بكم تعاون أمك في مصاريف الجامعه حرام تجلس تخيط وقدهي مريضه .

ياسر: مكره ياعم علي لاكن من عيرضى يشغلني عنده وأنا بينقراء مانا مكره أعاونهم .

علي: تشتي الصدق أنا قد حاكيتلك محمد أخي يبسرلك عمل عنده وقال تمام .

ياسر: إقتلب وشه وطنن وقال في نفسه يوووه مالقيتوا لي عمل إلا عنده .

علي : ييييه مالك طننت هيا ماقلت ذلحين قلنا تدرس ملاك وسميه خصوصي مارأيك ..

ياسر: إبتسم وقال هآه ماهو أدرس ملاك وسميه أيوه أيوه أكيد موافق 😁.

علي: ههههه ومالك زقرعت هكذا.

ياسر: ارتبش وعس راسه بيده هآه مابلا فرحت انه عمل ماعيأثرش ع دراستي .


في بيت محمد.....
محمد: خلاص لقينا لملاكي من يدرسها ياسر ابن عاتقه أخت سوسن مره علي قدهو نأمن عليها معه معروف ونكسب فيه أجر قلت شدفع له زياده ع المدرس قدهو نعاونه مارأيش ؟

نجلاء : هآه عرفته الي كسر رجل ملاكي لاكن لو نبسر مدرس أحسن لو مايفهمهاش سوى مدام عادهو طالب .

محمد: قالوا ذكي وبيذاكر لسميه وإحنا نجرب إن فهمت منه ماشي سبرله أي عمل عندي.

نجلاء : خلاص قد أنت أخبر..

ملاك : فالمدرسه ياسماسم لاتتأخريش عيجي المدرس الساعه4.


بعد العصر.....

ملاك : كملت تتغدا وطلعت تتجهز لبست بنطلون جينز وبلوزه طويله لاعند الركب مرسوم فيها ورود وردي وطرحه بيج ع وردي وجهزت كتبها .

ياسر: تحمم وبدل وفعل لشعره جل وتعطرجالس قبال المرايه ساعه وخرج من البيت ذكر تلفونه نسيه رجع يديه وزد دخل يتمرى مع الطريق 😉.

ملاك : ألوو سماسم هيا أين أنتي؟

سميه: قدنا فالطريق بس أتأخروا بابا بالسياره ساروا يسألوا ع واحد يشتي يخطب أمل شاجابرش لما أوصل .

ياسر: وصل بيت ملاك بيحاكي الحارس يدخله إنه المدرس حق ملاك ...



🌹meme-abdalgaleel

🎈 37 🎈





في بيت علي ....


سوسن : هيا مه مافعلتوا؟

علي : والله ماقلش إلا كل خير كلهم بيشكروه وبيقلوا رجال محترم مصلي وإبن ناس .

سوسن : يعني قدك موافق.

علي: مبدائا موافق لاكن الرأي الأول والأخير لأمل .


ملاك وسميه طالع في غرفتها بيتجابرين ع العريس حق أمل.

الشغاله : ملاك ياملاك المدرس وصل.
ملاك: دخليه الصاله وأديله عصير وكيك لما أنزل .

ياسر: دخل وبيتفرج البيت آآح بس صدق برنسيسه وهذا قصرها ..

الشغاله : دخلت عصير وكيك لياسر قالت له ملاك عتنزل بعد شويه .


علي : إدعي أمل نبسر مارأيها.
سوسن: سارت تدعيها.

أمل: هاه بابا قالوا ماما أجاوبكم..

علي: جبر القمر حقنا ماشاء الله كبرتي وقدنتي عروسه مارأيش يابنتي به ناس تقدموا لش وأنا سألت ع الولد ومابش عندي أي اعتراض عليه لاكن الرأي رأيش ..

أمل: خزيت وحمرت وطت وشها وقالت ع ماتشتوا وقامت.

سوسن : ضحكت كان ماذلحين أتصل لأختي تقيه أقلها موافقين يرسلوا الرجال.

سميه وملاك نزلين : دخلت ملاك الأوله وسميه قفاها ...


ياسر: كان بيشرب العصير إبسر ملاك سنب وجلس متسمر والقلص في يده مبتسم .

ملاك : إبسرته بإستغراب وساكته.

سميه : ههههههه ياسرج ماجاء بك قالوا لنا المدرس جاء مش أنت.

ياسر: خزي إبسر ملاك وقال عفوا أنا تخايلي أن عندكن خبر أني شادرسكن أنا بس عادي لو وجودي ضايقكن شاروح وبيلفلف ورقه يمشي ..

ملاك: لا عادي يا أستاذ ليش نتضايق أهم شي نفهم شرحك .

سميه: بتضحك فارحه ان ياسر عيدرسها وتجلس معه كل يوم إطمني ياملاك شرحه يجنن قووى مابينفهم إلا منه .

ملاك : ساكته جلست فوق الكرسي وفتحت كتابها .

ياسر: بيبسر ملاك إن شاء الله تفهموا مني أي ماده تحبي نبداء .

ملاك: ماتفرقش معي .

ياسر: حاسس ان ملاك عادها زاعله منه بعد الرساله وتضايقت من وجوده حاول يلطف الجو ذلحين الي عتفهم أسرع وتحل الواجبات شاكن أديلها طرزان وغمز بعيونه لملاك.

سميه : طرزان أبو عشره ياحاذق شاكن أشتريه لك أنا مابلا تدي جعاله ساع الناس .

ملاك : طبعا ساكته ماردتش عليه وقالت لسميه خلاص ممكن نبدأ الدرس بدل مانضيع وقتنا ع الفاضي .

ياسر: ضبح منها تمام يا أخت ملاك .


سوسن: ألو تقيه كيف أنتي ياختي.

تقيه : حيا حيا هيا مه بشريني ماقالوا فرحي قلبي .

سوسن : الله يفرح قلبش ماذلحين لاهم عيجوا الرجال حيابكم يرحبوا.


محمد: اتصل لنجلاء تنزل تبسر البنات وكيف ياسر عادهو أول يوم يجي علشان يطمن ...

نجلاء : نزلت هآه بنات كيف ان شاء الله فهمتين كيف مستواهن يا أستاذ ؟

ياسر: ماشاء الله عليهن ذكيات بس مدري ملاك عجبها شرحي أو لا لأنها ساكته .

نجلاء : هاه مامي فهمتي منه .

ملاك : إبسرت أمها ماقد بدأناش في مواد صعبه علشان أحكم بس مبدائا تمام.

ياسر: متضايق من إسلوب ملاك .. وابسر نجلاء: احنا كملنا اليوم بكره شاشرح لها أي ماده صعبه تختارها علشان تقدر تحكم وتقرر أذا تشتي أكمل أدرسها .. هيا سميه أروحش معي لأن أمي عندكم شاسير أديها ..

🎈 38 🎈



في الطريق ...

سميه : قوى ياسر لوسمحت نروح رجل اشتي أخطى لانستأجرش .

ياسر: معقد حواجبه ماقدرت أخطى ضابح من روحي لاماعجبهمش تدريسي مشو بالغصب عليهم.

سميه : يووه مالك إلا شرحك حالي قووى.

ياسر: شكلها بنت عمش زناطه قووى كأنه مارتاحتش إني شادرسكن وبعدا مالها ماتتلفلف نزلت بجينز ..

سميه :بتضحك ههههه منهي ملاك مع والله مافيها زنط بالعكس وبعدا هي مابتلبس بالطوه هم عندهم عادي أصلا حتى أمها ماشي ملثمه ولما بيسافرين بيخرجين عادي .

ياسر: هآه كان قلتي لي متحررين قووي ومتعودين ع الدلع ..

محمد : هاه ملوكه كيف ياسر فهمتي منه ؟

ملاك : اليوم ماشاء الله عليه فهمت قوى بس كان نفسي أستاذ.

محمد: أنا قلت مدام شاطر وزيد مسكين نكسب فيه أجر وجابرها من وضعهم بعد موت أبوه وزيد مرض أمه ...

ملاك : تأثرت وزعلت عليه



وصلت سميه وياسر...

ياسر: سميه إدعي أمي ماعد شدخلش
روحت عاتقه وياسر وقد حنان سبرت لهم العشاء لأن عمتها مريضه ونزلته لهم .

عاتقه : للمه يابنتي تتعبي نفسش .

حنان : يوووه ياعمه مابش شي من قدركم وطلعت.

عاتقه : كيف العمل ارتحت عندهم.

ياسر: ماله شي يووه يا أمه لوتبسروا ع بيت وعيشه معاهم قصر قصر وبنتهم دلوعه قووى والحرس والشغالات الله يسكنا الجنه.

عاتقه : عيعوضنا الله فالجنه وأنت افتح عينك وأقرى وعتشتحط وتفعلهن كلهن وتقع ساعهم وأحسن .

ياسر: ضحك ناهي لكم يا أمه ولابعد ألف سنه شقدر أشتري سياره ساع واحده من السيارات الي معاهم فالحوش .

حنان: بتدق الباب عفوا ياعمه نسيت تلفوني حن طرحت العشاء فالديمه شلته وطلعت.

عاتقه : الله يسخرلها بابن الحلال الي يستاهلها قد تزوجين خواتها كلهن لاكن مشو الحلا كل شي والله ان به حنان ساع العافيه فالبدن .

ياسر: صدق يمه حنان ماتشبهش خواتها ساع من وقعت لاكن ماهي ع أخلاق فيها.


تلفون ياسر رن رساله : (وجه مبتسم 😀 ذلحين بما أنه أتفقنا نكون أخوه ومن اليوم قدك حقي الأستاذ ما أسميك أستاذ ياسر ولا ياسر).

ياسر: إبتسم ونسي أنه كان ضابح منها رد عليها( لا ياسر ولا أستاذ سميني مثل ماكنتي تسميني زمان آسو 😉).

ملاك: ضحكت ورسلت له وجه محمر 😊





🌹meme-abdalgaleel

🎈 39 🎈





في بيت علي ....


علي: قد اتصلوا الرجال عنخطب يوم الجمعه .

سوسن: يوووه مسرع أيحين عننفض ونقشع البيت مابش وقت باقي يومين .
علي: اوذا معش ثنتين قمارى يبكرين يعاوننش .

سميه : أنا معي مدرسه مادخلني تقشع الي عيجوا يخطبوها ماعليا .

علي: مابش سيره مدرسه ياقمر بكري عاوني أمش ..

ملاك : ألووو سماسم مالش ماجيتيش المدرسه قلقت عليش .

سميه: بينعاون أمي بنقشع خطوبه أمل يوم الجمعه حتى ماشاقدرش اليوم أجي العصر قوى خلي ياسر يذاكرلش حاجه بسيطه لأني مابحد ..

ملاك : قحصت شفايفها أممممم خلاص أتصله لايجيش مارأيش ..

سميه : فتحت عيونها ماهو ماهو تتصلي لمن ياقمر من ادالش رقمه ..؟

ملاك : ركزت وبسرعه ردت وانا مدراني برقمه سعمنهو إبن خالتي اتصلي له أنتي ..

سميه : تنهدت بفرحه هآه قد إستغربت مع ماشتصله ولا بعدا تصيح أمش ماقدرنا لهرمها عتقل قد بينتحكم من نفسي ذاكروا شي بسيط بس .

ياسر: روح من الجامعه صلي وتغدا ورقد شويه يرتاح قبل مايسير الحصه .

علي: ابسري النواقص كلهن نجهزهن قبل الجمعه .

سميه : وأنا قدنا أشتي تخطبوني للمه ماهي .

أمل: خزيت ودكمتها مابلا تشتي أخبطش هههه

🎈 40 🎈




ملاك: بتجهز كتبها ونزلتهن الصاله وخلت الشغاله تجهز العصير والكيك وطلعت تبدل ..


ياسر: نكز وقدهو متأخر شويه قام ع طول يلبس بسرعه ورسل لملاك (عفوا ياملوكه اتأخرت شويه رقدت قدنا فالطريق ).

ملاك : ( مش مشكله خذ راحتك لاتستعجلش أصلا حتى سميه ماعتجيش )..

ياسر : فرح وفعل حركته يس يس ووقف إشترى ورده وطرزان 😉 ..


نجلاء : ملوكه حبيبي شخرج أنا وأخوتش يكملوا يشتروا بقيه الحاجات حق السفر.

ملاك : تمام يا ماما وأشتروا لي معاكم الحاجات الي قلتلكم .

ياسر: وصل يدخل ع خرجه سامي بيسوق السياره وجنبه سمير ونجلاء وراء خبى الورده وسط الشنطه حقه .
سامي لفت لاعند ياسر أول مره يبسره وصيح للحارس إبسره لاهو يشتي شي إديله ماكتب الله .

ياسر: إقتهر قووى ومسك نفسه ورد عليه مشنا بحاجتك يا ابن الأصول أنا المدرس حق ملاك.

نجلاء : خرجت راسها من الطاقه عفوا عفوا ياياسر هو ماقد عرفكش هذا مدرس أختك .

سامي: اوووه العفو منك ونزل يسلم عليه حقك عليا ياخي بس بابا بيفعلوا خير خيرات مع ناس بيجوا للبيت حسبتك واحد منهم السموحه منك .

ياسر: تنهد ووشه أسود مش مشكله حصل خير.

ملاك : كانت عند الطاقه حقها مسنبه بتبسرهم بس مشي داريه ماقالوا اتصلت للحارس يدخل ياسر وسألته ماحصل قلها..


ملاك : نزلت ع طول فتحت باب البيت مراعيه لياسر يدخل .

ياسر: مطنن بيتفرج شكله ولداته ماهو الشي الغلط فيه الي خلى سامي يحسبه جاء يطلب مساعده .


ملاك: إبسرته بيخطى مطنن وبيخفع بأرجله.. بتحاكى نفسها مسكين أمس عرفت ظروفه من بابا واليوم سامي يقله هكذا أشرت له بيدها وبتداعيه يييه يامطنن أوبه تتكحول وضحكت.

ياسر: سمعها رفع رآسه إبسرها بتأشر له وتضحك إبتسم.

ملاك : مسنبه عند الباب أيوه أيوه ارقد واتأخر عليا ..


ياسر: ضحك وغمز بعيونه للمه وحشتك؟

ملاك : خزيت وطت رآسها ودخلت الصاله .

ياسر: أيوه ماعنذاكر اليوم .

ملاك: أي شي بس ماده سهله علشان سماسم.

ياسر: ههه قدهي سماسم هذك سم هاري .

ملاك : حرام والله أنها طيبه وعسل.

ياسر: ابسرها وابتسم والله ماعسل إلا أنتي .

ملاك: إرتبشت وخزيت وتشتي تخرج كتبها من الشنطه سحبت شنطته ركزت هآه هآه عفوا ..

ياسر: بيضحك مبسوط بجلسته مع ملاك ونسي كلام سامي .
سحب شنطته قلها مابلا تشتي تفتحيها لاتتعذريش شميتي الي وسطها.

ملاك: خازيه والله ما انتبهت صدق.


ياسر: فتح الشنطه خرج الورده والطرزان مكن ملاك حبيت أعتذرلش ع إسلوبي البايخ في أخر رساله قلت هذا أحسن إعتذار مدام ومابحدي سماجه .


ملاك : ههههه سحبت الطرزان من يده يوووه كم لي منه من وقت ماكنت تشتري لي خلاص شزعل كل يوم علشان تراضيني فتحته وبتاكل .


ياسر: ههههه أديلش عيوني مش بس طرزان بس كليه دلا دلا يامفجوعه .

ملاك : إبسرته وخرجت لسانها بتحانكه يعجبني .


المهم كملت الحصه وهم بيتجابروا ..
ملاك:فعلت يدها في وشها يعووه ماذاكرناش شي.

ياسر: هههه عيدي عيدي هذه الحركه .

ملاك: خزيت وطت رآسها.

ياسر: خلاص بكره شاجي بدري شويه نعوض حصه اليوم ....




🌹meme-abdalgaleel

🎈 41 🎈




ملاك : جالسه مطننه فوق الكنبه بتلعب بشعرها بتتذكر كلام ياسر سارحه فيه ..

محمد: مال حبيب بابا مطنن فيمن بيفكر.

ملاك: هآه وتوضعت جلست سوى مابلا بينفكر لما يسافروا أخوتي كيف عيقع البيت شوعه مابش من يعاندني .

نجلاء : هههههه خلاص شاقع طبينتش إطمني .

محمد: لفت لنجلاء هيا مارأيش ندي لها أخت تطابنها من صدق .

ملاك : نبعت من بقعتها وسارت تجلس في طرف الكنبه جنب أبوها وحجفته وتسخوا ع ملاكي ..

محمد: لاتصدقيش ياروح بابا والله لويجين بعدش عشر ماحبيبه قلبي إلا أنتي ..

نجلاء : سعم فعلت نفسها حانقه وأنا ...

محمد: ههههه أنتي روح الروح يووه غبني ع زوج الثنتين ...

في بيت علي ....


علي : هيا بنتي كيف كلشي تمام عجبش الفستان والقلافد ماعادبش شي ناقص عليش قد قلت لعبدالله عيشلش عند الكوافير ولاعدبه شي تحاكيتي .

أمل : بخزا تسلموا عيجبرنا الله بعافيتكم وحبت رآسه .

يوم الجمعه الصبح ....

الرجال قاموا بحين تحمموا وتجهزوا ساروا يصلوا والنسوان في بيت علي بيتمين الرفاع ويبخرين اليوم خطبه وأمل سارت هي ويسرى بنت عمتها أنيسه عند الكوافير .

ملاك : بابا قوى حاكوا ماما أجي معاكم عند الخطوبه ..

محمد: سيري تجهزي بس ماعليش إلا تجي .

نجلاء : يعني مابش لي كلمه عندكم.

محمد: زمان كنتي تهمي لاتتاثر بطباعهم بس ذلحين قد بنتش مربايه أحسن تربيه وأخر دلع وبعدا هي حفله تتواله شويه تغير جو الدراسه سيري إبسري العيال قد تجهزوا .

نجلاء : سامي قال مشو فاضي معه عمل وسمير قال باقي حاجات ناقصه للسفر .

محمد : مابلا عيال أمهم عيخلي لي بنت أبوها.

في بيت علي :

ياسر والعيال مراعيين فالشارع علشان يرحبوا بأهل الخطيب لما يوصلوا .
ملاك: وصلت مع أبوها ونزلت من السياره طبعا لابسه عبايه مطرزه لأنها لابسه قصير وحاطه مكياج خفيف وكحل أزرق وفي يدها ورد وهديه لأمل بالمختصر فوق الحلا حلا 😉.

محمد: كيف الشباب حقنا .

ملاك : كيف أنتوا ولفتت لياسر سعم خازيه كيف انت يا أستاذ وطلعت عند النسوان .

ياسر: مسك تلفونه ع طول ورسلها (ماهو هذا اللبس يا آنسه وللمه ممكيجه وعاد أبوش مخلي لش جنبه إيزي صح ).

أنيسه : يوووه حيا ببنت أخي وحدش .

ملاك : لكم الحياه أينهن البنات .

سوسن : ع خرجتها من الديمه أهلا بالقمر كيف انتي جي البنات في غرفتهن .

دخلت ملاك عند البنات سلمت عليهن ومكنت أمل الهديه .

سميه : هياقليلي ماذاكرتوا أمس .

ملاك : حاجات بسيطه شاذاكرهن لش ومسكت تلفونها ذكرت انها سمعت صوت رساله.

🎈42 🎈




ملاك : فتحت الرساله قريتها ردت عليه ( هذا أنا وهذه تربيتي وأنا فوق سيارتنا ومع بابا مش ذنبي إذا أنت أنسان معقد).

ياسر: قري الرساله جغرت له طعم القات قام خرج يخزن فوق السياره حق هاني .


البنات طالع بيرقصين وفارحات .

ملاك : عمه سوسن تشتوا أساعدكم بشي .

سميه ويسرى : بيهزورين ملاك هيا جي ارقصي معانا ..

ملاك: قامت ترقص طبعا لابسه فستان أزرق قصير وشعرها الأشقر مندوش قد الديوان كله بيتحلالها وبيسألين منهي هذه البنت .

ياسر: رجع الكرسي حق السياره لاوراء مده وبيتسمع أغاني إبسر البرده حق الديوان مشقيه وملاك باينه وهي بترقص إبتسم تحيلالها وقال هذه البنت كيف يقدروا يزعلوا منها ..
رسل لها : (هيا غلقوا البرده ياقمر قد عيال الحاره بيتفرجوكم وأنتوا بترقصوا وبعدا ماهو هذا الحلا والفستان الأزرق ).

ملاك : كملت ترقص وبتبسر النسوان بيتسأولين عليها خزيت وخرجت من الديوان قريت الرساله وطنشته حانقه منه .



كملت الحفله وروحوا الناس وملاك روحت بتجابر أمها كيف الحفله وطلعت ترقد ياسر بيرسلها وهي جالسه مطنشه .

ياسر: دفى أمه وأدالها العلاج قوى يا امه لاتنسوا العلاج كن اشربوه بوقته قبل مايكن يكمل قلوا لي بالذات حق المراره بعدا نشتي لها عمليه ..

عاتقه : قد بينشربه لاتقلقش .

ياسر: دخل غرفته تمدد وبيتذكر ملاك وهي بترقص ابتسم ورسلها وهي جالسه مطنشه رجع مسك تلفونه واتصل برقمها ...




🌹meme-abdalgaleel

🎈 43 🎈




ملاك : مغمضه عيونها بتحاول ترقد وكلام ياسر قاهرلها ..سمعت تلفونها بيرن ابسرته وانه رقم ياسر كنسلت مره وثنتين وثلاث .

ياسر: ( تمام كنسلي بس أنزلي جاوبيني من تلفون عمي محمد ).

ملاك : بضبح اوووف منه فتحت تلفونها وجلست ساكته .

ياسر: مالش ساكته الدمه أكلت لسانش وبيضحك هههه يييه ياخبلا
ماهو الفستان الحالي والدلع هذاك .

ملاك: أنت قلت شوعه للمه ماذلحين حالي .

ياسر: ههههه ياحقوده عادش زاعله أنا قلتها من غيره بينغير عليش ..

ملاك : هآه

ياسر: أختي أختي وضحك

المهم تجابروا لافجر وتذكروا أيام زمان .
وكل يوم وكل واحد منهم بيراعي لاوقت الحصه يبسر الثاني وبدات ملاك تحبه بس بتكابر وكل ماتشتي تحكي لسميه تتراجع ....


ملاك : سماسم ما أخبار الي بتحبيه .

سميه : يووه محلاه يجنن قد بينبسره خيرات وكل يوم أحبه أكثر .

ملاك: حاكيني كيف بتحسي لماتبسريه وتحاكيه ماهو هذا الحب .

سميه : للمه قد ذيه واشرت لقلبها ❤بيدق .

ملاك : ضحكت وخزيت وغيرت الموضوع .

محمد: باقي اسبوعين لاأخر السنه هيا كيف المعنويات .

ملاك : 100%وأشرت بيدها 👍.


أيام الامتحانات.....


ياسر :كثف لهن الحصص وكان يسير الصبح المدرسه يراجع لملاك وسميه قبل مايدخلين الامتحان وسميه مفكره ان ياسر بدأ يحبها ومهتم بها بيفعل هكذا .

ملاك: تخرج من إلامتحان ترسل له ع طول تطمنه .


بدأءت امتحانات ياسر وكل يوم ملاك تتطمن عليه كيف حل .
طلعت النتايج وملاك طلعت 91%
وسميه 85
إبراهيم ابن علي طلع مجموع 80%ثالث ثانوي علمي .
ياسر وهاني طلعوا امتياز في كل المواد .

علي : أنا بكره شاخرجكم المطعم كلكم نحتفل بنجاحكم وشتصل لمحمد نشل ملاك معانا .

ياسر: سمع ان ملاك عتجي أشتري لها سلس فضه وفيه تعليقه بشكل قلب هديه النجاح .

فالمطعم ...
ياسر : رسل لملاك(قومي غسلي يدش وأنا شلحقش أشتي اديلش حاجه ).
ملاك: قامت وهو لحقها مكنها السلس بسرعه ورجع .

نجلاء : مارأيك لو تحجزلنا نسافر نسير نبسر العيال وقدهي إجازه الصيف .
محمد: ياخطيره مدراش ان قد جهزت الفيز كنت اشتي افعلها لكن مفاجأه ...

🎈 44 🎈

في بيت علي:

سميه : ممدده مطننه فوق السرير ماحست إلا ماء بيستكب من فوق راسها صيحت يييح بطلي سماجه يا أمل .

أمل : ههه تستاهلي قدلي ساعه بينجابرش وأنتي دعممه .

سميه: خفعت أمل بالوساده كنت في أحلى حلم خبلا.

أمل : قربت جنبها فوق السرير وتربعت هيا جابرونا يا أحلى حلم شكلكم 😍😍 وفعلتها شكل قلب بيدها .

سميه : ههههه شاقلش لاكن أحلفي ماتحاكي أحد وحكتلها انها بتحب ياسر وانها بتحسه بيحبها وكان يجي للمدرسه كل يوم يراجع لهن.


في بيت محمد.....

نجلاء: فتحت باب الغرفه هيا ياكسله نخرج السوق نشتري النواقص باقي للسفر اسبوع .

ملاك: بتتمطط يووه ياماما إشتي أرقد باقي معانا وقت ...

محمد: بيداعي من نازل يانجلاء نسيت ماقلش إشتري لي معاكن جاكت أسود تأخرت ع الشركه سلام .

ياسر: كمل يصتبح هو وأمه . صورتكم هذه الأيام مش حاليه مصفرين بتشربوا العلاج كم عاد معاكم تشتوا أشتري لكم .

عاتقه : بخيره لاتقلق إطمن بس عيجبرني الله بعافيتك عاد معي 3ألف الباقيه من المعاش لاكمل ششتري لي .

ياسر: وأنا قد قلت شبسر لي عمل أمد الاجازه هوذا ماشدرسش البنات عطله ندبر نفسنا أمد .

عاتقه : الله يدي رزقك ويفتحها في وشك .

أمل: مستغربه لاكن ياسميه ياسر معاملته لنا ساع أخونا متأكده انه بيحبش لاعاد تعلقي نفسش به عالفاضي قذك قلتلش ماسمعتي خالتي وأمي بيتجابرين ع البنت الي بيحب فالجامعه.

سميه : بتعوج فمها وتنفخ اووف منش ياحساده هو غر حن خطبوش بغير حب إلا بيحبني قد سألته قال مابيحبش أحد فالجامعه.

ياسر: ( صباح الفل ع أحلى ملاك فالدنيا ماعتفعلي اليوم).

ملاك: (صباح النور شخرج السوق أنا وماما نشتري حاجات عنسافر أمريكا بعد إسبوع).


ياسر: إكتبد (أمريكا "!! وتنسيني صح ).

ملاك: (هههههه هي 3شهور بس الأجازه وبعدا محد ينسى أخوه وفعلت له صوره 😉 شاكن اتصلك ).

ياسر:( أخ في عين ابليسش ههه ناهي ياختي فين عتخرجوا اشتي ابسرش من بعيد)



🌹meme-abdalgaleel

🎈 45 🎈



سوسن : ياهاني شرق علينا سير ادي عمتك أنيسه ويسرى عنخرج السوق نشتري الذهب لأختك أمل قالوا الحبه رخيصه هذه الأيام نصبطه .

عبدالله: سمعها وهو فالديوان بيلعب بطه فالكمبيوتر قام هاه يا أمه تشتوا أخرجكم أنا فاضي حتى لافجر تتسوقوا عادي .

سوسن : منيحين هذه الحماشه هيا مدام فاضي اخطى اديهن.

عبدالله : الآن ...


سميه دكمت أمل : وبصوت واطي لاتفرحيش مشو ع سواد عيونش عيخرجش هو غر حن اختي يسرى عتجي .

سوسن : هيا اخطين البسين يامدلازه مش وقت الهدار .


فالسوق :
نجلاء وملاك فالليبي بيشترين .

ياسر : وصل رسل لملاك أين أنتي .

ملاك: في محل *

ياسر: ( تمام شطلع وشفعل نفسي ابسرتكن صدفه ).

البياع : هاه ذلحين ايش عجبكم الأحمر أو الأسود.

نجلاء : مارأيش الصدق الاثنين حاليات محتاره .

ملاك : حسها عند ياسر عيطلع .هآه حاليات حاليات شلوا الاثنين .

ياسر: إبسرها من بعيد إبتسم وسنب عرض الجدر ارتزح ورفع رجل ومسك تلفونه سعم بيجابر صاحبه وبيتفرجها .

ملاك: إبتسمت وبانت الغمازات حقها خزيت ووطت .

نجلاء : خلاص إدي الاثنين وخرجت له قيمتهن بالدولار.

ياسر: في نفسه ذلحين الي بينفعله صح أو غلط ملابسها بالدولار وعايشه برنسيسه ليش أعلقها معي واحنا مافي بيتنا إلا3ألف ريال وطريقه لبسها فري وعيشتها مختلفه تنهد ضبح ورحله .

سوسن : هيا نزلنا عند ذيه المحل.

عبدالله : ماعتنزلوا كلكم أنتوا والبنات مافايده للجحبله انزلوا أنتوا وعمتي وأمل تختار وأنا أشل سميه ويسرى أشربهن عصير أمد ماتتموا.

سميه : سحبت أمل لاعندها قلك جحبله مابلا يشتي يشرب حبيبه القلب عصير .

أمل : خفعتها اوص سكته عيب .

أنيسه : أيوه والله انه صدق خلاص بس لاتتاخروش عنكمل ونتصلك .

ملاك : روحت تتصل لياسر ملاك إختفيت فجاءه .

ياسر: آح ياملاك أنتي وين وأنا وين .

ملاك: فعلت نفسها غبيه كيف يعني ماقصدك .

ياسر: ولاشي قليلي عتذكريني ولا أمريكا عتشدفش وتشلش عليا).

ملاك : شوووور شنساك ههههه لاتصدقش مسخاش شاموت لو ماكلمكش يوم.

ياسر: ضحك ماهو ماهو شذبحش لوتنسيني وبعدا ممنوع تضحكي عندهم عيمرعوا الغمازات حقش عليا).

ملاك : خزيت وتعذرت ان امها بتداعيها غلقت .



بيت علي....

علي: هيا مه إسكه ورني ما أشتريتين .

سوسن : يوووه ع قد غلا فالسوق جرينا لها البدله و2خواتم عاد باقي الحزام والبليزق .

علي: إسهل لاتهميش الزلط ..

سميه : غمزت لأمل إبسرتوا عبدالله يابابا اليوم مدري كفله خرجنا وزد شربنا عصير يعلم الله للمه .

عبدالله : حمر وشه ماهو ياللمه محد يفعل فيكن خير هيازد شمي خرجه .

إبراهيم وهاني : داريين انه بيحب يسرى ..

إبراهيم : خلاص شاكن أخرجكن أنا إبردين منه غر لابنت عمتي عتجي معاكن يشلكن عبدالله أنا مابينرتاحش لها ولفت لعبدالله .

في بيت محمد:

نجلاء: فعلت عزومه لصاحباتها عيجين يودعنها وجين صاحبات ملاك وجت سميه .

ياسر: جالس مع عيال خالته وضابح ملاك عتسافر التلفون في يده بيراسلها .

سميه : هيا ياحركات تلفونش واصل رسايل الصدق حآسه انش بتحبي ذلحين ضروري تعترفي لي مثل ما اعترفت لش ولاشازعل منش .

ملاك: خزيت وحمرين خدودها وإبتسمت مابش أحد يله انتي قليلي منهو مازد جابرتينيش منه.

سميه : لوتبسري كيف بيجلس يحانكني علشان أجابره وكيف لمايذاكرلي بيهتم بي ..

ملاك : بإستغراب يذاكر لش 😳.

سميه : هههه أكيد عرفتيه صح .
ملاك: مصدومه كان العصير في يدها حطته قصدش وسكتت .

سميه : بتضحك أيوه حبيب قلبي ياسر ......

🔺
46 🔺
🔺




سوسن : مارأيك في يسرى بنت أنيسه .

علي : كيف مارأئي فيها ماشاقل عليها بنت أختى أكيد بنت ونعم فيها .

سوسن : أصلا بينحس عبدالله مهتم فيها قلت لو نحجزها له باقي لي سنه وتم الجامعه .

علي : ضحك هههه كان ذلحين ظهرلي ماراس خراجكن السوق وكود أخوته بيزبجوا عليه نبسر لاشي نصيب توكلنا ع الله .


ملاك: 😳😳 مصدومه ماعد قدرت تتكلم .

سميه : بتخفعها في وشها وتضحك ييييه صوعاء يييه مالش مطننه ياسر ياسر إبن خالتي مالش مبهرره .

ملاك : مسكت دموعها وسنبت شاسير ابسر البنات ونسيت تلفونها ..

سميه : مالها هذه مستغربه .

علي : هيا مارأيك يابني لو نخطب لك قدو وقت امد ماتتخرج باقي لك سنه.

عبدالله : هآه مع ماقدوش وقت لما أتخرج.

علي : غمز لسوسن يله كان براحتك غر عمتك بتقلي جو ناس يخطبوا يسرى قلت في نفسي البنت بنتنا نخطبها لعبدالله لاكن خلاص الله يوفقها .

عبدالله : بفجيعه هآه مع مع أيوه أيوه قصدي موافق .

سوسن : ههههه موافق سعم انك بنت بنطلب رأيك.

عبدالله : خزي قصدي أيوه خلاص نخطبها والعرس لابعد سنه .

ياسر: بيلوي فالشارع ضابح عتسافر ملاك الصبح رسلها (ملاكي فاقد لش إشتي أكلمش قبل ماتسافري).

سميه : بتدور ملاك أين جت هذه تلفونها رساله .

ياسر:(ملاكي لاتسافريش كيف شاصبر 3شهور وأنتي بعيده).

سميه : أين جت هذه إسكه أبسر من بيرسل لاهو شي مهم ..




🌹meme-abdalgaleel