اماني .. ضحى عفية باجر مو تنسين تجيبين ملزمة الفيزيا
اريد ادرس هواي فاتتني محاظرات
.. اي غ

ير انتي كضيتيها كله سفرات
.. اي غير كلها عريت وية عرسي
وكل يوم طالعلي واحد معرس من العشيرة
ولازم نسافر نأدي الواجب

وصلنا لمفترق الطريق سلمت علية ودخلت لشارعهم
واني كملت طريقي

جنت امشي واني اطلع النقال من جنطتي
خلي اتصل على شيماء واشوف شوكت نروح لهدى
علمود نباركلها عالحمل ونتطمن عليها بييت عيالها
شيماء كالت من ارجع من المركز اخذج انتي ومريم

تقريباً دخلت بفرع بيت مروة.
وجنت مشغولة اطلع النقال بيد وحدة من الجنطة

وبهاي الاثناء وجان اتفاجيء بصوت نباح الكلب ابن الكلب

كمزت من مكاني واني ادور على مكانه
بكل ضني صوته جاي من البالكونة
وجان المحه واكف بالباب ومحد يمه
وهو شافني اشو هذا اركض علية
يلهث. وينبح عبالك شايفله حرامي

هو اني شفته اجة يركض بتجاهي واني انشمرت الملازم من بين ايديه
وطاروا العلم والعلماء بالهوى
وصرت اركض بالشارع اريد اوصل لبيت مروة
جان بين بيت مروة وهذا جارهم ثلاث بيوت

انتبهت لروحي من السرعة والخوف ما دا اركض عالكاع احس بروحي طايرة

اركض واجتي عيني على باب بيت مروة.
جان مسدود ولكيت يم الباب سيارة
واكفة وبابها مفتوح

كبل بدون اي تفكير ما اترددت ولا لحظة
من حلات روحي لكيت نفسي صاعدة بالسيارة
وسديت الباب بسرعة قصوى

يعني لو اكول هي جانت مجرد لحظات
بس من كد الخوف صارت عندي. دهر مر علية

جنت دايرة وجهي اباوع عالكلب ينبح يم باب السيارة
واني اغلط
.. الله ياخذك حشى مو كلب والله خلي تجي مروة اكللها تحجي وياهم ترة ما صارت هاي

فجاءة سمعت صوت رجال يضحك كاعد وياي بالسيارة
بلعت ريكي والتفتت وجان اشوف اخر شخص اتمنى
يشوفني بهاي حالتي

ابو ياسر .. ها هسة منو كاعد يتحارش بمنوا

يتبع

ياسمين:
#اسور_الفضة
#نهى_الحسون
#البارت_خمسة_وثلاثين

زهرة امل تولد في وسط ركام الرماد
مشاعر غريبة تظهر في وسط قلوب محطمة
وابتسامة ترقب وحماس لما يخبئه القدر

ضحى
التفتت واني متشنجة اباوع علشخص
الكاعد وياي بنفس السيارة او بالاحرى اني الي كاعدة
بسيارته

ابو ياسر .. ها هسة منو كاعد يتحارش بمنو
انا لو انتي

لكيت نفسي صاعدة بالسيارة بكرسي الامامي الي يم السايق
ومن حظي الي يخبل كانت سيارة ابو ياسر
اشرت وراي وجاوبته بسرعة
.. الكلب

اقصد لا يروح بالك بعيد
ترة الكلب ركض وراي
وحاجة المخنوك للهوة يرفس

صدكني انت بالذات اخر شخص احب اتواجد وياه
بنفس المكان

.. يعني هسة احنا لازم نشكر الكلب الي خلاج
تشرفين سيارتي وتركبين بصفي

جاوبته واني التفت منا ومنا
.. اي تكدر تروح تنزل وتشكره.يعني مابيها شي
عادي وهو راح ياخذك بالاحضان دتشوفه شلون حباب ومسالم

باوعت من الشباك اريد اشوف الكلب راح لو بعده
اريد انزل من السيارة. ما اريد ابقى
هذاالرجال وقح

سمعته يكولي
.. طبعاً هاي خدامتكم حيل فاهية كلتلها تعالي نزلي الغراض وفوتيهم للبيت. اشو هاي شافت الكلب
وانهزمت وتركت باب السيارة مفتوح وراها ودخلت للبيت وعافت الغراض عالنص

.. اي حقها ياروح ما بعدج روح
غير تخاف من الكلب

انتبهت عليه ضحك
.. اي صدك بس والله شكلج جان تحفة وانتي خايفة
لا والاقوى منها تهددين الكلب بمروة اختج
بس تعرفين شكد حلو عبالك بزونة وحاصريها يمي بسيارتي

.. اي دير بالك مني كل واحد يخوفني او يحاول يتمادى بكلامه وياية
اكول لمروة اختي عليه حتى تحطله حد اعتبرها هاي رساله تحذير

.. اذا جان على فهم الرسالة
اذن انتي معناها عاجبج غزلي بذيج المرة
وجاية اليوم تطالبين بالمزيد من الغزل

عزة بعينه شنو من جرأة شايل
جاوبته متفاجئة.. لااااا انت ابد مو معقول
انت شكد وقح شنو بدر مني حتى تعتقد اني عاجبني كلامك وياية

.. الدليل سكوتج وعدم ابلاغ مروة بالصار بيني وبينج من كلام بذاك اليوم
و هاي تعتبر احد علامات الرضى والقبول

.. يعني اني اذا نسيت الموضوع وما كلت لمروة عليك
مو معناها اني قابلة ومتونسة على غزلك.
بس الظاهر انت هواي اتعديت حدودك وياي وصار لازم احطلك حد

.. اتفضلي حطيلي حد هاي انا كدامج وهذا الكلب من وراج.
..على فكرة اني هذا طبعي وهذا لساني
ودائماً صريح

فلا تنتظرين مني اصير حباب والزم لساني وياج
لان مستحيل ابخل على نفسي واحرم عيوني
من شوفة خدودج الحمر من اتغزل بيهم وبالشامه الي منورتهم
بالحقيقة هاي فرصة لا تعوض

احس وصلت الدمعة بطرف عيني من الارتباك
هذا الرجال كارثة جاوبته
واني افور من الغضب
.. انت .. انت واحد .. متستحي
اني اطالبك بأن تحترمني. حالي حال اي بنية
تتعامل وياها بأدب
لان اني مسويت شي ينطيك الحق حتى تسمح لنفسك
تحجي وياي بهيج جرأة

باوع علية بتمعن وكأنما هذا الشخص صارله زمان من يعرفني

.. وانا لازم حدودي ومحترم نفسي.
بس انتي الي تعيلين بية
يعني كاعدة بسيارتي وتتعاركين وياي ووتكولين وقح
صدك حلوة هاي فوك حكه دكه
ترة احب اذكرج انتي المتجاوزة على مساحتي الخاصة

لاااااااا هذا صدك مصخها
التفتت. اريد افتح باب السيارة وانزل
حتى لو كان الكلب موجود ما راح ابقى لحظة وحدة وية هذا

اجيت افتح الباب وانزل ما حسيت الا هو ماد
ذارعه ولازمني من زندي وجرني حيل يمنعني

وعاط بية متفاجيء بحركتي
.. انتي شنو غبية ناوية تنتحرين

نترت ايدي اباوع عليه
ورجفت شفايفي ونزلت دموعي بقلة حيلة ما كدرت على السانه

.. اي واكبر غبية اذا بقيت كاعدة وياك
والله عضة كلب اهون علية من ان اسمح لرجال
يستقوى علية ويهيني
مستحيل بعد اسمح لاي واحد يستهين بية

جنت احجي ودموعي تتسابق وية كلامي

صفن بوجعي وفقد الكلام

كلامه اسلوبه. حذاقته كل هاي الصفات.
جانت جديدة وغريبة علية
لاول مرة بحياتي اتعارك وية رجال بحرية واواجهه
كان يحسسني وكأنما اني ند اله ومساوية لمستواه

ياخذ كلامي على محمل الجد وينطيني المجال
اناقشه واحجي واعبر عن غضبي اتجاهه
بدون ما يتهجم علية بالقمع ويسكتني بالضرب

بالحقيقة خبرتي بالرجل جانت محصورة ما بين اثير وسيف
واثنينهم كانوا نموذج تعسفي خاطيء
عندهم المراءة نكرة

مالهة حق ان تحجي او تطلب او حتى ترد او تناقش
بس اني لاحظت مجرد موقفين وية هذا الرجل

لكيت الساني ينطلق بحرية بدون ما اخاف
اجاوبه واحاربه. وحتى اكدر ادافع عن نفسي ضده
مع العلم بنفس الوقت اني عارفة ومتأكدة منه
ان هو مستحيل يأذيني واحس بالامان وياه

انتبهت عليه التفت وشغل السيارة
وحركها
مسحت دموعي الي مستمرة بالنزول
وسألته خايفة .. ش ش شنو وين ماخذني

.. لتخافين ما راح اخطفج.

رجع السيارة للخلف
ووكف كدام بيت جيران مروة جان بابهم مفتوح
والكلب لازال يطارد وينبح عالسيارة

دك هورن واستمر صوت الهورن يصدح المكان
باوع علية على صفحة
وهمسلي بهدوء ممتعودته منه

.. تدرين غلبتيني بدموعج
وكدرتي تخليني اوكف عند حدي

مسحي دمو

عج ماكو شي يستحق تبجين عليه

بس ما اعرف ليش من اشوفج
احب اتلاعب وياج بالكلام مثل واحد يلاطف بطفلة
جنت احب استفزج واستمتع من اشوفج تتأثرين بسرعة بكلامي
هذا الشي. يثيرني أتجاهج مااعرف ليش

التفت يباوع على باب الجوارين
ورجع يدك هورن بشكل مستمر
طلع الرجال الجبيرة ابو وجه السمح
مجرد مشاف الكلب الي يحوم داير مداير السيارة
كبل ابتسم
واجة بهرولة عليه. ولزمه من طوق العنق

وحجة وية ابو ياسر
.. نعتذر استاذ جان مربوط بالحديقة ما اعرف شلون
كدر يفتحه

ابو ياسر جاوبه بكل روح رياضية
.. لا عادي اغاتي. مصار شي
حرك سيارته ورجعها قرب باب بيت مروة

وهو يحجي بصوت ناصي
.. عمي حقه الكلب شيربطه يبقى حبل سير يربطه
اذا شاف البزونة تمشي بالشارع
اكيد ما اتحمل يبقى بمكانه مسكين

رفعت عيوني وخزرته وفتحت باب السيارة وكلتله
.. والله انت متصيرلك جارة ابد
مو بيدك لازم كون تصير وكح
كملت كلامي ونزلت

هو طكها ضحكة وصاح وراي
.. لاتنسين دزيلي الخدامة خلي تنزل باقي الغراض مال ام شيماء موصيتني عليهم

باوعت على الكشن الورة جان اكو علب كراتين
درت وجهي ودخلت جوة للبيت وصحت للخدامة
.. كارولين روحي نزلي الغراض من سيارة ابو ياسر

ظلت مصفصفة بوجهي. اهووو نسيت تحجي انكليزي
.. Go to the car and bring the boxes
اذهبي واجلبي الصناديق من السيارة

ابتسمت وهزت راسها بموافقة وراحت
باوعت للبيت بعدهم لامريم ولا مشمش واصلين

جانت جنطتي بعدها على كتفي فتحتها حتى اطلع النقال
واتذكرت الملازم والعلم والعلماء الي طاروا
بالجو باوعت من شباك المطبخ الي يطل عالكراج
شفت كارولين دتنزل الكراتين جان عددهم اربعة
صفتهم يم باب الكراج

جنت منتظرتهم بس يخلصون ويروح الاستاذ حتى
اروح اجيب الملازم

اتفاجئت بأبو ياسر انطة لكارولين سجلاتي وملازمي
الظاهر انتبه عليهم واكعات بالشارع

ابتسمت هذا ما يفوته شي
طلعت النقال واتصلت على شيماء وماكو رد
ورجعت اتصلت على مروة هم ماكو رد
شكو شصاير رحت بدلت
ملابسي اريد اشوفهم شوكت برجعون حتى احمي الغدى

واريد اتأكد من شيماء اليوم كالت جهزوا روحكم
اخذكم لبيت عيال هدى

لحظات ودك نقال جان المتصل شيماء وكالت لاتنتظرونا عالغدة
صارت عدنا حالة طارئة بالعيادة.

هدى
بالطريق راجعين للبيت
باوعت لهالة الي جان وجهها احمر من رجعت من يم الولد

.. اي ست هالة شوكت ناوية تحجين
تغة (تره) الفضول يقغة (يقرة) عندي الف

هالة باوعت علية وهي مصفصفة
.. لج هدى هذا حاط عينه علية ويكلي طول هاي الفترة اراقبج
وسألت عليج وعن اهلج

.. لج هالة لا يكون يغيد (يريد) يتقدملج
باوعت علية ورفعت حاجبها
.. لا لا يريد يطلب ايد امي شكرية

شنو هذا الذكاء الي نزل عليج فجأة هاي وحدج اكتشفتيها لو بس انتي

طبعا انتي فد عوبة متكدرين الا تحجيني كوة
يعني اكيد يريد يخطبني غير شافني حلوة واخبل فديتني

.. احم احم خفي علينا ترة صارت حاغة (حارة)
عفية لتحمين علينا

.. مو صوجج صوجي اني الي كاعدة يمج ومتنازلة واحجيلج
باوعت للعم حسنين وكالت

.. الله عليك عمو اني شناقصني وهاي العوبة تعيب علية

ابتسم وهو يباوع علينا بالمرايا
.. والله انتي ست الكل مفيش منك اتنين
الي حتكوني من نصيبوا امو دعيالو
بس ما تخديش على كلام ستي هدى اصلها
بتحب تهزر معاكي

ضحكت وجاوبتها
.. شفتي ازاي. حتى العم حسنين واخد بالو مننا
ويعغفني (ويعرفني) كنت اهزغ (اهزر) معاكي
اخ ياني منك يا ولية يمفتغية (مفترية)

بغرفتي
اغير ملابسي احلا شي اليوم قاسم مرتين اتصل علية
بالكلية يسألني شلون صرت

بدلت واخذت نقالي وعلاكة العلاج ونزلت حتى اتغدة
لكيت الكل موجودين عالغدة. وجهال منى هم كاعدين يتغدون
الظاهر منى بعدها ما راجعة. من الدوام

ام قاسم.. يالله خالة تعاي بوجهج بسم الله
هذا ماعونج عازلته على صفحة
جانت طابخة. مطبك لحم مثل التمن البرياني
وجان ماعوني مملي باللحم.

رحت سحبت الكرسي باوع لهالة عيونها نطت من مكانها
وكامت تباوع من ماعونها. لماعوني

هالة.. اكول حجية خير سالمين. عود هاي شيسمونها عالخير
ليش ست هدى ماعونها مال واحد مدلل.
واني ماعوني مال واحد متسول

ام قاسم .. عمة حتى عمة راح تفطن على اكل البنية
لج ثولة هاي حامل. تحتاج تتغذة. مو بس الها
تاكل لازم تاكل للشخصين حتى تعوض

هالة .. يعني شنو اشتغلت رحمة الله. وبدة شغل التفرقة
ترة هذا اكبر ظلم بحق الانسانية

ام قاسم .. لج هسة الي يسمعج يكول هاي البنية شكد تاكل
وانتي كل خير ما بيج بس دعاية واعلان
هسة اتحداج تخلصين ماعونج

..يمة ترة العين تاكل قبل المعدة. يعني اني اهم شي عندي.
محد ياخذ اهتمامج مني هنا مربط الفرس
اني اغار ست الحبايب

جنا ناكل وسألت هشام الي جان مندمج بالاكل
.. قاسم ليش ما اجة على الغدة
.. عمي محمد دز عليه علمود موضوع يخص شغلنا

ام قاسم.. ها بلكي حجة وية الرجال المسؤول عن المناقصة.

.. اي هو بخصوص موضوع المناقصة
بس لحد هسة ما اعرف اتوصلوا لحل

لو بعدهم



همة جانوا يحجون بشغلهم واني النار كامت تطلع
من اذاناتي يعني هسة هو ببيت عمه محمد.
يمة من الحركة والقهر
احس الاكل اتجمع ووكف ببلعومي ما جاي ينزل

جنت اكل بالكوة غصب عني
دك نقالي وجان المتصل شيماء
رديت عبالك حست بية دائما اتصالها يكون بوقت ما اني مهضومة
همست .. الو
شيماء.. هلا هدوشتي شلونج بشريني اخذتي علاجج
.. اي بس عندي كم واحد من العلاجات ما اعغف طغيقة (اعرف طريقة) استخدامهم

.. هااا لعد انتظريني اليوم اذا ما عندج شي او مشغولة
كلت اجيب البنات مريم وضحى حتى يباركولج عالحمل
خطية كولش فرحوا من سمعوا بالخبر

حجيت بلهفة وياهم
.. هلا بيكم بأي وقت والله ياغيت (ياريت) تجون
لو تدغين (تدرين) شكد مشتاقة لمغيم ( لمريم ) وضحى
لان صاغلي (صارلي ) هواي مشايفتهم

اتفقت وية شيماء تجيني عالعصر هي والبنات ونهيت الاتصال

التفتت لخالتي واني مبتسمة وعيوني ارتسم بيها الفرح
مجرد ما سمعت صوت شومة وعرفت بخواتي راح يجون.

احس بالروح استقرت وامنت
رغم هذا كله بس مكدر ينسيني وجع كلبي الي بعده محترك

.. خالة اليوم شيماء والبنات غاح ( راح ) يجون يباغكولي (يباركولي) عالحمل.

هالة .. عليج الله كليلها خلي تجيب وياها لولو كاتي
خلي العب عليها. غير تموت

سألتها مستغربة
.. منو لولو كاتي
.. مريم اختج. غير اخرب عليها
شكد احب انصب عليها من تلم شفايفها و تريد تبجي

لفت انتباهي هشام كعد ينافخ وخزر بهالة
عبالك غلطت عليه او سبته
لا والاحلى منها يأشرلها بحركة بسيطة انا الج

دك نقاله.
ورد عالمتصل
اسمعه يكله
.. لا اعذرني ما اكدر اروح وياكم العصر اجلوها على باجر
لان الاهل. محتاجيني ابقى يمهم عندهم حالة طارئة

هالة تاكل وتحجي وياي
.. اححححح. اشتغلت رحمة الله
اشم ريحة زحف بالجو

سد النقال وباوع عليها وخزرها

.. هالة خير خو ماكو شي سالمين منو يمج
اشو كمتي تذبين هاونات. عالمعسكر مالتي

همة يحجون واني عيوني تتنقل بيناتهم
كلشي ممفتهمة
فجاءة وجان يدك الجرس عندي

عزة هذا التخطيط كله علمود سمع بمريم راح تجي
لالا هذا الرجال مو طبيعي.
يمة خطية اختي مريومة والله. متكدر عليه وراح تضيع
بين ايديه

ام قاسم .. هالة عوفي اخوج خلي ياكل ولا تضوجيه
ودارت وجهة على هشام وسألته
.. وانت تعال كولي منو هذولي الاهل الي محتاجيك العصر
لايكون عندك اهل غيرنا وانا ما ادري

هشام بكل ثقة .. لا حجية هذا واحد لزكة. يريدني بشغلة العصر
وانا ما بية حيل اطلع لذلك صرفته بحجة الاهل

هالة .. احلف والله مرتين
اريد اصدكك بس والله مابيها مجال
بس تدري قوية قوية

عض شفته وكام من مكانه يريد يهد عليها
.. الظاهر انتي ما راح تسكتين الا اجي اسحلج يالله

ام قاسم .. لا عليمن تسحلها هاي دواها يمي خليها علية
هاي البنية انا اعرفلها اذا ما عندها شغل وعمل تكعد تدور مشاكل
دتعاي خلي انطيج شي يشغلج حتى تبطلين. تناكرين اخوج

هالة بلعت ريكها .. ياستار كامت علينا.
نبع الحنان
ام قاسم .. يالله شو كومي لمي المواعين وغسليهم
بدال مرة اخوج

هشام بابتسامة نصر.. والله كفو منج كفو

هالة كمزت من مكانها .. حرام عليكم والله حرام
عود ليش اني اغسل المواعين وست هدى شبيها ايديها
مشلولة ترة حامل ببطنها مو بيدها

كمت من مكاني.. لا خالة اني اغسلهم عادي واذا حامل
وحملي مهدد بالاسقاط تغة (ترة) مو معناها هالة تغسل عني مواعين

جنت احجي واحرك بحواجبي كدام هالة وهي اتأشرلي
تتوعدلي بسيطة انا اعلمج

ام قاسم.. لا خالة شنو قلة بنات عدنا. هية كم ماعون
ستري علينا وخلي هالفترة تعدي سلامات
وبعدين براحتج شتسوين سوي

ام قاسم كامت وحطت قوري الجاي عالنار وهالة بدت تلملم المواعين وتدردم
.. خاب شوف هديوة العوبة صارت حامل. وكامت
تدلل براسي

حجيت بدلع .. اي ياعيني هسة مو لخاطغي (لخاطري)
عالاقل لخاطغ (لخاطر) ابن اخوج الي بطني
جنت احجي وامسح على بطني

.. بهاي الج حق لزمتيني من ايدي التوجعني الا العزيز
بس مردودة. خلي يشرف اذا ما كربته كراب بالمشترة
اسوي اضرب من زيوني

ام قاسم .. هاي شنو بعدج واكفة تدكين سوالف
بالله شو اتحركي
هالة .. شلون بالله يعني الواحد لازم يحبل بهذا البيت يالله يدللونه

ام قاسم ..عزة بعينج هاي البنية. نزعت المستحة
وصارت تحجي عامي شامي
لج هالة انتبهي للسانج لا اكصه الج

مرة الوقت واتصلت على قاسم وسألته عن مكانه كلي
بالشغل
.. تجي عالعشا لو الشغل غاح (راح ) يلزمك يمه عالعشا
جنت اسأله واني كلبي يفور الكذاب يكلي بالشغل
انا له بس خلي يرجع واشوف شغلي وياه
هذا شكله فاهم موضوع الحمل غلط
منو كله الحامل ترتفع عندها نسبة الغباء وتصاب بالعمى الاثول

جاوبني.. لا انتظريني ارجع عالعشا.
.. اوك قسومييي انتظغك (انتظرك) حبيبيييييي
صرفني مستعجل وكال
.. يالله مع السلامة
وقطع الخط
من خلال صوته والاصوات اليمه ان هو صدك مشغول
لان لطالما جان يحجي وياي اسمع اصوات رجال ويحجون بأمور الشغل

مر الوقت وصار العصر وح

ياسمين:
ست
ملابس حلوة تشرح الكلب وحطيت ميك اب
وسويت ظفيرة وحدة وخليتها على صفحة

انتبهت لهالة وهشام كاعدين بالهول
يتهامسون مثل البلابل. سبحان مغير الاحوال
هذولي شنو سالفتهم. كل ساعة اشوفهم
بحال

لا والاقوى منها هشام كام وكللها
.. هالة حبيبتي اي شي تحتاجيه. بس كولي انا حاضر

هالة .. تسلملي فديت اخوي ونظر عيني

بقيت فاتحة حلكي وارمش بعيوني لا لا هذولي اكيد مو طبيعيين
ام قاسم كالت لهالة روحي صيحي اختج هديل وكليليها
خلي تنزل جوة يمنا شنو كاعدة فوك معلكة

راحت هالة صعدت فوك واندك الجرس
وكمت من مكاني بكل لهفة اريد اروح افتح الباب
اخواتي.وصلوا اريد واستقبلهم

وقفني صوت هشام وكلي.
.. لحظة انتظري انا كايم افتح الباب ما عندنا
نسوان يفتحون الباب والرجال موجودين

ههههههههه جان يحجي بكل ثكل وهيبة عباله
ما اعرف فلمه شنو.

راح هشام فتح الباب واني وخالتي بقينا واكفين بباب
المطبخ الخارجي. ننتظر البنات يدخلون

دخلت شيماء وضحى واني رحت اخذتهم بالاحضان
والتهيت بيهم ونسيت اختي الصغيرة بين ايدين الذيب

مريم
جنت لازمة مشمش من ايدها وواكفة وية ضحى وشيماء يم باب بيت عيال هدى
وفتح الباب وطل علينا استاذ هشام . وسلم عالبنات ووكف على صفحة حتى البنات يفوتون يدخلون للبيت
اشو وصلني الدور حتى افوت وراهم. اشو هذا قطع علية الطريق.
وصار يتلاعب وياي بالاتجاهات

اروح منا يروح وياي اجي منا يجي وياي هذا شبي ناصب علية لو صدك صدفة

رفعت راسي وصارت عيوني بعيونه. محتارة
وحجيت بصوت ناصي
.. شنو ناوي تطول على هالحسبة
عفية قرر وين. تريد تروح ترة دوختني
اريد افوت جوة

هشام.. اي تفضلي تكدرين تفوتين قابل انا لازمج
مشمش بضجر .. غوح منا نغيد ندخل نشوف هدى
جانت تحجي وياه وعافسة وجها

دنك عليها ورفعها وباسها من خدودها وهي
عافسة الخشم والوجه

وهو شايلها
سد الباب وهي عيونه علية
دخل واني دخلت وراه لكيت خواتي داخلات جوة للبيت

انتبهت لمشمش جانت تباوع على وجه هشام بتركيز
شوية ومدت اصبعها وحطته بغمازة هشام
وصاحت بصوت متفاجئة

.. مغيم ( مريم). شوفي هذا عنده زغف ( زرف )
بخده مثل هذا الي تحبيه وكل مغة (مرة) تطلعين صوغته (صورته) بالتلفون

اباوع عليه اتوقف عن المشي ودار وجهه يباوع علية
عزة بعينج مشمش اني سويت نفسي كلشي ما اعرف

حجيت بصوت ناصي من الفشلة
.. مااعرفه منو هذا الي كاعد تحجين عنه حبيبتي
بس مشمش شيسكتها
.. هذا الممثل الي كلما تشوفيه تبوسين التلفون
وتكولين فديييييت والله فديييييييت

يبوووووو عليج مشمش خررررب فضحتني
قصدها يشبه الممثل. الهندي جون ابرهام
عنده غمازة خرب يومها شهرتني

دخلنا للهول ومشمش لازالت تدردم وية هشام
اسمعه يحجي وياها
يكللها .. عمو مشمش تعاي وياي اشتريلج لعابة
هواي تفيدين بالمعلومات

اول مدخلت رحت سلمت على خالة ام قاسم
وهدى اخذتني لحظنها وسلمت عليها صايرة كلش خلوة والحمل لايك عليها

رحت كعدت يم شيماء ضربتني بكوعها على خاصرتي
وحجت من بين اسنانها بصوت ناصي

.. انا الج بسيطة وين جنتي ليش هلكد اتأخرتي بالكراج
معقولة هذا كلة تمشين

كمزت من مكاني على ضربتها وفلت وجهي

.. ااحم مشمش جانت تمشي على كيفها وتريد تروح وية
هذا حما هدى

سويت نفسي حتى ما اعرف اسمه
اباوع عليها كل شوية تخزرني

وبعدها التهت شيماء وضحى يسولفون وية ام قاسم وهدى
هدى.. حبيبتي مغيم(مريم) مشكوغة (مشكورة) على حلاوة الجوكليت
جاوبتها.. حبيبتي هدوش الف عافية. سويتها لان تحبيها
كلت تخليها جوة ايدج خاف تشتهيها

ام قاسم .. حبيبتي تعرفين تسوين حلاوة جكليت
ضحى.. اي خالة مو بس حلاوة جوكليت
هواية انواع الحلويات تسوي

ام قاسم.. هي حلوة وتسوي حلويات
جاوبتها .. اشكرج خالة عيونج الحلوة

انتبهت لهالة واختها هديل دخلوا وسلموا علينا
بس هديل وجهة كلش ثكيل وتسلم علينا من ورة خشمها هي تقريباً بعمري

وهالة بس دخلت وشافتني عيونها لمعت
واجتي سلمت علية وكعدت يمي

ام قاسم ضحكت بأحراج
.. يمة هالة شنو اليوم ما ناوية تضيفين البنات لو نسيتي

هالة .. هااا اي يمة
دارت وجهة علية وكالت .. مريومة كومي تعاي وياية
حتى تساعديني ونسولف اني وياج والله مشتاقتلج

باوعت على شيماء جنت متعودة
ابقى يمها وما اتحرك من مكاني
اجتي عيني بعين شومة اختي
وخزرتني بتحذير.
عرفت ان هي متقبل اكوم من مكاني

باوعت لهالة بأعتذار
.. لا حبيبتي هالة استحي اكوم وياج
عفية خليني هنا. كاعدة

هالة بخرعة .. لا تكوليها كلشي ولا الورقة تروح علية والله اموت
اااااقصد حبيبتي مريومة والله راح تزعليني منج
شنو قابل بيتنا بيت ناس اغراب وتستحين

رجعت باوعت لشيماء استنجد بيها
ياربي هاي هالة اشك بيها مخبلة مو عاقلة
اغلب كلامها. الغاز
لا والمشكلة تريدني افتهم عليها

ام قاسم رجعت باوعت لهالة
.. لج هالة بعدج واكفة هنا ياربي هاي البنية
صاير كلش فاهية.
جانت تحجي وتخزر بيها
وهالة تسويلها بيدها هسة اروح بس شوية صبريلي

هالة بص

وت ناصي

والله ما اطلع منا الا ومريم وياي
لو اعرف اطلعها سحل منا

حجيت وياها .. حبيبتي هالة ما اكدر اكوم شيماء متقبل

هسة لو اعرف ليش هيج كاتلة روحها حتى اجي وياها
جان ارتاحيت

هالة .. اكول شومة عن اذنج راح اخذ وياي مريم
هي جانت تحجي وية شيماء

لزمت ايدي وكومتني من مكاني وسحبتني وراها
ودخلتني للمطبخ
وبيدها بايركس الجوكليت
اول مرة اشوف مطبخهم جان بيتهم حلو
ومطبخهم كولش جبير

وجان يدخل هشام ووياه مشمش وبيدها باكيت لعابة
شافتني واجتي تركض علية
وكالت
.. مغيم شوفي عمو هشومي شنو اشتغالي ( اشترالي)
لعابة حلوة. اكول مغيم انتي كل يوم بيش الساعة تنامين

سألتها مستغربة
.. شنو شبيج مشمش
.. عمو هشومي يكول
قاطع كلامها هشام ورجع شالها وهو يضحك

.. ههههههه والله انج خطيرة يا مشمش.
ما تتأمنين شكلج مفضوحة

هالة .. حبيبتي مريومة تعاي قطعي الكيك بين ما
اصب العصاير.
كملت كلامه وباوعت لهشام
رحت يمها وكعدت اقطع بالكيك وسمعت هشام يسأل هالة.

.. الله هاي منو مسوية حلاوة جوكليت
.. هاي مريم مسويتها لهدى مو الك يعني للحوامل خاف تشتهي لا تفضحنا

ابتسمت على قصف هالة لاخوها شكد حلوة علاقتهم
وزعت قطع الكيك بالصحون وحطيتهم بصينية التقديم

لكيت هشام كاعد على ميز الطعام ودياكل بالحلاوة
وكال .. حلاوة وتسوي حلاوة.
والله اروح بيها انا ويرتفع عندي السكر

هالة .. الله يكون بعونك هشومي حالتك كلش تعبانة

همة يحجون واني بس ابتسم كولشي مامفتهمة على شنو ديحجون

هالة اخذت صينية التقديم ورحت امشي وراها
دارت علية
.. لا حبيبتي ابقي لتجين وياي هسة ارجعلج
اريدج تعلميني شلون اسوي الحلاوة عندي المواد
بس انتي تشرفين على العمل حتى اسويها كدامج
كعدي عالميز بين ما اروح اودي الصينية وارجعلج

اهوو هسة شيماء تظل تحجي علية
هشام.. تعاي كعدي شبيج خايفة. ترة احنا مناكل
بشر الا بعد الساعة ال١٢ ليلا من يكتمل القمر
نبدي نتحول و.....

ودخلت هالة وكملت كلامه
.. ونتحول لمستذئبين مصاصين الدماء

همة يحجون والعيون تلمع بوكاحة
بلعت ريكي هو اني منا اخاف من خيالي ونوب الله سلط
هذولي علية.
كمزت من مكاني وحجيت بخوف واني ااشر على الباب الوراي

.. ااااااريد اروح اكعد يم شيماء
هالة طفرت من مكانها وهي خربانة ضحك
ولزمتني

.. والله انتي فلم وربي ما ينشبع منج
هنيال الي ببالي راح يشبع ونسات براسج

حاولت اسحب ايدي منها وحجيت
.. هالة
قاطعتني وكالت
..لا لا وين رايحة تعاي كعدي راح اطلع المواد من المخزن.
كعدتني غصب عالكرسي وجان هشام كاعد كدامي
ووجهه احمر من الضحك

والله اكص ايدي اذا ما طلعوا هذولي اثنينهم مخابيل
وعقلهم فاصل

هشام سحب نفس عميق وجلى صوته وكوة لازم نفسه
ميضحك
.. احم. خلينا نحجي بالجد. راح تخلص فلوسي بس ضحك.

هسة غير افتهم منهم شي الله يلعن بليسكم
يحيرون الواحد
حجة بصوت هادي جدي وكال
.. اكول مريم شنو مستواج بالخامس زين لو وسط
.. اني مستواي زين بالخامس

.. شنو ناوية تخلصين اذا اخذتي شهادة السادس

لمعت عيوني واني احجي بلهفة اول مرة بحياتي واحد يسألني شنو طموحي.
لاول مرة انتبه لهشام ولشكله
اشو متغير صار كلش حباب

ابتسمت وكلتله .. اتمنى اصير دكتورة مثل اختي
مروة.

اباوع عليه دمغ كصته وكال
.. اخاف تطولين

.. شنو اطول ما افتهمت عليك
.. اقصد يعني اخاف تتعبين
.. بالعكس هو حلمي اصير دكتورة
صدك انت شنو مخلص دراسة

.. انا مهندس كهربائي. واشتغل وية قاسم اخوي
بالمناقصات وعندنا شركة استيراد وتصدير

وبعدها نسيت نفسي بالكلام وصرنا اني وهشام
نسولف بكلشي. هو يسألني واني اسأله
ما اعرف ليش للحظة حسيت اني وهشام هواي نتشابه
وكلش قريبين على بعضنا
حسسني عبالك اني بكده و بعمره واخذني على محمل الجد

عكس اخواتي يعاملوني كطفلة ويحيطوني بالحماية
وكأنما بس اخطي خطوة او احجي كلمة
بدون علمهم.راح ااذي نفسي

بالحقيقة هذا الشي يسعدني ويحسسني بالامان
بس اليوم واني بقرب هشام حسيت بروحي اني كبرت

هدى
راحو خواتي بعدما سلمت عليهم وخالة
لزمتهم عالعشا وشيماء رفضت
وكالت مروة خطية تعبانة. ولوحدها بالبيت لازم نرجع

ورة فترة بعدما كملنا العشا والاستاذ قاسم ماكو لحد الان ما بين

باوعت للساعة بضجر منتظرة الاستاذ
كمت من يم خالتي ورحت دخلت للمطبخ لكيت اخونا هشام
لابس صدرية غسيل الصحون وديغسل مواعين وية هالة
ويحجي وياها بالمطبخ الحار وهالة. خربانة ضحك ما اعرف شنو ديحجون

اجتي وراي ام قاسم وشافته وكالت

.. يا صلوات على النبي هاي شبيهم ولدي شجاهم
بس لا ذابين صرتهم بالمطبخ

هشام مشنف ردانات البدي واكتافه عريضة
وشعر الساعد مال ايديه كثيف. مبلل من غسل المواعين

.. ها يمة خيرجاي اساعد اختي حبيبتي شنو حرام

هالة كالت لهشام بنيرة مسكنه ودلال
.. هشومي حبيبي تعال شيل هذا الجدر كولش ثقيل علية
وهي تباوع لامها الي راح تنجلط احلى شي جواب هشام الي اخذ الجدر من عندها وكال.

.. حاضر يااااا ابليتيي

ييي من عين

ية الاتنين

ام قاسم.. يا يمة الرجال انضرب بعقله
جنت اضحك وافتهمت ان هشام وهالة اتفاقهم وراه مؤامرة.

سمعت صوت سيارة قاسم وما شفت الا هشام
كبل انزع الصدرية وشمرها على هالة وطكها ركضة للباب حتى يفتحه ههههههههه
الصورة تغيرت بصورة جذرية سريعة

اني بس شفت سيارة قاسم بالكامرة
استأذنت من خالة وكلتلها راح اصعد لغرفتي

ورة نص ساعة
دخل قاسم. وجهه كان هاديء
سلم علية وهو يراقبني
رديت عليه السلام بثكل ورفعت حاجبي زعلانة وسألته

..شنو شلونهم بيت عمك محمد
سألني مستغرب
.. وليش تسأليني على بيت عمي محمد شبيهم ؟؟؟

.. حبيبي تغة (ترة) لا عبالك اني كلشي اعرف
انت جنت اليوم ببيت عمك محمد على اساس حتى تحجي وياه
بخصوص الشغل

.. انا صحيح اليوم عندي شغل وية عمي محمد.
بس ما رحت لبيتهم رحت لمكان عمله هناك كعدنا نحجي.
شنو مكلتي ليش تسأليني

بلعت ريكي
عزة بعيني شكد عوبة يعني ماجان ببيت عمه
هذا عقلي القافل شلون بي راح يوديني بداهية

باوعت عليه ورمشت عيوني
واقتربت منه ورفعت روحي على اطراف اصابيعي حتى
الوحه كوة كدرت اوصل لطرف حنكه
وبسته بس انتبهت عليه هو ما حاول
يساعدني ويدنك مثل كل مرة

جانت بعيونه نطرات حازمة وسألني
.. اكول ست هدى شوكت جنتي ناوية
تكليلي عالنزيف الصار وياج
البارحة. ببيت بيبتج ليش ما عندي علم

.. منو كلك
.. انا اليوم اتصلت على مروة
حتى استفسر وتفهمني وضعج لان البارحة فرحة الخبر
نستنا نطمن على وضع حملج
وفاجئتني من كالت هي عندها نزيف ولازم ترتاح
اشو انتي اليوم رحتي داومتي
بالكلية

هدى.. اول شي ما كلتلك ما حبيت اشغل بالك
بهيج اموغ (امور). ما دام اني اكدغ (اكدر) اتجنبها ميحتاج ادخل
الجميع وياي بالانذاغ (بالانذار) واقلقهم علية
هاي وحدة ثانيا دوامت اليوم بالكلية تعغف (تعرف)
هاي اخغ (اخر) سنة الي والعميد كلش متشدد ويانة عالغيابات
فاخذت الوغقة (الورقة) الي كتبتها الي مغوة (مروة)
وختمتها من المستشفى حتى اسلمها للعمادة ويوافقون عالاجازة
ياحبيبي ما حبيت ادوخك بهذا الشي كله وانت مشغول.
خلي ثقل الحمل بس علية

قربني عليه ودنك راسه وكال
.. ما تكليلي هذا لسانج شنو سره.
ما اعرف شلون يملك السلطة على افعالي
ويسلب مني حق الزعل وبكلمة وحدة منج
تطفين نار غضبي.

ابتسمت واتكأت على صدره. بدلع. العب بدكمة القميص يم صدره بدون هدف
وكلت
.. الله يديم المودة بينا ويوم يوصل تأثيغ (تأثير) لساني لكلبك

قرب راسه على شفايفي وحجة بصوت ناصي وكال
.. طبعا ما يحتاج يوصل لكلبي
لان انتي عندج حظ وبخت بكلبي ما واصل لحده بشر ثاني

اخذ شفايفي وصار يتفنن واني نسيت نفسي ورفعت ايدي واتعلقت بركبته مثل الكلادة

لحظات وما احس الا اني وياه عالسرير
شلون وشوكت وصلنا لهنا ما ادري

بس كل الي اعرفه ما اريد اقطع لحظة تواصلنا
جنت بين ايديه مثل العسل الدافي. حرارة انفاسنة
تشهدلنا

فجاءة انتبهت للمسات هرقل اشو هذا ماخذ راحته عالاخر
ونيته كانت واضحة وعرفت لحظات الشغف لوين راح توصلنا
بعدته عني بحذر مترددة
همست بضعف
.. قاسم. لحظة.

باوع علية وعيونه ذبلانة من الشغف وسألني بصوت فاقد الصبر
.. شكو
.. يعني مغوة (مروة) من فهمتك على صحة الجنين. ووضعه
ما كلتلك ميصيغ تقتغب (ميصيرتقترب )من زوجتك

اباوع عليه غمض عيونه بصبر . وكال
.. اعرف اختج كالت لاتقترب للجنين
بس الما تعرفه اختج ان مو قاسم الي يتمتع ويحرمونه عن ممتلكاته

ابتسمت وحجيت بحذر
.. ما افتمهتك شلون يعني
ابتسم بنتصار ودنك علية وكال
.. تعاي جنيتي اقتربي علي وخلني اعلمج شلون
وداعتج عندي الف طريقة وطريقة توصلني
لممتلكاتي بدون ما احتاج ادك الباب وااذي ابني

ابتسمت متفاجئة من دهائه
وهو دنك راسه وقرب وجهه وبأنفاسه الحارة
غلف ابتسامتي المتفاجئة
ومن بعدها صار يدليني الطريق

شيماء

رجعنا من بيت هدى وجنت كلش تعبانة
اليوم اطول واصعب يوم مر علية
صدمة ورة صدمة لدرجة صرت اشك بعقلي راح
ينفجر من مد الكم الهائل. للمشاعر

جنا بالسيارة راجعين لبيت مروة خلص الطريق كله ارزل بمريم
واسألها عن سبب غيابها عنا وليش مكعدت يمنا ببيت عيال هدى. خطية مجاوبتني اي شي بقت مدنكة راسها وخدودها صاروا حمر
وكالت بس كلمة وحدة. هالة. لزمتني ومقبلت تتركني
اروح اكعد يمكم

دخلنا للبيت مروة كلتلي
ان حيدر اتصل عليها وهي فهمته حالة بنته ووضعها.
ضحى ومريم يباوعون علينا مستغربين على شنو نحجي.

استأذنت منهم ورحت دخلت للغرفة الي صارت غرفتي
وبدلت ملابسي
واني احس بروحي حيل تعبانة
وضاعت علية ياترى تعبانة نفسياً لو جسديا

دك نقالي برقم غريب
رديت عالمتصل واتفاجئت بصاحب الصوت
بس سمعت صوته جاوبته بسرعة
.. الو هلا حيدر
بس لا سرى صار بيها شي
جاوبني بصوت تعبان

.. هلو شيماء اعتذر عن الازعاج

.. لا عادي ماكو اي ازعاج طمني شلون صارت سرى

جرحسرة وكال.. والله مو زينة. هسوتها نامت
.. ياعمري ربي. يبرد كلبك على بنتك.
وينطيكم الصبر

.

ياسمين:
حتاجج بموضوع.

حجة اسمي وهو متردد الظاهر عنده شي يريد يحجي
..اتفضل حيدر كول. اسمعك
.. اريد استفسر عن الادوية الي صرفتهم مروة ما كدرت ارجعلها حتى تفهمني عليه شلون اخلي
سرى تستخدمه
اكول حبوب ومراهم وكريمات وغسولات ما اعرف شلون افهم بنتي تستخدهم

حطيت ايدي على حلكي من الفشلة والله ارتفعت حرارتي خدودي من ورة سؤاله

سحبت نفس عميق. وحجيت وياه بكل مهنية
.. شوف حيدر هاي مجموعة علاجات خاصة نسائية
افضل من تكعد سرى. انت تتصل علية واني
احجي وياها و افهمها على طريقة استعمالهم.

حتى اجنبك الاحراجات وية بنتك.

سمعت صوت كحة خشنة وبعدين جلى صوته وكال
.. شيماء انا جدا ممنون الج.

.. لا ماكو امتنان. بينا. انت هم كنت في يوم من الايام وكفتلي بهواي امور.

.. شيماء ما اريد اطول عليج بالمكالمة خاف تردين تنامين. بس قبل لا اروح اذا اكدر اجيب بنتي الكم بالبيت تعاينون على صحتها ومروة تفحصها
لان ما اكدر اجيكم للعيادة هناك ما اريد الفت انتباه اهلي.

.. عادي براحتك. اني ومروة دائما نرجع للبيت بوكت الظهر نتغدة وبعدها ناخذ نص ساعة راحة ونوب نرجع للمركز اذا تريد جيبها. الظهر. حتى هي تاخذ راحتها وية البنات

.. شيماء انتي ملاك الله حطج بطريقي حتى يعوضني ويصبرني على ما بلاني.

غمضت عيوني
انفتح باب غرفتي ودخلت مشمش وكالت

..خالتوا تعاي مامي تسيحلج

.. يالله انا اترخص واخذي راحتج. تصبحين على خير.
.. مع السلامة. وانت من اهل الخير.

غلقت النقال وباوعت لمشمش وكمت وراها
.. تعاي ولج جنية. اليوم الا اكلج كلج
اتسعت عيونها بوكاحة وراح تركض وتصرخ

رحت يم مروة جانت كاعدة بالهول لابسة تراك سمائي
وشعرها قصير.جانت مروة رشيقة وطويلة
باوعت لمريم وضحى كاعدات يمها عالقنفات
مريم تاكل لفة
وضحى لازمة كتابها وحاطة طرف القلم بين شفايفها
وتقرة

مروة.. تعاي شومة عندي موضوع مهم اريد احجي وياج واخذ. رأيج بي

.. شنو هو الموضوع كولي
.. بالحقيقة الموضوع يخص اختنا. ضحى

اباوع لضحى نزلت قلمها وباوعت على مروة
وكتابها بحضنها

.. اليوم. ظافر ابو ياسر حجة وياي وطلب مني ايد
ضحى.

يتبع

ياسمين:
#اساور_الفضة_ج٢
#نهى_الحسون
#البارت_ستة_وثلاثين

شيماء
الحقيقة كانت مفجأه لما مروة كالت
.. اليوم. ظافر ابو ياسر حجة وياي وطلب مني ايد ضحى.

كلام مروة كان شي غير متوقع
وانتبهت لضحى الي جانت نظراتها كلها حذر وصدمة

ضحى .. مروة صدك تحجين !!!!

مروة .. اي ظافر طلب ايدج مني وكال
خليها تفكر بالموضوع على راحتها وتاخذ وقتها لان هذا قرار زواج وارتباط

شيماء .. وهو مو يعرف بضحى دتمر بفترة صعبة
من المشاكل الي سوها سيف واهله ومخلفات الطلاق
يعني الي مرت بي والصار بيها مو هين

مروة.. اي وشنو يعني ضحى بعد متربطها اي علاقة بسيف وكلشي انتهى يعني تكدر تشوف حياتها. من اول وجديد. ومن حقها تكون عائلة خاصة. بيها وتبدي حياة جديدة وية شخص يستحقها ويعرف قيمتها

.. كلامج صحيح فعلا ضحاوي تستحق رجل يحتويها بعد الي شافته وعانته.
بس هي مصارلها هواي من اتطلقت.

مروة .. على كل حال الكلمة الاولى والاخيرة لصاحبة الشأن

التفتنا اثنينا اني ومروة وباوعنا. على ضحى
مروة .. شوفي ضحى والله اني لوما اعرف
بظافر رجال كفو صدكيني ما اجازف واحجي وياج
بس لان هو رجال متأكدة راح يصونج وما راح يظلمج لان يخاف الله

ضحى باوعت علينا وبعيونها نظرات حيرة وخوف وتردد.

.. مروة. ما اعرف شنو اكولج. بس فعلا فاجأتيني
يعني تصدكون اول ما ذكرت طاري الزواج
كلبي انقبض وجسمي ارتعد.
اني لحد الان احلم كوابيس بسيف اكعد من نومي مفزوعة وخايفة بعدني مناسية لوعة زواجي من سيف.

مروة .. حقج ومعذورة
بس يا اختي الحياة فرص والواحد مو كل يوم تجي
هيج فرصة بالحقيقة. ظافر رجال ما ينرفض

ضحى.. بالصراحة مروة كلامج صحيح
بس اني بعدني خايفة واحس بروحي ممستعدة اعيد ترجبة الزواج من مرة ثانية
اني حتى ما اعرف عنه اي شي

مروة.. شوفو بنات خلي اكلكم شغلة بخصوص ابوياسر

طبعا سبق وان حجيتلكم عن ابوياسر
شيكون مني وانتوا كنتوا شاهدين عالصار وياي حتى زوجي رافد الي هو زوجي
ما الجيء له. من احتاج شي
الكة روحي اتصل بابو ياسر

كان بالنسبة الي الاخ الي ماجابته امي
زوجته كانت هناء صديقتي و انتو تعرفون شلون وكفتلي بشدتي بعدما طلعت من بيت سليمة

وصادف اني سافرت وية رافد وهمة جانوا اصلا مسافرين قبلنا وهناك. التقينا
وصرنا مثل الاهل همة سند الي واني سند لهم
بس خطية هناء اتوفت بمرض خبيث وتركت وراها زوج متعلق بيها واطفال صغار ولد وبنية

ابو ياسر نقل عمله ورجع للعراق
هنا يم اهله لان ميكدر يدير امور اطفاله وهمة بحاجة من يعتني بيهم.
لذلك حطهم يم امه.

شيماء.. شكد عمر اطفاله

.. ياسر عمرة ٨ سنوات
وبنته اسمها جود. ٦سنوات

جان عمر جود ٣سنوات من ماتت هناء
شيماء .. هو شعجب ممتزوج طول هاي الفترة. من وفاة زوجته. لاتكولين بس شاف ضحى انعجب بيها

.. بالحقيقة المسألة مو مسألة حب. اني
اكلج بحكم العشرة ومن خلال معرفتي بظافر
اكتشفت ان من بعد وفاة هناء
ظافر صار يتهرب من عائلته ما يريد. يواجه
الم اطفاله او يشوف بعيونهم حزنهم وحاجتهم لامهم
لان هذا الشي يرجعه لنقطة الصفر

لذلك من رجع للعراق ترك مسؤلية اطفاله على امه.
وهو عايش عالهامش . ملتهي بالعقارات والقضايا الي يستلمها
عنده اهم شي يوفر ويأمن مستقبل لاطفاله

بحيث حتى ما مفكر يشتري بيت ويستقر بي هو واطفاله
يكول ليش اشتري بيت واني اصلا مكاعد يم اطفالي

فتشوفيه
عنده الواجب اتجاه اطفاله هو ان ما يقصر وياهم بالمصاريف
ويحطهم بارقى مدرسة ويلبسهم ارقى ملابس

هذا كل الي يكدر عليه لكن انتبهت عليه بخيل وياهم بالمشاعر
مو كرها بيهم وانما ظافر صديقي واخوية وايدي اليمنى مثل ميكولون
واعرفه كلش زين. يكره يورط مشاعره
مرات يكولي المشاعر نقطة ضعف الانسان
واحياناً تكسره وتلوي ذراعه وتذله. وتخليه تحت رحمتها
جان يقصد معاناته بعد وفاة زوجته هناء

جانت امه دائماً. تلح عليه طول هاي السنين حتى يتزوج
وخصوصا هو صار عمره ٣٤ سنة. يعني هم يالله يتزوج ويستقر.

حتى مرات امه تتصل بية حتى بلكي اقنعه
او اشوفله وحدة حلوة دكتورة او زميلة على معرفتي حتى
ادخل واسطة خير بينهم وازوجه لان تعرف بتأثير كلامي عليه
بس ظافر جان دائماً. يتهرب مني ومن امه

بس اليوم فاجئني من طلب مني ايد ضحى للزواج
معناها ظافر كدر يشوف بضحى الزوجة
الي جان يدور عليها الي تكمله ويشعر هي المناسبة له
فاني اكلج فكري زين وانطيني رأيج
انتي كبيرة وقادرة على اتخاذ قرارج وعلى راحتج وهاي حياتج
اني بالنسبة الي انطيتج كل المعلومات المهمة الي تحتاجينها

ضحى
مروة تحجي واني معدتي وكلبي واوضاعي كلها تخربطت.
حسيت بروحي ضايعة وحايرة
جاوبتها بصوت خايف

.. مروة انطيني فرصة افكر دخت والله

.. اخذي راحتج وفكري زين هاي حياتج وانتي
جبيرة. وتعرفين مصلحتج

انتهى موضوع ضحى عند هذا الحد تركناها تفكر براحتها

يوم ثاني الظهر
واحنا بالسيارة راجعين للبيت حتى نتغدة ناخذ وقت راحتنا
كلت لمروة عن بنت حيدر
وكالت عادي ما عندي اشكال بس انتي حضري
الادوات ال

لازمة عل

مود الفحص

اتصلت على حيدر الي جان صوته جدا مخنوك
وانطيته خبر حتى يجيب سرى اليوم للبيت عدنا

اتشكر مني سألته عنها. كلي
.. شيماء بنتي كلش مو زينة. نفسيتها صفر وخايف عليها.
ما اعرف شنو اسوي احس جرمت بيها
.. ميصير تحجي هيج
هذا قضاء وقدر انت مالك يد بي

..تصدكين اذا كلتلج من اسمع صوتج احس عبالك بلسم يداوي وجع كلبي

ارتبكت وانخبصت اول مرة بحياته يحجي وياي بصورة مباشر
.. احم اني مسويت شي هذا واجبي.

حتى ما عرفت شنو اجاوبه
والظاهر هو حس علية وعرف من خلال كلامي الغير
المترابط. استأذن. وسلم علية وانهى الاتصال

باوعت للنقال بيدي صافنة
وحطيته على كلبي ها هسة هم اكول هذا الكلام
وهم وعقلي كاعد يتهيأ. من وحده

وصلنا للبيت
ولكينا ضحى منتظرتنا دتحمي الغدة

سلمت علينا وكالت
.. ها اصب غدة لو انتظركم
جاوبتها .. اي والله ياريت تستعجلين
لان حيدر راح يجيب بنته لهنا.

.. يا ربي والله كاسرة خاطري هاي البنية
هسة شلون صارت
.. والله يكول مو زينة وكلش خايف عليها
.. الله يقويها ويصبرها

مروة نزعت حذاءها. وسترتها وكالت
.. اكول ست ضحاوي اليوم اكو واحد كل شوية
يتصل علية يحوم يريد يعرف جوابج

ضحى انگلب وجها احمر وجاوبتها بسرعة
وكالت .. مروة انتي مو كلتي اخذي وقتج وفكري براحتج
اشو البارحة حجيتي وياي واليوم تريدين الخبر
اني من غير كلشي الخوف والشك ماكل كلبي

ابتسمت مروة
.. اي والله صحيح كلامج.
بس شكل الاخ مستعجل يريد يعرف رأيج

ضحى استدارت وانطتنا ظهرها وشغلت روحها تصب الغدة
وكالت .. لعد خلاص اذا هو هيج مستعجل
اتصلي عليه و كليله البنية ماتريد تتزوج
خلي يدور وحدة ثانية مستعدة للزواج

مروة.. ههههههه والله انتوا ثنينكم فلم
هو الاخ مستعجل عليج انتي مو مستعجل عالزواج

تركت البنات يحجون بالمطبخ ورحت دخلت غرفة مشمش
ولكيت مريم كاعدة تحضر بجدولها مبين عليها
هسة راجعة من الدوام

باوعتلي وابتسمت
.. شلونج مريمة.
.. الحمدلله. هلة شومة
.. اكول مريم تكدرين تبدلين وتحضرين نفسج

.. اي اكدر
بس وين طالعين
.. منطلع لاي مكان
بس اريدج تجهزين نفسج علمود.
بنت حيدر الي حجيتلكم عنها. البارحة راح تجي اليوم
واريدج انتي بالذات تكونين موجودة
وتكعدين وياها حتى تتطمن من تشوف اكو وحدة بكدها
ومن عمرها.

خطية حالتها ووضعها كلش متدهور

مريم.. الله يساعدها والله حقها تتأذى
هذا هو شومة راح احضر روحي واحاول
احجي وياها واصادقها

ورة ساعة. بعدما خلصنا الغدى

دك نقال مروة والمتصل حيدر
يريد يعرف بالضبط اي بيت
مروة جاوبته وكالت
.. تدخل داخل الفرع رابع بيت على ايدك اليسرى.

اشرتلها حتى تكوله شيماء راح تطلعلك بالباب
كلتله وسدت النقال

مروة.. شيماء حظرتي الادوات والغرفة
.. اي جهزت كلشي

رحت عدلت ملابسي ولبست حفاية
وطلعت وكفت بالباب حتى ما يتيه
انتبهت لسيارته بينت من راس الفرع

احس كلبي انتفض وبدة. يهلهل بجيته
سحبت نفس عميق اهدي من انفاسي
ياگلبي ما بسك رجيف ما تثگل شوي
اتوقفت السيارة كدامي. وطفى السيارة ونزل.
سلم علية واستدار. ونزل. سرى. جان حاضنها تحت
جناحه.
باوعت عليها
جانت لازمة ايد ابوها بثنين ايديها وضامة راسها ورة كتفه
جانت تمشي على كيفها الظاهر كوة جاية

حيدر .. بابا سرى سلمي على خالة شيماء
رفعت راسها وباوعتلي بحذر خطية عيونها جانت حمر
يمكن جانت تبجي
همست بصوت ناصي مترددة
.. هلو خالة
ابتسمت
اتقدمت عليهم .. هلا حبيبتي سراوي
شلونج.

.. الحمدلله
.. تعالوا تفضلوا دخلوا. جوة

حيدر.. لا . خلي بس سرى. تدخل يمكم
انا عندي شغلة سريعة هنا قريبة عليكم. اكملها
وارجع
وانتوا حتى تكدرون تاخذون راحتكم

جان يحجي وعيونه بعيوني
عرفت بحيدر ديعاني ومحرج من الوضع
و فوك هذا كله يستحي يدخل ببيت غريب
وكله بنات مابي رجال

جاوبته حتى اطمنه
.. اخذ راحتك احنا اصلاً ما نحتاجك لان هي كعدة بناتية. ماكو مكان للرجال

ابتسم لي بأمتنان وهمس .. شكراً

جنا واكفين بالباب وجان تطلع الجنية مالتنة
ست مشمش هي وكصايبها

اليوم مسوية شعرها موديل افريقي مجموعة ظفاير ناعمة وحاطة قراصات ملونة اكيد هاي سوالف ضحى تموت على التسريحات

باوع لمشمش وابتسم على شكلها هي منا دنفوشة
وبيضة ورافعة راسها تباوع على حيدر وسرى
اني كبل عرفته

.. هاي الشحرورة مشمش بنت مروة اختي
حيدر.. الله يحفظها حلوة طالعة على خالتها

رفعت راسي متفاجئة واجتي عيني بعينه
ما انطاني مجال بسرعة التفت على سرى ورخة ايدها من. ذراعه
وهمس بأذنها. وهي رفعت راسها تباوع عليه وعيونها تتوسله.

عرفت هي خايفة ومتقبل يعوفها لوحدها يمنا
.. حبيبتي. سرى. لتخافين محد هنا
بس اني وخواتي وهنا امان واحسن لج
لازم تصيرين قوية. وتساعدين نفسج وتساعدين
ابوج حتى نصلح الوضع ونتطمن على صحتج

مشمش .. خالتوا شنو اسمها
.. سرى
.. سوغى شوفي شعغي. انتي عندج مثل شعغي

هههههههه اشتغلت مشمش
سرى هزت راسها بموافقة
.. اني عندي لعابة سو

يت شعغها م

ثل شعغي
انتي عندج لعابة
سرى هزت راسها ب لا

انتبهت حيدر بدة ينسحب من يمنا بهدوء
وكأنما استغل انشغال سرى وية مشمش.
سلم علية وركب سيارته وسرى التفتت مفزوعة تدور عليه
وعيونها اتسعت بخوف وهمست بصوت ناصي
.. بابا لا !!!
اني سبقتها ولزمتها من ايدها بهدوء
ومشيت اني وياها ودخلنا جوة واحلى شي مشمش
لازمتها من ايدها الثانية

وتحجي .. لتخافين احنا ما عندنا عاوعاو
بيت عمو نوفل عندهم عاو عاو

خطية تقصد على الكلب مال الجيران
سرى تباوع عليها بس وجها جان جامد خالي
من الحياة
دخيل الله هاي البنية شكد مكسورة
يعني مبين الصار بيها مو بس سلب طهارتها وانما. سلب منها حتى الحياة

دخلت جوة للاستقبال وجانت مريم وضحى موجودات
رحبوا بيها بدت اكتافها المتشنجة تسترخي
وكعدت عالقنفة انتبهت لكعدتها كانت مايلة

غمضت عيوني بقهر ربي الطف بحالها وبحال كل بنية
توكع بهيج مصيبة

تركتها يم البنات بالاستقبال. ودخلت جوة اصيح لمروة
لكيت مروة كاعدة عاللابتوب
وبيدها نقالها دتحجي معصبة

اتوقفت انتظرها تخلص مكالمتها
اسمعها تحجي
.. على يا اساس يرفض يوقع عالطلاق
سكتت تنتظر الطرف المقابل يحجي
شوية وجاوبته .. افتهم بس احنا اتفقنا
على ايام زيارته لبنته مرتين بالشهر
وبيتي يجي يشوفها. مياخذها وياه لأي مكان

شوف استاذ. ارجوك توصل هذا كلامي لرافد
وتكله لا يظل يماطل بسالفة الطلاق
صدكني مو من صالحه
خلي يحمد ربه ويشكره اني اتنازلت عن حقوقي
وحقوق بنته ولو وحدة غيري

تاخذهم من عيونه. ومصرف مشمش ياخذوا من راتبه مثل الورد
بس اني حبيت احل الموضوع بشكل ودي
بدون مشاكل بس اذا هو يفكر بهيج شي
خلاص ما عندي مانع ارجع افتح القضية من جديد
واطالب بحقي وحق بنتي وخلي يراويني شنو هو يكدر يسوي

اتوقع راتبه يادوب يكفيه هو وست فاتن
صلوات شلون اثنين ما يحبون يصرفون

شوف انت كله هذا ردها وشوف هو شنو راح يجاوبك
وبعدين اتصل علية. وكلي شنو جوابه

لحظات وانهت الاتصال وهي تسب وتغلط
بعصبية
.. ها مروة شبيج
سدت اللابتوب حيل وكامت من مكانها وكالت
.. بعد. شبية. اكو غيره. استاذ رافد العكرة
وقضية الطلاق

.. هسة شنو الي استجد هو مو على اساس موافق
.. اي واتفقنا على كل شي بس من وصلت للتوقيع
اشو هذا. كام يتهرب. ويماطل ما اعرف شنو نيته
بس صدكي ما راح يكدر يسوي اي شي

لان القانون وحالتي المادية كلهم بصالحي
يعني اكدر احط بدال المحامي عشر في سبيل اربح القضية
هو بعدما اتزوج فاتن. وحطلها شقة وفرشها لها الله يعلم شكد كلفته

لان هنا الاخت صرافة تلافة. وهو ممتعود. ان يصرف
على مرة خلي. شوية يجرب غيري ويعرف خيري

والله همة بالحقيقة لايكين على بعضهم اثنينهم
تافهين
انقهرت عليها جانت تحجي وترجف من الغيض
ياربي حقها اكيد زوجها وتغار عليه ومطعونة بالظهر
يعني خيانة زوجها وغدر صديقتها بوقت واحد

حجيت اذكرها
.. مروة حبيبتي. خطية بنت حيدر اجتي هنا
وتنتظرج
مروة غمضت عيونها بصبر ومسحت وجها بكف ايدها

وكالت.. روحي يمها علما. اغسل وجهي لان احس النار تريد تطلع من راسي
تركتها ورحت للاستقبال يم البنات لكيت
ضحى مقدمتلها. عصير وكيك
ومشمش جايبة الايباد. وكاعدة يم سرى وتراويها

ابداعاتها الفنية ومريم كاعدة يم مشمش وكل شوية
اسمعها تسألها عن دوامها بس المشكلة سرى متتجاوب

جان وجهة اصفر
صحت لمريم وضحى وكلتلهم ياخذون مشمش ويطلعون
خلي اكعد احجي وياها. قبل لا تجي مروة
وتفحصها.

سرى مكبوتة. ومخزونة. اني متأكدة لحد الان محجت بالصار وياه البارحة
لاي واحد لان. ابوها فضل
ان الموضوع ما ينذكر ولا ينحجي بي

فشي اكيد هي التزمت الصمت من باب الخوف وهذا الشي يأثر على نفسيتها.

رحت كعدت يمها. وسألتها
.. سرى حبيبتي اتمنى نصير اني وياج صديقات
باوعت علية بس مجاوبت

رجعت كملت كلامي .. طبعا اني اعرف الشي الصار بيج كلش صعب
بس انتي لازم تحجين الي بكلبج
وتفضفضين حتى تساعدين نفسج تتجاوزين هاي المرحلة

ثقي بالله راح تشوفين من تبدين تحجين
خوفج راح يبدي يقل

سرى
ارتعد جسمها و همست بخوف
.. خالة والله اني مسويت شي
بس همة يردون يذبحوني

حجيت وياها بكل هدوء غايتي اطمنها
.. شوفي حبيبتي اريدج تحجيلي كلشي من البداية واخذي راحتج
هنا محد راح يكدر يأذيج او يسمعج غيري اني

باعت ريكها واسترخت وبدت تحجي
.. خالة اني بصف الثالث متوسط
عندي خوان اثنين اصغر مني واحد بالاول والثاني
بالرابع واني اكبرهم
من يوم راحت ماما وعافتنا

جاوبتها بحزن.. الله يرحمها

باوعت علية وكالت .. ماما مو متوفية
وكلتها مستغربة
.. اي بس انتي كلتلي بذاك اليوم ماما متوفية
.. بالحقيقة ما احب اكول لاي واحد ان امي عافتنا وراحت.
ما تريدنا لا اني ولا اخواني

اتذكر جان عمري ١٠سنوات واخواني جانوا صغار
من كعدنا الصبح ما لكينا امي بالبيت
ما نعرف شنو سبب خروجها من البيت
وبابا فضل السكوت ورة فترة. سمعنا بابا وماما اتطلقوا
وماما اتنازلت عنا وراها بفترة ب

سيطة

سمعت م

ن عماتي ان امي اتزوجت وسافرت للخارج
راحت وية زوجها بدون ما تفكر او تحاول تتصل وتسلم علينا
بوكتها عرفت ان امي هي الي باعتنا.

ماما من اقارب بابا جانوا عايشين بالناصرية
بس مركز شغل بابا هنا ببغداد لذلك اشترى بيت
بنفس منطقة عمو مثنى.

وانتقلنا اني وبابا واخواني. لهنا.
وبابا اثث البيت ونقل مدارسنا اتذكر جان عمري
١٢ سنة احنا بالناصرية جنا عايشين وية بيت جدي
سوية. وعندي عمة اخت ابوية جبيرة بالعمر. عانس ممتزوجة

بابا طلب منها تجي تسكن ويانا هنا بالبيت
حتى تدير بالها علينا
بالحقيقة هي مكالت شي. عادي عندها. وصدك
ما قصرت ويانا ودارتنا عبالك اولادها

قبل اربعة اشهر عمي منصور الي بالناصرية
خطبني لواحد من ولده
بس بابا رفض وكله. بنتي بعدها صغيرة اريدها
تكمل دراستها وتاخذ شهادتها

صارت مشاكل بين عمامي وجدو وبابا
بس عمو مثني الي ساكن هنا قريب من عدنا
ساند بابا وكله زين تسوي.
اما البقية شنو الحرب

اني جنت كلش فرحانة بقرار بابا لان فعلا اني
بعدني صغيرة وما مفكرة بالزواج

قبل اسبوع جدو وعمامي اجوي لبغداد علمود
فاتحة مال واحد كرايبهم ببغداد اجوي يعزون اهله.
ويقرون الفاتحة ويرجعون.

سكتت واتسارع نفسها.
وبعدها كملت وهي ترتعد
.. البارحة. جان جدو وعمامي كلهم مجتمعين ببيت عمو مثنى.
وعمتي صمود كالت قبل لا اروح للمدرسة
اني اليوم رايحة لبيت اخوية مثنى خاف تطلعين من الدوام.
راح اضم المفتاح جوة الكابينة مالت الكهرباء بس مدي ايدج واخذي

بعدها داومت وخلصت دوامي مثل كل يوم
وصلني السايق يم الباب ونزلت وسلمت على صديقاتي
ورحت عالباب الرئيسي مالت الشارع
ودنكت ارفع قلم الباب من جوة الباب وادفعه وينفتح
احنا متعودين نفتح بابنا هشكل

دخلت وسديت الباب وراي ومشيت
ونفس المكان لكيت المفتاح جان الوقت بال ١ الظهر
فتحت باب الهول. ودخلت والتفتت حتى اسد الباب وراية
ما حسيت الا على ضربة اجتي على وجهي

وبعدها ما اتذكر اي غير مقتطفات من الي صار ان
الحرامي جان خافي وجهه تحت قناع صوف اسود
وطالع بس عيونه. همة ثلاثة الي ضربني. مسوالي شي
ربطني وحطني على صفحة
بعدها كامو يفتشون بالبيت وكل شوية يسألوني وين ذهبكم ووين فلوسكم

بس سؤالهم كان كله ضرب وية كل سؤال يضربوني
جنت مرعوبة دليتهم على كلشي لان خايفة منهم

بس واحد منهم عينه جانت علية من يضربني
جان يتلمسني القذر واحد منهم بعده عني ونتر بي
عوفها احنا جيين نبوك ما جايين انأذي عرضهم

اتعارك وياه وكله انت ما لك دخل انا المسؤول عنكم
مو انت تعلمني. همة يحجون واني كلبي يريد يوكف من الخوف.
بعدها حجة الثالث وجر الولد الي دافع عني
وكله تعال خلي نلكة طريقة نفتح بيها القاصة

وهو خلي براحته هسة هي قابل اختك امك
سحبه وراه وذاك يكله. اي بس احنا ما اتفقنا على هيج شي

جاوبه وكله مالك دخل هو يعرف شنو يسوي
مع الاسف ذاك الولد راح وياه ودخلو للغرفة الي بيها القاصة
والشيطان جرني من شعري ودخلني لوحدة من الغرف
حانت غرفة اخوية حسام
وهناك قضى على حياتي هناك روحي حسيتها فارقتني
وصرت بس مجرد جسد

بعدها ما اعرف شنو صار
لكيت بابا وعمامي وعماتي كلها تصيح
جنت خايفة اباوع لبابا كام يتدافع وياهم حتى
ما يوصلوني.
عمي الجبير يكللهم .. اكيد هذا صاحبها مدخلته
للبيت وباگ كل حلالك والله اليعلم بعد شسوالها

وعمي الثاني كال .. هاي لازم نذبحنا وندفنها

وعمي مثني عاط بيهم وكال
.. انتوا صدك جذب تحجون شبيكم
ولكم خافوا ربكم هاي طفلة وينها وين هالحجي

وبابا تركهم يتصايحون وية عمي
ولفني بالغطى لان وجهي كله دم من الضرب
وحدة من عماتي الي اجوي وية جدو للفاتحة كالت بالله خلي نفحصها
بس بابا عاط بيها وكللها بنتي راح تروح من ايدية

رايح اخذها للدكتورة. وهي تشوفها
وبعدها بابا جابني الكم

اباوع عليها وجهها شاحب وتحت العيون سواد
والدموع تجري

لميتها لحضني وحجيت
.. بعد كل الي سواه ابوج علمودج. المفروض انتي
توكفين على حيلج وتساعدين ابوج حتى يكدر يواجهم
ويسد حلوكهم الي راح تدنس سمعتج

انسد الباب والتفتنا لكينا مروة ولازمة بيدها الادوات
وكالت
.. يالله هسة خلصتوا حجيكم لو بعد وراكم سوالف
جانت تحجي وتبستم

باوعت لسرى وحجيت
.. ها حبيبتي هسة مستعدة
هزت راسها بالموافقة بس الشفايف بعدها ترجف

ضحى
بعد مرور اسبوع على موضوع طلب ظافر
ومروة من اخر مرة حجت بي بعدها مفتحت الموضوع وياية

واني لازلت ادرس بالمعهد
وبيت سيف انقطعت اخبارهم
عني وحتى ايمان مرت حماية
انقطعت عني اتصالاتها
خلصت محاضرتي اليوم
وطلعت من المعهد

اليوم ما عندي بس كيميا
طبعا من قبل جنت ارسب بس بالكيميا
كلش صعبة علية صحيح وكعت بخمسة
بس اكبر علة عندي بالدروس هي الكيميا.

جنت امشي واني اراجع الدروس الي مسيطرة عليهم
والدروس الي ضعيفة بيهم جنت خالتهم اقراهم وية البنات
وجان توكف سيارة بصفي وينفتح الباب وينزل
منها ظافر

اتوقفت عن المشي متفاجئة بوجوده
اقترب علية وكال بدون. م

قدمات
.. حجيت

وية مروة وطلبت منها
احجي وياج لوحدنا. وبراحتنا

احنا كبار ولازم نكعد ونتفاهم واحجيلج الي عندي وانتي تحجيلي شروطج

احلى شي هو يحجي وفتحلي باب السيارة الكدام وينتظر مني اصعد وياه

باوعت عليه وكلت
.. انت شكد واثق من نفسك اصعد وياك

.. الظاهر ناوية تطولين بالعناد

طلع نقاله واتصل على مروة وحجة وياها وكللها
ممكن تحجين وية اختج العنودية
تصعد وياية بالسيارة اوصلها للبيت
يالله راح افتح الحاكية وانتي احجي وياها

فتح الحاكية وسمعت صوت مروة
.. الو ضحاوي تسمعيني
.. اي اسمعج
.. حبيبتي. اني كلت لظافر يمر عليج بالمعهد
وياخذج يوصلج للبيت وبالطريق تحجون وتتفاهمون وحدكم
انتوا كبار اتمنى تنطين فرصة وتسمعيه
همست بصوت ناصي.. ان شاء الله
بس من هسة اكول جنت احجي واباوع عليه

اي كلمة زايدة. كبل انزل من السيارة
مروة ضحكت وكالت .. ابو ياسر
خف السانك عن اختي.

ظافر.. هو انا اكدرلها ام راس اليابس
انهى الاتصال بعدما ودع مروة

باوع علية وكال .. تفضلي ترة صدكي انتي بأمان يمي

ما حجيت شي فتت من يمه وصعدت. بالسيارة
وكعدت
استدار وصعد بصفي وشغل السيارة وساقها
التفت باوع علية جلى صوته وكال

.. شوفي ضحى انا اعرفج من زمان من جانت مروة تحجيلي عنكم انتي وخواتج
وعن مشاكلكم

وبأخر فترة بعدما اتطلقتي
مروة جانت دائما تحجي بيج خصوصا من استقريتي يمها واستلمتي بيتها
تكول هواي امور اتغيرت ببيتها نحو الاحسن
جانت دائماً تكول انتي اكثر وحدة بخواتها تشبهين امكم
حلوة ومسالمة واجتماعية

المشكلة اختج مروة جانت تحجي
يم شخص مينسى اي اشي
بحيث من صار سوء الفهم
واتصلت علية مروة وكالتلي على الاشكال الصار.
وعرفت ان الي حجيت وياها اختها ضحى مو الخدامة.

بيومها صدك ضحكت من كل گلبي.
وانا اتذكرج شلون عبستي وجهج علية
ولا والاقوى منها
جوابج الي ok

يعني حتى محاولتي تكليلي منو انتي
عرفت بوكتها انتي بنية مسالمة ومتحبين المشاكل
وخجولة

ومرة الثانية الله كتبلنا ان نلتقي ونحجي
بسيارتي لبيتكم وبيومها صرت استفزج بالكلام
واحجي ويج وتجاوبيني وتهدديني بأختج مروة

جنت اشوف كدامي طفلة تحاول تبعتد عن المشاكل
وصرت اراجع كلام مرة عنج واطبقه على البنية الكاعدة كدامي

حاولت ان ما ادقق على الموضوع
بس غصب عني الكة روحي متمدد بالليل عالسرير
وانتي تجين على بالي
صرت من اسمع بمروة تكول ضحى نفسها بالطبخ يجنن
كبل اذكر نفسي واكول انا ما عندي مطبخ

وبعدين انتبه على روحي وشنو دخل المطبخ بكلام مروة عن اختها.
حاولت اجذب روحي واوهم نفسي

مرات مروة تكول ضحى هي المسؤلة عن مسواك البيت واحتياجاته
كبل اسأل نفسي انا ما عندي بيت بي احتياجات

وصارت كلمات تجيب سيرتج اكون
كلي اذان صاغية واقارن حلي بالاشياء الي تسويها
لحد اخر مرة بموقف الكلب
هنا ادركت اني معجب بأخت مروة من زمان
ووكعت بحبها من يوم الي شفتها
وحبها كام يزيد كل مرة التقي بيها

انا سبق ان كلتلج انا صريح ومباشر ما احب الف وادور.
اعرف شنو اريد من المقابل
بس بنفس الوقت اتمنى المقابل يصارحني ويكلي شنو يريد مني
حتى اكدر التقي وياه بنصف الطريق وافهمه ويفهمني

هو جان يحجي واني عقلي وكلبي وفكري متأهبين
ومستعدين لكل كلمة يكولها ظافر
صرت احلل واعاين وادقق منا لحد ما خلص كلامه
استنتجت ان هو رجل حازم يعرف شنو يريد
يفكر بعقله حتى حبه بعقله
والاهم من هذا كله اكتشفت
ان هو يريد يتزوجني لان يحترمني

باوعت عليه وكلت
.. اني بالحقيقة اجذب عليك اذا اكلك ما خايفة
من فكرة الزواج بس كلامك وياي طمني
بس عندي شروط اريدك تسمعها

.. كولي شنو شروطج
.. اريد امتحن سادس خارجي واقدم على كلية
اكمل دراستي

.. ما طلبتي غير حقج تاخذين شهادة السادس
بس الكلية تكمليها ان شاء الله ببيتي
وانا اقدملج بنفسي على كلية

ابتسمت على سهولة موافقته اتوقعت راح يبقى يماطل
حتى يقنعني
من شاف ابتسامتي نورت وجهي
هوضحك وكال .. يعني نكول مبروك عالخير

زادت ابتسامتي ودنكت

هدى
مر على حملي اربع اشهر
واني هسة حاليا بعطلة نصف السنة
قاسم ممقصر وياي خالة والبنات الحمدلله زينين وياي

انتبهت لقاسم انلغت عنده فقرة سهرة الخميس
طبعا اسمعه مرة يحجي وية صاحبه
يكله كبرنا على هاي السوالف

جنت كلما اصلي اندعي من الله ان يهدي الي
ويبعده عن هاي الاماكن
بس بقت فقرة الكوفي والاركيلة.
مستمرة عنده. ما كطعها لان همة
جماعته كلهم بالكوفي.

اليوم محضرة لقسومي مفاجئة
اليوم عيد ميلاد زواجنا بالحقيقة هو ما يهتم ولا ينتبه
لهيج مناسبات على كولته غير عيد الام وعيد الاضحى وعيد الفطر.
ما انطي فلوس وهدايا
لو تنكلب الدنيا.

بس بقت هاي الامور علية اني الي لازم اعلمه
عليها
مثل ميكول ابو. المثل
رجلج على ما تعلمينه وابنج على ما تربينه

حضرت الغرفة و بخرتها وحضرت الكعدة العربية

وسفرة اليوم عزمته عالعشا بالطريقة العربية
كعدة بالكاع طبخت المطبك وشويت الدجاج
طبعا مو هنا المصيبة

المصيبة من اطبخ

واسوي حلويات
مو بس النا اني وقاسم
لا لازم الفريق كله. اسويلهم
ونوب حمواتي الي بالمحافظات جايات هنا عدنا خطار
فاطمة وسرور ومنى وكوثر وجهالهم

هذولي كلهم لازم اسوي على عددهم
حلويات وعشا
ما احس الا ظهري انكسر وهالة تحوم فوك راسي وتدردم.
هالة .. عمي والله الج خلك.
انا من اتزوج. اخلي هو يجيب اكل جاهز وداعتج
الا اطلع كراب ام قاسم كله من عيونه

هدى.. اي مو عوبة لعد شلون غاح (راح) يحس بالفغق (بالفرق)
بوجودج وعدمه. غيغ (غير) نفسج بالطبخ موجود
هاي من بالاضافة انتي تعغفين (تعرفين) هو شنو يحب وما تدوخينه
بهاي السوالف غوح (روح) جيب وودي

هالة .. ترة هذا بس زوجج هيج حقنة وصعب
بس اني زوجي غير

ضحكت على شكلها
.. هو وينه خلي يجي بالاول و بعدين كعدي اتحلفي بي
.. هانت ما بقى شي ونحصل الحلو
.. اشو كلشي ماكو من يجي عزومي اشوفج بس تكمزين من مكان لمكان
عبالك قغدة (قردة) تايهة

اول ما يدك الباب وتشوفيه بالكاميغا تغكضين (بالكاميرا تركضين )
تفتحين الباب

وبعدها تغوحين (تروحين) تنطيه جاي لو ماي
ومغات (ومرات) هشام يخغب (يخرب) عليج
و يشحتج من يمهم حتى ما تلحكين تشوفيه
زين تعالي تغة (ترة) الشوف لوحده ما يجيب نتيجة

هالة .. يااختي الله وايدج. علميني
لان اني ما عندي
غير بس طريقة وحدة هي ازرع روحي كدام عينه
واعدل بنفسي والبس احلى ما عندي
هذا كل الي اكدر عليه

لج مرات من ادخل عليه فجاءة بالاستقبال
يكمز خطية او افتحله الباب اكون راكضة طبعا

واطلعله الهث عبالك كلب بوليسي وشم ريحة المطلوب وراح يركض عليه
وهو يظل يباوعلي بحذر ويضيك عيونه هاي شبيها شدتحس

.. عزة بعينج يا هالة شمسوية بي خطية
على هاي الحسبة معناها انتي مفززته للولد. ومسوية بي خوفة.
وداعتج اكص ايدي اذا مو فد يوم. تقضين على المسكين
بوحدة من طلعاتج يهبط عنده السكغ (السكر)
لو مسوية. بي جلطة. ما اتسمى هدى مغة (مرة) قاسموف

.. هسة شلون شسوي فهميني الرجال راح يطير من بين ايدية

رحت للفرن فتحته اشوف الدجاج
رجعت سديته
.. هسة غوحي (روحي) من كدامي. خليني افكغلج بطغيقة (افكرلج. بطريقة )
نجيب غاس (راس ) عزومي بيها

هالة .. اكول وين جهال خواتي اشو البيت هدوء
رحت اكلب بالتمن
.. اخذهم هشام كلهم يشتغيلهم (يشتريلهم)
حلويات وكال اجيب ايس كغيم(ايس كريم)

هالة .. عاااااااا ليش ما اخذني وياهم.

طلعت من المطبخ الحار فرت روحي من حرارة الطباخ طلعت بالحديقة. رحت كعدت بالمرجوحة
دائما انتظر قاسم بالمرجوحة. من يجي افتحله الباب
وهو اتعود بحيث اذا يجي وما يلكاني افتحه الباب
كبل يسأل عني
ابتسمت واتلمست بطني اباوع عليها شوية دتبدي تكبر

شوية ورجعتلي هالة تتمايله بحركات راقصة عاشقة مثل اغنية (انا قلبي دليلي. قلي حتحبي )

.. ها خير شكو انتي كل شوية
جايتني بسالفة

هالة .. لج هدى عزومي حبيبي هنا في بيتنا
.. يا صدك يعني هو الي دك الجرس قبل شوية
.
هالة واكفة كدامي واني كاعدة عالمرجوحة
.. هسة هو وين
.. دخل جوة بالاستقبال اتصل على هشام وكله فوت انتظرني جوة انا ما اتأخر هسة جاي بالطريق

.. ياعيني. ياعيني. اشوف ليلى مراد. دتغني

هالة .. عليج الله هسة مو كفر بعينه هذا
والله حرام. حبيبي كاعد لوحده بالاستقبال
لا انيس ولا ونيس
هيج كون هسة مال ادخل عليه. واكله
حبيبتي عزومي. اني احبك وما انطيه مجال
يحجي كبل. اخمطه ببوسة اطلع حركة كلبي كلها بيها

اني اضحك على سوالفها
.. الله يلعن بليسج. يعني اني كلتلج اعترفيله بحبج
مو ترحين تهجمين عالولد

هالة بتصنيف .. يا اختي انا هذا طبعي ما عندي حل وسط حامية.
لو توكلني وتشبعني لو تضربني وتوجعنب
يعني اكوم او لا اكون.
لج. ااااااااخ ونوب اليوم. لابس تشيرت مشمشي
جعلني تشيرته. واحضن عضلاته
اااااوووووف

.. والله انتي مخبلة مو عاقلة
.. والله ياريت مخبلة.
جان على الاقل ما علية عتب اروح ادخل عليه
بالاستقبال
واغنيله
(مافيش حاگة تگي كيدا اهيدى حبيبي كيدا.
وارجع زي زمان.
يا ابني اسمعني اتدعلني تاخد عيني كان )

وبعدها اجره من ياخة التيشيرت. وارجع اخمطه
ببوسة كون اخلي ينسى حتى اسم امه

انتبهت على حركة ورة هالة. باوعت وشهكت وحطيت ايدي على حلكي مصدومة

عزة بعيني هذا عزام وواكف يم باب الاستقبال
وحاط النقال على اذانه. وفاتح حلكه
واكف متصنم وعيونه على هالة
الي منطلقة بالسوالف

بلعت ريكي ووجهي كام ينطي الوان اريد اسكت هاي المفضوحة
حجيت من بين اسناني
.. هالة كافي انلصمي وسدي حلكج فضحتينا

هالة.. على شنو اسكت
هسة قابل اني راح اروح اهجم عليه
هو حلم يا اختي خلينا نحلم لو حتى الحلم
تمنعونا عنه

ياعزة هاي زادت ما نقصت كمت من المرجوحة
اريد اروح اسكتها واكللها
هي شافتني

كمت وجاي عليه. ضحكت
.. هههههه خرب هد علينا . نيلز
خلي نشرد
دارت وجهه تريد تنهزم من عندي وجان

تشوف عزام واكف وراها بباب الاستقبال
اباوع لهالة جمدت بمكانها
لحظات وطكتها ركضة سريعة م

ثل وشة السيارة من

تعبر وششششششششش

اباوع لعزاع ارتبك من شافني ودنك راسه ورحع يحجي بالنقال.

دخلت للبيت ادور على هالة
ماكو ما لكيتها هاي يمكن صعدت فوك
يا ربي والله فشلة. اني من يمي. صرت بنص هدومي
زين هاي المكرودة شلون بيها

دخلت للهول يم خالة وحمواتي لكيت خالتي
تحجي بالنقال ووجها اصفر
سمعتها تكول
.. خالة رائد هذا شوكت صار الحجي
وهسة قاسم وين

يمة صخام شنو اتعاركوا بينهم. كامت من مكانها
وصارت تحوم بالهول
اني مجرد ما سمعت اسم قاسم بالسالفة كلبي وكع
يعني قاسم متعارك زين رائد شنو دخله

ام قاسم .. بس كلي ركب سيارته ووين راح
يعني هو كلك انا رايح للبيت
سدت النقال وباوعت
فاطمة. يمة شنو شصاير قاسم شبي

ام قاسم دتحجي. وجان يندك الجرس
عافت البنات وراحت للباب. واني وراها بس احس بكلبي صار بين رجلية من الخوف

باوعت من الكامرة لكيت عزام فتح الباب لقاسم
ودخل قاسم وبعدها وفات للمطبخ

جان وجهه احمر وركبته مشخوطة مجروحة
حجة بصوت هز اركان البيت وكال

.. يمة. انا صاعد فوك جيبي هديل وتعاي صعدي وراي

يتبع

ياسمين:
#اساور_الفضة_ج٢
#نهى_الحسون
#البارت_سبعة_وثلاثين

هدى
دخل علينا قاسم وجهه ما يتفسر من الغضب

جان وجهه احمر وركبته مجروحة
مبين من شكله جان يتعارك
حجة بصوت هز اركان البيت هز. وكال

.. يمة. انا صاعد فوك جيبي هديل وتعالي صعدي وياها وراية

اشوف خاله. تغير شكلها من الصدمة وانخطف لون وجها

راح عبر خواته
وهنة راحن ركضن وراه
يريدون يفتهمون منه شنو القضية
بس هو مو بحالهم. راح صعد فوك

جان يصعد الدرج يهزه هز
ام قاسم .. كلولي وين هديل
منى.. فوك بغرفتها وية هالة

راحت ام قاسم صعدت الدرج والبنات وراها
الكل مصدوم من الموقف ويسال نفس السؤال شنو الصاير

التفتت على بناتها وكالت لحد تصعد ورانا اخوكم معصب مااعرف شبي.
صاير نار كبرة خلي اصعد وافتهم شنو السالفة
شمصخمة اختكم

عافتن وراحت صعدت فوك
اني كبل رحت طفيت الاكل والفرن طفيته لان خلص الشوي

ورجعت مرة ثانية عليهم اشو ملكيت ولا وحدة جوة

اكيد. الكل. صعدوا فوك حتى يتسمعون
واني هم رحت وراهم. صعدت اريد افتهم حالي حالهم

وصلت للطابق الثاني واني الهث
لان ركضت صعدت على الدرج ناسية اني حامل اريد اعرف شصاير
باوعت عليهم كلهم متجمعات منتظرين يسمعون شي يشبع فضولهم

لحظات وطلعت هالة من الغرفة الي بيها هديل
طلعت هالة وتركت هديل وراها بالغرفة وسدت الباب
وعلى وجهها نظرات. التعجب والاستغراب

هالة تباوع على الوجوه
.. بنات شنو شصاير. قاسم وامي ليش يردون يحجون
وية هديل لوحدها بالغرفة

مني .. والله حالنا من حالج كلشي منعرف

فاطمة بصوت حازم .. احجي كولي
هاي اختج المايصة شنو عندها شمصخمة
هي اربعة وعشرين ساعة كارصة يمج بالغرفة معقولة متحجيلج شي

هالة .. قصدج اربعة وعشرين ساعة كارصة بغرفتها
من تحتاج مني شي تجيني

فاطمة.. الله يعلم شنو مصخمة هالحيوانة

كوثر حاطة اذنها عالباب
واتبعتها سرور
كوثر.. اشو كلشي مدا اسمع
سرور.. اي لان ديحجون بصوت ناصي.

اتذكرت الشموع والبخور العربي بالمبخرة
اهووووو خرب حظي راح تعبج ياهدى

تركت البنات ورحت لغرفتي
فتحت الضوة وطفيت الشموع
والبخور وفركشت الكعدة. بعدما شفت اعصاب قاسم
ما بيها مجال نحتفل الظاهرالسالفة مو مال احتفال

سمعت صوت خالتي تركت كلشي وطلعت من الغرفة
اريد اعرف شنو الصاير
لكيت خالة طالعة من الغرفة والباب ورة ظهرها مسدود

كانت تحجي وية البنات بحزم
وكالت
.. يله كدامي امشو خلي ننزل جوة
وخلي اختكم يم قاسم
هي جانت تحجي وتحاول تبين قوتها بس وجهها فضحها بصفرته

فجاءة سمعنا صرخة هديل الخايفة
وصوت قاسم الغاضب
شهكت بخوف عزة قاسم ديضرب بهديل

فاطمة اتجهت للباب تريد تدخل تفك اختها
ام قاسم لزمتها من ايدها وبعدتها عن الباب

.. وخري منا ولا وحدة بيكم تتدخل خلو اخوكم. يشوف شغله
يالله شو كلكم اتحركوا من كدامي امشوا نزلوا جوة

اخذتهم ونزلت جوة وتركت هديل وية قاسم لوحدهم

اباوع عالباب واسمع صوت
ضرب قاسم لهديل

وكلبي اجة يوكع من الخوف
جسمي من يمه كام يوجعني
مجرد سماع اصوات التعذيب جوة الغرفة
واستغاثة هديل وتوسلها لأخوها ان يعفوا عنها
ويرحمها وقاسم يردلها الكلام
ويكللها .. لج عار اش ولا كلمة ما اريد اسمع صوتج
اليوم ادفنج ومتفتحين حلكج

وبعدها سمعت صوت ردمة اخشاب
وصرخة هديل المفزوعة الخايفة
خلة شعر راسي يوكف
خالة والبنات نزلوا جوة. وسمعت ام قاسم

.. هدى يالله تعالي نزلي
انتبهت لروحي بعدني واكفة. مكاني كدام الباب

رحت نزلت وراهم واني كلبي يرجف من غضب قاسم
وضربه لهديل

لكيت خالة مغمضة عيونها بتعب
والبنات وحدة تباوع بوجه الثانية

ورة شوية دخل هشام والجهال وخبصوا البيت
وهشام اول ما دخل وباوع للوجوه

المكلبة سأل .. شكو صاير شي امي شبيها ؟؟
كامت منى وراحت يمه وحجتله بصوت ناصي
عن الصار

عكد حواجبه وكال .. وهسة قاسم وين
.. فوك يمها.
اتحرك اتجه للدرج
خالة صاحتله
.. يمة هشام عوف اخوك يأدب اخته
هشام.. اي يمة خلي يأدبها بس مو بالضرب
انتي تعرفين قاسم ضربته ضربة موت زلمة ما يتحملها
لا نوب يروح يسوي بالبنية شي

تركنا وراح صعد فوك ودقايق سمعنا صوت قاسم
ديطلعه هشام من غرفة هديل.
ويهدي بي. ونوب هشام صاح
.. هاالة تعاي صعدي فوك لاختج

كامو البنات اربعتهم
ام قاسم عاطت بيهم .. شنو خير هو صاح هالة
ما كال العشيرة

باوعت لهالة وكالت.. شوفي ترحين للناقصة اختج
وتكلليها اياني اشوفها كدامي والله ابتلي بيها
ما اريد اشوف جهرتها
هالة .. صار يمة
راحت هالة صعدت فوك

والجهال وحركتهم وهوستهم عبالك عايشين بعالم ثاني لوحدهم
بس باوعت للساعة جانت ب٨

وكلهم لحد هسة ممتعشين
كمت من يم البنات ودخلت للمطبخ
وطلعت الدجاج الشوي وكعدت افلسه
وضميت التمن البرياني بالثلاجة لان بعد الهوسة
الصارت ما اتوقع احد يشتهي ياكل برياني

وكعدت اسوي لفات
دجاج شوي فات من يمي زين. واخوه جواد
اسمع جواد يسأل زين

جواد.. اكول زيوني خالو قاسم ليش ضرب. خالة هديل
زين.. هسة تلكاها. ضامة ورقات ال

امتحانات

عن بيبي وخالو
بدون ما تعرف بيها بيبي

جواد.. لك زين حتى انت هسة راح تنبسط
لان انت دائماً تضم درجاتك عن بابا وماما

زين ركض حط ايده على حلك جواد
التفت منا ومنا خاف احد يسمعه
.. وكله. لك حمار لا احد يسمعك.
والله اسحلك. .....

كملوا كلامهم وهمة يمشون طالعين للحديقة

الله يلعنهم غير جهال وكحين
كملت اللفات ورحت صحت للجهال وكعدتهم بالمطبخ عالميز وانطيت كل واحد لفة

كعدوا ياكلون
واخذت صينية بيها لفات واكوابة جاي للبنات
وخالة دخلت للهول ووزعتها للبنات

ووصلت لخالة رفعت راسها وباعتلي وكالت
.. لا خالة ما اريد والله ما اشتهي العسل
حلكي صار مر

.. خالة ميخالف جبغي (جبري) نفسج حتى لو بس لكمة
حتى انطيج دواج لا يغتفع السكغ (يرتفع السكر ) عندج

فاطمة.. اي يمة صدك ووجهج صار اصفر
خالة مدت ايدها واخذت اللفة وكالت
..رحمة الله والديج خالة
تركتهم وعزلت عشا لقاسم وهشام

نزل هشام هو اللاخ وجهه ما يتفسر
سألته.. هشام اصبلك عشا
.. لا ما اشتهي اتعشا
.. قاسم وين
.. قاسم راح دخل لغرفته التفت على امه وكال
.. يمة انا طالع وية عزام

ام قاسم.. روح يمة الله وياك بس مو تتأخر
رحت انطيتها علاجها

كامت فاطمة وكالت انا صاعدة فوك يم قاسم
اريد افتهم شنو صاير اشو امي ضاربة الصامت متقبل تكول اي شي

راحت صعدت فوك يم قاسم
واني دخلت للمطبخ احضر العشا لقاسم
لكيت منى وسرور دينظفون بالمطبخ ويغسلون المواعين

ورة نص ساعة نزلت فاطمة
كوثر.. ها بشري شنو كلج قاسم
فاطمة عافسة الوجه

.. بعد قاسم وعندج الحساب مستحيل يحجي او يكول
اي شي شلع كلبي احجي وياه وهو ساكت. ووجهه
ميكصه السيف

سألته خوية احجيلي انا اختك الجبيرة
شاركني همك خلي افتهم شمسوية هاي الثولة
حتى اربيها الك. اعلمها غلطها

جاوبني وكال.. فاطمة سدي الموضوع
ميحتاج تربيها وتعليمها
رحمة لوالديج طلعي وعوفيني لوحدي

ونوب رحت دخلت على غرفة الحيوانة هديل
لكيتها ملعوب بيها طوبة وصايرة خركة
قاسم مجنزها. ولكيت هالة يمها دتبدللها ملابسها

باوعت لخالة وحجت بغيض
.. انتوا شنو سالفتكم انتي وابنج
محد يقبل يفهمنا شنو الصار وشسوت اختنا
ليش تحسسونا عبالك احنا مو خوات والنا حق
نتشارك وياكم

ام قاسم.. يا عيني هو قابل الموضوع بي فخر ونكعد نحجي بي
المصيبة ما تتسولف لا تنتظرين من اخوج قاسم يكللكم الصار
عوفوا الموضوع وخلو اخوكم بحاله ترة الي بي يكفي

تركت خالة وفاطمة ديحجون.
الله يستر هاي الغبية شنو مسوية
دخلت للمطبخ
وحضرت صينية العشا لقاسم وصعدتها فوك
مريت من غرفة هديل اسمع صوت انينها
بعدها دتبجي
وصلت لغرفتنا وفتحت الباب على كيف ودخلت
لكيت قاسم كاعد عالسرير مدنك وحاط راسه وبين ايديه

مثل الي يريد. يحميه من الانفجار
حطيت الصينية عالطبلة ورحت وكفت كدامه قريبة
عليه كلبي انعصر على منظره جان يتنفس بغضب

جان مستوى راسه بنفس مستوى
طولي. جان منظره يوحي بالانكسار

احس بكلبي انمرد على حاله اتمنيت امحي عن وجهه
هاي النظرة

اقترب عليه حطيت وجهه بين كفوف ايدية ورفعت راسه وقربت وجهي عليه
وهمست بصوت ناصي
.. اغفع غاسك ( ارفع راسك ) مو قاسم الينزل غاسه (راسه ) مهموم
انت عودتنا نشوفك جبل صامد ما يهزك غيح (ريح )

طبعت شفايفي على كصته
ولميت راسه لحضني
اتمنيت اسحب كل همومه ولا اشوفه هيج مخذول

جان متشنج رافض يخضع او يعترف
مرت فترة واني ضامته لحضني احاول احميه من نفسه

حسيت بقاسم بدة يستسلم ويسترخي بالتدريج
انتبهت عليه رفع ايديه ولمني بين ذراعه
دفن راسه بحضني مثل الطفل التعبان

وسحب نفس عميق
حسيت بحرارة انفاسه
الي جان مصدرها نار كلبه

همست.. قاسم لاتخزن يا حبيب الغوح (الروح) وحدك
شاغكني (شاركني) بوجعك وناغك (نارك)

حجة بتعب .. انصحج تبتعدين عني
وتتجنبين غضبي. لا يلوحج شرارة اعصابي
وتأذين نفسج وياي

.. لتخاف علية تغة (ترة) جلدي خشن يتحمل
لسعة السانك. اني زوجتك اذا مو اني الي
اتحمل ابو بيتي لعد منو الي يتحمله

رفع راسه واجتي عينه بعيني. ولازلت ايديه محاوطتني
وكأنما يلتمس مني الهدوء
غمض عيونه مثل الي ديصارع المه
وحجة بصوت مهموم وكال

.. ااااااخ لج شحجي وشكول
اختي بنت امي وابوي ربات ايدي
اليوم كسرت ظهري وشمتت بية عداي
خلت اليسوى والمايسوى يصير براسي رجال

اتسعت عيوني بصدمة لكن حاولت اتمالك نفسي وحجيت بكل غيض
.. ما عاش اليسكغ ظهغك (اليكسر ظهرك. )
ويغوحون (يرحون) لك فدوة لتغاب غجلك ( لتراب رجليك)

قاسم .. المشكلة الي غدرني مني وبية
ايمن ابن عمي محمد اليوم اجاني يكلي
الزم اختك وربيها وبعدها عن طريقي
دترسلي صورها وتستعرضلي وانا رزلتها بس ماكو فايدة
هي مصرة تبقى تراسلني وتضايقني .

يكلي اجيتك اليوم حتى تحطلها حد لان سكتت ما فيه الكفاية
القهرني جان يحجي وياي بالشارع
يعني حتى ما كلف نفسه يسوي حساب لسمعتها.

احمد الله واشكره جان رائد. وياي مو غير واحد
على الاقل رائد صاحبي مني وبية ما اخجل منه
وعر

ضه عرضي
ب

س بالرغم من هذا رائد من عرف شنو الموضوع
راح ابتعد ووكف على صفحة كلي راح انتظرك
بالسيارة علمود ليحرجني

.. اكيد هذا مو رجال ما عنده غيرة ولا ناموس
زين انت شنو سويتله

.. هدى انا مو غبي وما تعبر علية هيج سوالف
انا عابر علية اشكال والوان البنات
واعرف كلش زين
البنية ما ترسل صورها منا للدرب
اذا ما تشوف تشجيع من الطرف المقابل

انا ما ابرر لاختي اكول هي موغلطان
بس هو لوما منطيها مجال. وحاجي وياها

جان ما اتجرأت ورسلت صورها
مستحيل تسوي هيج لو ما كانت واثقة منه ومتجاوب وياها ومأملها بشي

.. كلامك صحيح وخصوصاً هي طفلة مراهقة
بسرعة تنجرف العتب عليه هو عشتوا دكتور
وجبير وفاهم

.. يعني اتخيلي اجاني بكل صلافة
يراويني صورها ومحادثاتها تارسة نقاله

شنو تتصورين راح تكون ردة فعلي. من اشوف اختي
تستعرض صورها كدام رجال ثاني
بلعت الصار وسحبت نقاله من ايده. وكسرته تكسر كدام عيونه
بحيث من حركة گلبي صرت اتصارع وية النقال
لحد ما اتكسر لقطع صغيرة

جنت اكسر واسب بأيمن واغلط
أيمن انطاني حجاية بالعظم اتمنيت ميت ولا سامعها
منه

ما اتحملت رحت هديت عليه واتفاجيء بهجومي
وانصدم اكثر من كلتله
.. انت اتجاوزت على عرضي. بسوايتك هاي
استغليت اختي واليوم الا اسوي عبرة لمن لا يعتبر

احس بروحي فقدت
رائد شافنة واجة اتدخل يفاككنا
جنت اعمى من الغضب.
كسرتي اليوم بسمعة اختي.
نفس كسرتي وقهري بوفاة ابوي
بالحالتين حسيت بروحي ضعيف وما كدرت احميهم

متحملت اشوف ضعفه . نزلت دموعي غصب عني
ولميته لصدري. واني اشهك

بقينا واحد حاضن اللاخ
جانت اثمن واغلى لحظة بحياتي

مجرد تنازل قاسم وسماحه الي اقترب منه
لهذا الحد واشوف واسمع ضعفه وكسرته
حسسني بأهميتي عنده. لدرجة هو رضى
يحجيلي ويشاركني بسره ومخاوفه بدون
حذر
بالرغم اعرفه كلش زين
كان دائما ينعزل بهيج مواقف ويبقى يكابر
ما يسمح لاي واحد يقترب منه ويشوف ضعفه

ابتعدت عنه وباوعت عليه واني امسح دموعي
.. شوف شلون نسيت صعدتلك العشا حتى تاكل

همس بتعب وهو ينهض من مكانه واتوجه للكنتور
.. ما اشتهي اكل. اريد بس اسبح وانام

ادري بي هو اليوم ما تغدة وما اجة عالغدة
.. اذا ما تاكل حتى اني ما اكل

.. هدى صدكيني مالي نفس اكل

سكتت ما لحيت خلي براحته
دخل للحمام واخذت الصينية نزلتها جوة
اهوو هسة شلون اكول لقاسم عن خطوبة ضحى
مروة كالت كولي لقاسم يحضر بالخطوبة

شيماء
مرت الايام
وحيدر كام يجيب بنته كل يوم لبيتنا
مو علمود مروة تشرف على وضعها وانما
هو لاحظ ان بنته بدت تتجاوب وتتغير شوية
لان اني اقترحت عليه ان يجيبها يم مريم ومشمش
وضحى حتى تغير جو وتبتعد عن كلام اهله

كام كل يوم يتصل علية بالليل بالبداية جان
يحجيلي عن سرى وشنو تسوي بالبيت
وشلون صار يراقبها بحذر. خايف عليها

وبعدها انتقلت المواضيع بعد تحسن وضع سرى الي مر عليها اربعة اشهر
وصار يحجيلي عن حياته. وشلون طلق مرته الاولى جان تقريباً يحجيلي عن كلشي يخصه

مرات اذكر نفسي واكول ميصير
اني مهمتي جانت تقتضي فقط سلامة سرى
ومالي حق اتوغل بحياتهم واعرف. بمشاكلهم
لكن غصب عني الكة كلبي يغلس علية وينصاع
للهفته لحب حيدر

وصرت كل يوم اعرف عن حيدر صفة جديدة
مجنت اعرفها قبل ويزيد من حبي له

وابتسمت واني اكتب اسامي المراجعين بالقائمة
اتذكرت مكالمة البارحة

جانت مختلفة عن كل المكالمات
البارحة حيدر. كعد يسولف وياي عن اهله
والاقوى منها من سألته وكلتله اني مرة سمعتك تحجي بلهجة
اهل الجنوب واتفاجئت بيك
لان ولا مرة سمعتك تحجي بيها

ضحك وكال .. ما استخدمها لان هنا مو الكل
راح يفهم علية لذلك احجي بلهجتنا بس من اكون وية اهلي
لان ابوية الحجي يضوج من احجي وياه بغدادي

ابتسمت واني اهمس
.. بس تدري اني مرة وحدة سمعتك تحجي بيها وجانت كلش حلوة بصوتك

سمعت صوت ضحكته وكال
.. جا ما دامج ترديني احجيلج بلهجتنا
تعاي وخليني. اسولفلج عن دليلي شلون ضامي
يرتوي بس من شوفت عودك الريان.

ضحكت .. والله حلو كلامك عبالك تكول شعر

.. بس انا جنت قاصد كل حرف كلته بذاك كلامي

اتذكر اول مرة شفتج بيها جنتي تبجين
ودموعج مالية. عيونج

جنت العن بكلبي الشيطان
واكول هذا ياهو الماعنده مخافة الله وهان عليه ينزل دمعتها
يعني بنات الناس خلصوا وبقت بس ريانة العود
تتلوع بحيرتها وتبجوها
من عساها ببخت كل من له يد بنزول دمعتها

اذا اكول هو يحجي واني كلبي يطرب عبالك ديغازلني
همست اريد اسيطر على دكات كلبي المتسارعة
.. حيدر هذا انت الي دتحجي وياية ؟؟؟؟

.. اي انا حيدر بذات نفسي احجي وياج.

سكت ورجع كمل كلامه
وفاجئني بكلامه
.. شيماء اريد اكمل نص ديني بيج.
اريدج تصيرين حلالي

كمزت من السرير ووكع النقال من ايدية
عزة باوعت للخط انغلق
ارتبكت وانخبصت احس كلبي يريد
يطلع من مكانه

لزمت النقال وصرت اباوع عليه انتظره
يرجع مرة ثانية يتصل علية
بس ماكو صرت احوم طول الليل بالغرفة افكر بكلامه وعيوني عالنقا

ل
وعقلي صار

كل شوية يعيد كلمات حيدر
معقولة اني سمعته صحيح لو عقلي شطح وصار
يخبص من يمه

انتبهت من صفنتي على كلام الموظفة بخصوص
الواردات
.. ست شيماء نزلت كلشي بالحاسبة.
اتمنى تراجعين القوائم انتي او ست مروة
حتى ابدي ادرجهم وية الملفات

.. اوك من ارجع. نكعد اني ومروة نراجع
هسة هاج اخذي. قائمة المراجعين
جنت احجي وية الموظفة ودخل رافد من البوابة الرئيسية للمركز
حارس امن بالبوابة

كام من الكرسي وحجة وياه. اسمعه يكله اني زوج الدكتورة مروة

والحارس لان جديد. ميعرف رافد طلب منه يشوف الهوية حتى يتأكد

اباوع لرافد عصب. شكله ممتوقع ان يعاملوا
مثل الغريب
طلع هويته وشافها الحارس وبعدها.
سمحله بالدخول لداخل المركز

كمت من مكاني اتجهت عليه
شافني وابتسم
سلم علية ورديتله السلام بصورة عادية
.. اكدر اعرف شنو سبب زيارتك

.. اجيت علمود احجي وية مروة. بخصوص الطلاق
وبنتنا.

.. اي بس هنا مكان عملها مو لائق تجي لهنا وتناقش اموركم العائلية
الافضل لو تخليها من ترجع مروة للبيت وهناك تحجون براحتكم

.. مروة رافضة اي تواصل بيني وبينها
متقبل حتى تحجي وياي. لذلك اني فضلت اجي هنا
واحطها امام الامر الواقع حتى تضطر تسمعني

شيماء اترجاج ان تساعديني وتخليني ادخل
واحجي وياها

سحبت نفس عميق والتفتت اباوع للمراجعات المنتظرات سراهم بالعيادة
حتى يدخلون لمروة
وكلتله انتظر لحظة خلي اشوف مروة

رحت دخلت لغرفة السكريترة
وبعدها تجي غرفة المعاينة مال مروة
دخلت عليها. جانت كاعدة. دتحجي وية المراجعة
وتكتب بالوصفة
مروة .. شوفي حبيبتي تستمرين تاخذين هذا المنظم خامس يوم الدورة. وبعدها .........

كملت كلامها وسلمت المريضة الوصفة وطلعت

مدت ايدها تريد تدك الجرس حتى تدخل المراجعة الي بعدها
وقفتها .. اوكفي مروة لحظة. بس احجي وياج
باوعت علية وكالت
..ها شومة كولي شعندج.

جانت تحجي وتكتب بالبطاقة معلومات خاصة بالمريضة

.. رافد اجة هنا ويريد يشوفج ويحجي وياج بموضوع كلش مهم.

اتوقفت عن الكتابة ورفعت راسها وباوعتلي
.. هذا من كل عقله ديحجي. جايني لهنا لعيادتي

انتبهت لمروة بدت تبين علامات الغضب عندها
.. مروة عفية لتعصبين. كولشي ينحل بالتفاهم
اني اختج الجبيرة وانصحج ان. تنطي فرصة
اسمعي وافتهمي شنو يريد منج بالضبط

غمضت عيونها بتفكير وكالت
.. طبعا هاي لخاطرج راح اتنازل. واوافق
اقابله. واحجي وياه

ابتسمت .. عفية عليج هاي اختي الي اعرفها.
درت وجهي واتوجهت للباب واني احجي
.. يالله لعد خلي اروح ادخله حتى يحجي وياج

مروة.. لحظة شيماء اني صحيح وافقت. اقابله واحجي وياه. بس ما حددت شوكت.
روحي كليله اذا يريد. يحجي وياي خلي ينتظر
اكمل شغلي وية المراجعات. وبعدين. اقابله

باوعت لمروة رحعت لبست نظاراتها الطبية
مدت ايدها للجرس وضغطت عليه. اشارة لدخول المراجعة
التالية

طلعت من عيادتها ولكيت رافد كاعد على قنفة متوسطة
صالة المركز مكانها مقابل الاستعلامات
جان كاعد وحاط رجل على رجل ولازم بيده مجلة يگلب بيها

شافني ونزل رجليه ورجع المجلة وكام من مكانه
يستفسر.

.. ها شنو كالت
.. وافقت تقابلك. وتحجي وياها
ابتسم بنصر وكال .. عرفت ما راح ينطيها كلبها
تردني
شفته اتحرك يريد يروح للباب العيادة

.. لحظة. رافد مروة وافقت تقابلك. بس بعدما
تخلص شغلها. ويرحون كل المراجعين
وانت براحتك تريد تبقى تنتظر او تروح
بعد هاي بقت يمك. انت صاحب الموضوع

اباوع عليه. عيونه اجتي تنط من الغيض والاهانة الي وجهتها له. مروة

من غضبه وعصبيته
عرفت ان هذا الرجل شكد مغرور. وشايف حاله
والمضحك عنده ثقة زايدة.بروحه يكول انا عرفت ما راح تكدر تردني

هدى
صار يومين على سالفة هديل
والبيت كلها اجواءه متكهربة

خالتي ارتفع سكرها. ونامت وسكنت غرفتها
وفاطمة وسرور. اخذوا جهالهم. وراحوا ببيت منى

علمود يفرغ البيت لان خالة تعبانة. وتحتاج هدوء

بقينا بس اني وهالة وهديل
هديل بغرفتها متنزل. والاكل هالة تصعده يمها

وهي كلها بكوم وهالة بكوم
هالة من بعد موقفها وية عزام الي اتزامن وية مصيبة هديل
من يومها اتغيرت عبالك مو هالة الاولية

جنت واكفة بالمطبخ اطبخ غدة. وما اعرف اصلا المن اطبخ
اشو لا قاسم ولا هشام ولا خالة ياكلون
وهالة. كامت تتجنبني ما اعرف ليش
حتى اكلها صارت تاكل بأوقات متفاوتة

باوعت عليها كاعدة لوحدها بالهول وتكلب بنقالها بملل
رحت كعدت يمها وحجيت بزعل

.. عوبة هالة شبيج صاغلج (صارلج) يومين تتهغبين (تتهربين) مني
وضايجة. زين اغيد (اريد) افتهم اني شنو دخلي بالصاغ (بالصار)

باوعت علية وعيونها ما بيها لمعة.
هالة .. ما بية شي.
.. هالة لاتشوفيني محتغمتج ( محترمتج ) وساكتة عليج
تغة (ترة) والله ازعل. اطنكغ (اطنكر)عليج واخليج تحلمين تحجين وياية

هالة .. شبيج هدى يعني الواحد ما يصير يضوج لوحده
يعني الا مزاعلج

.. اي لعد شنو اكو اسم ثاني غيغ (غير) الزعل
هيج تتهغبين (تتهربين) مني وتتحاشيني
غمضت عيو

نها وكالت
..

اذا اكلج مستحية منج ومن روحي ومن عزام ومن الصار كله بذاك اليوم تصدكيني

.. وعلى شنو تستحين مني.
.. لج هدى بعد الي صار كرهت روحي

.. لا هالة الموضوع ما مستاهل كل هذا الخجل والزعل
انتي مبين عليج جنتي تحجين بشقى وضحك

.. هدى لو جان الموضوع. بس شقى وضحك.
جان كدرت اتجاوز الفشلة واكل تبن واكعد واسكت

بس بعدما سمعت كلام هديل وعرفت شنو سبب
عركة قاسم. وضربها
بهاي اللحظة راجعت موقفي. وخفت لا عزام. يروح
يحجي لكوثر او هشام على الكلام الي سمعه مني
بساعتها.حسيت بالخجل من نفسي وتصرفاتي الغبية المتهورة

كليلي اذا وصل الكلام لقاسم وامي
شلون راح اكدر احط عيني بعيونهم
يعني هاي بدال ما اجازيهم على تعبهم ويانا

خصوصاً قاسم. اخوي سودة علية.
ممقصر ويانا اني واخواتي حريص علينا وعلى حمايتنا
ميستاهل. هيج ننزل راسه بغبائنا
ونخلي هو وامي علج بحلوك الشمات.

.. هالة كلامج صحيح. بس اني احب اكلج شي يمكن انتي تجهلينه
عزام ما دام هو صديق اخوانج معناها يتصف ويتحلى
بنفس اخلاقهم لان قاسم وهشام ما يصاحبون
الا. الي مثلهم

لذلك اني اكلج سدج امين ما غاح (راح) يوصل كلامج
لأي واحد لتخافين

هالة .. حلفي والله. ميجيب سيرة بالصار
.. اي والله. واني احلف عنه. وواثقة منه
لان عزام نشمي وعنده شهامة تمنعه يحجي بهيج سوالف تعبانة

اباوع لهالة شلون. رد الدم بوجها.
بس بقت محافظة على هدوءها
وصارت تحجيلي عن هديل وشصاير بيها
وشلون جانت تحجي وية ايمن. وهو طلب منها ترسله صورها بحجة مشتاقلها.

يوم ثالث خالة شوية صحصحت وكامت على حيلها
وكالت
.. اليوم اشوي دجاج واسوي تمن برياني خطية بناتي يحبونه
واتصلت عالبنات تريدهم يرجعون
وبيومها رجعوا البنات همة وجهالهم للبيت

ووياهم منى وكوثر وجهالهم
احس البيت صار بي حياة بعدما عشعش بي الحزن
جنت واكفة منتظرتهم بالكراج

اول ما دخلوا الفريق رحت سلمت عليهم بلهفة

فاطمة .. والله ما الوم. امي. بيوم. اتمسكت بيج وكالت
تربية بثنية. ما تتفوت

منى .. فديت مرت اخونا الحنينة
جاوبتها واني اضحك
.. زين بس اغيد اعغف (اريد اعرف )
فاطمة وسغوغ (سرور) ناس مهجغين (مهجرين)
خالة اتصلت عليهم يغجعون ( يرجعن) للبيت زين انتي وكوثغ (كوثر) شتسوون
لافين علينا مو هنا بيتوكم

كوثر .. مالت عليج ياعوبة ما تحملتي تصبرين شوية
صارلهم ساعة يحمدون بيج.

ضحكت .. لا والله.تغدون ( تردون ) الصدك
بالحقيقة البيت ضوجة من طلعتوا

دخلوا البنات وجنا مسوين غدا واني اتصلت على قاسم
بس جاوبني وكلي انا مشغول ما اكدر ارجع من وكت
بس هشام راح يرجع يتغدة

رجع هشام والكل كعدوا يتغدون
ام قاسم .. ها خالة هدى ليش متاكلين
.. خالة ما اشتهي والله
هشام.. طبعا متشتهي لان ابو الجهال ما موجود.

ام قاسم .. يا خالة موزين على الحمل
يعني اني اذا التهي عنج شوية هيج تسوين بروحج وتنسين نفسج
عود هاي انتي جنتي ام البيت واعتمد عليج
وانتي روحج مكدرتي تداريها

.. لا والله خالة اكلت قبل شوية
وشبعت

تركتهم يكملون اكلهم ورحت للمطبخ الحار. ارتب المواعين وحطيت القوري عالنار

كملوا الغدى ومنى كالت يالله ست هدى راوينة. عرض
اكتافج وسلمينا القيادة. بالمطبخ

واني ضحكت وجاوبتها بفرح
.. ما يغد الكغيم (يرد الكريم ) الا البخيل
اباوع لهالة. ابتسمت وكعدت تعزل وية البنات

منى شاورتني .. اكول هدى اختنا هالة شبيها
احس بيها مو طبيعية

.. تلكينها ضايجة علمود هديل وخالة تعبانة
.. لا هالة اختي واعرفها كلش زين صحيح هي مرات تحزن
بس عمرها ما صارت عاقلة ومؤدبة

جانت تحجي واني اباوع لهالة
صدك جانت تتجنب تكعد يم اخواتها وخصوصاً كوثر.
وحتى جهال كوثر ما تقتربلهم مثل قبل

حضرت. الجاي واخذته للهول يم خالة
دك نقالي وجان المتصل قاسم

جاوبته بلهفة
وهو حجة وياي وكلي
.. شنو شبيها جنيتي يكولون عنها ما تشتهي تاكل
اكدر اعرف السبب
رحت طلعت من الهول رحت بالحديقة احجي وياه لان المكان الوحيد هدوء

.. اي مقاطعة الاكل من وغاك (وراك)
.. ها ليش وانا شكو
..انت مقاطع الاكل ومتجي تاكل بالبيت واني كلتلك
اذا متاكل اني هم ما غاح (راح) اكل
وهسة اني وابني ميتين من الجوع وانت السبب

.. يخسة الجوع. لعد ما دام
هيج الحجي حظيرلي غداج وانا جاي
نتغدة انا وياج لان اني. هم بطني خاست من
الكيك. والعصير

ابتسمت بفرحة وجاوبته
.. صاغ (صار) من عيوني الثنين
.. تسلم عيونج. جنيتي

نهيت الاتصال ورحت دخلت للمطبخ لكيت خالة
عازلة دجاجة مشوية وصرت احضر
بالتمن والسلطة. واللبن. وبعدها رحت صعدت

فوك لغرفتي وكعدت احضر بيها واتذكرت الكعدة
العربية حضرت الاجواء والبخور.
اجنت اتحرك بسرعة وبطني كدامي

رحت للكنتور وطلعت عندي ملابس
جنت ناوية البسها بعيد زواجنا
جانت دشداشة. موديل مصري. مقلمة وبيها
دلعة الصدرة واسعة. والجاكات عالجانبين
السيقان كلها طالعة

حطيتها عالسرير واتصلت على قاسم
.. حبيبي من تغيد (تريد) توصل انطيني خبغ (خبر)
حتى اصب الغد