عفية نقال ما يسكتله لحظة
وبعدها اجاه اتصال حجة قاسم
.. رائد هاي وحدة وياك ولك ناقص اشكد انتظرتك
كل شوية اباوع عالباب اكول هسة يدخل ظلعي ويكحل عيني بفرحته بيوم عرسي
تالي تكلي طيارتي اتأخرت علية
جان هو يحجي وانا حابسة النفس ومتشنجة
حسيت بصوت وشة بأذاني وعرك جسمي
ما اعرف شصار بية من ذكر اسم رائد

بعدها انتبهت على سيارتنا اتحركت
ووراها اتحركت السيارات واصوات ابواق السيارات
سووها مثل الموسيقى

طلعت الزفة وعلى طول الطريق اني مدنكة
واباوع على مسكة الورد الي لازمتها بين ايدية

جانت الافكار تتلاطم بداخل راسي مثل امواج البحر الهائج
جان الوضع داخل السيارة كلش هادىء عكس
اصوات الهوسة بخارجها

يعني اذب الابرة اسمع صوتها من كد السكون
ما اسمع غير انفاس قاسم المخنوكة
كل شوية يجر حسرة

انتبهت للسيارة خففت سرعتها
وبلحظتها عرفت وصلنا لمنطقة بيت قاسم

رفعت عيوني حتى اشوف احنا وين
وجان تجي عيوني على شوارع منطقتي
القديمة جانت السيارة عبالك متعمدة
تمررني على طريق مدرستي الي هو نفسه يوصل لبيت اهل قاسم

اباوع للشوارع والذكريات هجمت علية
والعيون غركت
وكلبي يناغي الذكريات
ها ياشارع احلفك بالله هم حنيت لخطواتي على دربك
مثلما ما انا حنيت للمشي على رصيفك
بطئت السيارة تريد تستدير بنهاية الشارع
واصوات السيارات لازالت تتبعنا

فجاءة وجان اشوف مشاعل المخبل يركض
وية سيارتنا ويركص ويهوس
شهكت وحطيت ايدي على حلكي
ما اعرف اضحك مدري ابجي على هذا الموقف
شكلي راح اصير مخبلة مثل مشاعل وافقد عقلي

يعني سخرية القدر طالت ووصلت على ابواب حياتي
اباوع لمشاعل لابس كلابية مقلمة جبيرة ومعلك
جيس بركبته مبين مملي حلويات الظاهر ماخذها من بيت ام قاسم
جان حافي. وفرحان

ااخ يامشاعل والله الي وياك مواقف
وشكلك راح تصير اشارة ومعلم تاريخي على كل اطلال ذكرياتي
لاعب دور البطولة في كل ذكرى من ذكرياتي

ااتوقفت السيارة وبدوا الناس ينزلون من سياراتهم وقاسم
سبقني ونزل من السيارة يريد يستدير

حتى يفتحلي الباب وينزلني
اباوع لمشاعل المخبل واكف يركص
ويصيح عالناس

صرت استنجد بمشاعل
(يامشاعل ما الله يهديك الي
وتهد على قاسم بالحجار على راسه وتنسيه
اسمه واسم هدى وعشيرتها )
ضحكت على افكاري المعوقة
انفتح الباب وقاسم واكف يمه ساد علية الرؤية
نزلت من السيارة وجتي هالة ساعدتني انزل

بعدما نزلت بديت امشي وية قاسم متجه لبيتهم
باوعت باب بيتهم جان مفتوح على وسعه

لكن فجأءة سمعنا صوت رمي بالجو
انتبهت على قاسم اتوقف بمكانه واني اتوقفت وياه
رفعت راسي وباوعت بأتجاه نظرات قاسم
وجان اشهك بصوت مكتوم حطيت ايدي على حلكي
مصدومة

رائد رافع سلاحه ليفوك وواكف يم عتبة باب بيت قاسم
كام يرمي وعيونه تلمع الم حسرة

وحجة بعالي صوته للكصاب
.. يالله هسة ابدي اذبح جوة رجيلن
الغالي
جان جايب خروف وبدة الكصاب يذبح

اباوع لقاسم جان يبتسم بفخر
وكال.. والله عرفتك راح تحضر
اجة رائد واتقدم عليه

وكال .. مبارك عرسك يالظلع شلون ما احضر زفة الغالي
اتقدم لقاسم ولمه بين ذراعه واتبادلوا الاحضان
واني واكفة جامدة بمكاني والرجفة صارت تسري بداخل ظلوعي من المنظر الكدامي
ياربي شنو هالمحنة تركت رهف وراي بالقاعة منهارة
واجيت ولكيت رائد منتظرنا بعتبة الباب

الدنيا شكد غريب امرها
حطمت اربعة قلوب جانت عامرة بالحب
بس مع الاسف ولا وحدة من هاي القلوب المسكونة
بالحب .. واحد بيهم سعيد

انتبهت على صوت رائد جاي يهنيني
.. مبروك عليج يامرت الغالي

هو صحيح الحب موجود لكن طريق الوصول اله وعر وصعب
بالاخير صفينا ولا واحد بينا كدر ينال محبوبه

حجة هاي الكلمتين وابتعد مخنوك
وانتبهت على قاسم حثني حتى اتحرك وامشي
ادخل للبيت واجاني صوت ام قاسم
.. يمة فوتي وخطي برجلج اليمين

حتى تخضر دارنا بيج وبجهال قاسم
جانت تحجي بصوت مسموع تريد تسمع العذال

بعدما دخلوني للبيت نزعوا عني البرنص
وبعدها صعدنا انا وقاسم فوك للغرفة
وانا من كد الخوف احس صرنا اني والخوف اخوان
لان جان وياي بكل خطوة اخطيها وية قاسم

دخلنا للغرفة وانسد الباب ورانا
والتفتت عالباب المسدود اباوع عليه بجزع
لفت انتباهي حركة قاسم
اتوغل لداخل الغرفة
حل ربطة العنق مثل المخنوك وشمرها عالكرسي
ولحكتها السترة وفتح اول دكمتين من القميص

ومسح على وجهه وسحب نفس عميق وباوع علية
لكاني بعدني واكفة بمكاني مثل الطفلة التايهة الما تعرف الطريق منين

ابتسم على شكلي وعيونه سافرت على طولي
جانت نظرة الاعجاب بالمنظر الكدامه واضحة
لميت شفايفي بحذر

وهو حجة .. استغفر الله يابة شبيج مبرطمة الشفايف
لا تخافين ترة بعدنا ما كلنا حلال

.. تعالي فوتي ارتاحي خوما تكضيها علينا واكفة يم الباب
.. لا ما اغيد ( اريد) خليني هنا مغتاحة ( مرتاحة)

.. اي هو مبين كلش مرتاحة والدليل عيونج
الخايفة

.. لا اني ما خايفة بس شوية هواية غاح (راح) اموت من الخوف

.. الظاهر انتي شكلج راح تتعبيني وياج
شوفي انا طالع وانتي اخذي راحتج وبدلي ملابسج

جان يحجي وعيونه لازالت تسرق النظرات
حسيت بروحي عبالك واكفة كدامه عارية
بدون ملابس
(طلع من الغرفة او بالاحرى انهزم قبل لا يضعف
كدامها ويفقد صبره ويقع المحظور )

سحبت نفس براحة انتبهت لنفسي جنت حابسة انفاسي بوجوده
اتوغلت للغرفة اباوع عليها وباوع لشكلي بالمرايا
اكتافي وزنودي جانت كلها طالعة

كعدت عالسرير ودنكت ونزعت الحذاء العالي

خرب والله اتكطعت رجلية من وراه
واتنهدت براحة
لكن ما لحكت اخذ انفاسي

دخلت ام قاسم وبنتها الجبيرة فاطمة ومنى
جانوا شايلين صينية العشا مغطاية
ام قاسم.. ها عروستنا اشو بعدج بالبدلة

بلعت ريكي وكمت امتمت
.. ها انا هسه اغيد( اريد) ابدل وانتوا دخلتوا

منى.. اصلا حتى لو ردتي تبدلين ما راح تكدرين تنزعين البدلة لوحدج
بالله شو تعالي
اتجهت علية وصدك كعدت بالربع ساعة
تنزعني البدلة وتفتح التسريحة
عبالك كاعدة بورشة تصليح سيارات

وام قاسم وفاطمة يتحركون بالغرفة انتبهت لفاطمة
جانت شايلة ثوب ابيض
اقتربت مني وحطته عالسرير
عززة هذا روب النوم
صرت ارمش بعيوني من الاحراج
وام قاسم جانت شايلة دشداشة رجالية بيضة وحطتها يم
الروب
وبعد مرور ساعة
جنت كاعدة عالسرير
بعدما جهزتني منى
بعدها استلمتني ام قاسم وكعدت توصيني
ادير بالي على ابنها واسعده
اجيت ابجي هو منو المفروض توصي اني لو ابنها

بعدها طلعت ام قاسم ومنى وبقت فاطمة اخت قاسم الجبيرة
يمي تفهمني شنو اسوي من يقترب مني قاسم
فاطمة بصوت قوي كملت كلامها
.. هاج اخذي هاي القطعة البيضة خليها جوة ايدج

يمة انا هي كالت هيج واني غديت ماي من المستحى
عمي ستر الله ضحى اختي على الاقل جانت شوية خجلانة
بس هنا الاخت جانت تحجي بالقلم العريض
ونوب هي الله يحفظها تحجي بجدية يعني تخلي الواحد غصب عنه يرتعد

كامت وهي تكول
.. يالله بعد ما اوصيج حبيبتي
شوية انتي اتحلحي مو تصيرين فاهية ترة الرجال
يحب البنية الفطنة والحركة

يمة هي منا ضخمة وطويلة ونوب تحجي وياي هيج عبالك عتريس

بحيث هي من كامت من مكانها تريد تطلع
انا كبل كمزت من مكاني وكفت كدامها
عايز بس اخذلها تحية مثل الجندي

بعدها هي طلعت من الغرفة وسدت الباب
وانا صرت احوم بالغرفة
مثل البزونة حابسيها بغرفة لوحدها

ياربي شلون راح اتعدي هاي الليلة وية قاسم هاي
معقولة اصير سباعية
واتحمل قاسم يجي ياخذني ويسويني مرته
كول وفعل
جنت اروح وارجع بالغرفة
ياربي شلون بية وين اروح اذا شاف الوحمة

وسمعت صوته صار قريب عالباب
فتح الباب ودخل ووكعت عينه علية

سحب نفس عميق وغض بنظره عني ومسح على وجهه
وبعدها دار وجهه وراح اخذ الدشداشة واتوجه عالحمام
اسمعه يحجي وية نفسه
.. يالله هاك استلم يقاسم
شلون راح اتحمل وهاي واكفة كدامي هيج

شهكت وحطيت ايدي على حلكي
عززة اليوم هرقل ناوي علية
يمةةةةة

ورة دقايق طلع من الحمام وهو لابس الدشداشة والمنشفة على راسه باوع عالصينية
ورجع باوع علية وكال

.. هاي شنو بعدج ما اكلتي
ترة انا اكلت
همست بصوت ناصي كوة ينسمع
.. ما اغيد (ماريد)شبعانة

بربك يا اكل بهذا الزلك تعال كابلني والطم

جان يتحرك بالغرفة واني اباوع عليه شلون راح وكف كبال المراية
وكعد يمشط بشعره
ورش عطر وبعدها
دار وجهه وباوع علية
نظرات عيونه تكول واخيرا فرغتلج

اجة وكعد يمي عالسرير وبدة يحجي ويمهد للقادم الاتي
.. شوفي يابنت الحلال
انتي صرتي مرتي وحلالي فأريد منج تخليني اتهنا
بحلالي

اقترب علية والنية باينة من عيونه
لزم ايدي
واني كاعدة عالسرير اباوع ليكدام اجيت ابجي من الخوف
لمسات ايده انتقلت على طول زندي
وكال بصوت هامس
.. دخيل ربج شكد ترفة
اخاف امرر ايدي على بشرتج وتنجرح
قرب راسه على ركبتي وحرارة انفاسه صارت قريبة على النبض

يمة هو قرب راسه
وانا كمزت من مكاني ووكفت
وبهاي اللحظة
هجرتني شجاعتي و عقلي اتخلى عني
وتركوني لوحدي اواجه هرقل

عكد حواجبه ونهض من مكانه وراي
.. شكو ليش كمتي بعدنا ما كلنا بسم الله

ابتعدت عنه ودرت حول السرير وصار
السرير بينا
من شاف حركتي غمض عيونه بصبر
وكال بغضب
.. شنو كاعدة تلعبين وياية
يالله شو تعاي اليوم اخذج
اخذج وين ترحين وراج وراج
جان يحجي وهو يمشي بتجاهي

عاد انا هو حجة هيج
وانا الجني الهداوي برز للساحة
واتبخرت اخر قطرة عقل براسي

وجان اطفر فوك السرير
وحجيت بخوف وانا واكفة عالسرير

.. بغوح ابوك لا تقتغب مني
(بروح ابوك لاتقترب مني )
من شاف حركتي غمض عيونه بصبر
وكال بغضب
.. شنو كاعدة تلعبين وياية
يالله شو تعاي اليوم اخذج
اخذج وين ترحين وراج وراج
جان يحجي وهو يمشي بتجاهي

عاد انا هو حجة هيج
وانا الجني الهداوي برز للساحة
واتبخرت اخر قطرة عقل براسي

وجان اطفر فوك السرير
وحجيت بخوف وانا واكفة عالسرير

.. بغوح ابوك لا تقتغب مني
(بروح ابوك لاتقترب مني )
يتبع

#اساور_الفضةج٢
#نهى_الحسون
#البار_الحادي_عشر

هدى
جنت واكفة خايفة عالسرير متأهبة
وحجيت بخوف
.. بغوح ابوك لا تقتغب مني
(بروح ابوك لاتقترب مني )

قاسم جان واكف يباوع مصدوم
هز ايده بسخرية وسمعته يكول بغضب

.. يالله هاك استلم بالله هاي شحجي وياها
الله يسامحج يا امي على هاي الورطة

اباوع عليه عيونه نار
شلون ياربي شي يعدي هاي الليلة
جنت افرك ايدية ببعضهم وحجيت بترجي
.. الله يخليك انطيني فغصة بس هالمغة (فرصة بس هالمرة)
بس الى ان اتعود عليك والله اخاف

غمض عيونه بصبر
.. زين نزلي من الجرباية خلي احجي وياج
نكعد ونتفاهم مثل الناس والعالم

.. لا خليني هنا مغتاحة عادي احجي اسمعك
.. لعد ابقي بمكانج انا جايج
كالها بتهديد
يمة هو صعد عالسرير وانا طفرت من الصفحة الثانية
وجان هي طفرة وهي صرخة
وحسيت الا رجلي التوت بحيث كعدت عليها

عطت بصوت عالي موجوعة وخايفة

اشو بعد مااني عطت اسمع اصوات الهلاهل لام قاسم برة الغرفة
وراها صار صوت ضحك وتصنيف

وامه تكله
.. يمة قاسم على كيفك وية مريتك
بعدها صار الضحك والتنصنيف بفلس

شهكت وحطيت ايدي على حلكي
وعركت كصتي من الموقف المحرج
وباوعت لقاسم بحذر جانت عيونه تجدح نار

بلعت ريكي
لا ام قاسم على بختج كلش مو وكتج ادري شنو جانت خاتلة ورة الباب

كمز كلبي على صوت قاسم الخشن وهو يسب ويغلط
.. لا اليوم شكلي راح اجرم بواحد منكم لو انتي لو امي
..

هو يحجي وانا كاعدة بالكاع اتلمس برجلي وابلع بريكي
والله هسة يجي ياكلني بسنونه

اتجه علية وركع يمي بالكاع
وانا حجيت
.. لا غوح وخغ عني كله من وغاك التوت غجلي
( روح وخر عني كله من وراك التوت رجلي )

.. بالله هسة انا شنو افتهمت من ورة غوغوتج
مد ايده على رجلي
اجيت اسحبها خزرني وكال
..انطيني مجال خلي اشوف
احتمال صار عندج التواء بالقدم

لزمها وحركها واني كاتمة الصرخة واعض على شفايفي بألم

.. هسة هيج احسنلج صارلج ساعة تكمزين جنج قرد
فضحتينا الله يلعنج بعدني ممسوي شي

خرب احس حتى الوجع راح من كد الخوف والترقب
..

باوع على دموعي ورجفة شفايفي
غمض عيونه يطلب الصبر وكعد كدامي بالكاع
وصار يباوع علية بتفكير مثل الي يريد يتخذ قرار
ظل صافن علية وساكت مبين عليه الحيرة ديفكر بشي
وبعدها مسح على وجهه وجلى صوته
وكال
.. كافي لتبجين كومي ومسحي دموعج

نهض من مكانه ودنك علية حتى يساعدني اكوم من الكاع
حوطني بذراعه من خصري وسندني على صدره
انخبصت وما اعرف شصار بحالي
قربه وحرارة جسمه وترتني
كعدت عالسرير وابتعد مني
وكف كدامي وعيونه والنفس مالته جانوا شاهدين على اثارته

دنكت راسي من الفشلة وخدودي صاروا حمر
بعدين اجاني صوته
.. ااا .. احم احم
.. تصرفاتج دتصعب علية الامور وتعقدها فوك ما
هي متعقدة اشوف من الافضل اتركج اليوم لوحدج
لان الظاهر احنا اثنينا اعصابنا متوترة
من كثر الضغوطات

جان يحجي وقطع كلامه صوت النقال
عقد حواجبه وراح بتجاه السترة وطلعه من جيبه
اباوع عليه

جر حسرة وغمض عيونه ورجع شعره للخلف حركته دلت على العصبية
رد عالمتصل وانطاني ظهره وكام يحجي بهمس
ما كدرت اسمع شي

غير كلمة .. والله اكلت تبن
جان يحجي ويمشي بتجاه الباب يريد يطلع
هو طلع واني استغليت انشغاله بالاتصال

رحت اعرج عالخفيف بتجاه الباب اريد اتأكد راح لو بعده
اريد اغير ملابس النوم احس بالتهديد من وراهم اقتربت عالباب

وجان اسمع
.. خير حجية شكو شعندج تحومين هنا
ليش مو نازلة جوة يم خطارج
جان يحجي بغيض عزة شكله اتفاجيء بوجود امه
صاعدة فوك

بس اريد اعرف ام قاسم شتحس وين تريد توصل
يارب هاي العائلة راح تخبلني

جاوبته .. ها يمة قسام بشر
جاوبها وهو كوة لازم اعصابه
.. حجية ورب الكعبة راح تطلعيني عن طوري
بهاي سوالفج

.. يمة غير وليدي واريد اطمن عليك
.. هو شنو الصاير وتطمنين علية
قابل رايح احارب حجية لخاطر الحمزة عتقيني و عوفيني بحالي

.. لك يمة قسام ليش دومك شالع كلبي
وتكسر واهسي
هسة اني شنو رايدة منك غير بس اشوفك مرتاح وية مريتك

.. ادري بيج على شنو تحومين وما راح تعوفيني الا تعرفين شسويت
بس اطمني سدج امين ماكو شي صار
خليني اني براحتي شوكت ما يعجبني اخذها
يالله هسة ارتاحيتي

لطمت على صدرها
.. ياااااااا يمة قسام لعد والصوت السمعناه
جان شنو

.. اي مو جنا نسوي احماء وهي عاطت
اكلج حجية بالله رحمة على مو تاج ما تعوفيني
ترة والله روحي واصلة لخشمي
عزة بعينه كاعد يحشش على امه وهو بعز الغضب
بعدها عاف امه تدردم وراه وراح

ابتعدت عن الباب ورحت امشي سريع بية ما بيه
حتى اوصل لباب الحمام خاف تدخل علية

دخلت للحمام وانتظرت تفتح الباب وتدخل للغرفة
بس ماكو ما دخلت
شكلها غيرت رأيها
طلعت من الحمام ورحت اخذتلي بجامة نوم
ولبستها بالحمام وتالي طلعت وقاسم بعده ما رجع

استغليت الفرصة ودخلت جوة الغطا
وحطيت راسي عالمخدة واني انتظر شوكت يرجع للغرفة
حتى اعرف راسي من رجلية

ما اعرف شنو اسوي هسة شنو انام لو انتظره يرجع
وبعدين انام
وعلى هاي الحسبة ما حسيت الا وانا غاطة بسابع نومة

شيماء
بعد ما خلص العرس صلنا عمو امجد اني وسليمة للبيت
جانت سليمة على طول الطريق بس تدردم
على مروة وتحجي
سليمة.. انت لو تشوفها شلون دخلت للعرس
ما تكول للفلك ولك

شايفة نفسها كلش وهاي المكطمة نفخت ريشاتها
وصارت ما تتحاجة من شافت مريوة
اباوع عليها حتى ما كالت هاي بيبتي خلي اروح اسلم عليها
لبستني ولا جنك اني موجودة شكد فشلة من جاراتي كلهم
سألوني هاي بنت ابنج
صرت بنص هدومي احتاريت شجاوبهم

خرب جانت مستمرة تحجي بدون انقطاع
عبالك بالعة مسجل وعمو امجد بس يجاوبها
اي واي يسايرها

منا الى ان وصلنا للبيت راسي صاير طبل
واول ما دخلنا للبيت
واتوغلت بي حسيت خنكتني العبرة
دخلت للغرفة الي جمعتني بخواتي
صفت علية وحدي بس اني بيها

بدلت ملابسي وغسلت وجهي
وبعدها فرشت فراش واحد واتمددت
واني افكر بهدى شنو دتسوي بهاي اللحظة
خايفة لوتجاوزت خوفها .. نايمة لو كاعدة

والله هسه عرفت احساس الي يكول
كون انكلب طير واشوف شحال العزاز

استداريت واجتي عيني على مكان فراشها
جانت دائما تفرش بصفي وتنام بحضني
وهسه حضني فارغ مشتاقلها

قطع علية تفكيري صوت نقالي رديت جان المتصل مروة
.. هلا مروة شنو وصلتي لبيتج
.. هلا شومة اي وصلت ونومت مشمش
وكلت اتصل عليج قبل لا تنامين وابلغج
باجر الصبح حضري نفسج نروح اني وياج ناخذ الريوك لهدى وقاسم
.. والله هاي جانت نيتي كلت باجر اكعد من وكت
واسويلها ريوك واخذه الهة كدام عيالها

.. يالله لعد انتظريني امر عليج باجر
واخذج وياي
يالله حبيبتي شومة اخذي راحتج شكلج تعبانة مبين من صوتج
.. يالله حبيبتي الله وياج
نهيت الاتصال
واني افكاري صارت تدور على احداث اليوم
مروة وهدى وزواجها ضحى
الي ختمها علينا زوجها من اجة ولكاها واكفة لوحدها
بالشارع ووياها مشمش

حرك الدنيا عليها وصلنا
اني ومروة وانتبهنا لضحى واكف يمها سيف سلم علينا بغضب
وضحى حجت ومبين من صوتها جانت تبجي
كالت .. مروة حبيبتي هاي بنتج اني لازم ارجع وية سيف
جانت كوة تحجي

بس بنت مروة مشمش .. لزمت ايد امها وكالت
ماما هذا عمو ايييع شرير

جانت تحجي وتأشر على سيف
مروة بغيض سلمت على ضحى وكالت بصوت عالي
حتى يسمع سيف .. بنات مو تنسون عازمتكم يوم الجمعة عالغدة

سيف.. يالله ضحى استعجلي ترة السيارات طلعت
وبعدها ضحى سلمت علينا وراحت
ومروة حجت.. هاي يمكن جان يتعارك وية ضحى بالشارع
شيماء.. شلون عرفتي
.. مشمش كالت عليه شرير
هاي الكلمة تستخدمها اذا شافت واحد معصب ويغلط كدامها

شيماء.. عادي كلشي اتوقع من سيف
مروة.. الله كريم يصير خير تجي الجمعة وافتهم منها شبي هذا الثاني وياها

اتثاوبت وعدلت المخدة
ما ادري ليش احس مروة تعرف عنا كلشي
بس شلون كدرت تعرف واحنا محد يتواصل وياها

حتى سالفة الاجازة دوختني
شلون عرفت بية اني اريد اخذ اجازة وهذا فرات رفض ينطنياها

والله مروة لغز محير بحد ذاتها
بس الحلو بكل هذا هي رجعت لحياتنا

........
هدى
جنت نايمة حسيت على ايد تندهني حتى اكعد من النوم
فتحت عيوني ورجعت غمضتها واني اكول من بين نوم ويقضى

.. شيماء عمغي (عمري) اوكفي هسة اكعد بس شوية
حسيت بأيد خشنة هزتني حيل وبصوت خشن
.. يابة تكعدين لو شنو
امي وخواتي راح يصعدون ويشوفونج نايمة

سيف.. يالله ضحى استعجلي ترة السيارات طلعت
وبعدها ضحى سلمت علينا وراحت
ومروة حجت.. هاي يمكن جان يتعارك وية ضحى بالشارع
شيماء.. شلون عرفتي
.. مشمش كالت عليه شرير
هاي الكلمة تستخدمها اذا شافت واحد معصب ويغلط كدامها

شيماء.. عادي كلشي اتوقع من سيف
مروة.. الله كريم يصير خير تجي الجمعة وافتهم منها شبي هذا الثاني وياها

اتثاوبت وعدلت المخدة
ما ادري ليش احس مروة تعرف عنا كلشي
بس شلون كدرت تعرف واحنا محد يتواصل وياها

حتى سالفة الاجازة دوختني
شلون عرفت بية اني اريد اخذ اجازة وهذا فرات رفض ينطنياها

والله مروة لغز محير بحد ذاتها
بس الحلو بكل هذا هي رجعت لحياتنا

........
هدى
جنت نايمة حسيت على ايد تندهني حتى اكعد من النوم
فتحت عيوني ورجعت غمضتها واني اكول من بين نوم ويقضى

.. شيماء عمغي (عمري) اوكفي هسة اكعد بس شوية
حسيت بأيد خشنة هزتني حيل وبصوت خشن
.. يابة تكعدين لو شنو
امي وخواتي راح يصعدون ويشوفونج نايمة


يمة انا سمعت الصوت وانا كعدت مفزوعة
ونزلت الغطى وشعري مكوش بفوضى ونزل على وجهي

باوعت على مكاني منا ومنا
عزة والله للوهلة الاولى عبالي اني نايمة ببيتنا

وكعت عيني على قاسم جان واكف فوك راسي ويباوع علية شعره جان مبلل

بلعت ريكي عزة اني شوكت نمت وهو شوكت رجع
وهسة شسوي

عبالك حس بية بشنو كاعد افكر كال
.. سمعيني زين امي وخواتي راح يصعدون فوك
ويكعدون يجرجرونج بالكلام
فانتي اي وحدة تسألج كليلهم قاسم ميقبل
اسولف وياكم بخصوصياتنا
وكال بس اسمعج مطلعة يوم حجاية وحده
راح يكون حسابج عسير ومحد يخلص من ايدي

هزيت راسي بنعم وكمت من مكاني
نزلت عيونه على بجامتي واتسعت على قميص البجامة
باوعت على مكان نظراته
وجان اشوف روحي مدكمة البجامة غلط

ونص الشسمة طالع و مبين
شهكت ولميت صدر البجامة على صدري
وخزرته
.. عفية ديغ (دير) وجهك لا تباوع
هو رفع حاجبه وكال بثقة
.. اباوع على حلالي شنو حرام
باوع لساعته وكمل كلامه
بالله شو كومي اتحركي راح يجيبون الريوك
بس رحمة على والديج ستري علينا وبدلي البجامة

مشة من يمي وراح للباب يريد يطلع
جان يحجي وية نفسه بصوت مسموع
.. هي بجامة لو بلوى الله يلعنك يالشيطان
فتح الباب وطلع

وانا كبل رحت عالكنتور وطلعت دشداشة لونها
اوف وايت كلش نازكة
شيماء كالت هاي تلبسيها بصباحية العرس باول يوم

انتبهت لرجلي بيها الم بس طفيف
رحت دخلت للحمام
ورة نص ساعة
جنت واكفة كدام المرايا مبدلة ودامشط بشعري
بعد ما جففته بالشسوار

دخل قاسم للغرفة وهالة دخلت وراه شايلة بيدها صينية
الريوك وكاعدة توزع ابتسامات
هالة .. صباح النور عروستنا
جانت تحجي وتباوع على شكلي

تريد تشوف اي علامة عن ليلة البارحة
قاسم .. هالة حطي الصينية واتوكلي يالله
وسلمينا على امج وياج
ما افتهمت شنو جان يقصد
هالة وجها احمر كالت.. هدى خواتج اجوي وجابوا الريوك وامي كالت صعدي الهم
حتى يتريكون وينزلون فمو تنسين تكملين وتنزلين خواتج ينتظرونج جوة

هي بس ذكرت خواتي اني رحت عليها بلهفة
.. اني ما اغيد تغيك (مااريد اتريك) شبعانة
اجاني صوت قاسم من ورة
.. هالة طلعي وسدي الباب وراج
وهي كبل راحت بدون ما تباوع علية ولا تجاوبني
نفذت كلام اخوها وطلعت
باوعت عليه هسة شنو شسوي
كمل كلامه
الحجية وشغلة الاستخبارات ما راح تبطلها

راح اتوجه عالصينية وبسط ياكل
.. تعالي اتريكي حتى تنزلين يم خواتج
شوفي انا بية طبع اتخبل من البنية الي تتنعوص
وتتدلل على نعمة الله
جابولج ريوك تكعدين تاكلين مثل الخلك والعالم
وتكومين

يمة هو يحجي وانا من الخوف انعكدت معدتي
بربك هسة هذا ديدعوني للطعام لو للاعدام

خرب حظي الملطلط
رحت كعدت يمه قابضاً
صبله جاي بالكوب
وباوع علية وسألني تريدين جاي
.. لا ما اغيد شبعانة
اباوع عالصينية جانت مليانة اكل كاهي وكيمر
وخبز حار
جنت ميتة من الجوع وبطني ظلت تطلع اصوات موسيقية
باوع علية وخزرني بنفاذ صبر

.. مبين شبعانة
اكلج تاكلين لا والله
عزة كلشي لا يكعد يتحلف
بعده ما مكمل كلامه اني كبل مديت ايدي عالصينية
وكعدت اكل وعيوني عليه

دنك وكمل اكله اباوع عليه ما شاء الله
طبك الميمنة عالميسرة ماخذ راحته
بحيث سوالي واهس اكل ما اعرف ليش طريقة اكله
تشهي عالاكل

شنفت الردان وانطلقت اكل ونسفت المواعين الكدامي
وشربت الجاي وبعدها اتنهدت براحة
مال واحد شبعان رفعت راسي

وجان اباوع عليه لازم كوب الجاي ويباوع علية
وعيونه على شفايفي

مد ايده ولزم شفتي التحتية ومسح اثار الكيمر
من عليها
ظلت ايده تتلمس شفتي
رجعت راسي ليورة
وهو انتبه على نفسه وكام
.. انا نازل
راح للحمام وبعدها اتوجه للمرايا رش ريحة وعدل شعره وطلع

اتبعته وكمت من الصينية بعدما كترتها
ورحت غسلت جنت واكفة عالمرايا اعدل بنفسي قبل لا انزل
اندك الباب وبعدها انفتح
باوعت وجان تدخل شيماء ومروة
وراهم ام قاسم والبنات

رحت ركضت على خواتي واخذتهم لحضني
ام قاسم.. صباح الخير عروستنا شنو هالجمال
ما اعرف وليدي من اتريك بدة بيج لو بالكيمر

خطية ام قاسم عايشة اللحظة
جاوبتها .. طبكنا سوية واترغيك (اتريك) بينا
سوانا لكمة وحدة

منى .. هههههه اول مرة اشوف عروس تحشش بصباحية عرسها

وبعهدها ام قاسم كامت تباوع منا ومنا مثل الي تدور على شي
مبين من وجهها اكو على لسانها سؤال
بس ما تكدر تحجي لان منا خواتي

بعدما كعدو البنات مروة وشيماء وخوات قاسم يسولفون
وحيل اندمجوا لان همة جانوا صديقات من قبل
وبعدها ام قاسم كامت

.. يالله خالة اني والبنات نازلين لان ورانا طبخ
عمام قاسم راح يجون عالغدة
وانتوا ابقوا اخذوا راحتكم
واول مطلعوا البنات واستلمتني مروة بالاسئلة
.. ها هدوش بشري شنو سويتي البارحة
خو ما اتأذيتي كليلي شنو تحسين
حتى اكتبلج وصفة علاج لمثل هيج حالات
علمود قاسم يجيبها الج من الصيدلية

شيماء.. ههههه خرب يومج مروة من اسألتج مبين عليج دكتورة

همة يحجون اني صرت بنص هدومي ما اعرف شنو اجاوبهم

مروة.. شنو شبيج هدوش اتزوجتي لو خيطو حلكج
وين لسانج يمعودة لو تعرف بيج سليمه تكوم تهلهل

جاوبتها بكل خجل
.. مغوة عفية لا تذكغيني (مروة عفية لتذكريني)
.. شكو شبيج احجيلنا

.. يابة شنو من موقف محرج صاغ (صار) بية
وداعتج
البارحة قاسم انكلب طرزان واختكم صارت القردة شيتا
هو يركض وانا اطفر من مكان لمكان

ومن زود الخفة التوت رجلي ووكعت وهو
كام يغرد من الغضب والعصبية

شيماء.. عزة بعينج هدى والله كلت ما راح تدبريها
وشسوة بيج بس لا اذاج

جانت تحجي وياي وتفتح بالعلاليك الي جايبتهم هي ومروة طلعت حلويات وعصاير وكعدت تسفط بيهم بالثلاجة القصيرة الموجودة بركن الغرفة
جاوبتها وانا اباوع عليها
.. لا بالعكس مسوالي شي شكله هو همين جان متضايق من الموقف
واحس بي اقترب مني مثل الي يريد يأدي واجب

ما انكر جان اكو نظرات اعجاب بعيونه
بس هذا الشي لوحده مو دافع قوي يخليه يتوازة وياخذني
واني خايفة وبجيت وهو عطف على حالي وعتقني
وكال بس هالمرة راح اعذرج

مروة.. شوفي هدى صحيح زواجكم تم بظروف غريبة
بس بعدما شفت امه واهله وهو همين من سلم علينا مبين شخصيته قوية اتطمنت عليج

لان اعرف انتي بين ناس ما راح يظلموج
فاتمنى منج ان تكبرين عقلج وتصيرين سباعية
وتنجحين بزواجج

دنكت بضيق ما اكدر ابوح لمروة
عن خوفي من الوحمة وحبه لرهف ووعده بالزواج منها
بعدني مماخذة على مروة. صار زمان مفاركتنا
مو بسهولة احجي وياها مثل شيماء

بس المشكله شيماء يكفي اباوع لوجهة التعبان واعرف
هي البارحة ما نامت

مروة انطتني رقم نقالها وكالت
.. هدى اعرف بيج انتي خايفة من الوحمة
فاحب اكلج اذا تشوفين ان الوحمة راح تشكل حاجز بينج وبين قاسم
تعرفين السنتر مالتي هو نسائية وتجميل
تعالي علية للسنتر اي وقت تريدين بي احسن دكتورة تجميل
ترة هي مجرد تصبغ انتي ليش هيج مكبرة
موضوعها
.. مغوة الوحمة وحدة من هواية اسباب
الي تخليني اخاف من قاسم
يمكن الوحمة اهون الاسباب

ورة ساعة راحو مروة وشيماء بعدما كعدوا يوصوني
على زوجي وببيتي

نزلت جوة للبيت وجان البيت مخبوص
بالجهال
شافوني نزلت جان يجيني واحد من اولاد كوثر
اسمه زين وكال

.. ولكم تعالوا نزلت العروس وكام يهلهل
مثل بيبته
والتموا الجهال علية
سالته.. زيوني ماما وين
اشرلي عالمطبخ وهو يباوع علية
.. عااااااا ولكم شوفوا شعرها شكد طويل
اجتي ام قاسم وفرقتهم عن طريقي
.. لك زين سمي باسم الله
يالله روح منا

باوعت علية واخذتني للمطبخ
وكالت البنات مشغولات يساعدوني بالطبخ
.. خالة تحتاجون اساعدكم
.. لا حبيبتي انتي اليوم عروس كافي عليج قسام

البنات ظلو يضحكون
دخلت هديل للمطبخ
وشافتني وعفست الوجه وكالت
.. اكول ماما بيت عمو محمد راح يوصلون همة وبيت عمو كاظم
سلمت عليهم وحدة وحدة بس ولا ارتاحيت الهم
كلهم شايفين نفسهم ومعاجبهم العجب
واكو وحدة جانت مميزة عنهم
عيونها ولا استقرت بس تبصبص
بعدين عرفت هاي سعاد مرت عمهم كاظم
عزة هي هاي سعاد

وام قاسم والبنات يحجون ويسولفون وياهم
مجاملة
ما اخذين راحتهم وياهم
واني تلقائيا انضميت لفريقهم

نظرات رهف اكلتني اكل
جانت كاعدة وية امها فاتحة الشعر وصابغته
وطولها يجنن ورغم هذا كله عيونها مليانة حزن

عمة قاسم سألتني
.. شلونج انتي وقاسم البارحة بالعرس جان كلش
ضايج
ضليت فاتحة حلكي بالله هاي شجاوبها

وام قاسم كبل جاوبتها
وهي تضحك
.. هههههه هههه حبيبتي غضب قاسم صار خبر كان
اول ما دخل لغرفته وشاف زوجته
وداعتج اليوم كوة طلعته من الغرفة
بعد تعرفين سوالف العرسان

هي تحجي وانا وجهي كام ينطي الوان
اباوع لمنى وكوثر خربانات ضحك

هالة .. اي والله يمة وانتي الصادكة
اليوم من دخلت عليهم صينية الريوك
كبل شحتني من الغرفة عبالك خربت عليه الجو
دخلت ام قاسم وباوعت للوجوه وحست اكو شي وسألت
.. شكو شبي صوت هديل يلعلع صاير شي

منى .. لا يمة ماكو شي تعرفين هديل مخبلة وزعطوطة
وبسرعة تتمزعل

هالة.. لا هديل مو صغيرة جبيرة وتعرف الحجي كلش زين
ولازم امي تعرف بهديل شلون اتجاوزت على هدى وغلطت عليها

ام قاسم.. سدو ا الموضوع هسة الخطار راح يوصلون
وباوعت علية
ماما هدى لتضوجين هديل حسابها يمي انا اخليها
تجي تعتذرلج

هدى.. لا خالة ماكو شي يكفيني ان هي تحس بغلطها
لان اني ممسويتلها شي

ورة ساعتين
جنت فوك بغرفتي ابدل وحطيت مكياج
وسمعت الاصوات جوة شكلهم وصلوا

رشيت معطر وحضرت شال للحالات الطارئة خاف
احد موجود
ونزلت جوة وكلبي كام يدك حيل دخلت
عليهم للصالة جانوا الكل موجودين العمات وزوجات العمام وبناتهم

سلمت عليهم وحدة وحدة بس ولا ارتاحيت الهم
كلهم شايفين نفسهم ومعاجبهم العجب
واكو وحدة جانت مميزة عنهم
عيونها ولا استقرت بس تبصبص
بعدين عرفت هاي سعاد مرت عمهم كاظم
عزة هي هاي سعاد
ام قاسم كالت .. لعد خلي اروح ابدل ثوبي صار كله ريحة طبخ
طلعت من المطبخ

وهديل اجتي يمي
.. همزين راح تجي رهف اكيد قاسم راح يفرح
بشوفتها

منى زمخت بيها بغضب
.. هديل طلعي برة لا ابتلي بيج والله
هديل.. على شنو تبتلين بية ترة هو مو سر
كلنا نعرف بقاسم ورهف اول وتالي راح يتزوجون

هاله.. هديل اذا ما انلصمتي اروح اكول لماما عليج
هديل.. شنو شبيكم هديتوا علية واكلتوني بكشوري

همة يحجون واني وجهي كام صار نار
مو علمود شي بس حسيت بذل

كمت من الكرسي وباوعت لهالة وكلت
.. لا عادي انا غاح (راح) اطلع منا
دخلت فاطمة وخزرت هديل وكالت
.. لا انتي تبقين وهديل تطلع

هديل كبل طلعت وهي تحجي
.. والله زين تطردوني علمود وحدة ما عندها كرامة
اهلها لزكوها بأخوي

رصيت اسناني بغيض والله لو ما استحي وعيب
جان رحت نتفت شعرها كله بيدي
بس مع الاسف الكاع محضورة
كوة لازمة نفسي
ام قاسم كرصتها وهمست يمها
.. انا الج عوبة وانتي شعرفج بهاي السوالف
يالله امشي كومي ساعدي سرور

هالة كمزت من الكرصة وكامت من مكانها وهي تحك
.. رحمة الله والديج ام قاسم هاي جزات
الي يوفي للوطن

سمعت هديل تكول لرهف
.. رهف حبيبتي تعالي وياي خلي اراويج الملابس الي اشتريتهم

اباوع لرهف كامت من مكانها والعيون كامت تلمع بالدموع
وطلعت بسرعة هي وهديل من الصالة
وصعدوا فوك

هالة .. هدى تعالي وياي للمطبخ
شعندج كاعدة وياهم والله اذا بقيتي بعد ساعة يمهم
يصعد عندج الضغط
من فهواتهم

ما اعرف ليش احس بروحي ضايعة وياهم
يمكن لان جديدة بهذا البيت

دخلنا للمطبخ وسمعنا هشام يحجي بغضب وية كوثر
.. هاي الزفت شعدها جاية هنا
.. اي غير مرت ابوك المزيون
محسوبة علينا من العائلة ولازم امي تعزمها

.. من هسة اكلكم بس اشوفها كدامي انا غير مسؤل عن الراح يصير
مو تكولون هشام ما كال
هالة.. عفية هشام صلي عالنبي واتكفى الشر خليها تولي
اعتبرها ما موجودة هي مو يمك

دخل قاسم وشاف هشام معصب
.. شكو شبيك تجعر وصوتك واصل للخطار
هالة .. هشام متضايق من وجود سعاد مرة ابو

قاسم باوع عليه وبعيونه نظرة استفزاز.. وكال
.. سهلة ما تريد سعاد تعتب هذا البيت روح ادخل عليها
واطردها من البيت وكللها اكسر رجلج اذا عتبتي هنا

هشام.. ما اكدر صعبة امي توكف بعيوني
صعبة احرجها كدام خطارها

.. زين ما دامك تعرف عندك خطار وزحمة
ليش ما اتسيطر على غضبك وتصير حليم وتنتظر الفرصة تجي لحد عندك
وتاخذ بحيفك مو انت تروح تكمز ويقل مقدارك خليك ثكيل وراكز بكلشي

خلة وطلع قاسم
وقبل لا يطلع كله
.. روح اكعد يم الخطار بين ما اروح ابدل ملابس واجي حتى يصبون غدة

طلعوا اثنينهم من المطبخ
وسرور بعجلة.. يالله بنات صيحوا امي خلي تجي
حتى نبلش نصب غدا قاسم بس ينزل يريد الاكل كون جاهز

اجتي ام قاسم وكم وحدة من بنات عماتهم
حبوا يساعدون مدري يردون يشوفوني من باب الفضول
المهم كلنا اتعاونا بتجهيز السفرة
وام قاسم كالت
.. شنو هو وين قاسم اشو ماكو هذا بس هشام
دينقل الاكل يم الرجال

هالة.. يمة قاسم صعد فوك يبدل ملابسه
جنت احضر بالمواعين حتى يصبون

ام قاسم باوعتلي وحجت من بين اسنانها
.. عوفي الي بيدج وروحي صعدي صيحي رجلج خلي ينزل كوليله صبوا الغدة
جانت تحجي وعيونها تجدح نار

تركت المواعين ورحت بسرعة
خرب شلون بيهم ياربي تصرفات هاي العائلة ابد ما تنحزر شكلي راح اضل
اتعثر بيناتهم وانصدم الى ان ربي يفتحها علية وافهم عليهم

صعدت فوك
جان الفوك سنطة هدوء ماكو اي صوت
رحت لغرفتنا حتى اصيحه عبرت من يم باب شوية مفتوح
لفت انتباهي صوت وحدة تبجي

اتوقفت وباوعت بفضول اريد اعرف منو صاحب الصوت
اقتربت عالباب المفتوح
وجان اشوف
رهف كاعدة عالسرير دتبجي وقاسم راكع يم رجليها
وديمسح بدموعها يواسيها
يتبع

#اساور_الفضة
بارت١٢
#نهى_الحسون

هدى
جنت متجهة لغرفتي حتى اصيح لقاسم ينزل
للغدا بس سمعت صوت وحدة دتبجي لفت انتباهي
باب غرفة هديل مفتوح شوية
اقتربت بفضول اريد اشوف منو دتبجي وليش
جان اشوف
رهف كاعدة عالسرير وقاسم راكع يم السرير
وديمسح بدموعها يواسيها

جمدت بمكاني من الموقف ما اعرف شصار بية

جان قاسم يحجي وية رهف ويمسح بدموعها
واثنينهم رايحين بعالم ثاني ولا حتى انتبهوا لوجودي
اني واكفة اباوع عليهم

.. رهف كافي لخاطر الله لا تبجين
احنا مو اتفقنا تصبرين وتصيرين قوية وما تستسلمين

.. صدكني حاولت بس والله ما كدرت اتحمل
شلون تريد مني انام ليلي وانا اعرف
انت وياها جمعتكم غرفة وحدة
وراح تنام بحضنك
يعني خلي روحك بمكاني
تكدر تصبر تشوفني كبال عينك اتزوج غيرك وانام بحضنه ؟؟
قطع كلامها وحط ايده على حلكها
.. ما انتظر كبل ادفنج انتي وياه
.. شفت شلون ما اتحملت مجرد تسمع سؤالي وتلومني من ابجي وانقهر

.. شوفي رهف انا من الاول اكدت عليج اذا جنتي تردين تستمرين وياي
يابنت الناس فلازم تتحملين
تشوفيني اتزوج كدام عينج
ترة هذا زواج مو لعبة وعندي واجب لازم ااديه اتجاه زوجتي

وانتي عرفتي ظروف الزواج ووافقتي تبقين
وياي وهذا الشي كبر قدرج وزاد من معزتج بكلبي لان رغم الصار بقيتي متمسكة بحبنا
مثلما انا باقي على العهد وياج ومتمسك بيج

رهف.. اشو كلام خالة عكس كلامك
قاسم.. شلون امي عكس كلامي ما افتهمت

.. اشو تكول قاسم فرحان بعروسته واليوم وبالكوة يالله قبل ينزل جوة يمنا
وماخذ راحتك وياها واني كاعدة اتكلب بناري

اباوع عليه ابتسم مثل الي يعرف سوالف امه
رهف شافت ابتسامته وحجت بغيض
.. يعني تبتسم وما نكرت كلام امك.
معناها كلام امك صحيح
واني الغبية اكول هي دتحجي هشكل حتى تغيضني
.. رهف وين تردين توصلين بهذا كلامج
.. اريد تطمني وهذا من حقي.

همة يحجون واني احس كلبي كام يفور مو حباً بقاسم لا
بس موقفهم حسسني بالاهانة والذل

قاسم .. مثلا شلون ترديني اطمنج
.. اني مو غبية صحيح انت اتزوجتها غصب عنك
بس اني متأكدة اقتربتلها واخذتها وتممت زواجك منها
لان هذا واجبك بس الي اريد اعرفه ما بعد ذلك
شنو صار من بعدما اخذتها هم رجعت نمت بحضنها
هم همستلها بكلام الحب الي تكوله الي
هم ......

قاسم قاطع كلامها بغضب وكام من مكانه وعيونه عليها

.. لحظة رهف انتي هواي رحتي زايد بكلامج وياي
ترة حبي الج ما ينطيج الحق تتدخلين
وتسأليني عن هيج شي خاص

لا تتوقعين مني بيوم اجي احجيلج
شنو يدور بيني وبين زوجتي
اخذتها ما اخذتها شنو اسوي مو دخلج
هذا الشي خاص بية وما اسمح لكائن من كان يتطفل على خصوصياتي
حتى لو كانت هاي الوحدة انتي الي احبها وشاريها بروحي سامعة لو اعيد

رجعت تبجي
.. ترة اني سألتك لان احبك
ادري بيك مجبور عليها بس اريد اتأكد حتى كلبي يرتاح
اخاف تاخذك مني وتغيرك علية
وبهاي الاثناء سمعت صوت ام قاسم تصيح على قاسم حتى ينزل لان صبوا غدا

جاوبها بصوت عالي وهو يباوع لرهف
.. لحظة حجية هسة انزل

مكدرت الزم روحي حسيت بالاهانة
دفعت الباب ودخلت عليهم

رهف كامت من مكانها متوترة
واني حجيت بغيض واباوع عليهم اثنينهم

.. حبيتي اني هم مثل قاسم انجبغت (انجبرت) على هذا الزواج
الله وكيلج اتزوجته غصب عني

قاطعني قاسم وحجة وية رهف من بين اسنانه
.. رهف طلعي وتركينا لوحدنا

شفتها اتوجهت للباب تريد تطلع وهي مرتبكة
وكفتها
حجيت وياه
.. لا لحظة ليش تطلع هذا الموضوع يهمنا ثلاثتنا
خلي اطمنها على الاقل
بدال ما صاغلك (مصارلك) ساعة تواسي بيها
وناسي نفسك وخطاغك (خطارك)كاعدهنا انت وياها
وما مسوين اعتباغ (اعتبار) لاي احد

قاسم من بين اسنانه .. هدى بلا حجي زايد
ما اهتميت لتحذيره ولا لغضبه لان غضبي عماني عن كلشي
وصار همي استرد كرامتي
باوعت عليها

.. حبيبتي غهوفة اتطمني ماصاغ (ماصار) شي من الي ببالج
تغة (ترة) قاسم لا اخذني ولا سوالي شي فمالها داعي تكعدين تبجين مثل البومة
لان اني ما كاتلة نفسي عليه واذا تغيدين (تريدين)اني متنازلة عنه الج
شبعي بي الف عافية
واصلا اني ..........

بعدني ما مخلصة كلامي وما
حسيت الا وقاسم لزمني من زندي خلع ايدي من مكانها
رفعت راسي اباوع عليه شلون راص اسنانه بغضب
وكرر كلامه وعيونه بعيوني مثل الي كوة لازم نفسه لا ينفجر
.. رهف طلعي برة وسدي الباب وراج

بلعت ريكي وكلبي طفر من مكانه وبلحظتها عرفت من ورة الساني اتعديت حدودي و صحيت الوحش الي بداخله

طلعت رهف من الغرفة
قطع كلامنا دخول هالة المستعجل
.. قاسم بسرعة انزل امي حركت الدنيا
الغدا من ساعة انصب وعمو محمد كام يحجي يكول قاسم وين صار برد الاكل

يمة والله اجيت ابجي من الراحة من هالة دخلت
باوع علية ونفض ايدي
وكال يتوعد.. والله بختج بالخطار وامي
بس بسيطة حسابي وياج بعدين
حجاها وهو يطلع من الغرفة
وركع الباب حيل بكل قوته
كمزنا اني وهالة من مكانا
وصرنا وحدة تباوع بوجه الثانية

هالة .. لج عوبة انتي الظاهر ما رايدة روحج اليوم شيخلصج من قاسم
الله حابج امي درتني اصيح لقاسم
بس اتوقفت من سمعت كلامج يم الباب
ومن طلعت رهف كلت هاي هي قاسم راح يفطس هدى

.. سكتي والله اجيتي بوكتج جان شالني فلقة لو ما ملحكة علية

.. لج ثولة انتي شلون تحجين هيج
وتنطين المجال لوحدة مثل رهف تستغل الفرصة وتاخذ زوجج منج بكل سهولة
لا هي كله بكفة وكلامج بخصوص ليلة عرسكم بكفة
شلون تكليلها ما اخذني ولا اقترب مني

بس الله يستر اليوم قاسم شنو راح يسوي بيج على هذا حجيج
هو امي بكبرها من سألته اليوم عن هذا الموضوع هو اتخبل وكام من يمها معصب
كلنا نعرف بقاسم يتخبل ولا واحد يتدخل بحياته ويعرف اسراره وخصوصياته

هي تحجي واني احس اطرافي بادت وصارت ثلج
من الخوف
.. اني اعغف (اعرف)جنيت على نفسي بزلة الساني
بس غصب عني
يعني خلي نفسج بمكاني
عغوس (عروس) وبصباحية عغسها
تصعد تلكة زوجها كاعد وية حبيبته بغغفة ( بغرفة)لوحدهم
واشوفه شلون يواسيها ويطمنها خاف انجغحت مشاعغها (انجرحت مشاعرها)
بزواجه مني شنو تغيديني(تريديني) اسوي
يعني اني هم بشغ (بشر) والي كرامتي
حتى لو اغذل (ارذل) النسوان
ما تقبل تنهان بهذا الاسلوب مال اخوج

.. يعني افتهم من كلامج
هاي غيرة على قاسم لو شنو

.. هو بالاول خلي احبه وبعدين اغاغ (اغار) عليه
.. شوف هاي ام اغاغ مصدكه روحها
ترة قاسم ما يتفوت مو لان اخوي اكلج هيج بس والله هو خوش رجال

.. وشنو الفايدة واذا خوش رجال
شلون تغديني (ترديني) احب واحد
واني اعرف احساسه ومشاعرة وية وحدة ثانية

هالة.. عزة العزاج يهديوة
كون امي تسمعج شنو تكولين والله تنجلط
جانت معلكة املها عليج تبعدين رهف عن طريق
قاسم تالي حضرتج كاعدة تجمعين راسهم بالحلال

هدى..اي صدك هالة اريد اعرف امج ليش ما تغيد (ماتريد)
قاسم يتزوج غهف بنت عمكم
وهي تعغف (تعرف) كلش زين هو يحبها

هالة.. اهوووو سكتي هاي سالفة طويلة بعدين احجيها الج هسة خلي ننزل
لان امي كلش معصبة
نزلنا جوة واتلكتنا منى
.. شنو وين اختفيتوا تعالوا تغدوا

رحنا اتغدينا وام قاسم كل شوية تباوع علية ويعدين تباوع على رهف
مبين عندها هواي حجي بس متكدر تحجي منا الخطار

خلص الغدا وطلعوا عمامهم
جنت كاعدة يم منى وهالة وكوثر
سرور وفاطمة طلعوا للسوك يردون يشترون
غراض قبل لا يسافرون باجر
اباوع لام قاسم كاعد كدامي تباوع علية
ام قاسم .. هدى تعاي شوية اريد احجي وياج

بلعت ريكي وكمت من مكاني ورحت كعدت يمها
اقتربت مني وحجت بصوت ناصي تسألني
.. اكول يمة هدى. البارحة قاسم اخذج

هي تحجي تحجي واني وجهي صار احمر
عرفت شنو سبب ملحة ام قاسم على اقترابه الي
لان تريد من قاسم ينشغل بية عن رهف حتى تبعدها عن طريقه

.. خالة قاسم مأكد علية ما احجي اي شي يصيغ (يصير) بغغفتنا (غرفتنا )

ابتسمت وكالت .. عفية عليج لازم الزوجة تصون وتخفظ سر رجلها
بس لا تنسين اني امه واختلف

.. عفية خالة لا تخليني بحلك قاسم والله استحي
هو هددني كال اذا تحجين متلومين الا نفسج
واني تعغفين (تعرفين) بدون ميهددني اخاف منه
باوعت علية بطرف عينها مثل الي كلامي ما عجبها
كمت ورة هالة للمطبخ

هالة.. ها اشتغلت استخبارت ام قاسم
.. لج اي تسألني عن قاسم تمت المهمة لو بعدها
.. عزة بعيني امي ولا تكعد
والله عرفتها راح تسألج هذا السؤال
خرب وانتي شجاوبتيها
.. كلتلها خالة قاسم ميقبل احجي بهيج مواضيع
لكائن من كان

هالة ضحكت .. وين جان هذا العقل
من رحتي زعتي الاكو والماكو. كدام ست رهف
جنا نحجي وجان نسمع صوت صياح قاسم وركضته على باب الشارع
رحنا نباوع شنو الصاير
شوية ودخل قاسم شايل زين كصته كلها دم
وراه هشام

قاسم صاح بصوت رج البيت
.. لخاطر الكعبة اريد اعرف هذا وين امه الفاهية عنه

هشام.. هالة ركضي جيبي كطن وديتول

اجتي ام قاسم على صوت قاسم
هي والبنات. منى وكوثر وهديل
كوثر شافت ابنها لطمت على صدرها
.. يمة صخام شبي ابني
هشام.. لا تخافين ديلعب بالشارع وية الجهال ودافعينه
وواكع على حافة الرصيف
على راسه

اباوع لقاسم اخذ القطن والديتول من ايد هالة
ويحجي بغضب
.. بس اريد اعرف انتي شنو سالفتج
ملتهية بشنو وعايفة ابنج بالشارع
غير تنتبهين تشوفيه وين ما وين
انتي فكرج ذا صار بالولد شي راح ارحمج
والله محد يفكج مني

كوثر.. هسه جان يمي يلعب حتى اسأل البنات
جانت تحجي بين الخايفة على ابنها وبين الخايفة من قاسم
واني من يمي ارتعد جسمي عزة هذا ما عنده
يمة ارحميني
كله صلخ ..نتل.. ذبح

ام قاسم.. بالله شو انطيني خلي اشوف جرحه خاف عميق ويحتاجله خياط
زين سمع خياط وهو زاد بالبجي
عاط بي قاسم .. اياني وياك اسمعك تبجي انت رجال
بالله شو امسح دموعك احنا ما عدنا رجال يبجي مثل البنات
ترة ما بيك شي هو شوية دم

اباوع للولد بلع دموعه خايف من خاله وكوة لازم نفسه
وعينه على امه يستنجد بيها
ام قاسم.. يمة قاسم خرعت الولد على كيفك
مدت ايدها واخذت زين من ايد قاسم
كام من مكانه جانت دشداشته البيضة كلها دم

هشام.. روح بدل ملابسك ترة جماعتك راح يوصلون
حتى يتباركولك

قاسم.. اي يمة صدك سوي حسابج جماعتي راح يبقون على العشا
بعدها طلع من المطبخ وصعد فوك
وسمعت صوته صاح
.. هدى كمت من مكاني وباوعت لهالة
استنجد بيها

هي كامت وياي واجتي تطلع وياي
ام قاسم صاحتها .. هالة تعاي هو صاح هدى مرته بس
قابل صاح هالة رايحة تركضين وراها

عزة ام قاسم ما يفوتها شي خرب بالحظ
رحت صعدت فوك واني مترقبة ياربي شورطني وحجيت
شبية انقهرت من شفتهم سوية عساهم نارهم تاكل حطبهم

صعدت فوك واني اقدم رجل واخر رجل
دخلت للغرفة وجان الكاه
لابس بنطلون جينز وديلبس قميص
اجتي عيني على صدره

وضليت مسهسهة وفهيت عالمنظر الكدامي
ابن اللذين والله عليه جسم الا بشدة
قطع علية تأملي صوته
الخشن كمزت من مكاني
قاسم ..سدي الباب وتعالي خلي احجي وياج قبل لا انزل
اتقدمت عليه ووكفت كدامه
رفعت راسي الله يحفظه شكد طويل
حسيت بروحي واكفة بالطابق الارضي داحجي وية واحد بالطابق الثاني

باوع علية وكال
.. شوفي هدى الصار ما راح يتكرر اعرف
انتي كلامج صدر بلحظة غضب
هاي المرة راح اعديها الج لان انتي
بعدج جديدة على حياتي ومتعرفين لاطباعي

اتمنى مرة الثانية تكونين اكثر حذر
وسيطرة على السانج هالمرة سكتت مرة الثانية
ما راح اضملنج شنو اسوي بيج

جنت حابسة انفاسي بداخل صدري اترقب الهجوم والكلام الجارح
مجنت متوقعة واحد بالمية راح تكون هيج ردة فعله
حسيت براحة
وابتسمت بوجهه وعيوني لمعت بأحترام اكثر

.. اوعدك مغاح (ماراح) تسمع مني. اي كلمة بخصوص هذا الموضوع
ما دامك انت تحافظ على كغامتي وتحتغم (كرامتي ونحترم) وجودي

جنت احجي مندمجة
وهو جان يدكم بقميصه ويباوع عليه
باوعت عليه شلون يدكم
جلة صوته مثل الي حس بالجو اتوتر
.. يالله اني راح انزل يم جماعتي جوة

راح اتجه للمرايا مشط شعره وعدل قميصه
ولبس ساعته ورش عطر
ما اعرف ليش حسيت اكو رابط حميمي يجمعنا
الفة غريبة من نوعها
مثل الي يحاول يبدي يتأقلم وية وجود شخص ثاني

اندك الباب واجتني هالة تباوع علية لزمتني
وكعدت تكلب بية
هالة.. ها خية بشري شنو حزام لو بوكس
تحجي وتباوع

.. هههههه سكتي لا حزام ولا بوكس
الحمدلله هالمغة (هالمرة)عدت على خيغ (خير)
شكلي كسغت خاطغه لان عغوس (كسرت خاطره لان عروس)

هالة.. لعد يالله نزلي اجوي خطار علمود يتباركون
بدلي ملابسج وتعاي وراي

بدلت ولبست فستان بسيط كلش حلو ونزلت بعدما عدلت المكياج

اول ما نزلت رحت للمطبخ
لكيت ام قاسم
واكفة يم منى دتحضر صينية التقديم
باوعت علية من فوك ليجوة
لزمت شعري وهزت ايدها

منى وكوثر خربانات ضحك
شكو شبيها ام قاسم اليوم مو على بعضها

.. ادري شنو سالفتج اني اعرف العروس
بأول يوم عرسها شعرها ما ينشف من الماي

منى.. ههههه لااا يمة انتي داهية وربي
صدك ضحكتيني شلون دبرتيها هاي
دخل هشام وراه قاسم وبدوا ينقلون الاكل للمطبخ
ام قاسم .. ها يمة خلصتوا
.. اي حجية وعاشت ايدج عصام يكول هو كل من اجة وكال انا اعرف اطبخ
يابة خلي الطبخ لاهله
وام قاسم هي اهله

ام قاسم.. الف عافية على كلبكم
هشام.. هالة صبي جايات قبل لا يطلعون لان مستعجلين عندهم شغل
اخذت الصحون المتكدسة واخذتهم للمطبخ الصغير الحار حتى اغسلهم والبنات بالمطبخ البارد
شفت قاسم دخل وراي اشو هذا اقترب مني
ودنك راسه وقربه يم اذني وكال
.. عدلي حجابج شعرج طالع

يمة هو اقترب مني يمة غير اجة كلبي يوكف بس هالمرة مو من الخوف
ما اعرف من شنو بس احساس غريب
رفعت راسي واجتي عيني على ام قاسم تتحرك بالمطبخ
وعيونها علينا والحلك مشكوك

والله حيرتني هاي المرية شبيها شتحس
اشو كل شوية يتبدل مزاجها

طلع من المطبخ وكال ها خلصتوا الجاي
هالة.. اي خلصناه وهشام اخذه الهم

بعدها اجتي ام قاسم يمي
.. هدى خالة عوفي من ايدج المواعين
انتي عروس بعدج بأول يوم ميصير تغسلين مواعين
تعالي هالة اخذي من مرت اخوج المواعين
همة يضحكون واني اضحك وياهم مثل الاطرش بالزفة

ام قاسم.. دجيبي الصينية وخليني
اقدم للناس لا عقلي يوكف من التفكير
اخوكم راح يطلعلي كلب ثاني بصف كلبي

طلعت وراها وودخلت سلمت على الخطار
وخلص اليوم بكبره كل شوية يجون خطار
وبعدها التهينا نسوي عشا وصبيناه لجماعته وبعدها

اني والبنات اكلنا سوية وام قاسم اكلها يختلف عن اكلنا
لان سكر مو اي شي تاكل
جنت استحي واكل شوية
حتى بالغدة ما اكلت
وكلما اجوع اروح اصعد لغرفتي بالختلة اكل كم نستلة وانزل
بس النستلة لوحدها ما تفيد.

ام قاسم انتبهت علية وكالت.. ماما هدى
اكلي ولا تستحين هذا بيت رجلج يعني بيتج
اخذي راحتج
.. لا والله دا اكول
.. والله ما ادري انتي داتاكلين مدري الاكل دياكلج
اشو الاكل على حطته باقي
.. والله اني هي اكلي هيج

وبدت ام قاسم تحجيلي وتعرفني على اهلها واهل ابو قاسم
الي افتهمته من ام قاسم
ان همة مو هالكد علاقتهم وية اهل ابو قاسم
هالة.. عفية هالة حاطيها كبش فداء للمهمات الصعبة

ام قاسم.. اشتغلي وانتي ساكتة وروحي صيحيلي ذيج اختج
خلي تروح على غرفة هشام تنظفها
صعدت قبل شوية لكيتها هوسة

ورجعت التفتت علية وكالت
..روحي صعدي فوك لغرفتج وجهزي نفسج وارتاحي
اليوم كضيتوها كلة خطار خطية حتى ما لحكتوا تتهنون
جاوبتها بصوت واهن
.. اي خالة هسة اصعد

انمغصت بطني ذكرتني بالي ينتظرني

صعدت فوك لغرفتي ما اعرف شنو اسوي خايفة
احس بروحي محاصرة
فتحت الكنتور وطلعت بجامة خفيفة تصير حفر
من الصدر وما بيها ردن

اخذتها ورحت للحمام سبحت وبعدها لبست البجامة ونشفت شعري واني بالحمام ولزمت الشسوار الموجود قريب عالمغسلة وكعدت انشف شعري
واتذكرت كلام ام قاسم عن الشعر المبلل وجان يدك الجرس عندي من سبحت ههههههههه يا حظي
والله ام قاسم داهية

خلصت وطلعت من الحمام وجان اشوف قاسم
متمدد عالسرير
نزل نقاله وباوع علية
قاسم.. نعيما
.. الله ينعم عليك

حجيتها واني عيوني تتهرب بكل مكان الا عليه رحت لميز المرايا ورشيت عطر

التفتت لكيته شامر ملابسه عالسرير
رحت عليهم وشلتهم وصرت ارتب بيهم اريد اي شي يشغلني عنه

وعن التفكير بالخطوة الي بعدها
اني بعد الي شفته اليوم هو ورهف وشفت حبه الها
خاف جنت مجرد اسمع بيها هسه شفت هم كولشي بعيني
اشوفه صعب يقتربلي
هسة من شفتهم بعيني صار مستحيل اتقبله
واسلمه نفسي

اجاني صوته من وراي وكال
جان واكف وراي كلش قريب علية كمزت من مكاني
عزة هذا شوكت كام من السرير

وهمس.. تدرين اول ما شفت طول شعرج
حلفت اشبره على ايدي
اقترب علية ومد ايده على راسي وصار يحرك اصابع ايده على طول شعري

وصل لحد اسفل ظهري وكال
.. ما شاء الله عبالك عباية اياني وياج تفكرين تكصينه
لزمت خصلة من شعري وباوعت عليه
.. لا يمة اسم الله على شعغي (شعري)
مستحيل اكصه بدون متكول اني احب شعغي واهتم بي
اقترب علية واني جمدت بمكاني
وهمس يم ركبتي .. الليلة اريد اتوسده واشم عطره

فتحت حلكي بفهاوة .. هاه
شاف فهاوتي على صدمتي ترجم سكوتي عالخضوع
لزمني من ايدي واخذني متجه للسرير

للحظة اتبعته مثل المسحورة غركانة بين الخوف وبين
الفضول
كعدني عالسرير وكال
.. هدى اريدج كلج الي شعرج طولج جسمج
كله اريده احب اتمعن بكلشي يخصج
ما اعرف ليش من شفتج اخذني الفضول
اكتشف كلشي بيج

عرفت ان ساعة الصفر قد حانت
مال راسه وعيونه بعيوني
وقرب شفايفه
كلبي وعقلي يتصارعون
والثنين يسألوني هدى ترضين تعيشين بقية حياتج تحت الظل
انتبهت عليه بدة يميل جسمي عالسرير حتى استلقي على ظهري اتبعني وصار يعتليني وانفاسه الحارة تلفح وجهي
كلبي من الخوف يريد يوكف غصب عني نزلت دموعي
ما اكدر والله موبيدي ما اكدر اسلمه نفسي واني اعرف
جايني علمود الواجب وكلبه وية وحدة ثانية
اموت ولا هذا الذل

اتفاجيء بحركتي شكله مثل الي دايخ وذايب
عقد حواجبه وكال
.. شكو شبيج هدى ترة البارحة تركتج براحتج علمود جنتي خايفة واول ليلة الج
بس اليوم لا تتوقعين مني اتركج بدون ما اخذج
كمت من مكاني وخليت مسافة بيني وبينه
.. لحظة قاسم
بللت شفايفي والدموع غصب عني تنزل

.. هسة شكو ليش تبجين
سحبت نفس عميق وقويت نفسي منو ياخذ بحقي غيري اني لازم اصير قوية واوجهه ماكو تاليتي اروح بالرجلين هو يصفى لرهف واني انكسر

جليت حنجرتي وبديت
.. قاسم انت مو ذاك اليوم قبل الزواج كلت ان
انت زواجنا مفاجيء ومجنت متوقع ان بيوم اصيرغ (اصير) زوجتك وكلتلي انت تحب بنت عمك وحتى لو اتزوجتني ما ناوي تغيغ (تغير) اتفاقك وياها وبعدك ملتزم بوعدك بالزواج الها
. اي صحيح
.. زين تتذكغ (تتذكر) شنو كتلتلي بلحظتها وعدتني ان انت
تغيد(تريد) اتمم زواجك وياي علمود حجي الناس وان هذا واجبك اتجاهي ولازم تسويه
وبيومها طمنتني وكلت
ما اغيد (مااريد) اظلمج واكسغ (اكسر) بختج

.. اي صحيح واني بعدني مصر على كلامي مستحيل اظلمج

زين اذا انا متنازلة عن واجبي
لان اني مستحيل اخليك تقتغب (تقترب) مني واقبل اسلمك نفسي
وانت  احساسك وفكغك (فكرك)وكلبك وية وحدة ثانية

.. هذا كلامج ما له داعي مو انا الي غصبتج عالزواج
ابوج هو الي جبرج
وانا ما اريد اكسرج واظلمج مثل ابوج واخليج علج بحلوك الناس الما ترحم

وانا اريدج على حب الله لا تخافين ما راح اخليج تحسين
بفرق او بتقصير سواء بالفراش او خارجه
.. لا قاسم اني ما اريدك تقتغبلي (تقتربلي) حتى تشبع غغيزتك (غيزتك)عندي
ساعتها صدكني اذا ابوي غصبني وكسغني مغة (كسرني مرة)
فانت اذا جبغتني (جبرتني)واخذتني غاح تكسغني عشغة اضعافه (راح تكسرني عشرة اضعافه)

قاسم اتمنى تفهمني وتسمعني

اباوع عليه فرك وجهه وكعد عالسرير
يباوع علية وكأنما اول مرة يشوفني
.. اتفضلي احجي اسمعج
..
مثلما انت مخطط لحياتك وناوي تتزوج الي كلبك يحبها
اني هم مثلك حالي حال اي بنية
حلمي اتزوج واحد يحبني يردني الي لنفسي ونفتح اني وياه بيت يلمني واكون اني ام اولاده والاولى والاخيرة بحياته اعتقد مو هواي علية

بس مع الاسف اني يتيمة وما املك لا حول ولا قوة
حتى اختيار حياتي
اني مو بس يتيمة ام لا اني حتى يتمة الاب
لان ابوي سبب بكل ذل وكل مهانة كاعدة امر بيها بهذا الزواج ظلمني والدنيا ما رحمتني

عقد حواجبه والنار تسعر من عيونه

.. يعني شنو افتهم من كلامج ان انتي
ما تردين اخذج هسة

..اترجاك لا تفرض نفسك علية بحجة الواجب او الغريزة والله تجرم بية وبعمري
انت مو كلت اني اشبه اختك هالة
زين احلفك بالله لو اختك تصير بهذا الموقف
ترضى عليها تشوفها مهضومة وتنهان بهاي الطريقة
ا
.. زين شنو الحل بفكرج يعني انا رجال وانتي مرتي
لشوكت ابقى مانع نفسي عنج
لنفترض اني وافقت انطيج فرصة تتقبلين وضعج وياي
زين لشوكت

جان يحجيها وهو عاكد حواجبه وكوة لازم اعصابه
شكل كلامي ما يصرفله بس جانت بعيونه لمحة
من الرحمة خصوصاً من ذكرت اخته هالة واليتم مالتي
مر بعيونه طيف انكسر خاطره علية

استغليت الفرصة وكلتله
قاسم اني سلمتك حياتي وداخلة على الله وعليك
اريدك تصبر علية لحد ما انت تتزوج رهف وتشوف حياتك
وتطلكني واني هم اشوف حياتي وبهاي الفترة اريد اكمل كليتي واتعين حتى اكدر اعتمد على نفسي
وما اصير تحت رحمة ابوي

والله تسويلي جميل ما انسالك اياه طول عمري
وتكسب اجر وثواب بوحدة يتيمة الزمن حطها يم
بابك لا تحطمها

جنت لطالما احجي جانت دموعي تنزل احس جنت ابجي على غربة الزمن والوكت الي خلاني
استنجد بشخص ان ينقذني ويجتثني من حياتي
والله الموقف صعب

كام من مكانه وباوع علية وسحب نفس عميق
وكال ........
يتبع

#اساور_الفضة
#نهى_الحسون
#البارت_الثالث_عشر

هدى
جنت واكفة
حابسة الانفاس مترقبة خايفة
اباوع عليه ومعلكة كل امالي على قرار قاسم
ولا زالت دموعي دتنزل بتوسل

كام من مكانه
وسحب نفس عميق ومسح وجهه بكفوف ايديه وباوع علية
وكال.. شوفي يا بنت الناس
انا بية طبع
شغلتين ما اتحمل اشوفهم واوكف كدامهم عاجز
الي هي دموع امي وخواتي والثانية دمعة اليتيم
وانتي شكلج عرفتي شلون توصلين لضميري
وتلزمييني من الايد التوجعني وتكسبين عطفي

جان يحجي وانا كلبي طار بأمل ورفرف بجناحه
مثل العصفور

كمل كلامه
.. بس خلي افهمج قبل كلشي حتى يكون عندج علم
شنو تبعية اختيارج
اريدج تعرفين ان عقوبة المرة هي هجرها بالفراش
واي مرية راح تعتبر هاي اهانة وظلم بحقها

وانا من هسة احذرج مو بعدين تجيني
وتكعدين تندبين حظج وتشتكين من التقصير وياج
اريدج دائما ًً تتذكرين ان هذا جان اختيارج

هزيت راسي بموافقة وبكل لهفة اكدت
موافقتي بالكلام
.. اني واثقة من قغاغي (قراري )
عندي عقوبة هجغي بالفغاش(هجري بالفراش) هواي اغحم (ارحم)واهون علية
من ان تمم زواجك مني هسه
ويمكن اتعلق بيك ومو بعيد حتى اخلف منك طفل
وبعدين انت تغوح (تروح) وتخذلني وتتزوج علية غهف
واكون بساعتها خسغت (خسرت) كلشي

على الاقل بهذا قغاغي (قراري) يكون عندي الامل
ان من تتغكني (تتركني) وتتزوج غاح اكدغ (راح اكدر) ابدي حياة جديدة

.. خلاص ما دام انتي متأكدة من قرارج
لعد هذا هو يجرالج التردنيه
اساسا اني تزوجتج بس حتى ارضي امي
اما اذا على النسوان وغريزتي مثل متكولين تره الدنيا مليانه

بس مادام هذا قرارج ماشي
اوعدج راح تعيشين تحت ظلي معززة ومكرمة بهذا البيت
لحد ما الله يفرجها عليج
حالج حال الموجودين ماراح نزيد جدرنا علمودج
احنا دائما نطبخ جدورة كبار وبيتنا مليان خطار
راح اعتبرج دخيلة عندي لان نخيتيني
وطلبتي الامان مني حتى احميج من ابوج

شايفين شعور البنية من تكون عايشة طول عمرها
معتمدة على نفسها بأخذ حقها وتحمي نفسها بنفسها
راح تكون دائما واكفة ومستعدة بأي لحظة
تكشر الدنيا عن انيابها وتاكل وجها

بس موقف قاسم وكرمه وشهامته وياي
صدمني مجنت متوقعته راح يستجيب لطلبي منه
لذلك وكفت عاجزة كدام كرمه وشهامته
ومتعجبة وبنفس الوقت مستغربة

حقي اكون متعجبة بتصرفة لان جان هذا الشي جديد علية
واول مرة بحياتي اجرب شعور الامان قرب رجال
لان عثرات الزمن خلتني اكون اكثر حذر من الرياجيل
وما اامن روحي بيدهم بسهولة
من ابوي ورائد وبعدها ليث وسيف صرت ما اثق بأي رجال
باوعت عليه بامتنان وبجيت وكلت

.. الله يجبرغ خاطغك مثلما جبغت خاطغي
(الله يجبر بخاطرك مثل ما جبرت خاطري)
والله يهنيك وينولك الي ببالك

.. بس اريدج تخلين ببالج اني لهنا ويخلص واجبي وياج
وبما ان انتي اتنازلتي عن حقوقج بهذا الزواج
اذن بعد لا تتوقعين مني اداري مشاعرج
وبعد مو من حقج
تسوين مشهد درامي مثل اليوم من شفتينا اني ورهف
كاعدين سوا لوحدنا
اليوم لحد الظهر جان الج كل الحق تنقهرين وتكعدين تحاسبيني
وتطالبيني برد الاعتبار
لان فعلا كنت غلطان بحقج بلحظتها بكعدتي وية رهف لوحدنا
وجنت ناوي هذا الشي ما اسمحله يتكرر
لان مهما كان انتي مرتي والج يمي حق الاحترام

بس بعد ما اتنازلتي عن حقوقج يمي
بعد منا ورايح
ممسموحلج تعترضين على تواجد رهف وقربها الي
ووجودها بحياتي والتزامي وياها
وبعد ما مجبور اسويلج حساب بأي شي يخصني اني ورهف
ومراح اكعد اداري مشاعرج

.. اكيد هذا من حقك
لان هذا واقع حال وبس خليني اكولك شي
مادام احنا بموقف دنحجي بصغاحة (بصراحة)
هي غهف بكل الاحوال موجودة بحياتك
سواء اني وياك تممنا زواجنا او لا
والكل يعغف (يعرف) هي مسألة وقت
غهف تخلص دغاسة (دراسة ) انت تتزوجها ثاني يوم

اني كل الي اغيده (اريده) منك
ان تكون بكد كلمتك وياي

.. خلاص هذا هو اتفقنا
اني بالنسبة الي مكذبت عليج من البداية كلتلج احب بنت عمي
جنت اريد اتقربلج عادي يعني لان صرتي زوجتي وامر واقع
ولازم اسوي واجبي اتجاهج
وبالنهاية انتي بنية وحلالي وكاعدة تفترين كدامي
شتريدين اسويلج يعني
على كل حال اني موافق
بس قبل لا اروح انام
سمعيني زين وعلكي هاي الكلمة ترجية بأذنج
كلامنا هذا ما اريده يطلع لباب الغرفة
اذا اسمع بيج حاجية لاحد عن الصار
اعتبري روحج انتهيتي صدكيني احطمج وما يرفلي جفن
ومو تكولين ماكال قاسم

هزيت راسي بأمتنان
.. هاي هي صاغ (صار).
والله وعد مني ما غاح (ماراح) تسمع مني كلمة بخصوص هذا الموضوع

باوع علية نظرة اخيرة مثل الي ديكتشف كائن غريب
يستحق الملاحظة

بعدها دار وجهه وانطاني ظهره
اتوجه للسرير ونزع تشيرته وهو يمشي

جنت اراقب حركاته واباوع عليه
وجان توكع عيني على وشم بظهره اجة يوكف كلبي

جان واشم على ظهره صورة صقر فارد جناحاته
وكاتب جملة انا حر مثل الصقور بحروف انكليزية
انسيابية
يعني فعلا صورة الوشم جان يمثله
شكله ومضمون

اباوع عليه اتمدد عالسرير وحط ذراعه على وجهه
وكال .. شنو جنية راح تظلين واكفة
تباوعين علية امشي روحي طفي الضوة خلي انام

رحت طلقة طفيت الضوة
وصارت الغرفة ظلمة
وهسة شنو وانا وين اروح اشو هذا نام عالجرباية وعافني
زين اني وين انام شوف الحظ

يالله هدى لاتكعدين تتدلعين بالله شو روحي دبري امورج
مو انعم الله عالرجال لحد هسة ساكت عليج
ما لازمج وساحلج لحد هسة
عاد لا تختبرين صبره
ابتسمت على روحي صرت احجي وية نفسي مثل المخبلة

كعدت اتلمس طريقي بالظلمة
رحت اخذت نقالي وضويت شوية حتى اشوف
ا دور على شي افرشه بالكاع ماكو

بس بالاول خلي ابدل هذني ملابسي اذا جنت
اريد الرجال يلتزم بكلمته وياي فلازم احترم نفسي
والبس شي ما عليه العين وما الفت انتباهه علية
مو لابسه هيج كدامه واكوله لتباوع علية

بدلت البجامة ولبست دشداشة تركية سبورت
نص ردن وطويلة وصدرها دائري
بيها ٣ دكم عالصدر جانت مستورة ومريحة للنوم نفس الوكت
خرب هاي شنو ماكو فراش
اتوجهت للباب اجيت اطلع اجيب فراش
وجان اتذكرت
ام قاسم وحركة الاستخبارات

لا لا ما اطلع خلي اكعد واسكت ما اكدر اجازف وية ام قاسم
خاف تلزمني وتنزل بيك دك اسألة شي يفكني منها
عاد هي ذكية وتصيدها وهي طايرة
ورة ربع ساعة من التفكير سمعت نفسه استقر
وماخذ راحته شكله غط بالنوم

رحت امشي بتجاهه على اطراف اصابيعي اقتربت منه ودنكت عليه وسلطت ضوة النقال على وجهه
باوعت عليه لكيته رايح بسابع نومة

لفت انتباهي
مغمض عيونه ورموشه معقوفات ليفوك
بحيث عبالك حاطلهم مسكارة. اني البنية
مو هيج رموشي كثيفات ما شاء الله

جان نايم على بطنه على جانب السرير
ولابس بس القطعة التحتية من التراك

اهووو الله يلعنك يالشيطان هسة انا كعدت احلل
الرجال وهو نايم عمة حتى عمة شكد ملكوفة
بس شسوي لروحي اني هدى ام الفضول

فعلا اول مرة بحياتي اكون بهذا القرب والخصوصية وية رجال
فيمكن حب الاستطلاع ديخليني
اتمعن بكلشي بي. واتعجب عليه

رحت على الجانب الثاني من السرير
اي بس اليوم انام عالسرير
ومن باجر اشوف شلون يصير الترتيب
هسة هو ماخذ جانب واحد وتارك هواي فراغ عالجانب الثاني

ما اتوقع راح يأثر عليه
اقتربت وكعدت على كيف على حافة السرير
وجنت حريصة حتى ما اطلع صوت

حطيت راسي عالمخدة انتبهت عليه كسر خاطري خطية نايم وما متغطي

كمت وسحبت الغطا وفتحته وغطيت روحي ونمت
ملفوفة لف بالغطا عبالك دولماية

عدلت راسي عالمخدة واتثاوبت بنعاس
واخذتني الافكار لخواتي
هسة شنو البنات مروة وشيماء وضحى ومريم
من بعد العرس هم التقوا واجتمعوا وية بعضهم

لو منتظرين يوم الجمعة مثلما كالت مروة يوم الجمعة
تعزمنا اني وخواتي لبيتها

شيصبرني منا للجمعة بس يالله نصبر شعدنا
اي صدك كون اتذكر حتى انطي خبر لقاسم
بروحتي واشوفه شنو يكول

واوف وكون باجر اتذكر اتفق وية هالة علمود دوامي
بالكلية شوف شنو تقترح علية

تاخذني وياها لو ابقى وية الخط القديم مالتي يوصلني نفسه
وبعدها صرت افكر بحياتي وية قاسم
شكد راح تستمر ويطلكني

اني ما عندي مانع شوكت ما يعجبه يطلكني
ولوما اعرف سليمة وابوي راح يسودون عيشتي
اذا هسة طلبت الطلاك من قاسم ومحد راح يرحمني

ربي يهنيه ويسعده وية رهف
جميله وفضله وياية راح يبقى دين
بركبتي طول عمري
شوية شوية اتخلى عقلي عن حذره
وسحبني النعاس الى احضان النوم متقلبة بين ثنايا السبات العميق

شيماء
كاعدة اطبخ الغدة لباجر
واضمه حتى من ارجع من الدوام بس احميه
بعد زواج هدى صرت اسوي الغدا بالليل واظمه بالثلاجة

سليمة وبابا لا زالوا على نفس وضعهم يريدون مني كل شي اسويلهم
ويطالبوني بتلبية واجباتهم بكلشي طبخ غسل ملابس تنظيف
مصرف

دا افكر اكعد وياهم واتفق وياهم على نظام جديد
لهذا البيت

بعد اني ممجبورة اكعد مثل قبل البي طلباتهم
لان بعد ما عندي شي يجبرني اوفرلهم احتياجاتهم
اشو هدى وراحت وضحى ببيت رجلها واني بالمستشفى
وسليمة عندها راتبها وبابا رجال خلي على الاقل يشيل مصرفه عني
لشوكت اني ابقى اصرف عليهم

سليمة .. شكو اشو كاعد تحجين وية روحج شبيج تخبلتي
باوعت عليها .. ماكو شي بس جنت افكر بموضوع
بخصوص هذا البيت
وكلت منا ورايح اريدكم تشاركون وياي بمصرف البيت
وتساعدوني ترة منا ورايح اني اشيل ايدي

من مصاريف البيت
سليمة.. سمعيني زين انتي ما تمنين علية
بفلوسج ترة انتي وخواتج وابوج كاعدين ببيتي
وانا الي مسوية فضل عليكم ولوما بيتي جان انحجت حجايتكم

واليوم الي تفكرين بي تشيلين ايدج من المصرف
بهذا البيت
تلمين غراضج وتطلعين من بيتي
لان انا مو بعازتكم لا انتي ولا ابوج ولا خواتج
عندي بيتي وعندي راتب الرعاية الاجتماعية

والله شايل حمالتي فلا تكعدين كل شوية تهددين تسحبين
المصرف من البيت اعتبري هذا ثمن وجودج هنا

دارت وجهها وطلعت من المطبخ
وكالت
.. قبل لا تنامين قفلي البيبان وراج لان ابوج اتصل علية وكال راح اتأخر لا تنتظروني

جنا نحجي وجان نسمع صوت الجرس يندك
نشفت ايدي بالمنشفة وباوعت للساعة جانت الساعة ب١١ بالليل
سليمة.. منو اجانا بهالليل لتكون هم اختج جايتنه مكتولة

.. ما ادري هسة اشوف منو
وطلعت للباب اشوف منو اجانا

وسليمة اجتي وراي ووكفت يمي
واني فتحت الباب وسليمة مدت راسها
وسألت .منو

سمعت صوت رجال جبير سلم عليها وسألها
وكال .. حجية اثير وين اريده بشغلة كلش مهمة

جان يحجي وية سليمة وعيونه علية. اكلتني اكل
عمة حتى عمة شلون يباوع هذا الشايب

ابتعدت عن نظره وصرت ورة الباب اسمعهم شنو يحجون

سليمة كملت كلامها .. يا خالة منو اكله من يجي

.. كليلة اجة عليك شاكر صاحبك

اتسعت عيوني عرفته هذا نفسه الي عمو امجد
يضوج منه ويكول عنه طلع من السجن وبدت المشاكل

اهووو هذا هسة يرجع يحوم فوك راس ابوي
اكيد هسة جايبلنا مصيبة

سمعت سليمة سلمت عليه ودخلت وسدت الباب
وهي تكول

.. الله يستر شاكر بنفسه اجة يسأل عن ابوج
والله ما عرفته هواي متغير وكبران

اتصلي على عمج امجد خلي باجر يشوف ابوج شعنده رجع وية صخمان
قبل لا يجيبلي بلوة جديدة على راسي

...........
هدى
جنت اركض بالشارع كلش خايفة
واتلفت اكو رجال يخوف مشورب يركض وراي
مبين عليه من عيونه يريد يسويلي شي
لكيت باب بيت سليمة مفتوح رحت اركض.
وصلت يم الباب ردت ادخل
وجان انضرب بكصتي بالباب
عطت بصوت وصرت ابجي مثل الطفلة
دخلت للبيت ادور على خواتي جان الكة امي
واكفة

بلحظتها شكد جنت خايفة بس من شفت امي
زال خوفي ورحت ركضت عليها وشمرت نفسي بحضنها
اتلكتني ولمتني بين ايديها وحضنتني

جنت ابجي واشتكيلها على ضربة راسي
وهي صارت تمسح بدمي الي ينزل
من كصتي بطرف ثوبها

وكالت .. منو مبجي الجنية بنتي
جاوبتها.. يمة كلهم اذوني
اباوع عليها جرت حسرة واتغير لون وجهه
مثل الي اختنكت
وكالت.. سلمتهم بيد الله
بس كلما تحجي تتخربط صحتها بالزايد

باوعت عليها بخوف وصرت اتوسل بيها
ان ما تقهر نفسها علمودنا
بس مع الاسف زادت حالة امي سوء عبالك راح تموت
اتخبلت واني اترجاها
.. يمة ابوس ايديج لاتعوفينا والله محتاجينج

اباوع عليها رفعت عيونها وباوعت وراي التفتت
شفت شيماء واكفة وراي
كالت.. لشيماء
.. شيماء يمة انا مو انطيتج خمس سوارات اشو لابسة بس اربعة
شيماء رفعت ايدها تباوع عالسوارات
ورفعت عيونها لامي متفاجئة
وكالت.. يمة والله ما انتبهت على عددهم عبالي لابسة خمسة
اباوع لامي حزنت و انتكست صحتها بالزايد
واني خفت بالزايد عليها
رحت سندت امي
وضميتها لصدري حيل وكلتلها
اذا تردين ترحين اخذني وياج ولا تعوفيني هالمغة (هالمرة)

ومثل كل مرة
صرت احضن بيها وابوسها واتنفس ريحة ثيابها
عبالك اريد اخزن عطرها بذاكرتي

بس مع الاسف امي كامت تدفع بية عنها
وكل شوية احس تقوة دفعتها تريد تبعدني عنها
لان جنت متعلكة ومتمسكة بيها ما اريد اتركها تعوفني

بس ما اعرف اشو صوت امي الدافي
انكلب وصار خشن وكالت
.. جنية ستري على روحج وخري عني لان حركتي عشيرتي

عقدت حواجبي مستغربة همست بصوت واهن
.. ليش يمة تصديني
لحظات سمعت امي تكلي
.. يا صلوات على النبي ونوب صرت امها
لج هو انتي مو مال احترام شجابج هنا

جان الصوت قاسي على مسامع اذني
غمضت عيوني بحزن وفتحتهم
وجان اشوف وجهي مزروع بركبة قاسم
وداخلة جواه مثل الكتوت من يختل جوة جناح الدجاجة
والله عيناً وضعي وية قاسم

حسيت على ايد دتزحف من تحت الغطا على طول
رجلية عبالك مثل الحية من تبدي تتوغل
وبلحضتها وعيت على وضعي وية قاسم
جنا اثنينا تحت الغطا
شهكت بصوت مفزوعة قريب عالصرخة
وبدة عقلي يستوعب مكاني ووضعي

وهو فز من مكانه مصدوم مثلي

عطت بي ودفعته من صدره اريد اسحب نفسي من جوة حضنه
وحجيت بكل عصبية واني كلي ارجف
.. ها قاسم وين وعدك الي

ابتعد عني وهو يلعن ويسب
قاسم بغيض .. هو من وراج وورة سوايتج
يبقى وعد .. كلمة شرف ؟؟
يعني احلفج بالله رجال نايم على حب الله
اشو فجاءة و ما احس الا وانتي داخلة جوة حضني
ونزلتي علية بوس وحضن وتتوسلين بية
حتى ما اعوفج

كعدت على حيلي بالسرير واني حاصرتني البجية والفشلة

.. عليك الله لا تفهمني غلط والله جنت احلم بأمي
لا يغوح تفكيغك (لا يروح تفكيرك) بعيد

.. زين انتي الي متغيدين يغوح تفكيغي بعيد
بربج اكو واحد كايلج انا ملاك
شكالتلج روحج من اجيتي ونمتي يمي
عالسرير

ارتبكت وحجيت ادافع عن نفسي
.. والله البارحة كله ما نمت ادوغ (ادور) على فراش
حتى انام بالكاع بس ما لكيت وخفت اطلع وامك تلكفني
واحنا ما عايزين اسئلة جديدة
فشفتك نايم وتطمنت
كلت بس هالليلة انام وباجر ادبر اموري

عفس وجهه ورفع شعره المهوس للخلف
وكال
.. ضروري لازم تسويلج حل لهاي المصيبة
شوفيلج اي مكان تنامين بيه
بالكاع فوك الكنتور جوة الجرباية
اهم شي مو يمي
هالمرة هم راح امشيها الج
مرة ثانية الكاج نايمه بحضني حضري نفسج للفقرة الي وراها

اليوم حلمتي بأمج وكعدتي تحضنين وتبوسين
خاف الحلم الجاي تحلمين بأختج شيماء واروح انا بالرجلين

صارت خدودي حمر نار من الفشلة شكد زحمة
حجيت اريد اغطي على احراجي كدامه

.. احمد غبك وشكغه (ربك وشكره) اني جنت احلم بأمي
مو زين ما حلمت بسليمة جان شبعتك غفس (رفس) وسب
ومو بعيد تلكاني حاطة المخدة على وجهك حتى اخنكك

جنت احجي واضحك عالمنظر
.. لا ما ناوي انتظرج تحلمين مرة اللخ
بالله شو كومي من يمي وطلعي برة

كمت من مكاني وانسحب الغطا وياي بأثناء مكمت
اشو هذا عاط بية وكمزني

ورجع سحب الغطا واتغطى بيه
حجة من بين اسنانه وهو يعدل الغطا على خصره
.. عوفي الغطا وطلعي برة
.. شكو شبيك كمزتني الله يلعن بليسك هاي كله علمود
سحبت الغطا منك

عقدت حواجبي والفضول الهداوي يقرة الف
اريد اعرف هذا شبي عبالك واحد واكع بمأزق

كال بغيض يريد ياكلني
.. خرب بالقسمة السودة بالله هاي شحجي وياها
ولج جنية غير بختج بالغطا باقي ساتر علينا

باوعت بوجهه واني احس اذاناتي طالت مثل الحمار
والله حرام بالحرم اذا افتهمت كلمة وحدة منه
كضاها علية بس يزمخ

فزيت مفزوعة على صوته
.. تتحركين منا وتطلعين لا والله اجي اسحلج
وما تلومين الا نفسج

اني هي كمزة وهي فلتة طلعت من الغرفة ما يشوف الا غباري

سديت الباب وراي واني اعدل بهوسة شعري
جانت مرتبكة وخدودي حمر

جان تطلع ام قاسم من غرفة هشام
اسمعها تكله
.. يالله يمة هشومي هم يالله تكوم
تروح على شغلك قبل لا يكعد قاسم ويلكاك ما رايح ويلعب بيك طوبة
التفتت وسدت باب غرفته وصارت بوجهي
اباوع عليها كصتني من فوك ليجوة

وضحكت ماعجبهة.. ماما هداوي شبيج طالعة من غرفتج مستعجلة بالله شو دكمي ثوبج
منو راكض وراج ومنا ورايح ديري بالج
ترة هشام هنا وعيب يشوفج بهيج منظر

باوعت عالباب وراي
.. شنو قاسم كعد لو بعده نايم
هي تحجي واني صرت بنص هدومي
ياربي وين انطي وجهي من قاسم وامه واحد يرفع والثاني يكبس
.. اي خالة هستوة كعد وكلي نزلي سويلي غيوك (ريوك)

.. ما يحتاج انا مسوية الريوك ومخلصته
فوتي بدلي ثوبج وتعاي نزلي حتى تسلمين عالبنات قبل لا يسافرن

اباوع عليها دارت وجها وراحت على غرف البنات
وفتحت الاضوية ودخلتهم انذار جيم

ظليت واكفة يم الباب مثل الطالب المعاقب شلون ياربي
والله ورطة. قاسم طردني من الغرفة
وامه ترجعني للغرفة

وعلى هالحسبة طلعت ام قاسم من غرفة هديل وهي تستعجلها تنزل وراها دوام
وشافتني واكفة بمكاني وخزرتني

عاد اني بس شفتها نظرتها
كبل ركعت بالكاع وصرت اتلمس بيها
سويت نفسي ادور على شي وهمي ضايع يم الباب
.. ها شنو تدورين
جاوبتها واني ملتهية ادور عود مشغولة
.. تك ترجيتي وكعت مني وكاعده ادور عليها

وصرت من زود الحماس ازحف مثل الطفل على ركبي
وايدي عبالك صدك ضايعلي ذهب

اجتي ووكفت فوك راسي
.. انتي متأكدة وكعت منج هنا
اشو تراجيج اثنينهم ما لابستهم

بلعت ريكي الله يلعن حبل الجذب شكد كصير
.. هههه لا خالة اني جنت لابسة بس ......

وجان ينفتح الباب وقاسم يتعثر بية زين ما وكع الرجال على وجهه

ام قاسم.. الله .. الله .. زين ما وكعت
اي غير تنتبه شبيك طالع مستعجل

قاسم ونظرة العثرة المفاجئة بعدها على وجهه
جاوبها وهو يباوع علية
.. هو شنتبه اذا انا متزوجلي جنية كل شوية
ومكمزتني وطالعتلي بمكان

جان يحجي ويباوع علية
بين ما همة جانو ملتهين بالسوالف اني كمت من مكاني
اريد احافظ على بقايا ماء وجهي وارجع لغرفتي

بقوا همة يحجون واني فتت للغرفة وبوجهي للحمام
وسديت الباب وظليت منتظرتهم

شوكت ينزلون
والله وكأنهم سمعوا كلامي وراحوا ونزلو جوة
اتنهدت براحة يمة
الله يلعنك يالشيطان
شلون حظ علية اطلع من موقف محرج اوكع بالاقوى منه

غسلت وبدلت وحضرت شالي ونزلت جوة
وجان اشوف قاسم وهشام والبنات محضرين نفسهم
يردون يسافرون سرور وفاطمة وجهالهم

اباوع للبنات يحجن وية اخوهم قاسم
فاطمة.. قسام خوية ليش هشكل مكلف روحك
ومحمل سيارة سفرنا بالغراض والمشتريات
والله خيرك مغركني

انتبهت عليه اتهرب محرج من الموقف
عرفت بي يضوج من المواقف الحساسة

قاسم.. يابة هذا واجب ما مسوي عليكم فضل
انا اخوج شنو نفعي الكم
سرور.. ربي يعلي مراتبك وتبقى دوم رافع راسي

اول مرة بحياتي افتقد لشعور الاخ
يمكن اني وخواتي لو عندنا اخ جان هواي امور اتغيرت بحياتنا

حسدتهن على اخوهن اتمنيت عندي اخ مثل قاسم
هيج يحن علية

ااباوع عليه باس سرور من راسها وحجة وياها بصوت ناصي
بس اني لان جنت وكافة وراهم دا احضر اكواب الجاي
سمتعه شنو كللها
.. البارحة سويتلج فركة اذن لرجلج وضبيته شوي
حتى يبطل يكمز ورة كلام اهله

رفعت راسها وباوعت وعيونها تلمع بفخر
.. ههههههههه الله يبرد كلبك مثلما بردت كلبي

بعدها بنص ساعة راحوا البنات وسافروا

وهديل وهالة راحوا للدوام
واني بقيت يم ام قاسم

من فرغ البيت وصرت اكدر اتعلم عليه براحتي
ما اهتميت اني عروس ومن هاي السوالف ولازم
ما اشتغل ثلاثة ايام

انتبهت لروحي تلقائيا
صرت اساعد ام قاسم
بالمطبخ وبعدها سألتها عالمنظفات
ام قاسم.. يمة هدوشة عوفي من ايدج لاحكة عالشغل

.. خالة شنو السالفة انتي البارحة مو كلتي هذا بيتي
لعد اذا مو اني انظف بيتي منو ينظفه

.. روحي يمة الله يرضى على بطن الحملتج

جان قاسم كاعد بالبيت يحوم شكو شي خربان كلوب
واير .. مغسلة اي شي كعد يصلح بيهم
ام قاسم.. خطية قاسم كوة. لازم روحه ما يطلع للشغل ما متعود يكعد بالبيت
متشوفينه كاعد يطلع شغل من جوة الكاع
باوعت عليه مندمج يشد ببراغي ميز الطعام
وملتهي يحجي بالنقال
عفية نقال ما بطل كل شوية واحد متصل عليه
علمود الشغل
لو طالع للشغل احسنله
هسة شنو افتهم من كعدته بالبيت

بعدها كعد عالميز وكال
سويلي جاي ورحت دخلت للمطبخ اسويله جاي

واسمعه يحجي وية امه عن
سالفة عمه منير
ام قاسم.. قاسم يمة بداعتي عليك
لا تسويلهم شي يبقى هذا عمك وهذا ابن عمك
سلمهم لله

قاسم.. خاطرج عزيز عندي
بس مو انا الي اسكت عن حقي وحق خواتي الي نهبوه
مال اشوف منتصر العار يرجع للعراق وكأن شيئا لم يكن
هاي حجاية شيلها من بالج

لا منير ولا عشره منه يوكفون بعيني
خليهم علية ولا تكعدين تشلين همهم

.. يمة انا خايفة عليك
ما اكدر اشوفهم يلتفون عليك مثل الذياب
ويعرفون بيك لوحدك

.. عفو عليج حجية منو كلج انا وحيد
ترة صحيح انا وحيدج بس مو لوحدي
الله وهبني اخوان دنيا
ينشد بيهم الظهر الكاهم عند يمناي بالفزعة
همة يحجون واني اتسمع لكلامهم
خوف ام قاسم وهوسها بأبنها قاسم
جان كلش واضح

خطية وحيدها شكلهاراح تبقى تشيل همه
حتى لو كبر وصار رجال مو بيدها

اخذتلهم الجاي وصعدت فوك لغرفتي
وقررت اتصل على شيماء واسمع صوتها احس كلبي
مشتاق يسمع همسة الحنان بصوتها
يا بعد عمري شومة

باوعت للساعة اي هسة هي بالمستشفى فترة الاستراحة
بالله خلي احاول اتصل عليها
بلكي ترد

اتصلت واجاني صوتها
سلمت عليها بكل لهفة وهي هم جاوبتني
وكعدت تسألني عن حالي ووضعي ببيت عيالي ووية قاسم
جنا ثنينا عندنا حجي هواي وما ينفع بالاتصال
نحجيه
.. اي صدك شومة حلمت بأمي اجتني بالحلم
وانتي موجودة وياي
وصرت احجي لشيما عن حلمي جنت اريد اعرفله
تفسير

سكوت شيماء لفت انتباهي
.. ها شومة اشو سكتي شنو تفسيغ (تفسير) الحلم
شيماء بحسرة.. هدى ما اعرف بس خليني اتأكد واكلج
بعدها استأذنت مني تريد ترجع تكمل شغلها خلصت فترة الااستراحة
شيماء

سديت النقال من هدى بعدما اتطمنت عليها
وبقى كلامها عن الحلم يرن ببالي
بحيث اشتغل وافكر

شنو معنى تفسيره
معقولة وحدة من خواتي واكعة بشدة
واني لاهية عنها
رحت جانت عندنا سستر اسمها ام احمد هاي
شاطرة وعندها خبرة بالحياة

بس ما ادري هي تعرف بتفسير الاحلام لو لا
والله وجان اشوفها واكفة تحجي وية ام تريد تدخل وية
بنتها لقسم لولادات وهذا الشي ممنوع

والاماية دتتعارك وياها
تكللها ادخل وية بنتي ما اخليها تطلك لوحدها والله تخاف

ياربي والله اختنك صدري من شفت منظرها
بالرغم اني اتعلمت على هاي المشاهد
فزع الام وخوفها على بنتها من تطلك

او اب يجي يفتر يم باب القسم
لو زوج ينتظر مولده وزوجته بقلق

بس ما اعرف ليش هالمرة هزني منظر خوف الام
على بنتها
يمكن كلام هدى ذكرني بحنان امي
وصرت اتحسس من هاي المواقف
بعدما اجة موظف الاستعلامات وكم واحد مسؤول عن
القسم وكعدوا يفهمون المرية

وام احمد عافتهم وراحت
اوجتي يمي تدردم
.. والله ربولي علل مو علة وحده هذني الامهات
ما دامج هيج تخافين على بنتج
شكو مزوجتها خو خليها يمج
والله سالفة الامهات عجيبة
الما اتزوجت بنتها
كابلت النذورة وكعدت وما يضل امام ما تنخاه حتى تزوجها

والي اتزوجت واتأخرت بحملها كابلت الدكتورات وكعدت
ما يضل دكتور ما تتعناله حتى تحمل بنتها
ومن تحمل تكون هاي النتيجة تكعد تدك وتلطم على بنتها
من يحصرها الطلوك

رباب جانت واكفة يمنا
.. هاي عينا امي حاليا تكول من كد النذورة
الناذرتهم علمود زواجي
تكول تاه علية الحساب

.. خرب يومج رباب صدك قوية
ام احمد .. عمي حقها امج تسوي هيج
اذا عمرج صار ٣٦سنة وانتي بعدج ممتزوجة

رباب.. هانت هانت ام احمد مبقى شي واجيبلكم
بطايق الفرح واعزمكم على عرسي
ام احمد .. والله دا اتخيل شكلج بيوم عرسج شاكة الحلك من الاذن للاذن

جانوا البنات يحجون واني كلام ام احمد بخصوص العمر ظل يرن براسي
رباب.. اكول شومة عفية اريدج تاخذين مكاني
اليوم اريد اطلع من وكت راح يمر علية
الرجال حتى نشتري سيراميك للحمام

.. سكتي تلكوني صاعدة فوك سيارة العرس واغني
زفوني ما اريد العشا زفوني ما ازيد العشا

.. صار تتدللين من عيوني
.. تسلملي عيونج فديتج شومة اخذمج بيوم عرسج

ام احمد.. ان شاء الله
بعدما راحت رباب وحجيت لام احمد عن حلمي
جاوبتني
.. والله يا شومة اني ما عندي معرفة بالاحلام
بس هو واضح معناه
ان امج من اتوفت امنتج على خواتج واحتمال مثل ما اتوقعتي
وحدة من خواتج واكعة بشدة او راح تتمرض

فركت ايدي بخوف على خواتي
.. والله ما اعرف يا ام احمد
كل يوم اكول هانت وخف حملهن علية
وكلهن اتزوجن وصارن على ذمة رجال وهمة ازواجهم المسؤلين عنهم

تالي تجيني ضربة على غفلة تصحيني
.. الله يساعدج شومة ربي يبرد كلبج بخواتج

رحت وتركتها تكمل واجبها
واني اتجهت على نقالي بخوف وصرت اتصل
على مروة وضحى حتى اطمن عليهن

والحمدلله طمنوني على احوالهم
فجاءة واني نزلت النقال وجان
انكفخ على وجهي واتعثر

لزمتني ايد خشنة تسندني من الوكعة باوعت
شفت مرية جبيرة
كالت .. الله الله حبيبة شبيج

ضليت مصدومة بخوفي الجديد
هاي شلون فاتتني
وكبل شلت فتحت النقال واتصلت على مريم
اختي رن .. رن .. مرة مرتين
ماكو هناك و جان يجيني رد

فرحت كبل حجيت.. هلا مريومة حبيبتي شلونج
اجاني الصوت .. هلا شيماء اني مو مريم
اني مرت عمج جنان

.. هلو عمة شلونج شخباركم عمو والولد شلونهم
.. بخير الحمد لله
.. مريومة شلونها. والله مشتاقتلها
.. مريم زينة الحمدلله
.. ممكن تنطينياها اريد احجي وياها بخوض روحتنا لبيت مروة
جاوبتني .. مريم بالدوام متكدر تحجي وياج من ترجع
اخليها تتصل عليج

نهيت الاتصال واني اضرب اخماس بأسداس
وجان يدك الجرس عندي واشهك بخوف
هفوة السان جنان بخصوص وجود مريم بالدوام
لان مريم اليوم عندها اوف
بهذا اليوم

بقيت جامدة بمكاني بدة الخوف يتوغل لكلبي
اي امي اكيد جانت تقصد
اختي مريم هي الوحيدة الي اني ما افكر بيها
لان هي الوحيدة بينا مرتاحة بحياتها
وعايشة احسن عيشة

عكدت حواجبي واني امشي بالممر
بس لحظة ومنو يكول اختي مريم مرتاحة
معقولة لا لا مستحيل ما اتوقع عمو امجد يقصر وياها او يأذيها
هو النة احنا بنات اخوه الما عايشين وياه
مدللنا دلال وشايلنا بعيونه

ماكو شي يخليني افكر بيها لان ابنه الجبير متزوج
وعازل ببيت لوحده

والثاني طالب كلية صيدلة وكلش حباب وخجول
ولا مرة سمعنا عنه شي مو زين والا جان مريم كالت

خلي يخلص الدوام واروح لبيت عمو امجد
كلبي كام يلعب
.....
هدى
جنت واكفة بالمطبخ وكلبي يريد يطلع من صدري
قبل شوية دخلت علية هالة وكالت
هدى نزلي اجوي خطار
بيت المختار ابو رائد اجوي يتباركون

كمت من مكاني وسألتها
.. منو بيهم اجة من بيت المختاغ (المختار)
.. رائد وامه وزوجته
هو بالاستقبال يم قاسم
وامي كالت بسرعة صيحي هدى خلي تنزل تسلم عليهم

انتبهت على هديل تحجي وياي وهي لازمة صينية التقديم
.. خير وين صافنة هاج لزمي روحي قدمي
للخطار خلي نستفاد منج
بدال ما واكفة جنج صنم

اخذت الصينية منها وبالي مو يمها
سمعت هالة كامت ترزل بيها
بس ما اهتميت الهم

جان بالي كله يم ام رائد وزوجته
كل وحدة اكن الهة مشاعر شكل
كلبي نغزني

اتقدمت ودخلت وسلمت عليهم
جنت كوة لازمة روحي
ام رائد.. مبروك عليج قاسم
شكل امج داعيتلج توكعين بهيج قسمة
جانت تحجي وتضحك بحجة الشقة
بس تلميحها ما عبر علية
رحت سلمت على زوجة رائد الي جانت حامل
جانت كلش حلوة وحبابة

ابتسمت بوجهي وسلمت علية
وكعدت تحجي وياي
.. لازم اني وياج نصير صديقات
لان ازواجنا اصدقاء الطفولة
طبعا ًرائد دائما يحجي بقاسم يكول عنه اخوي الما ولدته امي

هي تحجي واني احس بكلبي صار. غابة ظلمة
من ورة قسوة الظروف المستفزة
والمتضاربة عليه

جنت احجي وية زمن زوجة رائد
وجان اشوف ام رائد قربت راسها
على ام قاسم
وصارت تحجي وياها بصوت ناصي
مثل الي عندهم سر

بس فجاءة انتبهت لام قاسم شهكت واتسعت
عيونها
وبعدها باوعتلي ورصت اسنانها
ورجعت بدلت معالم وجهها وحجت وية
ام رائد بكل هدوء

ولا كأن شي صاير
وبعدها دخلت هالة وبقينا نسولف
بس ما اعرف ليش بطني كامت توجعني
لان لطاما احنا كاعدين نسولف
كلما ارفع عيني الكة ام قاسم تباوع علية
بعدها دخل هشام وكال لام رائد

.. خالة رائد طلع و ينتظركم بالباب
وجان تطلع ام رائد بعدما سلمت علية وعيونها
تباوع عليه بغرور

وبعدها اجتي زمن وسلمت علية وطلبت رقم نقالي حتى نتواصل
اتبادلنا الارقام وراحوا

واني بقيت يم باب المطبخ
وام قاسم وهالة وصلوهم يم الباب

اباوع لام قاسم رجعت تريد تدخل
جوة للبيت ومرت من يمي وكالت

هدى بالله شو تعالي وراي بغرفتي
عندي حجي وياج
يتبع