ثاني يوم العصر هم طلعنه اتعشينه بالمطعم
وكال كومي نفتر شويه اني مااندل هو يمشي
ويندل محلات واني وراه ...

جان موسم مدارس كال اشتري اليعجبج
اخذت صدريتين وقميص عدد ٣ وجنطه
وبقيه الملابس مال بيت ورجعنه...

ظلينه اسبوع وباخر طلعه اشتريت
لفجر ولبابه كل وحده زي كامل ورجعنه
للبصره احس حالتي متحسنه اكثر رغم
يجي ابالي الصار بس اظل احجي ويه السبع
وانشغل بكلامه...

رانيا... خلصت الفتره ووسام بعده مصر
ع الحضانه ورفع دعوه وحدنه بالشقه اني
وماما وماشفت واحد من اهله اجه علينه
هو يجي من الباب ياخذ الاولاد ويروح...

بيومهه جنت ابجي وماما مخليه ايدهه
ع خدهه وصافنه اندك الباب كامت ماما صاحت
منو كال وسام اني والحجي فتحتله الباب ودخلو
صار هواي ماشايفه ابو سلمت وكعدت كارهه الساعه
الشفتهم بيهه..

كام يحجي بنفس المنوال وارجعي واني اتعهدلج
بي ردت اكله وين جنت من اجيت شكيتلج عمو
وسام يخوني كلت رجال والله محلله اربعه ماعاجبج
روحي لاهلج هسه صار ارجعي بس ماعندي
طاقه احجي..

جاوبته عمو سالفه الرجوع لاتحجون بيهه
ماارجع ابد وراح اشوف القاضي شيقرر
هاهي بس لواموت ماارجع لوسام الخان
مومره مرات وبعده ماتاب...

طلعوا وهم نفس تهديدهم ثاني يوم
التحق وسام وع نزلته المحكمه وظليت
بناري طول هاي المده...

وره ٥ ايام تقريبا اتصل وسام
بس فتحت خط كال اجيج من الاخير
المقدم اسمه ابو ليث تعرفي اكيد خلي يرجعني
لمكاني وانطيج الاولاد...

رانيا... شنووو ابو ليث ناقلك
وسام.. لازم ماتدرين اي عيني ابو ليث شامرني
يم الشمس كلشي ولا شغلي ورتبتي يا ام سيف..

رانيا... سديته منه وخابرت ضرغام مرتين ومارد
وره نص ساعه اتصل بس سأل شلونكم كتله
انت ناقل وسام؟!

ضرغام.. ليش اني وزير وماادري
رانيا.. ضرغااام كول الحقيقه انت مووو؟!
ضرغام.. شتردين؟!

رانيا.. بغض النظر عن كلشي يبقه ابو اطفالي
ومرجعهم اله بيوم من الايام مااريد انسان يتأذى
بسببي

ضرغام.. حنيتي؟!
رانيا... عصبت من كلامه شتحجي انت شنو حنيت
وبصفتك شنو حتلو اريد ارجع انفعلت حيل
منا اعصابي تلفانه وكلمته زرفت كلبي..

سمعته اخذ نفس وطگه الجداحه وكال هسه شتردين
لاتدخلين بشغلي اصلا اني داخليه وهو دفاع
شعليه وانقله ..

رانيا.. هدئت وكتله هسه خابرني كال اتنازل عن الاطفال
بس ارجع لمكاني لان عنده ترقيه والمكان خطر

ضرغام.. وشعليه اني قابلي الوزير وشرحيله
حالتج خلي يرجعه
رانيا... ابو ليث ؟!!

ضرغام.. لا ابو صخام ولاهم يحزنون
تريدين تردين تريدين تبقين انتي حره ومثل ماتفضلتي
اني بصفتي شنو وادخل..

رانيا.. موهيج الحجي انت الك ايد بنقلته
رجعه حته يرجعلي اطفالي انت منا وهو منا
كاااافي اني شنو ذنبي ياخذون اولادي مني ..

ضرغام.. الله كريم خلي يرجعهم واخذي
تعهد علي ويصير خير..

رانيا... سديته من عنده واني امسح بدموعي
من نزل وسام وره اسبوع صارت كعده بيت اهله
والشيخ ياسين والسبع موجود واتفقوا يتنازل
عنهم وسحب الدعوه لان بالحالتين يخسر الحضانه
لان اني قبلت اعيش ببغداد وهو دوامه خطر وراح
القاضي ياخذه بعين الاعتبار...

رجعنه لبغداد ويه الشيخ ياسين
واولادي ويايه شويه اخذت نفس
وارتاحيت بس ضرغام مايجي حته من يصير
موعد نزوله يظل ببغداد...

حاجيت السبع ع سالفه نقل وسام وكال
اني اخابر ضرغام وبعد ماادري شصار
سمعت عمه ساهره تساله ليش مايجي؟!

كالهه طالعه الدنيا من عينه حته يلزم
واجب بمكان جماعته مااكول بس خطيه
المجرمين الواكعه بيده..

جانت عقيق كاعده كالت اكو مجرمات
ويحقق وياهن ضرغام سألتهه شمدريج
كالت السبع سولفلي كال حته نسوان عليهن
تهم هو يحقق وياهن ...

اجه ابالي معقوله ضرغام ابو نسوان
ويظل ابغداد عنده شقه ويجيب بنات
تعوذت من الشيطان وكمت صاير كل تفكيري
بي ...

بليل اجه ياسين وجبار واواب وبعد زلم
مانعرفهم ومنا السبع وجراح وخاله
اباوع لبابه كاعده ع الدرج وقلقه ماتعرف
شتسوي..

نزلت ام جراح كالت راح ينحسم الموضوع
هسه السبع مصر ع جراح وراح دز عليهم
وجراح مايدري هسه تفاجئ ماعباله راح
يخلي امام الامر الواقع..

كدام هاي الناس ووجوه العشيره يحجي
لو يفسخ خطبته من بنت عمه ويتزوج نوال
لو ينطي كلمه لخاله هو راح ياخذ بنت عمه
ونوال تشوف حياتهه..

لزمت كتف لبابه وايدهه جانت ثلج
متوتره وخايفه حيل كلساع تغمض عيونهه
ودكول راح يختار بنت خاله ماكو داعي
للمشيه لايهين كرامتي كدام الكل ويكول
ماريدهه...

حاجيتهه اهدي لبابه لاتخافين جاوبتني
ودمعتهه وكعت ع خدهه ماخايفه بس
مااريد انصدم مااريد انهان كدام الزلم اني
موسلعه ويختارني لو يختار بنت خاله

لبابه.. اصواتهم عاليه ونقاش حاد
وخاله يصيح ضحكتوا عليه بنتي
الف واحد يتمناهه ماعدكم كلمه انتم
شيوخ لو شنو...

صوت السبع عالي وسكتهم كالهم
هو موصغير هو يحدد بنت عمه عقد عليهه
لحمايتهه بوقت انت رفضت تنطي بنتك
وجبار راح خطبهه بدون علمه يعني مو الذنب
منه منك انت شلون تنطي بدون متحجي وياه
وشنو التغير وقبلت تنطيهه وهو سنتين يخطبهه
منك وماتقبل؟!

صارت هوسه هذا يحجي وذاك يكول
فلان غلط بس اجت كلمات السبع بأذاني
حسيت راح تصير عندي حالة اغماء وهو يكله
حدد موقفك جراح لو اطلگ بنت عمك
لو تزوجهه بهذا الشهر؟! والكل سكت ينتظر
جواب جراح!!!!

.
.
.

يتبببببع....

... البارت الثالث والثلاثون



فرح الن يتوه بغسق الدجى ويصلنا؟!
امواج تثور ورياح تصدح بكل قوتها...
نخرج من مصيبة نقع بمعضلة اكبر
في قلب كل منا غصة تخنقه..
.وجرح لا يلتئم
كل واحد منا يغوص في همومه
سعادتنا سراب!! وسحاب عابر مر فينا مرور الكرام..
مشاعرنا جمر عالق في حناجرنا .
.تترجمه الدموع قبل الكلمات...غارقين في سفينة بلا شراع
بلا مجاديف ولا مرساااة...

نقاوم امواج الحياة بايدينا باجسادنا وقلوبنا
لم يعلم الحظ سبيله الينا كتب علينا القهر والحزن
مذ كنا نطفة في ارحام امهاتنا قطارات العمر تمضي مسافرة ومحطات الحياة تراقصنا على انغامها
ترى سيبقى صمودنا كما هو ؟؟؟!


....

لبابه.. ماحبيت الموقف ابد احساس بشع حيل
مسيطر عليه اني موسلعه وتنعرض ويختارني
لو يختار بنت خاله ؟!

اني مارحتله ولادكيت بابه وطلبت منه يخطبني
هو دگ صدره حاله من حال السبع من حمه اخته ابرار
بس الفرق اكو انسان حقاني بكلشي واكو ماتهمه غير
نفسه وسعادته..

رانيا تحجي ويايه وتهدي بيه تريدني مااهتم وماما
متملكهه اليأس مخليه ايدهه ع خدهه وصافنه عليه
اعرف تفكيرهه تتمنى لوتكدر تدخل بنصهم ودكلهم
ماانطي بنتي بس تخاف من العواقب...

دنگت راسي واني اسمع صوت جراح وهو يحجي
بتعب كال الحب موحرام وكل انسان بداخله فطره
انه حبيت بنت خالي وطلبتهه ع سنة الله ورسوله
انت خالي شاهد شكم مره دكيت بابك وطردتني؟

كلما ادز امي ودزيت الشيخ جبار وحته وسطت
غير ناس ماقبلت كلت بنتي تدرس وماازوجهه
وحته اذا فكرت ازوجهه ماانطيهه الك لان حياتكم
مامناسبه الهه..

اجيتك بنفسي وكدامك وكدام امهه وكتلك خالي
بنتك من هاللحظه راح تكون مثل ابرار اني صح حبيتهه
بس قسمه ماكو بيناتنه حاولت وياك بالف طريق
وماقبلت وجنت كل مره تطردني وحته امي طردتهه
من بيتك وظلت اشهر تتوسل بيك لان ماعدهه اخ
غيرك..

انه بديت حياة ثانيه صح عقدت ع بنت عمي
لحمايتهه وماردت اشغل بالهه بامور زواج لان
صغيره بس حالي حال كل رجال خطب وحب
خطيبته ويفكر يكون عائله وياهه..

انه كدام الكل اكول الخطبه مال بنت خالي غلط
صارت بدون علمي واني ناهي كلشي وياهه ويه
اهلهه انت انطيتهه بدون ماتسالني رايدهه بعدني لولا؟!

ماافضل وحده ع وحده بس قسمه بيني
وبين بنت خالي ماكو وانه قبل لا يصير
الحادث وياي بنيت البيت وناوي اتزوج بنت عمي
واستقر..

ابو نوال.. شتحجي انت عندك بنات العالم لعبه ذبحت
روحك ع بنتي وهسه تكسر بختهه وتعوفهه

جراح.. حجه بعصبيه لادكول كسرت بختهه انت سبب خطيتهه
انه طلبتهه منك وماقبلت وكتلك خالي هذا الموضوع
سده لان راح اخطب واستقر كتلي الله وياك

من اجاك الشيخ وخطبهه ماكلت هو خاطب بنت
عمه شلون تقبلهه تنطي لواحد خاطب هو لعب
لو هسه صار جراح خوش ولد وتريد تنطي

ابو نوال.. لاتعلي صوتك عليه موحطيتلك نجمه
وشخت براسي سنين اختك تاكل من خيري
وانت شلون جازيتني بكسران بخت بنتي

جراح.. كام وكف بصياح لاخلفة الله عليك
اختي تاكل وتشرب من فلوسي حته مسواك
تشاركك بالشهر عيرتهه بيمن بلگمة الخبز لو بكلاص
المي ؟!

السبع.. جراح ع كيفك جاي نتفاهم مونتعارك
جراح.. ماعندي تفاهم وياه موخالي انه مااريده ماعندي
خال ولا عندي عم لاشيخ ولا غيره عوفوني
بحالي اقرر حياتي باليعجبني اتزوج الي اريدهه
مو اليجبرني عليهه فلان وفلتان..

بنتك حبيتهه وماانطيتهه مشكلتك روح دبر
نسيب غيري الشيخ يتحمل المسوؤليه هو طلبهه
منك وخدعك اعناد بيه انت وياه تجازون

الشيخ.. والله وصارلك السان يجراح وكمت
تشمر بحجيك بدون ماتوازنه وعليمن ع الشيخ
جبار وع خالك الوحيد احزام ظهرك

جراح... كتلك ماعندي احزام اذا عندي فهو السبع
وضرغام اما انت عثره بطريقي وخالي سبب
دماري ودمار امي !!

مره مااريد من خالي لا عاقد عليهه ولا مواعدهه
جيبهه هنا وسألهه اتحداهه تحجي كلمه وحده
ودكول اني مواعدهه مثل ابوهه جذبت الجذبه وصدكتهه

من الاساس كتلهه مابيناتنه زواج زواجي بس من
بنت عمي وهي تروح ويه ابوهه مو قبل كالت
امري بيد ابوي هاهي يدبرلهه نسيب يليق بمقامه..

ياسين.. جراح انت الهادىء رغم صغر عمرك وانكول
احسنهم وموعصبي شجاك يابويه جايين نحلهه
لو نأزمهه ع كيفك اعصابك

جراح.. شيخ ياسين ماعندي كلام اعيده
بنت خالي ماخطبتهه خطبهه عمي وبدون علمي
ماضحكت عليهه ولالعبت بمشاعرهه اجيتهه من الباب
وطلبتهه هواي وابوهه يعيرني بوضعي ويطردني
وهم ارجع مره ثانيه ..

انه من يوم الرفض ابوهه اخر مره نهيت كلشي
وياهه ويه عائلتهه حته بيتهم ماوصلتله وتدري
هي انه رايد بنت عمي وحاب استقر واكون عائله
وهي تروح بحال سبيلهه..

ابو نوال.. كام وكف وحجه بعصبيه راح تدفع الثمن
غالي يجراح اذا ماخليك تبوس ادين حته ارضه
عليك هاي شواربي موعليه .

جراح.. اطلعوا من بيتي خالي وعمي الشيخ
مااريد اشوف وجوهكم طكت روحي منكم
طلعوا احسن ما ابتلي بيكم بهالليل..

فقد اعصابه جراح دفعه السبع طلعه من الاستقبال
والخطار ينتقد ويحجي وهو بعصبيه لاول مره
انشوفه بيهه يريد يتعارك ويريد يفرغ البداخله..

طلعوا كلهم وظل الشيخ ياسين انباوعله
من الشباك يهدي بجراح وهو نار ومشتعل
متغير حيل موذاك الانسان الهادىء اليتعامل
بهدوئه وعقله هسه بس عصبيته غالبه علي..

لبابه ...راح الشيخ ياسين وظل بس هو والسبع بره
اني ع وضعي وع كعدتي مااعرف اختارني ليش
ومعقوله مايحبهه والشفته بعينه وهو يحضنهه؟!

سكتت ماانطيت اي ردة فعل رغم كلهه تحجي
وهو صعد فوك بس اني اكتفيت بالصمت
لا حجيت ويه ماما ولا ويه رانيا منتظره
يكعدون واحجي...

ثاني يوم العصر اجه ضرغام الوحيد ضرغام يروح
للقصر لان ملابسه وغراضه هناك حته يسبح ويجي
ماعنده غرفه يمنه من يجي ينام بالاستقبال..

بيومهه تعشينه من وقت ماما كالت يريدون يكعدون
نتفاهم بموضوعج اجه الشيخ ياسين وام اواب
وكلنه كعدنه بالاستقبال من طبيت اجه جراح بوجهي...

كاعد بتوتر يهز برجله وايده يفتح ويسد بيهه
عبالك كاعد ع اعصابه هاي العصبيه والنرفزه
منيله ابد ماجان هيج..

حجه ياسين بايات قرانيه وبنصائح وحكم
وفتح موضوعنه وكال موضوع نوال انتهى انريد
نعالج موضوع لبابه ..

جراح.. شبي موضوع لبابه اجهز الغرفه وقبل المدارس
نتزوج ماكو داعي نحجي بي..

السبع.. شبيك انت تخبلت انطينه فكه
نحجي نتفاهم هوالحجي بس الك

جراح... شتحجون مسويهه سالفه موعاقدين
احنه مواتفقنه اذا اختاريت لبابه شهر ونتزوج
هاهي شهر واتزوج بعد عليمن هالحجي

ضرغام.. وشنو الحجي ناخذه من شور راسك
لو لان رجال لازم تقرر وعليهه تنفذ اسمع ولك
جراح اضبط اعصابك وخلي نفتهم موقف البنيه
ماتريدك شلون نجبرهه والله حضرت جنابك رايد؟

جراح.. شنو ماتريد نلعب احنه تريد وغصبا عليهه
ضرغام.. ماكو غصبآ عليهه انت تسمع وتنفذ غصبا
عليك عدهه ام ولي امرهه وهي تقرر حياتهه ..

السبع.. لزم رجل جراح ويطبطب عليهه يريده
يهدء موطبيعي هالانسان حته مايرفع عينه
بوجه احد عيونه مشتته من العصبيه..

ساهره.. ابني جراح والنعم منك ماقصرت بكلشي
حميتهه وخليتهه تكمل دراستهه واني قبل حجيت
وياك وكتلك احارب وانضرب وانذل علمودهن هي وفجر
ماعندي بس هن بهاي الدنيا

كل ام تطمح لبتهه بحياة سعيده قبل نهيت كلشي
وكتلك بنتي ماتنزل ع ضره وهسه هم اعيدهه كدام
الكاعدين اذا بيوم مفكر ترجع لبنت خالك اختصر
هالطريق وخليهه تكمل حياتهه مااقبل بكسران بنتي ..

ام جراح.. خيه شوفي شلون عصبي موضوع نوال
انتهه وهسه بنتج هي بنيتنه وجنتي وفرحة
ابني لاتصعبوهه علينه..

لبابه.. اسمع نقاشهم اريد احجي بس محد
منطيني مجال رفعت راسي ع ضرغام
شفته يباوعلي اشرتله اريد احجي هز راسه
بين ماكملت كلامهه ام جراح كال لبابه احجي
انطينه رأيج..

لبابه.. قويت حالي بعد تفكير ليله كامله ماغمضت عيني
منظره وهو يحضنهه مايروح من بالي قارنت بينه وبين
السبع هواي ايناس هم تحب السبع وماينطيهه مجال ابد
وجراح بحجه مااكسر خاطرهه ضمهه لصدره..

لبابه.. عليت صوتي وكلت اني مااريد اتزوج
ويه حجايتي رفع راسه عليه بخزره مااهتميت خليت
عيني ع ضرغام الوحيد احسه يفهمني ويساعدني..

ياسين.. ليش بويه چااا مو خطيبته ومتفقين ع عرس
شتغير هسه؟!
لبابه.. اني مااقبل اكون مجرد بديل وقت الحاجه
جراح يحب بنت خاله اني مسامحته خلي يتزوجهه
اني اريد اكمل دراستي ..

جراح.. سدي حلكج !!! مالي خلك حجي زايد
شهر كدامج ويصير الزواج عجبج ماعجبج مجبره
تنفذين كلامي..

لبابه.. وسط ذهول الكل كلهه صافنه حته امه والسبع
ع طريقه كلامه يشمر بكلامه تشمر ومايحسب احساب
لاحد..

ضرغام.. لابروح ابوك؟! تحجي صدك انت منو كالك
ماعدهه ظهر جاينه متخبل وفوكاهه تأمر وعلينه
انفذ محد كالك دخل بروحك بهيج سالفه عوجه
مثلك..

جراح.. انت لاتتدخل....
ضرغام.. ادخل وغصبا عليك ماعجبك اركع راسك بحايط
متنرفز حضرت جنابك ع بنت خالك روح انگلع
اتزوجهه وخلصنه كل العنده سالفه يفرغهه براس هالبنات

السبع.. والله العظيم اذا ماسكتوا ابتلي بيكم
اثنينكم واحد متحمل ع الثاني عدكم عداوه
انت جراح شنو هالحجي الماصخ شنو جبر شنو غصب

لبابه من مسوؤليتي تخطبهه مني وانت الممنون
شبيك بويه تسودنت نكلك الزم اعصابك لو فرغهه
بينه ...

جراح.. ماسمعتهه شتحجي وضرغام واكف بصفهه
السبع.. موبس ضرغام حته انه اوكف لان انت مدري
شبيك البنيه تكلك مااقبل غير نفتهم اسبابهه ..

لبابه.. اسبابي واضحه هاي كدامك شلون اعيش وياه
وهو حته احترام ماعنده ابدال ميسمعني يجبرني
موعبالك يتيمه وماعندي احد ولازم اتزوج ابن عمي
والله مستعده اسوي الماتتوقعه وماتجبرني ع شي..

جراح.. چااا خوش كدام الشيخ ياسين وكدامك
يالسبع مدامك ولي امرهه صرت انه ناهي ع لبابه
واليوصل يمهه لوبعد عشر اسنين اكسر رجليه

ضرغام.. اني راح اكوم اكسر راسك ارعن
شو كوم ودفعه ليبره وطلعه والسبع يفرك
بوجهه وياسين صافن علينه..

ياسين.. انطوا عذره ترى نفسيته تعبانه ع كيفكم
جراح كلنه نعرفه صاحب مواقف وهذا كلامه مومن
كلبه ابد بس عصبي ومتأذي من خاله..

السبع.. لبابه احجي وياي انتي ماتحبين
جراح لو شنو السالفه
لبابه.. مااريده!!
السبع.. السبب!!؟
لبابه.. متشوفه شلون يتهجم شلون اكمل عمر كامل
وياه وهو هيج ..

السبع.. يله ابو اواب وكام وكف خلونه نحجي ونتفاهم
وياه وبعدين نسولف لبابه فكري زين جراح
رايدج ولورايد بنت خاله محد كدر يمنعه..

لبابه.. كلهم طلعوا وصار اللوم عليه منا عمه زينب
ومنا ماما بس اني مااقبل بهيج موضوع ماجاي
انسه شلون حضنهه مال واحد مشتاق ومتلهف عليهه..

مددت بفراشي واني راسي مشوش من التفكير
السنه اني سادس واحس مستقبلي راح يضيع
لان مااكدر حته افكر بمستقبلي وبدراستي من كدما
مفكره بجراح ومصيري وياه..

رانيا مخليه ابنهه بحضنهه تنوم بي كعدت ع حيلي
كتلهه ليش مانايمه ابنج غفه؟!
رانيا.. كل واحد همه لون يالبابه لا الصغير المرتاح
ولا الجبير مرتاح شوفي عمرج شكده وتفكرين
وسالبه راحتج اذا ابدايه عمرج وهيج بعد شكم
سنه شلون بيج؟!

لبابه.. املي بالله جبير هو مايضيعني ويدليني
ع الدرب الصحيح احجيلي شبيج مهمومه ويوميه
ماتنامين..

رانيا.. افكر ارجع لوسام!!
لبابه.. عززه ليش مو ماتريدي
رانيا.. مااكدر افارك اولادي وبنفس الوقت مااكدر
اربيهم وحدي كبروا واني ماعندي لابيت ولاسند
من يكبرون منو الهم؟!

لبابه.. احجي وياج بصراحه اذا خطبج ضرغام
توافقين؟!
رانيا.. جريت حسره شكبرهه وكتلهه لاااا..

لبابه.. ليش اني حاسه بيج عندج مشاعر اتجاهه
رانيا.. بس اقبل بي ياخذون اولادي صح راح يخلوني
اشوفهم يجوز كل اسبوع بس مااكدر افاركهم
مااكدر ابني سعادتي ع تشتتهم ..

وسام موكد المسوؤليه صح كريم ويصرف
وماراح يخليهم بحاجه شي بس ماراح يربي
راح ينطيهم لاهله لو يجيبلهم مرت ابو وشلون
تغمض عيني واني سعيده وهم من ايد لايد..

لبابه.. لاتيأسين احتمال ماياخذهم منج
رانيا.. مااريد افكر بشي لان تعبت حيل
حته صرت اكره الليل من كدما افكر ...

لبابه.. غطت نفسهه هي واولادهه ونامت
شكد موجع الليل كل الذكريات والافكار تتراكم
وتلزم سره بي ونبدي بيهن فكره فكره لحدما
نتعب ومانوصل لنتيجه...

عقيق.. شبيك ضايج ع جراح؟
السبع.. جراح حالته النفسيه زفت وجيب اليفتهمه
هذا راح تعكس ع حياته الشخصيه

عقيق.. لبابه مقهوره؟
السبع.. حقهه عدهه تشتت بافكارهه المفروض
يحتويهه مو يعصب عليهه..

عقيق.. جنت واكفه يم الميز وهو مدد
خليت مرطب لاديه واجيت مددت بصفه
خله ايده جوه راسي وسحبني لصدره
حاوطت خصره باديه...

السبع.. اخذتي دواج؟
عقيق.. اي
السبع.. الاثار ماخفت ؟
عقيق.. هزيت راسي لااا
السبع.. تروح تروح!!

عقيق.. شوكت تسجلني بالمدرسه؟
السبع..باجر اخذ ام شهد ونروح نشرح حالتج
ونشوف شلون مالون
عقيق.. ليش متجيب غراضك هنا بعد شكو بالقصر؟

السبع.. جنت منتظر ضرغام يقرر وهذا ماتحصل
منه قرار اشترينه القطعه البصفنه هاي وراح نبدي
من هالاسبوع نبني مشتملات واحد الي واحد لضرغام
وجراح هذا البيت..

عقيق.. اني مااريد اكعد وحدي اريد يم فجر
السبع.. هو نهارج كله يم فجر وراح نبقه بالاكل سوه
بس انريد نرتاح ومحد يتقيد ضرغام متبهذل

عقيق.. هو ليش مايتزوج؟
السبع.. شمدريني حجينه ومافاد شمنتظر ماادري
بهاي الاشهر لاحظته هواي كل اسبوع هو بالنجف
يبات ويجي ماجاي ينسه بحاله صراع بين گلبه
وبين عقله...

عقيق.. محد مرتاح كلهه مهمومه حته انت
مامرتاح
السبع.. راحتي وياج من افوت هاي الغرفه كلشي
اعوفه بره اريد اختلي بيج

عقيق.. اني بالنهار اظل افكر شسوي من تجي كومه
حجي يصير عندي بس من تجي انساه كله

السبع... وين مسولفه مخلصتهه تحقيق وياي
سؤال جواب احجي البداخلج مثل مامتفقين
عقيق.. اني مااضم شي عليك بس انسه السالفه
افرح من اشوفك..

اندار عليه وضمني لحضنه حيل وباسني من خدودي
ومد ايده طفه الضوه كال تعبان اريد انام وانتي
هم لاتتحركين خلي انام ...

بسرعه غفه واني ظليت اباوعله اشوف ملامحه
باهته عاكس الضوه من جوه البابه شويه يبين
مااعرف اوصفه بكلمات بس كل الي اكدر اكوله
هو امي وابوي وعائلتي الفقدتهه وحته صحتي
الي اداري بيهه...

كعدت الصبح ماموجود هو يطلع من وقت لميت
شعري وكمت غسلت لكيت البنات بالمطبخ
خاله ساهره رايحه للمدرسه ويه السبع
صبيت حليب وكعدت اشرب..

فجر.. اني ضايجه
لبابه.. كلنه ضايجين
فجر.. ماياخذونه سفغه( سفره)
لبابه.. منو ميت علينه؟!

فجر.. غانيا غوحي لضغغام كليله
ضايجه وهو ياخذنه
رانيا.. بلسانج المكسور وليش اني
ماتولين انتي..

فجر.. منو يسمعني انتي غاليه والطلب
غخيص ..
رانيا.. الصمي تردين انتي روحي
فجر.. هسه يجي السبع واكله وانتن ظلن
نوحن

اجه السبع العصر تلكته من الباب بطلباتهه
ضايجين وانريد نطلع قبل المدارس كال
الشيخ ياسين عنده منطقه قريبه ع الشط مساحتهه
صغيره من البستان معتني بيهه حيل حلوه
اخذكم الهه...

لبابه.. حددنه موعد وخابرتنه ام اواب كالت
راح نروح قبلكم اخذنه ويانه شغلات بسيطه
لان هناك كالو نشوي سمج ودجاج ...

هاي اول طلعه النه داخل القريه ونفتر براحتنه
السبع اخذنه ولگينه ام اواب والحجيه ام ياسين
وذبنه وراح كال بعدين اجيكم..

جراح ماشفته صار شكم يوم كالو ببغداد
يراجع ع دوامه الشيخ ياسين هو وام اواب
شعلوا نار وعدهم منقله وماما تساعدهم
وريحه الشوي انتشرت بالجو ..

المنطقه حيل حلوه كلهه عشب اخضر واشجارهه
حلوه مرتبه رغم عاليه بس مرتبيهه اكو نهر صغير
يسمو الساگيه كلساع نغسل وحده تشمر مي ع الثانيه..

من صار موعد الغده ظلينه ننتظر والشيخ يخابر
عليهم اجو السبع واواب وضرغام وفرشنه سفره
جبيره هاي اول مره كلهه تجتمع بكعده وحده..

ناكل ونسولف ومانحس غير رانيا شهكت
وغصت بعظم سمج اندك ع ظهرهه مختنكه
عيونهه حمر وماتكدر تتنفس..

كامت تركض للمي تغسل وخاله تضرب ع ظهرهه
فايت ابلعومهه بالعرض تالي الحجيه صاحت ميلن عنهه
لزمتهه من فكهه ومدت اصبعهه وطلعته

ماادري شلون التفتت شفت ضرغام يباوع عليهه
وتارك الاكل ماكمل وهي ماكملت كعدت بعيد
عنه ..

كملنه صبينه جاي ولمينه السفره والمواعين
فارشين افراش وكل واحد اخذله جهه
السبع جان طابگ المخده ومرتجي يحجي
ويه ياسين..

وضرغام كام لجهه الشط يمشي وايده ليوره
بس نار جكارته يدل ع نار كلبه..

اثناء الحديث ذكرت ام اواب راح يسوون عشه
بمناسبه عياده اواب الجديده سألتهه ماما هو تخرج
موكلتي يدرس؟!

ام اواب.. صار سنتين من اتخرج بس درس مدري
شيسموهه وهسه خلص والعياده مشتركه هو وصديقه
لان متخرج قبله يكول احسن ماانتظر عاد امارس
عملي..

ساهره.. وين هنا لو بغداد؟
ام اواب.. لاهنا يفتح طگ كلبي كافي بغداد
حته دوامه هنا هذني السنتين وخلصن

ساهره.. يله زوجي يرادلج جنه وياج
ام اواب.. يوم عيد كلما افتح موضوع يسده
يكول موهسه مدري شلون قرر يتزوج وهسه بطل..

لبابه..عفناهن يسولفن وكمنه نتمشه ونشتم هوه
نقي وصلنه قريب الشط جان ضرغام واكف وصافن
بالفراغ شكد يفكر وهاي الجكاره ماتوكع ابد..

التفت علينه سمع صوت ابن رانيا
كال لاتتقربن لايوكع واحد من الجهال بس عينه
ع رانيا سحبتنه فجر وهي تصيح تعالن نشوف هاي الجهه

التفتت شفتهم واكفين وواحد يباوع لثاني
رانيا كلساع ادنك وترجع ترفع راسهه بخجل..

ضرغام.. شلونه بلعومج؟
رانيا.. زين
ضرغام.. مبينه مامرتاحه ولونج مخطوف
رانيا.. الصار موشويه
ضرغام.. موخلصت؟

رانيا.. شخلص هم مده ويرجع من جديد
رجع لشغله لو بعدك مارجعته؟!
ضرغام.. محسستني اني الوزير بويه شبليتيني

رانيا...يعني تقنعني مالك علاقه بنقله
ضرغام.. اعرف الآمر مالته شو بس كتله نقله
هو يريد حجه علي اني مااطب طبت شر

رانيا.. شكرا ع مواقفك والله ماانساهن ابد
ضرغام.. شسويت ؟! واجبي هذا بس !!!!!!

رانيا.. بس شنو؟
ضرغام.. تكدرين نتمشه شويه اريد احجي
وياج
رانيا.. ليش احجي هنا
ضرغام.. كدامي ياسين فشله تعالي هنا وابتعد شويه
وكفنه يم شجره ..

شوفي رانيااااا اني مااعرف اصبغ بالحجي
ولا اعرف شلون اعبر المهم اني اريد اتقدملج
توافقين؟؟؟؟

رانيا... ارمش بعيونه معدتي مغصتني
كلبي احسه انزع مني عيوني تريد تطلع من
مكانهه .. اذاني مامستوعبه السمعته..

ضرغام.. لاترمشين ولاتفتحين حلكج
هيج ..

رانيا.. اريد اكله فاجأتني اريد ابيع ثكل
بس كتله انت وغصيت ولزمتني الكحه واكح
واكح دايره وجهي وايدي ع حلكي واكح

يريد يمد ايده يطبطب ع ظهري ويبطل
يكورهه ويرجعهه ليوره يحجي وياي
واني لزكت الكحه..

راح جابلي بطل مي اخذت نفس اريد استوعب
كلامه هو هيج اليحجي كتهن كت لااذاني ولا عقلي
استوعب...

اخذت البطل شربت واني دايره وجهي
لومافشله اشيلهه ركضه للشارع
سديت البطل وظليت مدنگه ..

ضرغام.. يمعوده بعدني بسطرين ماحجينه
وغصيتي لعد لو متغزل بيج شسوين؟

رانيا.. مارديت احس خدودي جمر
كتله ابو ليث تعرف بضروفي ماكو
داعي اشرحلك

ضرغام.. جاي احجي وياج تقبلين لولا
عوفيني من ضروفج عود نحلهه

رانيا.. شنو هالاحراج غير ينطيني وقت
خوما اكله اي موافقه ساد الطريق عليه
واني مدنگه حجيت بصوت خافت خليني افوت

ضرغام.. سوالي طريق فوتي بس ماكو داعي
تفكرين ترى الكدامج مو ابن اليوم حسمي الموضوع
وبليل اريد جوابج

رانيا.. ماكدرت احجي ابد الساني انبلع
درت وجهي وامشي سريع رجعت يم ماما
واحس كلبي يدك باذاني اريد ارفع راسي
احس كلهه درت ..

لبابه... رانيا يمكن رجعت جهالهه ويانه
واني وفجر وعقيق نتمشه الشط حلو
حيل فجر ماتكعد راحه كلساع تتقرب ودكول
كون انزل..

حافه الشط تصير رطبه حيل وبيهه طين حته
خفت اوصلهه لازمه الجهال وواكفه وفجر
تكمز كلساع اصيح عليهه ماتكعد..

مانحسهه غير تزلگ رجلهه والله ستر ماوكعت
بالشط وكعت بالطين ملابسهه واديهه انترست
ورجعت ذبت الصوج بينه وتتعارك..

الله ذب الضحك علينه ع منظرهه كلهه
طين وماتعرف شلون تغسل وشلون ترجع
بهذا وضعهه رجعنه بنفس طريقنه نضحك
وجهال رانيا مسويهه زفه..

قريب مانوصل تلكانه اواب جان يخابر من شافنه
ظل واكف وصافن ع فجر منظرهه فضيع
اديهه ورجليهه وملابسهه متروسه طين..

فتنه من يمه وجهال رانيا يگرگون حجي
عمو خطيه فجر وكعت .. عمو كلهه طين
وفجر عيونهه بگصتهه..

بطبيعته اواب هادىء حجه ع كيفه تعالي
غسلي هنا واشرلهه ع الساگيه ساكته فجر راحت
دنكت تغسل واحنه وياهه وهو واكف يباوع علينه

خففت من الطين ورجعنه رزلتهه ماما وهي
ساكته عبالك السانهه انبلع حسيتهه موطبيعيه
مثل الحركه التجيهه ماادري عيونهه مو ويانه
بس تسمعنه...

للمغرب اجو السبع وضرغام ورجعنه حيل تونسنه
بيومهه وفجر اذا الحايط حجه هي حجت
قبل لانوصل لاواب جانت ترزل بينه بس من وصلنه
سكتت ولاحرف ظلت يومين هي ساكته...

اما موضوعي ويه جراح محد فتحه السبع بلش
بناء والكل ملتهي وجراح ابغداد وعمه زينب
ماتروح لاخوهه لان زعل ...

بده العام الدراسي اني صف سادس وفجر
ثالث ورانيا ويانه اماعقيق بمدرسه اهليه
يوصلهه السبع ومرات تروح ويانه..

نطلع كلنه من البيت بدوام واحد كله صباحي
نرجع كل وحده ع دراستهه اني المواد صعبه
وقليل دورات تقويه وبعيده عليهم مرات اخلي
الكتاب واكوم ابجي...

رانيا.. مارجعت جواب لضرغام سولفت لماما
جانت مرحبه بالموضوع بس اولادي ماكدرت
بسببهم وخاصه بهيج وضع طالعه من مشكله جديده

هو مافتح موضوع كال اريد جواب بليل بس
ماتصل مانتصادم ابد اني وياه كل اوقاتهم ويه العمال
واحنه دوام حياتنه روتين وماشيه...

عقيق.. يوميه ارجع اقره وحدي الي اعرفه
والماعرفه رانيا تساعدني لو لبابه كل وقتي
بالغرفه ويمي فجر نقره سوه ونحل تمارين
لو تسمعني واسمعلهه..

دخل السبع كامت فجر طلعت واني فارشه
الكتب ع الجربايه شمر نفسه بصفي رجليه
بالكاع وراسه بصفي كال شتسوي الحلوه؟!

عقيق.. اقره عندي امتحان وفجر هم عدهه
وقرينه سوه
السبع.. كملتي؟!
عقيق.. بعدلي شويه
السبع.. راح اسبح بين ماتكملين

عقيق.. راح للحمام واني كملت قرايه وجمعت
كتبي ورتبت الجربايه ومددت اجه يفرك بشعره
ويدندن بكلمات مافهمت منهه شي بس اتذكر
ياذيب ليش تعوي حالك مثل حالي بس بصوت
ناصي ...

شافني اباوعله ابتسم بالمرايه اجه يمي
رفع الغطه واخذني بحضنه سألني مثل كل
يوم اخذتي دواج؟ جوعانه؟ خليتي دهن؟
خوماتعبانه؟

مايدري بشوفته كل تعبي يروح
واحس نفسي انسانه طبيعيه مابيه
اي مرض..

دك المنبه ب٧ هو نايم اليوم ماعنده شغل
كمت غسلت ورجعت لكيته كاعد كتله صباح
الخير رد عليه وهو مرتجي ع الجربايه ..

ع السريع طلعت ملابسي ركضت بدلت بالحمام
ورجعت لابسه صدريه رصاصي وقميص ابيض
زي المدرسه هيج

مدنگه ع الجنطه مخليتهه ع الميز وما احس
غير اديه التفت ع خصري وباسني من رگبتي
بحنيه قشعر جسمي من لحيته ميلت راسي
باسني بعد اكثر ..

دفعته لااا السبع شدتسوي بس وضعي
احسه بده يستجيب لمساته مااريده يوخر
مشدد اديه ع خصري اكثر ومايوخر راسه
عبالك غفه ع ركبتي..

ابتعد وهو يفرني كدامه كرصني من خدي
وطلع لان خاله ساهره صاحته علمود العمال
كملت كلشي واجه الخط طلعنه تلكاني بالباب
انطاني مصروفي وراح...

يوميه من اكمل دوام اظل انتظر البنات
يجن عليه بالخط هن ورانيا صعدت
ونتناقش اني وفجر بالحل عندي اخطاء
محد يحاسبني لان خارجي بس اريد اكون
حالي حال البنات...

وصلنه للباب من نزلنه ضرغام واكف
اشر فوتن جوه ام سيف اوكفي
دخلنه وظلت رانيا واكفه تباوع علي..

رانيا.. كلبي لزمني مدري ليش ونظره ضرغام
تخوف حجيت مرتبكه صاير شي؟!

ماحجه ظل صافن بوجهي رمش عيونه
وكال امسحي حلكج!!

خجلت مااعرف شبي حلكي بس اكيد حمرتي
ضاربه صفح من التعب بعدين انتبهت عليهه
طلعت كلينس مسحتهه واني منصيه راسي

حسيته قريب كلش وترني قربه وعطره
ملاني رفعت راسي علي شكد صايره احب
عيونه وهاي حواجبه المرفوعه

صار ليلي حلو من كدما افكر بي وشاغل
تفكيري كلشي بي حلو هو شكله عادي
حاله حال الالف العراقين بس احس كلشي
بي مميز..

طلع جكاره من الباكيت وهو يسولف بهدوء
وعبالك وره هذا الهدوء ثوره ...

ضرغام.. اكو شخص اجه من الصبح وذاك
كاعد بالاستقبال يكول اني اخو رانيااا
ابوج متزوج اثنين وطلع عندج ااااخ من تالي...

.
.
.
يتبببببببببع........ متابعه شيقه

.. البارت الرابع والثلاثون





‏في بعض الأحيان قد تمر بك أقدار صعبة ، مؤلمة ، وقد تكون طويلة ، قد تبكي أو تتألم أو تشعر باختناق ، تيقن أنك إن رضيت عوضك الله..
كلما يتعثر حظك سوف تكتشف إنه خير لك ..
وكلما أصابتك الخيبه وفقدت أشياء مهمه .. ستجد أروع منها..
ليست صدفة ، ولكن هذة رحمة من الله عندما يجبر خواطرنا
••••••

رانيا... ماكو اصعب من شعور الخيبة وخاصه
بعد هذا العمر ماما بجت بحرقه مثل ام فاقده ولدهه
كلهم بحرب ومارجعوا بس بالعلم

جانت تبجي ودكول اني ماابجي ع احد ابجي
ع نفسي عشت هاي السنين واني منطيته كل
الثقه ومات وره سنه يطلع متزوج وعنده خلفه..

رمشت بعيوني واني مصدومه من شقه ضرغام
كتله شنووو اخوج منيلي اخ جاي تشاقه وياي؟!

ضرغام.. اكو واحد يتشاقه بهيج موضوع
اخوج موجود وامج تخربطت ويمكن هسه صارت
زينه..

رانيا.. اني منيلي اخ شبيك ضرغام هي اخت وبالخارج
شنو تلعبون عليه
ضرغام.. ياعزيزتي اني متبلي عليج ذاك اخوج وخالج
وابن خالج من الصبح صرعوا راسنه

رانيا.. فززني صوت عمه تحاجيني ودكلي
تعالي امج متخربطه طبيت اركض للغرفه واشوف
ماما بوفاه بابا موهيج عيونهه حمر بش شافتني
حجت بأسى ولج رانيا ابوج طلع متزوج ومخلف..

بعدني ممصدگه وممستوعبه الصار كعدت يمهه
خليت راسهه ع راسهه وبجيت يكولون البنيه
تاخذ حظ امهه وهاي اني مشلوعه گلب عليهه..

شلون يابابا هي تجازيهه بخيانه وشوكت
تطلع بعد وفاتك شلون نمت بهذيج الحفره
وانت ماتباريت الذمه وياهه ..

فوك النص ساعه هي تبجي واني ابجي
ماتكدر تحجي اي كلمه بس مصدومه
وتصيح يم ربك نتحاسب ماردتهه تدعي
الميت ماتجوز علي غير الرحمه...

كمت وكفت عدلت حجابي مسحت دموعي
واخذت نفس عالي راح التقي باخويه العمري
ماشايفته اريد اعرف بابا شوكت اتزوج وليش؟!

راحت وياي عمه ساهره دخلت للاستقبال
السبع وضرغام وياسين موجودين كلت السلام عليكم
وكعدت رفعت راسي اجت عيني ع خالي اسمه بهاء

عشر سنوات ضبط ماشايفه خالي اخو امي
الوحيد عدهه وعايش بكركوك تليفون مايرفع
ويسأل عليهه حته من توفه بابا وره شهر اخذ
من خاطرهه وهذاك يوم وهذا يوم..

اباوع لزلم اثنين كاعدين بصفه منو بيهم اخويه
عشت عمري ادور ع سند وشكد جنت اتمنى عندي
اخ ويدافع عني بس هسه كدامي كاعد ومااعرفه
وينه...

حجه خالي شلونج بنيتي رانيا ؟! رديت علي
الحمدلله وينه اخويه ؟!
بهاء.. هذا اخوج واشر ع البصفه بعمر جراح او اكبر
ضعيف حيل عيونه كبار وجاحظه عنده صلع من الجوانب
بشرته حنطيه ماينطي شبه النه ابد...

رانيا.. عندي اخ؟! عمري هسه ٢٧ سنه وسهاد ٣٠
يعني ٣٠ سنه وماندري عدنه اخ ؟! زين الاخو ماسأل
عن اخواته ماهزه حنين وكال شلون عايشات..

بهاء.. شلونج رانيا حقج بأي كلام تحجي بس
اني صار ٤ اشهر من رجعت للعراق جنت عايش
بلبنان واول مااجيت سألت عليكم وكالو ابوك ميت..

رانيا.. ابوك؟! قبل مااسمع منكم وشنو مناسبه
جيتكم اريد افتهم بابا شلون تزوج ع ماما؟
شلون ضم ابنه علينه وهو طول عمره يتمنى الولد..

بهاء.. اني احجي ابوج المرحوم تزوج اخت زوجتي
بعد زواجه من امكم ب٥ سنوات وشنو الاسباب الدفعته
للزواج ماندري

اتزوجهه مده سنه وطلبوا اهلهه لو يعلن زواجه
لو يطلگهه وهو اختار امج وطلگهه وبعد ماوصل
كركوك وكلشي انتهه ..

بس وره طلاكهه بشهرين طلعت حامل واخوهه
كال من اتجيب نشمر الولد علي ويرجع يطلگهه
لان طلاكهه باطل يعتبر بس من جابت ولد واني
جان ماعندي ولد اخذته ربيته وكتلهه ماكو داعي
تحجين وتعالي يمنه اكعدي..

ربيته اخوج هذا الماتعرفين حته اسمه حسام
وره حسام صار عندي اثنين ولد وربه حسام وياهم
ومايعرف شي عن ابو لحدما كبر وحجيتله وخيرته
يسافر لو يرجع لابو واختار يسافر وطلعته للخارج

هسه يابنتي من سمع بابو توفه وامه توفت من جان
عمره ١٧ سنه كال اريد اشوف اخواتي وخاصه
التقينه بطليقج وسام وكال الوضع العايشه
بي رانيا موامان..

رانيا.. يعني بابا مات ومايدري عنده ولد؟؟
بهاء .. للأسف اي لان ربيته وماكدرت افرط بي
وخاف ياخذه مني وهو سافر ماردت يخرب مستقبله..

رانيا.. بعين وقحه وكاعد يمنه وتحجي هيج
انت خالي الي المفروض ينكسر كلبك ع اختك
لو تروح تزوجه لاخت مرتك وجاي تحجي بطولاتك

بياعين جاي وتكلي عندج اخ كلولي شنو من بشر
انتم ماخفت من الله حرمته من الولد وتدرون بي
ماعنده سند بغض النظر عن سوايته الماتنغفر

بهاء.. شنو هالاحترام العندج تحجين ويه
خالج واخوج هيج
رانيا.. خالي!!! الماعنده مخافه الله وحرم ابويه
من ابنه مايتسمى حته بشر وعنده انسانيه

واخويه شعنده شكد عمره مودكولون
٢٩ سنه هسه متذكر عنده اخوات ؟!

حسام.. احجي اي شي حقج اني جايج اخذج
مااقبل تعيشين يم ناس غرب

ياسين.. يابويه ثمن حجيك ماينگال علينه
غرب واحنه اكلنه بفرد ماعون موهيج
الحجي بالدوواين..

كومي يا ام شهد بلا امر عليج صيحي
ام رانيا تجي تشوف اخوهه ندري
الموقف صعب عليهه بس مثل ماتعلمنه
انتن قويات بالف رجال.

رانيا.. الدم بعروقي يغلي من العصبيه
ابدي اكوم افترس خالي الكاعد ويحجي بزوده
واني اتذكر عملة بابا وانوب محروم ٢٩ سنه
من الولد وهسه عنده ابن ومتزوج وفوكاهه..

باوعت ع ضرغام ساكت نظرته غريبه
فرك وجهه وونزل ايده ع ركبته فركهه
وعينه عليه..

اجت ماما كعدت ماخلت عينهه بعين خالي
شهكتهه بنص الزلم اكبر دليل ع كسرتهه
لايمهه وتعاتبه ولا تكدر تعاتب اخوهه لان
المثل خالي مايتعاتب ..

حجوا حجوا وماما ماعدهه جواب كلما كالولهه
شدكولين ام رانيا ردت عليهم حسبي الله ونعم
الوكيل بكل ظالم وطاغي مسلمتكم بيد الله..

ياسين.. ام رانيا تعلمنه عليج بهاي السنه انتي مره
والنعم منج بغداديه اصيله وهاي الكاع موكاعج وثبتي
انتي من العراقيات امهاتنه الاصيلات لاتدعين
ع المرحوم ماتجوز علي غير الرحمه..

ام رانيا.. يا شيخ ياسين ماادعي علي مايوم خلاني
بحاجه احد ولايوم خلاني اطخ راس وادللت بنت
ال١٤ وياه بس اتحسب ع اخوي الحرمه من ابنه
وموبس هاي طعن اخته بظهرهه اني والمرحوم نتقابل
يم رب العالمين وياخذ حقي بس بالدنيا اتحسب
ع العدل...

اني مااريد اخ ولا اريد احد اني عايشه بحمايتك
شيخ ويم حماتي ومحد مقصر وياي اخوي
منين مااجه خلي يرد..

حسام.. ماكو هيج حجي انتي ظلي يم حماتج
اختي تروح وياي شنو عايشه بنص زلم
غربه..

ضرغام.. انت شبليتنه غربه وغربه جاي قبل ساعتين
وتشمر بحجيك
حسام.. انت محد..... قطع كلامه ضرغام
ضرغام... وتاليتهه وياك جاي تتعارك..

ياسين.. من رخصتكم كلامي ويه خال ام سيف
انه اطلب ايد بتكم لابنه وابن عمي ضرغام
ع سنة الله ورسوله..

رانيا.. خاف جنت عصبيه مثل النار وشمروا
عليهه مي وخمدت راسي صار بالكاع
صرت مااعرف شحجي كمت افكر شلون انطي موافقتي
واني خايفه من وسام..

حساام.. مستحيل اختي تزوج بالقريه تعذرنه
شيخ راح اخذ اختي واروح وخلي امهه تظل هنا
مومشكلتي..

السبع.. عمرك موقاصر ماتعرف تسولف شنهي
هالحجي لا اصول لاغيره عندك شنو تظل امهه
ليوين تريد توصل بالتمشخط مالتك

اسمعني انت بالذات الموافقه راح ناخذهه من اختك
واذا وافقت هسه الدرب الجابك يردك وهاااا احنه
بوكت موخوش شنو اليضمن كلامك صدك
وانت اخوهه وجاي تبيع بطولات علينه..

بهاء.. اكو تحاليل وتكدر تثبت اخوهه هم حقكم
محد يصدك بس البنيه من حقنه نزوجهه الي يعجبنه

رانيا.. باوعت لضرغام رفعلي حاجبه وميل راسه عود
ردي عليهم شرد واني مصدومه اقبل اخاف من وسام
ارفض الي اسمه اخوي وخالي يشيخون براسي..

شاورتني ماما اكسري الشوكه واقبلي محد يحمينه
من هالحيوانات هاي اله الواصل شوفي خالج
اخته وتبره منهه ..

اتخذت قرار سريع بدون حته تفكير بعواقب
كلت اني موافقه ومناقشه هذا الشي ويه ماما
وموافقه ..

حسام.. عاط بصوت عالي موبكيفج منو انتي
وتحجين بوجوهنه موافقه وتنطين رأيج احنه شنو هنا
كاعدين؟

ام رانيا.. انت منو ؟ خاف مصدك نفسك اخوهه بناتي
وحيدات ماعدهن اخ اخواتك بنات هذا واشرت ع خالي
اطلع من هذا البيت لا تشوف شي مايعجبك تشوفني
مره كاعده كدامك بس اذا رفعت صوتك وتأمرت ع بنتي
اسوي الماسوته الزلم..

شيخ ياسين اني ماعندي اخ اي واحد يجيك
لا اخ ولا ابن عمي اطردهم اني ماعندي بالدنيا غير
بنات اثنين ووين مااكو ارض واسعه تلمنه ..

بهاء.. اهدي اختي اعصابج محد يلومج بس خلينه
نتفاهم البنيه كعدتهه هنا بوسط بيت متروس
شباب اكبر غلط

السبع.. ماسمعت شحجينه موخطبناهه من عندك
والبنيه موافقه تريد تنتظر بين مانجيب الشيخ
كدامك العقد او تريد تفكر ودكول هي جبيره
وحكيمه نفسهه ماله داعي حته رأيك لان انت
مو ولي امرهه ..

رانيا.. من كل مكان الحجي ياسين من جهه السبع
من جهه والي اسمه اخويه وخالي من جهه
كمت اشوفهم يفترون كدامي دخت حيل كمت
طلعت للصاله واني راسي يريد ينفجر..

طلعوا بعد صياح وعياط وتهديد من السبع
وضرغام اي كلمه اي تحرش من حسام اوخالي
مايلومون غير نفسهم ...

طلعوا واني ضغطي هبط رافعه رجليه
وماما يم راسي اسمع بس شهكتهه مثل
طفله وانباگت لعابته...

مابيدي شي غير اكعد وابجي وياهه
كل الكلمات ماتواسيهه شريد احجي
شريد اكول لاتنقهرين ماخانج؟ لو شنو
المبرر والدافع لخيانته وضمه عنهه كل هاي
السنين...

كمت لازمه الحايط لان دايخه نزعت ملابسي
وغسلت اجت عمه جايبه عصير انطتني كلاص
وجهي اصفر شاحب ياربي شوكت ارتاح يايوم
وياساعه ...

الشيخ ياسين راح وبليل بس السبع اجه ضرغام
ملتحق ماما ظلت تحجي براسي وافقي
ولاتفكرين بفلان وفلتان فكري بنفسج وشبابج..

كعدت وياهه هي وعمه وكتلهن فهمني قبلت
بضرغام ووسام اذا سمع شلون؟ مصير اطفالي
شنو ذنبهم يتشتتون بين الادين ..

ساهره.. رانيا يمه اقبلي هسه وانخطبي حالج
حال البنات منا لمن يوصل الحجي لوسام الف
عمامه التنگلب وبعدين ليش نسبق الاحداث
يجوز مايوصل الحجي ؟ ويجوز يوصل وماراح
يحجي شي..

رانيا انتي دمرتي نفسج وكعدتي هاي السنين
وضرغام مبين شاريج وشفتي مواقفهم
شكد حلوه وصاحبين نخوه راح يحميج ويحمي
اطفالج...

ولاتنسين هوه هم اب وفاقدهم يعني راح
يتمسك بيهم اكثر وراح يحارب علمود سعادتج
صار سنين معتكف عن الزواج وهسه من شافج
قرر معناتهه شاريج يابنتي..

رانيا.. الحيره البيهه بس الله يعلم بيهه
كمت توضيت وصليت صلاه الاستخاره
وتوكلت ع الله بكل اموري..

٤ ايام ضبط اني بحاله صراع بين كلبي
وبين عقلي دخت راسي صدع حته
دوام ماداومت امشي خطوتين يهبط ضغطي
الاكل احسه بدون طعم بحلكي من شدة التوتر
والتفكير ...

اجه ضرغام وبيومهه ماما لحت تاخذ الجواب
ماقبلت اظل اماطل وراحت كالتله موافقه وبليل
اعقد وياريت جبار مايجي...

العصر اجت ام اواب والحجيه ام ياسين
والسبع جاب نور والحجيه بركات رغم الفرحه
البداخلي راح اصير اله بس بنفس الوقت الخوف
وكلساع يتخيلي وسام يجي ياخذهم مني...

عندي فستان اشتريته ماصار هوايه لونه
اسود لان جنت بعدني حزينه على بابا ماصار
سنه وماقبلت انزعه لان هي خطبه وبدون حفله..

ماما ماقبلت البسه وكالت ع الاقل بس بالعقد البسي
ابيض لبست ثوب ابيض والشال ع راسي جابته الحجيه
وياهه كالت من مكه هذا وصاحوني وره الباب
عقدلنه الشيخ...

محد هلهل بس صلوات وجكليت ودموع ماما
ابد ماوكفت واني مدنگه وامسح بدموعي
مشتاقتلك بابا الله يغفرلك ويرحمك تمنيت
تشوفني اختار الانسان المناسب وشكد جان
تلح حته اتزوج ...

صاحت ام اواب عيني ترى كلبتوهه مناحه عليمن
هسه نفرحلهه وتطلع سنة ابوهه وندك ونركص الهم
ضرغام فرحته جبيره سنين نتمنه يتزوج وهسه قبل
واختار التعجبه..

كومي ياحلوه بدلي والبسي فستان حلو
وادخلي البسوا الحلقات اني اشتريتهن
حالف الشيخ ياسين حلقات ضرغام علي اذا
قبل يتزوج مرمر گلوبنه..

رانيا.. صحت لبابه تجي وياي فتحت الكنتور مااعرف
شلبس مامشتريه ملابس من اجينه للبصره
ومن كمت اشتري كله اشتري اسود من توفه بابا

من طلعت ويه البنات اشترن للمدارس بوقتهه
عجبني فستان طويل اسود مخصر من فوك ومن جوه
شويه نفش وكصته تفاحه وربع ردن بس
تنزل ع الكتف...

لبسته ردت انزعه مامستور من الصدر ونص الظهر
طالع فتحت شعري طويل لحد الورك بس ماكعد
وياه رجعت لميته ولبابه سوته كعكعه من وره
خليت رشيت عطر وخليت شال ع اكتافي
وطلعت...

من شافتني ام اواب كالت من رخصتكم ماتحمل بعد
وكامت تهلهل دكوا الباب عليهم كالولهم خلي يجي
يلبسهه الحلقه ...

شعور حيل حلو اباوع بالوجوه اشوفهه كلهه
فرحانه حته ماما المكسوره مخليه رضاوي
بحضنهه يصفك ويكول ماما عروس..

كلبي مااسيطر ع دكاته احسه راح يوكف
من سرعته رغم الجو بي بروده بس اديه
قطعة جمر...

كلساع اغطي نفسي بالشال ماجاي اتخيل
ضرغام اني وياه هسه ع سنه الله ورسوله
واني صرت بأسمه ...

اسمع اصواتهن كالن دخل وعقيق ادور ع حجابهه
وترتني دكلي كومي كعدتي علي واني عوزي
اكعد بحضن الحجيه من كدما خبصتني...

كمت وكفت من دخل ابد مارفعت راسي
ولاكدرت حته اشوف ملامحه وشلابس
بس اشتم بعطره وام اواب تشاقه وياه..

طلعتله الحلقات سحب ايدي لبسني
الحلقه بس بطيء اسحب بايدي اريده
يتركهه وهو متعمد يلبس ع كيف ...

اريد البس حلقته ايدي ترجف عبالك
اول تجربه اليه من شافني هيج اخذهه
هو لبسهه وكعدنه ...

باركتله الحجيه واجت باستني جانت التليفونات
الكاميرا موهذيج الراقيه حيل بوقتهه جانت الدمعه
والدب رادت نور تاخذ صور ومنعهه ماخلاهه...

ام اواب.. كومو بالاستقبال محد اكو خلي يشوف
خطيبته ياسين والسبع طلعوا
رانيا.. اشر بايده هسه دقايق لان تليفونه دك
وطلع يخابر بره واني اخذتني ام اواب للاستقبال
انتظره...

رجليه صايرات مثل خيوط العنكبوت
ماكدرت. اوكف كعدت ع القنفه وعيني ع الباب
ايدي ع كلبي اهدي بروحي شجاج رانيا قابل
ليله عرسج...

سمعته يكح قريب ع الباب صدره مقبط
فدمره من الجكاير ظل يكح هواي يله
فتح الباب ودخل...

كمت وكفت باوعتله لابس بنطرون اسود
وقميص اسود الاستقبال طويل اني بنهايته
واكفه من جهه الصاله وهو بدايته يمشي
بخطوات بطيئه وعينه عليه...

وصل يمي صار مايفصل بيناتنه غير
اميال قصيره مخليه الشال ع كتفي
بخيث ماطالع شي من عندي مد ايده
برهاوه وسحبه بحركه سريعه بدون حته
ماانتبه وشمره بالكاع..

خليت ايدي ع زندي وكتله لاا ضرغام
موهيج بعدني مامكمله الحجايه وايده
حاوطت خصري بقوه وانرفعت رجليه
من الكاع وانطبعت بوسه قليل وصف
عميقه بحقهه..

احس كلبي يتراقص ويه حركة شفايفه
اريد اسيطر ع حالي مااكدر لمسه ايده
ع خصري حاسه بيهه وبوسته بعد اشد
احساس بكل حركه وبكل لمسه جنت
بكامل قواي مندمجه وياه..

مااكدر اكول ثواني لا دقايق مرت وهو متقن
الحركه من شدة هول المشاعر العندي ماحسيت
ع نفسي شلون ايدي محاوطه رگبته وابادله
بنفس احساسه...

ابتعد وخله راسه ع راسي ناخذ النفس
والهوه مشترك بيناتنه صدره يصعد وينزل
وايدي المحاوطه ركبته احسهه عركت
من حراره جسمه ...

شدد قبضته ع خصري اكثر وحضني
وهو يشم بنفس طووووووويل حيل
وگانو غرگان وهسه اشتم الهوه...

الصمت سيد الموقف اي تبادل حديث
بهاي اللحظات ماكو ولا هذا ضرغام المستفز
البارد شفت انسان قمة الرومانسيه..

كعدنه ع القنفه واني مدنگه رفع راسي بيده
وكال شو خلي انشوف ابداع الخالق..

ابتسمت رفعت راسه ظلت عيونه
هي التحجي واترجم الماگدرت الگلوب
دكوله بهاي اللحظات..

قرب نفسه يم اذاني وكال شلون كدرتي
تكسرين كل هالحواجز وخليتيني ماتغمض
عيني اذا مارانيااااااا براسي..

وباسني من وره اذني قشعر جسمي
ابتعدت بسرعه واني العب بالحلقه
ماعندي كلام اكوله اصلا يوم ولادتي
اعتبرته هيج مشاعر ماعشتهه ابد مشاعر
حقيقيه نابعه من اصغر خليه بجسمي..

اصابيعه لامست فتحه الفستان من المقدمه
وهو يرفعه لان من اكعد ينزل خليت ايدي
ع ايده كال احنه انريد نستر لان مااضمن
الباقي ...

كمت وكفت كتله خلي اروح فشله كلهه
بالصاله ؟! رد عليه روحي ودنك ع الشال
خلاه ع اكتافي وباسني من زندي ...

طلعت واني اداري بخدودي الجمر
حته بدون ماالتفت علي ركضت للغرفه
رجعت مراهقه او اقل من هذا الوصف
اتلمس المكان الي انطبعت لمساته علي
وابتسامه فرح مرسومه ع وجهي..

بدلت بسرعه واني كلساع اصفن ع وجهي
بالمرايه خاف اكو اثر بس الظاهر خبره
ويعرف شلون يتعامل...

طلعت يم الخطار لحد المغرب الكل راح وبقينه
وحدنه ضرغام كالو راح للقصر هاي الليله نمتهه
بسعاده حته التفكير تلاشه عندي وكلما اغمض
عيني تجي حركاته كدامي...

لبابه.. ثاني يوم كعدنه الصبح يوم جمعه
نظفنه البيت من هوسة البارحه ورانيا ماكعدناهه
نايمه والسبع راح لبغداد كال عندي شغل شكم يوم
واجي..

جراح مااشوفه صار هواي اكتم بداخلي
وساكته ومراعيه حالته النفسيه بس
صورته وهو ونوال ماتروح من بالي...

بيومهه دك باب الاستقبال فتحته
فجر وكالهه صيحي لبابه ماما كالت اكعدي
وياه وافتهمي منه هو طيب موهيج عصبي
اعذري ...

طبيت سلمت وكعدت بصفه نفس توتره وهزة
رجله كتله ليش تهز رجلك ماجنت هيج؟

وكفهه بسرعه وكال شلونج شلونج بالمدرسه؟
لبابه.. زينه شويه صعوبه بالمواد بس رانيا
ادرسني
جراح.. اني هنا وابرار اذا عندج شي تعالي
اساعدج تريدين انقلج بمدرسه اهليه؟

لبابه.. لا فجر مااكدر اعوفهه ومدرسة عقيق
بس متوسطه والثانويه يكولون بعيده حيل
عليمن اقره وحدي وانتو ساعدوني..

جراح.. زعلانه مني
لبابه.. انت شدكول؟
جراح.. حقج تزعلين بس اعذريني ع عصبيتي
لبابه تعرضت لايام حته باحلامي اشوفهه
انطيني العذر بين ماتتحسن حالتي النفسيه..

لبابه.. جراح احجيلي الحقيقه عندك مشاعر
ماخلاني اكمل كلامي خله اصبعه ع حلكي
وكال اااااشششششش

وروح ابوي وروح ابوي ماعندي مشاعر بس الج
ومن خطبتج ماخنتج ولا واعدتهه بشي
لبابه.. اني سمعتكم بالنجف وحجيتله بوقتهه
السمعته بالتفصيل

جراح.. والله العظيم مامنطيهه امل تعرفيني
زين مومن شيمنه نلعب ع اثنين بس هي تأملت
بسبب خطبه جبار وفهمتهه اكثر من مره وانتي تعرفيني
قبل لامن النوع العصبي ولا اغلط بسرعه ولاحته اجرح
بالكلام وجنت افهمهه بكل هدوء بس شسويلهه..

وسالفه الحضن غلطه لان هي اجت تركض وذبت
نفسهه ماادري بهذيج اللحظه يمكن لو فجر حاضنتني
هم مااوخرهه اني مشتاق للكل بوقتهه..

اني احجيلج مواريد اقنعج بس ثقي بالله
مااعوفج اظل انتظرج اسنين لحدما تقبلين
بارادتج بس اني هسه اريد احجيلج شغله
وقرري!!!

اني حالتي النفسيه دون الصفر تعرضت لتعذيب
ماينحجي ومواقف ذبح واغتصاب كدامي
مستحيل ارجع بين يوم وليله جراح القديم
لازم اتعالج ولازم تساعديني لان احتاجج بكل وقت..

لبابه اريد نتزوج هاي الفتره مال عطله نصف السنه
وبفتره المراجعه نروح نكعد ببغداد وحدنه اريد ارتاح
حته من الوجوه الموجوده هنا ...

لبابه.. اني سادس راح اتأثر خلينه نرتاح اثنينه
احسن للطرفين
جراح.. اريدج وياي صدكي تساعديني احس روحي
ضايع لج ليلي ماانامه من الكوابيس والمناظر الكدامي
واحس جسمي يتألم من جديد..

لبابه انطيني جوابج هسه وخلينه نتزوج
لاتفكرين بيوم اخذلج واخونج لو اموت
بس ساعديني اخلص من الازمه البيهه وحدي
مااكدر اتجاوزهه...

لبابه.. بدون وعي! بدون تفكير! بدون مااخذ
رأي ماما هزيتله راسي موافقه نتزوج
بالعطله ومااعرف المضموم شنو بس كلي الي اعرفه
جانت تفكير سريع بالموافقه

.
.
.
يتبببببببع......... متابعه ممتعه

البارت الخامس والثلاثون


لبابه.. كعدت حجيت لماما كل كلامه ظلت صافنه
بوجهي ماانطت ردت فعل كملت كلامي وسكتت
لزمت ايدي وحجت بحنان..

ساهره.. شوفي يابنتي جراح جربناه باكثر من موقف
مومن شيمهم الخيانه يريد يتزوج عليج باجر عكبه
محد يگله لا لان عدهم رجال ومحلل اربعه

بس بنفس الوقت مانريد انظلمه بكلامنه
احتمال هو فعلا حابج ويريدج زوجه واني ام
واشوفج صغيره صح راح ادخلين ب١٩ بس تبقين
صغيره ومو حمل زواج..

خلينه انسولف اذا خلصتي السادس
تتوقعين ادرسين بأمان بهيج وضع وطريق
بعيد للجامعه وجبار ورانه ؟! لازم هم نطلع من مشكله
انفوت بأكبر منهه

وهم من نجي لجانب الثاني خايفه تخسرين بزواجج
ياماما خطبتج صارت بيهه عراقيل هوايه واني
خايفه خاف ماتتوفقين ...

من اجي اباوع لعقيق شحلاتهه ويه السبع رغم
انتي اوعى منهه بس كادره تخلي هذا الجبل
يهتز بس كدامهه..

وهذا ضرغام هم حمه رانيا رغم ماتقربله
شي بس يحبهه واحتمال راح يواجه صعوبات
بزواجهم بس يبقه يحارب لأجلهه..

يعني اني اريد زواجج من جراح ع محبه الله
لاهو يفكر مجرد تكوين اسره ولا انتي تفكرين
بشغله الحمايه وتحسي مجرد امان ..

احجيلي لبابه تحبي؟ لو اعجاب؟ لو مشاعر
طفيفه احجيلي جراح بالنسبه الج شنو

لبابه.. دنگت راسي خجلانه من ماما رغم هي صديقتنه
بس مااتجرأت واكلهه اي احبه ومشاعري كلهه اله
ظليت مدنگه

هي افتهمت باستني من خدي وكالت احنه مغلوب ع امرنه
لو نحارب وحدنه ونواجه هاي الوحوش لو نرمي
حملنه ع رجال يتكفلنه ؟

ساهره..راح احجي ويه جراح واحجي ويه امه
زواج ماكو ابد منا لمن تاخذين شهاده السادس
يتحمل وخلي يكون تحمله علمودج زواج قبل
النجاح ماكو..

لبابه.. تركت الحجي ع ماما وهي راحتلهم فوك
وتفاهمت وياهم واتفقوا ماكو زواج اله بعد
السادس وهو بالاول معترض بعدين موافق

رجعت لدراستي بهمه ونشاط رجع جراح القديم
جابلي جهاز جديد ونفس خطي خليته ويوميه
يطمن عليه رغم ماينزل دائما معتكف..

جان عندي امتحان فيزياء وعصت مسئلتين عليه
حاولت رانيا تفهمني وماعرفتلهن خلصانهه ضحك
نحل ومايطلع الناتج..

فجر.. شبيچن خبصتنه انغيد نقغه
لبابه.. منو يمج متقرين جاي نقره هم
فجر.. منين من صوتكم وهاي غانيا حلكهه شكبغه
صايغ من انخطبت

رانيا.. ام السان المكسور تروحين وترجعين عليه
فجر.. ضغغام خطب وتوغط بعد مااجه صاغله
يومين

رانيا.. شقصدج ولج هلكدوتج وكل حجايه اكبر
من حجمج
فجر.. وينه مايجي غيغ مخطوبه وهو يحبج
شو انهزم..

عقيق.. لا مو انهزم السبع كال خابرو عدهم انذار
مدري شنو وبمكان بعيد اسمه طرَبيل وحته تغطيه
ماكو..

رانيا.. هاي شوكت؟ شوماكال
فجر.. اسم الله بعدكم جدد قابل يستأذن منج
رانيا.. راح اكوملج اشك حلكج واطلع السانج المكسور

عقيق.. بليل بيوم الخطوبه مخابري ورايح الفجر
يجوز مالحك ينطيج خبر
رانيا.. هو هم هيج ظليت ساكته اجاني رضاوي
واكع بالتراب كمت غسلتله وجاي ابدله دك تليفوني

كمت شفته مكتوب ابو ليث رضاوي طلع
يلعب واني كلبي يدك بقوه فتحت خط
كلت بصوت هادىء الووو

ضرغام.. هله اوكفي دقيقه!!
رانيا.. سكتت وصوت هوه عالي

واسمعه يحجي ويه الجنود
وواحد يكله سيدي اذا مانزلت باجر اشمر روحي من
هاي الرافعه صار شهر كلبي طك فدوه سيدي
خلينه ننزل وهو يضحك يكله ولك چااا اني وحد
مااريد انزل..

رجع حاجاني شلونج ؟ جاوبته الحمدلله وانت
ضرغام.. بخير اعذريني صار انذار مفاجىء
وماردت اقلقكم بالليل واليوم يله فرغت..

رانيا.. لاعادي سمعت من عقيق السبع
حاجيلهه
ضرغام.. اااي شلونج انتي اشتاگيت!
رانيا.. افتر بالغرفه ومبتسمه كتله اني هم

ضرغام.. هم شنو؟
رانيا... مشتاقتلك
ضرغام... هالمره اتأخر وبنص الجول ابو ابوي
مسموط الليل كله ماانام

رانيا.. ديربالك ع نفسك السبع هم ماموجود عنده شغل
والعمال جراح وياهم
ضرغام.. هااا زين لازم يستعجلون يجوز حته بليل
يشتغلون لان السبع مستعجل

رانيا.. ليش؟
ضرغام.. موبس السبع حته اني رجال مرتبط
وماعندي مكان اكعد بي
رانيا.. يعني يكمل البناء بهاي الدوام

ضرغام.. موكتلج السبع مستعجل واذا قرر
هاهي لازم يكمل لان صاير حجي موحلو بخصوص
عقيق

رانيا..شصاير؟
ضرغام.. جبار من مايلگه طلابه يستخدم سوالف
النسوان قال وقيل وهسه ماعنده شغل وعمل غير
يركض وره السبع

وكايم يحجي بكل مكان لان هو وعقيق بمكان واحد
وماكو دك وركص ماترهم بنظره وقرر السبع يعلن
زواجهم هاي الفتره بس يكمل البناء

رانيا.. بس عقيق مريضه
ضرغام وهو راح يكرب عليهه يمسح حلكه
بالحايط كلشي ماكو بس حته يسد حلوك الناس

رانيا.. ضرغام خايفه من شي
ضرغام.. من ابو سيف؟ ادري راح يوصله الحجي
وراح يجي ونتعارك عود تنحل لاتشغلين بالج

هسه اني لازم اروح من يصير مجال
اخابرج ديربالج ع نفسج
رانيا.. ماشي انت هم ديربالك
ضرغام.. ماتنطيني مسكن

رانيا.. شنو؟
ضرغام.. نسيت دماغج سميك انطيني جرعه
تصبرني
رانيا.. حجيت بحده ضرغاااام
ضرغام.. يابويه يروحلج فدوه ضرغام لو الزمج
هسه بس ربج يعلم شسوي

رانيا.. يله روح مو عندك شغل
ضرغام.. اي افلتي هسه الايام طويله
رانيا.. ضحكت بصوت
ضرغام.. بعد بعد ولج حته ريحه نسوان مايمنه
وانتي ادلعي بعد

رانيا.. صاحه واحد سيدي الغده جاهز
كال يله راح اروح وسده مخليه التليفون بيدي
والابتسامه شاكه حلكي ..

العصر راحوا العمال وطلعنه للمشتملات
ماكو سياج بيناتهن كل مشتمل حاله حال الشقه
تصميم وترتيبهم حيل حلو بينهم حديقه وبين المشتمل
وهذا البيت هم حديقه...

شويه نظفنه الي نكدر علي وام جراح وابرار
ويانه اجه سيوف يركض جايبله كارتونه
بيهه كتاكيت صغار ٨ الوان احمر واصفر وحته
وردي صابغيهن..

هم وفجر اخذوهن وحاروا بيهن فجر
تحب سوالف الطيور والدجاج ودزت جراح
اله اتجيب قفص صغير وراح جابلهن اضيع
اولادي الكاهم يم الكتاكيت..

ثاني يوم صادفت عطله وطلعوا الكتاكيت بالحديقه
الباب بي فتحه من جوه عاليه مالحكوا عليهن
ركضن كلهن وبس واحد ظل بالقفص..

طلعت تركض وراهن فجر هي وسيوف
واسمعهه اجت كل عقلهه تبجي وتصيح
ماتن ماتن وهذوله ناصبيهه مناحه وياهه..

المصيبه موهنا المصيبه اواب جاي ع جراح
ويه جيته طالعات ودايس عليهن بالسياره
ماحي اثرهن والحقد والغل بعين فجر مبين..

اواب دخل يم جراح وكال سوو غده يظل يمنه
وفجر تحوس ورضاوي يكلهه الاصفر باقي
بس ريشه ويبجون ويقهر بيهه..

التهينه انسوي غده تغدينه وغسلت مواعين
وكعدنه شويه نرتاح اليوم عمال ماكو اسمع صوت
جراح يحجي ويصيح مدري ياكلب ابن كلب مسوي
بالتايرات هيج..

ساهره.. خاف من الجيران عدهم جهال
جراح.. واحد متعمد اربعتهن مكعدهن فشله من الولد
وعنده عياده شلون يروح وضرغام ماخذ سيارته

رانيا.. اباوعلهه حاصره ضحكتهه وكاعده
وسيوف يشاورهه والله كلت مااسكتلهه
كتله هاي فجر

جراح.. شنوو فجر مكعده تايرات السياره
مال الولد ليش؟ وطالعه للشارع
فجر.. اني مااحب اجذب اي اني منو كاله
يدوس ع الكتاكيت مايشوف

جراح.. تحجين صدك؟ صغيرونه انتي
وتسوين هيج اجيبلج غيرهن قابل متعمد
حالج حال الجهال

رضاوي الفتان هو سمع هيج وراكض ع اواب كايله
وعمه ساهره تعتذر منه وهو مبتسم يكلهه ماصار
شي بس لو كايلتلي اجيبلهه عشره ولاهاي الدكه

رزلتهه عمه وزعطوطه وماتكبرين واني اعلمج
فشلتيني ويه الرجال شيكولون مسترجله
فجيران وهي مستمره تاكل تترزل وتاكل...

لليل كامت تصيح اسناني وتبجي منهن
من كدما تاكل حلويات يصلن عليهه بالليل
اخذت مسكن ونامت وعمه خابرت ام اواب
اخذت منهه عنوان العياده كالت باجر اخذهه..
..

فجر...
ك النيزك ك النجوم ك الشهاب.. انير غسق الدجى وينجلي الظلام
انا الفجر حين اظهر يختفي القمر خجلاا ..شرنقة صغيرة
ثم فراشة احوم في بستان ..ف عقلي ينضج وحقائقي تتضح ونظرتي للامور تتغير ..واعية ناضجة حد الكمااال
قوية جريئة عند الشدائد..لي سر لا يعرفه احد حتى انا
وعندما اتحدث اطرب من حولي بلساني
غامضة مبهمة محاطة بهالة ظلااام
لا اعلم ماذا يحصل لي وكل العيون موجهت حولي
اصارع في حياة بائسة ومستقبل مجهول
هل اصل الشاطئ بأمان؟ ؟!
ام لي نصيب من اعاصير الحياة؟ ؟!

maroosh96

فجر... اصغر وحده بالعائله المدلله مال بابا
كلكم تعرفوني وتعرفون الحياة الي عشتهه
وشنو من ايام مره وسوده مرت علينه
بس هذا مايعني السقوط بالعكس تألمنه
حته نتعلم من تجاربنه واغلاطنه..

اتذكر هذا اليوم وماانساه مثل اسمي
اليوم الي انذبحت شهد كدامي اختي
الجبيره وجنت مااكدر احجي لماما اجي
احجيلهه كلشي ..

يمكن محد يصدگني اذا احجي بيوم شفت
جبار يذبح بشهد مثل الدجاجه لبابه مغمضه
عيونهه وتجر بيه تريد تحميني بس عيوني
جانت مفتوحه ع وسعهه واركز بكل تفصيله
بحيث ويه حركه السجين تتحرك عيني..

كمت مااشوف اسمع انينهه واسمع صوت لبابه
بس شفت باب انفتح وشعاع نور عمه عيوني
جنت اردد بكلبي اية الكرسي لان الساني ماينطقهه
من شدة المنظر..

شفت بابا شفت واحد رجال جبير يشبه السبع
يطبطب ع ظهر بابا ويكله هسه نسقبلهه
ونداويهه شفت بعين عالم اخر موعالمنه

شفت العالم الثاني بهاي الدقايق المرت
عالم بي هواي ناس باعداد لاتحصى وكل واحد
حاير بروحه وبابا والرجال منتظرين وصول شهد
وعينهم ع الطريق..

شفت شهد لازمه رگبتهه بس ماكو دم وتركض حافيه
ع بابا وتحضنه اصيح بصوتي اخذوني وياكم
بس اني جنت اشاهد فقط شاهدت عالم الاموات

من انتبهت من سفرتي شفت جراح يحمينه
بس بالي وعقلي وعيوني ماجسدت غير
منظر العالم. الثاني شفت هواي ناس وكأني
اعرفهم..

اتذكر من دخلت بازمه رغم ذبح اختي بس
موهذا السبب لااا جنت اغمض عيني اشوف
بالحلم هذا العالم اتوسل بربي اريد ارجع
مثل قبل مااريد اشوفهم

شلون يوميه اشوف شهد وبابا وبنيه صغيره
عرفتهه اخت السبع من الصوره روحي بعالمهم
وجسدي بالحياة الدنيا..

التزمت بالقران وظليت هواي ادعي مااشوفهم
كمت اخاف كمت اتمنى ماانام ومايجي الليل
لان حسيت نفسي عايشه وياهم وتركت عيشتي
بالدنيا..

شويه شويه بديت استعيد صحتي وتوزاني
وكمت احجي وشهد بالدعاء واقرالهه قران
احس روحهه تفتر وياي ومرات احس احد يلمسني
التفت اشوفهه بخيالي تحاجيني ودكلي
لاتنسين الوصيه...

حمل الامانه ثگيل وشهد قبل لاننهزم بيومين
اجت وحملتني امانه وكالت هاي وصية بابا
احتفظي بيهه جانت حاسه ع نفسهه
ايامهه معدوده...

الانسان الطاهر والنقي رب العالمين يبعثله
احساس حته بأيامه الاخيره وشهد شفتهه
اكثر من مره باحلامي تاخذني من ايدي ودكول
تعالي شوفي بيتي..

تعدت السنين واني اتذكر بيتهه لحد هسه
جان منظر ماينوصف امشي ونهر يجري جوانه
ومايبللنه دكلي هاي الشجره هديه من فلان
ومااعرفه تذكر اسامي ماعرفهه

تمد ايدهه ع نهر تشرب مي وضحكتهه
مرسومه ع وجهه دكول شوفي مكاني
هذا مكاني الاخير حيل فرحانه بي وادعيلكم
حته الله يحميكم من جبار..

شهد ليومي هذا ماتروح من بالي روحهه غادرت
الدنيا بس بمغادرتهه فتحتلي ابواب يتمناهه
اي انسان احساس عالي عندي اتوقع الشي
قبل لايصير واشوفه كدامي..

موبكيفي ومااكدر اتحكم بشي فجأه يجيني
احساس اتذكر سالفه جواد وخطف عقيق
جان اكو واحد اسمه جواد جيرانه نلعب وياه
فجأه اجه ابالي وكانما واحد وكالي كولي جواد

اربط التخيل بالواقع واوصل لنتيجه
قبل لا اشوف هذا الشخص اعرفه زين
لو سيء كله هذا صار بيه من وفاه شهد...

حياتي جدآ هادئه وطبيعيه تاركه اموري
لله وماخاب من توكل ع رب العالمين
ماافكر بأي شي كل اليجي ابالي اكول
يم الله...

اعمارنه صغار بس المصايب كبار وكعت ع راسنه مصايب خلتنه نكبر بدل السنه عشره لو اقارن هذا عمري ابغداد
احتمال لحد الان مااعرف اجمع كلمتين لان مانعرف غير
المدرسه والبيت

بس هنا عرفت الظالم والمظلوم وعرفت اليتيم
اذا ماعنده سند مايعيش!!
عرفت رب العالمين اذا اخذ شي راح يعوض ابداله
تعويض جميل

والدليل عقيق اخذ منهه ابوهه بس عوضهه
بالسبع التعويض الالهي ماعلي اعتراض لو ينفتح
النه حجاب وانشوف حياتنه المختارهه ربنه
والحياة الي نختارهه احنه راح نسجد باليوم الالف
المرات ع اختيار رب العالمين...

فقدت بابا وفقدت اختي عشنه بظلم وجبروت
وقتل وصوت الرصاص بس وره هذا تعويض
جميل اله حكمه بيهه وهو العادل ماراح
يظلم احد حاشاه لله..

فزيت نص الليل اسناني الاخيره ياكلن
بيه من الالم كعدت ماما انطتني حبايه
قرنفل خليتهه يهدء شويه ويرجع...

ثاني يوم وره الظهر كالت بدلي اخذج لاواب
لو يشلع الرحى لو يشوفلهه حل رفضت
اول شي فشله اني كعدت التايرات مرات
اتصرف بجهل

والشي ثاني نظرات اواب ماارتاحلهه ع الرغم
من اشوفه وكأنو اشوف مستقبلي ويه هذا الشخص
بس اني ارفض رفض قاطع اعيش بالبصره

بعد ملحت ماما وجراح حجه عليه بدلت
ورحت اكوشي ماعرفت افسره اكدر احس
ويه الكل واشوف للكل بس ويه نفسي لا احس
ولا اكدر المح نظره عن مستقبلي...

وصلنه العياده وجراح دخل حجه وياه
كال يخلص البيده وادخلوا اني راح انتظركم بره
انتظرنه ربع ساعه وصاحنه السكرتير..

دخلنه سلمنه من شافنه كام سلم ع ماما
ومد ايده كال تفضلوا كعدنه وماما حجتله
السالفه كال اصعدي خلي اشوفهن..

اول مالزم فكي حسيت دنابيس وتنغرس
ببطىء بالمكان من شدة الخدر يفحص بيهن
ويأذني وساكته حسيت باصبعه لامس شفتي
الجوه بصوره سريعه ..

كال انزلي ونزع الكف وغسل ايده وشفته
شلون عرگان بحيث يحجي ويانه
ويمسح بوجهه بالكلينس ...

كال ملتهبه الرحى الاخيره مانكدر نشلعهه ولا نحشيهه
اله يروح الالتهاب ولازم اتركين الحلويات لان مدمرتهن
بالحلا وهالشي موصحيح...

كتبلنه وصفه ورجع فلوس الكشفه بس
لحدما طلعنه ووضعه موتمام العرك مالي
كصته وركبته ..

رجعت للبيت كلما اجبر نفسي اريد احس
بشي ولو ذره او اشوف شنو السبب
الي اجبر نفسي احس بي وسبب نظراته
مااوصل لنتيجه...

عقيق...السبع اليوم يجي كملت دراسه من وقت
وكال وره العشه اوصل ضرغام مااجه بعده
هاي صار عشر ايام تقريبا اثنينهم غايبين عن البيت

ب٩ وصل كال متعشي سلمت علي كدام
الكل سألني ع علاجي وكال راح اروح للقصر
عندي شغل مالحيت ولاسألت شصاير؟؟

ثاني يوم من رجعت من الدوام جان البناء شبه
كامل بقت بس الكهربائيات بحيث العمال تشتغل
شفتين بس مستعجل يريد يكمله..

صاحتني خاله ساهره للغرفه وسدت الباب
فاجاني كلامهه سمعته منهه ماسمعت من السبع
وهي دكلي بس يتنظف البيت راح يأثثه وتزوجون

سألتهه ليش وشنو السبب؟
حجتلي ع جبار يحجي عليكم وهذا مايستحي هو ونسوانه
ولان عايشين بغرفه وحده وخاف يظل يطلع اشاعات
وهنا ناسهم يريدون سالفه ..

السبع مافتح اي موضوع وياي واساسا مايبات
يمنه مخلصهه شغل خلص البناء وبس مشتملنه
اثثه اثاث بسيط مطبخ صغير لان اساسا
عمه ساهره شرطهه بوقت الاكل ننجمع يمهه
وغرفة نوم حلوه والصاله بيهه تخم وتلفزيون
يعني ع كدنه حاله من حال شقه بغداد...

هذا شهر ١٢ من سنه ٢٠٠٨ بعد اسبوعين
ونفوت بسنه جديده وامتحانات التمهيدي مالتي
بشهر الواحد جنت احل واجب بيتي وانفتح
الباب ...

كمت بابتسامه تلگيته باسني من خدي
وكعد بصفي بحلكه حجي اختصرتهه
علي وكتله صدك راح نتزوج؟

السبع.. ااي ام شهد كالتلج؟
عقيق.. ااي حجتلي كلشي يعني نعيش بالمشتمل
السبع.. ااي هو بنص البيت نهارج يم البنات لان
انه شغل وبليل وحدنه نحسبه غرفة نوم

عقيق.. يعني نسوي عرس مثل الناس
السبع.. بكيفج انه مااحب الشكليات والهوسه
بس علمودج
عقيق.. اني هم مااحب

السبع.. راح انسوي عشه بيوم الحنه لان هاي
من العادات وثاني يوم ماريد هوسه عرس
مجرد زفه بسيطه للبيت

عقيق.. مااريد زفه هو اطلع من هاي الغرفه
اروح بالمشتمل
السبع.. مااريد يحجن حجي ماصخ اوديج يوم الزفه
يم ياسين ومناك اخذج هي سياره وحده
ونجي لبيتنه..

عقيق.. هم اروح صالون
السبع.. چااا وحد عن البنات هو يوم واحد بعمرج
سوي اليعجبج يمج ام سيف وام شهد سباعيات...
هذا الاسبوع عندج امتحانات؟

عقيق.. لااا
السبع.. زين حته اطلعين تشترين التحتاجي
من باجر اخذلج اجازه فلوس راح انطي لام شهد
وانه شغل فوك راسي مالحك..

عقيق.. حسيته مهموم وحته مافرحان كتله
ماتريد تزوج نظل هيج؟
السبع.. ابتسم بتعب وكرصني من خدي
شلون مااريد بس الشغل متعبني

عقيق.. مااعرف شبي بس سكتت رغم
تعامله وحنيته نفسهه بس ماحسيتهه بفرحه
الهم مالي گلبه

ثاني يوم اخذنه جراح كلنه حته فجر ولبابه
للعشار واشترينه هوايه شغلات كله رانيا
اشتري هيج والبسي هيج ونسقي هيج

دخلنه للصايغ واشتريت ذهب هو منطي
لخاله ومتفقه وياه ورجعنه للبيت رتبنه الغراض
بالمشتمل وثاني يوم طلعنه وظلينه اسبوع
يوميه نطلع...

رحنه للصالون اتفقنه اني بيضه حيل
ومابيه شعر بوقتهه حته ماحفيت وجهي بس
رتبت حواجبي وشعري السبع وصاني مالعب بي
لونه حلو وخليته نفسه..

جنت فرحانه لان راح نتزوج وبعد ميعوفني
ولا يوم بس ماجنت اعرف تفاصيل العرس
اعرف مثل ماعودني السبع البوسه والحضنه

ماجنت اعرف العذريه شنو واقل خطأ البنيه
تفقدهه اتذكر الخطف والصار بس محد نبهني
لان ماحجيت بس للسبع وهو ساكت...

تحدد موعد العرس ع جية ضرغام وكالو الاربعاء
يجي جراح هو قايم بكلشي وعاصم وياهم لان السبع
هم لازم مقاوله وماكدر يعوفهه ع النص...

رانيا.. جنت انظف ع العرس واجه سيوف
صاح ماما عمو ضرغام يريدج غسلت اديه
وركضت للغرفه بدلت ملابسي وطلعت
صارله عشرين يوم من يوم الخطبه ماشفته..

فتحت الاستقبال ودخلت جان كاعدبالكاع
يدخن من شافني طفه الجكاره ونفخ الدخان بعيد وفتحلي ايده وهو ع كعدته وكال تعالي تعالي!!!

تقربت اريد اكعد بصفه سحبني من ايدي
خلاني بحضنه الخجل مسيطر عليه ماعنده
تمهيد كل حركاته مفاجئه..

سالته شلونك؟ جاوبني عوفيني من شلونك
احنه ليش ماتزوجنه ويه السبع شكو بعد؟

رانيا.. هو شفتك اني اليوم يله اجيت
شبيك مستعجل
ضرغام.. لعد صبريني
رانيا.. ضرغام كلامك بدون تمهيد موهيج؟

ضرغام.. هااا العفو ماعرفت اصيغ الطلب
يله ممكن تصبريني؟

رانيا.. ضحكت بصوت عالي صاح صوتج
وللللج ومد ايده ع خصري وسحبني
علي وايده وره راسي وباسني بقوه
حته ماكدرت ابتعد

خليت ايدي ع صدره اريد ابعده كعدتي مومريحه
ماابتعد لزم ايدي الي ادفعه بيهه وكمل مشواره

انفتح الباب حيل رضاوي يبجي كاتله سيوفي
وجاي يشتكي اخذه ضرغام يحاجي واني
امسح بحلكي احس الخدر وصل لاذاني..

رضاوي سحب ضرغام اله كومه حته
يحل المشكله كاله امري لله هي منو امك
انوب انته ...

طلعت للغرفه لكيت عقيق تبجي اريد افتهم
شبيهه ماتحجي من طلعت عمه ساهره اجت لزمت
ايدي وكالت عمه ساهره حجت حجي موحلو

رانيا.. ع كيفج حبيبتي شحجت هي تحبج
عقيق.. وصتني ع السبع وكالت لاتخافين
وحجتلي شغلات موحلوه تحجي وتسد اذانهه وتبجي
حته ايدهه ترجف...

رانيا.. ردت اطمنهه كمت احجيلهه بهدوء
واعلم بيهه وكلما احجي تنهار اكثر وتبجي
بحيث حسيتهخ راح يغمه عليهه اخر شي كتلهه
كذب ميسويلج شي لان انتي مريضه..

عقيق.. ماكدرت استوعب كلامهم اني هسه
موبنيه اني مااستاهل السبع كلهه تحترمه
واني هيج شنو ذنبه..

احس كلبي يريد يوكف وتبدل شعور الفرح
للحزن والالم شلون عمه ساهره كالت
البنيه الملعوب بيهه يكتلوهه يعني السبع
يكتلني..

بعد يومين عن الزواج بس ماغمضت عيني
ابد حته من يجي السبع انهزم للحمام بس
يخابرني اريد ابطل انعادت عليه المأساة
وكمت اعيش ساعات مره..

عقيق... اليوم ٢٠٠٩/١/١ مارحت صالون لان
اساسا المكياج مايلوكلي رانيا خلتلي شي بسيط
والبدله عدله مابيهه سيم مثل قبل عبالك
فستان بسيط وربع ردن مستور

كاعده ابيت الشيخ ياسين وكل اعظائي ترجف
رجليه قطعة ثلج واديه احسهم مثل الخشبه
ماينسدن اباوع بالوجوه محد يفهمني ولااكدر
احجي للسبع واليوم شلون بيه ...

ماحسيت بشي حته من اجه ومن صعدنه
ومن طبيت للمشتمل كلهن ماعشتهن ماعشت
غير شعور الخوف وترقب المصير ...

ساعه اكول انتي حجيتي للسبع ويدري
وساعه اكول هم صعبين وعشاير وعمه
ساهره كالت مايسكتون مااعرف بيمن افكر
وشسوي بس دموعي بعيني ورانيا تسكت بيه...

جنت كاعده واتمنى مايجي لاول مره
اتمنى السبع مايجي واشوفه اكو نسوان
عمات السبع وبناتهن حجت وحده مااعرفهه
يمكن عمته..

كالت احنه نبات هناا ننتظر البشاره من السبع
ونروح هاي كعدتنه اليوم

ساهره.. عيب هالحجي هو ومرته شنو بشاره
عندج ولد واتبشروا بيهم رجاءا خلونه نطلع
تاخذ راحتهه لان ع جيه هسه

ردت الثانيه ع خاله اسكتي انتي خاف معيوبه
وتسترين الهه چاااا هي سنتين يمه مانعابت
لو نخطفت والله اعلم شسوو بيهه ويسترهه

احنه عمات السبع وبنات شيوخ وهاي
كعدتنه للصبح انشوف بعينه ونكول
بنت اجاويد واذا ماشفنه وضمهه السبع
هاي معيوبه وسترهه....

.
.
.
يتببببببع...... متابعه شيقه

... البارت السادس والثلاثون



ومن عرفو بعافيتي
سكف طين وسعف ذبلان
فكو زيجهم ل الله ودعو تمطر.
...
عقيق.. راسي بالكاع مااكدر ارفعه لان دموعي
تجري اريد اسكت مااكدر حسيت بالغربه
وماعندي احد لوعندي ام كاعده بنصهن اكو وحده
تجرأت وهيج حجت عليه..

خاله ساهره تردهن وهن مستمرات بالحجي وحته
كلمات ماافهمهه لان لهجتهن اهل قبل
بس يباوعن بحقد ووحده منهن طلعت جكاره ادخن..

ام اواب.. ام جاسم هذا الحجي عيب ومايصير
ندري شيوخ وعادات بس هيج كلام مامقبول
لان انتي لا ام بنيه ولا ام ولد لو ام السبع موجوده
محد بيكم حجت هيج ..

ام جاسم.. انه اردن اعرف شچاچن تحمسن
برواحتجن چااا مادكولن اي البنيه علم
وترفع راس السبع شبيچن اطمطمن الهه

ام اواب.. من حجينه بالود وبالتفاهم علمودجن وعلمود
كبرتجن تعرفن السبع زين ولو طب وشاف مرته
مكدر خاطرهه وانتن بهالعمر عيب وزحمه

نوفه.. والله وچنج مرت ياسين صرتي ام البيت
وماندري سدي حليگج واحنه نحجي ويه السبع
حالهه حال بنات الگصر من عرسن انشوف نيشانهن
چااا هي اخذت زينة الزلم..

ساهره.. ام اواب عوفيهن احنه العلينه حجينه
هو يجي ويحاجيهن كومي بنيتي عقيق
ارتاحي اليوم ابدال متفرحين انقهرتي

نوفه.. شنهي يسويهره ماعندج اصول
دكوميهه من نصنه چااا المن كاعدين
ماتتعلمتن اصولنه لو بعدچن حضريات

ساهره.. عفت الاصول الج لان ماشاء الله
انت اخوات جبار ومااستبعد هذا الكلام
تلقين من عنده لان منعه السبع من الجيه
وصرتن السان ابمكانه وحجيتن..

كومي بنيتي ارتاحي والماعاجبه اصولنه
محد جابره يجي وينكد علينه..

عقيق.. كمت ويه خاله للغرفه بس سدت
الباب شهكت حضنتني بحنان ام وايده
تغطي اكتافي بالبرگع مال البدله ..

كعدت ع الجربايه مختنكه كتلهه خاله
اريد علاجي ؟

كامت طلعته من الميز وكالت منو بيهم
وجابتلي كلاص مي شربته هذا العلاج
وقت الحاجه بس هو بي نسبة منوم..

ساهره.. لاتضوجين هذني مايعرفن يسولفن
وعايشات بهذا القصر الطمس راسهم بالوحل
وبعدهن مستمرات بالهمجيه الناس وين وصلت
وهذني يدورن سوالف تعبانه..

عقيق..اسمعهه وامسح بدموعي شحجي خاله
كل كلامهن صح اني مومثل البنات بيوم عرسهن
ظليت ساكته ولازمتني الشهكه

ساهره.. بنيتي عقيق ولو السؤال موحلو انتي
ليش تبجين وخايفه صاير شي ؟اني امج مواتفقنه
ماتضمين عليه شي خاف من ترحون لبغداد صار
شي احجيلي ليش هيج العيون مورمه ولاعبالك
عروس وفرحانه

عقيق..الحجي بحلكي ردت احجي وسكتت
اتذكرت كلام السبع بوقتهه كال ممنوع تحجين
ولو يريد جان هو سولف لساهره...

ظلت تهدي بيه البنات كلهن بالبيت الجبير
لان يغسلن مواعين كامت خاله خابرتهن
كالت تعالن واني اروح بمكانهن حته يظلن يمج..

شويه واجن يمي بالغرفه بس رانيا ظلت هناك
لان خاله ماقبلت كالتهه لتخلين وحده تلزم المطبخ
غيرج...

البنات حالهن من حالي مانحجي بهيج مواضيع
اصلا فجر كامت تحجيلي ع الامتحان وطلعت
كتابي وتأشرلي الاسئله الي اجت بالامتحان..

سمعت صوت الحجيه بركات وام اواب
اجن من البيت الجبير شويه ودخلن
وهن يصلن على محمد باركن وطلعن ...

اباوع للساعه ب٨ اجت ام اواب كالت يله
بنات خلونه نطلع اجه السبع خليهم
يرتاحون هنااا عبالك كالو راح يعدموج
لزمت ايد ام اواب اكلهه لاتروحين واشوف عينهه
مدمعه وباستني حست بخوفي..

كلهه طلعت من الغرفه وظليت وحدي
ايدي ع كلبي اريده يهدء اقره ايات
واتذكر كلامه من يكول اسوي كلشي علمودج
بسبيل ماتتأذين..

اتذكرت كلام الطبيب بوقتهه ماافتهمته
من كاله ممنوع تتقربلهه بالوقت الحالي
مامسموح اي جهد الهه كلبهه ضعيف
واساسا بالمراجعه الاخيره كال عدهه خلل
بكهربائيه القلب هاي اضافه لمرضي السابق...

لبابه... ماما حاولت اطلع عماتي وماقبلن
جنه واكفين بره واجه السبع يحجي ويه
ضرغام الزلم كلهه راحت ماما طلعت حافيه
حاجت السبع وضرغام بس ماسمعنه شكالت..

دخل السبع وهلهلت ام اواب دنك ع الحجيات
بوسهن من راسهن وام ياسين مدري شتحجي
وهو يضحك...

كامت الحجيه بركات كالت خلينه نطلع وليدي
اخذ راحتك وهالله لهالله بالبنيه والله يسعدكم
ويكتبلكم الخير...

من كامت الحجيه عماتي ظلن كاعدات السبع
جان لابس دشداشه راح للمغسله يغسل
والتفت عليهن كالهن چنهه حلتلچن الكعده؟

نوفه.. چااا من الاصول نظل ننطر تبشرنه
السبع.. خاف امي انتي وماادري وهسه
عرفتي السبع حته تنتظرين بشاره لو بعدجن
وره جبار

ام جاسم.. ياعمه موهيج الحجي راحن نروح
ابيت ساهره بس حالك حال زلمنه انشوف
نيشان البت..

السبع.. شنو رأيجن اسوي هذا العرس اسود
عليجن انتن وجبار واجيبلج دم جبار نيشان

لبابه.. ولا وحده حجت كمل كلامه بحديه
وهو يأشر للباب يله اريد اشوف مرتي
وهاي سالفتجن عديدتهه حته لايتگدر خاطري
بس اذا سمعت حرف واحد وروح اختي
اسوي المايعجبكم شيخجن ...

كلهن كامن طلعن واحنه وراهن ماما حجت
وياه واجت ورانه طبن للبيت يدردمن
ويحجن وبعدهن مصرات راح نكعد ننتظر..

عقيق... اسمعه يسدن الابواب ويقفلهن
ويه كل طگه قفل تصيبني الرعشه
لحدماشفت رجليه قريبه ع الباب كمت بدون
شعور افتريت من الجهه الثانيه من الجربايه..

بس فتح الباب بجيت وحجيت بشهكه واشر
باديه اثنينهن لا لا تتقرب اكمز برجليه
كون ينفتح الحايط وادخل بي وينسد عليه..

اشرلي بأيده وهو مبتسم حبيبتي ع كيفج
ليش خايفه تعالي عقيقتي ماكو شي ليش
هيج حالتج؟

ماكدر اجاوبه بس ابجي لامكياج ولا كحل احس
عيوني تحركني من كدما سال الكحل وافرك
بيهن اخذ نفس عالي وتقرب عليه واني اشرله
لاتجي الله عليك عوفني ...

سحبني من ايدي بحنيه وضمني لصدره حيل
وهو يطبطب ع ظهري ويحجي بكلام حنين
اهدي اهدي منو وياج؟ منو مخوفج هيج
هسه اطلع انعل والديهم..

اريد اكله خايفه منك خوفني منك وعماتك
هيج حجن وينتظرن بس اي كلام ماطلع
من عندي بس اشهك..

اخذني بين اديه للجربايه وكعدني كدامه
لازم اديه رفع راسي ولزم وجهي باثنين اديه
وباسني من راسي ومسح دموعي باصبعه الجبير
وهو يحركه ع وجناتي بحنيه..

السبع.. انه شكايلج موكايلج هاي الدموع
مااريدهه كدامي تعرفين شكد اتأذى من اشوف
دمعه وحده منج ليش هيج حبيبتي منو المخوفج

عقيق.. حجيت بشهكه كتله عماتك يكولن معيوبه
السبع.. غضب الله ع راسهن العيب بگلوبهن اكو واحد
عنده عقيقه ويكولون هيج خلي يولن هذني
مايفتهمن بالحجي ...

لاتبجين ابد مدامني وياج انعل ابهاتهم الينزل
دمعتج لاتزعليني عليج احنه شمتفقين
مو تعوفين كلشي وانه امانج؟!

عقيق.. اباوعله وعيوني مغوشه وهو يمسح
دموعي ولازمني من اكتافي ويحرك ايده
عليهن ..

حجه وهو ياخذني بحضنه هااا ينسمتي
الهادئه كلبج هدء لوبعده؟!
هزيتله راسي اي شويه

السبع.. كومي خليني اشوفج خلصتيهه بواجي
خلي اشوف الحلو مالتي
عقيق.. كمت وكفت فرني كدامي ورجع حضني
مد ايده ع شعري فتح البرگع ذبه وفتح شعري
كله انفتح نزل ع ظهري..

همس يم اذني قشعر جسمي كال يله
روحي غسلي وبطلي بجي ...
عقيق.. اخذت ملابسي ورحت للحمام سبحت
وبدلت شويه هدئت بس بعدني خايفه خاف
يسوي شي مثل كلام خاله ساهره..

لبست تراك شتوي وطلعت جان يخابر بواحد
ع الشغل من شافني فتحلي ايده وكعدني ع رجله
لحدماكمل مكالمته..

السبع.. نعيما
عقيق.. الله ينعم عليك المي دافي تسبح
السبع.. اي راح اسبح واجي نصلي جففي شعرج
الجو بارد لاتتمرضين..

عقيق.. راح للحمام واني جففت شعري وسويته
ضفيره بارده حيل رحت فتحت الصوبه بالصاله
وظليت كاعده يمهه طلع لابس تشيرت نص ردن

كتله لاتبرد الجو ثلج رد عليه مابردان كومي
نصلي لاتكعدين يم الصوبه تدفين وتبردين
وتتمرضين..

كمت للغرفه صلينه سوه وره ماكمل ظل
يصلي مدري شنو بعدين سولفلي كال من وفاه
اهلي لهذا اليوم اصلي الهم ويه صلاتي...

سمعت الباب يندك كمل وكام جاب صينيه
اكل جايبتهه خاله ساهره وراحت ماطبت ماشفتهه
كعدنه بالصاله مااشتهي ولاهو اكل شي قليل وشالهه

ردت اروح اغسل المواعين سحبني من ايدي
للغرفه دب الخوف بگلبي سحبت ايدي
من عنده حيل وكتله انت موكلت مثل اختي
امانه منا لمن تلگين اهلج..

السبع.. ضيق عيونه وهسه شمسويلج يااخت
هاي عقيق لاتخافين ابد مني ولا راح يصير
شي من السوالف المعبين راسج بيهه

عقيق.. كول والله
السبع.. والله تعالي يله مثل كل يوم ماتجين
بحضني؟

عقيق.. مددت بصفه مثل كل مره وخله ايده
جوه راسه واندار عليه وخر ضفيرتي من كتفي
وباسني من خدي...

السبع.. سولفيلي منو مخوفج وشكالولج؟
عقيق.. خاله ساهره حجتلي شغلات مااعرفهه وكالت
اذا البنيه عليهه شي يكتلوهه..

السبع.. مابيج شي انتي لاتفكرين هيج اساسا
حالتج ماتسمح لهيج سوالف احنه متفقين اي شي
يزعلج ويضوجج تحجيلي ليش هيج كاتمه
بداخلج لومتخربطه..

عقيق.. استحي شحجيلك
السبع.. ممنوع اسمع هالكلمه مااريد تستحين مني
اعتبريهه سوالف عاديه اناقشج وافهمج
مااقبل تضمين بكلبج ..

عقيق.. عماتك اذا حجن شكول
السبع.. محد تحجي هذني بطرانات وجبار دافعهن
لان اله ايد بالخطف مالتج ويدري انه متكتم ع الموضوع

عقيق.. خاف تسألني خاله لو ام اواب
السبع.. كليلهن كلشي تمام والباقي السبع
كال لاتحجين مايقبل عماتي مايسألنج بس خاف
ام شهد تطمن عليج..

عقيق.. يخوفن عماتك
السبع.. هذني بعرس ضرغام هم هيج سون والبنيه
غريبه ومن غير محافظه وحته تعاركن ويه امهه
لان ردتهن بس ضرغام مسودن هم مشتمل عنده
وطلعلهن شايل المسدس كالهن التبقه كاعده هنا
الصبح ادفنهه بالنجف ...

وتالي رجعن بس بعدين اعترفن واعتذرن كالن
جبار كال لان ضرغام دك رجل اله ياخذهه عباله
عنده شي وياهه وهو مايحب التدرس.

عقيق... اسمعه وهو يسولف مركزه بوجهه فجأه
سكت وكام يحرك اصابيعه ع ركبتي غمضت عيوني
وهو مستمر بلمساته منين مااميل راسي يحركهن...

حسيت بشفايفه وهي تنطبع ع رگبتي انتفضت
واني ابعده لزم ايدي وباسهه رفعهن اثنيهن
واني مافتحت ابد بس الاحساس الجميل
مالي كياني...

صار اكثر جرأه وايده ع خصري ويصعد ابوساته
لحدماوصل حافه شفتي ايده تخلت على فكي
وباسني من شفايفي بهدوووء وكأنو عنده لوحه
فنيه ويلون بيهه...

ماكدرت اسيطر ع وضعي ولا ع احساسي
شعور فضيع اريده اكثر مااريده يبتعد
ابتعد شويه ورجع بشوط ثاني بس هي بوسه
وكأنو حلقت للاعلى من شدة الشعور الحلو...

ابتعد وسحبني لحضنه وكال غمضي عيونج
غمضت وايدي ع كلبه صوته يتخلل مسامعي
كال راح اسألج بس مااريد خوف ولااريد ارتباك

هزيت راسي شدد قبضته اكثر ورفعني
لصدره صار نص جسمي علي جان يكول
وره الخطف شكد ظليتي تنزفين؟

غمضت عيني حيل ولزمته من تشيرته بقوه
لزم ايدي وكال مجرد سؤال لتخافين؟
واني ع وضعي جاوبته عشر ايام؟

السبع... تألمتي؟
عقيق.. اااي
السبع.. ليش عشره وليش ماحجيتي
عقيق.. شي قليل موهواي وحته خاله متدري
بس موهواي اكو...

فتحي عيونج فتحت مليانات دموع باسني
منهن وكال ديربالج تنزل دمعه ترى اموتج..

عقيق.. انت مافرحان حسيت بيك انت تتمنى
تزوج مثل الناس
السبع.. صحيح مافرحان بس راح اكلج السبب!!

ياعقيق انه ماخذ عهد ع نفسي مااتزوج
ابد لان عندي ثار ومااتزوج قبل مااخذ بثاري
وحگ ابوي وامي ...

بس وين ياعقيق اجيتي گلبتي كياني
خليتي اخر همي الثار وهمي الوحيد
شلون احمي عقيق وشلون اسعدهه...

اتمنيت ابوي موجود بهذا اليوم تمنيت امي
واخوتي بس الحمدلله ع كل حال انتي اجمل
تعويض الهي وان شاء الله اكدر احميج واسعدج..

عقيق.. اني هم تمنيت ماما وبابا يفرحون
اني وياكم متشابهين .

السبع.. اثنينه عدنه نقص وكل واحد عوض النقص
بالثاني شو تعالي اموت ع سوالفج ياراحتي
وهدوئي...

واخذني بحضنه وهو يسولفلي عن طفولته
واني هم احجيله لحدما بديت انعس وهو يلعب
بشعري لان ماخذه علاج..
....

ام جاسم.. شنهي لاصايره ولادايره زلمه يطب
لمرته مايطلع يبشرنه

ضرغام.. والله كتلتيني شيبشرج انتن حاشرات
رواحتجن بكلشي

ام جاسم.. هسه يعرس جراح وهم اطردونه
جراح.. اطمئني مااتزوج بالبيت ولا اريد اشوفجن

ام جاسم.. والله ماتستحون ضرغام طردنه بعرسه
وهسه السبع وانت تحجي هيج ولكم شمالكم
صايرين تتراجفون كدام هالنساوين..

لبابه.. جنه كلنه بره نغسل مواعين والجو ثلج
وضرغام وجراح ناصبين ع ام جاسم وعماتهم
شويه ودخل اواب صاحت ام جاسم هايالدختور
ماتجي تشوف هالسن الاكشر بس هذا ظال عندي

اواب.. حجيه بليل مااشوف
ام جاسم.. فلك طرك ذاك اليوم كتلي بليل وهسه
بليل ماتشوف حبوبه شجاك لوماابيك جريم
ومعروف

اواب باجر الصبح اشوفلج موظاله هنا انتي؟
ام جاسم.. غير يطلع السبع چااا نسه روحه
مادكن البال علي ..

ساهره.. عيب عيب موكالجن اطلعن اله تخلنه
يصير موخوش
ام جاسم.. چااا هو من زمان موخوش ومسودن
كله من هذا واشرت ع ضرغام

ضرغام.. انتي روحي وردي عليه
ام جاسم .. يبعد خالتك ولك ليش ماتروح لعمامك
ضرغام رحتلهم ذاك اليوم هو شباقي بعمامي
بس واحد وخربان

ام جاسم.. خافنك تزعل اذا حجينه بنات السلف
شكال وارناب وانت عفتهن واجيت لبنت بغداد
متشوفهه شلون مايعه

رانيا.. وين مايعه من الصبح لسه كربتوا ع راسي
كراب الخيل وهسه صرت مايعه حجيه ماستبردتي
ماتفوتين جوه

ام جاسم.. عمت عين السانج طبعا چااا اذا كاعد
كبالج وتتهامزون بيج كل الحيل...

رانيا.. باوعت لضرغام مبتسم بس ماعلق
لان الولد كاعدين كملت شغل وطبيت جوه
بدلت ملابسي ونيمت الجهال بيدي التليفون
اجتني رساله من ضرغام..

كاتب لااطلعين بعد تشتغلين نامي اني
راح اروح للقصر اني وجراح وباجر الصبح
نجي محتاجه شي؟

رديت علي لاسلامتك سديت التليفون
وفرشنه كلهه تعبانه بسرعه غفينه
حسيت ع لبابه تكعد بيه ودكلي ضرغام
يصيحج...

فزيت ع طولي ضرغام مو بالقصر كالت
لا اجو وكال صيحي رانيا وكومي سويله
كهوه كاعد بره ...

الله عليج لبابه مكعدتني نص الليل ع كهوه
سويله خليني انام
لبابه.. كومي ولج هو كال صيحي رانيا
دكومي موخطيبج..

رانيا.. كمت بنص الليل جانت ب١ ونص
لبابه مخليه الكهوه ع النار بس صبيتهه
واخذتله الكوب وطلعت بارده حيل لافه نفسي
بالقمصله وهو كاعد بالحديقه

انطيته الكوب لابس تشيرت خفيف كتله ليش
كاعد هنا ماتبرد والجو ثلج ؟
ضرغام.. ماابرد جنتي نايمه؟
رانيا.. ااي

ضرغام..ليش كعدتي لبابه كالت كاعده كتلهه
صيحيهه ماادري بيج غافيه ...
رانيا.. خومابيك شي؟

ضرغام.. لامابيه شي بس السهر تعبني هاي الفتره
الراحت انذار والليل كله كاعد وتعودت
رانيا... كوم نام موزين عليك حته الجوه عيونك
صاير اسود...

ظل يباوعلي الضوه مفتوح واشوفه بكل وضوح
ركز بعيونه وكال ليش حبيتج انتي اني ماحبيت
بس وحده وانتهه الحب شلون كدرتي تحركين
احساسي من جديد..

رانيا.. خاف لان اشبهه
ضرغام.. لااا بس بالشكل تشابهن بس بالطبع
تختلفين انتي متمرده وغبيه

رانيا.. جاي تمدحني لو تذمني
ضرغام.. غزلي معوق مووو؟ من تصير عندي مشاعر
هائله مااعرف اعبر تذكرين شلون جنت استفزج
عبالك واحد ساقط من الشوارع..

رانيا.. لاحشاك بس جنت جدا مستفز
ضرغام.. تجيني حالات هسه مرتاح من اضوج
اصير ماانطاق

رانيا.. ضرغام تحبني؟
ضرغام.. مممم
رانيا.. ليش مادكولهه؟

ضرغام.. تصفط حجي الحب بالگلب ولومااحبج
ماارتبط بيج
رانيا.. عيونك حلوه؟
ضرغام.. جنت ع نفسها براقش...

سحبني من ايدي حيل لوره البيت ظهري
طخ بالحايط وكام يبوس بشراهه اكتافه تصعد
وتنزل ويه كل حركه وميلة راس..

يتركني اخذ نفس ويرجع من جديد وايده
اكثر جرأه لحدما ماكو منفذ للهروب حضنته حيل
يله هدء وعبالك بركان وثائر...

ابتعدت شويه واني اتلفت اريد ارجع
لزمني من ايدي باسني من بطنهه
وتركني..

رجعت للبيت بوجهي للفراش لبابه
لازمه تليفونهه تراسل بجراح
واني مثل عاصفه وكسرت شكو سنبله
يابسه بداخلي...

لبابه.. جراح احس بحبه يوم عن يوم
اكثر من قبل ابد مازعلني مدللني بالحجي والفعل
وشريد وشطلب ينفذ بس حالته النفسيه
بعدهه لقاء ماكو بيناتنه مجرد رسائل...

جنت اراسل بي بالليل هو واواب بالاستقبال
كال يله نامي خلي نلعب داس دومنه
اني واواب وانام..

هستوني مددت فزت فجر ع حيلهه
فتحت الضوه كتلهه اسم الله شبيج
فجر.. لبابه شفت حلم موزين وين السبع وين ضغاام!؟

لبابه.. اسم الله فجوره تعالي نطلع للمطبخ
لاتكعد الجهال اشفتي اشبيج؟

فجر.. موزين موزين كمت ابجي مااريد احلم
بيهم مااريد اشوف احد اريد اكون طبيعيه

طلعت للمطبخ واني ايدي ع كلبي يتهيألي
الراح يصير شفته بمنامي شفت اليصير كله
بمنامي اكو احد راح يموت..

انفعلت حيل تركت ايد لباب واسمع صوت
جراح بالاستقبال ركضت بدون وعي للاستقبال
فتحت الباب وابجي واحاجي بجراح

جراح كوم راح يصير شي شفت حلم موزين
المصيبه جراح مايعرف بحالتي وماجان شاهد
ع الصار صافن بوجهي ويحاجي لبابه شبيهه
خاف مصخنه..

تقدم عليه اواب وكال اهدئي اخذي نفس
عالي واكتمي بصدرج ماكو شي لاتخافين

فجر.. واحد غاح يموت انت تصدگني
اواب.. اصدگج بس ع كيفج تعالي اكعدي
واشر لبابه اتجيبلي مي..

الوحيد افتهمني ضرغام ماموجود وجراح واكف
مصدوم عباله اهذي لوبيه شي كلساع وكال
فجر خاف بعدج نايمه..

اواب.. شحلمتي منو يموت؟
فجر.. ماادغي منو! بس شفت بابا وعمو ابو السبع
حفغو( حفروا) قبغ وكالو ننتظغ اليوم فلان
يجي كالو الاسم بس مااتذكغ منو؟؟
واني بجيت لان احبه اكو واحد عزيز غاح يموت
اواب انت تصدگني غاسي يأذيني.....

.
.
.
يتبببببع.....