#قصة_ليتني_ماتزوجتها 👇

انا شاب في احببت ان اكمل نصف ديني فنصحتني احد قريباتي ان اخذ بنت فلان(من ربعنا ولكن يسكنون بمدينة اخرى) ولمعرفتي بها منذ الصغر تقدمت لخطبتها وسط عدم قبول من اهلي (لانهم حاطين عينهم على بنت غيرها). المهم وفقني الله وتزوجت..واثثت بيت وسكنت فيه مع زوجتي انااحب الاطفال ولكن هي بالعكس,, فقد انجبت منها طفلين.الطفل الاول تحسرت هي عليه (ولازالت تتحسر لانها كما تزعم لم تستمتع بفترة اول الزواج ..مع رفضي لذلك التحسر جملة وتفصيلا) وكانت المشكلة انها لا تعرف كيف تتعامل مع ذلك الطفل في حينها في وسط تخلي اهلها عنها في تلك الظروف.. اما الطفل الثاني فقد كان تحت اصرار مني ..والحمد لله على كل حال..والان هي رافضة تماما فكرة الانجاب..!! للاسف
انصدمت اول ماتعايشت معها بانها ميح في المطبخ..ولكن مع شوية صبر وشوية كلام بدا الموضوع يسلك..وان كان لا يرقى لما يجب ان تكون عليه المرأة ولكن مجرد المحاولة يكفيني ويرضي خاطري... مع اني من بيت مشهور بالطبخ وبالذات الاكلات الشعبية
ترى ان عملها في البيت مجهد كثيرا وان كل شيء عليها..مع انها ام لطفلين ونسكن في شقة لا تتعدى 150متر مربع..وترى وجوب ان يكون عندها شغالة!! وانها في هالبيت سيدة وليست خدامة..مع اني حاولت افهامها ان في الحياة الزوجية لكل طرف حقوق وعليه واجبات...
-انصدمت انها كارهه للضيوف الذي يصلون لبيتي سواء من الاقارب او من الاغراب وهو امر مزعج بالنسبة لي..فانا ان لم اكرم ضيفي كما يجب والا فلاداعي للعيش في مجتمعي..مع ان كل اكل العزايم من مطعم المندي وهي ماعليها الا الشاي والقهوة.!!..الا انها تسويها ولكن بنفس شينه!! ما ادري ليش؟؟لو اطلعها للسوق 50 مرة في اليوم ما كفاها..وهذا من حقها ولكن ليس بهالشكل الجنوني...فعندما لا نتفق على موعد للسوق او للطلعة يجن جنونها كيف فلانة وفلانة وانا لا!!-حينما نخرج في سفرية مثلا تكون في احسن حالاتها لانها لاتطبخ..وتتمشى..وتتسوق
.طيب حلو لكن اول ما نرجع ترجع لعادتها ويمكن اكثر .. ياشينة النفس!!اصبحت انا لا اشعر بالاستقرار معها (مع اني حريص جدا بعدم الضغط عليها او الطلب منها بالذات في ايام الدورة الشهرية) وعدم الاستقرار ادى الى التفكير بتطليقها والانفكاك من هذا الموضوع برمته...ولكن ما ذنب الطفلين...
مع اني اجد ضغوط غير طبيعية من عملي تلزمني العمل من الثامنة صباحا الى الخامسة عصرا...الا انني اجد ان دخولي لبيتي في بعض الاحيان كدخولي الى أي مكان اكرهه...فتخيلوا انني احب عملي أكثر لانني ببساطة اكره ان ادخل بيتي الذي تسكن فيه زوجتي واطفالي ..

هناك مواقف حصلت تجرح كبرياء أي انسان في الدنيا وعلى اسباب تافهه جدا (لا تتعلق باي احتياج بين الطرفين) ومع ذلك اغمض وامشي وكانني لم اسمع شيء..لان بصراحة ابوها كبير في السن وكثير الامراض ولا ودي اضغط عليه خوفاً عليه...عوضاً عن ان هذه ضريبة الزواج من الاقارب!!
اصابني نوع من النفور منها...حتى اصبحت تظهر سلبياً على علاقتنا بقوة مثل الصمت الاسري (فانا اذا جلست معها اكون مثل الجدار كي اتجنب أي شكاوي او كلام يسم البدن) واحاول ان اضمها ولكن نفسي تعافها من كثر مشاكلها...ولاحول ولا قوة الا بالله..وآه ثم آه ..فكثيراً ما ينتابني الحسرة والألم لأني تزوجتها.. !
اخيرا اناشدكم اخواتي الفاضلات ان تجدوا لي بالحل....فانا اخاف اني ظلمت زوجتي بدون ما اشعر...واخاف اني تجنيت عليها بدون وجه حق.. امل ان تشوروا علي.. وان تفهموني طبيعة بنات هاليومين لاني بصراحة عجزت وما عندي خوات يشورون علي..

#قصتي_مع_ممرض 👇

احكي لكم قصتي وهي رساله لكل بنت لها علاقه بشاب !
انا ممرضه اعمل بمستشفى بالقصيم وكانت علاقتي طيبه مع الكل واحب اساعد وملتزمه بعملي والحمدلله وكان معنا شباب ممرضين ودكاتره اجانب وسعوددين وماكان بينا الا الاحترام والتقدير بنات وشباب وكان واحد من الممرضين شاب محترم واخلاقه عاليه جدا يعني وملتزم بعمله كان قبلي متوظف من جيت ع المستشفى موجود والكل يمدح اخلاقه ويحترمه طبعا كان يعجبني باخلاقه واحترامه لنفسه حبيته بيني وبين نفسي ماكنت ابين له طبعا هو كان حاس بحبي له من نظراتي وطريقة كلامي معه وحصلت لي مشكله بالمستشفى وكان اول شخص يوقف معي وقف معي وقفة رجال واضطريت اخذ رقمه واتواصل معه بالجوال رسايل طبعا وانتهت المشكله ع خير الحمدلله وطلع الشاب من المستشفى لمكان ثاني وبقيت اتواصل معه بالواتس وعلاقتي معه جيده جدا

ومرت الايام وانا متواصله معه محادثات واتس وكنت كل يوم اسأله اذا احد عارف عن اللي بيني وبينه وكان يحلف بالله وبأعز م يمكلك انه بس انا وهو وربنا بس ومرات نكلم بعض ومحادثتي معاه جدا عاديه زيه زي اي شخص كان يقول انتي وسمعتك بذمتي وانا كنت اصدقه ماكنت اشوف غيره ولا اسمع غير كلامه ولا احس بشخص غيره كان انسان متواضع ويحب يساعد الكل يمكن كنت انا اشوفه بس لكن اللي حولي لهم وجهة نظر اخرى لكن لمن تعمقت معه بالعلاقه وعرفته زين تغير كل شي عرفته على حقيقته هالشخص كان يحمل بقلبه الحقد والخبث والكراهيه يعني عرفت عنه اشياء ماكنت اتمنى اعرفها عنه بيوم
كنت اكرهه هالشي فيه يعني كانت صدمه بالنسبه لي لكن كنت ماشوف عيوبه كنت اتمنى اكون غلطانه واستمريت معه وانا اكذب على نفسي وبدت بيني وبينه مشاكل بسيطه كنت اتخطاها واسامحه وهذا كل اللي صار بيني وبينه لكن الصدمه الكبرى والشي اللي اذهلني وماكنت اتوقع بيوم ولا حتى من اعدائي كان يوم الاثنين الساعه ٢ مساء ٢٤ فبراير كنت تعبانه من الدوام ونايمه صحيت العصر الا جاتني رساله من رقم ماعرفه اللي فيها مكتوب(انتي فلانه بنت فلان بيتكم بالحي الفلاني واخوانك هم فلان وفلان وعيال عمك ووجماعتك ومعدد لي كل اهلي انتي لك علاقه بشخص وهالشخص يتكلم عليك بالاستراحه وعند كل اللي يعرف واللي مايعرف وحتى محادثاتك معه كنا نشوفه وكان يتكلم عنك باقذر الكلام وانه كنتي تطلعين معه شقق وانتي راعية علاقات وشباب وانه ناوي لك نية شينه ويبي يفضحك وانتي تطلعين حتى مع الدكاتره الهنود وانه انتي خفيفه وانه ارسل علي احد الموظفين الاجانب وسويت معه علاقه يوووه
وكلام ماعمري سمعته بحياتي ولا بيوم كنت اتخيل اني اسمعه ولي هالكلام وكاتب لي تحت اللي عليك تسوينه انك تنسين هالشخص وتغيرين رقمك وتفصلين من دوامك معك اسبوع اذا ماسويتي هالشي بتنتشر فضيحتك عند اهلك وجماعتك يووه هنا وقف بي الوقت وانشل مخي عن التفكير ماهمني تهديده كان اكثر شي يهمني الكلام اللي قاله واللي وصفني فيه كان مثل الصاعقه بالنسبه لي يووووه شخص وثقت فيه وسلمته قلبي وسمعتي معقوله هالانسان الاخلاق المحترم كل هالحقاره فيه والخبث والنذاله طبعا مو بس انا عنده ضحايا كثيره كان يمثل عشان يستغل البنات ويبدا يبتزهن وياخذ منهن فلوس ومن هالحقاره والانحطاط طبعا سويت كل اللي قالي عليه والين الحين وهو يتكلم علي ويرسل ناس لمكان عملي واتصالات ورسايل تهديد ع رقمي ومعي صديقتي الله يجزاها خير وقفت معي وقفه مانساها لين تخطيت هالمشكله الحمدلله طبعا كان يرسل كل جمعه المغرب تذكير ساعة استجابه لمن كنت معاه من يومها وانا كل جمعه اتحسب عليه وادعي ربي ياخذ حقي وحق كل بنت استغلها باسم الحب نصيحه لكل بنت لا تسمحين لشخص تافهه يشوه سمعتك او يستغل ضعفك كوني قويه بربك وبدينك واهلك حسبي الله ونعم الوكيل فيه 😔😔

#قصة_العين_بالعين 👇

انا متزوجة من شخص متزوج ميسور الحال وطيب وحنون جميلة انيقة مهتمة بكل تفاصيل بيتي ووزوجي وحياتي رغم اني خريجة مثقفة وكنت موظفة بوظيفة مرموقة تركت كل ذلك واهتميت فقط ببيتي وزوجي المهم زوجي مثل ماقلت متزوج وعلاقته بزوجته ليست ع مايرام مشاكل ومشاحنات وكذا يعني وماكان عايش معاها مخليها في بيت لحالها مع اولادها وهوكان عايش لحاله مثل العزابي يعني وحياته مش مستقرة وملخبطة ماتهتم فيه ولاسأئلة عنه اهم شي يجيها مصاريفها ومطالبها
بصراحة كان يحاول يرجعوا يعيشوا طبيعي مع بعض مثل بقية الازواج يعدل بيني وبينها كم ماودها يوم بيوم اسبوع باسبوع شهر بشهر بس بدون فايدة المهم ياجماعة هذي الانسانة ماخلت فرصة تحاول توقع بي الا واستغلتها لكن وين يعلم الله اني كنت موظفة والرجال حولي مارفت عيني لحد اخاف الله بكل حركة وبكل نظرة حاولت تنشر رقم جوالي وجتني اتصالات ومسجات ماارد ع اي رقم غريب هذا طبع فيني عيت بدون فايدة
قلت اجرب ام الشرف واشوف ايش مع زوجي من ام عيال محترمة😏 اعطيت رقمها لواحد من اقاربنا عايش في الخارج دق عليها وردت عليه وتجاوبت😳 معه واتساب ودخلوا بعلاقة حب واتطورت بينهم الامور صور وكلام قذر بذئ وتخطيط طلاق وزواج😂طلعت الحرمة
راعية علاقات ووثق لي كل شي صار بينهم تسجيلات وصور ومحادثات مخلة وخادشة انا بصراحة ماانصدمت لاني نسيت مااقول لكم اني سمعت عنها اكثر من كذا بكثير بس سبحان الله السمع غير الشوف والله شفت صورها وسمعت صوتها وهي تتكلم بكل مياعة ناسية سنها وعمرها كانها مراهقة ناسية زوجها اللي رغم مشاكلها وخيانتها مازال شاريها من اجل عيالهم ع حسب قوله
المصيبة مش هنا المصيبة لما قررت اكشف حقيقتها لزوجي طلعت انا الغلطانة بنظره واني ظلمتها لما اعطيت رقمها لغريب يوقع زوجته وعملي مشكلة طويلة عريضة وعلمت انه يدري عنها بكل شي بس يغالط نفسه حتى اهله قالوا لي لاتتعبي نفسك معاه تعبنا واحنا نحذره من فعايلها...طيب وانا من ياخذ لي حقي يوم انها نشرت رقمي وحاولت توقعني اليس السن بالسن والعين بالعين والبادئ اظلم
طيب هل اخطأت يوم اني علمت عليها او اني أخطات يوم علمته بحقيقتها .. أشعر بالقهر والغصة😭

#قصة_تزوجت_صغيرة 👇

سلام عليكم بدخلكم بالسالفه علطول سلمكم الله جاي انصح للي يتمنى يتزوج بنت اصغر منه بواجد نصيحه لوجه الله لا تتمنى الا ثلاثنيه مطلقه ابرك لك واكيد البنات مو سوا لكن اسمع سالفتي واحكم بنفسك وساعدني انا عمري ٢٦ خلقت انا والهدوء سوا اكره الشخص المزعج كنت اقول لـ امي ابي زوجتي صغيره عشان تكون خجوله وكذا وفعلا امي اختارت لي بنت بأخر سنه لها بالثانوي وببداية زواجنا البنت مثل ماابي بس كانت امها تقولي ترا بنيتي خبله اعرفها العذر والسموحه اذا طلعت منها حركه ولا شي يزعجك ومن هالكلام وكنت اقول اكيد تمزح البنت عاقل واضح لكن مامر شهر الا شفت عقايب ربي منها طلعت مو خبله وبس الا الي بعده عليها حركات تقل متربيه مع عيال مع ان مالها اخوان كلهم بنات احيان اشك اني متزوج ولد مو بنت متخيلين مره اتابع مصارعه وتحمست مع حركة المصارع التفتت علي وقالت يووه حركته قديمه تبي تشوف حركه جديده قلت مستغرب وشهي !وبأسرع من السرعه سوت حركه ماحسيت بنفسي الا طايح من الكنب ويدي الي طحت عليها ماقدرت احركها وبدل ماتخاف وتتأسف تضحك وتقول خلنا نعيدها تكفى والله جلست اسبوع وزود ماحركها 💔،ومره قمت بنص الليل ماحصلتها قمت ادورها تخيلتها انحاشت ولا انخطفت والله واخر شي لقيتها مسويه جلسه بالسطح ومطلعه التلفزيون واتابع فلم رعب والي اعرفه البنات يكرهون الرعب واذكر خواتي مره تابعوه معي ومن قوة خوفهم ليلتها ناموا عند امي وهذي مختمه افلام الرعب والاكشن واذا حكيت عن رواقتها شقول شخلي عندها روقان لدرجة اذا واصلت سوت لها كبسه في الصبح ماعندها مشكله !ومن بدت الدراسه اذا جيت اطلعها حر موت والناس حالتها حاله اهي تشغل عراقي وتقول فحط امانه اهوشها الحركات ذي للعيال عيب انتي بنت ماتسمع وقبل اسبوعين زلقت بقوه بالمطبخ خفت عليها قلت بتبكي والا بينكسر بها عظم اسالها انتي بخير رفعت راسها لي مبتسمه قالت احلى حركه لروح كنق النظيم شوي واكفخها من الغبنه عشان تحس صدق ولا مقالبها شييي ثاني تخيلوا داقه على اختها الي اصغر منها وتبكي تقول لها زوجي طلع داعشي وبياخذني معه لسوريا واختها صدقت وقالت لاهلها انفجعت بتصالات ابوها وامها يهاوشون ويتوعدون ويالله اقنعتهم انها تكذب والله ضربتها ضرب من كل قلبي وانا مو من عادتي امد يدي ابدا ومع ذلك تضحك وتقول والله يضحك المقلب بس انت ثقيل راااااسي بينفجر منها ي جماعه وزود ع هذا تطق الميانه مع الغريبين مره نزلت اطلب لنا من مطعم واهي بسياره رجعت لقيتها فاتحه الدريشه وتسولف مع خدامه بالسياره الي جنبنا انهبللت منها معاد اتحملها حتى مقدر اعاتب امي ع اختيارها لانها تتغير ١٨٠ درجه قدام اهلي ولا كان فيه اعقل منها هذي ي اخوان من غير المقالب والمواقف الثانيه الي ماتنحكى وهذا لنا بس ٥ شهور من تزوجنا وشفت ذا كله اجل وش الباقي سااعدووني ابي افهمها بطريقه اني ابغاها انثثى صدق عاقله ورزينه لو شوي مو لهالدرجه تعبت منها والله اذا رجعت من الدوام الاقيها متخبيه وحاشره نفسها عشان ادور لها تعبت ياجماعه وابي حل معها..

#قصة_تطلقت_امي_بسببي 👇

انا وحده كان عندي حساب بالكيك وكنت مسميته باسم امي فقط اسمها ولانه عاجبني بس مو عشان شي ثاني فكنت غبيه حاطته ب ايميلنا المشترك مع ابوي واخواني الصغار وخواتي ما كنت اعرف شي بالجوالات لا انا وولا خواتي الصغار فقلنا لابوي سو لنا ايميل وقال عندي واحد قديم وما ادري انه ممكن يشوف ويقفط كل شي فحسابي هذا كنت اراسل فيه شباب وسوالف وضحك واغلب سوالفنا عن الحب 🔞 ف استمريت ع كذا يمكن شهرين وكل يوم اتعرف ع واحد ونبدا سوالف وضحك الا ما بيوم جاء ابوي معصب والشر طالع من عيونه ويصارخ وين امكم ويدخل عليها ويضربها وهي تبكي وش فيه ويقول انتي علاقه مع شباب ويكمل ضرب وقفل عليها يضربها واحنا نصارخ برا نبيه يفتح مو راضي مر تقريبا نص ساعه وهو يضربها ويبكي معها يقول وش قصرت فيه معك وطلقها وطلع واحنا بحيره ونسألها وش سويتي تقول يقول اني اخونه مع شباب واتكلم معهم 🔞 هنا عرفت ان يقصد الكيك وقتها كأن احد كب المويا على وجهي وعرفت اني غبيه وحماره بس ما قدرت اعترف لو اعترفت ممكن يقتلني ويسوي اكثر من الي سواه ب اميي انا غبيه عالاقل ما حطيت الكيك ب اسمها وانا والله مو قصدي شي بس اسمها عاجبني والله ، طبعا اتصلنا ع خالي وجاء واخذها وشاف وضعها وتضارب مع ابوي واجتمعو الناس لكن محد يعرف وش السالفه غيرنا وامي صار لها فوق ٤ شهور مطلقه وتتحسب عزالي كان السبب ومو فاهمه شي تكفون شورو علي كيف احل الوضع ضميري مأنبني لاني ما اعترفت ومستحيل اعترف لاني مو بايعه عمري وامي ان شاءالله يعوضها غير ابوي مع ان عمرها ٤٠ لكن ان شاءالله لان وراي حياه ومستقبل وزواج مراح اخرب على نفسي عشان امي لانها عاشت حياتها وتزوجت وخلفت هي ربي كتب لها كذا...

#قصة_مقلب_صديقاتي 👇

‏ انا متزوجه وعندي بيبي صغير هو روحي وعمري وكل حياتي متعلقه فيه مره مره
وعندي ثلاث صديقات صداقتنا مستمره من ايام الجامعه انا تزوجت وهم للحين ماجاهم نصيبهم
مالكم بالطويله احنا دايم نخرج مع بعض كافيهات ومطاعم وكذا
وباخر مره خرجنا مع بعض مرينا ماركت كبير وكان معي ولدي منومته بدراجته ومغطيته ببطانيه وكنت اتسوق وصديقاتي كانو بجهه ثانيه المهم شوي وانا اتسوق فيه حرمه قدامي تناظرني وتناظر الدراجه وشكلها متعجبه ومستغربه وكنها تبي تقول لي شيء وانا تركت اللي بيدي وقمت اناظرها نطقت الحرمه وقالت البيبي وينه ؟
جيت اطالع جوى الدراجه ياربي مافيه الا البطانيه وولدي مختفي تخيلو عمره اربعه اشهر بغيت انجن انا طول وقتي على بالي انه نايم ومدفيته بالبطانيه بغيت انجن صرت اصارخ وابكي والحرمه تهديني وجوني حراس الامن وعلمتهم ان ولدي مخطوف وابكي واحس الدنيا تخوف سوداء مرت علي لحظات مرعبه تخيلت اني خلاص ماحشوف ولدي مره ثانيه وانه خلاص ضاع للابد من الخرعه طحت على الارض رجولي ماشالتني وحراس الامن صار عندهم استنفار وقفلو البوابات الخارجيه علشان اللي خطفه مايهرب
عدت عشر دقايق ثقيله كأنها عشر سنوات وشوي اقبلو صديقاتي وهم شايلين ولدي وهم يضحكون ويقولون ياغبيه مقلب مقلب ليه كبرتي السالفه يحسبونا الامن خاطفينه وانا ماشوفهم ماصدقت اشوف ولدي نزعته من ايدينهم وضميته حسيت اني خلاص روحي رجعت لي لو اقدر اخبيه جوى قلبي خبيته من الخوف عليه وهو ياحبيبي كان نايم بس انا تهاوشت مع صديقاتي وشتمتهم وسبيتهم وتلاعنت معهم ومن هالموقف انتهت صداقتنا اللي صار لها سنين
هم للحين يكلمون اخواتي واسطات يبوني اسامحهم بس انا مو قادره انسى مقلبهم السخيف اللي بغى يصيبني بجلطه لولا رحمه الله من جد كل شيء الا انكم تفجعون ام على ضناها كرهتهم انا للحين من الخرعه اعاني من رعشه بيدي ماقدر امسك الاشياء زين يطيحون من يدي وانام وتجيني كوابيس اقوم مفزوعه ابكي وادور ولدي نصيحه لكل اللي يقرا قصتي ابتعدو عن المقالب مو الكل يتحملها .

#قصة_امي_واخوي 👇


انا اخوي الكبير اخصائي محترم وبنفس الوقت يدرس بجامعة وله ومكانته الله يحفظه ومن واحنا صغار من بعد وفاة ابوي هو مراعينا وشايل مسؤولية كل شي
اخوي هذا عمره ٣٨ سنة ومتزوج بنت خالتي سنعه ومتعلمه وعندهم ٤ اطفال تزوجها رضا لأمي
المهم اخوي هذا من حوالي اربع سنين فجأة قرر يتزوج زوجة ثانيه وامي زعلت عليه زعل كبير حيل مع انه حاول بكل الطرق ظل سنة كامله يقنعها ولما تعب راح خطب البنت ورجع حاول ف امي ما رضت وبالنهايه تزوجها 😩البنت هاذي تكون طالبه عنده بالجامعه والحق ينقال البنت جميله حيل وماحد يختلف ع جمالها حتى امي تقوله جميله ! حاول اخوي يدخلها بينا وباجتماعاتنا وكذا بس للحين امي ما تحب البنت مع اني انا وخواتي عشقناها البنت مرحه وواضح طيبه حيل ! بس امي عشان بنت اختها تكون الاولى مش راضيه للحين
المهم اخوي لما شاف امي دايم تحرج البنت صار يقلل من انه يجيبها وبعدين صرنا ما نشوفه ابدا بس يرسل مصاريف ! وبعد سنتين من زواجه طلق الاولى ولما امي عصبت حيل وصارت تدعي على اخوي قاله انه ما يقدر يعدل بينهم ويبغى زوجته الثانيه والكل منصدم اهلنا وكذا 😢 وواجد يدعون على اخوي وامي صارت تمنعنا نكلم اخوي والله وتخيلو بالموت شفته وقعدت اكلمه ليه سوا كذا ويرجع زوجته بس رافض حيل يقول انا اعطيتكم روحي وتزوجت رغبة لاأمي ولما اخترت سعادتي بدون ما اضركم صرتو ضدي يقول انه يحب حرمته حيل ومريحته ولا يبي يشوف غيرها
المشكله امي تدعي عليه كثير وانا خايفه على اخوي وبطلنا نقدر نتواصل معاه عشان امي !طليقته بنت خالتي صارت تتكلم عنه انتقام يعني وانا اقولكم هو مكانته محفوظة وهي تبي تشوهها
لا تقولون زوجته ساحرته هو واضح والكل يقوله ان هي حلوه وحابته وماعطته عيونها اكيد ما راح يتخلى عنها ! كيف اقنع امي ارجوكم تعبت من هالوضع واشتقت لاخوي

#قصة_ابي_اتزوج_غيرة 👇


انا متزوجه من ٥سنوات ومن تزوجت ماحبيته وهو سلوبه معي لا هتمام ولا حب يعني كرهني فيه زياده💔وصرت افكر يَصير عندنا بيبي يمكن يتغير الوضع او اشغل نفسي وكلمته نروح المشفى طلع عقيم مايجب اطفال كسر خاطريً وقلت له ببقى معك لاحد يجيً يقولً ماتحبينه وتبين منه اطفال وقتها قلت بشغل نفسي ومع الايام سالته لو انت. مكاني وش بسويً قال بتزوج عليكً وقتها صدمني انا معك مفروض يراعي مشاعري ولو صج يتزوج مايقولي كذا ويجرحني وهذا ونا صابره عليه ونا ماحبه بس بعد سنه تغيرت نظرتي وشفت وضعه باقي على عصبيته وبس هواش ونا ماحبيته ابداوخاطريً يَصير عندي بيبي بذات هل فترا احس فيني شوق لهل شي خاطريً اكون ام ولحين صارلنا ٥سنوات متزوجين بس موً قادره لا احبه ولا فيه شي ينحب حتى سلوبه معي مافيً هتمام ابدا المهم انا من النوع احب التصوير وكنت طالعه مول مع اهلي وصورت اخوي نزلت صورته الا يدخل واحد خاص طلع يعرف اخوي واهلي وسألني وش يَصير لك للي بصوره يقصد اخوي رديت عليه وقعد يسولف انه خويه وانه شفنا بنفس المول بعدها كل مانزل صوره يعلق لين ماجا ليوم للي دخل خاص وقالي انه معجب فيني وحبني من اولً ماشافني ويبي يتقدم لي وانه صادق وقال اتمنى ماترفضين بعدها حسيت بشعور غريب اول مراً احس فيه ورديت عليه اني متزوجه نصدم وقتها وقعد يعتذر لي وخذنا يومين احس اني بكلمه الي صار بينا كلام عادي بس حسيت اني حبيته من سلوبه وهتمامه وثاني يوم الا يعلق على صوره كنت متضايقه وقتها ومنزلتها قالي عسى ماشر شفيج ومنها قعدت اسولف معه وقلت له بنكون أصدقاء سالفه حب ماقدر لاني متزوجه قالي طيب خذنا ٣شهور وعرف عن حياتي كل شي وهو يسألني ويهتم فيني حيّل بديت احبه واذ ماكلمني اشتاق له صار لي اقرب شخص بالدنيا وطول يومنا سوالف مع بعض بدت علاقتنا تطور صار يبحبني ونا حبيته وقالي حبيتج وابيج ولحين يقولي تطلقي انا ابيج وهو صادق معي بكل شي وقالي من اول ماشفتج ابيج زواجه لي ،لاحد يجيً يقول خنتي زوجج اهو جبرني من هماله لي ومافي حب بينا ولا تفاهم من شهر كلمت زوجي وطلبت الطلاق ورافض يطلق يقول بعدل سلوب وفعلا صار يهتم بس بعد ايش لمى خلاصً طاب خاطريً منه وكرهته وصلت معي صرت اكره اسمع حتى صوته محتاره حيّل مادرًي وش اسوي ..

#قصة_زواجي_من_قاصر 👇


عمي وزوجته توفوا في حادث وتركوا وراهم من الأبناء سبعه 3أولاد و4بنات ,البنات كلهم متزوجات ماعدا الصغرى وعمرها 14سنه والأولاد الكبير متزوج و2في أستراليا للبعثه و3في كليه في منطقه ثانيه. طبعا البنت الصغرى أخذها أخوها الكبيرتعيش معاه ,وفي يوم ذهبوا أهلي لزيارتهم وأخذت البنت تبكي وتتكلم مع أختي اللي في سنها وتقول زوجة أخوها تضربهاوتشتمها..الخ ,أختي الله يهديها ما مسكت نفسها وقامت تكلمت على زوجة أخوها وقالت شوفي وراها أهل ولا تحسبينها مقطوعه ونادت الوالد وزعل الوالد وأقسم ما يطلع من البيت إلا فيها .أخذها تعيش معانا أخوها عارض في البدايه وتدخلوا أعمامي وتم الموضوع على كذا.بحكم إن الوالد رفض تسافر تعيش مع أخوها بالخارج وهو عزابي والثاني ساكن في كلية الضباط ..طبعا إحنا الأولادخمسه, الأثنين الكبار متزوجين وأنا3 عمري 26وفي اثنين بعدي ..طبعا الوالد فهمنا إن القسم الداخلي ممنوع من يوم سكنت بنت عمي معانا ,الوالده وأخواتي يحبوا البنت بشكل جنوني وبدوا يقنعوا فيه أتزوجها وأنا صراحه ماكانت في بالي المهم إخواتي كل وحده فيهم تقنع فيه يمكن 8 شهور ما أقتنعت .وفي يوم في نص الليل دخلت أخذ شي أكله وتوقعت الكل نايم ويوم دخلت إلا أشوفها في الصاله جالسه تذاكر هي مالحظتني .صراحه هنا البنت أعجبتني مره وماكنت متوقع إنها كذا.كلمت أختي المتزوجه كيف أخلاقها وقامت تمدح فيها قلت خلاص كلميها.أختي كلمت أختها, كلموا البنت في البدايه يقولوا جلست تبكي والوالده قالت لها والله ماأحد يجبرك إذا ماتبينه بلاش ,جلسوا إخواتي وأخواتها يقنعوا فيها 4شهور ويوم بلغوني موفقتها فرحت كثير , ملكنا شهر1 والله يهدي أمي وأبوي ماخلوني أجلس معاها,أبوي طردني من ساعة الملكه قال ما أشوفك في البيت خذ شقه مفروشه حتى يصير العرس .جلست أترجاهم بس أشوفها شوي يالله ‎وافقت ويادوب جيت بتكلم معاها وجيت بمسك يدها إلا الوالده تصيح وبغت تطيح علشان تجري بسرعه وطلعتني وحلفت ما أشوفها إلا يوم العرس .وجلست شهر على أعصابي ,تزوجت 2/2ويوم الزواج زفوا البنت ليه إلا أمي لابسها عباتها وين؟
قالت بروح معكم البنت صغيره وخايفه عليها ,أنا هنا زعلت وقلت قسما بالله ماأحد يروح معانا جتني جدتها أم أمها تترجاني تروح معي قلت لاأحد يحاول .وأخذت البنت وصار أبوي يهدد فيني لو جاءها شي مايصير فيه طيب .أخذتها طوال الطريق بس ساكتها بس كنت أحس إنها تبكي رحنا الفندق يوم شفت البنت أحسها شوي بتموت من الخوف مني .والله ماتلام ماشافتني في حياتها بحكم إنهم عايشين في منطقه ثانيه حتى بعد الملكه إلا 5دقايق . رحت أهديها وقلت خذي راحتك وأرتاحي أنا بنام الغرفه الثانيه خليتها .اليوم الثاني أنتظرت تطلع من الغرفه ما طلعت أذن العصر رحت دقيت الباب ودخلت وألقيها بس تبكي وحالتها مره,جلست أتكلم معاها وش فيك ؟بس ساكته ؟ أخذتها بيدها وطلعنا نتمشى وأبدا ما فتحت فمها . جيت بنام معاها في الليل حسيتها مره تغيرت ,أنا سويت نفسي إني مرهق وبنام على طول ونمت ويوم صحيت لقيتها نايمه بالصاله .وهذا حالنا لمدة 3أسابيع إذا نمت تطلع تنام مكان ثاني .بعدها كلمتها قلت ما يصير أنا زوجك تسوي فيه كذا وصارت تنام معي بس ماتنام حتى أنام وتنام على طرف السرير وأحيانا في الأرضيه كلمت أختي المتزوجه تكلمها وتقول ماردت عليها بس نزلت رأسها.وقلت ليها تكلم أخواتها يكلموها . كلمتها أختها تقول إنها تخاف مني.إلا هي تبيني . صرت أنا و هي كأن إخوان حتى الأكل ياناس ماتأكل والله إذا أجبرتها تأخذ لقمتين بالكثير وتقوم , البنت صغيره عليٍ في كل شي حتى جسمها هي بس 150 طولهاونحيفه وأنا 185 يعني فرق .وتحزني لما تبكي والله بس تبكي شوروا علي الله يفرج همكم ؟ وش أسوي معاها .. ‎تكفون أنا قلت لكم الوضع كامل علشان أبغاكم تعرفون ظروفها

#قصة_انا_مو_جميلة 👇


ترددت في كتابة مشكلتي ..وكتبتها قبل فتره وكنت راح اعرضها عليكم واشوف رأيكم بس غيرت رأيي والحين اكتبها لكم ثاني مره .
اولا انا عاديه من ناحية الشكل ( ع الطبيعه ماني جميله ) وزوجي مثل مستوى شكلي تقريبا مو جميل مره يعتبر عادي .
وهو طيب جدا بس وقت العصبيه يصير واحد ثاني ..و قبل فترة تهاوشنا ورفعنا اصواتنا على بعض وقالي كلمه للحين ما نسيتها ولا راح انساها طول عمري . .
قالي وهو معصب ( انتي لا وجه حسن ولا شي ) طبعا تأثرت كثير بكلمته ..وجرحني فيها مره .. وغير تعليقاته مرات على بعض الاشياء فيني ..وكله طبعا يقوله وقت الهوشه..بس هالكلمه تحديدا .
جرحتني مره يعني مثل اللي يقول ( مو كفايه انك مو حلوه ولا تعجبيني )
ومره وهو يهاوش عاب على صدري انه كبير.. وانا اصلا شوي سمينه فطبيعي صدري يكون كبير . .
وتحديدا صدري متعقده منه من قبل كلام زوجي وهو زاد البلا بكلامه
للعلم خوات زوجي جميلات ماشاء الله مقارنه فيني ..
.
يمكن هذا السبب مايشوفني حلوه ماادري
تغيرت مشاعري تجاهه غصب عني بعد كلامه .. حتى في الامور الخاصه ماصرت زي قبل ولا .
انبسط وهو لاحظ علي بس ما اقدر امثل عليه في ذي ، لان صعبه .. .
وانا الحين فكرت و عندي حلين .
الاول .. انه لو استمر مثل كذا اطلب الطلاق وارتاح واريحه واخليه ياخذ وحده جميله ..عادي ماعندي مشكله احسن من بعدين يتزوج علي . .
الحل الثاني .. اسوي عمليات تجميل لان احبه وبينا عيال .. وانا مافيني شي مره مشوه او مو حلو بالمره بس بعدل في نفسي شوي عشان اصير جميله واعجبه وانا موظفه الحمد لله يعني الماديه متوفره للعمليات
.
ابي رايكم بكل صراحه وبدون تجريح
اتمنى كل وحده قبل تجاوبني تحط نفسها مكاني
انك تحبين زوجك وهو يحبك لكن مايشوفك جميله .
هذا الشي يجرح انوثتي وبعد عندي عيال وماابي اهدم بيتي اخاف يدخل علي معاه عروس ويحدني على الطلاق ..