اكل عمري الحزن واستفحل الشيب،
مثل سبوره تاكل بالطباشير..

ولو هو الحزن مريود نوبات،
الخشب جا ضل حطب لوما البسامير..

#يوسف_حسن

جرح الجسد ينتهي،
جرح الكلام اكبر..
يبقى يعذب الگلب،
طول العمر واكثر..
لا عين ابد شافته،لا ينتهي بـ لحظته..
حاولت بس للأسف،
انسى مااكدر..

#غني_محسن

تعرف غلاتك لوبعد،
احتاج ابينها اكثر..

يالبيك لهاني العمر،
ماركزت بي من مر..
يمكن إذا گتلي شكثر،
تهواني راح اتحير..

الليل اعد محبتك،
بس باجر تزود اكثر..

(الادري بي من تبتعد،
مدري شأحس بحيرتي..
صدري حفر بي خنجر..
مكطوع شريان ابهر)..

يندفع شباچ الجفه،
وبالروح شي يتكسر..
اشتاكلك ...
بس الحجي المضموم الك يتبعثر..
وبدون موج احتاجلك..
بالبر واحس بيك البر..

مرات ادور لـجيتي،
كبالك سبب يتفسر..

وتلمحني احرك الخاتم،
وابدي ارتبك واتحسر..

"وهنا تحس بقيمته،
البس على شوفك يضطر"..

يافكة عيون الگلب،
ياميزتي البيها انغر..
مو رايدك واتنفسك..
لا يانفس شي اكبر..

ياروح ماتطلع مثل،
روحي التموت من اكبر..

اني اعرف بزعلك قبل،
ماتزعل وياي اكدر..
والنوم يتركني وقت
ماتنوي عينك تسهر..

ياريت ..كل هذا الحجي،
من اكعد كبالك يحضر..

ومن التهي بعينك بعد،
تهمسلي حتى اتذكر..

وياك اذا ماسولفت،
من الصمت لاتحذر..
مرات مو كل الحجي..
يلم المشاعر يكدر..

اني اؤمن التهوى صدك،
تتنخه بي من تعثر..
روحك عليّ تتكدر..
تنشف لحد مايخضر..
لوبرد ملكا تشتعل..
وارماد خلكك ينذر..
وانت اعرف شلون اختنك..
من نسمتك تتأخر..

*اگبل عليّ روجة عتب،
واتقرب تكون اخطر..
بس هاا عتب بس للمثل..
مو بالزعل تتأثر..
تلگاني ناطر روجتك..
فارش جرف يتعذر..

^بس انت ردتك من جنت،
مابين الاحلام افتر..
ومادامك بحضن الجفن..
جف النظر خل يكصر..

وياك ابتديت ...
بدونك شلون ابتدي شتتصور...

عنك ردت مره ابتعد،
والغيظ بافكاري ابحر..
وتراجعت نفس الوقت..
من حرت بيش اتعطر..

يخفت ضواي..وما يضل،
لوشوف الفراك ابصر..
والليل يتشمت هوى..
بخيط الشمع من يصغر.


#ايهاب_المالكي

قبل عشرون جرحاً من الموت،
قصة موتي بدأت عندما قلت لها..
صيحي بأسمي..
المو من شفافج نشاز ..
اسمي فاهي بحلك غيرج ..
جن دعاء بصوت فد واحد غني..

انتي يالـتروين كلشي،
الماي التشربي يكلوله هني..

عندما كانت روحي تحاول ان تلفظ انفاسها الاخيره،
وجدتها تلفظ اسمها..

تلاشت،
وكلت ألـمّج..
بس شلمج وانتي ظِل غروب طَش..
غيمه فصلية سما وزفوها رَش..



كنت اضن بأننا فهمنا بعضنا فـ(همنا) في بعضنا .. عادت في الوقت الذي اصبحت فيه لم أعد أُعُد ..

فعندما يصبح الاعتبار عجوزاً اعمى،
ما المغزى بأن يأخذوك بعين الاعتبار..
عندها علمت بأن النهر عيناً و اجفانه ضفتان..
فعندما يشعر بالنعاس سيطبق اجفانه على مائهِ و يموت ...

الجرف جفن النهر و الماي جن عين ،
لا يطبك جفونه النوم كتال ..
و ليلي بدون طيفك مرني تابوت .. صبحوا بوجهي صح الموت تنكال ...
مو ذيج التعوز كفة ردان ...
تطب عركة حجي حاجوزك لسان...
اني و رويحتي محوطينه شمات
كد ما للغني محوطينه صحبان..
الطعم اقبح كرم اليعزبه يريد ..
لكمة موت ينطي لضيف جوعان ..
شما يلتم شملنه الكاني خسران..
الحطب يلتم حرك مو لمة اخوان..

"بعد كلبي اشتعل بلكت يشوفوك ،
ينشاف الهوى من يصير دخان ..


#المطوري

الجانن بيك يشوفن،
من يروحن معذورات..

#مرتضى_حرب

وشدينه الجرح ونگطع حبل الخوف
ونشفنه الدمع ونسدت العبره..

بعد ما ننطي لزمه نضم ملح بالماي
ميزنا الحروف ووضحت الجفره..

ما نغلط بعد ونصير مثل الخيط
تحطنه علَى الفتگ وتعوفنه الابره..

عود احنه ويبس منصير ماشة نار
مو بينه الحفر والغيرنه المجره..

"تچوينه نعم نگطع هواها تموت
كافي اتظل عمر بجفوفنه الجمره.."

مانعرف مشينا وياهم مغمضين
دفعونا ووگعنه وغطوا الحفره..

والچفه طول مدها وطلع وارتاح
وابو النفس العزيزة لهسه بالنگره..

وبيه شگد عتب وشگد ملامه وحيف
على الدمع البچيته وماطفت حسره..

على الردلي يتبختر لا فرس لا سيف
ويحجي بكل رهاوة وطعنته بظهره..

على اليوگع فريسة شلون يغفة الليل
ينام بيا وجه وذياب التنطره..

مثل شذره الكرامة ومحبس الانسان
وبيها شگد محابس ذبت الشذره..



#سمير_صبيح

لا تسأل عليه شلوني بلياك،
بالحظ والبخت كاضي..

جم مره كمت زعلان من عندك،
وارجع محد مراضيني..
بس راضي..


#سعد_شميل

ماشيت النهر بس ماصرت ناعور
ورافگت الفرح بس ماضگت ملحه..

شاركت الحزن والعمر راس المال
وحچاية بخت شبعان من ربحه..

مثل الخيط عايش والحياة حظوظ
لو تسكن شمع لو تسكن بسبحه..


#سمير_صبيح

مدري شجاسني وفزيت مرعوب
"دم من الحلم سايح عالمخاد"
مو بس النفس والغرفة والبيت
امس حسيت ضاگت بيه بغداد

.............................................

قلت غلاتك والوعي ازداد
ووخرته دمي الفوگ المخاد
چانت گبل تخنگني وتضيگ
بس هسه جنه بعيني بغداد..


#علي_العربي

تعاليلي تعاليلي،
الشمس غيرت تفاصيلي..
ولو عندج مطر عـ الغير..
منج گطره خليلي..

تعاليلي اريد اتميز بجيلي..

#علي_البديري

تذكر من احط بوسات إلك عالباب
والباب الصبح من تطلع يگلك

وتذكر من اجي لشوفتك جية الروج
وعلى حطتك جرف ضليت ما املك

لا انه من البحر خلصان وابقى وياك
ولا جرفك يكضني وتعبت خلّك

بصراحة انت جرح وادري من اخيطه يطيب
غلاتك لو صبر مانعني ما شلك

"السما بعينك شبچ" عوف الاوهام وطير
حط ايدك بأدي لو اموت ماحلك

بعدك والسهر والليل والآهات
تولني نهش وتشوف ما اگلك

نَسمة بعاصفة لو رحت هم الگاك
ضل بالليل ماكو وميَّزت ضِلك

واندلك واجيك واگدر اوصلك
ادورك ما املّ والگاك واندلك

ولو حبة رمل عنوانك بصحراء
اشمن ريحتك بالگاع واوصلك

#سمير_صبيح

مامحتاج اسولف وابتسم،
المختصر محتاجلك..

لو يمي كل هاي البشر،
انت الوحيد اشتاكلك..

جا ليش عني تغيرت،
مو تدري محتاجك لان..
لا بيه احب غيرك بشر لا بيه اعيش بدونك..
بـالغالي يحلف كل محب..
واحلف جنت بعيونك..

بجيت ولان يمك ما مكابر،
بجيت وكسر ضلعي ولا الخاطر..
هاي الـنذوره مااوفيها مو عوز..
لان ماحاسب شكم مره ناذر..

تزرع لغم يـالزارعلك ورود،
وهيج ويايه تتجازه المشاعر..
مو شغلة قصيده ووزن واحساس..
اليجيب اخبار عنك هذا شاعر..

اميزك جنت اني بهوسة الناس،
انت العرف اليشوفه اليسافر..

اول مره ميبجيني الوداع،
واني الذبلان ورده بنص دفاتر..

#محمد_العبدلي

هم انت ،، شكو ، لخاطر الرحت وياه
هدني لخاطر الله اتركني بس ذكرى

"مثلي شكد اكو طب للگبور وشوف
مات من القهر مكتوب يم گبره"..

على دفعة صدر يتدخل الشيطان
وشكم استغفرالله بساع تتبره..

وبالدم والصلح بس البخت حاجوز
مرات البخت هم ينطرد بره..

مكان الما الك بي گعده لاتدناه
الغراب استحه وماحط على الشجرة..

شجابك لا تجي لك باوع الشيطان
بي عزة نفس ما يدخل الحضره..

جبتلك عين ذيب وهم نمت شتريد
وسألوني وگلت ما ماخذ الشمره..

غبت عني لان عنك رحت يومين
اليحب ينتظر لتگلي يتبره..

گبل حببني جدي بطير لكن طار
ولحد هسه انه گاعد باقي منتظره..

اهي گطره عَلّى گصة كل بشر مخلوق
وميذل العشگ لتگلي بالفتره..

جربت العشگ ماذلني تدري شلون
طاحت گصتي وما طاحت الگطره..

ولك لو كلها مثلك ما تجازي الطيب
جان وداعتك محد زرع شجره..

ولو بس العسل مرغوب بالديوان
جان الگهوه ابد ما تنشرب مره..

#علي_نجم

هَلْ مِنْ طَبِيبٍ لِدَاءِ الْحُبِّ أَوْ رَاقِي
يَشْفِي عَلِيلاً أَخَا حُزْنٍ وَإِيرَاقِ

قَدْ كَانَ أَبْقَى الْهَوَى مِنْ مُهْجَتِي رَمَقاً
حَتَّى جَرَى الْبَيْنُ فَاسْتَوْلَى عَلَى الْبَاقِي

حُزْنٌ بَرَانِي وَأَشْوَاقٌ رَعَتْ كَبِدِي
يَا وَيْحَ نَفْسِيَ مِنْ حُزْنٍ وَأَشْوَاقِ

أُكَلِّفُ النَّفْسَ صَبْرَاً وَهْيَ جَازِعَةٌ
وَالصَّبْرُ فِي الحُبِّ أَعْيَا كُلَّ مُشْتَاقِ..

#البارودي

لابد يوم تفرج ماتعسر
الرجُل لمن تسره مات عالسر
اذا رايد التطلك ماتعسر
كوم اندب عليّ حل القضيه

#سعد_محمد_الحسن

زعلان
بس يا زعل...
لمن ترد للصدگ...قبل المنادى اجي
وشلون !! جيه اجي
اركض ...ركض محترگ

يا للذتك بريتي
وين الگه مثلك هوى
لولاك والله اختنگ
هيه شراكة نفس
لو ...سكت كَلبك ...سكت گلبي
ويدگ...لو يدگ

ولو ...ما وكتنه صعب
ماچان ابد نفترگ
كلمن مشى الحالته
واحد سكن بالغرب ...وواحد ...سكن بالشرگ

وسوالفك تنسمع...چن احنا حلگ بحلگ

جنت انه الوم النخل ...لو من ادين السعف بالريح يوگع عثگ
بس ...جربتها وشفت ...شفت العطش لو هجم
اول ضحيه العرگ

بعدك ...صدگ حاولت ولكَيت مرسى بجرف
بحر العيون الزرگ
ولكَيت في وعطر...عند الشعرها فرگ

بس ...ما لكَيت الوفه
والله عشكَنا عشگ

يامن مگدر علي...غيرك فصاله صعب
جم دوب ...؟! ...اخيط واشگ
ما اضم عليك شكثر...مرت بعيني صور
ومن غيميت ونزل من عيني ذاك المطر...بس انت تبسمرت
والباقي كلها زلگ

ماضم عليك
الجدم غمض عيونه ومشه
وداني واني بطرگ ...شفه واذن تستمع
للي خذوا غيبتك...مجبور افضي الخلگ
وتكاتل ويا الحجي ...والخيل داست علي
"سحكَت ضلوعي سحگ"

اصحى : براسي انطعن !!
اسكر : رمح بالكَلب
بين الصحو والسكر ...رمحين صفن طبگ

عنت علي شوفتك ...واصبرت ...بس ماصبر كَلبي وصرخ :
راح اطگ

جاباني الك واذعنت ...جيتك بليلة شته
ظلمه ومطرها رشگ ...وشبعده صار الدرب
خوف ...ورعيد ...وثلج
وجفوف ايديه ....زرگ

ها ...كَمت...ضميت ايديه
وردت عالباب ...بالروح ادگ
بس ...كَالوا : المن تدگ؟
كلمن مشه بنيته ...كلمن مشى الحالته
واحد ...سكن بالغرب
واحد سكن بالشرگ

#الكاطع

شيعوضني الدمع وانه الخسرته هواي
وعلى رملة امل كل عمري وشلته..

انه الباگوا نهاري ورحت ادوره بليل
وبالمسودن طبع ميعوف سالفته..

على نفس الدرب ذبولي بس الصوف
حتى ارجع وكول ذياب ماكلته..

وانه الماصبر والعطش ما وازاه
دنت نفسه وذبح بالصحره راحلته..

گلب ماچنه گلبي چني متبني
جرعته التعب مايوم دللته..

طفل من ايده اگوده وهوه يمشي وياي
وعلى ضحكه بكهف للموت نزلته..

انقفل باب الصبر گد ما ادگ عليه
مو خالي كرم بس اني مللته..

"بعد ماهد سهم كون الطريده بعيد
مابيها فخر لو كول وصلته"

"وشفت عصفور ميت كل جرح مابي
حرت هذا المنيه شلون واصلته
شلت راسي وشفت بالشجره عش محروگ
گلت هذا السبب والحرگه كاتلته"

ونفس موته متت والجسد لحد الروح
وحسراتي بچفن وبدمعي غسلته..

"سحب سيفه الزمن هل من منازل صاح
اعزل ماخفت والزمن نازلته
مالحته ابد لكن ترسني جروح
بس عندي المهم ماعفته قاتلته"

بسك ياضمير الصار بيه هواي
بسك هالعمر مايوم جاملته..

"حذر بسوالفي نگلة جدم صياد
وأسال خاطرك ما يوم جفلته"

#سمير_صبيح

افرشلي ايدك،
روحي نعسانه ارد اموت..

موتي حق ولاتدورلك عذر،
اليموت بشبكه يتسجل شهيد..
الحب شفيع العاشگ بيوم الحشر..

#احمد_المطوري

مرات الشبگ ينراد
تعرف من خلاله الناس الذيابه..

ومرات الضحك ينراد
من تسمع العافك عافته أحبابه..

ومرات الدمع ينراد
من توصل محطه و تسمع شجابه..

و مرات الچذب ينراد
من تمشي ويه وادم كلها چذابه..

انه الربحان من راحوا ولااسمع شنو شصاحوا،،

حوبة گلبي تچوي النار صعدوا للسما وطاحوا ،،

مدري شبيه هل فتره بشر ماينعرف امره..

الوادم ماتحب وتخون وانه اتعلق بنظره..

يسألوني شجاك شبيك،بيه الوادم الفقره..

بيه المالگوا صحبان بيه الماخذوا عبره..

بيه العاشگ المخيون بيه المنكسر ضهره..

#علي_البديري