اني من كد ما حنين،
انطي للحايط جكاره..
ونكعد نسولف عليك..

#علي_البديري

الفرجه الماتكضها جفوف رسام،
تسوي ابشع مناظر باحلى الالوان..

#سعد_شميل

انه جذاب من ازعل،
واكلك روح مااريدك..
انه مرات من اشتاك،
ارسمنك واكض ايدك..

#مالك_الباوي

براي لألله من الخذلني،
واله بعد هيهات ارد..
هو منجل واني ورده،
شلون ترهم منجل يعاشر ورد..

#مرتضى_حرب

حيره وگلبي ما ماخذ قراره،
ومااشوفنها تخلص بـ استخاره..
احس الغرفه محجر من يجي الليل،
وعليّ مكتوب ممنوع الزياره..
انه ابن آدم يوادم موش طاعون،
وتخاف الناس كلها من انتشاره..

#سعد_شميل

لابيك حظ وتجي ولابيه حظ وانسى،
البارحه تذكرت كل لحظه بيها سوه..
وكبران چني سنه من البارحه لـهسه..

معقوله عشرة عمر ماخذها للونسه..
وللعشره مالك خلك،
بوجهي بمذله جنت مرسالك تشمره..
جن زاد بالمعركه يشمرونه للاسرى..

#سعد_شميل

ماخذ ناكتي وعايفلك الصحراء،
وخير من الله عندي متاع اليكفي..

ومثل ما طيره تنكت روحها من الماي،
هيج انكت عشرتك نكت من جفي..

بعد لا طينتي ولاتنحط بصفي،
انه بره القصر بس قالق السلطان..
وانت ويه العبيد الواكفه تهفي..

عله صوتي عليك اعذرني مامقصود،
بس بلا صياح العتب مايشفي..

ولاتنشدني وين مسافر ومجفي،
رماد ومن اسافر مامحدد وين..
المهم بس اشرد من الموكد المطفي..

وبعد مثل الفراغ اليبقى بالميزان،
من نتلاكه جتفك مايطخ جتفي..

"على باب العلاقه وحذروني الناس،
الحجي بوجهك فرق كالولي عـ المخفي..
كلها تصيحلي اوكف،لاتفوت شلون..
درب كله كزاز وطفل متحفي..
وفتت بيها متاهه ومن كضت رديت،
الدرب ماحافظه وامشي على اثر نزفي"..

(ضرفك سهل ماينقاس وي ضرفي،
وجرحك عين الابره وجرحي عين البوّم..
مفتش ليله كله ومارضى يغفي)..

وباب العشره سديته بقلق وبخوف،
ولك جن ساد بيدي عيون متوفي..
نهر بس نشفتني وحاط الله وياك،
‘جانت تترس الحلوات من جرفي‘..

عشره وتنكطع وتشدها ماتنراد،
وبعد ماعندي واهس تعتذر واعفي..
شريط الافتتاح وحدي،كطعه وياك..
طرفك لاامسه ولا تمس طرفي..

ولاتنشدني وين مسافر ومجفي،
ابن آدم بين فتره وفتره كون يغيب..
ويفرش ناسه كلها ويكعد يصفي.

#سعد_شميل

حظ ماعندي حتى ويه اقرب الناس،
وهاي المسئله الما الها جاره..
اشمرنه من السما يطيحون عـ الماي..
الوحيد التنبت بصدري المناره..


#سعد_شميل

مناداة للبعيد،

يا هي البره السجن،حاجيني من بره،
يا هي جناحي كبر،عاد القفص كبره
وخليني اشوف الضوه..
حتلو بكد الضوه البي تفحص الشذره،
وضوكني مر الشمس،
مو حتى قاع البحر ..
من شكه موسى ومشى ضاك الشمس مره..
جا هي كل مره،
"اشعل العشره لـبشر يشعل ابو العشره"
جا عنكبوتي شوكت يتحذر من النخل،
يوميه سعفه تجي تهجم تعب عمره،،
بغض النظر ع السبب،
ابن آدم يكتله الحجي المايكدر يعبره،
ولـهذا بالمشرحه يبدون من صدره..

صخره على گلبي الحجي،
يشريني ماكو نبي؟ويميل الصخره..

ونفسه الوجع نفسه،
ولابيك حظ وتحن ولابيه حظ وانسى..
البارحه تذكرت كل لحظه بيها سوه،
وكبران جني سنه من البارحه لهسه..
معقوله عشرة عمر ماخذها للونسه..؟

وللعشره مالك خلك،
بوجهي بمذله جنت مرسالك تشمره..
جن زاد بالمعركه يشمرونه للاسرى..
مرات اكول شعجب زاهدني ومقدره،
وكلما بعينه صرت رجعني يم ظهره..
محبوبه لو شعره..

يا هي جناحي كبر،عاد القفص كبره..
و حي وصعدلي النمل،
والريش الابيض كبل ضل يشبه الغتره..
يا هي بروحي گبر متروك من فتره،
وماضايك المي ورد.. يا هي محد الي وعايش على المطره،

وجيب اليجيب الهوى من تخنكك العبره،
ومو مااندل الدرب..
بس اني لمن طحت..مغطينها بالسعف..
يا وادم الحفره.


#سعد_شميل

ساعه اتذكرك،تمسح نهار فراك،
لان بيها الدقيقه تضاعفت عشره..
مثل وقعة بدر شوكي وليالي جفاك،
بيها القله كدرت تغلب الكثره..

#ايهاب_المالكي

روحي مضيف الهوى وهمومك ضيوفي،
وكلفني بيك العشك وهواي تكلوفي..

ليّك وهجرني الصبر وانكطعن طيوفي،
حلاوي من تبتسم بصراوي من توفي..

(جا ليش حد عشرتك مكتوب حد شوفي)..

واني عطش كربله وصوابي خط كوفي،
موتني موت النخل واني على وكوفي..

ومادام ماجاستك مااريدها جفوفي،
منين اجيب الحلو ويشبهك ويوفي..

#محسن_الخياط

مدوهن وين شايف راحة البال،
كصبه وغاير البهلول بيه..

#ياسين_الصالحي

اصحى براسي انطعن
اسكر رمح بالگلب
بين الصحو والسكر
رمحين طبن طبگ
عنت علّي شوفتك
وصبرت بس ماصبر گلبي
وصرخ راح اطگ

#الكاطع

القلق البروحي هز روّس الدراويش،
الماي بهودجك مو كدي راعش..

#كاظم_حسين

يعين الله كلمن يحب،
حب من طرف واحد..
كاعد كباله المحب،
بس حظه ما كاعد..
جا شنهي عيشة بشر،
كضاها بس بالحلم يوميه متواعد..

والله من افوت بدرب وكبالي الاكيها،
كل حسره اذب بالدرب كاع الله اجويها..


#زياد_المعماري

ولك كمت من انام حبال احط جواي،
بلكي من اكعد الكه احلامي معدومه..

#حيدر_حبيب

بعيوني اريدك تجي لو بس حلم عابر
انطيني نسمة هوى وبراحتك سافر
من دونك اني تره متلعثم وحاير
لو گلبي لو خاطري ما اعرف شكاسر
يالـ بيه الك لوعتي والشوك والشاعر
وليل وحلم بالجفن والماضي والحاظر
كلي اذا ما تجي وسولف من الاخر
اني ودمعتي تره ما نصبر لـباجر..

#ايهاب_المالكي

بس وحكك،
باجر يعوفوك كلهم..
وحدّك ترجعلي ذابل..
باجر آثار الغرب هوسه عـ خصرك،
اكثر من آثار بابل..

#حيدر_هواد

مثل هرش الشجر واشربلك الماي،
وكل هذا الخضار البيك مني..
وانه بنص الملح ومشابك الطين،
وبلابلنا على اغصانك تغني..
وتمر الريح بيك واحضن الكاع،
وتريد تروح ويه الريح عني..

#سمير_صبيح

تعال اكطع نزاع الليل،
حط بنحري جم نجمه..

#علي_رشم

صبح صباح بلا زرازير،
جم دوب احشم بالتصاوير..

صاير مثل حال التنانير،
محروك گلبي بحجة الخير..

#جبار_الحريشاوي