ما اجملك..انته مَلك..لو انته من الله رسم*
كلك دفو..مثلك منو..مدللني يا اجمل حلم*
ياعلي.....ياعلي.....ياعلي
................
شبع الگاع ابحلاتك..ياثواب الله الترف*
استورح ابگلبي اعله كيفك.. لا يلچمك من يرف*
استَغربت روحي ولگيتك.. بزحمة الغربه عرف*
شفتك ولاية محنّه.. وجاذبيتك تختلف*

ابطي بالريه من اشمك**
بلكت ابنبضي الزمك**
وهلبت ادموعي تفهمك**

اخذ الگلب..موتني حب.. مَوت العشگ تدري ابهده*
هوه العمر..لمحه ويمر.. خليني بغصانك نده*
ياعلي.....ياعلي.....ياعلي
....................
من سَمار اخدودك اشرب.. وانبت ابريسم خَظر*
العطش حبك يحيدر.. ما يرويه اي نهر*
ابكل المظايف لگيتك.. غزل واسوالف سهر*
عوفني ابسچة هواكم.. تايه ويهوى السفر*

اشرايد الگلبه لگاكم**
صاغني ولايه هواكم**
عبد واتمنى رضاكم**

لذه العشگ..لو من صدگ.. من يبتدي ابچلمة علي*
انته الضوه..وانته الهوه.. بعالم حياتي الاولي*
ياعلي....ياعلي....ياعلي
.....................
يا لذيذ اشما حچيتك.. وانتشي ابأسمك واحن*
روحي بجروحك افلهه.. وتنعگد دمعه ابجفن*
فطره حبك مو تصنّع.. ويا حلاته البيه يجن*
من الله طايح يا ثوابه.. وبالجوارح مندفن*

فتش اعيوني اعله جرحك**
بلكت ادموعي تلمحك**
واشتل ابنص ليلي صبحك**

شمحله الدمع..بيه انوجع.. وارتاح من ابچي الك*
وياك ابتدي..وبيك انتهي.. يا حيدر من اتوسلك*
ياعلي.....ياعلي.....ياعلي
......................
اغبش اعله احزاني واندل.. كل جرح شابع لچم*
كبّر ابروحي المواجع.. عالحزن كون انفطم*
دلي خطواتي اعله دربك.. كلشي ما اريد افتهم*
انه اعيش ابليلي عاشگ.. وناصب ابعيني الحلم*

وجّ قناديل المواجع**
واچفي بعيوني المدامع**
بروحي حسرات الجوامع**

ارزقني ألم..بچيني دم.. من اسمع ابراسك جرح*
هوه البچي..شگد بيه حچي.. بگد حزن الايتام الصبح*
ياعلي.....ياعلي....ياعلي
....................
اتلوگ بس انته اعله عيني.. طيح يم ليلي ضوه*
اختنگ واركض اشمك.. ياعلي اعذب هوه*
كون اليفارگ حبيبه.. يندفن وياه سوه*
دلل ابعيني البواچي.. ياعلي گلبي انچوه*

أفتره كلما بچيتك**
ياعلي من الله لگيتك**
جرح بس اشگد هويتك**

خليني احس..صوتك همس.. واعطش واشوفنك نهر*
حبك علي..يضل أزلي.. والعشگ يحله بالسهر*
ياعلي.....ياعلي....ياعلي




علاء المياحي
الفاتحه لروح والدي

.. [شمحلاتك يمه بندريه ]..

اداء #ملا_خالد_الفيصل
كلمات #علاء_المياحي #محمد_الابراهيمي

https://youtu.be/vWF55KKE-KQ

مجالس محرم الحرام 1441
حسينية /جنة الزهراء القرنه الشرش
مونتاج وتنفيذ /علي دزاين
مكساج /حسن المنصوري
اللهم عجل لوليك الفرج


https://t.me/kailacv

مشاهدة "شور _ يوليدي _ ملا جواد الباوي _ كلمات علاءالمياحي _ قصيدة العلي الأكبر ع" على YouTube
https://youtu.be/3O45ERtCDns

.. [سلطان الدموع ]..

اداء #ملا_خالد_الفيصل
كلمات #علاء_المياحي
الذاكر #سجاد_الخرسان
🔻موكب محسن فاطمه

https://t.me/kailacv

السلام عليكم
بالبداية اقدم شكري لكم لاشتراككم بقناتي المتواضعة متمنيآ لكم الموفقية ودوام الصحة..
بعون الله تم اكمال مجموعة من قصائد شهر محرم الحزن والعشق وسوف اقوم بنشرها بالوقت المناسب متمنيآ من الله ان يقبلها منا ..
دمتم بنعمة الحسين عليه السلام

يا غربة عليلة الحسين ع



ليلي اعله فجرك بويه حن
مخليني طير ابلا وطن
شباقيلي من راح الضعن

أيّس دليلي..يالخذتو حيلي..يخنگني صار الليل
التارس وجودي. يبچي اعله مودي.. وباچر تدوسه الخيل

باچر خيمهم تاكل بختهه النار
وانه بغربتي تحرگ حياتي الدار

احلامي..انباگت غفل احلامي
ايامي..ذبلت ثواني ايامي
شو ضامي..من هسه اشوفه ضامي
........................
اخر لقاء امن اگعدت
ها بويه گلي ودنگت
مخنوگه بس اتبسمت

هدومي جبتهه..وامحظرتهه..حسبالي گلي انروح
واسمعته گلي..يا بويه ضلي..بالطف وارانه اجروح

انتي عليله وطفنه يريد امتون
بويه المريضه ركضتهه بالله اشلون

من ايديه..كضني وبچه من ايديه
واعليه..سالن دموعه اعليه
محنيه..گباله اگعدت محنيه
.................
گعدني بحضينه ابهده
واسمعته بسمي يردده
لعيونه كل عمري فده

ضليت ابوسه..مچان التدوسه..الخيل وتفيض ادماه
هناك تجمعه..قطعه اعله قطعه..عمتي الصبح تلگاه

هاي الهواجس ما فارگتني دوم
عالتربه يوگع كلما يريد ايگوم

عماتي..تركض عليه عماتي
بشهگاتي..حس بيّه وابشهگاتي
دمعاتي..مشهن بيديه دمعاتي
.................
صوته سمعته وگلبي فز
منظر وگفته هزني هز
محني وعله اصفاحه ارتكز

اتمشه خطوه..بس شفته كوه..اعليه التفت من راح
تلاكه نظرنه..تشابك دمعنه..ومن ايدي هدمي طاح
صحته حبيبي من ايدي اشرب ماي
وردلي وشبكني وابجينه بس اهواي
مبخوته..الوياه مشت مبخوته
جم موته..بلحظه شفت جم موته
وابصوته..نبرة وداع ابصوته
....................
ودعوني اهلي من مشو
التمو عليّه شكد بجو
غرب ضعنهم وانتهو

طالت وكفتي..سالت دمعتي..راح وبعد ميعود
ظهري تحدب..والرمش شيّب..ما اضن نرد اردود

صرت الغريبه ايسموني كلهه الناس
كلتلهم انه انتظر يرد عباس

ما اجوني..كلشي انتهه وما جوني
واعيوني..ليهم تحن اعيوني
خلوني..بحسرة أهل خلوني


علاء المياحي
الفاتحه لروح والدي

مسلم ع


أول وقار..واجمل سمار.. شحلات اعمامته الخظره.. تخيل مهرته الشگره*
شافو ضواه..طش ابسماه.. تخوصر والعرب سكتو.. حرك بشته واهتزو*
جاءو الى الموت الاكيد
...............
شيخ وما يهد حگه.. رزن ما مال بالملگه.. يمين اشمال گلّبها وصفت بيده**
الحگ ايريدله زلمه..الربط والحل هذن يمه.. مسلم بالحرب يتمايز وعيده**
بدواوينه البخت يفلح.. عله اچفوفه الفجر صبّح.. يعزب السيف من يعطش دمه جيده**
يسيّر سالفة مغرم..حسين ابخلگه سر اعظم.. مسافة شوگ كلما يبعد اتعيده**

گالو غريب..گلهم جريب.. حسين ابروحي مستورح.. وگلبي من الهوى ايفرفح*
شمرة خيال..والگه الدلال.. قريب وعايش ابدمي.. اهيم ابعشگه ابن عمي*
جاءو الى الموت الاكيد
.....................
محد ينظر ابعينه..حد الشوف ليمينه..فوگ احزامه محد يرفع اعيونه**
ثگيل ابمشيه يتهده..حيله ايفيض يتبده..الهوه ايعدل عباته ويمسح امتونه**
الهله ما فارگت ثغره.. استحت من مشيته الگمره.. الرمش ليل وتهاده يغطي بجفونه**
اخذ كل الهوه ابچفه.. وسحب خيط الشمس لفه.. ما خله نفس الهم يشمونه**

صاحو دخيل..وين الكفيل.. ابن عمه يجي يكلمه.. ردنه نفس نشتمه*
شفنه الضياع..مسلم مطاع.. كلشي ايريده يجراله.. نبوس ايمينه واشماله*
جاءو الى الموت الاكيد
..................
زرهم والضوه اتخيّط.. گامت روحهم تفحط.. ابو طاهر فركها وعدل الثامه**
گعد يحويهم ابسيفه.. يستنگيهم ابكيفه.. يعلگ روسهم خرخاشه بحزامه**
چفه ادلال الحرب بيده.. اليطير ايلحگه وايصيده.. نوّخ حيلهم وايبّوس اجدامه**
غدت برض الحرب يوله.. وطشت بذنه هلهوله.. ترهدن وابتسم ميّلهه العمامه**

كض الطريج..وگامت تضيج.. الكوفه ورايته اترفرف.. سمع صوت القصر يرجف*
مسهم جنون..وصارو يجون.. يحجّون ابفرض حيله.. قوافل موت تحديله*
جاءو الى الموت الاكيد
......................
التالي ضيّع الاول..نظرهم گام ما يندل.. الخيل من الرعب تنفض الخياله**
الگاع اتمنو اتطمهم.. المعدل خبر گلهم.. جيبو ازلامكم ما اريد الوشاله**
هلي التستذوق العركه.. خشم المارضى انفركه.. عمي الرد شمسهه ابخنصر اشماله**
حمزه الداس كل ظلمه.. جدكم ضاگها اللطمه.. وهاشم ما چفاها وعامره ادلاله**

لو صدفه طاح..مثل الرماح.. واگف منتصب طوله.. وتطيح الدنيه من حوله*
بالحومه هاي..رفرف لواي.. اشب سبّاح ماي ازرگ.. اطرب لو يصير الطگ*
جاءو الى الموت الاكيد
................
صريچ اسنونهم يسمع.. من زردومهم تطلع.. ذاهت روحهم من عدل اعگاله**
الاماره هيه لاگتله..الرمَش منهم تلفتله.. سوالفهم اشاره صارت اگباله**
سبعهم مختنگ نفسه.. زلمه اليشرد ابخلسه.. اليحوس من التعب رمحه يجي اصلاله**
گلبها وگام يترهدن.. العيون ابحظرته سجدن.. وگال ابسرعه شيلو هاي الفضاله**

خيّم ضباب..شافوه سراب.. ما گدرو يلوحونه
تمنو بس يشوفونه*
گامت تموج..روج اعله روج.. تاهو والدرب ظلمه.. رسم بخدودهم لطمه*
جاءو الى الموت الاكيد
....................
سوالفهم بدت تگصر.. الجدم بالماكو يتعثر.. وطوعه اتهوس ومتحزمه بالشيله**
اللسن بالخوف تتلعثم.. للموت النحر سلم.. مشه وچف الهوه ابظهره يتچيله**
شدهم لحيه يم لحيه.. ماتو واسمه ضل يحيه.. لسه الكوفه ترجف من عزم حيله**
صيته شما عتگ يعله.. مسلم سالفه امهيله.. البخت لو عاز من گبته يبديله**

أول ذبيح..دمه يصيح.. انه الما بايعت ذله.. طريجي حسين واندله*
مسلم أمير..واهوه الظمير.. بكل گطرة دمه يعدل.. سفير ايضل المعّدل*
جاءو الى الموت الاكيد



علاء المياحي
الفاتحه لروح والدي

الاكبر ع


اول مره أمك*
اتطيح وماهي يمك*
يالماخذ اوياك الحيل من امشيت
..............
ها يالمكثر شيبتي..عالگاع طايح بالحر**
بعدك شباب وشيبت..شو يمه نايم بالبر**
انه الچنت يبني انلچم.. من گبل لا تتعثر**
تاليتي اشوفك عالترب.. تفاح بس اموذر**

عطشان واتصد عالخيم بعيونك***
يا جوري بس ما عرفو ايشمونك***
واگبال عيني التمو ايرفسونك***

هيچ اگبالي طايح*
بدمك يمه سابح*
يالماخذ اوياك الحيل من امشيت
...................
يا رطب مايع بالشمس.. منك چنت ما اشبع**
مفتوح جرحك والملح.. يچويك وانته مگطع**
طشوك يبني اعله الرمل.. خير الله هيچ اتوزع**
كل وردة مشتوله ابكتر.. شيلمك وشرد اجمع**

بالگوه تلگف من طحت بأنفاسك***
واعليه تنظر شفتك اتهز راسك***
عطشان چا رمحك اشماله وجاسك***

من شفتك تنازع*
بروحي گمت اجالع*
يالماخذ اوياك الحيل من امشيت
.................
طولت ليش ابنومتك.. الخيل ما ينحزرن**
يا ترف والحافر خشن.. وگامن عليك ايدچن**
بيا حيل تتلگه السحگ.. واجروحك اشگد نزفن**
مطحون دم ويالترب.. شما حست يبني ايلچمن**

أسمعهم ايضحكون من اجروحك***
يالاكبر وگوه تجر ابروحك***
عالوجه طايح والحجاره اتلوحك***

طايح وانته متعوب*
واعله الوجه مگلوب*
يالماخذ اوياك الحيل من امشيت
.................
شتحچي وترس حلگك دمه.. وياچلمه تطلع منك**
والسانك امخشّب عطش.. والخيل ما رحمنك**
اعليه شلت ايدك ردت.. تودعني بس داسنك**
لا أگدر اركضلك حضن.. والا أگدر اعوفنك**

واتشابگن عينك ييمه وعيني***
واتذكرت بيك اشحلات اسنيني***
ما حسّبت تالي الشمر يسبيني***

الطف اشگد حرمني*
ماخذ ابني مني*
يالماخذ اوياك الحيل من امشيت
..................
اسملله اعله طولك من طحت.. يالبيّه زارع لچمه**
يا أم تودعلهه ولد.. وما تگدر اهيه اتلزمه**
قداح اشوفك والسهم.. بصدرك نبت يشتمه**
الليل موعدنه ستر.. الجسمك نروح انلمه**

كل أم تدوّر وصله من اوليدهه***
واتنوح بس النوح بيش ايفيدهه***
بالشوگ تسرح والسياط اتعيدهه***

جسمك من الحگه*
يمه اشلون اشبگه*
يالماخذ اوياك الحيل من امشيت


علاء المياحي
الفاتحه لروح والدي

مسلم ع


أول وقار..واجمل سمار.. شحلات اعمامته الخظره.. تخيل مهرته الشگره*
شافو ضواه..طش ابسماه.. تخوصر والعرب سكتو.. حرّك بشته واهتزو*
جاءو الى الموت الاكيد
...............
شيخ وما يهد حگه.. رزن ما مال بالملگه.. يمين اشمال گلّبها وصفت بيده**
الحگ ايريدله زلمه..الربط والحل هذن يمه.. مسلم بالحرب يتمايز وعيده**
بدواوينه البخت يفلح.. عله اچفوفه الفجر صبّح.. يعزب السيف من يعطش دمه جيده**
يسيّر سالفة مغرم..حسين ابخلگه سر اعظم.. مسافة شوگ كلما يبعد اتعيده**

گالو غريب..گلهم جريب.. حسين ابروحي مستورح.. وگلبي من الهوى ايفرفح*
شمرة خيال..والگه الدلال.. قريب وعايش ابدمي.. اهيم ابعشگه ابن عمي*
جاءو الى الموت الاكيد
.....................
محد ينظر ابعينه..حد الشوف ليمينه..فوگ احزامه محد يرفع اعيونه**
ثگيل ابمشيه يتهده..حيله ايفيض يتبده..الهوه ايعدل عباته ويمسح امتونه**
الهله ما فارگت ثغره.. استحت من مشيته الگمره.. الرمش ليل وتهاده يغطي بجفونه**
اخذ كل الهوه ابچفه.. وسحب خيط الشمس لفه.. ما خله نفس الهم يشمونه**

صاحو دخيل..وين الكفيل.. ابن عمه يجي يكلمه.. ردنه نفس نشتمه*
شفنه الضياع..مسلم مطاع.. كلشي ايريده يجراله.. نبوس ايمينه واشماله*
جاءو الى الموت الاكيد
..................
زرهم والضوه اتخيّط.. گامت روحهم تفحط.. ابو طاهر فركها وعدل الثامه**
گعد يحويهم ابسيفه.. يستنگيهم ابكيفه.. يعلگ روسهم خرخاشه بحزامه**
چفه ادلال الحرب بيده.. اليطير ايلحگه وايصيده.. نوّخ حيلهم وايبّوس اجدامه**
غدت برض الحرب يوله.. وطشت بذنه هلهوله.. ترهدن وابتسم ميّلهه العمامه**

كض الطريج..وگامت تضيج.. الكوفه ورايته اترفرف.. سمع صوت القصر يرجف*
مسهم جنون..وصارو يجون.. يحجّون ابفرض حيله.. قوافل موت تحديله*
جاءو الى الموت الاكيد
......................
التالي ضيّع الاول..نظرهم گام ما يندل.. الخيل من الرعب تنفض الخياله**
الگاع اتمنو اتطمهم.. المعدل خبر گلهم.. جيبو ازلامكم ما اريد الوشاله**
هلي التستذوق العركه.. خشم المارضى انفركه.. عمي الرد شمسهه ابخنصر اشماله**
حمزه الداس كل ظلمه.. جدكم ضاگها اللطمه.. وهاشم ما چفاها وعامره ادلاله**

لو صدفه طاح..مثل الرماح.. واگف منتصب طوله.. وتطيح الدنيه من حوله*
بالحومه هاي..رفرف لواي.. اشب سبّاح ماي ازرگ.. اطرب لو يصير الطگ*
جاءو الى الموت الاكيد
................
صريچ اسنونهم يسمع.. من زردومهم تطلع.. ذاهت روحهم من عدل اعگاله**
الاماره هيه لاگتله..الرمَش منهم تلفتله.. سوالفهم اشاره صارت اگباله**
سبعهم مختنگ نفسه.. زلمه اليشرد ابخلسه.. اليحوس من التعب رمحه يجي اصلاله**
گلبها وگام يترهدن.. العيون ابحظرته سجدن.. وگال ابسرعه شيلو هاي الفضاله**

خيّم ضباب..شافوه سراب.. ما گدرو يلوحونه
تمنو بس يشوفونه*
گامت تموج..روج اعله روج.. تاهو والدرب ظلمه.. رسم بخدودهم لطمه*
جاءو الى الموت الاكيد
....................
سوالفهم بدت تگصر.. الجدم بالماكو يتعثر.. وطوعه اتهوس ومتحزمه بالشيله**
اللسن بالخوف تتلعثم.. للموت النحر سلم.. مشه وچف الهوه ابظهره يتچيله**
شدهم لحيه يم لحيه.. ماتو واسمه ضل يحيه.. لسه الكوفه ترجف من عزم حيله**
صيته شما عتگ يعله.. مسلم سالفه امهيله.. البخت لو عاز من گبته يبديله**

أول ذبيح..دمه يصيح.. انه الما بايعت ذله.. طريجي حسين واندله*
مسلم أمير..واهوه الظمير.. بكل گطرة دمه يعدل.. سفير ايضل المعّدل*
جاءو الى الموت الاكيد



علاء المياحي
الفاتحه لروح والدي

دخيل جمال القاسم



عطشان.......محله العطش بشفاك****
جسام..........يمه الرمح تاناك******
يالمعرس اتمنه*
بچفوفك الحنه*
يجسام........يجسام
..................
طولك نده اشلون انته تضمه.. والجوري حلمه.. عطرك يشمه*
يمخجل الماي بحلاتك.. عفته ابرضاتك.. يمه ياغلاتك*
روح ابهده وفرغلي حيلي.. خليلي ليلي.. يحرك دليلي*
ظلمه الخيم يالماشي غبشه.. نورك تطشه.. وعمري تعطشه*

والياس........من عشگه فرفح بيك*******
والموت.........بمصباحك امتانيك*******
وابنومك اتهنه*
بچفوفك الحنه*
يجسام......يجسام
.......................
احتاز الذبح ورده ورحتله.. واتبسمتله.. عمرك توشله*
خطارك الرمح وتضيفه.. چنك تعرفه.. بجرحك تلفه*
يمونس اعيوني من اشوفك.. حنه ابچفوفك.. تاليتي اعوفك*
الطف يروحي ايخظر اسهام.. تذبح بالحلام.. يبني يجسام*

الشوگ.......برموشي فطّر شيب********
اشلون.......عن عيني يبني اتغيب********
شيسكّت الونه*
بچفوفك الحنه*
يجسام.......يجسام
.........................
گهوي السهم من دلة الريج.. يالجرحك اغميج.. شما اشوفك ايهيج*
زفه الهلاهل بيهه سكته.. والفرحه ميته.. چفنك لبسته*
الليله بس اتلمنه خيمه.. باچر هضيمه.. نشبع شتيمه*
ادري الحوافر تاخذ الزين.. نبقى نساوين.. ننطي الوجه وين*

احتار.........وين اركض الياصوب*******
الگاك..........اعله الوجه مگلوب*******
الوادم تسلبنّه*
بچفوفك الحنه*
يجسام.......يجسام
.........................
تتبده باچر بيش المك.. كل خوفي الچمك.. لمّن الزمك*
اكصر عرس بالدنيه شفته.. بالحومه زفته.. من دمه حنته*
گلب امك الوادم تحرگه.. جسمك الحگه.. واشلون اشبگه*
بعدك ترف والخيل خشنه.. طولك تطحنه.. بيا گلب احضنه*

الخيل........ما تدري شنهي اتدوس********
عاشور......يطفي ابظلامه اشموس********
بحزانه غرگنه*
بچفوفك الحنه*
يجسام......يجسام
.........................
چتالك ايطفيلي شمعه.. راسك يرفعه.. يشمت اسمعه*
ذاري التراب ايحنّي شعرك.. يالرمشه عمرك.. وجوريه نحرك*
يالتشرب اسنينك حوافر.. يضل گلبي حاير.. شيخلي عاشر*
كل أم تدوّر وين ابنهه.. من يمشي عنهه.. يطفح حزنهه*

واتروح........للحومه تنشد وين*********
والنار........تحرگ بنات حسين*********
الطف يعذبنه*
بچفوفك الحنه*
يجسام.........يجسام
...........................
عنبر نسيم الطف تترسه.. وابروحي احسه.. وابشوفي المسه*
يا لذة اسمك من اذكره.. تچفيني حسره.. يالتبقى ذكرى*
يمثگل الگاع ابمشيتك.. واعيوني بيتك.. بروحي حميتك*
طيح ابهداوه وشبع التراب.. شمعك طفه وذاب.. بسنان الحراب*

وياك..........اخذ المحنه وروح*******
والعين.........اترسهه كوم اجروح*******
يالما امل منّه*
بچفوفك الحنه*
يجسام........يجسام



علاء المياحي
الفاتحه اروح والدي

يحبيب ابن مظاهر يأمير العاشقين
..................
أول وقار اتبسم وطاري الذبح حلالك*
واول جرح شيباتك ويالدم كمل جمالك*
حتى الضمه بشفافك ايلوگ وشبگ دلالك*
بيك العشگ مستورح وشارب نهر خيالك*

حسين........ بعيونك**
تهيم............. بجنونك**
شوگ............ بشفافك**
ليل............... بجفونك*

العشگ من ينعاش ما تنطفي جمراته**
واليحب يگضي الليل يحسب عدد نجماته*
بالعمر چم حسين تارس خلگ ساعاته**

يحبيب ابن مظاهر يأمير العاشقين
........................
احتاز العطش يالفاتح امظيف وتعزب اشفافك*
واتطشرت ماي وشبع روج النهر من شافك*
مية سنه والا سنه ما حنت حيل اچتافك*
مات العمر وانته تشب بحسين ربك دافك*


الحيل............ واسنينك**
ذاب................ بحسينك**
الماي.............. واجروفه**
ايبوس............ بيمينك**

خظرت بالطف ياس انته وذبل عاشورك**
والنهر يمك مات لمنّ طلع عن شورك**
الصبح من شيبتك يعكس ضواه ونورك**

يحبيب ابن مظاهر يأمير العاشقين
..................
كلشي سكت واجروحك اتسولف هله ابهالليله*
رغم التعب بس طولك ايوزع نده من حيله*
احتاز الذبح واسنينك ايترسن عشگ بشليله*
لمّن طحت طولك تشبگه الگاع واتچيله*

الموت.......... بچفوفه**
شال............. سالوفه**
الروح........... بحسينك**
تصيح.......... ما اعوفه**

ابطيحتك كل امظيف طاح وچفوها ادلاله**
ياعدل والطف مات من هوسو الچتاله**
يا ثواب الله الطاح والرمح باسه وشاله**

يحبيب ابن مظاهر يأمير العاشقين
....................
احتار الورد عطشان وانته امسيّر اعليه غيمه*
بين الغرب روحك صغتهه اولايه مدري خيمه*
هيچ الهوى لو ماكو يمخظر عشگ بالهيمه*
ديرة عرف طولك فزع حاضن الطف وضيمه*

وطن........... احساسك**
انذبح.......... ويراسك**
صغت.......... بجروحك**
عشگ........... عباسك**

يا چبير الانصار فاض الهوى من اعيونه**
عابس اشمنك شاف هام وصرخ بجنونه**
يا درس للعشاگ واهل الهوى ايدرسونه**

يحبيب ابن مظاهر يأمير العاشقين
......................
شايف نحر متحزم ابرمحه ويوزع اشواگه*
جزره الذبح واهوه نهر فاض وتسودن راگه*
جمره العشگ ما تنطفي وطول الزمن حراگه*
حيله انهدم من ركّضو زينب وصعدت ناگه*

غرگ........... بحزانه**
تشب.......... نيرانه**
تسيل.......... اجروحه**
انسحگ....... ديوانه**

كربله بالانصار لوحة عشگ ورديه**
صاغو من الارواح لمّن مشو ترچيه**
شربو من العباس قصة وفه بدويه**

يحبيب ابن مظاهر يأمير العاشقين




علاء المياحي
الفاتحه لروح والدي

في جوف الليل همسات زينب ع تخترق قلب ابا الفضل وهي تقول:



ثگيله الچلمه بالساني واختك گلب امايه**
اخاف الشامت ايأشر عليّ ويگول من هايه**
چبيرة عمر خاف امشي منّ اولايه لولايه**
وبيهّ تدري ...... انته ستري
...............
عودنــــي اعله افراگك يا فيّي وستري*
مو فجأئه اتخلينــــــي محتاره ابعمري*
يا دمعه اتكفيني لــــــو شافو خدري*

فكري حاير..شألگه باچر..من تسافر..ترجعلي واتانيك**
يا عرفنه..وكل سلفنه..اتمنى طفنه..ياخذني وايخليك**

يبختي ايطيح عالشاطي ويفرهد عمرك العامود**
خوفي يلچم اجروحك ماي السايل امن الجود**
شلمك وانته متبدي ويا حيل اليشيل ازنود**
وبيهّ تدري..... انته ستري
..........................
خاف اوصل واتعنى وابعينك سهمك*
لو اتيه يدليني يالكافل دمك*
شافرشلك لجروحك واملوحه اتلچمك*

ها يغالي..ابخيالي..چن دلالي.. ريح ابشبك صاير**
بيمن ابدي..وانه وحدي..ويامن احدي..وخيك داسه حافر**

شسويلك ضره وتدري ما تبقى الّي خيمه**
اشوطي اعله النسه الشردن وطشن مني بالهيمه**
ترى لو تمشي يالكافل تضيع من اختك ايتيمه**
وبيهّ تدري...انته ستري
..............
وعبدالله ايتانيكم يــــا خويــــه ابمهده*
واگماطه البيد امه چا بيش اتشده*
يا ماي امن اعيوني رايح تتبده*

لو نظَرته..صفره شفتّه..أسمع اخته..عمك هسه يرجع**
الما تشربه..بصدري حربه..ويمي غربه..وشامت يضحك اسمع**

يرايح والهوه ابصدرك اختك تبقى مخنوگه**
وعزيزتكم تون يمي رجلهه الترفه محروگه**
واخوك امطشره اجروحه شلم والجثه مسحوگه**
وبيهّ تدري.....انته ستري
.............
يالكافل تلچمني كــــل خطوه امشيهه*
والحيل ايعاندني گوه اعثر بيهه*
هيبتنه العالشاطـــــي اتراب ايغطيهه*

ابقى يمك..شلون اضمك..وانته سهمك..بايگ كحلة العين**
ویه الزنود..خدري ممدود.. حاضن الجود..ينظر صوب الحسين**

يخويه من يطيح الشيخ تنصب ديرته الچادر**
عجيبه وانتم اهل الله بذبحكم كلهه تتفاخر**
شسوي لو شمر يضحك عليّ ويگوم يتجاسر**
بيهّ تدري.....انته ستري
............
ذبّاح اخواني باچـــــر يحدينه*
والكافل خدر اللـــــه عاري امخلينه*
بالعاشر يــــاروحي اسمي امغيرينه*

الهاشميه..للسبيه..يحدي بيه..امشي اعله الهزيله**
خويه اختكم..وكل حرمكم.. تمشي عنكم..ضعن ابلا كفيله**

حبل يچتفهن ايديه من امريه لمريه**
سبايه نمشي يالكافل يتارس روحي حنيه**
اروح الشامي والرايه تضل عالشاطي مرميه**
بيهّ تدري......انته ستري



علاء المياحي
الفاتحه لروح والدي

للامام الرضا ع (محرم) استقبال الدموع


يسلطان بحزانك..يسلطان بحزانك..يسلطان بحزانك
..........
عيشني احله عذاب*
عمري بلا دمعه سراب*
أرزقني حزن الرباب*
واحزانك

يسلطان..يسلطان..يسلطان.. يسلطان

الدمع يخنگني..ردت تلحگني.. وتكحل اعيوني..واعيش العاشر**
يبو الحنيه..العذاب البيه.. شرب كل لوني..عله طاري الحافر**

سافر ابروحي اعله خيمه بيهه سالوفة عرس***
وطشني فيّ اعله الجروح الكسرت اعيون الشمس***
فتش اعيوني ابمدامع عالفحط من العطش***
واعله گدي انطيني دمعه رايد ابغربه احس***

الما شيّب عالغريبه**
لا يحچي بالمصيبه**
مسبيه تمشي زينب**
يادنيه شگد عجيبه**

يسلطان بحزانك..يسلطان بحزانك..يسلطان بحزانك
..................
النازل من الله حياة*
عطشان وكله فرات*
وطاح وتفزعله بنات*
وايتامه

يسلطان..يسلطان..يسلطان.. يسلطان

وگع نية الله..ولاكو اسملله.. تتچي اضلوعه..حبيبي وضامي**
واليعطشونه..تروح اعيونه.. وتسيل ادموعه.. وينادي اخيامي**

غبشو اعله اجروحه لچمه التارس الدنيه عشگ***
وين اكو مثله ربيع ايخظّر اشما ينسحگ***
شكو وردة ابجنة الله صوفرت من الذبح***
هايه يا خيل التدوسه وگلبه خيمه وتحترگ***

يحرمونه من اخيامه**
واعيونه اعله ايتامه**
والغربه تتفرج**
يتعذب بسهامه**

يسلطان بحزانك..يسلطان بحزانك..يسلطان بحزانك
....................
المچفي اعله التربه ضواه*
وخيل امضيفهه گفاه*
خنگو يا وسفه هواه*
بجروحه

يسلطان..يسلطان..يسلطان.. يسلطان

التسيل اجروحه..وتنازع روحه.. يدير ابعينه..يدوّر خيمه**
حبيبي نايم..تحوطه الوادم.. المعطشينه.. تشربه الهيمه**

فرهدو كلشي ابحياته وفرفح اگباله الورد***
وهالت الوان السوالف والخدر عالتل يهد***
ذاهت ارواح اليتامه من بده ايحز النحر***
وانكشف طول الغريبه الگامت اتروح وترد***

من صاحت خويه وينك**
عالخيمه فرلي عينك**
ياروحي ما تجينه**
والغربه امحوّطينك**

يسلطان بحزانك..يسلطان بحزانك..يسلطان بحزانك
...................
ملح اسوالفنه غريب*
الساتر عالمنه سليب*
وخده اعله الغبره تريب*
والحيته

يسلطان..يسلطان..يسلطان.. يسلطان

الحزن ياخذنه..الدمع معبدنه.. نحب اجروحه..ونحب لچماته**
السهم ذابحله..ربيع ابنبله.. واخذ من حيله.. بچي ابنياته**

داست ابصدره الحوافر خده نام اعله الترب***
والهزل باگت حياته من مشو بيهن غرب***
ميت وعينه الخواته وروحه ضلت بالخيم***
ميت ابركضة خواته مو سهم جاس الگلب***

محبوبي هيچي طايح**
متغير بالملامح**
والحسره تچوي روحه**
عالناگه خدره رايح**

يسلطان بحزانك..يسلطان بحزانك. يسلطان بحزانك
........................
هنياله اليبچي غرام*
بدلاله تچوي خيام*
تلچم بجروحه سهام*
وابگلبه

يسلطان..يسلطان..يسلطان.. يسلطان

اسافر يمه..واتيه ابرسمه..واهيم ابحزنه..واحس بالحسره**
ردت من عندك..رزق من ونتك.. شحلات الونه..التخلف جمره**

دنيه ما بيهه الحسين شتسوه ما بيهه طعم***
والجزع بيه لذه لمّن ينخبط ويه اللطم***
ألهوه الما بيه مخيم ما اريده ويالنفس***
فدوه بچيني الحبيبي چن طفل فاگدله أم***

خليني من عبيده**
محبوبي وامري بيده**
بچيني عالمخيم**
كل عمري هيچ اريده**

يسلطان بحزانك..يسلطان بحزانك..يلسطان بحزان



علاء المياحي
الفاتحه لروح والدي

كاشخ وشايل الجود*
هوس ودگ عالزنود*
(اذبهن لو اجيب الشط لبو اسكينه)
........
من ندس مهره عباس كركش الرايه رفرف*
غارت وشهگت الگاع والشمر لونه صفصف*
اهتزت وماجت الروس خيّط الطف على الطف*
عجت ومطرت ابغيض والهوه ابچفه حف حف*

واللوز بلعت الريج*
هوس وكض الطريج*
(الف الجيش واهله بهاي خاچيتي)
.........
مغزل افترت الطف والمعسكر تلايط*
وكّر ابثگله عالروس والنده ابگصته نگط*
كزبرة طينة الگاع والنهر شو تلطلط*
والجيوش العلى الماي كلهه شردت وره الشط*

تمشه للشاطي بهداي*
هوس ودچ عله الماي*
(اذا يرخصني اخوي اتعزل الكوفه)
...........
اتخوصر وخلست الناس صارو اليمه فقره*
عالجرف واگف الشيخ واليجر نفسه فگره*
وانخطف لون الوجوه بخت اليكضله حفره*
والشمر سكّت الناس وابهده ايذبله حسره*

دوّر ابعينه عالناس*
هوس وناده عباس*
(اريدن زلمه بس واحد يلاگيني)
........
عالجرف فاتح امظيف يگوه ابو فاضل يگوه*
عزب امرورة الموت والزلم دگها گهوه*
مهيل ايمينه عباس شاتل الحومه سطوه*
يطرب الطاري الزماط والرگب يمه تهوه*

زلمه ما خله بيهم*
هوس وصد عليهم*
(اشور والزعل يتطافر ابعيني)
.........
شربك اسوالف الجيش والحچي كله يمه*
گالو انفصله شيريد هذا زلمه ابن زلمه*
تحزم ابشته والناس كلمن انطاله سهمه*
دخّن ابغيضه عباس فوّر ابچفه دمه*

داخو وشربو الخوف*
هوس وهز الچفوف*
(رگبكم ما تكفي المهد عبدالله)
.........
ريشته اترف على الهام هيبة الله تجله*
بيرغه ايخمها بالطف والفرات ابتسمله*
ياهله ابكشخت حسين بالچتف جوده يحله*
دخيل ابو فاضل اهناك عالجرف ثايه دگله*

والنهر جابه وياه*
هوس وگله حياه*
(هله بالربته اعله الموت بدويه)


علاء المياحي
الفاتحه لروح والدي

كان للامام السجاد ع سهم من الم فراق اخيه الاكبر ع:


موت عطشان..الله وياك..ودلل الحافر ابصدرك*
موت عطشان..خويه وارتاح.. ركضت امك لا تعورك*
باچر..يالاكبر ايركضن**
باچر..بالهيمه وايعثرن**
موت عطشان
.........
روح للموت اعله كيف وشبع الگاع ابحلاتك**
الخيل بس تعرف تدوس وفرزنت لذة حياتك**
شبگت الحافر خفيفه ومو ثگل ركضت خواتك**
ركضت النسوان حسره وغافيه امروره ابلهاتك**

يرحم الموت..ونار الخيام..تاكل ابخلگ اليتامه*
والدي حسين.. باچر ايطيح.. ويزحف ازحوف الخيامه*
طايح..وانه انظر ايفرن**
باچر..بالهيمه وايعثرن**
موت عطشان
............
واحد ابرجله يرفسك وين المچان اليعورك**
والدي يلزم لحيته يشوفه يدبچ فوگ صدرك**
معاند ويحسين يضحك من يحز ابهيده نحرك**
عالوجه جسمك يگلبه ويرجع ايرده اعله ظهرك**

وبين الخيام..امك تنود..لا تعوره الضنه غالي*
لا يذباح..ابني عطشان.. الماي ما ضاگه ليالي*
ذابل..وعماتك ايصرخن**
باچر..بالهيمه وايعثرن**
موت عطشان
.............
يا أبو يصبر يغالي أبنه يمه ايذبحه زلمه**
وانته جسمك عالترابه امطشر وياهو اليلمه**
خويه يحتار اشيشيلك وانته صاير ثلمه ثلمه**
الأخ يفرشهه اعله طولك والجرح خايف يلچمه**

محدب الطول..بيك محتار.. ساد اعيونك ابوجهه*
من يحاچيك..ها يالحنين.. وينهه البسمه الاحبهه*
خويه... واجروحك اينزفن**
باچر... بالهيمه وايعثرن**
موت عطشان
....................
الموت ارحم ﻻ تعاين نار تاكل خيمه خيمه**
وصوت عمتك من تنادي ﻻ تطگ هاي اليتيمه**
راح اشوف ابعيني امك خويه من تركض ابهيمه**
وراح اسمع مهر ابونه يصهل يگول الظليمه**

تفزع الناس. عدهه فرهود.. بخيت اليسلبله وحده*
والشمر حيف..يضحك هواي.. وماهو عباس اليرده*
حيره..خواتك ايشردن**
باچر..بالهيمه وايعثرن**
موت عطشان
...............
باچر ابليل اهدعش يالأكبر اندور ابنيه**
بين حيره وبين خوف اتجيب يم نحرك اميه**
اتگلك اچفوفي زغيره وجايبه الماي ابأيديه**
شايفه اشفافك الزرگه وتدري حنيت رقيه**

شايف اشلون..الموت مبخوت.. من تگلك ها يروحي*
أنه هالجيت..گوم وياي.. يالله ضمدلي جروحي*
توجع..رجليه يحترگن**
باچر بالهيمه وايعثرن**
موت عطشان



علاء المياحي
الفاتحه لروح والدي

لا شئ اصعب على الام من رؤية ولدها مقطع على الارض .. الزهراء ع شاهدت وهج اوصال حبيب قلبها :



يمه شني الاذاك*
چا وينه حيلك ذاك*
معقوله هيچ الگاك*
..
نايم عله التربان*
يبني طحت عطشان*
وامن النزف تعبان*
..
عاري يالمخجل الشمس واختك تسوي افياي**
لا غيمه جاباها الوفه وليل الستر ما جاي**
يالبايع والله اشترى شيبت لحيتك هاي**
شمرت عصا الماي وطحت ما شربوك الماي**
..
تعطش ردت يالالله تارس عينك***
يالخنصرك مبيوگ منّ ايمينك***

حسين..حسين..حسين يا مذبوح
.................
جسمك ذبل شبساع*
حگه جروحه اوساع*
وخدك تضوگه الگاع*
..
بصدرك خيول اتدوس*
وانته عدل واتحوس*
وجسمك نبل متروس*
..
يالكاسر اعيون السحگ فحطت عليك الخيل**
شما يسحگ ابصدرك فرس يتبده منّه الهيل**
متواعد ويالله چنت يالمچفي منك حيل**
بس شايل اجروح الخدر يگضي ابسواد الليل**
..
طايح ولا مهتم چنت بسهامك***
ونار الشمر باگت حلاة اخيامك***

حسين..حسين..حسين يا مذبوح
....................
هيچ الشمر يچفيك*
وابلذه يذبح بيك*
يضحك اذا ياذيك*
..
وما تگدر انته اتگوم*
من كل كتر ملچوم*
واختك عليك اتحوم*
..
بنفاسك اتلاگف طحت واتوصي ببنيات**
من تمطر الدنيه سبي يا روحي عطشانات**
ظلمه وضواهن عالنهر وايشبعن ابعثرات**
واسكينه مو مالت تعب واعله الرمال اتبات**
..
ما لايگ ايروح الضعن بالهيمه***
ولا بيك حيل وما بقتلك خيمه***

حسين..حسين..حسين يا مذبوح
......................
گطعو ييمه الراس*
وفزعت عليك الناس*
ميت ضمه وتنداس*
..
تتأذه وايضحكون*
وابراسك ايهوسون*
بجروحك ايلچمون*
..
يالماكو مثلك منذبح بس راسك اشمحلاه**
حتى الله خلالك عرش فوگ الرمح علاه**
يمزاعل الدنيه وردت يم الله تبقى وياه**
مذبوح بس تبقى حلو الشافك يصيح الله**
..
اجمل ذبيح من الگفى ايشوفونك***
ليهسه يحچون ابجمال اعيونك***

حسين..حسين..حسين يا مذبوح
.........................
أمشينه يبني انروح*
كافي عطش واجروح*
جيب ابنك المذبوح*
..
بالجنه ماكو خيل*
لا نبله تگضي الحيل*
لا حرمه تبچي ابليل*
..
الجنه ما بيهه غرب يوليدي كلهه احباب**
لا بيهه حافر لا ذبح لا بيهه ذاري اتراب**
بس جرحي ما اضن ينتهي ما اريدن انسه الباب**
حد ما يجي اوليدي الفرج عندي عزيز وغاب**
..
ابنياتك ايردن الك يوليدي***
وذهباتهن انه الاردهن بيدي***

حسين..حسين..حسين يا مذبوح




علاء المياحي
الفاتحه لروح والدي

خافت عليه حتى من الهواء.. فسلمته للنبال (عبدالله الرضيع)



حتى لو فوگ الرمح تبقى امير*
الخاطر اشفافك اثوّب يبني بير*
يا عدل والعطش مات**
توه سهمك يبني فات**
دلي اللول الولد يبني دلي اللول
................
روح يا ازغر امير وخجل الماي ابضماك*
نحرك الجمّاره بيّن والسهم گلهم هذاك*
مايهم ميّت ظميره فرح من سهمك اجاك*
عمت عين الماي يمه تلاگفك مني وخذاك*

بالعبايه ايضللك من راح ابوك*
تالي نحرك ينچوي بحضنه ورموك*
وانته نحرك بس لهات**
توه سهمك يمه فات**
دلي اللول الولد يبني دلي اللول
................
بارد اسنان اليذبحك والنحر يبني چواه*
فرفرحت لله بحلاتك وانچفه حيلي وراه*
شوغ بس يمه ابهدواه الموت رادك مشتهاه*
زغير بس شالك ابوك امدنگ ومحني گفاه*

اشطولها صارت رجعته للخيام*
والحمد لله گلت عبدالله نام*
الليله بحضيني يبات**
توه سهمك يبني فات**
دلي اللول الولد يبني دلي اللول
..................
گماطك ابأيدي عگدته اعليك اخاف امن السهام*
لو احس صوت النبال ابسرعه اسدّ باب الخيام*
تالي اسمع يمه صوت اعله الرضيع اقري السلام*
راح يمّ عبدالله ابنچ ميّت وما اضنه نام*

مو هوه الشال الغطى أرفيف ايديه*
والنحر ملوي السهم شمسوي بيه*
عيشي بين الذكريات**
توه سهمك يبني فات**
دلي اللول الولد يبني دلي اللول
...................
الله لا ينطي الرماك الباگ جوري امن الربيع*
دوّرك لمّن لگاك وانته ها توك رضيع*
الما يفرزن شنهي طولك بالسهم طولك يضيع*
شاتل ابنحرك سهمهم والجرح كلش وسيع*

يا ثواب الله ورحت من عندي وين*
دمك السايل ترس لحيت حسين*
فرهدوه منّه الحياة**
توه سهمك يبني فات**
دلي اللول الولد يبني دلي اللول
................
رحت يالراسك سبيل اتونست بيه الرماح*
بكثر ما هوه زغير امن الرمح كل ساعه طاح*
كلهه ظلمه وانته بس ابعيني يوليدي الصباح*
ريجك الخليته ضامي يالولد توه استراح*

يلي اشتمك چنت عبدالله هيل*
گمت الولي للهوه لو صار ليل*
ابچي ويه الفاگدات**
توه سهمك يبني فات**
دلي اللول يبني دلي اللول



علاء المياحي
الفاتحه لروح والدي

جاي...مسلم لو بعده*
شلون....لو يمي اتعده*
گبل لا اسمع جاي**
سنة ومحظره الماي**
وينه..............وينه
.............
كل ساعه اركض يمّ الباب امن اسمع مرّ خيّال*
بطاسة ماي افزع من يعبر طاري اسمه اعله البال*
بعيني الوادم كلهه افضاله وبس مسلم رجال*
كاشخ طوله ابثوب الغيره ولبس الدنيه اسمال*

الماي......بيدي حظّرته*
اچبير.....بختي لو شفته*
انتظر صار من اهواي**
سنة ومحظره الماي**
وينه...........وينه
...................
وابطوله افتح ريج اعيوني واتخيل ملگاه*
وتفزع ديرة شوگ بروحي واشهگ بلكي الگاه*
كلما يوگع شي عالگاع اتفز چلمة حياه*
واتفرفح ضحكه اعله اشفافي بلكي حسين وياه*

شوگ.......يسرح بعيوني*
ثنين........والكافل جوني*
يگلهم طوعه هاي**
سنة ومحظره الماي**
وينه...........وينه
.......................
وايطبون البيتي واترس عيني بنور حسين*
وافتح كل رازونه ابگلبي واتبده نهرين*
واعگد روحي ابشيلة زينب واخدمهم عمرين*
وافرش طولي الضعن اهل الله واتسحگه الرجلين*

كون.....شليه ابصف شيله**
تشوف....عيني ابهالليله**
وگمر يلمع بسماي*
سنة وامحظره الماي*
وينه........وينه
....................
واسمع صوت امناغه واشهگ كلشي ولاعطشان*
وام عبدالله ارتاحي اتگلي يا طوعه حلمان*
خير امن الله الماي العدنه الكافل ينگل چان*
واسم الله امن النبله الرادت تذبح اغلا انسان*

الماي.....شو خير امن الله*
زغير......عبدالله وصلى*
بفضل عمه السگاي**
سنة ومحظره الماي**
وينه.........وينه
.......................
مسلم لازم ايد اولاده هيچ ابعيني احلام*
شمحلا الليل بعين الوالد بنته ابحضنه اتنام*
لا ماي اليخنگ ضحكتهم لا نار ويه اخيام*
وزينب شيخة ابقصر الكوفه مو تمشي اعله الشام*

هيچ.....مّن اغفى احلامي*
حسين.....راوي مو ضامي*
حلم سيّر بهداي**
سنة وامحظره الماي**
وينه...........وينه



علاء المياحي
الفاتحه لروح والدي

يبني السهم مو حلّك..لا تمشي وياه.. يا رضيعي*
ولون العطش حلالك..لا تذبل هناك...يا ربيعي*
يا عبدالله.......يا عبدالله
......................
انته عمرك دوب يا عبدالله شهگه*
السهم مو گدك ورايح تشبگه*
وحيل چلمة يمه منك اشتهيهه*
يا بزر گلبي الاطشه ابگاع فرگه*

ارمش بعينك يبزري*
ضامي يا عبدالله ادري*
والعطش فطّر لهاتك*
يا نهر بالخيمه يجري*

عبدالله افل اگماطك..اهواي السهام.. وانته وحدك*
من تچوي يبني نحرك..عاين عالخيام.. وانه اردك*
يا عبدالله.........يا عبدالله
........................
هناك تتلگه السهام ابطرگ نحرك*
اچبير سن النبله وانته ازغير عمرك*
شويه دمك يمه ما يشبع عطشهم*
ولسه ست شهگات عمرك وينه كبرك*

ياهو من نحرك يطلعه*
خاف اجر سهمك واوجعه*
رگبتك كلش زغيره*
وعكس ما یرهم ارجعه*

شتسوي وانته هسه..من التعب شبعان.. يمه اشوفك*
يا روحي وين اضمك..يا جرح عطشان.. بيش اروفك*
يا عبدالله.........يا عبدالله
.......................
تفطرت منّ العطش عبدالله شفتك*
واشتهه ايضوگ السهم يبني رگبتك*
الماي شمرة عصا عنك وانته متعوب*
ونشفت الهاتك يمايي الما شربتك*

يفرهد اعيوني رفيفك*
مخظّر وسهمك خريفك*
شيسوه ماي الما شربته*
وانته ما يگطع نزيفك*

سيّر نده اعله الهيمه..واسگيهم احساس..وابقى ضامي*
وارجع حلم ما راوي..وايتاني عباس..يم خيامي*
يا عبدالله.......يا عبدالله
............................
الناس ما تعرف تشمك وانته ورده*
والسهم متعافي يبني وما تهده*
ضامي بس عبدالله اشوفك حيل راوي*
انته اول طفل هيچ ايحرگه مهده*

روح يا جرحي اللچمني*
ترهدن اعله النبله يبني*
شلون كاروكك اهزه*
خالي وافراگك هضمني*

دليهم اعله الرگبه..خلهم يشبعون.. من حلاتك*
رفرف يغالي بيدك..واهمه يشوفون.. من رضاتك*
يا عبدالله.......يا عبدالله
.........................
حرمله ايدور الترافه البيهه نشعه*
ولو نحرك يمه اعرف ما يشبعه*
الموت سوگ وانته صرت اغلا بضاعه*
يصيح جيبو ازغيركم نحره اگطعه*

موت عبدالله ابهداوه*
وبلل اسهامه ابنداوه*
الموت مرّ گالو ابطعمه*
وانته طعمك بس حلاوه*

خلي امك ابحزنهه..يا ريحة حسين..وكل غلاته*
الموت يبني لذه..ويه المحبين.. واشحلاته*
يا عبدالله.....يا عبدالله




علاء المياحي
الفاتحه لروح والدي

السلام عليكم
خدمة الحسين عليه السلام التمسكم الدعاء وقراءة الفاتحة لروح والدي واتمنى ان تكونون راضين عني رغم قلة ما قدمته من قصائد واسأل من الله ان يسدد خطاكم ويوفقكم لهذه الخدمة.. ابعد الله عنكم الشر والوباء ودمتم موفقين ببركة صاحب الزمان عجل الله تعالى فرجه الشريف