شتسولف ويه الله ابعينك*
معطشهم مدري امعطشينك*
للباگك مديت ايمينك*
تنطي ثواب******

يمخظّر والحافر هيمه*
لشفافك نزلت چم غيمه*
بس شربت كل حيلك* خيمه
وذاك التراب******

بجروفك چم نورس نام**
وابريجك حتى الشط هام**

وابربيعك.جوري خظّر. وانته ضامي. يا روحي*

ماتو وانته اجروحك عدله**
طحت وصاحت آخ القبله**
شما يعتگ حبك صار احله**
ويحله العذاب*
......................
ما كاسر واهس للحافر*
نوّمته ابصدرك بالعاشر*
يذبحونك قابل ما حاير*
وانته جريح*****

ثگل الحافر ماخذ روحك*
بيش اتفكر ناسي اجروحك*
ما مهتم واسهام اتلوحك*
راضي تطيح*******

طشيت اعله الهيمه هيل**
ترتاح امن اتدوسك خيل**

وانته طايح.عالترابه. والحبيبك. ناجيته*

معشوگ ايحاچي ابمعشوگه**
رغم الحافر صاعد فوگه**
شمحلاته الموت امن اتضوگه**
ولا چن ذبيح*
.....................
وين الگه مذبوح اينازع*
ما مهتم للباگه اشگاطع*
لخيامه المنهوبه ايباوع*
وايهل دموع******

ما ميت والخيل اتدوسه*
اعله امچان البيه امه اتبوسه*
يا وصله امن الله ومرفوسه*
فوگ الضلوع******

گبال اخته وبالحر ايذوب**
من صبح الله الحد اغروب**

جوري طايح.كلهه فزعت. يم جروحه.ايلچمونه*

طاح ابوادم كلش صلفه**
يلچمونه بجروحه الترفه**
معقوله ولا خيمه اتلفه**
شمعه يموع*
....................
متهادي اعله الموت براحه*
شلون السيف النحرك لاحه*
مذبوح وحيّر ذبّاحه*
لمّن اجاه******

يا والد منحور اوليده*
ومكيف بالموت وعيده*
يدلل بالسيف ومد جيده*
وينزف ضواه******

غشمه الگالو بالطف مات**
ألنور ايلزموه هيهات**

ماتو اهمه.وانته عايش. يا حبيبي.بدمومك*

يالطايح عالگاع اسملله**
نحرك خظّر چم عبدالله**
نهر الحب بشفافك صلى**
عشگك جواه*
.......................
حبيتك من اول دمعه*
واليعشگ مثلك شيشبعه*
احلفلك بالضلن تسعه*
بحبك اهيم******

دليني اعله اجروح التوجع*
من طفك ما رايد اشبع*
يرف گلبي شما بسمك اسمع*
سعفه بنسيم******

معبودي وبس حبك أريد**
شما تلچمني ادموعي أهيد**

يا سعادة.كل حياتي. بگلبي اشوفك.معبودي*

يا اول نحر ايحب لچمه**
واول طف اتباها ابدمه**
بس رايد من عطرك شمه**
وانته رحيم*



علاء المياحي
الفاتحه لروح والدي

مرني طيف وحلم*
بجرحك ارد افتهم*
مختنگ يا نسم*
وارد اشمك

يا جرح ما برد*
بيهّ لچمة مهد*
حسرة ام الولد*
گلبي يمك

روحي تهمس همس**
شنهي گلبك يحس**
عن سوالف امس**
وعن الخيام

عن نسه امترّبات**
راحن امسلبات**
وگفن امدنگات**
بساحة الشام

چويني ابدمعي ارد ابچي..واحرگني ابضعن الراح*
سولفلي اعله ام عبدالله..هم نامت لو ترتاح*

يالشايف لون الغربه ويالساحگ درب ابعيد**
يالضايگ طعم الوحده تشعر بالضل اوحيد**
يالرضا................يالرضا
......................
يا رؤف الگلب*
فكلي حزنك واطب*
طشني دمعه ابدرب*
للسبايه

هوه هيچ العشگ*
كون اريد احترگ*
بدمعي كون اختنگ*
عالضمايه

بگلبي طفكم خظر**
بروحي شبّ وكبر**
حزني يجري نهر**
عايش وياه

ونستي بالدمع**
راحة من انوجع**
منّه ما ينشبع**
لذتي الگاه

لو هيچ الحب لو ماكو..ما اشبع من حسين*
أرتاح شما اتعذب..وين انه وحزنك وين*

يالعايش كلشي اگبالك ركضت عمتك والنار**
دليني اجروح التوجع علمني اشلون احتار**
يالرضا...................يالرضا
...............................
بيّه صرخت طفل*
بنحره غافي النبل*
ودمعة امه تهل*
من تشوفه

الوجهه چنه صبح*
شعرّفه بالذبح*
سهمه كلش وكح*
ما يعوفه

بدر الاربعطعش**
طافي ضيه عطش**
لا مهد لا نعش**
ثغره عطشان

العمره نسمة هوه**
بالسهام انچوه**
يابس وما روه**
الچنه ريحان

وامه من الخيمة اتلولي..ساكت حسبالي ارويت*
لا ماي ولا عبدالله..بزري امغمض رديت*

واعيونك يالغالي ذبلانه گلبي يحير**
بحضيني انته اغفى شدرّاني هيچ ايصير**
يالرضا....................يالرضا
...........................
مچفي فوگ الارض*
جدك وبيه يرض*
حافر ومن غمض*
بعمتك اشلون

الحيله باگه الضمه*
وجسمه وشّل دمه*
حرگو امخيمه*
وبيه يسلبون

رمحه صاير وطن**
عينه صوب الضعن**
راسه لبنيته حن**
شابع ادموع

ذبحو البسمله**
يالرضا ابكربله**
فرفحت كل هله**
بدوس الضلوع

معقوله الورد الجوري..بالهيمه اشلون ايطيح*
سارح شعره اعله امتونه..واتراب ايترسه الريح*

واليعطش يروونه يشرب من يطلب ماي**
بس جدك ضل ضامي وما هدّ يم طوله فياي**
يالرضا.................يالرضا
.............................
يالرضا ابغربتك*
عايش ابوحدتك*
كربله شربتك*
نهر الاحزان

بيقضه وابصفنتي*
سارح ابحيرتي*
واشرگ ابعبرتي*
گلبي عطشان

والخيم لچمته**
حزني يا لذته**
فارش الطيحته**
للوگع روح

اليهوى طبعه بچي**
بدمعتي شگد حچي**
بالجزع ارتچي**
اشبع ابنوح

وادموعي اتغرگ عيني..وابصدري اللوعه اتفور*
وافزعلك يا ابو الدمعه..بجروحك روحي اتزور*

واعيوني من يبچن دمعاتي تصير اخيام**
مفهومي بس لوعه عاشت بحساسي الشام**
يالرضا....................يالرضا



علاء المياحي
الفاتحه لروح والدي

#شور_يبني_اشبيها_هاي_الناس
🎤 ملا جوادالباوي
✍️ الشاعر علاء المياحي
🕌 قافلة اهالي المدينه
⚫️المشايه المقدسه:الحله
رابط قناة ملاجواد الباوي ☟☟☟
@Jawad12121212

يا زهراء...يا زهراء....يا زهراء
...................
شجاب السوط للجوري اوصل يمّه*
جنح فراشه مگفاچ وشبع لچمه*
رزق الچان من الله يفرفح ليش*
حيلچ راح من ضلعچ نزف دمّه*

يكسرة خاطر حسين**
السياط اندلتچ وين**
وانتي بنص گلب حيدر**
مدري اسكنتي بالعين**
يا زهراء....يا زهراء....يا زهراء
..................
يا أول صليب اليختنگ نفسه*
يأول شيله ضاگت نار والرفسه*
معقوله الخيال ايخنگه ثگل الباب*
ونجم اسهيل سوط ايلوحه وايلمسه*

يجرح ايگوم وايطيح**
وأخ ايشيلهه الريح**
عجيبه يا سبب كلشي**
يفضه صوتچ ايصيح**
يا زهراء....يا زهراء....يا زهراء
.....................
مالت الله انتي وثوبچ اتشلهب*
بيا حيل انتچت من شافتچ زينب*
والي ايشوف امه عالتراب ايصير*
ظهره اهلال محني لو مشه وحدب*

تره البت تنوجع حيل**
تضل اتنوح بالليل**
اذا واحد سطر امها**
ولون اعيونهه ايهيل**
يا زهراء....يا زهراء.....يا زهراء
.....................
شينومه الليل لو واحد جرح صبعه*
اشحال الباب ثالم وصله من ضلعه*
حتى الهدم يوجع من يريد ايگوم*
مدنگ لو گعد حتى الهوه ايوجعه*

مو بس صدرچ انصاب**
المحسن ماخذه الباب**
شفتي الموت چم مره**
عشتي ابنار الغياب**
يا زهراء....يا زهراء....يا زهراء
......................
على اعيونچ حلم ما كامل ورحتي*
يبعد العافيه الفوگ الترب طحتي*
انتي اول جرح ما يقبل ايطيب*
خذيتي الضحكه من اولادچ وشلتي*

بجرحچ بيّن الشام**
بابچ خظّر اخيام**
والمحسن رسم نبله**
وطفل ينباگ بسهام**
يا زهراء......يا زهراء....يا زهراء
........................
يواهس كل دمعنه ولذة الونه*
وسوالف نوحنه الما ينشبع منه*
قريناچ ابتراتيل العشگ والنوح*
شحلات اجروحنه المنچ مثل جنه*

حزن من عندچ انريد**
وهذا الكلش ايفيد**
رزقي اگلوبنه اللوعه**
وجرح ما نقبل ايهيد**
يا زهراء....يا زهراء....يا زهراء



علاء المياحي
الفاتحه لروح والدي

✅ : شور
🎤 : ملا علاء التميمي
📝 : علاء المياحي
🎙 : الذاكر حسين الجواد
🕌 : بغداد/الحسينيه/هيئة شباب القائم
🗓 : مجلس لتعجيل الفرج
@majalesmullaalatemimy
اللهم عجل لوليك الفرج 🤲

مشاهدة "اشكد ضحكو هواي||ملا علاء التميمي||علاء المياحي" على YouTube
https://youtu.be/Hf46DIClroc

🎶 ( ياعلي يبن موسى الرضا )
🔥 . شور
🎤 ملا عادل الصنگور
الذاكر ملا مصطفى المالكي
✍كلمات الحبيب الشاعر علاء المياحي
🚩 هيئة الشيب الخضيب

بعادات العرب زحمه المره تنطگ*
بس متن الزچيه من السياط ازرگ*
يگولون الجروح اتطيب من تعتگ*
بس جرحچ خظر من ينلچم يشهگ*

يالطولچ نفس وايخنگه ثگل الباب**
ويا شيلة التفرفح من حچه العطاب**
شارة الله انتي وطيحوچ اشلون**
والبسمار ماخذ حيلي حدر اتراب**

الوادم هسه يغفون***
وانه ادفن بالعيون***
هضيمه
ادفن بيدي الاحباب***
واهيل اعليهم اتراب***
حريمه
............................
بمچان الگعدنه اعيوني تتلفت*
عالمحسن نسولف واذکر ابتسمت*
يا نعمه الچفوها ابسرعه واتبدت*
اتخيلهه هيچ من الوجع عثرت*

يا وادم مره وترسو متنهه اسياط**
واجروح الحرگ ما يرهم الهه اخياط**
يا حرمه الگبلها اندفعت اعله الگاع**
اتخيل بچيهه وگلبي فزّ وشاط**

زلمه اعله الحرم صار***
يحرگ بيتي بالنار***
مصيبه
وبس تتفرج الناس***
اعله بيتي شلون ينداس***
عجيبه
........................
چنت انشد عليهه شبيهه تتعثر*
ثاري امن الجرح عالممشه ما تگدر*
والمكسور ضلعه ابروحه يتحير*
يضل الليل كله من الالم يسهر*

شما اسأل تگلي جرحي كلش زين**
تشهگ بس تشوف امدنگ ابني حسين**
من تنزل دموعه المختنگ يرتاح**
تحبس چانت الدمعه ابرموش العين**

الچانت سلوة الروح***
تالي يشبع اجروح***
متنهه
ليش الاعشگه ايموت***
عمري ايشيله تابوت***
بحزنهه
.......................
هيه السالفه الخلت دمعتي دم*
ماخذهه الوجع بس يمي تتبسم*
من طبعه التلچمه اجروحه يتألم*
حاله اشلون بالله الضلعه يتهشم*

الچانت تنطي للدنيه طعم واللون**
دفنتهه والغرب اسمعهم ايشمتون**
وجود الكون كله الخاطر الزهراء**
واسياط الغرب تچوي ابمتنهه اشلون**

ازتهه ابهدوة الليل***
خذت من راحت الحيل***
واماني
احس ارويحتي اتحوم***
عليهه وترفض اتگوم***
واتاني
..........................
رجعت وظهري من هذا القهر حدّب*
كبرت ابليله وحده والشعر شيّب*
محتار اشأگولن لو تفز زينب*
من تسألني بويه شخيرك امترب*

شگول وامها حدر الگاع هسه اتنام**
راحت من وكت والضل سراب احلام**
هيهات اليموت الاهله بويه ايعود**
ضلي الوحدچ لمّن يجيچ الشام**

حلم الما كمل ضاع***
صاير حصة الگاع***
يروحي
بس ادموع العيون***
وصور من لون المتون***
وجروحي



علاء المياحي
الفاتحه لروح والدي

بس طحت ضامي*
الدنيه مطرت غرب*
وانته فوگ الترب*
والخدر راح*
.................
بذيچ الشفاف اتغزل الماي ابعطشهن*
بذيچ العيون يلمع الشيب ابرمشهن*

طايح وحار الرمل يشرب جمال اخدودك**
وانته ناسي الدنيه كلهه اتسولف المعبودك**

من چانت الدنيه عطش طولك نده واچفيته***
احتازو وچفك رفعته وخنصرك مديته***

نشفتك الهاتك*
وانچفه كل نهر*
وخظّرت بالقدر*
والدمع طاح*
......................
يزحف الشوگ دوب يا دوب الخيمكم*
وحسبت اسهام بين العيون وضعنكم*

والسهم متونس وداخ ابحلات اعيونك**
والحوافر فزعت ونصبت عرس بمتونك**

والهوه اينرفز خيالك من يجيس الخيمه***
بزحمة اصياح وركض باگو تراچي ايتيمه***

شما ردت توگف*
الرمح يعترض*
وتوگع اعله الارض*
والجرح صاح*
..............................
ارتاحت الخيل وارتوى ريج الحوافر*
بردت الگاع وانتشت عين الخناجر*

خجّلت عين الحوافر من فتحت اضلوعك**
واستحى لون الشمس لمّن شعلت اشموعك**

والترب حيله انثنه لمّن صبغ شيباتك***
وخلگك ايسولف قهر من ركضن ابنياتك***

تمنن اعيونك*
تنظر اعله الخيم*
يهدهه لحظه السهم*
وذيچ الرماح*
...........................
فرفح الريح من سمع نشغة رقيه*
هيچ تاليه امطشر وصدرك اليّه*

تالي ما تالي الورد يسحگ فرس بچتافه**
يسولف اشلون وسهم خيّط حلاة اشفافه**

والغرب باگو عرفنه وتهنه بيهه الديره***
بس نسه وذاك السلف يچويني وانه ازغيره***

يا وطن سافر*
بين زحمة سبي*
وحيره مالت عبي*
وكل الجراح*
................................
چانت النار صلفه وابعازت عبايه*
وطول الخيام يستحي لو ماكو رايه*

وانتهه كلشي وحچه صوت الوداع ابروحك**
واركبت فوگ الرمح خاطر تشوف اجروحك**

الهزل باگت حياتك لا عطش لا منحر***
وارفعت ايدك توادع من مشن صوب البر***

والدمع نازل*
بيه هواي البچي*
شال كل الحچي*
والحزن لاح*



علاء المياحي
الفاتحه لروح والدي

يا رقيه

نايمه وشفتك تگلي هنا تعاي*
لسه عطشان وردت يبنيتي ماي*
أذكرك كل ما انام**
وانته تزحف للخيام**
ياحسين.......ياحسين
..........................
سكتت اصوات اليتامه وسلهمت عيني وغفيت*
شفتك وعبدالله بيدك شايله ابحلمي واجيت*
حظرت صدري الشبگتك بس شفت گوه مشيت*
چنت حسبالي من اشوفك زين والماي ارتويت*

ثاري بعدك والعطش لسه هذاك*
شلون تشرب والسهم بعده بلهاك*
ونامت بصدرك سهام**
وانته تزحف للخيام**
ياحسين.......ياحسين
.......................
انطيني اخوي اشويه اشيله گلبي طگ بويه عليه*
هاي أول مره اشوفه ليّه ما يفتح ايديه*
يناغي چان من ارد اشيله ايفرفح من اتعنه ليه*
انه اوعدك ما الچمه وسهمه ادري شسوه بيه*

أدري بويه النبله من جاسته شاط*
هواي رفرف وانفتح حتى الگماط*
والدمع بعيوني هام**
وانته تزحف للخيام**
ياحسين.....ياحسين
......................
چنت اتاني الليل ينزل خاطر اتعنه واجيك*
ووصلت بس اشلگيتك كلشي ما خلولي بيك*
چنت انازع وانه اشوف الخيل من داست عليك*
طشروك وانته جوري وباگو اوصيله من ايديك*

شلون احظنك وانته داستك خيول*
وطولك النعناع باگو منّه طول*
السحگ مسك الختام**
وانته تزحف للخيام**
ياحسين....ياحسين
............................
واحظنت صدرك واسولف اي رقيه أنه هاي*
بويه گلّ العمي يرجع ما تريد اسكينه ماي*
بيا وكت ياغالي عندي سوطهم يندل گفاي*
حرگو الخيمه وشردنه وزلمه ضل يركض وراي*

صاح واحد حيل ضربوها البنات*
ذني ابوهن راح والعباس مات*
لا اهلهن لا عمام**
وانته تزحف للخيام**
ياحسين.....ياحسين
............................
شگد خفت والدنيه ظلمه ياهو المطفي ضواك*
ردت اجر سهمك يبويه ثاري طالع من گفاك*
راسي خليته اعله صدرك ياهو من عندي خذاك*
وچنت اريد اشكي واگلك الاخذ ذهباتي ذاك*

هيچي معقوله الجسد عالتربه طاح*
وراسك اگبالي اشوفه اعله الرماح*
واسمع ايگلولي شام**
وانته تزحف للخيام**
ياحسين.....ياحسين
..............................
ليل ظلمه وانته غايب والوكت ماهو امان*
والخرابه هواي وحشه شلون فرّ بيهّ الزمان*
عوتني ابصدرك اغفى تالي انام ابهالمكان*
كلشي راح الچنت احبه وراح وياك الحنان*

شما نمت اتخيل اتگلي اجيت*
يارقيه الشوفتچ بويه ضميت*
تالي افز والگاه منام**
وانته تزحف للخيام**
ياحسين.....ياحسين



علاء المياحي
الفاتحه لروح والدي

مشاهدة "مرت سنه / كلمات علاء المياحي" على YouTube
https://youtu.be/txMSFWnl9xI

زراك امتونچ لو لون السمه*
جمال اجروحچ محد يفهمه*

محد يعرفه..يتبده لطفه.. ويشتل بينّه احساس**
عشنه سهاره..حبچ سماره.. يخّظر مثل الياس**

يهنياله البچت عينه اعله خدر الله***
يغصن الما كسر فيّه وذبل غفله***
.................
بجروف اعيونچ يتگوطر دمع*
كسر خلگ الله ما كاسر ضلع*

گاطعله زهره..وچافيله گمره.. وساطر خد الليل**
تبديتي حيره..وانتي الاميره.. طحتي سوالف هيل**

وسط زحمة حطبهم نفسچ اتحير***
وگعتي وصدرچ اتلگه الدفع منحر***
....................
زغيره اسنينچ وانطشن نذر*
لگينه احزانچ تچوينه جمر*

جرحچ يلمنه..خظر عشگنه.. دمعه ولوعه ونوح**
نسمع وگعتي..معقوله وانتي.. بیدچ هاي الروح**

يكلشي ابأيدچ ومُلگچ قدر محكم***
اليعرفچ مالت الله بالحشر يسلم***
.....................
هوينه الدمعه وحبينه البچي*
التسولف عينه احلا من الحچي*

عالسمع ذبنه..ولمن فطنه.. كبرت بينه الآه**
شمحلاته اسمچ..جنه نرسمچ.. نموت ونحيا وياه**

القلوب الما تشوفچ عميه ما شافت***
يمملكة الضوه اعله الفطره نتهافت***
.....................
يموت احسله الما عاشچ جرح*
الورد تكوينه يموت اعله الصبح*

شله ابحياته..كل عمره فاته.. الما يعرف معناچ**
الما تبچي عينه..شله ابسنينه.. ايموت الما يهواچ**

لذيذه الدمعه من تنزل عله الزهره***
صحارى الدنيه بس گاع العشگ خظره***



علاء المياحي
الفاتحه لروح والدي

▶️ :. كعده ...
💔 يازهراء
🎤 : سيد ستار الحيدري
📝 : علاء المياحي
🕌 : حسينيه وموكب قمر بني هاشم (ع) بصره_كرمه علي
@kmabn

#علي_الخادم

كل عام اگولن تجي..وافرش حلم لعيونك*
ثاري انته شابع عطش..وحافر فرس بمتونك*
واحچيلك اعله الضلع**
وتحچيلي عن الصبع**
يا حسين ...... يا حسين
...........................
كلما يمر حول انتظر*
تغبش على ليلي فجر*
امچانك اهنا بالحضن*
ما لايگ الطولك گبر*

لمّ روحك اصواب وجرح*
يمطشر وشابع ذبح*
مشتاگه ليكم يا ترف*
يمه الگبر حار وملح*

مشتاگه يبني ارجعلي خليني ارتاح**
خليني اسولفلك على اوليدي الراح**
واحچيلي عن راسك صدگ فوگ ارماح**
واوليدك ايگلولي بحضينك طاح**

تتعده يبني سنه..وامتانيه اترجعولي*
چم سنه بعد انتظر..لو ما تجي گلولي*
والينتظر ينوجع**
وتحچيلي عن الضلع**
يا حسين........يا حسين
.........................
كل جمعه تحضني چنت*
گتلي اردلچ من رحت*
مخنوگ صوتك بالالم*
وبالليل يم گبري نمت*

وامشيت عني وگلبي حس*
بصدرك گلت يسحگ فرس*
والخيل تصعد عالورد*
ومحد يگلهه كافي بس*

ارجع واسولفلك شني سوه الباب**
حتى انته تحچيلي اشفت چم امصاب**
سولفلي عن نار الخيم والعطاب**
ليل اختك اشلون الگمر عنه غاب**

خليني بيك التهي..وانسه جروح امتوني*
نسيني جرح الصدر..يحسين من دفعوني*
عندي البواچي طبع**
تحچيلي عن الصبع**
يا حسين........ يا حسين
..............................
تحچيلي عن سهم الولد*
لاوي رگبته الامه رد*
غالي الضنه يبني اشكثر*
واشلون تشبگ بالمهد*

بالبيت چان اشگد دفو*
وچا صار هم عندك اخو*
يوليدي والتفگد ضنه*
بحساسهه يعرف منو*

هم مثلي گالو فزعو اعليهه ابنار**
وانه ادري بالعدهه ولد بيه تحتار**
اشلون بالتحمي ضعن كله ازغار**
والخيل ما تعرف شني ازغار اكبار**

انه ادري باليحترگ..تفزعله كلهه الوادم*
ومحد عليهم فزع..وانته ذبيح ونايم*
واصياحهم ينسمع**
وتحچيلي عن الصبع**
يا حسين......... يا حسين
..............................
مثلك شبعت من الالم*
بسمارهم چنه سهم*
يحسين دفعوني وطحت*
وبابي احترگ مثل الخيم*

بالليل دفنوني الاهل*
بس انته جسمك عاري ضل*
يوليدي طايح عالترب*
من كل كتر دمك وشل*

الگاع تلچم جرحك انهار وليل**
متوذر وداست على اچتافك خيل**
ذبحوك عطشان وفضت شوگ وحيل**
ايسيل عطره من يمردونه الهيل**

متروس صدرك نبل..والشامت ايهز ايده*
بالهيمه اختك مشت..والشام حيل ابعيده*
بهداي تنزف دمع**
تحچيلي عن الصبع**
يا حسين....... يا حسين
............................
من چفك الخنصر نقص*
طحت وعذابك ما خلص*
مشكوله ذمته الي سلب*
من گلبي وصله چنه گص*

ارجعلي كافي من الغرب*
وامسحلي دمعاتي التصب*
نلتم مثل لمة گبل*
محلاتك البیتي تطب*

جيب اختك الشام اشكثر بيه شمات**
يمه الخرابه بلا غطى شلون تبات**
يضحكون ويسمعوها هاي اخت المات**
رجعولي كلكم وانسو كل جرح الفات**

خلينه نرجع سوه..تطيبون يمه اجروحي*
وانريد لا ما نفترگ..انسه العذاب ونوحي*
نرجع سوه ننجمع**
تحچيلي عن الصبع**
يا حسين....... يا حسين



علاء المياحي
الفاتحه لروح والدي

مشاهدة "عاشكلي امير الملا علي الزيدي . هيئة العقيلة زينب ع" على YouTube
https://youtu.be/mr6qa4lgHLc

زهراء......زهراء....مظلومه يازهراء
......................
انعمله الغيمت الدخان..فزعت لمنه من دخلو**
ذوله الناس مو خيرين..بويه امن امي ما خجلو**
بس اهيه واجوها اهواي..طاحت واشكثر ضحكو**
طاحت امي حدر الباب..وامن الدوس ما شبعو**
زهراء.......زهراء........مظلومه يا زهراء
.....................
بويه امشيت واتبعناك..ومشيي المنكسر گوه**
رد وبيده شايل سوط..ولو لايحني چان اشوه**
زلمه واحنه بس اثنين..ابمتن أمنه شني سوه**
اعلينه الناس يتفرجون..وام الحسن تتلوه**
زهراء........زهراء......مظلومه يا زهراء
...........................
انه اچفوفي حيل ازغار..وجرح امتونهه اشكبره**
مخنوگ وشفت بالعين..بخدهه اشسوت السطره**
بلون المغربيه صار..خد امي شفت حمره**
گامت وانچفت عالگاع..وصعبه عالمره العثره**
زهراء........زهراء........مظلومه يا زهراء
........................
لميت الدمه امن الگاع..لون التربه صار احمر**
الجرحه ابصدره يمشي اشلون..الجرت نفسه ما يگدر**
محنيه مشت مولاي..خطوه وخطوه تتعثر**
واتأشر عليهه الناس..باگت ورد واتطشر**
زهراء......زهراء........مظلومه يا زهراء
.......................
چانت عاده بالعربان..لو طاحت مره تفزع**
شمعنه الزهره فوگ الگاع..وترس اذني الضحك اسمع**
شبعنه امن الشماته هناك..وامن الدمعه ما نشبع**
واجروح اشكثر بالدار..شلون البيتنه ترجع**
زهراء........زهراء........مظلومه يا زهراء
........................
شفت ابعيني كلشي الصار..وگالو يالحسن انسه**
شنسه المحسن وبسمار..لو طيحتهه والرفسه**
خزن جرحي حد اليوم..شلون انسه الحرگ هسه**
زينب بويه والعطاب..وحسين اختنگ نفسه**
زهراء....... زهراء.....مظلومه يا زهراء




علاء المياحي
الفاتحه لروح والدي

▶️ :. نزال ...
💔 وامحسناه
🎤 : سيد ستار الحيدري
📝 : علاء المياحي
🕌 : حسينيه وموكب قمر بني هاشم (ع) بصره_كرمه علي
@kmabn

#علي_الخادم