باعي حتى نجي نحچي لازم نعرف شي.. الانسان كلما يكبر كلما تتغير قناعاتة وكلما يتأقلم ع الشي اللي عندة
انا بعمر ال٢٠ مو مثل ورا ٧ سنين اتغيرت واتغيرت افكاري والاهم من كل هذا انو انا اتأقلمت انو هاي حياتي وما راح اگدر اغيرها بس لانها مو عاجبتني…

وللأمانة مهنة الطب تختلف عن دراستة نظريًا..يعني من جنت طالبة انا اشوف بس الكتب والامتحانات وصحيح اي جنت اداوم بالمستشفى بس دوامي يقتصر انو اسولف ويه المرضى فقط وما اتدخل بعلاجهم بأي شكل من الأشكال
من تصير مهنتج ووظيفتج ترجعين شخص راح يموت ورا ثواني للحياة ومن تشوفين شخص حيييل متأذي وتركضيله لحدما يصير زين ويندعيلج هنا راح تصير عندة طاقة ونعمة اللي هي نعمة العطاء.. محد يتخيل شكد العطاء يفرح الانسان
احنا اغلب شغلنا اللي نسوي يكون فوك واجبنا المطلوب من عدنا يعني بس لأن ما گدرنا نعوف المريض نبقى ورا ما يخلص دوامنا الرسمي.. بس لان خفنا ع المريض نروح نسأل علية ونسلم عليه ونشوف شلون صحتة ونفرح اذا زين وكللش نضوج ونضل ايام نسولف بالسالفة اذا مات او صار مو زين


ورا ما داومت اقتنعت انو دراسة الطب اي صعبة جدًا بس هي مهنة عظيمة وضليت اتمناها تكون الي سبب ادخل بيها للجنة..
مهما كانت متعبة.. دوامنا حيل متعب محد يتوقعة الا شخص عايش ويانه بالبيت ويشوفة بس احنا اتعودنا عليه واتأقلمنا عليه
وبالاخير انا متيقنة انو رب العالمين هو اللي ساعدنا نحب مهنتنا ونضحيلها وانو الله يختار الاشخاص لكل مهنة..

- الرساله ؛ اريد اسأل اسئلة
اني دوممم دتصيرلي عراقيل من دخلت طب لليوم مستحيل سنة ما اتبهذل بيها واكتئب لدرجة احسني مطرودة من رحمة رب العالمين حاشاه بس هيج افكر
بالسادس جان معدلي 94 وعدت وانشلع گلبي يلا حصلت ال98.67 ودخلت هاي مو بزمن التقليص قبلها بسنة
ووبديت مرحلة اولى واكتئبت كل شي ماافتهم صرت ثانية ونجحت بالثانية طلع دور ثاني وحملت مواد رحت ثالثة وهم طلعت دور ثاني ورسبت باثنين ممن الثالثة وتحميل واحد من الثانية وعدت سنة كاملة على ثلث دروس واني محافظات وهم رسبت باثنين دور ثاني ونجحت بيهن داومت رابعة واني مكتئبة وماتحملت تبقى اقسام ظليت اروح وارجع واوصل بال7 بليل لحد ورا شهرين قررت اسوي تأجيل سنة واجلت سنة كاملة
وراها بعطلة اخر السنة قررت ان انقل وماارجع لنفس الدائرة انقلت وياريت ماانقلت العراقيل الي صارتلي والامور ورجعوني سنة رجعوني للثالثة وقبلت وورا شهرين كالولي لا تبقين رابعة ورجعت واني ماقارية نسائية باقي بس اسبوع عالفاينل قريت وكدرت انجح ونجحت بالوراهن كلهن لنهاية السنة عرفت ان عندي طب مجتمع لازم امتحنه واني المفروض استوفيه وعلى الرغم اكو بنات غيري قبلي بسنة انقلوا وبنفس الجامعة وياي الا اني تصيرلي كل العراقيل وراها طلعت دور ثاني طب مجتمع وسعيي صفر من اربعين والدكتوة ماقبلت حتى تخليلي 3 درجات عالاقل باليومي ونجحت بي بالدور الثاني وهسة اني خامسة وكل المواد جيد الا عملي الباطنية راسبة واني متاكدة 100‎%‎ اني ناجحةرواعرف نفسي مجاوبة
كرهت الطب واليوم اللي عدت بي سادس احس هذا عقاب من رب العالمين لان مااقتنعت بالسنة الاولى بمعدلي

باعي
محدثتج وصديقتها اللي سوينا هالقناة ثنينا كنا نعاني هالمعاناة
ماكو سنة تمر علينا طبيعي لابد صعوبات وازمات.. بالنسبة للاكتئاب ما فارقني كل سنيني بالطب.. اتغيرت شخصيتي وصرت اكثر سكوت وكارهة للدنيا
انا مثلج عدت سنة بالسادس وهم مرات جنت اكول لو راضية بمعدلي اول سنة وساكتة
بس خل اكلج شي.. كل إنسان بهالدنيا (بدون استثناء) اله اختبار معين بهالحياة.. هو هاي الغاية من حياتنا الله يمتحنا ويشوف شلون نتصرف ويحاسبنا ع هالاساس
ف كلنا عدنا امتحانات وتختلف صعوبتها ع حسب اللي نتحملة هو رب العالمين يعني ما يخليلنا امتحان اكثر من قابليتنا لان يدري كلش زين راح نكدر نعدي

الاحسن من هذا كله انو الدنيا ماشية ما توكف.. اليوم رسبتي، الدنيا والوقت يمشون وتنجحين السنة الوراها
صدكيني هسه وبعد تخرجي عرفت انو الرسوب مو نهاية العالم وانو عادي ما اموت اذا رسبت صح اعاني بس تعدي وتنتهي

واتأكدي انو الله كاتبلج العوض..
تدرين..رب العالمين ورا ما يختبرنا اختبار قاسي وصعب علينا داااااائمًا بالنهاية يكتبلنه عوض.. يعوضنا بطريقة يخلينا ننسى اللي صار ،لا ونضل نحمدة ونشكرة ع الامتحان

ولهسه
الابتلاءات مستمرة علينا
بس كلتلج انا مدام مسلمة وعايشة ف متيقنة انو لابد اكو امتحان من رب العالمين
ف دائمًا كولي الحمدلله

ويمكن تكون هاي فرصة من رب العالمين حتى تتقربين منه اكثر
لان احيانًا الغاية من البلاء هو التقرب لله

والله يوفقج يا رب ويكتبلج الخير ويسهل طريقج🩷

- الرساله ؛ حبيبتي اهواي شكرا على كلامج اهواي طمني🤍 يارب يوفقج وينور طريقج ويكتبلج الخير بكل امور حياتج

تدللون قلبي💘

- الرساله ؛ ايمت حسيتي كمتي تحبين شغلج صدك ما مثل البداية من كل شي غريب وجديد

من داومت بالمستشفى

يعني من بداية التعيين مالتنا

اتغير كلشي

- الرساله ؛ ما شاء الله ، الله يزيدچ من علمه
بس جان سؤالي هيچ لان شلون جنتي تدرسين وانتِ ما متقبلته لان اعرف دراسة صعبة نوب واحد ما متقبله بس شوية دامر بنفس سالفة بس مو طب 🙏

كلتلج الله يكتبلنه الطريق المناسب النا ويحببنا بي🩷 وان شاءالله الج بالمثل يا رب

ما چنه نحب الطب ولا متقبليه وچنه نحس بالندم حرفياً بكل لحظة مرت علينه من اول مرحلة لحد التخرج..
لحد ما تعيننه ومثل ما كالت زهراء اكتشفنه شكد هالمهنة عظيمة وانو احنه مكتوبلنه هالمكان وما راح نگدر نشتغل بأي شي ثاني.
شعور انو ترجعين انسان للحياة اهله جانوا فاقدين الامل منه
لو شعور الانجاز.. انو انتِ جاي تسوين شي.. جاي تقدمين شي چبير للناس، كل يوم وبكل لحظة تمر عليج
لدرجة هسه صارت تتعب نفسيتنه اذا بقينه يوم بالبيت😂 انو شنو يعني اليوم ما راح اسوي شي؟ اعتبر ماكو اي انجاز بحياتي بيومها.
ف بنهاية الطريق راح تكتشفون انو هالمكان مكتوب الكم وهالطريق بيه خير الكم.. اياً كان قسمكم

والموضوع ينطبق ع الحياة بصورة عامة بكلشي راح تكتشفون اكو خير بالنهاية ورب العالمين رتبلكم الطريق بدون ما تحسون.

- الرساله ؛ ما شاء الله ، الله يزيدچ من علمه
بس جان سؤالي هيچ لان شلون جنتي تدرسين وانتِ ما متقبلته لان اعرف دراسة صعبة نوب واحد ما متقبله بس شوية دامر بنفس سالفة بس مو طب 🙏

- الرساله ؛ هذا سؤالي جاوبيني عليه بلا زحمة

وهذا جواب اخر

.

خلصنا روتيشن شباب
هسه داخلين بالتدرج الطبي(قرى وارياف)

وما چنا فرحانين من خلص الروتيشن
احلى ايام عشناها بي واحلى ذكريات..
بس بعد هاي حياتنا ما بيها روتين.. وكل فترة لازم ننتقل لمكان جديد ومسؤوليات جديدة واشخاص جدد..

اتذكر هذا المريض
جنت بردهة الجملة العصبية اتور في يوم عشوائي كدا يعني أقيس الفعاليات الحيوية للمرضى صباحًا
وعادي شايله الفايلات ودخلت لوحدة من الردهات
سمعت مريض ولد شاب يصيح ولكم لحكولي هذا ما يعوفني( يقصد ع المرافق اللي وياه)
شافني دخلت كال انتي يالدكتورة مدري يالمضمدة تعاااالي ولج تعالي شوفي ما يوخر هذاااا
انه شفته منفعل ويصيح بشكل موطبيعي كلت خل اشوف المريض اللي بصفة حتى هذا المريض اطول وياه واشوف شبي
خلصت المريض اللي بصفة بسرعة ورحتله
كلت صباااح الخير.. ها شبيك ليش تصيح؟ شنو صاير؟ هو باوعلي وعيونه حمررررررر كلالي شنووو ولج انتي كتلتيني انتي بگتيني انتي اتفقتي ويه فلان وبگتيني يالحراميييية يالبواكةةةةة انه كتله عمي علكيفك بس خل اقيس ضغطك واروح هو كال روحيييي والله الا اخلي ثجيل يشوي ع ذاناتج بصل ويذبحج والله..
اتفقتوا عليّ وبگتيني ويريد يگوم يهجم عليّ انه اخذت شغلاتي وطلعت بسرعة😂 خفت منه كلت بس يهدئ ارجعله

ورا ساعة كلت بلكي هسه سكت لان ما قايستله شي وخاف يجي الاخصائي يتور وما يلگة الفعاليات.. المهم رحت هستوني خليت رجلي بالردهة هو صاح هااااا اجيتي ياا حرامية وضل يسب ويفشر ويريد يركض علي ولزموا اهله كلت هذا مخبل هسه يكتلني😂

بعدها اجة مريض جديد للردهة ولازم اروح اشوفة ف صحت لواحد من التمريض يجي وياي لان هذا ما ادري شيسويلي هو فعلًا مجرد ما شافني اتهستر وضل يصيح ويضرب الحايط انا كملت المريض والممرض اشرلي انو يلا دكتورة استعجلي لان هذا اتخبل.. اخذني وطلعنا كال والله قبل شوي زين ما بي شي بس من شافج ضل يصيح😭
المهم تركته بعد بس وراها هو ضل ما يقبل يكعد بالردهة وضل كاعد بالممر واهله لازمي كلما يشوفني يكلي الزمج الزمج وين ترحين عني ويأشر بطريقة عبالك انا صدك مأذيته
واذا اريد اروح للردهة اخذ وياي ممرض اخاف منه صدك
وراها بالليل اجيت اتور نايت تور وصلت للي بصفه الحجية كلتلي ها خالة مساع خبلج كتلها اي والله اخاف يهجم علي لو يفشر😭 هي كلتلي چا انا لزمني من حجابي وجرني گوه اهله لزموه
انه هنا كلت لا هاي هي بعد الله يستر

وصلت يمه بس جنت متوترة وما اكدر اتجاوزة بس بنفس الوقت كلت انطي الجهاز لاهله همَ يقيسوله المهم ما يشوفني.. فتحت شوية من البردة واشرت لاهله كتلهم قيسوله واروح هو حجة هذا المرافق اللي وياه كال دكتورة تعالي دخلي ما يسويلج شي(حجة بصوت عالي) انه حجيت بصوت ناااصي كلتله لا ما اريد بس قيسو الضغط واروح هو سمع
كال بهدوء تعالي دكتورة كلشي ما اسويلج چا انا شنو مسودن؟ وباوعلي كلتله لا حشاك مو مسودن( بعدني خايفة😂) كال انا صحيح مساع غلطت عليج واذيتج صحيح حقج انتي..ويباوع لاهله يكلهم صحيح انا اذيتها مساع.. اكو مره بصفة كلتله اعتذر منها حسن اعتذر كلالي انا اسف.. كتله لا عادي ماكو مشكلة بس اهم شي ما تعيدها بعد ..مو؟ هو باوعلي كال لا ما اعيدها

عفته ورحت وورا شوية هم اهله صاحولي هو مجمد نفسه ومنفعل وحرفيًا يسوي حركات مو طبيعية وما تدرين بأي لحظة يضرب لان عيونة حمرررررر ووجهه احمر بس متجمد
المهم يعني هو قبل لا يوصلون للتشخيص النهائي مالته بالليل اهله وقعوا ع مسؤوليتهم وطلعوا كالو راح ناخذه للشيخ ابننا مضرور لو بي جني

للامانة خففوا عني هواي لان صدك جنت خايفة منه لا اهله ينامون وتجية الحالة ويكلي انتي بواگة مدري شبايگة منه😭