Җаваплылык!

Казан шәһәренең Мәскәү районында яшәүче Әскәровлар гаиләсе өчен бүгенге көн бигрәк тә истәлекле. Илле ел иңне-иңгә куеп яшәгән Вакыйф Әскәр улы белән Вәзилә Шамил кызы алтын туйларын билгеләп узалар.

Башта алар Казан шәһәре Мэриясендә булып, кайнар котлаулар кабул иттеләр. Аннан соң башкаланың 161 нче сайлау участогына барып тавыш бирделәр. Инде көннең икенче яртысында ресторанга – Коръән ашына юнәлделәр.
-Без гомергә сайлауга җәмәгатем белән бергә йөрдек,- ди Вәзилә Әскәрова. – Гадәттә, иртән беренчеләрдән булып килә идек. Бездә җаваплылык көчле – үзем бик күп еллар санитар табиб булып эшләдем. Иптәшем Вакыйф гади машина йөртүчедән башлап баш инженер, техник директор вазыйфаларына кадәр күтәрелде. Җаваплылык, эшне җиренә җиткереп үтәү – безнең гаиләнең девизы.
Гаилә башлыгы Вакыйф абый җәмәгатенең сүзен хуплап: “Бүген шундый сөенечле көн. Ике улыбыз, алты оныгыбыз янәшәбездә. Үзебез исән-сау, моннан да олы бәхет бармы?!

Журнал «Татарстан»

“Бәрмәнчек” ансамбле сезне көтә!

Россия Президенты сайлаулары уңаеннан , бу көннәрдә күп кенә мәдәни чаралар , концертлар бушлай. Яков Емельянов исемендәге мәдәни үзәктә дә бүген шундый күңелле чаралар каралган. Татарстан Республикасы керәшеннәренең «Бәрмәнчек» дәүләт фольклор ансамбле көн дәвамында ике тапкыр: 13.00 һәм 17.00 сәгатьтә концерт куячак. Керәшен мәдәниятен яраткан тыңлаучыларны көтеп калалар.
-Шулай ук мәдәни үзәктә атаклы рәссамнарның күргәзмәсен дә булдырдык,- диде Яков Емельянов исемендәге мәдәни үзәкнең директоры, Республика керәшеннәре Иҗтимагый оешмасының Башкарма комитеты җитәкчесе, Татарстанның атказанган матбугат хезмәткәре Белоусова Людмила Даниловна. - Бүген сайлауларның өченче көне. Шулай өч көн дәвамында тавыш бирү халык өчен бик кулай. Бүген иртәдән сайлауларга дип мин дә җыендым. Үзәктә төрле чаралар узачак, аларның барысында да катнашам. Районнарда яшәүче керәшен җәмгыятьләре белән гел элемтәдә, сайлауга гаиләләре белән барганнар.

Журнал «Татарстан»