👀Блогерның яше юк!

Буада яшәүче блогер Мөхәррәм Мөхәммәтҗановны күпләр танып беләдер. Җитмеш дүрт яшендә социаль челтәрләрне үзләштергән кеше ул. Мөхәррәм абый СССР Югары Советы депутаты да, икътисад фәннәре буенча докторлык диссертациясе яклаган галим дә, бөлгенлек дәрәҗәсендәге колхозны аякка бастырган рәис тә, тулы бер завод төзегән җитәкче дә, бакчачы да...

Мөхәррәм абыйның бүген ун меңгә якын язылучылары бар. Көн дә яңа пост язып элә, видеолар куя. Язмалары – көнкүреш, тарих, бакчачылык, үзе турында. Өч ел ярым дәвамында ике меңгә якын кыска хикәяләр (постлар) язылган.

Мөхәррәм Тимергали улы дүрт ел буена социаль челтәрләрдә биреп барган язмаларын алты папкага җыйган. Аларны тематикалары буенча бүлгән. Хыял-максаты – әнә шуларны китап итеп бастыру.
Журналыбызның февраль санында Мөхәррәм абый турында бик матур язма әзерләдек. Сезгә дә укырга киңәш итәбез, дуслар!

Журнал «Татарстан»

🏋️‍♀️Авылда заманча спорт үзәге?!

Тәтеш районының берничә зур авылында менә шундый заманча спорт үзәкләре ачылган. Бу пилот проект, ягъни республиканың башка районнарында мондый әлегә биналар юк.

Яңалык тәтешлеләрнең күңеленә хуш килгән – спорт үзәккә халык бик теләп йөри.
-Биредә хәтта ярты ставкага шәфкать туташы да эшли, - диде Тәтеш районының Келәш авыл җирлеге башлыгы Фәнил Галимов. – Спорт белән шөгыльләнгәнче, шәфкать туташы өлкәннәрнең кан басымын бер тикшерә, соңыннан янә карый. Кирәк икән, даруын да бирә. Спорт үзәккә мәктәп балалары да килә. Аеруча хатын-кызлар яратып йөри, алар безнең бик актив.

Дуслар, сезнең авылларда да мондый үзәкләр булсын идеме? Гомумән, спорт белән шөгыльләнәсезме?

Журнал «Татарстан»