رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الثالثة_والخمسون
#مريم_زكريا_الجزء_الثالث
#مريم_الجزء_الأول

اتكلمنا المرة إللي فاتت عن زكريا عليه السلام وإنه دعا ربنا إنه يرزقه الذرية الصالحة لما شاف إنه بيرزق مريم بنت عمران فاكهة الصيف في الشتاء وفاكهة الشتاء في الصيف،
وكان ده كرامة من ربنا لمريم بسبب كثرة عبادتها وزهدها وتعلقها بالله،
كانت مريم مختلفة عن البنات إللي في سنها، يعني كان جسمها بيكبر وبيقرب من البلوغ أسرع من البنات العادية،
وكان من عادة بني إسرائيل إنهم يحجّون لبيت المقدس،
يعني بيطلعوا في قافلة من مدن القدس ويتوجهوا من هناك لبيت المقدس لأن بيت المقدس كان قبلتهم،
زي ما المسلمين بيتوجهوا للحج في مكة👌
في يوم من الأيام لما كان عمرها حوالي خمسة عشر سنة
خرجت في قافلة مع أهلها لبيت المقدس وهي كانت من مدينة النّاصرة،
في الطريق..سابت أهلها وتأخرت عن القافلة لسبب معين،
"إِذِ انتَبَذَتْ مِنْ أَهْلِهَا مَكَانًا شَرْقِيًّا"
إيه السبب منعرفش بالضبط..ممكن يكون أصابها الحيض،
أو إنها كانت عايزة تطهر من الحيض...أو غيرها من أقوال العلماء،
المهم إن حصل حاجة خلتها تتأخر عن الناس إللي معاها وراحت وراء جبل قريب كده بس بعيد عن عنيهم،
"فَاتَّخَذَتْ مِن دُونِهِمْ حِجَابًا "
فهي كانت عايزة تكون لوحدها..وفجأة لقت قصادها رجل..فاتخضت وخافت 🙊
"فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا"
فكرت إن الرجل ده عايز يراودها عن نفسها أو عاوز يؤذيها
ويعمل فيها حاجة يعني،
فقالت له : أعوذ بالرحمن منك لو كنت من المتقين😰
لأن التّقي هو إللي بيخاف ربنا وخوفه من ربنا بيمنعه إنه يعمل أي شيء محرم👌
"قالَتْ إِنِّي أَعُوذُ بِالرَّحْمَن مِنكَ إِن كُنتَ تَقِيًّا"
فالرجل قالها: متخافيش الموضوع مش زي مانتي فاكرة أنا رسول من عند ربك عشان أوهبك غلام..طفل طيب وطاهر، هتكوني انتِ أمه.
"قَالَ إِنَّمَا أَنَا رَسُولُ رَبِّكِ لِأَهَبَ لَكِ غُلامًا زَكِيًّا"

☆قبل ما نكمل هنقف كم وقفة كده مع آيات القرآن نتدبرها 😊
♡ربنا بيقول 《وأرسلنا إليها روحنا》
الروح هنا المقصود به جبريل عليه السلام ..طيب ليه ربنا سمّى جبريل عليه السلام بالروح🤔
احنا كبشر بنتكون من حاجتين هما جسد وروح صح؟
إيه إللي بيحرك الجسد😁
الروح هي إللي بتحرك الجسد..يعني الروح هي السبب في حياة الجسد👌
جبريل عليه السلام هو المَلك المسؤول عن توصيل الوحي،
والوحي ده سبب في حياة القلوب...فالإنسان بيكون حي بحاجتين: حياة جسدية وحياة قلبية👌
الحياة الجسدية كوووول الناس بتشترك فيها حتى الحيوانات بتشترك في الحياة الجسدية دي،
لكن الحياة القلبية دي خاصة بعباد الله المتقين....
"أَوَمَن كَانَ مَيْتًا فَأَحْيَيْنَاهُ" يعني كان كافرا فهديناه👌

يعني باختصار كده الروح تحيا بها الأجساد وجبريل عليه السلام يحيا بسببه القلوب عن طريق الوحي..عشان كده اسمه الروح😊

♡ نشوف الآية الثانية :
ربنا بيقول عن مريم لما راحت في مكان لوحدها لقت قصادها رجل《بشرا سويا》..ليه ربنا قال بشرًا سويا 😁
عشان يوصّل لنا إن إللي مريم شافته كان من البشر ومكنش من الجن..ده أولاً
ثانيا : البشر إللي هي شافته ده هو في أصله مَلك من الملائكة إللي هو جبريل عليه السلام،
والبشر ميقدروش يشوفوا الملائكة على أصلهم لازم يتمثلوا في صورة بشر عشان نقدر نشوفهم،
فلو كان الرجل إللي هي شافته ده طويل جدا مثلا أو قصير جدا أو في خِلقته أو في شكله أي حاجة مختلفة عن البشر العاديين كان الطبيعي إنها تخاف ويبان إن ده إللي مخوّفها💁‍♂️
لكن القرآن بيقول لنا إن ده مكنش سبب خوفها،
يعني هي مخفتش لمجرد إنها شافت بشر لإن البشر إللي شافته كان بشر سويّ الخِلقة مفيهوش علامة غريبة تستدعي الخوف في حد ذاته.. لأ.. ده بشر طبيعي زي أي بشر،
لكن هي خافت على نفسها من الرجل ده إنه يعتدى عليها 👌

♡الآية الثالثة😊
لما قالت مريم《إني أعوذ بالرحمن منك》 ليه قالت الرحمن؟ مع إن المفروض هنا كانت تقول الجبار أو ذو الانتقام والبطش عشان تخوفه مثلا ، ولإن هي عايزة تدفع عن نفسها الضرر فطبيعي تستغيث بالقوي المتين الجبار 🤷‍♂️
زي كده لو حد اعتدى على حقي، هقول له:
"موعدنا عند الرحمن"؟ ولّا هقول له موعدنا عند الجبار ؟ 👌
فمريم عليها السلام قالت الرحمن بالذات ومقلتش اسم تاني من أسماء الله الحسنى إللي فيها معنى الاستجارة بذي القوة والجبروت والبطش؛ لإنها كانت بتحاول تذكّر الراجل ده برحمة ربنا قبل عذابه👌
بتذكّره بالرجاء قبل الخوف من باب الرفق بالناس ودعوتهم للخير قبل ترهيبهم بالضر والعقوبة..

◇وده يعلمنا إن في الدعوة إلى الله قبل ماننهى عن المنكر نأمر الناس بالمعروف حتى ربنا بيقول لنا إيه:
"كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ "
فربنا قدم الأمر بالمعروف قبل النهي عن المنكر👌
فدايما في الدعوة إلى الله نقدم الأمر بالمعروف وبعدها على طول في نفس اللحظة ننهى ع

ن المنكر.. مش نلغيه أو نأجله خالص، لأ..
هو مجرد ترتيب أسبقية قدر المستطاع وحسب الموقف طبعا،
يعني بنقدم لهم البديل الصحيح👌

ومريم رضي الله عنها مكنتش تعرف هل الرجل ده تقي ولّا لأ فعشان كده حطت له شرط من باب التشجيع والتحفيز له..وهو :
《 إن كنت تقيا》يعني لو انت من إللي بيخافوا ربنا فإنت مش هتؤذيني،
زي مثلا لما نقول لحد لو انت بتحب ربنا اعمل كذا..فنلاقي الشخص اتحمس: أيوة أنا بحب ربنا ويبدأ يعمل،
وزي ما ربنا بيقول لنا :
" وَأَطِيعُوا اللَّهَ وَرَسُولَهُ إِن كُنتُم مُّؤْمِنِينَ"
فتلاقينا بنتحمس لطاعة ربنا ورسوله عشان نكون مؤمنين👌

◇في الغالب لو اتكلمنا مع الناس بالمعروف والترغيب الأول الناس هتستجيب👌
وزي ما قلنا من شوية ربنا بيقول لنا:
"كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ "
فربنا قدم الأمر بالمعروف قبل النهي عن المنكر💁‍♂️
فمريم عليها السلام ذكّرت الرجل ده برحمة ربنا إنه لو كان ناوي على شر فربنا رحيم هيقبله لو هو معملش المعصية ورجع عن إللي في دماغه،
مش ساعات كده بييجي في بالنا حاجات غلط عايزين نعملها والشيطان بيقعد يشجعنا ويقولنا خلاص اعمل الغلط ده ماهو ربنا عالم بنيتك السودة دي أصلا ومُطلع على سريرتك السيئة، فهتروح تصلي إزاي دلوقتي وانت كنت ناوي على كذا وبتفكر في كذا وكذا😕
فيقعد ييئسنا من رحمة ربنا عشان نرتكب الغلط ونستمر عليه ونعمل غلط تاني أكبر منه وهكذا..
فالإنسان في اللحظة دي بيبقى محتاج حد يذكّره برحمة ربنا .. انت معملتش حاجة لسه.. ارجع .. ربنا رحيم.. حتى لو كنت عملت.. ربك بيقبل التوبة👌 وهكذا..

فمريم عليها السلام ذكّرت الرجل ده برحمة ربنا إنه لو كان ناوي على شر فربنا رحيم هيقبله لو هو معملش المعصية ورجع عن إللي في دماغه وكمان هي كان في حالة استضعاف فممكن لو أخدت موقف شديد تستفز الرجل ويعتدي عليها😬

نرجع بقى لكلام جبريل عليه السلام وإنه قال لها إنه رسول من عند ربنا،
الأول بشرها إن ربنا اصطفاها وطهرها على كل نساء الدنيا..
"إِذْ قَالَتِ الْمَلائِكَةُ يَا مَرْيَمُ إِنَّ اللَّهَ اصْطَفَاكِ وَطَهَّرَكِ وَاصْطَفَاكِ عَلَى نِسَاء الْعَالَمِينَ"
وبعدين قال لها إن ربنا بيبشرك إنه هيوهبك غلام..لكن الغلام ده مختلف ..هو كلمة ربنا ..يعني هيخلقه في رحمك بكلمة كن فيكون..
"إذْ قَالَتِ الْمَلائِكَةُ يَا مَرْيَمُ إِنَّ اللَّهَ يُبَشِّرُكِ بِكَلِمَةٍ مِّنْهُ اسْمُهُ الْمَسِيحُ عِيسَى ابْنُ مَرْيَمَ وَجِيهًا فِي الدُّنْيَا وَالآخِرَةِ وَمِنَ الْمُقَرَّبِينَ"
وهيكون مشهور في الدنيا وهيتعرف اسمه بين المؤمنين بالمسيح عيسى بن مريم..وله وَجاهة وله مكانة عند ربنا...
هيكلم الناس ويدعوهم لعبادة الله وهو لسه مولود في المهد وكمان لما يكبر ..وهيكون من الصالحين المقربين عند ربنا👌
"وَيُكَلِّمُ النَّاسَ فِي الْمَهْدِ وَكَهْلاً وَمِنَ الصَّالِحِينَ"

☆قبل ما نشوف رد فعل مريم عليها السلام عايزين نرجع كده شوية للوراء في الزمن، ونشوف أصل مريم كان إيه😊
أصل مريم كان نية صالحة 👌
فاكرين لما أمها حنّة تمنّت إن يكون عندها ولد عشان يخدم الدين ويكون عابد لله، وربنا رزقها ببنت وكأنها زعلت إنها مش هتعرف تحقق إللي كان نفسها فيه...ومع ذلك هي استغلت المتاح إللي ربنا أعطاه لها👌
السؤال بقى😁
هل أم مريم كانت تتصور يوم ما وضعت البنت إن البنت دي هتكون أفضل نساء العالمين؟
هل تصورت ولا جه على بالها إن مريم دي هتخلف نبي من أولي العزم من الرسل بمعجزة إلهية محصلتش ومش هتحصل إلى يوم القيامة؟
هل تصورت حنة إن النبي ده هينسب لبنتها مريم إللي هي من آل عمران؟

♡وده يعلمنا إننا منستعجلش ومنزعلش لما حاجة عكس إللي احنا عايزينها تحصل 😊
ويعلمنا إن نية الإنسان ممكن في وقت من الأوقات تكون أفضل من عمله👌

نرجع بقى لمريم إللي كانت بتسمع كلام جبريل عليه السلام وهي متفاجئة... بشارة ورا التانية..وقبل كل ده ..إزاي هيكون لها طفل أصلا وهي مش متزوجة ومش ناوية تتزوج ولم تفعل الفاحشة😳
"قَالَتْ أَنَّى يَكُونُ لِي غُلامٌ وَلَمْ يَمْسَسْنِي بَشَرٌ وَلَمْ أَكُ بَغِيًّا"
فلما قالت للمَلك الكلام ده قال لها:
هو أمر ربنا خلاص قضاه..هتحملي بطفل بدون رجل عشان يكون آية ومعجزة للناس على قدرة ربنا الخالق👌
زي ما خلق آدم من غير لا أب ولا أم، وخلق حواء من ضلعه، قاردر يخلق طفل من أم فقط بدون أب💁‍♂️
"قَالَ كَذَلِكِ قَالَ رَبُّكِ هُوَ عَلَيَّ هَيِّنٌ وَلِنَجْعَلَهُ آيَةً لِلنَّاسِ وَرَحْمَةً مِّنَّا وَكَانَ أَمْرًا مَّقْضِيًّا"

☆في هنا فايدة لنا...وهي إن مريم مقالتش للرجل إللي هو جبريل عليه السلام إنت كذاب ..هو في امرأة تحمل بدون رجل..وابعد عني و..و..
لأن العاقل لا يُكذّب إللي بيقول له كلام لحد ما يكمل معاه ويستفهم ويشوف الدليل على الكلام وهل هو صادق ولّا لأ..
مش مجرد ما أقولك ده حصل كذا وكذا تقوليلي كذابة 😒
فلازم نفهم الأول ومنحكمش على ح

اجة بصدق ولا كذب إلا لما نتأكد ونفهم 👌

◇نرجع لتدبر القرآن😊
لما قالت 《لم يمسسني بشر》 ليه مقالتش لم يمسسني أحد😈
المس هنا المقصود به هو الجماع فلو إنها قالت لم يمسسني أحد يبقى كده الجان هيدخلوا في الآية، ومفيش زواج ولا علاقة زوجية بين البشر والجان يكون نتيجته حمل👌
فهي قالت بكل دقة إن لم يمسها أي بشر 💁‍♂️

¤معلومة عالسريع😁
يَحرم الزواج بين الجن والإنس على افتراض إن ده ممكن يعني😅
لأن ربنا قال لنا : "وَاللَّهُ جَعَلَ لَكُم مِّنْ أَنفُسِكُمْ"
وقال: " وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا"
ثم متخيلين كل واحدة ممكن تحمل حمل حرام تيجي تقول ده أنا حملت من الجني فلان🤓

بعد ما أخبر جبريل عليه السلام مريم إن حملها أمر من ربنا مفهوش رجعة، نفخ فيها الروح وحملت مريم بعيسى عليه السلام👌

◇يعني إيه بقى الكلام ده 😁
النفخ معناه إني أطلع هواء من فمي .. النفخ المعروف يعني لما تنفخ في أي حاجة ..ده أصل النفخ،
فربنا أمر جبريل عليه السلام إنه ينفخ في جيب الدرع إللي كانت مريم بتلبسه، وهو رقبة الثوب ومدخل الرأس،
عارفين لما نيجي نلبس جلابية أو عباية؟ ..بندخل راسنا منين 😅
أهي هي الفتحة دي.. حاجة زي كده 😁
فجبريل عليه السلام نفخ في المكان ده والنفخة دخلت في رحم مريم عليها السلام بأمر ربنا،
وعيسى عليه السلام هو الوحيد إللي جبريل عليه السلام نفخ فيه الروح، أما باقي البشر ففي ملك معين مسؤول عن نفخ الروح فيهم بعد تكوينهم في الرحم،
فنفخ الروح كان بداية خلق عيسى عليه السلام في رحم أمه مريم وبعدين كمل مراحل نمو الجنين العادية👌
حملت مريم عليها السلام بعيسى على أرجح الأقوال تسعة أشهر زي باقي النساء، ويقال إنهم ثمانية أشهر..

¤سؤال ..ربنا قال إن عيسى روح الله
" فَنَفَخْنَا فِيهِ مِن رُّوحِنَا "
هل ده معناه إن عيسى جزء من ربنا😳

طبعا لأ...الإضافة هنا إضافة تشريف وتكريم..فاكرين في قصة صالح عليه السلام لما ربنا خلق الناقة وصالح عليه السلام قال لقومه: هذه ناقة الله..وكمان الكعبة بنسميها بيت الله..كل الحاجات دي منسوبة إلى الله تعظيما وتشريف مش أكثر👌
يعني مش زي ما نقول علم الله وقدرة الله وسمع الله وبصره..دي صفات متصلة بربنا..بعكس الروح إللي بنضيفها لله عشان نبين مكانتها زي ما قلنا💁‍♂️

حملت مريم بعيسى عليه السلام وسلمت أمرها لله👌
أنا عايزاكم تتخيلوا مشاعر مريم عليها السلام🙊
شوفوا لو وصل لنا إن حد بيتكلم علينا مجرد كلام عادي وبيجيب في سيرتنا بنكون متضايقين إزاي😑
دي واحدة حامل من غير زوج وهي أصلا منقطعة للعبادة يعني مكنتشي ناوية زواج من أصله،
وهي مش شخصية عادية إطلاقا 😶
دي واحدة مشهورة بين الناس يعني العين عليها والناس مركزة معاها بزيادة،
وكمان أبوها كان كبير العلماء عندهم، هيقولوا عليها كانت بتمثل الطهر والعفاف وكذا وكذا،
تخيلوا إن كل ده بيدور في رأس بنت صغيرة لسه يادوب خمسة عشرة سنة😳
بطنها بدأت تكبر والناس بقت تبص لها نظرات ريبة🤨
فانعزلت عن الناس خالص عشان محدش يعايرها بالحمل بدون زوج، وراحت في وادي بيت لحم،
وفضلت هناك لحد ما جاء وقت ولادة عيسى عليه السلام😊
قبل ولادة عيسى بثلاثة شهور ويقال ستة أشهر اتولد مييين😁
ده إللي هنعرفه الجزء الجاي إن شاء الله 👌

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الرابعة_والخمسون
#مريم_زكريا_الجزء_الرابع
#يحيى

اتكلمنا عن زكريا عليه السلام لما دعا ربنا إنه يرزقه بولد عشان يرث النبوة، وربنا استجاب دعاؤه وحملت زوجته "إشياع" بيحيى عليه السلام،
ولدت إشياع يحيى عليه السلام، وكان يحيى مختلف عن باقي الأطفال؛ لإن ربنا أعطاله الحكمة والفَهم من وهو صغير ،
حتى لما كِبِر شوية وكان الأطفال يقولوا له تعالى نلعب كان بيقول لهم:
احنا متخلقناش للعب وكان يسيب اللعب ويتعبد لله، و ده إللي ربنا قال عنه في القرآن:
" وَآتَيْنَاهُ الْحُكْمَ صَبِيًّا"

◇وممكن نشوف الكلام ده مع أطفال صغيرين حوالينا تلاقي البنت على صغر سنها تطلب إنها تلبس الحجاب،
وتلاقيها منها لنفسها كده متجهة لطاعة ربنا بالرغم إن إللي حواليها مش في دماغهم أصلا وكل همهم يلبسوا على الموضة ويتفسحوا ويتحرروا من أي أوامر أو التزامات شرعية و...و...
فلما تلاقي بنتك ولّا أختك ولا أي طفلة أو طفل ماشيين في طريق ربنا شجعهم كتير،
يمكن تشجيعك ليهم ده يكون سبب في ثباتهم على الدين وتكون أعمالهم بسبب تثبيتك لهم في ميزان حسناتك 😊
واوعوا.. 🤐
إوعوا تقولوا للبنت مثلا "يا حبيبتي انتِ لسه صغيرة"،
ولا "عاملة في نفسك كده ليه!"، ولا أي كلام من الكلام المحبط ده إللي بيقتل الهِمم والعزائم ده 😑
لو البنت رجعت عن الإلتزام بطريق ربنا وكنتم انتم السبب ، هتبقى في ميزان سيئاتكم😶
ولازم تكونوا عارفين إن المسلم إللي بينشأ في طاعة الله، بيكون من السبعة إللي ربنا بيظلهم يوم القيامة من حر الشمس في ظل عرشه لما تكون الشمس قريبة جدا من رؤوسنا نسأل الله السلامة..
مش لو حد فينا شاف طفل واقف في عز الشمس مش بيصعب علينا؟
أهه يوم القيامة هيبقى أشد من حر الدنيا 😞
فياريت يصعب عليك هناك أكتر من الدنيا، وخلوا أطفال المسلمين يبنوا لأنفسهم ظلهم يوم القيامة بدون ما تحبطوهم👌
المهم،
يحيى عليه السلام كان طائع لربنا من صغره وزاهد في اللعب ، وعنده جدية في الإلتزام، وده كان بسبب إن ربنا قال له《يَا يَحْيَى خُذِ الْكِتَابَ بِقُوَّةٍ》💪🏻
يعني خد التوراة باجتهاد وبجدية وهمة عالية.. ومش هتعرف تاخدها بجِد واجتهاد غير لما تفهمها صح الأول،
ولما تفهمها صح ساعتها العقيدة هتستقر عندك وتقدر تطبقها في أقوالك وأفعالك كلها 👌

☆وطبعا الكلام ده لما ربنا بيقوله في القرآن فهو مش ليحيى لوحده، ده لينا احنا كمان 💁‍♂️
يعني ربنا بيقول لنا خدوا القرآن بجدية.. افهموه صح عشان تعرفوا تطبقوه..
فلما ربنا يقول أطيعوا الله وأطيعوا الرسول،
يبقى لازم تاخد الموضوع بجدية وأول خطوة في الجدية دي أكيد هي:
إنك تتعلم وتفهم إيه هي الأوامر دي إللي مفروض تطيعها،
وبعدين تاني خطوة في الجدية بتكون إنك تطيع كل الأوامر دي،
مش الموضوع يبقى على حسب ظروفك ومزاجك وهواك: ده هطيعه وده لأ؟ 😕
"أَفَتُؤْمِنُونَ بِبَعْضِ الْكِتَابِ وَتَكْفُرُونَ بِبَعْضٍ "؟!
يعني ما ينفعش مثلا تقول :
والله أنا هطيع ربنا وأصلي وأقرأ قرآن وأصوم وأزكي،
لكن الموسيقى مش هقدر، لازم أسمع😤
أو السينما دي روحي، معرفش أعيش من غيرها،
أو كله إلا الاختلاط مش هقدر مكلمش زمايلي ونخرج مع بعض😤
الدين يا جماعة ماينفعش ناخد نصه ونسيب نصه، ولا حتى نسيب حتة منه بمزاجنا...
آه ممكن نقصر غصب عنا ونكون زعلانين بسبب تقصيرنا في فريضة أو معصية،
لكن ميبقاش بمزاجنا: الأمر الإلهي ده هعمله لإنه سهل، وده لأ مش هعمله لإني مش مقتنع إنه فرض أو هيضايقني لو عملته.. الدين مش كده..
الدين ناخده كده كله على بعضه 😅

ثم لو كل حاجة سهلة كده يبقى فين أجر المجاهدة 🤷‍♂️
وكمان الجنة حُفّت بالمكاره يعني متحوّطة كده بالحاجات إللي بنكره نعملها...الحاجات إللي هي ضد هوانا👌

يعني مش هندخل الجنة غير لما نكسر المكاره دي💪🏻
زي كده لما واحد بيعدّي حواجز عشان يوصل لهدفه👌
وربنا بيقول لنا:
"أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ"
فين بقى مجاهدتنا لنفسنا وصبرنا على الطاعة وصبرنا عن المعصية 💁‍♂️
هو مين إللي بيبقى عايز يقوم في عز البرد يحط مية على جسمه عشان يتوضى؟
والله لولا إننا بنجاهد عشان نرضي ربنا وناخد الأجر مكنش في حد قام من تحت البطانية 😳
على فكرة الكلام ده لا يتعارض مع حديث لن يدخل أحد الجنة بعمله 😁
لأن واحد من الصحابة قال لرسول الله ﷺ خلاص بلاش نعمل ..فرسول الله قال:
"اعملوا فكل مُيَسر لما خُلق له"
فلما الواحد يلاقي نفسه واخدة الكتاب بقوة وماشية في طريق ربنا هنا نعرف إن ربنا ميسّرنا لطريق الجنة 😊
ربنا قال لنا اعمل كذا..حاضر يارب حاااالا،
متعملش كذا..حاضر يارب حااالا..مش نستنى لما نشوف ظروفنا تسمح ولّا لأ..ولا نقعد ندور على شيخ يقولنا عادي لو معملتش كذا أو يجوز إنك تعمل كذا على حسب الهوى🤓

فيحيى عليه السلام من صغره وهو بيطيع أمر ربنا👌
طب إيه باقي صفات يحيى عليه السلام؟
من الحاجات إللي ربنا رزقه بيها ك

انت: الحنان.. يعني الرحمة والعطف والشفقة والرأفة...
"وحَنَانًا مِّن لَّدُنَّا وَزَكَاةً وَكَانَ تَقِيًّا.."
ولو ركزتم هتلاقوا إن الصفة دي لها حكمة رائعة 😮
لما اتولد يحيى عليه السلام، كان زكريا عليه السلام وزوجته إشياع عمرهم كم ؟
كانوا قريبين من المائة سنة💁‍♂️
يعني كانوا محتاجين حد يكون حنين عليهم في سنهم الكبير ده، فربنا وهبه الحنان الوافر من فضله عز و جل بجانب البر،
لأن الإنسان ممكن يكون بار بأبويه من غير ما يكون حنيّن🤷‍♂️
يعني يحسن إليهم ويسمع كلامهم وكل حاجة لكن مفيش حنية تتحس من تصرفاته أو أفعاله👌
ده غير كده كمان مكنش بيرهقهم باللعب الكتير وهو صغير زي باقي الأطفال لإنه مكنش له في اللعب أصلا عليه السلام👌

وفي خاصية كمان ليحيى عليه السلام ربنا اختصه بيها وحده عن كل بني آدم،
وهي إنه مش بس معملش أي خطأ... لأ، ده حتى مفكرش ولا جه على باله كده إنه يعمل الغلط:
ربنا قال:
"سَيِّدًا وَحَصُورًا وَنَبِيًّا مِّنَ الصَّالِحِينَ"، وكنا قلنا من حلقتين فاتوا إن "سيد" يعني شخص كلمته مسموعة وليها أثر في الناس وبيتبعه ناس كتير،
وقلنا إن "حصور" يعني معصوم من الذنوب، لا يأتيها، يعني كإنه حُصِرَ عنها فبقى مانع نفسه من الشهوات الضارة ومن إنها تأثر عليه..
خلونا نقول مثال عشان المعنى يوضح،
مش ساعات كده نفس الواحد تقوله ماتيجي نشوف فيلم كذا ولّا مسلسل كذا ولّا نعمل كذا🤔
وساعتها الواحد بقى يا إما يستجيب لنفسه الأمارة بالسوء دي يا إما إنه يقول لها:
لأ حرام مش هعمل كده، ويشغل نفسه بحاجة مفيدة، ويجاهد نفسه عشان ما يضعفش ويعصي،
أهه أنا كإنسان طبيعي جه على بالي إني أعمل معصية معينة💁‍♂️
لكن يحيى عليه السلام بقى مبيجيش على باله أصلا إنه يعصي الله👌
والدليل على كده قول رسول الله ﷺ :
"ما من أحدٍ من ولدِ آدم إلا وقد أخطأ، أو هَمّ بخطيئة ، ليس يحيى بن زكريا"

☆وفي معنى تاني للحصور وهو إللي بيمنع عن نفسه شهوة الميل للنساء من أساسه، عشان يبقى منقطع للعبادة لله فقط😊
¤طيب لو المعنى ده هو المقصود، مش دي كده تبقى الرّهبَانِيّة إللي ربنا نهانا عنها 🤔

شوفوا، ربنا بيقول:
"وَاذْكُرِ اسْمَ رَبِّكَ وَتَبَتَّلْ إِلَيْهِ تَبْتِيلًا"
في نوعين من التّبَتل..
◇نوع معناه إن الإنسان يفرَّغ نفسه لعبادة الله بعد ما يُلبي احتياجاته البشرية الطبيعية، زي الأكل والشرب والنوم وهكذا، وده تبتل محمود..
و التبتل ده إللي كانت عليه مريم "البتول" عليها السلام،
يعني هي كانت منقطعة لعبادة لله وكمان زاهدة في الرجال، زي يحيى عليه السلام لما كان عابد لله و زاهد في النساء.. فكان التبتل إللي من النوع ده جائز في شريعة يحيى ومريم عليهما السلام👌

◇النوع الثاني إللي هو الرّهبَانِيّة، والرهبانية دي كانت في النصارى مش في اليهود،
يعني ربنا لما قال: "وَرَهْبَانِيَّةً ابْتَدَعُوهَا ما كتبناها عليهم إلا ابتغاء رِضوانِ الله فما رَعَوْها حَقَّ رِعايَتِها"
كان بيتكلم عن النصارى إللي هم هييجوا بعد عيسى عليه السلام،
والرهبانية مذمومة لأنها بتشدد على النفس في العبادة فوق طاقتها بزيادة،
زي الصيام كل يوم بدون راحة، وقيام الليل كله يوميا بدون راحة في الليل،
ده بالإضافة إلى إن الرهبانية كانت بتدعو لترك الزواج وبتدعو لترك أكل اللحم..
فزي ما شوفنا، تبتل يحيى ومريم مش من النوع المذموم أو المنهي عنه..
لأ كان بيتعبد لله، لكن بعد إعطاء الجسد حاجته الحياتية من راحة وأكل وغيره بدون حرمان ، ماعدا الزواج، فده بيكون زهدا فيه زي ما قلنا من شوية👌

وكان من صفات يحيى عليه السلام كمان إنه كان بار بأبوه وأمه بيراعي ربنا فيهم جدا مش مجرد حنان فقط لأ، ده إحسان في الإرضاء والمعاملة،
ومكنش متكبر نهائي، بالعكس كان خافض للجَناح وطبعه ليّن ومتواضع، سواء مع أبويه أو مع الناس،
ومكنش بيظلم ولا بيقهر حد، كان بيُشِع صلاح في كل شيء، أعماله صالحة وعقيدته صالحة ونيته صالحة،
"وَبَرًّا بِوَالِدَيْهِ وَلَمْ يَكُن جَبَّارًا عَصِيًّا"

ده غير إنه كان نبي وكمان ربنا ألقى عليه السلام في المواضع التلاتة للحياة اللي الإنسان بيكون فيها أضعف ما يكون؛
لأنه بينتقل من عالم لعالم تاني، ومواضع الضعف التلاتة دي هي:
◇يوم الولادة؛ لإن الإنسان بيكون داخل عالم جديد عليه وهو الدنيا،
◇ويوم الوفاة؛ لإنه بيكون ساب العالم إللي اتعود عليه وداخل في عالم تاني أصعب وهو عالم القبور،
◇ويوم البعث، إللي هيقوم فيه للحساب، ولاشك ده أصعب المواضع😞
فلما كانت الأحوال الثلاثة دي أشق ماتكون على الإنسان ربنا سلم على يحيي وأعطى له الأمان والسلامة زيادة فضل وإنعام منه عز وجل على يحيى عليه السلام👌
وربنا الشكور دايما بيكون كده مع العبد الطائع الشكور، بيضاعف له الفضل والإحسان
"وَسَلامٌ عَلَيْهِ يَوْمَ وُلِدَ وَيَوْمَ يَمُوتُ وَيَوْمَ يُبْعَثُ حَيًّا"
يعني يحيى عليه السلام كان حصور.. تقي.. سيد.. مؤثر في الجماهير.. حنون.. بار.. متواضع.. خافض للجناح.. زاهد في اللعب.. مت

بتل.. عالم.. فاهم.. حكيم.. حسن الأخلاق..

☆وعايزكم تركزوا في صفات يحيى عليه السلام إللي قلناها دي كووولها وتخلوها في دماغكم عشان هنشوف إللي هيحصل بعد شوية👌

عاش يحيى عليه السلام في بني إسرائيل، وكان محبوب ومعروف ، سيد بقى وبيتبعه ناس كتير زي ما قلنا😊

في يوم من الأيام يحيى عليه السلام جمع بني إسرائيل في بيت المقدس عشان يقول لهم خمسة أوامر ربنا أمره إنه ينفذها وإنه يأمر بني إسرائيل همّ كمان إنهم ينفذوها👌
رسول الله ﷺ بيقول:
"إنَّ اللَّهَ أمرَ يحيى بنَ زَكَريَّا بخمسِ كلماتٍ أن يعملَ بِها ، ويأمرَ بني إسرائيل أن يعمَلوا بِها"
الأوامر دي كالتالي :
♡الأمر الأول:
أمرهم إنهم يعبدوا الله ولا يشركوا به شيئا،
لأن إللي بيشرك بعبادة ربنا عامل زي واحد عنده خادم مشغله في محل وقال له الفلوس إللي هتكسبها تجيبهالي آخر اليوم💁‍♂️
فراح الخادم ده واخد الفلوس إللي كسبها دي وبدل ما يعطيها للراجل صاحب المحل راح موزعها للناس اللي ماشية في الشارع😬
فهل حد فيكم يرضى إنه يكون عنده خادم زي ده😑
ولله المثل الأعلى، احنا ربنا خلقنا ورزقنا بكل شيء، فطبيعي نعبده هو فقط، مع الفارق طبعا إن ربنا عز وجل غني عن عبادتنا،
لكن العبادة دي لمصلحتنا احنا وسعادتنا سواء في الدنيا أو في الآخرة👌
و العبادة معناها هي كل حاجة ممكن الإنسان يعملها من الأقوال أو الأفعال الظاهرة و الباطنة ويكون ربنا بيحب الأفعال دي وراضي عنها،
والأفعال الظاهرة زي الصلاة والذكر والصِّدق وحسن الخلق وطلب العلم وتقديم النُّسُك والقرابين،
والأفعال الباطنة زي الخشوع والإخلاص و التقوى💁‍♂️

♡ الأمر التاني:
قال لهم ربنا بيأمركم بالصلاة ..
ولما تصلوا متقعدوش تتلفتوا يمين وشمال وتنشغلوا بحاجة تانية غير الصلاة؛
لإن ربنا بيبقى ناظر لقلب العبد وهو بيصلي، فلازم العبد يحقق الخشوع في الصلاة، وكل ما كان الإنسان مهتم بموقفه بين يدي الله في الدنيا، ربنا هيهون عليه وقفته بين يديه يوم القيامة 😊

♡الأمر التالت:
أمرهم بالصيام...
وطبعا احنا عارفين فضل الصيام، وإن رائحة فم الصائم أطيب عند ربنا من ريحة المسك👌
فالصائم ده عامل زي راجل معاه كيس فيه مِسك ماشي بيه وسط الناس، أكيد ريحته هتبقى جميلة، ده غير التقوى إللي الصيام بيربينا عليها..

♡الأمر الرابع:
أمرهم بالصدقة..
ومعروف فضل الصدقة طبعا، وهي زيها زي واحد ناس أسرُوه وخلاص هيقتلوه،
وبعدين قال لهم لو أنا اديتكم فلوس تسيبوني؟
فوافقوا، فقعد يفدي نفسه بالفلوس لحد ما حرر نفسه من إيديهم..
وكذلك الإنسان لما بيتصدق ، بيبقى بيحوّش لنفسه صكوك وأموال يفدي بيها نفسه في الآخرة عشان يحرر نفسه ويحميها من عذاب الله👌

♡الأمر الخامس:
أمرهم بذكر الله ..
و ده بقى الحصن الحصين للإنسان.. فإللي بيذكر الله عامل زي واحد في أعداء بيجروا وراه،
وبعدين فجأة لقى حصن حصين قصاده، فراح داخل فيه وأنقذ نفسه من الأعداء،
فالإنسان طول ماهو بيذكر ربنا فهو في حصن منيع ضد كل أعداؤه، ضد الشيطان والدنيا والهوى وصحبة السوء👌

☆عشان كده ربنا شرع لنا في الإسلام أذكار في كل وقت يكاد يكون مفيش حالة في يومنا إلا ولها ذكر،
زي أذكار الإستيقاظ من النوم وبعدين أذكار الوضوء وبعدين أذكار الصلاة وبعدين أذكار الصباح وأذكار المساء وأذكار النوم..
ولو مفيش حالة معينة للذكر في وقت معين، فربنا جعل لنا أذكار عامة نقولها برده في غير أوقات أذكار الأحوال،
زي الاستغفار والحوقلة والتسبيح والتحميد والتكبير والتهليل والصلاة على النبي ﷺ وغيرهم كتير.. كل ده وإنت بتقوله بتكون في حصن منيع👌

ده غير إن أسهل عبادة وأعظمها أجر هي الذكر😁
واحد جه لرسول الله ﷺ قال له:
يارسول الله شرائع الإسلام كثرت علي..قيام الليل والصدقة والسنن و...و...
فقل لي على شيء أتمسك به ومسبهوش أبدا..رسول الله ﷺ قال له : "لا يزال لسانك رطبا من ذكر الله"
يعني داااايما اُذكر ربنا بتسبيح او استغفار أو..أو..
طيب إشمعنا يعني الذكر 🤔
رسول الله ﷺ بيقول:
أقول لكم بأحسن عمل ممكن تعملوه وأكثر عمل ربنا يرضاه وأكثر حاجة ترفع درجتكم ،
وأحسن من إنكم تتصدقوا بالذهب والفضة وأحسن حتى من الجهاد ...الصحابة قالوا:
بلى يا رسول الله😮
قال ذكر الله👌
☆طبعا مش عايزة واحدة تيجي تقولي يعني أسيب الصلاة وأقعد أذكر ربنا 🤓
الكلام هنا عن فضائل الأعمال مش عن الأصول👌
المهم،
دي كانت الأوامر الخمسة إللي يحيى دعا ليها بني إسرائيل..
وعاش عليه السلام بينهم يدعوهم لأخذ الأوامر بجدية ويتابعهم،
لحد ما في يوم من الأيام الحاكم الروماني هيرودس إللي اتكلمنا عنه قبل كده وقلنا إنه دخل في اليهودية حب يتزوج واحدة من محارمه يُقال إنها بنت أخوه،
وزواج المحارم كان محرم في شريعة يحيى عليه السلام،
فلما يحيى أنكر على الحاكم الأمر ده،
الحاكم مقدرش إنه يخالف أمره، لإن يحيى كان خطيب الناس ومحبوب منهم وهو القائم بالنبوة بعد زكريا عليه السلام..
لكن البنت كانت طمعانة في المُلك ، فمش عاوزة تفوّت فرصة الزواج با

لحاكم هيرودس،
وكانت البنت دي بَغِي، يعني فتاة زانية بتبيع عِرضَها مقابل المال،
وفي نفس الوقت والدتها كانت مشجعاها على إنها تتزوج من الملك،
فتزينت البنت ودخلت على الملك عشان تُغويه ، فلما سمع كلام الشيطان ووافقها على الزنا، رفضت وقالت له:
مش مسموح إلا بشرط.. إنك تتزوجني.. هي مش بتقول كده عشان هي عفيفة ، هي بتقول كده عشان بزواجها منه فقط هتكون ملكة..
فالملك قال لها: بس يحيى قال لأ!..
فقالت له: اقتله..!
مهر زواجي هو إنك تجيبلي رأس يحيى 😈
ففعلا بسبب غواية الشيطان له وغواية البنت البَغِيّ دي، الملك أرسل جنوده لمكان يحيى عليه السلام،
وقطعوا رأسه وحطوها في طبق ورجعوا بالطبق للملك، وقدمه للمرأة البغي😶
فربنا خسف بيها الأرض..!
البنت بدأت تغوص في الأرض وتصرخ، وأمها جنبها بتصرخ ..
وأول ما قربت تغوص بالكامل في الأرض، أمها قطعت راسها عشان تقتلها وتخفف عنها الألم والرعب..
فالأرض لفظت جسد البنت بعد قطع رأسها،
فبقت جثة راسها مقطوعة جنبها على الأرض، زي ما عملت في يحيى عليه السلام، والجزاء من جنس العمل، وما ربك بظلام للعبيد..

◇قصة موت يحيى عليه السلام ذكرها ابن كثير في التفسير...
لكن العلماء مختلفين برده هل يحيى قُتل أصلا ولّا مات بشكل طبيعي🤔
لإن مفيش نص صريح واضح بيقول إيه إللي حصل مع يحيى عليه السلام ومع زكريا.. كلها مجرد روايات لبعض المفسرين..
ويقال إن زكريا عليه السلام كان في دمشق لما قُتل يحيى عليه السلام،
وإن بني إسرائيل نفسهم كانوا عايزين يتخلصوا من زكريا عليه السلام ويقتلوه فهرب منهم،
وهروبه ده مكنش عشان نفسه لكن كان خايف عليهم ومش عاوزهم يتحملوا وزر قتل نبيين، هو وابنه يحيى،
فلما وصل لمكان معين، دخل في شجرة انفتحت له زي الباب كده بأمر الله،
فالشيطان مسك طرف ثوبه وخلّاه ظاهر للناس، وتجسّد الشيطان في صورة بشر، وقال لبني إسرائيل إللي كانوا بيبحثوا عن زكريا...إنتم بتدوروا على إيه؟ فقالوا له زكريا..
فقال لهم أهه، مش ده طرف هدومه؟
فقعدوا يخبطوا عالشجرة ويقولوا اخرج يا زكريا، فالشيطان قال لهم انشروا الشجرة بالمنشار،
فجابوا المنشار ونشروا الشجرة وزكريا عليه السلام جواها فقتلوه عليه السلام😞
"أَفَكُلَّمَا جَاءَكُمْ رَسُولٌ بِمَا لَا تَهْوَىٰ أَنفُسُكُمُ اسْتَكْبَرْتُمْ فَفَرِيقًا كَذَّبْتُمْ وَفَرِيقًا تَقْتُلُونَ"

☆يعني همّ مكنش عندهم ذرة عقل وتدبر كده 😑
مفكروش خالص هو إزاي ممكن حد يدخل وسط شجرة إلا لو كان دي بمعجزة من قوة إلهية غير بشرية🤦‍♂️
يعني مكنش عندهم ذرة خوف من ربنا؟!
بالبساطة دي بيتحدّوا ربنا عز وجل؟! 😶
يعني مش يقولوا إيه ده ! الشجرة انشقت وبعدين رجعت اتقفلت تاني وكان عايش جواها كمان ما اتفعصش يا جماعة إزاي ده حصل ! آمنا بالله 😮
لأ.. قتلوه بدم بارد وقلب كالحجارة أو أشد قسوة..🤓
وده حال بني إسرائيل على مر الزمن👌

☆ملحوظة:
احنا كنا حكينا قبل كده عن قصة النبي أشْعِيا وإنه مات بنفس الطريقة دي كده،
والمفسرين مختلفين هل قصة القتل دي خاصة فقط بزكريا ولّا بأشعيا ولّا حصلت للاتنين بالفعل🤔
و القصتين دول من الإسرائيليات إللي رسول الله ﷺ قال نحكيها دون تصديق أو تكذيب🤷‍♂️
فاحنا بنحكيها عشان نفهم الأحداث ماشية إزاي،
لكن بصفة عامة ده كان حال بني إسرائيل دائما مع أنبياء الله مع اختلاف التفاصيل هنا أو هناك..
وعشان كده ربنا استبدل أمتهم بأمة تانية غيرهم، إللي هي أمة محمد ﷺ، فلازم نستفيد من قصصهم ونتعلم👌

◇من الفوائد كمان إللي ممكن نستفيدها من قصة يحيى عليه السلام، إنه بالرغم من كل صفاته دي ومكانته بين الناس، إلا إنه قُتل في النهاية على يد بَغِي😞
وده يصبرنا في كل زمان لما نلاقي الظالم والكافر والفاجر متسلطين على الصالحين المؤمنين.. يقتلوهم ..يعذبوهم.. يأخدوا أموالهم يظلموهم..
هل ده معناه إن الفجار دول أغلى عند ربنا من الأتقياء؟
مستحيل طبعا،
لكن من ضمن حكمة ربنا في ده إن الظالم يُضاعَف عليه العذاب في الآخرة، والمؤمن المظلوم يزداد في الدرجات والأجر،
وصبر الله على الظالم مَكرُمة للمظلوم إذا صبر المظلوم ورضي بقضاء الله وثبت على الإيمان👌
طب ليه🤔
لأن عداد الحسنات بتاع المظلوم شغال 👌
ودي حسنات متعبش فيها💁‍♂️
الواحد لما بيكون عايز يعمل عمل صالح لازم يكون مخلص في العمل ده عشان ربنا يعطي له أجر العمل،
فيقعد يجاهد نفسه عشان يبقى مخلص وياخذ أجر..لكن المظلوم مش محتاج مجاهدة في الإخلاص ده حسناته بتتكتب له وهو نايم😁
أما زكريا عليه السلام،
فربنا أراد له إنه يكسب أجر الصبر الجميل على فَقْد الابن، ومش أي فَقْد ده فَقَده بعد عطش السنين، فياخد أجر الصبر العظيم ويكون قدوة للناس في ده على مر الزمن👌
وكمان همّ كده كده هيموتوا🤷‍♂️
سواء زكريا أو يحيى أو غيرهم من أهل الحق في كل زمان.. فيموتوا شهداء في سبيل الله أكيد أفضل خاتمة الواحد ممكن يختارها لنفسه💁‍♂️
و كما قيل: هي متيةٌ واحدة، فلتك في سبيل الله😊

بعد موت يحيى وزكريا عليهما السلام، مين

النبي إللي ربنا أرسله في بني إسرائيل🤔
إيه ده😬
هو لسه فيهم أمل بعد كل إللي عملوه ده😳

ده إللي هنعرفه إن شاء الله في الجزء الجاي😅

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الخامسة_والخمسون
#مريم_زكريا_الجزء_الخامس
#عيسى_الجزء_الأول

اتكلمنا عن مريم عليها السلام وإنها كانت منقطعة للعبادة عشان كده اسمها مريم البتول،
وعلى فكرة كلمة "القِدّيسة مريم" دي من وصف النصارى لمريم رضي الله عنها،
والكلمة دي من الغُلُو في وصف مريم،
فاحنا كمسلمين منقولش الكلمة دي.. ربنا وصفها بالصِّدِّيقة ، وليها أوصاف تانية في الإسلام ، لكن وصف《 قِدّيسة》 ده مش تبعنا خالص، يعني كإن في إيحاء كده إنها مقدسة، والقُدسِية لله وحده عز وجل👌
وقلنا إنها حملت بعيسى عليه السلام بدون أب وإنها انعزلت بحملها عن الناس،
وقلنا إن حمل عيسى عليه السلام كان تسعة أشهر على أرجح أقوال العلماء،
بعد ما خلصت مدة الحمل وجاء وقت الولادة ،
ألم الولادة اضطر مريم عليها السلام إنها تلجأ لجذع نخلة تسند عليه وتولد عنده بعيد عن عيون الناس،
"فَأَجَاءَهَا الْمَخَاضُ إِلَى جِذْعِ النَّخْلَةِ"

☆ عايزاكم تتخيلوا معايا شابة صغيرة عفيفة في موقف زي ده، بتولد لوحدها من غير ما يكون أي حد معاها لا أم ولا أب ولا أخ...ومش بس كده الطفل إللي بتولده ملهوش أب😶
الواحدة لما بتكون بتولد بتبقى تعبانة وخايفة وقلقانة و...و...
مع إن أهلها حواليها وزوجها معاها ومطمنة إن بعد الولادة كل الأمور متجهزة للمولود الجديد،
مريم عليها السلام اجتمع عليها تعب الولادة والألم النفسي بتاع الوحدة ومفيش حد يراعيها ولا يعطيها أكل ولا ماء،
وكمان الخوف من مواجهة الناس بالمولود ده😞
فكل المشاعر دي متجمعة جواها فتعبتها نفسيا جدا وخلتها تتمنى الموت،
وقالت ياريتني كنت مت قبل ما يحصل لي كده ، وكانت الناس نسيتني ونسيِت كل حاجة عني😔
"قَالَتْ يَا لَيْتَنِي مِتُّ قَبْلَ هَذَا وَكُنتُ نَسْيًا مَّنسِيًّ"

◇إيه ده ثواني كده😳
هو مش تمنّي الموت منهِي عنه؟ وكده يبقى جَزع وعدم رضا بقضاء الله😯

أيوة، بس في وضع مريم هنا الأمر مختلف.. لإن مريم لما تمنت الموت كان لسببين ✌
◇الأول:
إنها خافت إن الناس يظنوا بها الشر في عفّتها وتقواها ، فيعايروها بتهمة تمس الشرف فده يخليها تُفتن في دينها ،
ويجوز للإنسان إنه يتمنى الموت لو خاف على نفسه فتنة في دينه،
حتى رسول الله ﷺ قال إن في حاجتين الإنسان بيكرههما :
الموت، والموت أفضل للمؤمن من 《الفتنة》 والحاجة التانية قلة المال، وقلة المال أقل في الحساب ،
لكن مينفعش الإنسان يتمنى الموت لو أصابه ضرر أو أذى أو ابتلاء بشكل عام زي مرض مثلا أو فقر أو غيره👌

◇الثاني:
إنها خافت على قومها إنهم يقعوا في البهتان وقذف محصنة عفيفة، ويكون ده بسببها...يعني تكون سبب إن قومها يقعوا في معاصي،
زي مثلا لما تكرهي إن تحصل مشكلة أو فتنة بين الناس بسببك.. أكيد محدش بيتمنى لحظة زي دي😅
فمريم مكنتش عايزة قومها يقعوا في الغلط بسببها، فتمنت الموت.

☆وفي هنا فايدة لنا وهي إننا لا نتمنى الموت عشان حصل لنا ابتلاء ...مش يمكن البلاء ده يكون هو سبب تغير حياتنا💁‍♂️
هي مريم اتمنت الموت بسبب ابتلاء وفي ظنها إن ده أسوأ وضع ممكن تتعرض له واحدة في حياتها، لكن كان نتيجته إيه؟
بقت أم لرسول من أولي العزم ، وكمان هيُنسب ليها هي، وهتفضل سمعتها مُبرأة زي ما هي،
لأ وكمان هتبقى أيقونة في العفة لكل العالمين، بعد ما كانت من الأخفياء في زمن بني إسرائيل فقط👌
فبلاش نتمنى الموت بسبب أي بلاء يحصل لنا أيا كان نوعه، لكن نصبر الصبر الجميل بيقين ميتهزش، يقين في إن رب الخَير لا يأتي إلا بالخَير 😊

لما مريم عليها السلام تمنت الموت كان التمني ده لمجرد لحظات، فهي لما قالت يا ريتني كنت مت، ناداها جبريل عليه السلام من أسفل الوادي يطمئنها،
وكان المكان ده في بيت لحم وكانت ولادة عيسى عليه السلام على أرجح الأقوال في الصيف،
واستدل العلماء إن الولادة كانت في الصيف بالكلام الموجود في الروايات التاريخية بأن الرعاة كانوا بيمشوا في الليل بأغنامهم في زمن ولادة عيسى،
وفي الشتاء، البرد بيكون شديد وأحيانا بيكون في ثلج في بلاد الشام وبالتالي مفيش أحد بيتحرك في الليل🤷‍♂️
يعني احتفال النصارى بمولد عيسى عليه السلام سواء في شهر ديسمبر أو شهر يناير ملوش أصل تاريخي صحيح 👌

فناداها جبريل وقال لها متزعليش ربنا جعل تحتك نهر صغير تشربي منه،
"فَنَادَاهَا مِن تَحْتِهَا أَلاَّ تَحْزَنِي قَدْ جَعَلَ رَبُّكِ تَحْتَكِ سَرِيًّا"
◇ويُقال إن إللي ناداها كان عيسى ولكن الراجح هو جبريل،

فجبريل ناداها وطمنها، وقال لها ماتزعليش ومتخافيش، بصي ِلِمعِية ربنا إللي بتحاوطك واطمني،
ربنا جعل تحت منك نهر صغير تشربي منه، وهزي النخلة إللي وراكي بإيدك كده بس هتنزل عليكِ رُطَب ..
"وَهُزِّي إِلَيْكِ بِجِذْعِ النَّخْلَةِ تُسَاقِطْ عَلَيْكِ رُطَبًا جَنِيًّا"
فكلي واشربي وكوني مطمئنة البال وأبشري، ربنا معاكِ ومش هيضيعك وهيدفع عنك الأذى..
"فَكُلِي وَاشْرَبِي وَقَرِّي عَيْنًا"
رحمة عظيمة من ربنا لمريم في توقيت مهم جدا بالنسبة لها،
يعني هي إزاي هتقدر تاكل وتشرب في

الموقف ده وخصوصا إن الإنسان ميقدرش ياكل وهو خايف، حتى ربنا بيقول :
" وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ "
فهو قدم الخوف هنا على الجوع لأن الخوف ممكن ينسي الإنسان الجوع،
فربنا بيطمّن مريم رضي الله عنها وبيقول لها تاكل وتريح أعصابها وتهدّي نفسها خالص، وهو كده بيُهيأها للمواجهة إللي هتحصل بعدين👌
فأعظم سلاح الإنسان ممكن يتسلح به هو سلاح الإطمئنان 😊
عارفين، زي مثلا لما الواحد يكون عنده امتحان ومذاكر كويس ،
وبعدين لما يوصل للإمتحان يسمع كلام من إللي حواليه إن الإمتحان هييجي صعب والمادة دي امتحانتها صعبة،
أو الدكتور ده بيسقط ناس كتير،
فهيحس بالخوف لدرجة إنه ممكن ميعرفش يحل وينسى إللي كان مذاكره،
لكن تخيلوا كده مثلا إن سكرتير القسم طلع وقعد يطمّن الطلبة ويقول لهم الكلام ده مش صحيح،
والامتحان في مستوى الطالب المتوسط أصلا، كله هينجح إن شاء الله متقلقوش.. هيحس بإيه ساعتها؟
هيحس براحة وأمان طبعا، وهيدخل يواجه الامتحان
ويحل بكل سهولة 👌
أهه الإطمئنان ده هو سر النجاح في مواجهة أي شيء،
عشان كده ربنا قال لمريم عليها السلام: قَرِّي عَينًا،
مش بس متخافيش، لأ اطمني خالص وكوني مرتاحة البال وافرحي كمان بمولودك وميكونش في بالك أي قلق نهائي👌

فمع الكرامات إللي شافتها ..النهر الصغير ..والرطب إللي نزلت من النخلة إللي مكنتش فيها ثمر ولا ورق أصلا؛
اطمنت وقلبها هدِي خالص بعد كل ده😊

فكل ده ربنا بيجهزها نفسيا عشان تقدر تواجه أي إنسان،
وربنا قال لها على لسان جبريل عليه السلام إن أي بشر تشوفيه قولي له إنك صايمة ومش هتكلمي أي إنسان👌
"فَإِمَّا تَرَيِنَّ مِنَ الْبَشَرِ أَحَدًا فَقُولِي إِنِّي نَذَرْتُ لِلرَّحْمَنِ صَوْمًا فَلَنْ أُكَلِّمَ الْيَوْمَ إِنسِيًّا"
يعني ربنا بيقول لها إن أول بشر تقابليه تقولي له إنك صايمة و حتى مش هتكلمي أي إنسِيّ،
ومقلش أي 《بشر》 😁
لأن الإنس جاية من الأُنس، فمعنى الكلام إن حتى لو جالي حد يُؤنسني ويخفف عني مش هكلمه👌

◇طب وهي إزاي هتقول الكلام ده وهي صايمة عن الكلام😕
فاكرين زكريا عليه السلام لما دعا ربنا وقال يارب اجعل لي آية ، فربنا سَلب منه خاصية الكلام،
يعني مكنش قادر يتكلم مع أي حد خالص من أول ما خرج من المحراب، حتى لو كان عايز،
بعكس مريم عليها السلام فهي إللي هتسكت بإرادتها👌

☆إممم طب سؤال بس، هو ليه ربنا قال لمريم تهز جزع النخلة 🤔
مش هو كان بيرزقها فاكهة الصيف في الشتاء وفاكهة الشتاء في الصيف وهي مش تعبانة،
مش الأَوْلى دلوقتي إنه يرزقها بدون ما تبذل أي مجهود لأنها في أشد ضعفها وكمان لوحدها 😕
شوفوا،
هو كأن ربنا بيقول لها وبيقول لنا إن مش معنى إن الرزق ممكن يجيلك في يوم من الأيام وإنت قاعد من غير ما تأخذ بالأسباب يبقى تعتمد على كده وتسيب الأخذ بالأسباب👌
ربنا أعطى لمريم كرامة في وقت معين لكن في الموقف ده
فكإنه عز وجل بيقول لنا:
مهما كانت حالتكم صعبة، لازم تاخدوا بالأسباب إللي تقدروا عليها، حتى ولو كان سعي بسيط جدا زي هزة النخلة بإيد، و زي ضرب موسى للبحر بالعصا.
و زي كده لما ربنا يفتح لنا باب خير من أبواب الإلتزام...يعني بعتلنا حد ينصحنا، بعتلنا آية نسمعها فالقلب رَق، و...و...
أهه كل ده رزق ربنا بعتهولك بدون سبب👌
مينفعش بقى نعتمد على كده وننام في الخط وأقول لما ربنا يبعتلي تاني ولّا لما ربنا يأذن ولّا...ولّا....
لازم هنا ناخد بالأسباب برده..نسمع قرآن زيادة، نصلي أكثر، نسمع دروس وعظ أكثر..
فالخلاصة إنك حتى لما ربنا يرزقنا بدون سبب؛ ده مش مبرر إننا نعطل الأخذ بالأسباب،
حتى من أدب الدعاء إننا نأخذ بالأسباب،
مينفعش نقعد نقول يارب نجحني وأنا طول السنة مبذاكرش نهائي😑
مينفعش أقول يارب اهديني وأنا مش واخدة بأسباب الهداية..يعني واحد يقول يارب اهديني إني أبطل اسمع أغاني وهو عمال يسمع ويغني وينزل أغاني جديدة على تليفونه وينشر هنا وهناك😶
فين الأخذ بالأسباب...فين إنك تمسح الأغاني، فين إنك تلغي كل متابعاتك للصفحات إللي بتنزل أغاني..فين..فين..
مفيش حاجة بتيجي للإنسان على طبق من ذهب👌
لازم ناخد بالأسباب مهما كانت بسيطة...
يعني هي مريم عليها السلام فيها نفس أصلا عشان تهز جزع نخلة😅
ده احنا لو طلبنا من رجل إنه يهز جزع نخلة مش هيقدر،
فما بالنا بامرأة وكمان في أضعف حالاتها،
فهي رسالة من ربنا لنا كلنا: عايز حاجة؛ اعمل السبب بتاعها مهما شوفت إن السبب ده بسيط لا يُذكر👌

¤استنوا بقى عشان محدش يفهم غلط😶
في ناس تقعد تدعي يارب اهديني وهي مكبرة دماغها ومش بتدور على أي سبب من أسباب الهداية،
وانتم اكيد عارفينهم وقابلتوهم👌
وفي ناس بتدعي بالهداية ونفسهم فعلا من قلبهم إن ربنا يهديهم حتى لو كان باين عليهم عكس كده،
فالناس دي ربنا بيهديهم فعلا لأنهم بيكونوا صادقين،
فمش هم دول إللي أقصدهم خالص بكلامي إللي قلته من شوية👌

بعد ما مريم عليها السلام اطمنت وأكلت، وزي ما بنقول شمّت نفسها😅
راحت تقابل قومها بني إسرائيل وفي إي

ديها عيسى عليه السلام في اللّفة🙊
الطبيعي إني لما أشوف إنسان صالح وأنا عارفة صلاحه كويس، عمل حاجة غلط المفروض إني أسأله وأستفهم منه وأحسن الظن به...
طبعا ده لو أنا إنسانة كويسة ومش مبصدق ألاقي غلطة عالناس الصالحة عشان أقدح فيهم وأتهمهم وأذلهم بيها وأعايرهم و أشْمت فيهم🤓

بني إسرائيل عملوا إيه بقى 😕
مريم عليها السلام دخلت عليهم بطفل في إيدها ..وأنا عايزاكم تتخيلوا موقفها كان عامل إزاي ولّا همسات و نظرات الناس لها وهي ماشية وفي إيدها طفل😑
"فَأَتَتْ بِهِ قَوْمَهَا تَحْمِلُهُ "
قالوا لها :
يا مريم إيه اللي انتِ عملتيه ده! تقعي في الزنا يا مريم😱
"قَالُوا يَا مَرْيَمُ لَقَدْ جِئْتِ شَيْئًا فَرِيًّا"
يا أخت هارون- يعني من شدة عبادتها بيشبهوها بعبادة هارون عليه السلام-
يا شبيهة هارون في العفة والحياء؛ أبوكِ عمره ما كان رجل سيء السمعة أو فاسق، ولا أمك كانت بغي من البغايا.. فإزاي إنتِ تعملي عملة زي دي😤
"يَا أُخْتَ هَارُونَ مَا كَانَ أَبُوكِ امْرَأَ سَوْءٍ وَمَا كَانَتْ أُمُّكِ بَغِيًّا"

☆ناس كذبوا الأنبياء وقتلوهم متوقعين منهم إيه💁‍♂️
مش مثلا يصبروا ويستفهموا منها الأول؟!
مبيسألوش... هم قرروا خلاص مع نفسهم🤦‍♂️
وهم أصلا عارفين عفتها وطهارتها وعارفين هي بنت مين واتربت إزاي وحتى قالوا لها يا أخت هارون زي ما شوفنا،
ومع ذلك أول حاجة قالوها إنهم اتهموها في عرضها😑

عارفين زي إيه🤔
لما تكون امرأة ملتزمة بطريق ربنا ولّا لابسة نقاب وحصل منها خطأ غير مقصود أو عملت حاجة وبان منها للناس إنها عملت خطأ بيقولوا لها إيه؟
أيوة يا أم نقااب..أيوة ياست الشيخة...هو ده الدين بقى😏
كلام ظاهره حق أهه لكن وراه شماتة ربنا يعافينا😑

طبعا مريم عليها السلام في موقف لا تُحسد عليه 🙊
وهي نفذت أمر ربنا بالصيام ومبتتكلمش ولا بترد.. ومش عارفة تعمل إيه ، غير الطاعة.. والصبر..
فربنا ألهمها إنها تشاور على ابنها الصغير إللي بين إيديها في اللفة👈
يعني كأنها بتقولهم متسألونيش أنا اسألوه هو😶
"فَأَشَارَتْ إِلَيْهِ"
فبدأوا يسخروا منها ..إيه ده...إزاي نكلم طفل رضيع 😏
" قَالُوا كَيْفَ نُكَلِّمُ مَن كَانَ فِي الْمَهْدِ صَبِيًّا"

☆ملحوظة:
همّ مكنوش يعرفوا إن الطفل إللي مع مريم ده ولد ، صبي مذكر يعني،
همّ قالوا صبي بشكل عام قصدهم طفل وخلاص،
لكن مكنوش يعرفوا هل هو ذكر ولّا أنثى🤷‍♂️
زي لما نقول مثلا على المرأة الحامل: حامل في عيل، بنتكلم بشكل عام، دون تحديد ذكر أو أنثى.

فلما مريم رضي الله عنها أشارت لابنها إيه إللي حصل😮

ده إللي هنعرفه الجزء الجاي إن شاء الله😊

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_السادسة_والخمسون
#مريم_زكريا_الجزء_السادس
#عيسى_الجزء_الثاني

اتكلمنا المرة إللي فاتت عن مريم عليها السلام لما وضعت عيسى عليه السلام وراحت بيه لقومها وشوفنا إزاي اتهموها في عرضها،
وهي كانت صايمة عن الكلام وأشارت لعيسى عليه السلام وهي ماتعرفش إيه إللي هيحصل،
والكل مستني ومستغرب، وفجأة لقوا صوت طالع من بين إيديها وبيكلمهم، عيسى بن مريم عليه السلام نطق 🙊
أنطقه الله وهو لسه رضيع مكملش كام يوم في اللفة 😮
ربنا أنطق الطفل الرضيع في المهد عشان يدافع عن أمه،
هي تعرفت لله في الرخاء وكان عابدة وكان عندها رصيد،
فلما جاء الاختبار والابتلاء ربنا أكرمها بمعجزة👌
وشوفوا بقى أول حاجة قالها الطفل الرضيع كانت إيه:
"قَالَ إِنِّي عَبْدُ اللَّهِ "👌
يعني أنا مش إله ولا ابن إله ولا أي حاجة من دي خالص، أنا مجرد عبد لله،
"إِنِّي عَبْدُ اللَّه..ِ آتَانِيَ الْكِتَابَ.. وَجَعَلَنِي نَبِيًّا"

أعطاني الله الإنجيل، يعني ربنا آتاه الإنجيل والنبوة من زمان أوي من وقت ما قضى القضاء قبل أن يُخلق الخلق مش إن الإنجيل والنبوة معاه حالا،
لأ ده هيكون في المستقبل لما يكبر بس هو بيحكي عن حاجة هتحصل👌
فأعطاني الإنجيل، وجعلني نبي ليكم ، يعني محدش يطعن فيّ ويقول إني ابن زنا وانتم عارفين إن مستحيل الأنبياء يكونوا مولودين من زنا💁‍♂️
يعني كإن عيسى عليه السلام بيقول لهم أنا نبي.. وعبد لله... اتولدت بمعجزة، مش من الزنا.. وأمي مش زانية زي ما اتهمتوها مع إنكم عارفين أصلها وشرفها 😑
بل إنتم يا بني إسرائيل عارفين إن الأنبياء بيبعثوا في نَسَبِ قومِهِم، يعني بيكونوا من أشراف قومهم المعروف عنهم النزاهة وكل الأخلاق الطيبة عشان محدش يطعن في عِرضهم وشرفهم سواء ست أو راجل..
وبالفعل علو المقام والشرف والأخلاق ده كله كان اعترف بيه بنو إسرائيل وهم بيكلموها في الأول لما قالوا لها :
"يا أخت هارون ما كان أبوكِ امرءَ سَوءٍ وما كانت أمك بَغِيًّا"👌

عيسى عليه السلام كَمّل تعريف بنفسه وتعريف بوصايا ربنا له، والناس واقفة مذهولة😳
قال:
"وَجَعَلَنِي مُبَارَكًا أَيْنَ مَا كُنتُ وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
"وَأَوْصَانِي بِالصَّلاةِ وَالزَّكَاةِ مَا دُمْتُ حَيًّا"
يعني ربنا جعلني مبارك ومُعلم الخير للناس وداعيا إليه عز وجل ومُحَبِّبِ الناس في طاعة الله👌
ووصاني بالصلاة والزكاة طول ما أنا حي 👌

☆ممكن حد يسأل دلوقتي ويقول ..يعني عيسى عليه السلام دلوقتي بيصلي ويزكي🤨
يعني احنا كمسلمين عقيدتنا بتقول إن عيسى عليه السلام لم يمت وإنه هينزل في آخر الزمان..يبقى هو كده بيصلي ويزكي؟
وكمان ليه مذكرش الصيام..مش ربنا قال إن الصيام كان مفروض على الناس إللي قبلنا 🤔
شوفوا،
♡أولا: عيسى عليه السلام ربنا قال على لسانه:
"فَلَمَّا تَوَفَّيْتَنِي كُنتَ أَنتَ الرَّقِيبَ عَلَيْهِمْ"
الوفاة هنا معناها النوم..لو في واحد نايم بنقول عليه حي ولا ميت😁
بنقول عليه حي مع إن ربنا بيقول:
"اللَّهُ يَتَوَفَّى الْأَنفُسَ حِينَ مَوْتِهَا وَالَّتِي لَمْ تَمُتْ فِي مَنَامِهَا"

فعيسى عليه السلام دلوقتي نايم وبيصحى بأمر الله.. لما ربنا يشاء يعني،
ومن الأوقات إللي صِحي فيها كانت في رحلة الإسراء والمعراج ، لما رسول الله ﷺ صلى بالأنبياء جميعا في المسجد الأقصى،
ولما رآه رسول الله في السماء الثانية مع يحيى عليه السلام في رحلة المعراج وهنعرف الموضوع بالتفصيل واحنا بنتكلم في السيرة النبوية،
فهو بيصحى وقت ما ربنا يريد وينام وقت ما ربنا يريد، فحكُم عيسى عليه السلام كحكم النائم ،وإنتم عارفين إن الصلاة تسقط عن النائم 😊
وطبعا الزكاة نفس الموضوع، واحد نايم هيجيب فلوس منين عشان تبلغ النصاب ويخرجها🤷‍♂️

♡ثانيا:
بالنسبة للصيام ..عيسى عليه السلام مقلش الصيام وده معناه إن ربنا تكفّل ببقاء جسده بغير طعام ولا شراب👌
فهو لو قال إن ربنا أوصاني بالصيام يبقى ده يدل إنه بياكل،
وعشان الإنسان ياكل لازم يكون صاحي مش هياكل وهو نايم يعني😅
فالكلام ده معناه إنه نام وربنا هو إللي تكفّل ببقاء جسده من غير لا أكل ولا مية،
عارفين زي إيه؟
فاكرين قصة أصحاب الكهف إللي قلناها، وإنهم ناموا أكثر من ثلاثمائة سنة بدون أكل أو شرب وحتى شكلهم متغيرش💁‍♂️
وكمان ربنا تكفّل بهم إنهم لا يمرضوا وإنهم لا يصيبهم العمى وتكفّل بحاجات كتير أوي لهم.

◇خدوا بالكم إن اليهود والنصارى بيؤمنوا بقصة أصحاب الكهف😀
فإيه المشكلة في إن ربنا يتكفل بجسد عيسى عليه السلام خلال السنين دي كلها زي أصحاب الكهف لحد ما ينزل للأرض في آخر الزمان🤷‍♂️
فاللي يخلينا نقبل بمعجزة أصحاب الكهف نقبل بمعجزة عيسى عليه السلام،
وخصوصا إن عيسى عليه السلام خارج نطاق الزمن أصلا؛
لأن ربنا لما هيرفعه هيكون عمره ثلاثة وثلاثين سنة،
ولما ينزل في آخر الزمن هيكون عمره برده ثلاثة وثلاثين سنة👌
يعني الإنسان بيكبر في العمر بسبب إيه😕
مش بسبب تعاقب الليل والنهار؟ والسبب في تعاق

ب الليل والنهار هو الشمس،
فعيسى بقى خارج المنظومة بتاعتنا دي خالص👌

عيسى عليه السلام كمّل كلامه وقال:
"وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا"
يعني ربنا جعلني كمان بار بوالدتي ، وعصمني من إني أكون متكبر على أوامره عز وجل ولا عاصيا له ،
وعصمني من إني أكون متكبر على البشر أقتلهم وأضربهم وأقهرهم 👌

◇طيب سؤال للتدبر: ليه عيسى عليه السلام قال والدتي ومقالش أمي، مع إن لفظ الأم أعم وأقوى من لفظ الوالدة 🤔
يعني كلمة الأم تشمل الأم إللي ولدت وإللي ربت والأم من الرضاعة وهكذا .. ليه بقى قال والدتي😕

لإن عيسى عليه السلام كان عايز يثبت لهم بشكل خاص قضية محددة ويركز عليها من كل قضايا الأمومة:
قضية إن إللي ولدته وأنجبته هي مريم عليها السلام 👌
فلو قال لهم أمي، ممكن يفكتروا أمه الروحية مثلا ولّا أمه إللي تكفّلت برعايته لإنه يتيم،
فقال "والدتي" عشان يُثبت ويؤكد إنه اتولد من مريم رضي الله عنها مش من حد تاني👌

طيب بعد المعجزة الواضحة دي،هل بني إسرائيل اقتنعوا بقى وصدقوا مريم واعتذروا لها؟
أبداااا 😑
هو في ناس كده، مهما ظهر لهم الحق بمعجزات كمان، إللي في دماغهم في دماغهم🙄
ومش عايزين يقتنعوا لأنهم ببساطة بيبقوا مّتبعين لهواهم وعايزين يشمتوا في الناس الصالحين وخلاص، حتى لو همّ عارفين ومتأكدين إنهم على حق وإن إللي اتقال عن الصالحين ده غير صحيح👌

فربنا هنا بيعلمنا إننا منهتمش بكلام الناس مادام احنا صالحين وعارفين ومتأكدين إننا على حق، وإن في نوعية من الناس مهما حاولتي تقتنعهم مش هيقتنعوا 😤
يبقى نعمل إللي ربنا يريده منا وخلاص، لأن ربنا هو إللي هيحاسبنا في الآخرة مش الناس👌

☆خلونا نتدبر الآيات كده ونشوف ليه عيسى عليه السلام قال :لم يجعلني جبارا شقيا،
في حين إن يحيى عليه السلام قال: لم يجعلني جبارا عصيا🤔
يحيى عليه السلام أمه وأبوه كانوا على قيد الحياة،
فلو كان يحيى عاق بيعصي أوامر أمه أو أبوه، فالأم هتواسي الأب ،والأب هيواسي الأم،
فجاء لفظ "عصيا" هنا مناسب لتعريف الوضع فعلا لو حصل عقوق من يحيي عليه السلام 💁‍♂️
ويحيى عليه السلام جاء للدنيا من أب وأم، هو أه جاء بمعجزة، لكن الموضوع لسه منطقي لبني إسرائيل؛ لإن في أب وأم وزواج طبيعي،
فبالتالي بنو إسرائيل تقبّلوا موضوع ميلاد يحيى ومكنش في عداء بين أهله وبينهم بسبب ولادته🤷‍♂️

لكن عند عيسى عليه السلام ومريم وضعهم مختلف زي ما شوفنا؛ لإنه جاء من أم فقط بدون أب نهائي👌
فمفيش زوج أو أب يدعمها لو حصل عقوق،
وكمان معجزة ميلاد عيسى أقوى وأصعب على القبول عند ناس عندهم النزعة المادية عالية زي بني إسرائيل كده
فعشان كد بنو إسرائيل لم يتقبلوا معجزة خلق عيسى ببساطة،
وكانوا كلهم ضد مريم رضي الله عنها بسبب عيسى،
فبالتالي لو عيسى عليه السلام عَقّ مريم في يوم من الأيام، مين إللي هيواسيها وهيرحمها وهي وحيدة تماما😶
فجاء لفظ "شقيا" هنا مناسب أكتر لتعريف الوضع فعلا لو حصل عقوق من عيسى عليه السلام؛
لأن كلمة شَقِيّ معناها الشخص إللي نُزِعت منه الرحمة،
فهو كده هيكون أشد في البعد عن الرحمة لو حصل منه عقوق لأمه👌

◇عندنا بقى سؤال تاني مهم : هو ليه ربنا من الأساس خلق عيسى عليه السلام من أم بدون أب🤔
طبعا ربنا لا يُسأل عما يفعل... لكن احنا هنشوف الحكمة من خلق عيسى عليه السلام بدون أب😊
♡أول سبب هو بيان قدرة ربنا😁
احنا مشوفناش خَلق آدم عليه السلام ولا خلق حواء،
لكن سمعنا عنهم والموضوع بقى مستقر في نفوسنا فخلاص سلمنا الأمر لله،
فربنا أراد إنه يُرينا قدرته بإنه يخلق في الدنيا طفل بدون أب،
وإلا فخلق بشر من كومة تراب أصعب من وجهة نظرنا من خلق طفل داخل رَحِم أم، خلق محض بدون زوج😅
يعني بص كده لكومة تراب وتخيل إن ده كان أصلك👌
فخلق عيسى يشبه خلق آدم من الناحية دي،
يعني من ناحية خلق الشيء من العدم تماما بدون اكتمال أسبابه،
بل في حالة آدم مفيش أسبابه كلها أصلا، فخلق عيسى يشبه خلق آدم في حتة إن ربنا قال للإثنين كن فكان،
"إنَّ مَثَلَ عِيسَى عِندَ اللَّهِ كَمَثَلِ آدَمَ خَلَقَهُ مِن تُرَابٍ ثُمَّ قَالَ لَهُ كُن فَيَكُونُ"
لكن في حالة آدم: التراب اتحول لبشر
وفي حالة عيسى: النفخة اتحولت لبشر
ثم هو مين إللي بيأذن بحصول الحمل؟ مش ربنا؟
ومين إللي هيأ الأسباب الطبيعية المعروفة إللي بيها بيحصل الحمل؟ مش ربنا؟
طيب مش إللي جعل الطريقة الفلانية المعروفة دي لحصول الحمل، قادر برده إنه يجعل طريقة تانية لحصول الحمل 💁‍♂️

المشكلة بس إننا اتعودنا إن هي دي الطريقة الوحيدة للحمل، وده مش مضبوط في تعريف قدرة الله🤷‍♂️
احنا اتعودنا إن الجنين عشان يتكون لازم يكون فيه ذكر وأنثى.
عارفين زي إيه مثلا ولله المثل الأعلى😁
لما الناس زمان كانوا بيسافروا على الجمال وكانت دي وسيلة النقل الوحيدة عندهم ومتعودين عليها،
فلما اخترعوا العربيات أكيد الناس استغربت في الأول وكان في ناس مترضاش تركبها لأنهم مش متعودين عليها،
فتخيلوا

مثلا لو اخترعوا سيارات بتطير فوق البيوت دلوقتي هنبقى مستغربين وقلقانين وممكن منرضاش نركبها ونخاف منها في الأول عشان مش متعودين عليها👌
فربنا كسر لنا العادة دي وعمل لنا حاجة ضد إللي احنا اتعودنا عليه ده عشان يُورّينا قدرته ويؤيد رسله بالمعجزات عشان نصدق إنهم مش بشر عاديين،
وانهم دول مُؤيدين بالقوة العظمى إللي متحكمة في سير الكون ده كله وماسكة قوانينه؛ وهو الله عز وجل👌
آه الحياة ليها قوانين عشان نعرف نعيش في أمان ونستوعب الأمور بشكل منطقي وعلمي دقيق،
لكن لما ربنا يدلل لنا على قدرته بتغيير القوانين دي بمعجزات على يد أنبياؤه، فمنقولش ده مستحيل يحصل😤

وبكده تتم القسمة الرباعية:
خلق الله آدم بلا ذكر ولا أنثى...وخلق حواء من ذكر بلا أنثى،
وخلق البشر من ذكر وأنثى، وخلق عيسى من أنثى بلا ذكر👌
وجعل سبحانه عجوز وعقيم ينجبوا، وجعل عذراء تنجب، وجعل أصحّاء مبينجبوش..
كل ده عشان نتعلم إن قدرة ربنا مالهاش حدود، وإنما أمره إذا أراد شيئا أن يقول له كن فيكون😊

♡السبب الثاني:
إن بني إسرائيل ناس ماديين زي ما قلنا وشوفنا.
يعني لو شافوا بعنيهم يؤمنوا، مشافوش لا يؤمنوا😒
فهمّ نشأوا عالمادة وبالغوا في المادية وطغت عليهم،
حتى لما تلاقوا واحد بيحاسب واحد على كل صغيرة وكبيرة في أمور الماديات يقول له: إيه يا أخي انت يهودي 😑
فكل حاجة بالنسبة لهم كده، وكإنهم عاوزين لكل أمر إلهي ينزل معاه معجزة،
وكإن كل أمر إلهي بينزل بيلغي المعجزة إللي قبله ولازم النبي يرجع يقنعهم من الأول كل مرة إنهم لازم يطيعوه لإنه رسول من عند ربنا!
فاكرين لما قالوا لموسى عليه السلام أرنا الله جهرة؟
كان السبب إنهم عاوزين إله متجسد قدامهم يعبدوه، عشان كده أول ما عبروا البحر وشافوا ناس بتعبد أصنام قالوا لموسى :
"اجعل لنا إلها كما لهم آلهة"
وطبعا في فرق بينهم وبين موسى عليه السلام لما طلب إنه يشوف ربنا👌
الفرق بينهم إن موسى طلب الطلب ده من باب الاشتياق لرؤية الله عز وجل، لكن همّ طلبوا من باب إنهم يعبدوا حاجة شايفينها مش غيبية،
فهم نشأوا عالمادة وبالغوا في المادية وطغت عليهم ،
فكان لازم حاجة تكسر عندهم كل شوية حتة المادية والتعلق بالأسباب الزايد عن حده ده، فإيه إللي يكسرها المرة دي🤔
إرسال نبي بدون أب، ومالوش نسب معاهم،
يعني عيسى مالوش نسب متصل ببني إسرائيل 👌
وكل الأنبياء كانوا ييجوا ويقولوا لقومهم "يا قومي"ِ إلا عيسى عليه السلام كان بيقول لهم "يابني إسرائيل"
لإن مفيش أب ينتسب من خلاله ليهم 🤷‍♂️

بعد ما عيسى عليه السلام كلّم بني إسرائيل ووضح لهم هو مين، وبيّن لهم وصايا ربنا ليه، وبرّأ أمه من سوء ظنهم وبهتانهم،
ختم كلامه بإنه وقال:
"والسلام عليَّ يومَ وُلِدتُّ ويوم أموتُ ويوم أُبعَثُ حَيًّا"
بيقول لهم إن يوم لما اتولد ، ربنا عصمه من وَكْزَة الشيطان إللي بتحصل للمولود👌

☆وإيه وكزة الشيطان دي كمان🤨
كل الأطفال إللي بيتولدوا الشيطان بيمسهم بنزغــة ، يعني بيطعن الأطفال بصباعه كده زي وكزة بإيده في جنبهم، بيصرخ الطفل بعدها ، وده سبب بكاء الأطفال حديثي الولادة أول ما بيخرجوا من الرحم.. لما الطفل بيصرخ ده بيكون بسبب طعنة الشيطان دي،
وطبعا ده بيوضّح شدة العداء إللي بين الشيطان وبين بني آدم😑
والدليل حديث رسول الله ﷺ :
"ما من بني آدم مولود إلا يمسه الشيطان حين يُولد ، فيستهل صارخا من مس الشيطان ، غير مريم وابنها"
فاكرين لما اتكلمنا عن حَنة أم مريم عليها السلام وإنها قالت لما ولدت واتضح إن المولد بنت مش ولد، فقالت : وإني سميتها مريم وإني أعيذها بك وذريتها من الشيطان الرجيم؟
أهو ربنا حمى عيسى ومريم عليهما السلام من طعنة الشيطان ببركة دعاء حنة ده،
فلما جه الشيطان يطعن عيسى عند مولده، ربنا جعل فيه حجاب بينهم، فالشيطان طعن في الحجاب نفسه ومعرفش يوصل لعيسى عليه السلام،
وده معنى السلام والعصمة بتاعة وقت الولادة ، زي ما جه في الآية،
أما "ويوم أموت"؛ فربنا كمان أمِّنُه يوم ما هيموت، وده هيكون بعد ما ينزل عيسى عليه السلام في آخر الزمان ويقتل الدجال، ثم يقعد في الأرض زمن وبعدين يموت.. وهو ده اليوم المقصود في الآية..
طب "ويوم أُبعَثُ حيا"؟
ربنا أمنه كمان يوم البعث، من إنه يصيبه إللي بيصيب الناس من الفزع لما يشوفوا أهوال يوم القيامة 👌
"وَالسَّلامُ عَلَيَّ يَوْمَ وُلِدتُّ وَيَوْمَ أَمُوتُ وَيَوْمَ أُبْعَثُ حَيًّا"

بنو إسرائيل شافوا معجزتين :
ولادة عيسى بدون أب...وطفل رضيع تكلم ،
فهل آمنوا وصدقوا وبرؤوا مريم عليها السلام؟
وهل كان عيسى هو الوحيد إللي تكلّم في المهد ولّا كان في غيره؟

ده إللي هنعرفه الجزء الجاي إن شاء الله 😊

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

بوت الاستفسارات الخاص بالقصص

t.me/prophets_storiesbot