#تنبيه📣🔊🔊🔊
في هنا في الحلقة دي تصحيح:

في العلامة ال16 أنا كنت كتبت اسم الصحابي خطأ وأنا مش واخدة بالي معلش،
كتبت معاذ بن جبل، وهو صحابي تاني اسمه :《كعبُ بنَ عُجرةَ 》
أنا خلاص عدلت المنشور فحبيت أنبه عشان إللي قرأت متبقاش وصلها معلومة خطأ، وعشان الناس إللي أخدت الحلقات تصلح اسم الصحابي.

إزاي أنا خلطت بينهم كده الله أعلم😅
ربنا يعفو عنا جميعا يارب🤲❤

إيمان شلبي.

#قصة_نهاية_البداية_إيمان_شلبي
#الدار_الآخرة_بالعامية
#الحلقة_السابعة
#حلقة_خاصة_للأسئلة_عن_المرحلة_الثانية
#أسئلة_عن_نعيم_وعذاب_الأرواح

اتكلمنا عن إن الميت هيتبعه في الجنازة ثلاثة: أهله وماله وعمله، وهيرجع منهم أهله وماله ومش هيدخل القبر مع الميت غير عمله.

💠السؤال بقى، إزاي هيتبع الإنسان ماله🤔

🔅المال المقصود هنا إماؤه وعبيده ودابته، والإماء والعبيد دول يباعوا ويُشتروا، وكان من عادة العرب إن الميت إذا مات بيجمعوا عبيده ودوابه ويمشوا وراه لحد ما يدفنوه وطبعا أهله موجودين معاه هم كمان،
وبعد الدفن بيرجع الإماء والعبيد والدواب إللي هم الأموال،
أو المقصود بالمال ما يُكرَم به الميت من أجله، يعني ناس كتير من غير أهل الميت تتبع الجنازة عشان الميت ده كان رجل غني أو تاجر معروف مثلا، فالناس جايين بسبب أمواله.

وخدوا بالكم إن كلام رسول الله ﷺ في الحديث عن إللي بيتبع الميت أهله وماله وعمله على الأغلب،
وإلا في ناس لا يتبعها إلا العمل فقط، لا يوجد أهل ولا مال،
والعمل إللي هيدخل مع الميت في قبره هو إللي بيتجسد لصاحبه في القبر سواء على هيئة رجل صالح أو رجل سوء زي ما شرحنا👌

اتكلمنا برده عن ضمة القبر وقلنا إن محدش بينجو من ضمة القبر حتى الأطفال الصغار، لكن السؤال إللي بيطرح نفسه هنا:
💠هل الأطفال إللي ماتوا وهم غير مكلفين هيتسألوا سؤال الملكين وكذلك المجنون غير العاقل🤔

🔅هو الموضوع على خلاف بين العلماء،
1️⃣القول الأول بيقول إنهم بيتسألوا عادي وربنا بيكمِّل لهم عقولَهم ليعرِفوا بذلك منزلَهم ، ويُلهمهم الجوابَ عما يُسأَلون عنه،
وهم استدلوا على القول ده بإنهم بيصلوا عليهم ويدعوا لهم، ويسألوا اللهِ أن يقيَهم عذابَ القبرِ وفتنةَ القبرِ،
وذُكر عن أبي هريرة رضي الله عنه : أنَّه صلَّى على جنازةِ صبِيٍّ ، فسُمع مِن دُعائِه : اللهم قِهِ عذابَ القبرِ .
《رواه مالك وابن أبي شيبة 》

2️⃣القول الثاني إنهم لأ، لا يُمتحنون ولا يسألون في قبورهم،
وحجتهم في القول ده إن السؤال يكون للشخص إللي يعقل مين الرسول ومين إللي أرسله، فعلى الأساس ده يتسأل،
لكن الطفل الغير مُمَيز وإللي مش عارف حاجة؛ إزاي هيتسأل على حاجة مش فاهمها ولا يعقلها🤷‍♂️
ولو قلنا إن عقله هيكتمل في قبره؛ فهو لا يُسأل عن شيء مقدرش يعرفه أساسا وبالتالي مفيش فايدة من السؤال،
وأما حديثُ أبي هريرة رضي الله عنه ، فليس المقصود بعذابِ القبرِ فيه عقوبةَ الطفلِ على تركِ طاعةٍ أو فعلِ معصيةٍ قطعًا ، فإنَّ اللهَ لا يعذِّبُ أحدًا بلا ذنبٍ عمله،
لكن القبر بدون شك فيه من الآلامِ والهمومِ والحسراتِ ما قد يسرى أثرُه إلى الطفل ، فيتألَّمُ به ، فيُشرَعُ للمصلي عليه أن يسألَ اللهَ تعالى له أن يقيَه ذلك العذابَ.
《ده كان كلام ابن القيم رحمه الله في كتاب الروح》
والله أعلم فعلا بحقيقة الأمر هل هيتسأل أو لأ🤷‍♂️

¤وهنا الكلام هياخدنا لنقطة مصير الأطفال إللي ماتوا صغارا إيه🤔
وطبعا المقصود بالأطفال: أطفال البشر وكذلك أطفال الجن👌

🔰أطفال المسلمين إللي ماتوا صغارا من البشر أو الجن فهم في الجنة في كفالة إبراهيم عليه السلام،
أما أطفال غير المسلمين فعلى الراجح من أقوال العلماء وبمجموع الأدلة إن لهم امتحان يوم القيامة، ولو نجحوا في الامتحان ده هيدخلوا الجنة،
أما لو منجحوش في الامتحان هيكون مصيرهم إلى النار،
فعلى الرأي الأول إن الأطفال يُسألوا في القبر فكل واحد هيجاوب على حسب مصيره في الآخرة،
فاللي هينجح في امتحان الآخرة روحه في البرزخ هتبقى مع أطفال المسلمين في كفالة إبراهيم عليه السلام،
أما إللي مش هينجح في الامتحان فيبقى أمره إلى الله في البرزخ، ويوم القيامة يكون في النار👌

وحتى على القول إن الأطفال لن يسألوا في قبورهم فمصيرهم في البرزخ هيبقى برده على حسب علم الله فيهم هينجحوا في اختبار يوم القيامة ولّا لأ زي ما قلنا💁‍♂️

💠طيب بالنسبة للأنبياء، هل بيسألوا هم كمان في قبورهم🤔
🔅الظاهر من الأدلة أنهم لا يُسألون لأن هذا هو اللائق بهم وبمكانتهم وعصمتهم،
يعني تخيلوا إن الشهيد في المعركة لا يُسأل في قبره، فالنبي من باب أولى إنه لا يسأل في قبره🤷‍♂️
والسبب إن الشهيد لا يسأل في قبره هو زي ما رسول الله ﷺ قال:
"كَفَى بِبَارِقَةِ السُّيُوفِ عَلَى رَأْسِهِ فِتْنَة"
《رواه النسائي 》
يعني يا جماعة سؤال الملكين أساسا هو عبارة عن امتحان عشان يظهر المؤمن الصادق في إيمانه من المنافق ،
فثبوت الشهيد في أرض القتال تحت بارقة السيوف أدل دليل على صدقه في إيمانه ، وإلا كان فر للكفار👌
فالغاية من هي إثبات الإيمان، والأنبياء والشهداء أثبتوا إيمانهم فمفيش داعي لسؤالهم مرة تانية🤷‍♂️

💠طيب وبالنسبة للأمم السابقة، هل هم كمان اتسألوا في قبورهم🤔
🔅أقوال العلماء في الموضوع ده ثلاثة أقوال:
1️⃣القول الأول:
إن السؤال خاص بأمة رسول الله ﷺ؛ لأن الأمم قبلنا لما كانت رسلهم تأتيهم فيكذبوا بهم ويرفضوا اتباعهم؛ كان ربنا بيعاجلهم بالعذاب فخلاص مش محتاجين يتسألوا في قبورهم🤷‍♂️

2️⃣القول الثاني:
التوقف عن الكلام في الموضوع ده وعدم الجزم فيه بشيء، يعني نترك الأمر إلى الله ومنتكلمش فيه لأنه كده كده مش هيفيدنا بشيء👌

3️⃣القول الثالث بقى وهو الراجح وأدلته أقوى:
إن سؤال الملكين عام ومش خاص بأمة الإسلام، والأمم السابقة تعرضت له في قبورها،
فزي ما احنا بنتسأل عن نبينا؛ كل أمة بتتسأل عن نبيها إللي جاءها، وبيتعذبوا في قبورهم بعد سؤالهم، وإقامة الحجة عليهم،
وإللي بيؤيد الرأي ده إن الأحاديث إللي اتكلمت عن عذاب القبر دلت على وقوع العذاب على الكفار وعلى الأمم السابقة ، زي اليهود والمشركين إللي ماتوا قبل بعثة رسول الله ﷺ 👌
خَرَجَ النَّبِيُّ ﷺ وَقَدْ وَجَبَتْ الشَّمْسُ《يعني غربت الشمس》 فَسَمِعَ صَوْتًا فَقَالَ: "يَهُودُ تُعَذَّبُ فِي قُبُورِهَا "
《رواه البخاري ومسلم》

💠طيب على كده بقى الناس بتتسأل بأنهي لغة🤔
انتم عارفين إن في لغات مختلفة سواء في وقتنا الحاضر أو حتى قبل كده، فإيه هي اللغة إللي بيسأل بيها الملكين الناس في القبر😕

🔅شوفوا،
هو مفيش نص من الوحي عن الموضوع ده، عشان كده العلماء اختلفوا، في قول بيقول إنه السؤال بيكون باللغة السريانية،
وقول بيقول إنه باللغة العربية وربنا قادر إنه يجعل كل الناس تفهم اللغة العربية عادي في القبر، وقول ثالث بيقول إنه بيتسأل باللغة إللي يفهمها،
يعني لو هو من العرب يبقى هيتسأل باللغة العربية، ولو من غير العرب يبقى بلغته إللي يعرفها ويفهمها والله أعلم، زي ما قلنا مفيش عندنا كلام من الوحي يقولنا القول الصحيح في المسألة👌

💠طيب العذاب والنعيم إللي اتكلمنا عنه ده، هل هو للروح فقط ولّا الروح والجسد مع بعض🤔

🔅هو الأصل إن العذاب والنعيم بيقع على الروح فقط في عالم البرزخ،
لكن في أوقات الروح بتتصل بالجسد فيصيب الجسد نوع من النعيم أو العذاب مع الروح، زي كده ضمة القبر، فهي بتقع على الروح والجسد مع بعض،
لكن اتصال الروح بالجسد في عالم البرزخ بيكون مختلف عن اتصالها بيه لما كان في الدنيا،
ويوم القيامة بقى هترجع الروح الجسد عشان الحساب، وساعتها هيقع النعيم أو العذاب على الروح والجسد معا👌

💠طيب إزاي يعني بيحصل العذاب أو النعيم🤨
يعني احنا لو جبنا ميت وحطيناه أمام أعيننا مش هنشوف حاجة من إللي احنا قلنا عليها دي، فإزاي بقى بيحصل🤔

🔅كبداية لازم نثبّت الإيمان بالغيب في قلوبنا ويبقى عندنا يقين أن الله على كل شيء قدير ولا يعجزه شيء سبحانه 💁‍♂️
لكن احنا بنحاول نقرب المسألة ونشرحها من باب زيادة اليقين في القلب 👌
طبعا احنا كلنا بننام وساعات بنشوف أحلام جميلة وساعات بنشوف أحلام وحشة،
وساعات بنحلم إننا بناكل أو بنشرب حاجة ولما نصحى بنحس إن طعم الحاجة دي لسه في أفواهنا،
وممكن تكون نايم وبتحلم إنك بتجري وفي ناس بتجري وراك ونَفسك مقطوع من الجري وحد يدخل عليك يصحيك يلاقيك نايم في السرير عادي جدا ولا شايفك بتجري ولا حاجة 😅
فأقرب صورة لتقريب معنى عذاب القبر ونعيمه هو النوم إللي بنشوفه في الأحلام سواء بقى كانت أحلام سيئة أو أحلام جيدة،
وساعات بنصحى نلاقي وجع في الجسد بسبب خبطة اتخبطناها في الحلم مثلا،
فهنا بتكون الروح أثرت على الجسد تأثير احنا منعرفوش أدت إلى إنه يتألم معاها👌
وممكن اتنين جنب بعض واحد بيحلم بكابوس وتعبان في الحلم، والتاني جنبه على طول بيحلم حلم جميل ومبسوط فيه جدا،
فكذلك برده في القبر، ممكن يكونوا اتنين جنب بعض واحد بيتنعم وللتاني بيعذب ومحدش حاسس بالتاني👌

💠طب احنا كنا قلنا إن إللي يترك حفظ القرآن والعمل به هيتعذب في قبره؛ هل ده معناه إن حفظ القرآن فرض🤔

🔅حفظ القرآن كله فرض كفاية، مش فرض عين، بمعني إن مش كل مسلم يجب عليه حفظ القرآن، لكن هو فرض كفاية، يعني لو البعض حفظ القرآن سقط الفرض عن الكل،
لكن يجب علينا إننا نكون حافظين الفاتحة و معاها سورة تانية،
وده هو الفرض الواجب على كل مسلم👌
لكن إللي بيتعرض للعذاب هو إللي بيترك حفظ القرآن بالكلية ويترك العمل بالقرآن،
يعني الواحد فينا بين إنه بيحفظ قرآن أو بيراجع إللي حافظه، والأهم من الحفظ العمل بالقرآن،
لأن إيه الفايدة من حفظ القرآن بدون العمل بيه؟! دي كارثة تانية؛
لأن زي ما القرآن بيشفع لحافظه فهو يشهد على مخالفيه بهجره وتضييع فرائضه وتعدي حدوده،
فالواجب على كل مسلم هو العمل بالقرآن والامتثال لأوامره ونواهيه حتى لو لم يحفظه كاملا، ولو لم يعمل بالقرآن فهو معرض لعذاب القبر زي ما شرحنا👌

💠طيب هي أرواح الأنبياء بتبقى فين أو بيحصل معاهم إيه بعد الموت🤔
وكذلك أرواح الشهداء، وأرواح المؤمنين بعد سؤال الملكين بتكون فين بالضبط🤔

🔅خلونا نقسمهم كده:
1️⃣أولا: أرواح الأنبياء:
أرواح الأنبياء في الجنة عند الرفيق الأعلى ولها اتصال بالجسد في الأرض، إزاي وبأَي طريقة... الله أعلم🤷‍♂️
دي من الأمور الغيبية إللي منعرفش عنها حاجة،
لأن حياة البرزخ مختلفة تماما عن الحياة الدنيا، فيجب إننا نؤمن بها وخلاص زي ماهي من غير ما ندخل في تفاصيل 👌
وعشان المعنى يكون قريب لعقولكم، شوفوا الشمس كده مكانها فين؟
مكانها في المجموعة الشمسية بعيد عن الأرض 💁‍♂️
ومع ذلك الشمس بتدفئ الأرض ولها أثر كبير على الأرض، فزي ما الشمس لها اتصال بالأرض كذلك أرواح الأنبياء لها اتصال بأجسادهم، ورسول الله ﷺ قال:
"الأنبياء أحياء في قبورهم يصلون"
《صححه الألباني في "الصحيحة"》
واحنا كنا قلنا في شرح السيرة إن رسول الله ﷺ في رحلة الإسراء والمعراج مر على قبر موسى عليه السلام وكان قائم يصلي،
فحياة الأنبياء في القبور حياة خاصة غير الحياة الدنيا إللي احنا عارفينها،
وصلاتهم دي مما يتمتع به الميت، ويتنعم به، زي كده ما أهل الجنة يتنعموا بالتسبيح،
فربنا بيلهمهم التسبيح زي ما كان بيلهم الناس التنفس في الدنيا،
يعني الصلاة مش تكليف بياخد عليه ثواب زي ماكان في الدنيا؛
لأ، ده من النعيم إللي بيتلذذ بيه الأنبياء في قبورهم👌
والأرواح عادي بتنتقل من مكان لمكان في لحظات، واحنا شوفنا في رحلة الإسراء والمعراج إزاي إن رسول الله ﷺ بعد ما شاف موسى عليه السلام قائم يصلي في قبره؛ قابله بعدها في السماء💁‍♂️
حتى رسول الله ﷺ قال:
"مَا مِنْ أَحَدٍ يُسَلِّمُ عَلَيَّ إِلَّا رَدَّ اللَّهُ عَزَّ وَجَلَّ عَلَيَّ رُوحِي حَتَّى أَرُدَّ عَلَيْهِ السَّلَامَ"
《رواه أحمد وأبو داود وحسنه الألباني》
فرد الروح لرسول الله ﷺ ورده للسلام على من يسلم عليه لا يستلزم الحياة إللي احنا نعرفها، لكن هو رد من نوع خاص وحياة من نوع خاص، يكفينا بس إننا نؤمن بيها فهي من الأمور الغيبية👌

2️⃣ثانيا: أرواح الشهداء:
هم أحياء عند ربهم يرزقون، قال رسول الله ﷺ:
"إن أرواح الشهداء في جَوْفِ طَيْرٍ خُضْرٍ لَهَا قَنَادِيلُ مُعَلَّقَةٌ بِالْعَرْشِ تَسْرَحُ مِنْ الْجَنَّةِ حَيْثُ شَاءَتْ ثُمَّ تَأْوِي إِلَى تِلْكَ الْقَنَادِيلِ"
《رواه مسلم》
ومعنى الكلام إن:
◇أرواح الشهداء ربنا جعلها هي نفسها تتشكل على هيئة الطير الخضر دي وتسرح في الجنة زي ما هي عايزة وتأكل من الجنة، زي ما المَلك بيتمثل بصورة بشر.

◇أو إن أرواح الشهداء ربنا جعلها في جسد جديد وهو الطير الخُضْر بدل الجسد إللي أتلفه العدو في المعركة كنوع من العوض أو المكافأة للشهيد،
بحيث تقدر الروح من خلال الطير ده إنها تروح لأي مكان في الجنة وتأكل منه، كأنها وسيلة نقل يعني😅
وبعد كده الطير الخُضر تأوي للقناديل المعلقة تحت العرش، زي ما الطيور بتأوي لبيوتها على آخر النهار،
وطبعا القناديل دي مش هي بيوت وقصور الشهداء إللي هيستقروا فيها للأبد،
دي حاجة مؤقتة لحد ما يدخلوا الجنة دخولا كاملا يوم القيامة بالروح والجسد مع بعض،
وهم يرون قصورهم ومقاعدهم من الجنة، لكن النعيم التام يوم القيامة 👌
🔰وأرواح الشهداء أقسام:
في منهم إللي بيسرح في الجنة حيث شاء زي ما قلنا، وفي قسم في قُبَّةٍ خَضْرَاءَ على نهر بباب الجنة يخرج لهم رزقهم من الجنة الصبح وبالليل،
وفي احتمال إن أرواح الشهداء بتجتمع عند النهر إللي على باب الجنة ده ويأتيهم رزقهم من الجنة مع بعض😊
ومش معنى إنهم بياكلوا ويشربوا إن الأكل والشرب مهم لهم عشان يفضلوا عايشين زينا😅
يعني احنا بناكل ونشرب عشان نفضل على قيد الحياة صح؟
هم بقى حياتهم مش محتاجة أكل وشرب عشان يفضلوا عايشين، هم بياكلوا وبيشربوا من الجنة كنوع من أنواع النعيم،
وفي إللي بيتحبس عند باب الجنة ولا يدخلها لأن عليه دين، فالأول لازم يُقضى عنه الدين الأول وبعدين يدخل الجنة بقى زي ما قلنا👌

3️⃣ثالثا: أرواح المؤمنين من غير الشهداء:
هي في الجنة مادام لم يحبسها عن الجنة دَيْن،
قال رسول الله ﷺ:
"إنَّما نسَمةُ المؤمنِ طائرٌ يُعلَقُ في شجرِ الجنَّةِ ، حتَّى يرجعَ إلى جسدِهِ يَومَ يُبعَثُ"
《صحيح ابن ماجه》
يعني أرواح المؤمنين تتشكل على هيئة طائر يأكُلُ ويَرعَى من شَجرِ الجنَّةِ طول فترة عالم البرزخ لحد ما يأتي يوم البعث فترد الروح إلى صاحبها ويكون الدخول التام بالروح والجسد للجنة،
والفرق بين أرواح الشهداء وأرواح المؤمنين؛ إن أرواح الشهداء تنتقل في الجنة حيث شاءت، أما أرواح المؤمنين فلا تنتقل، لها مكان معين من شجر الجنة تأكل منه وفقط👌

💠آخر سؤال بقى معانا النهاردة:
هل الأرواح تتزوار؟ وهل الأموات بيعرفوا حاجة عن أحوال أهلهم في الدنيا؟ وإيه موضوع عرض أعمال الأحياء على الأموات ده🤔

🔅زي مانتم شوفتم كده، الأرواح إما منعمة أو مُعذبة،
فالأرواح المعذبة مفيش مجال إنها تروح تزور حد ولا تعرف أي حاجة عن أي حد🤷‍♂️
تخيلوا كده واحد بيعمل عملية وتعبان وحالته كرب، هل من الطبيعي إنه يفكر إنه يروح يزور فلان في حالته دي أو إن حد ييجي يحكي له أخبار النار يقوله ده فلان حصل معاه كذا وفلان اتجوز وفلان مش عارف إيه،
ده لو حد عمل كده الناس إللي تسمعه هتقول عليه مجنون ومش بعيد يتخانقوا معاه ويقولوا له هو في إيه؟ ده فيه إللي مكفيه، انت جاي تقوله إيه؟
فما بالكم بواحد بيتعذب عذاب محدش اتعذب مثله والعياذ بالله😓
فالأرواح المعذبة لا تتزاور ولا تعرف شيء عن أهلها في الدنيا 👌

أما الأرواح المنعمة فهي بيكون بينها وبين أرواح المؤمنين تلاقي، لكن تزاور كده وبيروحوا يقابلوا بعض ويقعدوا مع بعض؛ فده ليس عليه نص《 صحيح صريح》،
والحديث إللي بيدل على تلاقي المؤمنين هو:
قال رسول الله ﷺ:
".....فَيَأْتُونَ بِهِ أَرْوَاحَ الْمُؤْمِنِينَ فَلَهُمْ أَشَدُّ فَرَحًا بِهِ مِنْ أَحَدِكُمْ بِغَائِبِهِ يَقْدَمُ عَلَيْهِ فَيَسْأَلُونَهُ مَاذَا فَعَلَ فُلانٌ مَاذَا فَعَلَ فُلانٌ..."
《رواه النسائي وصححه الألباني》
بمعنى إن المؤمن لما تعرج روحه للسماء؛ تقابله أرواح المؤمنين وبيكونوا فرحانين بلقائه ويسألوه عن أخبار أهلهم في الدنيا،
ده بالنسبة للتلاقي، لكن التزاور بقى مفيش عليه دليل،
لكن ابن القيم رحمه الله قال في كتاب الروح أن الأرواح المنعمة الغير محبوسة تتزاور فيما بينها، وبيتذاكروا مع بعض ما كان بينهم في الحياة الدنيا؛ كل روح مع رفيقها الذي على مثل عملها،
فالله أعلم🤷‍♂️

أما الأحاديث إللي بتقول بتحسين الكفن لأن الموتى بيتزاوروا فيها فهي 《أحاديث ضعيفة》 لا يصح منها شيء، زي كده حديث:
"من وَليَ أخاه فليحسّن كفنه فإنهم يتزاورون فيها"
فالحديث ده ضعيف، وكل الأحاديث إللي بتتكلم عن تحسين الكفن ضعيفة، أيوة بيتلاقوا أو يتزاوروا لكن مفيش أمر بتحسين الكفن عشان التزاور ده👌
لأن بالعقل يا جماعة، إللي بيتزاور هم الأرواح مش الأجساد، والملائكة أساسا هم إللي بيكفنوا الأرواح بكفن من الجنة زي ما شوفنا في الحديث الصحيح،
فإزاي يعني رسول الله ﷺ هيقول للناس يحسنوا كفن الأجساد إللي هياكلها الدود وهتفنى كلها ما عدا عظم《عَجْبَ الذَّنَبِ》إللي هيعاد منها إحياء الإنسان مرة أخرى يوم القيامة🤷‍♂️

🔰أما بقى هل الأرواح المنعمة دي تعرف حاجة عن أحوال أهلهم في الدنيا ولّا لأ؛ فالموضوع فيه تفصيل👌
الميت في قبره لا يسمع أي حاجة من أخبار الدنيا على الإطلاق إلا في مواضع معينة،
ربنا بيقول:
"فَإِنَّكَ لَا تُسْمِعُ الْمَوْتَىٰ" 《سورة الروم آية(52)》
"وَمَا أَنتَ بِمُسْمِعٍ مَّن فِي الْقُبُورِ" 《سورة فاطر آية (22)》

الإستثناء بقى في إن الميت ممكن يسمع حاجة من أخبار الدنيا زي مثلا في حديث إن الميت إذا انصرف عنه أهله فإنه يسمع قرع نعالهم،
لكن موضوع إن الميت يعرف أخبار أهله في بيوتهم أو يسمعها،
أو إن روحه بترجع للمكان إللي ماتت فيه لمدة أربعين يوم؛ فغير صحيح وهو من الخرافات التي لا أصل لها🙅‍♂️❌
كل الأدلة من القرآن والسنة بتقول إن الميت لا يسمع أبدا ولا يعرف أحوال أهل الدنيا،
ده هو أصلا مشغول بالنعيم أو العذاب إللي هو فيه،
وزي ما قلنا ده غيب، مينفعش نتكلم فيه إلا بوحي، سواء قرآن أو أحاديث صحيحة👌
لكن...قد...وأنا بقول《قد》 يعني في احتمال إن ربنا يُطلع 《بعض》 الموتى على《بعض》أحوال أهله ولكن دون تحديد والله أعلم 🤷‍♂️

أما لو حد راح زار ميت يعرفه فلو سلم عليه هل يرد الميت السلام ولّا لأ؟
ففيه خلاف، علماء قالوا أه يرد السلام وعلماء تانيين قالوا لأ لضعف الأحاديث إللي ورد فيها الكلام عن رد الميت للسلام👌

فمينفعش بقى لما نروح نزور حد ميت نقعد نشكيله ونحكيله ده أنا حصل لي وحصل لي من بعدك يا فلان😬
لأنه أصلا لا يسمع الشكوى دي، وكمان ممكن ندخل في الشرك والعياذ بالله من غير ما نحس وده محرم😓

آخر نقطة بالنسبة لعرض أعمال الأحياء على الأموات؛ فلما واحد يموت ويقابل أرواح المؤمنين من إللي سبقوه للجنة ويسألوه عن إللي يعرفوهم من الدنيا يبدأ يخبرهم إنهم عملوا وعملوا،
ولو كان واحد منهم مات يقول لهم ده مات قبلي، هو مجاش عندكم؟
فيقولوا له إنه ذهب إلى أمه الهاوية يعني النار،
فالأعمال مش بتتعرض على الأموات بالتفصيل زي ماحنا متصورين، لأ،
ده بيكون عن طريق نقل الأخبار من الميت إللي لسه ميت وأقبل على أرواح المؤمنين إللي سبقوه فيخبرهم بأحوال أهلهم من أهل الدنيا👌
والدليل على كده حديث رسول الله ﷺ:
"...فَيَأْتُونَ بِهِ أَرْوَاحَ الْمُؤْمِنِينَ فَلَهُمْ أَشَدُّ فَرَحًا بِهِ مِنْ أَحَدِكُمْ بِغَائِبِهِ يَقْدَمُ عَلَيْهِ فَيَسْأَلُونَهُ مَاذَا فَعَلَ فُلانٌ مَاذَا فَعَلَ فُلانٌ فَيَقُولُونَ: دَعُوهُ فَإِنَّهُ كَانَ فِي غَمِّ الدُّنْيَا.

فَإِذَا قَالَ: أَمَا أَتَاكُمْ ؟ قَالُوا: ذُهِبَ بِهِ إِلَى أُمِّهِ الْهَاوِيَةِ."
《رواه النسائي وصححه الألباني》

وطبعا الكلام ده لا يتعارض مع الكلام إللي قلناه من شوية إن الميت لا يعرف أخبار أهله، فالكلام كان عن إن الميت لا يعرف أخبار أهله بنفسه، يعني هو مش بيطلع بره القبر ويروح يشوف أهله عاملين إيه،
أو إنه قاعد في القبر وشايف بيحصل إيه لأهله،
هو ممكن يعرف بعض أخبار أهله عن طريق أرواح المؤمنين إللي بتيجي تِباعا ورا بعضها ويتقابلوا مع بعض وبيسألهم💁‍♂️

وبكده يبقى احنا انتهينا من الأسئلة، المرة الجاية هنرجع للأحداث على الأرض عشان نشوف علامات القيامة الكبرى وإزاي هتقوم وعلى من سَتقوم وإيه إللي هيحصل بعدها👌

مصادر حلقة النهاردة في التعليقات👇

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐ المصادر ⭐


https://islamqa.info/amp/ar/answers/71175

https://binbaz.org.sa/fatwas/60/%D8%AD%D9%83%D9%85-%D9%85%D9%86-%D9%85%D8%A7%D8%AA-%D9%85%D9%86-%D8%A7%D8%B7%D9%81%D8%A7%D9%84-%D8%A7%D9%84%D9%85%D8%B4%D8%B1%D9%83%D9%8A%D9%86

https://www.google.com/amp/s/islamqa.info/amp/ar/answers/6496

https://www.alukah.net/sharia/0/56083/

https://www.alukah.net/sharia/0/68737/

https://islamqa.info/amp/ar/answers/161715

https://www.google.com/amp/s/islamqa.info/amp/ar/answers/114639

https://www.islamweb.net/ar/fatwa/199493/

https://islamqa.info/amp/ar/answers/47055

https://www.google.com/amp/s/islamqa.info/amp/ar/answers/175477

https://www.google.com/amp/s/islamqa.info/amp/ar/answers/148285

https://www.alukah.net/sharia/0/69051/

https://www.google.com/amp/s/islamqa.info/amp/ar/answers/199542

https://www.google.com/amp/s/islamqa.info/amp/ar/answers/114639

https://www.dorar.net/hadith/sharh/78879

https://www.alukah.net/sharia/0/58067/
https://www.google.com/amp/s/islamqa.info/amp/ar/answers/20820

https://dorar.net/hadith/search?q=%D8%B9%D8%AC%D8%A8+%D8%A7%D9%84%D8%B0%D9%86%D8%A8&st=a&xclude=&fillopts=on&t=*&d%5B%5D=1&d%5B%5D=2&m%5B%5D=0&s%5B%5D=0

https://islamqa.info/ar/answers/13183/%D8%B1%D9%88%D8%AD-%D8%A7%D9%84%D9%85%D9%8A%D8%AA-%D9%84%D8%A7-%D8%AA%D8%B9%D9%88%D8%AF-%D8%A7%D9%84%D9%89-%D8%A7%D9%87%D9%84%D9%87-%D9%88%D8%A8%D9%8A%D8%AA%D9%87

https://www.islamweb.net/ar/fatwa/155967/%D8%AA%D9%84%D8%A7%D9%82%D9%8A-%D8%A7%D9%84%D9%85%D9%88%D8%AA%D9%89-%D9%88%D8%AA%D8%B3%D8%A7%D8%A4%D9%84%D9%87%D9%85-%D9%88%D8%B9%D8%B1%D8%B6-%D8%A3%D8%B9%D9%85%D8%A7%D9%84-%D8%A7%D9%84%D8%A3%D8%AD%D9%8A%D8%A7%D8%A1-%D8%B9%D9%84%D9%8A%D9%87%D9%85

https://ar.islamway.net/fatwa/8106/%D8%B9%D8%B1%D8%B6-%D8%A3%D8%B9%D9%85%D8%A7%D9%84-%D8%A7%D9%84%D8%A3%D8%AD%D9%8A%D8%A7%D8%A1-%D8%B9%D9%84%D9%89-%D8%A7%D9%84%D8%A3%D9%85%D9%88%D8%A7%D8%AA

بوت الاسئلة الخاصة بقصص الأنبياء و السيرة النبوية

@prophetsstories_bot

رابط فهرس القناة 👇🏻
https://t.me/prophets_stories/2453

رابط القناة الشامل لقصص الأنبياء و السيرة النبوية بقلم إيمان شلبي
https://t.me/joinchat/AAAAAEhulzm7RmVxsli1pQ

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثامنة
#علامات_الساعة_الصغرى
#الجزء_الأول_انظر_حَوْلك

وانت في قبرك بتُنَعّم أو بتتعذب؛ هتيجي عليك لحظة تسمع فيها صوت عظيم جدا، وساعتها روحك هترجع لجسدك وهتقوم من قبرك،
جاءت لحظة البعث إللي ياما ناس كتير كذّبوا بها!
وهتلاقي كل الناس من أول آدم عليه السلام لحد نهاية الدنيا قايمين هم كمان من قبورهم متوجهين لأرض المحشر عشان كل واحد يتحاسب على كل أعماله إللي عملها في الدنيا👌

لكن قبل ما نعرف أحداث اليوم العظيم ده《اليوم الآخر》هنرجع بالزمن شوية كده للدنيا عشان نشوف حصل فيها، والدنيا انتهت إزاي👌

انت لما كنت عايش في الدنيا؛ كنت بتسمع عن أحداث حصلت، وأحداث لسه هتحصل، وأحداث انت نفسك شوفتها بعينك، بس انت مكنتش مستوعب!
مكنتش مستوعب يعني إيه يوم القيامة!
يعني إيه إن يوم القيامة ده له علامات!
ويعني إيه إن العلامات دي فايدتها إنها تذكرك وتنبهك من غفلتك ومن الدوامة إللي انت كنت حاطط نفسك فيها، من دراسة لشغل لزواج لبيت لأولاد لمشاكل هنا وهنا و....و....

دوامة كنت عايش فيها مكنتش بتقف تفكر بس تفهم يعني إيه قول رسول الله ﷺ: "بُعِثْتُ أَنَا وَالسَّاعَة كَهَاتَيْن ✌"
《صحيح البخاري》
مكنتش فاضي تركز إن قطيعتك لعمتك أو خالتك أو خالك أو عمك بسبب أمور الدنيا دي في حد ذاتها من علامات الساعة👌

وبما إننا رجعنا للدنيا تاني فخلينا نقف كده ونركز ونفهم ونستوعب، يمكن حد ينتبه من غفلته ويعمل ليوم القيامة👌

يوم القيامة ده هو اليوم إللي انت وأنا وكل الناس هيُبعثوا فيه بعد الموت وهنتحاسب على أعمالنا،
ومفيش حد يعرف وقته امتى غير ربنا عز وجل، لا أنبياء ولا ملائكة ولا غيرهم، لكن اليوم ده هيأتي أكيد👌
ورسول الله ﷺ لما جاءه واحد من الأعراب يسأله متى الساعة؟ رسول الله ﷺ قال له: ماذا أعددت لها؟
فمش المهم إنك تعرف هو امتى، لكن المهم هو استعدادك لليوم ده، يا ترى جهزت له إيه؟
وخصوصا يعني إن قيامتك الصغرى ممكن تقوم في أي لحظة👌

ومع إننا منعرفش امتى بالضبط ميعاد يوم القيامة؛ لكن ربنا أخبرنا عن علامات لليوم ده،
وده من رحمة ربنا بعباده عشان واحد زيك كده عايش في الدوّامة بتاعته دي ينتبه من غفلته ويستعد للقاء الله، ربنا قال:
"فَهَلْ يَنْظُرُونَ إِلَّا السَّاعَةَ أَنْ تَأْتِيَهُمْ بَغْتَةً فَقَدْ جَاءَ أَشْرَاطُهَا "
《سورة محمد آية(18)》

انت عارف كده لما تكون مسافر وراكب أي مواصلة وتشوف علامة مكتوب عليها فاضل كذا كيلو على المكان إللي انت رايحه فبتستعد للنزول كل ما بتقرب للمكان ده؟
أهه العلامات إللي ربنا قال عليها زي بالضبط كده العلامات إللي انت بتشوفها على طريق السفر 👌
ربنا جعل لك علامات عشان تستعد،
عشان كل شوية لما تشوف علامة تفتكر إن في يوم قيامة،
وإنك مهما عشت؛ فانت ليك رب هترجع له في يوم من الأيام وهتقف بين إيده وهتتحاسب على كل صغيرة وكبيرة👌
وربك أخبرك إن في نوعين من العلامات:
علامات ساعة صُغرى وعلامات ساعة كُبرى،
◇علامات الساعة الصغرى هى العلامات إللي بيتكرر حدوثها ومستمرة مش بتنقطع وبيكون بينها وبين يوم القيامة زمن،
ومش كل الناس بيحسوا بيها لأنها ممكن تحصل في مكان ومكان تاني لأ.

◇أما علامات الساعة الكبرى فهي علامات غير مألوفة وعظيمة،
كل الناس بيحسوا بيها وبيشوفوها وبتكون قريبة جدا من يوم القيامة،
وكل العلامات دي بتيجي وراء بعضها زي حبات الخرز إللي في العقد إذا انقطع، شوف كده الحبات بتقع وراء بعضها إزاي بسرعة، كذلك علامات الساعة الكبرى بتيجي بسرعة وراء بعضها👌

علامات الساعة الصغرى في منها إللي حصل وخلاص خلص،
وفي منها إللي حصل ومازال مستمر وانت شايفه بعينك بس متعرفش إن ده من علامات الساعة الصغرى، وفي منها إللي لسه محصلش.

تعرف إن من علامات الساعة الصغرى إللي حاصلة دلوقتي وانت شايفاها وشايف الناس حواليك بتقع فيها هي:
《ظهور الفتن》👌
والفتن جمع فتنة، والفتنة يعني الابتلاء والاختبار، فبيحصل للناس اختبارات كثيرة تُزلزل الإيمان في القلوب،
وانت نفسك ممكن تكون مريت بابتلاء واختبار حسيت فيه إن قلبك بيتزلزل من شدة البلاء ده👌
رسول الله ﷺ بيقول عن الفتن:
"إنَّ بينَ يديْ الساعةِ فِتَنًا كقطعِ الليلِ المظلمِ...."
《صحيح ابن ماجه》
يعني الفتنة في شدتها وقوتها زي الليل شديد السواد،
ورسول الله ﷺ بيتكلم عن سواد الليل إللي هو شافه بتاع الصحراء إللي مفهوش أي ضوء خالص مش سواد الليل بتاعنا إللي الأنوار مخلية له ضوء فالواحد يستأنس بيه،
سواد الليل بتاع الصحراء مرعب فعلا، ولو انت سافرت بالليل في طريق صحراوي من غير ضوء على الطريق هتعرف معنى قِطَع الليل المظلم،

فالفتن إللي هتتعرض لها انت وغيرك من الناس زي الليل المظلم ده،
لدرجة إن الواحد يبقى الصبح مؤمن وبالليل يكفر وده بسبب إنه هيبيع دينه بعَرَض من الدنيا،
"يُصْبِحُ الرَّجُلُ مُؤْمِنًا وَيُمْسِي كَافِرًا، أَوْ يُمْسِي مُؤْمِنًا وَيُصْبِحُ كَافِرًا، يَبِيعُ دِينَهُ بعَرَضٍ مِنَ الدُّنْيَا"
《صحيح مسلم》
وأظن انت شايف الموضوع ده حواليك منتشر إزاي؟
كم واحد كان مسلم وعشان اتعرض لابتلاء ترك الدين وأَلحَد،
وكم واحد ضحّى بدينه وباعه عشان شغلانة أو عشان مال أو عشان منصب،
وكم واحد كان ملتزم بتعاليم الإسلام وبسبب الابتلاءات ترك الالتزام؟
وإللي قلعت الحجاب الشرعي وبقت تلبس بناطيل، وإللي كان بيصلي وساب الصلاة و...و...
اوعى تكون منهم👀
تمسك بدينك، هو إللي هينفعك في القبر👌

ولسه الفتن مستمرة لحد قيام الساعة وكل ما بتقرب من يوم القيامة كل ما الفتن بتكون أصعب وأشد،
وكل فتنة بتتعرض لها هتقول هذه مُهلكتي، يعني خلاص الفتنة دي هي إللي هتضيعني، وبتبقى خايف وقلقان ومش عارف تعمل إيه،
عشان كده رسول الله ﷺ بيقول لك:
"بَادِرُوا بالأعْمَالِ فِتَنًا كَقِطَعِ اللَّيْلِ المُظْلِمِ"
《صحيح مسلم》
يعني عشان تنجو من الفتن والاختبارات الشديدة دي؛ انت محتاج إنك تُسارع وتعمل الأعمال الصالحة قبل ما تتعرض للإبتلاء؛
لأن صنائع المعروف تقي مصارع السوء، يعني لو انت عندك رصيد من الأعمال الصالحة؛ ربنا هينجيك ويحفظك من الفتن ويثبت قلبك على الإيمان👌
وطبعا مع الدعاء والتعوّذ من الفتن الظاهرة إللي انت عارف إنها فتنة، والتعوذ من الفتن البَاطنة يعني المختفية ومش عارف إنها فتنة.

☆ولو انت بقى عايز تنجو من النار وتدخل الجنة يبقى تعمل زي ما رسول الله ﷺ قال:
"فَمَنْ أَحَبَّ أَنْ يُزَحْزَحَ عَنِ النَّارِ ، وَيُدْخَلَ الْجَنَّةَ ، فَلْتَأْتِهِ مَنِيَّتُهُ وَهُوَ يُؤْمِنُ بِاللهِ وَالْيَوْمِ الْآخِرِ ، وَلْيَأْتِ إِلَى النَّاسِ الَّذِي يُحِبُّ أَنْ يُؤْتَى إِلَيْهِ"
《صحيح مسلم》
يعني انت عندك جزئين:
◇الجزء الأول:
إنك تموت وأنت تؤمن الإيمان بالله واليوم الآخر ،
والإيمان قول باللسان وتصديق بالقلب وعمل بالجواح،
فلو انت بتؤمن بالله واليوم الآخر فعلا مش مجرد كلام؛ لازم تعمل الأعمال الصالحة عشان تموت على الإيمان ده👌

◇الجزء الثاني:
إنك تعامل عموم الناس زي ما بتحب الناس تعاملك، وتعمل معاهم إللي تحب إنه يتعمل معاك،
فتنصح للناس زي ما بتنصح لنفسك، وتكره للناس ما تكرهه لنفسك، متكذبش عليهم ، ولا تغشهم ولا تخدعهم ، ولا تحب لهم الشر،
فلما تتعامل مع الناس يكون ميزان المعاملة : هل انت تحب إن الناس يعاملوك بالمعاملة دي أو لأ؟
فتعاملهم باللطف زي ما بتحب إنهم يعاملوك باللطف واللين، وبحُسن الكلام وبحُسن المنطق ،ولو عملت كده؛ هتُزحزح عن النار وتدخل الجنة👌

وبما إننا بتتكلم عن الفتنة بقى، ففي فتنة هتدخل كل بيوت العرب😶
قال رسول الله ﷺ:
"ثُمَّ فِتْنَةٌ لا يَبْقَى بَيْتٌ مِنَ العَرَبِ إلَّا دَخَلَتْهُ"
《صحيح البخاري》
في علماء من العصر الحديث قالوا إن الفتنة دي هي فتنة وسائل الإعلام والتواصل الاجتماعي؛ لأنها بتدخل كل البيوت حتى في الأماكن الصحراوية،
وهم استنتجوا الكلام ده من جمع أحاديث رسول الله ﷺ مع بعضها،
يعني في حديث لرسول الله ﷺ يقول عن الفتنة دي إنه يدخل حَرّها بيت كل مسلم،
"وفتنةٌ يدخلُ حرُّها بيتَ كلِّ مُسلِمٍ"
《الجامع الصغير- صحيح》
يعني أذى الفتنة دي يدخل بيت كل مسلم فهي تعم المسلمين ومش خاصة بالعرب فقط،
وانت شايف الفتن إللي انت نفسك بتتعرض لها من وسائل الإعلام ووسائل التواصل الاجتماعي،
وفي حديث تاني قاله حذيفة بن اليمان رضي الله عنه:
لَيُوشِكَنَّ أَنْ يُصَبَّ عَلَيْكُمَ الشَّرُّ مِنَ السَّمَاءِ حَتَّى يَبْلُغَ الْفَيَافِيَ .
قَالَ : قِيلَ : وَمَا الْفَيَافِيُ يَا أَبَا عَبْدِ اللهِ ؟
قَالَ : الأَرْضُ الْقَفْرُ .
وانت بتشوف الناس في الصحاري ومعاهم الموبايلات والنت وبيوصل لهم كل شر من أغاني وأفلام ومسلسلات وغيرها😓

☆وقال العلماء قديما زي شيخ الإسلام ابن تيمية إن الفتنة دي كانت الفتنة إللي حصلت بين الصحابة بعد مقتل عثمان بن عفان رضي الله عنه، والله أعلم.

◇كنت مجتهد في الدراسة وأخذت كورسات في مجال معين وروحت قدمت على وظيفة واترفضت وقبلوا واحد أقل منك في الإمكانيات بكتير عشان بس عنده واسطة؟!
أهه ده من علامات الساعة👌
قال رسول الله ﷺ:
"إِذَا ضُيِّعَتِ الأَمَانَةُ فَانْتَظِرِ السَّاعَةَ،
قَالَ أبو هريرة راوي الحديث: كَيْفَ إِضَاعَتُهَا يَا رَسُولَ اللَّهِ ؟
قال: إِذا أُسْنِدَ الأمْرُ إِلَى غَيْرِ أهْلِهِ فانْتَظِرِ السَّاعَةَ"

《رواه البخاري》
فده مش بيحصل معاك انت بس،
لأ، ده انت هتلاقي رئيس دولة مينفعش للرئاسة، هتلاقي مدرس بيشتغل في مدرسة مينفعش للتدريس، هتلاقي موظف في مصلحة مينفعش للشغل،
وتلاقي كل هؤلاء أخذوا العمل عن طريق الواسطة أو الرشاوي أو الغش أو الأمور الغير المشروعة بصفة عامة،
وانت أكيد بتسمع عن إللي بيزوّر شهادات وبتسمع عن الرشاوي إللي بتندفع،
ولسه بقى هييجي اليوم إللي تُرفع الأمانة من قلوب الناس،
والرجل إللي كان أمين؛ في يوم من الأيام هيصحى ويبقى خائن وتُرفع الأمانة من قلبه،
وده هيحصل للي مبقاش يخشى الله وبقى إيمانه ضعيف، وخالط أهل الخيانة فبقى خائن زيهم.

وطبعا كل ده بيدل على إن الناس ساعتها مبقتش مهتمة بدينها، وهنا الكلام هياخدك لعلامتين مهمين من علامات الساعة الصغرى وهتلاقيهم منتشرين جدا حواليك👌

◇العلامتين دول هما:
انتشار الجهل ورفع العلم، ومجيء السنون الخداعات.

كان عندك سؤال في الدين فذهبت تسأل حد من الناس انت مفكره على علم؛
فلما جاوبك حسيت في قلبك إنك مش مرتاح لكلامه فروحت سألت حد تاني لقيته بيقولك كلام مختلف عن الأول بس لسه قلبك مش مرتاح، فروحت لثالث ورابع،
لحد فين وفين على ما لقيت حد يجاوبك إجابة بالدليل من القرآن والسنة بفهم الصحابة والتابعين بالتفصيل فاطمأن لها قلبك وعرفت إن إجابته هي الصحيحة؟
أهه إللي حصل معاك ده بسبب انتشار الجهل ورفع العلم،
وده بيكون بقبْض العلماء يعني بموتهم،
قال رسول الله ﷺ:
" إِنَّ اللَّهَ لَا يَقْبِضُ الْعِلْمَ انْتِزَاعًا يَنْتَزِعُهُ مِنْ الْعِبَادِ وَلَكِنْ يَقْبِضُ الْعِلْمَ بِقَبْضِ الْعُلَمَاءِ حَتَّى إِذَا لَمْ يُبْقِ عَالِمًا اتَّخَذَ النَّاسُ رُءُوسًا جُهَّالًا فَسُئِلُوا فَأَفْتَوْا بِغَيْرِ عِلْمٍ فَضَلُّوا وَأَضَلُّوا "
《صحيح البخاري》
مفيش علماء ربانيين يعلموا الناس الدين الصح، يموت العالم فيذهب ما معه من العلم،
فإذا مات أهلُ العلمِ الحقيقيِّ، وصَلَ الجُهلاءُ إلى المراكزِ العِلميَّةِ الَّتي لا يَستحِقُّونها؛ مِن تَدريسٍ وإفتاءٍ وغيره،
وجعَلَ النَّاسُ منهم عُلماءَ يَسأَلونهم، فيُفتونَ بغيرِ عِلمٍ بسبب جهلهم، فيُحِلُّون الحرامَ، ويُحرِّمون الحلالَ، فيَضِلُّون هم أنفسِهم عن الحقِّ، ويُضِلُّون مَن اتَّبَعهم وأخَذَ بفَتْواهم مِن عامَّةِ النَّاسِ👌

فالناس إما تبعد عن الدين وتضل أو إنهم يتبعون رؤوسا جُهّالا،
يعني ناس مشهورين جهلة معندهمش علم وبيفتوا الناس وبيضلوهم، أو عندهم علم غلط فبيضلوا الناس بفتاويهم والناس مبتصدق تسمع فتاوى على مزاجها فيتبعوها😑

والجهلة إللي زي كده؛ قال عنهم رسول الله ﷺ:
"دُعَاةٌ علَى أَبْوَابِ جَهَنَّمَ مَن أَجَابَهُمْ إلَيْهَا قَذَفُوهُ فِيهَا،
فَقُال معاذ بن جبل رواي الحديث:
يا رَسولَ اللهِ، صِفْهُمْ لَنَا،
قالَ: نَعَمْ، قَوْمٌ مِن جِلْدَتِنَا، وَيَتَكَلَّمُونَ بأَلْسِنَتِنَا"
《صحيح مسلم》
هتلاقي انت الناس دي بتتكلم بالقرآن والسنة ولكن للأسف بيحرّفوا الكلام عن معناه الصحيح بسبب جهلهم لأنهم مأخذوش العلم عن الصحابة وعن العلماء،
وانت هتلاقي في ناس كثير بيتّبعوا كلامهم، وإذا مثلا حاولت تصلح الخطأ بتاعهم وتجيب كلام الصحابة والعلماء يرفضوا الكلام لأنه مش موافق لهواهم أو لأن الكلام غريب عليهم أو...أو...

كل واحد بقى بيفسر القرآن والأحاديث بمزاجه، مع إن الأصل إننا نتبع القرآن والسنة بفهم الصحابة والتابعين وتابعي التابعين؛
لأن الصحابة هم إللي نَزل عليهم القرآن وطبقوه ورسول الله ﷺ أقرهم على فهمهم وفعلهم👌
ومع إن لسه في علماء ربانيين لكن هم قليلون، والناس مش عايزة تسمع لهم بسبب الفتن إللي حصلت،
وبقينا في《السنين الخدّاعات》 التي يُصَدق فيها الكاذب ويُكذب فيها الصادق، ويُؤتمن فيها الخائن ويُخوّن فيها الأمين.
وعشان تخرج من المتاهة دي وتتبع الحق مطلوب منك ثلاثة أمور:
♡《الصدق مع الله 》
♡《والدعاء 》
♡《وعرض الفتوى على القلب》
يعني تكون صادق مع الله في إنك عايز توصل للحق وتتبعه فعلا،
وتدعي ربك إنه يُبصّرك بالحق ويرزقك اتباعه،
وساعتها لما تسمع فتوى والفتوى فيها مشكلة؛ قلبك مش هيبقى مرتاح وهتدور على الصح وربك هيهديك لمعرفة الحق👌

وطبعا بسبب انتشار الجهل وقلة العلم لازم هيظهر《الرُّوَيْبِضَة》
وده الرجل التافه أو الفاسق أو السّفِيه بيتكلم في أمر العامة،
يعني واحد مش نافع في أي حاجة تلاقيه طالع على القنوات الفضائية بيتكلم في الدين ويفتي،
تلاقي واحدة متعرفش أي حاجة في الدين وعمالة تفتي على مواقع التواصل الاجتماعي وتقول حلال وحرام،
والناس دي هتلاقيهم ماليين مواقع التواصل الاجتماعي دلوقتي، أكيد شفت منهم كتير،
وعلى فكرة الوضع الحالي مختلف تماما عن خمسة وعشرين سنة فاتت، فالدين كان له هيبة أكثر من كده ومكنش حد يتجرأ يتكلم في الكلام في الدين زي ما الناس بتعمل دلوقتي،
ولو عشت لك كمان خمسة وعشرين سنة هتشوف العجب😑

المرة الجاية إن شاء الله هنكمل الكلام عن علامات الساعة الصغرى👌

مصادر حلقة النهاردة في التعليقات👇

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐المصادر⭐


https://dorar.net/hadith/sharh/124104

https://www.google.com/amp/s/islamqa.info/amp/ar/answers/300003

https://dorar.net/hadith/sharh/63363

https://www.dorar.net/hadith/search?q=%20%D9%84%D9%8A%D9%82%D9%8A%D8%B3%20%D8%B9%D8%B1%D8%B6%20%D8%A7%D9%84%D8%AC%D9%86%D8%A9%20%D9%81%D8%B7%D8%A7%D8%B1%20%D9%85%D8%AF%D8%A9%20300%20%D8%A3%D9%84%D9%81%20%D8%B9%D8%A7%D9%85&m%5B0%5D=911&s[]=14540&page=5

https://dorar.net/hadith/sharh/64562

رابط فهرس القناة 👇🏻
https://t.me/prophets_stories/2453