لوا ويقول لك مثلا:
أسلوبك وحش!...روح بص لنفسك الأول!...خليك في حالك!
أنا مش بحب الجدال! كرهتونا في الدين🙄
ماهو خلاص ماعندهوش أي كلام مُقنع فتلاقيه حوّل الموضوع لناحية تانية خالص عشان مايطلعش غلطان وتطلع انت انتصرت عليه😑

وده إللي عملوه قوم إبراهيم عليه السلام... يلّا احرقوه وخلونا نخلص من القصة دي كلها 😤
"فَمَا كَانَ جَوَابَ قَوْمِهِ إِلَّا أَنْ قَالُوا اقْتُلُوهُ أَوْ حَرِّقُوهُ "

فحفروا خندق وقعدوا يجمعوا الخشب عشان يولعوا نار ،
فجمعوا حطب كتير جدا
ولما ولّعوا النار كانت النار كبيرة جدا لدرجة إنهم ماكنوش عارفين يقربوا منها،
فجابوا المنجنيق وهو آلة لرمي الحجارة لمسافات بعيدة حطوا فيه إبراهيم عليه السلام وقذفوه في النار،
"قَالُوا ابْنُوا لَهُ بُنْيَانًا فَأَلْقُوهُ فِي الْجَحِيمِ "

في اللحظة إللي رموه فيها إبراهيم عليه السلام قال:
حسبي الله ونعم الوكيل👌
حسبي الله يعني ربنا يكفيني ونعم الوكيل يعني لا أتوكل على أحد غيره،
"إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ "

فربنا قال للنار:
"يَا نَارُ كُونِي بَرْدًا وَسَلَامًا عَلَى إِبْرَاهِيمَ"
ولو كان قال "بردا" بس كان برد النار أضر بإبراهيم،
لكنه قال برد وفي نفس الوقت سلام يعني لا تؤذيه... يكون في درجة حرارة مناسبة 👌
☆فالنار لا تحرق إلا بأمر الله، والسكين لا تقطع إلا بأمر الله،
محدش له القدرة بذاته ،
ربنا هو إللي بيعطي القدرة للشيء👌
أكيد شوفتوا فيديوهات لناس تخبطهم عربية مثلا وتلاقيهم قاموا عادي جدا وكإنهم ماحصلهمش حاجة😅
وده لأن مفيش حاجة بتضر ولا بتؤذي بنفسها إلا بأمر الله ،
فاكرين لما قلنا الحديث:
"واعلم أن الأمة لو اجتمعت على أن يضروك بشيء لن يضروك إلا بشيء قد كتبه الله عليك،؟
يعني أي حد بيؤذيك الأذى ده حصل بأمر الله وإذنه ومشيئته،
زي بالظبط كمان تعاويذ السحر : "وما هم بضارين به من أحد إلا بإذن الله"
فساعتها تقول إيه؟
تقول كما قال إبراهيم عليه السلام بكل يقين :
حسبي الله ونعم الوكيل😊

☆ملحوظة مهمة:
في كلام بيُروَى عن إبراهيم عليه السلام إنه لمَّا رماه قومه بالمنجنيق إلى النار《 استقبله جبريل فقال: يا إبراهيم أَلَك حاجة؟
فقال إبراهيم: أمّا إليك فلا ، قال جبريل : فسل ربك. فقال إبراهيم : حسبي من سؤالي علمه بحالي》
الكلام ده يا جماعة باطل لا يصح🙅‍♂️❌
الصحيح الثابت إنه قال حسبي الله ونِعمَ الوكيل👌
وإللي عايز تفصيل أكثر هيلاقي الرابط في التعليقات👇

المهم،
إبراهيم عليه السلام قعد في النار لحد ما انطفت
وكانت كل الحيوانات بتحاول تطفي النار على إبراهيم حتى الضفدع،
كله بيطفي النار ، إلا الوزغ (البُرص) كان بينفخ في النار عشان تشتعل أكتر،
عشان كده رسول الله ﷺ نهى عن قتل الضفدع وأمر بقتل الوزغ👌

¤ممكن حد يسأل طيب مش كده ظلم 😑
إيه ذنب إن ذرية الوزغ كلها تُقتل عشان واحد بس كان بينفخ في النار😞
شوفوا،
هو قتل الوزغ مش بس عشان كده، لكن بنقتله كمان زي ما بنقتل الفواسق الخمسة إللي رسول الله ﷺ أمر إننا نقتلها حتى لو إحنا في الحرم أو مُحرمين، لإنه مؤذي وخبيث بطبعه ويُفسد الطعام👌
الفواسق الخمسة هم:
《الحية=العقرب=الفأرة=والكلب العقور=الحدأة <الحداية> 》

يُقال إن إبراهيم قعد في النار أربعين أو خمسين يوم
وإنه إبراهيم عليه السلام قال إن أفضل أيام عاشها كانت الأيام إللي كانت في النار،
لكن مفيش دليل واضح على الكلام ده وكلها اجتهادات المفسرين.
بعد ما خرج إبراهيم عليه السلام من النار الناس اتصدمت😳
طالع من النار سليم مفيهوش أي خدش!! ...النار حتى محرقتش هدومه!!
الحاجة الوحيدة إللي النار حرقتها كان الحبل إللي كانوا مقيدينه بيه عليه السلام،
"وَأَرَادُوا بِهِ كَيْدًا فَجَعَلْنَاهُمُ الْأَخْسَرِينَ"
ورغم إن قوم إبراهيم شافوا المعجزة دي قصادهم برده لم يؤمنوا وفضلوا كفار زي ماهمّ😞
واحد بس هو إللي آمن بإبراهيم عليه السلام وهو لوط عليه السلام، وكان ابن أخو إبراهيم،
يعني إبراهيم عم لوط عليهم الصلاة والسلام،
"فَآمَنَ لَهُ لُوطٌ.. وَقَالَ إِنِّي مُهَاجِرٌ إِلَى رَبِّي"

☆إللي قال إنه مهاجر إبراهيم مش لوط.
إبراهيم عليه السلام يئس منهم ومن عنادهم...فهيعمل إيه أكتر من كده 😑
فقرر إنه يهاجر ويسيب أهله ووطنه عشان يروح مكان تاني يعبد فيه ربنا ويوصل دين ربنا لناس تانية،
سمع النمرود بقصة إبراهيم عليه السلام،

☆والنمرود ده كان من الأربع ملوك إللي حكموا الأرض،
والملوك الأربعة دول اثنين مسلمين واثنين كفار،
الإثنين المسلمين كانوا: ذو القرنين وسليمان عليه السلام،
والإثنين الكفار كانوا النمرود و بُخْتُنُصّر،
وكان النمرود بيدّعي الربوبية.. يعني بيقول إنه ربّ...
والرب معناه مالك كل شيء وهو الخالق وهو المحيي والمميت وهو النافع والضار،
وده بنسميه عندنا في الإسلام 《توحيد الرّبُوبِية》
وطبعا معنى ال

رب غير معنى الإله👌
لأن الإله معناه هو من يستحق العبادة وأي عبادة بنعملها من صلاة أو ذكر أو ذل أو خشوع أو تعظيم تكون لله وبس👌
وده اسمه 《توحيد الأُلوهية》
عشان كده احنا بنقول لا إله إلا الله إللي هي كلمة التوحيد، يعني كإننا بنقول مفيش حد يستحق العبادة غيرك يا الله🙇‍♂️

فالنمرود بقى من قوته وجبروته كان بيقول إنه رب🤓
فقعد يجادل إبراهيم وبيسأله هو مين ربك ده بقى🙄
"أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ أَنْ آتَاهُ اللَّهُ الْمُلْكَ"

فقال إبراهيم عليه السلام ربي الذي يحيي ويميت😊
"إِذْ قَالَ إِبْرَاهِيمُ رَبِّيَ الَّذِي يُحْيِي وَيُمِيتُ"

فقال النمرود أنا أحيي وأميت😏
"قَالَ أَنَا أُحْيِي وَأُمِيتُ"
وعشان يثبت إنه يحيي ويميت، جاب اتنين محكوم عليهم بالإعدام وقال أنا هعفو عن ده ويبقى كده أنا أحييته،
وهقتل ده ويبقى كده أنا موتّه😌

☆يا راااااجل😳 ده انت بتتعب والله فعلا في الإحياء والإماتة إيه المعجزة دي! وإيه القدرات الخارقة دي كلها😀

طبعا إبراهيم عليه السلام من حكمته ورشده وجداله بالتي هي أحسن محبش يطوّل ويضيع وقت في الحوار العقيم ده ويقعد يشرحله إنه يقصد إنه يخلق من العدم وإن لما الإنسان يموت هيرجعه للحياة تاني و...و...و...إلى آخره🙄
لأ، قال لك ده واحد مجادل بالباطل، فأنا هجيبله حُجة تانية قاصمة ما يعرفش يرد فيها بحرف👌
فراح قايله بكل بساطة : طيب أنا ربي بيطلّع الشمس من المشرق فخليها انت تطلع من المغرب☺️
"قَالَ إِبْرَاهِيمُ فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ"
فالنمرود اتصدم ومقدرش ينطق بكلمة🤭
"فَبُهِتَ الَّذِي كَفَرَ وَاللَّهُ لَا يَهْدِي الْقَوْمَ الظَّالِمِينَ"
سبحان الله، ربنا وهب للإنسان عقل يهتدي به إلى الحق، وبعدين لما يظهر له الحق المبين يُعرض ويستكبر..
نعوذ بالله من الكبر😞

بعد كده جهّز إبراهيم نفسه ومعه زوجته سارة وخرج من أرض بابل هو ولوط عليه السلام وهاجروا إلى فلسطين في بلاد الشام.
هم الثلاثة سكنوا بلاد الشام وبعدين حصل أزمة في بلاد الشام فاضطر إبراهيم عليه السلام إنه يسيب البلد إللي كان فيها وراح لمصر ومعاه زوجته سارة،
أما لوط فراح سكن على حدود فلسطين في أقصى جنوب البحر الميت مع قوم اسمهم سدوم وهنعرف قصتهم بعدين إن شاء الله.
المهم،
لما إبراهيم عليه السلام دخل مصر كان ساعتها يحكم مصر ملك جبار، وكلمة جبار بيقولوها على الشخص إللي قتل ناس كتير،
فالملأ والحاشية بتاعته قالوا له إن في واحدة مشافوش في جمالها دخلت مصر😮
وكانت سارة أجمل نساء العالمين بعد حواء..فقال لهم يجبوها له،
فلما راحوا عشان يجيبوا سارة قال لها إبراهيم إذا سألوكِ عني قولي لهم إن أنا أخوكِ =يقصد أخوكي في الإسلام يعني=
وكان الملك الجبار ده لو عرف إن المرأة ليها زوج كان يقتله،
وده لاحتمالين :
¤إما إنه يغار إن المرأة يكون لها زوج،
¤والإحتمال التاني وهو إنه في دينه إنه مينفعش ياخد امرأة لها زوج فكان بيقتل زوج المرأة،
فإبراهيم عليه السلام لما عرف قال لها تقول إنها أخته عشان متحصلش مفسدتين: الاغتصاب والقتل،
فالاغتصاب واقع سواء كان إبراهيم عليه السلام حي أو ميت،
والدليل على كده إنه حتى لما قال إنه أخوها فهم أخذوها برده مسابوهاش.

☆طيب ممكن حد يسأل ويقول:
ليه إبراهيم عليه السلام مدافعش عن سارة ومنع الجنود إنهم يأخذوها حتى لو كانت النتيجة قتله؟
وهل لو في عصرنا دلوقتي حصل إن واحد جاء ليعتدي على المرأة، هل زوجها أو أخوها أو أبوها يسلمها عادي ونقعد ندعي زي إبراهيم عليه السلام واحنا في ديننا إن من قُتل دون عرضه فهو شهيد🤔

أولا: الشرائع مختلفة، يعني شريعة إبراهيم عليه السلام مختلفة عن شريعة الإسلام،
وإبراهيم عليه السلام لسه له رسالة وهي دعوة الناس للتوحيد،
ولو قُتل إبراهيم عليه السلام مين إللي هيبني الكعبة بعدين وفين ذرية الأنبياء إللي هييجوا من نسله،
فربنا ألهمه بأفضل حل في الوقت ده👌

ثانيا :
احنا مش بنحكم بمشاعرنا، لازم نفكر ونحكم بالعقل ونشوف أفضل الحلول وإبراهيم عليه السلام كان حكيم،
فهو اختار أخف الضررين وهو تسليم سارة للجنود بدون ما يعرض نفسه للقتل،
فبدل ما يكون الاعتداء على سارة وقتل إبراهيم، لأ يكون ضرر واحد فقط، وفي نفس الوقت هو مكنش هيسكت،
يعني هو كان عنده ثقة بالله إللي نجاه من النار إنه هينجي سارة، فكان الحل إنه يلجأ إلى الله وهو إللي ينقذهم من الطاغية👌
◇طيب لو الموقف ده حصل في واقعنا الحل إيه😕
أولا: التوكل على الله واللجوء إلى الله بالدعاء زي ما إبراهيم عليه السلام عمل،
وربنا قال :
"أمن يجيب المضطر إذا دعاه"
ثانيا: الأخذ بالأسباب، يعني يشوف طريقة ينجي نفسه وأهله من القتل أو الاعتداء،
فمش معنى إن رسول الله ﷺ قال إن من قُتل دون عرضه فهو شهيد يبقى الإنسان يرمي نفسه للقتل بحجة الدفاع عن عرضه👌
لأ، يأخذ بالأسباب ويفكر بطريقة يطلع بيها من الموقف ده، يعني لو هو عنده

حل يقدر ينجي نفسه وينجي زوجته أو بنته أو أخته من القتل والاعتداء يبقى يجب عليه إنه يعمل الحل ده،
لأن لو هو عنده حل ومأخدش بيه هيتحاسب لأن عرّض نفسه وأهله للأذى بدون داعي،
يعني مثلا ممكن يُظهر استسلامه في حين إنه مخطط لخطة يقدر ينقذ بها نفسه وأهله من القتل،
طيب مفيش خطة ومش عارف يعمل حاجة؟!
يبقى يدافع عن عرضه وحتى لو قُتل وساعتها هيكون شهيد👌
فإبراهيم عليه السلام دفع أقل الضررين،
هو ضعيف...وهم كده كده هياخدوا سارة...فبدل ما ياخدوا سارة وهو كمان يُقتل... لأ خلّاهم ياخدوا سارة ويفضل هو على قيد الحياة يدعي ربنا إنه ينجيهم وده من حكمته عليه السلام،
ففعلا أخدوا سارة وقعد إبراهيم عليه السلام يصلي ويدعي ربنا...فلما أدخلوا سارة على الملك وحاول يقرب منها دعت ربنا وهو سمعها وهي بتتكلم... فإيده اتشلت😐
فقالها إدعيلي إن إيدي ترجع زي ما كانت وأنا مش هقرب منك،
ففعلا دعت سارة ربنا... فرجعت إيده طبيعية،
فحاول يقرب منها تاني فإيده اتشلت تاني ...فقالها ادعيلي فدعتله ورجعت طبيعية....حصل الموضوع ده ثلاث مرات لحد ما في الآخر نادى على الخدم بتوعه قالوله خدوها من هنا إنتم جايبين لي شيطانة 😳
فسابها ترجع لإبراهيم عليه السلام وأعطاها هاجر هدية،
فلما شافها إبراهيم عليه السلام سألها إيه إللي حصل ؟
قالت له ربنا نجاني منه والجبار ده أعطاني هاجر هدية،
يعني زي قربان لها عشان متإذيهوش😅
فخرج إبراهيم من مصر ومعه سارة وهاجر وراحوا لبلاد الشام مرة تانية.

إيه إللي حصل معاهم بعد كده؟
ده إللي هنعرفه الجزء الجاي إن شاء الله.

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

آيات قصة ابراهيم عليه السلام الجزء الثاني😊

"قَالُوا مَنْ فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ *
قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ *
قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ *
قَالُوا أأنْتَ فَعَلْتَ هَذَا بِآلِهَتِنَا يَاإِبْرَاهِيمُ *
قَالَ بَلْ فَعَلَهُ كَبِيرُهُمْ هَذَا فَاسْأَلُوهُمْ إِنْ كَانُوا يَنْطِقُونَ * فَرَجَعُوا إِلَى أَنْفُسِهِمْ فَقَالُوا إِنَّكُمْ أَنْتُمُ الظَّالِمُونَ *
ثُمَّ نُكِسُوا عَلَى رُؤوسِهِمْ لَقَدْ عَلِمْتَ مَا هَؤُلَاءِ يَنْطِقُونَ *
قَالَ أَفَتَعْبُدُونَ مِنْ دُونِ اللَّهِ مَا لَا يَنْفَعُكُمْ شَيْئًا وَلَا يَضُرُّكُمْ "

" قَالَ أَتَعْبُدُونَ مَا تَنْحِتُونَ * وَاللَّهُ خَلَقَكُمْ وَمَا تَعْمَلُونَ"

" أُفٍّ لَكُمْ وَلِمَا تَعْبُدُونَ مِنْ دُونِ اللَّهِ أَفَلَا تَعْقِلُونَ"
" فَمَا كَانَ جَوَابَ قَوْمِهِ إِلَّا أَنْ قَالُوا اقْتُلُوهُ أَوْ حَرِّقُوهُ "

" قَالُوا ابْنُوا لَهُ بُنْيَانًا فَأَلْقُوهُ فِي الْجَحِيمِ "

" قَالُوا حَرِّقُوهُ وَانْصُرُوا آلِهَتَكُمْ إِنْ كُنْتُمْ فَاعِلِينَ *
قُلْنَا يَانَارُ كُونِي بَرْدًا وَسَلَامًا عَلَى إِبْرَاهِيمَ "

" إِنَّ النَّاسَ قَدْ جَمَعُوا لَكُمْ فَاخْشَوْهُمْ فَزَادَهُمْ إِيمَانًا وَقَالُوا حَسْبُنَا اللَّهُ وَنِعْمَ الْوَكِيلُ "

" فَأَنْجَاهُ اللَّهُ مِنَ النَّارِ "

" وَأَرَادُوا بِهِ كَيْدًا فَجَعَلْنَاهُمُ الْأَخْسَرِينَ"

" فَآمَنَ لَهُ لُوطٌ وَقَالَ إِنِّي مُهَاجِرٌ إِلَى رَبِّي"

" أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ أَنْ آتَاهُ اللَّهُ الْمُلْكَ
إِذْ قَالَ إِبْرَاهِيمُ رَبِّيَ الَّذِي يُحْيِي وَيُمِيتُ قَالَ أَنَا أُحْيِي وَأُمِيتُ
قَالَ إِبْرَاهِيمُ فَإِنَّ اللَّهَ يَأْتِي بِالشَّمْسِ مِنَ الْمَشْرِقِ فَأْتِ بِهَا مِنَ الْمَغْرِبِ
فَبُهِتَ الَّذِي كَفَرَ وَاللَّهُ لَا يَهْدِي الْقَوْمَ الظَّالِمِينَ"

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الثالثة_عشرة
#قصة_إبراهيم(٣)
#إسماعيل_الذبيح
#قصة_زمزم

قلنا المرة إللي فاتت إن إبراهيم وسارة ومعاهم هاجر توجهوا لبلاد الشام مرة تانية بعد ما خرجوا من مصر وراحوا قعدوا في فلسطين،
إبراهيم عليه السلام كان كِبِر في السن ومكنش عنده أولاد،
وكان بيتمنى إنه يكون عنده ولد،
فدعا ربنا إنه يرزقه الذرية الصالحة:
"رَبِّ هَبْ لِي مِنَ الصَّالِحِينَ ۩ فَبَشَّرْنَاهُ بِغُلَامٍ حَلِيمٍ "
وكانت سارة عقيم لا تلد،
فوهبت سارة لإبراهيم عليه السلام "هاجر" وبقت ملك يمين له،
وملك اليمين زيها زي الزوجة من ناحية المعاشرة الزوجية والإنجاب،
فحملت هاجر ... وولدت إسماعيل عليه السلام،
وطبعا كأي أب لسه أول مرة ينجب طفل من صلبه إبراهيم عليه السلام اتعلق بولده إسماعيل،
وكمان هنا الوضع مختلف لأن الولد جه لأب كبير في السن يعني بعد طول اشتياق وصبر فأكيد الإهتمام هيكون مُضاعف...
فهنا غارت سارة 😅
مع إنها هي إللي وهبت هاجر لإبراهيم عليه السلام عشان تخلف له ولد، لكن طبيعة غيرة النساء تغلب🤷‍♂️
يعني غيرة المرأة من الزوجة التانية دي حاجة طبيعية لا تُحاسب عليها إلا إذا المرأة تعدت بسبب الغيرة وظلمت أختها فاغتابتها أو طلبت من زوجها إنه يطلقها أو كادت لها المكائد وما إلى ذلك،
فالغيرة مادامت في القلب ويظهر منها الشيء المعقول إللي ما يتسببش في ضرر أو سوء ومدفعتش المرأة لإرتكاب أي محرم، فالمرأة لا تُحاسب على الغيرة دي😊

ولو بصينا لسارة هنلاقي إن من حقها فعلا تغير في موقف زي ده الصراحة،
انتم متخيلين زوجة مرت مع زوجها بأحداث كتير وعاشت معاه سنين طويلة -وده مش أي زوج ده إبراهيم خليل الله،
فتقوم الزوجة دي تلاقي واحدة تانية في يوم وليلة مفرحة قلب زوجها بالولد إللي هي مقدرتش توهبه له، ومستحوزة هي والولد على جزء كبير من اهتمامه😶
لاشك إن من حقها تغير وقلبها يَضِيق بده،
فربنا عز وجل رأفةً بسارة ورحمةً بمشاعرها أمر إبراهيم عليه السلام إنه ياخد هاجر وابنها الرضيع إسماعيل ويوديهم مكان تاني إللي هو مكة،
خدوا بالكم إن ربنا لما يريد شيء بيهيء له أسبابه👌

يعني يا جماعة بعدين ربنا هيأمر إبراهيم وإسماعيل عليهما السلام إنهم يبنوا الكعبة بيت الله الحرام، فإزاي كانوا هيبنوها وهم أصلا قاعدين في فلسطين والبيت الحرام هيكون في مكة💁‍♂️
فكان لازم ربنا يهيأ أسباب سفرهم لمكة أصلا،
و كمان ساعتها مكة كانت صحراء جرداء ومكنش ينفع لسه حد يعيش هناك ولا كان في زمزم لسه ولا كان في أي حاجة..فإزاي بقى كان كل ده هيحصل وييجوا مكة ويحفروا زمزم😕
فبتقدير وتدبير من ربنا عز وجل، سارة غارت وبالتالي ربنا أمر إبراهيم عليه السلام إنه يأخذ هاجر وإسماعيل لمكة عشان يهيء الأسباب إن البيت الحرام يتبنى وتبقى البلد الحرام مكة بلد معمور يأتي إليها الناس أفواجا من كل مكان فسبحان الله العظيم👌

◇ومن هنا أحب أقول لكم محدش يزعل لما يدعي دعوة وتتأخر، أو لما تحصلكم أي حاجة تضايقكم..
محدش يعرف الخير فين لأننا معندناش علم ربنا الواسع المحيط بكل شيء ولا عندنا حكمته الواسعة عشان نقدر نحكم على الأمور،
مش يمكن ربنا بيهيأ الأسباب عشان يحقق لنا إللي نفسنا فيه وأحسن كمان؟!!
مش يمكن ربنا قَدَّر الحاجة إللي احنا شايفينها وحشة ومضايقانا دلوقتي عشان يمنع عننا كارثة في المستقبل؟
اعرفوا كويس أوي إن تقدير ربنا لينا داااايما خير، بس احنا نثق فيه ونتوكل عليه وننقاد له😊
المهم،
إبراهيم عليه السلام أخد هاجر وإسماعيل وسافروا لمكة عند موضع البيت الحرام إللي ماكنش لسه اتبنى وكان أرض صحراء جرداء من غير زرع ولا مية، ساب لها قِربة مية وجِراب فيه تمر،
يعني نقدر نقول إزازة مية وكيس تمر،
وبعدين سابهم وإداهم ضهره ومشي!!
فهي استغربت🤨
وقعدت تنادي عليه:
يا إبراهيم إنت سايبنا لمين هنا وماشي؟!
وهو مش بيبص لها ومش بيرد ومكمل مشي...!
وهي تنادي عليه وتكرر نفس السؤال...فهي حست إن في حاجة، فسألِته: هو ربنا إللي أمرك بكده؟
فالْتَفَت وقال: نعم...فقالت بكل ثقة إذاً لن يضيعنا👌
يعني مادام ربنا إللي أمر وقدر كده يبقى أمره وقدره خيييير 😊
☆انتم مخيلين🙊
زوجة فجأة زوجها يجيبها في صحرا هي وابنها ويسيب معاها بشوية تمر ومية ويمشي ويسيبهم وكمان ما يردش عليها يطمنها بكلمة ولا يشرح لها شيء،
تقوم بدل ما تتهمه إنه مش أب ولا عنده رحمة ولا إنسانية –لإنها عارفة كويس أخلاقه ودينه- تفكر في أول حاجة إييييه؟؟؟
ربنا.. مالك الملك.. مالك إبراهيم ومالكها ومالك إسماعيل..
وكإن مفيش أي حاجة تانية هتطمنها لو السؤال ده كانت إجابته لأ..
مجرد ما اطمنت إن ربنا هو إللي أمر بكده ارتاحت واطمنت👌
دايما قولها لنفسك كل ما تحصلك مشكلة...
كل ما تتأخر عنك دعوة...
كل ما يشتد عليك البلاء...
قول لنفسك: مش ده قدر ربنا ؟
مش هو إللي أمر بده؟
مش هو إللي هيأ أسباب ده كله وأنا عامل استخارة وواخد بالأسباب زي ما أمرني ومُسلّم له كل أموري؟
خلاااا

ااص = يبقى ربنا مش هيضيعني 👌
بس خد بالك بقى😀
متكونش إنت سبب في إللي بيحصلك ده وترمي بلاك وشكوتك على قدر ربنا 😅
يعني مايكونش عندك امتحانات مثلا وماذاكرتش فحليت وحش و تيجي تقول يلاّ قدر ربنا كله خير أنا ما شاركتش في السقوط ده🤓
لأ، الكلام ده مش سليم.. لاااازم تاخد بالأسباب وتستخير ربك كمان وده من الأسباب👌
لما تاخد بالأسباب وتذاكر ثم متنجحش ده قدر ربنا بابتلاء إنت ما اتسببتش فيه،
يبقى هنا تقول لنفسك قدر ربنا ليا كله خير وأكيد ربنا رايد بحكمته أمر تاني أنا لسه مش فاهمه ولا شايفه،
وهكمل أخذ بالأسباب ومش هوقف لإن الأخد بالأسباب ده طاعة لله في حد ذاته، لحد ما ربنا يكشف لي من الحكمة ما يُطمـئِن قلبي أكثر ويقر عيني بالثمرة إن شاء الله.

بعد ما إبراهيم عليه السلام مشي بعيد عنهم رفع إيده للسماء وقال:
يارب أنا تركت أهلي في مكان مافيهوش زرع عند بيتك المحرم زي ما أمرتني ورجائي إنك تخلي بعض الناس يروحوا يسكنوا معاهم هناك عشان ما يبقوش لوحدهم كده في المكان المُوحش ده🤲
"رَبَّنَا إِنِّي أَسْكَنْتُ مِنْ ذُرِّيَّتِي بِوَادٍ غَيْرِ ذِي زَرْعٍ عِنْدَ بَيْتِكَ الْمُحَرَّمِ رَبَّنَا لِيُقِيمُوا الصَّلَاةَ ،
فَاجْعَلْ أَفْئِدَةً مِنَ النَّاسِ تَهْوِي إِلَيْهِمْ وَارْزُقْهُمْ مِنَ الثَّمَرَاتِ لَعَلَّهُمْ يَشْكُرُونَ"

هاجر كانت بتاكل من التمر وتشرب من المية إللي كانت معاها وترضع إسماعيل،
لحد ما المية والتمر خلصوا واللبن بتاعها جف وخلص،
وبقى إسماعيل بيبكي من الجوع...
فهي ماقدرتش تستحمل إنها تشوفه كده وهي مش قادرة تعمل حاجة...أم لطفل رضيع وابنها بيبكي جعان في صحراء وهي مش قادرة تعمل حاجة ولا عارفة تروح فين ولا فيه حد تنادي عليه يديها أكل ومية،
ومع ذلك توكلت على الله وقامت تسعى ورا الرزق وتدور على أي حاجة ...أي أكل أو أي مية أو أي إنسان😞
فطلعت على جبل الصفا فمالقتش حاجة.. وطلعت على جبل المروة مالقتش حاجة ،
فضلت تطلع وتنزل من الجبل ده للجبل ده... سبع مرات متتالية،
ولكم أن تتخيلوا..امرأة وحيدة من غير سند أو راجل يشيل عنها.. جعانة...عطشانة...مرهقة.. هزيلة.. ابنها بيعيط من الجوع طالعة نازلة من جبل للتاني في عز الحر😔

وفي وسط كل التعب والضعف ده بتبص بعنيها كل شوية على إسماعيل من بعيد عشان تطمن عليه،
وفجأة وهي بتبص عليه في مرة لقت المية بتطلع من عند رجله،
وكان ساعتها جبريل عليه السلام ضرب الأرض بطرف جناحه فتفجر منها الماء،
فلما شافت المية راحت جري وقعدت تحوط عليه ابإيديها وتقول زُم زُم
عشان كده اتسمى بئر الماء ده بزمزم ، والمية 💦عمالة تفور،
وبقت تاخد من المية تحط في القِربة إللي كانت معاها
وبدأت الطيور🕊 تتجمع لأن الطيور بتيجي على المكان إللي فيه مية،
في الوقت ده كان في قبيلة من جُرْهم معدية من المكان فشافوا الطيور وقالوا أكيد في مية في المكان ده خلونا نروح نشوف👌
وقبيلة جُرهم دي من العرب العاربة يعني العرب إللي بيتكلموا اللغة العربية،
فالعرب قبل إسماعيل عليه السلام اسمهم العرب العاربة وكان منهم قبائل كثير زي عاد وثمود ومدين إللي قلنا على أنبياؤهم قبل كده إنهم عرب😊
☆فاكرين لما قلنا إن هود وصالح وشعيب عليهم السلام كانوا عرب😁
كان من القبائل العربية دي قبيلة جُرْهم إللي كانت معدية وقت فوران ماء زمزم ،
كان سد مأرب بتاعهم إنهار، فرحلوا عن بلدهم يبحثوا عن مكان جديد يعيشوا فيه ويكون فيه حياة وزرع ومية وغيره،
فلما وصلوا عند هاجر وإسماعيل وشافوا المية قالوا لها:
ممكن نسكن في المكان هنا معاكم ؟
قالت لهم ماشي بس بئر الماء دة بتاعي أنا.. ملكي أنا👌
قالوا : أكيد..
وبعتوا بقى جابوا أهلهم واستقروا في مكة عند بئر زمزم.

☆ملحوظة:
هاجر مش قصدها إن المية بتاعتها يعني هتمنع عنهم الماء، لأ طبعا، وإلا كانوا هيوافقوا يقعدوا جنبهم على أساس إيه!
ما كانوا يسكنوا في أي مكان تاني مافيهوش مية🤷‍♂️
لكن هي فقط بتثبت مِلكية البئر عشان محدش ينازعها عليها.

بدأ إسماعيل عليه السلام يكبر ويتعلم منهم اللغة العربية ،
وكان هو أول من نطق باللغة العربية الفصحى المعروفة إللي نزل بيها القرآن،
والعرب ورثوا الفصاحة عن إسماعيل عليه السلام،
فالعرب إللي جاءوا بعد كده من ذرية إسماعيل عليه السلام ومنهم محمد ﷺ اسمهم العرب المُستَعرِبة، لأنهم اتعلموا اللسان العربي من قبيلة جُرهم 😊

●بالنسبة لإبراهيم عليه السلام كان بيتكلم باللغة الآرامية، أو السّرْيَانيّة،
وهي لغة بين اللغة العربية القديمة، واللغة العربية بتاعتنا إللي إحنا عارفينها: "لغة القرآن" ،
وبالمناسبة اللغة العبرية بتاعة اليهود هي فرع من فروع اللغة العربية القديمة👌

المهم،
إبراهيم عليه السلام كان بييجي يزور هاجر وإسماعيل عليه السلام كل فترة -وقيل كل شهر..
وكان إبراهيم عليه السلام بيحب إسماعيل لأنه كان ولده الوحيد ساعتها وكان ابنه البكر وكمان اتولد بعد زمن طويل فكان له مكانة عظيمة في قلبه زي ما

قلنا،
لكن إبراهيم عليه السلام كان خليل الله😊
والخِلّة دي منزلة عظيمة لازم يكون فيها القلب فاضي من حب كل شيء إلا حب الله...فعشان كده ربنا ابتلى إبراهيم ابتلاء عظيم جدا👌
ربنا أراد إنه يختبر إبراهيم عليه السلام في صدق محبته له عز وجل ويَعلم وُيظهِر مين إللي حبه في قلب إبراهيم عليه السلام أكبر:
حبه هو عز وجل ولاّ حب ابنه إسماعيل...هل هيقدم حبه لابنه على أوامر الله ولا هيعمل العكس😕
طبعا إحنا عارفين إن رؤيا الأنبياء وحي👌
فإبراهيم عليه السلام رأى رؤيا إنه بيذبح ابنه😳
طبعا ده معناه إن ربنا بيؤمره إنه يذبح ابنه😶
متخيلين الصدمة إللي إبراهيم عليه السلام فيها😥
ده احنا بيجيلنا الأمر من ربنا في حاجات بسيطة جدا ومع ذلك بنحس إنها تقيلة وبنقول مش قادرين وبنقعد ندور على أعذار😞
ده جاله الأمر بذبح ابنه البكر الوحيد إللي اتولد له بعد ٨٤ سنة😑
يعني مش إن ابنه هيموت لأ ده انت إللي هتذبحه يا إبراهيم بإيدك👌
طيب هيعمل إيه ويتصرف إزاي😟
إبراهيم عليه السلام لإنه يعلم علم اليقين إن ابنه ده مش بتاعه ولكنه وديعة عنده إلى وقت معين وإن ربنا هو إللي رزقه بيه؛
سلّم الأمر لله بكل رضا وطمأنينة و بدون أي تردد، وراح لإسماعيل عليه السلام وأخبره بالموضوع،
" فَلَمَّا بَلَغَ مَعَهُ السَّعْيَ قَالَ يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانْظُرْ مَاذَا تَرَى"
وكان ساعتها إسماعيل كِبر وبقى بيعتمد على نفسه ويشوف مصالحه ويدرك ويميز الكثير من الأمور ودة معنى كلمة "بلغ معه السَّعْيَ" حوالي سبع سنين كده.

☆وهنا إبراهيم عليه السلام بيعلمنا منهج تربوي مع عيالنا وهو إننا نستشيرهم في الأمور إللي تخصهم...
يعني إبراهيم عليه السلام مراحش أخد إسماعيل عليه السلام وذبحه وخلاص انتهى الموضوع😑
لأ، مع إن ده أمر إلهي مفيش فيه أي مجال للعصيان لكنه شاركه معاه في الموضوع لأنها حاجة خاصة بيه، وعشان يُشارك ابنه معاه في أجر الصبر والإحتساب👌
وكمان لإن ابنه راشد بما يكفي عشان يتحاور معاه وياخد ويدي ويقرر بحكمة في الأمر إللي هيُستشار فيه،
فمتقولش لابنك إعمل إللي بقولك عليه وخلاص ويكون أمر يخصهم ويمس أمورهم الشخصية بالفعل 😤
ماتقررش بالنيابة عنه هياكل إيه ويلبس إيه ويحب إيه ويكره إيه وباقي أموره من غير ما تاخد رأيه فيها،
طبعا لو رأيه غلط توضح له الصح إيه وتتحاور معاه وتعلمه التفكير المنطقي الصائب الراشد بيكون إزاي،
ولو الأمر أكبر من مستوى تفكيره وقراراته الراشدة فطبعا ده خارج كلامنا😅
زي إنك مثلا تاخد رأي ولادك وهما لسه أولى ابتدائي هل تخرجوا من التعليم ولاّ تكملوا،
لإن معروفة الإجابة هتكون إيه طبعا😀
يعني بشكل عام وباختصار:
ما تخليش ابنك معتمد عليك في تقرير أموره في كل حاجة تخصه..كبّره وعلمه إزاي يتحمل المسؤولية ويصنع قرار وكل موقف بتقديره بقى حسب كل أسرة وكل سن وكل بيت👌

إسماعيل عليه السلام بقى رد بكل صبر واستسلام لله وقال: يا أبتِ افعل ما تؤمر ستجدني إن شاء الله من الصابرين،
فهو استعان بربنا بإنه أثبت اعتماده وتوكله في الثبات على الله عز وجل👌
مقلش "انا أدها وأقدر أستحمل"، واعتمد على قوته وثباته الانفعالي من دون الله... لأ ..
قال 《إن شاء الله》 هتلاقيني صابر وثابت يا أبي، استعان بالله عشان ربنا يثبته على البلاء العظيم ده،
وتقبل أمر ربنا بكل صبر ويقين 😊
"قَالَ يَاأَبَتِ افْعَلْ مَا تُؤْمَرُ سَتَجِدُنِي إِنْ شَاءَ اللَّهُ مِنَ الصَّابِرِينَ"

خلاص إبراهيم حطه على وشه، وأخفى إسماعيل عليه السلام وشه عشان أبوه ماتتغلبش عليه الشفقة فيتراجع عن الذبح،
"فَلَمَّا أَسْلَمَا وَتَلَّهُ لِلْجَبِينِ"
تخيلوا معايا كده،
أب ماسك في إيده سكينة ...والابن قاعد في الأرض مستسلم تماما للذبح وفعلا يبدأ إبراهيم بذبح ابنه ..
لكن فجأة..!! السكينة مش بتقطع!😳
زي النار إللي مش بتحرق كده،
لإن زي ما قلنا: الحاجات مالهاش القدرة بذاتها ولكن بأمر الله فقط، مالك الملك👌
إبراهيم عليه السلام استغرب !!
السكينة مش راضية تذبح!!😮
وإسماعيل عليه السلام مستني آخر لحظات حياته وحاسس بالسكين بتتحرك على رقبته بس مفيش ألم ولا دم ولا روحه بتطلع!!
إيه الحكاية😦
وفي اللحظة دي يسمعوا مُنادي بينادي......

مين هو المُنادي ؟ وعايز إيه ؟
وليه السكين مذبحتش إسماعيل عليه السلام؟

ده إللي هنعرفه الجزء الجاي إن شاء الله😊

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الرابعة_عشرة
#قصة_إبراهيم(٤)
#البشارة_بإسحاق

وقفنا المرة إللي فاتت عند دهشة إبراهيم عليه السلام من السكينة التي لا تذبح وصوت المنادي إللي بينادي على إبراهيم عليه السلام😮
سمع المنادي بيقول :
يا إبراهيم قد صدقت الرؤيا!
"وَنَادَيْنَاهُ أَنْ يَا إِبْرَاهِيمُ *قَدْ صَدَّقْتَ الرُّؤْيَا"
يعني ربنا قال لإبراهيم إنت نفذت المطلوب منك خلاص ونجحت في الاختبار العظيم ده،
فالتفت إبراهيم عليه السلام لقى كبش ضخم عشان يذبحه فداء لإسماعيل عليه السلام، يعني يتم ذبحه بداله،
وخلاص البلاء انتهى وإبراهيم عليه السلام لم يذبح إسماعيل😊
¤إيه ده😳
طيب وكان لازمته إيه الموضوع من الأول مادام كده كده ربنا لا يريد قتل إسماعيل عليه السلام😥
لازم يعني الإبتلاء الشديد ده😖
أيوة لازم اختبار وتمحيص، وعشان كده احنا جينا الدنيا: 《ليبلوكم أيكم أحسن عملا 》
ربنا لا يبتلي عباده المؤمنين ليعذبهم أبدا👌
لكن كمان ربنا مش بيحاسبنا ولا بيجازينا بسابق علمه فينا...يعني لااااازم نشتغل ويبقى لينا عمل عشان على أساسه يحاسبنا فيعاقبنا أو يكافئنا،
إزاي ربنا هيكافئ إبراهيم عليه السلام ويرفع درجته بحاجة هو معملهاش لسه لكنه عارف عز وجل إنه هيعملها👌
مثال : إنت مكتوب لك عند ربنا إن ليك أجر الصابرين والكاظمين الغيظ،
إزاااااي هتاخد الأجر ده إلا لو ربنا ابتلاك بشخص سليط اللسان مش بيشوفك غير لما يحرق دمك🤓
ربنا مثلا كاتب لك أجر المجاهدين لأنفسهم...إزاااي هتاخد الأجر ده إلا لو إنت عمّال تجاهد نفسك وشيطانك على الطاعة وبعيد عن المعصية...وهكذا👌
وكذلك إبراهيم عليه السلام إزاي قصته هتكون مضرب للمثل في التسليم لأمر الله إلا لو اتحط في الإبتلاء ده؟
إزاي مكانته كخليل للرحمن هتيجي من غير ما يضحي بأغلى ما يملك في حياته في الوقت ده وهو ابنه👌

طيب فاكرين لما قلنا إن سارة غارت جدا من هاجر وابنها إسماعيل😊
إزاي قلب سارة هيهدى وتتحول قسوة الغيرة إلى شفقة وحب لو محصلتش الحادثة دي،
وإزاي كانت هتكون مناسك الحج لولا الحادثة دي😁

فمتفكرش أبدا أبدا إن ربنا بيقدّر الأمور عبثًا والعياذ بالله،لأ،
ده كل حاجة محطوطة في مكانها بالضبط...وكل حاجة متسجلة،
وجع قلبك ودموعك وقهرتك وظلم الناس ليك و...و...
كل ده ربنا مقدره عشان يشيل من عندك ذنب أو يطهر قلبك ويعلمك الصح من الغلط فتزكي نفسك أو يرفع درجتك في الجنة، واحنا قلنا إن ربنا لا يبتلي ليُعذب ...فما تقلقش😊

بعد ما ذبح إبراهيم عليه السلام الكبش فداءا لإسماعيل عليه السلام ورجعه لأمه هاجر رجع لفلسطين عند سارة من تاني
وكان إبراهيم عليه السلام ييزور إسماعيل وهاجر كل فترة زي ما قلنا،
وكان إسماعيل عليه السلام تزوّج من قبيلة جُرهم بعد موت أمه هاجر، فلما زاره إبراهيم عليه السلام ومالقاهوش
ولقي إمرأة وسألها عن إسماعيل، قالت له مش موجود، راح يصطاد لنا صيد ،
وكان إسماعيل بيخرج عشان يصطاد ،
فسألها عن حالهم بشكل عام عاملين إيه؟
فقالت له العيشة وحشة ومعندناش إللي يكفينا والحالة كرب و و و و... وقعدت تشتكي له من الحياة الزوجية مع إسماعيل😞
فقال لها لما زوجك ييجي سلمي عليه وقوليله غيّر عتبة بابك 😑
فلما رجع إسماعيل عليه السلام كإنه حس إن في حد جه، فسأل زوجته: حد جه النهاردة 🤔
فقالت له أيوة جالنا شيخ شكله كذا وكذا -ووصفته لإسماعيل عليه السلام- وسأل عليك وسأل عن حالنا فحكيت له،
فسألها ..طيب هو وصاكِ بحاجة🤔
قالت: قال لي أبلغك سلامه وبيقولك غير عتبة بابك،
فقالها ده أبويا وووصيته هي إني أفارقك..
وطلقها فعلا،
وتزوج امرأة تانية من جُرهم،
بعد مدة جه إبراهيم عليه السلام يزور إسماعيل مرة تانية وماكنش موجود و ردت عليه إمرأة تانية،
فسألها عن إسماعيل فقالت إنه خرج يصطاد، يعني في الشغل بلغة زماننا😅
فسألها عن حالهم وعيشتهم فحمدت ربنا وقالت إن ربنا موسع عليهم، فسألها بياكلوا إيه قالت: اللحم وسألها بيشربوا إيه: قالت الماء ،
فدعا لهم إبراهيم عليه السلام بالبركة وقالها:
لما زوجك يرجع سلمي عليه وقوليله ثبّت عتبة باباك،
فلما رجع إسماعيل عليه السلام سأل زوجته حد جه النهاردة🤔
قالت أيوة جالنا شيخ كبير -ووصفته ومدحته- وسأل على حالنا قلتله إننا كويسين،
فقال لها وصاكِ بحاجة🤔....قالت له: بيسلم عليك وبيقولك ثبّت عتبة بابك،
فقال لها ده أبي، وإنتِ العتبة إللي أمرني إني أثبتها، يعني بيوصيني ما أفارقكيش.

¤وييجي هنا سؤال...
هم ليه بيسموا المرأة عتبة 😕
لإن عتبة الباب والزوجة بيشتركوا في نفس الصفات الحميدة الطيبة: من حفظ البيت وستره وصيانة إللي جوة البيت من كل سوء برة البيت😊

¤طيب سؤال تاني 🤔
هو إسماعيل عليه السلام يسمع كلام أبوه كده على طول بدون ما يراعي مشاعر زوجته😥
طب وهي مراعتش ليه مشاعر زوجها لما واحد غريب ماتعرفوش يسألها عن حالهم وتقعد تشتكيله😑
يعني بغض النظر إن ده نبي هل ينفع إن المرأة تقعد تشتكي من زوجها للناس للرايح والجاي بصفة

عامة؟
يعني ده راجل غريب وقالت كده فما بالنا بالقريب هتكلمه عنه إزاي؟🙄
فإبراهيم عليه السلام لما أمر إسماعيل إنه يطلق زوجته كان قراره ده بسبب شكوى الزوجة وعدم رضاها برزق الله وسخطها الواضح على العيشة،
فهي متنفعش تكون زوجة نبي ابن نبي،
وهم مش أي أنبياء، ده واحد الذبيح إسماعيل عليه السلام، والثاني أبوه رسول من أولي العزم من الرسل وخليل الله المستسلم لأمر الله ...الراضي بقضاء الله ...
يعني احنا مش بنتكلم عن أي حد 😅
فإزاي تكون واحدة زي دي بتشتكي قلة الرزق و رِقّة العيش وتواضع النفقة ومش بتستر وتحفظ غيبة زوجها تكون في بيت النبوة ده👌
ده إحنا في عُرفنا لما واحد بيبقى عايز يتزوج وهو من عيلة معروفة مش بيدور على أي واحدة كده وخلاص...لأ بيدور على صفات معينة وعيلة معينة ومركز معين وبيدقق في مواصفات الزوجة الصبورة الحمولة العفيفة اللي لسانها محترم وعينها مليانة وأخلاقها كريمة، فما بالكم بالأنبياء أفضل البشر😶
فهو موصاهوش إنه يطلقها كده وخلاص بدون سبب معتبر،
وإلا فهو ماطلبش منه إن يطلق الزوجة التانية هي كمان إللي لقى فيها حسن الخلق والرضا برزق الله،
وكل ما كانت الزوجة صالحة ،كانت أكثر عونا لزوجها على أمور الدين والدنيا، وأعمق أثرا في تربية أبناء صالحين👌

المهم..
رجع إبراهيم عليه السلام لزوجته سارة في فلسطين
وهنا بقى حصلت المعجزة😮
تخيلوا معايا كده واحدة ست عجوزة عمرها ٩٠ سنة وعقيم لا تلد، وراجل عجوز عمره ١٢٠ سنة
راحوا لمستشفى وقالوا للدكاترة هو فيه أمل إننا نخلّف😞 الدكاترة ممكن يقولوا لهم إيه 😑
إنتم نفسكم لو شفتوا موقف زي ده قصادكم هتقولوا إيه على الراجل العجوز ده وزوجته😅
أهه ده بالضبط كان الوضع مع إبراهيم عليه السلام وزوجته سارة،
ولكن من يتق الله يجعل له مخرجا ويرزقه من حيث لا يحتسب👌
إبراهيم عليه السلام نفّذ أمر ربنا بذبح إسماعيل من غير ما يلاقي أي حرج في نفسه من طاعة الله،
فربنا مش بس كافؤه بإللي قلنا عليه👆،
لأ ..
ده كمان هيحققله معجزة وهيرزقه ولد تاني من زوجته "سارة" إللي كان نفسه ونفسها إنها تُنجب من زمان
ومش بس كده ..ده هيكون نبي !
ومش بس كده... ده هيتزوج وهيخلف ، وكل ده في حياة إبراهيم عليه السلام ، وحفيده ده هيكون نبي كمان، وابن حفيده كمان نبي😁
يعني الرجل العجوز إللي مكنش عنده أي أمل في ابن واحد ربنا رزقه بولد واتنين وهيشوف أحفاده وهتتكاثر ذريته وتملأ الأرض وهيكونوا أنبياء،
ومش بس كل ده 😊
لأ ده كمان باقي الأنبياء إللي هييجوا بعد كده كوووولهم هيكونوا من ذرية إبراهيم عليه السلام😁
عشان كده إبراهيم عليه السلام بيُلقب بـ ((أبو الأنبياء))
نتعلم من كده....
إن إللي يببذل لربنا شيء بإخلاص ربنا بيعوضه له أضعاف أضعافه ، فهو الكريم سبحانه👌
"وَمَنْ يَتَّقِ اللَّهَ يَجْعَلْ لَهُ مَخْرَجًا * وَيَرْزُقْهُ مِنْ حَيْثُ لَا يَحْتَسِبُ وَمَنْ يَتَوَكَّلْ عَلَى اللَّهِ فَهُوَ حَسْبُهُ إِنَّ اللَّهَ بَالِغُ أَمْرِهِ قَدْ جَعَلَ اللَّهُ لِكُلِّ شَيْءٍ قَدْرًا"

طيب قصة الولد التاني بدأت إزاي😁

إبراهيم عليه السلام كان أول من أكرم الضيوف،
وكان بيبحث عن ضيوف ويجيبهم عشان ياكلوا معاه في بيته،
وكان فاتح بيته للناس واحة ظليلة بحسن الضيافة والطعام والشراب، يدخلوا بيته بدون استئذان، وده من شدة كرمه،
لكن قعد فترة مكنش بيجيله ضيوف ،
لحد ما دخل عليه ثلاثة أشخاص....
كانوا أجمل بشر شافهم في حياته😮
لما دخلوا عليه سلموا ورد عليهم السلام وكان مستغربهم شوية لإنهم مش من البلد،
"هَلْ أَتَاكَ حَدِيثُ ضَيْفِ إِبْرَاهِيمَ الْمُكْرَمِينَ * إِذْ دَخَلُوا عَلَيْهِ فَقَالُوا سَلَامًا قَالَ سَلَامٌ قَوْمٌ مُنْكَرُونَ"
يعني قوم غيرمعروفين،

بعد شوية سحب نفسه من وسطهم من غير ما يحسوا
عشان يجيب لهم أكل ويضيّفهم بكرمه المعتاد،
فرجع لهم ومعاه عجل سمين مطبوخ وشهي جدا وحطه قدامهم عشان ياكلوا
"فَرَاغَ إِلَى أَهْلِهِ فَجَاءَ بِعِجْلٍ سَمِينٍ"
فلما شافهم مامدّوش إيدهم على الأكل، قلق وخاف😥
لإن كان من المعروف في الزمن ده إن إللي مش بياكل من الأكل بتاعهم يبقى ناوي على شر😑
فقال لهم:
إنتم مش هتاكلوا😅
"فَقَرَّبَهُ إِلَيْهِمْ قَالَ أَلَا تَأْكُلُونَ *فَأَوْجَسَ مِنْهُمْ خِيفَةً ".

☆وهنا فائدة جميلة تبين أد إيه زمان كان عندهم مروءة ونخوة، ومن ضمن ده صيانة العيش والملح، مش هاكل من أكلك وأنا ناوي أأذيك، عكس انعدام المروءة إللي بنلاقيه أحيانا في زماننا دلوقتي، تلاقي الأخ أو الأخت من دول ياكلوا مع أكل أصحاب البيت،
ولما يسيبوهم يغتابوهم ويحرضوا عليهم ويحسدوهم ويؤذوهم ويتكلموا عليهم من وراهم بكل حقد، ويرجعوا تاني ياكلوا عندهم عادي جدا ، ياكلوا عندهم وياكلو من لحمهم، ولا حول ولا قوة إلا بالله😞

فالثلاثة دول طمنوا إبراهيم عليه السلام وقالوا متخفش..احنا مُرسلين لقوم لوط عشان نُهلكهم...
فاتضح لإبراهيم إن الثلاثة دول ملائكة مش بشر طبيعيين، وعش

ان كده ما أكلوش من الأكل اللي متقدم لهم لإن الملايكة مبتاكلش ولابتشرب،
فكانوا ثلاثة ملائكة متمثلين في هيئة بشر: هم جبريل وميكائيل وإسرافيل،
"قَالُوا لَا تَخَفْ إِنَّا أُرْسِلْنَا إِلَى قَوْمِ لُوطٍ"
كانت سارة عند المجلس عشان لو احتاج الضيوف شيء،
فلما سمعت كلام الملائكة ضحكت وفرحت جدا إن ربنا هيُهلك القوم المفسدين المجرمين دول،
"وَامْرَأَتُهُ قَائِمَةٌ فَضَحِكَتْ فَبَشَّرْنَاهَا بِإِسْحَاقَ وَمِنْ وَرَاءِ إِسْحَاقَ يَعْقُوبَ "

☆ملحوظة
كلمة ضحكت في الآية :
"وَامْرَأَتُهُ قَائِمَةٌ فَضَحِكَتْ فَبَشَّرْنَاهَا"
في بعض المفسرين بيقولوا إن معناها حاضت، لكن أكثر المفسرين على إن ضحكت معناها الضحك المعروف.

المهم،
لما ضحكت الملائكة بشرتها وبشرت إبراهيم عليه السلام بإنها هتولد ولد اسمه إسحاق ...والولد ده هيكبر ويتزوج وهتشوف حفيده وهو يعقوب عليهم السلام أجمعين.

فهنا صرخت من الدهشة وقالت يا ويلي!! أنا عقيم😱
"فَأَقْبَلَتِ امْرَأَتُهُ فِي صَرَّةٍ فَصَكَّتْ وَجْهَهَا وَقَالَتْ عَجُوزٌ عَقِيمٌ"

هولد وأنا عجوز عقيم وزوجي شيخ كبير في السن😲
"قَالَتْ يَاوَيْلَتَى آلِدُ وَأَنَا عَجُوزٌ وَهَذَا بَعْلِي شَيْخًا إِنَّ هَذَا لَشَيْءٌ عَجِيبٌ"
فالملائكة قالت لها انتِ بتتعجبي من أمر ربنا؟!!
"قَالُوا أَتَعْجَبِينَ مِنْ أَمْرِ اللَّهِ رَحْمَةُ اللَّهِ وَبَرَكَاتُهُ عَلَيْكُمْ أَهْلَ الْبَيْتِ إِنَّهُ حَمِيدٌ مَجِيدٌ "
يعني مفيش أي عجب إن ربنا يرزقكم الولد رغم كل الصعوبات دي،
دي قدرة ربنا إللي مالهاش حدود ولا بيقف قصادها شيئ.
ودعت لهم الملائكة بالسلام والبركة..
لما إطمأن إبراهيم عليه السلام وفرح بالبشرى، بدأ يكلم الملائكة في قوم لوط، ويقولهم:
هتهلكوهم؟! طب ده فيهم ناس مؤمنين؟! وكمان فيهم لوط😞
"فَلَمَّا ذَهَبَ عَنْ إِبْرَاهِيمَ الرَّوْعُ وَجَاءَتْهُ الْبُشْرَىٰ يُجَادِلُنَا فِي قَوْمِ لُوطٍ"
فالملائكة قالت له يا إبراهيم مفيش فايدة من الكلام،
ده أمر ربنا ومفيش فيه نقاش لا هيقدم ولا هيأخر،
واحنا عارفين مين إللي موجود في القرية واحد واحد،
وهننجي لوط وإللي آمنوا معاه، وهنهلك باقي القرية من المجرمين،
"يَا إِبْرَاهِيمُ أَعْرِضْ عَنْ هَٰذَا ۖ إِنَّهُ قَدْ جَاءَ أَمْرُ رَبِّكَ ۖ وَإِنَّهُمْ آتِيهِمْ عَذَابٌ غَيْرُ مَرْدُودٍ"

مين بقى قوم لوط؟
وعملوا إيه عشان يستحقوا إن ربنا يهلكهم؟
ده إللي هنعرفه الجزء الجاي إن شاء الله 👌

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

بوت الاستفسارات الخاص بالقصص

t.me/prophets_storiesbot

رابط القناة الشامل لقصص الأنبياء و السيرة النبوية
https://t.me/joinchat/AAAAAEhulzm7RmVxsli1pQ

👈🏼 قناة تضم ملفات صوتية لقصص الأنبياء كما كتبتها الأخت الفاضلة إيمان شلبي بصوت حمزة و سلمان نور الحداد ...

t.me/hamzasalman

#قصص_الأنبياء
#الحلقة_الخامسة_عشرة
#قصة_إبرهيم(٥)
#لوط_وقومه

كنا واقفين عند إبراهيم عليه السلام لما كان بيجادل الملائكة في قوم لوط ،والملائكة قالت إن خلاص ربنا أمر بإهلاكهم، وفعلا خرجت الملائكة متجهة إلى قرية لوط عليه السلام.

مين همّ قوم لوط أصلا🤔

خلونا نرجع بالزمن شوية ...
فاكرين لما إبراهيم عليه السلام ربنا نجّاه من النار وبعدين لوط عليه السلام آمن بيه وخرجوا مهاجرين من بلدهم؟
( ولوط عليه السلام هو ابن أخ إبراهيم عليه السلام،)
وفاكرين بعدها لما إبراهيم عليه السلام سكن الشام مع سارة،
أهه في الوقت ده لوط عليه السلام سكن في مدينة اسمها سَدُوم،
عند مكان اسمه "البحر الميت" في زماننا دلوقتي،
وأهل سدوم اسمهم "المُؤْتَفِكة"،
والمؤتفكة في اللغة العربية معناها: كل ما هو مصروف عن وجههِ وحاله إللي المفروض إنه يكون عليه..
ومعناها في القرآن: هُم قومُ لوط المُنقلبة قُراهُم عليهم عاليها سافلها
المهم..
كانت المدينة دي يتبعها قُرَى حواليها،
أهل المدينة دول كانوا كفار.. ومش بس كده،
لأ دول كمان كانوا بيعملوا حاجة بشعة محدش عملها قبل كده😶
وهي إن الرجال كانوا يأتون الرجال...يعني الرجل يُعاشر الرجل...ودي حاجة ضد الفطرة، عكس الوجه والحال اللي ربنا خلق البشر بيه وإللي المفروض يكونوا عليه.
يعني ربنا خلق الرجل والمرأة مناسبين لبعض عشان يتزوجوا ويجيبوا أطفال ويستمر النسل👨‍👩‍👧‍👦
لكن لما الرجل يتزوج الرجل النسل هينقطع والأمراض هتنتشر،
والمشكلة إن مش واحد ولا إتنين إللي شَذُّوا عن الفطرة اللي ربنا فطر الناس عليها..لأ ... دي القرية كلها كده والعياذ بالله😓
وكانوا بيعملوا الفاحشة دي قصاد بعض عادي في النوادي
وكانوا يخرجون الريح علانية أمام بعض ويتضاحكون على كده، ومكانوش بيستحوا من أي شيء من أفعالهم الخبيثة القذرة دي،
وكانوا كمان قُطّاع طرق، يقطعوا الطريق على المسافرين ويفعلوا بهم الفاحشة،
"أَئِنَّكُمْ لَتَأْتُونَ الرِّجَالَ وَتَقْطَعُونَ السَّبِيلَ وَتَأْتُونَ فِي نَادِيكُمُ الْمُنْكَرَ "
يعني كانوا أخبث الخلق فعلا،
ويُقال والله أعلم إن إللي خلّاهم يعملوا الفاحشة مع الرجال إن كان عندهم بساتين وثمار موجودة على الطريق وحصل لهم قحط وجوع فقالوا لبعض لو منعنا الثمار إللي على الطريق دي عن المسافرين وأبناء السبيل هنقدر نعيش،
فقالوا ونمنعها إزاي🤔
فقالوا نخلي من عاداتنا إن أي رجل غريب ييجي البلد نسرقه ونفعل به الفاحشة وبكده محدش هييجي البلد 😈
وفعلا عملوا كده واعتادوا على الموضوع لحد ما بقى في طبعهم،
فربنا أرسل لهم لوط عليه السلام، بالهداية عشان يخرجهم من الظلمات دي إلى النور.

بدأ لوط عليه السلام أول حاجة خالص زي أي نبي مُرسل يَدعوهم لعبادة الله وحده،
يعني بدأ معاهم بالأَوْلى والأهم، فأهم حاجة دلوقتي إنهم يؤمنوا بالله ويعبدوه،
عشان لما ده يتحقق هيبقى سهل يستسلموا لأوامره ويتقوه ويطيعوه بدون عناد ومكابرة .
"إذْ قَالَ لَهُمْ أَخُوهُمْ لُوطٌ أَلا تَتَّقُونَ۩ إِنِّي لَكُمْ رَسُولٌ أَمِيْنٌ۩ فَاتَّقُوا اللهَ وَأَطِيْعُون"

☆وهنا في فائدة وهي إن لازم يكون عند الدعاة إللي بيدعوا الناس وبينصحوهم حاجة اسمها فِقه الأولويات،
يعني نعرف نبدأ بإيه معاهم الأول قبل أي حاجة تانية، حسب ترتيب الشرع للأولويات الشرعية..
يعني مثلا زي بالضبط لما تيجي أخت تنصح بنت مش بتصلي ومش لابسة حجاب هتكلمها في إيه الأول؟
هتكلمها في الصلاة الأول لأنها الأصل ورسول الله ﷺ قال:
"العهد الذي بيننا وبينهم الصلاة فمن تركها فقد كفر"
طيب هل معنى كده إن الحجاب الشرعي مش مهم🤨
لأ هو مهم بس الصلاة أهم دلوقتي👌
وهو ده فقه الأولويات الشرعية.

المهم،
لوط عليه السلام لما بدأ دعوته لقومه بإنهم يعبدوا الله وحده ولا يشركوا به شيئا، وقالهم إنه مش عايز منهم مقابل لدعوته ولا أجر،
هو بينصحهم عشان مصلحتهم هم فقط في الدنيا والآخرة
"وَمَا أَسْأَلُكُمْ عَلَيْهِ مِنْ أَجْرٍ إِنْ أَجْرِيَ إِلاَّ عَلَى رَبِّ العَالَمِيْنَ"

وحذرهم إن ربنا هينزل فيهم العذاب لو استكبروا ورفضوا الهدى،
وطبعا ناس زي دول، تتوقعوا هيكون رد فعلهم إيه😑
"قَالُوا لَئِنْ لَّمْ تَنْتَهِ يَا لُوطُ لَتَكُونَنَّ مِنَ المُخْرَجِيْنَ"
يعني قالوا للوط عليه السلام لو مابطلتش كلامك ده هنطردك برة البلد😡
لكن لوط عليه السلام استمر يدعوهم ويأمرهم بالمعروف وينهاهم عن المنكر سنين، ويعيد ويزيد ويقول:
"أَتَأْتُونَ الذُّكْرَانَ مِنَ العَالَمِين ۩ وَتَذَرُونَ مَا خَلَقَ لَكُمْ ربُّكُمْ مِّنْ أَزْوَاجِكُمْ بَلْ أَنْتُمْ قَومٌ عَادُونَ"

لما كان بيبقى في ناس معدية على الطريق من المسافرين كان لوط بيخبيهم عنده ويمشيهم في الليل في الخفاء بعيد عن أعين قومه أهل الفواحش، عشان لو شافوا الرجال دول هياخدوهم ويغصبوهم على فعل الفاحشة معهم،

واستمر الوضع على كده...قوم لوط عليه السلام يعملوا الفواحش ومستمرين في الكفر والظلم والتعدي عل