دا لا تصح 👌

◇نيجي لآخر سؤال وهو :
اشمعنى رسول الله ﷺ استحى في مراجعة ربنا لما وصل للصلوات الخمس ومستحاش قبل كده🤨
أولا:
لازم نعرف إن كل حاجة بتتم بقدر الله 👌
يعني ربنا أَلهم موسى عليه السلام إنه يقول لرسول الله ﷺ إنه يسأل ربنا التخفيف،
وأَلهم رسول الله إنه يسأل الله التخفيف كل مرة وألهمه كذلك الحياء إنه يسأل التخفيف لما وصل للعدد خمس صلوات😊
ثانيا:
في رواية بتقول إن ربنا كان بيخفف الصلوات خمسة خمسة لحد ما وصلت لخمس صلوات ، فلو رسول الله ﷺ رجع وسأل ربنا التخفيف كده مش هيبقى في صلاة، وكأن رسول الله ﷺ بيطلب من ربنا إلغاء الصلاة 😅
ده غير إن ربنا كان بيخفف الصلاة من غير ما يُعقب على شيء ،
لحد ما وصلوا لخمس صلوات فعقّب هنا وقال إنهم خمس في العمل وخمسين في الأجر، فعرف رسول الله ﷺ إن مينفعش تخفيف أقل من كده🤷‍♀️

☆دي كانت معظم الأسئلة إللي ممكن تيجي على بال حد فينا😁
لو حد عنده أسئلة ثانية في الجزء ده وأنا مجاوبتش عليها يقول لي في التعليقات وأنا هجاوب عليها إن شاء الله وأنا بشرح الجزء الجاي😉
كده رحلة رسول الله ﷺ للسماء انتهت وخلاص هينزل للأرض مع جبريل عليه السلام، نزل رسول الله ﷺ من السماء لبيت المقدس مرة أخرى وركب على البراق عشان يرجع لبيته في مكة😊
لكن قبل ما نرجع مع رسول الله ﷺ لمكة ونشوف أبو جهل وباقي كفار قريش تاني🙄 ونشوف رد فعلهم على قصة الإسراء برسول الله ﷺ،
في أحداث حصلت في رحلة الإسراء والمعراج أنا مقلتهاش لأن أنا معرفش وقتها كان إمتى بالضبط هل كان قبل المعراج ولا بعده، لأن العلماء مختلفين فيها، أنا كنت ناوية أذكرها النهاردة،
بس هخليها للمرة الجاية عشان نفضل عايشين مع رحمة ربنا شوية لأن الشخص إللي رسول الله ﷺ قابله كان صعب،
والحاجات إللي رسول الله ﷺ شافها كانت أصعب،
فالموضوع محتاج تفصيل😊

رسول الله ﷺ قابل مين، وإيه المشاهد إللي شافها ؟
ده إللي هنعرفه الجزء الجاي إن شاء الله 😉



#Eman_Shalapy

#قصص_الأنبياء(٢)
#السيرة_النبوية
#الحلقة_السابعة_والثلاثون
#رحلة_الإسراء_والمعراج
#العودة_لمكة

اتكلمنا المرة إللي فاتت عن رجوع رسول الله ﷺ للأرض،
وقلنا إنه هيقابل شخصية صعبة،
لكن قبل ما نتكلم عن عن الشخصية دي محتاجين نعرف وصية الملائكة لأمة محمد ﷺ إللي هو احنا 😁
إبراهيم عليه السلام وصانا بسبحان الله والحمد لله ولا إله إلا الله والله أكبر،
أما الملائكة فكان لهم وصية مختلفة، يقول رسول الله ﷺ إنه كل ما يعدي على مجموعة من الملائكة يقولوا له مُرْ أمتك بالحجامة،
يعني يا محمد أؤمر أمتك إنهم يحتجموا، والحجامة يعني استخراج الدم الفاسد من الجسم، ولها فوائد كثيرة جدا بس مش موضوعنا هنا😅

احنا هنرجع للشخصية الصعبة المختلفة إللي رسول الله ﷺ قابلها في رحلته ،الشخصية دي كانت مِلك من الملائكة، الملك ده كان 《مَالك خازن النار》🙊
بعد ما رسول الله ﷺ خلص صلاة بالأنبياء رأى من حائط بيت المقدس الشرقي جهنم😶
وشاف ملك من الملائكة وهو بيُقلب جمر في النار ، عارفين زي ما بنقلب الجمر أو الفحم المولع كده😓
ولما بنقلب الجمر بيطلع من حوله زي شرارة ، رسول الله ﷺ شاف الشرارة بتاعة الجمر وهي عاملة زي القصر الكبير،
"إِنَّهَا تَرْمِي بِشَرَرٍ كَالْقَصْرِ "
طبعا رسول الله ﷺ لم يدخلها وهي لم تؤذيه أو تمسه، هو شايفها بس👌
قال جبريل عليه السلام لرسول الله ﷺ : يا محمد هذا مالك صاحب النار فسلم عليه.
فرسول الله ﷺ الْتفت يبص عليه لقى رجل عابس😠
يُعرف الغضب في وجهه، يعني واحد مكشر إللي يشوفه يعرف إنه غضبان،
فبدأ مالك رسول الله ﷺ بالسلام وقال : السلام عليك يا محمد!
فسلم عليه رسول الله ﷺ،
عايزاكم تتخيلوا الموقف، واحد وشه غضبان وبيقول لك إزيك، إحساسك هيبقى عامل إزاي، لو رديتي هتردي وإنتي كشّة وخايفة... وإنتي بتبعدي، 😅
فإنتم تخيلوا موقف رسول الله ﷺ إللي الملائكة كلهم كانوا بيتبسموا في وجهه ويرحبوا به وبيسلموا عليه، وده الوحيد المكشر😳
حتى في بعض الروايات رسول الله ﷺ استغرب منه وسأل جبريل عليه السلام هو مضحكش في وجهي ليه،
فجبريل عليه السلام قال لرسول الله ﷺ :
هو لو كان بيضحك لحد كان ضحك لك، لكنه لا يضحك👌
تخيلوا بقى إن ده خازن النار، الواحد منا في الدنيا لما يقابل شخص لأول مرة ويكشر في وشه حتى لو بيسلم عليه بيضايق منه إزاي😶
مالك بقى خازن النار لا يتبسم أبدا، وده يعطينا انطباع بقول الله عز وجل:
"عَلَيْهَا مَلَائِكَةٌ غِلَاظٌ شِدَادٌ لَّا يَعْصُونَ اللَّهَ مَا أَمَرَهُمْ "

رئيس ملائكة لم يتبسم لرسول الله ﷺ، فتخيلوا هيكون معاملته لأهل النار عاملة إزاي😥
ربنا يعافينا وينجينا منها برحمته 😞
رأى رسول الله ﷺ بعض الناس إللي بيعذبوا في النار، من المشاهد دي إنه شاف ناس بيأكلوا الجِيَف، يعني بياكلوا جثث ميتة معفنة🤢
تخيلوا والعياذ بالله لما الواحد بيعدي ويكون في حيوان ميت وتبقى ريحته طلعت، بنبقى مش طايقين ريحته، في ناس بقى هتاكله في النار، يعني مش بس هيبقى عذابهم النار، لأ ده كمان هياكلوا الجيف😞
رسول الله ﷺ سأل جبريل عليه السلام مين الناس دي😳
فجبريل عليه السلام قال له:
هؤلاء الذين يأكلون لحوم الناس!
《الغيبة》كبيرة من الكبائر 😶

☆محتاجين نقف هنا وقفة صح😑
الغيبة انتشرت بطريقة صعبة مع انتشار مواقع التواصل الإجتماعي بالذات👌
متخيلين إن ممكن شخص ياخد لقطة شاشة لمنشور واحد منزله، ويقعد يشتم فيه، والناس تدخل تشتم فيه، وشوفوا كمية المشاركة والنشر والتعليقات،
وتخيلوا إن كل دي غيبة😬
الغيبة معناها ذكرك أخاك بما يكره كما قال رسول الله ﷺ،
سواء بأخلاقه أو بلبسه أو بشكله أو أي حاجة تضايقه👌
يعني تفكري كده لو أنا قلت الكلمة دي الشخص ده هيزعل ولا لأ ، أو لو عرف إني قلت عليه كده هيكره إني قلت الكلام ده ولا لأ🤔
تخيلوا لما واحدة تطلب نصيحة في مجموعة مثلا عالفيس، لمشكلة مع صاحبتها ولا مع زوجها، والناس تسيب المشكلة وتقعد تشتم في الزوج ولا في صاحبتها،
متخيلين إن كل دي غيبة😶
ومحدش يقول هو احنا نعرف زوجها ده شخص مجهول😒
هنا مش مجهول لأن الناس حددت وقالت زوجك ده كذا، المجهول لما نيجي نقول: ده في ناس بتعمل كذا كده يبقى مجهول ومفيش غيبة👌
ممكن واحدة تقول طيب أنا أصلا مغلطتش ما هي كده فعلا😑
رسول الله ﷺ قال :لو فيه الكلام ده يبقى اغتبته لو مش فيه الكلام يبأى بهتّه👌
والبهتان إن الإنسان يفتري على أخوه المسلم بكلام غير صحيح،
زي ما واحد ييجي يقول ده الشيخ الفلاني ده منافق😒
ويصمم ويحلف، طيب إنت عرفت منين والنفاق ده أصلا حاجة في القلب محدش يقدر يعرفها غير بوحي من عند ربنا😑
فتخيلوا لما تجتمع الغيبة مع البهتان ده هيبقى وضعه إيه في الآخرة😶
وفي مشهد ثاني للناس إللي بيأكلوا لحوم الناس ويتكلموا في أعراضهم رآهم رسول الله ﷺ وعندهم أظافر من النحاس بيقطعوا بها وجوههم وصدورهم 😰
الموضوع صعب جدا ربنا يعافينا...يا جماعة حافظوا على نفسكم، أي حد يجيب سيرة الناس قصادكم نبهوه وقولوا له ياخد باله، واحنا نفسنا

لازم ناخد بالنا كويس أوي من كلامنا،
مش هنخسر حاجة لو متكلمناش،
لكن لو اتكلمنا أكيد هنخسر كثير، رسول الله ﷺ قال إن أكثر أهل النار هم النساء،
وقال إن أكثر حاجة بتدخل الناس النار هو اللسان والفَرْج👌
فعلى إيه المغامرة، لأ...خلينا نمسك لساننا ونبعد عن أي مواضيع فيها كلام عن الناس بصفة عامة،
دي جنة ونار مش هزار....

الواحد لو قعد مع إنسان مكشر طول اليوم بيبقى مش هيطق، فما بالكم بخزنة جهنم الغلاظ الشداد وعلى رأسهم مالك إللي حتى لم يتبسم في وجه رسول الله ﷺ 😳
خلونا مع رحمة ربنا والجنة أحسن واحنا شفنا بس وصف بسيط للجنة وكنا مبسوطين بها فما بالكم لما ندخلها😍

محدش يستاهل إننا نتعذب بسببه، نتعذب عشان شوية كلام لا هيودي ولا يجيب، لا معلش مش عايزين😤
كل واحد فينا من النهاردة يتوب عن الغيبة ويستغفر،
ويدعي للناس إللي اغتابهم قبل كده، ويبدأ مع ربنا صفحة جديدة، وناخد بالنا من كلامنا بعد كده سواء لو احنا إللي بنتكلم أو الناس هي إللي بتتكلم معانا👌
وخليكم فاكرين دايما إننا طول ماحنا على قيد الحياة فلسه في فرصة للتغيير للأحسن وأهم حاجة إننا لا نيأس ومهما غلطنا نتوب ونستغفر ونبدأ من جديد😊
من المشاهد إللي رسول الله ﷺ شافها في النار، إنه رأى عاقر الناقة، فاكرينه...الرجل من قوم صالح عليه السلام إللي قتل الناقة 🙊
ورأى رسول الله ﷺ ناس شفاههم بتتقص بمقصات من نار،
"رجالا تقرض شفاههم بمقارض...."
فسأل رسول الله ﷺ جبريل عليه السلام مين الناس دي😳
فجبريل عليه السلام قال له:
إن دول الخطباء من أمتك يأمرون الناس بالبر والمعروف والطاعات وناسيين نفسهم مش بيعملوا إللي بيقولوا للناس عليه👌

◇ولازم هنا توضيح عشان الناس متفهمش غلط😊
المقصود من الكلام إن إللي هيتعذب العذاب ده هم الناس إللي بيقعدوا يقولوا للناس اعملوا واعملوا واعملوا وهم مش بيعملوا حاجة خالص من إللي بيقولوا عليها،
ودول عكس الناس إللي بتجاهد نفسها في عمل الطاعات ونشر الدين حتى لو كانوا مقصرين ومش بيعملوا بكل إللي بيقولوا عليه👌
الأصل إن الإنسان يأمر بالمعروف ويعمله وينهى عن المنكر وميعملوش،
لكن لو قصر في أي عمل... ده مش مبرر له إنه يترك الأمر بالمعروف ولا النهي عن المنكر،
بالعكس ده هياخد إثمين، إثم إنه لا يعمل المعروف
وكمان إثم ترك الأمر بالمعروف والنهي عن المنكر 👌
فالمطلوب مننا إننا نجاهد نفسنا في عمل المعروف واجتناب المنكرات،
ولو وقعنا في منكر أو قصرنا في عمل معروف نستمر برده في الأمر بالمعروف والنهي عن المنكر😉

مشاهد النار في حادثة الإسراء والمعراج مكنتش كثيرة لأن الغاية من الإسراء والمعراج كان إسعاد رسول الله ﷺ وإنه يرى آيات ربنا وأد إيه ربنا راضي عنه،
في حديث تاني رسول الله ﷺ هيشرح مشاهد لأهل النار بس ده هيكون بعد الهجرة،
فلما ييجي وقته هنشرحه إن شاء الله 😊
وكمان من الأحداث إللي حصلت إن رسول الله ﷺ اجتمع مع إبراهيم وعيسى وموسى عليهم جميعا السلام،
وقعدوا يتكلموا عن الساعة يعني يوم القيامة ميعاده امتى، واتكلموا عن علامات الساعة،
فإن شاء الله هقول إللي حصل بينهم لما نتكلم عن علامات الساعة الكبرى 😉

☆نيجي بقى للسؤال المهم إللي ملخبط ناس كثير😅
هو إزاي رسول الله ﷺ شاف الناس إللي بتتعذب دي ولسه يوم القيامة مجاش🤔

الموضوع بكل بساطة إن ربنا جعل رسول الله ﷺ يرى مآل الناس دي💁‍♀️
نوضح أكثر، هو الزمن بيد مين 😁
الزمن بيد الله عز وجل وربنا قادر إنه يجعل رسول الله ﷺ يشوف إللي هيحصل للناس دي،
مش احنا ساعات بنشوف رؤيا وبعدين تتحقق بعد كم سنة نقول أيوة أنا شفت الحدث ده قبل كده،
فطبيعي جدا إن ربنا يقرب الزمان لرسول الله ﷺ ويشوف مآل الناس إللي هي لسه عايشة هيكون إيه🤷‍♀️
وخصوصا إن دي حاجة بسيطة بالنسبة لمعراجه ﷺ للسماء ورؤية العجائب من خلق الله 😉
وهنلاقي حتى في القرآن ربنا بيتكلم عن أحداث يوم القيامة مثلا بصيغة الماضي في القرآن،
فهل معنى كده إن في قيامة قامت قبل كده🤔
لأ... استخدام الفعل الماضي عشان يعبر عن المستقبل عشان يقول لنا الأحداث دي هتحصل أكيد بدون أي شك👌

والمشاهد إللي رسول الله ﷺ شافها كانت لناس بيعذبوا في النار،
غير بقى الأحاديث إللي بتتكلم عن عذاب الناس في القبر دي موضوع تاني 😁
عشان بس نفرق بين الإثنين، لأن في ناس بتنكر عذاب القبر وبيقولوا إن الحساب هيبقى يوم القيامة فقط،
والكلام ده غير صحيح🙅‍♀️❌

◇عالسريع كده الإنسان لما بيموت بيكون حالتين 😁
إما بيُنعم أو بيُعذب،
☆إللي بينعم بيكون جاوب صح على أسئلة الملكين منكر ونكير :
من ربك؟ ما دينك؟ من نبيك ؟
فبيُفتح له باب من الجنة ويكون معاه عمله الصالح على هيئة رجل طيب الرائحة جميل المنظر يُؤنسه لحد يوم القيامة،
وروحه تُنعم في الجنة،
ويكون لنعيم الروح أثر على الجسد، يعني الجسد كمان هيتنعم مع الروح لكن مش زي نعيم الجسد والروح في الآخرة،
☆وإللي بيُعذب ثلاثة أنواع:
¤نوع بيُعذب في قبره لحد ما مقدار السيئات يخلص وبعدين يُنعم في قبره لحد يو

م القيامة زي ماقلنا من شوية 👆

¤والنوع الثاني واحد سيئاته كثيرة جدا وعذاب القبر مكفاش سيئاته، فده هيُعذب في النار لحد ما يوفي سيئاته وبعدين يدخل الجنة👌

¤النوع الثالث: الكفار ودول بيتعذبوا في القبر وفي النار إلى الأبد ربنا يعافينا 😞

رسول الله ﷺ ركب البراق ورجع مع جبريل عليه السلام لمكة، وفي طريق العودة حصلت موقف هيكون له الأثر بعدين،
كان في قافلة تجارية راجعة لمكة، فرآها رسول الله ﷺ وكان في بعير لهم هرب وواحد منهم راح يدور عليه ولقاه،
وشاف على رأس القافلة يعني في مقدمة القافلة جمل لونه أسود والمتاع إللي عليه لونه إسود،
وهو معدي على البراق سلم عليهم، فقالوا :ده صوت محمد😳
المهم وصل رسول الله ﷺ لبيته في مكة، وكل الأحداث دي كانت في ليلة واحدة،
رجعنا لأرض الواقع مرة تانية، رجعنا لمكة ورجعنا لكفار قريش، ورجعنا للدعوة ومهمة بناء أمة الإسلام👌
أنا بصراحة مش عارفة رسول الله ﷺ هيتعامل مع الناس دي تاني إزاي😶
يعني الواحد كان نسي أصلا إن أبو جهل ده موجود ولا أمية بن خلف، ولا غيرهم من المشركين،
وده واحنا بس بنسمع فما بالنا برسول الله ﷺ، أكيد هو كان نفسه يفضل في السماء في العالم المثالي ده وسط الملائكة زي ماحنا تمنينا وتشوقنا للعالم ده😁
لكن رسول الله ﷺ عارف إن وراه مسؤولية ورسالة لازم يؤديها الأول،
أكيد نظرته لكل حاجة هتتغير، نظرته للحياة الدنيا، ونظرته للناس ونظرته للإبتلاءات والأذى،
رسول الله ﷺ حياته هتتغير تماما بعد الرحلة دي👌

أتمنى إننا كمان نظرتنا للحياة الدنيا اتغيرت وعرفنا إننا هنسيبها في يوم من الأيام وإننا هنرجع لبيتنا الحقيقي في الجنة إللي بنيناه بالاثنا عشرة ركعة النوافل،
وزرعنا حوله النخل والأشجار والزروع بسبحان الله والحمد لله ولا إله إلا الله والله أكبر، ووضعنا فيه كنوز بلا حول ولا قوة إلا بالله 😊
أسأل الله العظيم رب العرش العظيم أن يجمعنا جميعا أنا وكل من يقرأ كلامي في الفردوس الأعلى من الجنة بصحبة رسول الله ﷺ وصحبة إبراهيم وموسى وعيسى وجميع الأنبياء عليهم السلام
كما جمعنا بصحبة سيرتهم في الدنيا يارب آمين🤲

إن شاء الله الجزء الجاي هنشوف رسول الله ﷺ بدأ يتعامل مع الناس وإيه خطته الجديدة لنشر الدعوة 😉

#Eman_Shalapy

#قصص_الأنبياء(٢)
#السيرة_النبوية
#الحلقة_الثامنة_والثلاثون
#أهل_مكة_والإسراء

وقفنا المرة إللي فاتت عند رسول الله ﷺ لما رجع من رحلة المعراج، وقلنا إن الرحلة كانت في ليلة واحدة،
رسول الله ﷺ رجع لبيته بعد الرحلة إللي شاف فيها عجائب خلق الله، أو زي ما ربنا قال:
"لقدْ رَأَىٰ مِنْ آيَاتِ رَبِّهِ الْكُبْرَىٰ"
لما جاء الصبح رسول الله ﷺ كأنه انتبه للأحداث إللي حصلت😳
شوفوا لما يحصل معاكم موقف وتبقوا متفاجئين فتكونوا مستسلمين للأحداث، وبعدين لما تقعدوا مع نفسكم كده وتسترجعوا إللي حصل تتصدموا ،
وتقولوا إزاي ده حصل😳
أهه رسول الله ﷺ بشر زينا بيحس بنفس المشاعر بتاعتنا،
لما رجع بيته وقعد يسترجع الأحداث طبعا كان في حالة ذهول، وهيقول للناس الكلام ده إزاي...هو عارف إنهم هيكذبوه😑
ماهو بقى عنده خبرة، بقاله معاهم عشر سنين خلاص حفظهم 😶

☆والخبرة مهمة جدا في الدعوة بجانب العلم😊
يعني لما يكون شيخ بقاله ثلاثين أو أربعين سنة في الدعوة واتعامل مع كل الشخصيات، خبرته هتكون مختلفة تماما عن شاب لسه بادئ في الدعوة 🤷‍♀️

لكم أن تتخيلوا كده الوضع لما رسول الله ﷺ يروح يقول لهم يا جماعة أنا روحت بيت المقدس ورجعت في ليلة واحدة وطلعت في السماء وشفت الجنة وشفت النار والملائكة و...و...😶
متخيلين رد فعل الناس هيكون إيه وهم أصلا مش مقتنعين إن الكون ده له إله واحد فقط 😅
كانت أم هانئ بنت أبي طالب أخت على بن أبي طالب في بيته ﷺ فحكى لها إللي حصل ، وبعدين رسول الله ﷺ وهو خارج من البيت عشان يروح يقول للناس،
راحت أم هانئ شدته من ثيابه لدرجة إن بطنه بانت وقالت له:
إياك تقول حاجة للناس ، هيكذبوك وهيؤذوك😱
فقال رسول الله ﷺ: والله لأحكي لهم👌

ماهو مش معنى إن الكلام إللي هقوله ده هيزعل الناس ومش هيقتنعوا به ويكذبوني يبقى مقلهوش🙃
لأ...أقوله مادام الكلام حق😊
ورسول الله ﷺ مصمم إنه يقوله لأنه حق ودين لازم يقوله للناس 👌
فخرج رسول الله ﷺ وراح قعد لوحده عند الكعبة وهو مهموم، هو عايز يقول للناس بس مش عارف يبدأ إزاي ولا يقول لهم إزاي😶
شوفي لما بتبقي عايزة تفاتحي زوجك ولا والدتك في موضوع وإنتي عارفة إن هيحصل قلق من ورا الموضوع ده ومش عارفة تبدإي إزاي ولا تقولي إيه بتبقي عاملة إزاي🙊
شوفي مشاعرك دي كانت زي مشاعر رسول الله ﷺ تقريبا😅
المهم رسول الله ﷺ قاعد حزين مهموم ،
فعدى عليه مين...أبو جهل 😬

☆رجعنا للناس دي تاني😑

فلما عدى عليه وشافه وهو مهموم كده، عرف إن في حاجة ، ماهي مش دي طبيعة رسول الله ﷺ ،
فقرب أبو جهل لعنه الله من رسول الله ﷺ وقعد جنبه وسأله وكلامه فيه استهزاء :
في حاجة حصلت...هاااا في جديد😏

فقال رسول الله ﷺ: نعم! ...يعني أه في جديد 😁
فقال أبو جهل : إيه🤔
قال رسول الله ﷺ :
أنا أُسْرِي بي الليلة! يعني أنا روحت مكان امبارح بالليل،
فقال أبو جهل : روحت فين🤔

فقال رسول الله ﷺ: إلى بيت المقدس!
فقال أبو جهل: يعني إنت روحت بالليل بيت المقدس والصبح كنت معانا🤨
فقال رسول الله ﷺ: نعم!
فأبو جهل لم يُظهر إنه بيكذب رسول الله ﷺ عشان يعني رسول الله ﷺ ميقولش بعدين لو نادى على أهل مكة أنا مقلتش🙄
فقال أبو جهل لرسول الله ﷺ بمكر وخبث : لو أنا جمعت لك الناس دي كلها هتقول لهم الكلام إللي إنت قلته لي دلوقتي ده😈
فقال رسول الله ﷺ : نعم! يعني أه اقول لهم

☆معلش بقى عشان انا بحب الحتة دي أوي😁
لما حد بيكون عايز يمكر ويحارب الدين ويتعامل بخبث قال يعني عشان يقضي على الدين،
والمسكين مش فااااهم إنه بيواجه رب العالمين🤦‍♀️
يعني إنت هتمكر وتحارب وهتبذل طاقتك كلها ومش بس ربنا هيذلك ويغلبك ،
لأ ..ده هيستعملك إنت ذات نفسك في نصرة الدين إللي إنت كنت بتحاربه ده😂😂
فاكرين أرطبون العرب عمرو بن العاص والمكر إللي مكره عشان يقضي على المسلمين النتيجة كانت إيه😅
قمة الخذلان لوفد قريش وقمة النصر للمسلمين،
فمهما حصل متقلقوش،
ربنا بيدافع عن دينه وعن المؤمنين،
زي بالضبط لو واحد قال أنا هغبر الدنيا بالتراب عشان أخفى ضوء الشمس،
هيقدر؟ ..مش هيقدر ولو عمله،ا التراب مش هيستمر في الجو، وأول واحد هيغرق بالتراب هو💁‍♀️
"فَلَا تَحْسَبَنَّ اللَّهَ مُخْلِفَ وَعْدِهِ رُسُلَهُ."

أبو جهل دلوقتي بيخطط إنه يضحك الناس على رسول الله ﷺ ويبين إنه كاذب وخلاص جت الفرصة😏
وهو مش عارف أصلا إن رسول الله ﷺ عمال يدور على طريقة ينادي بها على الناس عشان يحكي لهم مش عارف 😅
فالفرصة جت : أنادي على الناس تقول لهم؟ أيوة نادي على الناس وهقول لهم،
وينادي أبو جهل بأعلى صوته على كل مكة وأهل مكة كلهم ييجوا لأبو جهل يشوفوا هو عايز إيه،
ولو كان رسول الله ﷺ هو إللي قام ونادى عليهم مكنش حد فيهم هيلتفت له أصلا🤷‍♀️
عايزاكم تتخيلوا ..رسول الله ﷺ قاعد عند الكعبة مرتاح متحركش من مكانه وأبو جهل هو إللي عمال ينادي وصوته اتنبح عشان يجمع الناس 😂😂
"سُبْحَانَ الَّذِي سَخَّرَ لَنَا هَٰذَا وَمَا كُنَّا لَهُ مُقْرِنِينَ "

بجد آمنت بالله🙇‍♀️
يع

ني الموضوع لو اتخطط له مش هتكون نتيجته كده خالص، فسبحان مدبر الأمور👌

جاء الناس لأبو جهل وجنبه رسول الله ﷺ وقعدوا قصادهم،فقال أبو جهل لرسول الله ﷺ احكي للناس إللي إنت حكيته لي💁‍♂️
فقال رسول الله ﷺ للناس :إني أُسرِيَ بي الليلة!
فقالوا : روحت فين🤔
فقال رسول الله ﷺ : إلى بيت المقدس!
فقالوا : وبعدين الصبح كنت معانا😳
قال رسول الله ﷺ: نعم!
فاللي قعد يضرب كف على كف 😏 ، وإللي حط إيده على رأسه🙆‍♂️
وإللي متعجب للكذب😧 ، وإللي قعد يضحك على ما نام على ظهره من الضحك كده يعني😅 👈🤣🤣

وكل ده ورسول الله ﷺ ينظر إليهم🙁
تخيلوا قلبه ساعاتها كان عامل إزاي، واحد راجع من رحلة زي دي وقلبه مليان بالمشاعر إللي متتوصفش ،
وييجي ناس زي دي ويسخروا ويكذبوا ويضحكوا عليه😑

تخيلي لما تكوني بتقولي حاجة حقيقية والناس كلها تكذبك وتسخر منك كده، الموقف زي ماهو مؤلم لنا، كان مؤلم لرسول الله ﷺ 😞

☆ورحلة الإسراء والمعراج زي ماكانت لتسلية قلب رسول الله ﷺ، فهي كانت ابتلاء للمسلمين👌
فالموقف الواحد إللي بيحصل ممكن يكون لي ابتلاء وأجر، ونفس الموقف لواحد تاني عبرة وعظة،
يعني أنا ربنا وهبني شيء أو ابتلاني بشيء، فالابتلاء ده ربنا يرزقني به الأجر،
ولما حد يشوف عليّ الإبتلاء يتعظ ويعتبر، واحد تاني يشكر نعمة ربنا عليه، واحد ثالث يكفر بالله😬
ماهو يقول هو ليه ربنا يعمل كذا وكذا، ويبدأ يقيس الامور بعقله فيكفر بالله😑

وهو ده إللي حصل هنا😶
بعد ما رسول الله ﷺ قال للناس عن الإسراء في ناس من المسلمين ارتدوا عن الإسلام🙊
ماهي الناس بدأت تتكلم 🙄
شوفوا الكذب وصل لحد فين...يروح بالليل ويرجع الصبح، إنت تصدق دي، ده لو حد مجنون ميصدقش الكلام ده😏
كفار قريش بقوا يبحثوا عن أصحاب رسول الله ﷺ عشان يحكوا لهم ويفتنوهم عشان يكذبوا رسول الله ﷺ،
فقابلوا أبو بكر ..عبد الله بن أبي قحافة صاحب رسول الله ﷺ أول من آمن من الرجال الأحرار😁
فقالوا له : يا أبا بكر! سمعت صاحبك بيقول إيه😏
فقال لهم : وهو قال إيه🤔
فقالوا : بيقول إنه راح بيت المقدس ورجع في ليلة واحدة 😏
فقال لهم : هو قال كده فعلا😮
فقالوا : نعم 😤 فقال لهم: صدق! لو كان قال كده فعلا فهو صادق👌
فقالوا له: إنت مصدقه😳
فقال لهم : أشهد بالله إنه لصادق😤
فقالوا له: تصدقه إنه راح الشام ورجع في ليلة واحدة😲
فقال لهم : أنا بصدقه في أبعد من هذا، أصدقه في خبر السماء يأتيه في لحظة 👌
الموضوع منتهي... بكل بساطة أنا آمنت بوجود الله من البداية وصدقت إن ربنا بيبعث الأنبياء والرسل وصدقت إن محمد ﷺ نبي من عند الله،
خلاص أي تشويش ييجي بعد كده مش هبص له أصلا ولا له أي لازمة عندي🤚
عشان كده رسول الله ﷺ سماه في الموقف ده الصديق👌

☆وده الفرق بين المؤمن الثابت وغيره، أبو بكر ثبت قصاد الإبتلاء ده، ليقينه التام بالله وتصديقه الكامل لرسول الله ﷺ،
أما غيره فارتد، وربنا لا يظلم أحد، لو كان في قلوب إللي ارتدوا خير مكنوش ارتدوا🤷‍♀️
فالابتلاء لتمييز الصفوف، هل الناس هتثبت ولا هتقع👌
محتاجين نتعامل مع الدين ومع رسول الله ﷺ زي أبو بكر كده صح😊
ييجي لنا الحديث الصحيح خلاص.. نؤمن ونصدق ونطيع💁‍♀️

الدنيا قلق في مكة دلوقتي وأبو بكر بيقول إن محمد ﷺ صادق، طيب نتأكد إزاي إذا كان صادق ولا لأ🤔
خلاص تاهت ولقيناها😀
سألوا رسول الله ﷺ: تقدر توصف لنا بيت المقدس😈
هم عارفين إن رسول الله ﷺ مرحش بيت المقدس ولا مرة في حياته،
عمره كله مقضيه في مكة، وناس كثيرة من مكة عارفين المسجد الأقصى ، فانت لو كنت روحت إوصف لنا المسجد الأقصى💁‍♂️
فقام رسول الله ﷺ وقف عند الحجر، حجر إسماعيل عليه السلام، وبدأوا يسألوا رسول الله ﷺ عن تفاصيل المسجد الأقصى،
أصلا في الطبيعي لما بنكون رايحين مكان لأول مرة مش بنركز في المكان، وخصوصا لو رايحين المكان ده واحنا دماغنا مشغولة بحاجة تانية،
فرسول الله ﷺ راح للمسجد الاقصى في رحلة عجيبة، ودخل لقى الانبياء وأجواء إيمانية مش جاي يتفرج على تفاصيل ، وكمان بالليل 😳
هيفتكر إزاي😶
بدأوا يسألوه..قول بقى كان في كم شباك؟
في كم باب ناحية اليمين؟
كان في رسمة على الباب ولا كان دهان؟
وحطوا بقى كل الأسئلة إللي تتخيلوها، ماهم عايزين يعجزوه أصلا، فهتلاقي كل واحد طالع بكلمة 🙄

المشكلة بقى إن رسول الله ﷺ لازم يجاوب🙊
فقال رسول الله ﷺ إنه أصابه كرب شديد جدا ومبقاش عارف يعمل إيه😥
فربنا أظهر لرسول الله ﷺ بيت المقدس وبقى يجاوب على أسئلتهم وهو بينظر إليه وهم مش شايفينه،
يسألوا سؤال ...رسول الله ﷺ يبص عالمسجد ويجاوبهم 😅
فكفار قريش قالوا: الوصف إللي إنت وصفته صحيح 😳
فزادهم بقى رسول الله ﷺ وقال لهم أنا عندي دليل على صدق كلامي،
لما كنت راجع عديت على قافلة لكم، في مكان كذا وهتيجي يوم كذا وكان في بعير لهم هرب وراح جابه فلان، وعلى مقدمة القافلة في جمل أسود وعليه متاع أسود،
فقالوا : ماشي نستنى ونشوف😕
فلما جاء اليوم إللي رسول الله ﷺ قال لهم عليه، لقوا قافلة داخلة ع

ليهم وفي مقدمتهم جمل أسود عليه متاع أسود،
زي ما وصف رسول الله ﷺ بالضبط، يعني كل حاجة طلبوها منه أهه وكمان زادهم بدليل الطبيعي وإللي عنده أي ذرة عقل يؤمن،
دول بقى ولا الهوى، قالوا احنا مش مصدقين الكلام إللي بيقوله محمد 😒

☆والله يا جماعة بنقابل الناس دي 😑
بتبقى دماغهم حاجة كده عجيبة ربنا يعافينا🤦‍♀️
تقولك هاتيلي دليل من القرآن أو السنة على كذا وتجيبي وتقول لأ، الكلام ده مش صح😒

بعد ده كله وميؤمنوش، فطبيعي إنه يحزن ﷺ 🤷‍♀️
شوفوا ربنا قال له إيه عشان يهون عليه وعلينا احنا كمان طبعا👌
" قَدْ نَعْلَمُ إِنَّهُ لَيَحْزُنُكَ الَّذِي يَقُولُونَ فَإِنَّهُمْ لا يُكَذِّبُونَكَ وَلَكِنَّ الظَّالِمِينَ بِآيَاتِ اللَّهِ يَجْحَدُونَ "
يعني هم مش بيكذبوك هم مصدقينك لكن دي ناس جاحدة، عرفوا الحق وجحدوه👌
مش يسكتوا بقى ، لأ ده قعدوا يتكلموا في الموضوع ده أيام كثيرة،
كان المسلمون بيقعدوا مع رسول الله ﷺ كل يوم بيسألوه عن الحاجات إللي شافها وكان بيشرح لهم،
فكانوا عايشين جو إيماني جميل ، زي إللي عشنا زيه في الأجزاء إللي فاتت
بس تخيلوا بقى لما يكون رسول الله ﷺ إللي بيحكي،
نحس إن الجنة نزلت للأرض😊

◇عندنا سؤال مهم😁
هو ليه رسول الله ﷺ أخبر المشركين عن رحلته لبيت المقدس ولم يخبرهم عن رحلة المعراج للسماء🤨

بكل بساطة عشان يقدر يجيب دليل على إنه راح بيت المقدس، يعني وصف لهم المسجد الأقصى وقال لهم على القافلة، وكمان كذبوه🤦‍♀️
لكن هيجيب دليل إزاي إنه طلع السماء😶
دول كفار هيكذبوه، لكن المسلمين المؤمنين بمجرد ما هيقول لهم عن المعراج هيؤمنوا على طول👌
والإسلام لا يشوش على العقول، يعني حدثوا الناس بما يعرفون وحدثوا الناس بما يعقلون،
مينفعش نقعد نكلم الناس كلام هم مش فاهمينه وعقولهم مش مستوعبه، كده نفتنهم😶
وطبعا ده لا يتعارض مع إللي قلناه من شوية إننا لازم نقول الحق،
احنا نقول الحق إللي نقدر نثبته، رسول الله ﷺ قال الحق إللي يقدر يقبته بالدليل،
وفاكرين في قصة يوسف عليه السلام لما دخل معاه الفتيان وطلبوا تفسير الرؤيا ،
قبل ما يتكلم جاب لهم دليل على صدق الكلام إللي هيقوله فأثبت لهم بالدليل إنه بيفهم في تأويل الرؤى، قال لهم:

"قَالَ لا يَأْتِيكُمَا طَعَامٌ تُرْزَقَانِهِ إِلا نَبَّأْتُكُمَا بِتَأْوِيلِهِ قَبْلَ أَنْ يَأْتِيَكُمَا"
فعروج رسول الله ﷺ للسماء محتاج إيمان بالغيب، والكفار معندهمش إيمان بالغيب، دي بتاعة المسلمين الموحدين 😊
فده يعلمنا إننا لما نيجي نكلم الناس في مسألة شرعية يبقى معانا أدلتها وقناعتها وإيماننا بها والإثبات إنها حق👌

هيرجع رسول الله ﷺ للدعوة مرة ثانية، وهتاخد الدعوة منحنى مختلف، لأن الوضع في مكة دلوقتي بعد كل ده لا يبشر إن مكة هتكون مركز لإنطلاق الإسلام للعالم👌

عمل إيه رسول الله ﷺ عشان يتجه بدعوة الإسلام لمنحنى جديد ، ده إللي هنعرفه الجزء الجاي إن شاء الله 😉

#Eman_Shalapy

#قصص_الأنبياء(٢)
#السيرة_النبوية
#الحلقة_التاسعة_والثلاثون
#عرض_الإسلام_على_القبائل

وقفنا المرة إللي فاتت عند رسول الله ﷺ لما حكى لأهل مكة إللي حصل له في الإسراء، وشفنا إزاي بعد ما رسول الله ﷺ جاب لهم الدليل على صدق كلامه كذبوه برده😑
وكده بقى واضح جدا إن رسول الله ﷺ محتاج ناس تانية، خلاص الناس دي مبقتش نافعة،
رسول الله ﷺ حاول معاهم عشر سنين ومفيش فايدة 🤷‍♀️

أول محاولة لرسول الله في إنه يبحث عن ناس تانية تشيل هم الإسلام وتدافع عنه كانت في الطائف واحنا شفنا النتيجة كانت إيه😶
رسول الله ﷺ بدأ يبحث في الحج عن القبائل القوية ويعرض عليهم الإسلام، هو كان بيعرض الإسلام على القبائل في الحج السنين إللي فاتت دي لكن المرة دي الوضع مختلف،
لأنه مش بس هيطلب منهم إنهم يُسلموا، ده كان بيطلب منهم مع الإسلام إنهم ينصروه👌

☆موقف رسول الله ﷺ ده بيعلمنا نقطتين:
♡أولا :
إننا لا نيأس ولانستسلم،
فهو بعد ما حصل إللي حصله في الطائف مقلش خلاص مفيش نتيجة، لأ..ده قعد يدور على ناس غيرهم😊
♡ثانيا :
إننا نُتبع السبب👌
فاكرييين قصة ذو القرنين لما ربنا قال عنه : فَأَتْبَعَ سَبَبًا 😁
يعني كان بيشوف الحاجة المتاحة ويشتغل فيها، بيشوف الباب إللي ربنا فتحه قصاده ويستغله😉
أهه رسول الله ﷺ إللي نزل عليه قصة ذو القرنين استفاد من تجربة ذو القرنين لأنه عارف إن ربنا مش بيقص عليه قصص السابقين كده وخلاص ، ده في عبرة منها😊
فرسول الله ﷺ شاف دلوقتي إن قريش بقت باب مسدود مفيش فيه أمل،
موقفش بقى وصمم على قريش وقعد يقول أنا كده حياتي هتقف، ومش هينفع أدعو ناس تانية مادام أنا معرفتش أدعو أهل مكة و...و...
بكل بساطة رسول الله ﷺ ساب الباب المقفول ده وبدأ يدور على أبواب ثانية،
فَأَتْبَع إيه😁..فَأَتْبَعَ سَبَبا😉
فنتعلم من رسول الله ﷺ وذو القرنين إننا نستغل الأبواب المفتوحة،
مثلا ربنا فتح لك باب دراسة علوم شرعية من عالنت وسماع المحاضرات ،
بس إنتي عايزة تنزلي تروحي المسجد تحضري فيه، وموضوع المسجد مش متاح دلوقتي،
توقفي حياتك بقى ولا تستغلي الباب المفتوح💁‍♀️
فهو ده إللي رسول الله ﷺ عمله، لقى باب قريش مقفول بعد محاولات كثيرة، جاء الوقت إللي ندور فيه على باب ثاني👌
احنا دلوقتي في نهاية السنة العاشرة من البعثة،
بدأ رسول الله ﷺ يزور الوفود إللي بتيجي للحج، ويعرض عليهم الإسلام وإنهم ينصروه ويدافعوا عنه عشان يبلغ دعوة الإسلام،
راح لبني كلب وبني كِندة وبني حنيفة وغيرهم من القبائل وكان بيقول لهم، إنه رسول من عند الله يأمركم بعبادته وترك عبادة الأصنام،
وكلهم كانوا بيرفضوا، ماعدا قبيلة واحدة بس هي إللي أخذت الموضوع بجدية😮
قبيلة بني عامر، قبيلة قوية جدا ومن أعز قبائل العرب، فهم من الخمس القبائل إللي محصلش في تاريخها سبي لنسائها،
يعني محدش قدر يغلبها في تاريخها،
تخيلوا بقى لما قبيلة بالقوة دي تاخد الإسلام على محمل الجد، الإسلام ممكن ينتشر بسرعة أد إيه ومحدش يقدر يمس رسول الله ﷺ بسوء🙊
عرض رسول الله ﷺ الإسلام على قائدهم وكان اسمه بَيْحَرة بن فِراس،
فاهتم جدا بالإسلام ووقف وسط أصحابه يقول لهم قصاد رسول الله ﷺ : أنا لو أخذت الفتى ده من قريش هاكل به العرب👌
يعني هو عرف إن كلام رسول الله ﷺ حق وعرف إن إللي هيمشي وراه هيسود العرب ويملكهم كلهم👌
فعرض على رسول الله ﷺ عرض مغري جدا🙊
قال لرسول الله ﷺ :
هل لو احنا بايعناك وبعدين ربنا أظهرك ونصرك على من خالفك، يكون لنا الملك من بعدك؟
يعني بيقول لرسول الله ﷺ احنا هندخل الإسلام وندافع عنك ضد أي حد يخالفك، وهنساعدك إنك تكون زعيم ، وهتفضل إنت القائد والزعيم كده لحد ما تموت،
لكن بعد موتك الزعامة تنتقل لنا احنا💁‍♂️
عايزاكم تتخيلوا العرض المغري ده وموقف رسول الله ﷺ😬
رسول الله ﷺ الدعوة قصاده في مكة مقفولة، أهل مكة بيحاربوا دعوته،
محدش من القبائل راضي يؤمن به ولا يساعده، هو نفسه في حماية رجل كافر المطعم بن عدي،
وممكن يترك حماية رسول الله ﷺ لو قريش ضغطوا عليه،
المسلمين نصفهم في الحبشة والباقي بيتعذب في مكة،
فالعرض ده يعتبر عرض مثالي جداا وفي وقت قاتل،
واحنا أصلا مصدقنا لقينا حد يوافق على الإسلام🙊
وفي مقابل إيه، مقابل إنه يكونوا هم الزعماء بعد رسول الله ﷺ، يعني يعتبر حاجة بسيطة
يعني رسول الله ﷺ هو الحاكم وهيتبعوا كل أوامره،
رسول الله ﷺ رد على الكلام ده بإيه🤔
قال رسول الله ﷺ: الأمر لله يضعه حيث يشاء!
يعني يا بيحرة، لو إنت هتستحق إنك تقود المسلمين من بعدي وعندك القدرات إللي تأهلك لكده،
ربنا هيخليك إنت إللي تحكم، لكن لو غيرك هو إللي يستحق فربنا هيعطي الولاية للي يستحقها👌
يعني من الآخر رسول الله ﷺ رفض الشرط بتاع بيحرة🙊
فقال له بيحرة : يعني احنا نعرض نفسنا للقتل وبعدين لما ربنا ينصرك يكون الملك لغيرنا😳
لا معلش مش عايزين😤

◇طبعا كلنا مستغربين رد فعل رسول الله ﷺ، يعني هو كان ممكن يقبل بشرطه ده، وبعدين لما الرجل يُسلم يبقى يقنعه ويفهمه عادي مع الوقت

وهيستجيب أكيد🤷‍♀️
ده تفكير الناس إللي بتبص تحت رجلها مش للمستقبل، رسول الله ﷺ قدوة الناس إللي هتيجي بعده هيعملوا زيه،
هو كان ممكن يعرض المال على الناس عشان يتألف قلوبهم،
ويدخلوا الإسلام،
لكن الزعامة وحكم المسلمين مينفعش👌
ليه بقى😕
، لأن لما الزعيم بيكون ضال وهمه الدنيا، ضلاله مش بيؤثر عليه لوحده، ده هيؤثر على كل الامة😑
لأن الشخص الحريص على الزعامة هتلاقيه بيعمل كل المحرمات عشان يحافظ على زعامته وملكه😬
قتل عادي...تعذيب ميضرش...سجن وضرائب و..و..🙄
والزعيم إللي يعيش لدنيته هيهمل دين الناس، وأي قرار غلط هيعمله الناس كلها هتمشي وراه،
فأهم حاجة بالنسبة لزعماء الدنيا إنهم يحافظوا على زعامتهم وملكهم بأي طريقة، ومش مهم بقى إيه إللي يحصل بعد موتهم😶
لكن رسول الله ﷺ مش من زعماء الدنيا، رسول الله خايف على الناس في زمنه وفي كل زمن هييجي بعد موته ﷺ،
فإزاي يستأمن على المسلمين واحد زي بيحرة كل همه الزعامة وحب السيطرة، وهو ده هدفه من دخوله في الإسلام🤷‍♀️
يعني هو مش داخل الإسلام عشان بيحبه وعايز ينصره، هو كان عايز يدخل الإسلام لأن هو عارف إن الإسلام هيحكم الناس فهو عايز يكون الحاكم👌
والناس إللي همها الدنيا ودايما تفكر أنا نصيبي فين، أو انا هستفاد إيه، لا ينصروا الإسلام أبدا،
لكن إللي ينصر الإسلام هو إللي بينسى نفسه وهو بيخدم الإسلام وعينه على الآخرة😊

وبكده تكون المفاوضات فشلت مع بني عامر ورجعنا لنقطة الصفر تاني😓

على الرغم من إن رسول الله ﷺ شغال في الدعوة وبيبذل مجهود عشان ينشر الإسلام، إلا إنه لم يُهمل حياته الشخصية،
في السنة العاشرة من البعثة دي،
جاءت لرسول الله ﷺ خولة بنت حكيم زوجة عبد الله بن مظعون تشجعه على الزواج،
فقال لها مين بعد خديجة، فقالت له : عائشة بنت أبي بكر صاحبك، فقال لها صغيرة، وكانت عائشة في الوقت ده عمرها ست سنين،
فقالت له الصغيرة تكبر، فقال لها طيب ومن لبناتي لحد ما تكبر، فقالت له سَوْدَة بنت زَمعة،
زوجها مات وسابها بين أهله المشركين، فرضي رسول الله ﷺ وتزوجها شفقة بها لأنها كانت مسنة، ومكنتش ذات جمال،
وعقد على عائشة بنت أبي بكر رضي الله عنها وهي بنت ست سنوات ودخل بها وهي عندها تسع سنوات زي ما هنشوف بعدين😊

☆طبعا لازم نقف هنا ونوضح موضوع زواج رسول الله ﷺ بعائشة وإنه إزاي يتزوج طفلة، وإيه الحكمة من زواجه منها على رغم فرق السن إللي بينهم واشمعنى رسول الله ﷺ تزوج عائشة وهي صغيرة ،
ورفض إنه يزوج ابنته فاطمة من أبي بكر أو عمر بحجة إنها صغيرة وزوجها لعلي بن أبي طالب🤔

ناخدهم واحدة واحدة 😅
◇أولا :
هو لم يتزوج طفلة لم تبلغ ،رسول الله ﷺ عقد على عائشة وهي بنت ست سنين ولم يدخل بها إلا بعد البلوغ وهي عندها تسع سنين،
ومفيش واحدة تبص لبنتها إللي عندها تسع سنين وتقول إزاي رسول الله تزوج بنت صغيرة كده😬
السيدة عائشة كانت طويلة، وكمان كانت عايشة في مكة وهي بلد حار والبلاد الحارة يكون فيها البلوغ أسرع،
فلما نقول إن السيدة عائشة كان عمرها تسع سنين وهي طويلة يعني هي في جسم بنت عندها ستة عشرة سنة من بناتنا دلوقتي💁‍♀️
فهي كانت تصلح للزواج ورسول الله ﷺ مش هيتزوج امرأة لا تصلح للزواج🤷‍♀️

◇ثانيا:
من حكمة ربنا إن رسول الله ﷺ يتزوج عائشة على الرغم من فرق السن إن عائشة كان واضح عليها علامات الذكاء والفطنة والفصاحة والفهم،
فرسول الله ﷺ شاف إنها هتكون أقدر من غيرها على نقل أقواله وأحواله للناس،
فحياته ﷺ لازم تكون معروفة لنا عشان نتبعه، فلازم إللي ينقل عنه وينقل أحواله يكون ذكي وعنده حكمة👌
وكمان هي ابنة أحب الناس إليه أبو بكر الصديق،
فدي تعتبر كرامة لأبي بكر الصديق رضى الله عنه😉
و بالمناسبة كل النساء إللي هيتزوجهم مش عشان شهوة زي ما الناس بتطعن فيه ﷺ،
وإلا كان تزوج وهو صغير في شبابه، وكمان مكنش أول واحدة يتزوجها بعد خديجة متكونش جميلة،
لو هو هيتزوج عشان شهوة الزواج كان اختار أجمل النساء🙄
لكن كل زواجاته كانت لهدف وهو إن الناس تقلده في التعامل مع زوجاته👌
فهو تزوج البكر والثيب والكبيرة والصغيرة، فكل واحدة في نسائه كانت نموذج مختلف وهو اتعامل معهن جميعا 😉

◇ثالثا:
الأصل إن المرأة تتزوج القريب منها في السن، عشان يكون في تكافؤ ويكون في ألفة بين الزوجين،
عشان كده رفض إن فاطمة تتزوج من أبي بكر أو عمر،
لكن لو في مصلحة أكبر ممكن نتجاوز الشرط ده،
وطبعا المصلحة في زواج رسول الله ﷺ من السيدة عائشة كبيرة جدا،
ده غير إن رسول الله ﷺ رأى رؤيا مرتين إنه يتزوج عائشة رضي الله عنها، ورؤيا الأنبياء حق👌

خلصت السنة العاشرة من البعثة، ودخلنا في السنة الحادية عشرة، استمر رسول الله ﷺ في الدعوة أسلم بعض الناس مش مشهورة أسمائهم لأنهم ماتوا بعد إسلامهم بشهور قليلة،
وكان رسول الله ﷺ لسه في حماية المطعم بن عدي،
قعد السنة دي كلها يدعو الناس ويعلم الدين للمسلمين،
ويشرح لهم الآيات،
ويقرأ القرآن على أهل مكة بس مفيش فايدة فيهم برده،
وكانوا بيقعدوا يجادل

وا رسول الله ﷺ ومن أمثلة الجدال بتاعتهم،
إن العاص بن وائل وهو سيد من سادات مكة جاء لرسول الله ﷺ وكان في إيده عظم بالي قديم وراح مفتته قصاد رسول الله ﷺ وبقى تراب وقال له : بقى ربنا هيُحيي التراب ده بعد ما اتفتت كده😏
فقال له رسول الله ﷺ:
أيوة هيبعثه.. ثم يميتك ثم يحييك ثم يُدخلك نار جهنم👌
فنزلت فيه :
"أَوَلَمْ يَرَ الْإِنسَانُ أَنَّا خَلَقْنَاهُ مِن نُّطْفَةٍ فَإِذَا هُوَ خَصِيمٌ مُّبِينٌ *
وَضَرَبَ لَنَا مَثَلًا وَنَسِيَ خَلْقَهُ ۖ قَالَ مَن يُحْيِي الْعِظَامَ وَهِيَ رَمِيمٌ*
قُلْ يُحْيِيهَا الَّذِي أَنشَأَهَا أَوَّلَ مَرَّةٍ ۖ وَهُوَ بِكُلِّ خَلْقٍ عَلِيمٌ"

استمر الوضع كده خلال السنة الحادية عشرة لحد ما جاء موسم الحج،
وبدأ رسول الله ﷺ يعرض نفسه على القبائل مرة ثانية،
لكن المرة دي رسول الله ﷺ غير من خطته،
يعني هو كان بيروح يعرض نفسه على القبائل في النهار وكان أبو لهب يشوفه ويكذبه، أبو جهل يعطل عليه ويسخر منه🙄
المهم يعني إن الدعوة كانت بتوصل للناس مشوشة وفيها قلق،
لكن السنة دي رسول الله ﷺ عمل خطة جديدة،
لأن المطالب السنة دي أقوى، رسول الله ﷺ هيطلب من الناس الإسلام وكمان الدفاع عنه وعن المؤمنين ومواجهة قريش،
وقريش لو عرفت المطالب دي هتبقى مشكلة جامدة🙊
فاحنا محتاجين سرية تامة👌
والسرية دي أنسب وقت لها في الليل، ولأن رسول الله ﷺ ميعرفش القبائل القوية من الضعيفة ولا تاريخ زعماء القبائل ولا أنسابهم،
فهو محتاج لواحد خبير في الأنساب، يبقى مفيش أحسن من أبي بكر الصديق خبير الأنساب 💁‍♀️
فبدأ رسول الله ﷺ يزور القبائل في مخيماتهم خارج مكة في الليل،
وكده ضربنا عصفورين بحجر، الدعوة هتوصل للناس بدون تشويش وعلى روقان،
ولو في قبيلة وافقت إنها تنصر رسول الله ﷺ محدش من أهل مكة هيعرف هي مين🤭
رسول الله ﷺ مع إنه مُؤيد من ربنا لكن بيعلمنا الأخذ بالأسباب وإننا نخطط عشان مهمتنا تنجح👌

كان رسول الله ﷺ بيقابل القبائل فلما أبو بكر الصديق رضي الله عنه يقول له إن القبيلة دي ضعيفة كان يعرض عليهم الإسلام من غير ما يطلب منهم نُصرة،
ولو القبيلة قوية بيعرض عليهم الإسلام ويطلب منهم النصرة،
ذهب رسول الله ﷺ لقبائل كثيرة ومحدش منهم استجاب لرسول الله ﷺ، محدش آمن😑

☆وهنا نتعلم نقطة مهمة وهي إن احنا علينا البلاغ فقط🤚
يعني يا جماعة احنا علينا توصيل الدين مش إننا نلزم الناس بيه😅
يعني لما تقولي لواحدة إن النمص حرام مثلا وهي لا تستجيب خلاص إنتي عملتي إللي عليكي، إنتي ملكيش إنك تلزميها ولا تغصبي عليها،
من الأمور إللي بتخلي الناس تنفر إنهم يحسوا إننا بنلزمهم وإنهم لازم يسمعوا كلامنا،
احنا بنعرض عليهم الدين، والله قبلوا فلله الحمد مقبلوش خلاص مش بإيدنا إننا نلزمهم،
"فَإِنْ أَعْرَضُوا فَمَا أَرْسَلْنَاكَ عَلَيْهِمْ حَفِيظًا"
المشكلة بقى إننا لما منلاقيش الناس استجابت لنا نتعصب ونتضايق وممكن نتهم الناس بكلام مش ظريف😬
لا يا جماعة رسول الله ﷺ وهو رسول الله مألزمش أي حد بالدين، هو كان بيبلغ وخلاص، وهي دي وظيفته ووظيفتنا من بعده👌
"إِنْ عَلَيْكَ إِلَّا الْبَلَاغُ"

من القبائل إللي رسول الله ﷺ دعاهم كانت قبيلة بني شيبان، كان أبو بكر الصديق رضي الله عنه بيسأل : مَن القوم فيردوا ويقولوا بني فلان،
فلما سأل القبيلة وقالوا له إنهم بني شيبان بن ثعلبة، قال أبو بكر لرسول الله ﷺ :
يارسول الله بأبي انت وأمي، الناس دي من أعظم القبائل قبيلة كبيرة وعزيزة 😯
ولما سأل عن أساميهم لقى أشراف بني شيبان موجودين : مفروق بن عامر وهانئ بن قُبيصة والنّعمان بن شُرَيك والمثنى بن حارثة😁

هيبدأ الحوار وأبو بكر الصديق رضي الله عنه هيسأل بني شيبان،
هيسألهم عن إيه؟
وهل هيؤمنوا ولا هيكونوا زي غيرهم من القبائل؟
ده إللي هنعرفه الجزء الجاي إن شاء الله 😊



#Eman_Shalapy

#قصص_الأنبياء(٢)
#السيرة_النبوية
#الحلقة_الأربعون
#وفد_الخزرج
#انشقاق_القمر

وقفنا المرة إللي فاتت عند بني شيبان القبيلة القوية إللي رسول الله ﷺ هيعرض عليهم الإسلام،
وكان أشراف بني شيبان موجودين وهم :
مفروق بن عامر وهانئ بن قُبيصة والنّعمان بن شُرَيك والمُثنى بن حارثة،
بدأ معاهم الكلام أبو بكر الصديق بكلام يثيرهم عشان يشوف حماسهم وقوتهم إيه،
يعني بالبلدي كده يشوف ميتهم إيه😅
فسألهم أبو بكر:
إنتم عددكم أد إيه؟
فقال له مفروق: احنا أكثر من ألف والألف محدش يغلبهم بسبب قلتهم👌

فأثاره أبو بكر وقال له:طيب وإيه أخبار المَنعة فيكم😈
يعني تقدروا تحموا إللي يستجير بكم ولا إيه😈
فمفروق حس بالإهانة إزاي أبو بكر ينتقص منهم وإنهم مش أقوياء،
فرفع صوته وقال لأبي بكر:
احنا لما بنواجه حد بتكون دي أشد الأوقات غضب،
واحنا بنفضل وبنحب الخيل ورعايتها على حبنا لعيالنا،
والنصر من عند الله ينصرنا مرة وينصر الناس علينا مرة 😤

☆متنسوش إن العرب كانت تؤمن بوجود الله خالق للكون، لكنهم كانوا بيشركوا معه آلهة تانية في العبادة😉

هو ده الكلام إللي أبو بكر الصديق رضي الله عنه كان عايز يسمعه من مفروق، عشان لما يطلب منه الوقوف أمام قريش ميرجعش في كلامه وميكنش متردد،
مفروق كان واخد باله من أسئلة أبي بكر الصديق رضي الله عنه وعرف أنه عايز حاجة معينة،
رسول الله ﷺ مكنش لسه دعاهم لحاجة ، أبو الصديق هو إللي بيتكلم بس،
فقال مفروق لأبي بكر : لعلك أخو قريش؟
يعني هو إنت الرجل إللي ظهر في قريش وبيدعو لدين جديد🤔
فرد عليه أبو بكر بذكاء عايز يكسب نقطة في صالحه قال له:
إيه ده هو وصل لكم إنه رسول الله😮
يعني كأنهم متفقين دلوقتي إن محمد رسول الله وخلاص اعترافهم بإنه رسول أمر واقع😅
لكن مفروق كان ذكي برده وخد باله من سؤال أبي بكر فقال له: وصل لنا إنه بيتقال كده🤷‍♂️
فالتفت مفروق لرسول الله ﷺ وسأله وإنت بتدعو لإيه بقى يا أخا قريش☺
فبدأ رسول الله ﷺ يتكلم قال :
أدعو إلى شهادة أن لا إله إلا الله وحده لا شريك له وأني رسول الله ، وأدعوكم إنكم تؤوُوني وتنصروني،
لأن قريش كذبت برسالتي وتكبرت على أمر الله واتبعوا الباطل وتركوا الحق👌
مفروق عجبه كلام رسول الله ﷺ وهو مكنش خايف من قريش لكنه حب يتعرف على الدين أكثر،
فسأله عن الدين إللي بيدعو له، فرسول الله ﷺ فكر إنه يقرأ عليه القرآن،
لكن رسول الله ﷺ هيختار الآيات المناسبة للموقف،
مش هيروح يحكي لهم مثلا قصة نوح وهلاكهم،
الموقف مش مناسب خالص😅
لكن نظر في الوفد لقاهم ناس على مستوى عالي من الأخلاق فشاف آيات القرآن إللي بتدعوا للأخلاق الحميدة،
يعني كأن رسول الله ﷺ بيدور على أرض مشتركة يقف معاهم فيها😉
ودي من حكمته ﷺ إللي لازم نتعلمها، لما نيجي ندعي حد نشوف شخصية إللي قصادنا دي مهتم بإيه أو الصفات إللي فيه وأبدأ أدخل له من الناحية دي وبعدين أقول إللي أنا عايزاه بعد كده😁
رسول الله ﷺ قرأ عليهم آيات من سورة الأنعام نشوف مع بعض :
"قُلْ تَعَالَوْا أَتْلُ مَا حَرَّمَ رَبُّكُمْ عَلَيْكُمْ ۖ أَلَّا تُشْرِكُوا بِهِ شَيْئًا ۖ وَبِالْوَالِدَيْنِ إِحْسَانًا ۖ وَلَا تَقْتُلُوا أَوْلَادَكُم مِّنْ إِمْلَاقٍ ۖ نَّحْنُ نَرْزُقُكُمْ وَإِيَّاهُمْ ۖ
وَلَا تَقْرَبُوا الْفَوَاحِشَ مَا ظَهَرَ مِنْهَا وَمَا بَطَنَ ۖ وَلَا تَقْتُلُوا النَّفْسَ الَّتِي حَرَّمَ اللَّهُ إِلَّا بِالْحَقِّ ۚ ذَٰلِكُمْ وَصَّاكُم بِهِ لَعَلَّكُمْ تَعْقِلُونَ"

انبهر مفروق بكلام القرآن ومعانيه وإعجازه والأخلاق إللي بيدعوا لها، لدرجة إنه قال لرسول الله ﷺ: بتدعو لإيه يا أخا قريش؟
يعني عايز يسمع كلام تاني من القرآن 😁
فرسول الله ﷺ قرأ عليه برده آيات عن الأخلاق قال:
"إِنَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ذِي الْقُرْبَىٰ وَيَنْهَىٰ عَنِ الْفَحْشَاءِ وَالْمُنكَرِ وَالْبَغْيِ ۚ يَعِظُكُمْ لَعَلَّكُمْ تَذَكَّرُونَ "

فتأثر مفروق بكلام القرآن وقال لرسول الله ﷺ:
إنت دعيت لمكارم الأخلاق ومحاسن الأعمال، فعجبه الإسلام
وقعد يشتم في قريش 😅
لكن مفروق ميقدرش ياخد قرار لوحده هو أه زعيم وشريف في قومه بس في ناس معاه لازم يستشيرهم،
فحب إنه يعرف رأي أصحابه فقال لرسول الله ﷺ وهو بيشاور على صاحبه :
ده هانئ بن قبيصة شيخنا وصاحب ديننا💁‍♂️
يعني عنده خلفية دينية وأنا حابب آخذ رأيه، فالظاهر إن هانئ كان معجب بالإسلام ومكنش معترض عليه،
لكنه كان خايف ياخد قرار يورط بني شيبان في حرب مش بس مع قريش ..لأ ده مع العرب كلهم🙊
فقال هانئ لرسول الله ﷺ:
أنا سمعت كلامك يا أخا قريش، لكن مش منطقي خالص إننا نترك ديننا ونتبعك من قعدة واحدة كده،
يعني إنت كلامك حلو وكل حاجة بس عايزنا من قعدة واحدة ومن كم كلمة قلتها نشقلب حياتنا كلها ونحارب الدنيا ... مستحيل😕
☆وعلى فكرة ده منطق ناس كثير من المسلمين للأسف😑
لما نيجي نكلمهم عن اتباع الدين وربنا قال ولازم تعملوا،
يقولوا يعني إنتم عايزينا نغير حياتنا فجأة كد

ه ونشقلبها مرة واحدة، ماحنا طول عمرنا عايشين كده ومبسوطين 😒
معندهمش أي استعداد للتنازل عن أي حاجة لله😞

المهم هانئ قال لرسول الله ﷺ : انت ترجع واحنا نرجع ونفكر وبعدين يحلها ربنا،
فكأن هانئ بينسحب انسحاب مؤدب يعني😅
يبقى مفروق موافق، هانئ متردد ويميل لعدم الموافقة دلوقتي،
وبما إن الموضوع في حرب يبقى محتاجين نستشير وزير الحربية بتاعنا، فقال هانئ لرسول الله ﷺ وهو بيشاور على صاحبهم الثالث:
ده المُثنى بن حارثة شيخنا وصاحب حربنا💁‍♂️
يعني هو المسؤول عن الحرب ونحب نسمع رأيه،
والمثنى صاحب عقلية عسكرية وفارس شجاع ومشهور وسط العرب،
فقال المثنى : أنا سمعت كلامك يا اخا قريش، ورأيي من رأي هانئ👌
يعني أنا مش حابب إننا نتسرع في الدخول للإسلام، لكن المثنى أضاف نقطة جديدة عن الوضع العسكري لبني شيبان وهو ده إللي هيحسم الموضوع بأه أو لأ،
قال المثنى لرسول الله ﷺ:
قبيلتنا بين مائين، ماء العرب وأنهار كسرى

☆قبيلة بني شيبان كانت قريبة من نهر الفرات في العراق على الحدود يعني وكانت العراق تحت ملك كسرى ملك الفرس.

فاحنا هنقدر نساعدك وننصرك على قبائل العرب،
لكن نعدي لمياه كسرى ونروح نقاتلهم معلش مش هنقدر على ده، احنا أه ألف ونقدر نتغلب على العرب،
لكن الفرس جيشهم أكثر من اثنين مليون جندي😳
هنحاربهم ولا نقف قصادهم إزاي دول😱
ده غير كده احنا بيننا وبين كسرى عهد، وهو إننا لا نُحدث حدثا ولا نُؤوي مُحدثا،
يعني كسرى واخد مننا عهد إننا لا نخترع حاجة جديدة ولا ندافع عن أحد جاء بحاجة جديدة،
وأنا شايف إن إنت والدين بتاعك ده من الحاجات إللي الملوك بتكرهها😑
فلو انت عايز ،احنا نقدر نؤويك وننصرك على العرب بس👌
طبعا ده تقدم رهيب جدا وفرصة ذهبية لرسول الله ﷺ🙊
يعني هو أصلا مطارد من العرب دلوقتي،
فخلاص نخلص العرب وبعدين لما ييجي وقت فارس يبقى يحلها ربنا وأهه الإيمان يكون اتمكن من قلوب الناس دي وهيفدوا الدين بأرواحهم👌
لكن رسول الله ﷺ رفض عرض المثنى😳
قال له:
كويس أوي إنكم قلتم إمكانيتكم بكل وضوح، بدل ما تتفقوا معايا وبعدين تخلفوا كلامكم،
وبعدين قال له قاعدة أساسية مهمة جدا عن الإسلام لازم نعرفها احنا كمان:
《دين الله عز وجل لن ينصره إلا من أحاط به من جميع جوانبه》
يعني مش ممكن إللي ينصر الإسلام يقعد يختار أنا هاخد ده وأسيب ده، مش طماطم هي🙄
الإسلام يعني الإستسلام لكل أوامر ربنا، مش هاخد من الأوامر إللي يوافق هوايا وظروفي وإللي مينفعش معايا أسيبه،
العبودية لله إننا ننفذ كل أوامر ربنا زي ما قالها لنا ونترك إللي نهانا عنه👌
فرسول الله ﷺ رفض العرض بتاعهم لأنه عايز ناس وقت ما يقول لهم ربنا قال كذا ينفذوا فورا من غير ما يقعدوا يقولوا ليه وعشان إيه والحكمة من كده إيه ،
طيب أفهم الأول ماهو احنا عقولنا دي مش زينة يعني وربنا مدينا عقل نفكر بيه ...إلخ من الكلام إللي يشل😑

◇مش معنى كلامي إننا نلغي العقل عشان بس الناس إللي مبتصدق😁
ننفذ أوامر ربنا وبعدين ممكن نفكر في الحكمة بعدين، مش إننا نعرض أوامر ربنا ونواهيه على عقولنا وإللي يمشي معاه يبقى حلو نعمله وإللي مش فاهمينه نعترض عليه ونقول لأ مش هنعمله🤓

المهم رسول الله ﷺ قبل ما يمشي إداهم مفاجأة كده😁
قال لهم:
أمة فارس إللي إنتم خايفين منها دي لو ربنا أورث المسلمين أرضهم وأخذوا نساءهم سبايا ساعتها تسلموا؟
فقالوا له : طبعا نسلم😲
يعني بيقول لهم هتشوفوا إن أمة فارس دي إللي جيشها أكثر من اثنين مليون المسلمين هيتغلبوا عليهم ويهزموهم👌

طبعا احنا الموضوع بالنسبة لنا حاسينه عادي لأن احنا عارفين إن الإسلام انتشر وفعلا المسلمين فتحوا بلاد فارس،
لكن الناس دي مكنوش لسه عارفين حاجة،
تخيلوا واحد من مجاهل أفريقيا جاي يقول لمجموع من الأمريكيين الكفار مثلا يا جماعة احنا هنؤذن في البيت الأبيض وهيكون ده مقر خلافة المسلمين👌
هيكون رد فعلهم إيه 😅

أهه ده كان تقريبا وضع رسول الله ﷺ في الوقت ده، تحت حماية رجل كافر ، المسلمين مضطهدين ومُفرقين،
إزاي بقى ناس بالمنظر ده هيهزموا أقوى دولة في العالم إللي جيشها بس مش الشعب يزيد على اثنين مليون جندي😳

فشلت المفاوضات مع بني شيبان، ورسول الله ﷺ لم ييأس، هو عنده خطوط واضحة وقواعد أساسية مش هيتنازل عن أي حاجة منها،
ولحد دلوقتي لقينا ناس وافقت على المبدأ بس كانوا أصحاب دنيا،
ولقينا ناس تانية وافقوا نص نص، يبقى أكييييد هيلاقي إللي بيدور عليهم بس أهم حاجة إنه يستمر في البحث ولا ييأس،
لأن الإنسان بيفشل لما يتوقف عن المحاولة،
لكن طول ماهو بيحاول يعمل إللي هو عايزه هيوصل أكيد وهيحقق إللي كان نفسه فيه😊

انتقل رسول الله ﷺ لوفد تاني كان مكون من ستة رجال،
سألهم إنتم منين؟
فقالوا احنا مجموعة من الخَزْرَج، فسألهم رسول الله ﷺ:
أه...إنتم من حلفاء اليهود؟!
فقالوا له: أيوة من حلفاء اليهود😕
فقال لهم :طيب ممكن نقعد نتكلم مع بعض شوية ؟!
قالوا له : أه عادي 🤔
فعمل معاهم رسول الله ﷺ زي باقي القبائل دعاهم للإسلام وقر

أ عليهم القرآن،
فآمن الستة كلهم مرة واحدة في نفس اللحظة😳

☆إيه ده مين الناس دي إللي آمنوا كلهم بدون أي تردد كده😮
الخَزْرج دول قبيلة مشهورة في يثرب، وفي قبيلة تانية معاهم في نفس البلد اسمهم الأوس،
وكان بيسكن معاهم اليهود وكانوا حلفاء للأوس والخزرج ويثرب بعيد عن مكة حوالي خمسمائة كيلو متر،
وده يوضح لنا أد إيه رسول الله ﷺ كان مُطلع على أحوال زمانه وعنده معلومات عن القبائل بصفة عامة،

اليهود إللي كانوا عايشين في يثرب مع الأَوْس والخَزْرج، كانوا كل ما يحصل خلاف بينهم يقولوا للأوس والخزرج :
الزمن ده زمن نبي وأول ما يظهر هنتبعه ونقتلكم قتل عاد 😈
فمن كثرة ما اليهود بيقولوا كده الأوس والخزرج كرهوا اليهود، وفي نفس الوقت كانوا خايفين منهم ومع اتحادهم مع النبي إللي يظهر ده،
الفكرة إنهم كانوا مصدقين أصلا إن في حاجة اسمها نبي،
غير أهل مكة إللي كانوا رافضين الفكرة😮
فلما سمعوا كلام رسول الله ﷺ قالوا لبعض قصاد رسول الله ﷺ:
الحقوا 😲 ده إللي اليهود بيهددوكم به ، اوعوا يسبقوكم إليه👌
فكان ده سبب رئيسي في إسلامهم، سبب ثاني في سرعة إسلام الوفد الخزرجي إن قبل كم شهر كان في حرب أهلية قبلية بين الأوس وبين الخزرج،
ولسه من كم شهر بس كان في حرب بينهم وكانوا هيفنوا بعض،
فوفد الخزرج فكروا إن رسول الله ﷺ بكلامه المعجز وأسلوبه في التعامل يقدر يجمع بين القبيلتين،
فقالوا لرسول الله ﷺ:
احنا تركنا قومنا وبينهم من الشر إللي بينهم ، فيمكن ربنا يجعلك سبب في الجمع بينهم👌
قالوا لرسول الله ﷺ: احنا هنرجع لقومنا وندعوهم ونعرض عليهم إللي احنا آمنا به، فلو قبلوا فمحدش هيكون أعز علينا منك😊
والستة إللي آمنوا من الخزرج دول كانوا :
《أسعد بن زُرَارة وجابر بن عبد الله، وقطبة بن عامر وعوف بن الحارث ورافع بن مالك وعقبة بن عامر》
ورجع الستة فعلا ليثرب وبدأوا يدعوا قبيلتهم الخزرج ومش بس كده ده دعوا كمان الأوس للدخول في الإسلام ونسيوا الحرب إللي كانت بينهم ،ودخل في الإسلام اثنين من الأوس:
الهيثم بن التيّهان وعُويْم بن ساعدة، بمعلومات بسيطة جدا عرفوها عن الإسلام انطلقوا يدعوا الناس باللي هم عارفينه،
رسول الله ﷺ مكنش مخطط للقاء الستة دول،
ولا كان متوقع أنه هيقابلهم ، لكن لما الإنسان بيسعى ربنا بيكافؤه ويرتب له الأسباب إللي تخليه يوصل لهدفه👌
عشان كده احنا علينا السعي وإننا نعمل إللي نقدر عليه والنتائج بتاعة ربنا 😉
استمر الستة يدعون في قومهم سنة كاملة،
لحد ما رجعوا في العام التالي إللي هو العام الثاني عشر للبعثة في موسم الحج عشان يقابلوا رسول الله ﷺ بعشرة من الخزرج واثنين من الأوس،
هنعرف أحداث المقابلة إن شاء الله بس قبل كده محتاجين نعرف الحادثة العجيبة إللي حصلت قبل السنة الثالثة عشرة للبعثة 😮
المشركين كانوا عايزين معجزة من رسول الله ﷺ عشان يثبت لهم إنه رسول من عند الله،
☆قال يعني بعد ده كله ورسول الله مجبش معجزات🙄

بس هم كده أهل الباطل يقعدوا يجادلوا ويطلبوا أمور تعجيزية عشان يحاربوا الدين😑
فقالوا لرسول الله ﷺ احنا عايزين نشوف معجزة،
إنت مجبتش ولا معجزة،
رسول الله مقعدش يجادلهم ويقولهم مانا قلتلكم حادثة الإسراء وجبتلكم الدليل،
وقلت لكم على حادثة الصحيفة إللي أكلتها دودة الأرض و..و..
هو مقعدش يعدد لهم ، قال لهم لو أنا خليت القمر ينشق نصفين تؤمنوا؟
وكان الليلة دي القمر بدر، فقالوا له: أه طبعا نؤمن😲
فدعا ربنا إنه يشق له القمر فانشق القمر نصفين 🌜🗻🌛
وكان جبل أبي قبيس بينهم😮
فلما شافوا المنظر قالوا : سحرنا محمد😑
وكذبوا بالمعجزة إللي شافوها قصاد عينهم، فقال واحد فيهم طيب لو هو سحرنا فأكيد مش هيقدر يسحر إللي برة مكة،
خلونا نسأل الناس إللي جايين من السفر عن إيه أكثر حاجة عجيبة شوفتوها في سفركم ده،
فلما جاء الناس من السفر سألوهم قالوا لهم : في ليلة شفنا فيها القمر مقسوم نصين😳
فراح أهل مكة قالوا : ده سحره وصل لخارج مكة ، وسحر الناس😲
☆طبعا لا تعليق🤐
ربنا انزل :
"اقْتَرَبَتِ السَّاعَةُ وَانْشَقَّ الْقَمَرُ * وَإِنْ يَرَوْا آيَةً يُعْرِضُوا وَيَقُولُوا سِحْرٌ مُسْتَمِرٌّ * وَكَذَّبُوا وَاتَّبَعُوا أَهْوَاءَهُمْ وَكُلُّ أَمْرٍ مُسْتَقِرٌّ"

وأكيد السؤال إللي بيفرض نفسه هنا 😅
هو ليه ربنا لم يُهلك أهل مكة بعد ما طلبوا معجزة ولم يؤمنوا بها زي ما أهلك الأمم السابقة،
وخصوصا إن احنا قلنا قبل كده إن جبريل عليه السلام جاء قبل كده لما طلبوا إن مكة يبقى فيها أنهار ويحولها لأرض خضراء،
وكانوا طلبوا برده إنه يحول لهم جبل الصفا لذهب،
فقال جبريل لرسول الله ﷺ إن ربنا بيقول لو أعطاهم إللي طلبوه وكذبوا هيهلك مكة،
إيه الفرق بقى في الموقفين🤔

سؤال مهم جدا عشان كده هنجاوب عليه المرة الجاية إن شاء الله 😁


#Eman_Shalapy

#قصص_الأنبياء(٢)
#السيرة_النبوية
#الحلقة_الواحدة_والأربعون
#بيعة_العقبة_الأولى

اتكلمنا المرة إللي فاتت عن معجزة انشقاق القمر، ووقفنا عند سؤال مهم وهو:
ليه ربنا لم يُهلك أهل مكة بعد ما طلبوا معجزة ولم يؤمنوا بها زي ما أهلك الأمم السابقة،
وخصوصا إن احنا قلنا قبل كده إن جبريل عليه السلام جاء قبل كده لما طلبوا إن مكة يبقى فيها أنهار ويحولها لأرض خضراء، وكانوا طلبوا برده إنه يحول لهم جبل الصفا لذهب،
فقال جبريل لرسول الله ﷺ إن ربنا بيقول لو أعطاهم إللي طلبوه وكذبوا هيهلك مكة،
إيه الفرق بقى في الموقفين🤔

ربنا بيهلك الأمم إللي بتطلب معجزة بعينها، يعني هم بيقولوا عايزين معجزة كذا،
زي ثمود قوم صالح هم إللي طلبوا الناقة بكل مواصفتها وربنا خلقها لهم بالمواصفات إللي طلبوها،
ومع ذلك كفروا فاستحقوا العذاب والهلاك،
ولما طلب كفار مكة من رسول الله ﷺ أنه يفَجّر لهم من الأرض ينابيع ماء، وطلبوا معجزات بعينها زي ما قلنا في الجزء الثامن عشر،
ربنا قال إنه ممكن يحقق لهم كل إللي طلبوه لكن لو كذبوا بعد كده هيهلكوا جميعا👌
لكن في معجزة شق القمر هم مقلوش احنا عايزينك تشق لنا القمر،
ده رسول الله ﷺ هو إللي عرض عليهم لما قالوا له أَرِنا معجزة،
عرض عليهم إيه رأيكم لو شققت لكم القمر تؤمنوا؟
فقالوا له : ماشي،
ده غير كده مش كل الناس شافت انشقاق القمر،
والمعجزة لازم الناس كلها تشوفها زي ناقة صالح،
فبعض أهل مكة شافوه وبعضهم كان في بيته وإللي كان مشغول لأن القمر بيطلع في الليل والليل الناس فيه بتنام وبتقعد في بيوتها،
مش زي عصرنا دلوقتي، يعني الدنيا بالليل كانت بتبقى ظلام مفيش أي ضوء،
فكان النقاش مع رسول الله ﷺ في بداية الليل فأراهم آية انشقاق القمر يعني الموضوع مكنش مترتب له أصلا👌
وده يوضح لنا نقطة مهمة، وهي إن ناس قليلة كملن من خارج مكة شافت انشقاق القمر،
يعني في ناس بتُنكر انشقاق القمر بحجة إن محدش شافه من الأمم المعاصرة لأهل مكة والبشر كلهم بيشتركوا في ضوء القمر، وحاجة زي كده هنلاقي الناس بينقلوها،
¤يبقى إزاي حصل 🤨

بكل بساطة لأن وقت الليل الناس نايمة وحتى لو حد صاحي فهيبقى مشغول بحاجات تلهيه،
الناس مش هتبقى قاعدة رافعة رأسها للسماء باصة للقمر ومستنيينه يتشق يعني 🤓
وكمان لما يكون بداية الليل في مكة بيقابله في نصف الكرة الأرضية الناحية الثانية نهار،
أو مثلا فرق توقيت، في مكة بداية ليل وفي بلاد ثانية يبقى منتصف الليل، فالكل هيبقى نايم،
وكمان انشقاق القمر كان للحظات يعني مقعدش ليلة كاملة مُنشق، فطبيعي إن محدش ياخد باله،
يعني احنا في زماننا كان بيحصل خسوف للقمر ومحدش بيبقى عارف ولا يشوفه إلا لو الناس قالت قبلها،
لكن غير كده محدش بيحس بحاجة🤷‍♀️
ومتنسوش إن الخمر كان منتشر جدا في الزمن ده، فممكن لو ناس شافته تفكر إن ده بسبب الخمر فأكيد هيكذبوا نفسهم قبل ما يقولوا أي كلمة أصلا😅
أما إللي قالوا إن القمر لم ينشق أصلا ولسه هينشق يوم القيامة فكلامهم شاذ لا يُعترف به لأنه مخالف للأدلة الصحيحة👌

نرجع لرسول الله ﷺ في السنة الثانية عشرة للبعثة، كان رسول الله ﷺ بيدعو الناس بس كالعادة مفيش استجابة وحرب الدعوة شغالة،
كان بيشرح للمسلمين آيات القرآن وبيعلمهم الدين لحد ما جاء وفد من المدينة في موسم الحج من السنة الثانية عشرة من البعثة،
وكان الوفد مكون من اثنا عشر رجل من الأوس والخزرج ،
جاءوا عشان يقابلوا رسول الله ﷺ،
قعدوا مع رسول الله ﷺ في مكان اسمه العَقَبة، وبدأ رسول الله ﷺ يطلب منهم أمور محددة،
قواعد الإسلام الأساسية خلونا نشوفها ونشوف هل احنا مطبقينها في حياتنا ولا لأ👌
◇أولا :
ألا يشركوا بالله شيئا : تطبيق العقيدة الصحيحة، عبادة ربنا عبادة صحيحة، محدش يقدم أي أمر على أمر الله عز وجل👌
◇ثانيا:
لا يسرقوا ولا يزنوا ولا يقتلوا أولادهم ولا يأتوا ببهتان يفتروه بين أيديهم ولا أرجلهم،
والبهتان يعني أي حاجة بتخلي الشخص مندهش من الكذب إللي سمعه، مثال عشان المعنى يوضح😅
من أنواع البهتان:
الغيبة والنميمة وقذف المحصنات وقول الزور وشهادة الزور والزنا، وإن المرأة تزني وتلحق ولد الزنا بزوجها،
يعني أي حاجة مستبعشة تدخل في البهتان👌

بعد العقيدة الصحيحة تيجي الأخلاق،
مفيش قيام لأي أمة بدون الأخلاق، لو مفيش أخلاق ،ضاعت السياسة والحكم والقضاء والمعاملات😶

☆وأظن إنتم شايفين واقعنا عامل إزاي، عندنا أزمة في الأخلاق رهيبة😞
حتى بين إللي مفروض ملتزمين، ألفاظ صعبة ولعن بحجة الغيرة على الدين،
ورسول الله ﷺ هو أغير الناس على الدين ومع ذلك مشتمش حد أبدا على رغم الأذى إللي اتعرض له،
وربنا أمرنا نتبعه، رسول الله ﷺ كان ممكن يدعو على المشركين زي ما شفنا لكنه أبدا مشتمهمش،
بالعكس لما كان حد بيشتم قصاده انتصارا للدين برده كان إما بيسيبه ويمشي أو يُسكته،
احنا بنقعد نجاهد نفسنا عشان الصلاة والقيام والذكر و...و...عشان نبلغ درجات عالية في الجنة،
طيب ماهو الرجل يبلغ بحسن خلقه درجة الصائم القائم

،
وفي نفس الوقت لو الصائم القائم أخلاقه سيئة هتضيع حسناته إللي تعب في تجميعها🤷‍♀️

كل واحد فينا لازم يحسن أخلاقه حتى لو كل إللي حواليه أخلاقهم سيئة،
حتى لو إللي حواليه ألفاظهم سيئة احنا منعملش زيهم، حتى لو استفزونا برده نخلي قدوتنا رسول الله ﷺ،
مش احنا بنتعلم السيرة عشان نعمل زيه😉
عارفين القطار السريع 🚄مهما كان القطار سرعته كبيرة جدا عمره ما خرج عن القطبان🛤
وكذلك مشاعرنا لازم نتحكم فيها مهما غضبنا، أو الناس أذتنا أو استفزتنا مينفعش مشاعرنا تخرج برة قضبان الشرع👌

¤هقول لكم مثال ، أكيد كلنا عارفين حادثة قتل المسلمين في #نيوزيلاندا😑
طبعا كلنا غضبانين ومتضايقين ومحروق دمنا، طيب المشاعر دي نوجهها إزاي😓
هل نقعد نشتم في الرجل وفي دول الغرب وخلاص، ولا يطلع شباب يقولوا هو قَتل مسلمين آمنين،
خلاص احنا كمان هنروح نقتل نصارى آمنين في كنائسهم أو في بيوتهم وننتقم منهم😠

هل الإسلام قال كده؟
رسول الله ﷺ لما اتغدر بسبعين واحد من أصحابه كلهم من القراء يعني بيقرأوا القرآن وبيدرسوه ليل نهار،
حزن عليهم رسول الله ﷺ حزن شديد جدا ، مش بس لأنهم قتلوا ده كان في نفس الشهر عشرة من أصحابه قتلوا غدر برده يعني ثمانين واحد من أصحابه ، وهنعرف القصة بالتفصيل لما ييجي وقتها إن شاء الله ،
الشاهد إن رسول الله ﷺ كان بيدعو عليهم وبيعلم المسلمين الدين ،
لأن هو ده إللي كان يملكه ساعتها مكنش يقدر يخرج بجيش يقاتل الكفار دول لأن المسلمين كانوا لسه في مرحلة ضعف👌
وفي نفس الوقت مقعدش يشتمهم، ودول كانوا كفار فما بالكم بالناس إللي بتشتم مسلمين ظاهرهم الإسلام😑

لأ وشوفوا كمان رسول الله ﷺ عمل إيه 👌
واحد من المسلمين كان معدي في المكان لقى السبعين رجل من الصحابة دول قُتلوا،
فقابل بعدها وهو راجع للمدينة رجلين من نفس القبيلة إللي غدرت بالمسلمين دول وكان معاهم عهد من رسول الله ﷺ والصحابي ده ميعرفش،
فراح قاتلهم انتقاما للسبعين صحابي ورجع لرسول الله ﷺ،
تخيلوا إن رسول الله ﷺ أرسل دِية الرجلين دول لأهلهم لأنهم قُتلوا خطأ😶
مقلش مثلا خلاص هم اتقتلوا غلط وأصلا الناس دي قتلوا سبعين من أصحابي، فهم عليهم لي فلوس او أحسن يستاهلوا خليهم يذوقوا إللي عملوه فينا😤
مهما اتعامل الناس بأخلاقهم فاحنا لينا أخلاق الإسلام بتحكمنا،
إللي زعلان على قتل المسلمين يصلح نفسه وينصر دينه باتباع شرع ربنا💁‍♀️
مينفعش نتعامل مع الناس بمعاملتهم السيئة سواء مسلمين أو كفار، الشرع هو إللي بيحدد لنا طريقة التعامل مع الناس من خلال منهج رسول الله ﷺ 👌

◇وهو ده إللي رسول الله ﷺ طلبه من وفد الأوس والخزرج في الشرط الثالث قال:
لا تعصوني في معروف 👌
أمر واضح من رسول الله ﷺ إنهم يطيعوه ولا يعصوه مادام يأمرهم بمعروف، يطيعوه في أوامره وفي نواهيه،
يعني لما رسول الله ﷺ يقول :
"ليس المؤمن بالطّعان ولا اللّعان ولا الفاحش ولا البذيء"
يبقى على طول كلامنا ميكنش فيه أي طعن ولا لعن ولا فُحش ولا ألفاظ بذيئة حتى لو كل الناس بيقولوها🤚

☆وممكن حد يستغرب هو ليه رسول الله ﷺ قال لهم يطيعوه في المعروف، ماهو طبيعي إن رسول الله ﷺ مش هيقول إلا المعروف🤔

رسول الله ﷺ بيضع قواعد للمستقبل، قواعد لبناء الأمة في أي زمن، يعني أي حد هييجي بعدي تطيعوه لما يأمركم بالمعروف تطيعوه أمركم بمعصية لا تطيعوه،
《لا طاعة لمخلوق في معصية الخالق》

بعد ما رسول الله ﷺ قال لهم الشروط أو القواعد بتاعته قال لهم:
لو عملتم إللي قلت لكم عليه ده ...جزاؤكم الجنة👌
مفيش مُلك في الدنيا مفيش لكم أي حاجة في الدنيا،
جزاؤكم في الآخرة فقط🤚
ولو حد فيكم خالف كلامي وربنا عجّل عقوبته في الدنيا يبقى خلاص دي كفارة،
لو ربنا ستره بعد عصيانه لكلامي فأمره لله إن شاء عاقبه وإن شاء غفر له👌

كان إيه رد فعل الوفد🤔
وافق الوفد وبايعوا رسول الله ﷺ على الكلام إللي قاله لهم كله، وبقى اسمها بيعة العقبة الأولى أو بيعة النساء،
هي البيعة مكنش فيها نساء، لكن اتسمت كده لأن النساء كانوا بيبايعوا رسول الله ﷺ على الشروط دي من غير الجهاد في سبيل الله😉

☆طيب وليه رسول الله ﷺ مطلبش منهم النصرة أو إنهم يجاهدوا في سبيل الله🤨

لأن رسول الله ﷺ عارف إن القرار مش بأيدي الناس دي، هم مجموعة من يثرب مش من الناس إللي بإيدها تاخد القرار،
فهو مش هيحملهم ما لا يطيقوا،
فهو الأول بيربيهم إيمانيا عشان يقدروا يدعوا قومهم ويكون عدد المسلمين أكثر وساعتها يقدروا يتحملوا مسؤولية نصرة الإسلام والدفاع عن رسول الله ﷺ 😊

¤طيب إزاي رسول الله ﷺ هيربي المسلمين ويدعي الناس في يثرب وهو في مكة🤔

كده يبقى احنا محتاجين شخص يقوم بمهمة الدعوة إلى الله في يثرب ويكون سفير للإسلام هناك، يعلم المسلمين ويكون صورة متحركة للإسلام وقدوة للناس،
ويمهد أهل البلد نفسيا لاستقبال المسلمين من مكة أو الحبشة أو أي مكان في الأرض،
وطبعا يدرس الوضع الاقتصادي والعسكري والأمني في يثرب عشان رسول الله ﷺ هيروح يقعد فيها،
فمحتاجين ندرس كل حاج

ة ونعالجها ، احنا بنبني دولة دلوقتي فمفيش أي مجال للخطأ👌

مين بقى أكثر واحد ملائم للمهمة دي...مفيش غير مصعب بن عُمير😁
فاكرين مصعب وإللي أمه عملته معاه لما أسلم وكان إزاي هو أكثر شباب مكة ترفا ومع ذلك ساب كل حاجة من أجل الإسلام😊
طيب ليه رسول الله ﷺ اختار مصعب بالذات ، أكيد في أسباب،
احنا اتعودنا من رسول الله ﷺ إنه مش بيعمل حاجة ولا ياخد قرار إلا وله حكمة في قراره وله بُعد نظر😉

خلونا نشوف الأسباب إللي خلت رسول الله ﷺ يختار مصعب بن عمير بالذات دونا عن أي واحد تاني من الصحابة 👌
♡أولا:
مصعب من أوائل الناس إللي أسلمت وبالتالي هو من أعلم الصحابة وكان بيحفظ كل ما ينزل من القرآن،
وعارف إمتى نزلت الآيات ومعناها يعني خاض التجربة الإسلامية من البداية👌
وطبعا لازم يكون على علم واسع، لأن مش هينفع لما تحصل حاجة يروح يسأل رسول الله ﷺ لأن هيكون بينه وبين رسول الله ﷺ مسافة خمسمائة كيلو،
يعني حوالي خمس ساعات بالعربية لو ماشي على سرعة مائة كيلو متر😶
فهناك مكنش فيه عربيات فتخيلوا الوقت إللي هيحتاجه عشان يوصل لرسول الله ﷺ 😕

♡ثانيا:
كان من صفة مصعب رضي الله عنه إنه هادئ وصبور وعنده لباقة في الكلام وذكي وعنده سعة صدر وحليم وده صفات أساسية لازم تكون في الداعية، وكمان مصعب كان إنسان رقيق ومتواضع، يعني داعية مثالي😅

♡ثالثا:
مصعب من أشراف مكة فلما يروح لهم واحد شريف في النسب أكيد هيسمع له أشراف أهل يثرب ،بعكس لو راح لهم عبد ضعيف أو إنسان مجهول🤷‍♀️

♡رابعا:
مصعب كان من أغنياء مكة المشهورين، وترك الغنى والأموال عشان الإسلام،
فهيكون قدوة لأغنياء يثرب إللي عايزين يدخلوا في الإسلام وبيترددوا بسبب أموالهم او ملكهم،
فهو مثال عملي لرجل استطاع إنه يسيب المال من أجل الإسلام💁‍♀️
وكمان دليل واقعي إن دين الإسلام مش دين ثورة من الفقراء على الأغنياء ، ولا هو ظهر بسبب عوامل اقتصادية زي ما في ناس بتقول 🙄

♡خامسا:
السفير المنعزل عن مكة وعايش في أمان ممكن يُفتن بالدنيا والعيشة المريحة بعد ما كان شُعلة في الدعوة،
لكن مصعب نجح في اختبار أصعب، وهو إنه كان عايش أصلا وسط العيشة المريحة دي،
وإللي يخليه يرفض الدنيا من يد أمه إللي كانت موفرة له كل سُبل الراحة أكيد هيرفضها من يد أي حد تاني😊
ونقطة تانية مهمة إن السفير الإسلامي ممكن يُفتن بفتنة الزعامة والرئاسة وإن الناس بتمشي وراه،
لكن مصعب كان وضعه مختلف لأنه كان هيبقى زعيم في قبيلته بني عبد الدار إللي معاهم مفتاح الكعبة وبيتوارثوه،
فكان المفتاح هيبقى في إيده ويكون هو الزعيم لولا دخوله في الإسلام👌

♡سادسا:
مصعب بن عمير كان من المهاجرين للحبشة في الهجرة الأولى والثانية، فأكيد هجرته خلته يكتسب خبرة في التعامل مع الأغراب ومع عادات وتقاليد مختلفة،
فاللي يخليه يقدر يتعامل مع ناس غير عرب ولغتهم ودينهم مختلف عنه،
يخليه يقدر تعامل مع عرب زيه، يعني التعامل هيكون أسهل😉

♡سابعا:
هجرة مصعب للحبشة خلت عنده القدرة إنه يسيب بلده وأحبابه، واحنا مش عارفين مهمته في يثرب هتقعد كم سنة،
فمادام هو صبر السنين دي في الحبشة يبقى يقدر يصبر زيهم في مكان تاني💁‍♀️

♡ثامنا:
مصعب كان عمره في الوقت ده خمسة وثلاثين عام، وده سن مناسب جدا للعمل في الدعوة،
يعني لا هو شاب في بداية سن الشباب فيتهور في أخذ القرار بسبب حماسه،
ولا هو شيخ كبير في السن صعب يتحرك وتكون مهمة الدعوة شاقة عليه👌

كانوا بيحفظونا واحنا صغيرين إن أول سفير في الإسلام هو مصعب بن عمير،
لكن محدش كان بيقول لنا هو ليه كان هو السفير، مكنش حد بيقول لنا إن رسول الله ﷺ كان بيخطط وبيختار الناس المناسبة لكل حدث،
وإنه كان بيختار الأشخاص بعناية، ومش بيختار اختيار عشوائي كده وخلاص،
دولة الإسلام والصحابة متبنوش في لحظة، رسول الله ﷺ مكنش معاه عصا موسى بيحقق بها المعجزات
رسول الله ﷺ كان بيفكر ويخطط ويأخذ بالأسباب وكان بيتعب وبيتأذى في سبيل الله،
أي حد يقدر يعمل إللي رسول الله ﷺ عمله ويبني دولة ويربي ناس زي الصحابة،
وإللي يمشي على نفس منهج رسول الله ﷺ ومنهج الصحابة هيوصل أكييييد للي هم وصلوا له،
غير كده يبقى بنضيع وقتنا وبنضيع نفسنا ربنا قال:
"وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ "
هو طريق واحد مستقيم... طريق رسول الله وصحابته،
أي حد هياخد طريق مختصر هيضيع ويضل👌

رجع مصعب بن عمير مع وفد الأوس والخزرج ليثرب عشان يبتدي مهمته،
وهناك حصلت أحداث هتغير مجرى الدعوة الإسلامية للأبد🙊
مين إللي دخل في الإسلام وأدخل معه قبيلته كلها في يوم واحد😁
هنعرف إن شاء الله الجزء الجاي 😉


#Eman_Shalapy