الوفد الإسلامي،
يعني كأن المسلمين بيردوا بطريقة عملية على عمرو بن العاص بإن احنا مش غلمان سفهاء زي مانت قلت😏

☆شوفتم إزاي المسلمين همهم المصلحة،
مقعدوش يتخانقوا وكل واحد يقول لا أنا إللي اتكلم وده يقول أنا،
مش مهم مين يتكلم أهم حاجة إن الرسالة توصل مادام الشخص إللي بيتكلم مؤهل للكلام👌
يارب نفهم 😑

بدأ الحوار بين النجاشي وجعفر بن أبي طالب وسط اجتماع الوزراء والبطارقة وعمرو بن العاص والموقف مهيب 🙊

سأل النجاشي جعفر سؤال محدد ومباشر:
إيه هو السؤال😁
هنعرف الجزء الجاي إن شاء الله 😅


#Eman_Shalapy

#قصص_الأنبياء(٢)
#السيرة_النبوية
#الحلقة_الرابعة_والعشرون
#فشل_وفد_عمرو_بن_العاص

كنا واقفين المرة إللي فاتت عند النجاشي لما استدعى المسلمين عشان يسمع منهم ويشوف كلام عمرو بن العاص صحيح ولا لأ،
وبدأ الحوار بين النجاشي وبين جعفر بن أبي طالب رئيس الوفد،
النجاشي أصْحَمة سأل جعفر سؤال واضح ومحدد وقال:
إيه الدين إللي إنتم فارقتم بسببه قومكم وحتى مدخلتوش في ديني، ولا دين أي أمة من الأمم 🤔

☆السؤال يعتبر غريب شوية صح😁
يعني المسلمين في الحبشة بقالهم فترة، لا النجاشي سألهم ولا المسلمين كانوا متحمسين إنهم يدعوا الناس في أرض الحبشة للإسلام،
كل إللي ملك الحبشة يعرفه عن المسلمين إنهم ناس اتظلموا في بلادهم فلجأوا إليه،
لكن اتظلموا إزاي وبسبب إيه مكنش مهتم إنه يعرف، عادي يعني بتحصل 🤷‍♀️
يعني السبب في إن النجاشي سأل عن الدين الجديد ده هو عمرو بن العاص وإلا مكنش النجاشي هيفكر يسألهم عن حاجة😈
وحتى المسلمين مكنوش بيدعو في أرض الحبشة فالنجاشي عمره ما كان هيسمع عن الإسلام في الوقت ده خالص 💁‍♀️
شوفوا...عمرو بن العاص أه أرطبون العرب وعنده مكر ودهاء وهو من دهاة العرب الأربعة،
لكن هو بيتعامل مع مين...واقف قصاد مين...إنت مكرك يقابله مكر خير الماكرين😀
هنشوف إزاي مكر قريش المتمثل في وفد عمرو بن العاص بالمسلمين انقلب عليهم 🤭

◇و بالمناسبة المسلمين مكنوش متحمسين للدعوة في أرض الحبشة لأن هم كانوا عايزين يحافظوا على الدين إللي هم بيحملوه😅
لأنهم لو بدأوا يدعوا في أرض الحبشة وهم عدد قليل وقوتهم بسيطة،
هيفتحوا على نفسهم جبهات هم مش قدها وهيعرضوا نفسهم للأذى وممكن يُقتلوا كلهم😶
وهم أصلا هربانين من مكة عشان يحموا الدين، والحبشة كدولة أقوى من مكة بمراحل😅
فهنا كان الأَوْلى إن المسلمين يحافظوا على نفسهم من الهلاك في مقابل السكوت عن الدعوة وخصوصا إن ده كان في بدايات الإسلام👌
ودي حاجة اسمها فقه الواقع وفقه الأولويات،
يعني المسلمين حللوا الواقع بتاعهم وشافوا الاختيارات إللي قصادهم،
وبعدين اختاروا الأَوْلى ..يعني عملوا أحسن اختيار من الاختيارات المتاحة قصادهم👌

بدأ جعفر بن أبي طالب يجاوب على النجاشي وركزوا في الإجابة كويس😈
قال جعفر:
أيها الملك!
احنا كنا ناس أصحاب جاهلية...بنعبد الأصنام ونأكل الميتة ونعمل الفواحش ونُسيء الجوار، والقوي منا بياكل حق الضعيف😞
《الأفعال دي مترضاش بها النفوس الكريمة،
وهنا في إشارة إن عمرو بن العاص لسه على الصورة دي من الجاهلية 😈
والمشاكل إللي عرضها جعفر فيها ظلم، إما ظلم للنفس بعبادة الأصنام أو ظلم البشر،
فتخيلوا لما الكلام ده بيتعرض قصاد ملك عادل لا يُظلم عنده أحد هيكون إحساسه إيه》💁‍♀️
وده كان أول سهم أطلقه جعفر بن أبي طالب😁

نشوف السهم الثاني قال:
فكنا بنعمل كده لحد ما ربنا بعث لنا رسول عارفين أصله وفصل وصدقه وأمانته لدرجة إننا كنا مسميينه الصادق الأمين👌
《والنصارى بيؤمنوا بالرسل بصفة عامة وقصص الأنبياء والرسل موجودة عندهم فالكلام عن الأنبياء والرسل بالنسبة لهم حاجة مألوفة》😉

السهم الثالث اتكلم عن الصورة الجميلة المضادة للجاهلية وإللي أصبحوا عليها بعد الإسلام قال:
دعانا إلى عبادة الله وحده ونسيب إللي كان بيعبده آباءنا وأجدادنا،
وأمرنا بالصدق وصلة الرحم وحسن الجوار وأداء الأمانة،
والكف عن المحارم والدماء،
ونهانا عن الفواحش وقول الزور وأكل مال اليتيم وقعد جعفر يعدد للنجاشي أمور الإسلام،

☆حطوا نفسكم كده مكان النجاشي وقارنوا بين الوضعين الجاهلية والإسلام ..أي عاقل هيشوف الفرق الواضح جدا بين الصورتين 💁‍♀️

كمل جعفر في السهم الرابع وقال :
فاحنا صدقناه وآمنا به واتبعناه وعبدنا الله وأحللنا ما أحل الله وحرمنا ما حرم الله، احنا معملناش حاجة غلط أهه🤷‍♂️
راح قومنا وأهلنا اعتدوا علينا وعذبونا ،
وفتنونا عن ديننا عشان عايزينا نرجع لعبادة الأصنام ونعمل الخبائث بتاعة الجاهلية تاني😑

☆وطبعا الكلام ده ذكّر النجاشي والبطارقة بالتعذيب إللي تعرض له الحواريين أصحاب عيسى عليه السلام ،
وإللي تناقلته كتب النصارى، فتخيلوا مشاعر الناس إللي قاعدة بتسمع عاملة إزاي🙊

والسهم الخامس قال جعفر :
فلما قومنا قهرونا وظلمونا وشقوا علينا، جينا عندك واخترنا بلدك دونا عن أي بلد تانية، واخترنا حمايتك وكان رجائنا إننا لا نُظلم عندك😔

☆خدوا بالكم إن جعفر بن أبي طالب مكنش يعرف عمرو بن العاص قال إيه للنجاشي عن المسلمين،
لكن عالم الغيب والشهادة يعلم بالضبط إيه إللي حصل👌
فشوفوا الردود إللي جعفر قالها،
فكان بيرد السهام إللي عمرو بن العاص رمى بها المسلمين من غير ما يعرف😊
فسبحان من أجرى الكلام على لسانه👌
"وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ "

كان واضح جدا إن النجاشي والبطارقة إللي معاه تأثروا بكلام جعفر بن أبي طالب،
لكن النجاشي عاقل ميقدرش يحكم بمشاعره كده وخلاص،
إنت قلت الكلام ده..فين الدليل على صدق كلامك😕

عشان كده النجاشي س

أل جعفر:
معاك أي حاجة من كلام الرسول إللي بتقول عليه ده🤔

☆والنجاشي مش مجرد حاكم ده كان عالم من علماء النصارى، فعارف إن كلام الرسل مختلف تماما عن كلام البشر العادي👌
ولعله كمان كان عارف إن ده زمن نبي زي ما اتكلمنا في البداية خالص إزاي إن أهل الكتاب كانوا عارفين إن زمن رسول الله هو زمن آخر الانبياء😉

فجعفر قال له أيوة معايا وسبحان من هدى جعفر إنه يختار الآيات المناسبة ليقرأها على النجاشي😮
بدأ جعفر يقرأ:
"كهيعص* ذِكْرُ رَحْمَتِ رَبِّكَ عَبْدَهُ زَكَرِيَّا* إِذْ نَادَى رَبَّهُ نِدَاءً خَفِيًّا* قَالَ رَبِّ إِنِّي وَهَنَ الْعَظْمُ مِنِّي وَاشْتَعَلَ الرَّأْسُ شَيْبًا وَلَمْ أَكُنْ بِدُعَائِكَ رَبِّ شَقِيًّا*
وَإِنِّي خِفْتُ الْمَوَالِيَ مِنْ وَرَائِي وَكَانَتِ امْرَأَتِي عَاقِرًا فَهَبْ لِي مِنْ لَدُنْكَ وَلِيًّا..."
النصارى بيسمعوا ويتذكروا قصة زكريا عليه السلام والمعجزة إللي حصلت معاه ...ممكن ترجعوا تقرأوا قصة زكريا في قصص الأنبياء تاني لو حابين،
عشان تعرفوا مشاعر النجاشي والبطارقة كانت عاملة إزاي وهم بيسمعوا قصته😊
تأثر النجاشي والبطارقة لكلام القرآن لدرجة إنهم بَكُوا🙊

بعد ما خلص جعفر القراءة قال النجاشي:
إن الكلام ده والكلام إللي جاء به موسى= وفي رواية ثانية جاء به عيسى= ليخرج من مشكاة واحدة يعني كلام الإثنين من نفس المصدر 👌

وده إقرار من النجاشي بصدق رسالة الإسلام وصدق رسول الله وصدق المسلمين،
فنظر النجاشي لعمرو بن العاص وعبد الله بن أبي ربيعة وقال لهما:
روحوا والله ما أسلمكم المسلمين أبدا👌

☆فين هدايا عمرو ..فين تخطيطه...ومكره ودهائه 😁
فسينفقونها ثم تكون عليهم حسرة ثم يغلبون👌
إنت بتحارب ربنا يابني 😏

خرج المسلمون من عند النجاشي وهم فرحانين حاسين بالأمن، أول هزيمة لقريش 💪🏻

في المقابل خرج عمرو بن العاص من عند النجاشي وهو في شدة الغضب والغيظ🤭
أول مرة ينضرب في كبريائه الضربة القوية دي، داهية العرب إللي عمره خمسة وأربعين سنة يتغلب كده من شاب صغير عمره سبعة وعشرين سنة 😣
لكن القضية هنا مش سن ..القضية هنا مين إللي بيدافع عن الحق ومين إللي بيدافع عن الباطل،
فمهما طغى الباطل وانتشر في النهاية الحق هو الغالب👌

يسكت عمرو بقى ويرجع لقريش ويسيب المسلمين😅
أبدا😶
من شدة غيظه وغضبه قال:
والله لأخبر النجاشي بكرة سرهم ولأخليه يستأصلهم ويقتلهم كلهم 😠✊
أنا كنت عايز أرجعهم بس لمكة لكن بعد إللي حصل مش هسيبهم 😤
فصاحبه عبد الله بن أبي ربيعة لما سمع طريقته في التحدي وشاف منظره خاف منه😳
وقال له:
اوعى تعمل كده😥
مهما خالفونا فالمسلمين دول أرحامنا...إخوتنا وأبناء أعمامنا 😥
لكن عمرو مجروح في كبريائه فرفض وقال :
والله لأقول للنجاشي إنهم بيقولوا عن عيسى إنه عبد 😈

☆والموضوع ده كارثة في الحبشة 🙊
لأن عقيدة النصارى في الحبشة إن عيسى عليه السلام هو إله تجسد في صورة بشر ، فإزاي حد يقول على الإله بتاعهم إنه عبد😳
وده يدل على دهاء عمرو وأد إيه عنده معلومات كثيرة👌
عارف مين هو عيسى وعارف رأي المسلمين فيه ورأي أهل الحبشة،
فدي نقطة ضعف قاتلة ممكن فعلا تؤدي لقتل المسلمين جميعا 🙊
لكن برده...إنت بتحارب مين ياعمرو 😊

راح عمرو بن العاص في اليوم الثاني للنجاشي وهو وسط البطارقة وقال له:
أيها الملك!
المسلمين بيقولوا عن عيسى بن مريم قولا عظيما،
فابعث حد من عندك يستدعيهم واسمع بنفسك بيقولوا إيه😤
النجاشي عارف عمرو ودهائه، وإنه مش هيسكت 😶
ومع ذلك مقدرش يتجاهل طلبه،
لأن الموضوع حساس وكمان الكلام كان في حضور البطارقة فممكن تحصل أزمة في البلد،
فأرسل النجاشي يطلب جعفر بن أبي طالب، تقول السيدة أم سلمة وكانت من الناس إللي هاجرت للحبشة :
دي كانت أشد حاجة حصلت معانا👌
المسلمين اتورطوا🙊
رأي الإسلام في عيسى يتعارض مع رأي النصارى تماما،
وهم ضعفاء لاجئون ومفيش مكان تاني يستقبل المسلمين،
اجتمع الوفد الإسلامي مع بعض واتشاوروا نعمل إيه😥
هنقول إيه في عيسى 🙊
فقالوا بمنتهى الوضوح:
والله لنقول فيه ما قال الله..احنا هنألف..هنقول ويحصل إللي يحصل😤
☆القرار ده يعتبر قرار انتحاري...لكن الصحابة عارفين إن حياتهم مش مهمة مقابل الحفاظ على الدين من التحريف،
يعني مش هيحرفوا الدين عشان يحافظوا على حياتهم👌
مفيش حاجة تُقدم على العقيدة 😤

وصل جعفر ومعاه الوفد الإسلامي ووقفوا قصاد النجاشي والبطارقة من حوله، سألهم النجاشي:
ماذا تقولون في عيسى بن مريم😐

☆موقف صعب ...أي كلمة غلط هتحصل كارثة🙊

فقال جعفر بمنتهى الثقة:
نقول فيه إللي جاء به نبينا...عبد الله ورسوله👌
وقرأ عليهم :
"وَاذْكُرْ فِي الْكِتَابِ مَرْيَمَ إِذِ انْتَبَذَتْ مِنْ أَهْلِهَا مَكَانًا شَرْقِيًّا* فَاتَّخَذَتْ مِنْ دُونِهِمْ حِجَابًا فَأَرْسَلْنَا إِلَيْهَا رُوحَنَا فَتَمَثَّلَ لَهَا بَشَرًا سَوِيًّا* قَالَتْ إِنِّي أَعُوذُ بِالرَّحْمَنِ مِنْكَ إِنْ كُنْتَ تَقِيًّا.....

قَالَ إِنِّي عَبْدُ اللَّهِ آتَان

ِيَ الْكِتَابَ وَجَعَلَنِي نَبِيًّا وَجَعَلَنِي مُبَارَكًا أَيْنَ مَا كُنْتُ وَأَوْصَانِي بِالصَّلَاةِ وَالزَّكَاةِ مَا دُمْتُ حَيًّا*
وَبَرًّا بِوَالِدَتِي وَلَمْ يَجْعَلْنِي جَبَّارًا شَقِيًّا..."

يعني عيسى وأمه مريم عليهما السلام لهما مكانة عظيمة لكن في النهاية بشر👌
الكلام ده كلام خطير جدا😮
النجاشي بيسمع والبطارقة بيسمعوا...الأصوات بدأت تعلى في المكان والمسلمين مستنيين الرد إللي هيحدد مصيرهم لحظات تقطع الأنفاس فعلا🙊

وفجأة النجاشي يتحرك ويأخذ عود نبات🌿 من الأرض ويقول كلام محدش أبدا توقعه..لا عمرو بن العاص ولا الوفد الإسلامي ولا حتى البطارقة 😶
قال النجاشي:
والله ما عدا عيسى بن مريم ما قلت هذا العود 🌿👌
يعني كل الكلام إللي قلته عن وصف عيسى بن مريم صحيح،
يعني النجاشي اعترف بعبودية عيسى وبنبوته وإنه ليس إله😮
البطارقة مش عاجبهم الكلام وبدأوا يتناخروا
=يعني يطلعوا أصوات من مناخرهم= وأصواتهم بدأت تعلى بالغضب،
فالنجاشي صاح بهم بكل حزم :
والله وإن نخرتم...كلامه كل صح😤👌

وأخذ النجاشي ثلاثة قرارات محدش كان يتوقعها أبدا😳
الأول:
استضافة المسلمين في الحبشة وإكرامهم غاية الإكرام.
والقرار ده خطير لأن البطارقة معترضين وكده ممكن تحصل فتنة داخلية تؤدي لعزل النجاشي😶
لكن هو كان مقدم العدل..هو ده كان القرار العادل بالنسبة له👌
الثاني:
قطع العلاقات مع مكة، لأن البلاد إللي بتؤذي المسلمين مينفعش الصالحون يعملوا معاها علاقات،
فأمر النجاشي برد كل الهدايا إللي عمرو بن العاص جاء بها،
وخرج هو وعبد الله بن أبي ربيعة من عنده مقبوحين مذلولين🤭

القرار الثالث :
هو إن النجاشي ترك النصرانية وأسلم 😳

كل ده كان بسبب تحدي عمرو بن العاص👌
عمرو مكر بالمسلمين عشان يُقتلوا...أهم قاعدين آمنين مكرمين😏
ومش بس كده ..أهه انطرد ورجعت له الهدايا وانقطعت العلاقات مع مكة 😏
لا وكمان النجاشي أسلم 😁
بجد يا عمرو مش عارفين كنا هنعمل إيه من غير تخطيطك ده 😈
وكما يُقال : انقلب السحر على الساحر💁‍♀️
"وَيَمْكُرُونَ وَيَمْكُرُ اللَّهُ وَاللَّهُ خَيْرُ الْمَاكِرِينَ"
قل للعيون الحائرة لله أيدٍ قاهرة😊

البطارقة معجبهمش إن النجاشي موافق المسلمين في كلامهم،
إزاي يقول إنه عبد وهو عندهم إنه إله، فكانت هتحصل فتنة في أرض الحبشة وهم ميعرفوش أنه أسلم،
فجمع النجاشي البطارقة وقال لهم إنتم زعلانين ليه وعاملين قلق🤨
فالبطارقة قالوا له : بسبب الكلام إللي قلته للمسلمين في عيسى😤
فقال لهم : وإنتم بتقولوا إيه في عيسى🤔
فقال البطارقة: بنقول إنه إله😕
فقال لهم النجاشي:
وأنا على هذا.. ووضع يده على صدره، وكان تحت هدومه صحيفة مكتوب فيها لا إله إلا الله،
فلما قال أنا على هذا ووضع يده عالصحيفة يقصد أنا على التوحيد ،
لكن البطارقة فهموا إنه يقصد بكلمة على هذا إنه موافق على كلامهم، فالبطارقة اطمأنوا ومبقاش في مشاكل،
وظل النجاشي يكتم إسلامه طول حياته👌

☆وهو ده كده مش كذب😐
لا مش كذب ده اسمه تعريض يعني قال كلمة يقصد بها شيء وإللي قصاده فهم شيء تاني،
وده طبعا غير الكذب😅
الكذب إن الواحد يقول حاجة عكس الحقيقة، يعني يقول أنا فعلت كذا وهو لم يفعل،
والتعريض جائز وخصوصا لو في موقف زي بتاع النجاشي ده😉
لكن الكذب محرم مفهوش كلام إلا في ثلاثة مواضع وهي:
الإصلاح بين المتخاصمين وفي الحرب لتضليل العدو،
والكذب بين الزوجين في المشاعر،
يعني لو رجل بيسأل زوجته إنتي بتحبيني ولا لأ وهي مش طايقة تبص في وشه يجوز إنها تقول له طبعا بحبك 😚
أمال تقول له مش طايقاك وتخرب على نفسها😅
لأن البيوت بتقوم على الحب والرحمة بحيث لو اختفى الحب فالرحمة موجودة 😉

◇ممكن حد يسأل سؤال هنا ...هو النجاشي ليه مأعلنش إسلامه وواجه البطارقة والناس زي جعفر بن أبي طالب 🤔

النجاشي لم يعلن إسلامه لأنه خاف على حياته وملكه،
وخدوا بالكم إن موقف النجاشي يختلف عن موقف جعفر بن أبي طالب😅
يعني جعفر له وظيفة دعوية يجب عليه إنه يعلن الإسلام ويشرحه ويفصله ولو كان الثمن حياته،
لأن كل كلمة هيقولها محسوبة على الإسلام فمينفعش تورية ولا تعريض ولا إخفاء معلومة ولا كذب ولا أي حاجة خالص في الموقف ده👌
أما النجاشي فهو يعتبر زيه زي باقي المسلمين المضطهدين في مكة فيجوز إنه يخفي إسلامه،
مع إنه ملك بس موقفه ضعيف في مواجهة دولة كاملة على النصرانية بوزرائها برجال دينها،
ده غير إن الأصلح دلوقتي إنه يخفي إسلامه😉
تخيلوا لو أعلن إسلامه ..مين هيدافع عن المسلمين وهم قلة🤷‍♀️
هو هُيقتل والمسلمين هيقتلوا معاه ...يبقى استفدنا إيه دلوقتي 😑
لكن لما هو يخفي إسلامه ويمشي أمور الدولة ،
حافظ على حياته وملكه وحياة المسلمين وغيرهم من المستضعفين،
فوظيفة جعفر كانت إعلان الدعوة بكل وضوح،
ووظيفة النجاشي إنه يحافظ على الدعوة دي من الهلاك👌

وهنشوف إزاي المسلمين قعدوا في أرض الحبشة في حماية النجاشي خمسة عشرة سنة متصلة محدش اتعرض لهم بأذى😊
هنسيب المسلمين في الح

بشة في حماية النجاشي ونرجع مع عمرو بن العاص لمكة،
عشان نشوف كفار قريش هيتصرفوا إزاي في الورطة إللي هم فيها دي 😶
تعذيب المسلمين فشل...المفاوضات مع رسول الله صلى الله عليه وسلم فشلت،
محاولاتهم لاستعادة المسلمين الهاربين فشلت...جربوا كل حاجة مفيش ولا طريقة نافعة... ناقص إيه تاني🤔

أيوااااا مش فاضل غير☻ ......
هنعرف إن شاء الله إيه آخر وسيلة المشركين استخدموها للضغط على رسول الله وعلى المسلمين 😊



#Eman_Shalapy

#قصص_الأنبياء(٢)
#السيرة_النبوية
#الحلقة_الخامسة_والعشرون
#شعب_أبي_طالب

وقفنا المرة إللي فاتت عند عمرو بن العاص لما رجع مكة بعد هزيمته أمام الوفد الإسلامي عند النجاشي،
وصل عمرو بن العاص لمكة واجتمع مع سادات مكة وحكى لهم إللي حصل،
إللي كان مراقب الأوضاع وتحركات سادات مكة أبو طالب بن عبد المطلب عم رسول الله صلى الله عليه وسلم،
هو عارف إنهم هم خلاص استنفذوا كل الطرق عشان يرجعوا المسلمين عن دينهم،
مرت ثلاث سنوات من ساعة الجهر بالدعوة..ثلاث سنوات من التعذيب والقتل والمفاوضات والفرار بالدين للحبشة ومفيش فايدة،
لا المسلمين عايزين يرجعوا عن إللي في دماغهم من اتباع دعوة الإسلام،
ولا المشركين سايبنهم في حالهم😑
فخاف أبو طالب إن أحد من سفهاء قريش يتجرأ ويروح يقتل ابن أخيه🙊
وهو كان بيحبه جدا حتى أكثر من حبه لأولاده،
فأبو طالب عمل زي اجتماع طاريء كده لبني عبد مناف إللي هم بني هاشم وبني المطلب،
والمطلب هو عم عبد المطلب إللي اتكلمنا عنه في البداية خالص😉
فاجتمع الفرعين وطلب منهم حماية رسول الله صلى الله عليه وسلم لأن أهل مكة مش هيسبوه،
فوافق الفرعين على حماية رسول الله والدفاع عنه،
فانقسمت مكة قسمين، قسم يضم سادات قريش وأتباعهم والمؤيدين لهم ،
والقسم الثاني المسلمين بقيادة رسول الله صلى الله عليه وسلم ومعاهم بني هاشم وبني المطلب مؤمنهم وكافرهم،

في نفس الوقت ده كانت قريش طلعت بفكرة جديدة لحرب دعوة الإسلام،
قالوا بس نعمل قانون جديد ..قانون المقاطعة😈
يعني يقاطعوا المسلمين ويحاصروهم ويضيقوا عليهم،
كل أهل مكة لا يتزوجوا ولا يزوجوا أحد من بني عبد مناف مؤمنهم وكافرهم،
لا يبيعوا ولا يشتروا منهم، ولا حتى يقعدوا معاهم ولا يكلموهم ،
ومفيش مانع إن لو واحد من أهل مكة شك إن جاره من بني عبد مناف أو حتى متعاطف معاهم إنه يبلغ عنه،
أيوة يا جماعة تعاونوا معانا خلوا مكة تنضف من الناس إللي عايزة تخرب البلد دي 😏
ومش هيبقى في أي مصالحة بين أهل مكة وبني عبد مناف إلا لما ينفذوا كل إللي أهل مكة يقولوا عليه 😤
وراحوا كاتبين الكلام ده في صحيفة زي ورقة بالمفهوم بتاعنا يعني، وعلقوها داخل الكعبة،
عشان تبقى زي حاجة شرعية كده ميرجعوش فيها مهما حصل 😀
ومع إن القانون الجديد ده مخالف للعرف وكل القوانين بتاعة مكة، بس عادي يعني يا جماعة الورق ورقنا والدفاتر دفاترنا 💁‍♀️
مش مهم العُرف ولا المروءة ولا مراعاة إننا بيننا عشرة سنين طويلة ،ولا إننا في الشهر الحرام ولا في البلد الحرام، أهم حاجة المصالح هي دي إللي تهمنا دلوقتي😀

وبدأ التنفيذ فورا من أول ليلة في شهر الله المحرم من السنة السابعة من البعثة،
اجتمع المسلمون ومعاهم بني عبد مناف في مكان في مكة وقعدوا كلهم فيه واتسمى المكان ده 《شِعْب أبي طالب》

عايزاكم تتخيلوا بداية معاناة جديدة ...الرجال والنساء والأطفال وكبار السن المؤمن والكافر مع بعض في نفس المكان محاصرين مضطهدين،
إعلام سادات مكة عمال يُشوه في صورتهم أمام الناس،
لو حاولوا يشتروا ولا يبيعوا محدش بيتعامل معاهم ولو اشتكوا ويقولوا لهم تستاهلوا إللي يجرى لكم ،
مش إنتم اتبعتم محمد روحوا لمحمد خليه ينفعكم😏

منعوا عنهم الأكل، وحتى لو جت قوافل من برة مكة فيها أكل كان كفار قريش يشتروها من التجار بسعر عالي،
عشان محدش من المسلمين ولا بني عبد مناف يقدر يشتري😑
ده غير الإهانات طبعا والأذى، وأي حد يفكر بس كده إنه يتعاطف معاهم هنعمل فيه زيهم😤
الوضع ده مستمرش يوم ولا اتنين ولا شهر ولا شهرين ...ده استمر ثلاث سنوات، ستة وثلاثون شهر،
تخيلوا إن أصوات صراخ النساء والأطفال من الجوع كانت تُسمع من خارج الشّعب،
ووصل بهم الجوع إنهم أكلوا ورق الشجر😥
موقف حصل مع سعد بن أبي وقاص بيحكي إنه كان في شعب أبي طالب مع المسلمين بيقول مرة قام بالليل لقضاء حاجته،
فوهو بيتبول سمع صوت قعقعة تحت البول، فلقاها قطعة يابسة من جلد جمل،
فأخذها وغسلها وأحرقها وطحنها وسفها بالمية 😳
بيقول سعد إن الأكلة دي قوته ثلاث ليال😓
وده بيحصل للمسلمين وأهل مكة منعّمين مرفّهين آمنين في بيوتهم 😑
أهل الإيمان في ابتلاء وفقر وجوع وخوف، وأهل الباطل في نعيم آمنين في بيوتهم😞

☆في ناس من زماننا دلوقتي ممكن يقولوا هو أنا ليه أصبر عالهم ده، أو يارب أنا بطيعك وبعبدك وإنت تعمل معايا كده؟
هو مش المفروض تكافئني على الطاعة إللي بعملها،
لالا أنا مش مستحملة ...وفعلا تسيب طريق ربنا للأسف😞

عارفين ..أهه الإبتلاءات دي معمولة عشان الناس دي..الناس إللي إيمانها مش راسخ،
إللي لما تبقى الدنيا ماشية معاها حلو يبقى ربنا جميل والدين ده حاجة حلوة أوي😍
لكن مع أول ابتلاء صغير تلاقيها وقفت واعترضت، وممكن الإبتلاء يبقى أشد عشان ربنا يوريها نفسها وإن هي إللي سابت الطريق بنفسها👌
"وَمِنَ النَّاسِ مَن يَعْبُدُ اللَّهَ عَلَىٰ حَرْفٍ فَإِنْ أَصَابَهُ خَيْرٌ اطْمَأَنَّ بِهِ ، وَإِنْ أَصَابَتْهُ فِتْنَةٌ انقَلَبَ عَلَىٰ وَجْهِهِ خَسِرَ الدُّنْ

يَا وَالْآخِرَةَ"

الدين بقى مش هيُنصر بالناس المزعزة دي😀
عشان كده ييجي الإبتلاء عشان ينظف الصف المسلم من الناس دي👌
فاكريييين قصة طالوت وجالوت😁
والمراحل إللي مروا بها الأول والإبتلاءات قبل ما يواجهوا الجبارين وينتصروا عليهم،
أهه دي من سنن الله الكونية😉
ابتلى جيش طالوت وبيبتلي المسلمين مع رسول الله عشان إللي هيثبت في الإبتلاءات الشديدة المزلزلة دي ،
هو إللي هيقدر ينصر رسالة الإسلام ويقيم الدولة غير كده مفيش🤷‍♀️
هتلاقي ربنا بيبتلي الناس عشان يطلع المستخبي، كم مرة شفنا إنسان ظاهره التقوى والصلاح وإن متطلعش منه العيبة أبدا،
وفجأة مع ابتلاء أو اختبار اتحط فيه بقى شخصية تانية خالص عمرك ماكنتي تتوقعيها؟
ماهو ربنا قال : "وَنَبْلُوَ أَخْبَارَكُمْ "
المستخبي كله هيبان وهيطلع بمزاجنا أو مش بمزاجنا،
من كانت له سريرة صالحة أو سيئة أظهر الله عليه منها رداء يُعرف به👌

استمر العذاب والمعاناة على المسلمين وعلى المشركين ثلاث سنوات،
وخلال الثلاث سنوات كان بينزل القرآن يثبت قلوب المؤمنين،
في السنة السابعة للبعثة أول سنوات الحصار نزلت السجدة،
هقول لكم منها كم آية عشان تستشعروا المسلمين ساعتها كان إيه شعورهم:
"وَلَوْ تَرَى إِذِ الْمُجْرِمُونَ نَاكِسُو رُءُوسِهِمْ عِنْدَ رَبِّهِمْ رَبَّنَا أَبْصَرْنَا وَسَمِعْنَا فَارْجِعْنَا نَعْمَلْ صَالِحًا إِنَّا مُوقِنُونَ "

"أَفَمَنْ كَانَ مُؤْمِنًا كَمَنْ كَانَ فَاسِقًا لَا يَسْتَوُونَ "

"وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا وَكَانُوا بِآيَاتِنَا يُوقِنُونَ"

تخيلوا لما المسلمين كانوا بيسمعوا الآيات دي كانوا بيحسوا بإيه، وإزاي الآيات كانت بتهدي من نفوسهم😊

لكن الواحد ممكن يستغرب 🤨
طيب المسلمين بيؤمنوا بيوم القيامة وإن جزاءهم بعد الصبر هو الجنة،
المشركين بقى إيه إللي مصبرهم عالعذاب ده 😳
هم كان عندهم حَمِية...غيرة...نخوة إزاي واحد من قبيلته يتعمل فيه كده،
العهد إللي أخذوه على أنفسهم عشان يحموا رسول الله،
ضحوا بأموالهم وزوجاتهم وأبنائهم عشان يوفوا بعهدهم، وكانوا فعلا أد كلمتهم، مش مجرد خطب وأشعار وكلمات وخلاص😑
والنخوة والوفاء بالعهد كانت من أهم مميزات العرب في الجاهلية إللي أهلتهم لنزول رسالة الإسلام فيهم👌

☆تخيلوا لو الموقف ده حصل في عصرنا رد فعل فعل الناس هيبقى إيه😶
بصوا هو للأسف مش لو😓
لأنه بالفعل واقع في عصرنا في كذا بلد من بلاد المسلمين، والدنيا ماشية عادي😞

في السنة الثامنة نزلت سورة هود..وما أدراكم ما سورة هود🙊
فيها قصة عاد وثمود ونوح ولوط وغيرهم من الأنبياء وجزاء الذين سُعدوا والذين شَقوا وأهوال يوم القيامة😮
وارجعوا لقصص الأنبياء وتخيلوا رسول الله وهو بيقرأ وبيشرح الآيات للصحابة 👌
شوفوا ربنا ختم السورة بإيه:
أول رسالة لرسول الله وللمؤمنين معاه ولنا احنا كمان ركزوا🙊
"وكُلاًّ نَّقُصُّ عَلَيْكَ مِنْ أَنبَاء الرُّسُلِ مَا نُثَبِّتُ بِهِ فُؤَادَكَ وَجَاءَكَ فِي هَذِهِ الْحَقُّ وَمَوْعِظَةٌ وَذِكْرَى لِلْمُؤْمِنِينَ"
الرسالة التانية للكفار والظلمة 😡

"وقُل لِّلَّذِينَ لاَ يُؤْمِنُونَ اعْمَلُواْ عَلَى مَكَانَتِكُمْ إِنَّا عَامِلُونَ
وَانتَظِرُوا إِنَّا مُنتَظِرُونَ"
بعد ما ربنا ثبت رسوله والمؤمنين وقال للكفار اعملوا إللي إنتم عايزينه تهديدا لهم ختم السورة:
"ولِلَّهِ غَيْبُ السَّمَاوَاتِ وَالأَرْضِ وَإِلَيْهِ يُرْجَعُ الأَمْرُ كُلُّهُ فَاعْبُدْهُ وَتَوَكَّلْ عَلَيْهِ وَمَا رَبُّكَ بِغَافِلٍ عَمَّا تَعْمَلُونَ"

وصلنا للسنة التاسعة للبعثة ونزلت سورة سبأ...أنا مش عارفة أحط لكم أنهي آية...السورة محتاجة تتحط كلها، آيات معجزة فعلا😮
طال الحصار على المسلمين ومش واضح أي ملامح للفرج😑
كان في ناس متضايقين من إللي بيحصل لبني عبد مناف كانوا بيقولوا إزاي يعني احنا ناكل ونشرب والناس دي لأ،
إزاي عيالنا يناموا شبعانين،
وأطفال بني عبد مناف يناموا جعانين واحنا سامعين أصوات بكائهم من الجوع😞
فكانوا بيرسلوا لشعب أبي طالب بعض الطعام سرا، زي حكيم بن حزام إللي كان بيرسل لعمته خديجة بنت خويلد زوجة رسول الله صلى الله عليه وسلم،
وزي واحد اسمه 《هشام بن عمرو》 من بني عامر،
لكن الأكل مكنش كافي وكمان لازم يكون في حل جذري للموضوع ده👌
فبدأ يفكر هشام بن عمرو يعمل إيه🤔
قال لازم ننقض الصحيفة الظالمة دي 😤
لكن هو لوحده مش هيقدر يعمل حاجة، فبدأ يدور على رجل قوي له كلمة مسموعة في قريش،
لأن زعيم المعارضة أبو جهل أكثر المتحمسين للمقاطعة له مكانة كبيرة في قريش لأنه هو زعيم أكبر قبيلة كانت بتنازع بني هاشم وتتنافس معاها،
فدي فرصة مناسبة جدا عشان قبيلة أبي جهل بني مخزوم يحققوا انتصار على بني هاشم😈

فهشام بن عمرو محتاج واحد له مكانة زي أبي جهل من قبيلة بني مخزوم القبيلة القوية دي،
فراح لواحد اسمه 《زهير بن أبي أمية》 وراح للشخص ده بالذات لأن أمه تبقى عاتكة بنت عبد المطلب عمة رسول الله،

، فهشام بن عمرو هيستغل العصبية الفطرية إللي عنده😉
فقال له :
يا زهير! هو إنت عادي كده تاكل وتشرب وأخوالك بيحصل فيهم إللي إنت عارفه، وماشي ورا أبي جهل😒
وبعدين قال له كلمة خطيرة 😈
قال :
أحلف لك بالله إن لو كانوا دول أخوال أبي جهل وإنت إللي روحت قلت له تعال نقاطع الناس دي مكنش هيوافق😤

فزهير اتحمس وقال: طيب انا هعمل إيه وأنا رجل لوحدي، لو كان معايا حد تاني كنت قمت ونقضت الصحيفة دي😤
فقال له هشام : انا لقيته لك🤫
فقال له زهير مين:😕
فقال هشام : أنا 😅
فقال زهير: طيب شوف لنا واحد ثالث🤔
فهشام ترك زهير وراح لواحد ثاني من أصحاب الأخلاق والمروءة اسمه المطعم بن عدي،
وقعد يذكره بأرحام بني المطلب وبني هاشم فقال له المطعم:
وأنا هعمل إيه وانا رجل لوحدي😕
فقال له هشام:
لقيت لك واحد، فقال المطعم: مين🤔
فقال له : أنا
قال المطعم: شوف لنا ثالث، قال هشام في واحد فعلا هو
زهير بن أبي أمية، فقال له المطعم: طيب شوف لنا رجل رابع🤔
المطعم كان من قبيلة ثالثة، يبقى كده عندنا ثلاثة أشخاص من ثلاثة قبائل مختلفة،👌
المهمة صعبة ويمكن مستحيلة😑
الناس دي هتقف قصاد قريش كلها في حاجة كانوا اتفقوا عليها،
ومع ذلك هشام بن عمرو 《الكافر》 لم يستسلم👌
وراح فعلا يدور على رجل رابع،
فراح لأبي البختري بن هشام،
وقال له زي ما قال للمطعم بن عدي، فسأله أبو البختري:
هل في حد معانا على الموضوع ده🤔
فقال له هشام : أيوة ، أنا والمطعم بن عدي وزهير بن أبي أمية👌
فقال له أبو البختري: طيب شوف لنا رجل خامس😕
فسبحان الله خرج هشام بن عمرو بكل حماس يدور على رجل خامس😮

☆أظن لو حد مننا مكانه كان زماننا يئسنا من الرجل الثاني😅

فراح لواحد اسمه زَمعة بن الأسود وحكى له القصة وقال له إن في أربعة مجتمعين على الموضوع ده فقال له إنه موافق👌
☆الحمد لله مقلوش شوف لنا واحد سادس 😅

المهم الخمسة اجتمعوا وأخذوا القرار الجريء إللي هيعارضوا به كل سادات قريش، ورأيهم ممكن يؤدي لانقسام شديد في مكة، متخيلين هينصروا دين هم مش مقتنعين به أساسا 😶
فإيه إللي يجبرهم أصلا على كده وهم مش هيستفيدوا أي حاجة أصلا🤨
كل إللي حركهم كانت الحمية والنخوة👌
طبعا كله بتقدير ربنا، لأن ربنا إذا أراد شيئا هيأ أسبابه😉

اجتمعوا واتفقوا هيعملوا إيه واتفقوا على اليوم ،وقال لهم زهير إنه هو إللي هيبدأ الكلام وإنتم ادخلوا ورايا على طول😈
راح الخمسة في اليوم الموعود ، طبعا كل واحد لوحده عشان محدش ياخد باله🤭

دخلوا المسجد وقام زهير ونادى على أهل مكة وقال :
يا أهل مكة!
احنا نأكل ونشرب ونلبس وبنو هاشم هَلْكى محدش يبيع لهم حاجة ولا يشتري منهم😑
والله ما أنا قاعد غير لما نقطع الصحيفة الظالمة دي 😤

ّسمع الكلام أبو جهل اتعصب...إيه الراجل إللي هيضيع علي فرصتي دي😠
فراح قايم بكل حماسة وقال:
كذبت والله ما نقطعها😡
راح قايم زمعة بن الأسود 🤭 وقال لأبي جهل:
أنت والله أكذب😡
إحنا أصلا مكناش موافقين عليها لما اتكتبت من الأول 😠
فراح قايم أبو البختري بن هشام وقال:
صدق زمعة احنا مش راضيين عن إللي اتكتب فيها 😤
فقام المطعم بن عدي وقال:
صدقتما وأي حد يقول غير كده يبقى كاذب واحنا نتبرأ ألى الله منها😤
وبعدين قام هشام بن عمرو إللي جمعهم أصلا وقال نفس كلامهم وأصر على نقض الصحيفة هو كمان😅

إللي يشوف الموقف... يلاقي إن خمسة من سادات قريش عايزين ينقضوا الصحيفة وأبو جهل الوحيد إللي واقف بيدافع،
والباقيين قاعدين ساكتين بيتفرجوا والأغلبية الصامتة ملهاش أي لازمة 😀

وسط ماهم بيتخانقوا كده لقوا إللي داخل عليهم 😮

مين إللي دخل ...وعايز إيه؟
وهل الحصار اتفك ولا لأ...ده إللي هنعرفه الجزء الجاي إن شاء الله😊



#Eman_Shalapy

#قصص_الأنبياء(٢)
#السيرة_النبوية
#الحلقة_السادسة_والعشرون
#موت_أبي_طالب

كنا واقفين المرة إللي فاتت عند أبو جهل لما كان واقف بيدافع عن نقض الصحيفة،
وقصاده خمسة منظمين من سادات مكة عايزين ينقضوا الصحيفة،
وهم واقفين كلهم بيتخانقوا كده ...فجأة لقوا أبو طالب بن عبد المطلب عم رسول الله صلى الله عليه وسلم داخل عليهم المسجد🤨
فشاف ابو طالب الناس واقفة وبتتكلم فدخل في الكلام وقال لهم:
ابن أخويا بيقول إن الصحيفة إللي إنتم معلقينها في الكعبة وفيها قانون المقاطعة أكلتها دودة الأرض ومسبتش فيها حاجة غير اسم الله عز وجل...باسم اللهم👌
كفار مكة استغربوا إيه إللي بتقوله ده🤨
فقال لهم: روحوا هاتوا الصحيفة لو لقتوها زي ما ابن أخي قال...ترجعوا عن المقاطعة،
ولو كان كاذب هنتركه لكم وإنتم خذوه واقتلوه💁‍♂️
فقالوا : صح معاك حق ..ده العدل😕
فراح زعماء مكة ودخلوا الكعبة وبيشوفوا الصحيفة لقوها زي ما رسول الله قال🙊
معجزة واضحة أهه قصادهم، طبعا مكنش في حل تاني غير إنهم ينهوا المقاطعة زي ما وعدوا أبي طالب،
وانتهى حصار المسلمين بعد ثلاث سنوات في محرم من السنة العاشرة من البعثة،

☆شوفوا هو ربنا كان قادر إنه ينهي الموضوع كله في لحظة،
لكن ربنا أراد إنه يعلم الصحابة ويعلم كل الأجيال إللي هتيجي بعدهم: الصبر والثبات على الإيمان،
وكمان بيعلمنا إن أصعب المشاكل إللي ممكن يكون الإنسان فيها ممكن تتحل من طريق عمره ما يخطر على بال أحد أصلا،
وبيحله كمان من أصعب الأبواب تخيلوا 😅
الطبيعي إن إللي يسعى في نقض الصحيفة مين؟
بنو هاشم والمسلمون صح...لأنهم اكثر ناس متضررين،
ربنا قال للجميع لأ...إللي هيسعى في حل الموضوع رجل كافر ملوش علاقة أصلا بأي حاجة 👌
ومش بس كده ..خذوا الأصعب إللي هينهي القصة دي كلها..دودة😶
متخيلين...ربنا سخر دودة عشان تنهي حصار صعب شديد استمر ثلاث سنوات على المسلمين😳
الدودة قعدت ثلاث سنوات تأكل في الصحيفة، حد كان يخطر على باله إللي حصل ده أصلا🤷‍♀️
فاتعلموا الصبر واتعلموا كويس قوي كلام ربنا:
"وَمَا يَعْلَمُ جُنُودَ رَبِّكَ إِلَّا هُوَ" 👌
كل حاجة هتتحل بس اصبروا وإنتم هتشوفوا العجب 😁

انتهى الحصار وخرج المسلمون أشد ثباتا على الإسلام وأقوى يقينا في الله😊
في بدايات السنة العاشرة من البعثة مرض أبو طالب عم رسول الله،
كان وصل عمره لثمانين سنة، وكمان خرج من حصار ثلاث سنوات أكل فيها ورق الشجر ،
ده غير القلق إللي كان عايش فيه بسبب خوفه على رسول الله صلى الله عليه وسلم،
فكل ده أثر على صحته وأصبح مريض نايم في السرير مش بيتحرك،
الناس كلها عرفت بمرض أبي طالب وتوقعوا إنه يموت قريب😶
فخاف زعماء مكة🙊
هم مش ناويين يسيبوا رسول الله ، هيؤذوه يعني هيؤذوه😑
لكن المشكلة إنهم لو آذوه بعد موت أبي طالب، العرب هتعايرهم...إنتم استغليتم موت عمه عشان تستفردوا بيه وتعملوا إللي إنتم عايزينه😏
وهم كانوا بيراعوا أوي إن محدش يعيرهم، كانت حاجة كبيرة عندهم 😅
عملوا إيه🤔
راح وفد من خمسة وعشرين رجل من سادات مكة لأبي طالب ،منهم أبو جهل، وأبو سفيان وأمية بن خلف، وعتبة بن ربيعة وغيرهم،
اجتمعوا عنده وقالوا له:
يا أبا طالب!
إنت عارف مكانتك عندنا عاملة إزاي، وإنت شايف حالتك إيه دلوقتي، واحنا خايفين عليك من الموت وإنت عارف إللي بيننا وبين ابن أخوك😥
فانت ابعث حد يجيبه ونشوف حل وسط بيننا، احنا هنسيبه في حاله وهو يسيبنا في حالنا،
ونعيش في سلام مع بعض من غير أي مشاكل ، أظن مفيش أحسن من كده🤷‍♂️
☆يعني عايزين رسول الله يشوف الكفار يعبدوا الأصنام وميتكلمش ولا يدعوهم،
عايزين رسول الله يتقبل الناس على كفرهم وصباح الخير يا جاري وإنت في حالك وأنا في حالي 😀
عايزين رسول الله يشوف الفواحش والظلم والربا وكل أمور الجاهلية ويسكت عادي،
مش إنت بتعبد إلهك وأنا بعبد إلهي، خلاص بقى مشيها،
سيبك من الأمر بالمعروف والنهي عن المنكر والكلام ده، كل واحد حر😀

أظن العرض ده يعتبر مغري جدا لرسول الله والمؤمنين 😮
أهل مكة بعد ما كانوا رافضين الإسلام تماما وبيعذبوا المسلمين عشان يتركوا دينهم،
قدموا تنازلات أخيرا وتقبلوا فكرة وجود الإسلام، وكمان المسلمين لسه خارجين من حصار كان تاعبهم جدا،
فهم خلاص مش هيقدروا يستحملوا أي حاجة دلوقتي خالص😣
وأبو طالب إللي كان بيحمي رسول الله هيموت، فدي تعتبر فرصة مثالية للمسلمين مش هتتعوض🙊

وأرسل أبو طالب لرسول الله فلما جاء قال أبو طالب لرسول الله في حضور وفد المشركين:
دول أشراف قومك اجتمعوا على إنهم يعطوك ويأخذوا منك،
يعني هتعيشوا مع بعض في سلام من غير أي مشاكل👌

فرد عليه رسول الله صلى الله عليه وسلم وقال:
ياعم! إيه رأيك أدعوهم لحاجة أحسن من كده؟
فقال أبو طالب: هتدعوهم لإيه🤔
قال رسول الله:
أدعوهم إنهم يقولوا كلمة واحدة يملكوا بها العرب والعجم!!
أصلا أهل مكة مكنوش يحلموا بوحدة العرب،
دلوقتي بتكلمنا إننا نكون حكام للعرب والعجم...فارس والروم😳
فأبو جهل بكل حماسة قال:
قول إيه هي ا

لكلمة دي...واحنا هنقولها لك وكمان هنقول لك عشر أمثالها 😲

فقال رسول الله:
تقولون لا إله إلا الله وتتركوا ما تعبدون من دونه!!
فاتصدموا كلهم طبعا...هو إنت لسه في القصة دي😑
ورفض كفار مكة عرض رسول الله ورفض رسول الله عرض كفار مكة، وفشلت المفاوضات😶

☆عارفين لو كنا بنحكي عن حد تاني هو إللي عمل كده غير رسول الله ،كان زمان الناس قعدت تقول: مش يحمد ربنا على النعمة إللي هو فيها😏
ماهم قالوا لك اعبد ربنا عادي اهه🙄
خلاص خليك في حالك وهم في حالهم وبعدين في المستقبل يبقى يحلها ربنا،
إيه التفكير ده...مش تكسب أرض وتعيش في أمان، ويمكن في المستقبل ربنا يهديهم،
ثم إنت اصلا محلتكش حاجة وكل الناس ضدك..يبقى تبوس إيدك وش وظهر وترضى باللي هم عرضوه عليك، إنت هنتهب ولا إنت شايف نفسك على إيه😑
بس للأسف الناس مش فاهمة إن أمور الدين العقيدة مفيهاش فصال👌
رسول الله صلى الله عليه وسلم رفض إنه يتنازل عن أي حاجة ولو بسيطة في الدين مقابل أمنه وسلامته وسلامة المسلمين،
ومحدش من المسلمين اعترض أبداااا على قرار رسول الله ، لأنهم واثقين إنه لا ينطق عن الهوى،
وكمان واثقين في قوة دينه وإنه دائما وأبدا هيقدم مصلحة الدين والدعوة على أي مصلحة تانية👌
عشان كده القائد إللي يقود أمة الإسلام لازم يمشي على نفس منهج رسول الله وتكون مصلحة الدين عنده رقم واحد👌
لو قدم أي مصلحة تانية على مصلحة الدين هتكون نهايته الفشل😞

اشتد المرض بأبي طالب المساعد الأكبر للمسلمين والمدافع الأول عن رسول الله ودعوته على الرغم من كفره،
عرف رسول الله إن عمه أبو طالب مريض جدا فراح له ولقاه بيحتضر🙊
وكان عنده أبو جهل، اللحظة الحاسمة جت، مفيش أي مجال،
للتردد، رسول الله بقاله عشر سنين بيدعوه للإسلام لكن مفيش فايدة،
دي آخر فرصة...لو مات على الكفر انتهى...هيكون خالد مخلد في النار، مش هيطلع منها أبدا 😰
بعد كل الدفاع وتحمل الألم ده كله يُخلد في النار 😥

وقف رسول الله على رأسه وقعد يقول لعمه:
يا عم قل لا إله إلا الله... كلمة أقف أدافع بها عنك يوم القيامة قصاد ربنا!!
☆تخيلوا قلب رسول الله كان عامل إزاي وهو بيقول الكلام ده لعمه إللي رباه وكان بيحبه ويفضّله على أولاده،
عمه إللي محدش وقف جنبه أده😔
مجرد إن الواحد يضع نفسه مكان رسول الله مع أحد بيحبه بيحس إن قلبه هينخلع،
فما بالك برسول الله إللي كان أرق الناس قلوبا، وكان أحرص الخلق على هداية الناس😢

رسول الله عمال يحاول مع عمه في موقف مؤثر جدا😥
وفجأة واحد يقول:
يا أبا طالب! إنت هتسيب ملة عبد المطلب 😡
إزاي تسيب دين آباءك وأجدادك 😡

أبو طالب كان حيران بين ابن أخوه إللي بيحبه ونفسه ميكسرش بقبله،
وبين كلام أبو جهل إللي يعتبر منطقي بالنسبة له😑
في الآخر قال : لولا إن قريش تعيرني ويقولوا إنه قالها بسبب خوفه من الموت لكنت قلتها عشان خاطرك إنت بس، وقال إنه على ملة عبد المطلب...ومات😨
مات على ملة عبادة الأصنام😔
تخيلوا شدة ألم رسول الله صلى الله عليه وسلم في اللحظة دي،
تخيلوا الذكريات إللي مرت عليه في اللحظة دي من صغره لحد النهاية،
وفعلا دي النهاية...مفيش بينهم لقاء مرة تانية،
أبو طالب خالد مُخلد في النار ورسول الله في الدرجات العُلى من الجنة،
ألم رسول الله كان شديد جدا مش عشان عمه مات، لكن عشان هو مات على الكفر،
لما بنفقد حد عزيز علينا بنمني نفسنا إننا نلتقي في الجنة ،
لكن رسول الله مش هيلتقي لا بأمه ولا أبوه ولا عمه في الجنة😔
أشد الناس بلاءا الأنبياء👌

فقال رسول الله بعد موت أبي طالب في حزن شديد:
والله لأستغفر لك الله مادام ربنا لم ينهانِ عن كده!
ونزل قول الله :
"إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ"
ونزل:
"مَا كَانَ لِلنَّبِيِّ وَالَّذِينَ آمَنُوا أَن يَسْتَغْفِرُوا لِلْمُشْرِكِينَ وَلَوْ كَانُوا أُولِي قُرْبَىٰ مِن بَعْدِ مَا تَبَيَّنَ لَهُمْ أَنَّهُمْ أَصْحَابُ الْجَحِيمِ"

☆محتاجين نقف هنا كذا وقفة،
◇أولا:
نحمد الله على نعمة الإسلام وندعوه أنه لا يحرمنا منها نحن ومن نحب يارب آمين🤲

◇ثانيا:
شفنا أثر الصحبة السيئة على الإنسان، صديق السوء أبو جهل استمر يذكر أبا طالب بالكفر ويذكره بالعادات والتقاليد والناس لحد ما دي كانت نهايته😞
فاللي عندها صاحبة دايما بتعايرها بالتزامها أو تذكرها بالمعاصي أو بتساعدها على المعصية،
تبعد عنها فورا👌
كما يُقال : انْجُ سعد قد هلك سعيد،
يعني تخيلوا سعيد هلك فما بالكم بسعد إيه إللي هيحصله😶
يعني لو واحد بيغرق هينقذ نفسه الأول ولا وهو بيغرق هيروح ينقذ صاحبه ويغرقوا هم الإثنين مع بعض😑
كذلك إللي بتكون عايزة تقرب من ربنا أول حاجة لازم تعملها إنها تبعد عن أي حد بيجرها للمعصية،
محدش هينفعنا يوم القيامة ، كله هيهرب من الثاني،
أبو جهل مش هينفع أبو طالب بحاجة يوم القيامة😞
"الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ"

◇ثالثا :
سؤال ممكن ييجي في دماغنا

، ليه أبو جهل كان مصمم إن أبو طالب ميدخلش الإسلام، مع إنه خلاص هيموت ، فكان يسيبه 😕

أبو جهل كان خايف إن لو أسلم أبو طالب كل بني هاشم يسلموا بسببه،
ولو حصل كده ، احتمال كبير مكة تؤمن وكده سلطته في مكة هتضيع،
فهو أهم حاجة عنده طبعا مصلحته حتى لو على حساب مصلحة غيره،
ودي بنشوفها في حياتنا كثير جدا للأسف😞

◇رابعا:
الكفر لا تنفع معه طاعة...مهما كان الإنسان حسن الخُلق مُدافع عن حقوق المظلومين،
حتى لو دافع عن دين الإسلام ومات وهو غير مسلم ، فهو في النار، لن تنفعه أي طاعة مادام لا يشهد أن لا إله إلا الله أولا ومحمد رسول الله ثانيا👌
لكن ربنا لا يظلم أحد، كان أبو طالب أشد الناس دفاع عن رسول الله وعن الدعوة،
فرسول الله هيشفع في أبي طالب يوم القيامة إنه ميكونش في الدرك الأسف من النار،
هيكون عذابه إنه ييقى في قدمه جمرتين أو نعلين زي جزمتين من نار يغلي منهما دماغه، وده أهون عذاب لأهل النار ربنا يعافينا😞

◇خامسا:
سؤال مهم ومحير جدا...ليه رسول الله مع إنه مستجاب الدعوة ودعا لأكثر من شخص بالهداية وربنا هدهم،
مدعاش لأبي طالب إن ربنا يهديه 😳

¤قبل الإجابة لازم نفهم الأول إن رسول الله قعد عشر سنين يدعو عمه للإسلام واجتهد في ذلك،
حتى إن اثنين من أبناء أبي طالب وزوجته أسلموا، ومع ذلك هو لم يؤمن،
يعني رسول الله عمل إللي عليه من الأسباب الدنيوية،
زي ما نوح عليه السلام عمل مع ابنه وزي ما إبراهيم عليه السلام ما عمل مع أبوه👌

¤ربنا قال لرسوله:
"إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ ۚ وَهُوَ أَعْلَمُ بِالْمُهْتَدِينَ"
يعني مش عشان أنا بحب الشخص ده فخلاص هخليه يهتدي،
ممكن أكون بحبه لكن نهايته إنه من أهل النار،🤷‍♀️
فدي أول قاعدة بتعلمها إن ربنا يهدي من يستحق الهداية فقط،
بيرى قلوب العباد هل الشخص ده يستحق الهداية ولا لأ،
وأبو طالب كان عايز يدخل في الإسلام إرضاءا لرسول الله عشان ميزعلش ،
مش لأنه مؤمن بالله وبرسالة الإسلام، فالمحرك الرئيسي لكل أفعال أبو طالب هو حبه لابن أخوه كابن أخ مش كرسول من عند الله👌

¤مش كل دعاء رسول الله يُستجاب، والدليل على كده في صحيح مسلم إن رسول الله طلب من ربنا إنه يعطي أمته ثلاثة أمور، فأعطى له اثنتين ومنع عنه واحدة،
لحكمة ربنا يعلمها👌
ده غير كده رسول الله لو دعا بحاجة وهي تخالف ماقدره الله ربنا بيمنعه من الاستمرار في الدعاء ده،
فكان بيدعو لناس معينة وبيدعو على ناس ثانية،
فربنا أنزل :
"لَيْسَ لَكَ مِنَ الْأَمْرِ شَيْءٌ أَوْ يَتُوبَ عَلَيْهِمْ أَوْ يُعَذِّبَهُمْ فَإِنَّهُمْ ظَالِمُونَ "
فمبقاش يدعي، فربنا هو إللي بيوفق ويُلهم رسول الله الدعاء الموافق قدر الله💁‍♀️
فتكون نتيجة الكلام ده كله:
إن أبو طالب لا يستحق الهداية وبالتالي ربنا لم يُلهم رسول الله إنه يدعو لعمه أبي طالب لأن قدر ربنا في أبي طالب إنه هيموت على الكفر،
وحتى《 لو 》رسول الله دعا له بالهداية، فإما ربنا هيقول له إنه لا يدعو بشيء ربنا هو الحكم فيه،
أو إن ربنا مكنش هيستجيب لرسوله لحكمة يعلمها سبحانه،
و كان من الحكمة إن أبو طالب لم يسلم : إن الكفار مقدروش يتعدوا على رسول الله،
أو خلونا نقول إن أبو طالب خفف عنه أذى المشركين، ومكنش بيتجرأ عليه غير السادة،
لكن لو كان أسلم أبو طالب كان هيبقى زيه زي باقي المسلمين وهيحصل الأذى الشديد للجميع👌

◇سادسا:
مينفعش ندعي بالرحمة ولا نستغفر لأي أحد شفناه مات على الكفر،
وكمان مينفعش نحبه المحبة الدينية،
يعني مينفعش نحبه لأنه مجتهد في دينه مثلا ، ولا إنه متمسك بدينه، أو بسبب محبتنا له نعصي الله😅
لكن المحبة الطبيعية الفطرية عادي، زي ما رسول الله كان بيحب عمه كده،
وزي ما إبراهيم عليه السلام كان بيحب أبوه، وزي ما نوح عليه السلام كان بيحب ابنه،
كل دي محبة فطرية طبيعية، ومفيش تعارض بين إن الإنسان يحب أمه أو أبوه أو عمه محبة فطرية،
وفي نفس الوقت يكره الكفر إللي هم عليه ويحاول إنه يغيره👌
زي ما رسول الله حاول مع عمه وباقي الأنبياء إللي قلناهم😉

مات أبو طالب في السنة العاشرة من البعثة، وعلى الرغم من إن المدافع الأول عن الدعوة مات،
إلا إن الدعوة هتستمر،
فربنا هو إللي بيسخر الناس لحماية الدعوة وتبليغها👌

لكن بعد موت أبي طالب الأذى اشتد جدا على رسول الله🙊
كل الكراهية والعداء إللي كان جواهم طلعت دلوقتي😶
ماهو رسول الله بقى في موضع ضعف،
هم كانوا قبل كده بيؤذوه بس مش كده ، وهي دي حال الكفار والمنافقين،
طول ما الإنسان في موضع قوة ولو بسيط تلاقيه بيحترمك وحتى لو آذاك مش بيؤذيك أوي،
لكن أول ما تروح عنك القوة يظهر بقى كل المستخبي، ويتفننوا في الإفتراءات والإتهامات بالباطل😑
حتى رسول الله قال إن قريش مخدتش راحتها في أذيته غير بعد موت أبي طالب👌
تخيلوا الأذى إللي كان بيحصل له ده كله كان يعتبر حاجة بسيطة بالنسبة للي عملوه بعد كده😞
لدرجة إن السفهاء تجرأوا على رسول الله صلى الله عليه وسلم😑

وفي وسط كل الشدائد والابتلاءات دي حصل ابتلاء تاني أشد🙊

يا ترى إيه الإبتلاء إللي حصل ،
وإزاي رسول الله هيقدر يكمل في طريق الدعوة وسط الصعوبات والآلام دي كلها،
ده إللي هنعرفه الجزء الجاي إن شاء الله😊



#Eman_Shalapy

#قصص_الأنبياء(٢)
#السيرة_النبوية
#الحلقة_السابعة_والعشرون
#عام_الحزن

وقفنا المرة إللي فاتت عند رسول الله صلى الله عليه وسلم لما عمه أبو طالب مات وقريش ما صدقت واشتدت في الأذى على رسول الله جدا،
اجتمع على رسول الله الأذى الجسدي والأذى النفسي، فكان إللي بيخفف عنه ويصبّره بعد ربنا هي زوجته خديجة😊
كانت معاه من البداية،
من فترة شبابه لحد نزول الوحي، وفترة الجهر بالدعوة وشِعب أبي طالب،
وجعلت كل أموالها تحت تصرف رسول الله، يتصرف فيها زي ما هو عايز عشان تعينه على نشر دعوة الإسلام
فخديجة كانت لها مكانة خاصة في قلب رسول الله وكانة خاصة عند رب العالمين ،
لدرجة إن ربنا أرسل لها السلام مع جبريل ليخبرها به رسول الله 😮
وربنا بشرها على لسان رسول الله ببيت في الجنة من اللؤلؤ المجوف هادئ جدا مفهوش أي دوشة،
"عن أبي هريرة رضي الله عنه قال:
"أَتَىَ جِبْرِيلُ النّبِيّ صلى الله عليه وسلم. فَقَالَ:
يَا رَسُولَ اللّهِ هَذِهِ خَدِيجَةُ قَدْ أَتَتْكَ، مَعَهَا إِنَاءٌ فِيهِ إِدَامٌ أَوْ طَعَامٌ أَوْ شَرَابٌ،
فَإِذَا هِيَ أَتَتْكَ فَاقْرَأْ عَلَيْهَا السّلاَمَ مِنْ رَبّهَا عَزّ وَجَلّ، وَمِنّي، وَبَشِّرْهَا بِبَيْتٍ فِي الْجَنّةِ مِنْ قَصَبٍ لاَ صَخَبَ فِيهِ وَلاَ نَصَبَ".

مع إن الجنة أصلا هادئة ، لكن زيادة تخصيص لخديجة؛
لأنها كانت دائما بتحافظ على هدوء البيت لرسول الله عشان يرجع يرتاح فيه،
لم يُذكر عنها إنها عملت مشكلة مع رسول الله، ولا رفعت صوتها عليه ولم تُتعبه أبدا، و بالعكس كمان دي كانت بتساعده وتعينه،
مع إن كان في فرص كثيرة للمشاكل بسبب الدعوة،
لكن مع ذلك تحمّلت الأذى مع رسول الله وصبرت،
فبقت أفضل نساء أهل الجنة، فتخيلوا كانت امرأة صالحة أد إيه رضي الله عنها😊
وخير متاع الدنيا المرأة الصالحة، فلما تكون امرأة بالصلاح ده ، زوجها هيحبها أد إيه،
ولو الزوج ده بقى رسول الله صلى الله عليه وسلم هيبقى الحب عامل إزاي 🙊
ومع إن الزواج بأكثر من امرأة كان منتشر عادي في الجاهلية
إلا إن رسول الله لم يتزوج عليها أبدا خلال حياتها معاه إللي استمرت خمسة وعشرين سنة👌
وده من تقديره لها عليه الصلاة والسلام، فهي أغنته عن أي امرأة وكانت له نعم الزوجة،
فكان من وفائه لها وهو صاحب الخلق العظيم إنه لا يُكدر عليها الحياة بسبب الغيرة 😉

لكن مهما كان الإنسان بيحب شخص ومرتبط به فسنة الله في الكون لا تتبدل ولا تتغير،

بعد موت أبي طالب بثلاثة أيام وفي رواية ثانية قيل شهر ماتت خديجة رضي الله عنها😞

بصفة عامة موت الزوجة بالنسبة للرجل بيبقى مصيبة ،وكل ما طالت العشرة كان الوضع أشد والفراق أصعب،
فتخيلوا لما تكون زوجة زي خديجة رضي الله عنها وتموت،
وكمان ماتت في أشد الأوقات على رسول الله👌
لسه رسول الله مخرجش من حزنه على موت أبي طالب على الكفر،
فربنا يبتليه بفقد السكن ، بفقد رفيقة عمره وأم أولاده😞
ماتت إللي كانت بتهون عليه وتعطيه الثقة لما يشتد عليه الأذى من قريش، ابتلاءات ورا بعض ورا بعض،
ورسول الله في الإبتلاءات دي مكنش شاب صغير ده كان عنده خمسين سنة 😥
خمسين سنة وشايل هم المسلمين في الحبشة وهم المسلمين المستضعفين في مكة،
وهم نشر الدعوة ده غير الأذى والإبتلاءات إللي بيتعرض لها هو نفسه شخصيا😔
ومع ذلك رسول الله لم يعترض على قضاء الله، مقلش هو أنا ليه ربنا بيعمل معايا كده وأنا رسول،
مقلش هو إيه الحكمة يعني إن ربنا يبتليني الإبتلاءات دي كلها،
مقلش يارب كفاية أنا تعبت ومبقتش مستحمل ،
بتسمعوا الكلام ده من الناس ولا لأ، وابتلاءاتهم متجيش ذرة في ابتلاءات رسول الله صلى الله عليه وسلم😑

رسول الله كان بيحزن ،والحزن ده شيء طبيعي في النفس البشرية👌
واحنا قلنا قبل كده إن الحزن لا يتعارض مع الصبر والرضا لما اتكلمنا في قصة يوسف عليه السلام الجزء الخامس ،
لما يعقوب عليه السلام وهو نبي حزن لفقد يوسف وأخوه،

المشكلة مش في الحزن ،ده شيء طبيعي لكن المشكلة لما الحزن يخلي حياتنا تقف😑
تلاقي البنت مامتها ماتت أو أبوها أو...أو... وتقول خلاص أنا حياتي وقفت ومش عارفة استمر في الحياة،
وده سببه ضعف الإيمان، لازم نكون مستعدين نفسيا وإيمانيا لفراق أي أحد عشان منتصدمش وحياتنا تقف👌

أي حد بنحبه هنفارقه في يوم من الأيام،
قال جبريل عليه السلام لرسول الله صلى الله عليه وسلم
"أحبب من شئت فإنك مُفارقه"👌
سواء أم أو أب أو جد أو ابن أو زوج أو زوجة أو...أو....زي ما حصل مع رسول الله صلى الله عليه وسلم وربنا قالها لرسول الله ولنا:
"إِنَّكَ مَيِّتٌ وَإِنَّهُم مَّيِّتُونَ "

رسول الله هو أشد البشر بلاءا على الإطلاق ، ومهما كانت ابتلاءاتنا فهو ابتلاءاته كانت أشد،
ومع ذلك حياته موقفتش ، كان بيحزن ويتألم لكن الحياة بتستمر،
عنده دعوة لازم يوصلها لكل أهل الأرض، عنده أصحاب بيتعذبوا لازم يهون عليهم،
رسول الله عنده مسؤوليات تخيلوا لو حزنه خلى حياته تقف!!
كل حاجة هتضيع😳
فينفعش احنا كمان حياتنا تقف، عندنا مسؤوليا

ت والتزامات سواء دينية أو نيوية 👌

وطبعا محدش يطلع ويقول أصل ده رسول الله ولازم يكون كده وهو ربنا مثبته😅
لا يا حبيبتي رسول الله بشر زينا بيحزن ويتألم وبيمرض وبيتعرض لنفس إللي احنا بنتعرض له👌
وإلا مكنش ربنا يقول لنا نقتدي برسول الله لو كان عنده قدرات خارقة مش عندنا 😀
عشان كده أي رسول لازم يكون بشر👌
"قُلْ إِنَّمَا أَنَا بَشَرٌ مِّثْلُكُمْ يُوحَىٰ إِلَيَّ أَنَّمَا إِلَٰهُكُمْ إِلَٰهٌ وَاحِدٌ"

فلما حد يقولك رسول الله عمل واعملي زيه متقوليش أصل ده رسول الله، أو حتى تقولي جواكي كده،
لأن معنى كلامك إن ربنا قالك تعملي حاجة إنتي مش أدها ومش هتقدري تعمليها،
وده كده ظلم، وربنا لا يظلم مثقال ذرة🤷‍♀️
أيوة رسول الله كان ربنا بيثبته بسبب قوة الإيمان إللي عنده،
لكن قوة الإيمان دي حاجة مكتسبة 👌
يعني أي حد يقدر يكون صاحب إيمان قوي وده عن طريق:

♡طلب العلم الشرعي ،لأن كل ما الإنسان اتعرف على ربنا أكثر ،القلب يتملى حب وخوف ورجاء وخشية من الله،
زي ما رسول الله كان بيتعلم القرآن من جبريل😉

♡الاجتماع على عمل الخير، تشوفي حد تعملي معاه الطاعات المختلفة، ولو مفيش مش مشكلة استعيني بالله وهتلاقي ربنا بعث لك إللي يعينك😊

♡الدعوة إلى الإيمان، يعني إنك تدعي الناس وتأمريهم بالمعروف وتنهيهم عن المنكر،
كلمي الناس عن ربنا، وعن رسوله وعن الأخلاق،
وقبل ما تكلميهم خليهم يشوفوا فيكي فعلا الكلام ده،
رسول الله كان عبارة عن قرآن يمشي على الأرض،
خلي ده هدفك، إنك عايزة تكوني قرآن يمشي على الأرض زيه،
وطول مانتي بتحاولي إنك تكوني كده،
عمرك ما هترجعي عن طريق الإلتزام، لأنك هتكوني كل يوم في زيادة،
وده أهم حاجة ،إنك تستمري على طريق الإلتزام لحد ما تقابلي ربنا 😊

♡التفكر في الكون وفي الأحداث إللي بتحصل في حياتنا وحياة إللي حوالينا،
ونطلع العبر إللي تثبتنا على الدين وتقوي إيماننا واحنا تكلمنا عن التفكر قبل كده في البداية قبل البعثة،
ممكن ترجعوا له لو حبيتم😉

♡الصبر...مش هتقدري تعملي الحاجات دي غير لما يكون عندك صبر،
صبر إنك تتعلمي العلم الشرعي، صبر إنك تقعدي وتتفكري ، صبر إنك تعملي الطاعات وتبعدي عن المحرمات،
وإللي معندهوش صبر ضاع خلاص😳
لا مضعش إللي معندهوش صبر يعلم نفسه الصبر مرة واتنين وعشرة لحد ما يوصل إنه يكون عنده صبر،
ورسول الله بيقول :
"من يتَصبر يُصَبره الله"
يعني إللي بيقاوم نفسه على الصبر ويغصبها عليه ربنا هيصبره،
هو احنا مش لما بنيجي نصوم نبقى جعانين ونقعد نصبر نفسنا ونستحمل لحد ما المغرب يأذن،
اهه ربنا بيعلمنا طريقة الصبر، يعني هو أعطانا بداية الخيط،
الصيام مثال على التصبر وتعلم الصبر،
طبقوا القاعدة دي في باقي حياتكم، صبروا نفسكم على الطاعة، وهتوصلوا في النهاية👌

◇حياة رسول الله صلى الله عليه وسلم كلها عِبر، ومفيش بشر على وجه الأرض قصة حياته متوثقة ومحفوظة بالدقة والتفاصيل دي غير رسول الله صلى الله عليه،
وده عشان نتبعه في كل خطوة من خطوات الحياة😊

ماتت خديجة في السنة العاشرة للبعثة، بعد موت أبي طالب،
والعلماء سموا العام ده بعام الحزن بسبب حزن رسول الله الشديد على عمه وزوجته،
يعني مش رسول الله هو إللي سمى العام بعام الحزن👌

الوضع دلوقتي في مكة نقدر نقول عنه إنه بقى متجمد، واقف زي ماهو مفيش أي تقدم😕
المسلمين بيعذبوا، المشركين بيؤذوا رسول الله، محدش دخل في الإسلام، ودعوة الإسلام بتُحارب وتُشوه😞
حتى لما كان أي أحد ييجي للحج من سادات العرب كان سادات مكة بيحذروه إنهم يسمعوا لرسول الله،
وده من بداية الجهر بالدعوة،
حتى في قصة حصلت مع سيد قبيلة دَوْس في حج السنة السادسة من البعثة،
سيد دَوْس كان اسمه 《الطُّفَيْل بن عمرو الدَّوْسي》
جاء للحج فلما سادة مكة شافوه قالوا له عندنا رجل ساحر، بيقول كلام سحر بيفرق بين الرجل وأهله والرجل وقبيلته،
فاوعى تسمع له أبدا🤫
فيقول الطفيل إنهم قعدوا يزنوا عليه لحد ماخاف وحط القطن في ودنه عشان ميسمعش كلام رسول الله ولو بالغلط تخيلوا😅
فوهو بيطوف حول الكعبة شاف رسول الله بيصلي عند الكعبة،
وطبعا كان شكله مميز لأنه بيصلي صلاة مختلفة عن باقي الناس، وكان قريب منه فأسمعه الله بعض كلمات من القرآن
فلما رسول الله خلص صلاة وقام عشان يرجع بيته راح وراه الطفيل بن عمرو،

☆سبحان الله الممنوع مرغوب 😅
يعني سادات مكة لو كانوا سابوه أو حتى كانوا قالوا له روح اسمع لمحمد مكنش هيروح،
بس عشان هم خوفوه وقالوا متروحش أثاروا فضوله،
وكل ما أي حد حاول يمنع دعوة الإسلام من الإنتشار وحاربها تنتشر أكثر 👌

راح له الطفيل وقال له يا محمد : قومك قالوا لي كذا وكذا وخوفوني منك، لحد ما سديت أذني بالقطن😑
وأنا سمعت بعض الكلام إللي قلته فأنا عايز أسمع منك 😕
فرسول الله بدأ يوضح له رسالة الإسلام وقرأ عليه القرآن،
فأسلم الطفيل بن عمرو الدوسي😮
وبعدين في نفس اللحظة إللي أسلم فيها قال لرسول الله:
يارسول الله أنا سيد قومي، والناس بتسمع كلامي فأنا هر

وح أدعوهم للإسلام،
لكن ادعوا الله إنه يجعل لي آية زي علامة كده تساعدني في دعوتهم👌
فدعا له رسول الله : يارب اجعل له آية،
فكان في وجهه زي نور كده ،كأنه مصباح مُضيء،
فقال يا رسول الله:
بلاش وجههي هيقولوا إن الآلهة عاقبته عشان ساب الدين😓 فدعا رسول الله له إنه يجعلها في طرف السوط بتاعه،
فبقى الضوء متعلق في طرف سوطه😉

فلما وصل لقبيلته دوس ودخل عليه أبوه وكان شيخا كبير في السن يسلم عليه قال له الطفيل:
متكلمنيش ولا لك أي علاقة بي خالص😤🤚
فأبوه استغرب وسأله: ليه يابني كده😥
فقال له الطفيل:
عشان أنا أسلمت وتابعت دين محمد 😤
فأبوه قال له: خلاص أنا ديني هو دينك 👌
فقال له الطفيل:
روح اغتسل وطهر ملابسك وتعال أعلمك الإسلام، وفعلا عمل كده وعلمه وأسلم أبو الطفيل ،
جاءت زوجته وقال لها: متكلمنيش ولا لك اي علاقة بي خالص😤🤚
فزوجته استغربت إيه ده في إيه🤨
فقال لها نفس الكلام فأسلمت هي كمان معاه،
لقى الموضوع ماشي معاه كويس😅
راح رايح لقومه وقال لهم نفس الكلام إللي قاله لأبوه وزوجته،
طبعا مسمعوش كلامه وكانوا هيقتلوه ، وخلاص مش هنكلمك ولا لنا علاقة بك ، وهنجيب غيرك يعني بسيطة 😡

فراح لرسول الله صلى الله عليه وسلم وقال له : يارسول الله محدش فيهم آمن وانتشر فيهم الزنا،
ادع عليهم يارسول الله😤
فرفع رسول الله يده وقال:
اللهم اهد دوسا 🤲
فقال له : روح ادع قومك 《وارفق بهم》👌

☆الطفيل بن عمرو كان مفكر إن الناس كلها زي بعض، وينفع معاها نفس الأسلوب،
فلما استعمل أسلوب الشدة مع أهله ونجح،
فكر إن الأسلوب ده هينفع مع قومه😶
ونسي إن الأهل ممكن يتقبلوا منه إللي ميتقبلوش الغريب👌
فمينفعش إننا ندعي الناس كلها بنفس الأسلوب، في ناس ممكن نتكلم معاهم بعشم فيقبلوا الكلام،
في ناس تانية بنتعامل معاهم بالشوكة والسكينة 😅
في ناس إيمانها عالي مجرد ما نقول لهم قال الله وقال الرسول ينفذوا على طول بدون نقاش ،
في ناس تانية عايزة تقتنع الأول وتثبتي لها صحة الكلام،
وهكذا،
فرسول الله عرف إن الطفيل كان شديد على قومه، فوصّاه إنه يكلمهم براحة ورفق، مع إنهم كفار،
فما بالنا لما بنتكلم وندعوا المسلمين، نعاملهم إزاي 😉
وكانت النتيجة إن دوس كلها أسلمت بعدين لما الطفيل دعاهم برفق😊

الدعوة دلوقتي واقفة في مكة، مانعين حد يسمع لرسول الله،
مضيقين على المسلمين في كل حاجة😑
طيب وبعدين لازم يكون في حل وإلا كده مش هيبقى في أي تقدم خالص في الدعوة😶
ورسول الله مهما كان حزين أو مهموم فهمه الأول هو نشر دعوة الإسلام👌
فرسول الله فكّر في حاجة يعملها لأول مرة معملهاش خلال العشر سنين إللي فاتوا دول😮
فكر إنه يطلع بنفسه خارج مكة يشوف مدينة تانية يدعو الناس إللي فيها،
لكن المدينة إللي رسول الله محتاجها لها مواصفات معينة،
رسول الله فكر أنهي أكثر مدينة مناسبة ، لقاها مدينة الطائف👌
اشمعنى الطائف🤨
مدينة الطائف كان لها مميزات مش موجودة في غيرها:
◇أولا:
تعتبر الطائف المدينة الثانية في الجزيرة العربية بعد مكة،
فيها ناس كثيرة وفيها التجارة شغالة كويس، ولها مكانة بين قلوب العرب💁‍♀️
◇ثانيا:
الطائف فيها قبيلة قوية جدا هي قبيلة ثقيف، وواضح من الأحداث إن الخطوة الجاية إللي قريش هتعملها هي إنها هتحارب رسول الله والمسلمين،
فاحنا محتاجين قبيلة قوية👌
◇ثالثا:
كان في منافسة دينية كبيرة بين مكة والطائف، فإذا كانت مكة فيها الصنم المشهور هُبل،
فالطائف فيها صنم اللات المشهور وإللي ناس كثيرة بتحلف به،
فيمكن الطائف تحب تسحب البساط من مكة فتتبنى هي الدعوة الجديدة دي وتتفوق على مكة💁‍♀️
◇رابعا:
الطائف تعتبر قريبة نسبيا من مكة، المسافة بينهم مائة كيلو فقط،
فكده هيبقى التنسيق سهل بين مكة والطائف، يعني رسول الله هيعرف يتابع الأحداث في البلدين بسهولة😉
◇خامسا:
الطائف مهمة جدا لأهل مكة لأن أثرياء مكة لهم أملاك في الطائف،
فلو دخلت الطائف في الإسلام هتكون ضربة اقتصادية كبيرة موجعة لأهل مكة 👌

رسول الله أخذ القرار بإنه يتوجه للطائف، وكان ده بعد موت أبي طالب وخديجة بحوالي شهر،
على حسب الروايات كان في شهر شوال من السنة العاشرة للبعثة تقريبا🤔
يعني رسول الله معندوش حاجة اسمها راحة، مفيش راحة في الدعوة👌
المسافة بين مكة والطائف مائة كيلو،
فخرج رسول الله للطائف ماشي على قدمه😶
وكان الطريق كله صحراء وحر ، كان في شهر مايو تقريبا،
هو كان ممكن يأخذ معاه جمل أو فرس مثلا،
بس لو كان عمل كده كان أهل مكة هينتبهوا إنه مسافر فممكن يمنعوه، وهو عايز ينشر الدعوة😕
ففَضّل إنه يتحمل مشقة السفر عشان يحاول إنجاح فكرة الدعوة في الطائف 👌
وحتى وهو مسافر لم يأخذ أحد من الصحابة الأقوياء زي حمزة أو عمر بن الخطاب،
عشان برده محدش ياخد باله،أخذ معاه زيد بن حارثة، وكان ساعتها اسمه زيد بن محمد،
فعادي لما واحد يخرج مع ابنه في مشوار🤷‍♀️
قعد رسول الله صلى الله عليه وسلم في الطريق حوالي يومين، لحد ما وصل للطائف.

يا ترى هيبتدي الدعوة إزاي وهيكون إيه ر

د فعل أهل الطائف،
ده إللي هنعرفه الجزء الجاي إن شاء الله😊



#Eman_Shalapy