الله صلى الله عليه وسلم بيحكيه الصحابي عبد الله بن مسعود:
إنه مرة كان يصلي عند البيت ، وأبو جهل ومعاه أصحاب له قاعدين، فقالوا لبعض:
مين يروح يجيب أمعاء البعير بتاع آل فلان إللي ذبحوه ويضعه على ظهر محمد وهو ساجد😈
فقام أشقاهم وجاب الأمعاء واول ما رسول الله سجد راح حاطه على ظهره بين كتفيه،
وقعدوا يضحكوا على رسول الله لدرجة إنهم قعدوا يتمايلوا على بعض من الضحك😑
بيقول عبد الله بن مسعود إن رسول الله ظل ساجد لحد ما جاءت فاطمة وشالت الأمعاء من على ظهره وأنا مكنتش قادر أعمل حاجة😔
فقام رسول الله وقال : اللهم عليك بقريش ..اللهم عليك بقريش..اللهم عليك بقريش🤲

☆طبعا الدعاء هنا كان على الناس إللي عملت كده مش على كل قريش👌

◇لو انتبهتم إن كل مرة بيؤذوا رسول الله كان بيبقى وهو بيصلي،
يعني هو بيطيع ربنا ولم يؤذي أحد ومع ذلك كان رسول الله بيتعرض للأذى وساعات القتل،
ومفكرش مرة إنه يقول خلاص أنا مش هروح أصلي عند المجالس بتاعتهم تاني،
وده يعلمنا إننا نثبت على الحق مهما كان الأذى، ونستمر في الدعوة مهما كانت الناس مش عاجبها👌
ويعلمنا كمان إن مش معنى إن ربنا بيسلط بعض الكفار والظلمة على المؤمنين فده لِهوَان المؤمنين عليهسبحانه،
ولا لأنه غير قادر إنه يمنع الأذى عنهم ولكنه سبحانه له حكم وتدابير لا يعلمها غيره😊

وده يخلينا نسأل سؤالين مهمين🤔
¤ليه ربنا يبتلي المؤمنين وعلى رأسهم رسوله وأحب الخلق إليه كده ويسلط عليهم الكفار 😥

¤والسؤال الثاني ليه المسلمين ورسول الله صبروا ومردوش على الكفار وحملوا السلاح ودافعوا عن أنفسهم😑

هنعرف الإجابة إن شاء الله الجزء الجاي ، وهنشوف بدايات الفرج للمسلمين بعد ثلاث سنوات من القهر والتعذيب👌


#Eman_Shalapy

#قصص_الأنبياء(٢)
#السيرة_النبوية
#الحلقة_التاسعة_عشرة
#حكمة_الله_في_ابتلاء_المؤمنين

وقفنا المرة إللي فاتت عند سؤالين مهمين الأول كان:
¤ليه ربنا يبتلي المؤمنين وعلى رأسهم رسوله وأحب الخلق إليه كده ويسلط عليهم الكفار ؟
ربنا له حكمة في كل حاجة بيعملها فهو من أسمائه الحكيم،
فاحنا مهما حاولنا نستنج الحكمة مش هنقدر نفهم ولا نحيط بالحكمة الكاملة، لكن نحاول نفهم بعض الحكم دي😉

في البداية لازم نفهم قاعدة مهمة جدا😁
رسول الله صلى الله عليه وسلم هو القدوة إللي يجب علينا كمسلمين على مر العصور إننا نتبعها،
طيب هنتبعه إزاي في موقف حصل لنا في حياتنا ولم يحصل لرسول الله🤨
عشان كده كان لازم رسول الله يمر بمتخلف المواقف عشان نعمل نفس إللي هو عمله،
فهنلاقي حياة رسول الله جمعت كل الابتلاءات إللي ممكن تحصل لأي إنسان،
عشان كده السيرة مش مجرد حكاية نسلي بها وقتنا ،
السيرة منهج حياة لازم نعرفه ونفهمه ونطلع منه الحكمة والعبرة عشان نقدر نطبقه في حياتنا👌
" لَقَدْ كَانَ لَكُمْ فِي رَسُول اللَّه أُسْوَة حَسَنَة لِمَنْ كَانَ يَرْجُو اللَّهَ وَالْيَوْمَ الْآخِر"

ودي مش حاجة اختيارية😅
لأ..ده واجب على كل مسلم إنه يعرف حياة رسوله عشان يفهم القرآن ويفهم الواقع بتاعه لأن كل الأحداث بتتكرر بالحرف👌
ممكن واحد من المسلمين يموت له ابن، فيشوف رسول الله اتصرف إزاي ويتصرف زيه💁‍♀️
ممكن واحد تاني ابتلاؤه إن بناته تطلق، هيلاقي إن رسول الله بناته اطلقت فيكون رد فعله زي رد فعل رسول الله صلى الله عليه وسلم،
ممكن واحد ثالث يكون ابتلاؤه في أذى الناس له سواء بالشتم أو محاولات القتل،
أو التشهير به أو مقاطعته أو الاعتداء عليه ، وكل ده حصل مع رسول الله وكان له تصرف مع كل موقف حسب وقته👌
يعني في وقت لما تعرض للإيذاء سكت،
ومرة ثانية رد ودعا على المشركين ومرة ثالثة هيطلب من شاعره بعدين إنه يرد على المشركين بنفس أسلوبهم،
فلازم نعرف امتى نتصرف في المواقف المختلفة في حياتنا زي رسول الله صلى الله عليه وسلم😊

◇يبقى أول سبب من حكمة ربنا في تعرض رسول الله للأذى والابتلاءات المختلفة هو إنه قدوة والناس يجب عليها إنها تقلده👌

◇السبب الثاني هو:
رفع درجاته في الجنة فيبتلى المرء على قدر دينه، وأكثر ناس دينهم كامل وإيمانهم قوى هم الأنبياء والرسل ،وأفضلهم أولي العزم وأفضل أولي العزم محمد صلى الله عليه وسلم😉

◇السبب الثالث هو :
إن الناس تطمئن إن الابتلاءات حصلت لأكرم الخلق على الله وأحبهم إليه،
يعني لما يحصل لواحد فينا ابتلاء هيطمن إن الابتلاء ده خير له وإنه مش بسبب إن ربنا غضبان عليه وإن الابتلاء علامة حب،
لأن ربنا ابتلى قبله سيد الخلق أجمعين ، فتهدأ وتطمئن نفس المؤمن😊

ده كان بالنسبة لرسول الله أما بالنسبة للمسلمين فالوضع هيختلف،
📌ربنا ابتلاهم بأذى الكفار لأسباب ثانية، أولا:
تنقية الصف المسلم،
وخصوصا إن في ناس عبيد لهواها تقول أيوة احنا عبيد لله وبنطيع أوامره ولما ييجي الأمر بعكس هواها تلاقيها رجعت وسابت الدين،
مفيش أسهل من أي واحد يقول أنا صدقت وآمنت بالله وبرسوله🤚
طيب إزاي الإنسان ده يبان صدقه من كذبه؟
إذا حصل البلاء والأذى من الكفار👌
هو إيه إللي يخلي واحد زي بلال ولا خباب يصبر على التعذيب والظلم والقهر ده كله😑
مش صدق الإيمان بالله،
لو هو واحد منافق يظهر الإيمان ومن جواه مخبي الكفر إيه إللي يخليه يستحمل العذاب،
هتلاقيه مع أول ابتلاء وأذى خلع🙃
وربنا قالها للمسلمين الأوائل:
"أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ*
وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الكاذِبين"
هتُفتن وتبتلى عشان تشوف نفسك إذا كنت صادق ولا كاذب👌
عارفين زي إيه ولله المثل الأعلى 🤔
لما يكون لك أصحاب وأهل متجمعين حواليكي وكل واحد بيقول لك كلام جميل وإنه في ظهرك وهيقف جنبك مهما حصل،
وأول ما تحصل لك مشكلة الكل يتخلى عنك ويبان إنهم كانوا كذابين مُدعين،
ده غير بقى إللي بيقعدوا يشمتوا فيكي 😑
وكما قيل:
جزى الله الشدائد عني كل خير...عرفتني عدوي من صديقي

تخيلي بقى في وسط إللي انتي فيه ده ولقيتي شخص واحد منهم هو إللي واقف جنبك وبيواسيكي ويساعدك مشاعرك وإحساسك هيبقى عامل إزاي😊
وهل مكانة الشخص ده في قلبك هتبقى زي مكانة الناس إللي تخلوا عنك؟
طبعا لأ🤷‍♀️
وهو ده بالضبط حال المؤمن الثابت رغم الابتلاءات وحال المنافق إللي بيبان مع أول اختبار بسيط،
فكان لازم التمحيص ده عشان إللي هيتبقى وهيثبت هو إللي هيقوم على أكتافه نشر الإسلام 👌

📌وده يودينا للسبب الثاني وهو التربية😊
ربنا يريد لأمة الإسلام إنها تقود العالمين، وعشان تقودهم لازم يكونوا على طراز مختلف من البشر، مفيش حاجة توقفهم ولا يخافوا من أي شيء،
وخصوصا إن التمكين درجة الأنبياء ولا يكون التمكين إلا بعد المحنة💁‍♀️
فاللي يصبر ربنا هيمكّن له 👌
والابتلا

ء برنامج تدريبي يرفع مستوى الإيمان في القلب يوم عن يوم،
زي الذهب كده لما الناس بتستخرجه من الأرض مش بيعرضوه للنار ويمر بمراحل تنقية عشان يطلع الذهب اللامع إللي شكله حلو ده😉
فالمسلم الصادق بيخرج من الابتلاء أقوى وأعظم💪🏻

📌السبب الثالث هو تطهير النفس من الذنوب ورفع درجتها في الجنة،
تخيلوا لما الشوكة تُكَفّر عن المؤمن خطاياه فما بالكم بالضرب والحبس والتعذيب والقتل؟
الابتلاء بيطهر الانسان من الذنوب وطول ما في ذنوب لن ينتصر المسلمون ،
وربنا هيسلط عليهم من يكفر الذنوب دي،
فسنة كونية إن الإنسان لن يُمَكّن وربنا ينصره على أعدائه حتى يُبتلى👌
ده غير طبعا إن الابتلاء ده درس عملي من دروس التوحيد والإيمان والتوكل على الله😀
لأن الإنسان بيعرف بطريقة عملية إنه ضعيف ملوش أي قوة إلا بالله، وملوش ناصر غيره سبحانه،
فيتوكل على الله التوكل التام فيستحق لقب المؤمن إللي ربنا يُمكن له في الأرض😊

¤أظن الكلام لحد هنا مقنع 😅
لكن السؤال المُحيّر بقى 🤔
ليه المسلمين ورسول الله صبروا وتحملوا الألم ومردوش على الكفار وحملوا السلاح مثلا ودافعوا عن أنفسهم ولا حتى قاموا عملوا ثورة على الظلم ده 🤨

ربنا قال لرسوله مع بداية الجهر بالدعوة إنه يعلن الدعوة ويعرض عن المشركين،
لا يرد عليهم بقتال ولا يصطدم معاهم حتى لو حصل أذى حتى لو حصل إهانة وذل حتى لو حصل قتل 👌
"فَاصْدَعْ بِمَا تُؤْمَرُ وَأَعْرِضْ عَنِ الْمُشْرِكِينَ"
ليه طيب كده😳
♡أولا :
ربنا يريد إنه يعلّم المسلمين العرب الأوائل نوع جديد من الصبر،
هم بطبيعتهم كانوا يقدروا يصبروا على الجوع والحر والفقر والحروب وطول السفر و...و...
لكن الحاجة الوحيدة إللي مكنوش يقدروا عليها هي الصبر على تحمل الظلم👌
طبيعته ثائرة مترضاش الظلم، معندوش أي مانع إنه يثور ضد ظالمه ويقتل💁‍♀️
لكن دلوقتي الإسلام له أبعاد ثانية غير إن الواحد يبص لمصلحته الشخصية،
احنا محتاجين ناس تقيم دولة فتخيلوا القلة دي لو كل واحد ثار عشان يدفع الظلم عن نفسه وقُتل😶
مش هيبقى في ناس تقيم دولة الإسلام ولا تنشره،
الموت في سبيل الله حاجة جميلة لكن لو كلنا متنا مين إللي هينشر الإسلام🤷‍♀️
وفي كارثة تانية تخيلوا لو كل واحد ثار على إللي كان بيعذبه وممكن يقتله،
كانت هيؤدي لسمعة سيئة جدا للإسلام، ليه؟
لأن إللي كان بيعذب المسلمين هم أهلهم، كل واحد كان بيأخذ إللي أسلم من قبيلته ويعذبه😕
زي عثمان بن عفان مثلا إللي كان بيعذبه عمه ، فلما كل واحد يثور ويقتل أهله الوضع هيكون إيه،
والكفار بيقولوا أصلا من غير حاجة إن الإسلام بيفرق بين الرجل وابنه والرجل وزوجته والرجل وعشيرته😶
فربنا بيعلمهم وبيعلمنا برده تقديم مصلحة الأمة على مصلحتي الشخصية،
مش أهم حاجة《 أنا 》أحقق مصلحتي وخلاص ومش مهم أي حد تاني ،
الإسلام رباهم على إلغاء حتة ال《أنا》 دي،
واحنا لو ملغينهاش هنفضل زي ماحنا 😑

♡ثانيا : ودي مهمة وخدوا بالكم منها👌

تربية المسلمين على الطاعة المطلقة والتامة لله ولرسوله،
لأن الاختبار الحقيقي للطاعة هو أن يطيع المسلم بدون جدل واعتراض حتى في المشاعر😊
المشاعر إللي بتثور وتغلي بسبب الإحساس بالظلم والقهر ،
وإللي الإنسان مش بيبقى قادر يتحكم فيها،
ربنا ربى الصحابة إنهم حتى يتحكموا في مشاعرهم وتبقى مقيدة بطاعة الله ورسوله👌
فاكرين لما خباب بن الأرت راح لرسول الله وهو مشاعره كلها ألم واحساس بالظلم والقهر وطلب من رسول الله إنه يدعو الله بتعجيل النصر ،
وهو كان شايف إن هي دي المصلحة دلوقتي ورسول الله غضب وقال له إنكم قوم تستعجلون ،
خباب سمع أطاع ومعترضش واتحكم بمشاعره وقيدها بطاعة الله ورسوله،
والمشاعر دي مهما حاولنا نتخليها مش هنقدر نحس بالألم إللي هو كان حاسس بيه ساعتها من شدة التعذيب والظلم والقهر😔
ومع ذلك حتى مقلش لرسول الله طيب بس ادعي بس يا رسول الله ، حاجة تهون بها علي إللي أنا فيه ده😞
لأ...ده أخذ الكلام ورضي وصبر 👌
هنشوف إن شاء الله في صلح الحديبية لما عمر بن الخطاب غلبته مشاعره واعترض على أمر رسول الله بسبب الظلم والقهر إللي كان شايفه بيحصل قصاده،
ومع ذلك رسول الله قال له أنا عارف أنا بعمل إيه ولا أعصي الله،
وأبو بكر الصديق قال له إلزم غرس رسول الله، يعني منين ما يحط رجله حط رجلك،
فرضي عمر وهِدي وبعدين قال إنه قعد يعمل أعمال خير كثيرة عشان يكفر اعتراضه على رسول الله بسبب مشاعره إللي هي تعتبر طبيعية👌
وهو ده الفرق بيننا وبينهم، هم عندهم الله ورسوله مقدمين حتى على مشاعرهم،
وهنا يبان قول رسول الله صلى الله عليه وسلم:
"لا يؤمن أحدكم حتى يكون الله ورسوله أحب إليه مما سواهما"
والحب مش مجرد مشاعر الإنسان يحس بها ولا كلمات يقولها،
الحب اتباع لمنهج الله ورسوله في كل شيء حتى في المشاعر 👌
"لا يؤمن أحدكم حتى يكون هواهُ تَبَعا لما جئتُ به"

عشان كده الصحابة سادوا الدنيا زي ما هنشوف وأخذوا مكانة أفضل من مشى على الأرض بعد الأنبياء،
إللي عايز يبقى في مكانتهم ويوصل للنهاية إلل

ي وصلوا لها لازم يمشي في نفس الطريق بتاعهم إللي مشيوا فيه،
غير كده هيضيع 🤚
"وَأَنَّ هَذَا صِرَاطِي مُسْتَقِيمًا فَاتَّبِعُوهُ وَلا تَتَّبِعُوا السُّبُلَ فَتَفَرَّقَ بِكُمْ عَنْ سَبِيلِهِ ذَلِكُمْ وَصَّاكُمْ بِهِ لَعَلَّكُمْ تَتَّقُونَ "

♡ثالثا:
في سنن كونية.. زي إللي بيقع في مياه عميقة وهو ميعرفش يعوم هيغرق،
ومن السنن الكونية إن الباطل له قوة فمينفعش للمسلمين إنهم يقولوا ربنا معانا واحنا على الحق ويدخلوا حرب خاسرة تقضي عليهم 🙃
أيوة جند الله هم الغالبون، لكن الإسلام دين واقعي عملي،
مش مبني على مشاعر البشر المتقلبة💁‍♀️
يشوف قوة العدو واحنا قوتنا أد إيه ونحط الخطط المناسبة عشان نقدر نحقق النصر👌
يعني باختصار نأخذ بالأسباب مع التوكل على الله،
فلو دلوقتي المسلمين قاموا وكلهم ثاروا وهم قلة مستضعفة معندهمش أي امكانيات نهائي ..ممكن يقتلوا واحد ولا اثنين ولا حتى مائة من كفار مكة،
لكن في المقابل هيتم إبادتهم جميعا، زي ما قلنا من شوية😅

ده غير إن القتال مكنش ضروري أوي لأن الغاية مكنتش حكم مكة، الغاية كانت نشر الإسلام في مكة،
هي الدعوة أه ماشية بمشقة وبطلوع الروح ..بس ماشية😅
بعكس لو اتفرضت فرض بالقوة على ناس أصلا العزة والشرف والعلو في دمهم،
محدش هيقبل بالدعوة ولا حتى هيسمعوا لها وهيعاندوا أكثر لو حصل صِدام بينهم وبين المسلمين،
ده هم أصلا من أسباب معاندتهم اتباع دين الإسلام ضعف المسلمين😏

☆وده يعلمنا إننا لما نيجي ندعي حد نشوف نفسية الشخص ده إيه،
هل هو من النوع إللي بيتأثر أكثر بمظاهر الرحمة فيّ ،
فأزود منها عشان ألين قلبه، ولا من النوع إللي بيتأثر لو شاف مني ذكاء ولا قوة،
ولا من النوع إللي بيتأثر لو شاف مني لطف وأدب في الحوار وهكذا 😉

♡رابعا:
من حكمة ربنا في إعراض المسلمين عن المشركين وميكونش في صِدام،
إن ربنا يعلم إن في ناس من كبار المشركين ومن أشدهم على المسلمين هيؤمنوا،
وهيتأثروا بثبات المسلمين برغم كل الشدائد والصعوبات 👌
ده غير إن تعرض المسلمين للظلم هيكون سبب في تحرك بعض المشركين لنصرتهم زي ما هنشوف بعدين في قصة الحصار في شعب أبي طالب،
وكمان سبب في إسلام واحد من أبطال المسلمين حمية للظلم إللي وقع على رسول الله صلى الله عليه وسلم😊

احنا دلوقتي لسه في السنة السادسة من البعثة،
والمشركين عمالين يعذبوا في المسلمين ويعتدوا على رسول الله صلى الله عليه وسلم،
وأعداد المسلمين بتزيد وكانوا يخفون إسلامهم ،لكن كده هيبدأوا يظهروا والمشركين يعرفوهم😕
ففي نفس الوقت إللي احنا مش عايزينهم يظهروا فيه عشان ميتعذبوش،
عايزين نخفف عن الناس إللي بتتعذب دي وفي نفس الوقت مش هينفع حرب أو إنهم يدافعوا عن نفسهم😑

احنا عايزين حل عملي ينفع مع المستضعفين دول وغيرهم من الناس إللي هتيجي في المستقبل🤔
هو ربنا كان ممكن ينقذ رسوله والمؤمنين بكلمة 《كن》
لكن دي مش سنة التغيير ، رسول الله بيعلمنا الأخذ بالأسباب إللي نقدر عليها،
عشان محدش بعدين ييجي يقول أصل ده رسول الله ومعاه المعجزات🙄
هنا مفيش معجزات ...كلها أسباب بشرية نقدر نعملها😉

فالحل كان إنهم يشوفوا مكان تاني برة مكة يهاجروا له عشان يعبدوا الله فيها بدون تعذيب أو تهديد بالقتل👌

يعني هيسيبوا أهلهم ووطنهم والأماكن إللي عاشوا فيها عمرهم وأموالهم وتجارتهم و....و...
وده مش قرار سهل ، احنا دايما نسمع إن المسلمين هاجروا ونعدي الموضوع وأهه كلمة بتتقال😞

متخيلين واحد يسيب حياته المستقرة في بلده إالي بيحبها وكان عايش فيها مرتاح عشان بس قضية الدين😐
يعني هم مش هيسيبوا البلد عشان يروحوا يشتغلوا ويحسنوا مستوى المعيشة بتاعهم مثلا،
ولا هيروحوا بلد أعظم رفاهية فالموضوع كان هيبقى سهل عليهم،
لكن دول هيسافروا للمجهول، يا ترى هيلاقوا شغل ولا لأ، ياترى البلد إللي هيروحوه ده حر ولا برد يا ترى...يا ترى...

☆ودي حاجة جديدة الإسلام بيعلمها للصحابة وبيعلمها لنا،
إن أرض الله واسعة، وإن أعظم قطعة في الأرض هي إللي نقدر نعبد ربنا فيها👌
يعني احنا مش بنفضّل أرض على أرض بالأنهار والأشجار والعشيرة ،
لكن هل نقدر نعبد فيها الله بدون أذى ولا لأ،
فهم هيسيبوا أشرف بقعة على الأرض وهي مكة ويروحوا مكان تاني بس عشان يعرفوا يعبدوا ربنا😊

رسول الله صلى الله عليه وسلم أمر بعض أصحابه بالهجرة للحبشة،
والحبشة بعيدة جدا عن مكة واللغة مختلفة تماما عن لغة العرب🤨
ليه رسول الله اختار الحبشة بالذات؟
هو لخص الموضوع كله في كلمتين:
إن فيها ملك لا يُظلم عنده أحد 👌
مين هو الملك ده واشمعنى رسول الله ذكر صفة العدل وإنه غير ظالم؟
ومين الشخصيتين إللي هيسلموا ويقلبوا الموازين لصالح المسلمين في مكة 😊
ده إللي هنعرفه الجزء الجاي إن شاء الله😁


#Eman_Shalapy

#قصص_الأنبياء(٢)
#السيرة_النبوية
#الحلقة_العشرون
#الهجرة_الأولى_للحبشة
#إسلام_حمزة_بن_عبد_المطلب

اتكلمنا المرة إللي فاتت عن تزايد تعذيب الكفار للمسلمين عشان يرجعوا عن الإسلام،
لكن رسول الله فكر في فكرة عشان يحافظ بها على دعوة الإسلام من إن المشركين يقضوا عليها سواء بقتلهم للمسلمين أو تعذيبهم لحد ما يرجعوا عن الدين،
أو التكتيم الإعلامي إللي عملوه عشان محدش يعرف من خارج مكة أي حاجة عن الإسلام،
لدرجة إن أي أحد ييجي من خارج مكة سمع عن رسول الله صلى الله عليه وسلم وبيسأل مجرد سؤال،
حب استطلاع يعني😅 يضربوه😶
فكان لازم يكون في حل أو فكرة ننقذ بها دعوة الإسلام،
والفكرة كانت إنه يسمح لبعض المسلمين للهجرة خارج مكة👌
فالهدف الأساسي من الهجرة كان الحفاظ على دعوة الإسلام، مش الحفاظ على حياة الأفراد،
ومش معنى كده إن حياتهم مش مهمة..لأ طبعا مهمة لكن مقارنة بحفظ الدين ونشره فالدين هو رقم واحد👌

والدليل على كده إن رسول الله مطلبش من المستضعفين إنهم يهاجروا زي بلال وخباب إللي كانوا بيتعذبوا🤷‍♀️
لكن طلب من القرشيين إللي عندهم منعة في قومهم إنهم يهاجروا👌
فلو كان السبب الرئيسي هو مجرد الحفاظ على الأرواح فقط كان الأولى هو خروج المستضعفين إللي معندهمش منعة في مكة 😉
ده غير كده هجرة المسلمين من أشراف مكة بالذات لها أهداف تانية مهمة 🤭
رسول الله صلى الله عليه وسلم كان ذكي مكنش مجرد بشر ينزل له الوحي ويبلغ وخلاص،
لأ..ده كان بيفكر وبيأخذ بالأسباب الدنيوية والوحي يؤيده👌
فهو طلب من الأشراف الهجرة عشان أولا:
لما الناس دي تهاجر ممكن أهل مكة يطاردوهم،
فلو طاردوهم ومسكوهم مش هيقدروا يقتلوهم عشان هيخافوا من قبائلهم 💁‍♀️
فأقصى حاجة هيعملوها إنهم هيرجعوا المهاجرين لمكة،
لكن تخيلوا لو كان المهاجرين من العبيد كان إيه إللي كان ممكن يحصل لهم 🙊
كانوا هيقتلوهم بدون أي تردد ماهم ملهمش حد يدافع عنهم🤷‍♀️
ثانيا:
الأشراف يقدروا يؤثروا في أهل البلد إللي هيهاجروا لها
لأن من طبيعة البشر إنهم يسمعوا للشخص ذو المكانة والشرف وعنده مركز،
بعكس لو اتكلم شخص ضعيف محدش هينتبه له،
زي مثلا لما المرأة بتتكلم مع زوجها في موضوع مهم وجاء ابنها الصغير عايز يشارك في الحوار ويقول رأيه،
المرأة هتسمع لرأي زوجها ولا رأي ابنها😅
أكيد هتسمع كلام زوجها، مع إن سبحان الله ساعات ربنا بينطق الحق والرأي السديد على لسان الأطفال أو الضعفاء بصفة عامة👌
فالغرض أصلا هو توصيل الدعوة للبلد إللي هيرحوه،
فأكيد الوضع هيكون مختلف لما يكون الاشراف هم المهاجرين👌
لأن البلد هتكون كأنها استضافت وفد سياسي محترم معارض لسياسة مكة،
غير لما تستضيف من وجهة نظرهم مجموعة من العبيد الهاربين من اسيادهم🙃

ثالثا:
لما الأشراف دول يهاجروا ده هيعمل هزة اجتماعية في مجتمع مكة ويخلي الناس تتعاطف معاهم ...يعني أحسن ناس هم إللي سابوا البلد وإللي كانوا بيسعوا لإصلاحها،
ويبدأوا يفكروا هم بيحصل فيهم كده ليه،
عشان بس عايزين يصلحوا ويعبدوا الله..إزاي نرضى نعمل في الناس دي كده😞
عارفين زي إيه👌
زي لما شاب يكون عليه مظاهر الصلاح والناس بتشهد له بالخير ويتسلط عليه ظالم يعذبه أو يقتله ،
الناس هيكون رد فعلها إيه؟
مش هتتعاطف معاه وتتأثر وتبدأ تفكر في الظلم وإزاي يتعمل في خيرة شبابها كده👌
بعكس لو شاب بيشرب ولا شاب مفسد في الأرض لو اتقتل حد هينتبه له أصلا 😑
ففي المواقف دي يبدأ العقل يشتغل والعقل لما يشتغل بيشوف الحقيقة👌
فرسول الله كان بيشتغل على تحريك مشاعر أهل مكة من المشركين وعواطفهم لعل قلوبهم ترق ويبدأوا ياخدوا خطوات إيجابية 👌
لكن لو كان العبيد هم إللي خرجوا كان أهل مكة هيقولوا عادي يعني نجيب غيرهم🙄

لكن ممكن حد يسأل اشمعنى الحبشة بالذات 🤨
رسول الله اختار مدينة الحبشة بالذات مع إنها بعيدة عن أرض مكة،
وهيبقى التواصل صعب جدا بين رسول الله وبين المهاجرين من المسلمين، هو إن حاكم الحبشة كان لا يْظلم عنده أحد👌
زي ما هنشوف مثال على عدله بعدين😉

فكرة الهجرة دي تحديدا كانت بعد حوالي سنتين ونصف من مرحلة الجهر بالدعوة،🤔
يعني كانت في رجب من السنة الخامسة للبعثة،
وكانت دي بداية الفرج للمسلمين مع إنه كان فرج بسيط ومكنش لكل المسلمين😅

وفي أسباب تانية خلت رسول الله يختار الحبشة بالذات عن غيرها من الأماكن 😉
منها : إنها بعيدة عن المشركين... بين مكة وبين الحبشة بحر فمش هيقدروا يطاردوهم المسافة الطويلة دي🤷‍♀️
وحتى لو حصل وطاردوهم فملك الحبشة ملك عادل مش هيسلم المسلمين لقريش، بالرغم من إن في صحوبية تجمع بين أشراف مكة وبين ملك الحبشة👌
بعكس الدول العربية...أقصد القبائل العربية😅
لو المسلمين راحوا في أي قبيلة من القبائل دي مع إنها قريبة ونفس اللغة ونفس البيئة فمش هيبقى صعب إنهم يتكيفوا فيها لأنها مشابهة لأجواء مكة💁‍♀️
لكن المشكلة إن لو أهل مكة طلبوا من القبائل دي تسليم المسلمين هيسلموهم تسليم أهالي عادي جدا🤓
أمال يعني يخسروا علاق

اتهم الاستراتيجية مع أهل مكة بسبب مجموعة من المفسدين في الأرض،
فارقوا دين الأباء والأجداد وقال إيه عايزين ينشروا الإصلاح في الأرض 😏
ولو المسلمين راحوا اليمن مثلا فهي تحت حكم الفرس والفرس مجوس مشركين هم كمان فأكيد هيسلموا المسلمين لأهل مكة،
ده إذا الفرس نفسهم مقتلوش المسلمين أصلا😶

◇وكمان الحبشة كان بلد تجاري واقتصادهم قوي ،
فمش هيحصل أزمة للبلد دي بسبب لجوء المهاجرين لها وبكده أهل البلد نفسهم مش هيعملوا مشاكل مع ملك الحبشة ويطلبوا منه إنه يطرد الناس دي👌

◇ده غير إن الحبشة بلد مستقل يعني هي سيدة قرارها محدش بيعطيها معونات مثلا ولا حاجة ،فمفيش خطورة إن بلد تانية تجبرها على قرار هي مش عايزاه🤷‍♀️
شوفتم رسول الله كان بيدرس كل التفاصيل بدقة متناهيةإزاي وبيخطط ويرتب ويدرس الأحوال السياسية والاقتصادية،
أصل هو المسؤول عن أصحابه وهو القائد فلازم يبذل الأسباب إللي تؤمن حياة أتباعه👌

☆معلومة عن إزاي الفرس حكمت اليمن 😉
فاكرين لما الأحباش كانوا حاكمين اليمن وبعدين أبرهة جاء عشان يهدم الكعبة وقُتل هو وجيشه،
أبرهة كان سايب ابنه يحكم اليمن على ما يرجع، فكان في واحد من أهل اليمن الأصليين اسمه 《سيف بن ذي يزن》عايز يسترجع ملك اليمن من الأحباش، ملك آبائه وأجداده
فراح استعان بكسرى في قصة طويلة ملخصها إن كسرى أرسل مع سيف بن ذي يزن جيش من المساجين فحاربوا معاه وانتصروا على الأحباش،
وبدل ما يرجعوا ملك اليمن لسيف بن ذي يزن حكموه هم وبقت اليمن تحت الحكم الفارسي 😅
وكان حاكم اليمن من الفرس في زمن رسول الله صلى عليه وسلم اسمه 《باذان》خليكم فاكرين الاسم عشان هيكون له معانا قصة بعدين😉

أخبر رسول الله صلى الله عليه وسلم أصحابه بأمر الهجرة فخرج للحبشة حوالي اثنا عشر رجل وامرأتين،
منهم عثمان بن عفان وزوجته رقية بنت رسول الله صلى الله عليه وسلم،
كان تزوجها بعد ما ابن أبو لهب طلقها 👌
فلما خرجوا عشان يركبوا البحر سادات مكة عرفوا وبعثوا وراهم ناس عشان ترجعهم،
لكن لما وصلوا كان المسلمين خلاص أبحروا فمقدروش يوصلوا لهم وهاجروا بسلام😊
طبعا استمر أذى المشركين وتعذيبهم للصحابة، يعني الحاجات إللي قلناها قبل كده من التعذيب كانت مستمرة مش بتقف ،
حتى إهانة المشركين لرسول الله صلى الله عليه وسلم مكنتش بتقف 😑
لحد ما جاءت السنة السادسة للهجرة.. في يوم من الأيام ورسول الله عند جبل الصفا عدى عليه أبو جهل وهو لوحده فقعد يشتم في رسول الله شتيمة جامدة😞
ورسول الله لا يرد عليه ، فاتغر ابو جهل بحلم رسول الله وتجرأ أخذ حجر وقذف به رأس رسول الله فالحجر فتح رأسه عليه الصلاة والسلام😥
ومشي أبو جهل وراح لأصحابه عند الكعبة يحكي لهم إللي حصل ويتفاخر بانتصاره على رسول الله😑
ورجع رسول الله إلى بيته...

☆طبعا أنا مش هتكلم عن المشاعر إللي كان حاسس بها رسول الله بعد الموقف ده😞
لكن تخيلوا هو اتحمل أد إيه في سبيل الدعوة ..واحنا لمجرد حد يقول لنا كلمة ولا كلمتين نفسيتنا تتعب و نقول خلاص مش هندعي حد تاني 😞

كان شاف الموقف ده مولاة من الموالي ، والمولاة هي الأمة المحررة ،
☆شوفتم وما يعلم جنود ربك إلا هو 👌
وهي ماشية قابلت رجل هو من سادات مكة الأقوياء ومن قوته أنه كان بيخرج للصيد والقنص وكان بيصطاد الأسود😳
فكان راجع لسه من الصيد وهو حاطط قوسه على ظهره ،
ومكنش يروح البيت لما يرجع من الصيد إلا لما يطوف بالكعبة ،
وكان يقابل الناس ويسلم عليهم ويكلمهم وهو بيطوف ،
وكانت شخصيته قوية والناس بتهابه👌
فالمرأة دي قالت له:
لو شفت إللي حصل من شوية لابن أخوك محمد من أبي الحكم عمرو بن هشام 😏
كان هنا وشتمه وضربه...ومحمد سابه ومشي😒
كان العم ده هو حمزة بن عبد المطلب، ومش بس عم ده كان أخوه من الرضاعة،
فغضب حمزة جدا ومشي ناحية الكعبة في المكان إللي بيقعد فيه أبو جهل ،
وماشي مش بيكلم حد ووشه غضبان والناس شايفاه ..ياترى في إيه مش من عوايده كده😳
فضل ماشي لحد ما وصل عند ابو جهل وهو وسط أصحابه وأبو جهل شايفه جاي من بعيد ومتوقع بقى إنه جاي يسلم عليه زي ما بيعمل ☺
فلسه هيتكلم راح حمزة ماسك القوس بتاعه ومديله على دماغه فاتحها له أكثر مما عمل مع رسول الله 😈
☆أحسن يستاهل 😀
وحمزة لسه مش حاسس إنه انتقم لابن اخوه ولسه مشاعره مهديتش😠
فحب إنه يكيد أبو جهل ويغيظه ويحرق دمه راح قايل له:
إنت بتشتم محمد وأنا على دينه وبقول إللي بيقوله..رد علي كده لو تقدر 😡
أبو جهل كان قاعد وسط قبيلته وأصحابه وهو من قبيلة بني مخزوم القوية المسؤولة عن التخطيط للحروب ،
وحمزة من قبيلة بني هاشم القوية برده وليهم شرفهم بين الناس،
فكده ممكن تقوم حرب😮
فأصحاب أبو جهل قاموا عايزين ينتقموا من حمزة فقال لهم أبو جهل:
سيبوا أبا عمارة فأنا الغلطان ...أنا فعلا شتمت ابن أخوه وأذيته جدا😅
فسابه حمزة ورجع لبيته...وبعدين حصلت الصدمة 😳
أنا مش على دين محمد 😱
أنا إزاي قلت كده😳
وقعد طول الليل يفكر مش عارف يعمل إيه😨
هل يروح ويقول لهم إنه كذب و

إنه مش على دين محمد وده عيب جدا عندهم،
ولا يروح ويرجع في كلامه ويقول إنه ساب الدين ولا يدخل في الدين وخلاص😵
فدعا😊
دعا الله بصدق : يارب لو دين محمد ده حق فاجعل تصديقه في قلبي، يعني خليني مؤمن،
ولو مش حق طلعني من الورطة دي😔
فوقع تصديق الإسلام في قلب حمزة واطمان له وراح تاني يوم لرسول الله صلى الله عليه وسلم يعلن إسلامه😊

☆طبعا مش هقول لكم على فرحة رسول الله كانت عاملة إزاي 😅
إنتم حطوا نفسكم مكانه هتحسوا إن شاء الله بالسعادة إللي هو حس بيها 😊
وطبعا قريش قللت من أذاها لرسول الله بسبب إسلام حمزة 👌
شوفتم إزاي إن الإنسان ممكن يكره شيء يحصل له لكن في النهاية هو خير💁‍♀️
رسول الله مكنش عارف إن الموقف المؤلم إللي حصل له ده هيكون سبب في سعادة له مكنش متوقعها أبدا 👌
ماهو بشر لا يعلم الغيب إلا لو ربنا قال له 😉
فكم في حياتنا من مواقف تضايقنا وتألمنا من بدايتها لكن العاقبة كانت خير😊
فأبشروا 😁
رُبّ أَمرٍ تَتّقِيهِ.... جَرّ أَمرًا تَرتَجِيهِ
خَفِيَ المحبوب منه... وبَدَا المَكرُوهُ فيهِ😉

بعد إسلام حمزة بثلاثة أيام فقط حصلت حادثة قلبت كل موازين القوى في مكة وهيكون لها الأثر على مدى التاريخ كله😍

ياترى إيه إللي حصل 😁
هنعرف الجزء الجاي إن شاء الله😊



#Eman_Shalapy

#قصص_الأنبياء(٢)
#السيرة_النبوية
#الحلقة_الحادية_والعشرون
#إسلام_عمر_بن_الخطاب

كنا واقفين المرة إللي فاتت عند إسلام حمزة بن عبد المطلب عم رسول الله صلى الله عليه وسلم وأخوه من الرضاعة،
وكان إسلامه في السنة السادسة من البعثة،
قبل ما نعرف إيه إللي حصل بعد إسلامه بثلاثة أيام تقريبا،
هنرجع بالزمن شوية حوالي ثمانية أشهر كده تقريبا أو أكثر😉
احنا عارفين إن المشركين كانوا بيؤذوا المسلمين سواء المستضعفين أو السادة كل واحد على حسب مكانته،
فكان من إللي قريش آذتهم أبو بكر الصديق صاحب رسول الله ،
فهو كان من الناس إللي جهرت بإسلامها بعد رسول الله وكان الناس كلهم عارفين،
كانت قريش بتؤذي أبو بكر سواء بالكلام أو حتى ساعات بالضرب،
حتى يُروى إنه في يوم من الأيام كان بيدعو الناس عند الكعبة، فقام الكفار وقعدوا يضربوه لحد ما وقع في الأرض مُغمى عليه،
ومش يسيبوه بقى 😑
ده قعدوا يدوسوا عليه ومحدش قدر ينقذه منهم إلا عشيرته بنو تميم،
وأخذوه وهو مُغمى عليه وكانوا متأكدين إنه خلاص بيموت لدرجة إن عشيرته هددوا كفار قريش إن لو مات أبو بكر مش هيسيبوهم👌
فأخذوه ورجّعوه لبيته عند أمه😥
تخيلوا لما أم ابنها يرجع لها بالمنظر ده إحساسها هيبقى إيه😶
ومع ذلك أبو بكر مسبش الدعوة إلى الله👌
عارفين لو كان أبو بكر في عصرنا دلوقتي وعمل كده هيطلع لنا كائنات لزجة تقول 🤓:
هو إللي غلطان إيه إللي وداه هناك 🙄
احنا لو مشينا بالمنطق ده لا حد هيأمر بمعروف ولا حد هينهى عن المنكر بسبب إن كل واحد خايف من الناس وخايف على حياته😑
وده الفرق بيننا وبين الصحابة...الصحابة كانوا بيبذلوا أرواحهم في سبيل تبليغ الدعوة ونشر الإسلام مكنش بيهمهم أي حاجة 👌
لما اشتد الأذى على المسلمين ورسول الله أمر الصحابة بالهجرة للحبشة خرج أبو بكر مهاجر للحبشة وبعد ما سافر مسافة يوم أو يومين قابل واحد اسمه 《ابن الدّغِنّة》 من أشراف العرب،
فقال لأبي بكر :
إنت رايح فين 🤔
فقال له أبو بكر: مهاجر للحبشة أعبد ربي .. لأن قومي أخرجني وآذوني 😞

☆مع إن أبو بكر في السنة دي اتولد له بنت صغيرة اسمها عائشة من زوجته أم رومان ومع ذلك برده خرج للهجرة،
مع إن الإنسان بطبيعته هيكون قلقان على زوجته وبنته الصغيرة وهو خارج مش عارف هيرجع امتى 😓

المهم ابن الدغنة قال له : ليه 😳
إنت إللي زيك ميخرجش😤
إنت رجل بتُحسن لأقاربك بالمال أو الخدمة وغيرها،
وإنت صادق في كلامك عمرك ما كنت بتكذب، وكنت بتساعد الضعيف واليتيم وصاحب العيال الفقير،
وكمان كنت بتكرم ضيوفك وأي حاجة فيها خير مكنتش بتتأخر عنها👌
فارجع لمكة وأنا سأجيرك من قريش ، يعني هتبقى تحت حمايتي👌

☆فاكرييييين دي صفات مين 🙊
نفس الصفات إللي خديجة زوجة رسول الله صلى الله عليه وسلم قالتها له يوم ما رجع من الغار خايف😉
شوفتم الشبه إللي بين أخلاق رسول الله وأخلاق أبي بكر 😊

رجع أبو بكر الصديق لمكة مع ابن الدغنة وراح عند الكعبة ووقف بين سادات قريش وقال لهم :
أنا سأُجير أبا بكر😤
إزاي تخرجوا رجل بيساعد المظلوم والفقير ويكرم الضيف و....و...😡
فرجع أبو بكر لبيته وبدأ يصلي ويقرأ القرآن في حوش بيته،
وكان ابو بكر مبيقدرش يمسك دموعه لما يقرأ القرآن ،
من أول ما يقرأ الفاتحة يبكي😕
فكان يقرأ ويصلي ويبكي والنساء والأطفال يعدوا عليه، ولما يشوفوه كده كانوا يقفوا يشوفوا إيه ده...رجل يقرأ ويبكي 🤨
وطبعا إن رجل يبكي ده كان حاجة غريبة بالنسبة لهم😅
لأن رجال مكة معروفين بالشدة والغلظة والقوة ،
فإزاي رجل يبكي كده😮
طبعا سادات مكة مش عاجبها الوضع،
النساء والأطفال هيُفتنوا بأبي بكر كده ومش بعيد يدخلوا الإسلام😶
راحوا لابن الدغنة قالوا له :
شوف صاحبك😑
يا إما تخليه يصلي داخل بيته يا إما يرد عليك جوارك لأننا مش هنسكت😤
فراح ابن الدغنة لأبي بكر وقال له :
إن سادات مكة اشتكوا...فإما تصلي داخل بيتك أو ترد على جِوَاري،
لأني محبش إن الناس تسمع إن في حد نقض جِوَاري 😥

☆وكان موضوع الجوار أو الحماية ده عندهم عظيم جدا👌

فقال له أبو بكر: لأ...أنا هرجع لك جوارك وحمايتك وهرضى بجوار الله، وطبعا الناس ما صدقوا وبدأوا يؤذوه تاني😑

☆في ناس ممكن تستغرب هو ليه ابو بكر بيعمل كده،
ما يعبد ربنا وخلاص في بيته لازم مشاكل يعني😞

شوفوا الكفار مش هيرضوا ولا يهدأوا غير لما المسلمين يرجعوا عن دينهم،
فلو جوه ولا برة مش هيسيبوه...كده كده هيؤذوه🤷‍♀️
فخلاص بقى مادام كده كده هم هيؤذوني يبقى أعمل إللي أنا عايزه💁‍♀️
من باب:
إذا ضَربتَ فأوْجِع فإن العاقبة واحدة😈
وفي نقطة كمان 👌
إن إللي قصادك بيشوفك لما يضغط عليك هتعمل إيه،
هل هتضعف وتعمل إللي هو عايزه ولا هتقف وتقاوم😀
لو الإنسان ضعف من البداية وتنازل ...خلاااص سلسلة التنازلات اتفتحت مش هيقدر يرجع 👌
لكن لو من أول خطوة كده ثبت على مبدأه وكمان يزود بحاجات تانية بالعند فيهم،
هم إللي هيتراجعوا أو على الأقل مش هيطلبوا تنازلات تانية 💁‍♀️
يعني كأنه بيقول : مش عاجبك كذا خل

اص خذوا ده وده وده😈
فيبدأ التفاوض عالجديد ويسيب إللي كان عايزه مننا أصلا😅
فهو ده إللي أبو بكر عمله هم كانوا بيؤذوه عشان يسيب الإسلام...طيب أنا مش هسيبه وهطلع أصلي برة البيت وهروح أدعو الناس عند الكعبة😀
فاتحولت المفاوضات من إنه يسيب الإسلام لإنه يعبد ربه داخل بيته 💁‍♀️

☆اتعلموا بقى من أبي بكر الصديق 😁
لما حد يضغط عليكم في حاجة غلط اثبتوا ومتضعفوش💪🏻 وبالعكس كمان زودوا إنتم من طلباتكم هتلاقوا الناس بدأت تتراجع عن الضغط ده😈
وخير وسيلة للدفاع هي الهجوم😉

وسط الناس إللي كانت بتؤذي المسلمين واحد اسمه عمر بن الخطاب وكان من سادات قريش على صغر سنه 😮
وهو يبقى ابن أخت أبو جهل إللي حاول يقتل رسول الله وكان بيؤذيه على طول ده😑
عمر بن الخطاب اتعلم القراءة والكتابة ودي حاجة مكنش حد يعرفها ،
يعني كانت أعداد قليلة إللي كانوا بيعرفوا القراءة والكاتبة ومنهم عمر😊
أبوه الخطاب كان رجل ذكي معروف بشدته وغلظته وكان شجاع وجريء،
تخيلوا ابنه عمر هيكون إزاي لما الأب كده 💁‍♀️
وكان ربنا أعطى له جسم ضخم ،
وكان بيلعب رياضة فأجاد المصارعة وركوب الخيل والفروسية ، حاولوا تتخيلوا الشكل كده😅
وكان عمر زيه زي الشباب في عصره بيحب اللهو وبيشرب الخمر وورث من أبيه ميله لكثرة الزوجات،
فتزوج في حياته تسع نساء 😅
ولما جاء الإسلام وبدأ سادات مكة يعذبون المسلمون كان عمر من أشد الناس تعذيبا للمسلمين👌

لما رسول الله أذن للمسلمين بالهجرة للحبشة كانوا بيخرجوا مُتَسَلّلِين،
يعني مستخبيين عشان محدش يحس بهم 🤫
في يوم من الأيام لما كان واحد من الصحابة اسمه عامر بن ربيعة وزوجته ليلى بنت أبي حثمة خارجين عشان يهاجروا،
عامر بن ربيعة رجع يجيب حاجة وساب زوجته مستنياه على ما يرجع،
فوهي مستنية زوجها إذ فجأة لقت إللي جاي ناحيتها😳
لقيته عمر بن الخطاب🙊
هيعمل إيه...يا ترى هيأخذها ويعذبها ويهدد زوجها بها😳
ولا هيروح يجيب سادات قريش ويمعنوهم من الهجرة😥

فشافها متجهزة للسفر فقال لها :
إنتي خلاص مسافرة يا أم عبد الله😞
فقالت له: أيوة والله لنخرج من البلد دي بسبب قهركم وآذيتكم لنا لحد ما ربنا يفرجها من عنده😤
فقال لها:
صَحِبَكمُ الله😔...وسابها ومشي😮
وأم عبد الله واقفة مستغربة ومصطدومة 😳
أول مرة تشوف منه الرقة دي...هو ده عمر...يقول لي مع السلامة وكمان وهو حزين😧
وهي واقفة كده جاء زوجها عامر بعد ما جاب الحاجات بتاعتهم،
فقالت له: أما لو كنت شفت عمر من شوية ورقته معايا 😳
فقال لها: إنتي طمعتي إنه يُسلم😏
قالت له : أه😦
فقال لها: والله لا يُسلم إلا لو حمار الخطاب أسلم😑
يعني لو الحمار أسلم ممكن عمر يسلم😅
وقال كده بسبب إللي كان بيشوفه من شدة قسوة وغلظة عمر 👌
عمر دلوقتي في صراع نفسي :
إيه الدين ده إللي يخلي الناس تتخلى عن كل شيء في حياتها مقابل إنها تحافظ عليه كده،
وإيه الثبات إللي هم فيه ده رغم العذاب إللي بيتعذبوه بقالهم أكثر من سنتين😳
هل هم فعلا على حق...قائدهم كنا بنقول عليه الصادق الأمين ،
وبقالنا ست سنين في مناظرات ومفاوضات😕
طيب لو أنا اتبعتهم هيكون موقفي إيه ...هل أدخل في الدين ده وأكون تابع لهم😑
لكن أنا سيد من سادات مكة ومحدش يقدر يرد علي كلامي فكده مكانتي هتروح🤔
وكلام كثير يدور في رأس عمر😵

وخصوصا إن حصل معاه موقف قبل بعثة رسول الله🤭
في يوم من الأيام بعد الجهر بدعوة الإسلام كان عمر بن الخطاب جالس وكان معاه ابنه عبد الله بن عمر، فعدى عليهم رجل جميل فقال عمر:
أظن إن الرجل ده كان كاهن في الجاهلية🤔
فيقول عبد الله بن عمر :
وكان عمر لما يقول على حاجة أظن كذا إلا وكان ظنه في محله👌
فقال عمر نادوا على الرجل ده،
فلما جاء الرجل قال: أول مرة يُستقبل رجل مسلم الاستقبال ده😧
☆وكان الرجل ده مسلم😉

فقال له عمر إنه قال عليه إنه كان كاهن في الجاهلية 🤔
فالرجل قال له فعلا أنا كنت كاهن 😮

◇الكاهن غير الساحر،
الساحر بيقول ويكتب طلاسم وكلام غير مفهوم ، الكاهن بيستعين بالجن عشان يقولوا له بعض أمور الغيب إللي كانوا بيسمعوها من الملائكة وهم بيتكلموا😉

فقال له عمر : إيه أعجب حاجة سمعتها من الجنية بتاعتك🤔
فقال له الرجل:
في يوم كنت في السوق فلقيتها جاية عليّ مفزوعة وقالت له:
شوفت إللي حصل للجن بعد ماكانوا بيقعدوا عند أبواب السماء يسمعوا الغيب اتمنعوا منه، وأي حد بيحاول يسمع يترمى بالشهب😱
وقعدوا يدوروا على السبب في منعهم من خبر السماء،
لحد ما لقوا رجل بيقول لا إله إلا الله😮
فقال عمر :صدق👌
أنا برده لما كنت مرة عند البيت نائم عند الآلهة جاء رجل معاه عجل فذبحه،
وفجأة سمعت حد بيصرخ بصوت مسمعتش زيه بيقول:
يا جَلِيح《يعني يا وقح ويُقال إنه اسم لشخص》
أمر نَجِيح 《يعني عرفنا إللي حصل》
رجل فَصِيح 《رسول الله يعني》
يقول : لا إله إلا الله ،
فمعداش كم يوم إلا وقيل ظهر نبي👌

فكده موقف الرجل المسلم موافق لموقف إللي حصل لعمر😮
فدخل الإسلام في قلبه👌
《القصة موجودة في صحيح البخاري》

في يوم من

الأيام يُقال إنه بعد إسلام حمزة بن عبد المطلب بثلاثة أيام،
كان عمر رايح عند الكعبة فلقى رسول الله لسه جاي وهيصلي ،
فكبر رسول الله وبدأ في الصلاة وبدأ يقرأ سورة الحاقة وعمر يسمع القرآن من رسول الله
"الْحَاقَّةُ. مَا الْحَاقَّةُ. وَمَا أَدْرَاكَ مَا الْحَاقَّةُ.
كَذَّبَتْ ثَمُودُ وَعَادٌ بِالْقَارِعَةِ. فَأَمَّا ثَمُودُ فَأُهْلِكُوا بِالطَّاغِيَةِ......."

فيقول عمر أنا بسمع وأتعجب من الكلام 🤨
فقال عمر : ده والله شاعر🤔
فقرأ رسول الله :
" إِنَّهُ لَقَوْلُ رَسُولٍ كَرِيمٍ * وَمَا هُوَ بِقَوْلِ شَاعِرٍ قَلِيلًا مَا تُؤْمِنُونَ"
فقال عمر : يبقى كاهن🤔
فقرأ رسول الله :
" وَلَا بِقَوْلِ كَاهِنٍ قَلِيلًا مَا تَذَكَّرُونَ * تَنْزِيلٌ مِنْ رَبِّ الْعَالَمِينَ"
قال عمر:
فوقع الإسلام في قلبي..كل الشكوك راحت وتيقن إن هو ده دين الحق👌
وبعدها راح لرسول الله صلى الله عليه وسلم فأسلم،
وأصابته دعوة رسول الله :
"اللهم أعز الإسلام بأحب هذين الرجلين إليك بأبي جهل أو بعمر بن الخطاب ،
قال : وكان أحبهما إليه عمر "
وفرح به رسول الله والمسلمين فرح شديد جدا 😍
وبعد ما أسلم عمر بن الخطاب راح وسأل بين الناس مين أكثر واحد بينقل الكلام في مكة 🤔
فقيل له :
جميل بن مَعمَر🤨
فراح له عمر وقال له: يا جميل معرفتش إللي حصل 😈
أنا أسلمت ودخلت في دين محمد 😁
فجميل بن معمر مكلموش ولا سأله ولا رد عليه😳
راح واخد هدومه وطالع وعمر وراه لحد ما وصل لباب المسجد وصرخ بأعلى صوته:
يا معشر قرااااايش لقد صبأ عمر 📣📣
☆الصابئ يعني إللي بيغير دينه،
فقال له عمر:
كذبت...بل أنا أسلمت👌
فراح الناس قايمين عليه وقعدوا يضربوه🙊
وهو مسكتش😅
قعد يضرب فيهم هو كمان 😅
وقعدوا يضربوا في بعض مدة طويلة لحد ما عمر وقع مبقاش قادر يقوم😮
وراح قايل لهم:
اعملوا إللي تعملوه والله لو كنا ثلاثمائة رجل لنسيب لكم البلد أو نطلعكم إنتم منها😤
فوهم عمالين يتخانقوا كده عدى عليهم رجل كبير في السن من سادات مكة هو العاص بن وائل، شاف المنظر ...عمر بينضرب😦...فقال لهم إيه إللي حصل 😐
فقالوا له : صبأ عمر 😑
فقال لهم : وإنتم مالكم 😕...واحد اختار لنفسه حاجة إيه إللي يدخلكم في الموضوع🤨
إنتم مفكرين إن قبيلته هتسيبكم كده عادي من غير ما تنتقم منكم...اتركوه😑
فتركوا عمر وبدأ عمر يجهر بالإسلام في كل مكان محدش يقدر يتعرض له بأذى😊
وكان عمره يوم ما أسلم...المفاجأة : ستة وعشرين سنة 🙊
يقول عبد الله بن مسعود وكان من الصحابة الأوائل في الإسلام: إسلام عمر كان فتح لنا 👌
مكنش حد فينا من المستضعفين يقدر يصلي عند الكعبة،
أول ما أسلم عمر راح على طول صلى عند الكعبة،
فقريش ضربوه،
فضربهم لحد ما فرض نفسه عليهم وبقى يصلي والمسلمين وراه يصلوا ومحدش يقدر يتعرض لهم بأذى😊

¤ملحوظة مهمة😁
القصة المشهورة بتاعة إن عمر راح لأخته فاطمة البيت غضبان لما عرف إنها أسلمت مع زوجها وسمعهم بيقرأوا القرآن ودخل عليهم وضربهم وبعدين طلب يقرأ القرآن واغتسل وقرأ آيات سورة طه وبعدين راح لرسول الله دار الأرقم وأسلم.
القصة دي لا تصح متنا ولا سندا🙅‍♀️❌
《وهتلاقوا التفصيل في كتاب : ما شاع ولم يثبت في السيرة النبوية 》

دلوقتي الوضع اختلف بعد إسلام عمر وحمزة فهل الأوضاع هتستقر للمسلمين في مكة ويبدأ الفرج ولا هتشتد الأمور أكثر؟
ده إللي هنعرفه الجزء الجاي إن شاء الله 😊



#Eman_Shalapy

#قصص_الأنبياء(٢)
#السيرة_النبوية
#الحلقة_الثانية_والعشرون
#بين_هجرة_الحبشة_الأولى_والثانية

وقفنا المرة إللي فاتت عند إسلام عمر بن الخطاب وشوفنا إنه من بعد ما أسلم على طول راح نشر إسلامه في مكة كلها😅
وكان سبب إن المسلمين المستضعفين يصلوا عند الكعبة،
ويُقال في رواية فيها ضعف:
إنه لما أسلم قال لرسول الله :
يارسول الله مش احنا على الحق وهم على الباطل؟
فرسول الله قال له : نعم!
فقال عمر :طيب ليه نستخبى منهم خلينا نظهر إسلامنا👌
وخرج المسلمين صفين في مقدمة الصف الأول حمزة بن عبد المطلب،
ومقدمة الصف الثاني عمر بن الخطاب ويتقدمهم رسول الله صلى الله عليه وسلم،
فلما كفار مكة شافوهم اتغاظوا واتنكدوا جدا 👌
《من كتاب: ما شاع ولم يثبت في السيرة النبوية》

المهم إن الكفار أكيد اتنكدوا بإسلام حمزة وعمر وده إللي يهمنا😅
واستمر أذى المشركين للمسلمين لكن أخف من الأول ،
وكان رسول الله بيدعوهم ويقرأ عليهم القرآن،
في مرة لما كان رسول الله بيدعو سادات مكة،
جاء له رجل من الصحابة اسمه عبد الله بن أم مكتوم وهو ابن خال خديجة زوجة رسول الله،
وكان رجل أعمى،وكان عايز يسأل رسول الله عن آيات من القرآن سمعها،
فكان طول ماهو ماشي بيسأل أين محمد ...أين رسول الله؟...فالناس تقول له كمل في طريقك،
وهو عمال يمشي بسرعة كأنه بيجري مع إنه أعمى😮
وأصلا الأعمى لما بيمشي لوحده بيضرب بالعصاية بتاعته ضربة على اليمين وضربة على اليسار ،
وضربة أمامه عشان يعرف يمشي خطوة😕
فتخيلوا شدة حماسه عشان يسمع القرآن من رسول الله 😊
فلما قرب منه وسأل الناس أين رسول الله قالوا له:
هو هناك أمامك،
فلما وصل عنده سمع صوت رسول الله بيتكلم مع واحد من سادات مكة هو الوليد بن المغيرة وقيل أُبي بن خلف،
فقال لرسول الله صلى الله عليه وسلم:
يارسول الله علمني مما علمك الله...عايزه يعلمه القرآن ،
وكان رسول الله زي ماتقولوا مركز مع الوليد في الدعوة 😅
فعبد الله بن أم مكتوم أعمى،
فمش شايف الموقف عشان يقدر يحكم،
هل المناسب إني أمشي ولا المناسب إني أسأل لحد ما رسول الله يجاوبني🤔
فعبد الله بن أم مكتوم فضل يلح على رسول الله إنه يقرأ له
وكان جاي بسرعة متحمس شاغله إنه يتعلم القرآن من رسول الله،
فهو تخيل إن رسول الله تبسم له وهيبدأ يقرأ عليه القرآن ويجاوب على كل أسئلته😊
لكن رسول الله اتضايق من كثرة إلحاحه وإنه شغله عن دعوة الوليد إللي كان حاسس إنه بدأ يلين،
ورسول الله كان حريص على إسلام سادات مكة،
لأن الناس هتتبعهم وكمان هيبطلوا تعذيب المسلمين،
فكل ده كان بيدور في رأس رسول الله وبعدين فجأة لقى حد بيقاطعه وبيلح عليه😅
فعبس رسول الله في وجه الأعمى يعني كشّر وأعرض عنه وكمل كلامه مع الوليد،

☆زي مثلا لما تكوني بتتكلمي مع أحد ومندمجين في الكلام في موضوع مهم وخلاص قربتي تقنعي إللي قصادك،
فييجي حد ويقاطعك ويبدأ يسألك عن حاجة ويلح عليكي فهيكون رد فعلك إيه😅

الموقف ده محدش شافه من الصحابة لكن ربنا رآه 👌
هل الموقف ده يعدي؟
أنزل الله في الموقف ده قرآن يُتلى إلى يوم القيامة😊
نزل جبريل على رسول الله صلى الله عليه وسلم وقال له:
"عَبَسَ وَتَوَلَّى * أَنْ جَاءَهُ الْأَعْمَى * وَمَا يُدْرِيكَ لَعَلَّهُ يَزَّكَّى* أَوْ يَذَّكَّرُ فَتَنْفَعَهُ الذِّكْرَى*
أَمَّا مَنِ اسْتَغْنَى فَأَنْتَ لَهُ تَصَدَّى* وَمَا عَلَيْكَ أَلَّا يَزَّكَّى * وَأَمَّا مَنْ جَاءَكَ يَسْعَى * وَهُوَ يَخْشَى فَأَنْتَ عَنْهُ تَلَهَّى* كَلَّا إِنَّهَا تَذْكِرَةٌ "
فربنا بيرشد رسول الله إنه يساوي بين الناس في الدعوة لأن هو عليه البلاغ فقط أما الهداية فهي بيد الله👌

فكان لما عبد الله بن أم مكتوم يأتي لرسول الله بعد الحادثة دي كان يكرمه ويتبسم في وجهه ويحسن إليه😊

أما بالنسبة لقول رسول الله:
"مرحباً بالذي عاتبني ربي من أجله"
فالحديث ده ضعيف 👌

☆ممكن هنا حد يسأل سؤال 🤔
يعني كده إن رسول الله أخطأ وهو معصوم🙊

فاكرين لما اتكلمنا في قصص الأنبياء عن عصمة الأنبياء😉
هقولها تاني عشان أفكركم بها وعشان إللي مكنش يعرف يعرف 😁
وعشان هتحصل معانا مواقف ثانية في السيرة فلازم تكونوا فاكرين معنى عصمة الأنبياء😉

أولا :الأنبياء معصومين من الخطأ في تبليغ الوحي سواء خطأ متعمد أو خطأ غير متعمد ومعصومين من الكفر قبل الوحي وبعده.
ثانيا: الأنبياء معصومين من الوقوع في الكبائر
ثالثا : الأنبياء معصومين من الصغائر التي تدل على الخسة زي سرقة لقمة مثلا.
لكن ممكن يقعوا في الصغائر التي لا تدل على الخسة مع عدم إقرارهم عليها.
زي آدم عليه السلام لما وقع في معصية الأكل من الشجرة ناسيا، ومستمرش عليها ده تاب واستغفر على طول وربنا قبل توبته.
"وَعَصَىٰ آدَمُ رَبَّهُ فَغَوَىٰ *ثُمَّ اجْتَبَاهُ رَبُّهُ فَتَابَ عَلَيْهِ وَهَدَىٰ"

فالخطأ إللي وقع فيه رسول الله هو خطأ بشري عادي لا يتعارض مع حسن خلقه صلى الله عليه وسلم😉
فرسول بشر بيفرح ويحزن ويغضب وده بيظهر على ملامح الوجه،

فالموقف ده رسول الله معذور وعبد الله بن ام مكتوم معذور،
عبد الله بن أم مكتوم لا يرى الوضع إللي فيه رسول الله عشان يحكم،
ورسول الله كره إن كل شوية حد يقاطعه وهو ما صدق إنه الوليد أو أُبي بن خلف بدأ يلين😅
فلما حصل الخطأ الغير مقصود،
ربنا أنزل قرآن لتصحيح المسار وإن الأولى هو دعوة وتعليم الشخص المقبل على الدين بدل الثاني المعرض ومش عايز يسمع أصلا 😑

القرآن كان بينزل آيات متفرقة على حسب المواقف إللي بتحصل زي ما قلنا قبل كده😉
"وَقُرْآنًا فَرَقْنَاهُ لِتَقْرَأَهُ عَلَى النَّاسِ عَلَى مُكْثٍ وَنَزَّلْنَاهُ تَنْزِيلًا"

يعني ربنا بيقول إن القرآن نزل آيات متفرقة عشان رسول الله يقرأه على الناس على مهل،
ويتدبروا آياته ويثبت في قلوبهم، وفي بعض سور القرآن كانت بتنزل كلها مرة واحدة ،
وأغلبها السور القصيرة زي العصر وزي الكافرون والمسد والفاتحة والإخلاص و...و...
ومنها سورة الكوثر 😁
وكان سبب نزولها إن رسول الله مرة كان خارج من باب المسجد وفي نفس الوقت كان العاص بن وائل سيد من سادات قريش داخل ،
يعني واحد خارج والثاني داخل في نفس الوقت🔁
فقعد يتكلم مع رسول الله صلى الله عليه وسلم وكان في ناس من المشركين قاعدين،
فلما خلص العاص بن وائل مع رسول الله راح قعد معاهم فسألوه : إنت كنت بتكلم مين🤨
فقال لهم : ده كان الأَبْتر😒

☆وكانوا بيسموا إللي معندهوش ابن بالأبتر ورسول الله كان مات ابنه القاسم وعبد الله لو تفتكروا 👌

فربنا أنزل :
"إِنَّا أَعْطَيْنَاكَ الْكَوْثَرَ* فَصَلِّ لِرَبِّكَ وَانْحَرْ *إِنَّ شَانِئَكَ هُوَ الْأَبْتَرُ "
فدي كانت بشارة لرسول الله صلى الله عليه وسلم بأن ربنا أعطى له في الآخرة نهر اسمه الكوثر قال رسول الله للصحابة عنه:
" أَتَدْرون ما الكوثرُ؟ ..فقلنا: اللهُ ورسولُه أعلم 🤔
قال: فإنه نهرٌ وعَدنِيه ربي عزَّ وجَلَّ، عليه خيرٌ كثيرٌ، و حوضٌ تَرِدُ عليه أمتي يومَ القيامةِ،
آنيتُه عدد النجومِ، فيَخْتَلِجُ العبدُ منهم، فأقولُ: ربِّ، إنه مِن أمتي، فيقول: ما تدري ما أَحْدَثَتْ بعدَك"
فالخير ده مستنيك يا محمد في الآخرة أما شانئك يعني مبغضك هو الأبتر يعني هو المقطوع عن كل خير في الدنيا والآخرة👌

☆من الحاجات العجيبة إللي لاحظتها إن الكفار مهما آذوا رسول الله سواء بالشتيمة أو الضرب أو الإهانة...كان رسول الله يرجع يكلمهم ويدعوهم عادي 😳
لا وهم يكلموه برده بعدها ولا كأنهم عملوا حاجة😶
ودول كفار مش واحد مسلم بيدعو أخوه المسلم😑
أظن محتاجين وقفة كبيرة أوي مع نفسنا 😞

من السور التي يُقال إنها نزلت مرة واحدة ويُقال نزلت آيات متفرقة سورة النجم،
وكان المشركين بيقولوا : محمد يقول القرآن وبيخترع الكلام😒
فأنزل الله:
"وَالنَّجْمِ إِذَا هَوَىٰ* مَا ضَلَّ صَاحِبُكُمْ وَمَا غَوَىٰ* وَمَا يَنطِقُ عَنِ الْهَوَىٰ* إِنْ هُوَ إِلَّا وَحْيٌ يُوحَىٰ* عَلَّمَهُ شَدِيدُ الْقُوَىٰ"
من خلال سورة النجم يهمنا قصتين حصلوا😉
القصة الأولى:
فاكريييين عتيبة بن أبي لهب😈
اتكلمنا عنه في البداية لما طلق بنت من بنات رسول الله إللي كان متزوجها👌
لما قرأ رسول الله على المشركين في مكة الآيات:
"ثُمَّ دَنَا فَتَدَلَّى* فَكَانَ قَابَ قَوْسَيْنِ أَوْ أَدْنَى"
وسمع الآيات عتيبة بن أبي لهب،
فكان خارج في تجارة للشام مع أبوه ، فراح قايل والله لأروح لمحمد وأؤذيه،
وجاء عتيبة لرسول الله صلى الله عليه وسلم فعلا وقال له إنه بيكفر بالذي دنا فتدلى...إللي هو رسول الله يعني،
ثم تَفَل في وجه رسول الله صلى الله عليه وسلم😑
لكن البَصق مجاش في وجهه الكريم صلى الله عليه وسلم،
فقال رسول الله:
اللهم سلط عليه كلبا من كلابك 🤲
يُروى إن أبو طالب كان حاضر الموقف وسمع دعوة رسول الله فاتخض 😳
فراح وراء عتيبة وقال له دعوة رسول الله وسمعهم أبو لهب،
أو إن عتيبة لما سمع الدعوة ورجع لأبي لهب قال له على إللي حصل فخاف ابو لهب على ابنه،
فوهم في الطريق نزلوا في مكان عشان يباتوا فيه،
والمكان ده كان في صومعة لراهب فالراهب بص عليهم الصومعة وقال لهم إن المنطقة دي فيها أسود👌

فأبو لهب قال للناس إللي كانوا معاه،
يا جماعة ساعدوني أحمي عتيبة لأني خايف عليه من دعوة محمد😥
فجمعوا أحمالهم والمتاع بتاعهم وحطوا عليه عتيبة عشان ينام فوقه وهم ناموا حوله،
فجاء أسد وقعد يشم وجوههم واحد واحد لحد ما وصل لعتيبة فوق الأمتعة ونط عليه فضربه بمخالبه ومشي،
وعتيبة صرخ: قتلني، ومات في مكانه🙊
فلما أبو لهب عرف قال : مش قلت لكم أنا خايف عليه من دعوة محمد😩
" إِنَّا كَفَيْنَاكَ الْمُسْتَهْزِئينَ"

☆الواحد بيتعجب من الناس دي بجد😶
يعني عارف إن دعوة محمد صلى الله عليه وسلم مستجابة،
وعارف إن ابن أخوه على الحق،
ومع ذلك مفكرش إنه يسلم 😳
"وَجَحَدُوا بِهَا وَاسْتَيْقَنَتْهَا أَنفُسُهُمْ ظُلْمًا وَعُلُوًّا"👌

¤ممكن حد يسأل هنا سؤال😁
إزاي رسول الله يدعو عليه وهو إللي قال لما الصحابة قالوا له :
ادعُ على المشركين ، فقال رسول الله:
"

إني لم أبعث لعانا إنما بعثت رحمة" 🤔

ده فعلا كان هدي رسول الله صلى الله عليه وسلم، ولكنه في نفس الوقت كان يدعو على من يأس من إسلامه واشتد عداءه للمسلمين،
زي نوح عليه السلام لما دعا على قومه ،
هو دعا عليهم بعد ما ربنا أخبره إن محدش تاني هيؤمن غير إللي آمن معك ،
فاحنا حتى يجوز إننا ندعو على الظلمة والطغاة بالهلاك،
إذا كان أذاهم شديد على المسلمين ، ولا يُرجى منهم الهدى أو صلاح الحال 👌

♡وفي هنا حكم شرعي مهم في من يشتم رسول الله،
ممكن ناس كثيرة يتفاجؤوا به 🙊
أي أحد يشتم رسول الله فهو كافر مرتد خارج عن الإسلام سواء كان بيهزر ولا بيتكلم جد ،
وحدّه القتل سواء كافر أو مسلم،
حتى لو المسلم تاب فهو يُقتل حدا لو وصل أمره للقاضي أو الحاكم،
وده قول جمهور العلماء من المذاهب الأربعة المعتمد على الدليل من القرآن والسنة👌

اتفاجئتم صح😅

السؤال دلوقتي إللي عندكم ...طيب ماهو تاب والتوبة بتمسح ما قبلها ، ده حتى المرتد ربنا بيتوب عليه..ومقام ربنا أعلى من مقام النبي ،
وكمان رسول الله كان بيعفو عن إللي كان بيشتمه فاحنا بقى مش هنعفو😳

الكلام ده كله صحيح 👌 إلا في حق رسول الله 😁

◇أيوة التوبة بتمسح إللي قبلها وربنا يقبل التوبة في كل الذنوب والمعاصي لكن في حد من حدود الله،
زي الرجل المحصن إللي بيزني حده الرجم بالحجارة حتى لو تاب،
مادام وصل الأمر للحاكم وثبت عليه الزنا وجب إقامة عليه الحد،
وفي مذهب الإمام أحمد كمان إن إللي يسب رسول الله وتاب لا تُقبل توبته تخيلوا😳
فتوبة من يَسب رسول الله تنفعه بينه وبين ربه فيكون مسلما مؤمنا،
ويدخل الجنة لكن لا يرتفع الحد عنه فيُقتل مسلما ويُغسل ويُكفن ويُصلي عليه المسلمون👌
طبعا كل ده لو وصل الموضوع للحاكم،
لو موصلش يبقى يتوب بينه وبين نفسه ويعمل الأعمال الصالحة😉
أما بقى لو متبش فده كافر مرتد مفيش كلام😅

◇مقام ربنا أعلى من النبي وربنا بيغفر وده حق ربنا،
لكن رسول الله لو الناس شتمته وتابت وشتمته وتابت بقى عرضه مُستباح لأي حد يشتمه😑

◇وهو أه كان بيسامح وده حقه..لكن رسول الله مش موجود دلوقتي فمش من حق أي حد إنه يسامح بداله🤷‍♀️
هو لو واحدة شتمتك ولا أهانتك وجت صاحبتك قالت لها إنك مسامحاها وإنتي مش موجودة ،
هيكون رد فعلك إيه؟
على الأقل هتقولي مين قال لك تتكلمي مكاني وبلساني 😀
ورسول الله كان بيسامح عشان أسباب شرعية زي إن عشان لا ينتشر بين الناس إن محمد يقتل أصحابه،
أو من باب تأليف القلوب👌
وطبعاااااا الحدود دي الحاكم هو إللي يطبقها مش عوام الناس😱
عشان محدش يفهم الكلام غلط ويعك الدنيا😶

☆أنا جبت لكم المختصر المفيد..إللي عايز يتوسع ويعرف الأدلة بالتفصيل يراجع موقع الإسلام سؤال وجواب ،
أو كتاب :
" الصارم المسلول في تَحتُّم قتل ساب الرسول "
لشيخ الإسلام ابن تيمية 😉

نرجع للقصة الثانية إللي معانا النهاردة ومرتبطة بسورة النجم وهي إن رسول الله صلى الله عليه وسلم راح عند الكعبة وسادات قريش قاعدين فقرأ عليهم الآيات:
"وَأَنَّ إِلَى رَبِّكَ الْمُنْتَهَى*..... *فَبِأَيِّ آلَاءِ رَبِّكَ تَتَمَارَى *هَذَا نَذِيرٌ مِنَ النُّذُرِ الْأُولَى * أَزِفَتِ الْآزِفَةُ *
لَيْسَ لَهَا مِنْ دُونِ اللَّهِ كَاشِفَةٌ * أَفَمِنْ هَذَا الْحَدِيثِ تَعْجَبُونَ * وَتَضْحَكُونَ وَلَا تَبْكُونَ * وَأَنْتُمْ سَامِدُونَ * فَاسْجُدُوا لِلَّهِ وَاعْبُدُوا "
فسجد رسول الله وسجد المسلمون إللي كانوا معاه، وسجد كفار مكة إللي سمعوا الآيات وسجد الإنس والجن...أي حد سمع الأيات سجد وراء رسول الله😮
من شدة تأثير آيات القرآن عليهم مكنوش واعيين لنفسهم لدرجة إنهم سجدوا 😳
تخيلوا رسول الله بيقول :
"إن من البيان لسحرا"
فما بالكم بالقرآن.. وإللي بيقرأه رسول الله وبيقرأه على أهل اللغة إللي في إيدهم اللغة العربية الفصحى دي زي العجين،
يعني فاهمين كل كلمة بتتقال😦
لما قاموا وفاقوا من إللي عملوه قالوا : سحرنا محمد 😡
واحنا مش هنؤمن به أبدا😤
وانتشرت الأخبار إن مكة أسلمت 😀
لحد ما وصلت الأخبار للمسلمين في الحبشة ففرحوا وجمعوا حاجتهم ورجعوا لمكة،
ورجعوا لمكة دي يعني ركبوا البحر أيام وليالي ومشيوا في الطريق أيام وليالي يعني 😅
تخيلوا المجهود والمشقة إللي تحملوها بسبب شائعة 👌
وأول ما وصلوا عند مكة استنوا لحد بالليل وأرسلوا واحد يستكشف لهم الموضوع،
واكتشوفوا إن الخبر كان إشاعة🙊
اتفقوا إنهم يقسموا نفسهم ثلاثة أقسام:
قسم يرجع للحبشة، وقسم يدخل مكة يخلص شوية حاجات محتاجينها من غير ما أحد ياخد باله،
والقسم الثالث هيدخل مكة عادي قصاد لكن في جِوار حد من سادات قريش عشان يقابل رسول الله ويحكوا لهم عن إللي حصل معاهم في الحبشة👌
وفعلا رجع الأغلبية للحبشة وبقي بعض الأفراد دخلوا مكة، وتقابلوا مع رسول الله وحكوا له الأحداث إللي حصلت معاهم،
كفار مكة كانوا خفوا التعذيب عن المسلمين شوية بعد إسلام حمزة وعمر،
لكن بعد ما حصلت حادثة سجودهم مع رسول الله اشتدوا في تعذيب المس

لمين تاني😑
عايزين يثبتوا للناس إنهم متبعوش محمد وإنه هو إللي سحرهم😶
ده غير إن المشركين عرفوا إن المسلمين إللي هاجروا للحبشة عايشين هناك مرتاحين من غير مشاكل والنجاشي استقبلهم استقبال حافل،
فكل ده غاظ الكفار فبدأوا يصبوا غضبهم في تعذيب المسلمين،
هنا رسول الله أمر المسلمين بالهجرة مرة ثانية للحبشة،
لكن للأسف المرة دي الموضوع صعب😥
قريش مفتحة عينها وحاطين حراس في كل مكان عشان محدش يقدر يطلع برة مكة من المسلمين أو حتى المشتبه فيهم إنهم مسلمين أو حتى إللي بيفكروا في الإسلام 🤨

☆سبحان الله فعلا ما أشبه اليوم بالبارحة👌

وطبعا السؤال إللي بيطرح نفسه هنا...هو ليه أهل مكة مضيقين على المسلمين كده😕
مش المفروض يسيبوهم يطلعوا برة البلد🤨
هم هيسيبوا لهم البلد يشبعوا بيها ويمشوا ..أهل مكة بقى زعلانين ليه بقى🙄

آاااااا....إن شاء الله نجاوب على السؤال ده المرة الجاية😁 ونشوف مع بعض هل المسلمين هيقدروا يخرجوا برة مكة ولا لأ😉



#Eman_Shalapy

#قصص_الأنبياء(٢)
#السيرة_النبوية
#الحلقة_الثالثة_والعشرون
#الهجرة_الثانية_للحبشة
#وفد_عمرو_بن_العاص_للنجاشي

كنا واقفين المرة إللي فاتت عند المسلمين لما رجعوا مكة بعد ما سمعوا إشاعة إن مكة أسلمت،
واضطروا إنهم يرجعوا تاني للحبشة ويعدوا الصحراء والبحر إللي هم كانوا لسه راجعين منها😶
مجرد التفكير في الموقف صعب... الواحد بعد ما بيمشي مشوار أو حتى بيركب ،
وبيفتكر إنه نسي حاجة محتاجها ولازم يرجع بيبقى على آخره ومتضايق،
دول بقى شايلين عيالهم وحالهم ومالهم على جمال وماشيين أيام وليالي والمفروض إنهم ما صدقوا وصلوا عشان يستريحوا،
يلاقوا إن الخبر إللي قطعوا بسببه الطريق ده كله كاذب😐
وكان المفروض إنهم يبعثوا واحد منهم يروح يتأكد،
بدل ما يقطعوا المسافة دي كلها👌

☆وده يعلمنا إننا مناخدش أي قرار إلا لما نتأكد من صحة الكلام إللي وصل لنا👌
أكثر حاجة مضيعانا هي إننا بنمشي وراء الشائعات،
تلاقي الواحد مجرد ما يسمع كلام من هنا ولا من هنا ينشر ويبدأ يأخذ قرارات،
ده غير بقى السيئات إللي الواحد بياخدها بسبب الشتيمة إللي بيقولها لو الشائعة فيها حاجة تضايقه😶
فاتعلموا إنكم قبل ما تصدقوا أحد اتأكدوا من المعلومات الأول👌

قلنا إن معظم المسلمين رجعوا للحبشة ودخل بعض الصحابة لمكة، فيهم إللي دخل مكة من غير ماحد يحس بيه،
وفيهم إللي دخل عادي قصاد أهل مكة زي عثمان بن عفان وزوجته رقية بنت رسول الله،
وقلنا إن كفار قريش اشتدوا في العذاب على المسلمين ومنعوهم حتى إنهم يهاجروا برة مكة،
ووقفنا عند سؤال مهم وهو :
ليه أهل مكة ميسيبوش المسلمين يخرجوا برة مكة وبكده يرتاحوا منهم🤔
وده مش خاص بأهل مكة ده أي كفار أو ظلمة على مر التاريخ عندهم نفس الفكر،
يعذبوا المسلمين أو يقتلوهم ولا إنهم يسيبوهم يخرجوا برة البلد👌
أولا:
كفار قريش عارفين إن المسلمين راحوا الحبشة مش عشان يعيشوا حياة الترف هناك وانتهى الموضوع على كده،
دول راحوا عشان يربوا نفسهم تربية إيمانية مضبوطة فيقدروا يرجعوا لمكة وهم أقوى،
وكفار قريش عارفين إن رسالة الإسلام رسالة عامة يعني مش خاصة بأهل مكة بس،
يعني المسلمين هيعملوا كل إللي قدروا عليه لنشر دعوة الإسلام في الأرض كلها،
وأكيييييد هيرجعوا لمكة في يوم من الأيام👌
فعلى إيه بقى وجع القلب ده...احنا نحبسهم ولا نقتلهم ولا نعذبهم من البداية لحد ما يعترفوا على نفسهم بحاجات غير صحيحة ويتركوا الدين 💁‍♀️

☆يارب نكون بنربط بين الأحداث وفاهمين الليلة ماشية إزاي 😀

ثانيا:
في علاقات دوبلوماسية بين مكة والحبشة...فكده المسلمين هيغيروا العلاقات دي لصالحهم وتضيع مصالح مكة مع الحبشة،
لأن أهل الحبشة هيشوفوا أخلاق المسلمين وتعاملاتهم وإنهم لا يستحقوا التعذيب والقتل،
فكده هيعرفوا إن أهل مكة هم إللي ظلمة وهيستنكروا جدا أفعالهم وشكلهم هيبقى وحش قصاد ملك الحبشة،
وممكن الموضوع يتطور لقطع العلاقات السياسية والاقتصادية بين مكة والحبشة،
وده مش في صالح مكة إطلاقا وهيضرهم جدا 😕

☆واخدين بالكم😀

ثالثا:
كفار مكة خافوا إن أهل الحبشة يُسلموا وخصوصا إنهم عارفين إن دعوة الإسلام مقنعة والقرآن كلام مُعجِر،
فسهل إن الناس تدخل في الإسلام،
فلو دخلوا في الإسلام ممكن يأتون بجيش لغزو مكة😳
وهم ملهمش طاقة بحرب ملك الحبشة😕
ده مقدروش يقفوا في وجه أبرهة إللي كان مجرد تابع للنجاشي، هيقفوا قصاد النجاشي😏

يبقى نريح دماغنا من البداية ونمنع المسلمين من السفر ونحبسهم ونعذبهم ويا دار مدخلك شر 💁‍♀️

☆بس على مين ...ويمكرون ويمكر الله..الناس دي مش قادرة تفهم إنها بتحارب ربنا،
ومهما كان لهم الغلبة والنصر في البداية فالعبرة دائما بالنهاية...والأيام بيننا 😈

بسبب تزايد تعذيب الكفار للمسلمين، والخوف عليهم من القتل،
رسول الله أصدر قرار بالهجرة للمرة الثانية للحبشة،
لكن الهجرة المرة دي كانت أصعب😶
◇أولا : قريش بقوا واخدين بالهم ومراقبين المسلمين وحاطين حراس في كل مكان😕

◇ثانيا: المرة دي الناس إللي هتخرج ناس مهمة جدا
زي أم حبيبة رملة بنت أبي سفيان، زعيم زعماء مكة الكفار😳
وأبو حذيفة بن عتبة بن ربيعة وأبوه عتبة من سادات قريش الكفار😮
وفراس بن النضر بن الحارث😳
فاكرين النضر بن الحارث إللي راح اتعلم قصص فارس والروم كان بيقعد يقول للناس أنا بحكي لكم أساطير ومحمد بيحكي لكم أساطير ،
وهو إللي أدخل في مكة الضرب على العود...تخيلوا ابنه أسلم🙊
وهشام بن العاص بن وائل إللي أبوه العاص بن وائل كان بيقول عن رسول الله إنه أبتر😦

☆شوفتم مكر ربنا بالكفار🙊
هم لم يؤمنوا وحاربوا دعوة الإسلام فأخرج الله من بيوتهم ومن أصلابهم من يؤمن بالله،
يعني إللي هينصر الدعوة إللي إنت بتحاربها هم أحب الناس لقلوبكم👌
بجد أي قهرة المشركين كانواحاسين بها في الوقت ده...سبحان الله😮

◇ثالثا: العدد إللي هيخرج للحبشة المرة دي أكبر بكثير من المرة الأولى،
تقريبا نصف المسلمين إللي أسلموا هيخرجوا من مكة🙊
هيخرج ثلاثة وثمانون رجل وتسعة عشرة امرأة، غ

ير الأطفال،

فتخيلوا لما أبناء الزعماء نفسهم يخرجوا من مكة شكلهم قصاد الناس هيبقى عامل إزاي😅
ومكة بلد صغير فخروج العدد الكبير ده مرة واحدة هيعمل قلق جامد في مكة🙊
تصوروا لما أهل مكة يصحوا ثاني يوم ويلاقوا نقص منهم حوالي مائة شخص😳
صدمة جامدة طبعا لهم😶

لكن رسول الله مع كل الصعوبات دي فهو كقائد عنده فقه واقع شاف إن الدعوة لن تصل للناس إلا عن طريق الدعاة،
والدعاة وصلوا لمرحلة من الإيذاء الشديد خلتهم مش عارفين يمارسوا الدعوة،
يبقى لازم القرار الحاسم والجريء بخروج المسلمين من مكة👌
في شباب ممكن يتحمسوا في مرحلة زي دي من مراحل الدعوة ويقولوا :
لأ ..واحنا نسيب لهم البلد ونمشي ليه...احنا هنفضل ثابتين مهما كانت النتائج حتى لو متنا😤
وده خطأ... شوفوا ربنا خلق النبات الضعيف لين ومرن،
عشان لما الريح الشديدة تيجي عليه،
يميل ومينكسرش،لحد ما يكبر ويبقى شجرة قوية لها جذور عميقة في الأرض،
مهما اشتدت الريح عليها لا تميل وتظل ثابتة💪🏻
وكذلك المؤمن يستغل الأمور لصالحه لحد ما يبقى قوي ويقدر يواجه😉
وهو ده إللي رسول الله صلى الله عليه وسلم عمله،
وهنشوف في النهاية سياسة رسول الله وصلت المسلمين لإيه😊
بدأوا يخططوا إزاي هيخرجوا من مكة، وكان القائد بتاعهم هو جعفر بن أبي طالب بن عم رسول الله،
فبدأوا يشوفوا المخارج والمداخل المناسبة عشان يخرجوا من مكة والكل اشترك في إنجاح مهمة الهرب 👌
فمطلوب الأخذ بالأسباب إللي يقدروا عليها وفي نفس الوقت يتوكلوا على الله😉
وفعلا اتسللوا في الليل وقدروا يهربوا ويوصلوا للبحر ويركبوا السفن واتجهوا للحبشة ومحدش من الكفار قدر يمسك منهم أحد😁
"إنَّ اللَّهَ يُدَافِعُ عَنِ الَّذِينَ آمَنُوا"

أهل مكة يسكتوا ويقولوا خلاص بقى كفاية كده وخلونا ننهي الأزمة والصراع ده...لأ😶
هم مش هيسكتوا ولا هيتنازلوا غير لما يتنازل المسلمون عن دينهم،
ودي سنة كونية مش هتتغير مهما سمعتم من كلام أهل الباطل وإنهم عايزين يحافظوا على البلد واستقراره🙄
"وَلاَ يَزَالُونَ يُقَاتِلُونَكُمْ حَتَّىَ يَرُدُّوكُمْ عَن دِينِكُمْ إِنِ اسْتَطَاعُواْ"

عملوا إيه بقى😀
احنا عارفين إنهم ميقدروش يحاربوا الحبشة، وكمان في علاقات طيبة بينهم مش عايزين يخسروها،
قالوا بس مفيش غير إننا نقعد مع ملك الحبشة على ترابيزة المفاوضات💁‍♀️
لكن برده الموضوع مش سهل😕
أصل ملك الحبشة وإللي كان اسمه 《أَصْحَمة》 مشهور إنه ملك عادل لا يُظلم عنده أحد👌
فالكلام المباشر مش هينفع لازم الحيلة...طيب مين يا جماعة عندنا أكثر واحد ذكي عندنا ويقدر يستخدم الحيلة ويقنع النجاشي🤔
مفيش غيره أَرْطَبُون العرب😁
《عمرو بن العاص بن وائل》
أخو هشام بن العاص إللي أسلم وهاجر للحبشة😉
وعمرو بن العاص من دهاة العرب الأربعة 😊

☆الأرطبون كلمة معناها الرجل الداهية شديد الذكاء، وهي مأخوذة من كلام الرومان، فهم كمان كان عندهم أرطبون😅

فمالوضوع بالنسبة لعمرو بن العاص مش بس مهمة رسمية من قريش،
لأ ده كمان الموضوع قضية شخصية يعني هيقدر يتكلم بقلب جامد،
ومش بس كده ده عمرو بن العاص صديق شخصي للنجاشي،
يعني مفيش أي أحد أنسب من عمرو👌
واختاروا مع عمرو واحد اسمه عبد الله بن ربيعة وهو برده أخو عباس بن ربيعة من الصحابة إللي هاجروا للحبشة،
كده الخطوة الأولى تمت،
الخطوة الثانية مينفعش يدخلوا على الملك بإيدهم فاضية😅
فأهل مكة راحوا واشتروا الهدايا الثمينة وبالذات الجلود، لأنهم كانوا عارفين إن النجاشي والحاشية بتاعته بيحبوا الجلود،

☆شوفوا بيصرفوا فلوس ومرتبات بمئات الآلاف والملايين أد إيه عشان مهمة واحدة بس إنهم يصدوا عن سبيل الله ويضلوا الناس بتضليلهم وكذبهم😑
"إِنَّ الَّذِينَ كَفَرُوا يُنْفِقُونَ أَمْوَالَهُمْ لِيَصُدُّوا عَنْ سَبِيلِ اللَّهِ فَسَيُنْفِقُونَهَا ثُمَّ تَكُونُ عَلَيْهِمْ حَسْرَةً ثُمَّ يُغْلَبُونَ "

المهم عمرو بن العاص وعبد الله بن ربيعة أخذوا الهدايا وطلعوا عالحبشة،
هم كمان مشيوا ليالي وأيام وركبوا البحر وتحملوا مشقة السفر زيهم زي المسلمين،
لكن هل أجر وفد قريش زي أجر الصحابة المهاجرين😊
الكفار بيتألموا والمسلمين بيتألموا نفس الألم لكن المسلمين يرجون الأجر والثواب من الله👌
"إِنْ تَكُونُوا تَأْلَمُونَ فَإِنَّهُمْ يَأْلَمُونَ كَمَا تَأْلَمُونَ وَتَرْجُونَ مِنَ اللَّهِ مَا لا يَرْجُونَ "

وصل عمرو بن العاص الحبشة، لكنه مدخلش على النجاشي على طول😈
دخل على البَطَارِقة إللي هم كبار رجال الحكم من النصارى إللي بيقعدوا مع النجاشي ، الحاشية يعني😅
فلما دخل عليهم وهم طبعا عارفينه...فرحبوا به وأعطاهم الهدايا الثمينة إللي كان جايبها معاه،
وبكده ضمن إن البطارقة هيكونوا في صفه لما يتكلم مع النجاشي،
وحتى لو هم مش هيبقوا في صفه فهو على الأقل خلاهم على الحياد😈
يعني هل من المعقول إني أكون لسه جايب لكم هدايا أد كده وبعدين لما أطلب حاجة هتعترضوا😈
والمثل بيقول إيه 😀
اطعم الفم تستحي العين💁‍♀️

☆هو كان داهية العرب من