بوت الاستفسارات الخاصة بقصص الأنبياء و السيرة النبوية ...
اترك سؤالك الخاص بالحلقات و سنقوم بالرد قريياً بإذن الله... https://t.me/prophetsstories_bot

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

#الخلفاء_الراشدون_إيمان_شلبي
#سيرة_أبي_بكر_وعمر
#الحلقة_الثالثة_والثلاثون
#فاطمة_بنت_رسول_الله

بدايةً قبل الحلقة وبما إن منهجنا هو تطبيق إللي نتعلمه؛ عايزة أفكركم بحديث رسول الله ﷺ:
"تَرَى المُؤْمِنِينَ في تَراحُمِهِمْ وتَوادِّهِمْ وتَعاطُفِهِمْ، كَمَثَلِ الجَسَدِ، إذا اشْتَكَى عُضْوًا تَداعَى له سائِرُ جَسَدِهِ بالسَّهَرِ والحُمَّى."
《صحيح البخاري》
وانتم طبعا عارفين إللي حصل للمسلمين في سوريا وتركيا والبلاء إللي ربنا ابتلاهم به، فكل واحد فينا يحاول بقدر استطاعته إنه يساعد إخوانه المسلمين المبتلين في محنتهم، ولا تحقرن من المعروف شيئا👌
¤إللي يستطيع إنه يتصدق عن الناس إللي ماتوا والمصابين والمفقودين يتصدق؛
أخرج مبلغ من المال بحسب قدرتك وأشركهم جميعا في أجر الصدقة، يعني تكون نيتك أن هذه الصدقة عن الموتى والمصابين والمفقودين، وده يجوز عادي👍
انت كده أهديتهم حسنات تنفعهم في الآخرة وخصوصا إللي مات وانقطع عمله الصالح في الدنيا👌

¤اعمل عمل صالح خالص لله ثم ادعو الله بالعمل الصالح ده إن ربنا يغفر لميتهم ويشفي مصابهم ويهون على مُبتلاهم ويصبرهم على مصيبتهم، زي أصحاب الغار الثلاثة إللي اتقفل عليهم صخرة ودعوا بأعمالهم الصالحة فاستجاب الله لهم👌
أو حتى من غير عمل صالح ممكن الدعاء لهم بصفة عامة.
الدعاء والصدقة هما أبسط شيء نقدر كلنا إننا نعملهم حتى لو مفيش مجال ولا نستطيع إننا نوصل لهم مساعدات عينية👌

فنسأل الله الحكيم العليم الخبير بعباده أن يرحم موتاهم ويشفي مُصابهم ويهون عليهم مصيبتهم ويرزقهم الصبر والرضا ويأجرهم على بلاءهم ويرد المسلمين إلى دينهم ردا جميلا وألا يقبضنا على حين غفلة منا🤲
=================================
حلقة النهاردة عن السيدة فاطمة، هنعرف قصة حياتها سريعا بصفة عامة،
هي فاطمة بنت رسول الله ﷺ، وهي أصغر بناته ﷺ وأمها خديجة بنت خويلد، وكانت أحب بنات رسول الله ﷺ إليه وكانت أكثر واحدة تشبهه في الشكل والأخلاق،
اتولدت قبل البعثة بخمس سنين، يعني لما كان رسول الله ﷺ عمره خمسة وثلاثين سنة،
والسيدة خديجة كان عمرها خمسين سنة،
بعد بعثة رسول الله ﷺ وبداية الدعوة والجهر بيها بدأ أذى قريش لرسول الله ﷺ،
وكانت فاطمة بتحب رسول الله ﷺ وكانت بتشوف أذى قريش لأبيها وبتدافع عنه وتبعد عنه الأذى مع صغر سنها،
ومن الأذى ده إنه ﷺ مرة كان بيصلي عند البيت الحرام، وكان أبو جهل ومعاه أصحاب له قاعدين، فقالوا لبعض:
"أيُّكُمْ يَجِيءُ بسَلَى جَزُورِ بَنِي فُلَانٍ، فَيَضَعُهُ علَى ظَهْرِ مُحَمَّدٍ إذَا سَجَدَ؟"《صحيح البخاري》
يعني مين يروح يجيب أمعاء البعير بتاع آل فلان إللي ذبحوه ويضعه على ظهر محمد وهو ساجد😈
فقام أشقاهم وجاب الأمعاء وأول ما رسول الله ﷺ سجد راح وضعه على ظهره بين كتفيه،
وقعدوا كلهم يضحكوا على رسول الله ﷺ لدرجة إنهم قعدوا يتمايلوا على بعض من الضحك😑
واستمر رسول الله ﷺ ساجد والأمعاء على ظهره لحد ما جاءت فاطمة وشالت الأمعاء من على ظهره ﷺ وكان عمرها ساعتها سبع أو ثمان سنوات،
فلما فقام رسول الله ﷺ دعا: اللهم عليك بقريش ..اللهم عليك بقريش..اللهم عليك بقريش🤲

ماتت السيدة خديجة أم السيدة فاطمة في السنة العاشرة من البعثة وكان عمر فاطمة خمسة عشرة سنة تقريبا،
واحنا عارفين أد إيه رسول الله ﷺ كان بيحب السيدة خديجة وحزن على موتها،
فكانت السيدة فاطمة هي إللي بترعى رسول الله ﷺ بعدها وتحنو عليه وعلى طول كانت معاه في البيت، عشان كده كانت كنيتها أم أبيها👌

وكانت تُلقب الزهراء؛ واحنا منعرفش السبب في انها لُقّبت بالزهراء لكن بعض أهل العلم قالوا أنّها حَسنة اللون، أو المُشرقة المُنيرة وذلك نسبة لرسول الله ﷺ؛ لأنها تُشبهه في الجمال، والصورة الحسنة، والله أعلم😅

لما هاجر رسول الله ﷺ للمدينة بعد موت السيدة خديجة بثلاث سنوات تركها في مكة،
وبعد ما استقر الوضع في المدينة أرسل رسول الله ﷺ لمكة مَن يأتي بأهله وكان منهم السيدة فاطمة،
في السنة الثانية من الهجرة بعد غزوة بدر جاءت مَوْلاة لعلي بن أبي طالب وقالت له إن الناس بدأوا يطلبوا فاطمة للخطبة، فقالت له: إيه إللي يمنعك من إنك تروح وتخطبها من رسول الله ﷺ 🤔
فقال لها: وهو أنا عندي حاجة أتزوج بها😕
يعني أنا فقير ومعنديش حاجة أدفعها كمهر،
فقالت له: لو انت ذهبت لرسول الله ﷺ هيزوجها لك👌

فذهب علي لرسول الله ﷺ وقعد أمامه ومعرفش يتكلم🙊
رسول الله ﷺ كانت له هيبة، فهو دلوقتي جاي يطلب إيد بنته إللي بيحبها وبيخاف عليها، وهو فقير معندوش حاجة فهيتكلم إزاي😶
فرسول الله ﷺ سأله: إنت جاي عايز حاجة؟!
فسكت علي رضي الله عنه 😅
فقال له رسول الله ﷺ: لعلّك جئت تخطب فاطمة؟!

فقال علي بن أبي طالب: نعم.
فقال له رسول الله ﷺ: وانت عندك شيء تقدمه لها مهر؟!
فقال له علي رضي الله عنه:
لا والله يا رسول الله😓
فقال له رسول الله ﷺ: أنا كنت أعطيتك درع تتسلح بها، عملت فيها إيه؟
فقال علي: والله يا رسول الله دي درع متحطمة ميجبش ثمنها أربعة دراهم😥
فقال له رسول الله ﷺ: أنا زوّجتك فاطمة بالدرع دي👌
وتزوجت السيدة فاطمة من علي بن أبي طالب ابن عم أبوها، وكان عمرها حوالي من 18 ل 20 سنة تقريبا🤔
وكان علي بن أبي طالب عمره حوالي ثلاثة وعشرين عام،
فاطمة رضي الله عنها لما رسول الله ﷺ أخبرها بإن علي رضي الله عنه تقدم لخطبتها وأخبرها إن مهرها كان درع مقلتش مثلا إزاي أكون بنت رسول الله ويكون مهري درع ثمنه أربعة دراهم 😒
والدرع ده كان ثمنه في الحقيقة 400 درهم والدرهم الواحد يساوي ثلاثة جرام من الفضة،
وبحسبة بسيطة كده يبقى الأربعمائة درهم يساووا حوالي 8664 جنيه مصري
يعني مهر بنت رسول الله ﷺ سيدة نساء أهل الجنة وسيدة نساء العالمين كان 8664 جنيه،
ولو كان المهر العالي حاجة حلوة كان رسول الله ﷺ أمر بيه زي ما عمر بن الخطاب رضي الله عنه قال:
"لا تُغالوا بصُدُقِ النِّساءِ فإنَّها لو كانت مَكرمةً في الدُّنيا أو تقوى عندَ اللَّهِ لَكانَ أولاكم بِها النَّبيُّ ﷺ"
《صحيح أبي داود》

أما جهازها إللي رسول الله ﷺ جهّزها بيه فكان قطيفة، ثوب يعني ألبسه رسول الله ﷺ لفاطمة، وقِرْبة، بلغة عصرنا الإزازة إللي بيتحط فيها ماء، ووسادة من جلد حشوها نبات رائحته حلوة،
بس كده😅
ما هو يا جماعة رسول الله ﷺ قال:
"ما لي وما للدُّنيا، ما أنا في الدُّنيا إلَّا كراكبٍ استَظلَّ تحتَ شجرةٍ ثمَّ راحَ وترَكَها"《صحيح الترمذي》
زي لما بنسافر بلد تانية كده يومين تلاتة، هل بناخد كل حاجاتنا إللي في الشقة معانا ولّا بناخد إللي بيكفينا في الرحلة؟!
أهه هي دي الدنيا بالنسبة للآخرة، وكان طبيعي إن السيدة فاطمة إللي اتربت في بيت النبوة وأخلاقها تُشبه أخلاق رسول الله ﷺ جدا إن يكون زواجها سهل ميسور ليس فيه أي صورة من صور متاع الدنيا الزائل،
وانضرب بها المثل في زواجها اليسير المهر، القليل المؤنة👌

☆طيب سؤال: هل المفروض إننا نعمل زي علي وفاطمة رضي الله عنهما في موضوع الزواج🤔

شوفوا،
عامّة الصحابة كانوا فقراء، وحتى بيت رسول الله ﷺ كان بيت فقير، يعني كان ممكن يعدي على رسول الله ﷺ أيام من غير ما يأكل طعام مطبوخ، فكان طبيعي إنهم يتزوجوا عالحال إللي هم فيها،
وكذلك في عصرنا فالمرأة تتزوج من صاحب الخلق والدين إللي يتناسب مع حالها ووضعها؛ لأن التكافؤ بين الزوجين مطلوب👌
وطبعا كل ما خففنا في تكاليف الزواج كان الزواج والمرأة نفسها مباركة،
يعني موضوع إن واحدة تجيب ستين فوطة وثلاثين ملاية سرير، ومش عارفة كم طقم حلل وكم طقم كاسات وكوبيات و...و...
ده غير بقى الفرح وإللي بيحصل فيه والطلبات إللي بتتطلب من الشخص إللي بيتقدم وإزاي تكون أقل من بنت خالها ولّا أختها ولّا بنت صاحبتها والكلام إللي يخلي البنات تعنّس أو تتزوج أي واحد والسلام بسبب التعقيدات دي😑
كل ده مكنش من هدي رسول الله ﷺ ولا من هدي الصحابة،
ده كمان المغالاة في المهور مكروهة👌

وحتى بعد زواج السيدة فاطمة من علي مكنتش حياتها في بيت زوجها مُترَفة ولا ناعمة بل كانت أقرب إلى حياة التقشّف والخشونة؛
لأن علي رضي الله عنه على عِظم مكانته مكنش عنده مال كتير،
فعاشت السيدة فاطمة رضوان الله عليها في بيتها حياة بسيطة متواضعة،
فهي إللي كانت بتطحن وتعجن العيش بتاعها بإيدها، وخدوا بالكم إن مكنش زمان في دقيق أو طحين😅
دي هي إللي كانت بتجيب الحبوب و تطحنها بالرّحى، وهو نوع معين من الحجر المدوّر، وتقعد تعجن وتخبز،
ده غير مسؤوليات البيت التانية بالإضافة إلى حقوق زوجها عليها، مع وجود الحمل كمان😬
وكان رسول الله ﷺ قَسَم العمل بينها وبين علي رضي الله عنه،
فقال لهما إن الأعمال داخل البيت من مسؤولية السيدة فاطمة، والأعمال خارج البيت مسؤولية علي رضي الله عنه،
كل ده وهي بنت مين، بنت السيدة خديجة إللي كانت من أغنى النساء في مكة،
ومن كثرة شغل البيت تعبت جدا، والرحى إللي بتطحن بيها الحبوب كل يوم أثّرت في إيدها وتعبتها،
فذهبت لرسول الله ﷺ تطلب منه خادم، يعني بلغة عصرنا عايزة شغالة تساعدها في مسؤولياتها،
فلما ذهبت لرسول الله ﷺ ملقتهوش، فقالت لعائشة زوجة رسول الله ﷺ على طلبها ورجعت،
فلما جاء رسول الله ﷺ أخبرته السيدة عائشة، فذهب رسول الله ﷺ لبيت السيدة فاطمة وكانت هي وعلي خلاص هيناموا فجاءهم رسول الله ﷺ،
فأرادت السيدة فاطمة إنها تقوم لتستقبل رسول الله ﷺ فقال رسول الله ﷺ إنها تخليها في مكانها وقعد هو وسطهم وقال لهما:

"ألَا أُعَلِّمُكُما خَيْرًا ممَّا سَأَلْتُمَانِي؟
إذَا أخَذْتُما مَضَاجِعَكُما تُكَبِّرَا أرْبَعًا وثَلَاثِينَ، وتُسَبِّحَا ثَلَاثًا وثَلَاثِينَ، وتَحْمَدَا ثَلَاثًا وثَلَاثِينَ؛ فَهو خَيْرٌ لَكُما مِن خَادِمٍ."
《صحيح البخاري》
يعني أنا هقولكم على حاجة أحسن من الخادم إللي طلبتوه وهي إنكم لما تيجوا تناموا تقولوا سبحان الله 33 مرة والحمد لله 33 مرة والله أكبر 34؛
لأن الذّكر يعطي قوة للبدن كبيرة وربنا بيعطي الإنسان قدرة على التحمل،
وفعلا علي رضي الله عنه والسيدة فاطمة عملوا كده والسيدة فاطمة لم تحتاج لخادم يساعدها👌

ولدت السيدة فاطمة خمسة أطفال هم:
الحسن والحسين وهما سيدا شباب أهل الجنة، وولدت مُحسن، وأم كلثوم، وزينب،
أم كلثوم دي هتتزوج الخليفة عمر بن الخطاب بعدين، مع إن فارق السن بينهم كبير جدا بس ده كان عادي عندهم في زمانهم 😅

من الأحداث إللي حصلت في حياة السيدة فاطمة وتعتبر من المواقف الشديدة عليها؛ لما سمعت بخبر مقتل رسول الله ﷺ،
فبعد غزوة أحد وهزيمة المسلمين بسبب معصية فريق الرماة لأمر رسول الله ﷺ؛
بعض المسلمين هربوا من أرض المعركة وكانوا سمعوا صرخة واحد من المشركين وهو بيقول قُتل محمد،
فالمجموعة دي وصلت المدينة وعندهم الخبر بمقتل رسول الله ﷺ،
فأخبروا أهل المدينة باللي حصل لجيش المسلمين وإن رسول الله ﷺ قُتل،
فالنساء قعدت تبكي وتصرخ واتقلبت المدينة، و مكنش لسه اتحرم الصراخ على الموتى ساعتها،
فاطمة بنت رسول الله ﷺ لما وصل لها الخبر، خرجت مع مجموعة من النساء واتجهوا لمكان المعركة،
عشان يساعدوا المسلمين المصابين ويتأكدوا من الخبر،
فالمسافة بين المدينة وجبل أحد مش بعيدة، ثلاثة أميال ونصف، يعني تقريبا خمسة كيلو ونصف 🤔
وصلت النساء وكن تقريبا أربعة عشرة امرأة في الوقت إللي المشركين كانوا انسحبوا فيه من أرض المعركة،
عرفت السيدة فاطمة إن رسول الله ﷺ لسه على قيد الحياة فأول ما شافت رسول الله ﷺ حضنته، وشافت الدم يسيل من وجهه ورأسه ﷺ بعد إللي حصل له في الغزوة،
فقعدت تغسل الدم بالماء، لقت إن الماء بيزوّد الدم،
فأخذت قطعة من حصير وحرقتها لحد ما بقت رماد، تراب حار يعني ووضعته على الجرح زي الكمادات كده فتوقف الدم،
ورجعت مع رسول الله ﷺ للمدينة وفضلت تراعيه لحد ما خف.

أشد المواقف بقى إللي حصلت لها على الإطلاق هو موت أبيها ﷺ، فلما كان رسول الله ﷺ في مرض الموت دخلت عليه تزوره وكان من عادته إنه لما يشوفها يقوم لها ويقبلها بين عينيها ويقعدها مكانه،
وهي كمان كانت بتعمل كده، كان لما يأتيها كانت تقوم وتقبله بين عينيه وتقعده مكانها،
فالمرة دي رسول الله ﷺ كان مريض جدا ومقدرش يقوم لها ﷺ، لكنه رحب بها، وأجلسها بجانبه وقال لها سر في أذنها فبكت بكاء شديد، وبعدين قال لها سر تاني فضحكت،
فلما سألتها السيدة عائشة عن إللي رسول الله ﷺ قاله لها قالت لها:
" ما كنت لأفشي على رسول الله ﷺ سرَّه"
《صحيح البخاري》
ولما اشتد المرض على رسول الله ﷺ تألمت لمرض رسول الله ﷺ وقالت:
وَاكَربَ أَبَتَاهُ! يعني بتتألم وتتأوه لمرض رسول الله ﷺ
فقال لها رسول الله ﷺ:لَيْسَ عَلَى أَبِيكِ كَرْبٌ بَعْدَ الْيَوْمِ"
《صحيح البخاري》
يعني خلاص بعد النهاردة مفيش ألم ولا وجع لأن رسول الله ﷺ لما يموت هيدخل الجنة،
فلما مات رسول الله ﷺ قالت:
"يَا أَبَتَاهُ، أَجَابَ رَبًّا دَعَاهُ! يَا أَبَتَاهُ، جَنَّةُ الْفِرْدَوْسِ مَأْوَاهُ! يَا أَبَتَاهُ، إِلَى جبْرِيلَ نَنْعَاهُ! "《صحيح البخاري》

بعد موته ﷺ السيدة عائشة سألت فاطمة عن السر مرة تانية فقالت لها إن رسول الله ﷺ أسَرَّ إلَيَّ:
"إنَّ جِبْرِيلَ كانَ يُعَارِضُنِي القُرْآنَ كُلَّ سَنَةٍ مَرَّةً، وإنَّه عَارَضَنِي العَامَ مَرَّتَيْنِ، ولَا أُرَاهُ إلَّا حَضَرَ أجَلِي، وإنَّكِ أوَّلُ أهْلِ بَيْتي لَحَاقًا بي. فَبَكَيْتُ،
فَقالَ: أَمَا تَرْضَيْنَ أنْ تَكُونِي سَيِّدَةَ نِسَاءِ أهْلِ الجَنَّةِ -أوْ نِسَاءِ المُؤْمِنِينَ؟ فَضَحِكْتُ لذلكَ."
《صحيح البخاري》
يعني رسول الله ﷺ بيقول لها إن جبريل عليه السلام كان يراجع معه القرآن كل سنة مرة، أما السنة دي فراجعه معاه مرتين، فده كده معناه إن أجلي خلاص قرب ينتهي، وإنك أول واحدة من أهلي هتموتي بعدي، فبكت السيدة فاطمة لفراق رسول الله ﷺ،
فلما رآى رسول الله ﷺ حزنها قال لها أما ترضي أن تكوني سيدة نساء أهل الجنة أو سيدة نساء المؤمنين؟
فكان ده سبب ضحكها.

بعد موت رسول الله ﷺ بفترة قصيرة مرضت السيدة فاطمة مرض شديد ألزمها الفراش، وكان علي رضي الله عنه هو الذي يرعاها،
وجاءها أبو بكر رضي الله عنه يزورها ويسترضيها مرة أخرى في قضية الميراث إللي اتكلمنا عنها قبل كده،

يعني هو أراد إنه يأكد لها إنه لم يمنع عنها ميراث أبيها ولكن الأنبياء لا يورثوا زي ما شرحنا قبل كده وهي رضي الله عنها رضيت عنه ومكنش في أي مشاكل بينهما،
حتى إن زوجة أبي بكر وهي أسماء بنت عُمَيس كانت تساعد علي رضي الله في رعاية وتمريض السيدة فاطمة،
والسيدة فاطمة قالت لأسماء لما اشتد عليها المرض وعرفت إنها هتموت:
"يَا أَسْمَاءُ، إِنِّي قَدِ اسْتَقْبَحْتُ مَا يُصْنَعُ بِالنِّسَاءِ أَنْ يُطْرَحَ عَلَى الْمَرْأَةِ الثَّوْبُ فَيَصِفُهَا"《حديث حسن》
يعني هي مكسوفة وتستحي إنها لما تموت؛ الرجال يشوفوا هيئة جسمها المستغطي كله بالكفن وإللي مفيش أي حاجة ظاهرة منه؛
لأن زمان النعش كان عبارة عن خشبة مسطحة بيوضع عليها الميت رجل أو امراة، وكان الكل بيشوف هيكل الجسم وحجمه،
فهي مكنتش عايزة حد يشوف هيكلها المتغطي بالكفن،
فقالت لها أسماء:
"يَا ابْنَةَ رَسُولِ اللهِ أَلَا أُرِيكِ شَيْئًا رَأَيْتُهُ بِالْحَبَشَةِ؟!
يعني تحبي أعملك حاجة شوفتها في الحبشة؟
"فَدَعَتْ أسماء بِجَرَائِدَ رَطِبَةٍ فَحَنَتْهَا، ثُمَّ طَرَحَتْ عَلَيْهَا ثَوْبًا"
《حديث حسن》
يعني أسماء صنعت لها النعش المُغطى من جوانبه إللي شبه الصندوق ده عن طريق إنها أتت بجرائد نخل طرية وخليتها منحنية على النعش زي القوس ) ووضعت فوقها ثوب،
فمبقاش ظاهر لأي حد مين إللي داخل النعش، ومبقاش في أي حاجة توصف الجسم،
فلما رأته فاطمة السيدة فاطمة قالت لـ «أسماء»:
"مَا أَحْسَنَ هَذَا وَأَجْمَلَهُ لا تُعْرَفُ بِهِ الْمَرْأَةُ مِنَ الرَّجُلِ"
ودعت لأسماء:"سَتَرَكِ اللهُ كَمَا سَتَرْتِنِي"
فكانت السيدة فاطمة هي أول امرأة غُطّيَ نعشها في الإسلام على تلك الصفة،
وأوصت السيدة فاطمة أسماء بنت عُمَيس إنها لما تموت تغسلها أسماء وعلي وتُدفن في الليل عشان محدش يشوفها، من شدة حياءها رضي الله عنها،
وهي بتوصي بكل ده والموضوع شاغل بالها وهي هتبقى ميته وانقطع التكليف عنها، يعني خلاص مش هتتحاسب على أي شيء،
والكفن كفيل بسترها، يعني مجرد الكفن بس هيبقى مغطيها ومش ظاهر منها شيء،
ومع هذا فكان إللي أهمّها وأشغل بالها احتمال نظر الرجال إلى الكفن الذي قد يصفها👌
فما بالكم باللي تختار بإرادتها إنها تلبس الملابس التي تُظهر أجزاء من جسدها وملابس تحدد جسدها وهي مكلفة وهتتحاسب على كده وسمعت وعيد رسول الله ﷺ وهو يقول:
صِنْفَانِ مِنْ أَهْلِ النَّارِ لَمْ أَرَهُمَا، وذكر منهما:
"نِسَاءٌ كَاسِيَاتٌ عَارِيَاتٌ مُمِيلَاتٌ مَائِلَاتٌ، رُؤُوسُهُنَّ كَأَسْنِمَةِ الْبُخْتِ الْمَائِلَةِ لَا يَدْخُلْنَ الْجَنَّةَ وَلَا يَجِدْنَ رِيحَهَا"《رواه مسلم》
فتخيلوا بُعد النساء المتبرجات الكاسيات العاريات عن الجنة نفسها،
يعني الريحة تتشم من على أقصى بُعد وهو خمسمائة سنة، والكاسيات العاريات مش هيشموا الريحة دي ربنا يعافينا، يعني هم بُعاد أوي عن ريحة الجنة فما بالك ببعدهم عن الجنة نفسها هيكون أد إيه👌
وكل ده في مقابل إيه؟!
في مقابل ملابس ضيقة مفصّلة لجسدها؟!!
في حد عاقل يبيع جنة عرضها السماوات والأرض عشان شوية ملابس؟!!!
رضي الله عن السيدة فاطمة وجمعنا بها في الجنة، وسترنا الله وإياكم في الدنيا والآخرة🤲

☆ملحوظة مهمة:
انا مضطرة للتوقف عن تنزيل الحلقات في الوقت الحالي بسبب ظروفي الصحية، فبعتذر لكم جدا الموضوع فعلا خارج عن إرادتي🙈
فالحلقات هتتوقف فترة،
وهتكون أول حلقة بعد الإنقطاع إن شاء الله يوم:
الأحد ٣٠ إبريل، إلا لو ربنا قدر شيء تاني خارج عن إرادتي🙈
ولو مستعجلين تقدروا تسمعوا حلقات الخلافة الراشدة للدكتور راغب السرجاني، هتلاقوها موجودة على اليوتيوب👍

بلغنا الله وإياكم رمضان وليلة القدر ورزقنا فيهما العمل الصالح الذي يقبله ويرضاه منا🤲
فرصة إنكم تقرأوا حلقات الدار الآخرة مرة ثانية لزيادة الإيمان والاستعداد لرمضان❤️

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

وزي مانتم عارفين؛ لو في أي ملاحظة ياريت تقولوا لي؛
فالمؤمن مرآة أخيه👌

مصادر حلقة النهاردة في التعليقات👇

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy

⭐️المصادر⭐️

https://islamstory.com/ar/artical/22010/%D9%81%D8%A7%D8%B7%D9%85%D8%A9_%D8%A8%D9%86%D8%AA_%D8%B1%D8%B3%D9%88%D9%84_%D8%A7%D9%84%D9%84%D9%87

https://www.google.com/amp/s/islamqa.info/amp/ar/answers/361958

https://islamqa.info/amp/ar/answers/209478

https://dorar.net/hadith/sharh/11972

https://www.google.com/amp/s/www.islamweb.net/amp/ar/article/204496/

https://dorar.net/hadith/sharh/60614

https://dorar.net/hadith/sharh/118093

https://www.dorar.net/hadith/sharh/60910

https://dorar.net/akhlaq/1723/%D8%AB%D8%A7%D9%86%D9%8A%D8%A7-%D8%B0%D9%85-%D8%A5%D9%81%D8%B4%D8%A7%D8%A1-%D8%A7%D9%84%D8%B3%D8%B1-%D9%88%D8%A7%D9%84%D9%86%D9%87%D9%8A-%D8%B9%D9%86%D9%87-%D9%81%D9%8A-%D8%A7%D9%84%D8%B3%D9%86%D8%A9-%D8%A7%D9%84%D9%86%D8%A8%D9%88%D9%8A%D8%A9

https://dorar.net/hadith/sharh/41925

https://www.tarbikafa.com/2017/10/blog-post_21.html?m=1

https://www.google.com/amp/s/www.islamweb.net/amp/ar/fatwa/133957/

https://majles.alukah.net/t142615/

https://www.dorar.net/hadith/sharh/14095

https://youtu.be/qCyg6LCU8nQ

قناة قصص الأنبياء و السيرة النبوية بقلم إيمان شلبي
https://t.me/prophets_stories

بوت الاستفسارات الخاصة بقصص الأنبياء و السيرة النبوية ...
اترك سؤالك الخاص بالحلقات و سنقوم بالرد قريياً بإذن الله... https://t.me/prophetsstories_bot

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

السلام عليكم ورحمة الله وبركاته يا جماعة🙋
أولا:
كل عام أنتم بخير وتقبل الله طاعاتنا جميعا وبلغنا الله وإياكم ليلة القدر ورزقنا فيها العمل الصالح الذي يرضاه ويقبله منا وجعلنا وإياكم من المغفور لهم ومن عتقائه من النار🤲

ثانيا:
أنا للأسف مضطرة أتوقف عن كتابة حلقات الخلفاء لأجل غير مسمى بسبب ظروفي الصحية🙈
احنا كان ميعادنا يوم الأحد ٣٠ إبريل على أساس إني أكون خلصت كورس العلاج وتكون حالتي اتحسنت لكن نتيجة التحاليل كان لها رأي آخر وخصوصا إن مفيش أي تحسن في وضعي الصحي😅
فمعلش اعذروني مضطرة أتوقف حتى يأذن الله بالعودة مرة أخرى،
والموضوع يا جماعة مش خطير ولا حاجة الحمد لله هو اضطراب في الهرمونات لكنه مأثر على وظائف الجسم من ناحية التركيز والنوم والذاكرة والإجهاد والإنفعال غيرها،
وده ممكن التعامل معاه لو أنا متفرغة ومعنديش مسؤوليات تانية،
لكن المشكلة إني مش قادرة أوفق بين كتابة الحلقات وبين دوري كأم وخصوصا إن اثنين من عيالي في مرحلة ما يسمى ب《المراهقة (١٤ و١٦) سنة》وانتم عارفين الفترة دي حرجة أد إيه والأبناء محتاجين اهتمام ومتابعة وتوجيهات وصبر على مشاكلهم إللي مش بتخلص وخصوصا إنهم معتمدين عليّ بشكل كبير حتى في الدراسة المدرسية بحكم إنهم مش بياخدوا دروس خصوصية😅

ففي الوقت الحالي محتاجة إني أوجه طاقتي لهم لأن ربنا أمرني بكده لما قال رسول الله ﷺ:
"الأم في بيتها راعية ومسؤولة عن رعيتها"
وقال رسول الله ﷺ
"ما مِن عَبْدٍ اسْتَرْعاهُ اللَّهُ رَعِيَّةً، فَلَمْ يَحُطْها بنَصِيحَةٍ، إلَّا لَمْ يَجِدْ رائِحَةَ الجَنَّةِ"
يعني إللي يقصر في حق رعيته ويضيع حقوقها الدينية والدنيوية؛ يكون بعيد جدا عن الجنة ولا يدخلها،
وأنا أصلا هدفي رضا ربنا والجنة فإزاي بقى أرضي ربنا بما يغضبه🙃
وربنا قال في حديث قدسي:
"ما تَقَرَّبَ إلَيَّ عَبْدِي بشَيءٍ أحَبَّ إلَيَّ ممَّا افْتَرَضْتُ عليه"
يعني إللي عايز يتقرب إلى ربنا صح يعمل إللي ربنا فرضه عليه أولا قبل أي شيء💁
فالأصل إنه لو تعارض عملين صالحين نقدم الفرض والأهم والأَوْلى👌
ودي نصيحة مني لكم لأن ساعات الشيطان بيخلينا ننسى النقطة دي ويشغلنا بالمفضول عن الفاضل ويشغلنا بالمهم عن الأهم،
واحنا مش عايزين نكون في النهاية من الذين ضل سَعيهم في الحياة الدنيا وهم يَحسبون أنهم يُحسنون صنعا😅
فانتبهوا حتى لا تقعوا في هذا الفخ👌

وطبعا بعتذر لكل حد أرسل سؤال على بوت القناة وأنا لسه مردتش بس والله الوقت ضيق جدا في رمضان وعيالي عندهم امتحانات وأنا نفسي تعبانة🙈
فإن شاء الله هرد في أقرب وقت❤️

اعذروني على الإطالة لكن من حقكم عليّ إني أقول لكم أسباب التوقف،
وأنا نيتي إن شاء الله إني أكمل الحلقات ونوصل للدولة الأموية ونشوف فتح الأندلس وقصة التتار وفتح القسطنطينية، بس ربنا يبارك في الوقت والعمر إن شاء الله ويأذن إننا نكمل😅
وتقدروا يا جماعة تسمعوا حلقات الخلفاء من دكتور راغب السرجاني هتلاقوها على اليوتيوب،
الحلقات جميلة جدا وهو وصل لخلافة عثمان رضي الله عنه👌

أختم معكم بالقصة دي من السيرة بمناسبة العشر الأواخر وليلة القدر👇
وطبعا مسموح إعادة النشر في كل مكان👌

#ليلة_القدر
#قصص_من_السيرة
#لا_تحقرن_من_المعروف_شيئا

في غزوة تبوك، كان في مجموعة من المسلمين عايزين يخرجوا يجاهدوا لكن كانوا فقراء ورسول الله ﷺ مكنش عنده المال ولا البعير إللي يحملهم عليه،
فمشيوا من عند رسول الله ﷺ وهم بيبكوا.

واحد منهم اسمه عُلْبَة بن زيد بن عمرو الحارثي رجع بيته وهو معندوش حاجة يتصدق بيها لجيش المسلمين ولا عنده القدرة إنه يخرج للجهاد،
فعمل حاجة محدش يتخيلها ولا يتصورها👌
في الليل كده بينه وبين ربنا من غير ما حد يعرف قال:
"اللهم إنه ليس عندي ما أتصدقُ به،
اللهم إني أتصدقُ على كل مسلم بكل مظلمةٍ أصابني فيها من مال أو جسد أو عِرْض"
يعني كأنه بيقول لربنا يارب أنا معنديش حاجة أتصدق بيها زي باقي الصحابة إللي جهزوا جيش العُسرة
بس أنا عايز أخد أجر الصدقة فأنا هتصدق على كل مسلم بكل مظلمة أصابني فيها من مال أو جسد أو عِرْض😔

هو كان عايز يساعد المسلمين بأي حاجة ومش معاه حاجة يساعدهم بيها؛ يبقى خلاص يساعدهم بالعفو عن ظلمهم له ورد حسناتهم إليهم،
يعني يوم القيامة كل واحد كان اعتدى عليه أو ظلمه أو أخد ماله بغير حق هييجي يقف قصاد ربنا يوم القيامة ويدفع له من حسناته،
فهو بقى تصدق على المسلمين بالمظالم دي، يعني مش هياخد منهم حسنات يوم القيامة👌

تاني يوم الصبح خرج مع الناس عادي للصلاة ومحدش يعرف حاجة،
فبعد الصلاة رسول الله ﷺ قال: أين المتصدق بعِرضِه البارحة؟
يعني فين الرجل إللي تصدق على المسلمين بعرضه امبارح؟
فقام عُلبة رضي الله عنه من وسط الناس،
فقال له رسول الله ﷺ:
"أبشر فوالذي نفسي بيده لقد كُتبتَ في الزكاةِ المُتَقبّلة"👌

على فكرة هو مكنش مستني حاجة في المقابل، ولا كان متخيل إن ربنا هيُخبر رسول الله ﷺ من فوق سبع سماوات بالصدقة دي، وكمان يبشره بقبول الصدقة ضمن الزكاة المتقبلة،
يعني هو كان عنده كمية صدق وإخلاص أدت إن ربنا تقبل منه العمل إللي ممكن يكون في وجهة نظر البعض عمل بسيط ملوش أي لازمة،
وممكن لو حد كان سمعه وهو بيقول كده كان ممكن يقول طيب وانت الصدقة بتاعتك دي هتفيد الجيش في إيه يعني😏
لكن هو بذل إللي يقدر عليه وهو مش متخيل إن الصدقة بتاعته دي هيُضرب بيها المثل إلى يوم القيامة👌

الشاهد من القصة دي إن محدش فينا يستهين أبدا بأي عمل صالح مهما كان بسيييييط واحنا في العشر الأواخر من رمضان وفيها ليلة القدر،
وكمان منعرفش إيه العمل إللي ربنا ممكن يتقبله مننا،
مهما كنت غرقان في المعاصي وشايف إنك ضايع؛
فمتضيعش العشر الأواخر من رمضان، اعمل أي عمل صالح مهما كان في وجهة نظرك بسيط،
وممكن يكون العمل ده هو إللي ربنا يقبله منك ويكون سبب سعادة الدنيا والآخرة👌

ومن الأعمال الصالحة إللي أجرها عااااالي جدا العفو عن الناس،
وممكن لو صدقنا مع الله زي ما صدق عُلْبَة بن زيد بن عمرو الحارثي كده؛ ربنا يبلغنا ببركة الصدق ده ليلة القدر ويرزقنا فيها العمل الصالح إللي يرضاه ويتقبله منا،
واحنا منعرفش إذا كنا هنعيش لرمضان الجاي ولّا لأ،
فلعل رمضان السنة دي آخر فرصة للبعض، فمحدش يفوّت الفرصة دي👌

بلغنا الله وإياكم ليلة القدر ورزقنا فيها العمل الصالح الذي يرضاه ويتقبله منا🤲

متنسوش😊
قال رسول الله ﷺ:
"لا تَحقِرَنَّ مِنَ المَعْرُوف شَيْئًا، وَلَو أنْ تَلقَى أخَاكَ بوجهٍ طَلْق"《صحيح مسلم》

Eman Shalapy

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

فهرس مؤقت لحلقات الخلفاء الراشدين حتى يتم استكمال الحلقات **


الخلفاء الراشدين مقدمة
https://t.me/prophets_stories/3924
إسلام أبي بكر و جهوده في الدعوة
https://t.me/prophets_stories/3929
إسلام عمر بن الخطاب
https://t.me/prophets_stories/3943
هجرة أبي بكر و عمر
https://t.me/prophets_stories/3953
فضائل و مكانة أبي بكر و عمر الجزء الأول
https://t.me/prophets_stories/3964
فضائل و مكانة أبي بكر و عمر الجزء الثاني
https://t.me/prophets_stories/3975
فضائل و مكانة أبي بكر و عمر الجزء الثالث
https://t.me/prophets_stories/3985
فضائل و مكانة أبي بكر و عمر الجزء الرابع
https://t.me/prophets_stories/3995
ثبات أبي بكر أمام فتنة موت رسول الله ﷺ و ما بعدها
https://t.me/prophets_stories/4005
اجتماع الأنصار في سقيفة بني ساعدة
https://t.me/prophets_stories/4015
بين المهاجرين و الأنصار في السقيفة
https://t.me/prophets_stories/4025
الأئمة من قريش
https://t.me/prophets_stories/4036
التلميح باستخلاف أبي بكر
https://t.me/prophets_stories/4046
أبو بكر أول الخلفاء الراشدين
https://t.me/prophets_stories/4056
خطبة أبي بكر و أصول الولاية العامة في الإسلام
https://t.me/prophets_stories/4066
ردة العرب و إنفاذ بعث أسامة
https://t.me/prophets_stories/4076
أسباب قتال المرتدين
https://t.me/prophets_stories/4086
إدارة الشؤون الداخلية في المدينة الجزء الأول
https://t.me/prophets_stories/4095
إدارة الشؤون الداخلية في المدينة الجزء الثاني
https://t.me/prophets_stories/4104
رسالة أبي بكر للمرتدين و لقادة الجيوش
https://t.me/prophets_stories/4117
جيش خالد يواجه طليحه الأسدي و مالك بن نُويرة
https://t.me/prophets_stories/4129
الطريق إلى اليمامة
https://t.me/prophets_stories/4138
التعريف بقادة جيوش المسلمين في حروب الردة
https://t.me/prophets_stories/4148
القضاء على المرتدين جنوب المدينة
https://t.me/prophets_stories/4158
جيش خالد و جيش مسيلمة في أرض اليمامة
https://t.me/prophets_stories/4169
معركة اليمامة
https://t.me/prophets_stories/4179
اقتحام حصن الحديقة
https://t.me/prophets_stories/4191
انتصار المسلمين في معركة اليمامة
https://t.me/prophets_stories/4202
من شهداء الصحابة في معركة اليمامة الجزء الأول
https://t.me/prophets_stories/4219
من شهداء الصحابة في معركة اليمامة الجزء الثاني
https://t.me/prophets_stories/4231
جمع القرآن من البداية إلى النهاية الجزء الأول
https://t.me/prophets_stories/4242
جمع القرآن من البداية إلى النهاية الجزء الثاني
https://t.me/prophets_stories/4251
مواقف من حياة أبي بكر بعد الخلافة
https://t.me/prophets_stories/4262
فاطمة بنت رسول الله ﷺ
https://t.me/prophets_stories/4272

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

قناة قصص الأنبياء و السيرة النبوية بقلم إيمان شلبي
https://t.me/prophets_stories

📢📢من تريد سماع قصص الأنبياء كما كتبتها إيمان شلبي تستطيع الأن عن طريق الانضمام للقناة الصوتية الخاصة بالقصص ...

🌺🌺قناةصوتية للنساء فقط🧕🏻
لدخول القناة التواصل في تليجرام مع
http://t.me/AyaRmda

أو ماسنجر مع https://www.facebook.com/aya.yoty.503?mibextid=ZbWKwL