#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الثانية
#إسلام_عمر_بن_الخطاب

قلنا المرة إللي فاتت إن هيحصل حدث هيخلي للمسلمين قوة أكثر من الأول وهيكتسب أبو بكر رضي الله عنه صاحبه المُقرّب الثاني بعد رسول الله ﷺ💁

تعالوا بقى نشوف قصة الصاحب ده👌

كنا اتكلمنا المرة إللي فاتت عن مكة ووجود الكعبة بيت الله الحرام فيها، وقلنا إن الكعبة كان حولها الأصنام وإن الناس بتجتمع عند الكعبة سواء للعبادة أو للقاء بعضهم بعض،
كان من أفعال المشركين في الجاهلية إنهم بيذبحوا الذبائح للتقرب إلى الآلهة بتاعتهم،
ففي مرة كان في شاب في بداية العشرينات من عمره نائم عند الآلهة، فجاء رجل بعِجل عشان يذبحه عند واحد من الآلهة قريب من الشاب النائم،
فبعد ما ذبح العجل؛ سمع الشاب النائم واحد بيصرخ صراخ عالي شديد جدا لم يسمع مثله أبدا يقول:
"يا جَلِيحْ، أمْرٌ نَجِيحْ، رَجُلٌ فَصِيحْ، يقولُ: لا إلَهَ إلَّا اللَّهُ"
《صحيح البخاري》

فالناس قاموا من مكانهم، لكن الشاب قال:
"لا أبْرَحُ حتَّى أعْلَمَ ما ورَاءَ هذا"《صحيح البخاري》
يعني أنا مش هقوم من مكاني غير لما أعرف إيه الحكاية بالضبط👌
فسمع المنادي ينادي مرة تانية ويقول:
"يا جَلِيحْ، أمْرٌ نَجِيحْ، رَجُلٌ فَصِيحْ، يقولُ: لا إلَهَ إلَّا اللَّهُ"
《صحيح البخاري》
فبعدها بوقت بسيط وقف محمد بن عبد الله ﷺ وأخبر الناس إنه نبي أُرسل من عند الله ليدعوا الناس لعبادة الله وحده وترك عبادة الأصنام،
وكان الحدث ده هو بداية بذرة الإسلام في قلب الشاب ده إللي كان اسمه:
عمر بن الخطاب بن نُفيْل بن عبد العزى بن رياح بن عبد الله بن قرط بن رَزاح بن عدي بن كعب بن لؤي بن غالب بن فهر بن مالك بن النضر وهو قريش.

وعمر بن الخطاب ده يبقى ابن عم زيد بن عمرو بن نفيل الموحد إللي اتكلمنا عنه المرة إللي فاتت، وهو كمان يبقى ابن أخت أبو جهل إللي حاول يقتل رسول الله ﷺ أكثر من مرة وكان بيؤذيه على طول ده.

كان عمر بن الخطاب اتعلم القراءة والكتابة ودي حاجة مكنش حد يعرفها كتير،
يعني كان أعداد قليلة إللي كانوا بيعرفوا القراءة والكتابة ومنهم عمر،
أبوه الخطّاب كان رجل ذكي معروف بشدته وغلظته وكان شجاع وجريء، فتأثر عمر بطباع والده،
وكان عمر رجل ذات جسم ضخم ولحية كثيفة طويلة أبيض البشرة مع حمرة خفيفة، أصلع الرأس،
وكان بيلعب رياضة فأجاد المصارعة وركوب الخيل والفروسية،
وكان عمر زيه زي الشباب في عصره بيحب اللهو وبيشرب الخمر، وورث من أبيه ميله لكثرة الزوجات،
فتزوج في حياته سبع نساء 😅
أول واحدة تزوجها هي زينب بنت مظعون وهي أخت الصحابي عثمان بن مظعون، ولدت له حفصة وعبد الرحمن وعبد الله،
وزينب أسلمت في مكة رضي الله عنها.

لما ظهر الإسلام وبدأ المشركون يعذبوا المؤمنين كان هو من أشد الناس تعذيبا للمسلمين👌

في يوم من الأيام بعد الجهر بدعوة الإسلام كان عمر بن الخطاب جالس وكان معاه ابنه عبد الله بن عمر، فمرّ عليهم رجل جميل من المسلمين فقال عمر:
أظن إن الرجل ده كان كاهن في الجاهلية🤔

◇يعني الرجل إللي مر على عمر ده قبل ما يُسلم كان شغال في الكهانة، يعني بيستعين بالجن عشان يقولوا له بعض أمور الغيب إللي كانوا بيسمعوها من الملائكة وهم بيتكلموا عن أقدار الله إللي أمر بيها،
والكاهن غير الساحر،
الساحر بيقول ويكتب طلاسم وكلام غير مفهوم.

فيقول عبد الله بن عمر وهو بيحكي عن الموقف ده:
وكان عمر لما يقول على حاجة: أظن كذا، إلا وكان ظنه في محله👌
لأنه كان مُلهم، وعنده فِراسة،
فقال عمر نادوا على الرجل ده، هاتوه.
فلما جاء الرجل قال: ما رَأَيْتُ كَاليَومِ اسْتُقْبِلَ به رَجُلٌ مُسْلِم😳
يعني أول مرة يُستقبل رجل مسلم الاستقبال ده،
هو قال كده لأنه كان متعود على المعاملة السيئة من المشركين بسبب إسلامه، فالمرة دي عمر نفسه بيستقبله استقبال كويس وبيكلمه كمان.
فقال له عمر إنه قال عليه إنه كان كاهن في الجاهلية،
فالرجل قال له فعلا أنا كنت كاهن 😮

فقال له عمر: إيه أعجب حاجة سمعتها من الجنية بتاعتك🤔
يعني هو كان بيتعامل مع الجن، فبيسأله عن أكتر حاجة عجيبة سمعها من الجنية إللي بيتعامل معاها،
فقال له الرجل:
في يوم كنت في السوق فلقيتها جاية عليّ مفزوعة وقالت له:
شوفت إللي حصل للجن!
بعد ماكانوا بيقعدوا عند أبواب السماء يسمعوا الغيب اتمنعوا من السماع، وأي واحد بيحاول يسمع؛ يترمى بالشُّهب😱

وده إللي ربنا قال عنه في القرآن على لسان الجن:
"وَأَنَّا كُنَّا نَقْعُدُ مِنْهَا مَقَٰعِدَ لِلسَّمْعِ ۖ فَمَن يَسْتَمِعِ ٱلآنَ يَجِدْ لَهُۥ شِهَابًا رَّصَدًا"《سورة الجن آية(9)》

فالجن قعدوا يدوّروا على السبب إللي خلاهم يتمنعوا من خبر السماء،
لحد ما لقوا رجل《وهو رسول الله ﷺ》بيقول لا إله إلا الله😮
فقال له عمر :صدقت👌
وبدأ عمر يحكي له القصة إللي حصلت له لما كان نايم عند الكعبة وسمع الصارخ إللي صرخ وقال:
"يا جَلِيحْ، أمْرٌ نَجِيحْ، رَجُلٌ فَصِيحْ، يقولُ: لا إلَهَ إلَّا اللَّهُ"

☆الكلام ده معناه:
يا جَلِيح《يعني يا وقح ويُقال إنه اسم لشخص》
أمر نَجِيح 《يعني عرفنا إللي حصل》
رجل فَصِيح رجل يتكلم الفصحى《رسول الله يعني》
يقول: لا إله إلا الله،
فمعداش كم يوم إلا وقيل ظهر نبي👌
فكان الصوت إللي عمر بن الخطاب سمعه هو صوت لجنّي بينادي على واحد اسمه جليح وبيقول له إن في نبي ظهر عشان كده احنا اتمنعنا من الاستماع لخبر السماء.

فكده موقف الرجل المسلم إللي حكاه لعمر موافق للموقف إللي حصل لعمر نفسه😮
فساعتها دخل الإسلام في قلب عمر بس لسه لم يسلم👌

لما رسول الله ﷺ أذِن للمسلمين بالهجرة للحبشة؛ كانوا بيخرجوا مُتَسَلّلِين،
يعني مستخبيين عشان محدش يشعر بهم 🤫
في يوم من الأيام حصلت قصة مع عمر بن الخطاب مع واحدة من المسلمات وهي مهاجرة للحبشة، والقصة ذكرها الشيخ الألباني في كتاب《صحيح السيرة》،
القصة بتقول إن واحدة من المسلمات اسمها ليلى بنت أبي حَثمة كانت خرجت للهجرة مع زوجها عامر بن ربيعة،
فعامر بن ربيعة رجع يجيب حاجة وترك زوجته مستنياه على ما يرجع،
ف وهي مستنية زوجها إذ فجأة لقت إللي جاي ناحيتها😳
لقيته عمر بن الخطاب🙊
هيعمل إيه؟!
يا ترى هيأخذها ويعذبها ويهدد زوجها بيها😳
ولّا هيروح يجيب سادات قريش ويمعنوهم من الهجرة😥

فشافها متجهزة للسفر فقال لها:
انتِ خلاص مسافرة يا أم عبد الله😞
فقالت له: أيوة، والله لنخرج من البلد دي بسبب قهركم وآذيتكم لنا لحد ما ربنا يفرجها من عنده😤
فقال لها:
صَحِبَكمُ الله😔...وتركها ومشي،
وأم عبد الله واقفة مستغربة ومصدومة 😳
أول مرة تشوف منه الرقة دي...هو ده عمر الشديد الغليظ على المسلمين😮
يقول لها مع السلامة وكمان وهو حزين😧
وهي واقفة كده جاء زوجها عامر بعد ما جاب الحاجات بتاعتهم،
فقالت له: أما لو كنت شفت عمر من شوية و رقّته معايا 😳
فقال لها: انتِ طمعتي إنه يُسلم😏
قالت له: أه😦
فقال لها: والله لا يُسلم إلا لو حمار الخطاب أسلم😑
يعني لو الحمار أسلم ممكن عمر يسلم😅
وهو قال كده بسبب إللي كان بيشوفه من شدة قسوة وغلظة عمر وشدة يأسه من إسلامه👌

عمر دلوقتي في صراع نفسي:
إيه الدين ده إللي يخلي الناس تتخلى عن كل شيء في حياتها مقابل إنها تحافظ عليه كده!!
وإيه الثبات إللي هم فيه ده رغم العذاب إللي بيتعذبوه بقالهم أكثر من سنتين😳
هل هم فعلا على حق...قائدهم كنا بنقول عليه الصادق الأمين،
وبقالنا ست سنين في مناظرات ومفاوضات😕
طيب لو أنا اتبعتهم هيكون موقفي إيه؟
هل أدخل في الدين ده وأكون تابع لهم😑
لكن أنا سيد من سادات مكة ومحدش يقدر يرد علي كلامي فكده مكانتي هتروح🤔
وكلام كثير يدور في رأس عمر😵
وخصوصا إنه عارف من قلبه صدق دعوة الإسلام من ساعة ما سمع الجني الصارخ وكلامه مع المسلم إللي كان كاهن قبل الإسلام،
فإيه الوضع دلوقتي؟!
دخل عمر في الإسلام بعد ما سمع آيات القرآن💁
وكان عمره لما أسلم: ستة وعشرين سنة.

☆في روايات كثيرة عن كيفية إسلام عمر بن الخطاب حوالي اثنا عشر رواية، لكن كل قصص كيفية إسلام عمر رضي الله عنه: لم تأتِ بإسناد مقبول يُعتمد👌
يعني كلها روايات ضعيفة لا تصح،
لكن كل الروايات الضعيفة دي تدل على إن السبب إللي جعل عمر يسلم هو استماعه للقرآن👌
زي مثلا قصته المشهورة مع أخته فاطمة، إنه لما راح لأخته فاطمة البيت وكان غضبان لما عرف إنها أسلمت مع زوجها،
وسمعهم بيقرأوا القرآن ودخل عليهم وضربهم وبعدين طلب يقرأ القرآن واغتسل وقرأ آيات سورة طه وبعدين راح لرسول الله ﷺ دار الأرقم وأسلم.
والقصة دي بالذات لا تصح مَتنا ولا سندا🙅❌

وفي قصة تانية برده ودي قلناها في السيرة بتقول:
إن بعد إسلام حمزة بن عبد المطلب بثلاثة أيام،
كان عمر رايح عند الكعبة فلقى رسول الله ﷺ لسه جاي وهيصلي،
فكبّر رسول الله ﷺ وبدأ في الصلاة وبدأ يقرأ سورة الحاقة وعمر يسمع القرآن من رسول الله ﷺ:
"الْحَاقَّةُ۩ مَا الْحَاقَّةُ۩ وَمَا أَدْرَاكَ مَا الْحَاقَّةُ۩
كَذَّبَتْ ثَمُودُ وَعَادٌ بِالْقَارِعَةِ۩ فَأَمَّا ثَمُودُ فَأُهْلِكُوا بِالطَّاغِيَةِ......."

فيقول عمر أنا بسمع وأتعجب من الكلام 🤨
فقال عمر: ده والله شاعر🤔
فقرأ رسول الله ﷺ:
" إِنَّهُ لَقَوْلُ رَسُولٍ كَرِيمٍ ۩ وَمَا هُوَ بِقَوْلِ شَاعِرٍ قَلِيلًا مَا تُؤْمِنُونَ"
فقال عمر: يبقى كاهن🤔
فقرأ رسول الله:
"وَلَا بِقَوْلِ كَاهِنٍ قَلِيلًا مَا تَذَكَّرُونَ ۩ تَنْزِيلٌ مِنْ رَبِّ الْعَالَمِينَ"
قال عمر:
فوقع الإسلام في قلبي..كل الشكوك راحت وتيقن إن هو ده دين الحق👌
وبعدها راح لرسول الله ﷺ فأسلم.

والقصة دي كمان ضعيفة لكنها أقل ضعف من قصته مع أخته فاطمة،
فالشاهد يعني إن سبب إسلام عمر هو استماعه للقرآن،
وكان رسول الله ﷺ يدعو ويقول:
"اللَّهمَّ أعزَّ الإسلامَ بأحبِّ هذينِ الرَّجُلَيْنِ إليكَ بأبي جَهْلٍ أو بعُمرَ بنِ الخطَّابِ"《صحيح الترمذي》
يعني رسول الله ﷺ يدعو إن ربنا يختار أفضل هذين الرجلين فيهديه للإسلام ويؤيده به.

وكان رسول الله ﷺ يدعو بالدعاء ده لأن عمر وأبو جهل كان لهما بأس وقوة،
فلو واحد فيهم أسلم فده هيعطي للإسلام عزة ومَنَعة، فلما أسلم عمر فرح بإسلامه رسول الله ﷺ والمسلمون فرح شديد جدا، فقد قَالَ عبدُ اللَّهِ بن مسعود: "مَا زِلْنَا أعِزَّةً مُنْذُ أسْلَمَ عُمَرُ"
《صحيح البخاري》
يعني من قوة عمر وشجاعته كان ده سبب في نصرة الدين وحفظ المسلمين، فكانت الدعوة من نصيب عمر رضي الله عنه فهو كان أفضل وأخير من أبي جهل👌

بعد ما أسلم عمر بن الخطاب راح وسأل بين الناس مين أكثر واحد بينقل الكلام في مكة 🤔
فقيل له:
جميل بن مَعمَر🤨
فراح له عمر وقال له: يا جميل معرفتش إللي حصل 😈
أنا أسلمت ودخلت في دين محمد 😁
فجميل بن معمر مكلموش ولا سأله ولا رد عليه😳
راح واخد هدومه وطالع، وعمر وراه لحد ما وصل لباب المسجد الحرام وصرخ بأعلى صوته:
يا معشر قرااااايش لقد صبأ عمر 📣📣

☆الصابئ يعني إللي بيغير دينه

فقال له عمر:
كذبت...بل أنا أسلمت👌
فراح الناس قايمين عليه وقعدوا يضربوه🙊
وهو مسكتش😅
قعد يضرب فيهم هو كمان😅
وقعدوا يضربوا في بعض مدة طويلة لحد ما عمر وقع مبقاش قادر يقوم😮
وراح قايل لهم:
اعملوا إللي تعملوه والله لو كنا ثلاثمائة رجل لنسيب لكم البلد أو نطلعكم انتم منها😤
ف وهم عمالين يتخانقوا كده عدى عليهم رجل كبير في السن من سادات مكة هو العاص بن وائل، شاف المنظر ...عمر بينضرب😦...فقال لهم إيه إللي حصل 😐
فقالوا له: صبأ عمر 😑
فقال لهم: وانتم مالكم 😕
واحد اختار لنفسه حاجة إيه إللي يدخلكم في الموضوع🤨
انتم مفكرين إن قبيلته هتسيبكم كده عادي من غير ما تنتقم منكم...اتركوه😑
فتركوا عمر وبدأ عمر يجهر بالإسلام في كل مكان و محدش يقدر يتعرض له بأذى👌
《صحيح السيرة للشيخ الألباني》

يقول عبد الله بن مسعود وكان من الصحابة الأوائل في الإسلام: إسلام عمر كان فتح لنا،
مكنش حد فينا من المستضعفين يقدر يصلي عند الكعبة،
فأول ما أسلم عمر راح على طول صلى عند الكعبة،
فقريش ضربوه،
فضربهم لحد ما فرض نفسه عليهم وبقى يصلي والمسلمين يصلوا وراه ومحدش يقدر يتعرّض لهم بأذى،
وكان شديدا على الكفار بعد ما كان شديدا على المسلمين قبل إسلامه رضي الله عنه.
وبكده بقى عندنا الوزير الثاني لرسول الله ﷺ والصاحب الثاني لأبي بكر الصديق رضي الله عنه👌

مرت الأيام في مكة ورسول الله ﷺ والمسلمون معه يتعرضون للأذى من قريش، حتى حدثت حادثة زلزلت المجتمع المكي سواء الكفار أو المسلمين حتى إن هناك مَن ارتد من المسلمين بسبب هذه الحادثة😶
حصل إيه؟
ويا ترى كان إيه رد فعل أبي بكر بن أبي قحافة؟
ده إللي هنعرفه الحلقة الجاية إن شاء الله👌

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

وزي مانتم عارفين؛ لو في أي ملاحظة ياريت تقولوا لي؛
فالمؤمن مرآة أخيه👌

مصادر حلقة النهاردة في التعليقات👇

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy

⭐️المصادر⭐️
https://dorar.net/hadith/sharh/150551

http://iswy.co/e2bm6h

https://www.google.com/amp/s/www.islamweb.net/amp/ar/fatwa/94510/

https://www.google.com/amp/s/www.islamweb.net/amp/ar/fatwa/95563/

https://majles.alukah.net/t94299/

صحة قصة إسلام عمر

https://www.google.com/amp/s/islamqa.info/amp/ar/answers/327548

https://dorar.net/hadith/sharh/16033

https://www.google.com/amp/s/www.islamweb.net/amp/ar/fatwa/122344/

📣 الأن قصص الأنبياء متاحة في تطبيق للموبيل للتحميل من متجر جوجل بلاي https://play.google.com/store/apps/details?id=anbiaa.aplicxqf

قناة قصص الأنبياء و السيرة النبوية بقلم إيمان شلبي
https://t.me/prophets_stories

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

#الخلفاء_الراشدون_إيمان_شلبي
#سيرة_أبو_بكر_وعمر
#الحلقة_الثالثة
#هجرة_أبي_بكر_وعمر

قلنا المرة إللي فاتت إن حصلت في مكة حادثة زلزلت المجتمع المكي كله سواء الكفار أو المسلمين لدرجة إن في مسلمين ارتدوا بعد إسلامهم،
الحادثة دي هي حادثة الإسراء والمعراج👌

الموضوع باختصار هو إن بعد موت أبي طالب عم النبي ﷺ وحاميه من أذى قريش وكمان موت زوجته خديجة رضي الله عنها وبعد حادثة الطائف إللي تعرض فيها رسول الله ﷺ لأذى شديد من أهل الطائف؛
أراد الله عز وجل أن يخفف عن نبيه ﷺ آلامه وحزنه فأسرى به ﷺ من المسجد الحرام إلى المسجد الأقصى،
ومن المسجد الأقصى عُرج به إلى فوق السماء السابعة في رحلة طويلة جميلة مليئة بالعجائب، وفيها كلمه الله عز وجل وفرض عليه الصلوات الخمس،
والقصة أنا شارحاها بالتفصيل في السيرة النبوية من الحلقة ثلاثين حتى الحلقة ثمانية وثلاثين للي عايز يعرفها👍

رجع رسول الله ﷺ بعد الرحلة دي إلى مكة وأخبر أهل مكة إنه أُسرِيَ به في الليل من مكة إلى المسجد الأقصى،
وطبعا محدش صدق الموضوع؛ لأن المسافة بين مكة وبيت المقدس كبيرة جدا بيروحوها وبيرجعوا في شهر على الإبل،
فإزاي واحد يروح ويرجع في نفس الليلة؟!!!🤷
فالموضوع كان فتنة وبلاء كبير، فكانت النتيجة إن المشركين ازادادوا كفرا على كفرهم، وناس من المسلمين ارتدوا عن الإسلام😶

لكن أبو بكر رضي الله عنه كان له موقف مختلف👌
ذهب كفار قريش لأبي بكر وأخبروه بالموضوع، عشان عايزينه يكذّب رسول الله ﷺ،
فقال لهم:
لئن قال ذلك لقد صدق👌
يعني لو فعلا قال إنه أُسرِي به إلى بيت المقدس ورجع قبل الصباح فهو فعلا صادق،
فقالوا: أوَ تصدقه أنَّه ذهب الليلة إلى بيت المقدس، وجاء قبل أن يُصبح؟😳
فقال أبو بكر رضي الله عنه:
نعم، إني لأصدقه ما هو أبعد من ذلك، أُصدقه في خبر السماء في غدوة أو رَوحة.《السلسلة الصحيحة》
يعني أنا بصدقه في حاجة هي أبعد من المسافة دي، أصدقه في خبر السماء يأتيه في لحظة، فإزاي مش هصدقه في حاجة بسيطة زي كده!!
بعد الموقف ده لُقّب أبو بكر بلقب《الصديق》👌
فبقى اسمه أبو بكر الصدّيق.

☆وكلمة الصدّيق معناها دائم الصِّدق الذي يُؤيِّد قوله بالعمل،
يعني إللي بيقوله بيعمله،
وهو المؤمن كمال ‏الإيمان بما أنزل الله على الأنبياء وبما جاء به الرسول ﷺ علماً، وتصديقاً، وقياما،
فالوصف بالصدّيق أكمل من الوصف بالصادق، فكل صدّيق صادق، وليس كل صادق صدّيق.
ومنزلة الصدّيقيّة هي أعلى ما يمكن أن يصل ‏إليه المؤمن من الصحابة أو ‏غيرهم، فهي أعلى مرتبة بعد مرتبة النبوة،
قال تعالى:
"وَمَن يُطِعِ ٱللَّهَ وَٱلرَّسُولَ فَأُوْلَٰٓئِكَ مَعَ ٱلَّذِينَ أَنْعَمَ ٱللَّهُ عَلَيْهِم مِّنَ ٱلنَّبِيِّنَ 《وَٱلصِّدِّيقِينَ》وَٱلشُّهَدَآءِ وَٱلصَّٰلِحِينَ ۚ وَحَسُنَ أُوْلَٰٓئِكَ رَفِيقًا"
《سورة النساء آية(69)》

فأبو بكر رضي الله عنه وصل إلى مرتبة هي أعلى مرتبة بعد مرتبة النبوة بسبب إيمانه وتصديقه والتسليم التام لكل ما جاء به الرسول ﷺ بدون أي مناقشة أو استفسار👌
وكان عمر رضي الله عنه يقول عن أبي بكر:
"لوْ وُزِنَ إيمانُ أبي بكرٍ وإيمانُ الناسِ لرجحَ إيمانُ أبي بكرٍ"
《إسناده صحيح》

بعد حادثة الإسراء والمعراج بفترة؛ أكرم الله أبا بكر بأن زوّج ابنته الصغيرة عائشة لرسول الله ﷺ،
وكان عمرها ست سنوات، والزواج هنا كان مجرد عقد زواج فقط، أما الزواج الفعلي فحصل وهي ابنة تسع سنين،
وبقول إن دي كرامة لأبي بكر من الله؛ لأن رسول الله ﷺ رأى رؤيا مرتين إنه يتزوج عائشة رضي الله عنها ابنة الصديق، ورؤيا الأنبياء حق ووحي من الله يجب التنفيذ،
وعشان بس الناس إللي بتقعد تهري وتتكلم بجهل وبدون أي علم؛
رسول الله ﷺ لم يتزوج طفلة لم تبلغ🙄
رسول الله ﷺ عقد على عائشة وهي بنت ست سنين ولم يدخل بها إلا بعد بلوغها مبلغ النساء وهي عندها تسع سنين،
ومفيش أحد ينظر لبنته إللي عندها تسع سنين ويقول إزاي رسول الله ﷺ تزوج بنت صغيرة كده وهو عمره فوق الخمسين سنة😳

طبعا مفيش مقارنة بين أجساد عيالنا في زماننا دلوقتي وأجساد البنات والأولاد في عهد رسول الله ﷺ،
السيدة عائشة كانت طويلة، وكمان كانت عايشة في مكة وهي بلد حار والبلاد الحارة يكون فيها البلوغ أسرع،
فلما نقول إن السيدة عائشة كان عمرها تسع سنين وهي طويلة يعني هي في جسم بنت عندها ستة عشرة سنة من بناتنا دلوقتي💁
فهي كانت تصلح للزواج ساعتها ورسول الله ﷺ أكرم الخلق وأفضلهم مش هيتزوج امرأة لا تصلح للزواج🤷

ده غير إن رسول الله ﷺ لم تظهر عليه علامات كبر السن،
يعني كان شكله شاب لحد ما مات، ومع إنه مات وهو عنده ثلاث وستين سنة لكن مكنش عنده شعر أبيض غير ست شعرات بيض في لحيته👌

فمحدش يستغرب من فرق السن أو إن البنات كانت بتتزوج وهم صغيرين في السن، ده كان طبيعي عندهم،
يعني عمر ابن الخطاب رضي الله عنه لما أنجب حفصة كان عمره خمسة عشر عاما، ولما تزوجها رسول الله ﷺ كان عمرها عشرين سنة تقريبا وكانت ثيب، يعني كانت تزوجت وزوجها مات عنها،
وصفية بين حُيَي بن أخطب اليهودي كانت متزوجة وهي عندها خمسة عشرة سنة ودول يهود أهه مش عرب🤷
والفرق في السن بين عمرو بن العاص وابنه عبد الله عشر سنين ويُقال إحدى عشر سنة،
يعني عمرو كان متزوج وهو عمره عشر سنين تقريبا😅
فالموضوع كان عادي جدا عندهم،
ده غير إن المشركين واليهود أيام رسول الله ﷺ وإللي كانوا منتظرين غلطة لرسول الله ﷺ عشان يشهّروا به ويعملوا مشكلة ويطعنوا في رسول الله ﷺ والإسلام؛ مش هيفُوتهم إنهم يتكلموا عن رسول الله ﷺ ويستنكروا إنه تزوّج بطفلة🙄
فاحنا محتاجين نفهم الأمور بعصر رسول الله ﷺ وعقلية الناس إللي كانت عايشة فيه مش بعصرنا احنا👌

☆ملحوظة:
أنا شارحة النقطة دي في السيرة، لكن شرحتها تاني هنا عشان الأحداث الأخيرة إللي حصلت من التعدي على رسول الله ﷺ واتهامه زورا وبهتانا إنه تزوج طفلة،
ولقيت إن من المسلمين أنفسهم إللي بيقول كلام زي كلام الكفار ده بسبب جهلهم وعدم معرفتهم بنبيهم وطبيعة الحال في زمنه،
لدرجة إن ناس أنكرت أصلا إن رسول ﷺ تزوج عائشة وهي عمرها تسع سنين وإن عمرها كان ثمانية عشر سنة😑
مع إن السيدة عائشة هي بنفسها إللي قالت إنها تزوجت وعمرها تسع سنين والحديث في صحيح البخاري👌

بدأت أحداث الهجرة إلى المدينة بأمر واضح من رسول الله ﷺ بوجوب الهجرة على كل واحد قادر إنه يهاجر،
فهاجر عمر بن الخطاب رضي الله عنه سرا مثل باقي المهاجرين من المسلمين،
فهو اتفق مع ثلاثة من أصحابه المسلمين إنهم يتقابلوا في مكان خارج مكة وقالوا: أي واحد فينا ميجيش المكان ده؛ الباقي هيعرف إنه اتحبس ومقدرش ييجي، فالباقي يمشي ويهاجروا👌

وفعلا جاء عمر بن الخطاب للمكان وجاء صاحب له والثالث لم يأتِ، فهاجر عمر وصاحبه،
وهم في الطريق قابلوا عشرين واحد من الصحابة فدخلوا يثرب مع بعض، وكان من المهاجرين الأوائل رضي الله عنه،
وكان سابقهم مصعب بن عمير ومعاه عبد الله بن أم مكتوم الأعمى،
وعمار بن ياسر، وبلال بن رباح وسعد بن أبي وقاص رضي الله عنهم أجمعين.

☆ملحوظة:
الرواية المشهورة إن عمر رضي الله عنه هاجر علانية وإنه راح لأهل مكة وقال لهم: مَن أراد أن تَثْكله أمه أو يُيَتم ولده فليتبعني خلف هذا الوادي فإني مهاجر؛
هي رواية لم تأتِ من طرق ثابتة، يعني هي قصة ضعيفة لا تصح عن عمر بن الخطاب👌
لكن الصحيح هو إنه هاجر سرا مثل باقي المسلمين.
《المصدر: ما شاع ولم يثبت في السيرة النبوية》

أبو بكر الصديق رضي الله عنه هو كمان كان عايز يهاجر تنفيذا لأمر رسول الله ﷺ، فاستأذن رسول الله ﷺ إنه يهاجر، وفعلا كان مجهز نفسه للهجرة، فقال له رسول الله ﷺ: اصبِرْ،
فقال أبو بكر: يا رسولَ اللهِ تطمَعُ أنْ يُؤذَنَ لك؟
فقال رسولُ اللهِ ﷺ: "إنِّي لَأرجو"
《صحيح ابن حبان》
يعني رسول الله ﷺ قال له إنه يصبر عشان هو مستني إذن ربنا له في الهجرة فكان عايز يهاجر مع أبو بكر رضي الله عنه،
فجهز أبو بكر راحلتين له ولرسول الله ﷺ عشان يكون مستعد للرحلة في أي وقت👌

أَذِن الله عز وجل لرسوله ﷺ بالهجرة، فذهب رسول الله ﷺ لأبي بكر في وقت الظهر، وهو وقت مكنش رسول الله ﷺ متعود يزوره فيه،
فلما أُخبَر أبو بكر أن رسول الله ﷺ جاء؛ قال:
"فِداءٌ له أبِي وأُمِّي، واللَّهِ ما جاءَ به في هذِه السَّاعَةِ إلَّا أمْرٌ"
《صحيح البخاري》
يعني أكيد في حاجة خطيرة خلته ييجي في الوقت ده👌
فلما دخل رسول الله ﷺ لبيت أبي بكر؛ قال له رسول الله ﷺ:
"إنَّ اللَّهَ قَدْ أَذِنَ لِي فِي الْخُرُوجِ وَالْهِجْرَةِ"
فَقَالَ أَبُو بَكْرٍ: الصُّحْبَةَ يَا رَسُولَ اللَّهِ، قَالَ: “الصُّحْبَة“.
《إسناده صحيح》
يعني أنا هكون صاحبك في الرحلة دي؟
فرسول الله ﷺ قال له: أيوة انت هتكون صاحبي في الرحلة دي👌
فبكى أبو بكر الصديق رضي الله عنه من الفرحة،
تقول السيدة عائشة رضي الله عنها وكانت حاضرة وشايفة الموقف هي وأختها أسماء:
"فو الله مَا شَعُرْتُ قَطُّ قَبْلَ ذَلِكَ الْيَوْمِ أَنَّ أَحَدًا يَبْكِي مِنْ الْفَرَحِ، حَتَّى رَأَيْتُ أَبَا بَكْرٍ يَبْكِي يَوْمئِذٍ"《إسناده صحيح》
يعني بتقول: أنا عمري ما تخيلت إن في حد ممكن يبكي من الفرح لحد ما شفت أبي بكر يبكي من الفرح😮
ومع إن الموضوع خطير ولو المشركين مسكوهم هيقتلوهم؛ لأن الموضوع فيه ضياع النفس، و فيه ضياع المال، وسيكون فيه ضياع الأهل، وسيكون فيه ترك للبلد، إلا إن أبا بكر لم يتصور للحظة إنه ممكن يفارق رسول الله ﷺ،
فما دام هو في صحبة رسول الله ﷺ؛ فده شيء يدعو للفرح لدرجة البكاء👌
فأعطى أبو بكر الصديق لرسول الله ﷺ الراحلة إللي كان مجهزها له، فقبلها رسول الله ﷺ ولكنه أعطاه ثمنها وبدأت رحلة الهجرة👌

☆وهنا يظهر حب أبي بكر لرسول الله ﷺ،
أبو بكر الصديق رضي الله عنه أحب رسول الله ﷺ حباً خالط لحمه ودمه وعظامه وروحه، وحبه تغلّب على حب المال والولد والأهل والبلد،
ورسول الله ﷺ قال:
"لَا يُؤْمِنُ أحَدُكُمْ، حتَّى أكُونَ أحَبَّ إلَيْهِ مِن والِدِهِ ووَلَدِهِ والنَّاسِ أجْمَعِينَ"《صحيح البخاري》
يعني لا يكونُ المؤمنُ مُؤمنًا كاملًا حتَّى يُقدِّمَ مَحبَّةَ الرَّسولِ ﷺ جَميعِ الخَلْقِ، والمحبة مش مجرد كلام بنقوله، المحبة الصادقة تظهر على الأفعال،
ومحبة أبي بكر لرسول الله ﷺ ظاهرة جدا في أفعاله لدرجة إن رسول الله ﷺ قال عن أبي بكر:
"إنَّ أمَنَّ النَّاسِ عَلَيَّ في صُحْبَتِهِ ومَالِهِ أبو بَكْرٍ"
《صحيح البخاري》
يعني أكثر الناس جودا وسماحة لنا بنفْسِه ومالِه وفضله عليّ في صحبته وماله هو أبو بكر،
وعشان محدش يفهم خطأ، إنفاق أبي بكر لم يكن نفقة على النبي ﷺ في طعامه وكسوته، لأ 😅
ده كان معونة لرسول الله ﷺ على إقامة الإيمان، يعني إنفاقه في أول الإسلام كان لتخليص المسلمين إللي الكفار كانوا بيعذبوهم زي بلال رضي الله عنه،
وكمان إنفاقه على فقراء المسلمين كصدقة تعينهم على الحياة،
وقال رسول الله ﷺ عن أبي بكر:
"ما نفعَني مالٌ قطُّ، ما نفَعني مالُ أبي بَكرٍ"
《صحيح ابن ماجه》
يعني رسول الله ﷺ بيقول إنه لم يَنفَعْنه مالُ أحَدٍ مِن الصَّحابةِ رَضِي اللهُ عنهم كما نفَعَه مالُ أبي بكرٍ رَضِي اللهُ عنه؛ لأن رسول الله ﷺ وجَده حينَ بَخِل النَّاسُ عليه ﷺ👌

☆ملحوظة للتوضيح:
لما رسول الله ﷺ قال:
《ما نفعَني مالٌ قطُّ، ما نفَعني مالُ أبي بَكرٍ》مش معنى كده إن رسول الله ﷺ لم ينتفع بمال خديجة رضي الله عنها👌
بالعكس، ده هو بنفسه قال عنها:
"وواسَتْني بمالِها إذ حرَمَني الناسُ"《أخرجه البخاري》
يعني هي رضي الله عنها سخرت مالها كله لرسول الله ﷺ ليستعمله في إقامة الطاعة والإيمان،
فكان إنفاق المال فيما يحبه الله ورسوله وليس الإنفاق على رسول الله ﷺ نفسه؛ لأن رسول الله ﷺ نفسه كان غنيا👌

◇وعشان تفهموا معنى كلام رسول الله ﷺ عن أبي بكر،
تخيلوا كده لو الواحد فينا مر بأزمة شديدة ومكنش في حد معاه غير شخص واحد بس هو إللي وقف جنبه وساعده؛ أكيد هيكون له مكانة خاصة عنده وهيحفظ له الجميل ده💁
بعكس لو الواحد مر بأزمات عادية ولقى ناس تانية بتساعده وهو مكنش محتاج أوي للمساعدة،
هو هيكون أه ممتن لهم لكن مش زي الشخص إللي كان جنبه في أشد وقت كان محتاج فيه للدعم 👌
فرسول الله ﷺ وقت ما كان محتاج للنصرة والمال محدش كان معاه ينصره بنفسه وبماله غير أبو بكر الصديق رضي الله عنه👌
وده يظهر من مواقف الصديق رضي الله عنه،
يعني مثلا:
¤في الهجرة أخذ الصديق كل ماله عشان يستعمله أثناء سفره مع رسول الله ﷺ،
وفي طريق الهجرة نفسه كان أبو بكر يمشي أحيانا أمام رسول الله ﷺ، وأحيانا يمشي وراءه،
فرسول الله ﷺ سأله عن السبب، فقال له أبو بكر:
"يا رسولَ اللهِ، أذكُرُ الطلَبَ فأمشي خَلْفَك، ثم أذكُرُ الرَّصَدَ فأمشي بين يدَيْكَ"《حديث مُرسل》
يعني بيقول له إنه بيفتكر الناس إللي بيطاردوهم فبيمشي خلفه،
وبعدين يخاف ليكون في كمين فيمشي أمامه،
فهو كأنه بيقول لرسول الله ﷺ بطريقة عملية:
أنا مش مهم.. انت أهم مني.. أنا أفديك بروحي يا رسول الله👌

¤وكذلك لما كانوا في الغار ووصل المشركون عند باب الغار؛ كان خائف على رسول الله ﷺ وقال له إن لو واحد فيهم نظر بس تحت قدميه هيشوفنا، فرسول الله ﷺ طمأنه وقال له إن الله معهما وسيحميهما من المشركين👌
وقد أثبت القرآن صحبة أبي بكر لرسول الله ﷺ في الغار لما قال:
"إِلَّا تَنصُرُوهُ فَقَدْ نَصَرَهُ ٱللَّهُ إِذْ أَخْرَجَهُ ٱلَّذِينَ كَفَرُواْ ثَانِىَ ٱثْنَيْنِ إِذْ هُمَا فِى ٱلْغَارِ إِذْ يَقُولُ لِصَٰحِبِهِۦ لَا تَحْزَنْ إِنَّ ٱللَّهَ مَعَنَا"
《سورة التوبة آية(40)》

¤وكذلك في يوم من أيام رحلة الهجرة في وقت الظهيرة بعد ما كانوا ماشيين طول الليل؛ بحث أبو بكر عن ظل عشان يخلي رسول الله ﷺ ينام تحته،
فشاف صخرة لها ظل، فراح عنده وكنس بإيده مكان الظل وفرشه وقال لرسول الله ﷺ إنه ينام على الفراش ده،
وبيحكي بقى أبو بكر عمل إيه بعد ما نام رسول الله ﷺ على الفراش، قال:
"ثُمَّ انْطَلَقْتُ أنْظُرُ ما حَوْلِي هلْ أرَى مِنَ الطَّلَبِ أحَدًا،
فَإِذَا أنَا برَاعِي غَنَمٍ يَسُوقُ غَنَمَهُ إلى الصَّخْرَةِ يُرِيدُ منها الذي أرَدْنَا، فَسَأَلْتُهُ فَقُلتُ له:
لِمَن أنْتَ يا غُلَامُ، قَالَ لِرَجُلٍ مِن قُرَيْشٍ، سَمَّاهُ فَعَرَفْتُهُ، فَقُلتُ:
هلْ في غَنَمِكَ مِن لَبَنٍ؟
قَالَ: نَعَمْ، قُلتُ: فَهلْ أنْتَ حَالِبٌ لَنَا؟ قَالَ: نَعَمْ،

فأمَرْتُهُ فَاعْتَقَلَ شَاةً مِن غَنَمِهِ، ثُمَّ أمَرْتُهُ أنْ يَنْفُضَ ضَرْعَهَا مِنَ الغُبَارِ، ثُمَّ أمَرْتُهُ أنْ يَنْفُضَ كَفَّيْهِ،
فَقَالَ: هَكَذَا، ضَرَبَ إحْدَى كَفَّيْهِ بالأُخْرَى، فَحَلَبَ لي كُثْبَةً مِن لَبَنٍ، وقدْ جَعَلْتُ لِرَسولِ اللَّهِ ﷺ إدَاوَةً علَى فَمِهَا خِرْقَةٌ،
فَصَبَبْتُ علَى اللَّبَنِ حتَّى بَرَدَ أسْفَلُهُ،
فَانْطَلَقْتُ به إلى النبيِّ ﷺ فَوَافَقْتُهُ قَدِ اسْتَيْقَظَ،
فَقُلتُ: اشْرَبْ يا رَسولَ اللَّهِ، فَشَرِبَ حتَّى رَضِيتُ،
ثُمَّ قُلتُ: قدْ آنَ الرَّحِيلُ يا رَسولَ اللَّهِ؟
قَالَ: بَلَى.
فَارْتَحَلْنَا والقَوْمُ يَطْلُبُونَنَا، فَلَمْ يُدْرِكْنَا أحَدٌ منهمْ غَيْرُ سُرَاقَةَ بنِ مَالِكِ بنِ جُعْشُمٍ علَى فَرَسٍ له،
فَقُلتُ: هذا الطَّلَبُ قدْ لَحِقَنَا يا رَسولَ اللَّهِ، فَقَالَ: لا تَحْزَنْ إنَّ اللَّهَ معنَا"《صحيح البخاري》

يعني أبو بكر رضي الله عنه ترك رسول الله ﷺ نايم وبدأ يشوف هل الوضع آمن حوله ولّا لأ، وهل إذا كان أحد من قريش لحقهم،
فشاف راعي غنم معاه غنم فسأله عن الغنم ده بتاع مين فقال له عن اسم صاحب الغنم فعرفه أبو بكر،
فسأله أبو بكر هل معك إذن من مالك الغنم إنك تحلب لعابِري السَّبيلِ أو لمَن يمُرُّ بكَ على سَبيلِ الضِّيافةِ؟
فالغلام قال له نعم، فطلب أبو بكر من الغلام إنه يحلب من الشاة عشان يقدم الحليب لرسول الله ﷺ،
وقال أبو بكر للغلام إنه ينظف ضِرع الشاة الأول وينفضه من التراب والشَّعر عشان مفيش حاجة تقع في اللبن عشان يشربه رسول الله ﷺ،
فحلب الغلام اللبن في حاجة زي طبق مصنوع من خشب عميق، فأخذه أبو بكر ووضعه في إدَاوَةً يعني إناءٌ مِن جِلدٍ يوضع فيها الماء، زي زجاجة المياه عندنا كده،
وبعد كده ذهب أبو بكر لرسول الله ﷺ لقاه نائم، فكَرِه إنه يصحيه، ففضل واقف لحد ما استقيظ رسول الله ﷺ وبعدين أعطاه أبو بكر اللبن، فشرب منه رسول الله ﷺ لحد ما رضي أبو بكر،
معنى رضا أبو بكر هنا زي كده لما الأم تكون بتطعم طفلها لحد ما تحس بالرضى إنه خلاص كده شبع😅

وبعد كده كملوا رحلتهم نحو المدينة، وهم في الطريق لحق بهم سراقة بن مالك فخاف أبو بكر على رسول الله ﷺ فطمأنه رسول الله ﷺ وقال له أن الله يرعاهم ولن يصيبهم أذى👌

وَصَل رسول الله ﷺ إلى المدينة وكانت الشمس ظاهرة وقوية، فقام أبو بكر الصديق بتظليل رسول الله ﷺ من حر الشمس👌

وهنا هتبدأ رحلة جديدة باختبارات وابتلاءات جديدة في حياة الصديق رضي الله عنه هنتعرف على بعضها الحلقة الجاية إن شاء الله.

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

وزي مانتم عارفين؛ لو في أي ملاحظة ياريت تقولوا لي؛
فالمؤمن مرآة أخيه👌

مصادر حلقة النهاردة في التعليقات👇

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy

⭐️المصادر⭐️

https://www.google.com/amp/s/www.islamweb.net/amp/ar/fatwa/128364/

https://islamhouse.com/read/amp/ar/%D8%A3%D8%A8%D9%88-%D8%A8%D9%83%D8%B1-%D8%A7%D9%84%D8%B5%D8%AF%D9%8A%D9%82-%D8%A3%D9%81%D8%B6%D9%84-%D8%A7%D9%84%D8%B5%D8%AD%D8%A7%D8%A8%D8%A9-%D9%88%D8%A3%D8%AD%D9%82%D9%87%D9%85-%D8%A8%D8%A7%D9%84%D8%AE%D9%84%D8%A7%D9%81%D8%A9-144996#note_1

https://www.google.com/amp/s/www.islamweb.net/amp/ar/fatwa/268582/

https://www.google.com/amp/s/islamqa.info/amp/ar/answers/311718

https://www.google.com/amp/s/www.islamweb.net/amp/ar/fatwa/266182/

https://www.dorar.net/hadith/search?q=%D8%A5%D9%8A%D9%85%D8%A7%D9%86

http://fatawapedia.com/%D9%87%D9%84-%D9%8A%D8%AD%D8%AF-%D8%A7%D9%84%D8%B2%D9%88%D8%A7%D8%AC-%D8%A8%D8%B3%D9%86-%D9%85%D8%B9%D9%8A%D9%86-%D9%88%D8%AD%D9%83%D9%85-%D8%A7%D9%84%D8%B2%D9%88%D8%A7%D8%AC-%D9%81%D9%8A-%D8%B3%D9%86-%D9%85%D8%A8%D9%83%D8%B1-20433

https://www.dorar.net/hadith/sharh/8508

https://www.dorar.net/hadith/sharh/14838

https://www.dorar.net/hadith/sharh/1728

https://dorar.net/hadith/search?q=%D9%84%D8%A3%D8%B1%D8%B2%D9%82%D9%86%20%D9%85%D9%86%20%D9%84%D8%A7%20%D8%AD%D9%8A%D9%84%D8%A9%20%D9%84%D9%87%20%D8%AD%D8%AA%D9%89%20%D9%8A%D8%AA%D8%B9%D8%AC%D8%A8%20%D8%B5%D8%A7%D8%AD%D8%A8%20%D8%A7%D9%84%D8%AD%D9%8A%D9%84&d%5B0%5D=2&rawi%5B0%5D=6617&page=41&xpanded=1&m[]=1420

https://al-maktaba.org/book/31615/30410

https://www.islamweb.net/amp/ar/fatwa/3733/

https://audio.islamweb.net/audio/index.php?page=FullContent&audioid=208269

https://ar.islamway.net/article/77291/%D9%84%D9%85%D8%A7%D8%B0%D8%A7-%D8%B3%D8%A8%D9%82-%D8%A3%D8%A8%D9%88-%D8%A8%D9%83%D8%B1

https://www.islamstory.com/ar/artical/21227/%D9%87%D8%AC%D8%B1%D8%A9-%D8%B9%D9%85%D8%B1-%D8%A8%D9%86-%D8%A7%D9%84%D8%AE%D8%B7%D8%A7%D8%A8-%D8%B1%D8%B6%D9%8A-%D8%A7%D9%84%D9%84%D9%87-%D8%B9%D9%86%D9%87

https://www.dorar.net/hadith/sharh/7339

https://www.google.com/amp/s/www.islamweb.net/amp/ar/library/index.php%3fpage=bookcontents&idfrom=4142&idto=4142&bk_no=74&ID=1820

https://dorar.net/hadith/sharh/9769

https://dorar.net/hadith/sharh/62383

https://www.google.com/amp/s/www.islamweb.net/amp/ar/fatwa/80893/

https://www.dorar.net/hadith/sharh/150232

📣 الأن قصص الأنبياء متاحة في تطبيق للموبيل للتحميل من متجر جوجل بلاي https://play.google.com/store/apps/details?id=anbiaa.aplicxqf

قناة قصص الأنبياء و السيرة النبوية بقلم إيمان شلبي
https://t.me/prophets_stories

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886