السلام عليكم ورحمة الله وبركاته،
أعتذر جدا على التأخير في تنزيل الحلقات لحد دلوقتي، فأنا كنت مريضة من يوم الجمعة🙈

أنا حاليا شغالة على الحلقات الباقية وإن شاء الله بنزل الحلقات دي كلها مع بعض خلال الثلاثة أيام القادمة.

كل عام أنتم بخير وأعاننا الله وإياكم على حُسن عبادته🤲

موضوع حلقة النهاردة طويل جدا ومرتبط كله ببعضه،
فعشان كده قسمته على ثلاثة أجزاء هنزلهم ورا بعض ...
ولعل الحلقات تكون حافز للاجتهاد في الطاعة في رمضان👌

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الواحدة_والسبعون
#المرحلة_الثالثة_اليوم_الآخر
#وصف_الجنة_والنار_الجزء_الخامس_عشر
#سوق_الجنة_ورؤية_الله

اتكلمنا المرة إللي فاتت عن حدثين من الثلاثة أحداث إللي بيحصلوا عند الصراط،
◇الأول كان عن أصحاب الأعراف،
◇والثاني كان عن آخر واحد بيعبر الصراط ويدخل الجنة.
◇الثالث بقى هو عن آخر واحد يخرج من النار ويدخل الجنة👌

بعد ما ينتهي ربنا من حساب العباد يُخرج من النار الموحدين إللي لم يعملوا خيرا قط واتكلمنا عنهم قبل كده،
فآخر واحد بقى منهم هيخرج من النار وهيبقى وجهه تلقاء النار وشايفها ومفتكر إللي حصل له فيها؛ هيقول لربنا:
"يا رَبِّ اصْرِفْ وجْهِي عَنِ النَّارِ، قدْ قَشَبَنِي رِيحُهَا وأَحْرَقَنِي ذَكَاؤُهَا"
《صحيح البخاري》
يعني يارب ابعدني وابعد وجهي عن النار، ده ريحتها آذتني وأتعبتني، دي عاملة زي السَّمِّ في أَنْفي🤧
وأحرقني لَهَبُها واشتعالُها وشِدَّةُ وهَجِها😖

فيَقولُ الله له: هلْ عَسَيْتَ إنْ فُعِلَ ذلكَ بكَ أنْ تَسْأَلَ غيرَ ذلكَ؟
يعني ممكن لو حققت لك طلبك ده هتطمع وتطلب حاجة غيره؟
فالعبد يقول: "لا وعِزَّتِكَ🤚
فيُعْطِي اللَّهَ ما يَشَاءُ مِن عَهْدٍ ومِيثَاقٍ..."《صحيح البخاري》
يعني هو بيُقسِمُ بعزَّةِ ربِّنا وبيعاهده إنه مش هيطلب منه أي شيء تاني، فيحقق الله له أمنيته ويَصْرِفُ وجْهَهُ عَنِ النَّارِ،

"فَإِذَا أقْبَلَ به علَى الجَنَّةِ، رَأَى بَهْجَتَهَا سَكَتَ ما شَاءَ اللَّهُ أنْ يَسْكُتَ"
يعني بعد ما ربنا يبعده عن النار ويقربه من الجنة شوية؛ هيشوف جمالها وحلاوتها، فهيحاول يصبر ويسكت عشان مش عايز ينقض عهده مع ربنا، لكن مقدرش يستحمل فيقول لربنا:
"يا رَبِّ قَدِّمْنِي عِنْدَ بَابِ الجَنَّةِ"
يعني عايز يروح عند باب الجنة يقعد هناك ويستمتع بالمنظر أكثر لأنه لسه بعيد عنها،
فيَقولُ اللَّهُ له: أليسَ قدْ أعْطَيْتَ العُهُودَ والمِيثَاقَ، أنْ لا تَسْأَلَ غيرَ الذي كُنْتَ سَأَلْتَ؟
يعني هو مش انت عاهدتني وأقسمت لي إنك مش هتطلب حاجة تانية؟

☆هو عامل بالضبط زي الرجل إللي كان ماشي على الصراط إللي اتكلمنا عنه المرة إللي، يطلب من ربنا حاجة ويعاهده وبعدين يرجع في كلامه😄

فيَقولُ العبد: يا رَبِّ لا أكُونُ أشْقَى خَلْقِكَ، فيَقولُ: فَما عَسَيْتَ إنْ أُعْطِيتَ ذلكَ أنْ لا تَسْأَلَ غَيْرَهُ؟
يعني يارب أنا عاهدتك فعلا لكِن كَرَمَك بيخليني طمعان فيما عندك،
فربنا يقول له لو خليتك عند باب الجنة مش هتطلب مني حاجة تانية؟
فيحلف برده ويعطيه العهود، فربنا يقربه من باب الجنة،
"فَإِذَا بَلَغَ بَابَهَا، فَرَأَى زَهْرَتَهَا، وما فِيهَا مِنَ النَّضْرَةِ والسُّرُورِ، فَيَسْكُتُ ما شَاءَ اللَّهُ أنْ يَسْكُتَ، فيَقولُ: يا رَبِّ أدْخِلْنِي الجَنَّةَ..."
《صحيح البخاري》
يعني لما يوصل لباب الجنة ويشوف النعيم إللي فيها وفرح أهلها؛
هيحاول برده يصبر ويسكت عشان مش عايز ينقض عهده مع ربنا تاني، لكن مقدرش يستحمل؛ فطلب من ربنا إنه يدخله الجنة😅

فيَقولُ اللَّهُ له:
"ويْحَكَ يا ابْنَ آدَمَ، ما أغْدَرَكَ، أليسَ قدْ أعْطَيْتَ العُهُودَ والمِيثَاقَ، أنْ لا تَسْأَلَ غيرَ الذي أُعْطِيتَ؟ "
يعني ما أكثر ما تنقض كلامك يابن آدم وتخلف عهودك معايا، مش انت لسه كنت قايل إنك مش هتطلب مني حاجة تانية؟

فيَقولُ: يا رَبِّ لا تَجْعَلْنِي أشْقَى خَلْقِكَ😥
يعني يارب لا تجعلني أشقى وأتعس مخلوقاتك،
لو انت خليتني هنا على حالتي دي ولم تدخلني الجنة هكون أشْقى خَلقِك😓

"فَيَضْحَكُ اللَّهُ عزَّ وجلَّ منه، ثُمَّ يَأْذَنُ له في دُخُولِ الجَنَّةِ"
《صحيح البخاري》
يعني ربنا يضحك من كلامه ويقبل طلبه بدخول الجنة،
ومادام ربنا أخبر عن نفسه إن يضحك يبقى هو فعلا بيضحك، لكن ضحكه ليس كضحك المخلوقين، فهو ليس كمثله شيء سبحانه👌

فبعدين ربنا يقول له: تَمَنَّ، يعني شوف نفسك في إيه وأنا سأحققه لك، فيقعد العبد يتمنى ويتمنى وكمان ربنا يذكره:
مش عايز كذا مش عايز كذا لحد ما خلاص تنقطع بيه الأماني وميبقاش نفسه في حاجة؛ ربنا يقول له:
لكَ ذلكَ ومِثْلُهُ معهُ، وفي رواية تانية: ذلكَ لكَ وعَشَرَةُ أمْثَالِهِ.
يعني خد إللي انت طلبته ده وكمان زيه، وفي رواية تانية ربنا يعطيه عشر أضعاف إللي طلبه👌

بعد بقى ما الرجل ده يدخل الجنة خلاص ومفيش حد تاني هيدخلها وراه ويكون أهل الجنة استقروا في الجنة وأهل النار استقروا في النار؛ يسمع أهل الجنة وأهل النار صوت ينادي عليهم:

يَا أَهْلَ الْجَنَّةِ!
"فَيَشْرَئِبُّونَ ويَنْظُرُونَ" يعنى يمدوا رِقابَهم ويَرفَعون رُؤوسَهم ويَنظُرون،
زي كده لما حد ينادي عليك وانت مشغول في حاجة فتقوم تمد رقبتك وترفع راسك وتشوف مين بينادي وعايز إيه🤔
فلما ينظروا؛ يقول لهم المنادي:
فيَقولُ: هلْ تَعْرِفُونَ هذا؟
وهو بيتكلم عن《كَبْشٍ أمْلَحَ》موقوف بين الجنة والنار، يعني خروف لونه أبيض في أسود، لكن السواد إللي فيه أقل من البياض،
فأهل الجنة يردوا ويقولوا: نَعَمْ، هذا المَوْتُ.
يعني احنا عارفين الكبش ده، هو الموت،
يعني ربنا جعل الموت نفسه وليس《مَلك الموت》على صورة خروف حقيقي يراه أهل الجنة،
وهم عرفوه لأن ربنا ألقى في قلوبهم معرفته، يعني ربنا خلاهم يعرفوا إن ده الموت لوحدهم👌
فينادي نفس المنادي على أهل النار ويقول لهم:
"يا أهْلَ النَّارِ، فَيَشْرَئِبُّونَ ويَنْظُرُونَ، فيَقولُ: وهلْ تَعْرِفُونَ هذا؟ فيَقولونَ: نَعَمْ، هذا المَوْتُ"《صحيح البخاري》
فالمنادي وهو من الملائكة يقوم بذبح الكبش ده بين الجنة والنار، ويقول لأهل الجنة وأهل النار:
"يا أهْلَ الجَنَّةِ، خُلُودٌ فلا مَوْتَ، ويا أهْلَ النَّارِ، خُلُودٌ فلا مَوْتَ"
《صحيح البخاري》

وفي رواية تانية قال فيها رسول اللَّهِ ﷺ عن أهل الجنة:
"إِذَا دخَلَ أَهْلُ الْجنَّةِ الجنَّةَ يُنَادِي مُنَادٍ: إِنَّ لَكُمْ أَنْ تَحْيَوْا، فَلا تَمُوتُوا أَبدًا، وإِنَّ لكُمْ أَنْ تَصِحُّوا، فَلاَ تَسْقَمُوا أَبدًا،
وإِنَّ لَكُمْ أَنْ تَشِبُّوا فَلا تهْرَمُوا أَبدًا، وإِنَّ لَكُمْ أَن تَنْعمُوا، فَلا تَبْأسُوا أَبَدًا"《رواهُ مسلم》

يعني يا أهل الجنة عيشوا واستمتعوا بالجنة للأبد ولن تخرجوا منها ولن تموتوا ولن تمرضوا ولن تكبروا في السن وهتفضلوا منعمين للأبد،
وكذلك يقول لأهل النار: يا أهل النار عيشوا في العذاب الأليم المعين للأبد ولن تخرجوا منها للأبد،
فيزداد أهل الجنة فرح على فرحهم لأنهم هيعيشوا في الجنة للأبد ولن يخرجوا منها، ويقولوا:
"أَفَمَا نَحْنُ بِمَيِّتِينَ إِلَّا مَوْتَتَنَا الْأُولَى وَمَا نَحْنُ بِمُعَذَّبِينَ"
《الصافات آية(58-59 )》
يعني بجد مش هنموت تاني أبدا بعد ما موتنا الموتة الأولى في الدنيا وهنفضل في الجنة للأبد ومش هنتعذب؟!😮
يعني بيسألوا سؤال الشخص الفرحان المستبشر باللي يفرحه،
فيقولوا بعدها: "إِنَّ هَٰذَا لَهُوَ الْفَوْزُ الْعَظِيمُ"
《الصافات آية(60)》
يعني هو ده الفوز الحقيقي إللي بجد ومفيش حاجة تُقارن بيه👌

أما أهل النار لما يشوفوا الموت بيُذبح ويُقال لهم إنهم هيعيشوا في النار للأبد؛
هيزدادوا حسرة على حسرتهم وألم على ألمهم؛ لأنهم أيقنوا إن العذاب مستمر ولن ينتهِ ومفيش أي فرصة للنجاة👌
ومن هنا نقدر نفهم قول ربنا:
"وَأَنْذِرْهُمْ يَوْمَ الْحَسْرَةِ إِذْ قُضِيَ الْأَمْرُ وَهُمْ فِي غَفْلَةٍ وَهُمْ لَا يُؤْمِنُونَ"
《سورة مريم آية(39)》
يعني ربنا بيقول لرسول الله ﷺ:
أنذِرْ -يا محمَّدُ- جَميعَ النَّاسِ وحذرهم من يومَ القيامةِ إللي هيتحَسَّرُ فيه المسيءُ ويندَمُ لأنه لم يُحسِنْ، ويتحَسَّرُ المقصِّرُ لأنه لم يزدَدْ من الخيرِ،
وأشد الحسرة هي حَسرةِ خلودُ الكُفَّارِ في النَّارِ لما يشوفوا الموت بيُذبح أمامهم ويتيقنوا إنهم خلاص كده لن يخرجوا أبدا من النار وهيفضلوا في العذاب الأليم ده للأبد 😓

مهما بقى بلغ أهل الجنة من النعيم؛ ففي نعيم هو أعظم من أي نعيم ممكن الواحد يتخيله👌
إيه هو؟!
تعال نشوف😊

انت هتكون قاعد في قصرك في الجنة مستمتع بالنعيم في درجاتها على حسب عملك؛ لحد ما ييجي اليوم إللي هتروح فيه:
《سوق الجنة》👌

أكيد هتستغرب وتقول: وهو في الجنة سوق يُباع فيه ويُشترى😳
إللي يجاوبك على السؤال ده هو رسول الله ﷺ 👌
قال رسول الله ﷺ:
"إِنَّ لِأَهْلِ الْجَنَّةِ سُوقًا يَأْتُونَهَا كُلَّ جُمُعَةٍ، فِيهَا كُثْبَانُ الْمِسْكِ،
فَإِذَا خَرَجُوا إِلَيْهَا هَبَّتِ الرِّيحُ فَتَمْلَأُ وُجُوهَهُمْ، وَثِيَابَهُمْ، وَبُيُوتَهُمْ مِسْكًا، فَيَزْدَادُونَ حُسْنًا وَجَمَالًا"《صحيح مسلم》
وفي رواية تانية قال ﷺ:
"إِنَّ في الْجنَّةِ سُوقًا يأْتُونَهَا كُلَّ جُمُعةٍ. فتَهُبُّ رِيحُ الشَّمالِ، فَتحثُو في وُجُوهِهِمْ وثِيَابِهِمْ، فَيزْدادُونَ حُسْنًا وجَمالً"
《صحيح مسلم》

يعني أهل الجنة ليهم وقت بيجتمعوا فيه مع بعض، والوقت ده بيكون كل يوم جمعة،
وطبعا في الآخرة مفيش لا شمس ولا قمر ولا أيام زي الدنيا كده😅

واحنا قلنا في بداية الحلقات في الحلقة السادسة والعشرين تحديدا إن《اليوم الآخر》بيدل على آخر يوم من أيام الحياة الدنيا،
وفي نفس الوقت بيدل على اليوم الأول والأخير من الحياة الثانية،
يعني مفيش بعد كده يوم أول ويوم ثاني وأسبوع أول وثاني وكده زي الدنيا، لأ، هو يوم واحد لا ثاني له فيها أبدا🙅‍♂️

فهنا في الحديث لما يقول كل جمعة فالمقصود إنه بمقدار أسبوع، يعني لما يمر مقدار أسبوع على أهل الجنة يحصل الاجتماع ده،
فزي كده ما أهل الدنيا لهم سوق يجتمعون فيه، ويتبادلون المنافع، كذلك من نعيم أهل الجنة إن لهم سوق بيجتمعوا فيه👌

لكن أسواق الدنيا غالبًا بيكون فيها صياح وضوضاء ومشاحنات ومشاجرات، وبيع الواحد على بيع أخيه، وسباب وشتم وزعيق😑

أما سوق الجنة بقى فمختلف تمامًا، يعني مثلا سوق الجنة مفيهوش بيع ولا شراء، انت هتروح تاخد إللي انت عايزه منه وتقابل فيه إخوانك،
زي كده لما كنت بتخرج كل فترة في الدنيا وتروح مول أو سوق وتشتري أغراضك وبعدين تتقابل مع أصحابك أو بتخرجوا مع بعض تشتروا حاجتكم،
فالحياة في الجنة زي بالضبط الحياة في الدنيا،
يعني هتلاقي شوارع وبيوت وسوق ومطاعم ولك بيت وجار وزوجات وحدائق وبتروح تزور فلان وترجع وغيره وغيره من كل شيء تشتهيه نفسك، حياة كاملة حقيقية👌
لكن زي ما قلنا التشابه في الأسماء فقط أما النعيم والاستمتاع فمختلف تماما👌

وشوف كده مثلا لما تبقى واقف مع أصحابك في مكان مفتوح وتيجي نسمة هواء جميلة كده تلطف الجو،
فكذلك أهل الجنة هتهب عليهم في السوق ريح اسمها ريح الشمال زي ما قال رسول الله ﷺ في الحديث إللي قلناه من شوية،
والريح دي اتسمت كده لأن ريح الشمال مشهورة عند العرب ويستبشرون بها؛ لأنها هي التي كانت تأتيهم بالمطر،
فزي ما كان العرب بيستبشروا بريح الشمال التي كانت تأتيهم بكل بِما يُسعِدُهم مِنَ المطَرِ والماءِ؛ فكذلك الرِّيح إللي في الجنة دي تَأتيهم بِما يُسعِدُهم منَ النَّعيمِ والرَّوائحِ الطَّيِّبةِ؛
لأن الريح لما تتحرك هتثير وتحرك معاها تراب الجنة إللي هو عبارة عن مسك وزعفران،
فالمسك والزعفران ده يأتي على ثياب أهل الجنة ووجوههم،
زي كده لما كانت الرياح تثير الغبار في الدنيا فيأتي التراب على الوجه والملابس،
فلما يصيبهم المسك والزعفران يزدادوا جمال على جمالهم وحُسْن على حُسْنهم، يعني تصور كده هم في المرتبة العالية في الجمال، ومع ذلك فالكمال ده درجات، وكل شوية يتجدد ويزداد حينًا بعد حين👌

في السوق ده بقى هتحصل على أعلى نعيم في الجنة😊
لما تروح للسوق هتوصل لوادي واسع جدا من المسك الأبيض،
في المكان ده هتشوف:
"مَنَابِرَ مِنْ نُورٍ يجَلَسَ عَلَيْهَا النَّبِيُّونَ،
وَحُفَّتِ الْمَنَابِرُ دي 《يعني اتحاوطت》بِكَرَاسِيَّ مِنْ ذَهَبٍ فجَلَسَ عَلَيْهَا الشُّهَدَاءُ،
وَأَهْلُ الْغُرَفِ نزلوا مِنْ غُرَفِهِمْ، وجلسوا عَلَى كُثْبَانِ الْمِسْكِ"
وكثبان المسك دي عبارة كُتل من المسك زي الكثبان الرملية كده إللي بنشوفها في الصحراء،
فاللي قاعدين على كُثْبَانِ الْمِسْكِ "لَا يَرَوْنَ لِأَهْلِ الْكَرَاسِيِّ وَالْمَنَابِرِ عَلَيْهِمْ فضلًا فِي الْمَجْلِسِ" يعني هم مش شايفين إن إللي قاعدين على الكراسي والمنابر دول أفضل منهم، لأ كل واحد مبسوط بمكانه وراضي👌

فتخيل معايا كده مسرح كبير جدا أو ساحة كبيرة جدا وفيها كراسي درجة أولى ودرجة تانية وهكذا،
فالأنبياء قعدوا في الدرجة الأولى على منابر النور دي، وحولهم في الدرجة الثانية قعد الشهداء على الكراسي إللي من الذهب،
وفيهم إللي قعد على منابر من لؤلؤ و منابر من فضة،
وفيهم إللي قعدوا على كتل من المسك زي ما قلنا،
وبفكرك دايما إن مفيش تشابه غير في الأسماء فقط👌

فكده كل واحد على حسب درجته في الجنة قعد في مكان مميز خاص بيه،
فتخيل نفسك وانت قاعد وسطهم كده وفجأة سمعت صوت هو أجمل صوت ممكن تسمعه على الإطلاق بيقول لك:
"تُرِيدُونَ شَيْئًا أَزِيدُكُمْ"《صحيح مسلم》
يعني ربنا جل جلاله بينادي عليك وبيكلمك وبيقولك عايز حاجة كمان من النعيم أزودها لك، فترد مع أهل الجنة وتقول:
"أَلَمْ تُبَيِّضْ وُجُوهَنَا أَلَمْ تُدْخِلْنَا الْجَنَّةَ وَتُنَجِّنَا مِنْ النَّارِ"
《صحيح مسلم》
يعني منتهى آمال أهل الجنة إن ربنا يرضى عنهم ويبيض وجوههم ويدخلهم الجنة وينجيهم من النار، فإيه النعيم إللي أعظم من النعيم د؟!
فهنا في اللحظة دي يكشف الله الحجاب عن نفسه ويحصل لك أحسن نعيم في الجنة وهو رؤية الله عز وجل👌
هتشوف ربنا إللي فضلت طول عمرك تعبده،
هتشوف ربنا إللي فضلت تدعوه في ابتلاءاتك،
هتشوف ربنا إللي كنت بتقوم تصلي له وتناجيه في جوف الليل،
هتشوف ربنا إللي ياما صمت له عشان ينجيك من عذاب النار،
هتشوف ربنا إللي ياما اشتقت لرؤيته،
هتشوف ربنا إللي ياما استجاب لدعواتك وفرج همومك وغمومك،
هتشوف ربنا إللي ياما جبر كسر قلبك،

في اللحظة دي هتحس إن كل النعيم إللي انت شوفته في الجنة ده بقصورها وبأكلها وبشربها وبأنهارها وبكل شيء فيها ميجيش حاجة بجانب رؤيتك لوجه الله عز وجل👌

أفضل شيء انت حصلت عليه فعلا في الجنة هو رؤيتك للإله إللي كنت بتعبده؛ الله عز وجل😊
قال رسول الله ﷺ:
"فَيَكْشِفُ الحِجابَ، فَمَا أُعْطُوا شَيْئًا أَحَبَّ إِلَيْهِمْ مِنْ النَّظَرِ إِلَى رَبِّهِمْ عَزَّ وَجَلَّ، وهي الزيادة في الآية ثُمَّ تَلَا:
"لِلَّذِينَ أَحْسَنُوا الْحُسْنَى وَزِيَادَةٌ"《صحيح مسلم》
يعني الحسنى هي الجنة، أما الزيادة فهي رؤية الله على وجل على الحقيقة بعيونهم👌

☆ملحوظة:
احنا كنا اتكلمنا بالتفصيل في الحلقة السابعة والأربعين عن أدلة رؤية المؤمنين لربهم في الجنة، فمش هعيد نفس الكلام، إللي عايز يعرف الموضوع بالتفصيل يرجع للحلقة،
بس حابة أفكركم بنقطة مهمة قلتها برده في نفس الحلقة وهي الفرق بين الرؤية وبين الإدراك أو الإحاطة،
بمعنى إننا مثلا لما بنشوف الشمس☀️ أو القمر ⚪ بنقدر نشوفهم كلهم على بعض من فوقهم لتحتهم ومن يمينهم لشمالهم وده كده اسمه الإحاطة، يعني عنينا بتبقى جايبة كل الشمس وكل القمر في نفس اللحظة،
لكن لما نشوف السماء🌌 منقدرش نشوفها كلها على بعضها زي الشمس والقمر كده،
احنا بنشوف بس جزء جزء؛ لأن عنينا متقدرش تجيب كل السماء في نفس الوقت،
فاحنا منقدرش نُحيط بكل السماء زي الشمس والقمر كده، لكن مع ذلك احنا بنشوفها،
فلله المثل الأعلى في السماوات والأرض،
المؤمنين شافوا ربنا في الجنة أهه لكنهم لم يدركوه أو يحيطوا بيه بأبصارهم👌
قال تعالى:
"لا تُدْرِكُهُ الْأَبْصَارُ"《سورة الأنعام آية(103)》
وقال: "وَلَا يُحِيطُونَ بِهِ عِلْمًا"《سورة طه آية(110)》

لما أهل الجنة يشوفوا ربنا؛ هيقول لهم:
"سَلُونِي"
يعني اطلبوا إللي انتم عايزينه، فَيَقُولُونَ: نَسْأَلُكَ الرِّضَا يَا رَبُّ🤲
فَيَقُولُ لهم الله: "رِضَائِي أَحَلَّكُمْ دَارِي، وأَنالَكُمْ كَرامَتي"
يعني لولا إني راضي عنكم أساسا مكنتوش دخلتم الجنة، فيقول لهم مرة تانية: سَلُونِي،
فَيَقُولُونَ بِأَجْمَعِهِمْ: نَسْأَلُكَ الرِّضَا🤲
يعني كلهم يُجمعوا على طلب واحد وهو إنه يرضى عنهم،
فَيُشْهِدُهمْ عَلَى الرِّضَا، يعني يحقق لهم طلبهم بإنه يرضى عنهم،
ثُمَّ يَقُولُ: "سَلُونِي"
"فَيَسْأَلُونَهُ حَتَّى يَنْتَهِيَ كُلُّ عَبْدٍ مِنْهُمْ، ثُمَّ يَفْتَحُ عَلَيْهِمْ مَا لَا عَيْنٌ رَأَتْ وَلَا أُذُنٌ سَمِعَتْ وَلَا خَطَرَ عَلَى قَلْبِ بَشَرٍ"
《رَوَاهُ ابْن أبي الدُّنْيَا وَالطَّبَرَانِيّ فِي الْأَوْسَط بِإِسْنَادَيْنِ أَحدهمَا جيد قوي وحسنه الألباني في "صحيح الترغيب"》

يعني ربنا بيقول لهم تمنوا وانا هحقق لكم ما تتمنوه، فكل واحد يطلب من ربنا كل ما يتمناه لحد ما خلاص تنقطع عنهم الأماني ومفيش حاجة في نفسهم؛ يفتح عليهم الله من النعيم إللي محدش شافه ولا سمع عنه ولا تخيله👌

ويتقابل المؤمنون مع بعض ويتذكروا أحوالهم في الدنيا ويقارنوا بين حالهم في الدنيا وحالهم دلوقتي في الجنة ويقولوا:
"إِنَّا كُنَّا قَبْلُ فِىٓ أَهْلِنَا مُشْفِقِينَ۩ فَمَنَّ اللَّهُ عَلَيْنَا وَوَقَانَا عَذَابَ السَّمُومِ۩إِنَّا كُنَّا مِنْ قَبْلُ نَدْعُوهُ إِنَّهُ هُوَ الْبَرُّ الرَّحِيمُ "
《الطور آية(26-28)》
يعني فاكرين لما كنا في الدنيا كنا واحنا حتى في وسط أهلنا؛ عايشين خائفين من أهوال يوم القيامة وخايفين من النار فكنا بنبعد عن الحرام ونلزم طاعته الله سبحانه،
وكنا دائما ندعوا الله إنه يصرف عنا عذاب جهنم وينجينا منها ويدخلنا الجنة برحمته،
فمن بِره ورحمته بنا إنه رزقنا رضاه والجنة، ووقانا مِن سخطه ووقانا من النار،
وهنا واحد منهم يقول لهم:
"إِنِّى كَانَ لِى قَرِينٌ۩ يَقُولُ أَإِنَّكَ لَمِنَ الْمُصَدِّقِينَ۩ أَإِذَا مِتْنَا وَكُنَّا تُرَابًا وَعِظَامًا أَإِنَّا لَمَدِينُونَ"《الصافات آية(51–53)》
يعني واحد منهم بيحكي عن صديق له كان معاه في الدنيا كان بيسخر منه ويستهزأ بيه وينهاه عن الإِيمان بالبعث والحساب ويزين له الكفر في الدنيا ويقول له:
يا عم انت مصدق إننا بعد ما نموت هنتحاسب والكلام ده 🙄
ياعم عيش حياتك بلا كلام فاضي😏
فهو دلوقتي عايز يعرف صاحبه ده حصل معاه إيه،
فهيقول لأصحابه من أهل الجنة تعالوا كده نشوف حصل معاه إيه،
"قَالَ هَلْ أَنْتُمْ مُطَّلِعُونَ"《الصافات آية(54)》

فيكشف الله له عن موقع قرين السوء ده فيشوفه في وسط النار بيتعذب أنواع العذاب إللي قلناها قبل كده،
"فَاطَّلَعَ فَرَآهُ فِي سَوَاءِ الْجَحِيمِ"《الصافات آية(55)》

فيقول له: تَاللَّهِ إِنْ كِدْتَ لَتُرْدِينِ😳
وَلَوْلَا نِعْمَةُ رَبِّي لَكُنْتُ مِنَ الْمُحْضَرِينَ😠
يعني انت كنت هتوديني في داهية وكنت هتهلكني لو كنت سمعت كلامك ومشيت وراك،
ولولا فضل ربنا عليّ وهدايته لي وتثبيتي على الإيمان كان زماني معاك بتعذب في العذاب😤
فالحمد لله إنه نجاني من العذاب👌

ومش هو بس إللي هيشوف عذاب صاحبه،
ده كمان المؤمنين بصفة عامة هيشوفوا عذاب أهل النار عن طريق أبواب أو نوافذ يفتحها الله لأهل الجنة على النار زي ما قال ابن عباس رضي الله عنه،
فلما يشوفوهم هيضحكوا عليهم ويسخروا منهم زي ما كانوا بيعملوا مع المؤمنين بالضبط في الدنيا🙂
وده من الأمور إللي تسعدهم وتُسكن قلوبهم لأنهم شايفين إزاي ربنا انتقم من إللي ظلموهم وعذبوهم وسخروا منهم في الدنيا👌
"فَٱلْيَوْمَ ٱلَّذِينَ ءَامَنُواْ مِنَ ٱلْكُفَّارِ يَضْحَكُونَ۩عَلَى الْأَرَائِكِ يَنْظُرُونَ"
《المطففين آية(35-36)》

☆ملحوظة:
بالنسبة لرؤية أهل الجنة لعذاب أهل النار؛ ممكن تسأل وتقول إزاي واحد ممكن يكون مبسوط في الجنة وهو له حد من أهله في النار وشايفه أمامه بيتعذب😥

شوف،
أهل الجنة وهم في الجنة لا يحزنوا على أي حد من أصدقائهم أو أقاربهم إللي كانوا معاهم في الدنيا لو كانوا من أهل النار،
ربنا قال لنا صراحة كده إن كل الوصلات والعلاقات والصداقات تنقطع يوم القيامة، ولا يبقى إلا وصلة التقوى والعمل الصالح👌
قال الله تعالى:
"الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ"
《الزخرف آية(67)》
فالمؤمن هيكون عارف حكم الله في الكفار وبالتالي يُسلم لحكمة ربنا في أفعاله،
وكمان النعيم إللي هو فيه هينسيه أي حاجة تانية ومش هيبقى مشغول إلا بالنعيم ده👌
"إِنَّ أَصْحَابَ الْجَنَّةِ الْيَوْمَ فِي شُغُلٍ فَاكِهُونَ"
《يس آية(55)》

بعد ما ينتهي السوق؛ يرجع أهل الجنة لبيوتهم، فلما يدخلوا تقول لهن أزواجهن:
"وَاللهِ لَقَدِ ازْدَدْتُمْ بَعْدَنَا حُسْنًا وَجَمَالً"
《رواه مسلم》
يعني انتم راجعين بجمال وحسن زيادة عما كنتم عليه قبل ما تخرجوا من عندنا😮
فيقول لهم أزواجهم:
"وأَنْتُمْ، واللَّهِ لَقَدِ ازْدَدْتُمْ بَعْدَنا حُسْنًا وجَمالًا"
《رواه مسلم》
يعني حتى انتم كمان ازددتم جمال عما كنا سايبينكم😮

¤معنى كده إن النساء محضروش سوق الجمعة😳

هنعرف الإجابة في الجزء الثاني من الحلقة ....

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

◇مصادر حلقة النهاردة في التعليقات 👇

♡طبعا أي ملاحظة ياريت تقوليلي فالمؤمن مرآة أخيه❤

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy

⭐️المصادر⭐️

https://almunajjid.com/courses/lessons/49

https://youtu.be/QIKgknsg0NY

https://www.alathar.net/home/esound/index.php?op=codevi&coid=42326

https://www.dorar.net/hadith/sharh/1840

https://islamqa.info/ar/answers/10087/%D8%AD%D9%8A%D8%A7%D8%A9-%D8%A7%D9%84%D8%A7%D8%AE%D8%B1%D8%A9-%D9%84%D8%A7-%D9%81%D9%86%D8%A7%D8%A1-%D8%A8%D8%B9%D8%AF%D9%87%D8%A7

https://www.dorar.net/hadith/sharh/13177

https://islamqa.info/ar/answers/121628/%D9%85%D8%AA%D9%89-%D9%8A%D9%83%D9%88%D9%86-%D8%B0%D8%A8%D8%AD-%D8%A7%D9%84%D9%85%D9%88%D8%AA-%D9%88%D9%85%D8%A7-%D8%AD%D8%A7%D9%84-%D8%A7%D8%B5%D8%AD%D8%A7%D8%A8-%D8%A7%D9%84%D9%83%D8%A8%D8%A7%D9%89%D8%B1-%D9%81%D9%8A-%D8%A7%D9%84%D8%A8%D8%B1%D8%B2%D8%AE

https://www.islamweb.net/amp/ar/fatwa/63070/

http://iswy.co/e2bsih

https://binbaz.org.sa/audios/2658/592-%D9%85%D9%86-%D8%AD%D8%AF%D9%8A%D8%AB-%D8%A7%D9%86-%D9%81%D9%8A-%D8%A7%D9%84%D8%AC%D9%86%D8%A9-%D8%B3%D9%88%D9%82%D8%A7-%D9%8A%D8%A7%D8%AA%D9%88%D9%86%D9%87%D8%A7-%D9%83%D9%84-%D8%AC%D9%85%D8%B9%D8%A9-%D9%81%D8%AA%D9%87%D8%A8-%D8%B1%D9%8A%D8%AD-%D8%A7%D9%84%D8%B4%D9%85%D8%A7%D9%84

درجة حديث إذا اشتهى الرجل صورة دخل فيها
https://islamqa.info/amp/ar/answers/238569

https://almunajjid.com/courses/lessons/54

https://dorar.net/hadith/sharh/20818

https://islamqa.info/ar/answers/14525/%D9%87%D9%84-%D9%8A%D8%B1%D9%89-%D8%A7%D9%84%D9%85%D9%88%D9%85%D9%86%D9%88%D9%86-%D8%B1%D8%A8%D9%87%D9%85-%D9%81%D9%8A-%D8%A7%D9%84%D8%AC%D9%86%D8%A9

https://www.google.com/amp/s/islamqa.info/amp/ar/answers/210252

https://majles.alukah.net/t155282/

https://dorar.net/hadith/sharh/22909

http://www.quran7m.com/searchResults/052026.html

http://www.quran7m.com/searchResults/037051.html

https://www.google.com/amp/s/islamqa.info/amp/ar/answers/148143

https://islamqa.info/ar/answers/115480/%D9%87%D9%84-%D9%8A%D8%AD%D8%B2%D9%86-%D8%A7%D9%87%D9%84-%D8%A7%D9%84%D8%AC%D9%86%D8%A9-%D8%B9%D9%84%D9%89-%D8%A7%D9%82%D8%B1%D8%A8%D8%A7%D9%89%D9%87%D9%85-%D9%88%D8%A7%D8%AD%D8%A8%D8%A7%D8%A8%D9%87%D9%85-%D9%88%D9%87%D9%85-%D9%8A%D8%B9%D8%B0%D8%A8%D9%88%D9%86-%D9%81%D9%8A-%D8%A7%D9%84%D9%86%D8%A7%D8%B1

http://www.quran7m.com/searchResults/037056.html

http://www.quran7m.com/searchResults/037058.html

http://www.quran7m.com/searchResults/037060.html

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثانية_والسبعون
#المرحلة_الثالثة_اليوم_الآخر
#وصف_الجنة_والنار_الجزء_السادس_عشر
#ما_للنساء_في_الجنة_الجزء_الأول

تخيلي نفسك كده قاعدة في شاليه أو فيلا في الساحل الشمالي أو في جزر المالديف أو في أجمل مكان شافته عينك هنا أو هنا،
قاعدة كده باسترخاء على كرسي مُريح مُبّطن وطري وناعم باسترخاء وفي إيدك كوباية العصير ولابسة الملابس إللي انتِ عايزاها وقاعدة في المكان ده لوحدك لا حد يبص لك نظرة مش كويسة، ولا حد يعلق على طريقة قعدتك ولا على ملابسك،
قاعدة كده بالك رايق لا وراكي مواعين ولا وراكي غسيل ولا وراكي عيال هتذاكري لهم ولا وراكي أكل هتعمليه، ده الأكل نفسه هيجيلك لحد عندك بالتحلية كمان😅
أو ممكن تخرجي تاكلي في مكان حلو براحتك برده، ولا شايلة هم فلوس ولا مستقبل هيحصل فيه إيه، ولا خايفة على عيل من العيال يجراله حاجة،
ولا متخانقة مع حد وحارق دمك،
ولا بيجيلك حيض ولا نفاس، ولا بتقومي كل شوية تدخلي الحمام،

القعدة دي لوحدها كده مع الهدوء النفسي ده جنة والله😅
فما بالك بقى بإنك فوق كل ده هتستمتعي بكل حاجة مش بس تخطر على بالك، لأ ده حتى إللي متخطرش على بالك👌
≈خروج وفُسح ماشي،
≈ذهب ولؤلؤ وياقوت وكل ما تتصوريه من أشكالهم وتصاميمهم؛ موجود وليكي لوحدك محدش هيورثك فيهم ولا محتاجة تحوشيهم للزمن💁
≈أكل وشرب أشكال وألوان من غير ما تحطي إيدك في حاجة؛ ولا في أحلى من كده😀
≈وحتى زوجك هيكون أجمل وأحسن خُلق من أي حد شوفتيه أو عرفتيه👌
≈ولو مرة كده كان نفسك تخلفي؛ هتحملي وتولدي وطفلك يكبر لحد ما يوصل ثلاثين سنة؛ كل ده خلال ساعة واحدة فقط💁
قال رسول الله ﷺ:
"المؤمنُ إذا اشتَهَى الولدَ في الجنَّةِ، كانَ حملُهُ ووضعُهُ وسِنُّهُ في ساعةٍ كما يشتَهي"《صحيح الترمذي》

فكل حاجة اتكلمنا عنها في الحلقات إللي فاتت عن نعيم الجنة هي للرجال والنساء مع بعض👌
يعني ربنا وعد المؤمنين رجالا ونساءا بالجنة والنعيم والثواب الكريم،
فكل نعيم سواء الأنهار والطعام والشراب والبيوت والقصور وتحقيق الأماني والسُرر والآرائك و...و...
كل ده هو للرجال والنساء👌
والدليل على كده قول ربنا:
"وَمَنْ يَعْمَلْ مِنْ الصَّالِحَاتِ مِنْ《ذَكَرٍ أَوْ أُنثَى》وَهُوَ مُؤْمِنٌ فَأُوْلَئِكَ يَدْخُلُونَ الْجَنَّةَ وَلا يُظْلَمُونَ نَقِيرًا"《سورة النساء آية(124)》
وقال:
"مَنْ عَمِلَ صَالِحًا مِنْ《ذَكَرٍ أَوْ أُنثَى》وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ"
《سورة النحل آية(97)》
فالأصل أن النعيم للرجال والنساء الاتنين زي بعض👌
وأعظم نعيم لأهل الجنة زي ما قلنا المرة إللي فاتت هو رؤية الله عز وجل، يعني أهل الجنة هيشوفوا إن مفيش نعيم أعظم من رؤية الله عز وجل،
والنعيم ده برده يكون للرجال والنساء، ومن الأدلة على ده قول ربنا:
"لِّلَّذِينَ أَحْسَنُواْ ٱلْحُسْنَىٰ وَزِيَادَة"
والنساء من الذين أحسنوا، فلهن الحسنى يعني الجنة وكذلك الزيادة وهي النظر إلى وجه الله عز وجل زي ما شرحنا المرة إللي فاتت.

فاللي يخلي الواحدة مننا كنساء تصبر على طاعة الله وتتمسك بدينها وبأحكامه الشرعية والتسليم لأوامر الله وتجتهد في العمل الصالح وتحب لقاء الله؛ هو شوقها لمغفرة الله تعالى، والتنعم بالجنة والنجاة من عذاب النار، زيها زي الرجل تماما👌

وخصوصا بقى إن رسول الله ﷺ قال عننا كنساء إننا أكثر أهل النار😥
قال رسول الله ﷺ:
"اطَّلَعْتُ فِي الْجَنَّةِ فَرَأَيْتُ أَكْثَرَ أَهْلِهَا الْفُقَرَاءَ وَاطَّلَعْتُ فِي النَّارِ فَرَأَيْتُ أَكْثَرَ أَهْلِهَا النِّسَاء"《رواه البخاري ومسلم》

طب ليه كده😳
فعلا الصحابيات لما سمعوا كلام رسول الله ﷺ تعجّبن وسألنه:
ليه النساء أكثر أهل النار😳
فقال لهن رسول الله ﷺ:
"لأنَّكُنَّ تُكْثِرْنَ الشَّكَاةَ، وَتَكْفُرْنَ العَشِيرَ"
《صحيح مسلم》
وفي رواية تانية قال: "تُكْثِرْنَ اللَّعْنَ وَتَكْفُرْنَ الْعَشِير"
《رواه البخاري》
يعني لأن النساء بيعملوا ثلاثة أشياء كتير جدا، يعني مش مجرد مرة أو مرتين لأ ده حاجة كده زي الطبع فيهن،
¤أولا:
بيشتكوا كتير ومش بترضى بالقليل، يعني كل حاجة النساء تقعد تشتكي منها ومش عاجبها حاجة😅
وعلى فكرة ده واقع أنا شوفته بعيني بين النساء وانتم شايفين مواقع التواصل وإللي بيحصل فيها،
ده الشكوى واصلة لأتفه الأمور🤦
وحتى البنات الصغيرات تلاقيهم بيشتكوا عمّال على بطال، بداعي وبدون داعي، وأنا عندي نسختين منهم🙂

¤ثانيا: بيكثروا من اللعن يعني بيلعنوا كتير برده، وانتم عارفين إن مش من صفات المؤمن إنه يكون لعان💁

¤ثالثا: وَتَكْفُرْنَ الْعَشِير يعني المرأة تنكر وتجحد فضل زوجها عليها،
فتقول مثلا عن زوجها ده بخيل وظالم أذاقني الأمرَّين عشان موقف حصل أغضبها فيه لكنه في الحقيقة محسن إليها😅

☆ممكن واحدة تقول لي: طيب ما هو في رجال بيعملوا كده اشمعنى بقى👀
ثم يعني ده طبع في النساء زي ما قلتي أهه، يعني ربنا خلقنا كده، فلماذا نُحاسب على الطبع😑

¤أولا: احنا محتاجين نركز في ورقة امتحاننا احنا ونسيبنا من الرجال،
كل واحد هيتحاسب على أفعاله هو،
إللي فيه الصفات دي من الرجال ربنا هيحاسبه،
كفران العشير ده يعني جحود النعمة وإنكارها من كبائر الذنوب على الرجال والنساء سواء بسواء،
أصلا الإنسان بطبيعته جاحد للإحسان وجاحد للمعروف زي ما ربنا قال: "إِنَّ الْإِنْسانَ لِرَبِّهِ لَكَنُودٌ" 《سورة العاديات آية(6)》
والكنود هو إللي ييقعد يعد المصائب، وينسى النعم،
لكن التحذير من كفران النعمة وجحودها للنساء أكثر لأنه يغلب عليهن أكثر من الرجال لطبيعة خلقتهن👌

فاحنا نخلينا زي الصحابيات إللي أول ما سمعوا الكلام ده؛ قامت كل واحدة منهن وقعدت تتصدق باللي معاها من ذهب وغيره لأن الصدقة تطفئ غضب الرب👌
مفيش واحدة فيهم قالت مثلا اشمعنى احنا يعني إللي تقول لنا الكلام ده يا رسول الله، ما الرجال فيهم العِبَر😑
هم سألوا رسول الله ﷺ عن السبب ليه هم أكثر أهل النار عشان يتجنبوا الوقوع في الحاجة إللي تدخلهم النار،
فاحنا عايزين ننجي نفسنا من النار إللي شوفنا أهون عذابها عامل إزاي😥
وربنا بيقول لنا:
"فَمَنْ زُحْزِحَ عَنِ النَّارِ وَأُدْخِلَ الْجَنَّةَ فَقَدْ فَازَ"
《سورة آل عمران آية(185)》
يعني مجرد بس ما الواحد اتزاح عن النار ودخل الجنة خلاص كده هو فاز،
فمحدش فينا يقدر يستحمل في النار ثانية؛ ناهيكم إنه يقعد يتعذب فيها أصلا،
فاحنا بلاش نبقى مركزين مع غيرنا ونقعد نقارن ونقول اشمعنى والكلام ده،
خلونا نكون مركزين مع نفسنا وإصلاحها عشان نعدي بيها إلى الجنة👌

¤ثانيا:
يا جماعة احنا لا نُحاسب على الطبع إللي ربنا جعله فينا، ولكن نحاسب على الإرادة،
يعني انتم متفقين معايا إن الدنيا دار ابتلاء واختبار💁
فربنا وضع فينا بعض الأمور عشان نقاومها؛ ليتبين ويظهر الشخص إللي هيقاوم رغباته وطباعه ممن سيستلم لها، وبالتالي نؤجر عليها👌
يعني مثلا ربنا جعل فينا الشهوة وهي من طبيعة البشر،
لكن هناك مَن يستخدمها بإرادته في الحلال وهناك من يستخدمها بإرادته في الحرام، فاللي استخدمها في الحرام؛ يأثم، وإللي استخدمها في الحلال؛ يُؤجر،
فهنا ربنا لا يحاسبنا على الشهوة نفسها لكن يحاسبنا على طريقة استخدامها👌
ففي طبع النساء أنهن لا يصبرن ولا يشكرن ويكثرن اللعن أكثر من الرجال،
فاللي بتجاهد نفسها وتصبر وتشكر ولا تشتكي وتحفظ لسانها وتحفظ لصاحب المعروف معروفه؛ تخرج من الدائرة دي كلها وربنا يكافؤها بالجنة👌
ثم إزاي يكون البلاء بلاءا إذا لم يكن صعبا على النفس🤷
هل مذاكرة الإنسان لمادة سهلة وبيحبها هتكون مثل مذاكرة مادة صعبة ويكرهها؟
طبعا لأ💁
واحنا جئنا للدنيا هنا للعبادة وللاختبار عشان ندخل الجنة في الآخرة،
والجنة حُفّت بالمكاره، يعني أي طريق يوصلنا للجنة هنلاقي فيه الأمور إللي نكرهها ويجب علينا تخطيها،
وتختلف المكاره لكل إنسان فينا، فابتلائي غير ابتلائك غير ابتلاء فلان،
ممكن يكون ابتلاء امرأة معينة في طبعها إللي اتكلمنا عنه ده، وواحدة تانية قدرت إنها تتغلب على طبعها ده فكان ابتلائها في حاجة تانية خالص، وهكذا👌

فربنا جعل للرجال والنساء ابتلاءات بحسب طبيعة كل واحد فيهم وإللي يقدر يستحمله،
وربنا قال إنه لا يكلف نفس إلا طاقتها وإللي تقدر عليه، فعشان كده مثلا أوجب على الرجال إنهم يصلوا الصلوات الخمس في المسجد،

≡《صلاة الجماعة في{المسجد} واجبة على الرجال القادرين و تاركها من غير عذر؛ يأثم، مع صحة صلاته،
وده على الصحيح من أقوال العلماء لأدلة كثيرة مش هقدر أذكرها هنا لأنها مش موضوعنا وهتلاقوا رابط في التعليقات 👇 من موقع الإسلام سؤال وجواب لتوضيح المسألة بالأدلة الصحيحة》≡

و أوجب عليهم كمان صلاة الجمعة في المسجد، مع إن اليوم ده يوم أجازة الرجل فبيبقى عايز يريّح فيه،
وفي وعيد شديد للي بيفوت صلاة الجمعة ثلاث مرات ورا بعض زي ما جاء في أحاديث رسول الله ﷺ إللي منها قوله:
"مَنْ تَرَكَ ثَلَاثَ جُمَعٍ تَهَاوُنًا بِهَا طَبَعَ اللَّهُ عَلَى قَلْبِهِ"
《صحيح الجامع》
طَبَعَ اللَّهُ عَلَى قَلْبِهِ يعني ختم على قلبه وجعل عليه غشاوة ومنعه ألطافه، وجعل فيه الجهل والجفاء والقسوة ، أو جعل قلبه قلب منافق👌

فالرجل بيقاوم نفسه في إنه يترك شغله وعمله ودنيته ووقت راحته عشان ينزل للصلاة في عز الحر أو عز البرد،
وده غير مفروض على النساء تماما؛ لأن طبيعة خلقتها مستحملش ده،
يعني ربنا خلق المرأة بطبيعة تختلف عن طبيعة الرجل من حيث البنية الجسدية ومن حيث التكوين النفسي💁

وعلى الأساس ده كلف كل واحد فيهم بتكاليف تناسب طبيعته،
و بكده يحصل التكامل بينهم عشان الحياة البشرية تستمر،
فمثلا ربنا كلف الرجل بالعمل عشان ينفق على زوجته ويرعى شؤونها وأعطاه من القوة الجسدية إللي تساعده على تحمل أقسى درجات العمل، ولم يكلفه بالحمل والرضاعة مثلا😅
في حين إن المرأة مُكلفة بالحمل والرضاعة ورعاية الأولاد وعندها من القوة النفسية إللي تخليها تتحمل زن العيال وأرفهم😬

☆طبعا مليش دعوة بانتكاس الفطرة إللي حاصل في زمننا دلوقتي بخروج المرأة للعمل《بدون داعي ولا ضرورة》والزوج عايش على مرتب زوجته وبيشترط كمان إنها تكون بتشتغل عشان يتزوجها،
أنا بتكلم في شرع ربنا إللي فيه الصلاح ومع ذلك الناس تركته ومشيت وراء أهواءها😓

فالشاهد يعني إن إللي بيكون مفروض على الرجال والنساء هو بما يتناسب مع طبيعة كل واحد فيهم،
ولو شاء ربنا لجعل الرجال والنساء زي بعض،
لكن هو بيبتلي وبيكلف كل واحد على حسب القدرات إللي هو أعطاها لكل واحد منهم، فالمطلوب إننا نسارع في تنفيذ أمر ربنا زي ماهو أمر بالضبط👌
"وَلَوْ شَآءَ ٱللَّهُ لَجَعَلَكُمْ أُمَّةً وَٰحِدَةً وَلَٰكِن لِّيَبْلُوَكُمْ فِى مَآ ءَاتَاكُمْ ۖ فَٱسْتَبِقُواْ ٱلْخَيْرَٰتِ"《المائدة آية( 48)》
《طبعا سياق الآية مختلف، لكن معناها العام ينفع الاستشهاد بيه هنا إن شاء الله》

فلما ييجي بقى يوم القيامة في الجنة؛ ربنا بيكافئ كل واحد على حسب إللي هو صَبر عليه، يعني الجزاء من جنس العمل،
فلما كان الرجال بيروحوا يصلوا في المساجد ربنا عمل ليهم سوق الجمعة كمكافأة خاصة بيهم عشان يلتقوا ببعض ويشوفوا ربنا زي ما كانوا بيلتقوا في الدنيا،
وفي نفس الوقت ده النساء هتشوف ربنا برده في بيوتهن زي ما كانوا بيصلوا لربنا في بيوتهن زي ما رسول الله ﷺ قال عن صلاة المرأة في بيتها إن أفضل من صلاتها في المسجد💁
فربنا سبحانه لا يشغله شيء عن شيء سبحانه،
فزي ما كنتِ بتصلي له في بيتك، و زوجك أو ابنك أو والدك بيصلوا في المسجد؛
كذلك هتشوفيه وانتِ في بيتك مُعززة مُكرمة؛ وزوجك أو ابنك أو والدك هيشوفه في سوق الجمعة مع المؤمنين إللي كان بيصلي معاهم👌

وحتى الرياح إللي اتكلمنا عنها المرة إللي فاتت فهيكون ليكي منها نصيب، لأنها هتصيب النساء وهن في بيوتهن برده عادي زيهم زي المؤمنين فيزدادوا جمال على جمالهن💁
زي كده لما تكوني في بيتك في الدنيا والريح تدخل البيت وتحسي بيها وكمان زوجك يحس بيها وهو في الشارع،
فكل نعيم انتِ مشتركة فيه مع الرجل سواء بسواء، يعني النتيجة واحدة لكن المكان بس هو إللي بيختلف،
هم بيشوفوا ربنا في السوق واحنا كنساء بنشوفه في قصورنا وبيوتنا، يعني ربنا أعزنا وأكرمنا دنيا وآخرة😁

ورؤية ربنا العامة لكل أهل الجنة رجالا ونساءا تكون كل جمعة ودي عليها الدليل الواضح الصريح،
وممكن يكون في إللي بيشوفه في أوقات تانية غير يوم الجمعة بحسب تفاوت واختلاف درجات أهل الجنة،
لكن عشان نثبت موضوع رؤية ربنا في أوقات تانية غير يوم الجمعة محتاجين دليل صحيح،
و مفيش دليل على كده، لكن برده مفيش حاجة تمنع حصول الرؤية في أوقات تانية غير سوق الجمعة للرجال والنساء👌

فخلاصة الكلام إن سوق الجمعة ده خاص بالرجال فقط زي صلاة الجمعة كده،
وظاهر الحديث إللي قلناه المرة إللي فاتت بيدل على كده فعلا، الحديث بيقول إن أهل الجنة من الرجال بعد السوق بيرجعوا إلى أهليهم، يعني زوجاتهم، فدل رجوعهم إليهن على أنهن لم يكن يرافقنهم👌
ولعل والله أعلم≡ والكلام إللي هقوله ده معلهوش دليل وهو استنتاج《شخصي》 مني≡:
إن سوق الجمعة يحضره الرجال ومعاهم زوجاتهم المؤمنات من أهل الدنيا إللي دخلوا الجنة،
والأهل إللي في البيوت وإللي هيرجع إليهم أزواجهم هم من الحور العين، باعتبار إن المرأة المؤمنة درجتها أعلى من الحور العين فهي راحت مع زوجها،
لكن زي ما قلت الكلام ده ليس عليه أي دليل🙅
وظاهر الأدلة إن السوق هو للرجال فقط زي ما شرحنا والله أعلى وأعلم👌

☆ممكن واحدة تقول طب هو مش ممكن يكون ربنا عمل سوق للنساء مخصوص يجتمعن فيه؟🤔
الله أعلم🤷
مفيش برده أي دليل على كده، إللي ربنا أخبرنا بيه إن في سوق في الجنة وإللي هيحضره هم الرجال فقط👌

☆طب ربنا قال عن الجنة إن فيها ما تشتهيه الأنفس، أنا دلوقتي أشتهي إني أروح سوق الجمعة ده، هل هروح ولّا لأ؟👀

ربنا قال إن إللي يشتهي حاجة《في الجنة》هيحققها له، وإللي بيشتهي حاجة في الدنيا غير إللي بيشتهيها في الجنة🤷
يعني مثلا ممكن واحدة في الدنيا كانت بتحب زوجها أو أمها أو أبوها ولكن مثلا حد فيهم مات على الكفر والعياذ بالله ومصيره إلى النار،
هي ممكن تشتهي في الدنيا إن ربنا يدخله الجنة ولا يعذبه في النار،

لكن في الجنة يستحيل تشتهي حاجة مخالفة لشرع الله أو ما فرضه الله عليها،
يعني هيكون هواها ورغباتها تابعة لإرادة ربنا؛ لأنه بيكون أحب إليها من أي شيء مهما كان هو إيه👌
فلو المرأة اشتهت أي شيء《في الجنة》مهما كان هو إيه؛ ربنا هيحققه لها كما وعد سبحانه💁

☆ممكن واحدة تقول لي:
انتِ قلتِ دلوقتي إن نعيم الرجال والنساء زي بعض، طيب الرجال ليهم الحور العين، النساء بقى ليهم إيييه👀 👀؟!!

ده إللي هنعرفه في الجزء القادم ...

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

◇مصادر حلقة النهاردة في التعليقات 👇

♡طبعا أي ملاحظة ياريت تقوليلي فالمؤمن مرآة أخيه❤

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy

⭐️المصادر⭐️

حكم صلاة الجماعة في المسجد:

https://www.google.com/amp/s/islamqa.info/amp/ar/answers/98739

https://islamqa.info/ar/answers/120/%D8%AD%D9%83%D9%85-%D8%B5%D9%84%D8%A7%D8%A9-%D8%A7%D9%84%D8%AC%D9%85%D8%A7%D8%B9%D8%A9-%D9%81%D9%8A-%D8%A7%D9%84%D9%85%D8%B3%D8%AC%D8%AF

https://islamqa.info/ar/answers/8918/%D8%A7%D9%84%D8%A7%D8%AF%D9%84%D8%A9-%D8%B9%D9%84%D9%89-%D9%88%D8%AC%D9%88%D8%A8-%D8%B5%D9%84%D8%A7%D8%A9-%D8%A7%D9%84%D8%AC%D9%85%D8%A7%D8%B9%D8%A9-%D9%81%D9%8A-%D8%A7%D9%84%D9%85%D8%B3%D8%AC%D8%AF

ترك صلاة الجمعة ثلاث مرات:

https://www.google.com/amp/s/islamqa.info/amp/ar/answers/186002

https://dorar.net/hadith/sharh/82738

http://www.quran7m.com/searchResults/056015.html

http://www.quran7m.com/searchResults/056016.html

http://www.quran7m.com/searchResults/015047.html

https://www.dorar.net/hadith/sharh/35650

https://youtu.be/ptdkbGOt4CY

http://www.saaid.net/female/m18.htm

https://youtu.be/73UONotXjTw

https://islamqa.info/amp/ar/answers/25843

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثالثة_والسبعون
#المرحلة_الثالثة_اليوم_الآخر
#وصف_الجنة_والنار_الجزء_السابع_عشر
#ما_للنساء_في_الجنة_الجزء_الثاني

وقفنا في الجزء إللي فات عند سؤال:
لما الرجال ليهم الحور العين، النساء ليهم إيه؟!

احنا قلنا فعلا إن نعيم الرجال والنساء زي بعض بالضبط إلا فقط لو حاجة معينة مخصوصة للرجال فقط أخبر بها رسول الله ﷺ،
زي موضوع السوق ده وزي إن الرجال لهم زوجات من الحور العين، وإن المرأة تكون قاصرة على زوجها فقط💁

وقبل ما أشرح سبب اختصاص الرجال بالحور العين؛ خلينا كده نحط قاعدة مهمة جدا عشان تكون الأمور واضحة:
الله عز وجل عادل ولا يظلم عباده مثقال ذرة،
وهو الحكيم العليم الذي يضع الأشياء في مواضعها، وهو الرحيم الكريم الذي يُكرم عباده ويتفضل عليهم👌
فمهما شوفنا بعقولنا القاصرة إن هناك أمر ظاهره ظلم أو ظاهره على غير هوانا فده غير صحيح🙅
احنا إللي بنكون مش فاهمين حكمة ربنا مش أكتر👌

بالنسبة بقى لنقطة الحور العين للرجال،
شوفوا،
احنا عشان نعرف الإجابة محتاجين نفهم طبيعة الرجل وطبيعة المرأة المختلفة،
فزي ما قلت من شوية إن ربنا خلقنا للعبادة، وقال لنا إن الدنيا دار بلاء واختبار،
واللي هينجح في الاختبار ربنا هيكافؤه بالجنة، وإللي مش هينجح مصيره إلى النار،
والاختبار أو الفتنة بيكون في نقطة ضعف كل واحد فينا بحسب طبيعته إللي ربنا خلقها له، فربنا جعل نقطة ضعف الرجال إللي ممكن تضيّعه وتضيّع دينه؛ في النساء👌
فأي حاجة خاصة بالنساء سواء شكلها أو صورتها أو هيئتها أو صوتها حتى لو مغطية نفسها بإسود في أسود ومش باين منها حاجة؛
فهي بتلفت نظر الرجال وتحرك شهوتهم وممكن تفتنهم، عشان كده ربنا أمر النساء بالحجاب وبالقرار في البيت وعدم الخروج إلا لضرورة👌

وربنا جعل شهوة الرجال أعلى من شهوة النساء بكتييير؛ والدليل على كده إن ربنا جعل للرجل القدرة إنه يتزوج من أربع نساء،
وده بعكس المرأة إللي بتتزوج رجل واحد،
≡《بتكلم على القاعدة العامة محدش يقولي في نساء شهوتها أعلى والكلام ده، بتكلم عن القاعدة العامة في الرجال والقاعدة العامة في النساء، تمام😀》≡
نكمل👌
فربنا بقى جعل ابتلاء الرجل في حبه للنساء والتعلق بهن، ورسول الله ﷺ قال: "ما تَرَكْتُ بَعْدِي فِتْنَةً أضَرَّ علَى الرِّجالِ مِنَ النِّساء"
《صحيح البخاري》
يعني أكتر ابتلاء وفتنة ممكن تضر الرجل وتخليه يضيع دينه زي ما قلت هي النساء،
والشيطان عارف الكلام ده كويس جدا😬
وهو مهمته إللي عايش عشانها إنه يضل بني آدم ويدخلهم النار، فبيُدخل للإنسان من نقطة ضعفه👌
عشان كده المرأة إذا خرجت من البيت:
"استشرفها الشيطانُ"《صحيح الترمذي》
يعني يتَطلَّعَ إليها الشَّيطانُ، فيزيَّنَها للرجال ويرفَعَ أبصارهم إليها، ليَغْوِيَها أو يغوِيَ بها غيرَها، فيُوقِع أحدَهما، أو كليْهما في الفتنةِ،

عشان كده ربنا أمر الرجل بغض البصر وعدم الخلوة مع النساء الغير المَحارم والابتعاد عنهن تماما،
وفي قصص كتير جدا عن انحراف شباب ملتزم عن الدين بسبب امرأة أحبها أو فُتن بيها،
لأ وكمان أئمة وعُبّاد تركوا الدين بالكلية وراحوا لدين تاني بسبب عشقهم لامرأة،
وإللي قرأ منكم السيرة معايا يفتكر قصة بِرصِيصَا العابد إللي كانت نهايته الكفر بالله والموت على الكفر ده بسبب امرأة👌

والعكس برده، ممكن تلاقي واحد دخل الدين بسبب حبه لامرأة، في حين إن الموضوع ده قليل في النساء《مقارنة》بالرجال💁
فالرجل هنا بيقاوم طبعه إللي ربنا فطره عليه زي ما اتكلمنا من شوية عن نقطة الطبع في النساء👌

أما المرأة فربنا جعل ابتلاءها في حبها للزينة وإظهار الزينة دي، يعني هي بتحب جدا تتزين وتظهر جمالها،
والكاسيات العاريات المتبرجات بالزينة إللي في الشوارع أكبر دليل على الكلام ده😀
وتلاقوا البنات بتتنافس في إظهار جمالهن وتزينهن وأكيد شوفتوا البنات في الأفراح والمولات بيكونوا عاملين إزاي😅
ده حتى الزينة وصلت للنقاب والخمار وبقينا نشوف العجب🙂وكمان البنت من صِغرها بتحب الزينة،
وربنا قال عن النساء:
"أَوَمَنْ يُنَشَّؤُا فِي الْحِلْيَةِ"《سورة الزخرف آية(18)》
يعني المرأة من صغرها تنشأ على لبس الزينة والحُلِي، يعني ده طبع فيها أهه،
ومن أصعب الأمور إللي ممكن تقنع بيها امرأة إنها تلبس الحجاب الشرعي الصحيح بما في ذلك تغطية الوجه😅
ولما كمان ربنا يقول لها تقعد في بيتها ومتخرجش إلا لضرورة عشان متفتنش الرجال حتى وهي لابسة حجابها الشرعي؛ بتحس إنها مقيدة والموضوع ثقيل على نفسها جدا😣
وفي إللي تبدأ تعترض على شرع ربنا وساعات تتعدى بألفاظ سيئة تؤدي بيها للكفر والعياذ بالله😓

لكن زي ما قلنا الموضوع ابتلاء واختبار وربنا قال:
"وَجَعَلْنَا بَعْضَكُمْ لِبَعْضٍ فِتْنَةً أَتَصْبِرُونَ"《سورة الفرقان آية(20)》

يعني الرجل ربنا بيختبره بالمرأة وهل هيصبر ويغض بصره عنها وميقربش منها ويقاوم طبعه ولّا هيعمل العكس؟!
وكذلك المرأة ربنا بيختبرها بإخفاء زينتها مع حبها الفطري إللي في طبعها لإظهار الزينة دي بسبب وجود الرجل وإنها لا تفتنه،
فهل هتصبر؟ ولّا هتتفنن بإظهار الزينة حتى وهي لابسة حجابها؟!
وأكيد طبعا انتم مش ناسيين الوعيد للنساء الكاسيات العاريات إللي لا يدخلن الجنة ولا يجدن ريحها💁

فدلوقتي بعد ما فهمنا طبيعة وطبع كل واحد هنفهم إن لما كان اختبار الرجل في النساء وصبر على اختباره ده؛ كانت مكافئته وتشويقه إلى الجنة من جنس صبره وهي المكافأة بالنساء الجميلات وهن الحور العين💁

وكذلك المرأة لما كان اختبارها وفتنتها في الزينة وصبرت على عدم إظهار زينتها وأُمرت بتغطية جسدها كلها حتى الوجه والكفين؛ كانت مكافئتها بكل ما تشتهيه من أنواع الزينة في الجنة وما لم يخطر حتى على بالها💁
فربنا العالم بما خلق كافأ كل واحد بأكثر شيء هو ابتُليَ فيه وصبر عليه👌

فيبقى خلاصة الكلام كوووله إن ربنا بيكافئ كل واحد من جنس الحاجة إللي صبر عليها بصفة عامة👌
وكون إن الرجل ربنا فضله بالحور العين، فده لا يمنع من أن المرأة قد تفضله بأشياء أخرى كالدرجة الأعلى والأرفع وما فيها من النعيم الذي يناسبها،
والمرأة مثل الرجل في وعد الله لها بالدرجات العُلى، وبارتفاع درجتها لحفظها القرآن الكريم، فتقرأ وترقى، وتكون منزلتها عند آخر آية كانت تقرؤها،
وممكن تكون في درجة نازلة، فيرفعها الله إلى درجة زوجها، زي ما ربنا قال:
"ادْخُلُوا الْجَنَّةَ أَنتُمْ وَأَزْوَاجُكُمْ تُحْبَرُونَ"《سورة الزخرف آية(70)》

فالواحدة فينا كده لما تكون عارفة إن أكثر أهل النار النساء وعارفة الوعيد إللي منتظر المرأة الكاسية العارية إللي بتظهر زينتها؛
أكيد هتجتهد بكل طاقتها عشان متبقاش مع الأكثرية دي،
ومش هتنظر للرجال هم لهم إيه في الجنة واشمعنى هم يعني إللي ياخدوا الحور العين واحنا ملناش حاجة زيهم كده والكلام ده💁

ثم يعني الحور العين دي نعمة بسيطة بجانب نعيم فيه ما لا عين رأت ولا أذن سمعت ولا خطر على قلب بشر إللي النساء هتحصل عليه😅
ومتنسوش يا جماعة إن محدش بياخد كل حاجة،
يعني المؤمن عارف إنه مش هيقدر يَحصُل على منازل ودرجات كثيرة في الجنة زي درجات الأنبياء أو درجات الشهداء مثلا،

فهل الواحد بقى يقعد يقول اشمعنى هم لهم كذا وكذا وأنا لأ😑
مش منطق أبدا🤷
كل واحد في الجنة له نعيمه إللي ربنا اختصه بيه، والكل في الجنة هيبقى في قمة الرضا والسعادة ومش هيبقى في حد ساخط👌
فاحنا بس ربنا يكرمنا كده و ندخل الجنة وكل حاجة محلولة بعدين إن شاء الله😄

☆ملحوظة:
وجوب تغطية الوجه للنساء قال به فقهاء المذاهب الأربعة بدون أي خلاف في زمن الفتن، وزمن الفتن هو:
"الزمن الذي يَكثُر وينتشر فيه الفسق، ويَضعُف فيه الوازع الإيماني وكذلك يَنعدم الرّادع السلطاني"
والفسق معناه انتشار فِعل المحرمات وعدم الاستجابة لأوامر الله بسبب ضعف الالتزام بالدين عند الناس وبالتالي ضعف الوازع الإيماني يعني ضعف الإيمان،
وانعدام الرادع السلطاني يعني مفيش قانون من الدولة يمنع انتشار المعاصي، فما بالكم إذا كانت الدولة هي الراعية للمعاصي وبتساعد على انتشارها🤷
فاللي يشوف زماننا دلوقتي هيلاقي إنه تحقق فيه وبقوة معنى《زمن الفتن》👌
وطبعا اعتراض أكثر النساء على الكلام ده فيه دليل تاني إن فتنة واختبار النساء هو في أمرهن بإخفاء الزينة وإخفاء جمالهن😅

☆ممكن واحدة تقول:
طب هل معنى كده إن النساء مش هتلبس حجاب في الجنة ومش هتغطي وشها، وهتخرج عادي وسط الرجال وتقعد معاهم وتكلمهم 🤔

¤أولا: بالنسبة للبس النساء للحجاب في الجنة وتغطية الوجه:
فلا يظهر أن المرأة في الجنة تغطي وجهها،
وأصلا ليس في الجنة نظر سوء، ولا مرض قلب حتى تُلزَم المرأة بتغطية وجهها، ولا هي في موضع للعمل والأمر والنهي، يعني الجنة دار جزاء مش دار تكليف،
وبالنسبة لحديث رسول الله ﷺ عن نساء الجنة:
"لَنَصِيفُهَا عَلَى رَأْسِهَا خَيْرٌ مِنْ الدُّنْيَا وَمَا فِيهَا"
《رواه البخاري》
فالنصيف هو خمار الرأس، وهو من الزينة إللي المرأة بتتزين بيه في الجنة، مش إنها بتلبس حجاب وخمار زي الدنيا كده،
عارفين زي كده العروسة إللي بتلبس طرحة مع فستان فرحها للزينة،
فالنصيف ده كده، المرأة بتحطه على رأسها لتتزين بيه👌

¤ثانيا:
المرأة تكون في الجنة في مملكتها تتنعم بكافة أنواع النعيم من غير ما تكون مختلطة بالرجال،
يعني هي أصلا مش هتبقى محتاجة إنها تختلط بالرجال ولا تشوفهم ولا تكلمهم، هي مفيش في عينها غير زوجها وبس💁

هو لو واحدة زوجها وصل لأعلى درجات الجمال والكمال وحُسن الخلق؛ هتحتاج تنظر لغيره من الرجال أو تتكلم معاهم ليه 🤷

هي لا تطلب في الجنة غير زوجها ولا ترغب إلا به،
ولا هتبحث عن أشخاص كانت تعرفهم في الدنيا مثلا، ولا حتى الرجل هيبحث عن نساء كان يعرفهن في الدنيا؛
لأنه عنده زوجاته إللي جمال وكمال الواحدة منهن بلغ مرحلة تخليه مش شايف غيرها👌
وده بيدل على جمال الرجال والنساء في الجنة، ومحبة بعضهم بعضا محبة تجعل أحدهم لا يبحث عن شخص غيره،
وبيدل كمان على شدة عفّتهم كلهم،
فالجنة دار كرامة لا فيها خُبث ولا شر ولا سُوء، وليس فيها شهوة مُحرمة حتى لو مجرد أمنية،
يعني مفيش مثلا حد هيتمنى إنه يتزوج من نفس جنسه، لا رجل يتزوج رجل ولا امرأة تتزوج امرأة، الكلام ده ضد الفطرة أصلا😅

وكل حاجة المرأة هتكون عايزاها هتلاقيها عندها، وتقدر تخرج في البساتين ورياض الجنة زي ما هي عايزة،
فنساء الدنيا زي الحور العين كده《مَقْصُورَاتٌ فِي الْخِيَامِ و قاصرات الطرف》، يعني موجودين في خيام اللؤلؤ ولا ينظرن ولا يُحببن إلا أزواجهن👌
فبالتالي المرأة لا هتتكلم مع الرجال ولا هتخرج في وسطهم ولا هتختلط بيهم زي اختلاطهم في الدنيا كده💁

¤طب ورسول الله ﷺ، النساء كده مش هيشوفوه ولا يكلموه😥
والصحابة والصالحين، النساء مش هيشوفوهم ولا يكلموهم؟!

¤أولا:
رسول الله ﷺ وضعه مختلف، فهو في منزلة الأب لبنات أمته،
يعني نساء الجنة يشوفوه ويكلموه عادي جدا، فكل نبي أبو أمته
زي ما قال لوط عليه السلام لقومه:
"هَؤُلَاءِ بَنَاتِي هُنَّ أَطْهَرُ لَكُمْ"《سوؤة هود آية(78)》
يعني هو مكنش بيتكلم عن بناته إللي من صلبه، لكنه كان بيتكلم عن بنات أمته، فالنبي للأُمة بمنزلة الوالد للرجال والنساء👌

¤ثانيا:
بالنسبة لرؤية النساء للصحابة والصالحين، أو حتى رؤية الرجال للصحابيات والصالحات؛
فالظاهر من خلال الآيات والأحاديث الصحيحة إن المرأة تعيش مع زوجها وذريتها في مملكتها في الجنة وأنها تكتفي بزوجها عن الناس زي ما قلنا من شوية،
ومفيش نص واضح وصريح من القرآن أو السنة بيوضح مسألة رؤية المرأة للرجال الأجانب عنها زي الصحابة والصالحين،
أو رؤية الرجل ومقابلته للصالحات والعابدات من المؤمنات من أهل الجنة أو حتى أمهات المؤمنين،
فدي من أمور الغيب إللي محدش يعرفها ومحدش يقدر يتكلم فيها برأيه،
فمفيش نفي ولا إثبات لرؤية الرجال للنساء ولا رؤية النساء للرجال،
لكن زي ما قلنا من شوية إن ظاهر الأدلة بيقول إن مفيش اختلاط بين الرجال والنساء،
وإللي دل عليه القرآن إن المؤمنين بيلتقوا مع بعض وبيجلسوا على السرر متقابلين، زي ما ربنا قال:
"عَلَى سُرُرٍ مَوْضُونَةٍ ۩ مُّتَّكِـِٔينَ عَلَيْهَا مُتَقَٰبِلِينَ"
《سورة الواقعة آية(15-16) 》
وقال:
"وَنَزَعْنَا مَا فِى صُدُورِهِم مِّنْ غِلٍّ إِخْوَٰنًا عَلَىٰ سُرُرٍۢ مُّتَقَٰبِلِينَ"
《سورة الحِجر آية(47)》
والآيتين معناهم:
إن الواحد منهم هيبقى قاعد ومريّح وهو باله رايق على سرير منسوج بالذهب والفضة واللؤلؤ، والجواهر، وغير ذلك من الزينة التي لا يعلمها إلا الله،
وكل واحد منهم وجهه في وجه الآخر، مبسوطين وفرحانين برؤية بعضهم البعض؛ لأن رؤية وجوه الأحباب يزيد الأنس والبهجة👌

فالرؤية هنا ظاهرها إنها عامة، ومنعرفش هل تشمل رؤية الرجال للنساء ورؤية النساء للرجال كمجرد رؤية أم هي فقط رؤية الرجال للرجال ورؤية النساء للنساء🤷
فاحنا محتاجين ننشغل بالعمل إللي يدخلنا الجنة أكثر من انشغالنا بالأسئلة والبحث عن التفصيلات الدقيقة،
احنا مش هنروح لصحراء مهلكة يا جماعة فعايزين نطمن على نفسنا 😅
دي الجنة إللي مفيش زيها،
بمجرد ما الواحد يدخلها؛ هتختفي كل تعاسة أو شقاء الواحد مر بها ويتحول كل ده إلى سعادة دائمة، وخلود أبدي👌
ويكفي إن ربنا قال عن إللي يدخل الجنة:
"لَا يَمَسُّهُمْ فِيهَا نَصَبٌ وَمَا هُم مِّنْهَا بِمُخْرَجِين"
《الحجر آية(48)》
والقاعدة عندنا بتقول إن إللي يشتهي حاجة《في الجنة》 ربنا هيحققها له زي ما شرحنا👌
"وَفِيهَا مَا تَشْتَهِيهِ ٱلْأَنفُسُ وَتَلَذُّ ٱلْأَعْيُنُ ۖ وَأَنتُمْ فِيهَا خَٰلِدُونَ"
《الزخرف آية(71)》
فلو واحدة اشتهت وهي《في الجنة》إنها عايزة تقابل الأنبياء أو الصالحين أو الصحابة هتقابلهم عادي💁

☆ممكن واحدة تقول:
طيب في نساء دلوقتي لم يتزوجن، أو واحدة تزوجت وزوجها مات فتزوجت بعده، أو واحدة طُلقت وماتت وهي مطلقة،
إيه وضع النساء دي🤔

شوفوا،
مبدئيا كده مفيش حد أعزب في الجنة، يعني كل واحد عنده على الأقل زوجتين،
والنساء كمان مفيش واحدة كده هتعيش في الجنة من غير زوج،
فخلونا كده نقسم أوضاع النساء في موضوع الزواج👌
¤أولا:
لو واحدة متزوجتش خالص وماتت ودخلت الجنة؛ دي ربنا يزوجها باللي تقر بها عينها في الجنة من رجل من أهل الدنيا،
إما رجل أعزب من إللي ماتوا برده من غير ما يتزوجوا أو تتزوج واحد كان متزوج عادي ولكنه كان صاحب خلق ودين فبقى صاحب مكانة عالية في الجنة👌

◇يعني آخرتها هكون زوجة تانية🙂
♤صبّرني يارب🤦
هتكلم عن النقطة دي كمان شوية إن شاء الله👌

¤ثانيا:
لو واحدة طُلقت وماتت من غير ما تتزوج بواحد تاني؛ فدي كمان ربنا يزوجها باللي تقر بها عينها في الجنة من رجل من أهل الدنيا.

¤ثالثا:
لو واحدة كانت متزوجة ودخلت الجنة لكن زوجها كان في النهاية من أهل النار؛ فدي كمان ربنا يزوجها باللي تقر بها عينها في الجنة من رجل من أهل الدنيا.

¤ثالثا:
لو واحدة ماتت بعد ما تزوجت فهي هتكون زوجة لزوجها إللي ماتت وهي متزوجاه.

¤رابعا:
لو واحدة مات عنها زوجها ولم تتزوج بعده؛ فهي تكون زوجته في الجنة.

¤خامسا:
لو واحدة مات عنها زوجها وتزوجت بعده فالموضوع على خلاف، إما إنها تكون زوجة لآخر أزواجها أو تكون لأحسنهما أخلاقا والله أعلم،
والخلاف حصل لأن الحديثين إللي جاء فيهما أن المرأة لآخر أزواجها أو إنها تُخيّر بينهم؛ فيهم ضعف ولا يصحوا عن رسول الله ﷺ،
فالله أعلم بحالها، لكنه هيرضيها في النهاية👌

أما بقى إللي معترضة إنها تكون زوجة تانية في الجنة سواء لرجل أعزب معاه الحور العين أو لرجل كان متزوج في الدنيا ومعاه زوجته من أهل الدنيا وكمان الحور العين فدي أحب أقولها:
يا حبيبة قلبي الجنة مفيهاش غيرة نهائي، ولا فيها حزن ولا زعل ولا أي حاجة تعكر صفو حياتك😊
مشاعرنا في الجنة هتكون مختلفة خالص وهنكون راضيين،
ربنا قال:
"وَنَزَعْنَا مَا فِى صُدُورِهِم مِّنْ غِلٍّۢ تَجْرِى مِن تَحْتِهِمُ ٱلْأَنْهَٰار"
《سورة الأعراف آية( 43)》
وانتِ أصلا مش هتشوفي زوجات زوجك في الجنة، والدليل على كده قول رسول الله ﷺ:
"إنَّ في الجَنَّةِ خَيْمَةً مِن لُؤْلُؤَةٍ مُجَوَّفَةٍ، عَرْضُها سِتُّونَ مِيلًا، في كُلِّ زاوِيَةٍ مِنْها أهْلٌ، ما يَرَوْنَ الآخَرِينَ"
《صحيح البخاري》
فانتِ هتبقي عايشة مشغولة في النعيم إللي هينسيكِ كل حاجة تانية😅
فمفيش في الجنة إلا النعيم والسرور، ولا مكان للحقد والغل في قلوب أهل الجنة،
والحور العين خَلْق من خلقِ الله تعالى إكراماً لأهل الجنة زيادة في نعيمهم،
وانتِ مش هيكون في قلبك شيء من إللي بيكون في الدنيا تجاه الزوجة الثانية من غيرة أو أي شيء👌
ثم يعني على الراجح من أقوال العلماء فانتِ كإمرأة مؤمنة صبرت على طاعة الله وصبرت على ابتلاءات الدنيا؛ أفضل حالا من الحور العين وأعلى درجة وأكثر جمالاً منها،
يعني انتِ داخلة جزاءً لكِ على العمل الصالح وكرامة من الله لكِ لدينك وصلاحك،
أمَّا الحور التي هي من نعيم الجنة أصلا؛ فهي خُلقت في الجنة من أجل غيرها وجُعِلَت جزاء للمؤمن على العمل الصالح،
وفرق شاسع بين مَن دخلت الجنة جزاء على عملها الصالح، وبين من خُلقت ليُجَازَى بها صاحب العمل الصالح👌
فالأولى ملكة سيِّدة آمِرَة، والثانية - على عظم قدرها وجمالها - إلا أنها ـ فيما يتعارفه الناس ـ أقل من الملكة، وهي مأمورة من سيِّدها المؤمن الذي خلقها الله تعالى جزاء له،
زي كده الفرق بين النساء الأحرار والإماء في الدنيا، دي لها مكانة ودي لها مكانة👌
ثم زي ما قلت احنا بس ندخلها وكل حاجة سهلة بعد كده😄

يبقى خُلاصة موضوع نعيم المرأة في الجنة في نقط محددة:

1- المرأة لها من النعيم مثل الرجل تماما إلا نقطة الحور العين وحضور سوق الجمعة وشرحنا السبب.

2- المرأة يكافؤها الله بما تشتهي في الجنة بأي شيء تريده.

3- ربنا بيكافئ المرأة ويعوّضها من جنس الشيء الذي صبرت عليه في الدنيا《الجزاء من جنس العمل》

4- المرأة أجمل وأعلى منزلة من الحور العين على الراجح من أقوال العلماء.

5- المرأة لا تعيش عزباء في الجنة ويزوجها الله بما تقر به عينها بحسب حالها.

6- المرأة تعيش في نعيم وسرور، ولا مكان للغيرة ولا للحقد ولا الغل في قلبها.

7- المرأة ترى ربها مثلها مثل الرجل تماما وتصيبها ريح الشمال مثل الرجل كذلك.

8- المرأة ترى رسول الله ﷺ وتجلس معه وتكلمه فهو بمثابة الأب لها، وتكلم الأنبياء والصالحين إذا اشتهت ذلك《في الجنة》.

9- تعيش المرأة في الجنة في مملكتها تتنعم بكافة أنواع النعيم مثل الأميرات وبنات الملوك، وتستطيع الخروج في البساتين ورياض الجنة كما تشاء وتشتهي.

10- ربنا يكرمنا كده و ندخل الجنة وكل حاجة محلولة إن شاء الله😁

♡إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

◇مصادر حلقة النهاردة في التعليقات 👇

♡طبعا أي ملاحظة ياريت تقوليلي فالمؤمن مرآة أخيه❤

¤إن شاء الله مع كل حلقة هيكون في صورة زي دي👇 تلخص أهم الأحداث في الحلقة زي خطوط عريضة كده عشان المعلومة تثبت أكتر في دماغنا👌

#Eman_Shalapy