قال تعالى:
"يَوْمَئِذٍ يَتّبِعُونَ الدّاعِيَ لاَ عِوَجَ لَهُ وَخَشَعَتِ الأصْوَاتُ لِلرّحْمَنِ فَلاَ تَسْمَعُ إِلاّ هَمْساً"
《سورة طه آية(108)》
وقال:
"يَخْرُجُونَ مِنَ الْأَجْدَاثِ كَأَنَّهُمْ جَرَادٌ مُّنتَشِرٌ"
《القمر آية(7)》
والكافرون لما يُبعثوا هيقولوا:
"يَقُولُ الْكَافِرُونَ هَٰذَا يَوْمٌ عَسِرٌ"《القمر آية(8)》
يعني هذا يوم صعب شديد الأهوال.

الناس بقى إللي كانوا بينكروا اليوم الآخر والبعث والنشور هيقولوا:
"يَا وَيْلَنَا مَنْ بَعَثَنَا مِنْ مَرْقَدِنَا"《يس آية(52)》
وكلمة مرقد هنا بتدل على المكان المريح الآمن،
فتخيل بقى إن من شدة الأهوال وذهول عقولهم وفزعهم من إللي شايفينه من أهوال يوم القيامة والحشر والمصير إللي مستنيهم وصدمتهم بالبعث إللي كانوا بينكروه؛ الواحد فيهم بيقول على عذاب القبر إللي كان بيتعذبه إنه كان مَرقد، يعني ده كان كأنه نايم في مكان مريح!😳

بس أحسن يستاهلوا😒
مش هم إللي أنكروا البعث وقعدوا يتفلسفوا ويقولوا:
"مَنْ يُحْيِ الْعِظَامَ وَهِيَ رَمِيمٌ" 《يس آية(78)》
يعني مين إللي هيرجع العظام مرة تانية بعد ما بقت تراب؟!!
"وَقَالُوا أَإِذَا كُنَّا عِظَامًا وَرُفَاتًا أَإِنَّا لَمَبْعُوثُونَ خَلْقًا جَدِيدًا"
《الإسرء آية(49)》

وهم إللي كانوا بيسخروا ويتريقوا ويقولوا:
"هَلْ نَدُلُّكُمْ عَلَى رَجُلٍ يُنَبِّئُكُمْ إِذَا مُزِّقْتُمْ كُلَّ مُمَزَّقٍ إِنَّكُمْ لَفِي خَلْقٍ جَدِيدٍ۩ أَفْتَرَى عَلَى اللَّهِ كَذِبًا أَمْ بِهِ جِنَّةٌ"《سبأ آية(7-8)》
بيقولوا إن الرسول ﷺ كان بيكذب أو مجنون، إزاي يقول إننا بعد ما خلاص انتهينا من الوجود هنرجع تاني😏

وكانوا بيقولوا:
"إِنْ هِيَ إِلَّا حَيَاتُنَا الدُّنْيَا نَمُوتُ وَنَحْيَا وَمَا نَحْنُ بِمَبْعُوثِينَ"
《المؤمنون آية(37)》
وقالوا:
"أَإِذَا مِتْنَا وَكُنَّا تُرَابًا وَعِظَامًا أَإِنَّا لَمَبْعُوثُونَ ۩ لَقَدْ وُعِدْنَا نَحْنُ وَآبَاؤُنَا هَذَا مِنْ قَبْلُ إِنْ هَذَا إِلَّا أَسَاطِيرُ الْأَوَّلِينَ"《المؤمنون(82-83)》

أهم شافوا أهه إزاي إن أساطير الأولين طلعت حقيقة🙂
وإزاي إن مجرد صيحة واحدة خلتهم كلهم يطلعوا من قبورهم ويأتوا للحساب👌
قال تعالى:
"إِنْ كَانَتْ إِلا صَيْحَةً وَاحِدَةً فَإِذَا هُمْ جَمِيعٌ لَدَيْنَا مُحْضَرُونَ"
《يس آية(53)》
خد بالك بقى أحسن تكون من المكذبين أو من إللي بيشكوا بالبعث😬
كلام الله في القرآن هو الحق المُطلق وهيحصل، وكل إللي بقوله ده انت هتشوفه وهتسمعه يوم القيامة👌

أما بقى المؤمنين أهل التقوى فهيكونوا آمنين من الأهوال إللي منكري البعث شايفينها، ومش هيفزعوا زي الكفار وغيرهم،
قال الله تعالى:
"لا يَحْزُنُهُمُ الْفَزَعُ الأَكْبَرُ وَتَتَلَقَّاهُمُ الْمَلائِكَةُ هَذَا يَوْمُكُمُ الَّذِي كُنتُمْ تُوعَدُون"《الأنبياء آية(103)》
والأمن إللي هيكون فيه المؤمنين المتقين دول بسبب إنهم كانوا في الدنيا خايفين من اليوم ده وقعدوا يستعدوا له،
وبسبب خوفهم مكنوش بيضيعوا فرض ولا يتعدوا حدود الله، وربنا وصف حالهم في القرآن لما كانوا في الدنيا وقال عنهم:
"وَالَّذِينَ هُمْ مِنْ عَذَاب رَبّهمْ مُشْفِقُونَ"
《المعارج آية(27) 》

وربنا وعد وقال في الحديث القدسي:
"وَعِزَّتِي لَا أَجْمَعُ عَلَى عَبْدِي خَوْفَيْنِ، وَلَا أَجْمَعُ لَهُ أَمْنَيْنِ،
إِذَا أَمِنَنِي فِي الدُّنْيَا أَخَفْتُهُ يَوْمَ الْقِيَامَةِ، وَإِذَا خَافَنِي فِي الدُّنْيَا أَمَّنْتُهُ يَوْمَ الْقِيَامَةِ"《حسنه الألباني في "السلسلة الصحيحة"》

فلأنهم كانوا خايفين من ربنا في الدنيا وخايفين من أهوال يوم القيامة؛ ربنا أَمَّنهم،
أما إللي مكنوش خايفين وكانوا بيتعدوا على محارم الله ومش فارق معاهم حاجة وبيعملوا المحرمات ومفيش في لسانهم غير:
{ده ربنا غفور رحيم} ونسيوا إنه عز وجل شديد العقاب وكمان معاهم إللي كانوا بينكروا البعث؛ كل دول في هم وغم وحزن وفزع👌

وربنا لما يبعث الناس هيبعثهم على ما ماتوا عليه، قال رسول الله ﷺ:
"مَنْ ماتَ على شيءٍ بَعثَهُ اللهُ عليْهِ"《صحيح الجامع》
والحديث معناه إن إللي يموت على عَمَل مِن الأعْمال سواء كانت طاعَةً أو مَعصيَة، ربنا هيبعثه على هذا العَمَل،
يعني إللي ماتت وهي بترقص ربنا هيبعثها وهي بترقص، إللي ماتت وهي متبرجة هتُبعث وهي متبرجة،
وإللي مات وهو بيزني هيبعث وهو بيزني،
إللي مات وهو يشرب الخمر هيبعث وهو يشرب الخمر، وإللي مات وهو بيغني هيبعث وهو بيغني،
وكذلك إللي مات شهيد هيبعث و دمه يسيل منه، اللون لون دم والريح ريح مسك،
وإللي مات وهو حاج يُبعث يوم القيامة وهو يُلبي، وهكذا،
متسألش بقى إزاي ده هيحصل؛ لأن كل حاجة بنقولها دلوقتي هي خارج حدود العقل أساسا،
مهما حاولت تتخيل؛ عقلك مش هيستوعب الكلام إللي بنقوله في الحلقات دي، عشان كده الإيمان بالغيب مهم جدا وهو من صفات المؤمنين، والإيمان باليوم الآخر ركن من أركان الإيمان👌

كده خلاص انت فهمت معنى《البعث والنشور》وهو إحياء الله للموتى وخروجهم من قبورهم، وعرفت أحوال الناس عند البعث،
بعد البعث هييجي الحشر،
وعشان تبقى الأمور واضحة بالنسبة لك؛ احنا عندنا عشر 10 مراحل يوم القيامة هي:
1️⃣البعث والنشور وهو أول مرحلة يمر بها الإنسان يوم القيامة.
2️⃣الحشر.
3️⃣الشفاعة العظمى لرسول الله ﷺ.
4️⃣حوض النبي ﷺ.
5️⃣العرض《عرض الأعمال 》والحساب وفيه تفصيل.
6️⃣الميزان.
7️⃣الصراط.
8️⃣النار.
9️⃣القنطرة.
🔟الجنة.

فالمرحلة الثانية بعد البعث هييجي《الحشر》👌
يعني إيه الحشر وفين مكان المحشر وإزاي الناس هتحشر؟
ده إللي هنعرفه الحلقة الجاية إن شاء الله.
============================
¤ملاحظات مهمة على حلقة النهاردة:
☆أولا:
احنا قلنا إن الناس هتحشر يوم القيامة عُراة، لكن في أحاديث صحيحة برده بتقول إن الإنسان هيُبعث يوم القيامة في الثياب التي مات فيها، قال رسول الله ﷺ:
"إِنَّ الْمَيِّتَ يُبْعَثُ فِي ثِيَابِهِ الَّتِي يَمُوتُ فِيهَا" 《صححه الألباني》
فإزاي نجمع بين الاتنين؟🤔

العلماء قالوا بعض احتمالات منها:
1️⃣- أنهم يبعثون فيها ثم تُبلى بعد القيام، فإذا وَافُوا الموقف كانوا عُراة.
يعني لما يقوموا من القبر هيكون عليهم ملابسهم إللي كانوا اتكفنوا فيها بعد موتهم، وبعدين لما يروحوا لأرض المحشر هتفنى الملابس ويكونوا عُراة.

2️⃣- أنهم يبعثون عراة ثم إذا كُسِيَ الأنبياء والصديقون ومَن بعدهم كُسِيَ كلٌّ من جنس ما مات فيه من الثياب.
يعني إنهم هيخرجوا عراة من قبورهم وبعدين ربنا هيكسوهم من نفس الثياب إللي كانوا اتكفنوا فيها قبل موتهم بعد ما يكسوا الأنبياء وغيرهم.

☆نقطة مهمة بالنسبة للكسوة يوم القيامة👌
أول واحد هيُكسى يوم القيامة هو إبراهيم عليه السلام،
قال رسول الله ﷺ:
"وإنَّ أَوَّلَ الخَلَائِقِ يُكْسَى، يَومَ القِيَامَةِ إبْرَاهِيمُ عليه السَّلَامُ"
《صحيح مسلم》
يعني أول واحد ربنا هيلبسه ملابس هو إبراهيم عليه السلام وبعد كده رسول الله ﷺ،
ومش معنى إن إبراهيم عليه السلام هو أول من يكسى فهو له أفضليه على رسول الله ﷺ؛ لأ،
رسول الله ﷺ هو أفضل البشر، لكن لأن إبراهيم عليه السلام أُلقي في النار عرياناً ربنا كافأه بإنه يكون أول من يُكسى يوم القيامة،
وقيل في سبب كسوة إبراهيم أنه أول من لبس السراويل والله أعلم.

احنا دلوقتي إللي يهمنا نعرفه إن أول من يُكسى يوم القيامة هو إبراهيم عليه السلام ثم رسول الله ﷺ ثم باقي الأنبياء ثم المؤمنين،
امتى بقى تحديدا هتكون الكسوة دي؟!
الله أعلم🤷‍♂️
مفيش عندنا في الشرع دليل بيحدد الوقت إللي هتحصل فيه الكسوة، هل بعد الحشر مباشرة ولا في أرض المحشر قبل الحساب ولّا بعده ولّا امتى بالضبط، منعرفش🤷‍♂️

💠بس خدوا بالكم إن الكِسوة دي للأنبياء والمؤمنين فقط، يعني الكفار هيفضلوا حفاة عُراة للأبد👌

3️⃣- قال بعض العلماء إن الحديث عن الثياب ده خاص بالشهداء وإنهم يدفنوا في ثيابهم إللي ماتوا فيها فيبعثون في ثيابهم دي تمييزاً لهم عن غيرهم.

4️⃣- أن المقصود بالثياب هي الأعمال الصالحة زي ما قال ربنا: "وَلِبَاسُ التَّقْوَى ذَلِكَ خَيْرٌ" وقوله: "وَثِيَابَكَ فَطَهِّرْ"
والمعنى إن الإنسان يُبعث على ما مات عليه من عمل إن خيرا فخير وإن شرا فشر زي ما قلنا من شوية.

☆ثانيا:
بالنسبة للخوف من الله عز وجل، فالخوف من الله واجب على واحد فينا، والخوف من الله من صفات المؤمنين المتقين،
ربنا قال: "فَلَا تَخَافُوهُمْ وَخَافُونِ إِنْ كُنْتُمْ مُؤْمِنِينَ"
《آل عمران آية(175)》
والمقصود بالخوف هو الخوف إللي يدفع الإنسان لترك المنكرات والذنوب وعمل الأعمال الصالحة،
فالإنسان يخاف من الله وفي نفس الوقت يرجو رحمته،
فمينفعش يعيش في خوف على طول لحد ما يوصل لمرحلة القنوط،
وبرده مينفعش يعيش في أمن وإن الله غفور رحيم على طول الخط لحد ما يوصل لمرحلة اللامبالاة ويقع في المعاصي ولا يتوب ولا يستغفر زي ما احنا شايفين واقع أغلب الناس دلوقتي للأسف😓
وزي ما انتم شايفين ربنا قال إن إللي مش هيخاف منه في الدنيا هيخوفه في الآخرة👌

وإللي عايز يتعلم إزاي يخاف من ربنا صح؛ هيلاقي في التعليقات رابط لموقع الإسلام سؤال وجواب بيشرح《كيف نخاف الله عز وجل》👇

◇وفي ملحوظة مهمة بالنسبة لخوف المؤمنين يوم القيامة، المؤمنين هيقع عليهم خوف هم كمان، لكن خوفهم هيكون مختلف،
يعني بعضهم قد يفزع بسبب تقصيره في أمر الله، وبعضهم يفزع تكفيرا لسيئاته التي لم يتب منها،
وفيهم إللي هيكون خايفين خوف مهابة وخشية من الله،
يعني مش هيكونوا خايفين إن هيحصل لهم مكروه أو حاجة تؤذيهم وتسوءهم زي الكفار ومنكري البعث، لأ،

خوفهم هيكون خوف إجلال لله عز وجل، يعني الأنبياء مثلا هيكونوا خايفين وكلهم هيقول نفسي نفسي زي ما هنشوف إن شاء الله،
فهم عارفين إنهم لن يصيبهم أي مكروه أو أذى، لكن هيبة الله وجلاله والأحداث خلت في قلوبهم رهبة وتعظيم لله عز وجل،
فالمؤمنين لن يفزعوا فزع الكفار وغيرهم،
والملائكة هتبشرهم بالخير، لكن هيكون في قلوبهم زي ما قلنا خوف هيبة وتعظيم لله👌

☆ثالثا:
بالنسبة لترتيب الأحداث يوم القيامة؛ هي زي ما قلتها لكم كده، أولها البعث وآخرها النار أو الجنة،
لكن في اختلاف بين العلماء عن وقت الشرب من حوض رسول الله ﷺ هل هو قبل الصراط والميزان ولّا بعده،
هو كل فريق له أدلته، لكن القول بإن الشرب من حوض رسول الله ﷺ قبل الميزان والصراط أدلته أقوى،
وقالوا إن الحكمة من وجود الحوض قبل الصراط إن الناس هيكونوا خارجين من قبورهم وهم عطشانين والشمس هتقرب من الرؤوس زي ما هنشوف إن شاء الله، فطبيعي إن في الوقت ده يكون في حوض يشرب منه المؤمنين،
ده غير إن في ناس هتبعدهم الملائكة عن حوض رسول الله ﷺ ويُمنعون من الحوض بسبب أنَّهم أحدثوا في الدين، وبدَّلوا فلم يكونوا على سنته ﷺ ومن ضمنهم المنافقين،
ولو قيل إن الحوض بعد الصراط؛ كده هيبقى في تعارض مع كون إن إللي يُردُّ عن الحوض المنافقون؛ لأنّ إللي بييجي بعد المرور على الصراط هي القنطرة، ثم الجنة، ولا يمكن أن يتجاوز الصراط إلا مؤمن👌
فالراجح إن الشُّرب من الحوض هيكون قبل الميزان والصراط،
طبعا كل ده هنتكلم عنه بالتفصيل إن شاء الله، لكن أنا بس حبيت أوضح لكم الترتيب إللي هنمشي عليه في الشرح👌

☆رابعا:
💠ممكن حد يسأل ويقول: طيب هي إيه الحكمة أصلا من مراحل يوم القيامة وكل واحد خلاص عرف مصيره في قبره؟
يعني المسلم خلاص شاف مقعده من الجنة والكافر شاف مقعده من النار، فإيه الحكمة من الوقوف في أرض المحشر ؟ وإيه الحكمة من عبور الصراط إن كان الإنسان عارف من قبلها إنه هيقدر يعبر أو لا ؟

🔅مبدئيا كده، احنا قلنا قبل كده إن إللي يموت على الإسلام هيقدر يجاوب على سؤال الملكين، وبالتالي هيشوف مقعده من الجنة وينعم في قبره إلى يوم القيامة،
وإللي هيموت على الكفر مش هيقدر يجاوب على سؤال الملكين وبالتالي هيشوف مقعده من النار وهيعذب في قبره إلى يوم القيامة👌
فهنا الكلام عن المآل، يعني آخر مرحلة خالص هيوصلها العبد، بمعنى إن العبد لازم يمر بمراحل يوم القيامة عشان يوصل للمرحلة الأخيرة إللي هي الجنة أو النار، وأول مرحلة هي سؤال الملكين،
ومننساش إن الحسنات والسيئات لا تقف بمجرد موت العبد💁‍♂️
ففي حسنات جارية وفي سيئات جارية، ده غير إن يوم القيامة ممكن يؤخذ من حسنات العبد وتعطى للناس إللي اغتابهم أو ظلمهم أو أخذ حقوقهم،
فالعبد لازم يمر بالمراحل دي الأول عشان يوصل للمآل وهو الجنة أو النار،
زي كده لما الواحد بيكون بيشتغل وله مرتب بيقبضه آخر الشهر، هو عارف إن ده مرتبه وهياخده لكن لازم الأول يشتغل الشهر ده عشان ياخد مرتبه في الآخر،
فالمسلم مآله إلى الجنة والكافر مآله إلى النار👌

⚠️وهنا في ملحوظة مهمة وهي: إن المسلم ممكن يجاوب على أسئلة الملكين وتكون حسناته أكثر من سيئاته ومع ذلك يتعرض لعذاب القبر👌
فاكرين حلقة عذاب القبر لمن؟
أهه ممكن يكون المسلم عمل حاجة من موجبات عذاب القبر إللي قلنا عليها زي أكل الربا أو الزنا أو لم يكن يستبرئ من البول أو....أو... ولم يتب منها قبل موته؛ فهنا هو هيُعذب بقدر ذنبه ده في قبره؛ إلا أن يغفر الله له؛ لأن أصحاب الكبائر بصفة عامة في مشيئة الله، إذا شاء عذبهم وإذا شاء غفر لهم👌

📃فخُلاصة الكلام:
1️⃣المسلم الموحد هيشوف مقعده من الجنة حتى لو كان عنده معاصي زائدة على حسناته باعتبار مآله وإن المسلم الموحد حتى لو دخل النار فهو لا يُخَلَد في النار،
لكن فعلا لازم يكون مات على الإسلام؛ لأن في ناس ممكن تموت وهي مكنتش بتصلي أو وهي بتسب الدين أو بتعمل أي حاجة من الحاجات إللي بتخرج العبد من الدين وهم نفكرين نفسهم مسلمين،
فاللي هيموت فعلا على الإسلام هو إللي ربنا هيثبته عند سؤال الملكين في القبر زي ما ربنا قال:
"يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ ۖ وَيُضِلُّ اللَّهُ الظَّالِمِينَ"《إبراهيم آية(27)》

2️⃣الكافر هيشوف مقعده من النار باعتبار مآله وهيُعذب في القبر لحد يوم القيامة وبعدها يدخل النار.

3️⃣المسلم لو عنده ذنوب لم يتب منها قبل موته؛ هيتعذب عليها في القبر حتى لو كانت حسناته أكثر من سيئاته إلا ان يغفر الله له ويتجاوز عنه، وراجعوا حلقة:《عذاب القبر لِمَن؟》عشان تعرفوا إيه هي مُوجبات عذاب القبر👌

☆إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

◇مصادر حلقة النهاردة في التعليقات 👇

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐المصادر⭐


https://www.dorar.net/hadith/sharh/69253

https://khaledalsabt.com/explanations/1546/%D8%AD%D8%AF%D9%8A%D8%AB-%D9%8A%D8%AD%D8%B4%D8%B1-%D8%A7%D9%84%D9%86%D8%A7%D8%B3-%D9%8A%D9%88%D9%85-%D8%A7%D9%84%D9%82%D9%8A%D8%A7%D9%85%D8%A9-%D8%AD%D9%81%D8%A7%D8%A9-%D8%B9%D8%B1%D8%A7%D8%A9-%D8%BA%D8%B1%D9%84%D8%A7

https://ar.islamway.net/article/77137/%D8%A7%D9%84%D9%82%D8%B1%D8%A2%D9%86-%D8%A7%D9%84%D9%83%D8%B1%D9%8A%D9%85-%D9%88%D9%82%D8%B6%D9%8A%D8%A9-%D8%A7%D9%84%D8%A8%D8%B9%D8%AB

https://ar.islamway.net/article/77046/%D9%88%D8%A7%D8%B3%D8%AA%D9%85%D8%B9-%D9%8A%D9%88%D9%85-%D9%8A%D9%86%D8%A7%D8%AF-%D8%A7%D9%84%D9%85%D9%86%D8%A7%D8%AF-%D9%85%D9%86-%D9%85%D9%83%D8%A7%D9%86-%D9%82%D8%B1%D9%8A%D8%A8

https://www.google.com/amp/s/islamqa.info/amp/ar/answers/195920

https://www.google.com/amp/s/islamqa.info/amp/ar/answers/130921

https://www.google.com/amp/s/islamqa.info/amp/ar/answers/220511

https://dorar.net/hadith/sharh/120616

https://www.google.com/amp/s/islamqa.info/amp/ar/answers/21679

https://www.alukah.net/sharia/0/97478/

https://www.alro7.net/ayaq.php?langg=arabic&aya=103&sourid=21

https://www.islamweb.net/ar/fatwa/129060/%D8%A7%D9%84%D9%85%D9%86%D8%B9%D9%91%D9%8E%D9%85-%D9%81%D9%8A-%D9%82%D8%A8%D8%B1%D9%87-%D9%87%D9%84-%D9%8A%D8%AE%D8%A7%D9%81-%D9%8A%D9%88%D9%85-%D8%A7%D9%84%D9%82%D9%8A%D8%A7%D9%85%D8%A9-%D8%A3%D9%85-%D9%8A%D8%A8%D9%82%D9%89-%D8%A2%D9%85%D9%86%D8%A7

https://www.google.com/amp/s/islamqa.info/amp/ar/answers/220547

كيف نخاف الله عز وجل👆

https://khaledalsabt.com/interpretations/964/8-%D9%85%D9%86-%D9%82%D9%88%D9%84%D9%87-%D8%AA%D8%B9%D8%A7%D9%84%D9%89-%D9%88%D9%8A%D8%B3%D8%A7%D9%84%D9%88%D9%86%D9%83-%D8%B9%D9%86-%D8%A7%D9%84%D8%AC%D8%A8%D8%A7%D9%84-%D8%A7%D9%84%D8%A7%D9%8A%D8%A9-105-%D8%A7%D9%84%D9%89-%D9%82%D9%88%D9%84%D9%87-%D8%AA%D8%B9%D8%A7%D9%84%D9%89-%D9%88%D9%82%D9%84-%D8%B1%D8%A8-%D8%B2%D8%AF%D9%86%D9%8A-%D8%B9%D9%84%D9%85%D8%A7-%D8%A7%D9%84%D8%A7%D9%8A%D8%A9-114

https://www.alro7.net/ayaq.php?langg=arabic&aya=8&sourid=54

https://www.google.com/amp/s/islamqa.info/amp/ar/answers/181755

https://islamqa.info/ar/answers/127242/%D9%87%D9%84-%D9%8A%D8%B9%D8%B0%D8%A8-%D9%81%D9%8A-%D9%82%D8%A8%D8%B1%D9%87-%D9%85%D9%86-%D8%AA%D9%83%D9%88%D9%86-%D8%AD%D8%B3%D9%86%D8%A7%D8%AA%D9%87-%D8%A7%D9%83%D8%AB%D8%B1-%D9%85%D9%86-%D8%B3%D9%8A%D9%89%D8%A7%D8%AA%D9%87-%D9%81%D9%8A-%D8%A7%D9%84%D9%85%D9%8A%D8%B2%D8%A7%D9%86

https://islamqa.info/ar/answers/121628/%D9%85%D8%AA%D9%89-%D9%8A%D9%83%D9%88%D9%86-%D8%B0%D8%A8%D8%AD-%D8%A7%D9%84%D9%85%D9%88%D8%AA-%D9%88%D9%85%D8%A7-%D8%AD%D8%A7%D9%84-%D8%A7%D8%B5%D8%AD%D8%A7%D8%A8-%D8%A7%D9%84%D9%83%D8%A8%D8%A7%D9%89%D8%B1-%D9%81%D9%8A-%D8%A7%D9%84%D8%A8%D8%B1%D8%B2%D8%AE

بوت الاسئلة الخاصة بقصص الأنبياء و السيرة النبوية

@prophetsstories_bot

قناة قصص الأنبياء و السيرة النبوية بقلم إيمان شلبي
https://t.me/prophets_stories

https://t.me/prophets_stories/2453
روابط تحميل قصص الأنبياء و السيرة النبوية pdf

فهرس قصص الأنبياء 👇🏻
https://t.me/prophets_stories/2455


فهرس السيرة النبوية 👇🏻
https://t.me/prophets_stories/2456


فهرس حلقات نهاية البداية 👇🏻
https://t.me/prophets_stories/3886

#قصة_نهاية_البداية_إيمان_شلبي
#الدار_الآخرة_بالعامية
#الحلقة_الثامنة_والعشرون
#المرحلة_الثالثة_اليوم_الآخر
#الحشر

اتكلمنا المرة إللي فاتت عن البعث والنشور وإنه أول مرحلة هيمر بيها الإنسان يوم القيامة،
بعد البعث هييجي الحشر، وهو معناه تجميع الناس يوم القيامة و سَوْقهم لأرض المحشر وهي الأرض إللي هيتحاسب عليها الناس،
وهي أرض غير أرضنا،
والحشر أربعة، اثنين✌ في الدنيا واثنين✌ في الآخرة:

1️⃣الحشر الأول حصل ليهود بني النضير لما جمعهم رسول الله ﷺ وأخرجهم من المدينة،
وإللي عايز يعرف القصة بالتفصيل يبقى يرجع للسيرة النبوية أنا شارحة القصة بالتفصيل في الحلقة 85 و86.
وربنا ذكر الحشر ده في أول سورة الحشر، قال تعالى:
"هُوَ الَّذِي أَخْرَجَ الَّذِينَ كَفَرُوا مِنْ أَهْلِ الْكِتَابِ مِنْ دِيَارِهِمْ لِأَوَّلِ الْحَشْرِ"
《الحشر آية(2)》

2️⃣الحشر الثاني إللي هييجي في آخر الزمان وهو النار إللي تسوق الناس إلى محشرهم واتكلمنا عنه في علامات الساعة الكبرى وهو آخر علامة من علامات الساعة الكبرى.

3️⃣الحشر الثالث هو إللي هيكون بعد البعث وإللي هنتكلم عنه بالتفصيل النهاردة إن شاء الله.

4️⃣ الحشر الرابع حشر أهل المَوْقف إلى الجنة، أو إلى النار،
وده يوضحه قول الله عز وجل في سورة الزمر:
"وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا"
"وَسِيقَ الَّذِينَ كَفَرُوا إِلَىٰ جَهَنَّمَ زُمَرًا"
وهنتكلم عنه بالتفصيل إن شاء الله لما ييجي وقته.

احنا النهاردة هنتكلم عن الحشر الثالث وهو حشر الناس و سَوْقُهم لأرض المحشر،
ومش بس الناس، ده الإنس والجن وكل الدواب، كل الخلق هيُجمعوا ويُساقوا لأرض المحشر على أقدامهم محدش هيكون راكب أي دابة،
قال تعالى:
"وَمَا مِنْ دَابَّةٍ فِي الْأَرْضِ وَلا طَائِرٍ يَطِيرُ بِجَنَاحَيْهِ إِلَّا أُمَمٌ أَمْثَالُكُمْ مَا فَرَّطْنَا فِي الْكِتَابِ مِنْ شَيْءٍ ثُمَّ إِلَى رَبِّهِمْ يُحْشَرُونَ"
《الأنعام آية(38)》

وأرض المحشر دي هتكون أرض غير أرضنا، الأرض بتاعتنا هيحصل فيها تغيرين أو تبديلين✌
التغيير أو التبديل الأول هيكون في صفاتها، فمش هيبقى عليها جبال ولا بحار ولا عليها أي شيء وهتكون مستوية،
وده هيحصل واحنا في القبور،
ولما نُبعَث هنخرج من باطنها ونقوم نمشي عليها وهنلاقيها أرض مستوية مفيش عليها أي جبال ولا بيوت ولا أي مَعلَم لأحد.

والتبديل الثاني هيكون تبديل في ذات الأرض، يعني هي نفسها هتتبدل وتبقى شيء آخر، هتتبدل وتكون《خُبْزَة بيضاء》
والتبديل ده هيحصل لما الناس يكونوا عند الصراط: إما أثناء مرورهم عليه، أو ينتظرون المرور عليه.
عَنْ عَائِشَةَ، قَالَتْ:
" سَأَلْتُ رَسُولَ اللهِ ﷺ عَنْ قَوْلِهِ عَزَّ وَجَلَّ:
"يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ"{إبراهيم آية48}
فَأَيْنَ يَكُونُ النَّاسُ يَوْمَئِذٍ يَا رَسُولَ اللهِ؟
فَقَالَ: عَلَى الصِّرَاطِ" 《رواه مسلم》

¤إيه موضوع إن الأرض هتكون خُبْزَة بيضاء ده🤔

براحة كده وواحدة واحدة،
قال رسول الله ﷺ:
"تَكُونُ الأرْضُ يَومَ القِيامَةِ خُبْزَةً واحِدَةً، يَتَكَفَّؤُها الجَبَّارُ بيَدِهِ كما يَكْفَأُ أحَدُكُمْ خُبْزَتَهُ في السَّفَرِ، نُزُلًا لأهْلِ الجَنَّةِ"《صحيح البخاري 》

والحديث معناه إن ربنا يوم القيامة هيحول أرض الدنيا إلى خُبْزَة واحدة، وكلمة خُبْزَة معناها الطُّلْمَةُ،
وده عبارة عن عجين يُوضَع في الحُفرة بعد إيقاد النَّار فيها؛
فالله عز وجل يجعلُ الأرض كالطُّلْمة والرغيف العظيم.
وكلمة "يتكفَّؤها" معناها: يُقلِّبها ويُمِيلها "الجبَّار" تعالى "بيده"، من هاهنا إلى هاهنا،
ولله المثل الأعلى في السماوات والأرض؛ زي كده لما واحدة بتقلب قرص العجين من إيد لإيد زي ما رسول اللهﷺ قال:
"كما يَكْفَأ" يعني زي ما يَقلِب "أحدكم خُبزته" من يدٍ إلى يد، بعد أن يَجعلَها في الحفرة بعد إيقاد النَّار فيها حتى تستوي،
والأرض إللي بقت خبزة دي هيقدمها الله لعباده المؤمنين إللي هيدخلوا الجنة ليأكلوها إما قبل دخولهم الجنة مباشرة أو بعد دخولهم الجنة مباشرة👌

◇عشان أقرب لك المعنى،
شوف كده لما ييجي لك ضيف عزيز وانت ناوي تُكرمه بأطايب الطعام فأول ما يدخل بيتك بتكون مجهز له حاجة كده سريعة ياكلها قبل ما تقدم له أحسن حاجة عندك؟!
أهه ولله المثل الأعلى ربنا بيقدم لأهل الجنة حاجة كده زي تصبيرة، وفي قول بيقول إنهم هيأكلوا منها وهم واقفين في أرض المحشر قبل حتى ما يوصلوا للجنة والله أعلم.
لكن الأكيد إن الأرض هتتحول لخبزة يأكلها أهل الجنة من المؤمنين،
ومش محتاجة أفكرك بأن لله عز وجل يد تليق بجلاله وكماله وهو ليس كمثله شيء، وإننا بنثبت لله ما أثبته لنفسه،
في الحديث قال يد ووصَف إنه يقلب الأرض من يد ليد يبقى نثبت الكلام ده بدون تشبيه ولا تصوير ولا أي حاجة👌

أما أرض المحشر بقى فهي أرض مختلفة تماما، فهي أرض:
《 بيضاء عفراء كَقُرْصَةِ النقي》
يعني أرض بيضاء لكن مش بياض ناصع، وقيل إنه بياض يميل للحُمْرة قليلا، يعني زي ما بنقول أبيض محمر،
أمّا معنى قرصة النقيّ؛ فقِيل إنّها تعني أنّها في بياضها تشبه الدقيق النقيّ من الغشّ والنخالة.
قال رسول الله ﷺ:
"يُحْشَرُ النَّاسُ يَومَ القِيامَةِ علَى أرْضٍ بَيْضاءَ عَفْراءَ، كَقُرْصَةِ نَقِيٍّ قالَ سَهْلٌ أوْ غَيْرُهُ: ليسَ فيها مَعْلَمٌ لأحَدٍ."《رواه البخاري》

وأرض المحشر هتكون أرض أكبر بكتير من الأرض الموجودة حاليا، وهي أرض لم يُعصَ الله عليها ولم يُسفَك عليها أي دم،
والحكمة في نقاء وصفاء أرض المحشر إن اليوم ده يوم عدل وظهور حق؛ فطبيعي إن المكان إللي يقع فيه الحساب يكون طاهراً عن عمل المعصية والظلم👌
ويُقال والله أعلم إن الأرض دي اسمها《الساهرة》، يعني ربنا بيقول:
"فَإِنَّمَا هِيَ زَجْرَةٌ وَاحِدَةٌ ۩فَإِذَا هُم بِالسَّاهِرَةِ"
"النازعات آية(13-14)"
بعض علماء التفسير قالوا إن الساهرة دي هي أرض المحشر إللي بنتكلم عنها،
وبعضهم قال لأ، الساهرة دي معناها سطح الأرض،
ويبقى معنى الآية إن بعد الزجرة إللي هي نفخة البعث؛ الناس أصبحوا على سطح الأرض بعد ما كانوا في باطنها👌
أيًّا كان، إللي يهمنا أن هناك أرض للمحشر هتتسع لكل المخلوقات بغض النظر اسمها إيه،
فالملائكة هتسوق الناس لأرض المحشر دي، هنوصل لها إزاي؟
الله أعلم🤷‍♂️
إللي نعرفه إن الملائكة هتسوق الناس لأرض المحشر👌

هنا بقى هنشوف بعض أصناف الناس إللي هتُحشر يوم القيامة، وهنشوف شكلهم وحالهم هيبقى عامل إزاي👌

1️⃣الصنف الأول:
قال رسول الله ﷺ:
"يُحشَرُ المتَكَبِّرونَ يومَ القيامةِ أمثالَ الذَّرِّ في صُوَرِ الرِّجالِ يغشاهمُ الذُّلُّ من كلِّ مَكانٍ" 《صحيح الترمذي》
يعني الناس إللي كانت بتتكبر عن عبادة الله ويتكبرون على الخلق؛ هيكون حجمهم في أرض المحشر كأمثال الذر، يعني حجمهم صغير جدا في حجم صغار النمل،
يعني هم هيكونوا على صورتهم البشرية لكن حجمهم صغير جدا تحقيرا لهم والناس هيدوسوا عليهم عشان يذوقوا الذل والمهانة،
والجَزاءُ مِن جِنسِ العمل،
يعني لَمَّا تَكبَّروا وكانوا عايزين العِزَّةَ والعُلوَّ بغيرِ الحقِّ؛ أذلَّهم اللهُ تعالى وصَغَّرَ وحَقَّرَ شأنَهم👌

☆وخليني أفكرك بمعنى الكِبر عشان تلحق نفسك وتتخلص منه لو كان عندك منه وانت متعرفش؛ لأن إللي في قلبه مثقال ذرة من كبر مش هيدخل الجنة👌
قال رسول الله ﷺ:
"لا يَدْخُلُ الجَنَّةَ مَن كانَ في قَلْبِهِ مِثْقالُ ذَرَّةٍ مِن كِبْرٍ، قالَ رَجُلٌ:
إنَّ الرَّجُلَ يُحِبُّ أنْ يَكونَ ثَوْبُهُ حَسَنًا ونَعْلُهُ حَسَنَةً، قالَ رسول اللهﷺ:
إنَّ اللَّهَ جَمِيلٌ يُحِبُّ الجَمالَ، الكِبْرُ بَطَرُ الحَقِّ، وغَمْطُ النَّاسِ."
《رواه مسلم》
يعني عادي إن الإنسان يلبس لبس نضيف أو يركب عربية غالية مثلا أو يكون له مكانة عالية،
مش هو ده الكبر المقصود إللي يدخل صاحبه النار،
المقصود هنا بالكبر كما قال رسول الله ﷺ:
"سَفَهُ الحقِّ - أو بَطَرُ الحق- وغَمْطُ الناس"
بطر الحق يعني رد الحق ...
يعني لما مثلا يجيلك الحق بالدليل من القرآن والسنة وتقول لالا مش مقتنع🙄 ...لالا الكلام ده مش صح😤
وتقعد تتفلسف وتجادل بدون أي دليل وترفض إنك تطيع أوامر ربنا يبقى هنا عندك كِبر👌
غمط الناس معناه احتقارهم، يعني الواحد يحتقر إللي أقل منه في العبادة...
يحتقر إللي أقل منه في التعليم ...
يحتقر إللي أقل منه في النسب...كل ده يدخل في الكبر👌
فخد بالك بقى؛ لأن مثقال الذرة بس يمنع من دخول الجنة، وإللي يتمنع من دخول الجنة هيدخل النار طبيعي؛ لأن في الآخرة إما جنة أو نار👌

والمتكبرون أصلا لهم عذاب مخصوص والعياذ بالله😓
قال رسول الله ﷺ:
"يُحشَرُ المتَكَبِّرونَ يومَ القيامةِ أمثالَ الذَّرِّ في صُوَرِ الرِّجالِ يغشاهمُ الذُّلُّ من كلِّ مَكانٍ ،
يُساقونَ إلى سجنٍ في جَهَنَّمَ يسمَّى بَوْلَسَ تعلوهُم نارُ الأَنْيارِ يَسقونَ من عُصارةِ أَهْلِ النَّارِ طينةَ الخبالِ"《صحيح الترمذي》

يعني ربنا هيأمر الملائكة إنهم يسحبوا ويجروا المتكبرون دول ويدخلوهم إلى "سِجْنٍ في جَهنَّمَ" والسجن هو المكانُ المُظلِمُ الضَّيِّقُ المُعَدُّ للحبس،
والسجن ده اسمه "بَوْلَسَ" وهو كلمة جاية مِن (الإبلاسِ)، يعني اليأسِ،
ولعلَّ السِّجنَ ده اتسمى كده؛ لأنَّ الدَّاخِلَ فيه يائسٌ مِن إنه يتخلص منه قريب وإنه هيفضل مُقيم فيه،
وفي السجن ده هتحيط بيهم من فوقهم ومن حولهم: "نارُ الأنيارِ" والأنيار جمعُ نارٍ، وأُضيفَ إليها لفظُ نارٍ؛ للمُبالَغةِ في الإحراقِ وشِدَّةِ الحرِّ، وقيل إن الأنيار دي أصلُ نيرانِ العالَمِ،

وفي وسط ده كله كمان؛ ملائكة العذاب هتسقيهم ما يَسيلُ مِن أهل النار من دَمٍ وقيحٍ وصديدٍ ، إللي هي: " عُصارةِ أهلِ النَّارِ"،
وهذه العُصارةُ تُسمَّى "طِينةَ الخَبالِ"،
يعني حاجة كده استغفر الله يعني🤢
مفيش حاجة تستاهل والله إن الواحد يتحط في مكان زي ده، ربنا يعافينا ويعفو عنا😞

2️⃣الصنف الثاني من الناس هيكونوا عميانا، يعني مش بيشوفوا، مع إنهم لما كانوا عايشين في الدنيا كانوا مُبصرين،
لكن ربنا سلب منهم أبصارهم يوم القيامة بعد البعث؛ لأنهم لما كانوا في الدنيا يبصروا الآيات إللي جاءت على أيدي الأنبياء ويبصروا آيات القرآن وبيشوفوا الحق وبيشوفوا الباطل ومع ذلك أعرضوا عن اتباع الحق إللي جاء من عند الله؛ فكان الطبيعي إن ربنا يسلب منهم أبصارهم فالجزاء من جنس العمل👌
ربنا بيقول:
"وَمَنْ أَعْرَضَ عَن ذِكْرِى فَإِنَّ لَهُۥ مَعِيشَةً ضَنكًا وَنَحْشُرُهُۥ يَوْمَ ٱلْقِيَٰمَةِ أَعْمَىٰ"《سورة طه آية(124)》
فإياك إياك والإعراض عن الحق وعدم اتباعه، هتكون الخاسر الأكبر في الدنيا والآخرة👌

3️⃣الصنف الثالث يوم القيامة؛ ناس كفار هيُحشروا على وجوههم،
يعني بدل ما يكونوا ماشيين على أرجلهم هيمشوا على وجوههم،
إزاي؟!!!
بكل بساطة إللي أمشاهم على أرجلهم قادر إنه يخليهم يمشوا على وجوههم🤷‍♂️
عن أنس بن مالك رضي الله عنه أنَّ رَجُلًا قالَ:
"يا نَبِيَّ اللَّهِ، كيفَ يُحْشَرُ الكَافِرُ علَى وجْهِهِ؟
قالَ رسول اللهﷺ: أليسَ الذي أمْشَاهُ علَى الرِّجْلَيْنِ في الدُّنْيَا قَادِرًا علَى أنْ يُمْشِيَهُ علَى وجْهِهِ يَومَ القِيَامَةِ؟
قالَ قَتَادَةُ: بَلَى وعِزَّةِ رَبِّنَا."《رواه البخاري》

ومش بس هيحشروا على وجوههم؛ ده كمان هيكونوا عميانا مش بيشوفوا وهيكونوا صُمٌّ لا يسمعون و بُكْمٌ لا يتكلمون،
ربنا قال:
"وَمَن يُضْلِلْ فَلَن تَجِدَ لَهُمْ أَوْلِيَاءَ مِن دُونِهِ ۖ وَنَحْشُرُهُمْ يَوْمَ الْقِيَامَةِ عَلَىٰ وُجُوهِهِمْ عُمْيًا وَبُكْمًا وَصُمًّا مَّأْوَاهُمْ جَهَنَّمُ ۖ كُلَّمَا خَبَتْ زِدْنَاهُمْ سَعِيرًا" 《سورة الإسراء آية(97)》
وقال:
"يَوْمَ يُنفَخُ فِى ٱلصُّورِ ۚ وَنَحْشُرُ ٱلْمُجْرِمِينَ يَوْمَئِذٍۢ زُرْقًا"
《سورة طه آية(102)》
ومن معاني كلمة زُرق هنا في الآية أنهم هيكونوا عميانا.

☆هنا بقى في ملحوظة مهمة:
مش معنى إن في ناس هتُحشر يوم القيامة لا بيشوفوا ولا يسمعوا ولا يتكلموا إنهم هيفضلوا كده على طول؛ لأ،
في أوقات ربنا هيجعلهم يشوفوا ويسمعوا ويتكلموا وأوقات لأ، زي ما ربنا قال:
"وَرَأَى الْمُجْرِمُونَ النَّارَ فَظَنُّوا أَنَّهُم مُّوَاقِعُوهَا وَلَمْ يَجِدُوا عَنْهَا مَصْرِفًا"
《الكهف آية(53)》
وقال:
"إِذَا رَأَتْهُمْ مِنْ مَكَانٍ بَعِيدٍ سَمِعُوا لَهَا تَغَيُّظًا وَزَفِيرًا ۩وَإِذَا أُلْقُوا مِنْهَا مَكَانًا ضَيِّقًا مُقَرَّنِينَ دَعَوْا هُنَالِكَ ثُبُورًا"
《الفرقان آية12-13)》
فهم في حال سوقهم لأرض المحشر وفي حال سوقهم إلى النار هيكونوا بالوصف ده، لكن في مراحل تانية هيشوفوا ويسمعوا ويتكلموا👌

4️⃣الصنف الرابع هم السائلين، يعني الناس المتسوّلين إلي بيشحتوا وهم مش محتاجين، قال رسول الله ﷺ:
"ما يَزَالُ الرَّجُلُ يَسْأَلُ النَّاسَ، حتَّى يَأْتِيَ يَومَ القِيَامَةِ ليسَ في وجْهِهِ مُزْعَةُ لَحْمٍ"《رواه البخاري》
والحديث معناه أنَّ الإنسانَ الذي يَسأَلُ الناسَ أموالهم أو يطلب منهم أي حاجة من غير ما يكون فقير أو محتاج ولكن بيطلب استكثارا وبيذل نفسه ويهين كرامته مع إن ربنا أمره بحفظ كرامته؛ ربنا هيذله ويُهِينُه يومَ القيامةِ زي ما هو أذَلَّ نفْسَه في الدُّنيا ويَفضَحُه على رُؤوسِ الأشهادِ، فيَسلَخُ له وَجْهَه كلَّه، حتَّى يَأتيَ أمامَ النَّاسِ وليس في وَجْهِه قِطعةُ لحمٍ؛ جَزاءً وِفاقًا لِما فَعَله في الدُّنيا مِن إراقةِ ماءِ وَجْهِه👌

يا ترى بقى إيه الأحداث إللي هتحصل في أرض المحشر بعد ما الناس يوصلوا للأرض دي؟
ده إللي هتعرفه الحلقة الجاية إن شاء الله👌

☆إللي عايز ياخد القصص وينشرها عنده في أي مكان يتفضل ياخدها من غير ما يستأذن مع ذكر المصدر أو حتى يكتب منقول😊

◇مصادر حلقة النهاردة في التعليقات 👇

♡طبعا أي ملاحظة ياريت تقوليلي فالمؤمن مرآة أخيه❤

#Eman_Shalapy

⭐المصادر⭐


https://almunajjid.com/speeches/lessons/264

https://youtu.be/2wWYBW2O8mQ

https://www.google.com/amp/s/islamqa.info/amp/ar/answers/220511

https://almunajjid.com/courses/lessons/363

https://www.google.com/amp/s/islamqa.info/amp/ar/answers/21679

https://www.google.com/amp/s/islamqa.info/amp/ar/answers/2180

https://majles.alukah.net/t181603/

https://dorar.net/hadith/sharh/10335

https://www.dorar.net/aqadia/2498/%D8%A7%D9%84%D9%85%D8%A8%D8%AD%D8%AB-%D8%A7%D9%84%D8%B1%D8%A7%D8%A8%D8%B9:-%D8%B5%D9%81%D8%A9-%D8%A7%D9%84%D8%A3%D8%B1%D8%B6-%D8%A7%D9%84%D8%AA%D9%8A-%D9%8A%D9%82%D9%81-%D8%A7%D9%84%D8%AE%D9%84%D9%82-%D8%B9%D9%84%D9%8A%D9%87%D8%A7

https://dorar.net/hadith/sharh/10332

https://binbaz.org.sa/audios/2434/56-%D9%85%D9%86-%D8%AD%D8%AF%D9%8A%D8%AB-%D8%B9%D9%86-%D8%B9%D8%A7%D9%89%D8%B4%D8%A9-%D9%82%D8%A7%D9%84%D8%AA-%D8%B3%D8%A7%D9%84%D8%AA-%D8%B1%D8%B3%D9%88%D9%84-%D8%A7%D9%84%D9%84%D9%87-%D8%B5%D9%84%D9%89-%D8%A7%D9%84%D9%84%D9%87-%D8%B9%D9%84%D9%8A%D9%87-%D9%88%D8%B3%D9%84%D9%85-%D8%B9%D9%86-%D9%82%D9%88%D9%84%D9%87-%D8%B9%D8%B2-%D9%88%D8%AC%D9%84

https://dorar.net/hadith/sharh/73324

https://dorar.net/hadith/sharh/74332

https://www.google.com/amp/s/islamqa.info/amp/ar/answers/303031

https://www.google.com/amp/s/islamqa.info/amp/ar/answers/155139

https://dorar.net/hadith/sharh/24109

https://islamic-content.com/content/4646

https://dorar.net/aqadia/2483/%D8%A7%D9%84%D9%85%D8%A8%D8%AD%D8%AB-%D8%A7%D9%84%D8%B1%D8%A7%D8%A8%D8%B9:-%D8%B5%D9%81%D8%A9-%D8%AD%D8%B4%D8%B1-%D8%A7%D9%84%D8%AE%D9%84%D9%82-%D9%88%D8%A3%D9%86%D9%87%D9%85-%D8%B9%D9%84%D9%89-%D8%B5%D9%88%D8%B1-%D8%B4%D8%AA%D9%89

https://dorar.net/hadith/sharh/80739

https://islamqa.info/amp/ar/answers/174951

بوت الاسئلة الخاصة بقصص الأنبياء و السيرة النبوية

@prophetsstories_bot

قناة قصص الأنبياء و السيرة النبوية بقلم إيمان شلبي
https://t.me/prophets_stories

https://t.me/prophets_stories/2453
روابط تحميل قصص الأنبياء و السيرة النبوية pdf