#قصص_الأنبياء
#الحلقة_السادسة
#قصة_نوح_عليه_السلام
#الجزء_الأول_الدعوة_إلى_الله

وقفنا المرة إللي فاتت عند موت إدريس عليه السلام وإنه كان بيدعو الناس لعبادة ربنا ويذكرهم دايما بالله وإنه أول من جاهد في سبيل الله،
بعد موت إدريس عليه السلام كل البشر كانوا على التوحيد، يعني كانوا عارفين إن ربنا هو الإله الخالق الرازق ملوش أي شريك وإن مفيش إله يعبدوه غيره وإن في جنة وفي نار👌

كان عندهم معاصي منتشرة بينهم وظهر الفساد وابتعدوا عن الشرع ...لكن مكنش في شرك بالله في الأرض نهائي،

في وسط المعاصي والفساد ده كان في بعض الصالحين،
وكان الناس بيحبوهم بس مش بيقلدوهم،
يعني زي بعض الناس إللي في زمانا دلوقتي يقولولك إحنا بنحب الدين والمشايخ والعلماء بس من بعيد من غير يعملوا زي ما بيقولوا لهم، من غير ما يطبقوا كلامهم يعني😅

المهم الصالحين دول كانوا بيأمروا الناس بالمعروف وينهوهم عن المنكر وكان ليهم أماكن معينة بيدعوا الناس فيها ،
زي تقريبا كده مجالس العلم عندنا،

فلما مات الصالحون الشيطان وسوس للناس إنهم يعملوا في الأماكن دي زي نُصُب تذكاري =خلينا نقول تماثيل =
ويسموا التماثيل بأسماء الصالحين دول،
قال يعني عشان كل ما يعدّوا من أمام التماثيل دي يفتكروا
الصالحين وأيامهم فيتشجعوا للعبادة كأنهم موجودين معاهم،

وفعلا صنعوا التماثيل دي....ومفيش واحد من الجيل ده عَبد التماثيل دي خالص... كلهم كانوا عارفين قصة هؤلاء الصالحين،
لما مات الجيل إللي كان عايش مع الصالحين وعارفين قصتهم؛ الشيطان وسوس للجيل إللي بعدهم إن آباؤهم كانوا بيعبدوا التماثيل دي وكان المطر بينزل بسبب عبادتهم للتماثيل، فعبدوا التماثيل دي فعلا😶
وهنا نلاحظ إن الشيطان نفسه طويييييل أوي👌
هو مكنش مستعجل أهم حاجة يحقق هدفه،
زرع بذرة في جيل وحصد الثمرة في الجيل إللي بعده،
عشان كده ربنا قالنا :
"لَا تَتَّبِعُوا خُطُوَاتِ الشَّيْطَانِ ۚ وَمَن يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنكَرِ"

لو اتبعنا خطوات الشيطان إللي هي ساعات ممكن تكون حاجات مُباحة أصلا هيوصل بينا الحال إننا نقع في الغلط😞
يعني مثلا بنت تتساهل في الاختلاط مع الرجال،
وشوية شوية تبدأ تكلمهم خاص،
وشوية شوية تبدأ تتلكك عشان تبعتله أي سؤال، وشوية شوية تبدأ تشتكيله أحزانها وتستشيره في حياتها...... لحد ما نوصل لآخر مشهد إللي كلكم أكيد حافظينه خلاص من كتر ما هو متكرر في واقعنا للأسف،
ساعتها هي بتستعيد شريط القصة من أوله بتلاقي إن أول خطوة كانت السبب الأول في النتيجة دي،
ولو كانت من البداية عاملة حدود ومنتبهة لموضع خطواتها خطوة خطوة ورا الشيطان، مكنش التساهل المتدرج ده حصل👌
والشيطان ما جالهاش في أول خطوة دي قال لها مباشرة "صاحبي فلان".. لا ده أخذها عالهادي خالص بالتدريج.

مثال كمان:
شاب بيقعد مع شباب بيشربوا سجاير، وبيقول مش هشرب.. مرة عالتانية طب هجرب عشان أخد فكرة بس..... لحد المشهد الأخير إللي كلكم برده عارفينه وإللي في أحيان كتير بيوصل لإدمان المخدرات كمان.
والشيطان في أول خطوة دي ما جالوش قاله اشرب مخدرات.. لأ اخده برده عالهادي خالص بالتدريج
وقيسوا على كده...
افتكروا كده موقف كنا مفكرين إن بدايته عادية وفي الآخر وقعنا في الغلط واحنا عمرنا ما تخيلنا أبدا إن الحال يوصل بينا لكده...فخدوا بالكم من خطوات الشيطان اقطعوا الطريق عليه من الأول👌

المهم نرجع لقصتنا😁
الناس عبدوا الأصنام وكان أول مرة تُعبد الأصنام على وجه الأرض، فربنا بعث أول نبي مُرسل وهو نوح عليه السلام،
وكان بين بعثته وبين موت آدم عشرة قرون يعني ألف سنة،
قال رجل : يا رسول الله: أَنبيٌّ كان آدم؟
قال: نعم مُكَلّم.
قال: فكم كان بينه وبين نوح؟
قال: عشرة قرون.

وربنا بعث نوح لقومه يعني هو رسول لقومه هو بس،
وكانت رسالته واضحة:
يا جماعة اعبدوا ربنا إللي خلقنا كلنا ومفيش إله غيره..اعملوا إللي يرضيه وابعدوا عن إللي يغضبه 👌
" لَقَدْ أَرْسَلْنَا نُوحًا إِلَى قَوْمِهِ فَقَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
ولو تركتم عبادة التماثيل دي واستغفرتم... ربنا هيغفرلكم إللي فات،
"أَنِ اعْبُدُوا اللَّهَ وَاتَّقُوهُ وَأَطِيعُونِ * يَغْفِرْ لَكُمْ مِنْ ذُنُوبِكُمْ"

ويرضى عنكم ويبارك لكم في ذريتكم ويرزقكم الأموال وينزل عليكم الأمطار وهتعيشوا في سعادة وفي الآخر هتدخلوا الجنة:
"فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا * يُرْسِلِ السَّمَاءَ عَلَيْكُمْ مِدْرَارًا * وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا"

الكلام واضح ومنطقي أهه مفيش فيه أي مشكلة💁‍♂️

كان إيه بقى رد فعل قومه، وخصوصا الناس الأكابر أصحاب الأموال والنفوذ في البلد😬

قالوا إيه الضلال إللي إنت فيه ده😒
بقى كلنا غلط وانت إللي صح 🙄
"قَالَ الْمَلَأُ مِنْ قَوْمِهِ إِنَّا لَنَرَاكَ فِي ضَلَالٍ مُبِ

ينٍ"

رد عليهم نوح عليه السلام وقالهم ده مش ضلال لكن هو ده الحق، وأنا رسول من عند ربنا،
"قَالَ يَاقَوْمِ لَيْسَ بِي ضَلَالَةٌ وَلَكِنِّي رَسُولٌ مِنْ رَبِّ الْعَالَمِينَ"

مهمتي إني أبلغكم رسالته وبنصحكم بالحق وأنا أعرف عن ربنا إللي انتم متعرفهوش👌
"أُبَلِّغُكُمْ رِسَالَاتِ رَبِّي وَأَنْصَحُ لَكُمْ وَأَعْلَمُ مِنَ اللَّهِ مَا لَا تَعْلَمُونَ

فردوا عليه النصيحة وقالوا : انت بشر زيّنا من بني آدم فإزاي ربنا يُرسل رسول من البشر😒
"مَا نَرَاكَ إِلَّا بَشَرًا مِثْلَنَا"
ثم محدش اتبعك غير الضعفاء وسَفَلة القوم ومحدش من أكابر قومنا سِمع كلامك😏
"وَمَا نَرَاكَ اتَّبَعَكَ إِلَّا الَّذِينَ هُمْ أَرَاذِلُنَا بَادِيَ الرَّأْيِ "

واحنا مش شايفين أي تغيير يعني بعد ما خالفتم عبادة الأصنام وعبدتم ربنا إللي بتقولوا عليه 🙄
مش هنستفيد حاجة لو اتبعناكم... انتم زي مانتم...لا عندكم مال زيادة ولا حصل لكم شيء خارق،
مفيش جديد....واضح إنكم كذابين😤
"وَمَا نَرَى لَكُمْ عَلَيْنَا مِنْ فَضْلٍ بَلْ نَظُنُّكُمْ كَاذِبِين"

نوح عليه السلام قال لهم:
انتم ليه مستغربين إن ربنا يبعت لكم واحد زيكم من البشر ينصحكم ويقولكم الصح،
متركزوا في النصيحة ...مش مهم مين إللي بينصحكم وبينصحكم إزاي،
خدوا الكلام وفكروا فيه، مش يمكن كلامي صح وانتم إللي غلط😞
هل كُون إن أنا بشر ده يبقى مبرر ليكم إنكم تردوا نصيحتي بإنكم تتقوا الله عشان يرحمكم ويدخلكم الجنة😔
"أَوَعَجِبْتُمْ أَنْ جَاءَكُمْ ذِكْرٌ مِنْ رَبِّكُمْ عَلَى رَجُلٍ مِنْكُمْ لِيُنْذِرَكُمْ وَلِتَتَّقُوا وَلَعَلَّكُمْ تُرْحَمُونَ "

ثم هو أنا بقولكم أنا عندي خزائن السماوات والأرض من الكنوز ولو سمعتم كلامي الكنوز دي هتكون بتاعتكم
ولا بقولكم أنا ملك من الملائكة ولا بقولكم إني أعرف الغيب😑
"وَلَا أَقُولُ لَكُمْ عِنْدِي خَزَائِنُ اللَّهِ وَلَا أَعْلَمُ الْغَيْبَ وَلَا أَقُولُ إِنِّي مَلَكٌ"

☆قوم نوح يراجعوا نفسهم بقى ويفكروا في الكلام يمكن يكون صح؟.....أبدا🤦‍♂️
طلعوا بحجة جديدة 🙄
قالوا لبعض : ده بشر زينا بس عايز يكون أفضل مننا وأعظم فقال إنه نبي😏
"فَقَالَ الْمَلَأُ الَّذِينَ كَفَرُوا مِنْ قَوْمِهِ مَا هَذَا إِلَّا بَشَرٌ مِثْلُكُمْ يُرِيدُ أَنْ يَتَفَضَّلَ عَلَيْكُمْ"
ولو ربنا أراد فعلا إنه يرسل رسول لأرسل مَلك من الملائكة مش بشر😒
واشمعنى نوح يعني إللي تجيله النبوة وإحنا لأ، إحنا مسمعناش الكلام ده قبل كده😤
"وَلَوْ شَاءَ اللَّهُ لَأَنْزَلَ مَلَائِكَةً مَا سَمِعْنَا بِهَذَا فِي آبَائِنَا الْأَوَّلِينَ "

فقال لهم نوح عليه السلام :
لو كان معايا دليل وعِلم من ربنا إني أتبعه وأكون عبد لله بس ولا أعبد الأصنام،
وربنا وفقني وهداني لطاعته وانتم مش شايفين الحق ده ولا عايزين تقتنعوا وتؤمنوا بالله؛
فأنا مقدرش أَلزِمكم إنكم تتبعوني وتسمعوا كلامي وتشوفوا الحجج وتعترفوا بيها بالعافية وانتم معرضين عن الحق جملة واحدة😓

"قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي رَحْمَةً مِنْ عِنْدِهِ فَعُمِّيَتْ عَلَيْكُمْ أَنُلْزِمُكُمُوهَا وَأَنْتُمْ لَهَا كَارِهُونَ"

وأنا مش عايز منكم مقابل ولا عايز ملك ولا مال ولا أي حاجة كل إللي أنا بطلبه إنكم تُسلموا لله وتطيعوا أوامره،
ربنا هو إللي هيأْجرني 😟
"وَيَا قَوْمِ لَا أَسْأَلُكُمْ عَلَيْهِ مَالًا إِنْ أَجْرِيَ إِلَّا عَلَى اللَّهِ"

هل اقتنع قوم نوح عليه السلام😑...لأ🤦‍♂️
طلعوا بحجة جديدة🤓

قالوا له إنت إزاي عايزنا نتبعك ونسمع كلامك وانت إللي اتبعوك هم الفقراء والضعفاء وأصحاب المهن الوضيعة😏
اطردهم واحنا نقعد معاك ونتفاوض😒
"قَالُوا أَنُؤْمِنُ لَكَ وَاتَّبَعَكَ الْأَرْذَلُونَ "

☆إمممم بيفكروني بمين دول ياربي🤔
ٍآااااه بيفكروني باللي قال لم لأكن لأسجد لصلصالٍ من حمإ مسنون😏
إبليس.. لعنه الله😑
التكبر عن الحق والتكبر على الخلق سبب لغضب ربنا وسخطه وعدم دخول الجنة،
قال رسول الله ﷺ :
"لا يدخل الجنة من كان في قلبه مثقال ذرة من كِبْر"
متخيلين 😳...مثقال ذرة 👌
إوعوا حد يتكبر على الحق ولا على النصيحة،
خدوها إنها رسالة من ربنا ....مش مهم مين إللي بيقولها ...ولا بيقولهالك إزاي ولا بيقولهالك إمتى.
كونوا من :
" الَّذِينَ يَسْتَمِعُونَ الْقَوْلَ فَيَتَّبِعُونَ أَحْسَنَهُ "
لو عملنا كده هنكون من دول👇
" أُولَٰئِكَ الَّذِينَ هَدَاهُمُ اللَّهُ ۖ وَأُولَٰئِكَ هُمْ أُولُو الْأَلْبَابِ"

فنوح عليه السلام قال لهم:
طيب هو أنا مالي كانوا بيعملوا إيه😒
"قَالَ وَمَا عِلْمِي بِمَا كَانُوا يَعْمَلُونَ"
ناس آمنت واتبعت الحق يبقى أقبل منهم وقلوبهم دي بتاعة ربنا هو المُطلع عليها وهو إللي يحاسبهم أنا بشر ليا الظاهر الإيماني فقط..
والعبرة مش بالمكانة والشرف والزعامة والغِنَى، العبرة بالتقوى والاتباع لرسالة الله 😤
"إنْ حسَابُهم إلا على ربّي لو تَشْعرون"

وأنا مش هطردهم، لو أنا

طردتهم مين ينجيني من غضب ربنا عليّ لأني أسات لعباده الصالحين😞
"ومَا أنا بِطاردِ المؤمنينَ"
" وَيَا قَوْمِ مَنْ يَنْصُرُنِي مِنَ اللَّهِ إِنْ طَرَدْتُهُمْ أَفَلَا تَذَكَّرُونَ"

ياترى قوم نوح اقتنعوا واستجابوا لعبادة ربنا ولّا استمروا في العناد والكبر؟

ده إللي هنعرفه في الجزء الجاي إن شاء الله.

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_السابعة
#قصة_نوح_عليه_السلام
#الجزء_الثاني_الطوفان

اتكلمنا المرة إللي فاتت عن رفض قوم نوح لدعوة التوحيد وشوفنا الحجج إللي قالوها لنوح عليه السلام،
وشوفنا كمان رد نوح عليه السلام عليهم، لكن قوم نوح مسكتوش برده ومقتنعوش😑
قالوا انت بتفتري الكلام ده وبتألّف 😤
قالهم لو أنا بألّف وبفتري الكذب؛ أنا إللي هشيل الذنب ملكوش دعوة👌
وانتم كمان هتشيلوا ذنب إنكم مسمعتوش الكلام، ركزوا في المهم...في القضية نفسها، احكموا على محتواها.. هل هو حق ولّا باطل🤷‍♂️
"أَمْ يَقُولُونَ افْتَرَاهُ ۖ قُلْ إِنِ افْتَرَيْتُهُ فَعَلَيَّ إِجْرَامِي وَأَنَا بَرِيءٌ مِّمَّا تُجْرِمُونَ"

¤وفي هنا ملحوظة وهي إن ربنا لما بيبعث نبي أو رسول بيكون من القبيلة نفسها يعني همّ يعرفوه كويس ومعاشرينه وعارفين نسبه وأخلاقه وكل حاجة عنه، مش واحد غريب جاي من برة،
والأنبياء أخلاقهم كريمة ومحدش منهم بيكذب أبدا وبيكونوا أشراف ونسبهم عالي في قومهم،
عشان ميكنش لهم أي حجة في إنهم يردوا الحق،
زي مثلا لما إنسان بيكون على خلق ومؤدب ومحترم بطبيعته وأهله وأصحابه بيحبوه..
وبعدين ربنا يهديه للالتزام ويتعلم العلم الشرعي الصحيح ..
ويشوف مخالفات عند أهله وأصحابه ويبدأ ينصحهم بالصح عشان نفسه إنهم يفرحوا زيه بالحق إللي هو عرفه وحياته بقت أسعد بيه..
فهم بدل ما يسمعوا الكلام ويقتنعوا بالدليل والحق الواضح
تلاقيهم بقى يحاربوه ويزهّقوه وممكن يتعدوا عليه بالشتيمة أو السخرية أو يوْجعوه بالخصام ،
وهو يا عيني يكون مستغرب فين يا جماعة معاملتكم ليا بتاعة زمان😧
مش هيلاقيها لإنه بقى ينصحهم بحاجة مش على هواهم،
ودي سُنة كونية حصلت لجميع الأنبياء ومن سار على درب الدعوة إلى الله، فمحدش يزعل لو حصل معاه كده دي سنة كونية👌

لما قوم نوح لقوا إن مفيش فايدة من نوح وإنه مصمم على الضلال بتاعه ده،
قالوا يانوح انت بتجادل كتير ومش عايز تقتنع =واخدين بالكم😏= مش انت بتخوفنا بالعذاب، خلاص هات العذاب إللي انت بتقول عليه ده🙄
قَالُوا يَا نُوحُ قَدْ جَادَلْتَنَا فَأَكْثَرْتَ جِدَالَنَا فَأْتِنَا بِمَا تَعِدُنَا إِن كُنتَ مِنَ الصَّادِقِينَ"

نوح قالهم أنا مش بإيدي حاجة 🤷‍♂️
لو ربنا أراد؛ هينزّل عليكم العذاب، ودي حاجة سهلة يعني😏 إنتم مطلبتوش المستحيل😑
"قَالَ إِنَّمَا يَأْتِيكُم بِهِ اللَّهُ إِن شَاءَ وَمَا أَنتُم بِمُعْجِزِينَ".

ولو ربنا لم يُرد لكم الهداية مش هتنفعكم نصيحتي مهما قلت، فهو أعلم إذا كنتم تستاهلوا الهداية فعلا ولاّ تَستحبّون العَمَى على الهدى😤
"وَلَا يَنفَعُكُمْ نُصْحِي إِنْ أَرَدتُّ أَنْ أَنصَحَ لَكُمْ إِن كَانَ اللَّهُ يُرِيدُ أَن يُغْوِيَكُمْ ۚ هُوَ رَبُّكُمْ وَإِلَيْهِ تُرْجَعُونَ"

أنا عايزاكم تتخيلوا إن نوح عليه السلام كان بيدعو قومه في كل الأوقات، يعني الحوار إللي قلناه ده👆
مكنش مرة واحدة ولا في قاعدة واحدة كده وخلصت القصة😅
لاااااااااا 😶......ده قعد يدعو قومه سنييييين 👌
وكان بينوّع في الأسلوب، يعني شوية باللين وشوية بالشدة ،
شوية يُوْعدهم ويُبشرهم برحمة ربنا...وشوية يُخوفهم من عذابه،
مش بس كده ده كان حتى بينوّع في الوقت ،
يعني كان بيدعوهم بالنهار في مجالسهم،
وكان بيروح لهم بالليل لما يكونوا لوحدهم يدعوهم،
لأن في ناس ممكن تكون اقتنعت بس خايفة تُعلن الإيمان عشان محدش من أكابر القوم المجرمين يؤذيهم وهمّ مش هيستحملوا الأذى،
فهو جرب كوووول أساليب الدعوة👌
"قَالَ رَبِّ إِنِّي دَعَوْتُ قَوْمِي لَيْلًا وَنَهَارًا "
"ثُمَّ إِنِّي دَعَوْتُهُمْ جِهَارًا "
"ثُمَّ إِنِّي أَعْلَنتُ لَهُمْ وَأَسْرَرْتُ لَهُمْ إِسْرَارًا"

طيب كان رد فعل قومه إيه بقى😑
كل ماكان نوح عليه السلام عليه السلام يدعوهم ينفروا من كلامه و يهربوا منه بكل الطرق، لدرجة إنهم بدأوا يحطوا صوابعهم في ودانهم عشان ميسمعوش🙉

هل نوح قال خلاص أنا عملت اللي عليا أديني بقولهم وهم مش سامحين لودانهم تسمع حتى؟
فأنا مش هتكلم تاني بقى خلاص 😞

بالعكس 👌
بقى يشاورلهم بإيده،
بيدعوهم بإيده... يشاور عالسماء وينصحهم ويوصل لهم كلامه بالإشارة بدل العبارة😅

☆سبحان الله على قوة عزمه وإصراره على تبليغ رسالة ربنا😮

فقوم نوح راحوا واخدين هدومهم وحاطينها على وشهم عشان لا يسمعوه ولا حتى يشوفوه😑

كان ممكن يغمضوا عينهم، لكنهم حطوا الهدوم على وشهم، يعني مش عايزين نشوفك نهائي😤
"وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أَصَابِعَهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا"

شوفوا شدة الإعراض عن الحق....طيب ليه ده كله يا جماعة 😳
طيب متجربوا واسمعوا الكلام مش هتخسروا حاجة😐
الكِبر للأسف يعمل أكتر من كده😑
الكِبر من أخطر أمراض القلوب إللي تودّي في داهية فعلا ،
وهنشوف في الآخر وصية نوح لابنه بيقوله إيه عن الكبر بس لما نوصل ليها إن شاء الله.

نوح عليه السلام قعد يدعو قومه ويصبر على

تريقتهم وأذاهم ، وكان عندهم حاكم... مَلِك يعني،
كل ما كان نوح عليه السلام يدعو الناس ...الملك ده كان بيدعو الناس إنهم ميسبوش آلهتهم ويتمسكوا بعبادة الأصنام،
إللي كانوا مسميينها وَد وسُواع ويَغوث ويَعوق ونَسر،
"قَالَ نُوحٌ رَّبِّ إِنَّهُمْ عَصَوْنِي وَاتَّبَعُوا مَن لَّمْ يَزِدْهُ مَالُهُ وَوَلَدُهُ إِلَّا خَسَارًا "

وأسماء الأصنام دي هي أسماء الناس الصالحين إللي كانوا عايشين قبل كده واتكلمنا عنهم،
فلما ماتوا عملوا لهم تماثيل وسموهم بأسمائهم:
《وَد وسُواع ويَغوث ويَعوق ونَسر》

تتوقعوا بقى نوح عليه السلام قعد يدعو قومه ويصبر على تريقتهم وأذاهم له كم أد إيه؟
شهر...شهرين...سنة...عشر سنين؟

نوح عليه السلام يا جماعة قعد يدعو قومه تسعمائة وخمسين ٩٥٠ سنة🙊
"وَلَقَدْ أَرْسَلْنَا نُوحًا إِلَىٰ قَوْمِهِ فَلَبِثَ فِيهِمْ أَلْفَ سَنَةٍ إِلَّا خَمْسِينَ عَامًا "

انتم عارفين ربنا بيحكي لنا قصص الأنبياء والسابقين ليه؟
عشان يعلمنا وعشان نتدبر و نعتبر👌
كل قصة فيها عِبرة يعني هي مش حكاية وخلاص، في قصص الأنبياء هنلاقي مواقف بتتكرر معاك انت شخصيا👌

كم مرة حصل إنك كلمت حد عن حكم حاجة و رد عليك رد وحش؟
كم مرة الناس استهزأت بحد فيكم عشان متمسكين بطاعتكم لله ؟
كم مرة أمرت بالمعروف ونهيت عن المنكر ولقيت الناس بتصدك وتقولك بطلوا تشدد ....عقدتونا...حرمتم كل حاجة... سيبونا نعيش حياتنا كم...كم...
طيب ياترى كان رد فعلك إيه ؟...هل صبرت واستمريت في الدعوة للصح بالقدوة أولا ثم بالكلام المباشر ثانيا؟
ولّا يئست وقلت خلاص اعتزل ما يؤذيك... أنا هحرق في دمي ليه ! أنا خلاص عملت إللي عليّ وهمّ إللي مش عايزين يسمعوا الكلام😒
ومش كده وبس ده في ناس بتتأثر وبتخاف من أذى الناس فتسيب الصح عشان خايفة من الأذى، أو ممكن أصلا متعملش الصح من الأساس عشان محدش يقولها كلمة تضايقها👌

طيب مين الخسران هنا ؟
أكيد أنا ...لأن أنا ضيعت على نفسي فرصة اتباع الحق وفرصة أجر الدعوة 😔
دين ربنا هيستمر وباقي ليوم الدين، كده كده سواء بيّ أو من غيري،
لكن إللي ممكن يتغيروا ويتبدلوا هم الناس إللي بتوصل الدين،
وقت ماهتقول خلاص أنا مش هتكلم تاني....أنا مش هدعو حد تاني...
اعرف كده إن ربنا هيستبدلك بغيرك ومش هيكون زيك، ده هيفني عمره في الدعوة إلى الله👌
"وَإِن تَتَوَلَّوْا يَسْتَبْدِلْ قَوْمًا غَيْرَكُمْ ثُمَّ لَا يَكُونُوا أَمْثَالَكُم"

أنا مش مطلوب مني أهدي الناس ولا أخليهم يسمعوا كلامي وينفذوه في التوّ واللحظة ولا بعد سنين حتى،
لأ خاااالص إنت عليك تدعي الناس وبس، وأجرك عند ربنا هتاخده سواء الناس اتبعت أو متبعتش...
ربنا مش هيسألنا عن النتيجة أبدا ...هيسألنا إحنا قدمنا إيه كل واحد حسب استطاعته،
نوح عليه السلام كان فاهم المعنى ده كويس عشان كده استمر ٩٥٠ سنة يدعو قومه عمل كل إللي يقدر عليه ،
كان همه إنه يبلغ دين ربنا وبس 👌

طيب عارفين بعد كل المجهود إللي عمله ده كله والدعوة خلال السنين دي كلها ،آمن معاه كم واحد؟!!
يعني على الأقل خااالص لو كل سنة آمن واحد بس هيكون معانا ٩٥٠ إنسان مؤمن، لكن لأ،
أكثر الأقوال في إللي آمنوا مع نوح قالوا إنهم ٨٠ رجل وامرأة 😑
يعني كإن كل ١٢ سنة تقريبا كان بيؤمن معاه واحد فقط😶
وده نبي مرسل ومن أُولي العزم من الرسل ومُؤيد من الله واستعمل كل أساليب الدعوة ومع ذلك آمن معاه العدد البسيط ده خلال السنين الطويلة دي،
فما بالكم بينا احنا
فمتزعلش لما متلاقيش نتيجة ...متزعليش لما حد يؤذيكي في الله...اصبروا وافتكروا نوح عليه السلام قلبك هيهدى ،مش قلتلكم ربنا مش بيحكي لنا القصص كده وخلاص👌

المهم،
قوم نوح أصروا على الكفر، وربنا أوحى لنوح عليه السلام إن خلاص محدش هيؤمن من قومك إلا إللي آمنوا خلاص،
فنوح عليه السلام في اللحظة دي دعا على قومه إن ربنا يهلكهم ،
عشان أفسدوا في الأرض وكل ذريتهم بعد كده هتكون مفسدة في الأرض،
فربنا أمر نوح إنه يصنع سفينة 🛳وإنه يجمع فيها من كل مخلوق زوجين ذكر وأنثى، وعلمه سبحانه إزاي يصنعها ،
ويُقال إن نوح عليه السلام كان يعمل نجار،
نوح عليه السلام ترك الدعوة وتفرّغ لصناعة السفينة لأن خلاص ربنا بعلمه قاله إن مفيش حد هيؤمن،
قوم نوح بقى رايحين جايين يتريقوا على نوح عليه السلام،
يانوح انت بقيت نجار بعد ما كنت نبي😏
وطبعا لأنه كان بيبني سفينة على جبل ومفيش مية فكانوا بيقولوا إنه مجنون حد يبني سفينة على جبل🙄
"وَيَصْنَعُ الْفُلْكَ وَكُلَّمَا مَرَّ عَلَيْهِ مَلَأٌ مِّن قَوْمِهِ سَخِرُوا مِنْهُ ۚ"

فنوح عليه السلام قالهم زي ما بتسخروا منا احنا كمان بنسخر منكم لجهلكم باللي هيحصل لكم بعد شوية،
"قَالَ إِن تَسْخَرُوا مِنَّا فَإِنَّا نَسْخَرُ مِنكُمْ كَمَا تَسْخَرُونَ"
هتشوفوا مين إللي ربنا هيبعت عليه عذاب وأدينا مستنيين😏
"فَسَوْفَ تَعْلَمُونَ مَن يَأْتِيهِ عَذَابٌ يُخْزِيهِ وَيَحِلُّ عَلَيْهِ عَذَابٌ مُّقِيمٌ"

ربنا كان مُعطي لنوح عليه السلام علامة بالوق

ت إللي هيركب فيه السفينة،
والعلامة دي كانت أول ما يفور التنور يبدأ نوح عليه السلام يطلع السفينة هو والمؤمنين وأزواج الحيوانات إللي معاه ،
"حَتَّىٰ إِذَا جَاءَ أَمْرُنَا وَفَارَ التَّنُّورُ "
والتنور فيه تفسيرات كتيرة منها إنه هو الفرن إللي بيخبزوا فيه،
فأول ما يفور منه ماء يركب السفينة هو وإللي آمنوا معه،
"قُلْنَا احْمِلْ فِيهَا مِن كُلٍّ زَوْجَيْنِ اثْنَيْنِ وَأَهْلَكَ إِلَّا مَن سَبَقَ عَلَيْهِ الْقَوْلُ وَمَنْ آمَنَ"
فلما نوح عليه السلام شاف العلامة كلهم ركبوا السفينة ،
"وَقَالَ ارْكَبُوا فِيهَا بِسْمِ اللَّهِ مَجْرَاهَا وَمُرْسَاهَا"
وبدأ المطر الشديد ينزل من السماء🌧
والأرض تطلع مية بكميات كبيرة، وطبعا الناس بدأت تصرخ مش عارفين إيه إللي بيحصل،
المية مغرقة كل حاجة الزرع والبيوت وبدأت المية تعلى وتعلى والناس تغرق
ونوح عليه السلام في السفينة مع المؤمنين،
"وَهِيَ تَجْرِي بِهِمْ فِي مَوْجٍ كَالْجِبَالِ"
وفي وسط الأهوال دي كلها نوح عليه السلام شاف مين🙊
شاف ابنه وهو بيتسلق جبل وكانت المية لسه موصلتش للإرتفاع ده،
فنادى عليه نوح عليه السلام يا بني اركب معنا ولا تكن مع الكافرين😥
"وَنَادَىٰ نُوحٌ ابْنَهُ وَكَانَ فِي مَعْزِلٍ يَا بُنَيَّ ارْكَب مَّعَنَا وَلَا تَكُن مَّعَ الْكَافِرِينَ "
فابنه قال له:
لأ، أنا هطلع على الجبل وهو هينقذني من المية😤
"قَالَ سَآوِي إِلَىٰ جَبَلٍ يَعْصِمُنِي مِنَ الْمَاءِ"
لحد اللحظة دي مش قادر يستوعب إن نوح عليه السلام كان على حق لإن الكِبر عامي قلبه😞

نوح عليه السلام نادى عليه قاله مفيش حد هينجو النهاردة من العذاب إلا إللي ربنا يرحمه، فجه موج عالي 🌊وفصل بين الأب وابنه وغرق الابن مع الكافرين،
" قَالَ لَا عَاصِمَ الْيَوْمَ مِنْ أَمْرِ اللَّهِ إِلَّا مَن رَّحِمَ ۚ وَحَالَ بَيْنَهُمَا الْمَوْجُ فَكَانَ مِنَ الْمُغْرَقِينَ "
فضلت السماء تمطر والأرض تطلع مية لحد ما غطت المية كل رؤوس الجبال ،
الأرض كلها غرقت، وكأن الله يريد إنه يغسل الأرض من الفساد ويعيد للأرض نبتة التوحيد مُزهرة مرة تانية،
فمات كل من كان حيا على الأرض إلا من كان على السفينة
على الراجح من أقوال العلماء.

إيه إللي حصل بعد الطوفان ؟

ده إللي هنعرفه الجزء الجاي إن شاء الله.

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊


#Eman_Shalapy

#قصص_الأنبياء
#الحلقة_الثامنة
#قصة_نوح_عليه_السلام
#الجزء_الثالث_ما_بعد_الطوفان

قلنا المرة إللي فاتت إن نوح عليه السلام ركب السفينة هو والذين آمنوا معاه ومعهم من كل نوع من الحيوانات ذكر وأنثى،
وربنا أغرق الأرض بالماء وأهْلَك قوم نوح عليه السلام،
ربنا وَعد نوح عليه السلام إنه ينجّيه هو وأهله،
والمقصود بالأهل هنا هو كل من آمن بالله سواء كانوا أقاربه ولّا لأ،
زوجته كانت كافرة وكانت بتقول عنه مجنون،
وطبعا باعتبار الزوجة هي أكتر واحدة معاشرة زوجها وعارفة خباياه وطباعه وأخلاقه، فلما الناس سمعتها بتقول كده عنه وهي زوجته أصلا = فلاشك إن ده أثّر على دعوة نوح عليه السلام بالسلب،
وعشان كده ربنا وصفها بالخيانة في القرآن لأن الأصل إن الزوجة تعين زوجها في الشدائد وتعينه على الحق ومتطعنش في سمعته بالسوء بالزور والبهتان،
عشان كده ربنا ضربهم مثل لنا في القرآن عشان يعلمنا إن العبرة بالإيمان بالله مش بالنسب،
ربنا بيقول:
"ضَرَبَ اللَّهُ مَثَلًا لِّلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ ۖ كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا وَقِيلَ ادْخُلَا النَّارَ مَعَ الدَّاخِلِينَ"

طبعا مش المقصود هنا بالخيانة هي الخيانة الزوجية إطلاقا إللي هي الزنا؛ لأن ربنا حافظ لأعراض الأنبياء من ده👌
وماتت زوجة نوح على الكفر وأغرِقَت مع المُغرَقِين.

نوح عليه السلام كان له أربعة أبناء،
ثلاثة آمنوا، و الرابع إللي هو مذكور في القرآن لم يؤمن به لحد آخر لحظة وهو بيطلع الجبل لحد ما الموج فصل بينهم هما الاتنين وغرق زي ما شوفنا،
ولمّا الموج فصل بين الأب وابنه ،نوح عليه السلام بمشاعر الأب الرحيم الرفيق بدأ يسأل ربنا عنه:
يارب مش انت قلتلي إنك هتنجيلي أهلي ...طيب ما ابني من أهلي وانت وعدك الحق لا تخلف وعدا وعدته😔
"وَنَادَىٰ نُوحٌ رَّبَّهُ فَقَالَ رَبِّ إِنَّ ابْنِي مِنْ أَهْلِي وَإِنَّ وَعْدَكَ الْحَقُّ وَأَنتَ أَحْكَمُ الْحَاكِمِينَ"

هنا ربنا قال لنوح عليه السلام وقالنا كلنا القاعدة دي:
إنه ليس من أهلك👌
يعني أي حد مش على دينك مينفعش يكون بينك وبينه أي صلة وُد وحب حتى لو كان ابنك من لحمك ودمك،
يعني العبرة بقرابة الدين مش قرابة النسب.
"قَالَ يَا نُوحُ إِنَّهُ لَيْسَ مِنْ أَهْلِكَ ۖ إِنَّهُ عَمَلٌ غَيْرُ صَالِحٍ"

☆وهنا تيجي قاعدة مهمة جدا جدا في العقيدة وهي قاعدة
《الولاء والبراء》ومعناها باختصار :
الولاء يعني الإنسان يتولى الله ورسوله والمؤمنين،
والبراء يعني يتبرأ من الكفر وأهله،
يعني مينفعش يكون بيني وبين حد غير مسلم علاقات عميقة فيها حب وموالاة وتبادل لصور المودة كإنه أخويا أو حد من أهلي،
في حين إن علاقتي باخواني المسلمين مفيش فيها الكلام ده ولا حتى ربعه😑
نتعامل معاهم بالحسنى والعدل والكرم من باب الإحسان إليهم فقط عشان يعرفوا سماحة الإسلام مع غير المسلمين في أداء الحقوق وحسن الخلق..
لكن أكتر من كده = ما ينفعش👌
إلا لو حد من الأهل والأرحام فطبيعي بيبقى في حب فطري جِبِلِّي في القلب تجاههم = فده مافيش فيه حرج أو مؤاخذة.

◇ممكن حد يقول: بصراحة أخلاقهم أحسن من مسلمين كتير🙄

طيب هنفترض معاكم إن بعضهم أصدق وأوفى بوعده وأكرم أخلاقا من بعض المسلمين -وبالفعل فيه ناس في جاهليتهم بيبقوا من أحسن الناس أخلاقا، زي ما احنا عارفين "خيارهم في الجاهلية خيارهم في الإسلام.. إذا فقهوا"
يعني الأخلاق والطباع الكويسة فعلا بتسيب أثر بغض النظر عن الدين.. فتمام كده أنا هتفق معاكم في ده،
لكن سؤال مهم بقى👌
مهما أخلاقهم كانت حلوة،
إزاي ممكن نتخيل إنهم يكونوا أحسن من المسلمين وهمّ إللي أساؤوا الأدب مع الله عز وجل وكذبوه وقالوا إن عنده ولد وهو معندهوش ولد؟!!
بالله عليكم لو فيه حد بيعاملك كويس لكن طول النهار وكل ما يشوفك عمال يقولك "أمك دي كذابة" وانت عارف إن أمك صادقة مُنزهة عن السوء وعمرها ما تكذب،
انت ممكن تكون على علاقة بيه بعد كده؟ ده إذا ممسكتوش ضربته عشان يبطل يتكلم عنها بسوء أصلا..😒

ولله المثل الأعلى ..الله أحق إننا نغضب له👌

فاحنا بنحب ونوالي المسلمين لأنهم مسلمين،
ونبغض في الله ونتبرأ من الكفر وأهله لأنهم غير مسلمين لرب العالمين👌
ومش معنى إنك تكره حد في الله إنك هتؤذيه أو هتظلمه، اطلاقا.. 😱
ده مش سبب أبدا لكده ..ربنا قالنا:
"وَلَا يَجْرِمَنَّكُمْ شَنَآنُ قَوْمٍ عَلَىٰ أَلَّا تَعْدِلُوا ۚ اعْدِلُوا هُوَ أَقْرَبُ لِلتَّقْوَىٰ"
أيوة إحنا مأمورين بالإحسان لغير المسلمين😤
لكن مش على حساب دينا ولا عقيدتنا أبدا👌

المهم،
ربنا قال لنوح إنه يتبرأ من ابنه لأنه مش على دينه،
فبالتالي هو مش من أهلك.. وأنا وعدتك إني هنجيلك أهلك المؤمنين لكن الكفار لأ، فلا تدعوني بشيء محرم وهو إني أُنْجي كافر،
وأنا أنزهك إنك تكون من الجاهلين إللي مش عارفين الكلام ده،
"فَلَا تَسْأَلْنِ مَا لَيْسَ لَكَ بِهِ عِلْمٌ

ۖ إِنِّي أَعِظُكَ أَن تَكُونَ مِنَ الْجَاهِلِينَ"
ورسول الله ﷺ بيقولنا:
"لا يزَالُ يُسْتَجَابُ لِلعَبْدِ مَا لَم يدعُ بإِثمٍ، أَوْ قَطِيعةِ رَحِمٍ، مَا لَمْ يَسْتعْجِلْ"
يعني مينفعش ندعي بحاجة محرمة،
ثم فين العدل وربنا هو العدل ؟؟
معقولة هيبقى كافر و ربنا هينجيه لقرابته بنوح و هيسيب باقي الكفار يغرقوا؟!

فهنا نوح عليه السلام بعد ما اتضحت له الصورة بالكامل
استعاذ بالله إنه يقع في خطأ يشترك فيه مع الناس الجهلة وخصوصا إنه نبي عنده من العلم إللي مش عند غيره، ودعا ربنا إنه يغفرله.
"قَالَ رَبِّ إِنِّي أَعُوذُ بِكَ أَنْ أَسْأَلَكَ مَا لَيْسَ لِي بِهِ عِلْمٌ ۖ وَإِلَّا تَغْفِرْ لِي وَتَرْحَمْنِي أَكُن مِّنَ الْخَاسِرِينَ"

☆ في هنا إشارة وعبرة من ربنا لكل أب وأم وهي إن الأب والأم مش مطلوب منهم غير إنهم يرشدوا ويعلموا أبناؤهم صح، يعني ياخدوا بالأسباب في تربية أبناؤهم ويتوكلوا على الله في الثمرة،
طيب لو علموهم وربوهم تربية صحيحة فعلا،
《مش التربية إللي هم شايفينها صحيحة، خدوا بالكم في فرق طبعا》
وكانت النتيجة إن واحد من الأبناء طلع فاسق مثلا،
يبقى هو كده عمل إللي عليه قصاد ربنا،
هو مش مطلوب منهم النتيجة هم بس عليهم التربية، أما الهداية والتوفيق ده بتاع ربنا،
زي نوح عليه السلام لما ابنه كفر..هل كان العيب في نوح؟
لأ ..لأن ثلاثة من أبناؤه آمنوا، لكن أي تقصير في التربية يؤدي لإنحراف الأبناء فالأب والأم هيُسألوا👌
عشان كده لازم كل أب وكل أم يتعلموا التربية الشرعية الصحيحة اللي هيربوا بيها ولادهم ...الأمر مش اختياري ولا هو رفاهية دي حاجة هنتسأل عنها يوم القيامة😅

نرجع للسفينة إللي كانت بتتحرك وسط أمواج عالية جدا 🌊حتى إن ربنا شبه الأمواج دي بالجبال ⛰من كتر ما هي عالية وعظيمة،
وإللي شاف منكم فيديوهات عن سفن بتمشي في البحر وسط موج عالي هيحس وهيفهم المعنى ده أوي،
المنظر مرعب جدا ويخلع القلوب، هتلاقوا في التعليقات👇 رابط لفيديو لحاجة شبيهة للآية عشان تشوفوه وتستشعروا الموضوع 👌

بعد ما ربنا أهلك قوم نوح عليه السلام ..أمر السماء إنها توقف المطر وأمر الأرض إنها تبلع الماء، ورسيت السفينة على جبل الجودي، وربنا تركها لينا آية من يومها،
"وَقِيلَ يَا أَرْضُ ابْلَعِي مَاءَكِ وَيَا سَمَاءُ أَقْلِعِي وَغِيضَ الْمَاءُ وَقُضِيَ الْأَمْرُ وَاسْتَوَتْ عَلَى الْجُودِيِّ"

وفي هنا إعجاز علمي قاله دكتور زغلول النجار، قال إن في مستكشفين كفار ادّعوا إن الطوفان إللي حصل كان بسبب زلزال حصل في قاع البحر فأدى إلى فيضان من ماء البحر ..تسونامي يعني...فأغرق الأرض،
وده عكس إلي جه في القرآن ،

لأن ماء المطر عذب وعيون الماء إللي تفجرت من الأرض عذبة، فلما اكتشفوا سفينة نوح في أعلى قمة جبل الجودي متغطية بكيمة كبيرة من رسوبيات الماء العذب اثبت صحة كلام القرآن وكذّب كلام المستكشفين👌

☆وإللي عايز يعرف أكتر عن معجزة سفينة نوح عليه السلام يشوف الرابط إللي في التعليقات👇

بعد ما الأرض نشفت وبقت ينفع يستقروا فيها ربنا أمر نوح عليه السلام إنه ينزل من السفينة عشان يبدأ حياة جديدة في الأرض،
وكثير من العلماء إن مكنش كلهم بيسموا نوح عليه السلام آدم الثاني،
لأن كل البشرية بعد الطوفان هي من ذرية نوح عليه السلام،
"وجلْعنا ذُريّته هُم البَاقِين"
فربنا لم يجعل ذرية ونسل للمؤمنين إللي كانوا مع نوح عليه السلام،
وفي أقوال لبعض المفسرين إن المؤمنين إللي كانوا مع نوح ، من خضتهم الشديدة في مشهد الطوفان = أصابهم انقطاع للنسل بعدها والله أعلم..
وأيا كان السبب إللي أدى لانقطاع النسل إلا من ذرية نوح ساعتها ، فالخلاصة إن البشرية كلها من نسل أبناء نوح الثلاثة سام وحام ويافث،
قال رسول الله ﷺ :
"سام أبو العرب، وحام أبو الحبش، ويافث أبو الروم"

نزل نوح عليه السلام والمؤمنون من السفينة ونزلت الحيوانات إللي كانت معاه،

☆ عندنا هنا بقى سؤال مهم:
نوح عليه السلام ربنا أمره ياخد معاه علي السفينه كل المؤمنين، وزوج من كل الكائنات على الأرض... ذكر وأنثي..
"قُلْنَا احْمِلْ فِيهَا مِن كُلٍّ زَوْجَيْنِ اثْنَيْنِ"
طب بقية الحيوانات إللي نوح عليه السلام ما أخدهاش السفينة وغرقت في الطوفان ده، إيه ذنبهم🤔

الإجابة:
طيب وهو إيه ذنب الحيوانات إللي بتموت أو بتتأذى عموما في الفياضانات أو أي كارثة طبيعية🤷‍♂️
هي هي نفس المسألة ونفس الجواب👌

ربنا له حكمة في أفعاله
في أمور بنعرف حكمتها زي مثلا قصص سورة الكهف، وفي أمور مبنعرفش حكمتها لسه..

والموقف إللي ربنا مقلناش الحكمة منه = نُسلّم ونفوّض فيه لأمر الله بيقين إنها حكمة بالغة الغاية في الكمال ولا علاقة لها بالظلم نهائيا👌

إيه بقى تعريف الظلم في الأساس؟
كذا تعريف:

◇المعنى الأول:
الظلم هو التعدي على حقوق الغير.
--- طيب المخلوقات دي مِلك لربنا، يبقى ربنا له الحق في إنه يفعل بها ما يشاء.. وبالتالي ده مش ظلم🤷‍♂️

◇أو المعنى التاني وهو إن الظلم هو مخالفة أمر مَنْ تَج

ب طاعته.
---- طيب ربنا هو الخالق أصلا فالكل يسمع ويطيع له، وهو سبحانه لا يلزمه طاعة أحد.

☆أو معنى تالت للظلم وهو وضع الشيء في غير موضعه، زي تعذيب المُطيع ومَن لا ذنب له.

---و ده ربنا نَزّه نفسه عنه في أكثر من موضع في القرآن والسنة..
قال تعالى:
"وما ربك بظلام للعبيد"
"ولا يظلم ربُك أحدا"
"إن الله لا يظلم مثقال ذرة"
"ثم تُوفى كل نفس ما كسبت وهم لا يُظلمون"
وقال رسول الله ﷺ قال الله:
"إني حرمت الظلم على نفسي فلا تَظالموا"

وبالتالي معنى الظلم في حق ربنا مبقاش موجود من الأساس.. لإن الظلم حاجة قبيحة وربنا غني عنه فربنا حرمه على نفسه.

لكن زي ما قلنا هو له حكمة في جميع أفعاله ،
سواء عرفناها أو معرفنهاش👌

◇ طيب مش ظلم، لكن مش كده يبقى قسوة
-حاش لله طبعا- في حق حيوانات ملهاش ذنب؟!

يجاوبنا على السؤال ده حديث رسول الله ﷺ :
"لو أن الله عذب أهل سماواته وأهل أرضه لعذبهم وهو غير ظالم لهم، ولو رحمهم لكانت رحمته لهم خيرا لهم من أعمالهم"

يعني لو ربنا عز وجل عامل أهل السماء والأرض بعدله هيكونوا مستحقين للعذاب والعقاب..
ولو عاملنا برحمته فده إللي هينجينا.. لإن مفيش ولا نعمة واحدة ربنا أنعم بيها على أي كائن حي يقدر يؤدي شكرها ولو عشنا كلنا ساجدين لله أبد الآبدين👌

ثم لو فكرنا من زاوية منطقية تانية :
-فيه احتمال إن ربنا قبض أرواح الحيوانات قبل الطوفان أصلا،
-أو إنها ماتت عادي وسط الطوفان وربنا هوّن عليها الموت ومكنش مؤلم وكده كده كل نفس ذائقة الموت🤷‍♂️

وطبعا ده على افتراض القول الراجح إللي بيقول إن الطوفان كان يشمل الأرض كلها😅
لأن مفيش دليل قطعي إن الطوفان كان شامل الأرض كلها، والعلماء هم إللي رجّحوا القول ده من خلال الاستنباط من مجموع الأدلة والآثار،

فممكن أصلا الطوفان كان في قرية نوح فقط وبكده يبقى مفيش مشكلة ولا سؤال من الأساس، لإن ساعتها ربنا ممكن يؤمر الحيوانات إنها تخرج من القرية ببساطة،
فجميع الاحتمالات موجودة والله أعلم إيه إللي حصل،
لكن المؤكد هو إن الأصل إن ربنا حكيم عليم خبير رحيم بكل مخلوقاته ولا يظلم مثقال ذرة.. ويكون عندنا يقين في ده👌

عاش نوح عليه السلام على الأرض مع أبناؤه ومع المؤمنين في رخاء ونعيم، فكلهم طائعين عابدين لله مفيش أي كافر بينهم،
إحساس جميل فعلا،
"بلدةٌ طيبةٌ وربٌّ غفُور"

بعد العمر الطويل ده كله جاءت النهاية ...الموت ..
يُقال إن نوح عليه السلام هو أطول الأنبياء عمرا،
لكن كل حي له نهاية وسيموت مهما طال عمره، إلا الله الحي الذي لا يموت، مهما عاش الإنسان لااازم هيجيله الموت،
حتى الملائكة هتموت في يوم من الأيام،
"كلُّ مَن عليها فان"

لما جت ساعة وفاة نوح عليه السلام، وصى ابنه وصية قال :
أنا بأمرك بحاجتين ✌وبنهاك عن حاجتين ✌
أولا بأمرك بلا إله إلا الله ...فلو السماوات السبع والأراضين السبع اتحطوا في كفة ولا إله إلا الله في كفة هترجح كفة لا إله إلا الله👌
♡قولوا لا إله إلا الله😊
دايما قولوها وكرروها فهي أفضل الذكر ومن عاش على شيء مات عليه😁

ثانيا بأمرك بسبحان الله وبحمده، لأن فيها صلاة كل شيء وبها يُرزق الخلق👌
"وإن من شيءٍ إلا يُسبّح بحمده"
♡عايزين الرزق قولوا سبحان الله وبحمده😊

بنهاك أولا عن الشرك وثانيا عن الكبر👌
=واخدين بالكم من الوصية بيقوله الكِبر=
الشرك معروف وهو إننا نشرك مع ربنا احد في العبادة،

طيب الكِبر بقى إيه المقصود بيه🤔
هل الكِبر إن الإنسان بيلبس لبس نضيف أو بيركب عربية مثلا أو يكون له مكانة عالية؟
لأ مش هو ده الكبر المقصود، المقصود هنا بالكبر كما قال رسول الله ﷺ:
"سَفَهُ الحقِّ - أو بَطَرُ الحق- وغَمْطُ الناس"
بطر الحق يعني رد الحق ...لما الإنسان مثلا يجيله الحق بالدليل من القرآن والسنة ويقول لالا مش مقتنع🙄 ...لالا الكلام ده مش صح😤
ويقعد يتفلسف ويجادل بدون أي دليل يبقى هنا عنده كبر 👌
طبعا إللي بيسأل للعلم ده حاجة تانية😅
لكن لو جالك الحق إوعى ترده، قول سمعنا وأطعنا حتى لو عقلك مش مستوعب ممكن تستفهم بعدين وتسعى في طلب الفهم والحكمة،
أو لو مش قادر تنفذه ادعي ربنا إنه يعينك لكن أبدا أبدا إياك أن ترد الحق الثابت بالحجة الواضحة👌

غمط الناس معناه احتقارهم، يعني الواحد يحتقر إللي أقل منه في العبادة...
يحتقر إللي أقل منه في التعليم ...
يحتقر إللي أقل منه في النسب...كل ده يدخل في الكبر،
فلما تشوف حد أكبر منك قول :سبقني بالعبادة،
ولما تشوف حد أصغر منك هتقول : سبقته في المعصية،
كل ما نفسك تحدثك بإنك أحسن من حد فكرها بالكلمتين 👆دول هتلاقي نفسك بتنكسر لله،
واعرف دايما إنك متعرفش منزلتك إيه عند ربنا،
والعبرة يوم القيامة بالقلوب فأي حد ممكن نحتقره قد يكون هو أفضل عند ربنا مننا،
وخليك فاكر:
"لا يدخل الجنة من كان في قلبه مثقال ذرة من كبر" 👌

هل استمرت الأرض على التوحيد بعد موت نوح عليه السلام ؟
ولّا الناس عبدوا الأصنام مرة تانية؟

ده اللي هنعرفه الجزء الجاي إن شاء الله.

☆ملحوظة:
أي

حد عايز يأخذ القصص وينشرها يتفضل أنا معنديش مانع نهائي😊

#Eman_Shalapy

http://quran-m.com/quran/article/2448/فُلك-نوح-في-تركيا-وحقائقها-الثمانية


https://www.youtube.com/watch?v=flQGRmi9e3Y&feature=share

#قصص_الأنبياء
#الحلقة_التاسعة
#قصة_هود

اتكلمنا المرة إللي فاتت عن الوصية إللي نوح عليه السلام وصاها لابنه قبل موته،
بعد موت نوح عليه السلام عاش أبناؤه على التوحيد وعَمَروا الأرض،
وبعد سنين وسنين الناس نسيت وصية نوح عليه السلام و بدأ الشيطان يوسوس لهم تاني بنفس الطريقة،
أحفاد نوح عليه السلام قالوا إحنا مش عايزين ننسى آبائنا فاحنا لازم نعملهم تماثيل،
عشان نفضل فاكرينهم فيذكرونا بعبادة ربنا وقدرة ربنا والمعجزة إللي حصلت لنوح عليه السلام،

وطبعا جيل بعد جيل نسيوا عبادة ربنا وتعظيم وراء تعظيم كانت النتيجة إن البشرية رجعت تعبد الأصنام تاني وتركوا عباة الله الواحد الأحد الذي لا شريك له😑

واحنا قلنا قبل كده إن الشيطان نَفسه طوييييل مبيزهقش،
عادي جدا بالنسبة له إن يحط بذرة النهاردة بخطوة واحدة، ويلاقي ثمرتها بعد جيل أو أجيال كاملة👌

¤ ممكن حد يسأل ويقول وهم ذنبهم إيه...ماهمّ مكنوش يعرفوا حاجة؟
الجواب:
كان فيه تقصير من الآباء والمجتمع كله في نقل العلم الصحيح لأبناءهم وكل إللي حواليهم وإنهم يحذروهم من الشرك الظاهر والواضح جدا ده،
هقول لكم مثال،
مش احنا بنشوف في عصرنا دلوقتي ناس بتطوف بقبور أولياء الله الصالحين إللي ماتوا، ويتوسلوا ليهم ويدعوهم من دون الله؟!
طيب بلاش دي،
هل في عاقل يروح يشتري بنطلون مقطع فِتَل كده عشان يلبسه😑
يعني الطبيعي إن الهدوم لما تتقطع بنخيطها ونلبسها،
لكن لما تتتقطع لدرجة إنها تبقى فِتل بنشتري غيرها عشان خلاص مبقتش تنفع تتلبس، صح؟
هل يُعقل إني أروح أشتري الهدوم دي😳
لأ
ولو قلت آه = يبقى انت إللي غلط ومبتفهمش في الأمور الصح طبعا 🙄
طيب فين دور الأباء والأمهات هنا في غرس الصح ده وتصحيح الخطأ لما بيلاقوه قدامهم؟ فين تربيتهم؟
ماهو الأبناء هيجيبوا فلوس منين عشان يشتروا الهدوم دي مثلا؟
ده ساعات الأب والأم همّ إللي بيساعدوا أبناءهم ويشجعوهم إنهم يلبسوا كده،
وساعات كمان تلاقي الأب والأم لابسين اللبس ده بكل أسف، مع إن لسه حواليهم ناس بتفكرهم إن ده غلط وما يصحش ولسه بين إيدينا القرآن والسنة والهدي النبوي، يعني العلم لسه موجود👌
يبقى منستغربش لما الناس نسيت وصية نوح عليه السلام، لإنهم ببساطة مشيوا خطوة ورا الشيطان، والخطوة بتجر لخطوة،
وخطوة خطوة هتبص وراك مش هتلاقي طريقك كان فين بدايته عشان ترجع، فبتكمل لقدام ..
وبسبب كده ضلوا ورجعوا تاني لعبادة الأصنام😞

طيب خلونا نفترض إن الأباء مقصروش في تربية أبناءهم
والأبناء هم إللي ضلوا وعبدوا الأصنام، لأنهم مش مستوعبين خطورة الشرك بالله وطال عليهم العهد بعد هلاك قوم نوح عليه السلام، وأكيد إللي سمع مش زي إللي شاف👌

طيب إيه الحل؟
الحل إن ربنا يبعت لهم نذير،
وهو ده إللي حصل مع عاد قوم هود👌
عاد قوم هود هم أول ناس عبدوا الأصنام على وجه الأرض بعد الطوفان،
كانوا بيسكنوا في مكان اسمه الأحقاف وهي جبال الرمل،
وهي جزء من صحراء الربع الخالي، بين سلطنة عُمان واليمن،
"واذْكُر أخَا عادٍ إذ أنذَرَ قومَه بالأحْقَاف "
وكانوا عمالقة وأقوياء ...مكنش في حد في قوتهم أبدا في الوقت ده،
بنوا مدينتهم إِرَم وكانوا بيحبوا يعيشوا في الخيام،
فبنوا خيام بعواميد عملاقة ومرتفعة جدا، وكان عندهم حضارة متقدمة، ربنا وصف حضارتهم بإنها لم يُخلق مثلها في البلاد،
ويُقال إن أسوار المدينة كانت من الذهب والفضة،
وكانوا بيبنوا فوق الجبال القصور للترفيه والتسلية بالبناء، بيلعبوا يعني😅
يعني مش عشان يسكنوا فيها، لأ بينوها كده وخلاص،
من كتر ماكانوا أقوياء وعندهم رخاء وأموال،
زي إللي بيلعب بالرمل على الشاطئ كده مثلا،
وكانت القصور دي آية في الروعة والضخامة وفن المعمار..
"أتَبْنُونَ بكل رِيعٍ آيةً تَعبثُون"

وكان الناس بيخافوا من قوم عاد لأنهم كانوا ظلمة وجبارين،
مكنش في حد بيقدر يقف في طريقهم،
فهم اجتمع عندهم الكفر والظلم، يعني ربنا قادر على إنه يهلكهم في لحظة👌
لكنه سبحانه قال:
"وما كنا مُعَذّبِينَ حتّى نَبْعثَ رَسُولا"
فعشان يقيم عليهم الحُجة أرسل إليهم هود عليه السلام عشان يحذرهم من عبادة الأصنام ويدعوهم لعبادة الله وحده
ويحذرهم من الظلم والكفر والفجور وغيره،

كان هود عليه السلام واحد منهم... يعني عارفينه وعارفين أخلاقه وعارفين أصله وكل حاجة عنه،
وكان هود عليه السلام من الأنبياء العرب الأربعة،
والأنبياء العرب الأربعة هم عالسريع كده:
هود وصالح وشعيب ومحمد صلى الله عليهم أجمعين.
فكان هود عليه السلام وقومه عاد يتكلمون العربية.

قال هود لقومه اعبدوا الله وسيبكم من عبادة الأصنام ربنا هو إللي خلقكم وأعطاكم القوة والأموال ، وأنعم عليكم بالرخاء إللي إنتم عايشين فيه ده، الأصنام حجارة لا تضر ولا تنفع😥
"وَإِلَى عَادٍ أَخَاهُمْ هُودًا قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ "

فرد عليه عِلية القوم والأكابر منهم وقالوا :
انت سفيه وكذاب 😏
"قَالَ الْمَلَأُ الَّذِينَ كَفَرُوا مِنْ قَوْمِهِ إِنَ

ّا لَنَرَاكَ فِي سَفَاهَةٍ وَإِنَّا لَنَظُنُّكَ مِنَ الْكَاذِبِينَ"

فرد عليهم هود عليه السلام وقال:
أنا رسول من عند ربنا، أمرني إني أبلغكم الكلام ده، وأنا بنصحكم إنكم تسمعوا الكلام😟
"إِنِّي لَكُمْ رَسُولٌ أَمِينٌ * فَاتَّقُوا اللَّهَ وَأَطِيعُونِ "

قالوا: انت جاي تقولنا نعبد ربنا وحده بس كده ونسيب الآلهة إللي كانوا آباءنا بيعبدوها😱
إنت أكيد اتجننت 🙄إنت مفكر إننا هنسيب عبادة الأصنام بمجرد ما تقولنا 😏طبعا مش هنؤمن بكلامك😤
واضح إن الآلهة بتاعتنا آذتك لأنك بتتكلم عنها كده😒
"مَا نَحْنُ بِتَارِكِي آلِهَتِنَا عَنْ قَوْلِكَ وَمَا نَحْنُ لَكَ بِمُؤْمِنِينَ * إِنْ نَقُولُ إِلَّا اعْتَرَاكَ بَعْضُ آلِهَتِنَا بِسُوءٍ "

فقال لهم هود عليه السلام:
استغفروا ربنا من أفعالكم وهو هيغفر لكم وينزل عليكم الأمطار ويزيدكم قوة للقوة إللي عندكم،
بلاش تُعرضوا عن عبادة ربنا ، انتم بتجادلوني في حاجة اخترعتوها أنتم وآباؤكم ما أنزل الله بها من سلطان😑
"وَيَا قَوْمِ اسْتَغْفِرُوا رَبَّكُمْ ثُمَّ تُوبُوا إِلَيْهِ يُرْسِلِ السَّمَاءَ عَلَيْكُمْ مِدْرَارًا وَيَزِدْكُمْ قُوَّةً إِلَى قُوَّتِكُمْ "

فقالوا: إنت بشر زيك زينا.. بتاكل من إللي بناكل منه.. وبتشرب من إللي بنشرب منه🙄 إنت بس عايز يكون لك ملك وسلطة علينا 😒

فقال لهم هود عليه السلام:
انتم ليه مستغربين إن ربنا يبعث لكم واحد منكم عشان ينصحكم ويَدُلكم على الصح😕
"أَوَعَجِبْتُمْ أَنْ جَاءكُمْ ذِكْرٌ مِنْ رَبِّكُمْ عَلَى رَجُلٍ مِنْكُمْ لِيُنْذِرَكُمْ"
وأنا مش عايز منكم حاجة ...لا عايز مال ولا عايز سلطة،
ولا أي أجر على دعوتي ليكم لطريق الخير والحق،
أنا عايزكم تؤمنوا بربنا بس لمصلحتكم إنتم😤
افتكروا إن ربنا استخلفكم في الأرض بعد هلاك قوم نوح وأعطاكم قوة كبيرة، ولو آمنتم بالله هيزود لكم القوة دي وينعم عليكم بنعم أكتر👌

قالوا لبعض: بصوا لو سمعتم كلام بشر زيكم هتضلوا وتخسروا، ده بيقول إننا لو متنا واتحولنا لعظام وتراب هنصحى تاني ونتحاسب😏
ده بيفتري على ربنا الكذب😒
مش فاهم إن إحنا مش هنعيش إلا مرة واحدة بس🙄
"وَلَئِنْ أَطَعْتُمْ بَشَرًا مِثْلَكُمْ إِنَّكُمْ إِذًا لَخَاسِرُونَ * أَيَعِدُكُمْ أَنَّكُمْ إِذَا مِتُّمْ وَكُنْتُمْ تُرَابًا وَعِظَامًا أَنَّكُمْ مُخْرَجُونَ "

ثم مفيش حد أكثر منا قوة أصلا عشان يُعطينا قوة زيادة 😡
وبعدين إنت عمال تقولنا اعبدوا ربنا ...اعبدوا ربنا هو إيه الدليل أصلا على كلامك😏

فهود عليه السلام تحداهم 👌
قال لهم: عندي ليكم آية ومعجزة وأتحداكم بيها،
كلكم اجتمعوا مع بعض بقوتكم دي كلها وأتحداكم لو قدرتم ببطشكم وقوتكم إنكم تقدروا تؤذوني👌
وفعلا محدش قدر يقرب منه😊
"فَكِيدُونِي جَمِيعًا ثُمَّ لَا تُنْظِرُونِ"

☆خلونا نقرب الصورة شوية،
لو واحد ماشي في طريق ولقى عربية شرطة وفيها عساكر وظباط داخلين عليه بقوة وغضب هيكون احساسه إيه؟
تعال بقى شوف هنا ..هود عليه السلام لوحده واقف قصاد أقوى جنس بشري على الأرض ساعتها ...ناس ظلمة قَتّالين قُتلة زي ما بيقولوا😅
مش بيهمهم حد ..لو اجتمعوا عليه فعلا هيقطعوه،
ومع ذلك مقدروش يعملوا حاجة👌
مين إللي منعهم؟ الله😊
فاحنا من قصة هود نتعلم الثقة في الله👌
نتعلم إن محدش يقدر يلمسنا ولا يؤذينا إلا بأمر الله...نتعلم إن لو اجتمع أهل الأرض كلهم عشان يزعلوك أو عشان يضروك بأي شيء مهما كان بسيط مش هيقدروا...والله ما هيقدروا يعملوا كده إلا لو ربنا نفسه أَذِن بكده،
وهيبقى لحكمة عظيمة زي ما قلنا قبل كده، حتى لو ما عرفتهاش دلوقتي،
النبي ﷺ بيعلمك في الحديث الصحيح وبيقول لك:
{{ يَا غُلَامُ إِنِّي أُعَلِّمُكَ كَلِمَاتٍ ..
احْفَظِ اللَّهَ يَحْفَظْكَ ..
احْفَظِ اللَّهَ تَجِدْهُ تُجَاهَكَ ..
إِذَا سَأَلْتَ فَاسْأَلِ اللَّهَ ..
وَإِذَا اسْتَعَنْتَ فَاسْتَعِنْ بِاللَّهِ ..
وَاعْلَمْ أَنَّ الأُمَّةَ لَوْ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ ((إِلَّا بِشَيْءٍ)) قَدْ كَتَبَهُ اللَّهُ لَكَ..
وَلَوْ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ ((إِلَّا بِشَيْءٍ)) قَدْ كَتَبَهُ اللَّهُ عَلَيْكَ..
رُفِعَتِ الأَقْلَامُ وَجَفَّتْ الصُّحُفُ.. }}

أول ما تلاقي حد موقفلك أمورك...قول يارب
أول ما تلاقي حد بيؤذيك ...قول يارب
أول ما تلاقي الناس مش وراهم إلا إنت وسيرتك ومهاجمتك وتتبع عوراتك ...قول يارب
هو إللي بإيده كل شيء ...قلوب العباد... مفاتيح الكون
إنما العباد آلة ...البشر مجرد أدوات مش بإيدهم غير إنهم ينفذوا فيك أمر ربنا إللي كده كده نافذ نافذ،
فمتشتكيش من الخلق...اشتكي إلى الخالق،
قول يارب إنت سلطت سلَّطت عليّ عبادك دول.. يارب ابعدهم عني🤲
خلي عندك ثقة في الله زي هود عليه السلام ...واوعى تيأس لو اتأخر الفرج 👌
ربنا له حكمة حتى لو إنت متعرفهاش،
مش يمكن بيختبرك إذا كان عندك ثقة ويقين فيه عز وجل فعلا ولا لأ🤷‍♂️

أي حد سهل جدا

إنه يقول أنا مؤمن وعندي ثقة بالله😤
إزاي الانسان يعرف إذا كان صادق فعلا في كلامه ده ولّا لأ؟
بالإبتلاء والمشاكل المواقف والمحن والعراقيل والألم والنعم والنقم و...و...
هو ربنا عالم الغيب والشهادة،
وعالم إذا كان الشخص ده صادق ولّا لأ،
لكن ربنا مش بيحاسبنا بسابق علمه فينا إحنا هنعمل إيه -رغم قدرته على ده ومش هيكون ظالم ساعتها حاشاه عز وجل،
لكنه بيحاسبنا باللي إحنا بنعمله بالفعل
فبيبتليك عشان يوريك نفسك إذا كنت فعلا صادق في ثقتك وايمانك وإلتزامك وتوكلك ويقينك وثباتك على الطريق المستقيم ولا لأ👌
فلو صبرت واستمريت على طريق الإلتزام يبقى إنت فعلا صادق💪🏻
لكن لو رجعت يبقى مكنتش صادق،
وثقتك ويقينك وإصرارك على كمال العبودية لله عز وجل مكنوش أقوياء،
وربنا بيوصف الحال ده في القرآن بيقول إيه:
"ٍومِن النّاسِ من يَعْبد الله على حرف،
فإن أصابَه خيرٌ اطْمئنّ به،
وإن أصَابَتْه فتنةٌ انقلبَ على وجْهِهِ خَسِرَ الدنْيا والآخرة"
فاستمر واوعى ترجع...هتلاقي النتيجة ترضيك وتقر عينك بإذن الله 👌

قوم هود عليه السلام قالوا له:
خلااااص ✋سواء نصحتنا ولا لأ إحنا مش هنؤمن بيك ومش هنتعذب كمان 😤
"قَالُوا سَوَاءٌ عَلَيْنَا أَوَعَظْتَ أَمْ لَمْ تَكُنْ مِنَ الْوَاعِظِينَ "

قال لهم هود :أنا عملت إللي عليّ وبلغتكم رسالة ربنا ، وعادي جدا إن ربنا يستبدلكم ويجيب ناس غيركم يعبدوه ...إنتم لن تضروا الله شيئا فهو الغني عن العالمين، ربنا لا يحتاج لعبادتكم إنتم إللي محتاجينه👌
ربنا هيبعت عليكم العذاب قريب أوي وساعتها هتندموا لأنكم مسمعتوش الكلام😞
"فَقَدْ أَبْلَغْتُكُمْ مَا أُرْسِلْتُ بِهِ إِلَيْكُمْ وَيَسْتَخْلِفُ رَبِّي قَوْمًا غَيْرَكُمْ وَلَا تَضُرُّونَهُ شَيْئًا إِنَّ رَبِّي عَلَى كُلِّ شَيْءٍ حَفِيظٌ"

وفعلا بعدها ربنا منع المطر عن قوم هود وبدأ القحط،
وكانوا بيدعوا الأصنام ...فشافوا غيمات سودة من بعيد –زي سحاب يعني- ففرحوا إن خلاص هينزل عليهم المطر ، ولكنه طلع سحاب مليان بالريح الشديدة المُهلكة،
"فَأَرْسَلْنَا عَلَيْهِمْ رِيحًا صَرْصَرًا فِي أَيَّامٍ نَحِسَاتٍ لِنُذِيقَهُمْ عَذَابَ الْخِزْيِ فِي الْحَيَاةِ الدُّنْيَا"
من شدتها كانت تحمل الشخص وترفعه عالي جدا وتنزله في الأرض تنفصل رأسه عن جسده 😞
والناس تصرخ وقلوبهم هتنخلع من مكانها...و كان هود عليه السلام مع الذين آمنوا معه وسط العذاب ده كله مفيش أي حاجة بتصيبهم، ربنا نجاهم... الريح بتقتل الناس وهم لأ ...واستمرت الريح لمدة ثمانية أيام،
"وَأَمَّا عَادٌ فَأُهْلِكُوا بِرِيحٍ صَرْصَرٍ عَاتِيَةٍ * سَخَّرَهَا عَلَيْهِمْ سَبْعَ لَيَالٍ وَثَمَانِيَةَ أَيَّامٍ حُسُومًا فَتَرَى الْقَوْمَ فِيهَا صَرْعَى كَأَنَّهُمْ أَعْجَازُ نَخْلٍ خَاوِيَةٍ"
لحد ما هلكت عاد واندثرت تحت الرمال ...ومنفعهمش قوتهم ولا نفعتهم حضارتهم ...لو كانوا فكروا وآمنوا وأطاعوا أكيد نهايتهم كانت هتكون غير،
واحنا دورنا إننا نتعظ وناخد العبرة ومنعملش زيهم...
نسمع ونطيع👌
والسعيدُ من وُعظ بغيره 😊
ربنا يجعلنا جميعا من السعداء 🤲

هل ياترى الناس اتعظت ومكررتش نفس خطأ عاد؟
ولّا استكبروا وعبدوا الأصنام تاني؟

ده إللي هنعرفه المرة الجاية ان شاء الله.

☆ملحوظة:
حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy

#قصص_الأنبياء
#الحلقة_العاشرة
#قصة_صالح

شوفنا إزاي إن عاد قوم هود عليه السلام كذبوه ورفضوا عبادة ربنا فأهلكهم الله بالريح ونجّى هود والذين آمنوا معه،
عاش هود عليه السلام والذين آمنوا معه على عبادة الله،
وتناسلوا وجه جيل ورا جيل ،
والشيطان لعب لعبته تااااني🙄
نعمل تماثيل عشان نفتكر بيها آباءنا وأجدادنا ...وفي الآخر الأحفاد يعبدوها😑
ما بيزهقش👌
إنتم ممكن تستغربوا إزاي الناس بتقع في نفس الفخ مرة ورا مرة 🤨
هو احنا شايفين كده عشان احنا برة الموضوع لكن تعال نبص لنفسنا مثلا في المواضيع إللي بالفعل كل واحد فينا متعرض لها في حياته زيهم كده😕
=كم مرة عرفت إن صلاة الفجر فرض وهي إحدى أثقل صلاتين على المنافقين ومع ذلك بنضيعها عمدا؟

=كم مرة عرفنا إن الغيبة حرام وإننا لما بنغتاب حد بنديله حسناتنا على طبق من فضة ومع ذلك برده بنغتاب؟

=كم مرة عرفنا إن الأغاني والأفلام والمسلسلات حرام ومع ذلك بنتفرج؟
كم مرة النساء عرفوا الوعيد الشديد للي بتلبس لبس مجسم عورتها كإنها مغلفة جسمها مش ساتراه!
زي ما الحديث قال بالظبط كاسيات عاريات،
وإن إللي بتخرج من بيتها متعطرة و يشم عطرها الرجال فكأنها زانية والعياذ بالله،
ومع ذلك النساء لسه بتلبس لبس غير شرعي عادي خالص وتحط عطر وهي خارجة برة بيتها والدنيا آخر حلاوة ومحدش شايف إنه بيعمل حاجة تستدعي الدهشة🙃

كم مرة النساء شافت وسمعت إن نمص الحواجب حرام ومع ذلك لسه المسلمات بتنمص حواجبها وبتبحث على الشيوخ إللي يقولولها إنه حلال عشان تموّت ضميرها وتعمل نمص براحتها😞
احنا ممكن منكنش مشتركين مع الأمم السابقة في عبادة الأصنام ...لكن إحنا أكيد مشتركين معاهم في عدم الالتزام الكامل في طاعة الله وبنتبع أهواءنا...
فمتستغربوش و سَلُوا اللهَ العافية👌

عبَد الناس إللي من نسل هود عليه السلام واسمهم ثمود الأصنام تاني مرة ثانية،
ثمود سكنوا منطقة اسمها الحِجْر ويُقال إنها في شمال شرق المدينة المنورة،
وقوم ثمود دول لأنهم أحفاد هود عليه السلام- إللي هو من قبيلة عاد أصلا- كانوا أقوياء زيهم،
وكانوا بينحتوا الجبال على هيئة بيوت، يعني الجبل الضخم الكبير ده كانوا بينحتوا فيه وبيحولوه لبيت يسكنوا فيه مش بيبنوه من الطوب والأسمنت زي حالتنا كده😅
وده طبعا شيء يدل على قوتهم وضخامة أجسامهم👌
فربنا لأنه لا يُعذب أحد إلا لما يرسل له رسول ...أرسل لهم واحد منهم اسمه صالح،
وزي ما قلنا قبل كده إن ربنا بيرسل لهم واحد منهم عارفين أصله ونسبه وعارفين صدقه عشان ميكنش ليهم حجة ويقولوا:
مين ده! إحنا ما نعرفوش! نضمن منين هو كويس والا وِحش🙄
صالح عليه السلام بدأ يدعو قومه لعبادة الله وإنهم يسيبوا عبادة الأصنام،
"وَإِلَى ثَمُودَ أَخَاهُمْ صَالِحًا قَالَ يَاقَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ"
وبدأ يذكرهم بنعم ربنا عليهم وإزاي إن ربنا أسكنهم الأرض بعد قوم عاد وإزاي إن ربنا أعطاهم القوة إنهم يبنوا بيوتهم من الجبال👌
"وَاذْكُرُوا إِذْ جَعَلَكُمْ خُلَفَاءَ مِنْ بَعْدِ عَادٍ وَبَوَّأَكُمْ فِي الْأَرْضِ تَتَّخِذُونَ مِنْ سُهُولِهَا قُصُورًا وَتَنْحِتُونَ الْجِبَالَ بُيُوتًا فَاذْكُرُوا آلَاءَ اللَّهِ وَلَا تَعْثَوْا فِي الْأَرْضِ مُفْسِدِينَ"

ده بقى شكر النعمة يا ناس؟! بقى ربنا يعطيكم الثمار والزروع والأموال،
وفي الآخر تعبدوا وتعظموا وتشكروا غيره ومتسمعوش كلامه وتعرضوا عنه😥
وبشرهم إنهم إنهم لو يستغفروا ربنا ويتوبوا من كل ده، ربنا هيقبل توبتهم ويحبهم رغم ما قد سَلف👌

طيب يا ترى ردوا بقى قالوا إيه🙄

قالوا له إنت إيه إللي جرالك 😳..إنت كنت كويس😳
إنت أكيد مسحور ، إحنا كنا حاطين أملنا عليك🤦‍♂️
إحنا كنا متوقعين إنك هيكون ليك شأن كبير في القبيلة بسبب حكمتك وأخلاقك وحلمك ورجاحة عقلك ورشدك😞
إنت إزاي بتنهانا إننا نعبد الآلهة إللي طول عمرنا بنعبدها احنا وآبائنا 😰...كلامك ده مش صح 😤
"قَالُوا يَاصَالِحُ قَدْ كُنْتَ فِينَا مَرْجُوًّا قَبْلَ هَذَا أَتَنْهَانَا أَنْ نَعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ مُرِيبٍ "

فقالهم بكل لطف ولين وكلام كله عقل:
طيب لو أنا طلع كلامي صح...عذركم إيه عند ربنا ساعتها؟
مين إللي هينجيكم منه ؟ ...وكمان مش عايزيني أدعوكم لعبادته 😳
طيب إزاي وربنا هو إللي أمرني بكده 😟
ولو أنا سمعت كلامكم مين هينجيني من غضب ربنا😞
"قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي مِنْهُ رَحْمَةً فَمَنْ يَنْصُرُنِي مِنَ اللَّهِ إِنْ عَصَيْتُهُ فَمَا تَزِيدُونَنِي غَيْرَ تَخْسِيرٍ"
قالوا له انت بشر زينا 🙄 إزاي عايزنا نؤمن ونتبع بشر 😏
ثم إشمعنى أنت يعني إللي جالك وحي دونا عن باقي القبيلة 😒 ده إنت كذاب كذب😑
"فَقَالُوا أَبَشَرًا مِنَّا وَاحِدًا نَتَّبِعُهُ إِنَّا إِذًا لَفِي ضَلَالٍ وَسُعُرٍ ۩
أَؤُلْقِيَ الذِّكْرُ عَلَيْهِ مِنْ بَيْنِنَا بَلْ هُوَ كَذَّ

ابٌ أَشِرٌ"

☆أنا نفسي حد منهم يجيب كلام مقنع🤦‍♂️
ردودهم ملهاش أي علاقة بالعقل والمنطق والحُجة الدامغة😑
واحد بيقولك اعبد ربنا واسمع كلامه تروح انت تقوله أصل إنت بشر😐
طيب ما تحكّم عقلك في كلامه نفسه بغض النظر عن هل هو بشر ولاّ حوت أزرق ولاّ ملك نازل من السماء😒
مش يمكن كلامه صح ومنطقي ومتطابق مع الفطرة👌

المهم، آمن مع صالح بعض المستضعفين عشان يهزوا إيمانهم فكان أكابر القوم والأغنياء بيقولوا لهم إنتم متأكدين إن صالح ده مرسل من ربه🤨
"قَالَ الْمَلَأُ الَّذِينَ اسْتَكْبَرُوا مِنْ قَوْمِهِ لِلَّذِينَ اسْتُضْعِفُوا لِمَنْ آمَنَ مِنْهُمْ أَتَعْلَمُونَ أَنَّ صَالِحًا مُرْسَلٌ مِنْ رَبِّهِ"

فبدل ما الذين آمنوا يقولوا أيوة احنا عارفين ده ومتأكدين منه،
قالوا لهم: إحنا مش بس متأكدين إحنا مؤمنين كل الإيمان باللي صالح بيقوله😤
"قَالُوا إِنَّا بِمَا أُرْسِلَ بِهِ مُؤْمِنُونَ"
وكان الرد المتوقع للأسف من الكافرين المستكبرين دول:
" إِنَّا بِالَّذِي آمَنْتُمْ بِهِ كَافِرُونَ"

¤طيب اشمعنى الفقراء والمستضعفين بيؤمنوا وهم دول أتباع الأنبياء دايما، والملأ من الأكابر والأغنياء هم إللي بيرفضوا دعوة الأنبياء غالبا🤔
لأن المستضعفين بالإضافة إلى إنهم بيكونوا بيعانوا القهر والبطش والظلم والاستعباد من الفئة المستكبِرة،
فلما بيلاقوا حد بيقول لهم إنتم عبيد لله وحده فقط وأقوياء بعبوديتكم لله وحده، بيحسوا بالأمان والراحة والتحرر الحقيقي والنجاة الحقيقية،
فبيسارعوا في الخروج من الذل عند العباد اللي زيهم إلى الذل عند رب العباد اللي خلقهم كلهم👌
فبالإضافة للسبب ده في سبب كمان مهم،
وهو إن المستضعفين دول بيكونوا متعودين إن حد يأمرهم ويقودهم فبالنسبة لهم لما يكون في إله هو إللي يأمرهم أحسن طبعا من بشر يتكبر عليهم،
لكن الأغنياء متعودين إن هم إللي يعطوا الأوامر ومفيش حد أعلى منهم يُعطيهم أي أمر ، فالموضوع بيكون تقيل على نفسهم أوي،
إزاي يعني حد يتحكم فيّ ويقولي اعمل ومتعملش🙄
وهو ده الكبر 😑
يتكبر عن سماع النصيحة ويحتقر الناس زي ما قلنا في حديث رسول الله ﷺ قبل كده:
"الكبر هو بَطَرُ أو سَفَه الحق وغَمْط الناس"
فطول ما الإنسان حاسس إنه مستغني عن ربنا بصحته ..بماله.. بعيلته.. بعقله... بدماغه هتلاقيه بعيد عن ربنا ،
عشان كده ربنا أحيانا بيبتلي الإنسان سواء بفقد مال أو فقد عزيز أو ....أو.... عشان ينكسر ويرجع لربنا👌
"وَلَقَدْ أَرْسَلْنَا إِلَىٰ أُمَمٍ مِّن قَبْلِكَ فَأَخَذْنَاهُم بِالْبَأْسَاءِ وَالضَّرَّاءِ لَعَلَّهُمْ يَتَضَرَّعُونَ"

فلما ينزل بيك بلاء على طول على طول ارجع لربنا وادعيه واستغفر واعرف كويس إن البلاء ده ربنا بعتهولك عشان تحاسب نفسك و ترجعله، وعشان يمسح من ذنوبك أو يرفع درجتك في الجنة👌
سيبك من البشر محدش مُطّلع على حجم ونوع ألمك ولا هيحس بألمك غير ربنا ..مهما حكيت للبشر وفضفضت و استشرت... هترتاح شوية؟
ممكن.. لكن هتحل مشكلتك؟ مش أكيد🤷‍♂️
العادي إن محدش هيقدر يعملك حاجة غير الطبطبة..فاختصر الطريق واحكي لربنا وادعيه واطلب كل العون والانقاذ اللي انت محتاجه بدون حدود،
انت هنا في المكان الصح لإنك فعلا مالكش غيره منجي من المهالك ومفرج للكربات😊

المهم،
صالح عليه السلام استمر في دعوة قومه ثمود،
ففي مرة راح لهم في مكان بيجتمعوا فيه زي نادي كده،
وقعد يدعوهم ، فقالوا له إيه بقى؟!!!

قالوا يا صالح لو انت عايزنا نؤمن بيك هاتلنا دليل إن إنت فعلا رسول😈
شايف الصخرة العظيمة إللي هناك دي 👈 لو انت طلّعت لنا منها ناقة هنؤمن بيك😈
بس استنى مش أي ناقة كده وخلاص😏
لأ، احنا عايزنها تكون كبيرة وعظيمة لدرجة إنها تشرب يوم كامل لوحدها وإحنا يوم،
وعايزينها تكون حامل وفي الشهر العاشر، وعايزين...وعايزين...
وقعدوا يشددوا في الوصف والشروط عشان يعجزوه يعني فيبان ان سبب عدم إيمانهم هو عجزه هو مش تَعنّتهم همّ😏
فصالح عليه السلام قالهم لو أنا عملتلكم إللي انتم قلتوا عليه ده هتؤمنوا 😐
قالوا نعم 😤وأعطوه العهود والمواثيق👌
=لأنهم عارفين فعلا أد إيه همّ حطوا شروط تعجيزية.. فعادي يعني نقوله كلمتين وخلاص ونوافق ماهو كده كده مش هيعرف يعمل حاجة من طلباتنا=

فصالح عليه السلام صلى ودعا ربنا إنه يحقق لهم إللي طلبوه،
وفعلا الصخرة انشقت عن ناقة عظيمة بنفس الوصف إللي طلبوه بالضبط👌
أهه إللي طلبتوه جالكم بالضبط فماذا أنتم فاعلون😬
لم يؤمنوا😑
"وَآتَيْنَا ثَمُودَ النَّاقَةَ مُبْصِرَةً فَظَلَمُوا بِهَا "

صالح عليه السلام قالهم دي ناقة، ربنا هو إللي خلقها بدون أب أو أم محدش يقرب منها ولا يؤذيها سيبوها ترعى في أرض الله،
لو أذيتوها ربنا هيرسل عليكم عذاب شديد👌
وكانت الناقة تشرب الماء يوم كامل وهم بيشربوا الماء اليوم التاني وهكذا،
وكان أي حاجة وحشة تحصل لقوم صالح يقعدوا يقولوا لصالح والذين آمنوا معه انتم السبب في إللي بيحصلنا،
خربتوا البلد ...لولا انتم كان زمانا في وضع أحسن😡
"قَالُ

وا اطَّيَّرْنَا بِكَ وَبِمَنْ مَعَكَ "
صالح قال لهم وهو مستنكر كلامهم وطريقة تفكيرهم دي، يعني مش بسبب كفركم وعنادكم ومعاصيكم بيحصل لكم الإبتلاءات والمشاكل😒
"قَالَ طَائِرُكُمْ عِنْدَ اللَّهِ بَلْ أَنْتُمْ قَوْمٌ تُفْتَنُونَ"
لكن لا حياة لمن تنادي😞

استمر الوضع كده فترة ، وبعدين المَلأ اجتمعوا مع بعض قالوا الناقة بتشرب المية بتاعتنا الوضع كده مش نافع، لازم نشوف حل😤
خلونا نقتلها ونخلص منها ونرجع ناخد المية بتاعتنا😈

رئيسهم هو إللي تولى مهمة التخطيط والتنفيذ لقتل الناقة ويُقال إن اسمه "قُدَار بن سَالِف"،

إزاي بقى تولى المهمة دي؟!

كان في إمرأتين كافرتين في القرية،
واحدة منهم كانت زوجة لواحد من إللي أسلموا وهي كانت كافرة فسابها،
فقالت لواحد من أبناء عمها إنها هتتزوجه لو قتل الناقة، وكانت غنية وذات حسب وممن يُطمَعُ في الزواج بها،
والتانية كانت عجوز وكانت زوجة لأحد الرؤساء وكان عندها أربع بنات فعرضت على قُدار بن سالف ده إنه لو قتل الناقة هتزوجه أي واحدة يختارها من بناتها.
《والكلام ده إللي قالهعلماء التفسير وموجود في تفسير ابن كثير👆》

وافق قُدار واجتمع مع ابن عم المرأة الأولى وكمان جابوا سبعة تانيين بقى المجموع تسع أشخاص ربنا قال عنهم في القرآن:
"وَكَانَ فِي الْمَدِينَةِ تِسْعَةُ رَهْطٍ يُفْسِدُونَ فِي الْأَرْضِ وَلَا يُصْلِحُونَ"
وقالوا للناس احنا مش هنقتل الناقة غير لما توافقوا،
وقعدوا يقنعوهم وفعلا الناس وافقت إن التسع أشخاص دول يقتلوا ناقة صالح،
الناقة كانت بتنزل من الجبل عشان تشرب المية، فاستنوها وهي نازلة في يوم،
وهجم عليها قُدار فعقرها يعني ضربها على رجلها فكسرها، فوقعت الناقة على الأرض وصاحت بصوت عالي جدا، وبكده قتلها قُدار وإللي معاه🙊
صور لنا القرآن المشهد ده فقال:
"إِذِ انْبَعَثَ أَشْقَاهَا ۩ فَقَالَ لَهُمْ رَسُولُ اللَّهِ نَاقَةَ اللَّهِ وَسُقْيَاهَا ۩ فَكَذَّبُوهُ فَعَقَرُوهَا "
ومش كده وبس ده قالوا احنا نقتل صالح كمان ونخلص من القصة دي كلها مرة واحدة،
ولو حد سألنا هنقوله إحنا منعرفش حاجة😈
"قَالُوا تَقَاسَمُوا بِاللَّهِ لَنُبَيِّتَنَّهُ وَأَهْلَهُ ثُمَّ لَنَقُولَنَّ لِوَلِيِّهِ مَا شَهِدْنَا مَهْلِكَ أَهْلِهِ وَإِنَّا لَصَادِقُونَ "
فربنا أوحى لصالح عليه السلام إنه يخرج من القرية لأن ربنا هيرسل عليهم العذاب،
وبالفعل...أرسل ربنا عز وجل حجارة من السماء قتلت التسع أشخاص دول قبل ما ييجي العذاب على قوم صالح عليه السلام،
قال لهم صالح عليه السلام انتم قتلتم الناقة😳
ربنا هينزل عليكم العذاب بعد ثلاثة أيام 😡
"فَقَالَ تَمَتَّعُوا فِي دَارِكُمْ ثَلَاثَةَ أَيَّامٍ ذَلِكَ وَعْدٌ غَيْرُ مَكْذُوبٍ"

صحيوا أول يوم من أيام الإنذار لقوا كلهم وشهم أصفر،
وصحيوا تاني يوم لقوا وشهم لونه أحمر،
واليوم الثالث لقوا وشهم لونه اسود، والعياذ بالله😥
فلما عدى اليوم الثالث وصحيوا الصبح اتحنطوا وفضلوا
قاعدين مستنيين العذاب إللي هيجيلهم😞
"فَلَمَّا جَاءَ أَمْرُنَا نَجَّيْنَا صَالِحًا وَالَّذِينَ آمَنُوا مَعَهُ بِرَحْمَةٍ مِنَّا وَمِنْ خِزْيِ يَوْمِئِذٍ "
☆طب كنتم استغفروا وتوبوا بعد أول أو تاني يوم حتى🤦‍♂️
لكن خلاص للاسف.. ذلك وعد غير مكذوب☝️
لما الشمس طلعت سمعوا صيحة عالية جدا جاتلهم من السماء، والأرض اهتزت من تحتهم بشدة وانخلعت قلوبهم من الرعب وماتوا على حالهم ده😞

رجع صالح عليه السلام عشان يشوف حصلهم إيه،
وبعد ما شافهم إداهم ظهره وقالهم وهو ماشي ،
شوفتم ...أنا بلغتكم رسالة ربنا وإنتم مسمعتوش كلامي،
طبعا حسرة لقلوب الكافرين ما بعدها حسرة👌
"فَتَوَلَّى عَنْهُمْ وَقَالَ يَاقَوْمِ لَقَدْ أَبْلَغْتُكُمْ رِسَالَةَ رَبِّي وَنَصَحْتُ لَكُمْ وَلَكِنْ لَا تُحِبُّونَ النَّاصِحِينَ"

☆شوف كده لما بتكون عايز تعمل حاجة والناس تنصحك وتحذرك..بلاش كذا يا ابني... ماتعملش كذا يا حبيبي.. وبعدين تصمم رغم كل التحذيرات وتندم في الآخر بعد ما تشوف أثر قرارك،
وإللي نصحوك يقولولك ماحنا قلنالك إن ده موطن لسخط الله و عقابه، بس انت ماسمعتش النصيحة😑
بتبقى ساعتها عندك حسرتين حسرة الموقف إللي انت فيه وحسرة إنك مسمعتش كلام الناصحين،
بس في الدنيا بيكون لسه عندك فرصة ،
لكن قوم صالح خلاص انتهى الموضوع بالنسبة لهم...دول خالدين مخلدين في نار جهنم..حسرة مابعدها حسرة👌

♡قصة ثمود بتعلمنا إننا منسكتش على المنكر ومنوافقش عليه مهما كان عدد الداعين له،
لأننا لو سكتنا أو وافقنا فاحنا كده مشاركين في الإثم للشخص إللي بيعمل المنكر ، وربنا بيعاقب إللي عمل وإللي سكت أو رِضي 👌
لو مقدرتش تغير المنكر بإيدك ولا بلسانك، على الأقل غيره بقلبك ودي حاجة يقدر عليها كل البشر ...اكره المنكر...سيب المكان إللي فيه المنكر وقوم، خلي قلبك يغلي بإنكارك للمنكر،
ووجهك يتمعّر لحرمات الله،
لأنك لو معملتش كده ...هتتعود على المنكر ...ولو اتعودت عليه...هتعمله ببساطة في يوم من الأيام👌

يُقال إن صالح علي

ه السلام انتقل لحرم الله في مكة وظل هناك حتى مات.

المرة الجاية هيكون كلامنا عن خليل الله إبراهيم عليه السلام 😊

#Eman_Shalapy

وَإِلَى ثَمُودَ أَخَاهُمْ صَالِحًا قَالَ يَاقَوْمِ اعْبُدُوا اللَّهَ مَا لَكُمْ مِنْ" إِلَهٍ غَيْرُهُ"

هُوَ أَنْشَأَكُمْ مِنَ الْأَرْضِ وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا" إِلَيْهِ إِنَّ رَبِّي قَرِيبٌ مُجِيبٌ"

وَاذْكُرُوا إِذْ جَعَلَكُمْ خُلَفَاءَ مِنْ بَعْدِ عَادٍ وَبَوَّأَكُمْ فِي الْأَرْضِ" تَتَّخِذُونَ مِنْ سُهُولِهَا قُصُورًا وَتَنْحِتُونَ الْجِبَالَ بُيُوتًا فَاذْكُرُوا آلَاءَ اللَّهِ وَلَا تَعْثَوْا فِي الْأَرْضِ مُفْسِدِينَ"

" قَالُوا يَاصَالِحُ قَدْ كُنْتَ فِينَا مَرْجُوًّا قَبْلَ هَذَا"

" إِنَّمَا أَنْتَ مِنَ الْمُسَحَّرِينَ"

أَتَنْهَانَا أَنْ نَعْبُدَ مَا يَعْبُدُ آبَاؤُنَا وَإِنَّنَا لَفِي شَكٍّ مِمَّا تَدْعُونَا إِلَيْهِ" مُرِيبٍ"

قَالَ يَاقَوْمِ أَرَأَيْتُمْ إِنْ كُنْتُ عَلَى بَيِّنَةٍ مِنْ رَبِّي وَآتَانِي مِنْهُ" رَحْمَةً فَمَنْ يَنْصُرُنِي مِنَ اللَّهِ إِنْ عَصَيْتُهُ فَمَا تَزِيدُونَنِي غَيْرَ تَخْسِيرٍ"

" فَقَالُوا أَبَشَرًا مِنَّا وَاحِدًا نَتَّبِعُهُ إِنَّا إِذًا لَفِي ضَلَالٍ وَسُعُر* أَؤُلْقِيَ الذِّكْرُ عَلَيْهِ مِنْ بَيْنِنَا بَلْ هُوَ كَذَّابٌ أَشِرٌ "

"قَالَ الْمَلَأُ الَّذِينَ اسْتَكْبَرُوا مِنْ قَوْمِهِ لِلَّذِينَ اسْتُضْعِفُوا لِمَنْ آمَنَ مِنْهُمْ
أَتَعْلَمُونَ أَنَّ صَالِحًا مُرْسَلٌ مِنْ رَبِّهِ قَالُوا إِنَّا بِمَا أُرْسِلَ بِهِ مُؤْمِنُونَ * قَالَ الَّذِينَ اسْتَكْبَرُوا إِنَّا بِالَّذِي آمَنْتُمْ بِهِ كَافِرُونَ "

"مَا أَنْتَ إِلَّا بَشَرٌ مِثْلُنَا فَأْتِ بِآيَةٍ إِنْ كُنْتَ مِنَ الصَّادِقِينَ"

"قَالَ هَذِهِ نَاقَةٌ لَهَا شِرْبٌ وَلَكُمْ شِرْبُ يَوْمٍ مَعْلُومٍ * وَلَا تَمَسُّوهَا بِسُوءٍ فَيَأْخُذَكُمْ عَذَابُ يَوْمٍ عَظِيمٍ"

" وَآتَيْنَا ثَمُودَ النَّاقَةَ مُبْصِرَةً فَظَلَمُوا بِهَا"

" يَا قَوْمِ هَذِهِ نَاقَةُ اللَّهِ لَكُمْ آيَةً فَذَرُوهَا تَأْكُلْ فِي أَرْضِ اللَّهِ وَلَا تَمَسُّوهَا بِسُوءٍ فَيَأْخُذَكُمْ عَذَابٌ قَرِيبٌ "

" قَالُوا اطَّيَّرْنَا بِكَ وَبِمَنْ مَعَكَ قَالَ طَائِرُكُمْ عِنْدَ اللَّهِ بَلْ أَنْتُمْ قَوْمٌ تُفْتَنُونَ"

" وَكَانَ فِي الْمَدِينَةِ تِسْعَةُ رَهْطٍ يُفْسِدُونَ فِي الْأَرْضِ وَلَا يُصْلِحُونَ"

إِذِ انْبَعَثَ أَشْقَاهَا * فَقَالَ لَهُمْ رَسُولُ اللَّهِ نَاقَةَ اللَّهِ وَسُقْيَاهَا" فَكَذَّبُوهُ فَعَقَرُوهَا"

" فَعَقَرُوا النَّاقَةَ وَعَتَوْا عَنْ أَمْرِ رَبِّهِمْ"

" قَالُوا تَقَاسَمُوا بِاللَّهِ لَنُبَيِّتَنَّهُ وَأَهْلَهُ ثُمَّ لَنَقُولَنَّ لِوَلِيِّهِ مَا شَهِدْنَا مَهْلِكَ أَهْلِهِ وَإِنَّا لَصَادِقُونَ* وَمَكَرُوا مَكْرًا وَمَكَرْنَا مَكْرًا وَهُمْ لَا يَشْعُرُونَ"

"قَالُوا يَاصَالِحُ ائْتِنَا بِمَا تَعِدُنَا إِنْ كُنْتَ مِنَ الْمُرْسَلِينَ"

" فَقَالَ تَمَتَّعُوا فِي دَارِكُمْ ثَلَاثَةَ أَيَّامٍ ذَلِكَ وَعْدٌ غَيْرُ مَكْذُوبٍ"

" فَأَخَذَتْهُمُ الرَّجْفَةُ فَأَصْبَحُوا فِي دَارِهِمْ جَاثِمِينَ"

" وَأَخَذَ الَّذِينَ ظَلَمُوا الصَّيْحَةُ"

" فَتِلْكَ بُيُوتُهُمْ خَاوِيَةً بِمَا ظَلَمُوا"

"فَمَا أَغْنَى عَنْهُمْ مَا كَانُوا يَكْسِبُونَ"

" وَنَجَّيْنَا الَّذِينَ آمَنُوا وَكَانُوا يَتَّقُونَ"

فَتَوَلَّى عَنْهُمْ وَقَالَ يَاقَوْمِ لَقَدْ أَبْلَغْتُكُمْ رِسَالَةَ رَبِّي وَنَصَحْتُ" لَكُمْ وَلَكِنْ لَا تُحِبُّونَ النَّاصِحِينَ"

" فَتِلْكَ بُيُوتُهُمْ خَاوِيَةً بِمَا ظَلَمُوا إِنَّ فِي ذَلِكَ لَآيَةً لِقَوْمٍ يَعْلَمُونَ"

#قصص_الأنبياء
#الحلقة_الحادية_عشر
#إبراهيم_عليه_السلام_الجزء_الأول
#إبراهيم_والأصنام

إبراهيم عليه السلام ولد في بابل في العراق، وهو من نسل سام بن نوح عليه السلام،
وكانت الأرض كلها على الكفر ...الناس نسيت ربنا والعلم اندثر ومع وسوسة الشيطان كل الناس كانوا كفار،
وكان الناس في قرية إبراهيم عليه السلام برده مشركين، إللي فيهم بيعبد الأصنام 👥وإللي فيهم بيعبد النجوم والكواكب🌕 وإللي فيهم بيعبد الملوك🤴
وفوق كل ده أبو إبراهيم عليه السلام نفسه كان بيصنع الأصنام ويبيعها للناس،
يعني إبراهيم كان متربي في بيئة كلها كفر ومفيش أي شعاع من نور،
وكان أبوه واسمه آزر بيديله الأصنام عشان يروح يبيعها في السوق للناس،
فكان إبراهيم عليه السلام يقعد ينادي في السوق :
اشتروا من لا يسمع ولا يرى....اشتروا من لا يضر ولا ينفع...
وكان سنه صغير ...ومع ذلك كان بيفكر بعقله👌
وكان ذكي وعنده حكمة، فاتربى على كُره الأصنام وكان بيتعجب من قومه إزاي الناس دي بتعبد ما لا يسمع لا يرى، ولا ينفع ولا يضر؟!!
إزاي يكون حاجات إحنا إللي بنصنعها تكون هي إللي نعبدها؟!!
مقلش أنا كل أهلي بيعملوا كده...والناس كلهم كده، يعني هو أنا إللي هبقى صح والناس دي كلها غلط😑
بقى معقولة الناس الكبار دول هم إللي غلط وأنا إللي لسه سني صغير مش عارف حاجة هكون صح🤨
إبراهيم عليه السلام مستسلمش للواقع بتاعه وقلد الناس تقليد أعمى،
ولا قال أنا لازم اكون زيهم وأمشي وراهم👌
ربنا وهبه الهداية من صغره عن طريق إنه خلاه يفكر بعقله ويكون من الراشدين ،
"وَلَقَدْ آتَيْنَا إِبْرَاهِيمَ رُشْدَهُ مِنْ قَبْلُ وَكُنَّا بِهِ عَالِمِينَ"

فكان بيتفكّر في خلق السماوات والأرض وفي خلق البشر لحد ما اهتدى بتفكيره إن الكون ده له خالق،
فكان عايز يعلّم قومه ويهديهم لعبادة الله الخالق وإنهم يسيبوا عبادة الأصنام ،
ودي فطرة الإنسان إنه مجرد ما يعرف ربنا ويعرف دينه بيكون عايز ينشر الدين ده ويبدأ يبلغ الناس إللي حواليه،
فلما إبراهيم عليه السلام كِبِر وجاءه الوحي،
بدأ بدعوة أبيه لأن طبيعي إن أول شخص الإنسان يحب لهم الخير هم أبويه،
لكن الموضوع صعب...لأن دايما الأبوين بيشوفوا عيالهم مهما كبروا واتعلموا إنهم صغيرين،
وطبعا غالبا بيكون عندهم نظرة لعيالهم إن إيه يابني، على آخر الزمن هييجي واحد زيك لسه مطلعش من البيضة هيعلمني الصح من الغلط والحق من الباطل🙄
ده الكلام ده في الأمور العادية...فما بالكم لما إبراهيم عليه السلام يقول لأبوه مثلا:
والله يابابا الدين إللي إنت بتتبعه ده والأصنام إللي انت بتعبدها دي إنت وقومك وأجدادك من قبلك كل ده غلط والصح كذا وكذا ☺️

متخيلين رد الفعل هيكون إيه😅
☆خلينا نحط نفسنا كأبناء مكان إبراهيم عليه السلام كده والواحد مننا يروح يقول لأمه أو أبوه: أنا عرفت إن المسلسلات والأغاني والاختلاط حرام وهنقول الدليل من القرآن والسنة وأهل العلم قالوا كذا وكذا ،
متخيلين ممكن يعملوا فينا إيه😶
وهم مسلمين موحدين ...فما بالكم لو قلنا لهم إن الدين بتاعكم ده كله على بعضه غلط🙂
فإبراهيم عليه السلام في موقف صعب جدا،
ومع ذلك مقلش مليش دعوة وكل واحد هيتحاسب عن نفسه، وأنا مالي وأنا مش عاوزهم يكرهوني👌
بالعكس... المحب الحقيقي بيبذل كل إللي يقدر عليه عشان خاطر إللي بيحبه حتى لو كان ده هيكون فيه ضرر عليه أو هيسبب غضبه منه 😊
وده بالضبط إللي حصل مع إبراهيم عليه السلام،
راح لأبوه وكلمه بكل لطف وحب واختار الكلمات بعناية واختار الأسلوب المناسب الحكيم عشان يقدر يقنع أباه،
قال له:
=يا أبتِ =عشان يحسسه إنه قريب منه ويستعطفه،
إنت ليه بتعبد ما لا يسمع ولا يرى ومش بيفيدك بأي شيء،
هو الإنسان بيعبد إله ليه؟
"إِذْ قَالَ لِأَبِيهِ يَاأَبَتِ لِمَ تَعْبُدُ مَا لَا يَسْمَعُ وَلَا يُبْصِرُ وَلَا يُغْنِي عَنْكَ شَيْئًا"
مش عشان يستجيب دعاؤه ويدفع عنه أي ضرر ويهديه ويحميه ويرزقه ويدبر له أموره،
طيب الأصنام مبتعملش أي حاجة من دي...فإنت ليه بتعبدها😔
◇وطبعا مش معنى إن الإله مفروض يمنع عنا الضر إن المقصود إننا نبقى مُنعمين في الحياة الدنيا بدون أي ابتلاءات، لأ المقصود :
"قُلْ مَن يُنَجِّيكُم مِّن ظُلُمَاتِ الْبَرِّ وَالْبَحْرِ تَدْعُونَهُ تَضَرُّعًا وَخُفْيَةً "
"أَمَّن يَهْدِيكُمْ فِي ظُلُمَاتِ الْبَرِّ وَالْبَحْرِ وَمَن يُرْسِلُ الرِّيَاحَ بُشْرًا بَيْنَ يَدَيْ رَحْمَتِهِ"
يعني اللي يملك الضر والنفع هو الإله ده، يعافيكم أحيانا ويبتليكم أحيانا لحكمة هو يعلمها، لكن الأصنام بتعمل إيه من كل ده🤷‍♂️
ولا شيء إطلاقا.. ده غير عجزها عن إنها تدفع الضر عن نفسها أساسا🙄

☆إبراهيم عليه السلام بيكلم أبوه آزر بكل عقل👌
يا أبتِ على الرغم من إنك أبويا والمفروض إنك أعلم مني،
بس أنا جالي علم مش عندك ...فاسمع كلامي هوصلك للحق،
"يَاأَبَتِ إِنِّي قَدْ جَاءنِي مِنَ الْعِلْمِ مَا لَمْ يَأْتِكَ فَاتَّبِعْنِي أَهْدِكَ صِرَاطًا سَوِيًّا"
يا أبتِ بلاش تسمع كلام الشيط

ان...ده الشيطان عاصي للرحمن،
"يَاأَبَتِ لَا تَعْبُدِ الشَّيْطَانَ إِنَّ الشَّيْطَانَ كَانَ لِلرَّحْمَنِ عَصِيًّا"
يا أبتِ أنا خايف عليك من عذاب الرحمن😔
"يَاأَبَتِ إِنِّي أَخَافُ أَنْ يَمَسَّكَ عَذَابٌ مِنَ الرَّحْمَنِ فَتَكُونَ لِلشَّيْطَانِ وَلِيًّا"
كان إبراهيم عليه السلام بيكلم أبوه بكل حب و تواضع وإحترام عقل وحكمة وأدب،
ومع ذلك كان رد أبوه شديد وقاسي عليه،
قاله : انت مش عاجبك الآلهة إللي بعبدها يا إبراهيم،
لو مبطلتش الكلام إللي بتقوله ده أنا هرميك بالحجارة ، وأنا مش عايز أشوفك تاني أبدا😡
"قَالَ أَرَاغِبٌ أَنْتَ عَنْ آلِهَتِي يَاإِبْرَاهِيمُ لَئِنْ لَمْ تَنْتَهِ لَأَرْجُمَنَّكَ وَاهْجُرْنِي مَلِيًّا"
خدوا بالكم إن الآباء والأمهات ربنا فطرهم على حب أبناؤهم وخصوصا لو الأبناء دول بارين بيهم،
فتخيلوا بقى كمية الغضب والكبر إللي منعت آزر من إنه يتبع إبراهيم عليه السلام😞

وبالرغم من قساوة أبوه معاه رد عليه إبراهيم عليه السلام بكل حب ولين وشفقة ،
قال له: سلام عليك... أنا هستغفر لك ربنا...ده ربنا بيحبني أوي وكريم معايا جدا،
"قَالَ سَلَامٌ عَلَيْكَ سَأَسْتَغْفِرُ لَكَ رَبِّي إِنَّهُ كَانَ بِي حَفِيًّا"
وفعلا استمر إبراهيم يستغفر لأبوه فترة كده،
لكن لما تبين له بوحي من الله إن أباه هيفضل كافر وإنه عدو لله تبرأ منه،
لأن لا يجوز للمؤمن أن يدعو بالرحمة ولا يستغفر لكافر بالله حتى لو كان أبوه أو أخوه أو ابنه 👌
"وَمَا كَانَ اسْتِغْفَارُ إِبْرَاهِيمَ لِأَبِيهِ إِلَّا عَنْ مَوْعِدَةٍ وَعَدَهَا إِيَّاهُ فَلَمَّا تَبَيَّنَ لَهُ أَنَّهُ عَدُوٌّ لِلَّهِ تَبَرَّأَ مِنْهُ"

☆في هنا ملحوظة مهمة يا جماعة،
القرآن قال إن أبو إبراهيم عليه السلام اسمه آزر وقال إنه كان كافر بيعبد الأصنام،
ربنا قال:
"وَإِذْ قَالَ إِبْرَاهِيمُ لِأَبِيهِ 《آزَرَ》 أَتَتَّخِذُ أَصْنَامًا آلِهَةً ۖ إِنِّي أَرَاكَ وَقَوْمَكَ فِي ضَلَالٍ مُّبِينٍ"
واحنا شوفنا كمية الآيات إللي إبراهيم عليه السلام كان بيكلم فيها أبوه وبيقول له فيها يا أبتِ،
فكل الآيات في القرآن ظاهرها إن آزر هو أبو إبراهيم مش عمه، حتى رسول الله ﷺ قال:
يَلْقَى إِبْرَاهِيمُ《 أَبَاهُ آزَرَ》 يَوْمَ الْقِيَامَةِ ، وَعَلَى وَجْهِ آزَرَ قَتَرَةٌ وَغَبَرَةٌ ،
فَيَقُولُ لَهُ إِبْرَاهِيمُ : أَلَمْ أَقُلْ لَكَ لاَ تَعْصِنِي ؟
فَيَقُولُ أَبُوهُ: فَالْيَوْمَ لاَ أَعْصِيكَ.
فَيَقُولُ إِبْرَاهِيمُ : يَا رَبِّ ، إِنَّكَ وَعَدْتَنِي أَنْ لاَ تُخْزِيَنِي يَوْمَ يُبْعَثُونَ ، فَأَي خِزْىٍ أَخْزَى مِنْ أَبِي الأَبْعَدِ ؟!
فَيَقُولُ اللَّهُ تَعَالَى : إِنِّي حَرَّمْتُ الْجَنَّةَ عَلَى الْكَافِرِينَ...."
والحديث ده في البخاري يا جماعة،
فمن كل الأدلة دي يظهر لنا إن آزر هو أبو إبراهيم عليه السلام وليس عمه زي ما في علماء ومشايخ بيقولوا،
فاحنا يا جماعة بناخد بالقول إللي عليه دليل من القرآن والسنة،
وفي التعليقات هتلاقوا رابط فيه تفصيل المسألة للي عايز يستزيد👇

المهم،
خرج إبراهيم من البيت وهو حزين إن أبوه مستجبش لعبادة الله وترك عبادة الأصنام،
لكنه مفكرش أبدا إنه يترك الدعوة، قال لما أكلم الناس يمكن حد فيهم يهتدي،
استخدم الأول برده أسلوب العقل والتفكير المنطقي عشان يقنعهم،
لما جاء الليل شاف نجم، فقال: ده ربي وأنا هعبده👌
"فَلَمَّا جَنَّ عَلَيْهِ اللَّيْلُ رَأَى كَوْكَبًا قَالَ هَذَا رَبِّي فَلَمَّا أَفَلَ قَالَ لَا أُحِبُّ الْآفِلِينَ"
فلما اختفى الكوكب قال الإله لازم يكون حاضر وميغبش،
فشاف القمر طالع فقال :
أيوااا هو ده إلهي 👌
"فَلَمَّا رَأَى الْقَمَرَ بَازِغًا قَالَ هَذَا رَبِّي فَلَمَّا أَفَلَ قَالَ لَئِنْ لَمْ يَهْدِنِي رَبِّي لَأَكُونَنَّ مِنَ الْقَوْمِ الضَّالِّينَ"

فلما إختفى القمر قال:
وبعدين بقى، أنا كده لو إللي خلقني مهدانيش لإلهي الحق إللي مفروض أعبده أنا هضل وهفضل في حيرة ومش هبقى عارف أعبد إيه 😞
فلما شاف الشمس بقى طالعة قال هو ده ربي ...ده أكبر
ومنور الدنيا وأعظم،
"فَلَمَّا رَأَى الشَّمْسَ بَازِغَةً قَالَ هَذَا رَبِّي هَذَا أَكْبَرُ"
فلما غابت الشمس هي كمان قال:
أنا بريء من الآلهة دي كلها، أنا هؤمن باللي خلق الشمس والقمر والنجوم فقط ومش هعبد معاه أي حاجة تانية😤
"فَلَمَّا أَفَلَتْ قَالَ يَاقَوْمِ إِنِّي بَرِيءٌ مِمَّا تُشْرِكُونَ"
"إِنِّي وَجَّهْتُ وَجْهِيَ لِلَّذِي فَطَرَ السَّمَوَاتِ وَالْأَرْضَ حَنِيفًا وَمَا أَنَا مِنَ الْمُشْرِكِينَ"

◇طبعا الغياب إللي بيقدح في الألوهية مش مقصود بيه إننا طالما مش شايفينه وغايب عن عينينا يبقى ده مش إله😀
لأ،
المقصود إنه بيغيب عن مكان معين عشان يظهر في مكان تاني وهكذا، وده كده عمره طبعا ما ينفع يبقى إله،
لأن الإله الحق يعلم كل شيء ولا يغيب أبدا👌

☆كل ده إبراهيم عليه السلام كان بيكلم نفسه قصاد قومه عشان يخليهم يفكروا ويقنعهم بطريقة غير مباشرة،
مش إن إبراهيم عليه السلام ك

ان بيعبد القمر والشمس والعياذ بالله وبعدين اهتدى😅

بعد كده بدأ يكلم قومه ويسألهم : إيه التماثيل إللي إنتم قاعدين عليها طول النهار دي، هم بيسمعوكم لما بتدعوا وتطلبوا منهم حاجة؟
هل بينفعوكم بشيء ؟
"إذ قَالَ لِأَبِيهِ وَقَوْمِهِ مَا هَذِهِ التَّمَاثِيلُ الَّتِي أَنْتُمْ لَهَا عَاكِفُون "

الطبيعي والمنطقي إنهم يجاوبوا ويقولوا يا أه يا لأ،
لكن دول قالوا :
إحنا لقينا آباءنا بيعبدوها فعبدناهم🤓
"قَالُوا وَجَدْنَا آبَاءنَا لَهَا عَابِدِينَ "
زي إللي بيقول إحنا لقينا الناس بتعمل فعملنا زيهم،
لقينا الناس بتلبس مقطع فلبسنا،
لقينا الناس بتشتم وبتقول ألفاظ بذيئة فبقينا نقول زيهم،
لقينا الناس بترمي الزبالة في الشارع فبقينا بنرمي إحنا كمان...
والحجة ما الناس كلها بتعمل كده👌

فقال لهم إبراهيم عليه السلام إنتم وآباؤكم غلط، آباؤكم ضلوا وإنتم كمان ضليتم لما مشيتوا وراهم وقلدتوهم😞
"قَالَ لَقَدْ كُنْتُمْ أَنْتُمْ وَآبَاؤُكُمْ فِي ضَلَالٍ مُبِينٍ "
اعبدوا الله ..هو إللي خلقكم ورزقكم وإللي إنتم بتعبدوهم دول لا يملكون أي شيء ينفع ولا يضر،

فقالوا له : إنت بتتكلم جد فعلا ولا بتألف وبتهزر🤨
"قَالُوا أَجِئْتَنَا بِالْحَقِّ أَمْ أَنْتَ مِنَ اللَّاعِبِينَ "
فقال لهم :
أنا بتكلم جد جدا طبعا!! ربكم إللي خلق السموات والأرض وخلق النجوم والكواكب إللي إنتم بتعبدوها👌
"قَالَ بَل رَبُّكُمْ رَبُّ السَّمَوَاتِ وَالْأَرْضِ الَّذِي فَطَرَهُنَّ وَأَنَا عَلَى ذَلِكُمْ مِنَ الشَّاهِدِينَ"

وأحلف لكم بالله أنا هوريكم هعمل إيه بالأصنام بتاعتكم دي وهتشوفوا إزاي إنها لا حول لها ولا قوة ولا قادرة حتى تمنع الضرر عن نفسها😤
"وَتَاللَّهِ لَأَكِيدَنَّ أَصْنَامَكُمْ بَعْدَ أَنْ تُوَلُّوا مُدْبِرِينَ"

وفعلا في يوم من الأيام كان عندهم زي عيد بيخرجوا فيه للصحراء، فانتهز إبراهيم عليه السلام الفرصة وقالهم أنا مريض ومش هقدر أروح معاكم،
"فَنَظَرَ نَظْرَةً فِي النُّجُومِ * فَقَالَ إِنِّي سَقِيمٌ فَتَوَلَّوْا عَنْهُ مُدْبِرِينَ"

وفعلا راح المعبد إللي فيه الآلهة المزعومة بتاعتهم ولقى قصادهم أصناف الأكل كلها وهي زي ماهي،
قال للأصنام باستهزاء: إنتم مش هتاكلوا😒
إيه مش بتنطقوا ليه😏
"فَرَاغَ إِلَى آلِهَتِهِمْ فَقَالَ أَلَا تَأْكُلُونَ * مَا لَكُمْ لَا تَنْطِقُونَ"

فراح نازل عليهم تكسير بالفأس لحد ما كسرهم كلهم ما عدا واحد بس وكان أكبر واحد فيهم حجما،
"فَرَاغَ عَلَيْهِمْ ضَرْبًا بِالْيَمِينِ"
علق الفأس على رقبته وسابه ومشي، رجع الناس شافوا التماثيل متكسرة 😳
"فَجَعَلَهُمْ جُذَاذًا إِلَّا كَبِيرًا لَهُمْ لَعَلَّهُمْ إِلَيْهِ يَرْجِعُونَ "

قالوا مين الظالم إللي عمل كده في آلهتنا😱
فناس منهم قالوا إحنا سمعنا واحد بيهدد الآلهة بتاعتنا اسمه إبراهيم🤔
"قَالُوا مَن فَعَلَ هَذَا بِآلِهَتِنَا إِنَّهُ لَمِنَ الظَّالِمِينَ * قَالُوا سَمِعْنَا فَتًى يَذْكُرُهُمْ يُقَالُ لَهُ إِبْرَاهِيمُ "

فقالوا هاتوه 😡 قصاد الناس كلهم عشان نشوف حكايته إيه وعمل كده ليه😤
"قَالُوا فَأْتُوا بِهِ عَلَى أَعْيُنِ النَّاسِ لَعَلَّهُمْ يَشْهَدُونَ"
وهو ده بالضبط إللي كان عايزه إبراهيم عليه السلام😈

ياترى إيه الحوار إللي هيحصل بين إبراهيم عليه السلام وقومه؟
وهل هيؤمنوا في الآخر ولا هيستكبروا زي الأقوام إللي سبقوهم؟
ده إللي هنعرفه في الجزء الجاي إن شاء الله.

☆ملحوظة:
أي حد عايز يأخذ القصص وينشرها يتفضل أنا معنديش مانع نهائي😊



#Eman_Shalapy